DJAMBA DJƐ WEKELO 30
YEEMBO 97 Otepela wɔ Ndjambe ndeke lɔpɛyɛka lowiko
Okoka ndjeka wayi efula má elakanyelo w’ewangelo wɛ Bible
‘Djɛko momolonghanyɛ djɛ nyowopola winá enkfumɔ wayi wasɔ kaanga ewanyo, la kaanga nyomboshikimala lá wayi wa nsɔsɔlɔ wa nyeke.’—2 PƐ. 1:12.
IKANYI YƐ DJAMBA
Wopo wɔ nkamba l’elakanyelo wɛ djonyi wowaso má elakanyelo w’ewangelo wɛ Bible, kaanga sombeka ilá efula.
1. Elakanyelo wɛ Bible yatshikitanyɛ lowiko lɔɔko ngete nge winá wɔ ngawange ndjeka Bible?
ELAKANYELO w’ewangelo wɛ Bible wetshikitanyɛka mbiko yɛso. Ndjɔmbɔmba, winá wɔ seke ente djiina djɛ Ndjambe nde Yehova, totapolaka djiina djɛ ntondo djɛ nkoma tolongo tɔnde. (Iza. 42:8) Winá wɔ seke nsɔsɔlɔ lá nkambo dendana la edjo, topolawopolaka ntsha anto waso wa ngandji wavɔ wangɛnake ndjolo. (Los. 9:10) La winá wɔ seke daka djɛ Ndjambe djɛ Paradiso kelá looko, topokaka etsho weyaye wɔma lonkina. Toyalaka la eshikikelo ente tongowika ilá efula, ape etsho emangha—ɛnɔnyi 70 kana 80 toko—koko etshinda etshinda.—Yee. 37:29; 90:10.
2. Wopo wɔkɔnge 2 Pɛtɛlɔ 1:12, 13 ɛnyɛwɔ ente kaanga Akristo wambotshunda lá nyuma nkoka mba wapɔ má elakanyelo w’ewangelo wɛ Bible?
2 Tewa ente elakanyelo w’ewangelo welekɔ djonyi efula leso. Ɔpɔstɔlɔ Pɛtɛlɔ ndafunela onkanda wɔnde 2 nde Akristo ‘wamboshikimala lá wayi wa nsɔsɔlɔ.’ (Wala 2 Pɛtɛlɔ 1:12, 13.) Winá wɔsɔ, wapomanaki la ambalaka efula yɛ nyuma lá otshumano, ole wetsha wɛ nyɛtshi la anto watakambelaki Ndjambe. (2 Pɛ. 2:1-3) Koko Pɛtɛlɔ akɔpaka nkotshɛ́ wananyɔ la ankaana yɛnde dj’iwɔ mpikama lá ambalaka yɛsɔ. Djɛ ndakembɛ, avungolaka elakanyelo ɛmɔtshi wɛ yeke. Elakanyelo wɛsɔ wetakotshɛ́ dj’iwɔ nama nkɔmano djɛwɔ tii l’ekomo.
3. Kɔpɛyɛ ndjɔmbɔmba kɛnyɛ lamo Akristo ankfumɔ oyɛwɔ ladjɛ nkindjɛ ntɔnɔla lá elakanyelo w’ewangelo.
3 Winá wɔ sotatshunde lá nyuma, tokoka mba elakanyelo wɛ bango má elakanyelo w’ewangelo wɛ Bible. Tɔkɔsa ndjɔmbɔmba: Ndambi kɛ mɛlɛmɛlɛ la onto weka ndamba, nkoka nkamba la nkete djɛkɔ mɔ djɛ mpongola dambo. Koko lá ila k’etsho, ndambi kɛ mɛlɛmɛlɛ nkoka ndjeka djɛ nkamba la nkete djɛkɔ lá wopo onkina kana ndamba alambo ankina. Lá wopo wɔkɔ ɔmɔ, waambokambela Yehova l’ilá k’ɛnɔnyi la weeka Bible ntato nkoka ndjoka elakanyelo wɛ Bible w’ewangelo lá topo totshikitanyi. Nkoka ndjala má salongola batisimo, akambo la edjito wɛ sombowa lá olemo wɔ teokrasi wembotshikitana. Winá wokambaso la elakanyelo wɛ seke lá akambo watokomela winá wɔsɔ, tokoka ndjisola elakanyelo wɛ djonyi la wɛ ntato. Nyontshɔ tokolenda wopo wɔ Akristo wambotshunda okokawɔ mba wapɔ má elakanyelo w’ewangelo wɛ Bible.
YEHOVA NDEKE ONTONGI
4. Eposelo wɛkɔnge weyalisá leso winá wɔ seke ente Yehova alekɔ Ontongi wɔso?
4 ‘Ontongi wɔ nkete nkfumɔ nde Ndjambe.’ (Heb. 3:4) Tewa ente looko la nkete nkfumɔ djɛ l’eteyi, nanghemaka me Ontongi wɔ balo la nkfulu efula. Atotongaka, la atewa m’ekomo tii ekomo. Nkambo deka nde angotowakelake. Nde ndjewaka kɛnɛ kelekɔ́ wɔlɔ leso. Winá wɔ sewe ente Yehova ndeke Ontongi wɔso, kɛsɔ keyalaka la eposelo wɛ wɔlɔ efula leso, kɛtɔpɛyɛka lowiko lɔ nsɔsɔlɔ la lolekɔ l’okoma.
5. Ekete kɛkɔnge kekoka nkokotshɛ́ djɛ ndjala la okitshakitshɛ? (Izaya 45:9-12)
5 Ndjewa nsɔsɔlɔ ente Yehova ndeke Ontongi wɔso nkoka ntolakanyɛ okitshakitshɛ. M’ɔkɔngɔ wɔ Djɔbɔ mpika wiso lende nyɔmɛlɛ la le anto ankina, Yehova ovungolaka ante nde ndeke Ontongi wɔ nkfulu inkfumɔ. (Djɔ. 38:1-4) Mvungo kɛsɔ kevungolaka Djɔbɔ ente mboka yɛ Ndjambe ileka mboka yɛ wana w’anto. Má nkilika etepela wɛsɔ, ɔprɔfɛtɛ Izaya afunaka ante: ‘Ndo koko bomba ngoshimela Onkengi ante: “Okengɛ na?”’—Wala Izaya 45:9-12.
6. Okokaso ntɔnɔla lá balo la nkfulu kɛ Ontongi wɔso Yehova lá winá wɔkɔnge? (Lenda asango.)
6 Winá wɔ Okristo olekande ndjewa akambo, akoka ntateyɛ ndawɛkɛ efula la tokanyi tɔnde l’edjena kɛ nkadjimɔ te Yehova la Otepela wɔnde djɛ mpona ɛlɔndjɛlɔ. (Djɔ. 37:23, 24) Iya ntsha onto atɔnɔla efula lá balo dj’indeko la djɛ sopakoke ndjɛdjɛ dj’Ontongi wɔnde? (Iza. 40:22; 55:8, 9) Nkambo djɛ nsɔsɔlɔ djɛsɔ ngokotshɛ́ djɛ ndjala la okitshakitshɛ la djɛ nsembola tokanyi tɔnde.
Ekete kɛkɔnge kengotokotshɛ́ dj’iso ndjala la ikanyi yɛ wɔlɔ winá wɔ tokanyi tɔso yopasange la tɔ Yehova? (Lenda itenyi 6)d
7. Rahela ndananghe ngete mo djɛ ndjawola otshikitano wɔ bango?
7 Rahela, kanga lintasɛ lá Slovénie, ɛnaka ante ntɔnɔla le Ontongi wɔnde okotshɛ́ka djɛ ndjawola otshikitano w’ɛlɔndjɛlɔ kɛ olonghanyelo. Asuyɛ ante: “Winá ɛmɔtshi, atayalaki wɔdju ndjawola akano w’anto watɔlɔndjɛ. Ndjɔmbɔmba, kaanga m’ɔkɔngɔ wɔ lemi ndenda Losango 8 lɔ Iloyi yɛ lɔndjɛ 2023, ndjokaka djodjo efula lá oloko winá wɔ mɛnyi wɔnanyɔ apɛyɛ djamba la lomangha lɔ ndɛdju kfu. Ko ndɔmbaka Yehova djɛ nkotshɛ́ lemi djɛ ndjawola etshikitano wɛsɔ.” Rahela asuyɛ ante ete ngo oyɛnde Ontongi wɔ olongo la looko, Yehova alekɔ la akoka efula wa ndɔndjɛ olonghanyelo wɔnde tá mboka kɛ sii. Ntsha ɛna ente alekɔ wolo efula djɛ ndjawola looka kana ɛlɔndjɛlɔ kɛ bango, lamo ngopatɔnɔla lá balo la nkfulu k’indeko kɛ Ontongi wɔso?—Ɔrɔ. 11:33-36.
LAMO NDJAMBE OTSHIKANDE NDJOLO
8. Ndjeka ladjikɛnge Ndjambe otshikande ndjolo okokawɔ ntoyakala wapɔ ngete mo?
8 Lamo Ndjambe otshikande ndjolo? Anto amɔtshi wapawaká ndjɔndɔ kɛ woopó wɔsɔ wangokake Ndjambe nkɛlɛ efula kana wangotepelake ambɔ Ndjambe apalekɔ! (Woo. 19:3) Lá lɛdji lotshikitanyi, wɛ ombeka ente mpekanto kɛ sasambela la ntshamba djɛ sii ndeke loposɛ ndjolo, koko ape Yehova. Ombokalɔ ndjeka ente bale ntshitshi djɛ Yehova mbokotshɛ miliyɔ y’anto djɛ ndowewa la dj’iwɔ nyɛna wopo wɔ Yehova ndongoshiyɛ ndjolo etshinda etshinda. (2 Pɛ. 3:9, 15) Wayi wa nsɔsɔlɔ wasɔ watoshikikɛ la wangotosukanyɛ lande.
9. Akambo wakɔnge wokokaso mvungɔ donga djɛ Yehova otshikande ndjolo?
9 Winá wokongaso djɛ Yehova nshiyɛ ndjolo, iso ladjɛ ndjala la bale ntshitshi. Koko, winá wɔ boto djɛso la iso ɛnaso ndjolo la ɔtɛngɛyɛwɔ, kana ovutshɛso, tokoka ndawopola lamo Yehova ndopananghe lankeke. (Aba. 1:2, 3) Lá winá wɛ nghɔsɔ, toyale la balo djɛ ntɔnɔla lá donga djɛ Yehova awolande djɛ anto wa wɔlɔ nyɛna ndjolo.a (Yee. 34:19) Tɔtɔnɔlɛ lonkina lá nkambo djɛ daka djɛ Ndjambe djɛ nshiyɛ ndjolo etshinda etshinda.
10. Anne ndakfulumeyɛ nyɔyi kɛ nyɛnghɛnde ngete mo?
10 Ndjewa nsɔsɔlɔ lá nkambo djɛ ndjolo nkoka ntokotshɛ́ djɛ nkfulumeyɛ. Anne, kanga lintatshɛ lá Mayotte, lá océan Indien atepela ante: “Layalaki la yɛnyi efula, ɛnɔnyi emangha m’ɔkɔngɔ wɔ nyɔyi kɛ mama. Koko mvungɔki mbala la mbala ente Yehova apalekɔ ikɔkɔ yɛ ndjolo yɛmi. Alekɔ wumbe djɛ nyimɛ topo tonkfumɔ tɔ ndjolo la djɛ nkfundola anto waso wa ngandji wambovɔ. Ntɔnɔla lá akambo wa nsɔsɔlɔ wasɔ, mpɛyɛka lemi vu djɛ yimba djenkamoyɛki efula.”
11. Donga djɛ Yehova otshikande ndjolo otokotshɛ́wɔ dj’iso nkindjɛ mpoposanyɛ ngete mo?
11 Ndjewa nsɔsɔlɔ lá donga djɛ Ndjambe otshikande ndjolo nkoka ntotshinda djɛ mpoposanyɛ. M’ɔkɔngɔ wɔ mpakisola ante bale ntshitshi djɛ Yehova nsakisolaka ewiko le anto walapɛla, Pɛtɛlɔ afunaka ante: ‘Nyɔtɔnɔlɛ lá wopo w’anto woyɛnyo ladjɛ ndjala lá nanghedji dj’eyalelo k’ekina ole lá akambo wɛnyɛ ente nyomalema Ndjambe.’ (2 Pɛ. 3:11) Olemo w’ipoposanyɛ wolekɔ l’anteyi k’akambo wɛnyɛ ente tomalema Ndjambe. Ete ngo Papa kɛso, tɔngɔkɔpake anto. Tokombola dj’iwɔ mbika lá andja wa bango wa Ndjambe wa sii. La bale ntshitshi nkfumɔ Yehova apɛyɛ anto walekɔ lá idjena y’intasɛ mbamba kɛ ndɔtɛmɔla. Wole mpeyi kokotshɛ́ kɛ nkamba esanga la Ndjambe la kɛ nkotshɛ́ anto efula djɛ ndjeka akambo walendana lande lá ntondo k’ekomo ndjɛ!—1 Kɔ. 3:9.
TOWIKA LÁ ‘MFU Y’EKOMO’
12. Ndjewa ente tolekɔ lá ‘mfu y’ekomo’ okokawɔ ntoyalakala wapɔ ngete mo?
12 Bible nkɔndɔla wopo w’anto yongoyala lá ‘mfu y’ekomo.’ (2 Ti. 3:1-5) Tokolenda anto watodjingi, tɔnghɛna wopo wɔ prɔfɛsi kɛsɔ okotshamawɔ. Winá wɛnaso wopo wɔ djalelo dj’anto yotaleke ntshitana, tongoleka ndjala l’eshikikelo ente Otepela wɔ Ndjambe wɛdje ndjilela oloko.—2 Ti. 3:13-15.
13. Lá ntɔlɔnghana la ndjɔmbɔmba kɛ Yeso kelá Luka 12:15-21, okokaso ndáwopola weepó wɛkɔnge?
13 Ndjewa ente towika lá mfu y’ekomo angototshinda djɛ nangha akambo lankeke lankeke. Tokolenda wopo wɔ ndjɔmbɔmba kɛ Yeso kelá Luka 12:15-21 otokotshɛ́wɔ djɛ nangha akambo lankeke lankeke. (Wala.) Lamo yete mpame k’okfudji kɛsɔ ambɔ ‘enkesa’? Ape ladjikɛnde ayalaki la okfudji, koko ladjikɛnde atewaki mpetshɛ́ akambo wa djonyi l’edjena kɛ ntondo. Alawombelaka ‘koko atayalaki okfudji lá wiso wa Ndjambe.’ Ladjikɛnge mpame kɛsɔ ndayale ladjɛ nangha lankeke lankeke? Ndjambe oshimelaka ante: ‘Wɔkɔlɔmba lowiko lɔko otsho wɔ lɔɔko.’ Lɔɔko kɛnɛ ete ngo nkfumbo dj’akambo yotasukana tá ekomo, tokoka ndáwopola ente: ‘Ekoma wɛmi wɛnyɛ ente nangha akambo lankeke lankeke? Okotshɛmi wana wami djɛ ndawilela ekoma wɛ ngete nge? Langokambake la wolo, la winá ole la mfalanga yɛmi ntondo ntondo djɛ ndáwombela nkete mɔmɛlɛ kɛmi ndo koko djɛ ndáwombela nkete l’olongo?’
14. Lá nkilika ndjɔmbɔmba kɛ Miki, ladjikɛnge oyɛwɔ balo ntɔnɔla lá tolembetelo tɔ Afunelo tɛnyɛ ente towika lá mfu y’ekomo?
14 Wopo wɛnaso lowiko nkoka ntshikitana winá wɔtɔnɔlaso lá tolembetelo tɛnyɛ ente towika lá mfu y’ekomo. Kɛsɔ ndeke lokomelisá nkaana Miki. Atepela ante: “Winá wɔ mawa mpɔlɔmɛ, oloko wantomaki djɛ mpona olemo wongonkotshɛ́ djɛ ndjeka anyama. Ndjalaki lonkina la okoma wɔ ndjala yat’ekalo yɛ lotshinda la wɔ ntokamba lá idjena ilekɔ́ la djonyi. Tolongo tombotshunda lá nyuma wandakaka djɛ lemi ntɔnɔla wɔlɔ djɛ ndjewa ntsha langokoka nkamba olemo wɔ demba wokombolami la nkotshɛ okoma wɔmi wɔ nyuma. Wamvungolaka ambɔ ekomo kɛ nkfumbo dj’akambo djɛnɛ kembokoma entshupa. Lá onkoko onkina, l’andja wa bango, langeka anyama efula yɔkɔpami etshinda etshinda. Ko nsɔnaka okoma wɔ ndjingela nkalasa kɛ itenyi la kɛ djonyi. Kɛmpɛyɛka mbamba kɛ mba olemo wonkotshisá djɛ ndjala yat’ekalo ko m’ɔkɔngɔ nsɛkɔka tá idjena iyalaki la djonyi lá Équateur.” Miki nya womɛnde wakamba lá olemo w’edjingadjinga winá wɔsɔ.
15. Wopo wɔkɔnge anto elolawɔ lá losango lɔ wɔlɔ? Pɛyɛ ndjɔmbɔmba. (Lenda asango.)
15 Topakoke ndɛmba winá wɔ anto ankina otonawɔ losango lɔ wɔlɔ. Wakoka ntshikitana. Tokolenda ndjɔmbɔmba kɛ Djakɔbɔ ankfunɛ Yeso. Nde ɛnaka Yeso atafule, ambokoma Mesiya, la alakanyɛ anto ankfumɔ. Koko lá ilá k’ɛnɔnyi, Djakɔbɔ atakoma ombeki wɔ Yeso. Ngo m’ɔkɔngɔ wɔ nyɔyi kɛ Yeso ndeke Djakɔbɔ ndookomaka ombeki—la aloyalaka l’osasa efula!b (Dj. 7:5; Nga. 2:9) Tɛnake ente welo wilɛ djɛ mpoposanyɛ boto djɛko mpawola akambo wa nsɔsɔlɔ lɔɔko kɛnɛ oyɛwɔ ngo totoko, kana ntshɔ ntowembola anto wapawola losango l’Onkfumi apalekɔ la ntshina. Tongopoposanyɛ lankeke lankeke ntsha tovungɔ ente towika lá mfu y’ekomo. Kɛnɛ kashimelɛ lɔɔko nkoka ndoyala la lɔɔla lɔ wɔlɔ m’ɔkɔngɔ w’etsho, winá ɛmɔtshi kaanga m’ɔkɔngɔ wɔ ndjolo k’ekekete.c
Ekete kɛkɔnge kengotokotshɛ́ dj’ipa mpekɔ boto djɛso mpalekɔ́ andjawodji? (Lenda itenyi 15)e
YALA LA DJEDJƐ LÁ MVUNGO YƐ YEHOVA
16. Wapɔ wɔkɔnge wowakaso má mvungo yɛ Yehova? (Lenda ipapango “Kamba lawɔ djɛ nkotshɛ́ anto ankina.”)
16 Eleelo ɛmɔtshi wɛ nyuma wowaso olambemawɔ nde lá nkambo djɛ anto watokaka elakanyelo w’ewangelo wɛ Bible. Ndjɔmbɔmba, onanghelawɔ asawo wa ntshandjawala, wamba la avideo amɔtshi wa jw.org, la periodikɛ imɔtshi nde anto wapalekɔ Ewakɛ. Kaanga nghɔsɔ, tongowake wapɔ má mvungo ilekɔ l’eteyi. Ingofudjɛke ngandji kɛso te Yehova, ingokembɛke djawo lá Otepela wɔnde, la ingotokotshɛke djɛ ndjewa ndakanyɛ anto elakanyelo w’ewangelo wɛ Bible.—Yee. 19:7.
17. Lá akambo wakɔnge okokaso ntɔnɔla lá elakanyelo w’ewangelo wɛ Bible?
17 Ete ngo Ewakɛ wɛ Yehova, tongoyalake la osasa winá w’okaso papoo nkambo mɔtshi djɛ nsɔsɔlɔ djɛ Bible. Koko tolekɔ la djedjɛ efula djɛ ndjoka elakanyelo w’ewangelo wɛ Bible wɛ seke la wetokotshɛ́ djɛ nsukana la Yehova. Ntsha totshininala ngo lá tokanyi tɔso l’edjena kɛ nsunama lá ɛlɔndjɛlɔ kɛ olonghanyelo wɔ Yehova, tovungɔ la okitshakitshɛ onkfumɔ onto wɔlɔndjɛ olonghanyelo—Ontongi wɔ balo dj’efula la wɔ nkfulu inkfumɔ. Winá w’onto wɔso ɔmɔtshi kana iso okfulumeyɛso ndjolo, toyale la bale ntshitshi, tɔtɔnɔlɛ lá donga djɛ Yehova otshikande ndjolo. Winá wɔsaso nkano lá wopo w’okokaso nkamba la winá la mfalanga yɛso, tovungɔ ente iso ladjɛ nangha akambo lankeke lankeke lá mfu y’ekomo yɛnɛ. Mvungo yɛ Yehova ikindjɛ ntotshinda, ntokembɛ la ntɔpɛyɛ balo.
YEEMBO 95 Osase wotaleke mpɛta
a Lenda djamba “Pourquoi la souffrance disparaîtra bientôt” lá Etange k’Olami, Ngɔndɔ k’atano 15, 2007, nki. 21-25.
c Lenda djamba “Kɛkɔnge k’ewaso lá nkambo djɛ dombo djeyaye djɛ Yehova?” lá Etange k’Olami, Ngɔndɔ k’atano 2024 nki. 8-13.
d NSAKISO KƐ ASANGO: Iloyi yɛ tokokolo imbotona ikanyi yɛ ikokolo imɔtshi. M’ɔkɔngɔ winá wɔ ndalendaka olongo wombolola kfu la tɔɔtɔ, ambɔlɛna ikanyi yɛnde lá lɛdji lɔ wɔlɔ.
e NSAKISO KƐ NTSHANGO: Lá wekelo wɔnde wɔ onto nyɔmɛlɛ, Owakɛ ɔmɔtshi ashishima tolembetelo tɛnyɛ ente towika lá mfu y’ekomo. Kɛsɔ kembotshinda djɛ ndjeta mama kɛnde djɛ ndopoposanyɛ.