Ufundibue kui Luka
7 Pabapuile kulungula bantu mianda ibaadi na kia kuibalungula, batuelele mu Kapernaume. 2 Kuakua, ungi mukata a basalayi baadi na mufubi abaadi mufule, baadi akumbu ngofu na baadi pepi na kufua. 3 Pabapushishe bibaadi bangi abakula pabitale Yesu, batumine bangi bakulu ba bena Yunda kuadi, bua kumuteka bua’shi afikie apaashe mufubi aaye. 4 Abo nkufika kui Yesu na kubanga kumuisendeela, bambanga’shi: “Mmulombene bua’shi omukuashe, 5 muanda mufule muilo wetu na naye muibakishe kitumbuilo kietu.” 6 Biabia, Yesu bayile nabo. Kadi patabaadi pepi na ku nshibo, mukata a basalayi baadi mupue kutuma ba kuuku baye bua kumulungula’shi: “Muanana, tuekalakashanga, muanda ntshi mukumbanyine bua’shi otuela muande mu nshibo. 7 Nyi buakinyi ntshi muiate bu mukumbanyine kufika kodi. Kadi akula penda eyi, na mufubi ande apaashibue. 8 Muanda ami namu nemutudibue muushi mua matalua a bangi, ne na basalayi be muushi mua matalua ande, nalungulaa umune’shi: ‘Nda!’ na ende, nalungulaa ungi’shi: ‘Fika’ na afiki, na nalungulaa mufubi ande’shi: ‘Kita bino!’ na ebikitshi.” 9 Pabapushishe Yesu ino mianda, bakaanyine ngofu, na aye nkualuluka kui kibumbu kia bantu kibaadi akimulondo na nkuamba’shi: “Nenulungula’shi, sunga mu Isalele ntshi musangane muntu e na lukumiino lukata bu luno.” 10 Pabaadi baaba bababadi batume balukie ku nshibo, babaadi basangane mufubi na mbidi bukome.
11 Kunyima kua nsaa ipeela, bayile mu kibundi ki’abetanyina bu Naine, balongi baye na kibumbu kikata kia bantu babayile naye. 12 Pabaadi muifubuile pepi na kibelo kia kibundi, baadi mufumankane na bantu batuale kitanda kia muntu, muana a eleka a mukashi kilele. Dingi, kibumbu kikata kia bantu ba mu kiakia kibundi babaadi naye. 13 Pabaadi Muanana mumone yawa mukashi kilele, bamupushishe lusa, na aye nkumulungula’shi: “Leka kudila.” 14 Biabia baadi muifubuile na akuma ka lusala k’abasemuinaa bitanda, na babaadi bekasemune nkuimana. Akupu aye nkuamba’shi: “Nsongualume, nakulungula’shi, buuka!” 15 Yawa muntu mufue nkubuuka, nkubanga kuakula, na Yesu nkumupa nyinaye. 16 Biabia, moo nkuibakuata boso, abo nkubanga kutumbisha Efile Mukulu, bambanga’shi: “Mutemuki mukata batuuku munkatshi muetu, na Efile Mukulu bapasukila muilo waye.” 17 Nkumo pabitale biabia bibaadi mukite ibapalakene mu Yudeya oso na mu bibundi bioso bi pepi.
18 Biabia balongi ba Yowano abaadi bamulondele ino mianda yoso. 19 Nyi Yowano nkuitanyina babidi ba ku balongi baye na nkuibatuma kui Muanana bua kuipusha’shi: “Obe nyi baadi na kia kufika, su tui na kia kutengiela ungi?” 20 Pababafikile kui Yesu, baaba bantu abamulunguile’shi: “Yowano Mubatshishi betutumu kodi, bua kukuipusha’shi: ‘Obe nyi baadi na kia kufika, su tui na kia kutengiela ungi?’” 21 Mu yaaya nsaa baadi mupaashe bantu bebungi babaadi na mikumbo ikata na ipeela, kubinga bikudi bibubi, na kubuula ba mpofu be bungi meso. 22 Aye nkuibalula’shi: “Ndayi nukalungule Yowano mianda yanubapusha na yanubamono: Ba mpofu bakuete kumona, bishetshi bikuete kutambuka, ba sha nsudi bakuete kutooshibua, ba nshikue bakuete kupusha, bafue bakuete kubuushibua, na balanda bakuete kulungulua mukandu wibuwa. 23 Sha muloo ngiawa sh’apete kintu kia kumukokosha muandi.”
24 Pabalukiile bantu babaadi Yowano mutume, Yesu babangile kulungula kibumbu kia bantu pabitale Yowano’shi: “Kianuyile mukutala mu kabaaka nkinyi? Elengie diabapuku kui lupapi su? 25 Biabia, kianuyile mukutala nkinyi? Mmuntu mufuale bilamba bibuwa? Baaba abafualaa bilamba bia muulo ukata na be na nshalelo ebuwa be mu mashibo a ba nfumu. 26 Mu binyibinyi, nkinyi kianuyile mu kutala? Mmutemuki? Oolo, nenulungula’shi, mmukile mpa na mutemuki. 27 Aye nyi abadi bafunde pa muanda waye’shi: ‘Tala! Natumu mukiendi wande kumpala kobe, aukalumbula eshinda kumpala kobe.’ 28 Nenulungula’shi, munkatshi mua bantu boso, ta mui muntu su ngumune mukile Yowano bukata, kadi muntu mukile bupeela mu Bufumu bu’Efile Mukulu, mmumukile bukata.” 29 (Pabaadi bantu boso na bafutshishi ba bitadi bapushe biabia, abakuile’shi Efile Mukulu mmululame, muanda abaadi babatshishibue na lubatshisho lua Yowano. 30 Anka Bafadisee na baaba babaadi abauku Miiya ngofu abaadi bapele elango* di’Efile Mukulu, muanda tababaadi babatshishibue kui Yowano.)
31 “Biabia, nemulombene kupuandikisha bantu ba mu kino kipungo na ba nanyi, na be bu ba nanyi? 32 Be’nka bu bana bakinga bashale mu kisalue na abeyitanyishena, bambanga’shi: ‘Tuikele benuyimbile milengie,* anka tanuibashe; tuikele benuyimbile ngono ya maalo, anka tanuibadile.’ 33 Mu mushindo umune, Yowano Mubatshishi mmufikie t’adi mukate, tatomo nfinyo, anka anuamba’shi: ‘E na demo.’ 34 Muana a muntu mmufikie adi, atomo, anka anuamba’shi: ‘Talayi! mudiafi na ntomi a malofu, kuuku a bafutshishi ba bitadi na a ba nkitshishi ba miluisho!’ 35 Sunga biabia, mianda ilulame ayikitshi muntu nyi ayilesha’shi e na binangu.”
36 Umune a ku Bafadisee baadi nka atekie Yesu buabadia kudia naye. Biabia aye nkutuela mu nshibo mua yawa Mufadisee, nkushala bua kudia. 37 Ungi muana mukashi baadi aukibua mu kibundi bu nkitshishi a miluisho, baukile’shi Yesu kuete kudia* mu nshibo mua yawa Mufadisee, na aye nkutuala mulangi wa alabasta wi na malashi. 38 Emana kunyima kua Yesu dia ku ngua yaye, abanga kudila na kutopesha ngua ya Yesu na mpolo, akupu eyikumuna na nyene yaye. Dingi, afifia ngua yaye na kalolo koso na ekupongoola malashi. 39 Yawa Mufadisee baadi muitanyishe Yesu pabamuene biabia, baadi muiakuile’shi: “Su uno muntu badia kuikala mutemuki binyibinyi, badia kuuka’shi uno muana mukashi kuete kumukuma nnanyi, na’shi mmuntu a mushindo kinyi, nkitshishi a miluisho.” 40 Kadi Yesu nkumulungula’shi: “Simone, ne na muanda wa kukulungula.” Aye nkumulungula’shi: “Mulongieshi, ewakule!”
41 “Bantu babidi babaadi n’ebasa dia muntu baadi muibeyapushe makuta; umune baadi n’ebasa dia ndenie 500, kadi ungi na dia ndenie 50. 42 Bu biabashibadi na kintu su nkimune kia kumufuta, baadi muibalekieele boso. Biabia nanyi a kuabadi akamufulu ngofu?” 43 Simone nkualula’shi: “Napuandikisha’shi, ngiawa aadi mulekieele ebasa dikata.” Yesu nkumulungula’shi: “Bualuula kalolo.” 44 Akupu Yesu nkualuluka kui muana mukashi na nkulungula Simone’shi: “Bomono uno muana mukashi? Natuele mu nshibo yobe; tuemumpe mema bua kutumpa ngua yande. Kadi uno muana mukashi batopesha ngua yande na mpolo yaye na beyikumuna na nyene yaye. 45 Tue munfifie kuitama, kadi uno muana mukashi, kubanga nsaa yantuelele muno, tamulekie kufifia ngua yande na kalolo koso. 46 Tuemupongoole muimu ku mutue wande, kadi uno muana mukashi bapongoola malashi ku ngua yande. 47 Pa muanda wa biabia, nankulungula’shi, miluisho yaye sunga biayidi i bungi,* ibalekieelua, muanda mmuleshe kifulo kibungi. Kadi yawa alekieelua bipeela, afulu bipeela.” 48 Akupu Yesu nkulungula yawa muana mukashi’shi: “Miluisho yobe ibalekieelua.” 49 Baaba babaadi adi nabo* ababangile kuilungushena’shi: “Uno mmuntu kinyi alekieela mpa na miluisho?” 50 Anka aye nkulungula yawa muana mukashi’shi: “Lukumiino lobe lubakupaasha; nda mu butaale.”