DJAMBA DJƐ WEKELO 23
YEEMBO 2 Yehova ndeke djiina djɛko
Kɛnɛ kesakisola djiina djɛ Yehova lewɛ
‘“Nyolekɔ ewakɛ wɛmi,” ndeke lotepela Yehova.’—IZA. 43:10.
IKANYI YƐ DJAMBA
Nyɛnyɛ odjito wɔso lá okinyelo la osolelo wɔ djiina djɛ Yehova.
1-2. Ewaso ente djiina djɛ Yehova djalaki la ntshina efula le Yeso ngete mo?
DJIINA djɛ Yehova djalaki la ntshina efula le Yeso. Nde ndeke onto wolekisá nsola djiina djɛ Papa kɛnde. Ngo ngete satepela lá djamba mboheta, Yeso ayalaka entshupa djɛ mvɔ l’ɔtɛ wɔ djiina djɛ Papa kɛnde, la kɛnɛ kesakisola djiina djɛsɔ. (Mar. 14:36; Heb. 10:7-9) La m’ɔkɔngɔ w’Ɛlɔndjɛlɔ k’Ɛnɔnyi Kinunu, Yeso angoyala entshupa djɛ nkawoyɛ lowandji lonkfumɔ djɛ nkinyɛ djiina djɛ Yehova. (1 Kɔ. 15:26-28) Ngandji kɛ Yeso tá djiina djɛ Ndjambe kɛtɛnyɛ djokanelo djɛnde dj’efula nya Papa kɛnde. Kenkfumɔ kɛ Yeso ndananghaka kɛnyɛ ente akɔpa Yehova efula.
2 Yeso ayɛka lá looko lá djiina djɛ Papa kɛnde. (Dj. 5:43; 12:13) Ewanyɛka djiina djɛ Papa kɛnde le ambeki wande. (Dj. 17:6, 26) Alakanyɛka, la ananghaka ansese lá djiina djɛ Yehova. (Dj. 10:25) Lá nsɔsɔlɔ, Yeso alɔmbaka Yehova djɛ mbakela ambeki wande ‘l’ɔtɛ wɔ djiina’ djɛnde. (Dj. 17:11) Djɛko ndeke, ntsha Yeso aseelaka la nkfulu kenkfumɔ djiina djɛ Yehova, wopo wɔkɔnge onto okokande mpomela ikole ante alekɔ ombeki wɔ nsɔsɔlɔ wɔ Kristo ntsha apewe kana apakambe la djiina djɛ Papa kɛnde?
3. Ɔkɔpaso ntepela lá djamba djɛnɛ nge?
3 Ete ngo Akristo wasɛsa nkilika wina wa Yeso, tɔngɔsake la ntshina efula djiina djɛ Papa kɛnde. (1 Pɛ. 2:21) Lá djamba djɛnɛ, tɔnghɛna lamo Yehova ndapɛyɛ anto ‘wapoposanyɛ losango lɔ wɔlɔ l’Onkfumi’ djiina djɛnde. (Mat. 24:14) Tɔnghɛna lonkina kɛnɛ kɛ djiina djɛ Yehova osakisolawɔ l’onto l’onto wɔ l’anteyi kɛso.
‘ANTO WAMBƆSƆNAMA . . . DJƐ DJIINA DJƐNDE’
4. a) Odjito wɔkɔnge Yeso ndapɛyɛ ambeki wande lá ntondo kɛ nkalɔ tá olongo? b) Woopó wɔkɔnge wɔkɔpaso nkadjimola lá djamba djɛnɛ?
4 Lá ntondo kɛnde nkalɔ tá olongo, Yeso ashimelaka ambeki wande ante: ‘Nyo nyongowa wolo winá wɔ nyuma k’ekina yongoyɛ le nyo, ole nyongoyala Ewakɛ wɛmi lá Jerusalɛmɛ, lá Judeya dj’otondo la Samariya, tii tá djena djetale djɛ looko.’ (Ele. 1:8) Djɛko ndeke losango lɔ wɔlɔ yapoposanyema ape ngo lá Isariyɛlɛ toko koko ole lá djena dj’etale. Okama papoo ente anto wa ewila enkfumɔ wangowa mbamba kɛ nkoma ambeki wa Yeso. (Mat. 28:19, 20) Yeso atepelaka ante: ‘Nyongoyala Ewakɛ wɛmi.’ Ambeki wa bango wasɔ wangoyala ladjɛ ndjewa djiina djɛ Yehova, ndo koko yongoyala ngo Ewakɛ wɛ Yeso toko? Akambo watepelama lá Elemo shapitrɛ 15 watokotshɛ́ djɛ nkadjimola lá woopó wɔsɔ.
5. Wopo wɔkɔnge tokokolo tɔ Jerusalɛmɛ la apɔstɔlɔ yɛnyɛ ambɔ anto ankfumɔ ladjɛ ndjewa djiina djɛ Yehova? (Lenda ntshango.)
5 Lá 49 D.D., apɔstɔlɔ la tokokolo tɔ Jerusalɛmɛ wasanghanaka djɛ ntepela kɛnɛ kɛ ase ewila yayale ladjɛ nangha dj’iwɔ ndjawolama ete ngo Akristo. L’ekomo, Djakɔbɔ, ankfunɛ Yeso, atepelaka ante: ‘[Pɛtɛlɔ] ambɔkɔndɔlaka wɔlɔ wɔlɔ wopo wɔ Ndjambe ndile ase ewila yimba mbala kɛ ntondo djɛ nsɔna anto amɔtshi m’anteyi kɛwɔ djɛ djiina djɛnde.’ Djakɔbɔ ndatepela djɛ djiina dj’onto wɔkɔna? Winá wɔ ndatepela etepela wɛ ɔprɔfɛtɛ Amɔsɛ, akfɛka ante: ‘Djɛ anto wambotshikala mpona Yehova l’oloko ɔmɔ, esanga l’anto w’ewila enkfumɔ, anto wetama lá djiina djɛmi, ndeke lotepela Yehova.’ (Ele. 15:14-18) Ambeki wa bango wasɔ wapangeka ngo akambo walendana la Yehova toko, koko ole ‘wangetama lá djiina djɛnde.’ Kɛsɔ nsakisolaka ente wangɔlɔta la wangewama má djiina djɛ Ndjambe.
Lá losanghanyɛ lɔ iloyi yɛ lɔndjɛ yɛ ɛtɛndɔ kɛ ntondo, ampame yɛ nkɔmano wɛnyɛka papoo ambɔ Akristo ladjɛ ndjala anto wambɔsɔnama djɛ djiina djɛ Ndjambe (Lenda itenyi 5)
6-7. a) Lamo Yeso ndaye lá looko? b) L’ɔtɛ wɔ nkambo nkina djɛkɔnge deka djonyi ndaye lá looko?
6 Djiina djɛ Yeso mɛlɛmɛlɛ osakisolawɔ nde “Yehova alekɔ ewiko,” la ɛnyɛka papoo ante Yehova awikɛ anto walekɔ́ la djawo má mbamba kɛnde. Yeso nyaye lá looko nde djɛ ndálambola lá nkambo djɛ anto. (Mat. 20:28) Má mfuta oshinga wɔ mbendo, adjipolaka anto mbamba kɛ mbika ole kɛ mba lowiko l’etshinda.—Dj. 3:16.
7 Ko lamo anto yayale la djonyi djɛ oshinga wɔ mbendo? M’ɔtɛ wɔ kɛnɛ keposisá lá bedji dj’Ɛdɛna. Ete ngo isatepela lá djamba mboheta, ambotshi waso wa ntondo, Adama l’Eva, wapendolaka Yehova ko watshutshɛka mbamba kɛ mbika etshinda etshinda. (Ewa. 3:6, 24) Koko, Yeso ayɛka djɛ ndonangha ekete kɛmɔtshi kɛ djonyi efula keleka ewiko kɛ ananghi yɛ mpekanto. Satana atonganyeyɛka Yehova akambo wa nkekete efula. (Ewa. 3:4, 5) Djɛko ndeke ewiko kɛ tonkanola tɔ Adama la Eva kalendanaki la nkambo mɔtshi dj’ekekete efula—okinyelo wɔ djiina djɛ Yehova. Mande Yeso ndayalaka nde ntomɔ kɛ Yehova la alɔtaki djiina djɛnde, ananghaka akambo efula djɛ nkinyɛ djiina djɛ Yehova.
Wopo wɔkɔnge onto okokande mpomela ikolo ante alekɔ ombeki wɔ nsɔsɔlɔ wɔ Kristo ko apewe kana apakambe la djiina djɛ Papa kɛnde?
8. Anto ankfumɔ walekɔ́ la djawo le Yeso oyɛwɔ ladjɛ ndjewa nge?
8 Anto ankfumɔ wanghɛnyɛ́ djawo le Yeso, ayale ase Juda kana ase ewila, ladjɛ ndjewa ikɔkɔ yɛ ewiko kɛwɔ, ntepela ente Papa kɛ Yeso, Yehova Ndjambe. (Dj. 17:3) Lonkina, ete ngo Yeso, wangetama lá djiina djɛ Yehova. Wayalaka lonkina ladjɛ ndjewa djonyi djɛ okinyelo wɔ djiina djɛkɔ. Yongowa ewiko ngo m’eteyi. (Ele. 2:21, 22) Djɛko ndeke ambeki ankfumɔ wa Yeso wa nkɔmano wayalaka la djonyi djɛ ndjeka akambo walendana la Yehova ete ngo Yeso. Topakamɔ lamo Yeso ndakomeyɛ lɔlɔmbɔ lɔnde lɛnaso lá Djɔanɛ 17 l’etepela wɛnɛ: ‘Lemi ndjewanyɛka djiina djɛko lewɔ ole langewanyɛ, djɛ ngandji kɛ ngandjoke ndjala l’anteyi kɛwɔ la lemi ndjala esanga isawɔ.’—Dj. 17:26.
‘NYOLEKƆ EWAKƐ WƐMI’
9. Okokaso nyɛnyɛ ente djiina djɛ Yehova dekɔ la ntshina efula leso ngete mo?
9 Ambeki ankfumɔ wa nsɔsɔlɔ wa Yeso, ladjɛ ndjila yimba lá okinyelo wɔ djiina djɛ Yehova. (Mat. 6:9, 10) Iwɔ ladjɛ ndɔsa djiina djɛ Yehova la ntshina ndeka wiina ankfumɔ. Kɛsɔ ndɔmbaka iwɔ nangha akambo amɔtshi. Ko wopo wɔkɔnge wokokaso ndɔsa opiko lá okinyelo wɔ djiina djɛ Yehova, kana ndjɛdjɛ má engolo enkfumɔ wɛ Satana?
10. Mvulu kɛ tominanyi kɛ djingingi kɛkɔnge kotepelawɔ lá onkanda w’Izaya 42-44? (Izaya 43:9; 44:7-9) (Lenda ntshango.)
10 Shapitrɛ 42-44 k’onkanda w’Izaya kɛnyɛ ente tolekɔ l’odjito w’ekekete efula wɔ nkinyɛ djiina djɛ Yehova. Shapitrɛ yɛnɛ itepela djɛ mvulu kɛ tominanyi kɛ djingingi, ko l’eteyi Yehova opola tondjandjambe dj’iwɔ nyɛnyɛ ntsha walekɔ andjambe yɛ nsɔsɔlɔ. Etaka lonkina anto djɛ ndowakola andjambe yɛsɔ. Koko lako kaanga onto wokoka mbakola!—Wala Izaya 43:9; 44:7-9.
Tɔsa opiko lá dombo nanghema lá mvulu kɛ tominanyi kɛsɔ lá wepo efula (Lenda itenyi 10-11)
11. Kɛkɔnge kɛ Yehova ndashimela enkambi wɛnde, ete ngo ɛnaso lá Izaya 43:10-12?
11 Wala Izaya 43:10-12. Yehova atepela djɛ enkambi wɛnde ante: ‘Nyo nyolekɔ ewakɛ wɛmi . . . ole lemi ndeke Ndjambe.’ Yehova álɔmba dj’iwɔ nkadjimola lá woopó wɔnɛ: ‘Me lemi, Ndjambe kenkina alekɔ?’ (Iza. 44:8) Tolekɔ la mpeyi kɛ nkadjimola lá woopó wɔsɔ. Má etepela la nanghedji djɛso, towakola ente Yehova ndeke ɛtɔyi kɛ Ndjambe kɛ nsɔsɔlɔ. Djiina djɛnde dekɔ lá djiko djɛ wiina ankfumɔ. Tɛnyɛ lá lowiko lɔso l’otondo ente tɔkɔpa Yehova, la tolekɔ la nkɔmano le nde, ayale kaanga Satana otilande l’ehemba. Lá lɛdji lɔsɔ, tolekɔ la mbamba kɛ nkotshɛ́ djɛ nkinyɛ djiina djɛnde.
12. Prɔfɛsi kɛ Izaya 40:3, 5 yakotshama ngete mo?
12 Tokola Yeso Kristo winá wosukaso djiina, kana lokumu lɔ Yehova. Izaya ewoyɛka lonkina ante onto ɔmɔtshi ‘angɔmbɛla [kana “angɔlɔngɔsɔla,” nɔtɛ.] mboka kɛ Yehova.’ (Iza. 40:3) Yakotshama ngete mo? Djɔanɛ ombatisanyi alɔngɔsɔlaka mboka kɛ Yeso, kanga loyisá la lotepelaki lá djiina djɛ Yehova. (Mat. 3:3; Mar. 1:2-4; Luka 3:3-6) Prɔfɛsi kɛkɔ ketepelaki nghɔnɛ: ‘Lomo lɔ Yehova longisɔ.’ (Iza. 40:5) Nkambo djɛsɔ yananghema ngete mo? Winá wɔ Yeso nyaye lá looko, ɛnyɛka lá lɛdji lɔ djɔ ante alekɔ ntomɔ kɛ Yehova, ngo ngete Yehova ndeke loyisá nyɔmɛlɛ kɛnde lá looko.—Dj. 12:45.
13. Okokaso ndjokola Yeso ngete mo?
13 Ete ngo Yeso, tolekɔ Ewakɛ wɛ Yehova. Tɔlɔta djiina djɛ Yehova la toshimela anto ankfumɔ akambo wande wa nkamɔ. Koko djɛ nangha nkambo djɛsɔ wɔlɔ, iso ladjɛ ndjewanyɛ odjito wɔ djonyi wolekɔ́ la Yeso lá okinyelo wɔ djiina djɛ Yehova. (Ele. 1:8) Yeso alekɔ Owakɛ wɔ Yehova wɔ ntondo, la tokilika ndjɔmbɔmba kɛnde. (Ndj. 1:5) Ko kɛkɔnge kesakisola djiina djɛ Yehova leso?
KƐNƐ KESAKISOLA DJIINA DJƐ YEHOVA LESO
14. Ete ngo Yeembo 105:3 ɛnyɛwɔ, okaso ngete mo lá nkambo djɛ djiina djɛ Yehova?
14 Tofula ensamba djɛ djiina djɛ Yehova. (Wala Yeembo 105:3.) Yehova nsasangaka efula ntsha tofuna la djiina djɛnde. (Jɛr. 9:23, 24; 1 Kɔ. 1:31; 2 Kɔ. 10:17) ‘Mfuna lá nkambo djɛ Yehova’ osakisolawɔ nde ntonatona ente Yehova ndeke Ndjambe kɛso. Tɔsa ente ndjila djiina djɛnde onkfunda la nsuka lokumu lɔnde oyɛwɔ nde mpeyi k’ekekete. Topakoke ndjoka nsɔnyi nshimela ambayi yɛso y’olemo, yɛ nkalasa, epasɔ, la anto ankina ente oyɛso nde Ewakɛ wɛ Yehova! Djabolo ɔkɔpande nde iso ndjipa ɔlɔmɔ dj’ipa nshimela anto ankina djiina djɛ Yehova. (Jɛr. 11:21; Ndj. 12:17) Lá nsɔsɔlɔ, Satana nya anto wande nkombolaka dj’anto mvungɛ djiina djɛ Yehova. (Jɛr. 23:26, 27) Ngandji kokaso djiina djɛ Yehova ntokotshɛ́ka djɛ nsasanga ‘otondo wɔ lofu.’—Yee. 5:11; 89:16.
15. Kɛkɔnge kesakisola ndjeta djiina djɛ Yehova?
15 Tokindjɛ ndjeta djiina djɛ Yehova. (Yɔw. 2:32; Ɔrɔ. 10:13, 14) Ndjeta djiina djɛ Yehova nsakisolaka akambo efula ape ngo ndjewa la nkamba la djiina djɛ Ndjambe toko. Tewa ente Ndjambe oyɛnde nde Onto wɔ nsɔsɔlɔ, la tolawɛkɛ le nde má nkadjimɔ te nde djɛ mpona okotshɔ ole ɛlɔndjɛlɔ. (Yee. 20:7; 99:6; 116:4; 145:18) Toshimela anto ankina djiina la wekeka wande, talɔmba dj’iwɔ ndápɛla la dj’iwɔ nangha la wolo djɛ ndjawolama me Yehova.—Iza. 12:4; Ele. 2:21, 38.
16. Wopo wɔkɔnge wokokaso nyɛnyɛ ente Satana alekɔ kanga ongolo?
16 Tolekɔ entshupa djɛ nyɛna nkɛtshi djɛ djiina djɛ Yehova. (Dja. 5:10, 11) Winá wotshikalaso la nkɔmano le Yehova lá winá w’ekakasano, toposɛ Satana kanga ongolo. Lá etsho wɛ Djɔbɔ, Satana amamaka enkambi wɛ Yehova nkambo djɛnɛ: ‘Onto angosandjoyɛ ekete kenkfumɔ kokotshɛnde djɛ lowiko lɔnde.’ (Djɔ. 2:4) Satana ɛnyɛka ante anto wangokambela Yehova ngo ntsha walekɔ lá winá wɛ wɔlɔ, koko ntsha wambopomana la ekakasano, wangookadjɛ. Djɔbɔ mpame kɛ nkɔmano ɛnyɛka ante emamɔ wɛsɔ welekɔ engolo. Lá wopo wɔkɔ ɔmɔ, tolekɔ l’odjito wɔ nyɛnyɛ ente ayale nkambo djɛkɔnge Satana okokande ntoposeyɛ, topapɛyɛki Yehova ɔkɔngɔ. Tokoka ndjala la eshikikelo kenkfumɔ ente Yehova angotowomba m’ɔtɛ wɔ djiina djɛnde.—Dj. 17:11.
17. Lá wopo onkina wɔkɔnge wokokaso numɛ djiina djɛ Yehova, ete ngo ɛnaso lá 1 Pɛtɛlɔ 2:12?
17 Tɛnyɛ dilɛmɛlɔ tá djiina djɛ Yehova. (Woo. 30:9; Jɛr. 7:8-11) Ladjikɛnde tolekɔ antomɔ yɛ Yehova la tɔlɔta djiina djɛnde, tokoka numɛ djiina djɛnde kana ntɛkɛ nsɔnyi. (Wala 1 Pɛtɛlɔ 2:12.) Djɛko ndeke, tokoka nangha kenkfumɔ kokokaso nangha djɛ numɛ Yehova má etepela la eyalelo kɛso. Lá wopo wɔsɔ tongolumɛ djiina djɛnde lá nkilika akoka waso, kaanga oyɛso ase ntshamba djɛ djɔ.
18. Wopo onkina wɔkɔnge wokokaso nyɛnyɛ ente djiina djɛ Yehova dekɔ la ntshina efula leso? (Lenda nɔtɛ.)
18 Djiina djɛ Yehova deka lokumu lɔso ntshina. (Yee. 138:2) Lamo oyɛwɔ djonyi efula? Lokumu lɔso nkoka ntshitana le anto watodjingi m’ɔtɛ wɔ ngandji kokaso djiina djɛ Yehova.a Yeso ayalaka entshupa djɛ mvɔ nyɔyi kɛ nsɔnyi efula ete ngo ondjakanyi djɛ numɛ djiina djɛ Yehova. Nde ‘afumboyɛka nsɔnyi’ má wopo wɔ ndotatshimba yimba kana wɔ ndotakanela kɛnɛ k’anto yafɛnyɛ lá nkambo djɛnde. (Heb. 12:2-4) Okoma wɔnde yayalaka nde nangha ɛkɔpa kɛ Ndjambe.—Mat. 26:39.
19. Olawokɛ ngete mo lá nkambo djɛ djiina djɛ Yehova, ko lamo?
19 Tolekɔ l’ofuno djɛ mbɛmba djiina djɛ Yehova la tolekɔ l’osasa wɔ ndjetama djiina dj’Ewakɛ wɛ Yehova. M’ɔtɛ wɔ elonga kɛsɔ ndeke awolaso atoyi wototolawɔ. Djiina djɛ Yehova deka lokumu lɔso ntshina. Nyontshɔ tɔshi nkano djɛ nkindjɛ numɛ djiina djɛ Yehova ayale nkambo djɛkɔnge Satana okokande ntoposeyɛ. Lá lɛdji lɔsɔ ndeke isɔnghɛnyɛ ente djiina djɛ Yehova dekɔ la ntshina efula leso, ete ngo olɛwɔ le Yeso Kristo.
YEEMBO 10 Tolumɛ Yehova Ndjambe kɛso!
a Kaanga Djɔbɔ mpame kɛ nkɔmano atateyɛka nkanela efula wopo wɔ anto yotakoka ndɔwɔsa winá wɔ ambayi yɛnde isato iyatshite lokumu lɔnde. Winá wɔ ndavusɛ wana wande la ndatshutshɛ nkete djɛnde nkfumɔ, ‘Djɔbɔ atanangha mpekanto la atatepela ante Ndjambe amonangha nkambo mɔtshi djɛ nyɛtshi.’ (Djɔ. 1:22; 2:10) Koko winá wɔ yawande Djɔbɔ ambɔ amonangha nkambo mɔtshi djɛ nyɛtshi, nde atateyɛka ‘ntepela tepeletepele.’ Atateyɛka nseela ntondo ntondo lokumu lɔnde l’edjena kɛ nkinyɛ djiina kana lokumu lɔ Ndjambe.—Djɔ. 6:3; 13:4, 5; 32:2; 34:5.