Okola osasalo wɔ Yeso l’olemo w’ipoposanyɛ

1. Djekeka djɛkɔnge ntshikitanyɛ enkambi wɛ Yehova l’ase andja?

Ekete ketshikitanyɛ enkambi wɛ Yehova l’anto ankina watepela ambɔ walekɔ Akristo nde osasaloa wɔwɔ l’olemo w’ipoposanyɛ. (Tito 2:14) Koko winá ɛmɔtshi, osasalo wɔko wokoka mpɔla. Mbala imɔtshi okoka mfɛna nya ikokolo imɔtshi isuyɛ ante: “Mbala efula, mpokaka mposɛ kɛ mpoposanyɛ.”

2. Kɛkɔnge kekoka ndjala okakasano djɛ nama osasalo l’olemo w’ipoposanyɛ winá ɛmɔtshi?

² Tokoka nsasanga djɛ nangha akambo efula l’olemo wɔ Yehova, koko ape mpoposanyɛ. Lamo? Tokoka nyɛna eposelo wɛ kɛnɛ k’onanghaso mbala kɛmɔ winá w’opikaso la w’ɔlɔngɔsɔlaso amvulu yɛ teokrasi, w’okotshɛso waalekɔ́ la ndjolo, kana w’okembɛso wananyɔ. Iso nsasangaka la vu ole la ngandji kɛnyanaso winá w’okambaso la wananyɔ waso, la w’ewaso ente wakɔpa kɛnɛ kananghelaso. Lá wedji onkina, akoka ndjala tombopoposanyɛ ilá efula lá etatshi kɛmɔtshi kɛ looko, ko topawaka eposelo wɛ wɔlɔ. Kana tokoka mpomana l’anto wapakɔpɛ losango lɔso. Tewa lonkina ente, laasotasukana t’ekomo, anto efula wangetela ntona losango lɔso. (Mat. 10:22) Kɛkɔnge kekoka ntokotshɛ́ djɛ nama la mfundjɛ osasalo wɔso l’olemo w’ipoposanyɛ?

3. Wopo wɔkɔnge Luka 13:6-9 ɛnyɛwɔ osasalo wɔ Yeso?

³ Tokoka ndjeka akambo efula má ndjɔmbɔmba k’osasalo wɔ Yeso l’olemo w’ipoposanyɛ. L’ilá k’olemo wɔnde, atatshutshɛ osasalo wɔnde. Lá nsɔsɔlɔ, l’ilá k’etsho, atafudjɛki olemo wɔnde. (Wala Luka 13:​6-9.) Ete ngo mpame kekonisá otamba wɔ mfingo wonanghisá ɛnɔnyi 3 ipa ntɔ kaanga lowambo lɔmɔ, Yeso apoposanyɛka ase Juda l’ilá k’ɛnɔnyi 3, koko efula watowawola. Koko, ete ngo okonyi ndakindjɛ nkonga mbambo yɛ otamba wɔ mfingo, Yeso atatshika ndapoposanyɛ kana atahɔdjɛ olemo wɔnde. Koko, afudjɛka welo wɛnde dj’iwɔ ndjawola losango lɔ wɔlɔ.

4. Akambo 4 wakɔnge wa ndjɔmbɔmba kɛ Yeso wɔkɔpaso nyɛna?

⁴ Lá djamba djɛnɛ, tɔnghɛna wopo wɔ Yeso ndɛnyɛ osasalo, pekapeka l’ilá kɛ ngɔndɔ 6 y’ekomo y’olemo wɔnde. (Lenda nɔtɛ: “Après cela” lá Luka 10:1 lá Bible djɛ wekelo djɛ Falase.) Ndjeka kɛnɛ kɛ ndalakanyɛka la ndjokola akambo wa ndananghe angotokotshɛ́ djɛ nama osasalo. Nyontshɔ tokolenda ndjɔmbɔmba kɛ Yeso l’akambo 4 wanɛ: 1) Nde ahetshɛka ɛkɔpa kɛ Yehova lá ntondo, 2) ilaka yimba lá prɔfɛsi yɛ Bible, 3) alawɛkɛka le Yehova djɛ mba okotshɔ, la 4) ayalaki la ikanyi yɛ wɔlɔ ante anto amɔtshi wangowawola.

NDE AHETSHƐKA ƐKƆPA KƐ YEHOVA LÁ NTONDO

5. Wopo wɔkɔnge Yeso ndɛnyɛ ante ilaki yimba djɛ nangha ɛkɔpa kɛ Ndjambe?

⁵ Yeso apoposanyɛka ‘losango lɔ wɔlɔ l’Onkfumi’ l’osasalo ladjikɛnde ewaki ante Ndjambe akɔpaki nde nkamba olemo wɔsɔ. (Luka 4:43) Yeso akomɛka olemo w’ipoposanyɛ ekete keleka djonyi lá lowiko lɔnde. Kaanga t’ekomo k’olemo wɔnde, aheetaki lá ‘ngando la ngando la lá mbandja la mbandja,’ djɛ ndakanyɛ anto. (Luka 13:22) Akfumbaka lonkina ambeki efula djɛ nkamba nyawɔ olemo ete ngo ansakodji.—Luka 10:1.

6. Wopo wɔkɔnge olemo w’ipoposanyɛ okanawɔ la olemo onkfumɔ wokambaso l’olonghanyelo? (Lenda ntshango.)

⁶ Ole lɔɔko kɛnɛ, olemo w’ipoposanyɛ wɔ losango lɔ wɔlɔ wolekɔ olemo woleka djonyi wɔ Yehova nya Yeso ɔkɔpawɔ iso nkamba. (Mat. 24:14; 28:19, 20) Djokanelo dekɔ l’anteyi k’olemo w’ipoposanyɛ la elemo enkina w’olonghanyelo. Ndjɔmbɔmba, topika amvulu yɛ teokrasi kana tokamba la Betɛlɛ djɛ nshiyɛ ehomba wɛ ntatshi djɛ looko. Iso nkotshɛ́ka wananyɔ l’ankaana winá w’ambalaka yeyɛ m’etongelo ape ngo djɛ ndapɛyɛ nkete toko, koko ole djɛ ndakotshɛ́ dj’iwɔ ndjala la nkfumbo djɛ nyuma, ndjila ole olemo w’ipoposanyɛ. Winá w’ewaso djonyi djɛ olemo w’ipoposanyɛ la w’ewaso ente wolekɔ olemo woleka djonyi wɔ Yehova ɔkɔpande iso nkamba, tongoyala la mposɛ kɛ mpoposanyɛ mbala la mbala. János, ikokolo imɔtshi yɛ Hongrie, atepela ante: “Mvungɔ ente lako olemo w’olonghanyelo wokoka mpɛna olemo w’ipoposanyɛ; ɔsɔ ndeke olemo wɔso woleka ntshina.”

7. Lamo Yehova ɔkɔpande iso nkindjɛ mpoposanyɛ? (1 Timɔte 2:3, 4)

⁷ Tokoka mfudjɛ osasalo wɔso l’olemo w’ipoposanyɛ ma ndɔsa anto ete ngo Yehova awɔsande. Nde nkɔpaka djɛ anto efula ndjoka losango lɔ wɔlɔ la dj’iwɔ ndjawola. (Wala 1 Timɔte 2:​3, 4.) L’etsho w’ekomo wɛnɛ, atokfumba djɛ ndjala l’akoka wa ntshanghanyɛ losango lowikɛ mbiko. Ndjɔmbɔmba, inkankanda Kɔpa anto—Kfumbawɔ ambeki ilekɔ l’alako watokotshɛ́ djɛ mbanga ntshawo l’okoma wɔ nkfumba ambeki. Kaanga ntsha anto wapawola winá wɔsɔ, wakoka ndaawola lá ntondo kɛ ekomo kɛ efunge funge. Kɛnɛ kashimelaso winá wɔsɔ, kekoka ndaatshinda djɛ ndawola l’etsho weyaye. Koko kɛsɔ okokawɔ nanghema ngo ntsha tokindjɛ ndaapoposanyɛ.

NDE ILAKI YIMBA LÁ PRƆFƐSI YƐ BIBLE

8. Má ndjewa prɔfɛsi yɛ Bible, Yeso ndakambe la winá wɔnde lá wopo wɔ wɔlɔ ngete mo?

⁸ Yeso ewaki wopo wɔ prɔfɛsi yɛ Bible yongokotshama. Ewaki ante ndongokamba olemo wɔnde ngo ɛnɔnyi esato l’etenyi. (Dan. 9:26, 27) Ewaki kankina prɔfɛsi ilendana la winá edjinge wopo wɔ Mesiya ndongovɔ. (Luka 18:31-34) Má ndjewa nghɔsɔ, Yeso akambaka la winá wɔnde lá wopo wɔ wɔlɔ. Eposelo weyalisa nde, akambaka l’osasalo onkfumɔ djɛ nshiyɛ olemo wɔ yɔpɛyɛ.

9. Lamo prɔfɛsi yɛ Bible ototshindawɔ djɛ ndjala la osasalo lá olemo w’ipoposanyɛ?

⁹ Looka lɔso lɔ prɔfɛsi lokoka ntotshinda djɛ mpoposanyɛ l’osasalo. Tewa ente winá wɔ nkfumbo djɛ akambo djɛnɛ wombotshikala daambi. Tewa ente akambo w’andja wanɛ la nanghedji dj’anto lɔɔko kɛnɛ djɛnyɛ kɛnɛ kɛ Bible ndatepela lá nkambo djɛ etsho w’ekomo. Tɛna wopo wɔ mbandji kenana Onkfumi wɔ Anglo-Americain la wɔ Russie ole ewila wasuka okotshɛwɔ prɔfɛsi kɛ nkfumi kɛ nɔrɔ la nkfumi kɛ sidɛ ‘l’etsho w’ekomo wɛnɛ.’ (Dan. 11:40) Tewa lonkina ente Onkfumi wɔ Anglo-Americain ndeke djingingi dj’akaka wa isakandole yɛ Danyɛlɛ 2:43-45. Tawola ente, ete ngo prɔfɛsi ɛnyɛnde—lako ila—Onkfumi wɔ Ndjambe wɔkɔpa ntshita enkfumi wɛ wana w’anto. Prɔfɛsi inkfumɔ yɛsɔ yɛnyɛ ente tombetela nsukana l’ekomo la itotshinda djɛ mpoposanyɛ lankeke lankeke.

10. Lá wopo onkina wɔkɔnge prɔfɛsi yɛ Bible otokembɛwɔ djɛ nkindjɛ mpoposanyɛ l’osasalo?

¹⁰ Prɔfɛsi yɛ Bible itewola lonkina lamo oyɛso ladjɛ mpoposanyɛ. Carrie, nkaana kɛmɔtshi kekamba olemo wɔ winá enkfumɔ lá Republique Dominicaine atepela ante: “Alaka wakembɛ wa Yehova w’etsho weyaye wɛ wɔlɔ watotshinda djɛ mpoposanyɛ anto nsɔsɔlɔ.” Akfɛ ante: “Winá wɛnami wopo w’anto owikawɔ lɔɔko kɛnɛ, langɛnake ente alaka wanɛ wapalekɔ ngo lá wapɔ wɔmi toko, koko ole lá wapɔ wɔwɔ.” Prɔfɛsi yɛ Bible itokembɛ dj’ipa nkɔma ɛwɔ ladjikɛnde tewa ente Yehova alekɔ laso lá olemo w’ipoposanyɛ. Leila, kanga lowika lá Hongrie atepela ante: “Izaya 11:6-9 ntshindaka lemi djɛ ntshanghanyɛ losango lɔ wɔlɔ kaanga le anto wɛnama ente wapangawola. Ndjewa ente má okotshɔ wɔ Yehova, onto onkfumɔ nkoka ntshikitana.” Edjinge Christopher, wɔnanyɔ welá Zambie, atepela ante: “Ete ngo Marko 13:10 ndewoyɛ, losango lɔ wɔlɔ lotshanghana lá andja w’otondo, la ndekɔ la mpeyi kɛ nkotshɛ prɔfɛsi kɛnɛ.” Prɔfɛsi kɛkɔnge kɛ Bible kekotshinda djɛ nkindjɛ mpoposanyɛ?

NDE ALAWƐKƐKI LE YEHOVA DJƐ MBA OKOTSHƆ

11. Lamo Yeso ndayale la djonyi djɛ ndáwɛkɛ le Yehova djɛ nde ndokotshɛ́ djɛ mpoposanyɛ la osasalo? (Luka 12:49, 53)

¹¹ Yeso alawɛkɛki le Yehova djɛ nde ndokotshɛ́ djɛ nkindjɛ ndjala la osasalo wɔ mpoposanyɛ. Kaanga Yeso ndakambaka la topo tɔ mayɛlɛ, ewaki ante anto efula wapangawola losango lɔ wɔlɔ l’Onkfumi la longoyakala lɔnyɔkɔ. (Wala Luka 12:​49, 53.) Eposelo weyalisá nde, ewandji wɛ ntolo wahonaki mbala efula djɛ ndoyaka. (Dj. 8:59; 10:31, 39) Koko Yeso akindjɛki mpoposanyɛ ladjikɛnde ewaki ante Yehova alekɔ nya nde. Atepelaka ante: ‘Mpalekɔ mɔmɛlɛ, koko Papa kanga lontomisá alekɔ nya lemi. . . . Atankadjɛ mande lemi nangha winá onkfumɔ kɛnɛ k’osasangɛ.’—Dj. 8:16, 29.

12. Wopo wɔkɔnge Yeso ndalɔngɔsɔla ambeki wande djɛ nkindjɛ mpoposanyɛ lá winá wɔ lɔnyɔkɔ?

¹² Yeso avungolaka ambeki wande dj’iwɔ ladjɛ ndjilela Yehova oloko djɛ nde ndasuka. Ashikikɛka mbala la mbala ante Yehova angasuka kaanga lá winá wɔ yongopomana la lɔnyɔkɔ. (Mat. 10:18-20; Luka 12:11, 12) Ladjikɛnde ewaki ante anto efula wangonanyɛ losango lɔ wɔlɔ, ewolaka ambeki wande djɛ ndjala l’okoso. (Mat. 10:16; Luka 10:3) Álakaka dj’ipa ntshinda la wolo anto wapakɔpɛ ndawekameyɛ djɛ ndjawola losango lɔ wɔlɔ. (Luka 10:10, 11) La áshimelaka dj’iwɔ ndota ntsha wanyɔkɔla. (Mat. 10:23) Yeso ayalaka la osasalo la alawɛkɛka le Yehova, atalawila lá mbalaka nghotoko.—Dj. 11:53, 54.

13. Lamo awolɛ ente Yehova angokokotshɛ́?

¹³ Tolekɔ la djonyi djɛ okotshɔ wɔ Yehova djɛ nkindjɛ mpoposanyɛ la osasalo lá winá wɔ lɔnyɔkɔ lɔɔko kɛnɛ. (Ndj. 12:17) Lamo awolɛ ente Yehova angokokotshɛ́? Tokolenda lɔlɔmbɔ lɔ Yeso lolekɔ́ lá Djɔanɛ 17. Yeso alɔmbaka Yehova djɛ mbomba apɔstɔlɔ wande, ko Yehova akadjimolaka lɔlɔmbɔ lɔnde. Onkanda wɔ Elemo wɛnyɛ wopo wɔ ndakotshɛ́ apɔstɔlɔ wande djɛ mpoposanyɛ la osasalo ayale lá lɔnyɔkɔ. Lá lɔlɔmbɔ lɔsɔ, Yeso alɔmbaka kankina djɛ Yehova mbomba anto wangɛnyɛ djawo l’olemo w’ipoposanyɛ w’apɔstɔlɔ wande. Ndjila ngole wɛ. Yehova atatshike nkadjimola lɔlɔmbɔ lɔ Yeso; angokokotshɛ́ ndaka ndakotshɛ́ apɔstɔlɔ.—Dj. 17:11, 15, 20.

14. Wopo wɔkɔnge wewaso ente tongoyala la akoka wa mpoposanyɛ l’osasalo? (Lenda ntshango.)

¹⁴ Winá wolasɛmɛla ekomo, akoka ndjala wolo efula mpoposanyɛ la osasalo losango lɔ wɔlɔ, koko Yeso atoshikikɛ ante angɔtɔpɛyɛ okotshɔ woyɛso la djonyi djɛ ndjala la osasalo. (Luka 21:12-15) Ete ngo Yeso nya ambeki wande, totshika anto ndɔsa nkano djɛ ndjawola kana lako, la topasɛ ampɔsɔ lawɔ. Kaanga winá w’oshimbawɔ olemo wɔso, wananyɔ l’ankaana wakindjɛ mpoposanyɛ ladjikɛnde walawɛkɛ le Yehova, koko ape la wolo wɔwɔ. Ete ngo Yehova ndapɛyɛka enkambi wɛnde w’ɛtɛndɔ kɛ ntondo wolo, atɔpɛyɛ wolo lɔɔko kɛnɛ ‘djɛ olemo w’ipoposanyɛ nkambema wɔlɔ wɔlɔ’ djɛ ɛkɔpa kɛnde nkotshama. (2 Ti. 4:17) Ntsha ombilela Yehova oloko, okoka ndjala l’eshikikelo ente, ongokindjɛ mpoposanyɛ l’osasalo.

NDE AYALAKA LA IKANYI YƐ WƆLƆ

15. Kɛkɔnge kɛnyɛ ente Yeso ayalaki la ikanyi yɛ wɔlɔ lá olemo w’ipoposanyɛ?

¹⁵ Yeso ayalaka la ikanyi yɛ wɔlɔ lá nkambo djɛ olemo w’ipoposanyɛ. Kɛsɔ kokotshɛka djɛ ndjala la osasalo. Ndjɔmbɔmba, lá ekomo kɛ ɔnɔnyi wɔ 30 D.D., Yeso ɛnaka ante anto efula wayalaki entshupa djɛ ndjawola losango lɔnde, ko awɛdjɛka la bedji mbɛla djɛ mvuka. (Dj. 4:35) M’ɔkɔngɔ wɔ ɔnɔnyi ɔmɔ, ashimelaka ambeki wande: ‘Nkete djɛ mvuka dekɔ efula.’ (Mat. 9:37, 38) Ko m’ɔkɔngɔ, alɔkɔkɔmɛka lonkina ante: ‘Nkete djɛ mvuka dekɔ efula. . . Nyɔlɔmbɛ owandji wɔ vukelo djɛ nde ntoma enkambi la vukelo djɛnde.’ (Luka 10:2) Yeso ewaki ante anto wakoka ndjawola losango lɔ wɔlɔ, la asasangaki winá wɔ ndɛnyi wawola losango lɔkɔ.—Luka 10:21.

16. Wopo wɔkɔnge ndjɔmbɔmba yɛ Yeso ɛnyɛwɔ ente ayalaki la ikanyi yɛ wɔlɔ l’olemo w’ipoposanyɛ? (Luka 13:18-21) (Lenda ntshango.)

¹⁶ Yeso alakanyɛka apɔstɔlɔ wande ante dj’iwɔ nama osasalo wɔwɔ, ngo iwɔ ndjala l’ikanyi yɛ wɔlɔ lá losango lɔwɔ. Tokolenda ndjɔmbɔmba yɛnde ipe. (Wala Luka 13:18-21.) Yeso akambaka la lowambo lɔ mutardɛ djɛ ndakanyɛ ante losango l’Onkfumi longotshanghana lá wopo wɔ nkamɔ la longofula lá wopo wɔ sopewe ntepela. Lá ndjɔmbɔmba kɛmɔtshi, ɛdjɛka losango l’Onkfumi la okanga w’ifudjɛ, ladjikɛnde longotshangana l’andja w’otondo la longotshikitanyɛ mbiko y’anto, kaanga anto efula yopanghɛna eposelo wɛsɔ. Yeso ashikikɛka apɔstɔlɔ wande ante losango lopoposanyɛwɔ longokotshɛ́ anto efula.

17. Donga djɛkɔnge dj’okotshɛso djɛ ndjala l’ikanyi yɛ wɔlɔ l’olemo w’ipoposanyɛ?

¹⁷ Totshindama djɛ mpoposanyɛ la osasalo má ndjila yimba lá akambo wananghema lɔɔko kɛnɛ l’andja. Ɔnɔnyi onkfumɔ, miliyɔ y’anto wakɔpa nsɔsɔlɔ ndjingelaka lá Bokfɔ la ndjekaka laso Bible. Anto nkone la nkone walongola batisimo la watɔwɔlama djɛ nkamba olemo w’ipoposanyɛ. Topewe anto amangha wangawola losango lɔso, koko tewa ente Yehova atshumanyɛ oloyi w’ekekete wongowika lá efunge funge k’ekekete keyaye. (Ndj. 7:9, 14) Owandji wɔ vukelo akindjɛ nyɛna nkete djɛ wɔlɔ lá bedji, djɛko ndeke tolekɔ la donga djɛ wɔlɔ djɛ mpoposanyɛ.

18. Ɔkɔpaso anto ankina nyɛna leso nge?

¹⁸ Ambeki wa nsɔsɔlɔ wa Yeso mpoposanyɛka winá enkfumɔ la osasalo losango lɔ wɔlɔ. Winá w’anto yɛnyi ambɔ apɔstɔlɔ watepela akambo poo poo, ipa ndjoka wɔma, ‘wewaka ambɔ wayalaki la Yeso.’ (Ele. 4:13) Tɔkɔpa anto wopoposanyɛso nyɛna ente ndjɔmbɔmba kɛ osasalo wɔ Yeso kelekɔ la ndjimbo leso.