Wambotshikela Yehova elaka

Ngɔndɔ ete ngo ipe m’ɔkɔngɔ w’iwɔ mposa m’Edjipito, ase Isariyɛlɛ wakomaka l’Onkókó wɔ Sinayi ko wapikaka ká kɛwɔ l’eteyi. Yehova etaka Mɔsɛ djɛ nde mpanda t’onkókó ko oshimelaka ante: ‘Lemi mbikɛka ase Isariyɛlɛ. Ntsha iwɔ ndjala la ntshunamo te lemi edjinge nkindjɛ nɛmɛyɛ ɛlɛmbɛ wɛmi, wangoyala owila wɔmi.’ Mɔsɛ akitaka m’onkókó ko atoshimelaka ase Isariyɛlɛ kɛnɛ kɛ Yehova ndatepalá. Iyananghe mo? Wakadjimolaka ambɔ: ‘Tongonangha kenkfumɔ kɛ Yehova otoshimelande djɛ nangha.’

Mɔsɛ ahandaka lonkina t’Onkókó wɔ Sinayi. L’eteyi, Yehova oshimelaka ante: ‘Langotepela isape, m’ɔkɔngɔ wɔ mfu isato. Koko shimela anto dj’ipa iwɔ nsɛsa djɛ mpanda l’onkókó.’ Mɔsɛ akitaka ko ashimelaka ase Isariyɛlɛ djɛ ndálonghanyɛ dj’iwɔ ndékameyɛ́ kenkfumɔ kɛ Yehova ɔkɔpande ndaashimela.

M’ɔkɔngɔ wɔ mfu isato, ase Isariyɛlɛ wɛnaka amayimo edjinge bonde djɛ tshulu l’onkókó. Wokaka lonkina akfungola wa wolo l’oyoko wɔ ntsheke. Masɔ Yehova akitaka l’onkókó lá iyɛ. Ase Isariyɛlɛ wayalaka la wɔma w’efula ko waadjitaki lokomba. Ntshikito djɛ looko djɛ wolo efula ntshikitshɛka onkókó w’otondo edjinge wodjipamaka bii l’edjinga. Oyoko wɔ ntsheke wotahandaki ngo mpanda. Ko masɔ, Ndjambe atepelaka ante: ‘Lemi ndeke Yehova. Nyopakoke ntɛmɔla tondjandjambe tonkina.’

Mɔsɛ ahandaka t’onkókó ko Yehova ɔpɛyɛka ɛlɛmbɛ wɛ ndɔpɛyɛ anto dj’iwɔ ndjewa wopo wɔ ndɔɔtɛmɔlaka la wopo woyɛwɔ ladjɛ nanghaka akambo. Mɔsɛ afunaka Ɛlɛmbɛ wɛkɔ, ko masɔ awalelaka ase Isariyɛlɛ. Watshikaka elaka ambɔ: ‘Tonghonanghaka kenkfumɔ kɛ Yehova otoshimelande djɛ nangha.’ Ɛwo, watshikelaka Ndjambe elaka. Walɛmɛyɛka elaka kɛwɔ?