Wopo wɔ Yehova otokotshɛnde djɛ nkfulumeyɛ

1. Lamo oyɛso la djonyi djɛ okfulumedji, ko ekete kɛkɔnge kengotokotshɛ́ dj’iso mba? (1 Pɛtɛlɔ 5:10)

LÁ MFU y’ekomo yɛ wolo yɛnɛ, enkambi wɛ Yehova walekɔ la djonyi djɛ okfulumedji. Amɔtshi wɛna ndjolo l’elando wepashile. Amɔtshi wakfulunghana la djodjo l’oloko mande wambovusɛ onto wɔ ngandji. Ankina wakfulumeyɛ onanyelo wɔ nkfumbo, kana w’ewandji wɛ lɛɛta. (Mat. 10:18, 36, 37) Yala l’eshikikelo ente ayale okakasano wopomana lawɛ, Yehova angokokotshɛ́ djɛ nkfulumeyɛ.—Wala 1 Pɛtɛlɔ 5:10.

2. Nkoka djɛ nkfulumeyɛ dj’Okristo oyɛwɔ mampe?

² Okfulumedji nde akoka wa nshikimala, wa nkfulumeyɛ la wa nkindjɛ ndjala la nkongi lá ntondo kɛ enkeka, lɔnyɔkɔ, ekakasano, la ehemba. Akoka wa nkfulumeyɛ w’Okristo wapaye má wolo wɔnde; koko má wolo wɔ Yehova, kanga lɔtɔpɛyɛ ‘wolo woleka wolo woyalaka la onto.’ (2 Kɔ. 4:7) Lá djamba djɛnɛ, tɔnghɛna nonghanyi 4 yɛ Yehova ndombotilela djɛ ntokotshɛ́ djɛ nkfulumeyɛ. Tɔnghɛna ole wopo wokokaso mba wapɔ má nonghanyi yɛkɔ.

LƆLƆMBƆ

3. Lamo okokaso ntepela ente lɔlɔmbɔ alekɔ nkambo djɛ nkamɔ efula?

³ Yehova ambotilela nonghanyi yɛ nkamɔ efula ikoka ntokotshɛ́ djɛ nkfulumeyɛ. Amonangha dj’iso ndjala la akoka wa nsawola la nde kaanga oyɛso ananghi wa mpekanto. (Heb. 4:16) Tokokanela nkambo djɛnɛ: Tokoka ndɔmba Yehova lá nkambo la lá winá onkfumɔ. Akoka ntoka lá otepela onkfumɔ la lá idjena inkfumɔ, kaanga ntsha oyɛso nde isɔmɛlɛ kana lá lokando. (Yɔna 2:1, 2; Ele. 16:25, 26) Ntsha tombotshimba yimba efula ko topawa etepela wɛ mpakisola tokanyi tɔso, Yehova alekɔ l’akoka wa ndjoka kɛnɛ kɔkɔpaso ntepela. (Ɔrɔ. 8:26, 27) Lá nsɔsɔlɔ, nsawola la Yehova alekɔ nkambo djɛ nkamɔ efula!

4. Lamo okokaso ntepela ente alɔmbɛlɔ wɔlɔmbaso djɛ mba okfulumedji wokana la ɛkɔpa kɛ Yehova?

⁴ Yehova atoshikikɛ lá Otepela wɔnde ante: ‘Ekete kenkfumɔ kɔlɔmbaso kokana la ɛkɔpa kɛnde, nde ntokaka.’ (1 Dj. 5:14) Tokoka ndɔmba Yehova okotshɔ djɛ nkfulumeyɛ? Ee! Kɛsɔ ndjokanaka l’ɛkɔpa kɛnde. Otepelaso nghɔsɔ lamo? Winá w’okfulumeyɛso ekakasano, tɔpɛyɛ Yehova ndjɔndɔ kɛnde nkadjimola onto wosolaka, Satana Djabolo. (Woo. 27:11) Lá djiko djɛ lasɔ, Bible ntepela ante Yehova alekɔ la mposɛ ‘kɛ nyɛnyɛ wolo wɔnde lá nkambo djɛ anto wowilela eloko wɛwɔ enkfumɔ.’ (2 Ɛk. 16:9) Djɛko ndeke toyale la eshikikelo ente Yehova alekɔ la nkfulu ole la mposɛ kɛ ntokotshɛ́ djɛ nkfulumeyɛ.—Iza. 30:18; 41:10; Luka 11:13.

5. Lɔlɔmbɔ ɔtɔpɛyɛwɔ vu djɛ yimba ngete mo? (Izaya 26:3)

⁵ Bible ntepela ante winá wɔlɔmbaso Ndjambe l’oloko ɔmɔ djɛ ekiyano wɛso, ‘vu djɛ Ndjambe deka tokanyi tonkfumɔ ngolama eloko wɛso la timba tɔso.’ (Flp. 4:7) Tokolenda nsakiso kɛ etepela wɛsɔ. Anto wapakambela Yehova wapomana la ekakasano, wangɔsɛsake topo totshikitanyi tɔ ndjala la vu djɛ yimba. Ndjɔmbɔmba, amɔtshi wangonanghake djɛ nyimɛ yimba má ekakasano wɛwɔ ma nsamba nkanela akambo watshimbɛ yimba. Nyimɛ yimba má ekakasano wetokomelá nkoka ndjala mbalaka lá nyuma. (Ɛdjɛ la Mateo 12:43-45.) Koko vu djɛ Yehova ɔtɔpɛyɛnde winá wɔlɔmbaso deka otale yopo inkfumɔ yɛ vu yɛ onto okokande mba má nyimɛ yimba má ekakasano wɛnde. Winá wɔlɔmbaso Yehova, tɛnyɛ ente tolawɛkɛ lá akambo ankfumɔ le nde la ente atɔpɛyɛ ‘vu djepashile.’ (Wala Izaya 26:3.) Wopo ɔmɔtshi wɔ Yehova onanghande nghɔsɔ nde, má ntokotshɛ́ djɛ mvungɔ akambo amɔtshi wa nsɔsɔlɔ wa seke má Otepela wɔnde. Nkitshɛkitshɛka timba la eloko wɛso ladjikɛnde tewa ente Yehova atowakela la nde nkɔpaka iso ndjala la lowiko lɔ wɔlɔ.—Yee. 62:1, 2.

6. Wopo wɔkɔnge wokokɛ nkamba lá lɛdji l’efula la nonghanyi kɛ lɔlɔmbɔ? (Lenda ntshango.)

⁶ Kɛnɛ kokokɛ nangha. Winá w’okfulumeyɛ okakasano, ‘tshika odjito wɔko le Yehova’ la lɔmbande akɔpɛyɛ vu. (Yee. 55:22) Lɔmba lonkina djɛ mba balo ngokokotshɛ́ djɛ nkfulumeyɛ ekakasano. (Woo. 2:10, 11) Winá wɔlɔmbɛ Yehova djɛ nkɔpɛyɛ okfulumedji, tovungɛke ndokawoyɛ lokasa lá lɔlɔmbɔ. (Flp. 4:6) Hona tolembetelo tɛnyɛ ente Yehova akosuka winá woyɛ l’ohemba, ko kawoyɛnde lokasa djɛ osukɔ wɔnde. Tawolake ehemba nkovungɛ esako wɛ nghombowa.—Yee. 16:5, 6.

OTEPELA WƆ NDJAMBE

7. Ndjeka Bible okokawɔ ntokotshɛ́ djɛ nkfulumeyɛ ngete mo?

⁷ Yehova ambɔtɔpɛyɛ Otepela wɔnde djɛ ntokotshɛ́ dj’iso nkfulumeyɛ. Bible mbolola la avɛrse kfu watoshikikɛ osukɔ wɔ Yehova. Tokolenda vɛrse djɛnɛ. Mateo 6:8 atepela ante: ‘Papa kɛnyo ndjewaka ekete koyalanyo la ohomba kaanga lá ntondo kɛnyo ndɔlɔmba.’ Yeso atepelaka nghɔsɔ, ladjikɛnde ewa Yehova wɔlɔ efula ndeka onto onkfumɔ. Djɛko ndeke toyale la eshikikelo k’efula ente, winá woyalaso lá ndjolo, Yehova ndjewaka la angotokotshɛ́. Bible dekɔ la tokanyi tɔ nghɔsɔ efula tokoka nkembɛ nkano djɛso djɛ nkfulumeyɛ.—Yee. 94:19.

8. a) Kɔpɛyɛ ndjɔmbɔmba kɛ ikfɔ imɔtshi yɛ Bible ikoka ntokotshɛ́ djɛ nkfulumeyɛ, b) Ekete kɛkɔnge kekoka ntokotshɛ dj’iso mvungɔ tɔkfɔ tɔkɔ?

⁸ Tɔkfɔ tɔ Bible nkoka ntokotshɛ́ djɛ nkfulumeyɛ. Tolekɔ la alako wa balo wakoka ntokotshɛ́ djɛ ndɔsa akano wa wɔlɔ. (Woo. 2:6, 7) Ndjɔmbɔmba, Bible ntoshimela djɛ ntshika nkiyana lá kɛnɛ kengotokomela lá etsho weyaye, koko tolawɛkɛ le Yehova lofu lonkfumɔ. (Mat. 6:34) Ntsha tolekɔ l’ekfumbo kɛ mbala la kɛ ntɔnɔla lá Afunelo, tongovungɔ lankeke tɔkfɔ tɔ Bible toyɛso la djonyi.

9. Wopo wɔkɔnge ɛkɔndɔ wɛ Bible okembɛwɔ wɛkamo lá okotshɔ wɔ Yehova?

⁹ Tɛna lá Bible ɛkɔndɔ wɛ anto walawɛkisá le Yehova la wawisá okotshɔ wɔnde. (Heb. 11:32-34; Dja. 5:17) Winá wɔtɔnɔlaso lá ɛkɔndɔ wɛsɔ, tongokembɛ wɛkamo wɔso le Yehova ente ‘alekɔ djiisa djɛso la wolo wɔso, okotshɔ wolekɔ́ entshupa djɛ nyɛnama lá winá wɔ ndjolo.’ (Yee. 46:1) Winá wekaso mbiko yɛ anto wa nkɔmano wakambelisá Yehova, tongotshindama djɛ ndjokola djawo la okfulumedji wɔwɔ.—Dja. 5:10, 11.

10. Wopo wɔkɔnge wokokɛ nkamba lá lɛdji l’efula la nonghanyi k’Otepela wɔ Ndjambe?

¹⁰ Kɛnɛ kokokɛ nangha. Wala Bible lofu la lofu, la funa avɛrse wɛnɛ ente wakoka nkokotshɛ́. Anto efula wanghɛnake ambɔ nshishima vɛrse lofu la lofu alekɔ yopo yɛ wɔlɔ efula yɛ mbanga lofu la ikanyi ikembɛ yɛ Bible. Nkaana Mariea ɛnaka ante nkambo djɛsɔ dekɔ nsɔsɔlɔ winá wɔ yavunde ambotshi wande 2 la olando wɔ kansɛrɛ. Ekete kɛkɔnge kekotshisá nkaana kɛsɔ winá wɔ ndawakelaka ambotshi wande lá ngɔndɔ y’ekomo yɛ lowiko lɔwɔ? Atepela ante: “Nkɛsɛ nkfumɔ latangaki vɛrse djɛ Toshishimake Afunelo lofu la lofu la latɔnɔlaki. Ekfumbo kɛsɔ kampɛyɛki mbamba kɛ ndodjɛ yimba yɛmi la ikanyi imɔtshi yɛ Bible ikotshɛki djɛ ndápɛyɛ lá nkambo dj’ekekete ndekola lemi la deka akambo wankomelaki.”—Yee. 61:2.

WINASO ANDJAWODJI

11. Lamo ndjewa ente topalekɔ isɔmɛlɛ winá wokfulumeyɛso ekakasano oyɛwɔ nkambo djɛ lokembo?

¹¹ Yehova ambɔtɔpɛyɛ nkfumbo k’Akristo djɛ ntokotshɛ́ dj’iso nkfulumeyɛ. Ndjewa toko ente ‘nkfumbo k’otondo kɛ wananyɔ [waso] w’andja w’otondo wɛna ndjolo la ekakasano wɛ wopo wɔkɔ ɔmɔ,’ nkoka ntoshikikɛ ente topalekɔ isɔmɛlɛ. (1 Pɛ. 5:9) Lá nsɔsɔlɔ, tokoka ndjala la eshikikelo ente ayale okakasano wɔkɔnge wopomana laso, anto ankina wapomanaka la nkambo djɛ nghɔsɔ, ko wakfulumeyɛka. Kɛsɔ kɛnyɛ ente ole iso tokoka nkfulumeyɛ!—Ele. 14:22.

12. Wopo wɔkɔnge winaso andjawodji okokawɔ ntokotshɛ́, ko wopo wɔkɔnge wokokaso ndakotshɛ́? (2 Kɔrɛtɔ 1:3, 4)

¹² Winá wokfulumeyɛso, winaso andjawodji nkoka ntokotshɛ́. Ɔpɔstɔlɔ Poolo ɛnaka ante nkambo djɛsɔ dekɔ nsɔsɔlɔ. Mbala efula nde awandjɛki má nshila wiina w’anto wokotshɛ́ki winá wɔ ndayalaka lá lokando. Wapɛyɛka Poolo lokembo, wolo la okotshɔ wɛnama. (Flp. 2:25, 29, 30; Kɔl. 4:10, 11) Lɔɔko kɛnɛ nkambo djɛ nghɔsɔ nkoka ntokomela. Winá woyɛso la djonyi djɛ okotshɔ djɛ nkfulumeyɛ, wananyɔ la ankaana yɛso wangoyalake entshupa laso; la koko winá woyalawɔ la djonyi djɛ okotshɔ, iso koko tongoyalake entshupa lawɔ.—Wala 2 Kɔrɛtɔ 1:3, 4.

13. Ekete kɛkɔnge kekotshisá nkaana Maya djɛ nkfulumeyɛ?

¹³ Nkfumbo kɛso kɛ wananyɔ l’ankaana kekotshɛka nkaana Maya lá Russie efula. Lá 2020 ampulushi yɛ Russie wingelaka lá mvulu kɛnde mbala kɛkɔ kɛmɔ, ko wawangaka mpɛndja, manyi nde ayalaka ladjɛ nseela djawo djɛnde lá ntondo kɛ tominanyi mande apoposanyɛka anto. Maya atepela ante: “Winá wɔ malɛmbɛ efula lá yimba, wananyɔ l’ankaana wandjetaki la wamfunelaki, wanshikikɛki ambɔ wankɔpa. Ndjewaki winá enkfumɔ ente, ndekɔ la nkfumbo k’ekekete la kɛ ngandji efula. Koko má 2020, ndeke mashikikɛ nsɔsɔlɔ ente ndekɔ la nkfumbo kɛ wɔlɔ efula.”

14. Wopo wɔkɔnge wowaso osukɔ wɔ winaso andjawodji winá w’okfulumeyɛso? (Lenda ntshango.)

¹⁴ Kɛnɛ kokokɛ nangha. Winá wokfulumeyɛ, Yala entshupa la wananyɔ l’ankaana y’Akristo. Tokakanyɛke djɛ ndɔmba tokokolo okotshɔ. Wakoka ndjala ‘ihombo lá winá wɔ lompopo, la ete ngo idjena yɛ elamelo lá winá w’olumbe wɔ mvula.’ (Iza. 32:2, nɔtɛ.) Vungɔ lonkina ente, ole winako Akristo koko wapomana la ekakasano. Nanghela winako wolekɔ́ lá ndjolo ikakambo imɔtshi yɛ wɔlɔ, nkoka nkokotshɛ́ djɛ wɛ ndjala l’ikanyi yɛ wɔlɔ ole la wɛdjimo lá ohemba wokokomela.—Ele. 20:35.

NKONGI DJƐSO

15. Nkongi yakotshɛ́ Yeso ngete nge, koko yongotokotshɛ́ iso ngete nge? (Hebero 12:2)

¹⁵ Yehova ambɔtɔpɛyɛ nkongi djɛ wolo djetokotshɛ́ djɛ nkfulumeyɛ. (Ɔrɔ. 15:13) Tokovungɔ kɛnɛ kekotshisá Yeso djɛ nkfulumeyɛ ekakasano wɛ nkekete mfu yɛ ndayalaka lá looko. (Wala Hebero 12:2.) Yeso ewaki ante nkɔmano djɛnde ngokotshɛ́ djɛ nsola djiina djɛ Yehova. Yeso ayalaki la oloko pakipaki djɛ nkalɔ tá olongo t’isɛkɛnde la djɛ ndokamba la wananyɔ wande lá Onkfumi wɔ l’olongo. Lá wopo wɔkɔ ɔmɔ, nkongi djɛso djɛ mbika etshinda etshinda lá andja wa bango wa Ndjambe, ntokotshɛ́ djɛ nkfulumeyɛ okakasano onkfumɔ wotoposeyɛ andja wa Satana.

16. Nkongi yakotshɛ́ nkaana djɛ nkfulumeyɛ ngete mo, ko olakanyelo wɔkɔnge wowɛ má etepela wɛnde?

¹⁶ Tokolenda wopo wɔ nkongi djɛ Onkfumi yakotshɛ́ nkaana Alla lá Russie. Wavundaka womɛnde la wowingeyɛka lá lokando winá wɔ ndakongaka djɛ ndosamba. Winá wɔ nkambo djɛsɔ yananghema, Alla atepelaka ante: “Ndɔmba la ntɔnɔla lá nkambo djɛ nkongi dj’etsho weyaye nkotshɛka dj’ipa lemi ntɛka. Ndjokaka ente m’ɔkɔngɔ wɔ okakasano wɔnɛ, akambo ankina wa wɔlɔ wangoyɛ. Yehova angolonga, la iso koko tongolonga.”

17. Wopo wɔkɔnge wokokaso nyɛnyɛ ente tolekɔ la djedjɛ lá nkongi djɛso mbopikama lá Bible? (Lenda ntshango.)

¹⁷ Kɛnɛ kokokɛ nangha. Ɔsa winá wɔ ntɔnɔla djɛ etsho weyaye wɛ wɔlɔ efula wɛ Yehova ntombotowombela. Lokawɛnyi lá andja wa bango wa Ndjambe la kanela esako wɛ ngongowa. Ko ekakasano wepomana laso, wɛnghɛnama ete ngo oyɛwɔ nde ‘wɛ winá ɛmɔtshi la wepalekɔ wɛ wolo.’ (2 Kɔ. 4:17) Lonkina nangha kenkfumɔ kokokɛ nangha djɛ mpoposanyɛ anto ankina. Kokanela wopo wokoka ndjala wolo lewɔ djɛ nkfulumeyɛ ekakasano w’andja wa Satana wanɛ, ipa ndjewa kɛnɛ kɛ Ndjambe otolakande lá etsho weyaye. Okoka mfudjɛ mposɛ kɛwɔ lá nkongi djɛso djɛ Onkfumi kaanga má nsawola ndambo daambi lawɔ.

18. Lamo okokaso ndjilela alaka wa Yehova oloko?

¹⁸ M’ɔkɔngɔ wɔ nkfulumeyɛ ehemba la nkɔmano nkfumɔ, Djɔbɔ ashimelaka Yehova ante: ‘Winá wɔsɔ lemi lambewa ente wɛ olekɔ la akoka wa nangha akambo ankfumɔ la lako nkambo dekɔ lá ɔtɛ wɔko djɛ nghopakoke nangha.’ (Djɔ. 42:2) Ete ngo Djɔbɔ ndɛnyi, lako ekete kekoka nshimba djɛ ɛkɔpa kɛ Yehova nanghema. Nkambo djɛ nsɔsɔlɔ djɛsɔ nkoka ntokembɛ winá wokfulumeyɛso. Ndjɔmbɔmba, kokanela djɛ omoto wotata olando ambɔtɛka mande adɔktɛrɛ efula wapalekɔ la akoka wa ndosadjɛ. Koko winá wɔ dɔktɛrɛ djewa djoyi efula la dj’anto ilelawɔ oloko isolande nkambo la opakisolande wopo wɔ ndɔngɔpɛyɛ bɔki, nde angoka wɔlɔ kaanga ntsha alɔmbama ndambo kɛ winá djɛ nde nsala. Nde nkoka nkfulumeyɛ ladjikɛnde ambewa ante angosala. Lá wopo wɔkɔ ɔmɔ, wɛkamo wɔso lá nkongi djɛ Paradiso keyaye wotokotshɛ́ djɛ nkfulumeyɛ.

19. Oyɛso l’ohomba wɔ ekete kɛkɔnge djɛ nkfulumeyɛ?

¹⁹ Ete ngo sɔmɛna, Yehova atokotshɛ́ djɛ nkfulumeyɛ ekakasano wɛso má mbamba kɛ lɔlɔmbɔ, Otepela wɔnde, winaso andjawodji, la nkongi djɛso. Ntsha tokamba lá lɛdji l’efula la nonghanyi yɛsɔ, Yehova angotowakela kaanga opomanaso la okakasano wɔkɔnge tii lofu lɔ andja wa Satana wa nyɛtshi wanɛ yongima.—Flp. 4:13.