Olekɔ la djonyi djɛ ndeka ndjala la bale ntshitshi? Ntsha nghɔsɔ, lɔmba. Bale ntshitshi alekɔ djekeka mɔtshi djɛ lowambo lɔ nyuma. (Nga. 5:22, 23) Djɛko ndeke iso ladjɛ ndɔmbaka Yehova djɛ ntokotshɛ́ la nyuma kɛnde k’ekina la djɛ iso ndjala la lowambo lɔnde. Ntsha tombopomana l’akambo w’ilá bale ntshitshi djɛso l’ohemba, iso ‘nkindjɛka ndɔmba’ nyuma kɛnde k’ekina djɛ ntokotshɛ́ dj’iso ndjala la bale ntshitshi. (Luka 11:13) Iso nkoka lonkina ndɔmba Yehova djɛ ntokotshɛ́ dj’iso nyɛnaka akambo ete ngo nde ɛnande. Masɔ mɔkɔngɔ w’iso ndɔmba, iso ladjɛ ndjilaka welo djɛ ndjalaka la bale ntshitshi mfu inkfumɔ. Winá wolekaso ndɔmba la wonanghaso la wolo djɛ ndjala la bale ntshitshi, ndeke djekeka djɛsɔ yongotalekaka mpika edjo l’oloko wɔso la ndokoma etenyi kɛ lonto lɔso. Kɛsɔ kengotokotshɛ djɛ ntɔnɔlaka lá ndjɔmbɔmba yelá Bible. Bible dekɔ la ndjɔmbɔmba efula y’anto wayalaki la bale ntshitshi. Má ntɔnɔlaka l’ɛkɔndɔ wɛsɔ, tokoka ndjeka topo t’okokaso nyɛnyɛka bale ntshitshi djɛso. w23.08 22 ite. 10-11

Yeso ashikikɛka ɔpɔstɔlɔ Pɛtɛlɔ osukɔ wɔ Yehova. Yeso kaanga lokfundwisá apɛyɛla Pɛtɛlɔ nya ambeki wande ankina nse yemá nsese. (Dj. 21:4-6) Ipa l’ehamo nsese djɛsɔ nshikikɛka Pɛtɛlɔ ente Yehova nkoka ndɔpɛyɛ nkete djɛ demba dj’oyɛnde la djonyi ipa l’okakasano. Masɔ apɔstɔlɔ wakokaka mvungɔ etepela wɛ Yeso wɛ ndatepela ante Yehova angokotshɛ ehomba w’anto wakindjɛ ‘mpona ntondo ntondo Onkfumi.’ (Mat. 6:33) Djɛ nkotshɛ etepela wɛsɔ, Pɛtɛlɔ ilaka olemo w’ipoposanyɛ l’edjena kɛ ntondo koko ape olemo wɔnde wɔ nsaka ndjale. Nde apoposanyɛka l’oloko wolo onkfumɔ lofu lɔ Pantɛkɔtɛ k’ɔnɔnyi wɔ 33 D.D., edjinge akotshɛ́ka nunu dj’anto djɛ ndjawola losango lɔ wɔlɔ. (Ele. 2:14, 37-41) M’ɔkɔngɔ wɔ lasɔ, nde akotshɛ́ka ase Samariya l’ase Ewila djɛ ndjawola Kristo. (Ele. 8:14-17; 10:44-48) Lá nsɔsɔlɔ Yehova akambaka la Pɛtɛlɔ lá lɛdji l’efula djɛ ndjakala nkopo inkfumɔ y’anto l’otshumano. w23.09 20 ite. 1; 23 ite. 11

Ɛnɔnyi ete ngo epe m’ɔkɔngɔ w’ase Babilɔnɛ ntshita Jerusalɛmɛ, Nkfumi Nebukadenezara kɛ Babilɔnɛ ɛnaka dɔ djɛ wɔma djɛ isakandole y’ekekete. Nde anaka djɛ ndjaka ampame y’awalo inkfumɔ yel’onkfumi wɔnde, ndjila edjinge Danyɛlɛ, ntsha waposhimelisa dɔ djɛ ndɛnaki la nsakiso kɛ dɔ djɛkɔ. (Dan. 2:3-5) Danyɛlɛ ayalaka ladjɛ nangha lankeke; ntsha lako, anto efula watatshutshɛ mbiko. Ko nde ‘ingelaka le nkfumi ko ɔlɔmbaka djɛ ndɔpɛyɛ ndambo kɛ winá djɛ nde ndoshimela nkfumi nsakiso kɛ dɔ djɛkɔ.’ (Dan. 2:16) Nkambo djɛsɔ djalɔmbaki ndjala l’oloko wolo edjinge la djawo. Bible apɛnyɛ ante Danyɛlɛ ambosakisolaká alɔ ntondo. Nde alɔmbaka winande, ‘djɛ ndɔmba nkɛtshi me Ndjambe kel’olongo lá kɛnɛ kelendana l’iseke yɛsɔ.’ (Dan. 2:18) Yehova akadjimolaka ndɔmbɔ yɛsɔ. Má okotshɔ wɔ Ndjambe Danyɛlɛ asakisolaka dɔ djɛ Nebukadenezara. Danyɛlɛ nya tolongo tɔnde wawikaka. w23.08 3 ite. 4