Faaaogā le Tamaʻitusi Se Faatomuaga o le Afioga a le Atua, e Amata ai se Talanoaga
1. O le ā le meafaigaluega fou ua tatou maua mo le talaʻiga?
1 Ua iai nei se tamaʻitusi e taʻua Se Faatomuaga o le Afioga a le Atua, e aogā mo la tatou faiva. E faapefea ona faaaogā lenei meafaigaluega fou, e sauniuni ai a tatou taulimaga mo le talaʻiga? Talu ai ua faatulaga mau i lalo o so o se mataupu faale-Tusi Paia, e pei foʻi o le tusi Reasoning, o lea e faigofie la ona faaaogā e amata ai ni talanoaga.
2. E faapefea ona tatou faaaogā i le talaʻiga le tamaʻitusi Se Faatomuaga o le Afioga a le Atua?
2 E te ono faaaogā le fesili e 8 ma faapea atu: “O loo matou asiasi i aiga ona e toʻatele tagata o loo taumānatu i le fesili lenei, ʻPe e tuuaʻia le Atua ona o mafatiaga o tagata?’ [I nisi vaipanoa, e sili atu ona lelei pe a faaali i le tagata le fesili.] O le ā sou manatu? [Faatali mo se tali.] O loo maua i le Tusi Paia se tali faamalieloto o lenei fesili.” Faitau saʻo mai i le Tusi Paia ia mau ma talanoaina. Pe a fiafia le tagata, e te ono faaali atu i ai le lisi o fesili e 20, ma fai i ai e filifili mai se fesili lua te talanoa i ai i le isi asiasiga. Pe e ofo i ai se tasi o lomiga mo suʻesuʻega, lea e talanoa atili ai le mataupu na lua talanoaina.
3. E faapefea ona tatou faaaogā le tamaʻitusi Se Faatomuaga o le Afioga a le Atua, e amata ai ni talanoaga i se oganuu e iai tagata e lē o ni Kerisiano?
3 O le fesili e 4 ma le 13 e oo i le 17, e aogā tele pe a talaʻi i oganuu e iai tagata e lē o ni Kerisiano. O se faaaʻoaʻoga, e te ono faaaogā le fesili e 17 ma faapea atu: “O loo matou asiasi i aiga ma fesili i ai i lenei mataupu. Pe e te ioe e tele luʻi ua fesagaʻia e aiga i aso nei? [Faatali mo se tali.] E toʻatele ulugalii e ioe i le atamai o upu nei: “O le avā, ia matuā faaaloalo o ia i lana tane.” [E lē manaʻomia ona e taʻua o nei upu e mai i le Efeso 5:33. Afai o loo e talanoa i se fafine, e te ono taʻua upu o loo i le Efeso 5:28.] Pe e te manatu e aogā nei fautuaga i se faaipoipoga?”
4. O le ā e te ono faia i le faaiʻuga o le lua talanoaga ma se tasi e lē o se Kerisiano?
4 Pe a māeʻa le talanoaga, ia fai se fuafuaga e toe sosoo le lua talanoaga i se isi taimi. Atonu e te fuafua e faaaogā isi mau mai i le fesili lava lea na lua talanoaina. I se taimi talafeagai, ia faailoa i le tagata o manatu aogā ia na lua talanoaina e mai i le Tusi Paia. Ofo se lomiga e te iloa e ono fiafia i ai o ia, e fua i le lua talanoaga ua mavae ma le manatu o le tagata i le Tusi Paia.—Tagaʻi i le faaopoopoga o La Tatou Faiva o le Malo o Tesema 2013.