Wopo w’okokaso nkindjɛ nkembɛ ngandji kel’anteyi kɛso

1-2. a) Lamo Poolo ndatepela ante ngandji ndeke djekeka djeleka ‘ekekete’? b) Okadjimolaso lɔ lá weepó wɛkɔnge?

WINÁ wɔ ɔpɔstɔlɔ Poolo ndatepela djɛ djawo, nkongi la ngandji, nde akomɛka l’etepela wɛnɛ ante: ‘Ngandji ndeke loleka ekekete l’enteyi kɛwɔ.’ (1 Kɔ. 13:13) Lamo Poolo ndatepela nghɔsɔ? L’etsho w’eyaye, topangoyala lonkina la djonyi djɛ ndjala la djawo l’alaka wa Ndjambe walendana l’andja wa bango kana ndjala la nkongi ente alaka wa Ndjambe wangokotshama lonkina, ladjikɛnde wangoshiyɛ nkotshama. Koko mfu inkfumɔ tongoyalaka la djonyi djɛ nkɔpa Yehova la anto ankina. Lá nsɔsɔlɔ, ngandji kɛso te wɔ kengokindjɛ ngo ntafule lotshinda lotshinda.

² Ladjikɛnde winá enkfumɔ tongoyalaka la djonyi djɛ ndjala la ngandji, tongoshishima weepó esato wɛnɛ. Wɔ ntondo, ladjikɛnge oyɛso ladjɛ nkɔpana? W’ape, wopo wɔkɔnge w’okokaso nyɛnyana ngandji l’anteyi kɛso? W’asato, wopo wɔkɔnge w’okokaso ndeka nkembɛ ngandji kel’enteyi kɛso?

LAMO OYƐSO LADJƐ NDJOKANA NGANDJI?

3. Donga djɛkɔnge dj’okotshɛso djɛ nkɔpana l’anteyi kɛso?

³ Lamo oyɛwɔ djonyi iso ndjokana ngandji? L’anteyi kɛ donga dj’okotshɛso, elonga kɛmɔtshi nde, ngandji ntewanyɛka etengo Akristo wa nsɔsɔlɔ. Yeso ashimelaka apɔstɔlɔ wande ante: ‘Má nkambo djɛnɛ anto ankfumɔ wangewa ambɔ nyolekɔ ambeki wami, ntsha nyokana ngandji l’anteyi kɛnyo.’ (Dj. 13:35) Lonkina, ndjala la ngandji l’anteyi kɛso ntokotshɛ́ka dj’iso nkindjɛ ndjala l’osanga. Poolo etaka ngandji ante ‘mamá djenangha djɛ anto ndjala l’osanga lá yopo yɛ djɔ.’ (Kɔl. 3:14) Koko, elonga kenkina kelekɔ k’oyɛso ladjɛ nkɔpana. Ɔpɔstɔlɔ Djɔanɛ afunelaka winande andjawodji ante: ‘Onto woka Ndjambe ngandji, ladjɛ nkɔpa ole wɔna nyɛnghɛnde.’ (1 Dj. 4:21) Winá w’ɛnyanaso ngandji l’anteyi kɛso, ɛnyɛso nde Ndjambe ngandji.

4-5. Kɔpɛyɛ ndjɔmbɔmba kɛnyɛ djokanelo djelekɔ́ l’antenyɛ ngandji k’okaso Ndjambe la ngandji k’okanaso l’anteyi kɛso.

⁴ Lá wopo wɔkɔnge ngandji kɛso te Ndjambe oyɛwɔ la djokanelo la ngandji k’okaso wananyɔ l’ankaana? Tɔkɔsa ndjɔmbɔmba kɛnɛ: Tokolenda djokanelo djelekɔ l’antenyɛ oloko la ntenyi nkina djɛ demba djɛso. Winá wɔ dɔktɛrɛ olendande otekelo wɔ esisa w’ɛwɔ wɛso, nde nkoka ndjala l’akoka wa ndjisola akambo ankina walendana l’oloko wɔso. Wopo wɔkɔnge w’okokaso nkamba la ikfɔ yɛsɔ lá kɛnɛ kelendana la ngandji?

⁵ Ngo ngete dɔktɛrɛ ndewaka ntsha oloko wɔso w’okamba wɔlɔ kana lako winá w’ekameyɛnde otekelo wɔ esisa w’ɛwɔ wɛso, iso nkoka ndjewa tii lá lɛdji lɔkɔnge lɔkɔpaso Ndjambe má ndenda ngandji k’okaso anto ankina. Ntsha tɔmbɛna ente ngandji kɛso te winaso andjawodji kembokita ndambo, kɛsɔ kekoka nyɛnyɛ ente ngandji kɛso te Ndjambe koko ketahɔlɛ. Koko winá wɛnyɛso winaso andjawodji ngandji kɛso mbala la mbala, kɛsɔ kɛnyɛ ente ngandji kɛso te Ndjambe koko kelekɔ wolo.

6. Lamo oyɛso ladjɛ nkiyana ntsha ngandji kɛso te wananyɔ l’ankaana ketahɔlɛ? (1 Dj. 4:7-9, 11)

⁶ Iso ladjɛ nkiyana ntsha ngandji kɛso te wananyɔ l’ankaana yɛso ketahɔlɛ. Lamo? Ladjikɛnde nkambo djɛsɔ nsakisolaka ente tolekɔ l’olando lá nyuma. Ɔpɔstɔlɔ Djɔanɛ apakisolaka nkambo djɛsɔ má ntovungola ante: ‘Onto wopakɔpɛ wɔnanyɔ wɛnande, apakoke nkɔpa Ndjambe, kanga ndɔpɛnyi.’ (1 Dj. 4:20) Olakanyelo wɔkɔnge w’owaso? Yehova nsasangaka laso ngo ntsha ‘tɔkɔpana l’anteyi kɛso.’—Wala 1 Djɔanɛ 4:​7-9, 11.

WOPO WƆKƆNGE W’OKOKASO NYƐNYƐ ENTE TOKANA NGANDJI?

7-8. Topo tɔmɔtshi tɔkɔnge t’okokaso nyɛnyɛ ngandji k’okanaso?

⁷ Iso ntanaka mbala efula l’Otepela wɔ Ndjambe ɔlɛmbɛ wɔ ‘nkɔpana l’anteyi kɛso.’ (Dj. 15:​12, 17; Ɔrɔ. 13:8; 1 Te. 4:9; 1 Pɛ. 1:22; 1 Dj. 4:11) Koko, ngandji oyɛnde nde djekeka djel’eteyi k’oloko, kana l’onto lɔ l’eteyi, edjinge lako onto w’okoka nyɛna l’eteyi k’oloko wɔso. Ntsha nghɔsɔ, wopo wɔkɔnge w’okokaso nyɛnyɛ ente iso ndjokanaka ngandji l’anteyi kɛso? Má etepela la nanghedji djɛso.

⁸ Topo tolekɔ efula t’okokaso nyɛnyɛ wananyɔ l’ankaana yɛso ente iso ndakɔpaka. Ndjɔmbɔmba imɔtshi ikikinɛ: ‘Nyoshimelanake nsɔsɔlɔ l’anteyi kɛnyo.’ (Zak. 8:16) ‘Nyoyale vu l’anteyi kɛnyo.’ (Mar. 9:50) ‘Lá nkambo djelendana la nɛmɛyɛna, nyɔpɛyɛ ndjɔmbɔmba.’ (Ɔrɔ. 12:10) ‘Nyolongolanake.’ (Ɔrɔ. 15:7) ‘Nyokindjɛ . . . nyimeyana l’anteyi kɛnyo.’ (Kɔl. 3:13) ‘Nyɔwɛmbɛlanake edjito.’ (Nga. 6:2) ‘Nyokindjɛ nkembɛna.’ (1 Te. 4:18) ‘Nyokindjɛ . . . nsukana l’anteyi kɛnyo.’ (1 Te. 5:11) ‘Nyɔlɔmbɛlanake.’—Dja. 5:16.

9. Lamo mpɛyɛ anto ankina lokembo oyɛwɔ ilembetelo y’ekekete yɛ ngandji? (Lenda edjinge ntshango.)

⁹ Nyontshɔ tokoshishima yopo imɔ y’okokaso nyɛnyɛ ngandji kɛso te anto ankina. Tokoshishima dako djɛ Poolo djɛnɛ: ‘Nyokindjɛ nkembɛna.’ Lamo nkembɛ anto ankina oyɛwɔ ilembetelo y’ekekete yɛ ngandji? Lá nkilika onkanda ɔmɔtshi wosakisolá Bible, itepela “Nkembɛna” yɛ Poolo ndakambe nkɔpaka ntepela “ndjala entshupa l’onto djɛ ndosuka winá w’opomanande l’ehemba wɛ wolo.” Djɛkondeke winá w’okembɛso winaso ondjawodji wɛna ndjolo, iso ndokotshɛ́ka djɛ nde mba lokembo edjinge nkindjɛ nkɛnda lá mboka kɛ lowiko. Edjinge winá w’okembɛso wɔnanyɔ kana nkaana kɛso, tɔngɔwɛnyɛke ente iso ndɔkɔpaka.—2 Kɔ. 7:​6, 7, 13.

10. Djokanelo djɛkɔnge dekɔ l’antenyɛ djandji la lokembo?

¹⁰ Ndjoka onto djandji la ndɔpɛyɛ lokembo alekɔ akambo ape walekɔ́ la djokanelo dj’efula. Ngete mo? Onto w’okana djandji ntshindamaka djɛ nkembɛ anto ankina la nsɛsaka djɛ ndakotshɛ́ lá ndjolo yɛnawɔ. Djɛkondeke ntondontondo tongokake nkɛtshi, makɔ tɔngɔpɛyɛke lokembo. Nyontshɔ tokolenda wopo wɔ Poolo ndokanyɛ djandji djɛ Yehova la lokembo lɔpɛyɛnde. Poolo atepelaka ante Yehova alekɔ ‘Papa kɛ nkɛtshi edjinge Ndjambe kɛ lokembo lonkfumɔ.’ (2 Kɔ. 1:3) Etengo nɔtɛ kɛ vɛrse djɛnɛ opakisolawɔ, Poolo akambaka l’itepela ‘nkɛtshi’ djɛ nyɛnyɛ djandji dj’okaso anto ankina. Djɛkondeke, ‘Ndjambe ndjetamaka Papa kana Ikɔkɔ yɛ nkɛtshi ladjikɛnde djandji oyɛwɔ nde mende.’ Edjinge djandji djɛsɔ ndotshindaka djɛ ‘ntɔpɛyɛ lokembo lá ehemba wɛso enkfumɔ.’ (2 Kɔ. 1:4) Ngo ngete washi wa ntshitshi wakɛla m’ikɔkɔ otshitshimɛwɔ awale w’anto walekɔ la mposɛ, Yehova ntshitshimɛka la nkembɛka anto walekɔ́ lá ndjolo. Wopo wɔkɔnge w’okokaso ndjokola Yehova má ndjoka anto ankina djandji la má ndapɛyɛka lokembo? Yopo imɔtshi nde, nkona l’oloko wɔso wekeka wakoka ntokotshɛ́ djɛ ndjoka anto ankina ngandji la ndakembɛ. Etengo wekeka wakɔnge?

11. Lá nkilika Kɔlɔsɛ 3:12 la 1 Pɛtɛlɔ 3:​8, wekeka wakɔnge w’oyɛso ladjɛ nkona djɛ nkindjɛ ndjala la ngandji ketotshinda djɛ nkotshɛ́ anto ankina?

¹¹ Kɛkɔnge kekoka ntokotshɛ́ djɛ nkindjɛ ndjala la ngandji k’oyɛso la djonyi djɛ ‘nkindjɛ nkembɛ anto ankina’ lofu la lofu? Iso ladjɛ nkona wekeka wanɛ: djandji, ngandji k’onto la wɔnanyɔ la oloko wɔlɔ. (Wala Kɔlɔsɛ 3:12; 1 Pɛtɛlɔ 3:8.) Wopo wɔkɔnge wekeka wasɔ okokawɔ ntokotshɛ́? Winá wɔ djandji la wekeka ankina wafɛna okomawɔ etenyi kɛmɔtshi kɛ lonto lɔso, tongoyalaka la mposɛ kɛ nkembɛ waalekɔ́ lá deko djɛ ndjolo. Etengo Yeso ndatepela, ‘má efula k’akambo walekɔ́ l’oloko ndeke ɔlɔmɔ otepelakande. Onto wɔ wɔlɔ mposɛka akambo wa wɔlɔ má bomba djɛnde djɛ akambo wa wɔlɔ.’ (Mat. 12:​34, 35) Nkembɛ wananyɔ l’ankaana walekɔ́ la djonyi djɛ lokembo alekɔ nsɔsɔlɔ yopo yɛ wɔlɔ efula yɛ ndawɛnyɛ ngandji kɛso.

WOPO WƆKƆNGE W’OKOKASO NKINDJƐ NKEMBƐ NGANDJI KELEKƆ́ L’ANTEYI KƐSO?

12. a) Lamo oyɛso ladjɛ mbadjɛ? b) Woopó wɔkɔnge w’ɔkɔpaso nkadjimola winá wɔsɔ?

¹² Isankfumɔ nkombolaka ‘nkindjɛ ndjokana ngandji.’ (1 Dj. 4:7) Djɛkondeke, alekɔ djonyi leso dj’iso mvungɔ ndjewo kɛ Yeso kɛnɛ: ‘Ngandji kɛ anto efula kɛngɔhɔla.’ (Mat. 24:12) Yeso atakɔpa ntepela ante nkambo djɛsɔ ngoleka nanghema l’anteyi kɛ ambeki wande. Koko, iso ladjɛ mbadjɛ dj’ipa nkfumbwama má osambo wɔ ngandji wolekɔ́ l’andja watodjingi wanɛ. La ikanyi yɛsɔ lá wɔɔngɔ, nyontshɔ tokoshishima woopó wɔ djonyi wɔnɛ: Kɛkɔnge kekoka ntokotshɛ́ djɛ ndjewa ntsha ngandji kɛso te wananyɔ kelekɔ ngo wolo?

13. Nkambo djɛkɔnge nkoka ndjila ngandji kɛso l’ohemba?

¹³ Yopo imɔtshi y’okokaso nshikikɛ wolo wɔ ngandji kɛso nde nshishima wopo w’elolaso winá w’opomanaso l’akambo amɔtshi lá lowiko. (2 Kɔ. 8:8) Ɔpɔstɔlɔ Pɛtɛlɔ alumolaka nkambo mɔtshi, atepelaka ante: ‘Ladjiko djɛ akambo ankfumɔ wasɔ, nyoyale la ngandji k’efula l’anteyi kɛnyo ladjikɛnde ngandji ndjipaka efula kɛ mpekanto.’ (1 Pɛ. 4:8) Djɛkondeke wɛdju la evunga w’anto ankina nkoka ndjila ngandji kɛso l’ohemba.

14. Lá nkilika 1 Pɛtɛlɔ 4:​8, yopo yɛkɔnge yɛ ngandji k’oyɛso la djonyi? Pɛyɛ ndjɔmbɔmba.

¹⁴ Nyontshɔ tɔkɔtɔnɔla la nkɔmɛ nkfumɔ l’etepela wɛ Pɛtɛlɔ. Etenyi kɛ ntondo kɛ vɛrse 8 nyɛnyɛka wopo wɔ ngandji k’oyɛso ladjɛ ndjala la kɛkɔ, ‘ngandji k’efula.’ Itepela ‘efula’ yɛ Pɛtɛlɔ ndakambe nsakisolaka “mvutola.” Etenyi k’ape kɛ vɛrse kɛnyɛ eposelo wekoka ndjɛ ma ngandji k’efula. Kengodjipake mpekanto yɛ wananyɔ waso. Tokoka nyɛnyɛ nkambo djɛsɔ má ndjɔmbɔma kɛnɛ: Tombokota ngandji kɛso la ɛwɔ epe ngo ngete oyɛwɔ nde esendja k’okokaso mvutola, ko tombotshanghanyɛ esendja kɛkɔ tshaa djɛ ndjipa ape mpekanto kɛmɔ kana ipe toko, koko ‘efula.’ Ndjipa nkoka nsakisola ndjipisanyɛ kana nyimeyɛ. Ngo ngete esendja okokawɔ ndjipa badji, ngandji nkoka ndjipa wɛdju la evunga wɛ anto ankina.

15. Ntsha ngandji k’okaso wananyɔ l’ankaana yɛso kelekɔ wolo efula, kɛkɔnge kɛ songoyala l’akoka wa nangha? (Kɔlɔsɛ 3:13)

¹⁵ Ngandji kɛso ladjɛ ndjala wolo efula dj’iso ndjala l’akoka wa nyimeyɛ evunga wɛ winaso andjawodji, kaanga ntsha nkambo djɛsɔ ndɔmbaka ndjila welo lá winá ɛmɔtshi. (Wala Kɔlɔsɛ 3:13.) Winá w’imeyɛso anto ankina, iso nyɛnyɛka ente ngandji kɛso kelekɔ wolo edjinge ente iso nkɔpaka nsasangɛ Yehova. Kɛkɔnge kekoka ntokotshɛ́ lonkina dj’ipa ndjila yimba lá evunga l’akambo wa nyɛtshi w’anto ankina otonanghelawɔ?

16-17. Kɛkɔnge kengotokotshɛ́ lonkina dj’ipa ndjila yimba l’evunga wɛ anto ankina? Pɛyɛ ndjɔmbɔmba. (Lenda edjinge ntshango.)

¹⁶ Pika wiso lá nanghedji djɛ wɔlɔ djɛ wananyɔ l’ankaana koko ape lá djɛ nyɛtshi. Tokolenda ndjɔmbɔmba kɛnɛ. Kɔɔsa djɛ olekɔ lá ntshɛkɛlɔ esanga la wananyɔ l’ankaana. Nyombohetshɛ winá wɛ wɔlɔ efula ko t’ekomo nyombovunda foto k’esanga. Ko, nyombokalɔ mvunda foto ipe lonkina djɛ ndolama ntsha kɛ ntondo kepaposisa wɔlɔ. Winá wɔsɔ ombowa foto isato. Koko ɔmbɛna ente lá foto kɛmɔtshi, wɔnanyɔ ɔmɔtshi apamɔnghamɔnghisa. Okokɛ nangha nge la foto kɛkɔ? Ongodjimola ladjikɛnde olekɔ la foto inkina ipe yɛ anto ankfumɔ wamɔnghamɔngha ndjila edjinge wɔnanyɔ wɔkɔ.

¹⁷ Tokoka ndjɛdjɛ foto y’olamakaso la akambo w’okotakaso lá wɔɔngɔ wɔso. Mbala efula tongovungɔke winá wɛ wɔlɔ efula wɛ sahetshɛ la wananyɔ l’ankaana yɛso. Koko tɔkɔsa djɛ lá mbamba kɛmɔtshi wɔnanyɔ kana nkaana ambonagha kana ambotepela nkambo djɛ nyɛtshi. Kɛkɔnge k’oyɛso ladjɛ nangha ntsha tombovungɔ nkambo djɛkɔ? Lamo ngopananghe la wolo djɛ ndjimola nkambo djɛkɔ má wɔɔngɔ etengo okokɛ ndjimola foto kepaposisa wɔlɔ? (Woo. 19:11; Ɛfɛ. 4:32) Tokoka mvungɛ evunga wɛ wɔnanyɔ kana nkaana ladjikɛnde tovungɔ winá wɛ wɔlɔ efula wɛ sahetshɛ lande. Ɔsɔ ndeke akambo wa wɔlɔ w’okombolaso nama lá yimba edjinge ndɔsa la ntshina.

DONGA DJ’OYƐSO LA DJONYI DJƐ NGANDJI PEKAPEKA LƆƆKO KƐNƐ

18. Nkambo djɛkɔnge djɛ djonyi djelendana la ngandji djɛ somboshishima lá djamba djɛnɛ?

¹⁸ Lamo okombolaso nkindjɛ nkembɛ ngandji kɛ l’anteyi kɛso? Etengo sɛnisa, winá w’ɛnyɛso wananyɔ l’ankaana ngandji, ɛnyɛso nde Yehova ngandji. Wopo wɔkɔnge w’ɛnyɛso winaso andjawodji ngandji? Yopo imɔtshi nde ma ndapɛyɛ lokembo. Tongoyala l’akoka wa ‘nkindjɛ nkembɛna’ ntsha totshindama má djandji. Wopo wɔkɔnge w’okokaso nkindjɛ nkembɛ ngandji kɛ l’anteyi kɛso? Má nangha kenkfumɔ k’okokaso nangha djɛ nyimeyɛ evunga w’anto ankina.

19. Lamo oyɛwɔ djonyi nyɛnyana ngandji pekapeka lɔɔko kɛnɛ?

¹⁹ Lamo oyɛwɔ djonyi nyɛnyɛ ngandji l’anteyi kɛso pekapeka lɔɔko kɛnɛ? Tokolenda elonga kɛmɔtshi kɛ Pɛtɛlɔ ndapɛyɛ: ‘Ekomo k’akambo ankfumɔ kembosukana. Djɛkondeke, . . . nyoyale la ngandji k’efula l’anteyi kɛnyo.’ (1 Pɛ. 4:​7, 8) Etengo ekomo k’andja wa lopango wanɛ yotaleke nsukana, kɛkɔnge k’okokaso nkongela? Winá wɔ ndatepelaka lá nkambo djɛ ambeki wande, Yeso atepelaka ante: ‘Anto wa ewila enkfumɔ wangonyotona m’ɔtɛ wɔmi.’ (Mat. 24:9) Djɛ mpikama lá ntondo kɛ lotono lɔ nghɔsɔ, iso ladjɛ ndjala iwoke imɔ. Ntsha tombongha nghɔsɔ, Satana apangolonga lá welo wilande djɛ ntokapola ladjikɛnde ngandji, ‘mamá djenangha djɛ anto ndjala l’osanga lá yopo yɛ djɔ,’ ngotokotshɛ djɛ ndjala iwoke imɔ.​—Kɔl. 3:14; Flp. 2:1, 2.