‘Kindjɛ nkilika’ Yeso m’ɔkɔngɔ wɔ batisimo

1-2. Esako wɛkɔnge wɛ sowaka m’ɔkɔngɔ wɔ batisimo?

TONGOYALAKE l’osasa efula winá w’olongolaso batisimo la w’ingelaso lá nkfumbo kɛ Yehova. Anto walekɔ́ la mpipo kɛsɔ wakoka ndjawola etepela wɛ ondjombe Davidɛ wɛnɛ: ‘Osasa le onto wɔ wɛ [Yehova] ngɔmbɔsɔna la wolekɔ́ entshupa la wɛ djɛ ndjintansɛ lá awandja wako.’​—Yee. 65:4.

² Yehova apapɛyɛka onto onkfumɔ mbamba kɛ ndjitansɛ lá awandja wande. Etengo satepela lá djamba djemboheta, angosepake le nde ngo anto wɛnyɛ ambɔ wakombola ndjala la djokanelo djɛ wɔlɔ la nde. (Dja. 4:8) Winá w’oyalambolɛ la w’olongolɛ batisimo, ongoyala imama la Yehova lá lɛdji lotshikitanyi. M’ɔkɔngɔ wɔ batisimo, okoka ndjala l’eshikikelo ente nde ‘angokotshoyɛ esako tii lako kaanga ekete kɛmɔ kengosamba.’​—Mal. 3:10; Jɛr. 17:7, 8.

3. Odjito w’ekekete wɔkɔngɔ wolekɔ́ l’Akristo wamboyalambola la wambolongola batisimo? (Losanghanyɛ 5:4, 5)

³ Lá nsɔsɔlɔ, batisimo oyɛwɔ ngo ewangelo. M’ɔkɔngɔ wɔ ntapola djina djɛsɔ, ongonangha kenkfumɔ k’oyɛ ladjɛ nangha djɛ mbika lá wopo w’okana l’ɛlɔkɔ kɛko kɛ ndálambola, kaanga lá ntondo k’ehemba l’ekakasano. (Wala Losanghanyɛ 5:4, 5.) Etengo oyɛ ombeki wɔ Yeso, ongokilika ndjɔmbɔmba la ɛlɛmbɛ wɛnde lá nkilika akoka wako. (Mat. 28:19, 20; 1 Pɛ. 2:21) Djamba djɛnɛ ngokokotshɛ djɛ nangha nkambo djɛsɔ.

‘KINDJƐ NKILIKA’ YESO KAANGA L’ANTEYI K’EHEMBA L’EKAKASANO

4. Lá wopo wɔkɔnge ambeki wa Yeso ɔwɛmbawɔ ‘otamba wɔ ndjolo’? (Luka 9:23)

⁴ M’ɔkɔngɔ wɔ batisimo, opangosamba mpomana l’ekakasano. Lá nsɔsɔlɔ, Yeso ɛnyɛka papoo ante ambeki wande wangɔwɛmba ‘otamba wɔ ndjolo.’ Ɛwo, wangonangha nkambo djɛsɔ ‘lofu la lofu.’ (Wala Luka 9:23.) Yeso ndakɔpɛ nde ntepela ante ambeki wande wangɛnaka ndjolo mfu inkfumɔ? Lako. Ndakɔpɛ ngo nkɔkɔmɛ ante, ladjiko djɛ esako wɛ yongowa, wangopomana l’ekakasano. Ekakasano ɛmɔtshi nkoka ndjala ndjolo efula.​—2 Ti. 3:12.

5. Esako wɛkɔnge Yeso olakande waayapekala nkete mɔtshi?

⁵ Nkoka ndjala ombopomana l’onanyelo me ase nkfumbo kɛko, kana mbala imɔtshi omboyapekala nkete mɔtshi ngo djɛ ndjila wapɔ w’Onkfumi l’edjena kɛ ntondo. (Mat. 6:33) Ntsha nghɔsɔ, okoka ndáshikikɛ ente Yehova ɛna akambo ankfumɔ wa ngananghe la djawo lá nkambo djɛnde. (Heb. 6:10) Mbala imɔtshi, wɛ ɔmɛna nsɔsɔlɔ k’etepela wɛ Yeso wɛnɛ: ‘Lako onto wotshikisá mvulu kana wananyɔ kana ankaana kana nyɔ kana papa kana wana kana awedji l’ɔtɛ wɔmi la l’ɔtɛ wɔ losango lɔ wɔlɔ, wopangowa mvulu, wananyɔ, ankaana, nyɔ, wana, la awedji mbala 100 winá wɔsɔ esanga la lɔnyɔkɔ, ko lá nkfumbo dj’akambo djeyaye, lowiko l’etshinda.’ (Mar. 10:29, 30) Lá nsɔsɔlɔ, esako wɛ ngombowa weleka otale ekete kenkfumɔ kɛ ngomboyapekala.​—Yee. 37:4.

6. Lamo nghongoyala la djonyi djɛ nkindjɛ nana la ‘mposɛ yɛ demba’ m’ɔkɔngɔ wɔ batisimo?

⁶ Wɛ ongokindjɛ nana la ‘mposɛ yɛ demba’ kaanga m’ɔkɔngɔ wɔ batisimo. (1 Dj. 2:16) Oyɛwɔ ngo nghɔsɔ ladjikɛnde, olekɔ ngo inkanola yɛ ntshamba djɛ djɔ y’Adama. Okoka ndáwoka winá ɛmɔtshi etengo ɔpɔstɔlɔ Poolo. Nde afunaka ante: ‘Lá nsɔsɔlɔ lemi nsasangaka l’ɛlɛmbɛ wɛ Ndjambe lá nkilika wopo w’onto w’oyɛmi l’eteyi, koko lemi nyɛna ɔlɛmbɛ onkina wɔ l’eteyi kɛ demba djɛmi wonana la ɔlɛmbɛ welá yimba yɛmi edjinge wonkomɛ́ mfumbe kɛ ɔlɛmbɛ wɔ mpekanto wɔ l’eteyi kɛ demba djɛmi.’ (Ɔrɔ. 7:22, 23) Okoka ndɛmba ladjikɛnde onana la mposɛ yɛ demba. Koko, ntɔnɔla lá daka djɛ ngalake Yehova winá wɔ ngoyalambola le nde, ngokembɛ nkano djɛko djɛ nana l’ehemba. Nkambo djɛ nsɔsɔlɔ nde ɛlɔkɔ kɛko kɛ ndálambola kengokokotshɛ́ winá w’opomanɛ l’ehemba. Ngete mo?

7. Lamo ndálambola le Yehova yongokokotshɛ́ djɛ ntshikala la nkɔmano te nde?

⁷ Winá w’oyalambolɛ le Yehova, wɛ ongolatona nghɔmɛlɛ kɛko. Kɛsɔ nsakisolaka ente wɛ ongotepela ente lako tá mposɛ la ekoma wɛko wepasasangɛ Yehova. (Mat. 16:24) Djɛkondeke, winá w’opomanɛ l’ohemba, opalekɔ la djonyi djɛ ndáwopola kɛnɛ k’oyɛ ladjɛ nangha. Omboshiyɛka ndɔsa nkano ntondo lá kɛnɛ kɛ nghongonangha, ntepela ente ntshikala la nkɔmano le Yehova. Ongopikama ngo ndii lá nkano djɛko djɛ nsasangɛ Yehova. Lá lɛdji lɔsɔ ongoyala etengo Djɔbɔ. Kaanga ndapomana l’ekakasano wɛ wolo efula, atepelaka l’oloko wolo onkfumɔ ante: ‘Lemi mpatshikaki nkɔmano djɛmi!’​—Djɔ. 27:5.

8. Wopo wɔkɔnge ntɔnɔla lá lɔlɔmbɔ lɔko lɔ ndálambola okokotshɛwɔ djɛ mpikama lá ntondo k’ehemba?

⁸ Má ntɔnɔla lá lɔlɔmbɔ lɔko lɔ ngananghe winá wɔ ngoyalambola le Yehova, ongowa wolo wɔ mpikama l’ohemba onkfumɔ. Ndjɔmbɔmba, ongowetshola mposɛ yɛ ebula kɛ nkana? Lako kaanga ndambo daambi! Wɛ omboshiyɛka ntepela ente lako lá nkambo djɛsɔ. Má nangha nghɔsɔ, ongoyalama dj’ipa ndotshimba yimba la nana la mposɛ yɛ nyɛtshi m’ɔkɔngɔ w’iwɔ nkonama. ‘Ongopengɔ mboka k’anto wa nyɛtshi.’​—Woo. 4:14, 15.

9. Wopo wɔkɔnge ntɔnɔla lá lɔlɔmbɔ lɔko lɔ ndálambola okokotshɛwɔ lonkina djɛ nkindjɛ ndjila ɔtɛmwɛlɔ wɔ Yehova l’edjena kɛ ntondo?

⁹ Iya ntsha ombowa olemo wopangɔkɔpɛyɛ mbamba kɛ ndjingelaka mbala la mbala lá nsanghanyɛ y’Akristo? Wɛ ewa kɛnɛ k’oyɛ ladjɛ nangha. Lá ntondo kɛ wɛ mba olemo wɔ nghɔsɔ, omboshiyɛka ndɔsa nkano dj’ipa ndjawola olemo onkfumɔ w’opangɔkɔpɛyɛ mbamba kɛ ndjingela nsanghanyɛ. Djɛkondeke, tohembamake djɛ ndjawola olemo wɔ nghɔsɔ, ko m’ɔkɔngɔ ndohona wopo wɔ nkindjɛ ndjila Yehova l’edjena kɛ ntondo. Má mvungɔ nkano djɛ Yeso djɛ nsasangɛ Papa kɛnde, ongotona mbala kɛkɔ kɛmɔ ole l’oloko wolo onkfumɔ ekete kenkfumɔ kewɛ ente kekoka ntshutshumadjɛ Ndjambe, Kanga ngoyalambola le nde.​—Mat. 4:10; Dj. 8:29.

10. Wopo wɔkɔnge Yehova ndongokokotshɛ́ djɛ ‘nkindjɛ nkilika’ Yeso m’ɔkɔngɔ wɔ batisimo?

¹⁰ Kɛnɛ kelekɔ nsɔsɔlɔ nde, ehemba l’ekakasano wɛkɔpɛyɛ mbamba kɛ nyɛnyɛ ente ɔmbɔsa nkano djɛ ‘nkindjɛ nkilika’ Yeso. Ntsha ombonangha nghɔsɔ, okoka ndáshikikɛ ente Yehova angokokotshɛ́. Bible ntepelaka ante: ‘Ndjambe alekɔ la nkɔmano edjinge apawolaki nyo mpembama lá lɛdji loleka kɛnɛ kokokanyo nkfumeyɛ, koko winá wɔ nyongopomana l’ohemba, nde angonyatela mboka djɛ nyo ndjala l’akoka wa nkfumeyɛ ohemba wɔkɔ.’​—1 Kɔ. 10:13.

WOPO WƆ NKINDJƐ NKILIKA YESO

11. Yopo yɛkɔnge ileka wɔlɔ yɛ ‘nkindjɛ nkilika’ Yeso? (Lenda edjinge ntshango.)

¹¹ Yeso ayalaki l’osasalo ole atshikalaka ma ma la Yehova má lɔlɔmbɔ. (Luka 6:12) Lá nsɔsɔlɔ, yopo ileka wɔlɔ y’okokɛ nkindjɛ nkilika Yeso m’ɔkɔngɔ wɔ batisimo nde nkindjɛ nangha akambo wangokosukanyɛ la Yehova. Bible ntepelaka ante: ‘Ayale lá lɛdji lɔkɔnge lɔ sombofula, tokindjɛ ntshɔ tá ntondo lá wopo wɔ wɔlɔ lá nkilika lokolo lɔkɔ lɔmɔ.’ (Flp. 3:16) Mbala la mbala, ongokaka kɛnɛ kekomela wananyɔ l’ankaana wambɔsá nkano djɛ ndeka ndápɛyɛ l’olemo wɔwɔ w’ekina. Mbala imɔtshi, wambingelá lá Nkalasa k’Ansakodji y’Onkfumi kana wambɔsɛkɔ́ tá djena dj’oyɛwɔ la djonyi dj’efula. Ntsha olekɔ l’akoka, yawilela okoma ɔmɔtshi wɔ nghɔsɔ ole wɛ. Enkambi wɛ Yehova wangokombolake mfudjɛ olemo wɔwɔ. (Ele. 16:9) Iya ntsha winá wɔsɔ opalekɔ l’akoka wa nangha nghɔsɔ? Tɔfɛnyɛke ente anto wakoka nangha nghɔsɔ wakoleka. Ekete keleka djonyi lá lowiko l’Okristo nde, nkindjɛ nkfulumeyɛ. (Mat. 10:22) Tokanelake ente welo w’ilɛ djɛ nkambela Yehova lá nkilika akoka wako la akambo wakokomela lá lowiko wepalekɔ la ntshina. Ɔsɔ oyɛwɔ nde yopo imɔtshi yɛ djonyi efula y’okokɛ nkindjɛ nkilika Yeso m’ɔkɔngɔ wɔ batisimo djɛko.​—Yee. 26:1.

12-13. Kɛkɔnge k’okokɛ nangha ntsha osasalo wɔko wotahɔlɛ (1 Kɔrɛtɔ 9:16, 17) (Lenda edjinge ipapango “Kindjɛ ndota.”)

¹² Iya kɛkɔnge k’oyɛ ladjɛ nangha ntsha ɔmbɛna ente ɔpɔlɔmbaka m’anse k’oloko kana olemo wɔko w’ipoposanyɛ wopokosasangɛka? Kɛkɔnge k’oyɛ ladjɛ nangha ntsha oposasanga la badji djɛko djɛ Bible etengo ngasasangaka ntondo? Ntsha ombowanga ndáwoka nghɔsɔ m’ɔkɔngɔ wɔ batisimo, totepelake ente opalekɔ lonkina la nyuma kɛ Yehova. Oyɛnde ose ntshamba djɛ djɔ, mposɛ yɛko nkoka ntshikitana winá enkfumɔ. Ntsha osasalo wɔko wombotateyɛ mpɔla, tɔnɔla lá ndjɔmbɔmba kɛ ɔpɔstɔlɔ Poolo. Kaanga ndananghaka la wolo djɛ ndjokola Yeso, nde ewaki ante ape winá enkfumɔ ndeke ndongoyalaka la mposɛ kɛ nangha nkambo djɛsɔ. (Wala 1 Kɔrɛtɔ 9:16, 17.) Nde atepelaka ante: ‘Ayale kaanga lemi nangha nkambo djɛsɔ ipa l’ɛkɔpa kɛmi, lemi ndekɔ la odjito wɔ yampɛyɛ.’ Kɛsɔ nsakisolaka ente, Poolo ɔsaka nkano djɛ nkamba olemo wɔnde ayale kaanga wopo wɔ ndoyawokaka lá winá ɛmɔtshi.

¹³ Lá wopo wɔk’ɔmɔ ndeke, tawolake djɛ mposɛ yɛko yɛ ntshamba djɛ djɔ nkapemela. Ɔsa nkano djɛ nangha kɛnɛ kelekɔ́ wɔlɔ ayale kaanga wopo w’oyawokɛ. Ntsha ombokindjɛ nangha kɛnɛ kelekɔ́ wɔlɔ, mposɛ yɛko yɛ nyɛtshi ikoka ndotshikitana. Lá nkambo nkfumɔ, ndjala la nkfumbo djɛ wɔlɔ djɛ nyuma ngokokotshɛ́ djɛ nkindjɛ nkilika Yeso m’ɔkɔngɔ wɔ batisimo. Ntsha wɛ nangha nghɔsɔ mbala la mbala ɔngɔpɛyɛ edjinge winako andjawodji lokembo.​—1 Te. 5:11.

‘KINDJƐ NDÁSHISHIMA . . . KINDJƐ NDÁLENDA’

14. Kɛkɔnge k’oyɛ ladjɛ nshishimaka winá la winá, ko lamo? (2 Kɔrɛtɔ 13:5)

¹⁴ Angoyala djonyi wɛ ndáshishima mbala la mbala m’ɔkɔngɔ wɔ batisimo. (Wala 2 Kɔrɛtɔ 13:5.) Winá la winá, shishimaka lowiko la nkfumbo djɛko djɛ ndjewa ntsha ɔngɔlɔmbake lofu la lofu, ongowalake la ongekake Bible, ongingelake nsanghanyɛ, la ongopoposanyɛke. Nangha la wolo djɛ mpona wopo wɔ nsasanga la mba wapɔ má akambo walendana l’ɔtɛmwɛlɔ wasɔ. Ndjɔmbɔmba, koyawopola weepó wɛnɛ: ‘Lemi nkoka mpakisola anto ankina elakanyelo w’ewangelo wɛ Bible? Topo tɔmɔtshi tolekɔ tokokami nangha djɛ ndeka nsasanga l’olemo wɔmi w’ipoposanyɛ? Langotepelake nkambo kɔɔ lá ndɔmbɔ yɛmi, la ingɛnyɛke ente ndáwɛkɛ le Yehova lá nkambo nkfumɔ? Langingelake nsanghanyɛ y’Akristo mbala la mbala? Wopo wɔkɔnge w’okokami ndeka mpika ntoyi lá nsanghanyɛ la ndɔngɔsɔla wopo wɔpɛyɛmi kɔmantɛrɛ?’

15-16. Olakanyelo wɔkɔnge nghombowa má kɛnɛ kekomelisá wɔnanyɔ ɔmɔtshi lá kɛnɛ kelendana la mpikama l’ohemba?

¹⁵ Angoyala wɔlɔ wɛ nshishima lonkina l’oloko ɔmɔ wɛdju wɛko. Wɔnanyɔ Robert atepela djɛ nkambo djɛsɔ má nkɔndɔla kɛnɛ kokomelisá ante: “Winá wɔ mayalaka l’ɛnɔnyi 20, nkambaki olemo wɔ winá ɛmɔtshi. Lofu lɔmɔtshi m’ɔkɔngɔ w’olemo, winami ɔmɔtshi w’olemo w’omoto andjetaka lá kande. Nde anshimelaka ante: ‘Tongoyala ngo sape toko lá mvulu, la langoyala entshupa djɛ nsanga mbeto isape.’ Má bango ntɔmaka ɔlɔmɔ winá wɔ mɔpɛyɛka donga mɔtshi dj’ipa kɔɔ, koko l’ekomo ntepelaka l’oloko wolo onkfumɔ ente lako, la ndopakisolaka lamo matone.” Robert apikamaka lá ntondo k’ohemba wɔsɔ, edjinge ɔsɔ alekɔ nkambo dj’okokaso ndowedjɛ. Koko winá wɔ ndovungɔka nkambo djɛsɔ m’ɔkɔngɔ, nde ɛnaka ante atakandola ohemba wɔkɔ lá lɛdji lɔ wɔlɔ. Nde asuyɛ ante: “Ntatona lɔlɔmbɔ lɔnde lɔsɔ la wolo ole lankeke etengo Yosɛfu ndananghe le wadjɛ Pɔtifara. (Ewa. 39:7-9) Lá nsɔsɔlɔ, nkamɔka efula lá wopo wɔ yayale wolo le lemi djɛ ntona. Nkambo djɛsɔ nkotshɛ́ka djɛ nyɛna ente ndekɔ la djonyi djɛ nkembɛ djokanelo djɛmi la Yehova.”

¹⁶ Okoka mba wapɔ má ndáshishima nghɔmɛlɛ kɛko etengo Robert ndananghe. Kaanga winá w’opikamɛ lá ntondo k’ohemba, okoka ndáwopola ente: ‘Lambɔsaka winá efula djɛ ntepela ente lako?’ Ntsha ɔmɛna nkambo mɔtshi dj’okokɛ ndɔngɔsɔla, tolafolake nghɔmɛlɛ kɛko. Yala l’osasa ladjikɛnde ombisola wɔdju wɔko. Ilá nkambo djɛkɔ lá ndɔmbɔ yɛko, la tateyɛ nkembɛ nkano djɛko djɛ mbika lá wopo wokana l’ɛlɛmbɛ wɛ Yehova welendana la nanghedji.​—Yee. 139:23, 24.

17. Wopo wɔkɔnge djiina djɛ Yehova yawa lomo má kɛnɛ kekomelisá Robert?

¹⁷ Olakanyelo onkina wolekɔ w’okokaso mba má kɛnɛ kekomelisá Robert. Nde akindjɛ ante: “M’ɔkɔngɔ wɔ lemi ntona leeta lɔ winami w’olemo nde anshimelaka ante: ‘Ombopikama l’ohemba!’ Ndowopolaka kɛnɛ kɛ ndakɔpɛ ntepela. Nde ampakisolaka ante ilongo yɛnde imɔtshi iyalaki Owakɛ ntondo, oshimelaka ante Ewakɛ wɛ Yehova efula w’elangala wangoyalake la lowiko lɔ dongi mpe la wangonanghake akambo wa nyɛtshi lá wisisa ntsha wambowa mbamba. Nde ashimelaka winande ante angompemba lemi djɛ ndenda ntsha lemi koko ndekɔ ngo ngete elangala wɛsɔ. Makɔ ndjɛka ndoyala l’osasa efula má wopo wɔ mapɛyɛ djiina djɛ Yehova lomo.”

18. Ngɔmbɔsa nkano djɛ nangha nge m’ɔkɔngɔ wɔ batisimo? (Lenda edjinge ipapango “Ɔnɔnghɔ wɔ wamba wangokosasangɛ efula.”)

¹⁸ Ntsha omboyalambola le Yehova la ombolongola batisimo, ɔngɛnyɛ ente wɛ nkɔpaka nkinyɛ djiina djɛnde ayale nkambo djɛkɔnge djengokokomelá. Edjinge yala l’eshikikelo ente Yehova ewa ekakasano w’epomana la wɛ ole ehemba w’opikamɛ. Nde angosakola welo w’ilɛ djɛ ntshikala la nkɔmano. Yashikikɛ ente má mbamba kɛ nyuma kɛnde k’ekina, nde angɔkɔpɛyɛ wolo wɔ nangha nkambo djɛsɔ. (Luka 11:11-13) L’okotshɔ wɔ Yehova, ongoyala l’akoka wa nkindjɛ nkilika Yeso m’ɔkɔngɔ wɔ batisimo djɛko.