Yehova ananelaka Jɛhɔshafatɛ mbandji

Jɛhɔshafatɛ, nkfumi kɛ Juda, atshitaka ntshumbelo djɛ Bala ole tosakandole toyalaki l’owila. Nde akɔpaki djɛ anto ndjewa ɛlɛmbɛ wɛ Yehova. Djɛko ndeke ndatome ewandji la ase Lewi lá Juda nkfumɔ djɛ ntolakanyɛ anto ɛlɛmbɛ wɛ Yehova.

Ewila waadjingaki wokaki wɔma nanyɛ Juda ladjikɛnde wewaki ambɔ Yehova alekɔ esanga l’owila wɔnde. Wayakalaki edjinge Jɛhɔshafatɛ, nkfumi kɛ Juda epapɛyɛ. Koko masɔ, ase Mɔabɛ, ase Amɔnɛ, l’ase etashi kɛ looko kɛ Seirɛ wayɛka ndonanyɛ ase Juda. Jɛhɔshafatɛ ewaki ante alekɔ la djonyi dj’okotshɔ wɔ Yehova. Ashimelaka ampame ankfumɔ, amato, la wana dj’iwɔ ndjɛ lá Jerusalɛmɛ. Nde alɔmbaka lá ntondo kɛwɔ ante: ‘Yehova, ntsha opatokotshisa, topangolonga. Tɔmbɔkɔwɔnda, otoshimele kɛnɛ k’okokaso nangha.’

Yehova akadjimolaka lɔlɔmbɔ lɔnde ante: ‘Tokake wɔma. Langokokotshɛ́. Nyemale lá mpola djɛnyo, nyotatshikitake, ko nyɔnghɛna wopo wɔ mongonyowikɛ.’ Yehova ndaawikɛ ngete mo?

La nkɛsɛ, Jɛhɔshafatɛ asɔnaka endjombe, ko aashimelaka dj’iwɔ mpeta lá ntondo k’angala. Iwɔ wakɛndaka má Jerusalamɛ tii lá edjena kenanemaki mbandji kɛ yetaka ambɔ Tekowa.

Winá wɔ endjombe yalumɛka Yehova la osasa onkfumɔ ole la djoyi djɛ wolo, Yehova ananelaka owila wɔnde. Nde ilaka ovungusano l’antenyɛ ase Amɔnɛ l’ase Mɔabɛ ko wawangaka ndjakana yɔmɛlɛ, lako onto wotshikalisá la lowiko. Koko Yehova alamaka enkambi wɛnde w’ase Juda, angala l’ankfundji. Ewila enkfumɔ weyalaki entshupa wokaka kɛnɛ kɛ Yehova ndananghe, ole wewaka ambɔ Yehova akindjɛ nanela owila wɔnde. Wopo wɔkɔnge Yehova owikɛnde enkambi wɛnde? Lá topo efula. Nde apalekɔ la djonyi dj’okotshɔ w’anto djɛ nangha nkambo djɛsɔ.