Yobo
7 “Muwa wa muntu afuiyaa pa nsenga tawi bu mufubo wabakitshisha muntu pa bukopo?
Na mafuku aaye ta e bu a muntu abadi baate ku mufubo su?
2 Nka bu mpika, e na lukalo lui bukopo na mutaala,
Na nka bu muntu abadi baate ku mufubo, atengiela efuto diaye.
3 Babampa mieshi ya bisumanga
Na babambadikila bufuku bua makienga.
4 Pandala neyipusha’shi: ‘Nabuuku nsaa kinyi?’
Anka apayisha bufuku, nekupila aku naku mpa na pa butooko.
5 Mbidi yande ngiule na bifinyo na bibambo bi butshafu;
Kikoba kiande nkiule na malonda na tufina.
6 Mafuku ande aende lubilo kukila mashinyi a muntu alukaa bilamba,
Na aafudiila kushi lukulupilo.
7 Tentekiesha’shi muwa wande ndupapi,
Na’shi eyiso diande tadianamone dingi muloo.*
8 Eyiso dikuete kummona binobino taadikammono dingi;
Meso oobe aakankimbi, anka tankekala kuanka.
9 Nka bu ekumbi adipalakana na adishimina,
Muntu atuele mu Mashama* temutuuku dingi.
10 T’alukiila dingi ku nshibo kuaye,
Na mbalo yaye tayikamutundula dingi.
11 Biabia, ntankakanda kukanua kuande.
12 Ne kalunga ka mema su ne nyema mukata a mu kalunga ka mema,
Buashi otuule mulami a kundama?
13 Pangakula’shi: ‘Nkuasa ande anyingisha;
Lusala luande alunkuasha bua kubofusha dikienga diande,’
14 Akupu ontshinyisha na bilotua
Na onkuatshisha moo na bimonua,
15 Biabia nasangula kupela kuyooka,
Oolo, lufu pamutue pa ino mbidi yande.*
16 Nashikua muwa wande; ntshina dingi lukalo lua kuikala na muwa.
Ntadiile, muanda mafuku ande enka bu lupapi.
17 Muntu afuiyaa nnanyi buashi omupasukile
Na omuelele binangu?*
18 Buakinyi okuete kumutaluula ku namashika koso
Na kumutompa nsaa yoso?
19 Tokatusha meso oobe kuandi
Na kundekiela nsaa ikumbane buashi mmine mata su?
20 Su ne mukite muluisho, mbikunyi biandi mulombene nkuluishisha, Obe Atalaa bantu?
Buakinyi bongikasha bu kintu kiobe kia kuasa bintu?
Nafiki bushito kodi su?
21 Buakinyi tokunfuila lusa bua kutupilua kuande kua miiya
Na kumbuikiila kilubilo kiande?
Muanda mu kapindi kapeela’mu nakalala mu lufufi,
Na okankimbi, anka ntakekala kuanka.”