Tala o Mea na Tutupu Mai i le Tusi Tausaga 2011

AMERIKA

Itulau 59, palakalafa 1-2

MOLIMAU ATU I TAGATA E TELEFONI SESĒ MAI.

I le Dominican Republic, na faalavelave soo mai ai i galuega a se tuafafine ni tagata e sesē mai a latou telefoni. Ina ua mavae ni nai aso, sa manatu loa o ia, ‘E mafai ona ou faaaogā le avanoa lea e talaʻi atu ai.’ Na faapefea ona ia faia lenei mea? A telefoni mai se tagata, ona ia faamalie atu lea o loo sesē mai lana telefoni, ma toe faapea atu, “Ia avea ia le avanoa lenei ou te fesili atu ai, Pe na e faitauina le Tusi Paia i le asō?” E ui e iai nisi e toe tuu i lalo le telefoni, ae e fai lava foʻi sina toʻatele o i latou e tali mai e leai, e latou te leʻi faitauina le Tusi Paia. Ona ia fesili atu lea, “Pe e te iloa le māfuaaga e tāua tele ai ona faitau le Tusi Paia?” Ina ia avatu se tali faale-Tusi Paia, e na te faitauina atu le Salamo 1:​1-3. O se tasi o alii ofisa o le malo, na umi se taimi na talanoa ai ma le tuafafine ma na ia faapea mai e leai sana Tusi Paia. Sa fai ni fuafuaga ina ia avatu i ai sana Tusi Paia ma ni lomiga faale-Tusi Paia. E lua vaiaso mulimuli ane, ae telefoni mai le tamāloa ma faafetai mai i le tuafafine mo lona naunau faapea lomiga na avatu.

O le tasi foʻi taimi na sesē mai ai le telefoni, na fesili mai ai se tamaʻitaʻi talavou, “O oe o se Molimau a Ieova?” Ina ua tali atu le tuafafine ioe, na amata loa ona tagi le tamaʻitaʻi ma faapea mai o ia o sē ua lē o toe talaʻi. Na faalaeiau atu loa i ai le tuafafine ma fai se fuafuaga mo se tasi e fesoasoani atu i ai faaleagaga. O lea ua amata nei ona toe talaʻi lea tamaʻitaʻi.

OCEANIA

Itulau 70, palakalafa 7

FAAAUUPEGAINA I SĀVALI.

O Natano e 12 ona tausaga, e nofo i Ausetalia. E masani lava ona alu ma ave ni sāvali faale-Tusi Paia i lana ato aʻoga, ma e masani ona molimau atu i ana uō i le aʻoga. I se tasi aso, a o savali atu i lo latou fale mai i le aʻoga, na ia vaaia ai se tinā matua o loo tūtū i lumāfale o lona fale. Na ataata mai le tinā, ona ataata atu foʻi lea o Natano i ai, ma tuu atu i ai se tasi o ana sāvali. Ona faamatala mai lea e le tinā iā Natano ua tolu tausaga talu ona maliu si ana tane. Ona tago lea o Natano i lana ato ma toso aʻe le sāvali O le ā le Faamoemoe mo Ē Pele ua Maliliu? Na tagi le tinā a o faamatala atu e Natano le toetū o loo fotuaʻi mai, lea o le a mafai ai ona ia toe vaai i lana tane i le Parataiso. Na fesili mai le tinā, “Ae o afea e muta ai puapuaga?” Na toe tago ifo Natano i le isi sāvali, Ua Toeitiiti Mou Atu Puapuaga! Ona toe fesili mai lea o le tinā iā Natano po o ā isi mea e talitonu i ai. Na tuu atu e Natano i le tinā se isi sāvali mai i lana ato, O Ā Mea e Talitonu i ai Molimau a Ieova? Ina ua uma, ona alu lea o Natano. I ni vaiaso mulimuli ane, na toe vaaia ai e Natano le fafine i lumāfale o lona fale. Sa valaau atu le fafine iā Natano e sau, ma tago atu fusi mai o ia. Na faapea atu le fafine, “E te iloa oe Natano? Ina ua uma ona e tuu mai iā te aʻu na sāvali, e toʻalua ni fafine Molimau a Ieova na ō mai iā te aʻu, ma o lea ua amata laʻu suʻesuʻega faale-Tusi Paia ma i laʻua!”