Wa kabidi wa Samuele
1 Kunyima kua lufu lua Saule, p’abaadi Davide mualukiile kubaadi mukepee bena Ameleke, Davide bashadile mu Sikelage munda mua mafuku abidi. 2 Muifuku dia kasatu ungi nsongualume bafikile, akatukila mu kishalelo kia ngoshi kia Saule, baadi na bilamba bisanukie na baadi muipongie nsenga mu mutue. P’abafikile pepi na Davide baponene mu nsenga, aye nkukupila mpala paashi.
3 Davide nkumuipusha’shi: “A okatukila kunyi?” Aye nkumualula’shi: “Nasuuku mu kishalelo kia ngoshi kia bena Isalele.” 4 Davide nkumuipusha’shi: “A mianda ibakitshika naminyi kuakua? Ndungule namu.” Aye nkumualula’shi: “Bantu babasuuku ngoshi, na bebungi babaafu. Mpa na Saule na muana aaye Yonatane babaafu namu.” 5 Akupu Davide nkuipusha yawa nsongualume baadi mumutuadile mukandu’shi: “A bouku naminyi’shi Saule na Muana aaye Yonatane babaafu?” 6 Yawa nsongualume nkumualula’shi: “Nakidilanga ku muengie wa Ngilboa, namono Saule mmueme ku mulumbu waye, matempu na bantu abatambusha nfualasa babaadi abefubuila lubilo lubilo kuadi. 7 Pabaadi muialuule aye nkumona, bangitanyiine, ami nkuamba’shi: ‘Nnami uno.’ 8 Aye nkungipusha’shi: ‘A nnobe nnanyi?’ Ami nkumualula’shi: ‘Ne muina Amaleke.’ 9 Akupu aye nkundungula’shi: ‘Fika namu ongipee muanda ne mukalakashue bikile, anka nkiantala.’ 10 Biabia ami nkufika kuadi nkumuipaa, muanda naukanga’shi nta mulombene kupanda bu biayikalanga mupone mu nsenga mutapikie ngofu. Akupu, ami nkuata kifulu kiaye kia bufumu kikeele ku mutue waye na kikano kikeele ku mboko yaye, na nafiki nabio binobino kui Nfumuami.”
11 Paapa Davide nkusaana bilamba biaye, na bantu boso babaadi naye babakitshine namu nka biabia. 12 Abadidile abeele misaase i bukopo, abo nkuishidika mpa na ku kiolua bua Saule, bua muana aaye Yonatane, bua bantu ba Yehowa na bua nshibo ya Isalele, muanda babaadi bayipayibue ku lupete lua ngoshi.
13 Akupu, Davide nkuipusha yawa nsongualume baadi mumutuadile mukandu’shi: “A we a kunyi?” Aye nkumualula’shi: “Ne muana a muenyi muina Amaleke.” 14 Paapa Davide nkumuipusha’shi: “Buakinyi tue mutshine bua kuipaa muedibue muimu a Yehowa?” 15 Biabia Davide nkuitanyina umune a ku ba nsongualume baye, nkumulungula’shi: “Fika omuipee.” Yawa nkufika, na nkumuipaa. 16 Davide nkumulungula’shi: “Mase oobe e pa mbidi p’obe obe nabene, muanda buefundu p’obe kuakula’shi: ‘Ami nyi ipayile muedibue muimu a Yehowa.’”
17 Paapa Davide nkuyimba uno musambo wa maalo pabitale Saule na muana aaye Yonatane, 18 na batumine eyi bua’shi beulongieshe bantu ba mu Yunda. Wawa musambo wa maalo ubaadi na mutue wa muanda awamba’shi: “Buta,” na mbeufunde mu mukanda wa Jashare:
19 “Ô Isalele! Bantu bobe ba ntumbo babafuila ku miengie yobe.
Tala bibapono bantu be bukome mu ngoshi!
20 Tanuakulanga uno muanda mu Gate;
Tanuiwulungulanga bantu mu miseese ya Ashekelone,
Bisumanga ba nsonguakashi ba bena Filistine abasanka,
Na ba nsonguakashi ba bantu bashi basadiibue abekala na muloo.
21 Anue miengie ya Ngilboa,
Lume sunga mpeshi tabinunokielanga,
Mafuba eenu taatushanga bintu biabadi balombene kulambula Efile Mukulu,
Muanda kuanudi nyi kuluishibue ngabo ya bilobo.
Na ngabo ya Saule, tayikii dingi yedibue muimu.
22 Buta bua Yonatane tabubaadi abualukiila ku mongo,
Ku mase a bantu babaabadi bayipee, na ku miimu ya bantu be bukome,
Na lupete lua ngoshi lua Saule, talubaadi alualukiila kushii kutshokola.
23 Saule na Yonatane abekalanga bafudiibue na bakuminyibue ngofu p’abekalanga na muwa,
Sunga ku lufu ntambeabulushene,
Babaadi bakile mumba ku lubilo,
Na bukome kukila ntambue.
24 Anue ba nsonguakashi ba Isalele, dilayi Saule,
Aye baadi enufuadika bilamba bimongie pididii, na bilumbulue kalolo,
Baadi eele bintu bia kulengiesha nabio bia ôlo ku bilamba bienu.
25 Tala bibapono bantu be bukome mu ngoshi!
Yonatane bafuila ku miengie yobe!
26 Ne na kinyongua kikata bobe obe mukuetu Yonatane,
Naadi mukufule bikata.
Kifulo kiobe kibodi mmufule, kibaadi buwa kukila kifulo kia bakashi.
27 Tala bibapono bantu be bukome mu ngoshi,
Na bina ngoshi bibashimina!”