Elakanyelo w’owaso m’etepela w’alɛnɔ wɛ prɔfɛsi wɛ Jakɔbɔ—Etenyi 1

1-2. Jakɔbɔ ndananghe tá ekomo kɛ lowiko lɔnde nge, ko lamo? (Lenda ntshango djɛ loposo.)

ƐNƆNYI ete ngo 17 wemboheta má winá wɔ Jakɔbɔ, onkambi wɔ Yehova wɔ nkɔmano, ndasɛkɔ má Kanana tá Edjipito nya nkfumbo kɛnde kenkfumɔ. (Ewa. 47:28) Winá wɔkɔ wɔsɔ, ayalaka l’osasa efula má nkalɔ nyɛna ndjonde kɛnde Yosɛfu, la má nyɛna nkfumbo kɛnde kembokalɔ ndjala l’osanga. Koko winá wɔsɔ, Jakɔbɔ amboka ante akɔpa mvɔ lako ilá. Ko ambotshumanyɛ wana wande djɛ ndashimela akambo amɔtshi.—Ewa. 49:28.

² L’etsho wɛsɔ, lá ntondo k’owandji wɔ nkfumbo mvɔ, wayalaki la ekfumbo kɛ ntshumanyɛ ase nkfumbo djɛ ndapɛyɛ alako w’alɛnɔ. (Iza. 38:1) Lá losanghanyɛ lɔkɔ, wɛnyɛki kanga longoyala owandji wɔ nkfumbo m’ɔkɔngɔ wɔ nyɔyi kɛnde.

3. Lá nkilika Ewangelo 49:1, 2, lamo etepela wɛ Jakɔbɔ oyɛwɔ la nsakiso ketshikitanyi?

³ Wala Ewangelo 49:1, 2. Koko ɔsɔ atayala ngo losanghanyɛ lɔ nkfumbo toko. Jakɔbɔ ndayalaka nde ɔprɔfɛtɛ. Lá losanghanyɛ lɔsɔ, Yehova atshindaka onkambi wɔnde má nyuma k’ekina djɛ ntepela akambo wa djonyi wangonanghema l’etsho weyaye walendana la tonkanola tɔnde. La elonga kɛsɔ, wangɔsake etepela wɛ Jakɔbɔ wɛnɛ ete ngo prɔfɛsi k’alɛnɔ.

4. Oyɛso ladjɛ ndjila lá yimba nge winá wɔ sotashishima etepela w’alɛnɔ wɛ prɔfɛsi wɛ Jakɔbɔ? (Lenda ipapango “Nkfumbo kɛ Jakɔbɔ.”)

⁴ Lá djamba djɛnɛ, tɔnghɛna kɛnɛ kɛ Jakɔbɔ ndashimela wana wande 4: Ribɛnɛ, Simɛyɔnɛ, Lewi, la Juda. Lá djamba djɛ lɔnda, tɔnghɛna etepela wɛ Jakɔbɔ ndashimela wana wande 8 ankina. Ete ngo ɔkɔpaso nyɛna, Jakɔbɔ atatepela ngo djɛ wana wande toko, koko ole djɛ tonkanola tɔwɔ toyisá ndokfumba owila wɔ Isariyɛlɛ. Ɔkɔndɔ wɔ owila w’Isariyɛlɛ wɔngɔtɛnyɛ wopo wokotshamisá prɔfɛsi y’etepela w’alɛnɔ wɛ Jakɔbɔ. La má nshishima etepela wɛnde, tɔnghɛna elakanyelo wɛ djonyi wekoka ntokotshɛ́ djɛ nsasangɛ Papa kɛso kɛ l’olongo, Yehova.

RIBƐNƐ

5. Ribɛnɛ ndakongaka ante angowa me papa kɛnde l’etsho weyaye ekete kɛkɔnge?

⁵ Jakɔbɔ ndashimela ntondo nde Ribɛnɛ, oshimelaka ante: ‘Wɛ ndeke wɔnami w’otango.’ (Ewa. 49:3) Ete ngo wɔna wɔ ntondo, Ribɛnɛ afɛnyɛki ante angowa epiko 2 má nkete djɛ papa kɛnde. Akokaki nkanela lonkina ante angokoma okitshɔ wɔ isɛkɛnde m’ɔkɔngɔ wɔ nyɔyi kɛnde, la wana wande koko wangolokita okitshɔ wɔkɔ.

6. Lamo Ribɛnɛ ndatshutshɛ odjito wɔ wɔna w’otango? (Ewangelo 49:3, 4)

⁶ Koko, Ribɛnɛ atawa okitshɔ wɔnde wɔ wɔna wɔ otango. (1 Ɛk. 5:1) Ladjikɛnge? Ladjikɛnde ɛnɔnyi emangha lá ntondo, ewanaka nya Bilha oshile wɔ Jakɔbɔ. Nyayalaka nde ose olemo wɔ djɛmɔ djɛ Rashɛlɛ, wadji wɔ Jakɔbɔ ndakɔpaka efula. (Ewa. 35:19, 22) Ribɛnɛ nde wɔna Jakɔbɔ ndawote nya wadji wɔnde onkina, Lea. Nkoka ndjala Ribɛnɛ okaka nsaki kɛ omoto efula winá wɔkɔ. Nkoka ndjala ndakesola Bilha nde dj’ipa Jakɔbɔ ndɔɔkɔpa efula l’edjena kɛ nkɔpa nyɛnghɛnde. Ayale nghɔsɔ kana lako, kɛnɛ kɛ ndananghe ketasasangɛ Yehova la isɛkɛnde.—Wala Ewangelo 49:3, 4.

7. Kɛkɔnge kekomeli Ribɛnɛ nya tonkanola tɔnde? (Lenda ipapango “Etepela w’alɛnɔ wɛ prɔfɛsi wɛ Jakɔbɔ.”)

⁷ Jakɔbɔ ashimelaka Ribɛnɛ ante: ‘Opangokoma onto w’ekekete.’ Etepela wɛsɔ wekotshamaka. Lako kaanga idjena imɔ lá Bible yotepelawɔ ambɔ inkanola imɔtshi yɛ Ribɛnɛ ikomaka nkfumi, nkfundji kana prɔfɛtɛ. Koko, Jakɔbɔ atatona wɔnande, la tonkanola tɔ Ribɛnɛ tokomaka otondo wɔ ikɔlɛ lá Isariyɛlɛ. (Yos. 12:6) Ribɛnɛ ɛnyɛka wekeka wa wɔlɔ lá akambo amɔtshi, la lako kaanga idjena imɔ lá Bible yɛnyɛwɔ ambɔ ananghaka wayi wa mbindo wa ntshɛngi lonkina.—Ewa. 37:20-22; 42:37.

8. Olakanyelo wɔkɔnge wowaso má ndjɔmbɔmba kɛ Ribɛnɛ?

⁸ Olakanyelo wɔkɔnge w’owaso? Iso ladjɛ nangha la wolo djɛ ndjala la ndákota ole ntshika wayi wa mbindo wa ntshɛngi. Ntsha tombohembama djɛ nangha mpekanto, temale la tɔtɔnɔlɛ lá wopo wɔ nanghedji djɛso okokawɔ nkɔta oloko wɔ Yehova, w’ase nkfumbo kɛso la anto ankina. Tovungɔ lonkina ente ‘onto l’onto angovuka ngo kɛnɛ kokonande.’ (Nga. 6:7) Lá onkoko onkina, kɛnɛ kekomelisá Ribɛnɛ ketovungola nkɛtshi kɛ Yehova. Kaanga Yehova ndopangotolama má eposelo wɛ nyɛtshi wɛ evunga wɛso, angosakola welo wilaso djɛ nangha kɛnɛ kelekɔ́ wɔlɔ.

SIMƐYƆNƐ LA LEWI

9. Ekete kɛkɔnge ketshindisá Jakɔbɔ djɛ nshimela Simɛyɔnɛ la Lewi etepela wɛnyɛ ente apawawola? (Ewangelo 49:5-7)

⁹ Wala Ewangelo 49:​5-7. Manyi, Jakɔbɔ ashimelaka Simɛyɔnɛ la Lewi etepela wɛ wolo wɛnyɛ ente wapawolama le nde. Ɛnɔnyi emangha lá ntondo, Shɛkɛmɛ, mpame kɛmɔtshi k’ose Kanana, akesolaka Dina, wɔna Jakɔbɔ w’omoto. Wopo wɔ wana ankfumɔ wa Jakɔbɔ yoke nkɛlɛ efula má ndjoka kɛnɛ kekomelisá nkaana kɛwɔ kokama, koko Simɛyɔnɛ la Lewi watapemela nkɛlɛ kɛwɔ. Wadjimbaka ase Shɛkɛmɛ ambɔ wiila vu lawɔ ntsha wambawola ndjopa mpota. Ase Shɛkɛmɛ wawolaka. Winá wɔ yayalaka ngo la ampota, Simɛyɔnɛ la Lewi ‘wɔsaka onto l’onto lokfula lɔ mbandji, wingelaka lá ngando l’isasimoyɛ ko wayakaka ampame inkfumɔ.’—Ewa. 34:25-29.

10. Wopo wɔkɔnge etepela w’alɛnɔ wɛ prɔfɛsi wɛ Jakɔbɔ welendana la Simɛyɔnɛ la Lewi yakotshama? (Lenda ipapango “Etepela w’alɛnɔ wɛ prɔfɛsi wɛ Jakɔbɔ.”)

¹⁰ Jakɔbɔ atshimbaka yimba efula má enanghedji kɛ lopango kɛ wana wande ape wasɔ. Nde áshimelaka ante wangotshanghana lá Isariyɛlɛ y’otondo. Etepela wɛ prɔfɛsi wɛsɔ wekotshamaka m’ɔkɔngɔ w’ɛnɔnyi 200 winá wɔ Isariyɛlɛ yingela lá Looko lɔ Daka. Ikɔlɛ yɛ Simɛyɔnɛ iwaka ngete okitshɔ ngando imɔtshi iwangwanaki iyalaki l’eteyi kɛ etatshi kɛ looko kɛ ikɔlɛ yɛ Juda. (Yos. 19:1) Ikɔlɛ yɛ Lewi iwaka okitshɔ wɔ ngando 48 itshanghanisá lá atshuku ankfumɔ wa Isariyɛlɛ.—Yos. 21:41.

11. Nkambo djɛkɔnge djɛ wɔlɔ nanghisá ikɔlɛ yɛ Simɛyɔnɛ la yɛ Lewi?

¹¹ Tonkanola tɔ Simɛyɔnɛ la tɔ Lewi watahetola evunga w’andoyi yɛwɔ. Ikɔlɛ yɛ Lewi iyalaki la nkɔmano dj’ekekete efula lá ɔtɛmwɛlɔ wɔ piyɔɔ. Winá wɔ Yehova ndapɛyɛ Mɔsɛ Ɛlɛmbɛ lá Onkókó wɔ Sinayi, ase Isariyɛlɛ efula watɛmɔlaka wɔna ɔnkɔkɔ, koko ase Lewi wahetaka tá onkoko wɔ Mɔsɛ la wookotshɛ́ka djɛ ndjaka anto watɛmɔlisá wɔna ɔnkɔkɔ wɔsɔ. (Epo. 32:26-29) Yehova asɔnaka ikɔlɛ yɛ Lewi, má ndapɛyɛ mpeyi k’ekekete efula kɛ ndjala ankfundji. (Epo. 40:12-15; Ew. 3:11, 12) M’ɔkɔngɔ ikɔlɛ yɛ Simɛyɔnɛ ikotshɛ́ka ikɔlɛ yɛ Juda djɛ nana la ase Kanana dj’iwɔ ndɔsa etatshi kɛwɔ kɛ looko lá Looko lɔ Daka.—Tos. 1:3, 17.

12. Elakanyelo wɛkɔnge wowaso má ndjɔmbɔmba kɛ Simɛyɔnɛ la Lewi?

¹² Olakanyelo wɔkɔnge w’owaso? Tawolake nkɛlɛ ndɔndjɛ akano la nanghedji djɛko. Ntsha wambokonanghela wɛ kana onto wɔko ɔmɔtshi nkambo djɛ nyɛtshi, okoka ndjoka nyɛtshi kana ntshimba yimba. (Yee. 4:4) Koko iso ladjɛ mvungɔ ente, Yehova apawola etepela la nanghedji djɛnyɛ nkɛlɛ kɛ indeko. (Dja. 1:20) Tokoka nkandola akambo wa lɛngɛyɛ watokomela lá bandja kana l’eteyi kɛ otshumano, lá nkilika tɔkfɔ tɔ Bible, ko kɛsɔ kengotokotshɛ́ djɛ ndjewɔ djɛ nangha nyɛtshi keyɛ má nkɛlɛ k’indeko. (Ɔrɔ. 12:17, 19; 1 Pɛ. 3:9) Kaanga ntsha ambotshi wako wanangha akambo wapasasangɛ Yehova, vungɔ ente opakoke nkilika ndjɔmbɔmba kɛwɔ. Tɛnake ente opakoke nsasangɛ Yehova la opakoke mba esako wɛnde. Yehova apangosamba nsakola welo wilɛ djɛ ntshɔ tá ntondo la djɛ nangha kɛnɛ kelekɔ́ wɔlɔ.

JUDA

13. Lamo Juda ndayale ladjɛ nkiyana winá wɔ ikeke yɛnde yakoke?

¹³ Manyi Jakɔbɔ atepelaka lonkina nya Juda. Juda akokaka ndjoka yɛnyi má ndjoka etepela wɛ Jakɔbɔ ndashimela amama yɛnde. Edjinge nde, ananghaka evunga ɛmɔtshi wɛ nkekete efula. Ingelaka ngole nde lá osandjo wɔ ngando kɛ Shɛkɛmɛ. (Ewa. 34:27) Winá wɔ wananyɔ wande yasadjɛka ankfunɛwɔ Yosɛfu ete ngo mfumbe, nde koko alokitelaka. (Ewa. 37:31-33) M’ɔkɔngɔ, ananghaka wayi wa mbindo nya okilo wɔnde Tamara, afɛnyɛka ante oyɛnde nde ndumba.—Ewa. 38:15-18.

14. Akambo wa wɔlɔ wakɔnge wananghisá Juda? (Ewangelo 49:8, 9)

¹⁴ Koko, má wolo wɔ nyuma k’ekina, Jakɔbɔ asakolaka Juda la owandjɛka. (Wala Ewangelo 49:​8, 9.) Juda ɛnyɛki ante akiyana djɛ papa kɛnde kekomisá ekokolo efula ndokaka. Koko okaka lonkina omvumba wɔwɔ Bejamɛ djandji efula.—Ewa. 44:18, 30-34.

15. Lá topo tɔkɔnge esako wɛ Juda yakotshama?

¹⁵ Jakɔbɔ ewoyɛka ante Juda angapamela wananyɔ wande. Koko ɛnɔnyi efula wehetaka djɛ prɔfɛsi kɛsɔ nkotshama. Mbala kɛ ntondo kɛnyɛwɔ ente Juda awaka ekopo kɛ ndɔndjɛ nde má mbisa kɛ ɛnɔnyi 200, m’ɔkɔngɔ wɔ Eposelo, winá wɔ ikɔlɛ yɛ Juda yalɔndjɛ Isariyɛlɛ má osowe wɔ lɔsɛnga tii lá Looko lɔ Daka. (Ew. 10:14) M’ɔkɔngɔ w’ɛnɔnyi efula, ikɔlɛ yɛ Juda ndeke lohetaki lá ntondo djɛ nana l’ase Kanana djɛ nkfɛyɛ ewila weyalaki entshupa la Looko lɔ Daka. (Tos. 1:1, 2) La Davidɛ, inkanola yɛ Juda ayalaka onto wɔ ntondo l’ɔnɔnghɔ wɔ ankfumi l’ikɔlɛ yɛsɔ. Koko prɔfɛsi kɛ Juda kekotshamaka lá akambo ankina efula.

16. Prɔfɛsi kɛ Ewangelo 49:10 yakotshama ngete mo? (Lenda ipapango “Etepela w’alɛnɔ wɛ prɔfɛsi wɛ Jakɔbɔ.”)

¹⁶ Jakɔbɔ ɛnyɛka ante owandji wɔngɔlɔndjɛ́ wana w’anto etshinda etshinda angoposa má ikɔlɛ yɛ Juda. (Wala Ewangelo 49:10 la nɔtɛ.) Owandji wɔsɔ nde Yeso Kristo, kanga Jakɔbɔ ndete ante Shilo. Ondjelo ɔmɔtshi atepelaka djɛ Yeso ante: ‘Yehova Ndjambe angɔpɛyɛ nkosa kɛ lowandji kɛ papa kɛnde Davidɛ.’ (Luka 1:32, 33) Wangowetake kankina ambɔ ‘kimbwe kɛ ikɔlɛ yɛ Juda.’—Ndj. 5:5.

17. Wopo wɔkɔnge wokokaso ndjokola Yehova lá wopo wɔsaso anto ankina?

¹⁷ Olakanyelo wɔkɔnge w’owaso? Yehova asakolaka Juda kaanga ndananghe evunga wɛ nkekete. Ko wananyɔ wande wakokaka ndawopola kɛnɛ kɛ Yehova ndɛnyi le Juda? Ayale nghɔsɔ kana lako, Yehova ɛnaka akambo wa wɔlɔ le Juda, ko osakolaka. Okokaso ndjokola Yehova ngete mo? Winá wowa winaso odjito wotshikitanyi, tokoka mpembama ntondo ntondo djɛ ndjila wiso ngo lá wɛdju wɛnde. Koko angoyala wɔlɔ iso mvungɔ ente Yehova asasanga nsɔsɔlɔ la wekeka wande wa wɔlɔ. Yehova mponaka djɛ nyɛna ekete kɛ wɔlɔ le enkambi wɛnde. Tonanghe la wolo djɛ ndowokola.

18. Lamo oyɛso ladjɛ ndjala la bale nshitshi?

¹⁸ Olakanyelo onkina wowaso má kɛnɛ kekomelisá Juda nde, iso ladjɛ ndjala la bale ntshitshi. Yehova nkotshɛka winá onkfumɔ alaka wande, koko apakotshɛka winá onkfumɔ lá wopo la winá wokongaso. Tonkanola tɔ Juda totalɔndjɛ enkambi wɛ Ndjambe mbala kɛmɔ. Koko tosukaka la nkɔmano nkfumɔ anto wa Yehova ndasɔnɛ djɛ ndɔndjɛ, ayale Mɔsɛ má ikɔlɛ yɛ Lewi, Yosuwa má ikɔlɛ yɛ Efrayimɛ, kana Nkfumi Saolo má ikɔlɛ yɛ Bejamɛ. Nyontshɔ tosuke ole iso anto ankfumɔ wa Yehova ɔsɔnande djɛ ntɔlɔndjɛ lɔɔko kɛnɛ.—Heb. 6:12.

19. Elakanyelo wɛkɔnge sombowa lá nkambo djɛ Yehova má etepela w’alɛnɔ wɛ prɔfɛsi wɛ Jakɔbɔ?

¹⁹ Isɔmɛna nge lá etepela w’alɛnɔ wɛ prɔfɛsi wɛ Jakɔbɔ? Okama papoo ente ‘wopo w’onto ɛnande akambo wotshikitana la wopo wɔ Ndjambe ɛnande akambo.’ (1 Sa. 16:7) Yehova alekɔ la bale ntshitshi ole nyimeyanaka. Kaanga Yehova ndopadjipe wiso lá akambo wa nyɛtshi, apakongaka djɛ antɛmɔdji wande ndjala djɔ. Akoka kaanga nsakola anto wananghisá evunga wɛ nkekete ntsha wambolapɛla lá nsɔsɔlɔ la wambotateyɛ nangha kɛnɛ kelekɔ́ wɔlɔ. Lá djamba djeyaye, tɔnghɛna kɛnɛ kɛ Jakɔbɔ ndashimela wana wande 8 watshikalisá.