Yosɛfu ndayalaká nde ɔmɔtshi l’anteyi kɛ wana w’ekomo wa Djakɔbɔ. Amama yɛnde wɛnaka djɛ Yosɛfu ndeke isɛkɛwɔ ndalekaka nkɔpa. Okanelɛ mo, yoke ngete mo lá nkambo ntshɔ? Iwɔ wokaka Yosɛfu djewɔ ole wootonaka. Akambo walekaka ntshitaná winá wɔ Yosɛfu ndaashimela alɔ amɔtshi wa nkamɔ wa ndɛnyi. Iwɔ wakanelaka ambɔ alɔ wasɔ wɛnyɛ ente lofu lɔmɔtshi, wangookfusamela. Ko ngo masɔ, wetelaka ndootona!

Lofu lɔmɔtshi, amama yɛ Yosɛfu walamaki ɛnkɔkɔ entshupa la ngando kɛ Sishɛmɛ. Djakɔbɔ atomaka Yosɛfu djɛ ntaalenda ntsha walekɔ ngo vu. Winá wɔ yatangela Yosɛfu m’otale, watepelaka l’anteyi kɛwɔ ambɔ: ‘Yɛɛná alɔ ndokonyi amboyɛ. Nyontshɔ tóyake!’ Ko woovundaka, wowokelaka lá mpeku dj’otale. Koko, Juda, mama kɛnde kɛmɔtshi atepelaka ante: ‘Totooyakake! Nyontshɔ tósadjɛ ete ngo mfumbe l’edjena kɛ ndooyaka.’ Djɛko ndeke, wasadjɛka Yosɛfu la mfalanga yɛ kɛngɛlɛ 20 le ananghi y’opoto y’ase Midiyanɛ itatshɔki t’Edjipito.

Masɔ, amama yɛ Yosɛfu wɔsaka okutu wɔnde, w’ilaka l’ekiya wɛ mbodji, watomelaka isɛkɛwɔ okutu wɔkɔ, ko wooshimelaka ambɔ: ‘Ɔnɛ ape okutu wɔ wɔnako?’ Ko, Djakɔbɔ akanelaka ante nyama kɛmɔtshi kɛ lopango ndeke loyakisá Yosɛfu. Nde asolongotɔka la yɛnyi. Lako kaanga onto wolongisá ndookembɛ.

L’Edjipito, watosadjɛka Yosɛfu ete ngo mfumbe le owandji ɔmɔtshi wɔ lomo wɔ yetaka Pɔtifara. Koko Yehova ayalaki esanga nya Yosɛfu. Pɔtifara ɛnaka djɛ Yosɛfu akambaki olemo wɔlɔ edjinge ayalaki onto wɔ yakokaka ndjilela oloko. Lako mpeta ilá, Pɔtifara ilaka Yosɛfu owandji wɔ nkete djɛnde nkfumɔ.

Wadjɛ Pɔtifara ɛnaka djɛ Yosɛfu ayalaki mpame k’ɔwɔngi efula la kɛ wolo. Lofu la lofu, nde alɔmbaki Yosɛfu djɛ nde nsanga mbeto nyande. Kɛkɔnge kɛ Yosɛfu ndayale ladjɛ nangha? Nde atonaka ole ooshimelaka ante: ‘Lako! Nkambo ntshɔ dekɔ nyɛtshi! Nkfumi kɛmi ndjilelaka lemi oloko, edjinge wɛ olekɔ wadjɛnde. Ntsha lemi nsanga mbeto isape, langonanghela Ndjambe mpekanto!’

Lofu lɔmɔtshi, wadjɛ Pɔtifara ahonaka djɛ nsanga mbeto nya Yosɛfu la wolo. Nde ovundaka lá ntshendja djɛnde, koko Yosɛfu alotaka. Winá wɔ Pɔtifara ndakalɔ lá mbandja, wadjɛnde óshimelaka ante Yosɛfu ambɔkɔpaka nkesola. Nde lako ndooshimela nsɔsɔlɔ. Pɔtifara omalaka efula, ko awokelaka Yosɛfu tá lokando. Koko Yehova atavungɛ Yosɛfu.

Winá wɔ Yosɛfu ndayalaka lá lokando, Farawɔ nkfumi k’Edjipito ɛnaka alɔ wa lako kaanga onto w’okokisá ndoosakisola. Onkambi wɔnde ɔmɔtshi oshimelaka ante Yosɛfu nkoka ndoosakisola alɔ wande. Mbala kɛkɔ kɛmɔ, Farawɔ atomaka djoyi dj’iwɔ ndjakala Yosɛfu.

Farawɔ oowopolaka ante: ‘Wɛ nkoka nsakisola lemi alɔ wami?’ Yosɛfu ashimelaka Farawɔ ante: ‘Nkete djɛ ndɛ ngoyala tshanghana tshanghana l’Edjipito l’ilá k’ɛnɔnyi esambele, ko masɔ, ndjala kɛ nkasa kengoyala ɛnɔnyi esambele. Sɔna onto ɔmɔtshi wɔ balo djɛ nde mbomba nkete djɛ ndɛ dj’ipa anto wako ndovɔ la ndjala kɛ nkasa.’ Farawɔ ooshimelaka ante: ‘Lambɔkɔsɔna ngo wɛ! Wɛ ongoyala onto w’ape l’onkfumi w’Edjipito!’ Wopo wɔkɔnge Yosɛfu ndewe nsakiso kɛ alɔ wa Farawɔ? Yehova ndeke lokotshisá Yosɛfu.

Yosɛfu awombaka nkete djɛ ndɛ, l’ilá k’ɛnɔnyi esambele wɛwɔlamisá. Masɔ ndjala kɛ nkasa keyalaka lá looko l’otondo ete ngo Yosɛfu ndatepela. Anto wayɛki má djena nkfumɔ djɛ ndosomba nkete djɛ ndɛ le Yosɛfu. Isɛkɛnde Djakɔbɔ okaka ante nkete djɛ ndɛ ndekɔ l’Edjipito, ko nde atomaka wana wande w’ampame djomi djɛ ntosomba nkete djɛ ndɛ.

Wana wa Djakɔbɔ watshɔka te Yosɛfu, nde awewaka ngo mbala kɛkɔ kɛmɔ. Koko, amama yɛnde watówewá. Iwɔ wokfusamelaka awɔngɔ ngo ngete ndɛnyi lá dɔ winá wɔ ndayalaka ilɛngɛ. Yosɛfu akɔpaka ndjewa ntsha amama yɛnde wakindjɛki ngo ndootona. Djɛko ndeke ndaashimela ante: ‘Nyolekɔ tɔtɔmbi. Nyómboyɛ́ nde ndokemba ngando kɛso djɛ ndjewa lampe oyɛso wɔdju.’ Iwɔ watepelaka ambɔ: ‘Lako! Somboyɛ nde má Kanana. Tolekɔ wana 12 w’onto ɔmɔ. Ankfunɛso ɔmɔtshi ambovɔ́, edjinge omvumba wɔso atshikalaka la isɛkɛso.’ Ko Yosɛfu atepelaka ante: ‘Nyondjakale omvumba wɔnyo wɔsɔ ndeke langawolake kɛnɛ k’otepelanyo.’ Ko, iwɔ wakalɔka tákawɔ, te isɛkɛwɔ.

Winá wɔ nkete djɛ ndɛ yashile, Djakɔbɔ atomaka wana wande lonkina t’Edjipito. Mbala kɛsɔ, watshɔka l’ankfunɛwɔ Bejamɛ. Yosɛfu aahembaka: nde isaka nkɔpɔ djɛnde djɛ mfɛsa lá mpata k’emponga kɛ Bejamɛ ko atepelaka ante amama yɛnde ndeke lɔmbɔngɔla. Winá wɔ enkambi wɛ Yosɛfu yisola nkɔpɔ lá mpata kɛ Bejamɛ, amama yɛnde wayalaka la yɛnyi efula. Iwɔ walɔmbaka Yosɛfu djɛ nde ndaapɛyɛ dilanyɛ l’edjena kɛ Bejamɛ.

Winá wɔsɔ, Yosɛfu ambewa ante amama yɛnde wambotshikitana. Yosɛfu atapanga nkfulumeyɛ lonkina. Nde atondjɔka la delo ole atepelaka ante: ‘Lemi nde Yosɛfu, nyanghɛmɔko kɛnyo. Papa alekɔ ngo la lowiko?’ Amama yɛnde wakamɔka efula. Nde aashimelaka ante: ‘Nyotakiyanake m’ɔtɛ wɔ kɛnɛ kɛ nyananghela. Ndjambe antomaka lanɛ djɛ lemi ndowikɛ mbiko yɛnyo. Nyotshu lankeke nyondjakale papa kɛmi lanɛ winá wɔsɔ.’

Iwɔ wakalɔka, ko watoshimelaka isɛkɛwɔ losango lɔ wɔlɔ lɔsɔ, edjinge wɔɔtɔlaka t’Edjipito. Yosɛfu nya isɛkɛnde wambooyala lonkina esanga, m’ɔkɔngɔ wɔ ɛnɔnyi efula.