Mpele djɛ Jerusalɛmɛ

Nyontshɔ tokokawoyɛ wiso tá ɛnɔnyi wemboheta. Nɛhɛmiya, onkambi wɔ Nkfumi Aratazɛrɛsɛ, ndayalaka nde ose Isariyɛlɛ wowikaki lá Shushana, ngando kɛ Pɛrɛsiya. Wɔnanyɔ ɔmɔtshi wɔ Nɛhɛmiya ayɛka má Juda la losango lɔ nyɛtshi lɔnɛ: ‘Anto wakalisá má Jerusalɛmɛ wapalekɔ kankina lá vu. Mpele la nkfuke yɛ ngando yɛ ase Babilɔnɛ yatshite italɔngɔswamá.’ Oloko wɔ Nɛhɛmiya wodjikaka. Nde akɔpaka ntshɔ tá Jerusalɛmɛ djɛ ntokotshɛ́, ko alɔmbaka Ndjambe djɛ nkfumi ndotshika djɛ nde ntshɔ.

M’ɔkɔngɔ, nkfumi ɛnaka djɛ Nɛhɛmiya ayalaka la yɛnyi. Nde oshimelaka ante: ‘Ntakɛnaká ntondo nghɔnɛ. Kemboposá nge?’ Nɛhɛmiya okadjimolaka ante: ‘Mopayale la yɛnyi ngete mo, winá wɔ Jerusalɛmɛ, ngando kɛmi kembokoma ngo boko toko?’ Nkfumi okadjimolaka ante: ‘Ɔkɔpɛ nkonanghele nge?’ Mbala kɛkɔ kɛmɔ, Nɛhɛmiya ananghaka lɔlɔmbɔ lɔ limimi. Masɔ atepelaka ante: ‘Lambɔkɔwɔnda, ontshike ntshu tá Jerusalɛmɛ, ntopike mpele djɛkɔ lonkina.’ Nkfumi Aratazɛrɛsɛ ashimelaka Nɛhɛmiya ante okoka ntshɔ, edjinge nde ɔsaka nonghanyi dj’ipa mbalaka nkomela Nɛhɛmiya lá lɔkɛndɔ lɔnde l’otale. Lonkina, nde ilaka Nɛhɛmiya guvɛrnɛrɛ djɛ Juda edjinge ɔpɛyɛka awaya wa nangha nkfuke yɛ ngando.

Winá wɔ Nɛhɛmiya ndakome lá Jerusalɛmɛ, nde ashishimaka mpele djɛ ngando. Ko atshumanyɛka ankfundji la ewandji ko aashimelaka ante: ‘Ɔnɛ alekɔ nkambo djɛ yɛnyi efula. Iso ladjɛ nkamba olemo.’ Anto wawolaka ko wawangaka nkalɔ mpika mpele.

Koko antonyi amɔtshi w’ase Isariyɛlɛ waasɔkaki, la watepelaki ambɔ: ‘Ɔkɛngi nkoka mvuta mpele djɛ nyotaapike.’ Anto wakambaki olemo watilaki yimba lá atoyi wasɔ edjinge wakindjɛka mpika. Epele kétahandaki ngo mpanda la ketetelaki nkemba.

Antonyi wɔsaka nkano djɛ ndjɛ má ndjena la ndjena djɛ ndonanyɛ Jerusalɛmɛ l’isasimoyɛ. Winá wɔ ase Juda yoke nkfuko kɛwɔ, wokaka wɔma lako wopo. Koko Nɛhɛmiya atepelaka ante: ‘Nyotokake wɔma. Yehova alekɔ esanga laso.’ Nde apodjɛka alami djɛ namaka anto wapikaki, ko antonyi watákoká ndaananyɛ.

L’ilá kɛ etsho 52 toko, mpele la nkfuke ishilaka. Nɛhɛmiya ayakalaka ase Lewi lá Jerusalɛmɛ djɛ ndonangha fɛtɛ k’odjipwelo. Nde aalonghanyɛka lá eloyi epe wɛ endjombe. Wahandaka lá mpele má wa ɛskaliye iyalaki lá Wiso w’Ɛtɛkɔ ko masɔ oloyi l’oloyi watshɔka wanɛ t’onkoko wɔnɛ, wanyi t’onkoko onkina wɔ ngando. Watafulaki aseke, ambɔlɔ, ngɔmbi edjinge wataatshumbelaki Yehova. Ɛzɛra atshɔka la oloyi ɔmɔtshi, ko Nɛhɛmiya nya oloyi onkina, tii iwɔ ntopomana lá tɛmpɛlɔ. Anto ankfumɔ, ampame, amato, la dɛngɛngɛ, walambolaka Yehova elambo ole wananghaka fɛtɛ. Eyoko wɛwɔ w’osasa wokɛki otale efula.