Wopo ɔkɔ nke we ndjaalonghanyɛ wɔlɔ ta nsanghanyɛ?

Nde wekake Bible la Temwe ke Yehova ɛmɔtshi, okaniso wolendake ntondo akambo wanɛ enyo la dje ndjeka. Elekɔ wɔlɔ dje wɛ nangha ngo wopo ɔkɔ lá ntondo ke ntshɔ ta losanghanyɛ l’otshumano, gkambo engokokotshɛ dje we ndjoka wekelo wɔlɔ. Nde omboyala la nsawo ke nanghaká nghɔsɔ mbala la mbala, onghɛna lɔɔla le wɔlɔ efula.

Soná wíná l’etena ke ndjeka. Wíná ɔkɔ nke oyalake vu dje nkanela wɔlɔ? Nkɛsɛnkɛsɛ lá ntondo ke mbanga olemo ndo l’otsho nde wana wambetama? Ngo kondo nde opangokoka ndjeka iláá efula, soná wíná enga we okoke ndjetshɛ lá wekelo, ko totshikake ekete ɛmɔtshi epite djoyi gkɔ. Oná etena ke vu, la dje mbangoyɛ ekete enkfumɔ kena koka nkeetsheyɛ wíná, djimá radio, televizio la telefone. Lɔmbá Ndjambe lá ntondo ke wɛ ndjeka; angokokotshɛ dje wɛ nyimiɛ esamano we mbile ko ndjaapɛyɛ l’Otepela we Ndjambe.​—Filipɛ 4:6, 7.

Ilá tolembetelo lá djambá dje weke, la yalonghanyɛ dje ntshɔ totepela. Kowanga ntondontondo la nyona ikanyi ye djambá gkɔ lá yombasɛ. Tɔnɔlá dje ɔtɛ we djoyi we djambá gkɔ kondo we shapitre ɛkɔ, lendá wopo ɔkɔ nke itɛ ye djoyi imimɔ yokanawɔ l’ikanyi y’ingoondo ye djambá, la lenda asango la wepó we mbopola akambo wɛnɛ wɛnyɛ́ tokanyi te gkekete. M’anko, tangá paragrafe ɛmɛmɔ, ko oná ndjɔndɔ ke wopó. Oná la tangá avɛrsɛ wanɛ yopafundisa etepela, ko lendá wopo ɔkɔ nke wokanawɔ la djambá gkɔ. (Elemo 17:11) Nde ɔmɛna ndjɔndɔ ke wopó ɔkɔ, kfulá osidji kondo ilá ilembetelo lá etepela ɛmɔtshi we lá paragrafe, dje wɛ nkoka mbofɔ ndjɔndɔ. Ko lá losanghanyɛ, oyokoka nsangiɛ lɔwɔ nde wɔkɔpa, mpɛyɛ ndambo k’ikanyi l’etepela w’ɛkɔ nghomɛlɛ.

Nde olonghanyɛ wamba wopo la wopo wanɛ wekakiso lobengo la lobengo lá nsanghanyɛ, ongapatanyɛ tokanyi te bango lá “bomba dj’ɛko” dje ewo ke Bible.​—Mateo 13:51, 52.

• Okoke ndjalá la nsawo ɛkɔ nke lá gkambo dje nsanghanyɛ?

• Okoke ndjaalonghanyɛ wopo ɔkɔ nke dje ntshɔ topɛyɛ ikanyi lá losanghanyɛ?