Tusi Tausaga 2011
PAEONIA TALAVOU.
O Peresi, o se teineitiiti e nofo i Cameroon i Aferika, ma na avea ma tagata talaʻi e leʻi papatisoina i le ono o ona tausaga. I lana lipoti muamua, na tusi ai suʻesuʻega faale-Tusi Paia e sefulu. Na manatu le failautusi a le faapotopotoga e sesē, o lea na fesili atu ai iā Peresi, ae tali mai e saʻo e sefulu ana suʻesuʻega. Na toe fesili atu: “E faapefea ona e iloa le tele o itula e tusi i lau lipoti ae e leai sau uati?” Na faapea mai Peresi, e itula le umi o le mālōlōga, ma e talaʻi i lenā taimi atoa. O le mātauina o lona lototele e talaʻi, na iʻu ai ina avea lona tinā ma lona tauusoga ma tagata talaʻi e leʻi papatisoina. Ua papatiso Peresi, ma ua sefulu nei ona tausaga, ma o loo paeonia lagolago a o aʻoga pea. Ua avea foʻi lana uō o Ana e valu tausaga ma tagata talaʻi e leʻi papatisoina. Na taʻua e se tagata fiafia: “Ou te fiafia lava e vaaia i sauniga a o leʻi ō tamaiti e nonofo ma o latou mātua, e latou te faafeiloaʻi muamua tagata uma, aemaise ē e matutua. E lē vaaia lava lea mea i laʻu lotu. Ou te iloa o tamaiti ua aʻoaʻoina faapea, o le a avea ma tagata matutua e sili ona lelei.”
PAPATISO I LE FITU TAUSAGA.
O Paola o se teineitiiti e nofo i Mekisikō i sisifo, ma o loo tausia e mātua o lona tinā. I le lima o ona tausaga, na amata ai ona suʻesuʻe le tinā o lona tinā ma Molimau a Ieova. Ona e masani ona faalogologo i le suʻesuʻega, na matuā fiafia ai o ia i le upu moni. E ui lava e leʻi toe faaauauina suʻesuʻega a le tinā o lona tinā, ae na amata ona alu Paola i sauniga e na o ia. E fesili atu o ia i mātua o lona tinā ina ia fesoasoani i le faiga o lona ofu, ma fesoasoani e kolosi le auala e agaʻi atu i le Maota mo Sauniga.
Ina ua iloa e Paola faitau ma tusitusi, na tusi loa lona igoa i le Aʻoga o le Faiva Faatiokarate ma avea o se tagata talaʻi. O lona alofa mo Ieova na papatiso ai ina ua fitu ona tausaga. Ina ua fesiligia i le māfuaaga e auai ai i sauniga ma toʻaga e talaʻi e ui ina lē lagolago mai lona aiga, ae tali mai Paola o lē ua sefulu nei ona tausaga: “Ou te fiafia i lauga ona e faalaeiauina ai aʻu e suʻesuʻe pea le Tusi Paia ma aua neʻi faia mea sesē. Ou te talaʻi ona ou te manaʻo e aʻoaʻo tagata i mea o le a faia e Ieova mo i latou i le lumanaʻi, ma e mafai e le Tusi Paia ona faafiafia i latou i le taimi nei.”