Mea na Tutupu

Ia Alofa Mutimutivale i Tagata Uma

I se tasi aso, na matamata ai se tuafafine mai i Niu Sila i se vitiō i le jw.org o loo taʻua ai, e lē gata e lagona e Ieova le alofa mutimutivale ae e na te faaalia foʻi. (Isa. 63:​7-9) Na ia filifili ai loa e saʻili avanoa e fesoasoani ai i isi. A o faia sana faatau i lenā lava aso, na ia feiloaʻi ai i se fafine e leai se mea e nofo ai, ma manaʻo ai e faatau se meaʻai mo lenei fafine. Na talia e lenā fafine. Ina ua sau le tuafafine ma le meaʻai, na ia molimau puupuu i le fafine e faaaogā ai le sāvali Po o le a Faaiʻuina ea Mafatiaga?

Na tagi le fafine ma faapea mai sa ola aʻe i se aiga Molimau a Ieova, ae ua leva ona ia tuua le upu moni. Ae talu ai nei sa ia tatalo i le fesoasoani a Ieova ina ia toe foʻi mai ai. Na tuu e le tuafafine le Tusi Paia i le fafine ma faia le fuafuaga mo sana suʻesuʻega.a

E tatou te faaaʻoaʻo i le alofa mutimutivale o Ieova i tagata, e aofia ai o tatou tauaiga faapea uso ma tuafāfine i le faapotopotoga. E mafai foʻi ona tatou faaalia lea uiga e ala i le saʻili o avanoa e molimau atu ai i isi.