Yobo
13 “Oolo, eyiso diande ndimone bino bioso,
Etui diande ndipushe na di’ebishinguula.
2 Biabia bi’anuuku, nami namu n’ebiuku;
Ntshi mushadile kuanudi.
3 Anka ami nakumiina kuisamba penda na Sha Bukome Boso aye nabene;
Nakumiina kusamba muanda wande kumpala ku’Efile Mukulu.
4 Anka nukuete kuluisha nkumo yande na mianda ya madimi;
Boso buenu nui ba minganga bashi kapu.
5 Su nubadia penda kushala baumine talalaa,
Bibadia kulesha’shi nui na binangu.
6 Teemeshayi namu binangu biande,
Na nutee matui mu kusamba kua milomo yande.
7 Anuakula mianda ishi ilulame muishina di’Efile Mukulu?
Na anuakula mianda ya madimi muishina diaye su?
8 Anukekala ku lupese luaye,
Anukatompo kuakuiila Efile Mukulu a binyibinyi su?
9 Aye muinutaluule, mianda ayikenuyila kalolo su?
Nui kumudimba bu biabadi balombene kudimba muntu afuiyaa su?
10 Binyibinyi akenusaashila
Su nubatompo kulesha ntondo mbufiefie.
11 Kinemo kiaye kikata t’akikenutshinyisha
Na moo waye t’aukenukuata su?
12 Mayi eenu a binangu nyi nkindi ya buto;
Mayi eenu akuibingisha nao e nka bu ngabo ikitshibue na ema.
13 Uminayi kumpala kuande, bua’shi ngakule.
Akupu tadiilayi kioso kilombene kunfikila kinfikile!
15 Sunga angipaa, nashala nka mutengiele;
Nakasamba muanda* wande kumpala kuaye.
16 Paapa badia kuikala kipandilo kiande,
Muanda muntu sh’atshinaa Efile Mukulu* ta mulombene kutuela kumpala kuaye.
17 Teemeshayi eyi diande kalolo;
Teeyi matui ku biangakula.
18 Binobino nemulumbuule kilumbu kiande bua nkasamba;
Nauku’shi nemubingie.
19 Nanyi akalu nami?
Nafu su nashala mumiine!*
20 Ô Efile Mukulu, mpe penda bintu bibidi,*
Bua’shi ntshifuamanga ku meso kobe:
21 Kaasha eyasa diobe dibushito wedituule kula nami,
Na totadilanga moo oobe untshinyishe.
22 Akula na nakualula,
Sunga ntadiile ngakule, na ongalule.
23 Bilubilo biande na miluisho yande bikunyi?
Ndeshe kilubilo kiande na muluisho wande.
24 Buakinyi ofuamisha mpala yobe
Na ommono bu muishikuanyi oobe?
25 Otompo kutshinyisha esaki diabapepula kui lupapi
Sunga kulonda lusonyi luume?
26 Muanda okuete nka kufunda mianda ibuulo ya banfundu nayo,
Na okuete kunyooka bua miluisho yande ya ku bu nsongua.
27 We muele mikoolo yande mu momba,
Okuete kutaluula mashinda ande oso,
Na okuete kulondoola mbalo yoso ya ngashina.
28 Biabia muntu* aluilaa nka bu kintu kinyangie,
Nka bu kilamba kiabadi badie kui tuishi.