Le Manatu o Tagata e Faatatau i le Tatalo
“Pe a ou tatalo, ou te lagona o loo faatasi mai le Atua, o loo ia uuina loʻu lima ma taʻitaʻiina aʻu pe a ou lē iloa le mea a fai.”—MARÍA.
“Na maliu laʻu avā ina ua mavae le 13 tausaga o feagai ma le kanesa. Ou te manatua na ou tatalo i le Atua i aso uma ma ou lagona na ia faafofoga mai iā te aʻu, ma silafia oʻu tigā. Na ou lagona ai foʻi le toʻafilemu.”—RAÚL.
“O le tatalo o se meaalofa matagofie a le Atua mo tagata.”—ARNE.
I le manatu o María, Raúl, Arne ma le toʻatele, o le tatalo o se meaalofa faapitoa. Latou te manatu e ala i le tatalo, e mafai ai ona talanoa i le Atua, faafetai iā te ia ma saʻili lana fesoasoani. Latou te talitonu atoatoa i le faamautinoaga o loo i le Tusi Paia e faatatau i le tatalo i le Atua: “O le mea lenei ua tatou mautinoa ai i le Atua, po o ā lava mea e tatou te talosaga atu ai e tusa ma lona finagalo, e faafofoga mai lava o ia iā i tatou.”—1 Ioane 5:14.
Peitaʻi, o le toʻatele e lē talitonu i faamatalaga a le Tusi Paia e faatatau i le tatalo. Na faamatala e Steve lona manatu e faatatau i le tatalo. “Ina ua 17 oʻu tausaga, e toʻatolu aʻu uō na maliliu i ni faalavelave faafuaseʻi. E toʻatasi na maliu i se faalavelave tau taavale, ae e toʻalua na malelemo i le sami.” O le ā na faia e Steve? Na ia faapea mai, “Na ou tatalo i le Atua pe aiseā na tutupu ai nei mea, ae e leai se tali. O lea na ou fesili ifo, aiseā e tatalo ai fua?” O le toʻatele ua manatu e lē o taliina a latou tatalo ma ua taumānatu ai po o le a le aogā o le tatalo pea.
E iai foʻi isi māfuaaga ua fesiligia ai e le toʻatele le tāua o le tatalo. O nisi ua manatu, ona ua silafia e le Atua mea uma, ua ia silafia la o tatou manaʻoga ma faafitauli ma e lē manaʻomia ona taʻu atu na mea iā te ia.
O isi e talitonu e lē fia faafofoga le Atua i a latou tatalo ona o mea sesē na latou faia i taimi ua teʻa. Ua faapea mai Jenny, “O le faafitauli telē a, ou te manatu e leai soʻu aogā. Na ou faia mea na ou toe salamō mulimuli ane ai, ma na ou manatu e lē tatau ona faafofoga mai le Atua.”
O le ā sou manatu e faatatau i le tatalo? Afai e tutusa ou manatu ma manatu o loo taʻua i luga, e mafai ona faamāfanafanaina oe i le iloaina o loo i le Tusi Paia ni tali faamalieloto. E mafai ona tatou maufaatuatuaina le manatu o le Tusi Paia e faatatau i le tataloa, ma e fesoasoani iā te oe e maua tali o fesili nei:
Po o faafofoga le Atua i a tatou tatalo?
Aiseā e na te lē talia ai nisi tatalo?
O le ā le auala e te tatalo ai ina ia faafofogaina ai lau tatalo?
E faapefea ona fesoasoani le tatalo iā te oe?
a O loo i le Tusi Paia tatalo a le toʻatele o auauna a le Atua, e aofia ai tatalo a Iesu Keriso. E silia i le 150 tatalo o loo i Tusitusiga Paia Eperu lea e masani ona taʻua o le Feagaiga Tuai.