Djawo djɛnde djingelaka l’ohemba

Abrahama alakanyɛki wɔnande Isaka djɛ nkɔpa Yehova la ndawɛkɛ t’alaka wande ankfumɔ. Koko, winá wɔ Isaka ndayalaka l’ɛnɔnyi 25, Yehova alɔmbaka Abrahama djɛ nangha nkambo mɔtshi djalaki wolo efula nangha. Nkambo djɛkɔnge?

Ndjambe ashimelaka Abrahama ante: ‘Lambɔkɔwɔnda, ɔsa itɔyi yɛ wɔnako ndeke ondambolende ete ngo olambo wɔ lotshumba l’onkókó ɔmɔtshi wɔ l’owila wɔ Mɔriya.’ Abrahama atewá lamo Yehova ndɔlɔmbɛ djɛ nde nangha nkambo ntshɔ. Koko, nde alɛmɛyɛka.

Lofu lɔwɔlamisá, la nkɛsɛ winá, Abrahama ɔsaka Isaka l’enkambi wɛnde epe ko watshɔka tá Mɔriya. M’ɔkɔngɔ wɔ mfu isato, watateyɛka ntangela enkókó wɛ l’eteyi. Abrahama ashimelaka enkambi wɛnde dj’iwɔ ndaakonga winá wɔ ndombotshɔ nya Isaka djɛ ntolambola olambo. Abrahama apɛyɛka Isaka ɔwɔmbɔ wɔ nkonyi djɛ mbɛmba ko nde nyɔmɛlɛ akotaka lokfula. Isaka opolaka isɛkɛnde ante: ‘Iya nyama k’isotatshu ntolambola ketikɔ?’ Abrahama akadjimolaka ante: ‘Yolo, Yehova angɔtɔpɛyɛ.’

Winá wɔ yakome l’onkókó wɔkɔ, iwɔ wananghaka etshumbelo. Masɔ, Abrahama akowaka Isaka ɛkɔdji l’ɛwɔ la l’ekolo ko owetshɛka l’etshumbelo.

Abrahama ɔsaka lokfula. Mbala kɛkɔ kɛmɔ, ondjelo wɔ Yehova awélaka m’olongo ante: ‘Abrahama! Tonanghelake wɔna nyɛtshi! Winá wɔnɛ lambewa ente olekɔ la djawo le Ndjambe, ladjikɛnde ombawola ndambola wɔnako.’ Masɔ, Abrahama ɛnaka ɔnkɔkɔ wɔ wome wombodjingama aseke l’etshiko. Nde atshungolaka Isaka ɛkɔdji lankeke ole alambolaka ɔnkɔkɔ wɔsɔ l’edjena kɛnde.

Ngo má lofu lɔsɔ, Yehova awangaka ndjeta Abrahama ante ilongo yɛnde. Ewa ladjikɛnge? Abrahama anaghaki kenkfumɔ kɛ Yehova ndɔlɔmbaka, kaanga ntsha apewe lamo Yehova ndɔmbɔlɔmba nkambo djɛkɔ.

Yehova avungolaka lonkina daka djɛ ndalake Abrahama ante: ‘Lemi langokosakola, edjinge langofudjɛ wana wako kana tonkanola tɔko.’ Kɛsɔ nsakisolaka djɛ Yehova angosakola anto ankfumɔ wa wɔlɔ má lotshimbo lɔ nkfumbo kɛ Abrahama.