Yeso ambosadjɛ onto lofu lɔ Saba

Afarisɛ watonaki Yeso efula la wahonaki ngo elonga kɛ ndoovunda. Iwɔ watepelaki ambɔ nde apakoke nsadjɛ onto lofu lɔ Saba. Koko lofu lɔmɔtshi lɔ Saba, Yeso ɛnaka mpame kɛmɔtshi kembowodjɛ wiso alɔmba nkete l’ontayimbo. Nde ashimelaka ambeki wande ante: ‘Nyolende wopo wɔ nkfulu kɛ Ndjambe ɔkɔpawɔ nkotshɛ́ mpame kɛnɛ.’ Yeso asɔpaka nkɛtɛ la ansɔnyi wande, ko masɔ akfutaka mpame kɛkɔ lá wiso. Yeso oshimelaka ante: ‘Ntshɔka tokosole wiso l’odjiya wɔ Silɔamɛ.’ Mpame kɛkɔ atosolaka wiso, ko ɛnaka mbala kɛ ntondo lá lowiko lɔnde.

Anto w’ɛnisá wakamɔka efula. Watepelaka ambɔ: ‘Ɔnɛ nde mpame kintasɛki lanɛ la kɛlɔmbaki nkete kɛnɛ, ndokoko onto ɔmɔtshi ndeke lɔfɛna lande?’ Mpame kɛkɔ akadjimolaka ante: ‘Lemi nde kanga lowodjisá wiso ngo má mawotshɔ!’ Anto wowopolaka ambɔ: ‘Ya ko nghɔmbɛna ngete mo?’ Winá wɔ ndaashimela wopo wɔ ndɛnyi, wɔɔtɔlaka te Afarisɛ.

Mpame kɛkɔ akɔndɔlaka Afarisɛ ante: ‘Yeso ambonkfutaka nkɛtɛ imbɔsɔpama lá wiso ko masɔ ambonshimelaka djɛ lemi ntosola wiso. Lambotosolaka, ko winá wɔsɔ lambotateyɛ nyɛna.’ Afarisɛ watepelaka ambɔ: ‘Ntsha Yeso ambosadjɛ onto lofu lɔ Saba, mbɔ nkfulu kɛnde ape me Ndjambe.’ Koko ankina watepelaka ambɔ: ‘Ntsha nkfulu kɛnde ape me Ndjambe, ntshimi atasamba ndjala l’akoka wa ndoosadjɛ.’

Afarisɛ wetaka ambotshi wa mpame kɛkɔ ko wawopolaka ambɔ: ‘Wopo wɔkɔnge wɔnanyo ndombotateyɛ nyɛna?’ Ambotshi wa mpame kɛkɔ wokaka wɔma mande Afarisɛ watepelaka ambɔ onto onkfumɔ wongoyalá la djawo te Yeso angokilikama má sinagɔgɛ. Djɛko ndeke watepelaka ambɔ: ‘Iso topewe. Nyowopole nyɔmɛlɛ.’ Afarisɛ wawangaka ndjopola mpame kɛkɔ weepó efula, ko ndombaashimela ante: ‘Lambonyoshimela akambo ankfumɔ wewami. Lamo okindjɛnyo ndjopola weepó?’ Afarisɛ womalaka ko wɔɔhɔnyɔlaka tá bandja.

Yeso atshɔka ntɛnana nya mpame kɛkɔ ko owopolaka ante: ‘Wɛ olekɔ la djawo le Mesiya?’ Mpame kɛkɔ oshimelaka ante: ‘Langoyala la djawo tende ntsha lambowewa.’ Yeso oshimelaka ante: ‘Lemi ndeke Mesiya.’ Ape Yeso ayalaki oloko wɔlɔ efula? Atowikɛ ngo ndoowikɛ toko koko lonkina, ookotshɛ́ka djɛ nde ndjala la djawo.