Olakanyelo ɔmɔtshi w’okokaso mba má akano wa nyɛtshi w’ɔsisá Nkfumi Jɛhɔyashɛ nde, iso ladjɛ nsɔna ntombe yetotshinda tá akambo wa wɔlɔ ntepela ente ntombe yɛkɔpa Yehova la yɛkɔpa ndosasangɛ. Topakoke ndjala lotombe ngo l’anto walekɔ laso lɔsɔkɛ lɔmɔ toko. Tovungɔ ente, Jɛhɔyashɛ ayalaki ilɛngɛ efula lá ntondo k’ilongo yɛnde Jɛhɔyada. Koyawopola lá kɛnɛ kelendana l’ɔsɔnɛlɔ wɔ tolongo ente: ‘Iwɔ wangonkotshɛ́ke djɛ nkembɛ djawo djɛmi te Yehova? Wangonkembɛke djɛ nkilika ɛlɛmbɛ wɛ Ndjambe? Wangotepelake akambo walendana la Yehova edjinge akambo wande wa nsɔsɔlɔ wa djonyi? Wangɔlɛmɛyeke ɛlɛmbɛ wɛ Ndjambe? Wangonshimelake ngo kɛnɛ k’okombolami ndjoka ndo koko wangoyalake l’oloko wolo wɔ mpɛyɛ lemi dako ntsha lambovunga?’ (Woo. 27:5, 6, 17) Lá nsɔsɔlɔ, ntsha tolongo tɔko wapakɔpɛ Yehova, mbɔ koko lako djonyi nkɛnda lawɔ. Koko ntsha tolongo tɔko wangɔkɔpake Yehova, malemawɔ, wangokokotshɛka winá enkfumɔ!—Woo. 13:20. w23.09 9-10 ite. 6-7

Dɛta alpha ndeke lowangaki lá alfabe wa Grɛkɛ, la dɛta omega ndeke lokomɛki alfabe wakɔ. Má nkamba la ‘Alfa la Omega,’ Yehova ɛnyɛka ante winá w’owangande la nkambo mɔtshi, nde nkomeyɛka nkambo djɛkɔ tii l’ekomo lá lɛdji lɔ wɔlɔ. M’ɔkɔngɔ wɔ Yehova ntonga Adama la Eva, Nde áshimelaka ante: ‘Nyowote, nyowotanele, nyolodjɛ looko la nyowapemele.’ (Ewa. 1:28) Lá mbamba kɛsɔ, ayalaka ngo ngete Yehova ambotepela ante: ‘Alfa.’ Nde ɛnyɛka ikanyi yɛnde papoo ante: Ikeke ingokoka yɛ tonkanola tɔ djɔ la tɔ dilɛmɛlɔ tɔ Adama la Eva yongolodjɛ looko la yongokadjimola paradiso. Winá wɔ ndongokotshɛ daka djɛnde l’etsho w’eyaye, angoyala ngo ngete Yehova ambotepela ante: ‘Omega.’ M’ɔkɔngɔ wɔ nde nshiyɛ ntonga ‘olongo la looko la nkete nkfumɔ djel’eteyi,’ Yehova atepelaka nkambo mɔtshi djɛnyɛ ente ikanyi yɛnde ingokotshama nsɔsɔlɔ. Apɛyɛka eshikikelo ante nde angokotshɛ ape l’ehamo ikanyi yɛnde lá nkambo dj’anto la djɛ looko. Ikanyi yɛkɔ ingokotshama lotshinda lotshinda l’ekomo kɛ lofu l’esambele.—Ewa. 2:1-3. w23.11 5 ite. 13-14

Lɔkɛndɔ lɔ nsɔsɔlɔ lɔ wolo l’imá Babilɔnɛ t’Isariyɛlɛ lokokaka ndɔsa ngɔndɔ ete ngo inɛyi, koko Yehova alakaka ante angowangoyɛ ekakasano enkfumɔ wekokaki ndaashimba dj’iwɔ nkalɔ. Lá timba t’ase Juda wa nkɔmano, nkalɔ t’Isariyɛlɛ ayalaka la wapɔ ndeka k’enkfumɔ k’iyakoke ndasambɛ. Ɔtshɔkɔ woleka ekekete walendanaki l’ɔtɛmwɛlɔ wɔwɔ. Tɛmpɛlɔ kɛ Yehova ketayalaki lá Babilɔnɛ. Etshumbelo kɛ ase Isariyɛlɛ kɛ ndambola elambo wɛwɔ ngo ngete Ɛlɛmbɛ wɛ Mɔsɛ yalɔmbaka ketayalá edjinge lako kaanga nonghanyi kenanghemisá djɛ ankfundji ndambolaka elambo wɛkɔ. Lá djiko djɛ lasɔ, ampame l’amato w’apanghano watalɛmɛyɛki Yehova l’ɛlɛmbɛ wɛnde wayalaka efula ndeka wanɛ wɔlɛmɛyɛki. Djɛko ndeke nunu dj’ase Juda w’okaki Ndjambe wɔma wayalaka l’eloko lukuluku djɛ nkalɔ t’owila wɔwɔ, lá yakoke tokawoyɛ etolo kɛwɔ kɛ piyɔɔ. w23.05 14-15 ite. 3-4