Oruta nya Naɔmi

L’eleko kɛmɔtshi keyalisá ndjala efula l’Isariyɛlɛ, omoto ɔmɔtshi w’ose Isariyɛlɛ wɔ yetaka Naɔmi nya womɛnde la wana wawɔ ape w’ampame wasɛkɔka tá Mɔabɛ. M’ɔkɔngɔ, womɛ Naɔmi avɔka. Wana wande w’ampame watshukaka amato w’ase Mɔabɛ, Oruta nya Ɔrɔpa. Yɛnyi nde, wana wa Naɔmi w’ampame wasɔ wavɔka.

Winá wɔ Naɔmi ndoke ante ndjala kemboshila l’Isariyɛlɛ, nde ɔsaka nkano djɛ nkalɔ tá mbandja kɛwɔ. Oruta nya Ɔrɔpa watshɔka la nde, koko lá mboka, Naɔmi aashimelaka ante: ‘Nyoyalaka wadji wa wɔlɔ le wana wami ole akilo wa wɔlɔ le lemi. Lemi nkombolaka nyo ntshukana lonkina. Nyokalɔ takanyo tá Mɔabɛ.’ Oruta nya Ɔrɔpa watepelaka ambɔ: ‘Iso nkɔkɔpaka! Topakɔpɛ nkotshika nghɔmɛlɛ.’ Naɔmi akindjɛka ndaashimela dj’iwɔ nkalɔ. Ekomo ekomo, Ɔrɔpa akalɔka, koko Oruta atshikalaka. Ko Naɔmi oshimelaka ante: ‘Ɔrɔpa ambokalɔ te boto djɛnde la tondjandjambe tɔwɔ. Kalɔ nyande, edjinge ntshɔka tá mvulu kɛ nyɛnghɛko.’ Koko Oruta atepelaka ante: ‘Mpangokotshika. Owila wɔko wongoyala owilla wɔmi, edjinge Ndjambe kɛko angoyala Ndjambe kɛmi.’ Naɔmi ndoke ngete mo winá wɔ Oruta ndoshimela nghɔsɔ?

Oruta nya Naɔmi wakomaka l’Isariyɛlɛ má bango djɛ eleko k’ovukawɔ asami. Lofu lɔmɔtshi, Oruta atshɔka ntɔtɔna wɛsɛ w’asami wetaatshikalaki m’ɔkɔngɔ lá bedji djɛ mpame kɛmɔtshi k’etewɔ Bɔazɛ, wɔna Rahaba. Nde okoka djɛ Oruta alekɔ ose Mɔabɛ wawolisá ntshikala nya Naɔmi la nkɔmano nkfumɔ. Nde ashimelaka enkambi wɛnde dj’iwɔ ntatshikaka ndambo kɛ wɛsɛ m’ɔkɔngɔ djɛ Oruta ntatɔnaka.

La nkɔlɔ, Naɔmi opolaka Oruta ante: ‘Ngotshɔki ntokamba lɔɔko lá bedji djɛ na?’ Oruta atepelaka ante: ‘Lá bedji djɛ mpame kɛmɔtshi k’etawɔ Bɔazɛ.’ Naɔmi ooshimelaka ante: ‘Bɔazɛ alekɔ ewoto kɛ womɛmi. Kindjɛ nkamba ngo lá bedji djɛnde esanga l’eseka enkina w’amato. Ongoyala kɛko vu l’eteyi.’

Oruta akindjɛka nkamba lá bedji djɛ Bɔazɛ tii l’ekomo kɛ eleko k’ovukelo. Bɔazɛ ɛnaka djɛ Oruta alekɔ nkambi edjinge omoto wɔ wɔlɔ efula. L’etsho wɛsɔ, ntsha mpame ambovɔ ko atawotá, ewoto kɛnde akokaki ntshukana nya wadjɛnde wɔ ndatshike. Djɛko ndeke Bɔazɛ atshukaka Oruta. Wawotaka wɔna mpame, djiina djɛnde nde Ɔbɛdɛ, kanga loyisá ndoyala inkanola yɛ Nkfumi Davidɛ. Tolongo tɔ Naɔmi wayalaka l’osasa efula. Watepelaka ambɔ: ‘Ntondo, Yehova akɔpɛyɛka Oruta, kanga lɔkɔkɔpa lombombe, ko winá wɔsɔ, ambɔkɔpɛyɛ ndoyi. Yehova awa lomo.’