Ba nsushi
20 Biabia bena Isalele boso babafikile kukatukila ku Dane mpa na ku Beere-sheba na kukatukila mu nsenga ya Gileade, na kakongie koso kabebungile bu kintu kimune* kumpala kua Yehowa ku Misepa. 2 Nyi ba nfumu ba muilo na bisamba bioso bia Isalele nkuimana pa mbalo yabio mu kakongie ka muilo w’Efile Mukulu, basalayi 400 000 abatambuka lua ngua, bena mpete ya ngoshi.
3 Bena Benyamine babapushishe’shi bantu ba Isalele abakaamina ku Misepa.
Akupu bantu ba Isalele nkuipusha’shi: “Etulunguleyi, uno muanda wi bubi bui bino ukitshikile naminyi?” 4 Nyi yawa muina Levi, mulume a mukashi abaabadi bayipee nkualula’shi: “Nfikile ku Gibeya a Benyamine na mukashi ande bua kulala. 5 Bantu* ba mu Gibeya nkungibuela na nkuifunyisha nshibo bufuku. Abakimbanga kungipaa, anka pamutue pa biabia abalala na mukashi ande pa bukopo, na baafu. 6 Nyi naata kitanda kia mukashi ande nekitshibi mbipindi na natumu biabia bipindi mu kipindi kioso kia bupianyi bua Isalele, muanda bakitshine muanda wi bubi na wi buufu mu Isalele. 7 Binobino anue muilo wa Isalele, esambeyi na nutuushe kienu kinangu pano.”
8 Akupu muilo oso nkuibua mu buumune* na nkuakula’shi: “Takui muntu su ngumune a kuatudi ende ku kashibo kaye k’epema sunga kualukiila ku nshibo yaye. 9 Binobino, bino nyi bi’atukitshi Gibeya: Tuteyi bubale bua nkuenda mu kumuluisha. 10 Atuata bantu 10 mu bantu 100 ba bisamba bioso bia Isalele, na bantu 100 mu bantu 1 000, na bantu 1 000 mu bantu 10 000 bua kubunga bia kudia bua kiluilo kia basalayi bua’shi bende mu kuluisha Gibeya a Benyamine ngoshi, bua muanda wi buufu ubabakitshi mu Isalele.” 11 Biabia bantu boso ba Isalele babebungile bu kintu kimune* bua nkaluisha kibundi ngoshi.
12 Akupu bisamba bia Isalele nkutuma bantu kui bantu boso ba kisamba kia Benyamine, bakula’shi: “Mmuanda kinyi wi bubi bui bino ubakitshika munkatshi muenu? 13 Binobino tuushayi bantu ba bisumanga ba mu Gibeya bua’shi tuibayipee na tukaashe kintu ki bubi mu Isalele.” Anka bena Benyamine abapelele kuteemesha bakuabo bena Isalele.
14 Akupu bena Benyamine abebungile paasha pa bibundi ku Gibeya bua kuenda mu kulua ngoshi na bantu ba Isalele. 15 Mu diadia efuku bena Benyamine babayitanyishe bantu 26 000 be na mpete ya ngoshi ba mu bibundi biabo, kukaasha bantu 700 ba mu Gibeya abauku kulua ngoshi. 16 Mu kino kiluilo kia ngoshi mubaadi bantu 700 abauku kulua ngoshi abaadi na lubokosua. Oso a ku bano bantu baadi mulombene kuasa ebue na ndundo mu mushindo wadishibaadi dilombene kutupilua sunga lunyene.
17 Bantu ba Isalele babaabadi bayitanyishe kukaasha bena Benyamine, abaadi bantu 400 000 be na mpete ya ngoshi, na oso a kuabadi baadi kilobo akiuku kulua ngoshi. 18 Abo nkuibua na nkuenda ku Betele mu kuipusha Efile Mukulu. Akupu muilo wa Isalele nkuakula’shi: “Nnanyi a kuatudi e na kia kuenda kumpala mu kulua ngoshi na bena Benyamine?” Yehowa nkualula’shi: “Yunda nyi ende kumpala.”
19 Kunyima kua biabia bena Isalele nkuibua ku namashika na nkushimika kishalelo bua kulua ngoshi na Gibeya.
20 Bantu ba Isalele abatuukile mu kulua ngoshi na bena Benyamine; abo nkuilonga bua kulua nabo ngoshi ku Gibeya. 21 Biabia bena Benyamine nkutuuka mu Gibeya na nkuipaa bantu ba Isalele 22 000 mu diadia efuku. 22 Anka kiluilo kia bantu ba Isalele kibaadi kinyingie eshimba na akio nkuilonga dingi bua kulua ngoshi mu yaaya mbalo imune nka bu muifuku dia kumpala. 23 Akupu bena Isalele nkuenda na nkudila kumpala kua Yehowa mpa na ku kiolua na abo nkuipusha Yehowa’shi: “Abitungu tuende dingi mu kulua ngoshi na bakuetu, bantu ba Benyamine su?” Nyi Yehowa nkuakula’shi: “Ndayi mu kulua nabo.”
24 Biabia bena Isalele nkuifubuila pepi na bena Benyamine muifuku dia kabidi. 25 Bena Benyamine nkutuuka n’abo namu mu Gibeya mu kufumankana nabo muifuku dia kabidi na abo nkuipaa bangi bena Isalele 18 000, boso buabo bekale na mpete ya ngoshi. 26 Nfudiilo a bioso bantu ba Isalele nkuenda ku Betele. Abo nkudila na nkushala kuakua kumpala kua Yehowa, abo nkuishidika mu diadia efuku mpa na ku kiolua, abo nkulambula milambu ya kushiika kaalo na milambu ya butaale kumpala kua Yehowa. 27 Kunyima kua biabia bantu ba Isalele nkuipusha Yehowa, muanda mushete wa kilombeno w’Efile Mukulu a binyibinyi ubaadi kuakua mu aa mafuku. 28 Binobino Finease muana a Eleazare, muana a Alona nyi baadi afubu* bu tshite muakuidi kumpala kuao mu aa mafuku. Abo nkuipusha’shi: “Abitungu nka tuende dingi mu kulua ngoshi na bakuetu, bantu ba Benyamine, su abitungu tulekie?” Yehowa nkualula’shi: “Ndayi, muanda malooba nebatuulu mu maasa eenu.” 29 Akupu Isalele nkutuma bantu mu kubelama befunyishe Gibeya oso.
30 Bena Isalele nkuenda mu kulua ngoshi na bena Benyamine muifuku dia kasatu, na abo nkuilonga bua kulua ngoshi na Gibeya nka bu yaaya ingi misusa. 31 Pabaadi bena Benyamine batuukie mu kufumankana na kiluilo kia basalayi, abaadi bebakakile kula na kibundi. Akupu, nka bu ingi misusa, ababangile kuibaluisha na kuipaa bangi ba kuabadi mu mashinda akata, dimune diao adiende ku Betele na dingi adiende ku Gibeya, baleka bantu ba Isalele pepi na 30 bafue mu mapia. 32 Biabia bena Benyamine nkuakula’shi: “Atuibatshokola nka bu misusa ya kumpala.” Anka bena Isalele nkuakula’shi: “Atualukiila kumongo na tuibakakile kula na kibundi mu mashinda akata.” 33 Biabia bantu boso ba Isalele nkuibuaa, nkukatuka mu ma mbalo aabo na nkuilonga ku Baale-tamare, pabaadi bena Isalele abaadi babelame batuukie mu ma mbalo aabo pepi na Gibeya. 34 Bantu 10 000 abauku kulua ngoshi ba Isalele boso babafikile kumpala kua Gibeya, na ngoshi ibaadi bukopo. Anka bena Benyamine tababaadi abauku’shi malua e kuibafikila.
35 Yehowa nkutshokola Benyamine kumpala kua Isalele, na mu diadia efuku bena Isalele nkuipaa bantu ba bena Benyamine 25 100, boso bekale na mpete ya ngoshi.
36 Anka bena Benyamine abaadi bapuandikishe’shi abatshokola bantu ba Isalele pabaabadi balukiile kumongo, aku namu bena Isalele babaadi balukiile kumongo muanda babaadi bakulupile mui bantu abaadi babelamine Gibeya. 37 Bantu babaadi babelame nkukita bukidibukidi na nkuenda batadiile ku Gibeya. Akupu bantu abaadi babelame nkupalakana na nkuipaa bantu boso babaadi mu kibundi ku lupete lua ngoshi.
38 Binobino, bantu ba Isalele abaadi bepushene’shi baba bantu babelamine kibundi abebuesha muishi kuakua bu kitunduilo.
39 Pabaadi bena Isalele balukiile ku mongo mu ngoshi, bantu ba Benyamine bababangile kuibaluisha na abo nkuipaa bantu ba Isalele pepi na 30, na abo nkuakula’shi: “Abimueneka patooka’shi atuibatshokola dingi kumpala kuetu nka bu mu ingi ngoshi ibakidi.” 40 Na muishi wi bungi ubabangile kukaamina mu kibundi bu kitunduilo. Pabaadi bantu ba Benyamine balulukie bua kutala, abamuene kibundi kioso kikuete kutemba kaalo na ndimi ya kaalo ibaadi ayikaamina mpa na muiyilu. 41 Akupu bantu ba Isalele nkuibalulukila, na bantu ba Benyamine nkubofula mbidi, muanda babamuene’shi malua abebafikila. 42 Biabia abo nkusuuka bantu ba Isalele batadiile dia ku kabaaka, anka ngoshi nkuibalonda; bantu babaadi abatuuku mu bibundi nkuibakuatshishena bua kuibayipaa. 43 Abo nkuifunyisha bena Benyamine na nkuibalonda kushi kukooka. Abo nkuibatshokola kumpala kua Gibeya dia kutunduka nguba. 44 Nfudiilo a bioso, bantu ba Benyamine 18 000 nkufua, boso bekale bilobo bia ngoshi.
45 Bantu ba Benyamine nkualuluka na nkusuukila mu kabaaka mu lubuebue lua Rimone, na bena Isalele nkuipaa bantu 5 000 ba kuabadi mu mashinda akata, na abo nkutungunuka na kuibalonda mpa na ku Gidome; abo nkuipaa* bangi bantu 2 000. 46 Bena Benyamine boso babafuile mu diadia efuku babaadi bantu 25 000, bekale na mpete ya ngoshi, boso bekale bilobo bia ngoshi. 47 Anka bantu 600 babaadi basuukile mu kabaaka mu lubuebue lua Rimone, na abaadi bashale mu lubuebue lua Rimone munda mua mieshi inanka.
48 Na bantu ba Isalele nkualukiila mu kuluisha bena Benyamine na abo nkuipaa baba abaadi mu kibundi ku lupete lua ngoshi, kubanga ku muntu mpa na ku nyema, boso babaadi bashale. Dingi, abo nkuela bibundi bioso bibaadi muishinda dibaabadi abakidila kaalo.