Nsese djɛ lá Ndjale kɛ Nkola nkola

Ngo winá wɔ Farawɔ ndoke ante ase Isariyɛlɛ wamboposa má Edjipito, nde atshikitanyɛka ikanyi yɛnde yɛ ndatshika dj’iwɔ ntshɔ. Ashimelaka ananyi mbandji yɛnde ante: ‘Nyotshumanyɛ apusupusu yɛmi yɛ mbandji, ndeke nyontshɔ taakilike! Totasambaka ndaatshika dj’iwɔ ntshɔ.’ Nde nya ampame yɛnde wawangaka nkilika ase Isariyɛlɛ.

Yehova atalɔndjɛki anto wande má nkamba lá nkondji djɛ bonde la mbile edjinge la nkondji dj’iyɛ l’otsho. Nde aahetshɛka má Ndjale kɛ Nkola nkola ko ashimelaka dj’iwɔ mpika ká kɛwɔ l’eteyi.

Ko ase Isariyɛlɛ watangelaka Farawɔ nya angala wande walaakilika. Iwɔ wakfungaka l’antenyɛ ndjale la angala w’ase Edjipito. Ase Isariyɛlɛ waleelaka Mɔsɛ ambɔ: ‘Tɔkɔpa mvɔ! Otatotshika ngo l’Edjipito.’ Ko Mɔsɛ atepelaka ante: ‘Nyotokake wɔma. Nyokonge edjinge nyolende wopo wɔ Yehova ɔkɔpande ntowikɛ.’ Mɔsɛ alawɛkɛki nsɔsɔlɔ le Yehova, ape nghɔsɔ?

Yehova ashimelaka ase Isariyɛlɛ dj’iwɔ nyima má ká. L’otsho wɔsɔ, Yehova asɛkɔlaka nkondji djɛ bonde ko ilaka l’antenyɛ ase Edjipito l’ase Isariyɛlɛ. Lá djeke dj’ase Edjipito, widjima pitshii. Koko, lá djeke dj’ase Isariyɛlɛ, osase woyalaki.

Yehova ashimelaka Mɔsɛ djɛ nde nsembola lɔwɔ lɔnde lá djiko djɛ ndjale. Ko Yehova atomaka lompopo lɔ wolo otsho w’otondo. Ndjale kekapwanaka l’ape, ko ketshikaka ontayimbo l’anteyi. Miliyɔ y’ase Isariyɛlɛ wakɛndaka lá looko lombomá, l’antenyɛ́ mpele djɛ washi, djɛ ndjopa tá wedji onkina.

Angala wa Farawɔ wakilikaka ase Isariyɛlɛ lá looko lombomá. Ko Yehova ilaka angala wakɔ l’ovungusano. Ekato w’apusupusu yɛwɔ wetateyɛka ndjongɔ. Angala watɔka tɛɛndjɛ ambɔ: ‘Nyontshɔ tolote manɛ! Yehova aananela.’

Yehova ashimelaka Mɔsɛ ante: ‘Sembola lɔwɔ lɔko tá djiko djɛ ndjale.’ Mbala kɛkɔ kɛmɔ, mpele djɛ washi vukumelaka angala w’ase Edjipito. Farawɔ nya angala wande ankfumɔ wavɔka. Lako kaanga onto ɔmɔ wowikisá.

L’onkoko onkina wɔ ndjale, oloyi w’ekekete w’anto walumɛki Ndjambe lá yeembo ambɔ: ‘Nyotshumbele Yehova, mande nde ambila otshumba wɔ lomo. Nde ambodjindjɛ ampunda la andjapemi yɛwɔ lá ndjale.’ Winá wɔ yatshumbaka, amato waminaki ole wapomaki anghɔmɔ. Anto ankfumɔ wayalaki l’osasa ambɔ winá wɔsɔ, wambotshungɔ nsɔsɔlɔ.