Yobo
4 Akupu Elifaze muina Temane nkualula’shi:
2 “Su muntu akiebe kuisamba nobe, we kukutua luishinko su?
Muanda nnanyi mulombene kuikanda bua kuakula?
3 Mbinyibinyi wemulangie bantu be bungi,
Na boodi munyingishe bantu babofule.
4 Mayi obe abaadi ebueshe muntu kuete kukokola,
Na boodi munyingishe baba bashi bia kuibuaa abo banabene.
5 Anka biabia bibakufikila, na bibakukidi bukome;
Mbikukume, na wemukalakashue.
6 Kutshina kobe kua Efile Mukulu ta kukutakula bua kukulupila muadi?
Lulamato lobe talukupa lukulupilo su?
7 Ntentekieshe namu: Mmuntu kinyi shi musole muanda tadi mufue?
Nsaa kinyi itabadi babutule muntu mululame?
8 Nkiandi mumone nkia’shi baba abadimi* mianda ibubi
Na baba abakunu dikienga abakaumbula kiakia ki’abakunu.
9 Abafu kukiila ku muwa w’Efile Mukulu,
Na kukiila ku nsungu yaye ibukopo abashimina.
10 Ntambue akukungula, na muana a ntambue asama,
Anka sunga meno a ntambue* ibukome aatshokoka.
11 Ntambue afuiyaa bua kukutua kia kudia,
Na bana ba ntambue abapalakana.
12 Binobino eyi ndifikie kuandi mu bufiefie,
Na miununo yadio ngifikie ku matui ande.
13 Mu kuumbakana kua binangu mu bimonua bia bufuku,
Nsaa i tulo tui bukopo atukuata bantu,
14 Kusuusa kui bukopo nkukuate,
Kubausha mifufua yande yoso na moo wi bukopo.
15 Kikudi kampanda kibakidi kumpala kuande;
Buaa bua pambidi pande bubeboo.
16 Kibaadi nka kimane,
Anka ntshinaadi mutundule mpala yakio.
Kifuanyi kampanda kibaadi kumpala kuande;
Kubaadi kushaale kutaale, akupu ami nkupusha eyi adiakula’shi:
17 ‘Muntu afuiyaa mulombene kuikala mululame kukila Efile Mukulu su?
Muntu mmulombene kuikala selele kukila Mupangi aaye su?’
18 Tala! Te na lukumiino mui bafubi baye,
Na basangana mikeyilu* yaye na bilubilo.
19 Bikuikala naminyi bua baba bashale mu mashibo a ema,
E na bitako biao mu lufufi,
Babaashina kushi lukalakashi bu tuishi!*
20 Abebaashina boso kubanga ku namashika mpa na ku kiolua;
Abebashimisha bua loso, na takui muntu su ngumune auku.
21 Ta be bu kashibo k’epema ke na mioshi itshibikie?
Abafu kushi binangu.