EFILU

1 Biabia mashina a bana ba Isalele babatuelele na Yakobo mu Ejipitu, muntu oso na ba mu nshibo muaye ngano: 2 Rubene, Simeone, Levi na Yuda: 3 Isakare, Zabulone na Benyamine; 4 Dane na Neftali; Gade na Ashere. 5 Na bantu* boso ba mu kifuko kia Yakobo babaadi 70, anka Yosefe baadi mupue kuikala mu Ejipitu. 6 Nfudiilo a bioso, Yosefe bafuile, na bakuabo balume boso, mpa na bantu boso ba mu kiakia kipungo. 7 Na bena Isalele babaadi betandene, abo nkufuima ngofu, na babaadi abatungunuka nka na kufuima na kufika na bukome mu kipaso kia kukaanya. Biabia, babauudile muiumbo dishima.

8 Muenda mafuku, ungi nfumu mupia shibaadi auku Yosefe babangile kumunana mu Ejipitu. 9 Biabia aye nkulungula muilo waye’shi: “Talayi! Bena Isalele be bungi bukile na be bukome kuitukila. 10 Tukimbeyi mushindo wa kuibakutshisha bua’shi tabafuimanga. Bisumanga, abatungunuka na kufuima, na su ngoshi yatuuka abende ku lupese lua beshikuanyi netu bua kuituluisha, akupu bakatukie muiumbo.”

11 Biabia babatuudile ba nfumu ba kuibafubisha midimo pa bukopo bua’shi bebakiengieshe na midimo i bukopo, na bebakile Faraone bibundi bia kulamina bintu, kuamba’shi, Pitome na Ramesese. 12 Kadi pababadi abanyisha kuibakiengiesha, babaadi abanyisha kufuima na kupalakana muiumbo. Biabia bena Ejipitu babapushishe bena Isalele moo wi bukopo. 13 Nyi buakinyi bena Ejipitu babakuatshile bena Isalele ku bupika na nkuibakitshisha midimo i bukopo. 14 Babekeshe nshalelo abo bubi bukile na kuibakitshisha midimo i bukopo ya kukita potopoto, kubula kua matafuadi na midimo yoso i bukopo ya mu mafuba. Eyendo, babaadi abebafubisha midimo yoso ilekene ya bupika na kifita kioso.

15 Kunyima nfumu a mu Ejipitu nkuisamba na Shifra na Puwa ba ntaashi bena Ebelu, 16 aye nkuibalungula’shi: “Panukuasha bakashi bena Ebelu bua kutanda, talayi muana kalolo, su nubamono’shi mmulume, numuipee; kadi su nubamono’shi mmukashi, numulekie na muwa.” 17 Anka ba ntaashi babatshinyine Efile Mukulu a binyibinyi, na tababakitshine bibaadi nfumu a mu Ejipitu muibalungule nya. Kadi babaadi abalama bana balume na muwa. 18 Muenda mafuku, nfumu a mu Ejipitu bayitanyine baba ba ntaashi ebepusha’shi: “Buakinyi nukuete kuleka bana balume na muwa?” 19 Ba ntaashi babalunguile Faraone’shi: “Bana bakashi bena Ebelu ta be bu bana bakashi ba bena Ejipitu nya. Be bukome na bakuete kutanda kumpala kuashi ntaashi afikie kuabadi.”

20 Biabia Efile Mukulu belele baba ba ntaashi miabi, na bena Isalele babaadi abatungunuka na kufuima na kufika na bukome bukile. 21 Na bu bibaadi baba ba ntaashi batshine Efile Mukulu a binyibinyi, bebapeele bana kunyima kua mafuku. 22 Nfudiilo a bioso, Faraone balunguile muilo waye oso’shi: “Abitungu nuele muana mulume oso abatanda kui bena Ebelu mu muela wa Nile, kadi nulekie muana mukashi oso na muwa.”

2 Mu aa mafuku, ungi muntu a mu kisamba kia Levi, bayibakile muana a Levi mukashi. 2 Na yawa mukashi bayimite, atanda muana mulume. Bu bibamuene’shi muana baadi buwa bukile, bamufuamishe munda mua mieshi isatu. 3 Pabamuene’shi te na dingi mushindo wa kumufuamisha, batshile kisaku* kikitshibue na papirise,* aye nkuikishinga kabudimbo na oliba, akupu nkuimuela muana na nkukekitula mu malengie ku bukunkula bua muela wa Nile. 4 Kadi tat’aye baadi muimane kubula bua kumona kibaadi kilombene kumufuila.

5 Pabaadi muana mukashi a Faraone mufikie mu kuitumpa ku muela wa Nile, bafubi baye bakashi babaadi abatambukila ku bukunkula bua muela. Na bamuene kisaku munkatshi mua malengie. Musango umune batumine mufubi aaye mukashi bua kuikiata. 6 Pabaadi muikibuule, bamuene muana mulume kuete kudila. Bamupushishe lusa, na amba’shi: “Uno ngumune a ku bana ba bena Ebelu.” 7 Akupu, tata a yawa muana bayipuishe muana mukashi a Faraone’shi: “Okumiina nkakukimbile muana mukashi muina Ebelu bua’shi akomeeshe uno muana su?” 8 Muana mukashi a Faraone bamualuluile’shi: “Nda!” Musango umune yawa tat’aye bayile mu kuitanyina nyinaye na yawa muana. 9 Muana mukashi a Faraone balunguile nyina muana’shi: “Ata uno muana omungomeeshe, nakakufutu.” Yawa muana mukashi bamuatshile na aye nkumomeesha anka. 10 Pabakudile yawa muana, bamutuadile kui muana mukashi a Faraone, na aye nkufika bu muan’aye. Bamudikile bu Moyise,* na nkuamba’shi: “Muanda ne mumuate ku mema.”

11 Dingi efuku, pabaadi Moyise bapu kukula, bayile kui bakuabo bena Isalele na amona midimo i bukopo ibabadi abebafubisha, aye nkumona muina Ejipitu baadi akupila mukuabo muina Ebelu. 12 Na pabatadile ku lupese, amona’shi takui muntu baadi amumono, bayipayile yawa muina Ejipitu na aye nkumushiika mu lusenga.

13 Muifuku dibalondele bayile’nyi, na asangana bena Ebelu babidi abalu ngoshi. Balunguile yawa baadi mu kilubilo’shi: “Buakinyi okupila mukuenu?” 14 Na yawa nkumualuula’shi: “Nnanyi bakutuulu bu nfumu na bu nsushi eetu? Okiebe kungipaa bu bioyipayile muina Ejipitu su?” Biabia Moyise bapushishe moo, amba’shi: “Eyendo, uno muanda ubapu kuukibua!”

15 Na pabapushishe Faraone wawa muanda, bakimbile bia kuipaa Moyise; anka Moyise bamusuukile, aye nkuenda mu kushala muiumbo dia Madiane. Pabafikile kuakua, bashalele pepi na kitonko kia mema. 16 Tshite muakuidi a mu Madiane baadi na ba nsonguakashi musambobidi. Babayile mu kutapa mema na kuusha miomba bua kutomesha nyema ya nshabo. 17 Nka bu pa kiubishi, balami ba nyema babafikile bebabinga. Moyise nkuenda mu kukaluila* baba ba nsonguakashi na nkutomesha nyema yabo mema. 18 Pababalukiile ku nshibo kui nshabo Rewele,* bakaanyine amba’shi: “A lelo nubaluka bukidi biabia naminyi?” 19 Babamualuluile’shi: “Ungi muana mulume muina Ejipitu betukaluila kui balami ba nyema, betutapila mpa na mema, na batomesha nyema yetu.” 20 Bepuishe bana baye’shi: “Kadi yawa muana mulume e kunyi? Buakinyi nubamulekie? Muitanyineyi bua’shi tudie naye kantu pamune.” 21 Kunyima Moyise nkukumina bua kushala kua Rewele, na aye nkupa Moyise muan’aye mukashi Sipora bua’shi amuibakile. 22 Akupu, yawa mukashi bamutandiile muana, Moyise nkumudika bu Gershome,* muanda bambile’shi: “Nemufikie mu kushala bu muenyi mu kibundi kiabeene.”

23 Kunyima kua mafuku e bungi, nfumu a mu Ejipitu bafuile, anka bena Isalele babatungunukile na kukienga na kuidila pa muanda wa bupika, na kuakua kuidila kuabo kua kukimba bukuashi pa muanda wa bupika, kubaadi kutungunukie na kupushika kui Efile Mukulu a binyibinyi. 24 Nfudiilo a bioso, Efile Mukulu bapushishe kudila kuabo, na aye nkutentekiesha kilombeno kibakitshine na Abalahama, Isaake na Yakobo. 25 Biabia, Efile Mukulu batadile bena Isalele; aye nkutuula muanda wabo kuishimba.

3 Moyise bafikile mulami a nyema ya muko aaye Yetro, tshite muakuidi a mu Madiane. Dingi efuku, pabaadi adiisha nyema ku lupese lua kushi kua kabaaka, bakafikile mpa na ku muengie w’Efile Mukulu a binyibinyi, ku Orebe. 2 Akupu muikeyilu a Yehowa bamumuenekiele mu ndimi ya kaalo, munkatsh’ebuula dia mutshi wi na meeba, kadi pabaadi atungunuka na kutala, bamuene’shi ebuula dibaadi aditembe kaalo, anka tadibaadi adipi nya. 3 Moyise bambile’shi: “Abitungu nyende nkatale awa muanda wa kukaanya, mmone buakinyi ebuula dia mutshi t’adipi kaalo.” 4 Pabamuene Yehowa’shi Moyise kuete kuisesela pepi bua kutala, bamuitamine munkatshi mu’ebuula dia mutshi’shi: “Moyise! Moyise!” Moyise baluluile’shi: “Nnami uno.” 5 Biabia Efile Mukulu bamulunguile’shi: “Tu’eseselanga dimo pepi. Fuula sandale yobe, muanda mbalo yodi muimane ngia kishila.”

6 Akupu Efile Mukulu bambile dingi’shi: “Ne Efile Mukulu a nshobe, Efile Mukulu a Abalahama, Efile Mukulu a Isaake, na Efile Mukulu a Yakobo.” Paapa Moyise bafuamishe mpala yaye, muanda baadi atshinyi bua kutala Efile Mukulu a binyibinyi. 7 Yehowa bakumbeshe’nyi shi: “Eyendo, nnamono makienga a muilo wande wi mu Ejipitu, na napusha kudila kuabo pa muanda wa baba bakuete kuibakiengiesha na midimo i bukopo; nauku kalolo makienga abakuete kufumankana nao. 8 Nayiki bua kuibapaasha ku maasa a bena Ejipitu, nebatushe mu diadia eumbo na kuenda nabo mu nsenga i buwa na yangabale, nsenga ayalala mabeele na buuki, nsenga ya bena Kanaana, bena Ite, bena Amore, bena Perizi, bena Ivii, na bena Yebuse. 9 Muanda kudila kua bena Isalele kubafiki mpa na kuandi, na namono dingi biabakuete kuibakiengiesha kui bena Ejipitu, mu mushindo ukile bubi. 10 Binobino fika nkutume kui Faraone, bua’shi okatuushe muilo wande wa Isalele mu Ejipitu.”

11 Anka Moyise balunguile Efile Mukulu a binyibinyi’shi: “Ami namu nenyi buandia kuenda kui Faraone na kutuusha bena Isalele mu Ejipitu?” 12 Efile Mukulu bamulunguile’shi: “Nakekala nobe, na bua’shi oshinkamishe’shi nnami bakutumu, nakupa kino kitunduilo: Kunyima k’obe kutuusha muilo wa Isalele mu Ejipitu, anukafubila* Efile Mukulu a binyibinyi ku uno muengie.”

13 Kadi Moyise balunguile Efile Mukulu a binyibinyi’shi: “Banda kupuandikisha’shi nende kui bena Isalele na nebalungula’shi, ‘Efile Mukulu a ba nkambua benu bantumu kuanudi,’ kadi bangipusha’shi: ‘A eshina diaye nnanyi?’ Nakebalungula kinyi?” 14 Biabia Efile Mukulu balunguile Moyise’shi: “Nakekala kiakia kiankumiina* kuikala.”* Na akumbasha’shi: “Tala biodia kukalungula bena Isalele, ‘Nakekala bantumu kuanudi.’” 15 Efile Mukulu balunguile dingi Moyise’shi:

“Bino nyi biokalungula bena Isalele, ‘Yehowa Efile Mukulu a ba nkambua benu, Efile Mukulu a Abalahama, Efile Mukulu a Isaake, na Efile Mukulu a Yakobo bantumu kuanudi.’ Dino ndio eshina diande bua ikalayika, mu dino eshina nyi muankumiina’shi bantentekieshanga mu bipungo na bipungo. 16 Binobino, nda okabungie bakulu ba Isalele, webalungule’shi, ‘Yehowa Efile Mukulu a ba nkambua benu, Efile Mukulu a Abalahama, Efile Mukulu a Isaake, na Efile Mukulu a Yakobo bammuenekiela na bambashi: “Natuulu binyibinyi muanda wenu kuishimba, na namono biabakuete kuinukiengiesha mu Ejipitu. 17 Nyi buakinyi namba’shi, nenupososha ku malua a bakuete kuinumuesha kui bena Ejipitu, bua kuinutuala muiumbo dia bena Kanaana, bena Ite, bena Amore, bena Perizi, bena Ivii, na bena Yebuse, nsenga ayalala mabeele na buuki.”’

18 “Mbinyibinyi abakakutemeesha. Obe na bakulu ba Isalele anuende kui nfumu a Ejipitu numulungule’shi: ‘Yehowa Efile Mukulu a bena Ebelu mmuisambe netu. Biabia atukusendeela’shi wetuposole munda mua mafuku asatu, tuende mu kabaaka tukalambule Yehowa Efile Mukulu eetu.’ 19 Kadi ami nabene nauku’shi nfumu a bena Ejipitu takenutadiila buanudia kuenda nya, anka su bamukitshisha kui eyasa di bukome. 20 Biabia nakebuesha eyasa diande nkupile bena Ejipitu na mianda yoso ya kukaanya yankakitshi muanka, paapa enutadiila nuende. 21 Na nakakitshi bia’shi uno muilo ulongamine bena Ejipitu, na panukende, tanukende ku maasa bisumanga nya. 22 Abitungu muana mukashi oso atekie nkungishanyi naye na muana mukashi mushale mu nshibo yaye bintu bia kiamo kia arja, bia ôlo, mpa na bilamba na anukebifuadika bana benu balume na bana benu bakashi; na anukapaula bena Ejipitu.”

4 Biabia Moyise nkualuula’shi: “Tupuandikishe’shi ta mbakumiine biangakula na ta mbampushishe, muanda abakakula’shi, ‘Yehowa tamukumuenekiele.’” 2 Yehowa nkumuipusha’shi: “Nkinyi kiodi nakio muiyasa?” Moyise nkumualuula’shi: “Mmukombo.” 3 Efile Mukulu nkumulungula’shi: “Eusumbule mu nsenga.” Moyise nkuiusumbula mu nsenga, ao nkualuluka nyoka; na Moyise nkusuuka. 4 Yehowa nkulungula dingi Moyise’shi: “Oola eyasa diobe omukuate ku mukila.” Moyise nkoola eyasa diaye, nkumukuata ku mukila na aye nkualuluka dingi mukombo muiyasa diaye. 5 Efile Mukulu nkumulungula’shi: “Kino nkitunduilo kia’shi bakakumiine’shi, Yehowa Efile Mukulu a ba nkambua babo, Efile Mukulu a Abalahama, Efile Mukulu a Isaake, na Efile Mukulu a Yakobo, mmukumuenekiele.”

6 Yehowa nkumulungula dingi’shi: “Ela namu eyasa mu kilamba kiobe.” Moyise belele eyasa mu kilamba kiaye. Na pabeditushishe, dibaadi dikuatshikie nsudi, na dibaadi soo nka bu mulemba! 7 Efile Mukulu bamulunguile’shi: “Alusha eyasa mu kilamba kiobe.” Moyise baluishe eyasa mu kilamba kiaye. Na pabeditushishe dibaadi dialukie nka bu mbidi yaye yoso! 8 Efile Mukulu nkulungula Moyise’shi: “Su ta mbakumiine biokula, sunga kukumiina kitunduilo kia kumpala, eyendo’shi abakakumiina kitunduilo kia kabidi. 9 Anka su ta mbakumiine bino bitunduilo bioso bibidi, na babapele kuteemesha eyi diobe, wate mema a mu Nile, weapongoole mu lufuinkinyi, na aa mema watshile mu muela wa Nile aaluluka mase mu lufuinkinyi.”

10 Paapa Moyise nkulungula Yehowa’shi: “Nfuile namu lusa Yehowa, tangikalaa na ngakuilo mupelepele, biabikala kala sunga pano p’okuete kuisamba na mufubi oobe, muanda ne na ludimi lui bushito n’euwuta.” 11 Yehowa nkumuipusha’shi: “Nnanyi bapeele muntu mukanua, sunga kuikasha muntu bu kamaama, nshikue, muntu amonaa kalolo sunga mpofu? Ta nnami Yehowa su? 12 Binobino nda, nakekala nobe nsaa yuakula, na nakakulongiesha biodi mulombene kuakula.” 13 Kadi Moyise nkumulungula’shi: “Nfuile namu lusa Yehowa, tuma namu ungi muntu oso okumiina.” 14 Paapa Yehowa nkufitshila Moyise munda, nkumulungula’shi: “Alona muina Levi ta mukuenu su? Nauku’shi akulaa kalolo. Binobino e muishinda, afiki mu kufumankana nobe. Na pakumono eshimba diaye adisanka. 15 Okesamba naye na kumulungula biadia kuakula,* na nakekala nenu nsaa yanuakula, na kuinulongiesha kianudia kukita. 16 Akakula pa mbalo yobe kumpala kua muilo, na akekala bu muntu a kukuisambila, obe namu okekala bu Efile kuadi.* 17 Na okaata uno mukombo muiyasa diobe bua kukita nao bilengieleshi.”

18 Biabia Moyise nkualuka kui muko aaye Yetro, nkumulungula’shi: “Nakiebe kualukila kui bakuetu mu Ejipitu bua nkatala su baki na muwa.” Yetro nkumulungula’shi: “Nda mu butaale.” 19 Kunyima Yehowa nkulungula Moyise mu Madiane’shi: “Alukiila mu Ejipitu, muanda bantu boso abakimbanga nkuipaa, mbapue kufua.”

20 Paapa Moyise nkuata mukashi aaye na bana baye nkuibatenteka ku mpunda, na abo nkutuela muishinda bua kuenda mu Ejipitu. Moyise baadi mukuate mukombo w’Efile Mukulu a binyibinyi muiyasa diaye. 21 Na Yehowa balunguile Moyise’shi: “P’okafiki mu Ejipitu, kita bilengieleshi bioso biandi mukupe matalua a kukita kumpala kua Faraone. Anka ami nakatadiila bua’shi eshimba diaye dipape, takafungula muilo buaudia kuenda. 22 Abitungu olungule Faraone’shi, ‘Yehowa amba’shi: “Isalele mmuan’ande, muan’ande mbedi. 23 Nakulungula’shi, posola muan’ande ende mu kunfubila. Kadi su bopele kumufungula, nakayipaa muan’obe, muan’obe mbedi.”’”

24 Binobino pababadi muishinda pa mbalo ya kuikiisha, Yehowa baadi mufumankane naye na akimba kumuipaa.* 25 Nfudiilo a bioso, Sipora batshile ebue di maashi, atshiba munyonga* wa muan’aye, na akita bia’shi kakoba kao kakume ku ngua yaye,* na aye nkuakula’shi: “Pa muanda we muikale kuandi bu mulume a mase.” 26 Biabia Efile Mukulu nkumulekiela buadia kuenda. Mu kiakia kipungo Sipora bambile’shi, “nyi mulume ande a mase,” pa muanda wa kusadiibua.

27 Yehowa balunguile Alona’shi: “Nda mu kabaaka okafumankane na Moyise.” Na Alona bayile akafumankana na Moyise ku muengie w’Efile Mukulu a binyibinyi, aye nkumusema na nkumuanya kiipa. 28 Nyi Moyise nkulungula Alona bioso bibamulunguile Yehowa baadi mumutume, mpa na bilengieleshi bioso bibamulunguile bua kukita. 29 Kunyima kua biabia Moyise na Alona babayile, abo nkubunga bakulu boso ba Isalele. 30 Alona nkuibalungula mianda yoso ibaadi Yehowa mulungule Moyise, na Moyise nkukita bilengieleshi kumpala kua muilo. 31 Paapa muilo nkukumiina pababapushishe’shi Yehowa baadi mualushe binangu biaye kui bena Isalele, na’shi bamono makienga abo, abo nkuinama na kukupila mapala paashi.

5 Kunyima kua biabia, Moyise na Alona babayile kui Faraone bamulungula’shi: “Yehowa Efile Mukulu a Isalele amba’shi, ‘Posola muilo wande bua’shi ukankitshine musangelo mu kabaaka.’” 2 Kadi Faraone bambile’shi: “Yehowa nnanyi bua’shi mmukokiele na kuposola bena Isalele buabadia kuenda? Ta nguuku Yehowa’mi na tandekie bena Isalele buabadia kuenda nya.” 3 Babamulunguile’shi: “Efile Mukulu a bena Ebelu mmuisambe netu. Biabia atukuseendela bua’shi tuende mu kabaaka munda mua mafuku asatu, bua’shi tukalambule Yehowa Efile Mukulu eetu; bisumanga, etunyooko na bipupa sunga na lupete lua ngoshi.” 4 Nfumu a bena Ejipitu bebaluuluile’shi: “Moyise na Alona, buakinyi anukutshisha baba bantu bua kufuba? Alukiilayi ku mudimo.” 5 Na Faraone nkukumbasha’shi: “Anumono kalolo’shi uno muilo wi bungi, kadi anukumiina’shi balekie mudimo wabakuete kukita.”

6 Nka mu diadia efuku, Faraone batumiine bakata ba midimo i bukopo na tupita tuabo eyi’shi: 7 “Tanupanga dingi muilo nsonyi bua kukita matafuadi. Ebatadiileyi abo banabene bakekimbile. 8 Kadi abitungu nuibatekie buabadia kukita nka bungi bui mumune bua matafuadi bu biabakitanga kumpala. Tanuibapeleshelanga buanka, muanda tabadi na lulengu. Nyi buakinyi bakuete kuidila’shi, ‘atukiebe kuenda, atukiebe kukalambula Efile Mukulu eetu!’ 9 Nyishayi kuibakitshisha midimo i bukopo, na bekale na bibungi bia kukita bua’shi tabatulanga binangu ku mianda ya madimi.”

10 Biabia bakata ba midimo i bukopo na ba tupita babo, babayile bakalungula muilo’shi: “Faraone amba’shi, ‘ta nenupa dingi nsonyi nya. 11 Ndayi nukakimbe anue banabene nsonyi koso kuanudia kuiyipeta, anka t’abapeelesha mudimo wenu su nkapeela.” 12 Biabia, bena Isalele babapalakene muiumbo dia Ejipitu dishima, mu kusangula bisosua biabadia kufubisha pa mbalo ya nsonyi. 13 Bakata ba midimo i bukopo abaadi abatungunuka na kuibalungula’shi: “Muntu oso atungunukie na kukita bungi bua matafuadi bui mumune nka bu bibaadi akitshi kumpala pababadi abenupa nsonyi.” 14 Dingi, babakupiile ba tupita ba bena Isalele babaabadi batuule kui bakata ba midimo i bukopo ba Faraone. Babebepuishe’shi: “Buakinyi lelo na maloba, tanui bakumbashe bungi bua matafuadi bu buanukitanga kumpala?”

15 Biabia ba tupita ba bena Isalele babayile kui Faraone bamulungula na kuidila’shi: “Buakinyi okitshina bafubi bobe biabia? 16 T’abetupa nsonyi nya, anka abetulungula’shi, ‘Kitayi matafuadi!’ Abetukupila, aku namu bantu bobe nyi be mu kilubilo.” 17 Kadi Faraone bebaluluile’shi: “Nukuete kukita mudimo na lulengu! Nukuete kukita mudimo na lulengu! Nyi buakinyi anuamba’shi, ‘Atukiebe kuenda, atukiebe kukalambula Yehowa.’ 18 Biabia, alukiilayi ku mudimo! T’abenupa nsonyi nya, anka abitungu nutungunukie na kukita matafuadi nka bungi bubanudi anukitshi kumpala.”

19 Nyi tupita tua bena Isalele nkumona’shi muanda ubanyisha kuela bukopo, muanda wa bibabaadi bebalungule’shi: “Tanupeleshanga bungi bua matafuadi anukitaa kuifuku dioso su nkapeela.” 20 Akupu babafumankene na Moyise na Alona, abaadi abebatengiela bua kuimonena nabo p’abakatuka kua Faraone. 21 Musango umune babebalunguile’shi: “Yehowa amono biabia bianubakitshi na enutshibila kiimu, muanda nubakitshi bia’shi Faraone na bafubi baye betubepuule, na nubatuulu lupete lua ngoshi mu maasa muabo buabadia kuituipaa.” 22 Akupu Moyise nkulungula Yehowa’shi: “Yehowa, buakinyi okiengiesha uno muilo? Buakinyi we muntume? 23 Kubanga nka nsaa yangiile kui Faraone bua kuisamba naye muishina diobe, banyisha kukiengiesha uno muilo, na tue mupaashe muilo wobe nya.”

6 Biabia Yehowa balunguile Moyise’shi: “Binobino omono biankitshina Faraone. Eyasa diande di bukome adikamukitshisha bua’shi ebaposole, n’eyasa diande di bukome adikamukitshisha bua’shi ebabingie muiumbo diaye.”

2 Akupu Efile Mukulu nkulungula Moyise’shi: “Nnami Yehowa. 3 Naadi namuenekiela Abalahama, Isaake, na Yakobo bu Efile Mukulu sha bukome boso, kadi pabitale eshina diande dia bu Yehowa, ntshinadi muibaukishe dianka nya. 4 Naadi mukite nabo dingi kilombeno bua kuibapa eumbo dia Kanaana, eumbo dibaabadi bashale bu benyi. 5 Binobino ami nabene napusha kuidila kua muilo wa Isalele wabadi batuule ku bupika mu Ejipitu, na natentekiesha kilombeno kiande.

6 Biabia lungula bena Isalele’shi: “Nnami Yehowa, nakenupososha ku midimo i bukopo yabenunyenyeka kui bena Ejipitu na kuinupaasha ku bupika buabo, nakenupaasha na mboko yande i bukome na kuibanyooka bikata. 7 Nakenukukila bu muilo wande, na nakekala Efile Mukulu eenu, anukauku binyibinyi’shi ne Yehowa Efile Mukulu eenu, enupososha ku midimo i bukopo ya bakuete kuinukitshisha kui bena Ejipitu. 8 Nakenutuesha muiumbo dinaadi muitshipe bua kupa Abalahama, Isaake, na Yakobo; nakenupa dianka bua’shi dikale bu dienu. Nnami Yehowa.’”

9 Kunyima Moyise balunguile bena Isalele ino mianda, anka tababaadi bamuteemeshe, muanda babaadi bapue kubofula ku mashimba na pa muanda wa bupika bui bukopo.

10 Akupu Yehowa nkuisamba na Moyise, nkumulungula’shi: 11 “Nda okalungule Faraone nfumu a bena Ejipitu’shi, abitungu aposole bena Isalele bakatukie muiumbo diaye.” 12 Biabia Moyise nkualuula Yehowa’shi: “Talanga! Bena Isalele ta mbampushishe nya; mbikunyi bilombene Faraone kumpushisha, aku ne na lukalakashi lua kuakula?” 13 Kadi Yehowa nkulungula dingi Moyise na Alona mayi abadia kulungula bena Isalele na Faraone nfumu a bena Ejipitu, bua’shi amone bia kutuusha bena Isalele mu nsenga ya Ejipitu.

14 Ba nfumu ba bifuko bia bena Isalele babaadi bino: Bana ba Rubene, muana mbedi a Isalele mbano: Anoke, Palu, Esrone, na Karmi. Bino nyi bifuko bia mu kisamba kia Rubene.

15 Bana ba Simeone mbano: Yemuele, Yamine, Ohade, Yakine, Zoware, na Shaule, bana ba mukashi muina Kanaana. Bino nyi bifuko bia mu kisamba kia Simeone.

16 Mashina a bana ba Levi muyile bifuko biabo ngano: Gershone, Kehate, na Merari. Levi bakitshine bipua 137.

17 Bana ba Gershone mbano: Libeni na Shimeyi, muyile bifuko biabo.

18 Bana ba Kehate mbano: Amalame, Isala, Ebrone na Uziele. Kehate bakitshine bipua 133.

19 Bana ba Merari mbano: Maheli na Mushi.

Bino nyi bibaadi bifuko bia bena Levi muyile kuilondena kua bifuko biabo.

20 Amalame bayibakiile Yokebede, nkashan’aye na nshaye. Yokebede nkutanda Alona na Moyise. Amalame bakitshine bipua 137.

21 Bana ba Isala mbano: Kora, Nefege, na Zikri.

22 Bana ba Uziele mbano: Mishaele, Elizafane, na Sitri.

23 Alona bayibakile Elisheba muana a Aminadabe, nkashan’aye na Nasone. Elisheba bamutandiile Nadabe, Abihu, Eleazare, na Itamare.

24 Bana ba Kora mbano: Asire, Elkana, na Abiasafe. Bino nyi bifuko bia mu kisamba kia Kora.

25 Eleazare muana a Alona, bayibakiile umune a ku ba nsonguakashi ba Putiele. Aye nkumutandila Finease.

Bano nyi ba nfumu ba bifuko bia bena Levi muyile bifuko biabo.

26 Uno Alona na Moyise nyi bababalunguile kui Yehowa’shi: “Tuushayi muilo wa Isalele mu nsenga ya bena Ejipitu, belondene muyile bisaka biabo.” 27 Uno Moyise na Alona, abo nyi babesambile na Faraone nfumu a bena Ejipitu buadia kutuusha muilo wa Isalele mu Ejipitu.

28 Muifuku dibaadi Yehowa muisambe na Moyise mu nsenga ya Ejipitu, 29 Yehowa balunguile Moyise’shi: “Nnami Yehowa. Lungula Faraone nfumu a bena Ejipitu mianda yoso yankulungula.” 30 Moyise nkulungula Yehowa’shi: “Talanga! Nkuete kuisamba na lukalakashi, biabia Faraone akanteemesha naminyi?”

7 Akupu Yehowa nkulungula Moyise’shi: “Tala, nakuikasha bu Efile Mukulu kui Faraone, na mukuenu Alona ekala bu mutemuki oobe. 2 Okambuula bioso biankulungula, na mukuenu Alona akesamba na Faraone bua’shi aposole bena Isalele batuukie muiumbo diaye. 3 Ami nakatadiila eshimba dia Faraone bua’shi dipape, na nakafuimisha bitunduilo na bilengieleshi muiumbo dia Ejipitu. 4 Kadi Faraone takakupushisha nya, nakatuulu eyasa diande p’Ejipitu, na nakatusha bibumbu bia muilo wande wa bena Isalele mu nsenga ya Ejipitu, na kunyoka bena Ejipitu bikata. 5 Bena Ejipitu abakauku binyibinyi’shi Nnami Yehowa pankaoola eyasa diande p’Ejipitu na kutuusha bena Isalele munkatshi muabo.” 6 Moyise na Alona babakitshine bibaadi Yehowa muibalungule; abo nkukita nka biabia. 7 Moyise baadi na bipua 80, Alona namu baadi na bipua 83 pababayile bua kuisamba na Faraone.

8 Akupu, Yehowa balunguile Moyise na Alona’shi: 9 “Su Faraone enulungula’shi, ‘Kitayi kilengieleshi,’ obe Moyise lungula Alona’shi, ‘Ata mukombo oobe, weusumbule kumpala kua Faraone.’ Aukaluluka nyoka mukata.” 10 Biabia Moyise na Alona babayile kui Faraone na babakitshine nka biabia bibaadi Yehowa muibalungule. Alona basumbuile mukombo waye kumpala kua Faraone na bafubi baye, ao nkualuluka nyoka mukata. 11 Faraone namu nkuitanyina ba sha binangu, ba sha malenganyi na ba mpaki ba manga ba mu Ejipitu, abo nkukita namu nka bia mumune na malenganyi abo. 12 Oso a kuabadi basumbuile mukombo waye mu nsenga, na ayo nkualuluka nyoka ikata; kadi mukombo wa Alona ubaminyine mikombo yabo. 13 Anka eshimba dia Faraone dibapapile, na tabaadi muteemeshe Moyise na Alona nya, nka bu bibakuile Yehowa.

14 Biabia Yehowa nkulungula Moyise’shi: “Eshimba dia Faraone ndipape. Bapele kuposola muilo wande buaudia kuenda. 15 Maloba ku nakashika wende kui Faraone. Tala! Okamupete kuete kualala ku mema! Abitungu wemane ku kiese kia muela wa Nile bua kufumankana naye; na wekale na mukombo walulukile nyoka muiyasa diobe. 16 Abitungu omulungule’shi, ‘Yehowa Efile Mukulu a bena Ebelu bantumu kodi, na bamba’shi: “Posola muilo wande bua’shi ukanfubile mu kabaaka,” kadi mpa na binobino tokiebe kumukookiela nya. 17 Yehowa amba’shi: “Ku bino biankakitshi okauku’shi Nnami Yehowa. Binobino, nakupila mukombo wi muiyasa diande mu muela wa Nile, na mema aaluluka mase. 18 Mishipa i mu muela wa Nile ayifu, na muela aubanga kununka, bena Ejipitu t’abakobesha kutoma mema a mu muela wa Nile nya.”’”

19 Akupu Yehowa nkulungula Moyise’shi: “Lungula Alona’shi, ‘Ata mukombo oobe, weutadishe ku mema a bena Ejipitu, ku miela yabo, ku mashiba abo, ku mikola yabo na ku ma ntanki abo, bua’shi alulukie bu mase.’ Biabia akukekala mase mu nsenga yoso ya Ejipitu, biabikala mu bilamino bia mema bia mitshi sunga bia mabue.” 20 Musango umune Moyise na Alona babakitshine nka biabia bibaadi Yehowa muibalungule. Alona nkuibuesha mukombo waye, nkuiukupila mu muela wa Nile mu meso mua Faraone na bafubi baye, na mema oso mu muela abalulukile mase. 21 Mishipa ibaadi mu muela ibafuile, muela ubabangile kununka na bena Ejipitu tababaadi bia kutoma mema a mu muela wa Nile nya, muanda mase abaadi mu nsenga yoso ya Ejipitu.

22 Anka, ba sha malenganyi ba mu Ejipitu babakitshine namu nka bia mumune na mianda yabo ya mu mufito. Eshimba dia Faraone dibaadi ditungunukie na kupapa na tabaadi mupushiishe Moyise na Alona nka bu bibakuile Yehowa. 23 Akupu Faraone balukiile kuaye ku nshibo, na tabaadi mutuule uno muanda kuishimba nya. 24 Biabia bena Ejipitu boso babaadi ababundula mena ku bukunkula bua Nile bua kupeta mema a kutoma, muanda tababaadi balombene kutoma mema a mu Nile nya. 25 Biabia, kubakidile mafuku musambobidi kunyima kua Yehowa kualuula mema a mu muela wa Nile bu mase.

8 Yehowa nkulungula dingi Moyise’shi: “Nda kui Faraone na omulungule bino, ‘Yehowa akula’shi: “Posola muilo wande bua’shi ukanfubile. 2 Su botungunuka na kupela kufungula muilo wande, nakafuisha kipupa kia nsobia muiumbo diobe dioso dishima. 3 Na muela wa Nile aukaulu nsobia, ayikaulu mu nshibo yobe, mu kadimbo kobe ka kulala, ku lusala lobe, mu mashibo a bafubi bobe na kui muilo oobe, mu ma nfuulo oobe na mu bintu* biobe bia kusobela bukula. 4 Yaaya nsobia ayikakaamina pa mbidi pobe, ayikakaamina muilo oobe, mpa na bafubi bobe boso.”’”

5 Kunyima Yehowa nkulungula Moyise’shi: “Lungula Alona’shi, ‘Ata mukombo oobe weolole dia ku miela, ku mikola ya mema a Nile na ku mashiba, na kita bia’shi nsobia yiule mu Ejipitu mushima.’” 6 Biabia Alona baoluele eyasa diaye pa mema a Ejipitu na nsobia nkubanga kukaamina, nkuula muiumbo dia Ejipitu. 7 Biabia ba sha malenganyi nkukita namu nka biabia na mianda yabo ya mu mufito, abo nkukita bia’shi nsobia ikaamine yiule muiumbo dia Ejipitu. 8 Kunyima Faraone nkuitanyina Moyise na Alona, nkuibalungula’shi: “Sendeelayi Yehowa akatushe nsobia kuandi, na kui muilo wande, muanda nakiebe kuposola muilo wenu bua’shi wende ukalambule Yehowa milambu.” 9 Biabia Moyise nkualuula Faraone’shi: “Ndungule obe nabene nsaa yandia kusendeela Efile Mukulu bua’shi akatushe nsobia kodi, kui bafubi bobe, kui muilo oobe, na mu mashibo obe. Ayikashadila nka penda mu muela wa Nile.” 10 Faraone nkumualuula’shi: “Mmaloba.” Biabia Moyise nkumulungula’shi: “Abikitshika nka bu bibotekie, bua’shi oukie’shi takui ungi muntu e bu Yehowa Efile Mukulu etu. 11 Nsobia ayikatuka kodi, mu mashibo obe, kui bafubi bobe na kui muilo oobe. Ayikashala nka mu Nile.”

12 Moyise na Alona nkukatuka kui Faraone, na Moyise nkusendeela Yehowa bua nsobia ibaadi mutumine Faraone. 13 Biabia Yehowa nkukita bibatekiele Moyise, na nsobia nkubanga kufua mu mashibo, mu bibundi na ku mafuba. 14 Babeyikonguele mituto na mituto, na eumbo nkubanga kununka. 15 Pabamuene Faraone’shi eumbo tadidi biya, baadi mukoposhe eshimba na aye nkupela kuteemesha Moyise na Alona, bu bibaadi biakule Yehowa.

16 Kunyima Yehowa nkulungula Moyise bino: “Lungula Alona’shi, ‘olola mukombo oobe okupile mu lufuinkinyi, na lufuinkinyi alualuluka tumue mu Ejipitu mushima.’” 17 Babakitshine namu nka biabia. Alona nkolola mukombo waye, nkukupila mu lufuinkinyi. Lufuinkinyi loso nkualuluka tumue muiumbo dia Ejipitu, na tumue nkubanga kusuma bantu na nyema. 18 Ba sha malenganyi babatompele namu kukita nka biabia bua kutuusha tumue na mianda yabo ya mu mufito, anka tababaadi bobeshe. Tumue tubaadi nka atusumu bantu na nyema. 19 Nyi ba sha malenganyi nkulungula Faraone’shi: “Uno mmunue w’Efile Mukulu!” Kadi Faraone batungunukile na kupapisha eshimba diaye, tabaadi muteemeshe Moyise na Alona, nka bu bibakuile Yehowa.

20 Yehowa nkulungula dingi Moyise’shi: “Buuka ku nakashika okemane kumpala kua Faraone p’alaala ku muela wa Nile, omulungule’shi, ‘Yehowa amba bino: “Posola muilo wande bua’shi ukanfubile. 21 Kadi su bopele kufungula muilo wande, nakatumu bibuwa kodi, kui bafubi bobe, kui muilo oobe, na mu mashibo obe; mashibo a mu Ejipitu aekala aule bibuwa mpa na paashi mu nsenga. 22 Diadia efuku nakakitshina eumbo dia Goshene mushale muilo wande mianda mu mushindo wilekene. Tamukekala bibuwa, na okauku’shi ami Yehowa, ne muiumbo. 23 Na nakatuulu kuilekena pankatshi pa muilo wande na muilo oobe. Kino kitunduilo akikitshika maloba.”’”

24 Biabia nyi bibakitshine Yehowa, bisaka bia bibuwa bibabangile kuula mu nshibo ya Faraone, mu mashibo a bafubi baye na mu nsenga ishima ya Ejipitu. Bibuwa bibaluishile eumbo. 25 Nfudiilo a bioso Faraone bayitamine Moyise na Alona ebalungula’shi: “Ndayi nukalambule Efile Mukulu eenu muiumbo.” 26 Kadi Moyise nkuamba’shi: “Ta bi buwa tukite biabia, muanda bena Ejipitu ababepulaa biabia bi’atukiebe kulambula Yehowa Efile Mukulu eetu. Biabia su tualambula bintu bi’ababepulaa kui bena Ejipitu abo abamono, t’abetuasa mabue su? 27 Atuende mu kabaaka munda mua mafuku asatu, na kuakua atukalambula Yehowa Efile Mukulu eetu milambu nka bu biadi muitulungule.”

28 Binobino Faraone nkuamba’shi: “Nenulekiela nuende nukalambule Yehowa Efile Mukulu eenu milambu mu kabaaka. Anka tanuendanga kula. Nuntekiele namu Efile Mukulu.” 29 Moyise nkualuula’shi: “Binobino nakatuka kumpala kobe, na nakakutekiela kui Yehowa, maloba bibuwa abikatuka kui Faraone, kui bafubi baye na kui muilo waye. Anka Faraone alekie kuitudimba, aposole muilo wende mu kulambula Yehowa milambu.” 30 Kunyima Moyise nkukatuka kui Faraone na nkuteka Yehowa. 31 Biabia Yehowa bakitshine nka bibamutekiele Moyise, bibuwa nkukatuka kui Faraone, kui bafubi baye, na kui muilo waye. Takubasheele su nkimune. 32 Anka, Faraone batungunukile na kukoposha eshimba, tamulekie muilo bua’shi wende.

9 Biabia, Yehowa nkulungula Moyise’shi: “Nda kui Faraone omulungule’shi, ‘Yehowa Efile Mukulu a bena Ebelu amba’shi: “Posola muilo wande bua’shi wende ukanfubile. 2 Kadi su bopele kuibaposola na botungunuka nka na kuibalama, 3 Talanga! Eyasa dia Yehowa adikekala pa nyema yobe i mu mapia. Kipupa ki bukopo akikakuata nfualasa, mpunda, tumelo, na nyema ikata na ipela. 4 Yehowa akatuulu kuilekena pankatshi pa nyema ya bena Isalele na nyema ya bena Ejipitu, na takui nyema su ngumune a bena Isalele akafu.”’” 5 Dingi, Yehowa nkutshiba nsaa, aye nkuamba’shi: “Maloba, Yehowa akakitshi uno muanda muiumbo.”

6 Yehowa bakitshine uno muanda muifuku dibalondele, na nyema ya mishindo yoso ya bena Ejipitu ibabangile kufua, anka nyema su ngumune a bena Isalele tabafuile. 7 Pabepuishe Faraone, babamulunguile’shi takui nyema su ngumune a bena Isalele mufue. Anka eshimba dia Faraone dibatungunukile na kupapa, na ta muposole muilo buaudia kuenda.

8 Akupu Yehowa balunguile Moyise na Alona’shi: “Ushayi maasa eenu buto bua mu nfuulo, akupu Moyise ebuele muiyilu kumpala kua Faraone. 9 Abukaaluluka bu lufufi mu nsenga yoso ishima ya Ejipitu, na abukatusha mapote* kui bantu na nyema muiumbo dishima dia Ejipitu.”

10 Biabia babatshile buto bua mu nfuulo na abo nkuimana kumpala kua Faraone, Moyise nkuibuela muiyilu na abo kualuluka mapote pa mbidi pa bantu na nyema. 11 Ba sha malenganyi ta babaadi bobeshe kuimana kumpala kua Moyise pa muanda wa mapote, muanda abaadi ebatuukie pa mbidi p’abo na pa bena Ejipitu boso. 12 Kadi Yehowa balekiele bua’shi eshimba dia Faraone dipape, na ta muteemeshe Moyise na Alona, nka bu bibaadi Yehowa mulungule Moyise.

13 Biabia Yehowa balunguile Moyise’shi: “Buuka ku nakashika okemane kumpala kua Faraone, omulungule’shi, ‘Yehowa Efile Mukulu a bena Ebelu amba’shi: “Posola muilo wande bua’shi wende ukanfubile. 14 Binobino natumu bipupa biande bioso kodi, kui bafubi bobe mpa na muilo oobe, bua’shi oukie’shi takui muntu e bu biandi mu nsenga yoso ishima. 15 Muanda nadia kuikala mupue kolola eyasa diande na kukutumina obe, na muilo oobe kipupa ki bukopo, dingi bodia kuikala mupue kushimina pa nsenga. 16 Anka su nemukulekie na muwa, mbua kukulesha bukome buande na bua’shi batumbishe eshina diande mu nsenga ishima. 17 Okiokitshina nka bantu bande mianda na kapeesha pa kupela kuibaposola buabadia kuenda? 18 Maloba mu ino nsaa, nanokiesha mpeshi a mabue e bukopo, bia shanokiele dingi mu Ejipitu kubanga kala mpa na binobino. 19 Biabia tuma eyi bua’shi bakatushe nyema yobe yoso na bintu biobe bioso bi mu mapia, bebiele mu mbalo ya kuibilamina. Muntu oso sunga nyema ekala mu mapia na sh’ekala mu nshibo, afu apamuponena mabue a mpeshi.”’”

20 Mufubi oso a Faraone batshinyine Yehowa batuesheshe baye bafubi na nyema yaye mu mashibo, 21 kadi baba bashibaadi bakokiele eyi dia Yehowa babalekiele bafubi babo na nyema yabo mu mapia.

22 Yehowa nkulungula Moyise’shi: “Olola mboko yobe muiyilu bua’shi mpeshi a mabue anokie muiumbo dishima dia Ejipitu, kui bantu, kui nyema na kui bintu bioso bi mu nsenga ya Ejipitu.” 23 Biabia Moyise nkuela mukombo waye muiyilu, na Yehowa nkukupisha tupandapanda na nkunokiesha mpeshi a mabue, na kaalo* nkunoka pa nsenga. Yehowa baadi mutungunukie na kunokiesha mpeshi a mabue mu Ejipitu oso mushima. 24 Kubaadi mpeshi a mabue na mipenyo i bukopo. Yawa mpeshi baadi bukopo bukile; kasha Ejipitu ekala bu kisamba takubaadi kubande kunoka mpeshi e biabia muiumbo. 25 Mpeshi a mabue bayipayile bintu bioso bibaadi mu mapia muiumbo dishima dia Ejipitu, kubanga ku bantu mpa na nyema, na baluishishe bisakisaki bioso na kutshiokola mitshi yoso. 26 Anka penda muiumbo dia Goshene mubaadi bena Isalele bashale, nyi mushibaadi munokie mpeshi.

27 Biabia Faraone bayitamishe Moyise na Alona ebalungula’shi: “Uno musango nakitshi muluisho. Yehowa mmululame, anka ami na bantu bande tui mu kilubilo. 28 Sendeelayi Yehowa bua’shi mpeshi a mabue na tupandapanda bimane. Biabia nakenuposola bua’shi nuende, t’anushala dingi nya.” 29 Moyise nkumualuula’shi: “Anka’mi kiatuku mu kibundi, nakolola maasa ande kui Yehowa. Tupandapanda atukalekie na mpeshi a mabue atshibika, bua’shi oukie’shi nsenga ngia Yehowa. 30 Anka sunga biabia, nauku’shi obe na bafubi bobe tanukatshinyi Yehowa Efile Mukulu nya.”

31 Mpeshi baadi mupue kuluisha mitshi ya lin na mitshi ya orje, muanda orje baadi mupue kupa, na lin namu baadi na bilongo. 32 Anka mpeshi tabaadi muluishe ntete ya blé na ntete ya epotre, muanda mbintu bish’abipeyaa bukidi. 33 Moyise bakatukile kui Faraone, atuuka mu kibundi na nkuibuesha maasa kui Yehowa, tupandapanda na mabue a kasangu bibalekiele na mpeshi batshibikile. 34 Pabamuene Faraone’shi mpeshi, mabue a kasangu na tupandapanda bibalekie, bakitshine’nyi muluisho, aye nkupapisha eshimba diaye, mpa na bafubi baye namu. 35 Eshimba dia Faraone dibatungunukile na kupapa, na ta muposole bena Isalele buabadia kuenda, anka bu bibaadi Yehowa muibiakule kukiila kui Moyise.

10 Akupu, Yehowa nkulungula Moyise’shi: “Nda kui Faraone, muanda nemutadile eshimba diaye na mashimba a bafubi baye bua’shi apape, bua’shi mmone bia kulesha bino bitunduilo biande kumpala kuaye, 2 na bua’shi okalungule bana bobe na bekulu bobe mushindo wandi munyooke bena Ejipitu, na bilengieleshi biandi mukite munkatshi muabo; eyendo anukauku binyibinyi’shi Nnami Yehowa.”

3 Biabia, Moyise na Alona babayile kui Faraone, abo nkumulungula’shi: “Yehowa Efile Mukulu a bena Ebelu amba’shi, ‘Opele kunkookiela mpa na nsaa kinyi? Posola muilo wande wende ukanfubile. 4 Su botungunuka na kupela kuposola muilo wande, natumu mpasu ya nshiye maloba muiumbo diobe. 5 Ayikabuikila nsenga yoso ishima, takukekala mushindo wa kumona nsenga. Ayikadi bintu bibaadi mpeshi a mabue muinulekiele, na ayikadi mitshi yenu yoso. 6 Ayikauulu mu mashibo oobe, mu mashibo a bafubi bobe boso na mu mashibo a bena Ejipitu boso. Bamashenu, na bamashenu-kulu ta mbamone muanda wi biabia kasha bashala mu dino eumbo mpa na lelo uno.’” Kunyima kuaye kuakula biabia, Moyise bealuluile akatuka kui Faraone.

7 Bafubi ba Faraone babamulunguile’shi: “Uno muntu atungunuka na kuitukalakasha mpa na nsaa kinyi? Lekiela bano bantu, bende mu kufubila Yehowa Efile Mukulu aabo. Tomono’shi eumbo dia Ejipitu ndiluishibue su?” 8 Biabia babaluishe Moyise na Alona kui Faraone, aye nkuibalungula’shi: “Ndayi nukafubile Yehowa Efile Mukulu eenu. Anka abenyi abende mbanyi?” 9 Moyise baluluile’shi: “Atuende na ba nsongua, na bantu banunu, bana betu balume, bana betu bakashi, mikooko yetu na ngombe yetu, muanda atukiebe nkakitshina Yehowa musangelo.” 10 Faraone bebalunguile’shi: “Su nenuleka nuenda anue na bana benu, biabia Yehowa e nenu binyibinyi! Abimueneka patooka’shi nui na binangu bia kukita muanda kampanda wi bubi. 11 Nyaa! Nka penda bana balume bende bakafubile Yehowa, muanda nyi kianutekiele.” Paapa babebabingile kua Faraone.

12 Biabia Yehowa nkulungula Moyise’shi: “Oola eyasa diobe p’Ejipitu bua’shi mpasu ya nshiye ifikie ituele muiumbo dishima dia Ejipitu na idie bisakisaki bioso bi muiumbo, bintu bioso biabadi balekie kui mpeshi a mabue.” 13 Musango umune, Moyise nkoola mukombo waye p’eumbo dia Ejipitu, na Yehowa nkukita bia’shi kipapi kia kutunduka nguba kipukie muiumbo bufuku boso bushima na mu kanya. Pabatokiele bufuku, kipapi kia kutunduka nguba kibatuadile mpasu ya nshiye. 14 Nshiye nkutuela muiumbo dioso dishima dia Ejipitu, ayo nkushala mu ma mbalo oso. Kibaadi kipupa kikile bukopo; kasha takubaadi kubande kumueneka mpasu ya nshiye i bungi bui biabia, na tabuanekale dingi kuanka. 15 Ibaadi ishale mu ma mbalo oso, n’eumbo dibafikile mufito pa muanda wayo; ibadiile lubishi loso lua muiumbo, na bikuba bioso bia ku mitshi bibaadi mpeshi a mabue mulekie; ta nkushale esaki su ndimune ku mutshi, sunga bisakisaki muiumbo dioso dishima dia Ejipitu.

16 Biabia Faraone nkuitamisha Moyise na Alona bukidibukidi, nkuibalungula’shi: “Nakitshina Yehowa Efile Mukulu eenu muluisho, mpa n’anue namu. 17 Nenusendeela bua’shi nunfuile namu lusa bua uno musango, nutekie Yehowa Efile Mukulu eenu bua’shi ankatuishe penda kino kipupa akifuisha lufu.” 18 Biabia bakatukile* kui Faraone aye nkusendeela Yehowa. 19 Nka paapa Yehowa nkushintula kubaadi akuende lupunga, alo nkufika bu lupapi alutukila kupona nguba lui bukopo, nkuata mpasu ya nshiye nkukeyisumbula mu Kalunga Kamonga. Takubashadile sunga lumune muiumbo dishima dia Ejipitu. 20 Anka Yehowa balekiele bua’shi eshimba dia Faraone dipape, tamuposole bena Isalele buabadia kuenda.

21 Yehowa balunguile’nyi Moyise’shi: “Oola eyasa diobe muiyilu bua’shi kuikale mufito muiumbo dia Ejipitu, mufito ukile bukopo mu mushindo wa’shi muntu mulombene kuiukuma.” 22 Musango umune Moyise boluele eyasa diaye muiyilu, na kubelele mufito wi bukopo mu nsenga yoso ishima ya Ejipitu munda mua mafuku asatu. 23 Takubaadi muntu baadi emoneena na ungi, na takui muntu su ngumune baadi musane mu yaaya mbalo ibaadi munda mua mafuku asatu; anka, bena Isalele boso abaadi n’etata mu ma mbalo ababadi bashale. 24 Paapa Faraone bayitamishe Moyise amulungula’shi: “Ndayi nukafubile Yehowa. Nulekie nka penda mikooko yenu na ngombe yenu. Kadi nuibalombene kuenda mpa na bana benu.” 25 Kadi Moyise baluluile’shi: “Obe nabene wetupa milambu na milambu ya kushiika kaalo, na atukeyilambula Yehowa Efile Mukulu etu. 26 Atuende’nyi na nyema yetu. Takui nyema su ngumune ashala, muanda atukaata ingi bua kulanguila Yehowa Efile Mukulu etu, na t’atuuku ki’atukalambula bua kulanguila Yehowa mpa na p’atukafiki kuakua.” 27 Anka Yehowa balekiele eshimba dia Faraone adipapa, na tamukumiine kuibaposola buabadia kuenda. 28 Faraone balunguile Moyise’shi: “Katuka kumpala kuande! Dimuka, tofikanga dingi kumpala kuande, muanda efuku di’ofiki kumpala kuande, ofu.” 29 Moyise nkualuula’shi: “Nka bu bibuamba, tanfiki dingi kumpala kobe nya.”

11 Biabia Yehowa balunguile Moyise’shi: “Nafuisha kingi kipupa kui Faraone na kui bena Ejipitu. Kunyima kua biabia Faraone enulekie bua’shi nuende. P’enulekiela bua kuenda, enubingi mu ino mbalo. 2 Biabia lungula bena Isalele’shi: Muana mulume oso na muana mukashi oso, abitungu atekie nkungishanyi naye bintu bia arja na bia ôlo.” 3 Na Yehowa bakitshine bia’shi muilo ulongamine bena Ejipitu. Dingi Moyise nabene bapetele kinemo kikata muiumbo dia Ejipitu munkatshi mua bafubi ba Faraone na kui muilo.

4 Kunyima Moyise bambile’shi: “Yehowa amba’shi, ‘Munkatshi mua bufuku nakakidila mu Ejipitu, 5 na muana mbedi oso a muiumbo dia Ejipitu akafu, kubanga ku muana mbedi a Faraone, mushale ku nkuasa a bufumu, na ku muana mbedi a mpika mukashi apelaa n’ebue dia mpelua, na ku muana mbedi oso a nyema. 6 Muiumbo dishima dia Ejipitu amuikala maalo akata, biabishakitshikile dingi kashaa, na tabian’akitshikie dingi nya. 7 Anka sunga mbua t’abulukila bena Isalele sunga nyema yabo, bua’shi nuukie’shi Yehowa mulombene kutuula kuilekena pankatshi pa bena Ejipitu na bena Isalele.’ 8 Bafubi bobe boso abakafiki kuandi na abakanginamina, abamba’shi: ‘Nda, obe na muilo oso aukulondo.’ Na nakende.” Kunyima kua’ye kuakula biabia bakatukile kui Faraone na nsungu i bukopo.

9 Yehowa balunguile Moyise’shi: “Faraone t’akenuteemesha nya, bua’shi bilengieleshi biande bifuime mu nsenga ya Ejipitu.” 10 Moyise na Alona babakitshine bino bilengieleshi bioso kumpala kua Faraone, anka Yehowa baadi mulekiele bua’shi eshimba dia Faraone dipape, biabia tamulekiele bena Isalele buabadia kukatuka muiumbo diaye.

12 Akupu Yehowa balunguile Moyise na Alona muiumbo dia Ejipitu’shi: 2 “Uno mueshi awikala mueshi wenu wa mbangilo. Awikala mueshi wenu wa kumpala wa kipua. 3 Lungula muilo ushima wa Isalele’shi, ‘Muifuku di’ekumi dia uno mueshi, muntu oso aate mukooko bua kifuko kiaye, mukooko umune ku nshibo yoso. 4 Kadi su mu nshibo mui bantu bapeela bashi balombene kupua mukooko ushima, be kuiudia na nkungishanyi nabo e pepi nabo muyile bungi bua bantu. P’anutala bungi bua bantu, nutale bungi bua muita bulombene muntu oso kudia. 5 Mukooko wanusangula wikale ulume ushi na kilema, wa kipua kimune. Nui balombene kusangula mikooko yana ilume sunga bipembue biana. 6 Abitungu nuiulame mpa na kuifuku dia 14 dia uno mueshi, na kifuko kioso kia bena Isalele akiwipaa pa kamuilua-nshobe. 7 Abitungu baate ndambo ya mase beyishingie ku ntempa ibidi na ku ebaya di kunundu kua kiibi kia nshibo yabeudiila.

8 “‘Abitungu badie wawa muita buabua bufuku. Bewekiele mu kaalo na beudie na mikate ishi kitatusho na masaki e buulo. 9 Tanuiudianga ubishi, ubishe, sunga uteekie, kadi nuiwekiele ku kaalo, na mutue na bioko mpa na bia munda. 10 Tanulamanga muita su ngupeela mpa na ku nakashika, kadi su kuashala muita mpa na ku nakashika, nuiushiikie kaalo. 11 Na bino nyi bia kuiudia, nuiudie nuibafuale mikaba mu bifuka bienu, nsandale ku ngua yenu, na mukombo muiyasa dienu; na abitungu nuiudie bukidibukidi. Nyi Pasaka a Yehowa. 12 Muanda nakakidila mu Ejipitu buno bufuku na kuipaa bana mbedi boso ba muiumbo dia Ejipitu, kubanga ku bantu mpa na ku nyema; na nakatshibila b’efile boso ba bena Ejipitu kiimu. Nnami Yehowa. 13 Mase aakekala bu kitunduilo ku mashibo eenu muanudi; na nakamono mase na kukidila kunundu kuenu, kipupa t’akikafiki kuanudi na kuinuipaa pankanyooko eumbo dia Ejipitu.

14 “‘Dino efuku adikala buenu bu kitentekiesho, na abitungu nueditentekieshanga bu musangelo wa Yehowa mu bipungo na bipungo. Dikale nka bu muiya mu bipungo na bipungo. 15 Munda mua mafuku musambo anukadi mikate ishi kitatusho. Muifuku dia kumpala anukakatusha kitatusho kioso mu mashibo eenu, muanda muntu oso adi kintu ki na kitatusho kubanga kuifuku dia kumpala mpa na ku dia musambo, abitungu bamuipee. 16 Muifuku dia kumpala anukakitshi musangelo wi selele, na muifuku dia musambo, anukakitshi ungi musangelo wi selele. T’abitungu kukita mudimo su ngumune mu aa mafuku. Anukateekie nka penda kiakia ki muntu nakio lukalo bua kudia.

17 “‘Abitungu nuikale anukitshi Musangelo wa Mikate ishi kitatusho, muanda mu dino efuku, nakatuusha bibumbu bienu mu nsenga ya Ejipitu. Abitungu nuikale anutentekiesha dino efuku mu bipungo bienu bioso. Uno mmuiya bua loso. 18 Kubanga muifuku dia 14 dia mueshi wa kumpala ku kiolua, anukadi mikate ishi kitatusho mpa na ku efuku dia 21 ku kiolua. 19 Munda mua mafuku musambo ta mbalombene kupeta kitatusho su nkimune mu mashibo eenu, muanda muntu oso adi kintu ki na kitatusho, bi’ekala muenyi sunga muina Isalele abitungu bamuipee. 20 T’abitungu nudie kintu su nkimune ki na kitatusho. Mu mashibo eenu oso, nudie mikate ishi kitatusho.’”

21 Musango umune Moyise nkuitanyina bakulu boso ba mu Isalele, nkuibalungula’shi: “Ndayi nusangule nyema yana bua bifuko bienu bioso, na nuipee mulambu wa Pasaka. 22 Akupu nusabikie kisaasa kia mitshi ya izope mu mase e muilonga, nuiashingie kuibaya di kunundu kua kiibi na ku ntempa ibidi; muntu su ngumune a kuanudi tatukanga paasha mpa na ku nakashika. 23 Paapa, apakidi Yehowa bua kuipaa bena Ejipitu na pamono mase e kuibaya dia kiibi na ku ntempa ibidi, Yehowa akakidi ku biibi bienu, na t’akatadiila kipupa kia lufu bua’shi kituele mu mashibo eenu.

24 “Abitungu nutungunukie na kukita biabia muanda uno mmuiya wa loso buenu na bua bana benu. 25 Na p’anutuele mu nsenga y’abenupa kui Yehowa nka bu biadi muakule, abitungu nutungunukie na kukita bino. 26 Na apenuipusha bana benu’shi: ‘Uno musangelo wanukitshi aulesha kinyi?’ 27 Anukebalungula’shi, ‘Nyi mmulambu wa Pasaka wa Yehowa, bakidile kunundu kua mashibo a bena Isalele mu Ejipitu pabayipayile bena Ejipitu, kadi apaasha mashibo etu.’”

Paapa muilo nkuinama na nkukupila mapala paashi. 28 Biabia bena Isalele babayile na abo nkukita nka bu bibaadi Yehowa mulungule Moyise na Alona. Abakitshine nka biabia.

29 Paapa munkatshi mua bufuku, Yehowa bayipayile muana mbedi oso muiumbo dia Ejipitu, kubanga ku muana mbedi a Faraone baadi mushale ku nkuasa a bufumu mpa na ku muana mbedi a muntu baadi mu lukano, na bana mbedi boso ba nyema. 30 Faraone babukile buabua bufuku pamune na bafubi baye boso na bangi bena Ejipitu boso, na kubaadi maalo akata munkatshi mua bena Ejipitu, muanda ta kubaadi nshibo su ngimune ishibaadi kitanda. 31 Faraone nkuitanyina Moyise na Alona buabua bufuku, nkuibalungula’shi: “Ebueyi nukatukie munkatshi mua muilo wande, anue na bangi bena Isalele. Nuende nukafubile Yehowa nka bu bibanuakula. 32 Nuate’nyi na nyema yenu ikata na ipeela nuende, nka bu bibanuakula. Kadi abitungu nungielele muabi.”

33 Bena Ejipitu bababangile kukitshisha bena Isalele buabadia kutuuka muiumbo diabo bukidibukidi “muanda” babambile’shi, “tui nka bu bapue kufua!” 34 Biabia muilo ubatshile musabu wabo kumpala kua kuiwela kitatusho, na bintu biabo bia kusobela mikate bebipombeela mbilamba, bebitenteka ku mapampa. 35 Bena Isalele babakitshine nka bu bibaadi Moyise muibalungule, abo nkuteka bena Ejipitu bintu bia kiamo kia arja, bia ôlo mpa na bilamba. 36 Yehowa bakitshine bia’shi bena Isalele balongamine bena Ejipitu, paapa, babebapeele bintu bibabebatekiele, abo nkupaula bena Ejipitu.

37 Biabia bena Isalele babakatukile ku Ramesese abo nkuenda ku Sukote lua ngua, babaadi bana balume 600 000 kukatusha bana. 38 Na kisaka kikata kia bantu besangie* kibayile nabo, mpa na nyema ipeela na ikata, nyema ikile bungi. 39 Bababangile kuekiela mikate i kishengu na musabu ushi kitatusho ubabakatukile nao mu Ejipitu. Wawa musabu taubadi na kitatusho muanda babebabingile musango umune mu Ejipitu, na tambamone bia kulumbuula bintu bia kudia.

40 Bena Isalele babashalele mu Ejipitu munda mua bipua 430. 41 Ku nfudiilo kua biabia bipua 430, mu diadia efuku, bibumbu bioso bia Yehowa bibatukile mu nsenga ya Ejipitu. 42 Abekala abakitshi musangelo buabua bufuku bua kutentekiesha bibaadi Yehowa muibatushe mu nsenga ya Ejipitu. Bena Isalele boso abekala abakitshina Yehowa musangelo buabua bufuku munda mua bipungo biabo bioso.

43 Akupu Yehowa balunguile Moyise na Alona’shi, “Uno mmuiya wa Pasaka: Muenyi su ngumune ta mulombene kumudia. 44 Kadi su muntu e na mpika mulume aadi muule ku makuta, abitungu amusale. Paapa yawa mpika mulombene kudia Pasaka. 45 Muenyi na muntu anudi baate ku mudimo ta mulombene kudia Pasaka. 46 Nui balombene kudia wawa mukooko mu nshibo imune. Tanui balombene kutuuka na muita su ngumune paasha, na tanua kutanya mufufua su ngumune. 47 Muilo oso ushima wa Isalele aukitshi Pasaka. 48 Su muenyi mushale munkatshi muenu akiebe kukita musangelo wa Pasaka bua Yehowa, abitungu’shi bana balume boso ba mu nshibo yaye basadibue. Paapa mmulombene kukita Pasaka, na akekala bu muina Isalele. Kadi muntu su ngumune shi musadibue, ta mulombene kumudia. 49 Akukekala muiya wi mumune bua muina Isalele na bua muenyi mushale munkatshi muenu.”

50 Biabia bena Isalele boso babakitshine nka bu bibaadi Yehowa mulungule Moyise na Alona. Babakitshine nka biabia. 51 Mu diadia efuku, Yehowa batushishe bena Isalele boso* mu nsenga ya Ejipitu.

13 Yehowa balunguile dingi Moyise’shi: 2 “Ngikashile bana mbedi boso balume ba Isalele ba kishila.* Muana mbedi oso abatanda, biabikala a muntu sunga a nyema, ngande.”

3 Paapa Moyise nkulungula muilo’shi: “Tentekieshayi dino efuku dibanutuku mu Ejipitu, mu nshibo ya bupika, muanda Yehowa mmuinutushe mu ino mbalo na mboko yaye i bukome. Biabia tanui balombene kudia kintu su nkimune ki na kitatusho.* 4 Anutuuku lelo mu dino efuku dia mueshi wa Abibe.* 5 Apekala Yehowa muinutueshe mu nsenga ya bena Kanaana, bena Ite, bena Amore, bena Ivii na ya bena Yebuse, nsenga ayalala mabeele na buuki ibaadi muitshipe kui ba nkambua benu bua kuinupa, paapa nutungunukie na kukita uno musangelo mu uno mueshi. 6 Munda mua mafuku musambo anukadi mikate ishi kitatusho, na muifuku dia musambo akukekala musangelo bua Yehowa. 7 Nudie mikate ishi kitatusho munda mua mafuku musambo; tanuikalanga na kintu su nkimune ki na kitatusho sunga kuikala na kitatusho muiumbo dienu dioso. 8 Okalungula muan’obe mu diadia efuku’shi, ‘Nakitshi bino pa muanda wa bibaadi Yehowa munkitshine panatuukile mu Ejipitu.’ 9 Na bino abikekala bu kitunduilo kuiyasa diobe na bu kitentekiesho mu mpala yobe, bua’shi muiya wa Yehowa wikale mukanua mobe, muanda Yehowa bakutushishe mu Ejipitu ku mboko yaye i bukome. 10 Abitungu olame uno muiya ku kipua kioso pa nsaa yawo.

11 “Apakakutuesha Yehowa mu nsenga ya bena Kanaana ibaadi muitshipe bua kukupa obe na ba nkambua bobe, 12 abitungu olambule Yehowa muana mbedi mulume oso, mpa na muana mbedi oso a bimunuanga biobe biokapete. Muanda bana balume mba Yehowa. 13 Okakuula muana mbedi oso a mpunda pa kumushintula na mukooko, kadi su tue mumukuule, paapa abitungu omutshokole nshingo, na okuula muana mbedi mulume oso a ku bana bobe.

14 “Su mu mafuku e kumpala muan’obe akuipusha’shi: ‘Bino abipatuula kinyi?’ Okamulungula’shi, ‘Yehowa baadi muitutuushe mu Ejipitu, muiumbo dibaatudi bapika na mboko yaye i bukome. 15 Pabaadi Faraone mupapishe eshimba apela kuitutuma buatudia kuenda, Yehowa bayipayile muana mbedi oso mu nsenga ya Ejipitu kubanga ku muana mbedi a muntu, mpa na a nyema. Nyi buakinyi nalambula Yehowa bana mbedi boso balume, na nakuula muana mbedi oso a ku bana bande.’ 16 Bino abikala bu kitunduilo kuiyasa diobe na mu mpala mobe, muanda Yehowa baadi muitutuushe mu Ejipitu na mboko yaye i bukome.”

17 Binobino, pabaadi Faraone muposole muilo buaudia kuenda, Efile Mukulu tabaadi muibakunkushe buabadia kuyila muishinda dibaadi mu nsenga ya bena Filistine, sunga biekala’shi dibaadi pepi. Muanda Efile Mukulu bambile’shi: “Muilo wi kushintula binangu biao paukafumankana na ngoshi na walukiila mu Ejipitu.” 18 Biabia Efile Mukulu bakitshine bia’shi muilo wifunye, uyile muishinda dia mu kabaaka ka ku Kalunga Kamonga. Anka bena Isalele babatuukile mu Ejipitu bu basalayi belumbule bua ngoshi. 19 Moyise batuadile dingi mifufua ya Yosefe, muanda Yosefe baadi mueleshe bana ba Isalele mutshipo’shi: “Efile Mukulu t’akakutua kualusha binangu biaye kuanudi, paapa nuate mifufua yande, nuende nayo.” 20 Babakatukile ku Sukote bakashala ku Etame, ku bukunkula bua kabaaka.

21 Na Yehowa baadi atambuka kumpala kuabo, mu kanya mu musungo w’ekumbi bua kuibaludika, na bufuku mu musungo wa kaalo bua kuibamunyika, biabia babaadi balombene kutambuka kaanya na bufuku. 22 Musungo w’ekumbi taubaadi aukatuka kumpala kua bantu mu kanya, sunga musungo wa kaalo bufuku.

14 Biabia Yehowa balunguile Moyise’shi: 2 “Lungula bena Isalele balukiile, bashale kumpala kua Pihahirote, munkatshi mua Migedole na kalunga, betalene na Baale-sefone. Nukashale kumpala kua yaaya mbalo pepi na kalunga. 3 Paapa Faraone akakula bua bena Isalele’shi, ‘Abend’abaumbakananga muiumbo. Kabaaka kabebakangila eshinda.’ 4 Nakalekiela eshimba dia Faraone dipape, na akebalondo, naketumbisha kukiila kui Faraone na kiluilo kiaye; na bena Ejipitu abakauku’shi Nnami Yehowa.” Biabia mbibabakitshine.

5 Kunyima, babalunguile nfumu a bena Ejipitu’shi bena Isalele babasuuku. Musango umune, Faraone na bafubi baye nkushintula binangu pabitale bena Isalele, abo nkuamba’shi: “Buakinyi tubakitshi bino, buakinyi tubafungula bena Isalele bua’shi tabekalanga bu ba mpika betu?” 6 Aye nkulumbuula matempu aaye a ngoshi, na nkuata bilobo biaye bia ngoshi bua kulonda bena Isalele. 7 Aye nkuata matempu a ngoshi 600 akile buwa na angi matempu oso a mu Ejipitu, na kuitempu dioso kubaadi kilobo kia ngoshi. 8 Na Yehowa nkulekiela eshimba dia Faraone nfumu a bena Ejipitu bua’shi dipape, aye nkulonda bena Isalele, pabaadi bena Isalele abatuuku mu Ejipitu na lukulupilo* loso. 9 Bena Ejipitu nkulonda bena Isalele, na matempu oso a Faraone, na basalayi bakaamine ku nfualasa, na kiluilo kiaye kia ngoshi, babaadi abende na kuisesela pepi nabo pababaadi bashale pepi na kalunga, pepi na Pihahirote, mbetalene na Baale-sefone.

10 Pabesesele Faraone pepi, bena Isalele babebuesheshe meso, bamona bena Ejipitu bakuete kuilondena nabo. Bena Isalele babapushishe moo ukile, abo nkubanga kuidila kui Yehowa. 11 Abo nkulungula Moyise’shi: “Mmuanda mu Ejipitu ta mui mashama nyi kubuetufuisha muno bua’shi tufuile mu kabaaka? Abuetukitshina biabia buakinyi pobe kuitutusha mu Ejipitu? 12 Kino ta nyi ki’atukulunguilanga mu Ejipitu’shi, ‘Etulekiele tufubile bena Ejipitu’? Muanda mbikile buwa kufubila bena Ejipitu pe kufika mu kufuila mu kabaaka.” 13 Biabia Moyise nkulungula muilo’shi: “Tanutshinanga. Kankamanayi, numone Yehowa biakiebe kuinupaasha lelo uno. Muanda bena Ejipitu banumono lelo uno, t’anukebamono dingi efuku su ndimune. 14 Yehowa nabene akenuluila, anka anue anushala baumiine.”

15 Yehowa nkulungula Moyise’shi: “Buakinyi odidi kuandi kushi kukooka? Lungula bena Isalele babangie luendo. 16 Obe, ela mukombo oobe muiyilu, oole eyasa diobe ku kalunga, wekatshibe pabidi, bua’shi bena Isalele basambukie munkatshi muako mu nsenga yume. 17 Anka ami, nakalekiela mashimba a bena Ejipitu bua’shi apape, bua’shi bebalonde mu kalunga; biabia naketumbisha kukiila kui Faraone na kui basalayi baye boso, kui matempu aaye a ngoshi, na kui basalayi baye bakaamine pa nfualasa. 18 Na bena Ejipitu abakauku binyibinyi’shi ne Yehowa, panketumbisha kukiila kui Faraone, matempu aaye a ngoshi na kui basalayi baye bashale pa nfualasa.”

19 Akupu, muikeyilu a Efile Mukulu a binyibinyi baadi atambuka kumpala kua bena Isalele baadi mukatukie aye nkukila kunyima kuabo, na musungo w’ekumbi ubaadi kumpala kuabo ubaadi ukatukie ao nkuimana kunyima kuabo. 20 Na ubaadi ufikie munkatshi mua bena Isalele na bena Ejipitu. Ku lupese lua bena Ejipitu ubaadi weleshe mufito. Na ku lupese lua bena Isalele ubaadi awibamunyika. Biabia bena Ejipitu ta mbesesele pepi na bena Isalele buabua bufuku boso bushima.

21 Biabia Moyise nkoola eyasa diaye pa kalunga; na Yehowa nkualusha mema a kalunga kunyima kukiila ku lupapi lui bukopo lua kutunduka bufuku boso bushima, na muushi mua kalunga nkuuma, na mema nkuitshibuula pankatshi. 22 Biabia bena Isalele babatuelele munkatshi mua kalunga mu nsenga yume, pabaadi mema a kalunga ngemane bu bimano ku mboko yabo ibalume, na ku mboko yabo ibakashi. 23 Bena Ejipitu nkuilondena nabo, na nfualasa yoso ya Faraone, na matempu aaye a ngoshi, na basalayi bakaamine ku ma nfualasa babebalondele munkatshi mua kalunga. 24 Pepi na bufuku kutooka, Yehowa batadile bena Ejipitu kukatukila mu musungo wa kaalo na w’ekumbi, na aye nkutuesha bena Ejipitu mu kafutakanyi. 25 Efile Mukulu baadi akaasha bipombo bia matempu abo, biabia babaadi abeatambusha na lukalakashi. Bena Ejipitu babambile’shi: “Tusuukieyi tulekie bena Isalele, muanda Yehowa ebaluila ngoshi.”

26 Paapa Yehowa nkulungula Moyise’shi: “Oola eyasa diobe ku mema a kalunga bua’shi alukie abuikiile bena Ejipitu, matempu aabo a ngoshi, na basalayi babo bakaamine ku ma nfualasa.” 27 Musango umune, Moyise nkoola eyasa diaye pa kalunga, na pabaadi bufuku tabukiebe kutooka, mema nkualuka nka muao mua kala. Nsaa ibabangile bena Ejipitu kusuuka, Yehowa nkuibasumbula mu mema a kalunga. 28 Mema nkubuikiila matempu a ngoshi, basalayi bashale ku ma nfualasa, na biluilo bioso bia Faraone bibaadi bilonde bena Isalele munkatshi mua kalunga. Takui muntu su ngumune a kuabadi bapandile.

29 Kadi bena Isalele babatambukile mu nsenga yume munkatshi mua kalunga, na mema abaadi emane bu bimano ku mboko yabo ibalume na ku mboko yabo ibakashi. 30 Diadia efuku Yehowa nkupaasha Isalele ku maasa a bena Ejipitu, na Isalele nkumona bitanda bia bena Ejipitu ku kiese kia kalunga. 31 Bena Isalele nkumona’nyi bukome bukata bubaadi Yehowa muleshe bena Ejipitu, na muilo nkubanga kutshina Yehowa, na kutuula lukumiino mui Yehowa na mui mufubi aaye Moyise.

15 Mu yaaya nsaa Moyise na bena Isalele babayimbile luno loono bua Yehowa:

“Nayimbila Yehowa, muanda mmuule ndaa na ntumbo.

Nfualasa na yawa muipakamine bebiasa mu kalunga.

 2 Yah mbukome buande, muanda bafiki mupaashi ande.

Aye nyi Efile Mukulu ande, nakamutumbisha, Efile Mukulu a nshami, na nakamusamuna.

 3 Yehowa nyi nkilobo kikata kia ngoshi. Yehowa nyi eshina diaye.

 5 Mema e na mbunda-mbunda i bukopo abebabuikila; na babayiki muushi nka bu ebue.

 9 Muishikuanyi akuile’shi: ‘Nakebalondo! Nakebakuata!

Nakebanyengie bioso biankumiina mpa na pangikuta!

Napundumuna lupete luande lua ngoshi! Eyasa diande adibatuutu!’

11 Yehowa, nnanyi e bu’be munkatshi mua b’efile?

Nnanyi e biodi, obe eleeshaa bu mukile kishila?

Obe we a kutshina, na a kuyimbila bua kukutumbisha, obe akitaa bilengieleshi.

12 We moole mboko yobe ibalume, na nsenga nkuibamina.

Bantu boso ba mu Kanaana abekala na mashimba kuiyilu.

16 Kususa na moo wi bukopo abikebakuata.

18 Yehowa akakunkusha bu nfumu bua loso.

20 Biabia Miriame mutemuki mukashi, mukuabo na Alona, batshile katumba muiyasa, na bakashi boso babamulondele na tutumba, abend’ayimbanga na kusha. 21 Miriame baadi mualuule bana balume, ayimba’shi:

“Imbilayi Yehowa, muanda mmuule ndaa na ntumbo.

Nfualasa na yawa muipakamine bebiasa mu kalunga.”

22 Kunyima Moyise baadi mukaashe bena Isalele ku Kalunga Kamonga, benda mu kushala ku kabaaka ka Shure. Babatambukile mafuku asatu mu kabaaka, anka tababapetele mema. 23 Babafikile ku Mara,* anka tababaadi balombene kutoma mema a Mara muanda abaadi buulo. Nyi buakinyi babayitamine yaaya mbalo bu Mara. 24 Muilo ubabangile kuunauna pabitale Moyise, wamba’shi: “A paapa atutomo kinyi?” 25 Moyise baadi muidile kui Yehowa, na Yehowa nkumulesha mutshi. Pabewelele mu mema, mema abafikile ataale.

Kuakua Efile Mukulu nkuibelela muiya, na aye nkuata uno muanda bu kileshesho bua kuibalesha bibaadi akiebe’shi bakite, na kuakua aye nkuibatompa. 26 Aye nkuamba’shi: “Su boteemesha kalolo eyi dia Yehowa Efile Mukulu oobe, na kukita biabia bi buwa ku meso kuaye, na su otuulu binangu ku miiya yaye na kuiyikokiela yoso, tankakutumina maladi su ngamune angikalanga mutumine bena Ejipitu, muanda Nnami Yehowa akupaasha.”

27 Kunyima kua biabia abafikile ku Elime, kubaadi nsulo ya miela 12, na mabo 70. Babashalele paapa pepi na mema.

16 Kunyima kuabo kukatuka ku Elime, nfudiilo a bioso muilo oso wa Isalele ubafikile mu kabaaka ka Sine, ke pankatshi pa Elime na Sinayi, muifuku dia 15 dia mueshi wa kabidi, kunyima kuabo kutuuka muiumbo dia Ejipitu.

2 Kunyima muilo oso wa Isalele ubabangile kuunauna pabitale Moyise na Alona mu kabaaka. 3 Bena Isalele babaadi abebalungula’shi: “Eyasa dia Yehowa dibaadia kuituipaa sunga mu nsenga ya Ejipitu, muatuikele bashale pepi na ngieso ya miita, na muatudianga atuikuta. Binobino nubafiki netu muno mu kabaaka bua kuipasha bano bantu boso na nsala.”

4 Paapa Yehowa balunguile Moyise’shi: “Nakenunokiesha bia kudia muiyilu, muntu oso abitungu ende akasangule buaye bungi bua bia kudia efuku dioso, bua’shi mmone bia kuibatompa, bua kumona su abakakookiela miiya yande sunga kukutua kuiyikookiela. 5 Anka muifuku dia kasamombo, pabateekie biabia biabadi basangule, abitungu bikale misango ibidi kukila bungi bu’abasangulaa mafuku oso.”

6 Moyise na Alona nkulungula bena Isalele boso’shi: “Ku kiolua anukauku binyibinyi’shi Yehowa nyi muinutuushe muiumbo dia Ejipitu. 7 Ku nakashika anumono ntumbo ya Yehowa, muanda Yehowa bateemesha bibanumunauna. Atue namu tui ba nnanyi buanudia kuituunauna?” 8 Moyise nkutungunuka’shi: “Apenupa Yehowa muita wa kudia ku kiolua na bidiibua ku nakashika bianudia kudia nuayikuta, anukamono’shi Yehowa bateemesha miununo yenu yanumuunauna. Kadi atue tui ba nnanyi? Anuunauna Yehowa, ta natue.”

9 Akupu Moyise balunguile Alona’shi: “Lungula muilo oso ushima wa Isalele bino, ‘Fikayi kumpala kua Yehowa, muanda bapusha miununo yenu.’” 10 Pabaadi Alona muisambe na muilo ushima wa bena Isalele, babealuluile abo nkutala dia ku kabaaka, paapa, ntumbo ya Yehowa ibamuenekiele muikumbi.

11 Yehowa besambile dingi na Moyise, amulungula’shi: 12 “Napusha miununo ya bena Isalele. Ebalungule’shi, ‘Ku kamuilua nshobe anudi muita, na ku nakashika anuikuta mikate, paapa anukauku binyibinyi’shi nnami Yehowa Efile Mukulu eenu.’”

13 Kiakia kiolua, toonyi tua tupoopo tubafikile ato nkupuuta kishalelo kiabo, na ku nakashika lume lui bungi lubaadi lupute kumpese yoso ya kishalelo. 14 Pabaumine lume, kubaadi tuntu tupeela-tupeela tutooka atusenguluka mu nsenga. 15 Pabebimuene bena Isalele, bababangile kuiyipusha’shi, “A kino nkinyi?” Muanda tababaadi abauku’shi nkinyi. Nyi Moyise nkuibalungula’shi: “Nyi mikate ibenupa Yehowa bu bidiibua. 16 Yehowa benuelela muiya wa’shi, ‘Muntu oso asangule nka penda bungi buadi mulombene kudia. Anukasangula kipimo kimune kia omere bua muntu oso muyile bungi bua bantu ba mu nshibo yaye.’” 17 Bena Isalele babakitshine nka biabia; bababangile kuibisangula, bangi nkusangula bi bungi, bangi namu nkusangula bipeela. 18 Pababaadi abebipimi na kipimo kia omere, yawa basanguile bi bungi ta baadi na bikile bungi na yawa basanguile bipeela ta baadi mukutue biadia kudia. Boso babaadi abasangula muyile bungi buabadia kudia.

19 Paapa Moyise nkuibalungula’shi: “Muntu su ngumune talekanga kia kudia su nkimune mpa na ku nakashika.” 20 Anka ta mbateemeshe Moyise nya. Pabaadi bangi ba kuabadi bebilekie mpa na ku nakashika, bibatuelele bifinyo, abio nkubanga kununka, na Moyise nkuibakuatshila nsungu i bukopo. 21 Babaadi abebisangula ku nakashika koso, muntu oso muyile bungi buadia kudia. Pabaadi nguba akamiina, bibaadi abisunguluka.

22 Muifuku dia kasamombo, babasanguile bungi bua bia kudia misango ibidi, bipimo bibidi bia omere bua muntu oso. Biabia ba nfumu boso ba muilo babafikile mu kulungula Moyise wawa muanda. 23 Paapa Moyise bebalunguile’shi: “Nyi biabadi bambe kui Yehowa. Malooba akuikala kuikisha ku midimo yenu yoso, muanda nyi sabato eselele a Yehowa. Ekielayi biabia bianudi na lukalo lua kuekiela, na nuteekie biabia bianudi na lukalo lua kuteeka; biabia abishala nuibilame mpa na ku nakashika.” 24 Biabia babebilamine mpa na ku nakashika, nka bu bibambile Moyise buabadia kukita, na ta bibanunkile sunga kutuela bifinyo. 25 Paapa Moyise bambile’shi: “Ebidieyi lelo, muanda lelo nyi efuku dia sabato bua Yehowa. Na t’anukebipete mu nsenga nya. 26 Anukebisangula munda mua mafuku asamombo, anka efuku dia musambo nyi efuku dia sabato, tabikekala kuanka nya.” 27 Anka bangi bantu babayile mu kuibisangula muifuku dia musambobidi, kadi ta mbapete kintu su nkimune.

28 Biabia Yehowa balunguile Moyise’shi: “Anupele kukookiela mayi ande na miiya yande mpa na ku nsaa kinyi? 29 Nutentekieshe’shi Yehowa mmuinupe efuku dia Sabato. Nyi buakinyi enupa mikate bua mafuku abidi muifuku dia kasamombo. Abitungu muntu oso ashale mbalo yadi; muntu su ngumune takatukanga mu kibundi kiaye muifuku dia musambo.” 30 Biabia bantu babakitshine Sabato muifuku dia musambobidi.

31 Bena Isalele babayitamine biabia bintu bu “mane.”* Bibaadi bitooka nka bu ntete ya koriandre, na mukanua bibaadi bu mikate yabadi bakite na buuki. 32 Paapa Moyise bambile’shi: “Yehowa amba’shi, ‘Uushayi kipimo kimune kia omere kia bino bintu na nuibilame munda mua bipungo bienu bioso, bua’shi bana benu bakamone mikate yanenudishanga mu kabaaka panaadi muinutuushe mu nsenga ya Ejipitu.’” 33 Paapa Moyise balunguile Alona’shi: “Ata kalondo na wemuele kipimo kimune kia omere kia mane, wekituule kumpala kua Yehowa, akilamibua munda mua bipungo bienu bioso.” 34 Biabia nka bu bibaadi Yehowa mulungule Moyise, Alona batshile kaka kalondo ekatuula kumpala kua kashete ka Bukamonyi* bua’shi kamone bia kulamibua. 35 Bena Isalele babaadiile mane munda mua bipua 40, mpa nka na pababafikile mu nsenga ibaadi bantu bashale. Babeadile mpa na pababafikile ku mikalo ya nsenga ya Kanaana. 36 Biabia, kipimo kimune kia omere, nkimune ki’ekumi kia kipimo kia efa.*

17 Kakongie koso ka Isalele kabakatukile mu kabaaka ka Sine, abende na kuikisha mu bipindi-bipindi muyile bibaadi Yehowa ebalungula, nfudiilo a bioso babashalele ku Refidime. Anka takubaadi mema abadia kutoma.

2 Biabia muilo ubabangile kutombokiela Moyise, wamulungula’shi: “Etupe mema a kutoma.” Kadi Moyise bebalunguile’shi: “Buakinyi nukuete kuntombokiela? Buakinyi anutungunuka na kutompa Yehowa?” 3 Kadi muilo ubaadi na nyota ikile mu yaaya mbalo, na ubaadi utungunukie na kuunauna Moyise na kuamba’shi: “Buakinyi we muitutuushe mu Ejipitu, mbua kuituipasha na bana betu mpa na nyema yetu na nyota su?” 4 Nfudiilo a bioso Moyise nkuidila kui Yehowa’shi: “A nkinyi kiandia kukita na uno muilo? Kubashala nka kapindi kapeela buabadia kungasa mabue!”

5 Paapa Yehowa nkulungula Moyise’shi: “Kila kumpala kua muilo, wende na bangi bakulu ba mu Isalele na mukombo ubodi mukupile mu muela wa Nile. Eukuate muiyasa, otambukie. 6 Talanga! Nakemana kumpala kobe pa lubuebue ku Horebe. Abitungu okupile ku lubuebue, na mema aakemutuku bua’shi muilo utome.” Moyise bakitshine nka biabia mu meso a bakulu ba Isalele. 7 Biabia baadi muudikie yaaya mbalo bu Maasa* na bu Meriba* muanda bena Isalele babaadi batontoole* naye, na babatompele Yehowa pa kuamba’shi: “Yehowa e munkatshi muetu su te muanka?”

8 Akupu bena Amaleke babafikile, abo nkulua na bena Isalele ngoshi ku Refidime. 9 Paapa Moyise balunguile Yoshua’shi: “Sangula bana balume, wende okalue na bena Amaleke. Malooba nakemana ku nsongo kua muengie na mukombo w’Efile Mukulu a binyibinyi muiyasa diande.” 10 Yoshua bakitshine nka bu bibamulunguile Moyise, aye nkulua na bena Amaleke. Moyise, Alona na Ure babakamiine ku nsongo kua muengie.

11 Pabaadi Moyise ashaala muele maboko muiyilu, bena Isalele abaadi abakidi bukome, kadi pabaadi Moyise ayisha maboko aaye, bena Amaleke babaadi abakidi bena Isalele bukome. 12 Pabaadi maboko a Moyise eele bushito,* babatshile ebue, bedituula, aye nkuipashala. Paapa Alona na Ure babakuatshile maboko aaye, au ku luno lupese, au ku lungi lupese, biabia bashadile muele maboko muiyilu, mpa na pabatuelele nguba. 13 Biabia Yoshua baadi mutshokole bena Amaleke na bantu babaadi abebakuatshishena na lupete lua ngoshi.

14 Yehowa nkulungula Moyise’shi: “Funda uno muanda bu kitentekiesho mu mukanda na wewambuluile Yoshua’shi, ‘Nakashimisha bena Amaleke boso muushi mueyilu, t’abakebatentekiesha dingi.’” 15 Paapa Moyise nkuibaka kilambuilo na nkuikiudika bu Yehowa-nisi,* 16 amba’shi: “Bu bikale’shi bena Amaleke abaluisha nkuasa a bufumu* a Yah, Yehowa akekala nabo mu ngoshi munda mua bipungo na bipungo.”

18 Biabia Yetro tshite muakuidi a mu Madiane, muko a Moyise bapushishe bioso bibaadi Efile Mukulu mukitshine Moyise na muilo wa Isalele, na bibaadi Yehowa mutushe bena Isalele mu Ejipitu. 2 Yetro muko a Moyise baadi mukuukile Sipora mukashi a Moyise, pabaadi Moyise mumualushe kuabo, 3 pamune na bana baye babidi. Umune a ku bana baye bamudikile bu Gershome, muanda Moyise bambile’shi, “Ne mufikie mu kushala bu muenyi mu kibundi kiabene,” 4 na ungi bamudikile bu Eliezere,* muanda bambile’shi, “Efile Mukulu a nshami mmukuashi ande, aye mumpaashe ku lupete lua Faraone.”

5 Paapa Yetro muko a Moyise, pamune na mukashi a Moyise na bana baye, babayile kui Moyise mu kabaaka kubaadi mushale ku muengie w’Efile Mukulu a binyibinyi. 6 Akupu batumine eyi kui Moyise’shi: “Ami muko oobe Yetro, nkuete kufika kodi na mukashi oobe na bana baye babidi.” 7 Musango umune Moyise batukile, nkuenda mu kufumankana na muko aaye, aye nkukupila mpala paashi na nkumuanya kiipa. Boso babaadi beyipushene pabitale nshalelo abo, na abo nkutuela mu nshibo y’epema.

8 Moyise nkulondela muko aaye bioso bibaadi Yehowa mukite Faraone na bena Ejipitu pa muanda wa bena Isalele, nkalakashi yoso ibabaadi bafumankane nayo muishinda, na bibaadi Yehowa muibapaashe. 9 Yetro nkusanka bua mianda yoso ibuwa ibaadi Yehowa mukitshine bena Isalele pa kuibapaasha kui bena Ejipitu.* 10 Paapa Yetro nkuamba’shi: “Yehowa atumbishibue, aye muinupaashe kui bena Ejipitu na kui Faraone, na mupaashe muilo ku bukunkushi bua bena Ejipitu. 11 Binobino nauku’shi Yehowa e na bukome kukila bangi b’efile boso, pa muanda wa bibakitshina baba abakiengieshanga muilo waye n’etombo.” 12 Akupu, Yetro muko a Moyise bafikile na mulambu wa kushiika na ingi milambu bua kulambula Efile Mukulu. Alona na bakulu boso ba Isalele babafikile, abo nkudia pamune na muko a Moyise kumpala ku’Efile Mukulu a binyibinyi.

13 Muifuku dibalondele, Moyise bashalele nka bu pa kiubishi bua kusambisha muilo, bantu babayimene kumpala kua Moyise kubanga ku nakashika mpa na ku kiolua. 14 Pabaadi muko a Moyise mumone bioso bibaadi Moyise akitshina muilo, bambile’shi: “A kiokitshina bino nkinyi? Buakinyi we mushale pano bupenka, na muilo oso nguimane kumpala kobe kubanga ku nakashika mpa na ku kiolua?” 15 Moyise nkulungula muko aye’shi: “Mpa muanda bantu bakuete nka kufika kuandi bua kuipusha Efile Mukulu mianda. 16 Apatuku kilumbu, abafiki nakio kuandi, abitungu nebasambishe ku muntu na muntu, na kuibaukisha bitshibilo bi’Efile Mukulu a binyibinyi na miiya yaye.”

17 Muko a Moyise nkumulungula’shi: “Biabia biokitshi ta bibuwa nya. 18 Eyendo’shi wekookiesha ngofu, mpa na bantu bodi nabo, muanda uno mudimo ngukile bukopo na tue kuiukita obe nabene. 19 Binobino nteemeshe. Nakiebe kukupa elango, n’Efile Mukulu ekala nobe. Obe ekala bu muntu alesha mpala ya muilo kumpala ku’Efile Mukulu a binyibinyi, na abitungu wekale okalubuila Efile Mukulu a binyibinyi mianda. 20 Ebapatuluile bitshibilo na miiya, na webaleshe eshinda diabadia kutambukila, na mudimo wabadia kukita. 21 Anka sangula munkatshi mua muilo balume be na ngobesha, abatshinyi Efile Mukulu, balume ba kukulupila bash’abakumiina’shi bebatshibe milomo, na webatule bu ba nfumu ba bantu kinunu, ba nfumu ba bantu lukama, ba nfumu ba bantu makumi atano, na ba nfumu ba bantu ekumi. 22 Abekala abasambisha muilo apatuku bilumbu,* anka su kui kilumbu ki bukopo abafiki nakio kodi, kadi tu bilumbu tupeela bekale abata bitshibilo. Ebofuishe mianda pa kukumiina kufuba nabo pamune. 23 Su bokitshi biabia, na su mbipushene na abikumiina Efile Mukulu, okoobesha uno mudimo kalolo, na muntu oso alukiila kuaye na muloo.”

24 Musango umune Moyise bateemeshe muko aaye, aye nkukita bioso bibamulunguile. 25 Moyise nkusangula balume banyingie mu Isalele mushima, na aye nkuibatula bu ba nfumu kunundu kua muilo, ba nfumu ba bantu kinunu, ba nfumu ba bantu lukama, ba nfumu ba bantu makumi atano, na ba nfumu ba bantu ekumi. 26 Biabia babaadi abasambisha muilo pabaadi apatuku bilumbu. Anka bilumbu bi bukopo babaadi abende nabio kui Moyise, kadi babaadi abasambisha bilumbu bipeela. 27 Kunyima kua biabia, Moyise beladikishene na muko aaye, na muko aaye nkualukila muiumbo diabo.

19 Mu mueshi wa kasatu kunyima kua bena Isalele kutuuka muiumbo dia Ejipitu, mu diadia efuku babafikile mu kabaaka ka Sinayi. 2 Babakatukile ku Refidime abo nkufika mu kabaaka ka Sinayi, na abo nkushala mu kabaaka. Bena Isalele babashalele mu yaaya mbalo mbetalene na muengie.

3 Paapa Moyise bakamiine kui Efile Mukulu a binyibinyi, na Yehowa nkumuitanyina kukatukila ku muengie, aye nkumulungula’shi: “Tala biodia kukalungula ba mu nshibo ya Yakobo, bena Isalele: 4 ‘Nuibemuene anue banabene kiakia kiandi mukite bena Ejipitu, bua kuinusemuna ku mbaba ya mumba na kufika nenu kuandi ami nabene. 5 Binobino, su nuakokiela eyi diande n’eshimba dimune na kulama kilombeno kiande, anukekala binyibinyi muilo wande wi pabuao munkatshi mua miilo yoso, muanda nsenga yoso ishima ngiande. 6 Anukekala kuandi bufumu bua ba tshite muakuidi na muilo wi selele.’ Ano ndio mayi odia kukalungula bena Isalele.”

7 Biabia Moyise bayile aye nkuitanyina bakulu ba muilo, na nkuibalungula mayi oso abaadi Yehowa mumulungule. 8 Kunyima kua biabia, muilo oso ubaluluile n’eyi dimune’shi: “Bioso bibakula Yehowa atuibikitshi.” Musango umune, Moyise batshile lualuulo luabo, aye nkukelulungula Yehowa. 9 Na Yehowa balunguile Moyise’shi: “Talanga! Nafiki kodi muikumbi difita, bua’shi muilo upushe panesamba nobe na bua’shi bekale na lukumiino modi mafuku oso.” Paapa Moyise balunguile Yehowa mayi a muilo.

10 Akupu Yehowa nkulungula Moyise’shi: “Enda kui muilo, na we wikashe wi selele lelo na malooba, na abitungu utumpe bilamba biao. 11 Abitungu wilumbuule bu’efuku dia kasatu, muanda muifuku dia kasatu Yehowa akayiki ku muengie wa Sinayi kumpala kua muilo oso. 12 Abitungu welele muilo mikalo ku bukunkula boso bua muengie na kuibalungula’shi, ‘Nudimukie, tanukaaminanga ku muengie sunga kukuma ku bukunkula buao. Muanda muntu akumu ku muengie abamuipaa binyibinyi. 13 Mboko su ngimune tayikumu yawa muntu, anka abamuasa mabue sunga kumutubula.* Biabikala muntu sunga nyema te bia kushala na muwa.’ Kadi apadidi mpungi* a lusengua lua mukooko ulume, mbalombene kukaamina ku muengie.”

14 Akupu Moyise bayikile ku muengie enda kui muilo, aye nkuibekasha be selele na abo nkutumpa bilamba biabo. 15 Aye nkulungula muilo’shi: “Elumbuuleyi bu’efuku dia kasatu. Muntu talalanga mukashi.”*

16 Muifuku dia kasatu kubaadi tupandapanda na mipenyo, ekumbi dikata dibaadi kunundu kua muengie n’eyi dibukopo dia mpungi, paapa bantu boso babaadi mu kishalelo bababangile kusuusa. 17 Yaaya nsaa Moyise batukile na bantu paasha pa kishalelo buabadia kufumankana n’Efile Mukulu a binyibinyi, babemene kuushi kua muengie. 18 Muengie ushima wa Sinayi ubaadi autusha muishi, muanda Yehowa bayikile kuanka muilungu dia kaalo; na miishi ya ku muengie ibaadi ayikaamina nka bu miishi ya nfuulo, muengie oso ubabangile kutshinkatshinka ngofu. 19 Pabaadi eyi dia mpungi adinyisha kuela bukopo, Moyise babangile kuakula, n’eyi di’Efile Mukulu a binyibinyi dibaadi adimualuula.

20 Biabia Yehowa bayikile ku muengie wa Sinayi ku nsongo kua muengie. Na Yehowa bayitanyine Moyise ku nsongo kua muengie, Moyise bakamiine. 21 Akupu Yehowa balunguile Moyise’shi: “Ika na odimushe muilo, tabatompanga kukila mikalo bua kumona Yehowa, bisumanga be bungi ba kuabadi abafu. 22 Na ba tshite muakuidi abeseselaa pepi na Yehowa beyikashe bu be selele, bisumanga Yehowa akebayipaa.” 23 Moyise baluluile Yehowa’shi: “Bantu ta mbalomene kukaamina ku muengie wa Sinayi, muanda opuile kuitudimusha wamba’shi, ‘Ela mikalo ifunyishe muengie, na weyiikashe ya kishila.’” 24 Anka Yehowa bamulunguile’shi: “Ika, akupu okamiine dingi obe na Alona, anka tolekielanga ba tshite muakuidi na muilo basambukie mikalo bua kukamiina kui Yehowa, bisumanga ebayipaa.” 25 Paapa Moyise bayikile kui muilo, ebalungula yaaya mianda.

20 Akupu Efile Mukulu bakuile ano mayi oso aalondo:

2 “Nnami Yehowa Efile Mukulu oobe, baadi mukutushe mu nsenga ya Ejipitu, mu nshibo ya bupika. 3 Tue mulombene kuikala na bangi b’efile kukatusha nka penda ami.

4 “Tuekitshinanga nkishi sunga kinfuanyi* kia kintu kampanda ki muiyilu’muaa, sunga ki pa nsenga, sunga ki mu mema muushi mua nsenga. 5 Tuebikunaminanga na tabakutakulanga bua kuibilanguila, muanda ami Yehowa Efile Mukulu oobe n’Efile Mukulu atekaa’shi bandamate nka penda ami, afuishaa kiimu kui bana bua bilema bia bamashabo, mpa na ku kipungo kia kasatu na kia kananka bua baba banshikue, 6 kadi naleshaa kifulo kia lulamato mpa na ku kipungo kia kinunu kui baba banfule na abalama miiya yande.

7 “Tue mulombene kutemuna eshina dia Yehowa Efile Mukulu oobe mu mushindo ushi buwa, muanda Yehowa t’akakutua kunyoka muntu afubisha eshina diaye mu mushindo ushi buwa.

8 “Wekale otentekiesha efuku dia Sabato bua kuidilama dia kishila. 9 Ofubu na kukita midimo yobe yoso munda mua mafuku asamombo, 10 anka efuku dia musambobidi, nyi efuku dia sabato bua Yehowa Efile Mukulu oobe. Tue mulombene kukita mudimo su ngumune, biabikala obe sunga muan’obe mulume, sunga muan’obe mukashi, sunga mpika oobe mulume, sunga mpika oobe mukashi, sunga nyema oobe, sunga muenyi mushale mu nshibo* yobe. 11 Muanda munda mua mafuku asamombo Yehowa bakitshine eyilu na nsenga, kalunga na bioso bi muanka, na babangile kuikisha muifuku dia musambo. Nyi buakinyi Yehowa mmuikashe efuku dia Sabato dia kishila na kuidielela miabi.

12 “Nemeka nshobe na nyinobe, bua’shi okite mafuku e bungi mu nsenga yabakupa kui Yehowa Efile Mukulu oobe.

13 “Toyipayishenanga.

14 “Totambukanga lusandi.

15 “Toyibanga.

16 “Totushanga bukamonyi bua madimi pabitale muinobe.

17 “Tolakilanga nshibo ya muinobe. Tolakilanga mukashi a mukuenu, sunga mpika aaye mulume, sunga mpika aaye mukashi, sunga ngombe aye, sunga mpunda aye, sunga kingi kintu kioso kia muinobe.”

18 Bantu boso babaadi abapusha akukupila tupandapanda, na kudila kua mpungi, na babaadi abamono mipenyo na muengie awifitshi miishi; pababamuene biabia babasushile na abo nkuimana ku bula. 19 Na muilo nkulungula Moyise’shi: “Obe esambe netu, atukuteemesha, kadi Efile Mukulu teesambanga netu, muanda atutshinyi tala tuafua.” 20 Biabia Moyise balunguile muilo’shi: “Tanutshinanga, muanda Efile Mukulu a binyibinyi mmufikie mu kuinutompa, bua’shi nutungunukie na kumutshina, na tanukitanga muluisho.” 21 Paapa bantu babaadi bemane nka ku bula, kadi Moyise baadi muisesele pepi n’ekumbi difita mbalo ibaadi Efile Mukulu a binyibinyi.

22 Paapa Yehowa balunguile Moyise’shi: “Bino nyi biodia kulungula bena Isalele, ‘Nubemuena anue banabene’shi nesamba nenu kukatukila muiyilu. 23 Ta nui balombene kukita b’efile ba kiamo kia arja bua kuibalanguila pamune nami, na ta nui balombene kuikitshina b’efile ba ôlo. 24 Anukankitshina kilambuilo kia nsenga, na anukandambuila milambu ya kushiika panka, milambu yenu ya butaale, na nyema yenu ikata na ipeela. Mu ma mbalo oso ankekasha eshina diande buabadia kuiditentekiesha, nakafiki kuanudi na kuinuelela miabi. 25 Su nubankitshina kilambuilo kia mabue, t’abitungu nuikikite na mabue atanye. Muanda su nubafubisha mabue atanye na bitotua, anuikikasha bu kishi kia kishila. 26 Tue mulombene kukaamina ku kilambuilo kiande ku bikaamino, bua’shi tala bamona musua oobe.’

21 Ino ndio miiya yodia kuibalungula:

2 “Su boulu mpika muina Ebelu, akakufubila munda mua bipua bisamombo, anka mu kia musambobidi, akapososhibua kushi kufuta kintu. 3 Su bafikile bupenka, alukiila bupenka. Kadi su bafikile na mukashi, paapa mukashi aaye alukiila naye. 4 Su nfumuaye bamupa mukashi na yawa mukashi bamutandila bana balume na bana bakashi, yawa mukashi na bana baye abekala ba nfumuaye, kadi aye nabene alukiila bupenka. 5 Kadi su yawa mpika amba’shi, ‘Nemukumiine nfumuami, nemukumiine mukashi ande na bana bande; tankumiina kuikala bulungantu,’ 6 abitungu nfumuaye ende naye kumpala ku’Efile Mukulu a binyibinyi. Akupu ende naye ku kiibi sunga ku ntempa ya kiibi, na nfumuaye amutubule etui na mutubulo,* paapa akekala mpika aaye bua loso.

7 “Su muntu bapaana muan’aye mukashi bu mpika, yawa muana mukashi ta mbalombene kumuposola bu biabaposolaa mpika mulume. 8 Su nfumuaye ta mumukumiine na ta mumuibakile, kadi amupaana kui ungi muntu, nfumuaye te na matalua a kumupaana kui benyi, muanda bamuluishisha. 9 Su bakumiina’shi muanaye mulume a muibakile, amukitshina mianda nka bu muanaye mukashi. 10 Su aata ungi mukashi, ta mulombene kupeelesha bia kudia, bilamba, sunga kutshimbisha kulala naye bu mukashi a kumpala. 11 Su ta mumukitshine bino bintu bisatu, paapa ende, ekale bulungantu kushi kufuta ekuta su ndimune.

12 “Su muntu akupila ungi muntu na yawa muntu afua, abitungu numuipee. 13 Kadi su ta muibikite pa bukopo n’Efile Mukulu a binyibinyi batadila’shi bikitshikie, nakakulesha mbalo yadia kusuukila. 14 Su muntu akuatshila muinaye nsungu i bukopo na amuipaa pa bukopo, abitungu yawa muntu afue, sunga biekalashi abitungu kukamuata ku kilambuilo kiande. 15 Yawa akupila nshaye sunga nyinaye, abitungu kumuipaa.

16 “Su muntu ayiba ungi muntu na amupaana, sunga’shi bamusangana mu maasa aye, abitungu bamuipee.

17 “Yawa oso ele nshaye sunga nyinaye milua, abitungu bamuipee.

18 “Tala kilombene kukitshika su bantu abekakena na umune bakupila muinaye ebue sunga ekofi, na yawa ta mufue anka bashala mulale ku lusala: 19 Su yawa abadi bakupile mmulombene kuibua na kutambuka paashi na mutshi, paapa ta mbalombene kunyoka yawa mukupiile. Anka akafutu yawa adi mukupile bua nsaa y’ekalanga mushimishe ku mudimo waye mpa na pakapusha bi buwa.

20 “Su muntu akupila mpika aaye mulume sunga mpika aaye mukashi na mutshi na yawa afua nka paapa,* abitungu bamobuele. 21 Anka, su bashala na muwa mund’efuku dimune sunga abidi t’abamobuela nya, muanda mmuntu abadi baule ku makuta a nfumuaye.

22 “Su bantu abalu bekupila mukashi e n’eyimi na atanda muana kabishi* na ta nkutukie masaku a lufu,* yawa muikupilanga afutu bintu bi’abamutekie kui mulume aaye; na abitungu ebitushe kumpala kua ba nsushi. 23 Kadi su masaku atuusha lufu, paapa abitungu kutuusha muwa ku muwa, 24 eyiso bu’eyiso, eyino bu’eyino, eyasa bu’eyasa na luao bua luao, 25 kushiikibua kaalo bua kushiikibua kaalo, elonda bu’elonda, ekofi bu’ekofi.

26 “Su muntu akupila mpika aaye mulume sunga mpika aaye mukashi kuiyiso na editunya, abitungu amulekie ende bulungantu muanda w’eyiso diaye. 27 Na su akuula eyino dia mpika aaye mulume sunga mpika aaye mukashi, abitungu amulekie ende bulungantu pa muanda w’eyino diaye.

28 “Su ngombe akupila muana mulume sunga muana mukashi nsengua na yawa muntu afua, abitungu baase ngombe mabue mpa na p’afuila na t’abadi muita waye; kadi ta mbalombene kunyoka nfumuaye nya. 29 Kadi su ngombe ekalanga na kiubishi kia kukupila bantu nsengua na badimusha nfumuaye kadi ta mumulame, na ayipaa muana mulume sunga muana mukashi, abitungu baase ngombe mabue, na nfumuaye namu ayipayibue. 30 Kadi su bamuteka nkuulo, abitungu atuushe kioso ki’abamutekie bu muulo wa nkuulo bua kupaasha muwa waye. 31 Sunga akupila nsongualume sunga nsonguakashi nsengua, abakakitshina sha ngombe mianda muyile uno muiya. 32 Su ngombe akupila mpika mulume sunga mukashi nsengua, sha ngombe apa nfumu a mpika shekele 30, abitungu baase ngombe mabue mpa na p’afuila.

33 “Su muntu aleka buina muasa, sunga’shi abundula apela kuibubuikila, na ngombe sunga mpunda apona muanka, 34 yawa mubundule buina afutu. Afutu muulo wa nyema kui nfumuaye, na yawa nyema mufue ekala aaye. 35 Su ngombe a muntu akupila ngombe a ungi muntu nsengua na afua, abitungu bapaane yawa ngombe e na muwa, beabishene makuta; na beabishene’nyi yawa ngombe mufue. 36 Kadi su bibaadi abiukibua’shi yawa ngombe baadi akupishena nsengua na sha naye ta mumulame, paapa abitungu afute ngombe kua ngombe, na yawa ngombe mufue afiki aaye.

22 “Su muntu ayiba ngombe sunga mukooko na ewipaa sunga kuiupaana, paapa akafutu ngombe itano bua yawa ngombe umune, na mikooko inanka bua wawa mukooko umune.

2 (“Su bashikisha ngifi kuete kuiba mu nshibo yabene na bamukupila afua, takui ebasa dia mase buaye nya. 3 Su biabia biakitshika bufuku bupue kutooka, akuikala ebasa dia mase aaye.)

“Abitungu yawa ngifi afute. Kadi su te na kintu, abitungu bamupaane bua bintu biayibile. 4 Kadi su bamukuata na kiakia kiayibile kiki na muwa, biabikala ngombe, mpunda sunga mukooko, akafutu bintu misusa ibidi.

5 “Su muntu adishila nyema yaye muifuba sunga muifuba dia nfinyo na beyilekie buayidia nkadia muifuba dia ungi muntu, abitungu afute bintu bikile buwa bia muifuba diaye sunga bintu bikile buwa bia muifuba diaye dia nfinyo.

6 “Su muntu ela kaalo kapalakana ku mitshi ya meeba na kapiisha bisaasa bia ntete biabadi bapue kutshiba, ntete yabashatshibile sunga efuba dia ungi muntu, yawa elele kaalo abitungu afute bintu bipie kaalo.

7 “Su muntu apa muinaye makuta sunga bintu bua kumulamina, na biabia bintu biayibibua mu yaaya nshibo ya muinaaye, na su bakuata yawa ngifi, abitungu ebifute misango ibidi. 8 Kadi su ta mbakuate ngifi, abitungu kuenda na yawa sha nshibo kumpala ku’Efile Mukulu a binyibinyi bua kumona su mmuate bintu bia muinaye. 9 Mu bilumbu bioso bitale bintu biabadi bayibe, bu ngombe, mpunda, mukooko, kilamba sunga kintu kioso kishimine kiadi mulombene kuamba’shi, ‘Kino nkiande!’ bantu boso babidi abende na muanda wabo kumpala ku’Efile Mukulu a binyibinyi. Yawa abalungula kui Efile Mukulu’shi e mu kilema, afutu muinaye bintu misango ibidi.

10 “Su muntu apa muinaye mpunda, ngombe, mukooko sunga nyema kampanda oso bua’shi amulamine, na yawa nyema afua sunga’shi atshokoka sunga benda naye kushi muntu amono, 11 abo boso babidi abetshipi kumpala kua Yehowa, bua’shi yawa ekeele na bintu aleshe’shi ta mukume bintu bia muinaye na yawa sha bintu abitungu akumiine biabia. Yawa mukuabo t’afutu kintu nya. 12 Kadi su mbamuibe nyema, abitungu afute sha nyema. 13 Kadi su mbamusasule kui nyema a bukielo, abitungu afikie na yawa abadi basasule bu kishinkamisho. Biabia te bia kufuta nyema abadi basasule kui nyema a bukielo.

14 “Kadi su muntu eyapula nyema a muinaye na yawa nyema atshokoka sunga’shi afua, aku namu nfumuaye t’epanka, abitungu yawa eyapuile afute. 15 Su nfumuaye e panka, yawa eyapuile t’afutu. Su eyapuile nyema na makuta, aa makuta nyi aekala bu efuto.

16 “Su muana mulume atombosha nsonguakashi kamame abashabangiile na amulala,* abitungu afute eondo, na yawa nsonguakashi ekala mukashi aaye. 17 Su nshe-muana apela n’eshimba diaye dioso bua kumupa anka, abitungu yawa muana mulume afute makuta e muulo w’eondo.

18 “Tue mulombene kulama ndoshi mukashi na muwa.

19 “Muntu oso alala nyema abitungu bamuipee binyibinyi.

20 “Yawa oso alambula bangi b’efile kushi penda Yehowa, abitungu ayipayibue.

21 “Tue mulombene kubepula muntu muenyi sunga kumukiengiesha, muanda anue namu nubaadi bu benyi muiumbo dia Ejipitu.

22 “Tanukiengieshanga mukashi kilele sunga muana a nshiye. 23 Su omukiengiesha sunga nkapeela na edila kuandi, tankakutua kupusha kudila kuaye; 24 nsungu yande ayikakamina, na nakenuipaa ku lupete lua ngoshi, bakashi benu abakashala bu bakashi kilele, na bana benu bu bana ba nshiye.

25 “Su weyapusha mulanda a munkatshi mua muilo wande makuta, muntu anudi bashale naye, tuekalanga bu muntu eyapushaa bua kupeta makasa. Na tomutekanga makasa.

26 “Su wata kilamba kia muinobe bu kieeko, abitungu omualuishe kianka kumpala kua nguba kutuela. 27 Muanda kiakia ngi kieputaa, nkilamba ki’abuikilaa mbidi yaye; su boshala nakio, ebuikila kinyi pa kulala? Su bedidi kuandi nakapusha binyibinyi, muanda ami ne na lusa.

28 “Tue mulombene kuela Efile Mukulu mulua, sunga nfumu a mu muilo oobe.

29 “Tuekakanga bua kutuusha bia buntu bia ku bintu biobe bikile bungi, na biabia abisubuka ku biengielo biobe. Okandambula muana mbedi a ku bana bobe balume. 30 Tala kiodia nkakita na ngombe na mukooko oobe: Aukashala na nyinaye munda mua mafuku musambobidi kunyima kuaye kumutanda. Na muifuku dia muanda, okamundambule.

31 “Abitungu nuikale be selele kumpala kuande, ta nui balombene kudia muita wa nyema abadi bayipee kui nyema a bukielo mu kisuku. Abitungu nuiupe mbua.

23 “Tue mulombene kupalakasha mianda ya madimi. Na tokuatshishenanga muntu e bubi p’obe kutuusha bukamonyi bua madimi. 2 Tolondanga kisaka kia bantu bua kukita mianda i bubi, na nsaa y’otusha bukamonyi pabitale kilumbu kampanda, tolondanga abikumiina kisaka na kuluisha bia binyibinyi. 3 Tue mulombene kulesha ntondo mu muanda utale mulanda.

4 “Su bomono ngombe sunga mpunda a muishikuanyi nobe mushimine, abitungu omualuishe anka. 5 Su bomono mpunda a muntu kampanda mukushikue mmupone na bushito, tue mulombene kukita bu’be shi mumumone na kumukila. Abitungu omukuashe pa kukaasha nyema bushito.

6 “Tue mulombene kuluisha kilumbu kia mulanda e munkatshi muenu paadi na kilumbu.

7 “Totuelakananga mu kilumbu ki’abadimbila muntu, toyipanga muntu shi na muanda na muntu mululame, muanda tankakula’shi muntu e bubi’shi mmululame nya.

8 “Tokumiinanga kutshibibua milomo, muanda kutshibibua kua milomo, akubuikilaa meso a bantu be na binangu na nkulombene kuluisha mayi a bantu balulame.

9 “Tue mulombene kukiengiesha muenyi. Anuuku kalolo abipushaa muenyi,* muanda nubaadi bu benyi muiumbo dia Ejipitu.

10 “Okakunu bintu mu nsenga yobe na kuumbula bintu biayitusha munda mua bipua bisamombo. 11 Kadi mu kipua kia musambobidi, abitungu weyilekie kushi kuiyidima, ishale kikuwa, na balanda ba mu muilo wenu abakadi abimumene, biabia biabalekie nyema ayibidi. Bino ndio biokakitshi n’efuba diobe dia nfinyo na dia tukuba tua olive.

12 “Munda mua mafuku asamombo okitshi midimo yobe; anka muifuku dia musambobidi okayimika midimo yobe yoso, bua’shi ngombe oobe na mpunda oobe biyikishe, na bua’shi muana a mpika oobe mukashi na muenyi bayikishe namu.

13 “Abitungu nukite biabia bioso binenulungula, na ta nui balombene kuteemuna eshina dia bangi b’efile; ta mbalombene kuidipusha mukanua muenu.

14 “Misango isatu ku kipua, okankitshina musangelo. 15 Okakitshi musangelo wa Mikate ishi kitatusho. Okadi mikate ishi kitatusho munda mua mafuku musambobidi, mu kipungo kitshibibue mu mueshi wa Abibe* nka bu binadi mukulungule, muanda mu kiakia kipungo nyi mubotukile mu Ejipitu. Muntu su ngumune ta mulombene kufika kumpala kuande ku maasa bisumanga. 16 Okakitshi’nyi Musangelo wa Biumbuluanga,* bintu bia kumpala bia ku mudimo obe, biabia bioyikala mukune mu mafuba; na Musangelo wa Kuumbula* ku nfudiilo kua kipua, p’okaumbula bintu bia mu mafuba, biabia biodi mukitshine mudimo wi bukopo. 17 Misango isatu ku kipua bana balume boso abakamueneka kumpala kua Muanana a binyibinyi, Yehowa.

18 “Tue mulombene kutuusha mase a mulambu wande na kintu su nkimune ki na kitatusho. Na mimu yanundambula bu milambu ku misangelo yande, ta ngilombene kukisha bufuku mpa na ku nakashika.

19 “Okatuala biumbuluanga bia kumpala bikile buwa bia mu nsenga yobe ku nshibo ya Yehowa Efile Mukulu oobe.

“Tue mulombene kuteekiela muana a mbushi mu mabele a nyinaye.

20 “Natumu muikeyilu kumpala kobe bua kukulama muishinda na bua kukutuesha mu mbalo yandi mulumbule. 21 Muteemeshe na omukookiele. Tomutombokielanga, muanda takabuikila miluisho yobe, muanda eshina diande di muadi. 22 Kadi su bokokiela eyi diaye n’eshimba dimune, na kukita bioso biangamba, nakashikua beshikuanyi bobe na kukiengiesha baba abakukiengiesha. 23 Muanda muikeyilu ande akatambuka kumpala kobe na akakukunkusha kui bena Amore, kui bena Ite, bena Perizi, bena Kanaana, bena Ivii, na bena Yebuse, na nakebatshokola. 24 Tue mulombene kukunamina b’efile babo sunga kukimba bua kuibafubila, na tuambulanga bikitshino biabo. Kadi abitungu obumbule b’efile babo na kutshokola misungu yabo ya kishila. 25 Abitungu nufubile Yehowa Efile Mukulu eenu, akelela bidiibua bienu na mema eenu miabi. Nakakaasha maladi munkatshi muenu. 26 Bana bakashi ba mu muilo wenu t’abakaluisha kutanda sunga kuikala ba nkunga, na nakakuikasha na muwa munda mua bipua bi bungi.

27 “Natumu moo wande kumpala kobe, na nakatuesha miilo yoso y’ofumankana nayo mu kafutakanyi, nakakitshi bia’shi beshikuanyi bobe boso basuukie kumpala kobe.* 28 Kumpala kua’shi nufikie nakabofusha beshikuanyi nenu, na nakabingi bena Ivii, bena Kanaana na bena Ite kumpala kuenu. 29 Tankebabingi boso kumpala kuenu mu kipua kimune nya, tala eumbo diashala bisumanga na nyema ya bukielo yafuima bua kuinukitshina bi bubi. 30 Nakebabingi kumpala kuenu kapeelakapeela, mpa na panukafuimi nupiane eumbo.

31 “Nakatuulu mikalo yenu kubanga ku Kalunga Kamonga mpa na ku kalunga ka bena Filistine, na kubanga ku kabaaka mpa na ku muela wa Efrate; muanda nakatuulu bantu ba mu eumbo mu maasa eenu, na anukebabingi kumpala kuenu. 32 Tue mulombene kukita nabo kilombeno sunga na b’efile babo. 33 Ta mbalombene kushala muiumbo dienu, bua’shi tala benutakula bua kunkitshina miluisho. Su nualanguila b’efile babo, abikekala bu muteo kuanudi.”

24 Akupu balunguile Moyise’shi: “Kaamina kui Yehowa, obe na Alona, Nadabe na Abihu, na bakulu 70 ba Isalele, nuinamine ku bula. 2 Moyise bupenka nyi esesela kui Yehowa; kadi bangi tabeseselanga nya, na muilo taukaminanga naye.”

3 Moyise bafikile aye nkulungula muilo mayi oso a Yehowa na bitshibilo biaye bioso, na muilo oso ushima ubaluluile n’eyi dimune’shi: “Bioso bibakula Yehowa atuibikitshi.” 4 Biabia, Moyise bafundile mayi oso a Yehowa. Aye nkubuuka ku nakashika, nkuibaka kilambuilo kuushi kua muengie na aye nkuibaka misungu 12 muyile bisamba 12 bia Isalele. 5 Kunyima kua biabia batumine ba nsongualume bena Isalele buabadia kutuusha milambu ya kushiika na kulambula ngombe bu milambu ya butaale kui Yehowa. 6 Akupu, Moyise batshile ndambo ya mase, eyeela mu bibakudi, na ata ingi ndambo ya mase eyimiamina ku kilambuilo. 7 Akupu batshile mukanda wa kilombeno, nkuiubadikila muilo n’eyi di bukopo. Na muilo nkuamba’shi: “Bioso bibakula Yehowa atuibikitshi na atukookiela.” 8 Biabia Moyise batshile mase eamiamina muilo na amba’shi: “Ano mmase a kilombeno kibabakitshi nenu kui Yehowa mu kuipushena na ano mayi oso.”

9 Moyise na Alona, Nadabe na Abihu na bakulu 70 ba Isalele babakamiine, 10 abo nkumona Efile Mukulu a Isalele. Muushi mua ngua yaye mubaadi kintu kibaadi nka bu mabue a safire abadi balamikie paashi, na kibaadi kitooka nka bu eyilu dinabeene. 11 Ta baadi mukitshine baba bantu bakata ba mu Isalele bi bubi nya, babamuene kimonua ki’Efile Mukulu a binyibinyi, abo nkudia, nkutoma.

12 Biabia Yehowa balunguile Moyise’shi: “Kaamina kuandi ku muengie na oshale kuanka. Nakupa mabue a mpelua e na miiya na mayi bianfundu bua kuibalongiesha.” 13 Biabia, Moyise bayile na mukuashi aaye Yoshua, na Moyise nkukaamina ku muengie w’Efile Mukulu a binyibinyi. 14 Kadi balunguile bakulu’shi: “Etutengieleyi pano mpa na p’atualukiila. Alona na Ure be nenu. Su muntu e na kilumbu, ende kuabadi.” 15 Paapa Moyise bakaamiine ku muengie pabaadi ekumbi ndikubuikile.

16 Ntumbo ya Yehowa ibashele ku muengie wa Sinayi, n’ekumbi dibaadi dikubuikile munda mua mafuku asamombo. Muifuku dia musambobidi, bayitanyine Moyise munkatshi mu’ekumbi. 17 Kui bena Isalele babaadi ababandila ntumbo ya Yehowa, bibaadi nka bu kaalo akatembe ku nsongo kua muengie. 18 Moyise nkutuela muikumbi na nkukamina ku muengie. Aye nkushala ku muengie munda mua mafuku 40 kanya na bufuku.

25 Akupu Yehowa nkulungula Moyise’shi: 2 “Lungula bena Isalele buabadia kuata bia buntu ku bintu biabo, bafikie bandambule, anukangatshila bia buntu kui muntu oso sh’eshimba adimutakula bua kutuusha. 3 Bino nyi bia buntu bianukakumiina kuata kuabadi: ôlo, kiamo kia arja na kia munyinga,* 4 buanda bui bulee, buanda bumongolokie na buanda bumonga pididii, lin mukile buwa, na buaa bua mbushi, 5 misokia ya mikooko ilume ina elangi dimonga, misokia ya nkongie, mabaya a mutshi wa akasia, 6 muimu wa kuela mu bimunyi, bintu bia mapembue bia kukita nabio muimu wa kishila na kabanda ke na mapembue e buwa, 7 mabue a onixe na angi mabue a kulamika ku’efode na ku kilamba kia pa kiadi. 8 Abakankitshina mbalo ya kishila, na nakashala* munkatshi muabo. 9 Anukakitshi tabernakele na bintu bia kuimuela bioso, anukamukitshi nka muyile mushindo wankulesha.

10 “Abakakitshi mushete na mabaya a mutshi wa akasia, anukeukitshi wi bula bua kude ibidi na kipindi, na bukata bua kude umune na kipindi, na bula bua muiyilu bua kude umune na kipindi. 11 Akupu okeulamika ôlo mukile buwa. Okamulamika munda na paasha, na okewifunyisha na ka mukaba ka ôlo ku mpese koso. 12 Na okeukitshina bikano binanka bia ôlo, okebilamikie kunundu kua mikolo yawo inanka, bikano bibidi ku lupese lumune, bingi bibidi ku lungi lupese. 13 Okakitshi mitandalo na mabaya a mutshi wa akasia, na wekulamikie ôlo. 14 Okatuesha yaaya mitandalo ku bikano bi ku mpese ya Mushete bua kumona bia kuiutuala. 15 Yaaya mitandalo ayishala ku bikano bi ku Mushete; t’abitungu kuiyikatusha nya. 16 Okatulu mu Mushete, kashete ka Bukamonyi kankupa.

17 “Okakitshi mputo a ôlo mukile buwa, bula buaye abuikala bua kude ibidi na kipindi, bukata buaye bua kude umune na kipindi. 18 Okakitshi bakeluba babidi ba ôlo, okebafusha na kitotua ku masongo abidi a mputo. 19 Okakitshi bakeluba ku masongo oso abidi, mukeluba umune ku nsongo yoso ya mputo. 20 Bakeluba abakabuula mbaba yabo ibidi bua’shi ikale itadiile muiyilu, babuikile mputo na mbaba yabo, na bekale betalene; mapala aabo aekala ayiname ku mputo. 21 Okatulu mputo ku Mushete, na okatulu mu wawa Mushete, kashete ka Bukamonyi kankakupa. 22 Nakakumuenekiela kunundu kua mputo, na kuakua nyi nkuanyikala nesamba nobe. Na munkatshi mua bakeluba babidi, baba be kunundu kua mushete wa Bukamonyi, nyi kuankakuukisha miiya yoso yodia kulungula bena Isalele.

23 “Okakitshi dingi mesa na mabaya a mutshi wa akasia e bula bua kude ibidi, bukata bua kude umune na bula bua muiyilu bua kude umune na kipindi. 24 Okekulamika ôlo mukile buwa, na okeefunyisha na ka mukaba ka ôlo ku mpese yoso. 25 Okekukitshi kipombeelo ki bukata bu’eyasa na ka mukaba ka ôlo keefunyishe kiakia kipombeelo mu mpese yoso. 26 Okeukitshina bikano binanka bia ôlo, webitule ku mapaka ananka, kuakua kulamikie mikolo yawo inanka. 27 Bikano abikala pepi na kipombeelo bua’shi bikale bikuate mitandalo ayikuasha bua kusemuna mesa. 28 Okakitshi mitandalo na mabaya a mutshi wa akasia, wekulamikie ôlo, na ku yaaya mitandalo nyi kuabekala abasemuina mesa.

29 “Okakitshina dingi aa mesa malonga, makopo, ma mbidika na bibakudi biabakapongoola nabio milambu ya bitomuanga. Okebikitshi na ôlo mukile buwa. 30 Na wekala otulu mikate ya kulesha ku mesa nsaa yoso kumpala kuande.

31 “Okakitshi kitudilo kia bimunyi na ôlo mukile buwa. Kino kitudilo kia bimunyi, okekifusha na kitotua. Kitako kiakio, mushisa wakio, ntabi yakio, makopo akio, bikunu biakio na bilongo biakio abikala bikuatene kintu kimune. 32 Kitudilo kia bimunyi akikala na ntabi isamombo, ntabi isatu ku lupese lumune, na ingi isatu ku lungi lupese. 33 Ku ntabi yoso i ku lupese lumune, akukekala tukopo tusatu tui bu bilongo bia mutshi wa amande, wi na bikunu na bilongo bituelene, na ku ingi ntabi yoso i ku lungi lupese akukekala tukopo tusatu tui bu bilongo bia mutshi wa amande, wi na bikunu na bilongo bituelene. Bino nyi abikekala ntabi yoso isamombo ayikatukila ku mushisa wa kitudilo kia bimunyi. 34 Ku mushisa wa kitudilo kia bimunyi akukekala tukopo tunanka tui bu bilongo bia mutshi wa amande na bikunu na bilongo biao bituelene. 35 Kikunu kimune akikala muushi mua ntabi ibidi ya kumpala ayikatukila ku mushisa, na kikunu kimune muushi mua ntabi ibidi ayilondo, na kingi kikunu muushi mua ntabi ibidi ya nfudiilo, bua ntabi isamombo ayikatukila ku mushisa. 36 Bikunu, ntabi na kitudilo kioso kishima kia bimunyi, abikala bikuatene kintu kimune kia ôlo e buwa abadi bafushe na kitotua. 37 Okekikitshina bimunyi musambobidi bia kutuula kuanka, na apakatembe biabia bimunyi, abikamunyika kumpala kuakio. 38 Tumano tuakio na bintu biakio bia kusemuina kaalo, abikala bia ôlo mukile buwa. 39 Abitungu kukita kino kitudilo kia bimunyi pamune na bintu biakio bioso, na ntalanta umune a ôlo mukile buwa. 40 Etatshishe bua’shi webikite’nka muyile mushindo ubaabadi bakuleshe ku muengie.

26 “Okakitshi tabernakele na bilamba ekumi bia mapema bikitshibue na lin mukile buwa abadi balukie, na buanda bui bulee, buanda bumongolokie na buanda bumonga pididii. Okekusolo bakeluba na buanda. 2 Kilamba kioso ki’epema akikala bula bua kude 28, na bukata bua kude 4. Biabia bilamba bioso bia mapema abikala bukata bumune. 3 Bilamba bitano abikala bilungene buabidia kuikala bu kilamba kimune, na bingi bitano namu abikala bilungene buabidia kuikala bu kingi kilamba kimune. 4 Okakitshi mapolo na buanda bui bulee ku nsongo kua kilamba ki’epema ki ku nsongo kua kiakia kilamba kikata, na okakitshi nka biabia ku nsongo kua kingi kilamba kikata mbalo yabilungena. 5 Okakitshi mapolo 50 ku kilamba kimune ki’epema, na angi mapolo 50 ku nsongo ya kingi kilamba ki’epema bua’shi ekale etalene mbalo yabidi bifumankeene. 6 Okakitshi tukano 50 tua ôlo, na okabungu bilamba bia mapema pamune na tuatua tukano, na tabernakele akafiki kintu kimune.

7 “Okakitshi’nyi bilamba na buaa bua mbushi, bu’epema dia kubuikila kunundu kua tabernakele. Okakitshi bilamba 11 bia mapema. 8 Kilamba kioso ki’epema akikala bula bua kude 30 na bukata bua kude 4. Biabia bilamba bioso 11 bia mapema abikala bukata bumune. 9 Okabungu bilamba bitano bia mapema pamune na obungie bingi bisamombo pamune, na okakonyo kilamba kia kasamombo kumpala ku’epema. 10 Okakitshi mapolo 50 ku nsongo ya kilamba kimune ki’epema, kiakia ki ku nsongo kua bioso, na okakitshi angi mapolo 50 ku nsongo ya kilamba ki’epema ki ingi mbalo yabidi bifumankeene. 11 Okakitshi tukano 50 tua munyinga,* wetutueshe mu mapolo bua kukuatshishena epema pamune, paapa adikekala kintu kimune. 12 Kipindi akishala kia bilamba bia mapema akikala kiembeele. Kia pankatshi kia kilamba ki’epema akishala akikala kiembeele ku mongo kua tabernakele. 13 Bula bua bilamba bia mapema bishale biembeele ku tabernakele abuikala bua kude umune ku mpese yoso, bua’shi bimone bia kuputa tabernakele.

14 “Okakitshi’nyi kia kubuikila nakio ki’epema na misokia ya mikooko ilume i na elangi dimonga, na kunundu okakitshi kia kubuikila nakio kia misokia ya nkongie.

15 “Okakitshi ma kadre a tabernakele na mabaya a mutshi wa akasia, weemikie buimane. 16 Kadre koso akekala bula bua kude ekumi, na bukata bua kude umune na kipindi. 17 Kadre koso akekala na tukuatshilo tubidi tuilamikishene. Bino ndio biokakitshi ma kadre oso a tabernakele. 18 Okakitshi ma kadre 20 bua lupese lua kuushi lua tabernakele.

19 “Okakitshi bitako 40 bitubule bia kiamo kia arja muushi mua ma kadre 20: bitako bibidi bitubule abikala muushi mua kadre ka kumpala bua kutuesha tukuatshilo tuako tubidi, na bitako bibidi bitubule muushi mua kadre koso akalondo bua tukuatshilo tuako tubidi. 20 Bua lungi lupese lua tabernakele, lupese lua kunundu, okite ma kadre 20, 21 na bitako biabio bitubule 40 bia kiamo kia arja, bitako bibidi bitubule muushi mua kadre ka kumpala, na bingi bitako bibidi bitubule muushi mua kadre koso akalondo. 22 Bua lupese lua kunyima kua tabernakele, lua kupona nguba, okite ma kadre asamombo. 23 Okakitshi ma kadre abidi buaadia kuikala bu bibayi bibidi mu mapaka abidi e kunyima kua tabernakele. 24 Aekala alamakashibue abidi kubanga kuushi na kuiyilu, mpa na ku kakano ka kumpala. Okakitshi nka biabia bua oso abidi, na aakekala bu bibayi bibidi bia mu mapaka. 25 Akukekala ma kadre muanda na bitako biao 16 bia kiamo kia arja bitubule, bitako bibidi bitubule muushi mua kadre ka kumpala, na bingi bitako bibidi bitubule muushi mua kadre koso akalondo.

26 “Okakitshi mitandalo na mabaya a mutshi wa akasia, mitandalo itano bua ma kadre e ku lupese lumune lua tabernakele. 27 Okitshi’nyi ingi mitandalo itano bua ma kadre e ku lungi lupese lua tabernakele, na mitandalo itano bua ma kadre e ku lupese lua kupona nguba lua tabernakele, dia kunyima. 28 Mutandalo wa pankatshi aukidila pa kadre ke pankatshi aukakatukila ku lupese lumune, ukafudile ku lungi lupese.

29 “Okalamika ôlo ku ma kadre, okeakitshine bikano bia ôlo bua kutueshela mitandalo, na okalamika ôlo ku mitandalo. 30 Okakitshi tabernakele nka muyile mushindo waye ubaabadi bakuleshe ku muengie.

31 “Okakitshi kilamba kia lushiko na buanda bui bulee, buanda bumongolokie, buanda bumonga pididii na lin mukile buwa abadi balukie. Abakekusolo bakeluba na buanda. 32 Okekipudika ku bibayi binanka bia mutshi wa akasia bilamikibue ôlo. Tupudikilo tuakio atuikala tua ôlo. Bibayi mbia kushimika mu bitako binanka bia kiamo kia arja bitubule. 33 Okapudika kilamba kia lushiko ku tukano, na munda mua kiakia kilamba kia lushiko okemutuulu mushete wa Bukamonyi. Kiakia kilamba akikenutshibuluila mbalo ya Kishila, na mbalo Ikile kishila. 34 Abitungu otuule mputo ku mushete wa Bukamonyi mu mbalo Ikile Kishila.

35 “Okatuulu mesa paasha pa kilamba kia lushiko, na kitudilo kia bimunyi kitalene na mesa lupese lua kuushi lua tabernakele, na mesa weatuulu lupese lua kunundu. 36 Okakitshi kilamba kia kushika ku kituelelo ki’epema na buanda bui bulee, buanda bumongolokie, na buanda bumonga pididii na lin mukile buwa biabadi balukie pamune. 37 Okakitshi bibayi bitano bia mutshi wa akasia bua kiakia kilamba kia ku kituelelo, okekulamika ôlo. Tupudikilo tuakio atuikala tua ôlo na okakitshi bitako bitano bitubule bia munyinga.*

27 “Okakitshi kilambuilo na mabaya a mutshi wa akasia; bula buakio abuikala bua kude itano na bukata buakio kude itano. Kiakia kilambuilo akikala na mpese yoso inanka imumune. Na bula buakio bua muiyilu bui kude isatu. 2 Ku matungi akio ananka okekukitshi nsengua; nsengua ayikekala ku kilambuilo, na okalamika kiamo kia munyinga* ku kilambuilo. 3 Okakitshi mbeketshi bua kubua buto bua ku kilambuilo, okakitshi bikasu, bibakudi, nsomo mpa na bintu bia kusemuina kaalo, bino bintu bioso okebikitshi na kiamo kia munyinga. 4 Okakitshina kilambuilo kasango ka kiamo kia munyinga, ku mpese yako inanka okekukitshi tukano tunanka tua kiamo kia munyinga. 5 Kaka kasango okekatulu muushi mua kilambuilo, munkatshi muakio. 6 Na okakitshina kilambuilo mitandalo na mabaya a mutshi wa akasia, okekulamika kiamo kia munyinga. 7 Yaaya mitandalo okeyituesha mu tukano bua’shi ikale ku mpese ibidi ya kilambuilo p’abekisemuna. 8 Okakitshi kilambuilo, kikale nka bu mushete wi na mpungi ukitshibue na mabaya. Webikite nka mu mushindo ubabaadi bakuleshe ku muengie.

9 “Okakitshi lupango lua tabernakele. Bua lupese lua kuushi, lupango aluikala na bilamba bia lin mukile buwa biembeele, bula bua lualua lupese abuikala bua kude 100. 10 Alukekala na bibayi 20, na bitako 20 bitubule bikitshibue na kiamo kia munyinga.* Tupudikilo tua bibayi na tukuatshisheno tuabio, abikekala bia kiamo kia arja. 11 Bula bua bilamba biembeele bia lupese lua kunundu abuikala namu’nyi bua kude 100, pamune na bibayi 20 na bitako biabio 20 bia kiamo kia munyinga bitubule, na tupudikilo tua arja na tukuatshisheno tua biabia bibayi. 12 Ku lupese lua kupona nguba mu bukata boso bua lupango, akuikala bilamba biembeele bi bula bua kude 50 na bibayi ekumi, na bitako ekumi bitubule. 13 Bukata bua lupango ku lupese lua kutunduka nguba abuikala kude 50. 14 Akukekala kude 15 bua bilamba biembeele bi ku lupese lumune, na bibayi bisatu na bitako bisatu bitubule. 15 Na ku lungi lupese, akukekala kude 15 bua bilamba biembeele, na bibayi bisatu, na bitako bisatu bitubule.

16 “Kibelo kia lupango abitungu kikale na kilamba ki bula bua kude 20 kikitshibue na buanda bui bulee, buanda bumongolokie, buanda bumonga pididii na lin mukile buwa biabadi balukie pamune, na bibayi binanka na bitako biabio binanka bitubule. 17 Bibayi bioso bifunyishe lupango abikala na bia kukuatshishena nabio na tupudikilo tua kiamo kia arja, kadi bitako biabio bitubule abikala bia kiamo kia munyinga. 18 Bula bua lupango abuikala kude 100, buipi kude 50, na bula bua muiyilu kude 5, aluikala lukitshibue na lin mukile buwa mulukie, na abitungu bitako biabio bitubule bikale bia kiamo kia munyinga. 19 Bina mufubo bioso bianukafubisha bua kukita mudimo mu tabernakele, pamune na biluu bioso bia tabernakele na bia lupango abikala bia kiamo kia munyinga.

20 “Okatumina bena Isalele eyi buabadia kukutuadila muimu wi buwa wa olive mutue, bua kuela mu bimunyi bua’shi bikale bitembe nguba oso. 21 Mu kashibo k’epema ka kufumankena, paasha pa kilamba ki pepi na mushete wa Bukamonyi, Alona na bana baye balume abakakitshi bia’shi bimunyi bikale abitembe kumpala kua Yehowa kubanga ku kiolua mpa na ku nakashika. Nyi muiya wa loso wabadia kukookiela kui bena Isalele munda mua bipungo biabo bioso.

28 “Oketanyina munkatshi mua bena Isalele mukuenu Alona na bana baye, bua’shi banfubile bu ba tshite muakuidi, Alona nabene, Nadabe na Abihu, Eleazare na Itamare bana ba Alona. 2 Okakitshina mukuenu Alona bilamba bia kishila bua ntumbo na buwa. 3 Okesamba na basha binangu boso bandi muushe na binangu, na abakakitshina Alona bilamba bua’shi ekashibue eselele bua kunfubila bu tshite muakuidi.

4 “Binyi bilamba bi’abakakitshi mbino: kilamba kia pa kiadi, efode, musapi ushi na maboko, musapi wi na tushibo-tushibo, lubango na mukaba; bino bilamba bia kishila abebikitshina mukuenu Alona na bana baye, bua’shi amone bia kunfubila bu tshite muakuidi. 5 Bantu ba sha binangu abakafubisha ôlo, buanda bui bulee, buanda bumongolokie, buanda bumonga pididii na lin mukile buwa bua kuibikita.

6 “Abakakitshi efode na ôlo, na buanda bui bulee, buanda bumongolokie, buanda bumonga pididii na lin mukile buwa abadi balukie, na abakamulengiesha na buanda. 7 Efode ekala na bipese bibidi bia bilamba bilungene ku mapampa. 8 Mukaba wabadi balukie, ulamikibue ku efode bua’shi amulamate kalolo, aukitshibua na biabia bintu bimune: ôlo, buanda bui bulee, buanda bumongolokie, buanda bumonga pididii na lin mukile buwa abadi balukie.

9 “Okaata mabue abidi a onixe, wekufunde mashina a bana ba Isalele, 10 mashina asamombo aekala kuibue dimune, na angi asamombo ku dingi, muyile kuilondena kua kutandibua kuabo. 11 Muntu atonkolaa mabue, akatonkola mashina a bana ba Isalele ku mabue abidi nka bu biakitaa kitampi. Akupu bele aa mabue mu tukopo tua ôlo. 12 Abitungu otuule aa mabue abidi pa mapampa a efode bu mabue a kitentekiesho bua bana ba Isalele, na abitungu Alona atuale mashina aabo kumpala kua Yehowa ku mapampa abidi bu kitentekiesho. 13 Okakitshi tukopo tua ôlo bua kuela aa mabue, 14 okakitshi nkano ibidi ya ôlo mukile buwa ilukie bu mooshi, na abitungu wanyine yaya nkano ku tuatua tukopo.

15 “Na okakitshisha kilamba kia pa kiadi kia bu nsushi kui yawa muntu atelaa na asolaa ku bilamba na buanda. Okebikitshi na bintu bimune bu biodi mukite nabio efode, kuamba’shi buanda bui bulee, buanda bumongolokie, buanda bumonga pididii na lin mukile buwa abadi balukie. 16 Akikekala bula bumune mpese yoso inanka p’abekikonyo pabidi, bula buakio abuikala bu bu’eyasa dibaale na bukata buakio bu bukata bu’eyasa dibaale. 17 Okekulamika milongo inanka ya mabue. Mulongo wa kumpala awikala n’ebue dia ribi, dia topaze, na dia emerode. 18 Na mulongo wa kabidi awikala n’ebue dia tirkuaze, safire, na dia jaspe. 19 Mulongo wa kasatu awikala n’ebue dia lesheme, agate na dia ametiste. 20 Mulongo wa kananka awikala n’ebue dia krizolite, onixe na dia jade. Aakedibua mu tukopo tua ôlo. 21 Mabue aekala muyile mashina a bana 12 ba Isalele. Abitungu kutonkola ebue dioso nka bu kitampi na adikala na dimune dia ku mashina a bisamba 12.

22 “Okakitshina kilamba kia pa kiadi nkano ya ôlo e buwa ilukibue bu kipaaba. 23 Okakitshi tukano tubidi tua ôlo bua kilamba kia pa kiadi na kulamika tuatua tukano tubidi ku masongo abidi a kiakia kilamba. 24 Okatuesha mioshi ibidi ya ôlo mu tuatua tukano tubidi tui ku mapaka a kilamba kia pa kiadi. 25 Okatuesha nsongo ibidi ya mioshi mu tukopo tubidi, na okeyanya ku mapampa a efode dia kumpala. 26 Okakitshi tukano tubidi tua ôlo na oketutuesha mu mapaka abidi a ku kilamba kia pa kiadi, ku nsongo kua kipindi ki muushi kitalene na efode. 27 Okakitshi tungi tukano tubidi tua ôlo kumpala kua efode, kuushi kua mapampa abidi pepi na mbalo yabidi bifumankeene, kunundu kua mukaba wa efode wabadi balukie. 28 Kilamba kia pa kiadi abitungu kishale pa mbalo yakio, nkikuate ku moshi wi bulee, wawa moshi aukuatshishena tukano tuakio ku tukano tua efode. Bino abikuasha bua’shi kilamba kia pa kiadi kishale pa efode, kunundu kua mukaba wabadi balukie.

29 “Abitungu’shi Alona ekale na mashina a bana ba Isalele pa kilamba kia pa kiadi kia bu nsushi, p’eshimba diaye p’atuele mu mbalo ya Kishila, bino abikala bu kitentekiesho nsaa yoso kumpala kua Yehowa. 30 Okatulu Urime na Tumime* pa kilamba kia pa kiadi kia bu nsushi, na abikekala p’eshimba dia Alona p’atuele kumpala kua Yehowa. Abitungu Alona ekale na bintu abikuasha bua kutshiba bilumbu bia bena Isalele p’eshimba diaye kumpala kua Yehowa nsaa yoso.

31 “Okakitshi musapi ushi na maboko wa efode na buanda bui bulee ao oso ushima. 32 Akuikala muasa kunundu* munkatshi muao. Wawa muasa awikala na mutelo wiwifunyishe wabadi batele kui muntu alukaa bilamba. Aukekala bu muasa w’ekotshi dia tu biamo bua’shi tautanyikanga. 33 Okakitshi tukuba tua grenade na buanda bui bulee, buanda bumongolokie, na buanda bumonga pididii ku kikupa kiao kioso, okite’nyi na tu ngunga tua ôlo munkatshi muato. 34 Abitungu okite bia’shi ka ngunga kamune ka ôlo kekale akalondo kakuba ka grenade, ka ngunga kamune ka ôlo akalondo kakuba ka grenade, kuushi koso kua kikupa kia musapi ushi na maboko. 35 Abitungu’shi Alona eufuale bua kukita mudimo, na abitungu’shi tuleo tupushikie nsaa y’atuele na y’atuku mu mbalo ya kishila kumpala kua Yehowa bua’shi tafuanga.

36 “Okakitshi kalata ka ôlo e buwa akapenyapenya, na wekutonkole nka bu bi’abatonkolaa ku kitampi, wekufunde’shi: ‘Buiselele mbua Yehowa.’ 37 Wekalamikie ku lubango na moshi wa bulee bua’shi kashale kumpala kua lubango. 38 Kaka kalata akekala mumpala mua Alona, na Alona akasemuna bushito bua muntu bakitshina bintu bia kishila muluisho, biabia bi’abekasha bu biselele p’abebitusha kui bena Isalele bu bia buntu bia kishila. Akekala mu mpala muaye nsaa yoso bua’shi Yehowa amone bia kuibakumiina.

39 “Okakitshi musapi wi na tushibo-tushibo na lin mukile buwa, okite lubango na lin mukile buwa na olukie mukaba.

40 “Okakitshi’nyi misapi, mikaba, na bilamba bia kuanya ku mitue bua bana ba Alona, bua ntumbo na buwa. 41 Okafuadika mukuenu Alona na bana baye, na okebele muimu, okebatulu mu midimo yabo na kuibekasha beselele bua’shi banfubile bu ba tshite muakuidi. 42 Okebakitshina’nyi tuputula tua lin buabadia kushikiila misua yabo. Atukatukila mu kifuka mpa na ku matankanta. 43 Abitungu Alona na bana baye betufuale pabatuele mu kashibo k’epema ka kufumankena sunga p’abesesela ku kilambuilo bua kukita mudimo pa mbalo iselele bua’shi tabasoolanga na bafua. Uno mmuiya bua loso buaye na lutandua luaye.

29 “Bua’shi okebekashe beselele buabadia kunfubila bu ba tshite muakuidi, okakite bino: Ata muana a ngombe na mikooko ibidi ilume ishi na kilema, 2 mikate ishi kitatusho,* mikate ishi kitatusho i bu nkata isangie na muimu, na galete ishi kitatusho yabadi bashingie muimu. Bino bioso okebikitshi na bukula bua blé bukile buwa 3 Okebiele mu kiseele na kufika nabio mu kiseele kumpala kuande pamune na muana a ngombe na mikooko ilume ibidi.

4 “Okafiki na Alona na bana baye ku kibelo kia kashibo k’epema ka kufumankena na webatumpe mema. 5 Paapa wate bilamba na ofuadikie Alona musapi, na musapi ushi na maboko wa efode, efode na kilamba kia pa kiadi, na omuanye mukaba wabadi balukie wa efode mu kifuka kalolo. 6 Okamuanya lubango ku mutue, na kuakua ku lubango wekuele kitunduilo* kia kishila kia kuilambula kui Efile Mukulu; 7 akupu wate muimu wa kishila* omupongoluele ku mutue bua’shi ekale muedibue muimu.

8 “Kunyima wetamine bana baye na webafuadikie misapi, 9 w’ebanye mikaba mu kifuka mpa na Alona namu, okebanye bilamba biabo bia kuanya ku mutue, na bu tshite muakuidi abukekala bu buabo; bino abikekala bu muiya bua loso. Bino nyi biokatulu Alona na bana baye mu midimo yabo buabadia kufuba bu ba tshite muakuidi.

10 “Akupu okafiki na ngombe mulume kumpala kua kashibo k’epema ka kufumankena, na Alona na bana baye abakatuulu maasa ku mutue wa ngombe. 11 Oyipee ngombe mulume kumpala kua Yehowa ku kibelo kia kashibo k’epema ka kufumankena. 12 Wate ndambo ya mase a ngombe ku munue oobe, weashingie ku nsengua ya kilambuilo, mase oso aashala weapongole kuushi kua kilambuilo. 13 Akupu wate muimu oso wi ku mala, na muimu wa kuishimba, na nfiyo ibidi, na muimu wi kuanka, webishiikie kaalo bua’shi bitushe miishi ku kilambuilo. 14 Muita wa yawa ngombe mulume na kikoba kiaye, na tufi okebishiiki kaalo paasha pa kishalelo. Nyi mmulambu wa muluisho.

15 “Akupu wate mukooko ulume umune, Alona na bana baye abakatuulu maasa ku mutue wa wawa mukooko. 16 Oyipee wawa mukooko ulume, wate mase awo weamiamine ku mpese yoso ya kilambuilo. 17 Osee wawa mukooko muyile bipindi biao, na osuule mala na bioko biao, wate bioso webitule pamune na mutue. 18 Abitungu oshiikie wawa mukooko oso kaalo, bua’shi miishi yao ituukie ku kilambuilo. Mmulambu wa kushiika kaalo bua Yehowa, autusha mapembue e buwa.* Mmulambu wabadi bashiikie mu kaalo bua Yehowa.

19 “Akupu okaata ungi mukooko ulume, Alona na bana baye abatuulu maasa ku mutue wa wawa mukooko. 20 Oyipee wawa mukooko na wate ndambo ya mase ao weashingie ku nsongo kua etui dibalume dia Alona na ku a bana baye, na ku biala bia maasa abo abalume, na ku mana abo akata a ku ngao yabo ibalume, na omiamine mase ku mpese yoso ya kilambuilo. 21 Abitungu wate ndambo ya mase e ku kilambuilo, na ndambo ya muimu wa kishila, webimiamine Alona na ku bilamba biaye, na bana baye mpa na ku bilamba biabo bua’shi Alona na bilamba biaye, na bana baye na bilamba biabo bikale bia kishila.

22 “Ku wawa mukooko ulume, wate muimu, mukila wi muimu, muimu wi ku mala, muimu wa kuishimba, nfiyo ibidi na muimu wi kuanka, na kioko kibalume, muanda nyi mmukooko wa kutudibua ku mudimo. 23 Dingi, mu kiseele kia mikate ishi kitatusho ki kumpala kua Yehowa, ata mukate ushi kitatusho wi kishengu, mukate wi bu nkata usangie na muimu na galete umune. 24 Okatuulu bino bintu bioso mu maasa a Alona na mu maasa a bana baye, na okebipuku aku-naku bu mulambu wa kupuka kumpala kua Yehowa. 25 Okebiata mu maasa muabo, webishiikie kaalo pa kilambuilo kunundu kua mulambu wa kushiika kaalo, bu kintu ki mapembue e buwa kumpala kua Yehowa. Mmulambu wabadi bashiikie mu kaalo bua Yehowa.

26 “Akupu, wate kiadi kia mukooko ulume wa kutudibua ku mudimo wabadi balambule bua Alona, na weupukie aku-naku bu mulambu wa kupuka kumpala kua Yehowa, akupu akikala kiobe. 27 Okekasha kiadi kia mulambu wa kupuka bu kia kishila, na kioko kia kipindi kiselele kiabekele bapukie, kiakia kiabatshile ku mukooko ulume wa kutudibua ku mudimo, ku biabia biabadi balambule bua Alona na bua bana baye. 28 Abikekala bia Alona na bana baye muyile muiya wa loso w’abakatumikila kui bena Isalele, muanda nkipindi kia kishila, na akikekala kipindi kia kishila ki’abakatuusha kui bena Isalele. Nkipindi kiabo kia kishila bua Yehowa, akikatukila mu milambu yabo ya butaale.

29 Bilamba bia kishila bia Alona abakebifuala kui bana baye abakamupiana nsaa y’abedibua muimu na y’abatudibua bu ba tshite muakuidi. 30 Tshite muakuidi a ku bana baye amupiana na atuele mu kashibo k’epema ka kufumankena bua kufubila mu mbalo iselele, akebifuala munda mua mafuku musambobidi.

31 “Okaata mukooko ulume wa kutudibua ku mudimo na weuteekie mu mbalo iselele. 32 Alona na bana baye abadi muita wa wawa mukooko na mikate i mu kiseele ki ku kibelo kia kashibo k’epema ka kufumankena. 33 Abakadi bintu biabadi bafubishe bua kubuikila miluisho yabo bua kuibatula bu ba tshite muakuidi, na kuibekasha beselele. Kadi ungi muntu* shi na matalua a kuibidia, ta mulombene kuibidia, muanda mbintu bia kishila. 34 Su muita wa ku mulambu wa kutudibua ku mudimo sunga mukate ubashala mpa na ku namashika, paapa okashiiki biabia bibashala mu kaalo, ta mbalombene kuibidia, muanda mbintu bia kishila.

35 “Okakitshi bino bua Alona na bana baye muyile bioso biandi mukulungule. Okitshi mafuku musambobidi bua kuibatula mu mudimo wabo wa bu tshite muakuidi. 36 Okatuusha ngombe mulume bua mulambu wa miluisho, bua kubuikiila miluisho efuku dioso, na okatoosha kilambuilo ku miluisho pa kutuusha mulambu wa kubuikiila miluisho buakio, na okekiele muimu bua kuikikasha kia kishila. 37 Munda mua mafuku musambobidi, okatuusha milambu ya kubuikiila miluisho bua kuikasha kilambuilo bu kia kishila, bua’shi kifikie bu kilambuilo kikile kishila. Abitungu’shi muntu oso ekukumu ekale a kishila.

38 “Bino nyi biokekala olambula pa kilambuilo: efuku dioso wekala otusha ngombe ibidi ilume ya kipua kimune. 39 Olambule muana a ngombe umune mulume ku namashika na ungi pa kamuilua nshobe. 40 Muana a mukooko wa kumpala ulume, weutusha na ki’ekumi kia kipimo kia efa kia bukula bui buwa busangie na kia mbinanka kia kipimo kia hine kia muimu wa olive yabadi batue, na mulambu wa kitomuanga wa nfinyo wa kia mbinanka kia kipimo kia hine. 41 Muana a ngombe mulume a kabidi, okamulambula pa kamuilua nshobe pamune na mulambu wa ntete wi mumune na milambu ya bitomuanga nka bu ku nakashika. Okebilambula bu kintu akitusha mapembue e buwa, mulambu ushiikibue mu kaalo bua Yehowa. 42 Aukekala bu mulambu wa kushiika kaalo wa kutushanga nsaa na nsaa munda mua bipungo bienu bioso, ku kibelo kia kashibo k’epema ka kufumankena kumpala kua Yehowa, mbalo yangikala nenumuenekiela bua kuisamba nobe.

43 “Yaaya mbalo nyi yankamuenekiela bena Isalele, na ntumbo yande ayiyikasha bu ya kishila. 44 Nakekasha kashibo k’epema ka kufumankena na kilambuilo bu mbalo ya kishila, na nakekasha Alona na bana baye bu ba kishila bua’shi banfubile bu ba tshite muakuidi. 45 Nakashala munkatshi mua muilo wa Isalele na nakekala Efile Mukulu aabo. 46 Abakauku binyibinyi’shi nnami Yehowa Efile Mukulu aabo baadi muibatushe muiumbo dia Ejipitu bua’shi nshale munkatshi muabo. Nnami Yehowa Efile Mukulu aabo.

30 “Okakitshi kilambuilo bua kuikushiikila kabanda;* okekikitshi na mabaya a mutshi wa akasia. 2 Akikala na mpese inanka i mumune, bula buakio abuikala kude umune, bukata kude umune, na bula bua muiyilu kude ibidi. Kilambuilo na nsengua yakio abikala kintu kimune. 3 Okekilamika ôlo mukile buwa: kunundu kuakio, mu mpese yakio yoso, na ku nsengua yakio; na okekifunyisha na ka mukaba ka ôlo. 4 Na okekikitshina’nyi bikano bibidi bia ôlo kuushi kua ka mukaba, mu mpese ibidi italene, na bino bikano abikuasha bua kukuata mitandalo yabafubisha bua kuikisemuna. 5 Okite mitandalo na mabaya a mutshi wa akasia na wekulamikie ôlo. 6 Okekitulu kumpala kua kilamba kia lushiko ki pepi na mushete wa Bukamonyi, kumpala kua mputo a mushete wa Bukamonyi, kuakua kuangikala nakumuenekiela.

7 “Alona akashiiki kabanda ke mapembue pa kilambuilo , ekashiiki nsaa y’alumbula bimunyi nakashika oso. 8 Dingi, apatembesha Alona bimunyi pa kamuilua nshobe, akashiiki kabanda. Mmulambu wa kabanda wanukatusha kumpala kua Yehowa mafuku oso munda mua bipungo bienu bioso. 9 Ta nui balombene kulambula panka kabanda kashi kakuminyibue, sunga mulambu wa kushiika, sunga mulambu wa ntete, na ta nui balombene kupongoola panka mulambu wa bitomuanga. 10 Musango umune ku kipua muifuku dia kubuikiila miluisho, Alona akapongola ndambo ya mase a mulambu wa miluisho ku nsengua ya kilambuilo, bua kuikasha kilambuilo bu kia kishila. Akebikitshi musango umune ku kipua munda mua bipungo bienu bioso. Kilambuilo nkintu kikile kishila bua Yehowa.”

11 Kunyima Yehowa balunguile Moyise’shi: 12 “Nsaa yoso yobadika bungi bua bana ba Isalele, abitungu muntu oso atushe nkuulo kui Yehowa bua muwa waye nsaa ya kuakua kubadika. Bi buwa kukita biabia bua’shi tala kipupa su nkimune kiebakuata nsaa y’abebafundu mashina. 13 Bintu bi’abakatusha kui muntu oso abadi bafunde eshina mbino: kipindi kia shekele* muyile kipimo kia shekele a mu mbalo ya kishila. Gera* 20 i mumune na shekele umune. Kipindi kia shekele nkia buntu kia kupa Yehowa. 14 Muntu oso abadi bafunde eshina e na bipua kubanga pa 20 mpa na kukaamina akatusha kia buntu bua Yehowa. 15 Mpeta ta mulombene kutuusha bikile, na mulanda namu ta mulombene kutuusha bishadile ku kipindi kia shekele bu kia buntu kia Yehowa bua kubuikila miluisho, bua kumona bia kukuula miuwa yenu. 16 Okaata makuta a kukuula nao abatusha kui bena Isalele, weatushe bua mudimo wa kashibo k’epema ka kufumankena, aakekala bu kitentekiesho kumpala kua Yehowa bua bena Isalele bua kubuikila miluisho bua miuwa yenu.”

17 Yehowa nkulungula dingi Moyise’shi: 18 “Okite elonga dikata na kia kuiditudila bia kiamo kia munyinga* bua kuitumpa mema; akupu weditule pankatshi pa kashibo k’epema ka kufumankena na kilambuilo, na wemuele mema. 19 Alona na bana baye abakasuula maasa na ngua yabo paapa. 20 P’abatuele mu kashibo k’epema ka kufumankena sunga p’abesesela ku kilambuilo bua kukita midimo na p’abashiikila Yehowa milambu mu kaalo, abetumpu mema bua’shi tala bafua. 21 Abitungu betumpe mema ku maasa na ku ngua bua’shi tala bafua. Bino abikala buabo bu muiya wa loso bua Alona na bua lutandua luaye munda mua bipungo na bipungo.”

22 Yehowa balunguile dingi Moyise’shi: 23 “Akupu, wate bino bintu bia mapembue akile buwa: kilo isamombo ya mire muikuatene, kilo isatu ya kanele ke mapembue, na kilo isatu y’elengie di mapembue, 24 kilo isamombo ya mutshi wa kasia yabadi bapime muyile kipimo kia shekele kia ku mbalo ya kishila, pamune na kipimo kimune kia hine* kia muimu wa olive. 25 Kunyima, okite nabio muimu wa kishila wa kuela bantu; abitungu kuibisanga pamune na kalolo koso. Muanda awikala muimu wa kishila wa kuela bantu.

26 “Okele kashibo k’epema ka kufumankena muimu mpa na mushete wa Bukamonyi, 27 okele’nyi mesa muimu na bintu biao bioso, kitudilo kia bimunyi na bintu biakio bioso, kilambuilo kia kabanda, 28 kilambuilo kia milambu ya kushiika kaalo na bintu biakio bioso, n’elonga na kitudilo kiadio. 29 Abitungu webikashe bia kishila bua’shi bifikie bikile kishila. Muntu oso ebikumu abitungu ekale eselele. 30 Okele Alona na bana baye muimu na kuibekasha beselele buabadia kunfubila bu batshite muakuidi.

31 “Okalungula bena Isalele’shi: ‘Uno muimu aukatungunuka na kuikala wa kishila kuandi bua kuelanga bantu munda mua bipungo bienu bioso. 32 Ta nui balombene kuiushinga pa mbidi ya muntu, sunga kukita bingi bintu bi mumune bu uno muimu. Muanda nkintu kia kishila. Aukatungunuka na kuikala kintu kia kishila kuanudi. 33 Muntu oso akitshi muimu bu uno, na ewele pa mbidi ya muntu* shi na matalua a kuedibua wanka, abitungu numuipee.’”

34 Akupu Yehowa balunguile Moyise’shi: “Ata bungi bui mumune bua bino bintu bia mapembue: makopola a stakte, onika, maka a galbanume, na oliba mukile buwa. 35 Webikite musengo wa kabanda; abitungu kuibisanga kalolo, bikale biele mungua, bi buwa ngofu, na bia kishila. 36 Okatu ndambo ya ku bianka bua’shi ifikie musengo wi buwa, okatulu ndambo ya wawa musengo kumpala kua kashete ka Bukamonyi mu kashibo k’epema ka kufumankena, mbalo yankekala nakumuenekiela. Wawa musengo abitungu wikale bu kintu kikile kishila kuanudi. 37 Tue mulombene kukita musengo wa kabanda odia kuikala ofubisha obe nabene na bino bintu. Okebimono bu bintu bia kishila bua Yehowa. 38 Muntu oso akitshi wawa musengo bua’shi ekale apusha mapembue ao, abitungu kumuipaa.”

31 Yehowa batungunukile na kuisamba na Moyise amba’shi: 2 “Teemesha, nasangula Besalele muana a Uri, Uri namu muana a Ure a mu kisamba kia Yunda. 3 Nakamuusha na kikudi ki’Efile Mukulu, mmupe binangu, mpushisho, na kiukilo kia kukita midimo yoso ya maasa, 4 bua kukita bintu bilengieshe kalolo, kukita mudimo na ôlo, kiamo kia arja na kia munyinga,* 5 bua kusee na kulamika mabue a muulo, na bua kukita midimo yoso ya mabaya. 6 Dingi, ne musangule Oholiabe muana a Ahisamake a mu kisamba kia Dane, bua kumukuasha. Nakele binangu mu mashimba a baaba boso be na kapatupatu bua’shi bakite bino bintu bioso biandi mukulungule: 7 kashibo k’epema ka kufumankena, mushete wa Bukamonyi na mputo e kunundu kuao, na bintu bioso bia mu nshibo y’epema, 8 mesa na bintu biao, kitudilo kia bimunyi kia ôlo mukile buwa na bintu biakio bioso, na kilambuilo kia kabanda, 9 kilambuilo kia milambu ya kushiika kaalo na bintu biakio bioso, elonga dikata na kitudilo kiadio, 10 bilamba biabadi balukie kalolo, bilamba bia kishila bia tshite muakuidi Alona, na bilamba bia bana baye bi’abakafuala bua kufuba bu ba tshite muakuidi, 11 muimu wa kishila, na kabanda ke mapembue bua mbalo ya kishila. Abakakitshi bintu bioso biandi mukulungule.”

12 Yehowa nkulungula dingi Moyise’shi: 13 “Esambe na bana ba Isalele, webalungule’shi: ‘Bikishekishe, nuikale anunemeka sabato yande, muanda nyi nkitunduilo pankatshi penu nami munda mua bipungo bienu bioso, bua’shi nuukie’shi, ami Yehowa nyi enuikasha ba kishila. 14 Abitungu nuikale anunemeka Sabato, muanda nyi nkintu kia kishila kuanudi. Muntu oso sh’amunemeka abitungu bamuipee. Muntu akitshi mudimo su ngumune muifuku dia Sabato, abitungu kumukatusha* munkatshi mua muilo waye. 15 Okakitshi midimo munda mua mafuku asamombo, kadi muifuku dia musambo, nyi efuku dia sabato dia kuikisha ku midimo yoso. Nyi efuku dia kishila bua Yehowa. Muntu oso akitshi mudimo mu diadia efuku abitungu kumuipaa. 16 Abitungu bena Isalele banemekie Sabato; abitungu bamunemekie munda mua bipungo biabo bioso. Nyi nkilombeno kia loso. 17 Nyi nkitunduilo kia loso pankatshi pande na muilo wa Isalele, muanda munda mua mafuku asamombo, Yehowa bapangile eyilu na nsenga, muifuku dia musambo bapuile mudimo na aye nkuikisha.’”

18 Biabia pabapuile kuisamba na Moyise ku Muengie wa Sinayi, bamupeele mabue abidi a Bukamonyi, mabue a mpelua kubaadi kufundibue na munue w’Efile Mukulu.

32 Paapa, muilo ubamuene’shi Moyise bayisha buadia kuika ku muengie. Muilo ubebungile, ao nkuenda kui Alona, nkumulungula’shi: “Etukitshine efile mulombene kuitukunkusha, muanda t’atuku kibafikila uno Moyise, muntu baadi muitutuushe mu nsenga ya Ejipitu.” 2 Paapa Alona nkuibalungula’shi: “Katushayi tudibu tua ôlo tui ku matui a bakashi benu, a bana benu balume, na a bana benu bakashi, nuituntuadile.” 3 Bantu boso nkubanga kukatusha tudibu tua ôlo tubaadi ku matui aabo na abo nkuitutuadila Alona. 4 Aye nkuata yawa ôlo kuabadi, nkubumba naye nkishi a kana ka ngombe abakitshine na mutonkolo. Aye nkubanga kuakula’shi: “Anue bena Isalele, uno nyi Efile Mukulu eenu, benutushishe mu nsenga ya Ejipitu.

5 Pabamuene Alona bino, bayibakile kilambuilo kumpala kua kana ka ngombe. Akupu aye nkuela musaase’shi: “Malooba kui musangelo bua Yehowa.” 6 Efuku dibalondele, bababukile kumpala kua nsaa, abo nkubanga kutuusha milambu ya kushiika kaalo na ya butaale. Akupu bantu babashalele bua kudia na kutoma. Kunyima kua biabia babebuele buabadia kusanka.

7 Paapa Yehowa balunguile Moyise’shi: “Ika, muanda muilo oobe ubotushishe mu nsenga ya Ejipitu ubapu kukita muanda wi bubi. 8 Babakatuka bukidi muishinda dinadi muibalungule buabadia kutambukila. Babekitshina nkishi a kana ka ngombe, abekenamina na abekalambula milambu, abamba’shi, ‘Anue bena Isalele, uno nyi Efile Mukulu eenu benutushishe mu nsenga ya Ejipitu.’” 9 Yehowa balunguile’nyi Moyise’shi: “Namono’shi uno muilo wi na mutue wi bukopo. 10 Binobino, ntadiile nebabutule mu nsungu yande i bukopo, na nakakuikasha obe bu kisamba kikata pa mbalo yabo.”

11 Paapa Moyise nkusendeela Yehowa Efile Mukulu aaye, na nkuamba’shi: “Ô! Yehowa, buakinyi okimbi’shi nsungu yobe i bukopo itembele muilo oobe, kunyima k’obe kuibatusha mu Ejipitu na bukome bobe bukata, n’eyasa diobe di bukome? 12 Buakinyi okumiina bena Ejipitu bambe’shi, ‘Baadi na binangu bi bubi pabaadi muibatuushe. Baadi akumiina kuibayipaa ku miengie na kuibashimisha pa nsenga’? Poosha nsungu yobe i bukopo na otaluule kitshibilo kiobe kiodi muate kia kufuishila muilo oobe ano malua. 13 Tentekiesha mufubi oobe Abalahama, Isaake, na Isalele, bobodi muitshipe kuabadi muishina diobe wamba’shi: ‘Nakafiimisha bekulu benu bu nyenyenyi ya muiyilu, na nakapa bekulu benu ino nsenga yoso yandi muleshe, bua’shi beyate ikale bu yabo bua loso.’”

14 Paapa Yehowa nkubanga kutaluula malua abaadi muambe’shi afuishila muilo waye.

15 Biabia Moyise balulukile, aye nkuika ku muengie mmukuate mabue abidi a Bukamonyi muiyasa diaye. Aa mabue abaadi afunde mpese yoso ibidi; alu lupese na lungi. 16 Efile Mukulu nabene nyi bakitshine aa mabue, na bifundue bibaadi kuanka bibaadi bitonkodibue n’Efile Mukulu. 17 Pabaadi Yoshua mubangie kupusha tuleo tua bantu, muanda wa misaase ibabaadi abele, balunguile Moyise’shi: “Kui tuleo tua ngoshi mu kishalelo.” 18 Kadi Moyise bamulunguile’shi:

19 Musango umune pabaadi Moyise muifubuile pepi na kishalelo, aye nkumona kana ka ngombe na masha ababaadi abashi, nsungu i bukopo ibamukamiine, aye nkusumbula mabue abaadi mu maasa muaye, na nkuiatanya kuushi kua muengie. 20 Batshile kana ka ngombe kababakitshine, aye nkuikashiika mu kaalo, nkuikafingakasha ako nkufika bukula; akupu aye nkupalakasha buabua bukula mu mema na nkuiatomesha bena Isalele. 21 Kunyima Moyise balunguile Alona’shi: “A uno muilo ubakukitshi kinyi bua’shi webakitshishe muluisho wi bino bukata?” 22 Alona nkumualuula’shi: “Nfumuami, tokuatanga nsungu. Ouku kalolo’shi binangu bia uno muilo mbitadile nka mu kukita bi bubi. 23 Biabia bandunguile’shi, ‘Etukitshine efile mulombene kuitukunkusha, muanda t’atuku kibafikila uno Moyise, muntu baadi muitutuushe mu nsenga ya Ejipitu.’ 24 Biabia ami nkuibalungula’shi, ‘Muntu oso e na ôlo abitungu amuate, afikie amumpe.’ Akupu neele yawa ôlo mu kaalo na batusha kano kana ka ngombe.”

25 Moyise bamuene’shi bantu bakuete kukita mianda kushi kuikanda, muanda Alona ta baadi muibatoshe, mu kipaso kibabaadi bakuatshikie bufu kumpala kua beshikuanyi babo. 26 Paapa Moyise nkuimana ku kibelo kia kishalelo na nkuamba’shi: “Nnanyi e ku lupese lua Yehowa? Afikie kuandi!” na bena Levi boso nkumuifunyisha. 27 Aye nkuibalungula’shi: “Yehowa Efile Mukulu a Isalele amba’shi, ‘Abitungu oso a kuanudi aate lupete luaye lua ngoshi, akile ku kibelo na kibelo kia mu kishalelo kioso kishima, ayipee mukuabo mulume, nkungishanyi naye na kuku aaye a p’eshimba.’” 28 Bena Levi babakitshine bibaadi Moyise muibalungule. Biabia, mu diadia efuku babayipayile bantu bafikie ku 3 000. 29 Paapa Moyise bambile’shi: “Lelo etuuleyi ku lupese bua Yehowa, muanda oso a kuanudi bayipaa muan’aye na mukuabo; lelo uno enuelela miabi.”

30 Muifuku dibalondele, Moyise balunguile muilo’shi: “Nuibakite muluisho ukile bukata, binobino nakamina kui Yehowa bua kumona su nekukita kintu kampanda bua’shi abuikiile muluisho wenu.” 31 Paapa Moyise balukiile kui Yehowa, nkumulungula’shi: “Uno muilo ubakitshi muluisho ukile bukata! Ubekitshina efile a ôlo! 32 Kadi binobino, kumiina namu kubuikila muluisho wabo; kadi su t’okumiina, nakusendeela’shi oshime eshina diande ku mukanda oobe odi mufunde.” 33 Kadi Yehowa nkulungula Moyise’shi: “Yawa munkitshine muluisho, nyi anshimi eshina diaye mu mukanda wande. 34 Binobino nda, okakunkushe muilo ku mbalo inadi mukulungule. Talanga! Muikeyilu ande akatambuka kumpala kobe, muifuku diankasambisha muilo, nakeunyoko bua muluisho wao. 35 Paapa Yehowa babangile kunyoka muilo, muanda ubakitshine kana ka ngombe, kaka kabaadi Alona mukite.

33 Yehowa balunguile dingi Moyise’shi: “Katuka ino mbalo na muilo ubodi mutushe muiumbo dia Ejipitu. Wende mu nsenga inadi muitshipe kui Abalahama, Isaake, na Yakobo’shi, ‘Nakeyipa bekulu bobe.’ 2 Nakatumu muikeyilu kumpala kobe, na nakabingi bena Kanaana, bena Amore, bena Ite, bena Perizi, bena Ivii na bena Yebuse. 3 Nda mu nsenga ayalala mabeele na buuki. Anka t’ankende nenu, muanda nui muilo wi na mutue wi bukopo, ne mulombene kuinubutula muishinda.”

4 Pabapushishe muilo bishima bi buabua bukopo, ubabangile kudila, takui muntu su ngumune bafuadile bintu biaye bia kuilengiesha nabio. 5 Yehowa balunguile Moyise bino: “Lungula bena Isalele’shi: ‘Nui muilo wi na mutue wi bukopo. Kuikele kushale kapindi kapeela bua’shi nfikie munkatshi muenu, nenubutule. Biabia lekayi kufuala bintu bienu bia kuilengiesha nabio pankiantaluula kiandia kuinukitshina.’” 6 Nyi buakinyi kubanga nka ku muengie wa Horebe, bena Isalele tambafuale’nyi* bintu biabo bia kuilengiesha nabio.

7 Paapa Moyise nkuata kashibo kaye k’epema, nkuikashimika paasha pa kishalelo, kula na mbalo ibaadi kishalelo, aye nkuiketamina bu kashibo k’epema ka kufumankena. Muntu oso baadi na muanda wa kuipusha Yehowa baadi ende ku kashibo k’epema ka kufumankena kabaadi paasha pa kishalelo. 8 Pabaadi’nka Moyise ki’atuku bua kuenda ku kashibo k’epema, muilo oso ushima ubaadi awibo na awimana ku bibelo bia tushibo tuabo tua mapema, babaadi abatala Moyise mpa na p’akatuele mu kashibo k’epema. 9 Pabaadi Moyise nka ki’atuele mu kashibo k’epema, ekumbi dia mulemba dibaadi adiiki na adimana pa kibelo kia kashibo k’epema pabaadi Efile Mukulu esamba na Moyise. 10 Pabaadi muilo oso aumono ekumbi dia mulemba ndimane pa kashibo k’epema, muntu oso baadi ayinama ku kibelo kia kashibo kaye k’epema. 11 Yehowa baadi esamba na Moyise mpala kua mpala, nka bu abikalaa muntu esamba na muntu naye. Pabaadi alukiila ku kishalelo, Yoshua muana a Nune mukuashi aaye tabaadi akatuka ku kashibo k’epema.

12 Biabia Moyise nkulungula Yehowa’shi: “Talanga, ondungula’shi, ‘Kunkusha uno muilo,’ kadi tue mundungule muntu ontumu naye. Ondungulanyi’shi, ‘Nakuku muishina diobe,* na wemukumiinyibue nami.’ 13 Bua lusa su nemukumiinyibue nobe, nakutekie bua’shi ondeshe mashinda oobe, buandia kukuuka na kutungunuka nakukuminyibua nobe. Na watenyi bano bantu’shi, mmuilo oobe.” 14 Biabia bamulunguile’shi: “Ami nabene* nende nobe, na nakupa kuikisha.” 15 Paapa Moyise bamulunguile’shi: “Su obe nabene* tu’ende netu, tu’etukatushanga ino mbalo nya. 16 A bi kuukibua naminyi’shi ne mukumiinyibue nobe, ami mpa na muilo oobe? Tampuende netu bua’shi ami na muilo oobe tuikale belekene na ingi miilo i pa nsenga su?”

17 Yehowa balunguile’nyi Moyise’shi: “Nakitshi’nyi biabia bibontekie, muanda ne mukukumiine na nakuuku muishina diobe.” 18 Moyise bamulunguile’shi: “Ndeshe namu ntumbo yobe.” 19 Kadi Efile Mukulu bamualuluile’shi: “Nakakitshi bia’shi ntumbo yande yoso ikile kumpala kobe, na nakaukisha eshina dia Yehowa kumpala kobe; nakalesha kalolo kui yawa ankumiina kuikalesha, na nakalesha lusa kui yawa ankumiina kulesha lusa.” 20 Bakumbeshe’shi: “Tue kumona mpala yande, muanda takui muntu a kummona, kadi ashala na muwa.”

21 Yehowa batungunukile na kuakula, amba’shi: “Tala ino mbalo i pepi nami. Imana pa lubuebue lui paapa lualua. 22 Apakidi ntumbo yande, nakakutuesha mu mpako* ya lubuebue, na nakakufuamisha n’eyasa diande mpa nka na pankidila. 23 Kunyima kua biabia nakakatusha eyasa diande, na okamono mongo wande. Anka mpala yande muntu ta kuiyimona.”

34 Akupu Yehowa balunguile Moyise’shi: “Senesha mabue abidi nka bu aa a kumpala, nakekufundu mayi abaadi ku mabue a kumpala, aa obodi mutanye. 2 Elumbuule bua maloba, muanda ku nakashika okakamina ku muengie wa Sinayi, na wemane kumpala kuande ku nsongo kua muengie. 3 Anka muntu su ngumune t’akaminanga nobe, na takuikalanga muntu mbalo su ngimune kuakua ku muengie. Sunga nyema tangilombene kudiila kumpala kua wawa muengie.”

4 Biabia Moyise baseneshe mabue abidi nka bu aa a kumpala, aye nkubuuka ku nakashika, nkukamina ku Muengie wa Sinayi nka bu bibaadi Yehowa mumulungule, aye nkukuata aa mabue abidi abaadi museneshe muiyasa diaye. 5 Paapa Yehowa bayikile muikumbi, nkuimana naye kuakua na nkumulungula eshina dia Yehowa. 6 Yehowa baadi akidi kumpala kuaye, akulanga’shi: “Yehowa, Yehowa, Efile Mukulu sha lusa n’eshimba dia kalolo, sh’akuata nsungu bukidi, na muule ndaa na kifulo kia lulamato na binyibinyi,* 7 aleshaa kifulo kia lulamato kui binunu bia bantu, afuilaa bantu lusa ku bilema, ku bilubilo na miluisho yabo, anka t’akatadiila muntu mupiile kushi kumunyoka, afuishaa kiimu kui bana na kui bekulu bua bilema bia bamashabo mpa na ku kipungo kia kasatu na kia kananka.”

8 Moyise bayinamine bukidibukidi, aye nkukupila mpala paashi. 9 Akupu bambile’shi: “Binobino, ô! Yehowa, su nemukuminyibue nobe, nakusendeela’shi wende namu netu Yehowa, sunga biekala’shi tui muilo wi na mutue wi bukopo, w’etufuile lusa bua kilubilo kietu, na ku muluisho wetu na wetuate bu kisamba kiobe.” 10 Aye namu bamualuluile’shi: “Nakitshi nenu kilombeno: Kumpala kua muilo wenu oso, nakakitshi mianda ya kukaanya yanshakitshine mu nsenga ishima munkatshi mua miilo yoso, na bantu boso banukekala nabo munkatshi muenu, abakamono mifubo ya Yehowa, muanda nakitshi nenu muanda wa kukaanya.

11 “Teemesha kalolo mianda yankutumina eyi lelo uno bua kukita. Nakabingi kumpala kuenu bena Amore, bena Kanaana, bena Ite, bena Perizi, bena Ivii na bena Yebuse. 12 Dimuka bua’shi tokitanga kilombeno na bantu bashale muiumbo muanuende, muanda biabia mbilombene kuikala bu muteo munkatshi muenu. 13 Kadi abitungu obumbule bilambuilo biabo, otshokole misungo yabo ya kishila, na kutshiba mitshi yabo ya kishila.* 14 Toyinaminanga bangi b’efile, muanda Yehowa aukiibua’shi* abitungu kumulamata nka penda aye.* Oolo, nyi Efile Mukulu atekie’shi bamulamate nka penda aye. 15 Nudimukie bua’shi tanukitanga kilombeno na bantu bashale mu diadia eumbo, muanda p’abakatambuka lusandi na b’efile babo na kulambula b’efile babo milambu, muntu kampanda e kuinuitamina na nuakadia milambu yabo. 16 Eyendo’shi, paapa okatshila bana bobe balume bana babo bakashi, na bana babo bakashi p’abakatambuka lusandi na b’efile babo, abakatakula bana bobe buabadia kutambuka lusandi na b’efile babo.

17 “Tue mulombene kukita b’efile ba kilonda kisunguulue.

18 “Abitungu okite Musangelo wa Mikate ishi kitatusho. Okadi mikate ishi kitatusho nka bu biandi mukulungule bua kukita; okakitshi bino munda mua mafuku musambobidi pa nsaa itshibibue mu mueshi wa Abibe,* muanda mu mueshi wa Abibe nyi mubotukile mu Ejipitu.

19 “Muana mbedi mulume oso ngande, mpa na a nyema yobe yoso, biabikala muana mbedi a ngombe sunga a mukooko. 20 Okakuula muana mbedi a mpunda pa kumushintula na mukooko. Kadi su tue mumukuule, paapa abitungu omutshokole nshingo. Okakuula muana mbedi oso a ku bana bobe balume. Muntu su ngumune ta mulombene kufika kumpala kuande ku maasa bisumanga.

21 “Okakitshi mudimo munda mua mafuku asamombo, kadi muifuku dia musambo, okayikisha. Sunga biekala’shi nkipungo kia kudima sunga kia kumbula, okayikisha.*

22 “Okakitshi Musangelo wa mbingo na biumbuluanga bibedi bia ku ntete ya blé na Musangelo wa kuumbula* ku nfundiilo kua kipua.

23 “Misango isatu ku kipua, bana balume boso abakamueneka kumpala kua Muanana a binyibinyi, Yehowa, Efile Mukulu a Isalele. 24 Muanda nakabingi bisamba kumpala kuenu, na nakatamisha nsenga yenu, takui muntu su ngumune akaabila nsenga yenu panukende misango isatu ku kipua bua kumona mpala ya Yehowa Efile Mukulu eenu.

25 “Tue mulombene kutuusha mase a mulambu wande na kintu su nkimune ki na kitatusho. Mulambu wa musangelo wa Pasaka ta ngulombene kukisha bufuku mpa na ku nakashika.

26 “Okatuala biumbuluanga bia kumpala bikile buwa bia mu nsenga yobe ku nshibo ya Yehowa Efile Mukulu oobe.

“Tue mulombene kuteekiela muana a mbushi mu mabeele a nyinaye.”

27 Yehowa balunguile dingi Moyise’shi: “Abitungu ofunde ano mayi, muanda mu kuipushena na ano mayi, nakitshi nobe kilombeno na Isalele.” 28 Paapa bashalele na Yehowa munda mua mafuku 40 kanya na bufuku. Ta baadile kintu sunga kutoma mema. Na bafundile* ku mabue mayi a kilombeno, miiya Ekumi.

29 Akupu Moyise bayikile ku Muengie wa Sinayi, mmukuate mabue abidi a kilombeno muiyasa diaye. Pabaadi Moyise muikie ku muengie, tabaukanga’shi mpala yaye ibaadi ayipenyapenya, muanda baadi muisambe n’Efile Mukulu. 30 Pabaadi Alona na bena Isalele boso bamone Moyise, babamuene’shi mpala yaye ikuete kupenyapenya na abo nkutshina kuifubuila pepi naye.

31 Kadi Moyise bebetamine, paapa, Alona na ba nfumu boso ba muilo babafikile kuadi, na Moyise nkubanga kuisamba nabo. 32 Kunyima kua biabia, bena Isalele boso babesesele pepi naye, na aye nkuibalungula miiya yoso ibaadi Yehowa mumupe ku Muengie wa Sinayi. 33 Pabaadi Moyise apudisha kuisamba naye, baadi abuikila kilamba kumpala yaye. 34 Kadi pabaadi Moyise atuele bua kuisamba na Yehowa, baadi akatusha kiakia kilamba mpa na p’atuuku. Akupu baadi atuuku na kulungula bena Isalele miiya ibabadi abamupa. 35 Bena Isalele babaadi abamono’shi mpala ya Moyise ibaadi ayipenyapenya; paapa Moyise baadi alusha kilamba ku mpala yaye mpa nka na p’atuele mu kuisamba n’Efile Mukulu.

35 Kunyima Moyise babungile muilo ushima wa Isalele, eulungula’shi: “Mianda y’abatekie kui Yehowa’shi nukite ngino: 2 Abitungu nufube munda mua mafuku asamombo, kadi efuku dia musambobidi adikala diselele buenu, sabato bua Yehowa, buanudia kuikisha ku midimo yoso. Muntu su ngumune akitshi mudimo mu diadia efuku abitungu kumuipaa. 3 Tanui balombene kuteembesha kaalo mu nshibo yenu su ngimune muifuku dia Sabato.”

4 Moyise balunguile dingi muilo ushima wa Isalele’shi: “Talayi abiamba Yehowa’shi nukite, 5 ‘Atayi kia buntu mu bintu bienu bua kuikipa Yehowa. Muntu oso sh’eshimba dia kalolo atuadile Yehowa kia buntu: ôlo, kiamo kia arja, kia munyinga,* 6 buanda bui bulee, buanda bumongolokie, buanda bumonga pididii, lin mukile buwa, buaa bua mbushi, 7 misokia ya mikooko ilume ina elangi dimonga, misokia ya nkongie, mabaya a mutshi wa akasia, 8 muimu wa kuela mu bimunyi, bintu bia mapembue bia kukita nabio muimu wa kishila, na kabanda ke na mapembue e buwa, 9 mabue a onixe, na angi mabue a kulamika ku efode, na ku kilamba kia pa kiadi.

10 “‘Bantu boso be na binangu be munkatshi muenu, bafikie bakite bioso abitekie Yehowa, 11 kuamba’shi tabernakele n’epema diaye, na kibuikilo kiaye, tukano tuaye na ma kadre aaye, mitandalo yaye, bibayi biaye na bitako biaye bitubulue; 12 Mushete na mitandalo yao ya kuiutuadila, mputo, na kilamba kia kutshibuula nakio mbalo ya Kishila na Mbalo ikile Kishila; 13 mesa na mitandalo ya kuiatuadila na bintu biao bioso na mikate ya kulesha; 14 kitudilo kia bimunyi na bintu biakio bioso, na bimunyi na muimu wa kuela mu bimunyi; 15 kilambuilo kia kabanda na mitandalo ya kuikituadila; muimu wa kishila na kabanda ke mapembue e buwa; kilamba kia ku kibelo kia tabernakele; 16 kilambuilo kia milambu ya kushiika kaalo, kasambo kakio ka kiamo kia munyinga, mitandalo yakio ya kuikisemuina na bintu biakio bioso; elonga dikata na kitudilo kiadio; 17 Bilamba bia kuembelesha ku lupango, bibayi bialo na bitako bialo bitubule; kilamba kia ku kibelo kia lupango; 18 biluu bia tabernakele, bilu bia lupango na mioshi yabio; 19 bilamba bilukibue kalolo bua mudimo wa mu mbalo ya kishila, bilamba bia kishila bia tshite muakuidi Alona, na bilamba bia bana baye buabadia kufuba bu ba tshite muakuidi.’”

20 Biabia kakongie kashima ka bena Isalele kabakatukile kumpala kua Moyise. 21 Akupu muntu oso baadi n’eshimba dia kalolo na baadi akumiina kutuusha bafikile na bia buntu mu kulambula Yehowa, bua’shi bebifubishe bua kukita kashibo k’epema ka kufumankena, na midimo yoso ibaadi ayitungibua kuakua, na bua bilamba bia kishila. 22 Balume mpa na bakashi babatungunukile na kufika, muntu oso baadi n’eshimba dia kalolo, babafikile na tukano tua kulengiesha ku bilamba, tudibu, tukano tua ku mpembe, na bingi bikano, mpa na bintu bia ôlo bia mishindo yoso. Boso abatushile milambu* yabo ya ôlo kui Yehowa. 23 Na muntu oso baadi na buanda bui bulee, buanda bumongolokie, buanda bumonga pididii, lin mukile buwa, buaa bua mbushi, misokia ya mikooko ilume i na elangi dimonga, na misokia ya nkongie, bafikile nabio. 24 Muntu oso baadi akumiina kutuusha kiamo kia arja na kia munyinga, bafikile nabio bu bia buntu bia Yehowa, na muntu oso baadi na mabaya a mutshi wa akasia bua mudimo oso bafikile nao.

25 Bakashi boso ba sha binangu, babalukile bintu na maasa aabo, na abo nkutuala biabia bibabaadi balukie: buanda bui bulee, buanda bumongolokie, buanda bumonga pididii, na lin mukile buwa. 26 Bakashi boso babaadi na binangu babaadi mashimba abo aebatakula, babalukile buaa bua mbushi.

27 Na ba nfumu ba muilo babatuadile mabue a onixe, na angi mabue a kulamika ku efode na ku kilamba kia pa kiadi, 28 bintu bia mapembue na muimu bua bimunyi, na bua muimu wa kishila, na kabanda ke na mapembue e buwa. 29 Balume boso na bakashi babaadi eshimba diabo adibatakula babafikile na kintu kampanda bua mudimo ubaadi Yehowa mutume eyi bua kukita ku bukuashi bua Moyise; bena Isalele babafikile mu kuibilambula Yehowa bu bia buntu mu kukumiina kuabo’bo banabene.

30 Akupu Moyise balunguile bena Isalele’shi: “Talangayi, Yehowa mmusangule Besalele muana a Uri, Uri namu muana a Ure a mu kisamba kia Yunda. 31 Mumuushe na kikudi ki’Efile Mukulu amupa binangu, mpushisho, na kiukilo kia kukita midimo yoso ya maasa 32 bua kukita bintu bilengieshe kalolo, kukita mudimo na ôlo, kiamo kia arja, na kia munyinga, 33 bua kusee na kulamika mabue a muulo, na bua kukita bintu bioso bia mabaya bilengieshibue. 34 Na mmutule muishimba diaye na muishimba dia Oholiabe muana a Ahisamake a mu kisamba kia Dane binangu bia kulongiesha. 35 Na mmuibaushe ndaa na mayele bua kukita midimo yoso ya maasa, kusola ku bilamba na buanda, kuluka na buanda bui bulee, buanda bumongolokie, buanda bumonga pididii, na lin mukile buwa, na kuluka bilamba. Bano bantu abakakitshi midimo yoso na kulumbuula bintu bioso abitungu kukita.

36 “Besalele akafubu na Oholiabe na muntu oso e na binangu abadi bape kapatupatu na mpushisho kui Yehowa, bua kuuka bia kukita midimo yoso ya pa mbalo ya kishila, nka bu bibaadi Yehowa mutume eyi.”

2 Paapa Moyise bayitanyine Besalele na Oholiabe na muntu oso e na binangu baadi Yehowa muele kapatupatu muishimba diaye, muntu oso baadi eshimba diaye adimutakula bua kukuasha na kukita mudimo. 3 Paapa babatshile kui Moyise bia buntu bioso bibaadi bena Isalele batushe bua kukita nabio mudimo wa pa mbalo ya kishila. Anka bantu babatungunukile na kumutuadila milambu ya mu kukumiina kuabo, ku namashika koso.

4 Kunyima kuabo kubanga mudimo wa kishila, bafubi ba sha binangu boso bababangile kufika umune ku umune. 5 Babalunguile Moyise’shi: “Bantu bakuete kutuala bintu bikile bungi kukila biabia abitungibua bua mudimo ubaadi Yehowa mutume eyi bua kukita.” 6 Biabia Moyise batumine eyi bua’shi bele musaase mu kishalelo kishima’shi: “Balume na bakashi, tanutualanga dingi bintu bua bia buntu bia kishila.” Paapa bantu babalekiele kutuala bintu. 7 Bintu bibaadi bilombane bua mudimo oso ubaadi na kia kukitshibua, bibaadi mpa na bikile bungi.

8 Paapa bafubi boso ba sha binangu babakitshine tabernakele na bilamba ekumi bia mapema bikitshibue na lin mukile buwa abadi balukie, na buanda bui bulee, buanda bumongolokie na buanda bumonga pididii. Bebikitshine* na ekusola bakeluba na buanda. 9 Bula bua kilamba kioso ki’epema bubaadi bua kude* 28, na bukata bua kude 4. Biabia bilamba bioso bia mapema bibaadi bukata bumune. 10 Akupu babungile bilamba bitano bia mapema pamune, na bingi bilamba bitano bia mapema aye nkuibibunga pamune. 11 Kunyima kua biabia, bakitshine mapolo na buanda bui bulee ku nsongo kua kilamba kimune ki’epema kibaadi ku nsongo pa mbalo ibabidi na kia kufumankena. Bakitshine’nyi nka biabia ku kilamba ki’epema kibaadi ku nsongo pa mbalo yabibaadi na kiakufumankena. 12 Bakitshine mapolo 50 ku kilamba kimune ki’epema, na angi mapolo 50 ku nsongo ya kingi kilamba ki’epema pa mbalo yabibaadi na kia kufumankena, bua’shi mapolo ekale etalene. 13 Nfudiilo a bioso bakitshine tukano 50 tua ôlo, na aye nkuitukuatshishena pamune na bilamba bia mapema, bua’shi tabernakele afikie kintu kimune.

14 Akupu bakitshine bilamba bia mapema na buaa bua mbushi, bu’epema dia kubuikila kunundu kua tabernakele. Aye nkukita bilamba 11. 15 Kilamba kioso ki’epema kibaadi bula bua kude 30, na bukata bua kude 4. Biabia bilamba bioso 11 bia mapema bibaadi bukata bumune. 16 Akupu babungile bilamba bitano bia mapema pamune, na aye nkubunga bingi bilamba bisamombo bia mapema pamune. 17 Kunyima bakitshine mapolo 50 ku nsongo kua kilamba ki’epema kibaadi ku nsongo pa mbalo pababidi na kia kufumankena, na bakitshine mapolo 50 ku nsongo kua kingi kilamba ki’epema pababidi na kiakufumankena. 18 Bakitshine tukano 50 tua kiamo kia munyinga* bua kukuatshishena bilamba bi’epema bua’shi bifikie kintu kimune.

19 Bakitshine’nyi kia kubuikila nakio ki’epema kia misokia ya mikooko ilume i na elangi dimonga, na kia kubuikila nakio na misokia ya nkongie bua kutenteka kunundu.

20 Akupu bakitshine’nyi ma kadre a tabernakele na mabaya a mutshi wa akasia abaadi emane. 21 Kadre koso kabaadi bula bua kude ekumi, na bukata bua kude umune na kipindi. 22 Kadre koso kabaadi na tukuatshilo tubidi tuilamakishene. Biabia nyi bibakitshine ma kadre oso a tabernakele. 23 Bino nyi bibakitshine ma kadre a lupese lua kuushi lua tabernakele, ma kadre 20. 24 Akupu bakitshine bitako 40 bitubule bia kiamo kia arja, bia kutuula muushi mua ma kadre 20, bitako bibidi bitubule muushi mua kadre ka kumpala, bua kutuesha tukuatshilo tuako tubidi, na bitako bibidi bitubule muushi mua kadre koso akalondo bua tukuatshilo tuako tubidi. 25 Bua lungi lupese lua tabernakele, lupese lua kunundu, bakitshine ma kadre 20 26 na bitako biao bitubule 40 bia kiamo kia arja, bitako bibidi bitubule muushi mua kadre ka kumpala, na bingi bitako bibidi bitubule muushi mua kadre koso akalondo.

27 Bua lupese lua kunyima lua tabernakele, lua kupona nguba, bakitshine ma kadre asamombo. 28 Bakitshine ma kadre abidi bua’shi ekale bu bibayi bibidi mu mapaka abidi e kunyima kua tabernakele. 29 Bibayi bibaadi bilamakashue bibidi kubanga kuushi na kuiyilu, mpa na ku kakano ka kumpala. Bakitshine nka biabia buabidia kuikala bibayi bibidi bia mu mapaka. 30 Biabia ma kadre oso abaadi muanda na bitako biao 16 bia kiamo kia arja bitubule, bitako bibidi bitubule muushi mua kadre koso.

31 Akupu bakitshine mitandalo na mabaya a mutshi wa akasia, mitandalo itano bua ma kadre e ku lupese lumune lua tabernakele. 32 Bakitshine mitandalo itano bua ma kadre e ku lungi lupese lua tabernakele, na mitandalo itano bua ma kadre e ku lupese lua kupona nguba lua tabernakele, dia kunyima. 33 Akupu bakitshine mutandalo wa pankatshi ubaadi aukidila pa kadre ka pankatshi, aukatukila ku lupese lumune na kufudiila ku lungi lupese. 34 Balamikile ôlo ku ma kadre, na kuiakitshina bikano bia ôlo mua kutueshela mitandalo, na balamikile ôlo ku mitandalo.

35 Bakitshine kilamba kia lushiko na buanda bui bulee, buanda bumongolokie, buanda bumonga pididii, na lin mukile buwa abadi balukie. Baadi muikusole bakeluba na buanda. 36 Akupu baadi muikikitshine bibayi binanka bia mutshi wa akasia, na kuikulamika ôlo, pamune na tupudikilo tuakio tua ôlo, na aye nkukitshina biabia bibayi bitako binanka bitubule bia kiamo kia arja. 37 Bakitshine kilamba kia kushika ku kituelelo ki’epema na buanda bui bulee, buanda bumongolokie, buanda bumonga pididii, na lin mukile buwa biabadi balukie pamune, 38 pamune na bibayi biakio bitano na tupudikilo. Balamikile ôlo ku nsongo kuabio na ku tukuatshisheno tuabio, kadi bitako biabio bitano bitubule bibaadi bia kiamo kia munyinga.

37 Besalele bakitshine Mushete na mabaya a mutshi wa akasia. Bula buao bubaadi bua kude* ibidi na kipindi, bukata buao kude umune na kipindi, na bula buao bua muiyilu, kude umune na kipindi. 2 Beulamikile ôlo mukile buwa munda na paasha, na aye nkuiwifunyisha na ka mukaba ka ôlo ku mpese yoso. 3 Kunyima aye nkuiukitshina bikano binanka bia ôlo, aye nkuibilamika kunundu kua mikolo yao inanka, bikano bibidi ku lupese lumune, na bingi bibidi ku lungi lupese. 4 Akupu bakitshine mitandalo na mabaya a mutshi wa akasia, aye nkuikulamika ôlo. 5 Dingi batueshele yaaya mitandalo mu bikano bibaadi ku mpese ya Mushete bua kumona bia kuiutuala.

6 Bakitshine mputo a ôlo mukile buwa. Baadi bula bua kude ibidi na kipindi, na bukata bua kude umune na kipindi. 7 Akupu bakitshine bakeluba babidi ba ôlo bafushibue na kitotua ku masongo abidi a mputo. 8 Mukeluba umune baadi ku nsongo imune, na ungi ku ingi nsongo. Bakitshine bakeluba ku ma nsongo abidi a mputo. 9 Bakeluba babidi babaadi babuule mbaba yabo beyitadisha muiyilu, babuikila mputo na mbaba yabo. Babaadi abetalena, na mapala aabo abaadi ayiname ku mputo.

10 Kunyima bakitshine mesa na mabaya a mutshi wa akasia. Bula buao bubaadi bua kude ibidi, bukata buao kude umune, na bula buao bua muiyilu, kude umune na kipindi. 11 Bealamikile ôlo mukile buwa, aye nkuiefunyisha na ka mukaba ka ôlo ku mpese yoso. 12 Akupu bekukitshine kipombeelo ki bukata bu’eyasa na ka mukaba ka ôlo keefunyishe kiakia kipombeelo mu mpese yoso. 13 Dingi, aye nkuiakitshina bikano binanka bia ôlo, na nkuibilamika mu mapaka ananka, mbalo ibaadi mikolo yao inanka ilamikibue. 14 Bikano bibaadi pepi na kipombeelo, bua’shi bikale abikuata mitandalo ibabaadi abafubisha bua kusemuna mesa. 15 Akupu bakitshine mitandalo na mabaya a mutshi wa akasia buabadia kuikala abasemuina nayo mesa, aye nkuikulamika ôlo. 16 Kunyima bakitshine bintu bioso bia kutuula ku mesa na ôlo mukile buwa, malonga, makopo, bibakudi, na mbidika biabakapongola nabio milambu ya bitomuanga.

17 Paapa bakitshine kitudilo kia bimunyi na ôlo mukile buwa. Baadi mufushe kiakia kitudilo kia bimunyi na kitotua. Kitako kiakio, mushisa wakio, makopo akio, bikunu biakio na bilongo biakio bibaadi bikuatene kintu kimune. 18 Kitudilo kia bimunyi kibaadi na ntabi isamombo ikatukile ku mushisa, ntabi isatu ku lupese lumune, na ingi isatu ku lungi lupese. 19 Ku ntabi yoso i ku lupese lumune kubaadi tukopo tusatu tui bu bilongo bia mutshi wa amande, tui na bikunu na bilongo bituelene, na ku ingi ntabi yoso i ku lungi lupese, kubaadi tukopo tusatu tui bu bilongo bia mutshi wa amande, wi na bikunu na bilongo bituelene. Bino nyi bibaadi ntabi yoso isamombo ayikatukila ku mushisa wa kitudilo kia bimunyi. 20 Na ku mushisa wa kitudilo kia bimunyi, kubaadi tukopo tunanka tui bu bilongo bia mutshi wa amande, na bikunu, na bilongo bituelene. 21 Kubaadi kikunu kimune muushi mua ntabi ibidi ya kumpala ayikatukila ku mushisa, na kikunu kimune muushi mua ntabi ibidi ayilondo, na kingi kikunu muushi mua ntabi ibidi ya nfudiilo, bua ntabi isamombo ayikatukila ku mushisa wa kitudilo kia bimunyi. 22 Bikunu, ntabi na kitudilo kia bimunyi kioso kishima, bibaadi bikitshibue buabidia kuikuatena kintu kimune kia ôlo e buwa abadi bafushe na kitotua. 23 Akupu bakitshine bimunyi biakio musambobidi, tumano tuakio na bintu biakio bia kusemuina kaalo bia ôlo mukile buwa. 24 Bekikitshine pamune na bintu biakio bioso na ntalanta umune a ôlo mukile buwa.

25 Bakitshine kilambuilo kia kabanda na mabaya a mutshi wa akasia. Kibaadi na mpese inanka i mumune, bula buakio bubaadi bua kude umune, bukata buakio kude umune, na bula buakio bua muiyilu kude ibidi. Kilambuilo na nsengua yakio bibaadi kintu kimune. 26 Bekilamikile ôlo mukile buwa, bamulamikile kunundu kuakio, mu mpese yakio yoso, na ku nsengua yakio na aye nkuikifunyisha na ka mukaba ka ôlo ku mpese yoso. 27 Bakitshine bikano bibidi bia ôlo kuushi kua ka mukaba, mu mpese ibidi italene, buabidia kukuasha bua kukuata mitandalo y’abafubisha bua kuikisemuna. 28 Kunyima kua biabia, bakitshine mitandalo na mabaya a mutshi wa akasia, aye nkuikulamika ôlo. 29 Bakitshine’nyi muimu wa kishila wa kuela bantu na kabanda ke mapembue e buwa bisangibue pamune na kalolo koso.

38 Bakitshine kilambuilo kia milambu ya kushiika kaalo na mabaya a mutshi wa akasia. Mpese yakio yoso inanka ibaadi bula bumune, bula buakio bubaadi kude itano, bukata buakio kude itano, na bula bua muiyilu kude isatu. 2 Akupu bakitshine nsengua mu matungi akio ananka. Nsengua yakio ibaadi ikitshinue kuakua. Na balamikile kiamo kia munyinga* ku kilambuilo. 3 Kunyima kua biabia bakitshine bintu bioso bia ku kilambuilo, mbeketshi, bikasu, bibakudi, nsomo, na bintu bia kuatshila kaalo. Bino bintu bioso bebikitshine na kiamo kia munyinga. 4 Bakitshine dingi kasango ka kiamo kia munyinga bua kilambuilo, bekatudile muushi mua kilambuilo dia pankatshi pakio. 5 Bakitshine bikano binanka ku mapaka ananka pepi na kasango ka kiamo kia munyinga biabidia kukuata mitandalo. 6 Akupu bakitshine mitandalo ya mabaya a mutshi wa akasia na bekulamikile kiamo kia munyinga. 7 Batueshele mitandalo mu bikano bi ku mpese ya kilambuilo bua kumona bia kuikisemuna. Bakitshine kilambuilo ki bu mushete wi na mpungi ukitshibue na mabaya.

8 Bakitshine dingi elonga dikata na kia kuiditudila bia kiamo kia munyinga; baadi mufubishe mmueno ya bana bakashi babaabadi balumbuule kalolo bua kufuba ku kibelo kia kashibo k’epema ka kufumankena.

9 Akupu bakitshine lupango. Bua lupese lua kuushi, bakitshine lupango lui na bilamba bia lin e buwa mulukie biembele, bula bua lualua lupese bubaadi bua kude 100. 10 Kubaadi bibayi 20 na bitako 20 bitubule bia kiamo kia munyinga, na tupudikilo tua bibayi, na tukuatshisheno tuabio bibadi bia kiamo kia arja. 11 Dingi, bula bua bilamba biembeele bua lupese lua kunundu, bubaadi bua kude 100. Bibayi biabio 20 na bitako biabio bitubule 20 bibaadi bia kiamo kia munyinga. Tupudikilo tua biabia bibayi na tukuatshisheno tuabio tubaadi tua kiamo kia arja. 12 Kadi bua ku lupese lua kupona, bilamba biembeele bibaadi bula bua kude 50. Kubaadi dingi bibayi ekumi na bitako ekumi bitubule, na tupudikilo tua bibayi na tukuatshisheno bibaadi bia kiamo kia arja. 13 Bukata bua ku lupese lua kutunduka nguba, bubaadi bua kude 50. 14 Ku lupese lumune lua kituelelo, kubaadi kude 15 ya bilamba biembeele, na bibayi bisatu na bitako bisatu bitubule. 15 Na ku lungi lupese lua kituelelo kia lupango, kubaadi bilamba biembeele bi bula bua kude 15, na bibayi bisatu, na bitako bisatu bitubule. 16 Bilamba bioso biembeele bibaadi bifunyishe lupango, bibaadi bikitshibue na lin mukile buwa abadi balukie. 17 Bitako bitubule bua kutuesha bibayi bibaadi bia kiamo kia munyinga, tupudikilo tua bibayi na tukuatshisheno tuabio tubaadi tua kiamo kia arja, kunundu kuabio kubaadi kulamikibue kiamo kia arja, bibayi bioso bia ku lupango bibaadi na bia kukuatshishena nabio, bibaadi bia kiamo kia arja.

18 Kilamba kia ku kibelo kia lupango kibaadi kilukibue na buanda bui bulee, buanda bumongolokie, buanda bumonga pididii, lin mukile buwa abadi balukie. Kibaadi na bula bua kude 20 na bula bua muiyilu bua kude 5, bula buakio bubaadi bui mumune na bilamba biembeele ku lupango. 19 Bibayi biakio binanka na bitako biakio binanka bitubule, bibaadi bikitshibue na kiamo kia munyinga. Tupudikilo tuakio tubaadi tua kiamo kia arja, kunundu kuabio na tumitshi tuabio tua kukuatshishena nato, bibaadi bilamikibue ôlo. 20 Biluu bioso bia tabernakele na bia lupango bibaadi bia kiamo kia munyinga.

21 Bino mbintu bibaabadi bafubishe bua kuibaka tabernakele, tabernakele a Bukamonyi, bibabadi bakite muyile eyi dibaabadi batumine Moyise. Buno bubaadi bushito bua bena Levi ku bukunkushi bua Itamare muana a tshite muakuidi Alona. 22 Besalele muana a Uri, Uri namu muana a Ure a mu kisamba kia Yunda bakitshine bintu bioso bibaadi Yehowa mutumine Moyise eyi bua kukita. 23 Baadi na Oholiabe muana a Ahisamake a mu kisamba kia Dane. Oholiabe baadi nsendue, baadi asolo ku bilamba na buanda na kuluka bilamba na buanda bui bulee, buanda bumongolokie, buanda bumonga pididii na lin mukile buwa.

24 Ôlo oso ababaadi bafubishe bua midimo yoso ya pa mbalo ya kishila, baadi bungi bumune na ôlo a mulambu wa kupuka: ntalanta 29 na shekele 730 muyile kipimo kia shekele kia ku mbalo ya kishila. 25 Na bungi bua kiamo kia arja bua bantu boso ba mu kakongie babaabadi bafunde mashina, bubaadi bua ntalanta 100, na shekele 1 775 muyile kipimo kia shekele kia ku mbalo ya kishila. 26 Kipindi kia shekele bua muntu oso kibaadi kitshibiibue muyile kipimo kia shekele kia ku mbalo ya kishila bua muntu oso baadi munkatshi mua bana balume babaadi bafundibue mashina, kubanga pa bipua 20 na kunundu, bungi bua bantu boso bubaadi bua 603 550.

27 Babaadi bafubishe ntalanta 100 ya kiamo kia arja bua kukita bitako bitubule bia pa mbalo ya kishila, na kukita bitako bitubule bia kilamba kia lushiko; bitako bitubule 100 bibaadi bungi bui mumune na ntalanta 100, ntalanta umune bua kitako kioso kitubule. 28 Bakitshine tupudikilo tua bibayi na shekele 1 775, nkulamika kunundu kuabio kiamo kia arja na nkuibilamakasha pamune.

29 Mulambu* wa kiamo kia munyinga ubaadi wa ntalanta 710, na shekele 2 400. 30 Bakitshine nao bitako bitubule bia pa ntuelelo a kashibo k’epema ka kufumankena, kilambuilo kia kiamo kia munyinga, kasango kakio ka kiamo kia munyinga, na bintu bioso bia ku kilambuilo, 31 bitako bitubule bia ku lupango loso, bitako bitubule bia pa ntuelelo a lupango, biluu bioso bia tabernakele na biluu bioso bia lupango.

39 Babakitshine bilamba bilukibue kalolo bua mudimo wa mu mbalo ya kishila na buanda bui bulee, buanda bumongolokie, na buanda bumonga pididii. Babakitshine bilamba bia kishila bia Alona nka bu bibaadi Yehowa mulungule Moyise.

2 Bakitshine efode na ôlo, buanda bui bulee, buanda bumongolokie, buanda bumonga pididii, na lin mukile buwa abadi balukie. 3 Bababaatakeshe ôlo, abo nkumupeelesha ngofu, akupu aye nkuata yawa ôlo ababadi babaatakashe, nkukita tu mioshi bua kuitutueshakasha na buanda bui bulee, buanda bumongolokie, buanda bumonga pididii na lin mukile buwa, abo nkusola ku efode na buabua buanda. 4 Babakitshine bilamba bia ku mapampa bua kuibilamika ku efode, babaadi bebilamakashe ku masongo aabio abidi. 5 Na mukaba wabadi balukie, ulamikibue ku efode bua’shi alamate kalolo, ubaadi ukitshibue nka na biabia bintu bimune, ôlo, buanda bui bulee, buanda bumongolokie, buanda bumonga pididii na lin mukile buwa abadi balukie, nka bu bibaadi Yehowa mulungule Moyise.

6 Babelele mabue a onixe mu tukopo tua ôlo na abo nkuikutonkola mashina a bana ba Isalele, nka bu bi’abatonkolaa kitampi. 7 Beatudile pa mapampa a efode bu mabue a kitentekiesho bua bana ba Isalele, nka bu bibaadi Yehowa mulungule Moyise. 8 Akupu basolele pa kilamba kia pa kiadi na buanda nka bu bibaadi ku efode, na ôlo, buanda bui bulee, buanda bumongolokie, buanda bumonga pididii na lin mukile buwa abadi balukie. 9 Kibaadi bula bumune mpese yoso inanka p’abekikonyo pabidi. Babakitshine kilamba kia pa kiadi kibaadi bula na bukata bu’eyasa dibaale p’abekikonyo pabidi. 10 Babekulamikile milongo inanka ya mabue. Mulongo wa kumpala ubaadi n’ebue dia ribi, dia topaze na dia emerode. 11 Mulongo wa kabidi ubaadi n’ebue dia tirkuaze, safire na dia jaspe. 12 Mulongo wa kasatu ubaadi n’ebue dia lesheme, agate, na dia ametiste. 13 Na mulongo wa kananka ubaadi n’ebue dia krizolite, onixe, na dia jade. Abaadi edibue mu tukopo tua ôlo. 14 Mabue abaadi muyile mashina a bana 12 ba Isalele. Babaadi batonkole aa mashina nka bu ku kitampi, eshina dioso dibaadi adilesha kimune kia ku bisamba 12.

15 Akupu, babakitshine nkano ya ôlo e buwa ilukie bu kipaaba pa kilamba kia pa kiadi. 16 Na babakitshine tukopo tubidi tua ôlo na tukano tubidi tua ôlo, na abo nkulamika tuatua tukano tubidi ku masongo abidi a kilamba kia pa kiadi. 17 Kunyima babatueshele mioshi ibidi ya ôlo mu tukano tubidi ku mapaka a kilamba kia pa kiadi. 18 Akupu babatueshele nsongo ibidi ya mioshi mu tukopo tubidi, na nkuiyanya ku mapampa a efode dia kumpala. 19 Babakitshine’nyi tukano tubidi tua ôlo, abo nkuitutuesha ku mapaka abidi a kilamba kia pa kiadi, ku nsongo kua kipindi ki muushi, kitalene na efode. 20 Babakitshine tungi tukano tubidi tua ôlo, abo nkuitutula kumpala kua efode, kuushi kua mapampa abidi pepi na mbalo yabidi bifumankene, kunundu kua mukaba wa efode wabadi balukie. 21 Nfudiilo a bioso, babanyine kilamba kia pa kiadi na moshi wi bulee ubaadi aukidila ku tukano tuakio na mu tukano tua efode, bino bibaadi abikuasha bua’shi kilamba kia pa kiadi kishale pa efode kunundu kua mukaba wabadi balukie, nka bu bibaadi Yehowa mulungule Moyise.

22 Kunyima bakitshine musapi ushi na maboko wa efode, nka bu abikitaa muntu alukaa bilamba, ubaadi ukitshibue na buanda bui bulee ao oso ushima. 23 Muasa wa musapi ushi na maboko ubaadi munkatshi, nka bu muasa w’ekotshi dia tu biamo. Wawa muasa ubaadi na mutelo wiwifunyishe bua’shi tautanyikanga. 24 Akupu babakitshine tukuba tua grenade na buanda bui bulee, buanda bumongolokie na buanda bumonga pididii buabadi balukie pamune ku kikupa kia musapi ushi na maboko. 25 Babakitshine tu ngunga tua ôlo mukile buwa, abo nkuitutula munkatshi mua tukuba tua grenade, kuushi koso kua kikupa kia musapi ushi na maboko, munkatshi mua tukuba tua grenade; 26 babakitshine bia’shi ka ngunga kamune ka ôlo kekale akalondo kakuba ka grenade, ka ngunga kamune ka ôlo kalonde kakuba ka grenade, kuushi koso kua kikupa kia musapi ushi na maboko ubaabadi abafuala bua kukita nao mudimo, nka bu bibaadi Yehowa mulungule Moyise.

27 Babakitshine misapi ya lin mukile buwa bua Alona, na bana baye, ilukiibue kui muntu alukaa bilamba, 28 na babakitshine lubango na lin mukile buwa, na bilamba bia kuanya ku mutue bia lin e buwa biabadi balengieshe, na tuputula tua lin mukile buwa abadi balukie, 29 na mukaba ukitshibue na lin mukile buwa abadi balukie, buanda bui bulee, buanda bumongolokie, buanda bumonga pididii biabadi balukie pamune, nka bu bibaadi Yehowa mulungule Moyise.

30 Nfudiilo a bioso, abakitshine kalata ka ôlo e buwa akapenyapenya, kitunduilo kia kishila kia kuilambula kui Efile Mukulu, abo nkuikufunda nka bu bi’abatonkolaa ku kitampi’shi: “Buiselele mbua Yehowa.” 31 Babekuanyine moshi ukitshibue na buanda bui bulee, bua kumona bia kuikatula ku lubango, nka bu bibaadi Yehowa mulungule Moyise.

32 Midimo yoso ya tabernakele, kashibo k’epema ka kufumankena ibapuile, na bena Isalele babakitshine bioso bibaadi Yehowa mutumine Moyise eyi. Babakitshine nka biabia.

33 Akupu babafikile na tabernakele kui Moyise, epema na bintu biadio bioso: tukano tuadio, ma kadre adio, mitandalo yadio, bibayi biadio na bitako biadio bitubule; 34 kibuikilo kiaye kikitshibue na misokia ya mikooko ilume i n’elangi dimonga, kibuikilo kiaye kia misokia ya nkongie, kilamba kia lushiko; 35 mushete wa Bukamonyi na mitandalo yao, na mputo; 36 mesa na bintu biao bioso, na mikate ya kulesha; 37 kitudilo kia bimunyi kia ôlo mukile buwa, na bimunyi biakio bi mmulongo, na bintu biakio bioso, mpa na muimu wa kuela mu bimunyi; 38 kilambuilo kia ôlo, muimu wa kishila, kabanda ke mapembue e buwa, na kilamba kia kushika ku kituelelo kia nshibo y’epema; 39 kilambuilo kia kiamo kia munyinga na kasango kakio ka munyinga,* mitandalo yakio, bintu biakio bioso, elonga dikata na kitudilo kiadio; 40 bilamba bia kuembeelesha ku lupango, bibayi bialo na bitako bialo bitubule, kilamba kia kushika ku ntuelelo a lupango, mioshi yalo na biluu bialo, na bintu bioso bia kukita nabio mudimo ku tabernakele, bua kashibo k’epema ka kufumankena; 41 bilamba bilukibue kalolo bua mudimo wa mu mbalo ya kishila, bilamba bia kishila bia tshite muakuidi Alona, na bilamba bia bana baye buabadia kufuba bu ba tshite muakuidi.

42 Bena Isalele babakitshine wawa mudimo oso, muyile bioso bibaadi Yehowa mulungule Moyise. 43 Pabafikile Moyise mu kutala mudimo oso ubabakitshine, bamuene’shi mbakite bioso nka muyile bibaadi Yehowa mutume eyi; Moyise nkuibelela miabi.

40 Akupu Yehowa balunguile Moyise’shi: 2 “Muifuku dia kumpala dia mueshi wa kumpala, okashimika tabernakele, kashibo k’epema ka kufumankena. 3 Otuule mushete wa Bukamonyi muanka, na oshikiile Mushete na kilamba kia lushiko. 4 Abitungu wemutule mesa na kulonga bintu bioso bia ku mesa, wemutule kitudilo kia bimunyi na otembeshe bimunyi. 5 Akupu otuule kilambuilo kia ôlo bua kushiika kabanda* kumpala kua mushete wa Bukamonyi, na otule kilamba kia kushika ku kituelelo kia tabernakele.

6 “Okatulu kilambuilo kia milambu ya kushiika kaalo kumpala kua kituelelo kia tabernakele, kashibo k’epema ka kufumankena, 7 na okatulu elonga dikata pankatshi pa kashibo k’epema ka kufumankena na kilambuilo, wemuele mema. 8 Akupu wele lupango luifunyishe kashibo k’epema ka kufumankena na wele kilamba kia kushika ku kibelo kia lualua lupango. 9 Kunyima wate muimu wa kishila, wewele ku tabernakele na bintu bioso bi muanka, oyikashe tabernakele bu a kishila na bintu biaye bioso, bua’shi ekale bu kintu kia kishila. 10 Okele kilambuilo kia milambu ya kushiika kaalo na bintu biakio bioso muimu, na kuikikasha kia kishila, bua’shi kifikie kilambuilo kikile kishila. 11 Na wele elonga dikata na kitudilo kiadio muimu, wedikashe dia kishila.

12 “Akupu wetanyine Alona na bana baye ku kibelo kia kashibo k’epema ka kufumankena na webatumpe mema. 13 Ofuadikie Alona bilamba bia kishila, omuele muimu na omuikashe a kishila, akanfubila bu tshite muakuidi. 14 Kunyima wetamine bana baye balume na webafuadikie misapi. 15 Webeele muimu nka bu bioyikalanga muele nshabo, bua’shi bankitshine mudimo wa bu tshite muakuidi, na kuedibua kuabo kua muimu akukitshi bia’shi banfubile bu ba tshite muakuidi mu bipungo biabo bioso bua loso.”

16 Moyise bakitshine bioso bibaadi Yehowa mumutumine eyi. Bakitshine nka biabia.

17 Muifuku dia kumpala dia mueshi wa kumpala mu kipua kia kabidi, babashimikile tabernakele. 18 Pabashimikile Moyise tabernakele, bashimikile bitako biaye bitubule mu nsenga, aye nkushimika ma kadre, nkuela mitandalo, na nkushimika bibayi. 19 Babuikile epema ku tabernakele, aye nkutenteka kibuikilo ki’epema kunundu kua tabernakele, nka bu bibaadi Yehowa mulungule Moyise.

20 Kunyima batshile kashete ka Bukamonyi aye nkuikela mu Mushete, nkuela mitandalo ku Mushete na nkuikuela mputo. 21 Batueshele Mushete mu tabernakele, aye nkutuula kilamba kia lushiko na nkushika mushete wa Bukamonyi, nka bu bibaadi Yehowa mulungule Moyise.

22 Akupu batuudile mesa mu kashibo k’epema ka kufumankena, lupese lua kunundu kua tabernakele paasha pa kilamba kia lushiko, 23 na aye nkulonga mikate panka kumpala kua Yehowa, nka bu bibaadi Yehowa mulungule Moyise.

24 Batuudile kitudilo kia bimunyi mu kashibo k’epema ka kufumankena kumpala kua mesa, ku lupese lua kuushi lua tabernakele. 25 Batembeshe bimunyi kumpala kua Yehowa, nka bu bibaadi Yehowa mulungule Moyise.

26 Kunyima batuudile kilambuilo kia ôlo mu kashibo k’epema ka kufumankena kumpala kua kilamba kia lushiko, 27 bua kushiikila kabanda ke mapembue panka, nka bu bibaadi Yehowa mulungule Moyise.

28 Batuudile kilamba kia lushiko ku kibelo kia tabernakele.

29 Batuudile kilambuilo kia milambu ya kushiika kaalo pa kituelelo kia tabernakele, kashibo k’epema ka kufumankena, buadia kuikulambuila milambu ya kushiika kaalo na milambu ya ntete, nka bu bibaadi Yehowa mulungule Moyise.

30 Akupu batuudile elonga dikata pankatshi pa kashibo k’epema ka kufumankena na kilambuilo, na aye nkuimuela mema a kuitumpa. 31 Moyise mpa na Alona na bana baye abasudile maasa na ngua yabo paapa. 32 Nsaa yoso ibabaadi abatuele mu kashibo k’epema ka kufumankena sunga y’abeseesela pepi na kilambuilo, abaadi abetumpu mema, nka bu bibaadi Yehowa mulungule Moyise.

33 Nfudiilo a bioso, bayibakile lupango luifunyishe tabernakele na kilambuilo, na nkupudika kilamba kia lushiko ku kituelelo kia lupango.

Biabia Moyise bapuile mudimo. 34 Ekumbi dibabangile kubuikila kashibo k’epema ka kufumankena, na ntumbo ya Yehowa nkuula mu tabernakele. 35 Moyise ta bamuene bia kutuela mu kashibo k’epema ka kufumankena, muanda ekumbi dibaadi dimane kunundu kuako, na ntumbo ya Yehowa ibaadi iwule mu tabernakele.

36 Mu luendo luabo loso, pabebuanga ekumbi kunundu kua tabernakele, bena Isalele babaadi ababanga luendo.* 37 Kadi su ekumbi ta ndibuee, paapa tababaadi abende mpa na efuku di’adiboo. 38 Muanda ekumbi dia Yehowa dibaadi kunundu kua tabernakele mu kanya, na kaalo kabaadi akemana kunundu kua tabernakele bufuku, ku meso kua muilo ushima wa Isalele mu luendo luabo loso.