Yobo
32 Biabia baba bana balume basatu babalekiele kualula Yobo, muanda baadi mushinkamishe aye nabene’shi mmululame.* 2 Anka Elihu muana a Barakele muina Buze a mu kifuko kia Rame baadi mufiite munda ngofu. Baadi mukuatshile Yobo nsungu ibukopo muanda baadi atompo kulesha’shi aye nabene* mmululame pamutue pa Efile Mukulu. 3 Baadi dingi mufiitshile bakuuku basatu ba Yobo munda muanda tababaadi bapete lualulo anka babaadi bakule’shi Efile Mukulu e bubi. 4 Elihu baadi mutengiele bua kualula Yobo, muanda babaadi bamukudile. 5 Pabaadi Elihu mumone’shi baba bana balume basatu tababaadi na kia kualula, bafiitshile munda ngofu. 6 Biabia Elihu muana a Barakele muina Buze babangile kuakula’shi:
“Ne nsongualume*
Na anue nui bantu bakulu .
Biabia na kanemo koso nekalanga mupele kuakula,
Na ntshi mutompe kuinulungula bia nguuku.
7 Nekeele muele binangu’shi: ‘Bantu bakulu bakule,
Na baba be na bipua bibungi bakule bu bantu be na binangu.’
8 Anka nyi nkikudi ki mui bantu,
Muwa wa Sha Bukome Boso, awibapaa kushinguula kua mianda.
9 Ta nka penda bipua* abikasha muntu sha binangu,
Sunga’shi ta nka penda bantu bakulu abauku kiakia kilulame.
10 Biabia nakula’shi: ‘Nteemesheyi,
Na nenulungula kiakia kianguuku.’
11 Talayi! Natengielanga mayi eenu;
Natungunukanga na kuteemesha binangu bienu
Panukimbanga mianda yanudia kuakula.
12 Nekalanga muinuteemeshe kalolo,
Anka muntu su ngumune a kuanudi ntamuleshe’shi Yobo e mu kilubilo*
Sunga kupela biabia biakulanga.
13 Biabia tanuambanga’shi: ‘Nubapete binangu;
Efile Mukulu nyi balesha’shi Yobo e mu kilubilo, ta mmutu nya.’
14 Ntayikalanga angakula ami nya,
Biabia ntamualula na mayi eenu nya.
15 Babapusha moo, tabakina kia kualula;
Tabakina muanda wa kuakula.
16 Nekeele mutengiele, anka tambatungunukie dingi na kuakula;
Mbashale bemane nka paapa, tabaki dingi na muanda wa kualula.
17 Biabia nami namu nakalula;
Nami namu nakakula kiakia kianguuku,
18 Ne na mayi e bungi a kuakula;
Kikudi ki muandi nyi kikuete kuntakula.
19 Munda muande mui nka bu nfinyo ishi na mbalo ya kutuusha lupapi,
Nka bu malondo apia a misokia ya nyema e pepi na kutanyika.
20 Ntadiile ngakule buashi mpushe bibuwa!
Nafungula milomo yande na ntuushe lualulo.
21 Ntandesha ntondo kui muntu su ngumune;
Sunga kulungula muntu mianda ya lubombo* bua kupeta kintu.
22 Muanda ntanguku bia kulesha muntu lubombo;
Su nakitshi biabia mupangi ande angipaa bukidibukidi.