Na Ausia e Hulda Lona Sini

I INITONESIA i le tamaʻi motu o Sangir Besar, e nonofo ai nisi o tatou tuafāfine se toʻatolu. E iloa i latou e tagata o le motu o ni tagata talaʻi, ma fesoasoani i tagata e malamalama i le Tusi Paia. Peitaʻi, i ni nai tausaga talu ai e ese le galuega na faia e nei tuafāfine i le matafaga.

Muamua, e latou te ō i le sami e laʻu mai ai maa lapopoʻa i le matafaga. O nisi o nei maa e tetelē e pei o ni polo soka. Pe a uma ona laʻu mai maa, ona saofafaʻi lea o nei tuafāfine i ni tamaʻi nofoa laupapa, ma faaaogā samala e tuʻininii ai nei maa. Pe a uma lenā, ona latou tuu lea o na maa ninii i le pakete ona ō lea ma ave i o latou fale. Pe a latou taunuu, ona tuu lea o na maa i ni taga lapopoʻa e faatali loli e ave ai e faaaogā e fai ai auala.

O se tasi o nei tuafāfine o Hulda. Ona o lona tulaga na ia faaaluina ai le tele o le taimi e faia ai lenei galuega nai lo o isi tuafāfine. Na masani ona ia faaaogā uma tupe na maua mai i lenā galuega e tausia ai lona aiga. Peitaʻi, e iai se isi mea na manaʻo e faaaogā ai le isi vaegātupe. Na manaʻo e faatau se tablet ina ia mafai ona ia maua ai le JW Library^®. Na iloa e Hulda o le a faaleleia ona tomai i le faiva ma lona malamalamaga i le Tusi Paia, pe a ia maua vitiō ma isi vaega o le JW Library^®.

O lea, mo le tasi ma le ʻafa masina, na galue ai Hulda mo le lua itula faaopoopo i taeao taʻitasi i le tuʻininii o maa. I se fua faatatau, pe a tuufaatasi uma maa na ia tuʻininii e mafai ona tumu ai se loli laʻitiiti. O le iʻuga, na lava lelei le tupe e faatau ai lana tablet.

Na faapea mai Hulda, “E ui ina ou matuā lē lavā, tigā ma gāoi loʻu tino ona o le tuʻiina o maa, ae na pei e fofoʻe ese atu na tigā ina ua faaaogā laʻu tablet fou e faaleleia ai oʻu tomai i le faiva, ma faigofie ai ona sauniuni aʻu mea mo le sauniga.” Na ia taʻua foʻi na matuā aogā lana tablet i le taimi o le faamaʻi, e fesootaʻi ai pea ma le faapotopotoga mo sauniga ma talaʻiga. E tatou te fiafia foʻi ona ua ausia e Hulda lona sini.