DJAMBA DJƐ WEKELO 15
YEEMBO 30 Papa kɛmi, Ndjambe kɛmi edjinge Ilongo yɛmi
‘Malema Ndjambe alekɔ wɔlɔ’ leso!
‘Le lemi, malema Ndjambe alekɔ wɔlɔ le lemi.’—YEE. 73:28.
IKANYI YƐ DJAMBA
Wopo w’okokaso nsukana la Yehova la esako w’okokaso mba.
1-2. a) Welo wɛkɔnge wɛlɔmbama ndjila djɛ ndjala la djokanelo djɛ ma ma l’onto ɔmɔtshi? b) Ɛnaso lá djamba djɛnɛ lɔ nge?
OLEKƆ l’ilongo imɔtshi yɛ ma ma? Wopo wɔkɔnge ngawange ndjokana nyape? Mbala imɔtshi ohetshɛka winá efula nyape, ekaka djɛ ndjewa ekakasano wɛnde, la ohonaka djɛ ndjewa kɛnɛ kɔkɔpande la kɛ ndopakɔpɛ. Ɛnaka ente alekɔ la wekeka wa wɔlɔ wokokɛ ndjokola. Oyɛka ndɔkɔpa ilongo yɛko.
2 Alɔmbama winá la welo efula djɛ ndjala ilongo nya onto. Oyɛwɔ ngo nghɔsɔ ntsha ɔkɔpa ndjala ilongo yɛ wɔlɔ yɛ ma ma yɛ Yehova Ndjambe. Djamba djɛnɛ ngɔtɛnyɛ wopo wokokaso malema Ndjambe la esako wɛ songowa. Ntondo ntondo tɔkɔtɔnɔla lá donga djɛnyɛ lamo oyɛso ladjɛ malema Ilongo yɛso yɛ wɔlɔ Yehova.
3. Lamo oyɛso ladjɛ ntɔnɔla lá wapɔ weyɛ má malema la Yehova? Pɛyɛ ndjɔmbɔmba.
3 Ape l’ehamo, awola ente alekɔ wɔlɔ nsukana la Yehova. Koko, ntɔnɔla lá wopo wɔ wɔlɔ wɔ nsukana la nde nkoka ntotshinda djɛ nkindjɛ ndomalema. (Yee. 63:6-8) Ndjɔmbɔmba, tewa ente oleelo wɔ wɔlɔ, nanola demba, mpomola efula, nɔ washi efula, alekɔ wɔlɔ efula leso. Anto efula wapakipɛka nkete djɛsɔ, ko wapilaka alemba wawɔ yimba. Koko ntsha tɔmbɔtɔnɔla lá wopo w’akambo wasɔ otokembɛwɔ demba, tongokindjɛ nangha akambo wakɔ. Lá wopo wɔkɔ ɔmɔ, tewa ente malema Yehova alekɔ wɔlɔ efula leso, koko ntɔnɔla lá wapɔ wowaso má nangha nghɔsɔ nkoka ntotshinda djɛ malema Ilongo yɛso.—Yee. 119:27-30.
4. Lá nkilika Yeembo 73:28, ondjombe ndatshumbe ante mo?
4 Wala Yeembo 73:28. Omfunyi wɔ Yeembo 73 ndayalaka nde ose lewi wɔ yasɔnɛ djɛ ntshumba lá tɛmpɛlɔ kɛ Yehova ete ngo ondjombe. Atɛmɔlaka Yehova l’ilá k’ɛnɔnyi ɛmɔtshi. Koko ayalaki la djonyi djɛ nde mvungɔ kana djɛ mvungola anto ankina ente ‘Malema Ndjambe’ alekɔ wɔlɔ lende la lewɔ. Wapɔ ɛmɔtshi wɛkɔnge weyɛka má nangha nghɔsɔ?
‘MALEMA NDJAMBE’ NDJAKALAKA OSASA
5. a) Lamo malema Yehova otoyakalawɔ osasa? b) Lá nkilika Woongo 2:6-16, kɔpɛyɛ ndjɔmbɔmba kɛnyɛ lamo balo djɛ Yehova okokawɔ ndjala la wapɔ edjinge okokawɔ mbomba onto la onto.
5 Tongoyala l’osasa ntsha tokindjɛ nsukana la Yehova. (Yee. 65:4) Alekɔ nsɔsɔlɔ m’ɔtɛ wɔ donga efula. L’onkoko onkina, ekete kɛ ntondo nde, tongowake wapɔ má nkamba l’alako wa balo w’Otepela wɔnde, Bible. Balo djɛ nghɔsɔ ntolamaka má ndjimbo yɛ nyɛtshi, la dj’ipa nangha evunga wɛ nkekete. (Wala Woongo 2:6-16.) Bible dekɔ l’elonga winá w’otepelande ante: ‘Osasa le onto wombowa balo la onto wombowa ntɔnɔ.’—Woo. 3:13.
6. Kɛkɔnge ketshutsheyisá ondjombe osasa wɔnde?
6 Lá nsɔsɔlɔ, kaanga tolongo tɔ Yehova ndjalaka lá deko djɛ ndjolo. Omfunyi wɔ Yeembo 73 atshutshɛka osasa wɔnde winá wɔ ndatɔnɔla l’akambo wa nyɛtshi. Atateyɛka ntshimba yimba la ndula anto ankina mande, akanelaki ante anto wa nyɛtshi wapewe Ndjambe kana ɛlɛmbɛ wɛnde wayalaki la lowiko l’osasa. Nde aladjimbaki ante anto wa lopango la wetako wangoyalake winá enkfumɔ l’okfudji, l’alemba wolo, ole wapɛnaka ndjolo. (Yee. 73:3-7, 12) Ondjombe atshimbaka yimba efula tii akomaka l’idjena yɛnde ndáwopola ntsha welo wilande djɛ nkambela Yehova welekɔ la ntshina. La yɛnyi inkfumɔ, atepelaka ante: ‘Malame oloko wɔmi pɛtɔ ngo totoko la masole akatshi wami dj’ipa ndjala la mbalaka.’—Yee. 73:13.
7. Wopo wɔkɔnge wokokaso ndáwomba má yɛnyi ikoka ntotshutsheyɛ osasa wɔso? (Lenda ntshango djɛ loposo.)
7 Ondjombe atatshika yɛnyi yɛsɔ ndosolongoyɛ. Ananghaka nkambo mɔtshi. ‘Ingelaka lá tɛmpɛlɔ kɛ nkamɔ k’ekina kɛ Ndjambe,’ edjena kɛ Yehova ndasembola ikanyi yɛnde. (Yee. 73:17-19) Winá woyɛso la yɛnyi, Ilongo yɛso Yehova, ndjewaka. Ntsha tɔmbɔlɔmba djɛ nde ntɔlɔndjɛ la tombawola okotshɔ wɔnde má mbamba k’Otepela wɔnde l’otshumano, tongowa wolo wɔ l’eteyi w’iso nkfulumeyɛ. Kaanga winá wokaso yɛnyi efula, Yehova angotokembɛ la angotoshikimadjɛ.—Yee. 94:19.a
Ose Lewi w’ofunisá Yeembo 73, amemala lá ‘tɛmpɛlɔ kɛ nkamɔ k’ekina kɛ Ndjambe’ (Lenda itenyi 7)
‘MALEMA NDJAMBE’ NTƆPƐYƐKA LOWIKO LOLEKƆ L’OKOMA LA NKONGI
8. Nsukana la Ndjambe oyɛwɔ wɔlɔ leso lá wepo enkina wɛkɔnge?
8 Nsukana la Ndjambe alekɔ wɔlɔ leso m’akambo ape wa djonyi wanɛ. Djɛ ntondo, ntɔpɛyɛka lowiko lolekɔ́ l’okoma. Dj’ape, ntɔpɛyɛka nkongi djɛ wolo dj’etsho weyaye. (Jɛr. 29:11) Nyontshɔ tokotshimola akambo wasɔ.
9. Wopo wɔkɔnge malema Yehova ɔtɔpɛyɛwɔ lowiko lolekɔ́ la okoma?
9 Malema Yehova ntɔpɛyɛka lowiko lolekɔ́ l’okoma. Anto efula watepela lɔɔko kɛnɛ ambɔ Ndjambe apalekɔ, wafɛnyɛ ambɔ lowiko lopalekɔ l’okoma la ekomo ekomo anto wapangoyala kankina. Koko má wekelo wɔ Otepela wɔ Ndjambe, tombolashikikɛ ente Ndjambe ‘alekɔ ole alekɔ omfuti w’anto wohona la oloko ɔmɔ.’ (Heb. 11:6) Kaanga lɔɔko kɛnɛ, tolekɔ la lowiko l’osasa mande tonangha kɛnɛ kɛ satonghama djɛ nangha—nkambela Papa kɛso kɛ l’olongo, Yehova.—Mvu. 10:12, 13.
10. Yeembo 37:29 ɛnyɛwɔ anto wakongela Yehova lá nkambo dj’etsho weyaye nge?
10 Anto efula, oyɛwɔ ngo la nkongi djɛ mbika lowiko l’itenyi lɔnɛ—nkamba elemo, mbongola nkfumbo, la mbomba ndambo kɛ nkfuta djɛ winá wɔ olemo yongoshila (kana wɔ yɔngɔsa pension). Wapewe kɛnɛ kɛ Ndjambe ndombolaka. L’onkoko onkina, nkongi djɛ enkambi wɛnde oyɛwɔ ngo le nde. (Yee. 25:3-5; 1 Ti. 6:17) Tolawɛkɛ le Ndjambe kɛ sombomalema, la tilela alaka wande oloko. Tolekɔ ole la nkongi djɛ ndɔtɛmɔla lá Paradiso etshinda etshinda.—Wala Yeembo 37:29.
11. Wopo wɔkɔnge nsukana la Ndjambe oyɛwɔ l’eposelo leso, ko wopo wɔkɔnge oyɛwɔ l’eposelo le nde?
11 Nsukana la Ndjambe alekɔ wɔlɔ leso lá wepo enkina. Ndjɔmbɔmba Yehova alaka djɛ nyimeyɛ anto walapɛla la wasukana la nde. (Iza. 1:18) Epesolo welekɔ́ nde, topawɛmbɛ lonkina edjito wɛ nkfum’oloko ketolomboyɛ m’ɔtɛ wɔ mpekanto yɛ ntondo yɛ sananghe. (Yee. 32:1-5) La tolekɔ la osasa wɔ nsasangɛ Yehova. (Woo. 23:15) Lá nsɔsɔlɔ, tokoka ntɔnɔla lá esako enkina weyɛ má ndjala ilongo yɛ Ndjambe. Iya wopo wɔkɔnge wokokɛ nkindjɛ nsukana la Ndjambe?
WOPO WƆ NKINDJƐ ‘MALEMA NDJAMBE’
12. Akambo wakɔnge ngananghe djɛ malema Ndjambe?
12 Ntsha oyɛ nde Okristo wombolongola, omonangha akambo efula wakosukanyɛ la Yehova. Ombeka akambo wa nsɔsɔlɔ efula walendana la Yehova Ndjambe, edjinge la Yeso Kristo, ombolapɛla má mpekanto yɛko yɛ ntondo, olekɔ la djawo djɛ wolo le Ndjambe, la onangha la wolo djɛ mbika lá nkilika ɛkɔpa kɛnde. Koko djɛ malema Ndjambe, iso ladjɛ nkindjɛ nangha akambo wasɔ.—Kɔl. 2:6.
13. Akambo asato wakɔnge wangotokotshɛ́ djɛ malema Yehova?
13 Ekete kɛkɔnge kengokokotshɛ́ djɛ nkindjɛ malema Yehova? 1) Iso ladjɛ nkindjɛ mbala la ndjeka Bible. Okoma wɔso wotayalake ngo wɔ ndjeka akambo walendana la Ndjambe toko. Koko tonanghe la wolo djɛ nyɛna Ndjambe oyɛnde na leso, ladjɛ ntshika tɔkfɔ tɔ Bible tɔ ndafune lá Otepela wɔnde ntɔlɔndjɛ. (Ɛfɛ. 5:15-17) 2) Iso ladjɛ nkembɛ djawo djɛso má ntɔnɔla lá efula kɛ tolembetelo tɛnyɛ ngandji kɛnde leso. 3) Iso ladjɛ nkindjɛ nkfupa nkete djomadjɛ Yehova la ntona ndjala tolongo tɔ anto wanangha akambo wa nyɛtshi.—Yee. 1:1; 101:3.
14. Lá nkilika 1 Kɔrɛtɔ 10:31, akambo amɔtshi wakɔnge wokokaso nangha lofu la lofu djɛ nsasangɛ Yehova? (Lenda asango.)
14 Wala 1 Kɔrɛtɔ 10:31. Alekɔ djonyi efula iso nangha akambo wasasangɛ Yehova. Kɛsɔ mpakisolaka akambo efula ape ngo mpoposanyɛ la ntshɔ tá nsanghanyɛ. Lá akambo wa wɔlɔ wasasangɛ Ndjambe, tokoka ndjila ole kɛnɛ konanghaso lofu la lofu. Ndjɔmbɔmba winá w’oyɛso sii lá akambo ankfumɔ, la w’okapanaso la anto ankina kɛnɛ k’okotshɛso, tosasangɛ Yehova. (2 Kɔ. 8:21; 9:7) Tɔngɔkɔpake lonkina ndɔsa ɔpapɛyɛ wɔ lowiko l’odjito. Tosukana la ikɔkɔ yɛ lowiko má ndjala la wɛdjimo lá oleelo, ɔnwɛlɔ la má ndɔngɔsɔla demba djɛso lá lɛdji lokoka. Welo enkfumɔ wonanghaso djɛ nsasangɛ Yehova, kaanga lá tokakambo tɔ daambi, ntosukanyɛka lande.—Luka 16:10.
Ndjewa nkɛndjɛ otuka ipa ndawila lá mbalaka, nanola demba, ndɛ nkete djɛ wɔlɔ ole ndjala la nkapo, alekɔ topo tɔmɔtshi tokokaso nsasangɛ Yehova (Lenda itenyi 14)
15. Yehova okongande dj’iso ndɔsa anto ankina ngete mo?
15 Yehova alekɔ onto wɔlɔ ole le anto wa wɔlɔ la le anto wa nyɛtshi. (Mat. 5:45) Nde nkongaka dj’iso ndɔsa anto ankina ete ngo nde awɔsande. Ndjɔmbɔmba, topakoke ‘ntepela nyɛtshi lá nkambo djɛ onto, topakoke ndjala anto wasɛ ampɔsɔ, . . . toyale la ndákota te onto onkfumɔ.’ (Tito 3:2) La akambo ankfumɔ wasɔ lá yimba, topakoke ndɔsa anto ankina ente walekɔ anto watotoko ngo mande wapasange djawo laso. (2 Ti. 2:23-25) Tongomalema Yehova má ndjala winá onkfumɔ anto wɔlɔ la má ndɔsa anto ankfumɔ l’odjito.
TOKOKA ‘MALEMA NDJAMBE’ KAANGA WINÁ WONANGHASO OVUNGA
16. Omfunyi wɔ Yeembo 73 ndatateyɛ ndáwoka m’ɔkɔngɔ wɔ winá ɛmɔtshi ngete mo?
16 Iya ntsha m’ɔkɔngɔ wɔ winá ɔmɔtshi, ombotateyɛ ndjoka ente ɔpɛlama djɛ Yehova nkɔkɔpa? Ete ngo sɛnisa, nkambo djɛ nghɔsɔ nkomelaka omfunyi wɔ Yeembo 73. Atepelaka ante: ‘Ekolo wɛmi weyalaka entshupa djɛ mpengɔ mboka; akaka wami wayalaka entshupa djɛ nsɛlɛmɔ.’ (Yee. 73:2) Asuyɛka ante ayalaki la ‘yɛnyi’, la ‘ayalaki l’ekanedji kɛ nyɛtshi ete ngo nyama k’enkesa’ lá ntondo kɛ Yehova. (Yee. 73:21, 22) Atepelaka ante mande amonangha ovunga, apangokalɔ lá mboka kana apɛdje Yehova ndɔkɔpa?
17. a) Kaanga lá winá wɔ ndahɔlɛ, ondjombe ndananghe nge? b) Owaso olakanyelo wɔkɔnge má ndjɔmbɔmba kɛnde? (Lenda asango.)
17 Ntsha ondjombe ɛnaka ante Yehova ambokadjɛ, mbɔ koko ikanyi yɛsɔ yayale ngo yɛ winá ɛmɔtshi. Ɛnama ente lá winá wɛ ndahɔlɛ wɛsɔ, asuyɛka ante alekɔ la djonyi djɛ malema Ndjambe, ete ngo etepela wɛnde wɛnɛ ɛnyɛwɔ: ‘Koko winá wɔsɔ lemi ndekɔ winá enkfumɔ isape [Yehova]; wɛ omonkota lá womɛ lɔwɔ lɔmi. Wɛ ɔndɔndjɛ linko l’alako wako, ko manyi wɛ ɔngɔntɔla tá lomo.’ (Yee. 73:23, 24) Ole iso ladjɛ nyɛna Yehova ente alekɔ ve djetoshikimadjɛ winá wɔlɛmbaso kana oyɛso wɔdju. (Yee. 73:26; 94:18) Kaanga akaka waso wambovunga mboka lá winá ɛmɔtshi, tokalɔ le Yehova l’eshikikelo ente alekɔ ‘entshupa djɛ nyimeyɛ.’ (Yee. 86:5) Pekapeka ntsha tɔmbɔlɛmba efula, tosukane la Ndjambe kɛso.—Yee. 103:13, 14.
Winá wɔlɛmbaso lá nyuma, iso ladjɛ malema Yehova má ndapɛyɛ efula lá ɔtɛmwɛlɔ wɔnde (Lenda itenyi 17)
‘TOMALEME NDJAMBE’ ETSHINDA ETSHINDA
18. Lamo yopalekɔ l’olelo djɛ nsukana la Yehova?
18 Lako olelo lá wopo w’okokaso nsukana la Yehova la wopo wokokaso ndowewa. Bible ntepela ante mboka, djaana, la djewo djɛ Yehova, ‘mpakoke nsɔsɔlɔ ndjewama.’—Ɔrɔ. 11:33.
19. Yeembo 73 ɔtɔpɛwɔ eshikikelo kɛkɔnge?
19 Yeembo 79:13 itepela nghɔnɛ: ‘Iso anto wako la ɛnkɔkɔ wɛ lá lokoto lɔko, tongokokawoyɛka lokasa lotshinda lotshinda; edjinge tongotshanghanyɛka lomo lɔko lá lɔsɔkɛ la lɔsɔkɛ.’ Ole wɛ okoka ndjala l’eshikikelo ente ongowa esako w’ipa l’ekomo winá w’okindjɛ malema Ndjambe, edjinge okoka ntepela la eshikikelo kenkfumɔ ente: ‘Ndjambe alekɔ ve djɛ oloko wɔmi la opiko wɔmi etshinda etshinda.’—Yee. 73:26.
YEEMBO 32 Heta l’onkoko wɔ Yehova!
a Anto wamonana ilá efula la ndjolo, yɛnyi la wambotshimba yimba, nkoka ndjala la djonyi djɛ okotshɔ wɔ tofulume. Djɛ ndjewa akambo efula, lenda Etange k’Olami, No. 1 2023.