BENA LEVI

1 Na Yehowa nkuitanyina Moyise, nkuisamba naye kukatukila ku kashibo k’epema ka kufumankena, nkumulungula’shi: 2 “Esambe na bena Isalele, webalungule’shi, ‘Su muntu akiebe kutuusha mulambu kui Yehowa wa mu bimunuanga biaye, mmulombene kutuusha mulambu wa ku nyema yaye ikata sunga nyema yaye ipeela.

3 “‘Su mulambu waye mmulambu wa kushiika kaalo watshibue mu nyema yaye ikata, akatuusha muana a ngombe mulume shi na kalema. Akamutusha mu kukumiina kuaye’ye nabene kumpala kua Yehowa ku kituelelo kia kashibo k’epema ka kufumankena. 4 Akatuulu eyasa ku mutue wa mulambu wa kushiika, na abakamukuminyiina wanka bua kumubuikiila miluisho.

5 “‘Akupu, abitungu bayipee muana a ngombe mulume kumpala kua Yehowa, na ba tshite muakuidi bana ba Alona, abakalambula mase na beamiamine ku mpese yoso ya kilambuilo ki ku kituelelo kia kashibo k’epema ka kufumankena. 6 Abitungu kukaasha musokia ku mulambu wa kushiika kaalo, na nkuiutshiba bipindi-bipindi. 7 Ba tshite muakuidi bana ba Alona, abakakuatshisha kaalo ku kilambuilo na kulonga nteete ku kaalo. 8 Ba tshite muakuidi bana ba Alona, abakalongo bipindi bia nyema a mulambu na mutue, na muimu wi ku nfiyo, kunundu kua nteete i ku kaalo ke ku kilambuilo. 9 Mala aaye na bioko abakebisuula na mema, tshite muakuidi akebishiiki bioso kaalo pa kilambuilo bu mulambu wa kushiika kaalo, mulambu ushiikibue mu kaalo autusha mapembue e buwa kui Yehowa.

10 “‘Su mulambu waye watuusha bu mulambu wa kushiika kaalo nguatshibue mu nyema ipeela, mu mikooko yana ilume sunga mbushi, biabia akatuusha nyema mulume shi na kilema. 11 Abakamuipayila ku lupese lua kunundu lua kilambuilo kumpala kua Yehowa, na ba tshite muakuidi, bana ba Alona, abakamiamina mase aaye ku mpese yoso ya kilambuilo. 12 Akamutshibuula bipindi-bipindi, na tshite muakuidi akalongo bipindi biaye na mutue waye na muimu wi ku nfiyo, kunundu kua nteete i ku kaalo ke pa kilambuilo. 13 Akasuula mala na bioko na mema, na tshite muakuidi akebilambula bioso na kuibishiika kaalo ku kilambuilo. Mmulambu wa kushiika kaalo, mulambu ushiikibue mu kaalo autusha mapembue e buwa kui Yehowa.

14 “‘Kadi su balambula tonyi bu mulambu wa kushiika kaalo kui Yehowa, akatuusha mulambu waye wa tukutshi sunga tuana tua nkudimba. 15 Tshite muakuidi akekalambula ku kilambuilo, akekatshibi mudibu na ngala yaye, na kuikashiika mu kaalo bua’shi miishi ituukie ku kilambuilo, anka mase aako nga kupongoola ku lupese lua kilambuilo. 16 Akakaasha ediilo na mapushi, ebisumbule ku lupese lua kilambuilo dia kutunduka nguba, kuakua kui buto.* 17 Akekatanya pa mbaba kushi kuikatshibuula mu bipindi bibidi. Akupu, tshite muakuidi akekashiiki kaalo ku kilambuilo kunundu kua nteete i ku kaalo. Mmulambu wa kushiika kaalo, mulambu ushiikibue mu kaalo autusha mapembue e buwa kui Yehowa.

2 “‘Binobino, su muntu alambula Yehowa mulambu wa ntete, abitungu mulambu waye wikale wa bukula bui buwa, ekupongoole muimu na ekutentekie oliba. 2 Paapa akafiki nao kui ba tshite muakuidi bana ba Alona, na tshite muakuidi akaata eyasa diule dia bukula, na muimu na oliba oso, na akebishiiki kaalo ku kilambuilo, bu mulambu wa kitentekiesho kui Efile Mukulu, mulambu ushiikibue mu kaalo autusha mapembue e buwa kui Yehowa. 3 Biabia abishala ku mulambu wa ntete mbia Alona na bana baye, abikala bu kintu kikile kishila kia ku milambu ya Yehowa ishiikibue mu kaalo.

4 “‘Su otusha mulambu wa ntete wabadi bekiele mu nfuulo, abitungu wikale ukitshibue na bukula bui buwa, mikate ishi kitatusho i bu nkata yabadi basangie na muimu na galete ishi kitatusho yabadi bashingie muimu.

5 “‘Su mulambu oobe ngua ntete ikangie mu mpano, abitungu kuiukita na bukula bui buwa, busangie na muimu kushi kuela kitatusho. 6 Abitungu kuiutshiba tupese-tupese, na okapongoola muimu kunundu kuao. Nyi mmulambu wa ntete.

7 “‘Su mulambu oobe mmulambu wa ntete uteekibue mu lueso, abitungu ukitshibue na bukula bui buwa na muimu. 8 Okatuala mulambu wa ntete ukitshibue na bino bintu kui Yehowa, na abakeupa tshite muakuidi akende nao pepi na kilambuilo. 9 Na tshite muakuidi aata ndambo ya mulambu wa ntete, bu mulambu wa kitentekiesho kui Efile Mukulu, na akeushiiki kaalo ku kilambuilo, bu mulambu ushiikibue mu kaalo autusha mapembue e buwa kui Yehowa. 10 Biabia abishala ku mulambu wa ntete mbia Alona na bana baye, abikala bu kintu kikile kishila kia ku milambu ya Yehowa ishiikibue mu kaalo.

11 “‘Mulambu wa ntete su ngumune oolambula Yehowa ta ngulombene kuedibua kitatusho, muanda tuemulombene kushiika kitatusho sunga buuki bu mulambu ushiikibue mu kaalo bua Yehowa.

12 “‘Nui kuibilambula Yehowa bu mulambu wa biumbuluanga bia kumpala, kadi ta nui balombene kufika nabio ku kilambuilo bu mulambu wa mapembue e buwa.*

13 “‘Milambu yoso ya ntete y’okatuusha, abitungu ikale yeele mungua; okite bia’shi mungua wa kilombeno ki’Efile Mukulu oobe, taukutuanga mu milambu yobe ya ntete. Okatuusha milambu yobe yoso ya ntete na mungua.

14 “‘Su otusha mulambu wa ntete wa biumbuluanga biobe bia kumpala kui Yehowa, okatuusha ntete ikii ipia yabadi bakangie, ntete ikii ipia yabadi batue batshibusha kalolo, bu mulambu wa ntete wa biumbuluanga biobe bia kumpala. 15 Okapongoola muimu kunundu, na okatuulu oliba kunundu. Mmulambu wa ntete. 16 Tshite muakuidi akebishiiki mu kaalo bu mulambu wa kitentekiesho kui Efile Mukulu, kuamba’shi, ndambo ya ntete yabadi batue na muimu mpa na oliba oso, bu mulambu wabadi bashiikie mu kaalo bua Yehowa.

3 “‘Su mulambu waye mmulambu wa butaale, na su mmuiwate mu nyema yaye ikata, biabikala nyema mulume sunga nyema mukashi, abitungu atuushe nyema shi na kilema kumpala kua Yehowa. 2 Akatuulu eyasa ku mutue wa mulambu waye, na abakewipaa ku kituelelo kia kashibo k’epema ka kufumankena; ba tshite muakuidi, bana ba Alona abamiamina mase ku mpese yoso ya kilambuilo. 3 Akatuusha kipindi kia mulambu wa butaale bu mulambu ushiikibue mu kaalo bua Yehowa: muimu wi ku mala, muimu oso ulamate ku mala, 4 na nfiyo ibidi na muimu wayo bi pepi na kibala. Akatusha’nyi muimu wi kuishimba mpa na nfiyo. 5 Bana ba Alona abakebishiiki kaalo ku kilambuilo, kunuundu kua mulambu wa kushiika kaalo utudiibue ku nteete i ku kaalo; mmulambu ushiikibue mu kaalo autusha mapembue e buwa kui Yehowa.

6 “‘Su mulambu waye nguatshibue mu nyema ipeela bu mulambu wa butaale kui Yehowa, abitungu atuushe nyema mulume sunga nyema mukashi shi na kalema. 7 Su mulambu walambula ngua mukooko wana ulume, akeutusha kumpala kua Yehowa. 8 Akatuulu eyasa ku mutue wa mulambu waye, na abakewipaa kumpala kua kashibo k’epema ka kufumankena. Bana ba Alona abakamiamina mase ao, ku mpese yoso ya kilambuilo. 9 Akatuusha muimu wa mulambu wa butaale bu mulambu ushiikibue mu kaalo bua Yehowa. Akakaasha mukila oso ushima wi muimu wi pepi na mongo, na muimu oso ulande ku mala, mpa na muimu oso ulamate ku mala, 10 na nfiyo ibidi na muimu wayo bi pepi na kibala. Akatusha’nyi muimu wi kuishimba mpa na nfiyo. 11 Tshite muakuidi akebishiiki mu kaalo ku kilambuilo bu bia kudia,* mmulambu ushiikibue mu kaalo bua Yehowa.

12 “‘Su atuusha mbushi bu mulambu waye, paapa akamutusha kumpala kua Yehowa. 13 Akatuulu eyasa diaye pa mutue wa yawa mbushi, na abakamuipaa kumpala kua kashibo k’epema ka kufumankena; abitungu bana ba Alona bamiamine mase aaye ku mpese yoso ya kilambuilo. 14 Kipindi ki’akatuusha bu mulambu ushiikibue mu kaalo bua Yehowa, mmuimu ulande ku mala, muimu oso ulamate ku mala, 15 na nfiyo ibidi na muimu wayo bi pepi na kibala. Akatusha’nyi muimu wi kuishimba mpa na nfiyo. 16 Tshite muakuidi akebishiiki mu kaalo ku kilambuilo bu bia kudia, mmulambu ushiikibue mu kaalo autusha mapembue e buwa. Muimu oso ngua Yehowa.

17 “‘Ta nui balombene kudia muimu sunga ngupeela, sunga mase: Uno mmuiya bua loso mu bipungo bienu bioso, koso kuanukashala.’”

4 Yehowa balunguile’nyi Moyise’shi: 2 “Lungula bena Isalele’shi, ‘Su muntu akita muluisho kushi mu kukumiina kuaye, p’aye kukita muanda wabadi bapele kui Yehowa:

3 “‘Su tshite muakuidi muedibue muimu akita muluisho na ekasha muilo bu utopekibue, paapa akalambula Yehowa muana a ngombe mulume shi na kilema bu mulambu wa muluisho bua muluisho wadi mukite. 4 Akafiki na yawa ngombe mulume ku kituelelo kia kashibo k’epema ka kufumankena kumpala kua Yehowa, na atuule eyasa diaye ku mutue waye, akamuipaa kumpala kua Yehowa. 5 Kunyima, tshite muakuidi muedibue muimu aata ndambo ya mase a yawa ngombe mulume, atuele nao mu kashibo k’epema ka kufumankena; 6 akasabika munue waye mu mase na kumiamina ndambo ya mase misango musambobidi kumpala kua Yehowa, kumpala kua kilamba kia lushiko kia mu mbalo iselele. 7 Tshite muakuidi akeele’nyi ndambo ya mase ku nsengua ya kilambuilo kia kabanda akatuusha mapembue e buwa ki kumpala kua Yehowa, mu kashibo k’epema ka kufumankena; na akapongoola mase oso a ngombe abashala kuushi kua kilambuilo kia milambu ya kushiika kaalo ki ku kituelelo kia kashibo k’epema ka kufumankena.

8 “‘Akupu, akakaasha muimu oso wa ngombe mulume a mulambu wa muluisho mpa na muimu ulande ku mala, na muimu ulamate ku mala, 9 na nfiyo ibidi na muimu wayo bi pepi na kibala. Akatusha’nyi muimu wi kuishimba mpa na nfiyo. 10 Abikekala mumune na biabia biabadi bakatushe ku ngombe mulume a mulambu wa butaale. Tshite muakuidi akebishiiki kaalo ku kilambuilo kia milambu ya kushiika kaalo.

11 “‘Kadi musokia wa yawa ngombe mulume na muita waye oso pamune na mutue, bioko, mala na tufi— 12 kuamba’shi, bioso bibashala bia ku yawa ngombe mulume—akebisemusha mpa na paasha pa kishalelo ku mbalo yabaadi balumbuule, kuakua ku’abasumbuilaa buto,* na akebishiiki kaalo. Akebishiikila ku mbalo yabasumbuilaa buto.

13 “‘Binobino su kakongie kashima ka Isalele kayikala kapiile pa kukita muluisho kushi mu kukumiina kuabo, na kakutua kutundula’shi mbakite kintu kiabadi bebakandikie kui Yehowa, 14 nsaa ayiukibua muluisho, paapa abitungu kakongie katushe muana a ngombe mulume bu mulambu wa muluisho, na bafikie naye kumpala kua kashibo k’epema ka kufumankena. 15 Bakulu ba kakongie abakatuulu maasa ku mutue kua yawa ngombe mulume kumpala kua Yehowa, na abakamuipaa kumpala kua Yehowa.

16 “‘Akupu, tshite muakuidi muedibue muimu akatuele na ndambo ya mase a yawa ngombe mu kashibo k’epema ka kufumankena. 17 Tshite muakuidi akasabika munue waye mu mase na kumiamina ndambo ya mase misango musambobidi kumpala kua Yehowa, kumpala kua kilamba kia lushiko. 18 Kunyima akeele ndambo ya mase ku nsengua ya kilambuilo ki kumpala kua Yehowa, ki mu kashibo k’epema ka kufumankena; na akapongoola mase oso abashala kuushi kua kilambuilo kia milambu ya kushiika kaalo, ki ku kituelelo kia kashibo k’epema ka kufumankena. 19 Akakaasha muimu oso na kuiushiika kaalo ku kilambuilo. 20 Akakitshi na uno ngombe nka biabia biakitshine na ungi ngombe a mulambu wa muluisho. Biabia nyi abikakitshi tshite muakuidi bua kubuikila miluisho yabo, na abakafuidiibua lusa. 21 Akasemusha yawa ngombe mpa na paasha pa kishalelo na kumushiika kaalo, nka bu biashiikile ngombe a kumpala kaalo. Mmulambu wa muluisho bua kakongie.

22 “‘Su nfumu bakitshi muluisho kushi mu kukumiina kuaye, p’aye kukita umune wa ku mianda yoso yabadi bakandikie kui Yehowa Efile Mukulu aaye, na bekala bu mupiile,* 23 sunga’shi su batundula muluisho wadi mukite bua muiya kampanda wadi muipee, paapa abitungu atushe kipembue kiana kishi na kilema bu mulambu. 24 Akatuulu eyasa ku mutue wa kiakia kipembue kiana na kuikipaa mu mbalo yabayipayilaa mulambu wa kushiika kaalo kumpala kua Yehowa. Mmulambu wa muluisho. 25 Tshite muakuidi akaata ndambo ya mase a mulambu wa muluisho ku munue waye, eele ku nsengua ya kilambuilo kia milambu ya kushiika kaalo, na akapongoola mase oso abashala kuushi kua kilambuilo kia milambu ya kushiika kaalo. 26 Akashiiki muimu waye oso ku kilambuilo nka bu biashiikile muimu wa mulambu wa butaale; paapa tshite muakuidi akatekie bua’shi bamubuikiile muluisho waye, na abakamufuila lusa.

27 “‘Su muntu kampanda a ku bantu bashale muiumbo akita muluisho kushi mu kukumiina kuaye, na ayikala mupiile pa kukita umune wa ku mianda yabadi bakandikie kui Yehowa, 28 sunga’shi atundula muluisho wadi mukite, paapa abitungu atuale mbushi mukashi ki muana shi na kilema bu mulambu wa muluisho wadi mukite. 29 Akatuulu eyasa ku mutue wa mulambu wa muluisho na kuipaa wawa mulambu wa muluisho mu mbalo imune na mulambu wa kushiika kaalo. 30 Tshite muakuidi akaata ndambo ya mase ku munue waye, eyele ku nsengua ya kilambuilo kia milambu ya kushiika kaalo, na akapongoola mase oso abashala kuushi kua kilambuilo. 31 Akakasha muimu oso nka bu biabakashaa muimu ku mulambu wa butaale, na tshite muakuidi akeushiiki kaalo ku kilambuilo buaudia kutuusha mapembue e buwa kui Yehowa; tshite muakuidi akakitshi bia’shi muluisho waye ubuikiilue, na abakamufuila lusa.

32 “‘Kadi su akiebe kutuusha muana a mukooko bu mulambu wa muluisho, abitungu atuale mukooko wana ukashi ushi na kalema. 33 Akatuulu eyasa diaye ku mutue wa wawa mulambu wa muluisho na kuiwipaa bu mulambu wa muluisho pa mbalo yabayipayilaa mulambu wa kushiika kaalo. 34 Tshite muakuidi akaata ndambo ya mase a mulambu wa muluisho ku munue waye, eyele ku nsengua ya kilambuilo kia mulambu wa kushiika kaalo, na akapongoola mase oso abashala kuushi kua kilambuilo. 35 Akakasha muimu oso nka bu biabakashaa muimu wa mukooko wana ulume wa mulambu wa butaale, na tshite muakuidi akeushiiki kaalo ku kilambuilo kunundu kua milambu ya Yehowa ishiikibue mu kaalo; paapa tshite muakuidi akakitshi bia’shi muluisho waye wadi mukite ubuikiilue, na abakamufuila lusa.

5 “‘Su muntu auku muanda kampanda sunga’shi mmumone muanda kampanda kuaukitshika, kadi tamuiwakule, bakitshi muluisho, na wawa muluisho wi pa mapampa aaye.

2 “‘Sunga’shi su muntu akuma kintu kampanda ki butete, sunga kitanda kia nyema a kisuku e butete, sunga kitanda kia nyema a paasha, sunga kitanda kia kamune ka ku tunyema atutambukaa mu bisaka, yawa muntu ekala e butete, na ekala mupiile sunga biekala’shi tauku. 3 Su muntu akuma butshiafu bua muntu kushii kuuka, kuamba’shi kintu kioso ki butete kilombene kumuikasha bu e butete, na nsaa yauku wawa muanda ekala mupiile.

4 “‘Sunga’shi su muntu etshipa bua kukita muanda kampanda kushi’ye kunangushena kumpala, biawikala wi buwa sunga wi bubi, sunga wekala wi naminyi, na teukanga, kadi bafiki mu kutundula’shi ekalanga muitshipe kushii kuela binangu, paapa ekala mupiile.

5 “‘Su ekala mupiile mu umune wa ku ino mianda, paapa abitungu atonde muluisho wadi mukite. 6 Afiki’nyi na mulambu waye wa kushimisha nao miluisho kui Yehowa bua muluisho waye wadi mukite, kuamba’shi nyema mukashi a ku nyema yaye, biabikala mukooko ukashi sunga mbushi mukashi ki muana, bu mulambu wa muluisho. Paapa tshite muakuidi akakitshi bia’shi muluisho waye ubuikiilue.

7 “‘Su ta mulombene kupeta mukooko, paapa abitungu afikie na tukutshikutshi tubidi sunga tuana tua nkudimba tubidi kui Yehowa bu mulambu wa kushimisha nao miluisho, kamune bu mulambu wa muluisho, kangi kamune bu mulambu wa kushiika kaalo. 8 Akende nato kui tshite muakuidi, na tshite muakuidi akatuusha kamune bu mulambu wa muluisho, akekatshibi mudibu na ngala yaye, kadi kushi kuiutukula. 9 Akamiamina ndambo ya mase a mulambu wa muluisho ku mpese ya kilambuilo, kadi mase oso aashala, eapongoole kuushi kua kilambuilo. Mmulambu wa muluisho. 10 Akatuusha kaka kangi koonyi bu mulambu wa kushiika kaalo muyile biabakitaa mafuku oso; na tshite muakuidi akakitshi bia’shi muluisho waye ubuikiilue, abakabuikiila muluisho wadi mukite.

11 “‘Kadi su te na mushindo wa kufika na tukutshikutshi tubidi sunga tuana tua nkudimba tubidi bu mulambu wa muluisho waye, abitungu afikie na ki’ekumi kia efa kia bukula bui buwa bu mulambu bua muluisho wadi mukite. Ta mulombene kuimuela muimu sunga kutenteka oliba kunundu, muanda mmulambu wa muluisho. 12 Akende nabio kui tshite muakuidi, na tshite muakuidi akemuata eyasa dia bukula buadidia kuikala bu mulambu, na akebushiiki ku kilambuilo kunundu kua milambu ya Yehowa ishiikibue mu kaalo. Mmulambu wa muluisho. 13 Tshite muakuidi akakitshi bia’shi muluisho waye wadi mukite ubuikiilue, muluisho oso wa ku ino miluisho, na abakamubuikiila uanka. Biabia bioso bibashala bia ku mulambu abikala bia tshite muakuidi, nka bu biabikalaa bua mulambu wa ntete.’”

14 Yehowa batungunukile na kuisamba na Moyise, amba’shi: 15 “Su muntu akutua lulamato p’aye kuipaa muiya utale bintu bia kishila bia Yehowa, paapa atuadila Yehowa mukooko ulume ushi na kilema watshibue mu nyema yaye ipeela, bu mulambu wa kushimisha nao miluisho; muulo wao wa shekelea kiamo kia arja awikala muyile kipimo kia shekele kia mu mbalo ya kishila. 16 Na akafutu’nyi bua muluisho wadi mukitshine mbalo ya kishila, na akakumbasha kia mbitano kia wawa muulo. Akebipa tshite muakuidi, bua’shi tshite muakuidi akite bia’shi muluisho waye ubuikidibue na mukooko ulume wa mulambu wa kushimisha nao miluisho, na muluisho waye aukabuikiilua.

17 “‘Su muntu kampanda akita muluisho pa kukita kimune kia ku bintu biabadi bambe kui Yehowa’shi ta mbalombene kuibikita, sunga biekala’shi mmuiukite kushi’ye kuuka, mmupiile, na wawa muanda awikala pa mapampa aaye. 18 Abitungu afikie na mukooko ulume ushi na kilema watshibue mu nyema yaye ipeela kui tshite muakuidi, muyile muulo wabatshibi bu mulambu wa kushimisha nao miluisho. Paapa tshite muakuidi akakitshi bia’shi muluisho wadi mukite kushi’ye kuuka ubuikiilue, na wawa muluisho aukabuikiilua. 19 Nyi mmulambu wa kushimisha nao miluisho. Yawa muntu mmupiile binyibinyi muanda bakitshina Yehowa muluisho.”

6 Yehowa nkulungula dingi Moyise’shi: 2 “Su muntu akita muluisho na akutua lulamato kui Yehowa, p’aye kudimba muinaye pabitale kintu kampanda kibaabadi bamupe bua kulama, sunga’shi ayiba sunga kuata kintu kia muinaye pa bukopo, 3 sunga’shi mmusangule kintu kibaadi kishimine na adimbi pabitale kiakia kintu, na su pabitale yaya miluisho yoso i biabia akita mutshipo wa madimi pabitale muluisho wadi mukite, kiadi mulombene kukita nkino: 4 Su mmukite muluisho na mmupiile, abitungu alushe kiakia kibaadi muibe, sunga kiadi munyengie, sunga kiakia kiadi mupete p’aye kudimbishena, sunga kintu kibaabadi batudishe kuadi, sunga kiakia kibaadi kishimine kiadi musangule, 5 sunga kintu kioso kibaadi mukitshine mutshipo wa madimi, na abitungu afute kiakia kintu kioso kishima, na kukumbasha kia mbitano kia muulo wa kiakia kintu. Akekipa sha kintu muifuku di’abatundula’shi mmupiile. 6 Na akafiki na mukooko ulume ushi na kilema watshibue mu nyema yaye ipeela kui tshite muakuidi bua kuiulambula Yehowa, bu mulambu wa kushimisha nao miluisho muyile muulo wabadi batshibe. 7 Tshite muakuidi akakitshi bia’shi muluisho waye ubuikiilue kumpala kua Yehowa, na abakamufuila lusa bua muanda oso wadi mukite, umuikashe bu mupiile”

8 Yehowa batungunukile na kuisamba na Moyise, amulungula’shi: 9 “Tumina Alona na bana baye balume eyi’shi, ‘Talayi muiya pabitale mulambu wa kushiika kaalo: Mulambu wa kushiika kaalo aukashala ku kilambuilo bufuku bushima mpa na ku nakashika, na abitungu bekale abashisakanya kaalo ku kilambuilo. 10 Tshite muakuidi akafuala kilamba kiaye kia kishila kia lin, na kufuala kaputula ka muushi ka lin bua kushikiila mbidi yaye. Akupu akakasha buto bua mulambu wa kushiika ku kilambuilo, na akebutuulu ku lupese lua kilambuilo. 11 Kunyima, akafuulu bilamba biaye, afuale bingi bilamba, na akende na buto ku mbalo yabadi balumbuule, paasha pa kishalelo. 12 Abakashisakanya kaalo ku kilambuilo, muanda t’abitungu’shi kashime nya. Tshite muakuidi akekulongo nteete ku nakashika koso, na kutuula mulambu wa kushiika kunundu, na akekushiikila miimu ya mulambu wa butaale. 13 Abekala abashisakanya kaalo ku kilambuilo nsaa yoso. T’abitungu’shi kashime nya.

14 “‘Binobino, talayi muiya pabitale milambu ya ntete: Bana ba Alona abekala abeyilambula kumpala kua Yehowa, kumpala kua kilambuilo. 15 Umune a kuabadi akaata mu mulambu wa ntete, eyasa diule dia bukula bui buwa, na ndambo yabo ya muimu, na oliba oso e kunundu kua mulambu wa ntete, akebishiiki kaalo ku kilambuilo bua’shi bitushe mapembue e buwa bu mulambu wa Yehowa. 16 Alona na bana baye abakadi biabia abishala. Abakebidi na mikate ishi kitatusho pa mbalo ya kishila. Abakeyidiila mu lupango lua kashibo k’epema ka kufumankena. 17 T’abitungu kuibiekiela na kintu su nkimune ki na kitatusho. Ne muibape bua’shi bikale bu kiabo kipindi kia ku milambu ya ntete yabadi bashiikie kaalo. Nyi nkintu kikile kishila, nka bu mulambu wa muluisho na bu mulambu wa kushimisha nao miluisho. 18 Muana mulume oso a ku bana balume ba Alona akebidi. Abikekala bu kiabo kipindi kia ku milambu ishikiibue mu kaalo ya Yehowa munda mua bipungo na bipungo. Kintu kioso akikumu ku yaaya milambu akikala namu kia kishila.’”

19 Yehowa nkulungula dingi Moyise’shi: 20 “Uno nyi mulambu wabakalambula Yehowa kui Alona na bana baye muifuku di’abamuele muimu: Ki’ekumi kia efa kia bukula bui buwa bu mulambu wa ntete wabatushaa pa kiubishi, abakatuusha kipindi ku nakashika na kingi kipindi ku kiolua. 21 Aukakitshibua na muimu mu mpano. Okeusanga kalolo na muimu na weutushe bipese-bipese bu mulambu wa ntete ukangibue, autusha mapembue e buwa kui Yehowa. 22 Tshite muakuidi muedibue muimu a ku bana baye akamupiana nyi akebikitshi. Awikala muiya wa loso: Abakeulambula oso ushima buaudia kutuusha miishi kui Yehowa. 23 Mulambu oso wa ntete wabapa tshite muakuidi abitungu wikale mulambu oso ushima. T’abitungu kuiudia nya.”

24 Yehowa besambile dingi na Moyise, amulungula’shi: 25 “Lungula Alona na bana baye’shi, ‘Uno nyi muiya wa mulambu wa muluisho: Pa mbalo yabadi bayipayile mulambu wa kushiika kaalo nyi pabakayipayila namu mulambu wa muluisho kumpala kua Yehowa. Nyi nkintu kikile kishila. 26 Tshite muakuidi akeulambula bua muluisho nyi akeudi. Akeudiila pa mbalo ya kishila, mu lupango lua kashibo k’epema ka kufumankena.

27 “‘Kintu kioso akikumu wawa mulambu akifiki kia kishila, na muntu oso amiamina ndambo ya mase a wawa mulambu ku kilamba kiaye, abitungu otumpe yaya mbalo imiaminue mase pa mbalo ya kishila. 28 Su bekeele beuteekiele mu lueso lua buma, abitungu kuilutanya. Kadi su bekeele beuteekiele mu lueso lua kiamo kia munyinga,* paapa abitungu kuilukunya na kuilutumpa na mema.

29 “‘Muana mulume oso a munkatshi mua ba tshite muakuidi akeudi. Nyi nkintu kikile kishila. 30 Anka ta mbalombene kudia mulambu wa muluisho su mbatuale ndambo ya mase ao mu kashibo k’epema ka kufumankena bua kubuikila miluisho pa mbalo ya kishila. Abitungu kuiushiika kaalo.

7 “‘Uno nyi mmuiya wa mulambu wa kushimisha nao miluisho: Nyi nkintu kikile kishila. 2 Abakepayila mulambu wa kushimisha nao miluisho pa mbalo yabepayilaa milambu ya kushiika kaalo, na abitungu kushinga mase ao ku mpese yoso ya kilambuilo. 3 Tshite muakuidi akatuusha muimu oso pamune na mukila wi muimu, na muimu wi ku mala, 4 na nfiyo ibidi na muimu wayo wi pepi na kibala. Akatusha’nyi muimu wi kuishimba mpa na nfiyo. 5 Tshite muakuidi akebishiiki mu kaalo ku kilambuilo bu mulambu ushikiibue mu kaalo bua Yehowa. Nyi mmulambu wa kushimisha nao miluisho. 6 Muana mulume oso muikale tshite muakuidi akeudi, na abitungu kuiudia pa mbalo ya kishila. Nyi nkintu kikile kishila. 7 Muiya utale mulambu wa muluisho ngutale’nyi mulambu wa kushimisha nao miluisho; muita wa yawa nyema abalambula awikala wa tshite muakuidi beufubisha bua kubuikiila miluisho.

8 “‘Nsaa i tshite muakuidi atusha mulambu wa kushiika kaalo bua muntu kampanda, kikoba kia mulambu wa kushiika kaalo wabapanga tshite muakuidi akikala kiaye.

9 “‘Mulambu oso wa ntete wabekieela mu nfuulo sunga wabatekiela mu lueso, sunga mu mpano ngua tshite muakuidi eulambulanga. Aukafiki bu waye. 10 Kadi bua mulambu oso wa ntete wabadi basangie na muimu, sunga uume awikala wa bana boso ba Alona; muana oso akapete bungi bui mumune.

11 “‘Binobino uno nyi mmuiya bua mulambu wa butaale ulombene muntu kutuusha bua Yehowa: 12 Su beutusha bu mushindo wa kulesha lutumbu, akeutusha pamune na mulambu wa lutumbu, na mikate ishi kitatusho i bu nkata ifunte mu muimu, na galete ishi kitatusho yabadi bashingie muimu, na mikate i bu nkata ikitshibue na bukula bui buwa, isangie kalolo na yabadi bafunte na muimu. 13 Akatuusha mulambu waye pamune na mikate i bu nkata yele kitatusho na milambu yaye ya butaale yatusha bua kulesha lutumbu. 14 Ku wawa mulambu akaata umune wa ku mikate yoso bua kuiutusha bu kipindi kia kishila kui Yehowa; akikala bu kipindi kia tshite muakuidi miaminanga mase a mulambu wa butaale. 15 Muita wa mulambu waye wa butaale watusha bua kulesha lutumbu abitungu kuiudia nka mu diadia efuku di’eulambula. Ta mulombene kulama kantu su nkapeela ka ku wanka mpa na ku nakashika.

16 “‘Su mulambu waye watusha, mmutshipo sunga mulambu wa mu kukumiina kuaye, abitungu kuiudia nka mu diadia efuku dieulambula, na biabia abishala mbalombene’nyi dingi kuibidia muifuku adilondo. 17 Kadi muita wa ku wawa mulambu aushala mpa na kuifuku dia kasatu, abitungu kuiushiika mu kaalo. 18 Anka, su baadia muita wa mulambu waye wa butaale muifuku dia kasatu, yawa eutushile t’abakamukumiina nya. Na t’aukabadikiibua’nyi buaye; muanda nkintu ki butete, na muntu adi wawa mulambu asemuna bushito bua kilema kiaye. 19 Muita aukakumu ku kintu ki butete t’aukadibua nya. Abitungu kuiutatshisha kaalo. Muntu oso a kishila abitungu adie muita ushi butete.

20 “‘Kadi muntu oso e butete adi muita wa ku mulambu wa butaale wa Yehowa, abitungu kumukaasha* munkatshi mua muilo waye. 21 Su muntu akuma kintu ki butete, biabikala butshafu bua muntu, sunga nyema e butete, sunga kintu kioso ki butete, kadi adia muita wa ku mulambu wa butaale wa Yehowa, abitungu kukaasha yawa muntu munkatshi mua muilo waye.’”

22 Yehowa nkulungula dingi Moyise’shi: 23 “Lungula bena Isalele bino, ‘Ta nui balombene kudia muimu su ngumune wa ngombe, wa mukooko wana ulume, sunga wa mbushi. 24 Muimu wa nyema anudi bapete mufue sunga muimu wa nyema abaadi bayipee kui ungi nyema, nuibalombene kuiufubisha bioso bianukumiina, anka ta nui balombene kuiudia. 25 Muanda yawa adi muimu wa nyema aalambula Yehowa bu mulambu wa kushiika, abitungu kumukaasha munkatshi mua muilo waye.

26 “‘Ta nui balombene kudia mase a kintu su nkimune mu ma mbalo oso anukashala, biabikala mase a toonyi sunga a nyema. 27 Muanda muntu oso adi mase a mushindo oso wawa, abitungu kumukaasha munkatshi mua muilo waye.’”

28 Yehowa nkulungula dingi Moyise’shi: 29 “Lungula bena Isalele’shi: ‘Yawa afiki na mulambu waye wa butaale kui Yehowa, akatuusha kipindi kia mulambu waye wa butaale bua kuikilambula kui Yehowa. 30 Akafiki na muimu mpa na kiadi mu maasa aaye bua kuibilambula Yehowa bu mulambu ushikiibue mu kaalo, na akebipuku aku-naku bu mulambu wa kupuka kumpala kua Yehowa. 31 Tshite muakuidi akashiiki muimu ku kilambuilo, kadi kiadi akikekala kia Alona na bana baye.

32 “‘Ku mulambu wenu wa butaale, anukapa tshite muakuidi kioko kibalume bu kipindi kia kishila. 33 Muana a Alona atuusha mase a mulambu wa butaale na muimu, akaata kioko kia mukoolo ubalume bu kiaye. 34 Muanda ku milambu ya butaale ya bena Isalele nakaata kiadi kiabadi balambule bu mulambu wa kupuka aku na’ku na kioko kiabadi balambule bu kipindi kia kishila, bua kuikipa tshite muakuidi Alona na bana baye. Bino abikala bu muiya wa loso bua bena Isalele.

35 “‘Kino nyi kibaadi kipindi kia ku milambu ya Yehowa ishikiibue mu kaalo kibaadi kitudibue ku lupese bua ba tshite muakuidi, bua Alona na bana baye, muifuku dibaabadi bebatuule buabadia kufubila Yehowa bu ba tshite muakuidi. 36 Yehowa balunguile bena Isalele buabadia kuibapa kino kipindi, muifuku dibaabadi bebele muimu. Nyi mmuiya wa loso munda mua bipungo na bipungo.’”

37 Uno muiya ngutale mulambu wa kushiika kaalo, mulambu wa ntete, mulambu wa muluisho, mulambu wa kushimisha nao miluisho, mulambu wa kutudibua ku mudimo, na mulambu wa butaale, 38 nka bu bibaadi Yehowa mulungule Moyise ku muengie wa Sinayi, muifuku dibaadi mulungule bena Isalele buabadia kutuadila Yehowa milambu yabo mu kabaaka ka Sinayi.

8 Yehowa batungunukile na kuisamba na Moyise, amulungula’shi: 2 “Ata Alona na bana baye, na bilamba, na muimu wa kishila, ngombe a mulambu wa muluisho, mikooko ibidi ilume, na kiseele ki na mikate ishi yele kitatusho, 3 na obungie muilo oso pamune ku kituelelo kia kashibo k’epema ka kufumankena.”

4 Paapa Moyise bakitshine’nka bibaadi Yehowa mumulungule, na muilo nkuibunga pamune ku kituelelo kia kashibo k’epema ka kufumankena. 5 Akupu Moyise nkulungula muilo’shi: “Bino nyi bibetulungula Yehowa buatudia kukita.” 6 Paapa Moyise nkuitanyina Alona na bana baye, nkuibatumpa mema. 7 Kunyima bafuadikile Alona musapi, nkumuanya mukaba mu kifuka, nkumufuadika musapi ushi na maboko na efode, na nkuanyina efode na mukaba ulukiibue wa efode buadia kulamata kalolo. 8 Akupu bamufuadikile kilamba kia pa kiadi, na nkutuula Urime na Tumime pa kilamba kia pa kiadi. 9 Bamufuadikile’nyi lubango ku mutue, na aye nkulamika kumpala kua lubango kalata kabaadi akapenyapenya ka ôlo, kitunduilo kia kishila kia kuilambula kui Efile Mukulu, nka bu bibaadi Yehowa mulungule Moyise.

10 Kunyima, Moyise batshile muimu wa kishila aye nkuiwela ku tabernakele na ku bioso bibaadi muanka, nkuibikasha bia kishila. 11 Akupu, aye nkushinga ndambo ya wawa muimu ku kilambuilo misango musambobidi, na nkuela kilambuilo muimu na bintu biakio bioso, n’elonga dikata na kitudilo kiadio bua kuibikasha bia kishila. 12 Nfudiilo a bioso, aye nkupongoola ndambo ya muimu wa kishila mu mutue wa Alona, na nkumuela muimu bua kumuikasha a kishila.

13 Kunyima Moyise bayitamine bana ba Alona, aye kuibafuadika misapi na nkuibapombeela mikaba mu bifuka, na nkuibanyiina bilamba bia kuanya ku mitue, nka bu bibaadi Yehowa mulungule Moyise.

14 Akupu batshile ngombe mulume a mulambu wa muluisho, na Alona na bana baye abatudile maasa aabo ku mutue wa yawa ngombe mulume a mulambu wa muluisho. 15 Moyise nkuipaa yawa ngombe na nkuata mase na munue waye, nkuiashinga ku nsengua i ku kilambuilo, ku mpese yoso, na nkutoosha kilambuilo ku miluisho, kadi mase abashadile beapongoluele kuushi kua kilambuilo, bua kuikikasha kia kishila na kumona bia kukita bia’shi bekale ababuikiila miluisho panka. 16 Kunyima bakashile muimu oso ubaadi ku mala, na muimu wi kuishimba, na nfiyo ibidi mpa na muimu wayo, na Moyise nkuibishiika kaalo ku kilambuilo. 17 Akupu, biabia bibaadi bishale ku yawa ngombe, kuamba’shi musokia, muita na tufi baadi muibishiikishe kaalo paasha pa kishalelo, nka bu bibaadi Yehowa mulungule Moyise.

18 Kunyima kua biabia, batshile mukooko ulume wa mulambu wa kushiika kaalo, na Alona na bana baye abaatudile maasa aabo ku mutue kua wawa mukooko. 19 Moyise nkuipaa wawa mukooko na nkushinga mase ku mpese yoso ya kilambuilo. 20 Akupu, aye nkutshibuula wawa mukooko bipindi-bipindi, nkuata mutue, biabia bipindi na muimu,* nkuibishiika kaalo. 21 Moyise nkusuula mala na bioko na nkushiika wawa mukooko oso ushima ku kilambuilo. Ubaadi mulambu wa kushiika kaalo autusha mapembue e buwa. Na ubaadi’nyi mulambu ushiikibue mu kaalo bua Yehowa, nka bu bibaadi Yehowa mulungule Moyise.

22 Akupu, batshile mukooko ulume wa kabidi, mukooko wa kutuudibua ku mudimo, na Alona na bana baye abatudile maasa ku mutue wa wawa mukooko. 23 Moyise nkuipaa wawa mukooko na nkuata ndambo yao ya mase, nkuiyishinga ku nsongo y’etui dibalume dia Alona, na ku kiala ki’eyasa diaye dibalume, na ku ena dikata dia mukoolo waye ubalume. 24 Kunyima kua biabia, Moyise bayitanyine bana ba Alona, na nkuibashinga ndambo ya ku aa mase ku nsongo ya matui aabo abalume, na ku biaala bia maasa aabo abalume na ku mana akata a mikoolo yabo ibalume; kadi mase abashadile, beashingile ku mpese yoso ya kilambuilo.

25 Akupu batshile muimu, mukila wi muimu, muimu oso ubaadi ku mala, muimu wi kuishimba, nfiyo ibidi na muimu wayo na kioko kibalume. 26 Mu kiseele ki na mikate ishi na kitatusho, kibaadi kumpala kua Yehowa, batshile mukate umune ushi wele kitatusho wi bu nkata, mukate umune wi bu nkata ufunte mu muimu, na galete umune. Akupu aye nkuibitenteka ku bipese bia muimu na ku kioko kibalume. 27 Kunyima kua biabia, bebitudile bioso mu maasa a Alona na mu maasa a bana baye, na nkubanga kuibipuka aku-naku bu mulambu wa kupuka kumpala kua Yehowa. 28 Paapa Moyise bebiatshile mu maasa muabo na aye nkuibishiika kaalo ku kilambuilo kunundu kua mulambu wa kushiika kaalo, ubaadi mulambu wa kutuudibua ku mudimo autusha mapembue e buwa. Ubaadi mulambu ushikiibue mu kaalo bua Yehowa.

29 Kunyima Moyise batshile kiadi,* aye nkuikipuka aku-naku bu mulambu wa kupuka kumpala kua Yehowa. Kiakia kiadi kia mukooko wa kutuudibua ku mudimo kibafikile kia Moyise, nka bu bibaadi Yehowa mulungule Moyise

30 Na Moyise batshile ndambo ya muimu wa kishila na ndambo ya mase ibaadi ku kilambuilo, aye kuibimiamina Alona na ku bilamba biaye, mpa na bana baye babaadi naye na ku bilamba biabo. Biabia bayikeshe Alona na bilamba biaye, na bana baye na bilamba biabo bu bia kishila.

31 Paapa Moyise balunguile Alona na bana baye’shi: “Teekayi muita ku kituelelo kia kashibo k’epema ka kufumankena, anuiudiila nka yaaya mbalo na mikate i mu kiseele kia kutuudibua ku mudimo, nka bu biabandunguile’shi, ‘Alona na bana baye abeudi.’ 32 Muita na mikate abishala, nuibishiikie kaalo. 33 Ta nui balombene kukatuka ku kituelelo kia kashibo k’epema ka kufumankena munda mua mafuku musambobidi mpa’nka na apakapu mafuku eenu a kutuudibua ku mudimo, muanda abikaata mafuku musambobidi bua kuinutuula ku mudimo wa bu tshite muakuidi. 34 Yehowa baadi muitulungule bua kukita biabia bibatukitshi lelo uno bua’shi miluisho yenu imone bia kubuikiilua. 35 Anukashala ku kituelelo kia kashibo ka kufumankena bufuku na kanya munda mua mafuku musambobidi, na anukakitshi bioso biabadi benutekie kui Yehowa, bua’shi tala nuafua; muanda bino nyi bibaabadi bandungule.”

36 Biabia Alona na bana baye babakitshine bioso bibaadi Yehowa muibalungule bua kukita ku bukuashi bua Moyise.

9 Muifuku dia muanda, Moyise bayitanyine Alona na bana baye na bakulu ba Isalele. 2 Balunguile Alona’shi: “Ata kana ka ngombe bua mulambu wa muluisho, na mukooko ulume bua mulambu wa kushiika kaalo, bikale bishi na kilema na webilambule kumpala kua Yehowa. 3 Kadi olungule bena Isalele’shi, ‘Atayi kipembue bua mulambu wa muluisho, kana ka ngombe na mukooko ulume uki wana, bioso bikale bia kipua kimune, bishi na kilema, bua mulambu wa kushiika kaalo, 4 na ngombe mulume na mukooko ulume bia mulambu wa butaale, bia kulambula kumpala kua Yehowa, na mulambu wa ntete usangie na muimu, muanda lelo Yehowa enumuenekiela.’”

5 Biabia babafikile na bibaadi Moyise muibalungule kumpala kua kashibo k’epema ka kufumankena. Kunyima muilo oso ushima ubafikile, ao nkuimana kumpala kua Yehowa. 6 Moyise bambile’shi: “Bino nyi bibenulungula Yehowa’shi nukite, bua’shi ntumbo ya Yehowa inumuenekiele.” 7 Paapa Moyise balunguile Alona’shi: “Esesele ku kilambuilo na olambule mulambu oobe wa muluisho na wa kushiika kaalo, na okite bia’shi miluisho yobe’be nabene ibuikiilue na miluisho ya ba mu kifuko kiobe; na olambule mulambu wa muilo, na okite bia’shi miluisho yabo ibuikiilue, nka bu bibaadi Yehowa mutume eyi.”

8 Musango umune Alona besesele ku kilambuilo, aye nkuipaa kana ka ngombe ka mulambu waye wa muluisho. 9 Akupu bana ba Alona babamutambikile mase, aye nkusabika munue waye mu mase na nkuiashinga ku nsengua ya kilambuilo, kunyima aye nkusumbula mase abashadile kuushi kua kilambuilo. 10 Aye nkushiika mu kaalo ku kilambuilo, muimu, nfiyo na muimu wa kuishimba bia ku mulambu wa muluisho, nka bu bibaadi Yehowa mulungule Moyise. 11 Na bashiikile muita na musokia kaalo paasha pa kishalelo.

12 Kunyima bayipayile mulambu wa kushiika kaalo, na bana ba Alona babamupeele mase, aye nkuiashinga ku mpese yoso ya kilambuilo. 13 Babamupeele bipindi bia mulambu wa kushiika kaalo mpa na mutue, aye kuibishiika kaalo ku kilambuilo. 14 Paapa aye nkusuula mala na bioko na kuibishiika kaalo ku kilambuilo, kunundu kua mulambu wa kushiika kaalo.

15 Akupu aye nkulambula mulambu wa muilo, na nkuata kipembue kia mulambu wa muluisho kibaadi kia muilo, aye nkuikipaa na nkuikilambula bu mulambu wa muluisho nka bu bibakitshine na nyema a kumpala. 16 Na aye nkulambula mulambu wa kushiika kaalo, na nkuiukita muyile biabakitaa pa kiubishi.

17 Kunyima balambuile mulambu wa ntete, nkuusha eyasa diaye na ndambo ya ntete, na nkuiyishiika kaalo ku kilambuilo pamune na mulambu wa kushiika kaalo wa ku nakashika.

18 Kunyima kua biabia, bayipayile ngombe mulume na mukooko ulume wa mulambu wa butaale bibaadi bia muilo. Akupu, bana ba Alona nkumutambika mase, na aye nkuiashinga ku mpese yoso ya kilambuilo. 19 Kadi bua bipese bia muimu bia ngombe mulume, na mukila wi muimu wa mukooko ulume, na muimu wi ku bia munda, na nfiyo, na muimu wi kuishimba, 20 babatuudile biabia bipese bioso bia muimu pa biadi bia nyema, kunyima aye nkushiika bipese bia muimu mu kaalo ku kilambuilo. 21 Anka biadi na kioko kia mukoolo ubalume, Alona nkuibipuka aku-naku bu mulambu wa kupuka kumpala kua Yehowa, nka bu bibaadi Moyise muakule.

22 Akupu Alona nkuela maboko aaye muiyilu kui muilo na nkuiwelela miabi, aye nkuika kubaadi alambula mulambu wa muluisho, mulambu wa kushiika kaalo na milambu ya butaale. 23 Ku nfudiilo a bioso, Moyise na Alona babatuelele mu kashibo k’epema ka kufumankena, akupu babatukile belela muilo miabi.

Paapa ntumbo ya Yehowa ibamuenekieele muilo oso, 24 na kaalo akafiki kui Yehowa kabayikile kaatatshisha mulambu wa kushiika kaalo, na bipese bia muimu bibaadi ku kilambuilo. Pabamuene muilo oso biabia, ubabangile kuela misaase na ao nkukunama, nkukupila mapala paashi.

10 Kunyima, bana ba Alona Nadabe na Abihu, babatshile oso a kuabadi kintu kiaye kia kusemuina kaalo, abo nkuimuela kaalo na nkutuula kabanda kunundu kuako. Akupu abo nkubanga kulambula kumpala kua Yehowa kaalo kabashibaadi na matalua a kushiika, muanda ushibaadi Efile Mukulu muibalungule bua kukita. 2 Paapa kaalo kabakatukile kumpala kua Yehowa, ako nkuibashiika, na abo nkufua kumpala kua Yehowa. 3 Akupu Moyise balunguile Alona bino: “Yehowa amba’shi, ‘Nakeyikasha a kishila munkatshi mua bantu be pepi nami, na naketumbisha kumpala kua bantu boso.’” Paapa Alona bashadile muumiine.

4 Biabia Moyise bayitanyine Mishaele na Elizafane, bana ba Uziele mukuabo na nshaye na Alona, aye nkuibalungula’shi: “Fikayi pano, tualayi bakuenu balume nuibakatushe pa mbalo ya kishila, nuibatuule paasha pa kishalelo.” 5 Biabia babafikile, abo nkuibatuala mu mankandio aabo, nkuenda nabo paasha pa kishalelo nka bu bibebalunguile Moyise.

6 Kunyima, Moyise nkulungula Alona na bangi bana baye, Eleazare na Itamare’shi: “Tanulekielanga nyene yenu butshafu sunga kusaana bilamba bienu, bua’shi tala nuafua na’shi Efile Mukulu akuatshila muilo ushima nsungu. Bakuenu ba mu muilo ushima wa Isalele abakadidi baaba bababayipaa kui Yehowa ku kaalo. 7 Tanukatukanga ku kituelelo kia kashibo k’epema ka kufumankena, bisumanga anufu, muanda muimu wa kishila wa Yehowa wi pa mbidi penu.” Babakitshine nka bu bibaadi Moyise muibalungule.

8 Paapa Yehowa nkulungula Alona’shi: 9 “Obe na bana bobe tanutomanga nfinyo sunga angi maalua aakoluanaa nsaa y’anutuele mu kashibo k’epema ka kufumankena, bisumanga anufu. Uno mmuiya wa loso munda mua bipungo bienu bioso. 10 Bua’shi nushinguule kuilekena kui pankatshi pa kintu kia kishila na kintu kishi kia kishila, na kuilekena kui pankatshi pa kintu ki butete na kishi butete, 11 na bua’shi numone bia kulongiesha bena Isalele miiya yoso ibaadi Yehowa muibelele kukiila kui Moyise.”

12 Paapa Moyise balunguile Alona na bana baye babaadi bashale, Eleazare na Itamare’shi: “Atayi mulambu wa ntete ushale wa ku milambu ya Yehowa ishikiibue mu kaalo, nuiudie bu mikate ishi na kitatusho pepi na kilambuilo, muanda nkintu kikile kishila. 13 Abitungu nuiudiile mu mbalo ya kishila, muanda nkipindi kiobe na kipindi kia bana bobe kia ku milambu ya Yehowa ishiikibue mu kaalo, na bino nyi bibaabadi bandungule. 14 Obe na bana bobe balume, na bana bobe bakashi anukadiila dingi kiadi* kia mulambu wa kupuka na kioko kia kipindi kia kishila mu mbalo ya kishila, muanda nkipindi kiobe na kipindi kia bana bobe kia ku milambu ya butaale ya bena Isalele. 15 Abakafiki na kioko kia kipindi kia kishila na kiadi kia mulambu wa kupuka pamune na milambu ya muimu ishikiibue mu kaalo bua kupuka mulambu wa kupuka aku-naku kumpala kua Yehowa; abikekala bu kiobe kipindi na kia bana bobe bua loso, nka bu bibaadi Yehowa muibiakule.”

16 Moyise bakimbile na kalolo koso kipembue kia mulambu wa muluisho, na basangene’shi mbekishiikie kaalo. Biabia aye nkufitshila Eleazare na Itamare bana ba Alona babaadi bashale munda, aye kuibalungula’shi: 17 Buakinyi tanuibadiile mulambu wa muluisho mu mbalo ya kishila, muanda nkintu kikile kishila, na mbenupe wanka bua’shi numone bia kusemuna miluisho ya muilo na nukite bia’shi miluisho yabo ibuikiilue kumpala kua Yehowa. 18 Nta mbatuele na mase ao mu mbalo ya kishila. Nubadia kuikala beudiile mu mbalo ya kishila nka bu bianenulungulanga.” 19 Alona nkualuula Moyise’shi: “Talanga! Lelo balambulanga mulambu wa muluisho na mulambu wa kushiika kaalo kumpala kua Yehowa. Kunyima kua ino mianda ibankitshikila, su nadia kuikala mudie mulambu wa muluisho, bibadia kuikala bisankishe Yehowa su?” 20 Pabapushishe Moyise biabia, basankile ngofu.

11 Kunyima, Yehowa balunguile Moyise na Alona’shi: 2 “Lungulayi bena Isalele’shi, ‘Bino nyi bipangua bi na muuwa bia pa nsenga bianudia kudia: 3 Nui balombene kudia nyema oso e na mikona itshibuule na alushaa mukanua bintu biadi mupue kumina bua kuibisankunya dingi.

4 “‘Kadi ku nyema ayalushaa mukanua bintu biayidi ipue kumina bua kuibisankunya dingi, sunga i na mikona, ta nui balombene kudia ino ayilondo: kamelo muanda akalushaa mukanua bintu biakadi kapue kumina bua kuibisankunya dingi, kadi ta ke na mikona itshibuule. Ke butete kuanudi. 5 Sunga nseshi, muanda alushaa mukanua bintu biadi mupue kumina bua kuibisankunya dingi, kadi te na mikona itshibuule. E butete kuanudi. 6 Sunga nkalulu, muanda akalushaa mukanua bintu biakadi kapue kumina bua kuibisankunya dingi, na ta ke na mikona itshibuule. Ke butete kuanudi. 7 Sunga ngulube, muanda e na mikona itshibuule anka t’alushaa mukanua bintu biadi mupue kumina bua kuibisankunya dingi. E butete kuanudi. 8 Ta nui balombene kudia muita su ngupeela wa yaya nyema, sunga kukuma bitanda biayo. I butete kuanudi.

9 “‘Bintu bi mu mema bianudia kudia mbino: Kintu kioso ki mu mema ki na lusele* lua mmongo na mamba, biakikala mu tulunga tua mema sunga mu miela, nui balombene kuikidia. 10 Kadi kintu kioso ki mu kalunga sunga mu miela kishi na lusele lua mmongo sunga mamba ki munkatshi mua tu bipangua toso atutambukaa mu bisaka, na kingi kipangua kioso ki na muwa ki mu mema, nkintu ki butete kuanudi. 11 Eyendo, abikala butete kuanudi, na ta nui balombene kudia muita wabio su ngupeela, mpa na bitanda biabio bi butete kuanudi. 12 Kintu kioso ki mu mema kishi na lusele lua mmongo na mamba ki butete kuanudi.

13 Bipangua abipapamaa bianushi balombene kudia muanda bi butete mbino: mumba, eminyi, eminyi difiita, 14 kabemba kamonga, na mishindo yoso ya tubemba tufiita, 15 manganga a mishindo yoso, 16 mbushi kionyi,* kipungulu, konyi ka muwete na mishindo yoso ya bibemba-bemba, 17 kapulukutui,* kioo, efuifui, 18 ebata dia mu mema, kionyi kia pelika, n’eminyi, 19 kiabula, mishindo yoso ya tulama ngombe, namalambo na mudima. 20 Tu bipangua toso tui na mapushi atutambukaa mu bisaka tui na mikolo inanka, nyi mbintu bi butete kuanudi.

21 “‘Ku tu bipangua tui na mapushi atutambukaa mu bisaka tui na tukoolo tunanka, nui balombene kudia penda tuatua tui na tukoolo tubidi tukata tua kunyima tukile tuatua tungi toso atuitukuashaa bua kuitumba. 22 Ku tuatua tubipangua, tuanudi balombene kudia ntuno: nshiye ya mishindo yoso, na ingi mpasu ayidibua, manyenya, na nfibo. 23 Tuatua tungi tu bipangua tui na mapushi atutambukaa mu bisaka tui na tukoolo tunanka, tui butete kuanudi. 24 Bino bintu abinuikasha butete. Muntu oso akumu kitanda kiabio ekala butete mpa na ku kiolua. 25 Muntu oso asangula bitanda biato, abitungu atumpe bilamba biaye; na ekala butete mpa na ku kiolua.

26 “‘Nyema oso e na mikona kadi ishi iabuule na sh’alushaa mukanua bintu biadi mupue kumina bua kuibisankunya dingi e butete kuanudi. Muntu oso amukumu ekala butete. 27 Ku nyema yoso ayitambukaa na mikoolo inanka, yaya ayitambukilaa ku nsongo kua makasa aayo, i butete kuanudi. Oso akumu kitanda kiayo ekala butete mpa na ku kiolua. 28 Muntu oso asemuna kitanda kiayo abitungu atumpe bilamba biaye, na ekala butete mpa na ku kiolua. Yaya nyema i butete kuanudi.

29 “‘Tu bipangua tua pa nsenga atuikakaa atuikala butete kuanudi ntuno: mpombo-mpuku, mpuku na mishindo yoso ya miinsua, 30 jeko,* lombe, munsua wa mu mema, munsua wa mu nsenga,* na lufuamino. 31 Bino bipangua bioso abiikakaa bi butete kuanudi. Muntu oso akumu kitanda kiabio ekala butete mpa na ku kiolua.

32 “‘Binobino, kintu kioso ki’abiponena nsaa y’abifu akikala butete, biabikala bintu bia mu kikuku bia mitshi, ku kilamba, ku musokia, sunga ku kipese kia mpaya. Kintu kioso kia ku biabia bintu sunga kiekala kia mufubo kinyi, abitungu kuikiela mu mema na akikala butete mpa na ku kiolua; akupu akikala kishi butete. 33 Su kitanda kia kiakia kipangua kiaponena mu kintu ki’ema, abitungu kuikitanya, na kintu kioso ki muanka akikala butete. 34 Kidibua kioso ki’abakumu kui mema aakatukila mu kiakia kintu akikala butete, na kitomuanga kioso akikalanga mu kiakia kintu akikala butete. 35 Kintu kioso ki’abaponena kui kitanda kiabio akikala butete. Biabikala nfuulo sunga mafuwa, abitungu kuibitanya. Abikala butete, na abikashala kintu ki butete kuanudi. 36 Anka penda mushima* na kintu kia kulamina mema nyi abikala bishi butete, kadi muntu oso akatusha kitanda kiabio kiponene muanka, ekala butete. 37 Su kitanda kiabio kiaponena ku lutete lua kukuna, lualua lutete t’aluikala butete. 38 Kadi su beela mema ku lutete, na kipindi kampanda kia kitanda kiakio kiaponena kuanka, lualua lutete aluikala lui butete kuanudi.

39 “‘Kadi su nyema anudiyaa baafu, muntu oso akumu kitanda kiaye ekala butete mpa na ku kiolua. 40 Yawa oso adi kitanda kiaye, abitungu atumpe bilamba biaye, na ekala butete mpa na ku kiolua. Yawa oso atuala kitanda kiaye, abitungu atumpe bilamba biaye, na ekala butete mpa na ku kiolua. 41 Tu bipangua toso tua pa nsenga atuikakaa atuikala butete kuanudi. Ta nui balombene kuitudia. 42 Ta nui balombene kudia kipangua kioso akiikakaa pa nsenga, kipangua kioso akitambuka na mikoolo inanka, sunga kimune kia ku bipangua abitambukaa mu kisaka ki na tukoolo tui bungi, muanda nyi nkintu ki butete kuanudi. 43 Tanuiyikashanga be butete na bino bipangua bioso, tanuiluishanga anue banabene na kuiyikasha be butete na bino bipangua. 44 Muanda ami ne Yehowa Efile Mukulu eenu, na abitungu nuitooshe na kufika beselele, muanda ami n’eselele. Biabia tanui balombene kuiyikasha butete na kipangua su nkimune akiikakaa pa nsenga. 45 Muanda nami Yehowa benutushishe mu nsenga ya Ejipitu bua kuinulesha’shi ne Efile Mukulu eenu, na abitungu nuikale beselele muanda ami n’eselele.

46 “‘Uno mmuiya pabitale nyema, bipangua abipapama, na bipangua bioso abitambuka mu mema, na pabitale bipangua bioso bi pa nsenga abitambukaa mu bisaka, 47 bua kutuusha kuilekena pankatshi pa bintu bi butete na bishi butete, na pankatshi pa bipangua bianudi balombene kudia na biabia bianushi balombene kudia.’”

12 Yehowa nkulungula dingi Moyise’shi: 2 “Lungula bena Isalele bino, ‘Su muana mukashi e n’eyimi batanda muana mulume, ekala butete munda mua mafuku musambobidi, anka bu biekalaa butete mafuku ekalaa ku mueshi. 3 Muifuku dia muanda, abitungu kusala muana. 4 Atungunuka na kuitoosha ku mase aaye munda mua mafuku 33 aalondo. T’abitungu akume kintu kiselele su nkimune, sunga kutuela mu mbalo ya kishila mpa na p’alombasha mafuku a kuitoosha kuaye.

5 “‘Su batanda muana mukashi, biabia ekala butete munda mua mafuku 14, anka bu biekalaa butete mafuku ekalaa ku mueshi. Atungunuka na kuitoosha ku mase aaye munda mua mafuku 66 aalondo. 6 Apapu mafuku a kuitoosha kuaye bua muana mulume sunga muana mukashi, akatuadila tshite muakuidi mukooko ulume wa kipua kimune, bu mulambu waye wa kushiika kaalo, na kana ka nkudimba sunga ekutshi bu mulambu wa muluisho ku kituelelo kia kashibo k’epema ka kufumankena. 7 Tshite muakuidi akebilambula kumpala kua Yehowa na kukita bia’shi bamufuile lusa, na akekala mutooshibue ku mase aaye adi mutuushe. Uno nyi mmuiya pabitale mukashi batanda muana mulume sunga mukashi. 8 Kadi su ta mulombene kupeta mukooko, abitungu afikie na tukutshikutshi tubidi sunga tuana tua nkudimba tubidi, kamune bu mulambu wa kushiika kaalo, na kangi kamune bu mulambu wa muluisho, na tshite muakuidi akakitshi bia’shi bamufuile lusa, na akekala mutooshibue.’”

13 Yehowa baadi mutungunukie na kuisamba na Moyise na Alona, ebalungula’shi: 2 “Su pa mbidi pa muntu* patuuka kiuulua, mpapa sunga ebashi bilombene kufika bu mukumbo wa nsudi pa kikoba kiaye, abitungu kuenda naye kui tshite muakuidi Alona, sunga kui umune a ku bana baye, ba tshite muakuidi. 3 Tshite muakuidi akatala mukumbo wi pa kikoba kiaye. Su buaa bui paapa pe mukumbo mbutooka, na paapa pe maladi mpepukie kukila ingi mbalo yoso, nyi mukumbo wa nsudi. Tshite muakuidi akamutaluula na kuamba’shi e butete. 4 Kadi su ebashi di pa kikoba paaye nditooka, na ta ndipukie, na buaa bui panka ta mbutookie, abitungu’shi tshite muakuidi amutuule pa mbalo ya pa bupenka munda mua mafuku musambobidi. 5 Muifuku dia musambobidi, tshite muakuidi akamutaluula, su bamono’shi diadia ebashi ta nditame na diapalakana pa kikoba, tshite muakuidi akamutuulu pa mbalo ya pa bupenka munda mua angi mafuku musambobidi.

6 “Tshite muakuidi akamutaluula dingi muifuku dia musambobidi, su bamono’shi diadia ebashi dibafituluka na ta dipalakane pa kikoba, tshite muakuidi amba’shi yawa muntu te butete; muanda dikele mpapa bisumanga. Akupu yawa muntu akatumpu bilamba biaye na ekala shi butete. 7 Kadi su mpapa yamutuuka dingi pa mbidi paaye kunyima kua tshite muakuidi kumuikasha bu shi butete, ende dingi kui tshite muakuidi. 8 Tshite muakuidi akamutaluula, su apeta’shi mpapa ngipalakane pa kikoba, tshite muakuidi akamuamba dingi’shi e butete. Nyi mukumbo wa nsudi.

9 “Su nsudi yatuuka pa mbidi pa muntu, abitungu bende naye kui tshite muakuidi, 10 tshite muakuidi akamutaluula. Su e na kiuulua kitooka pa kikoba, na kiakia kiuulua nkitookieshe buaa bui panka na su pe elonda, 11 nyi nsudi ishayipuiyaa i pa kikoba kiaye, tshite muakuidi akamuamba bu e butete. T’akamutuulu pa mbalo ya pa bupenka, muanda e butete. 12 Kadi su nsudi yamutuuka pa mbidi yaye yoso, na tshite muakuidi amona’shi ngimutuukie kubanga ku mutue na ku ngua, 13 na tshite muakuidi p’ataluula yawa muntu, apeta’shi nsudi i pa kikoba kiaye kioso, akamuamba’shi te butete. Muanda kikoba kiaye kibafiki kitooka, na yawa muntu te butete. 14 Biabia su elonda diamutuuka pa kikoba kiaye, ekala butete. 15 Apamono tshite muakuidi elonda, amba’shi yawa muntu e butete. Elonda’nyi di butete. Nyi nsudi. 16 Kadi su elonda dibaumu, abitungu’shi yawa muntu alukie kui tshite muakuidi. 17 Tshite muakuidi akamutaluula, su basangana’shi elonda dibaumu, amulungula’shi te butete. Taki butete nya.

18 Su kiuulua kiaula muntu pa mbidi na kiapua, 19 kadi su pa mbalo ikeele kiuulua pauula kintu kitooka sunga ebashi dimongolokie, abitungu akeleeshe kui tshite muakuidi. 20 Tshite muakuidi akataluula diadia ebashi, su paapa p’ebashi mpepukie kukila ingi mbalo yoso, na buaa bui panka mbutookie, tshite muakuidi akamba yawa muntu’shi e butete. Muanda mmukumbo wa nsudi wikeele utuukie pa kiakia kiuulua kiaye. 21 Anka su tshite muakuidi ataluula, amonaa’shi buaa bui panka ta butookie, na kikoba ki panka ta nkiipukie, na su apamueneka pafiitulukie, tshite muakuidi akatuulu yawa muntu pa mbalo ya bupenka munda mua mafuku musambobidi. 22 Kadi su diadia ebashi dibapalakana pa kikoba, tshite muakuidi akamba’shi yawa muntu e butete. Nyi nsudi. 23 Kadi su ebashi di’nka mbalo imune ta ndipalakane pa kikoba, mpenda kiuulua akikalanga panka, tshite muakuidi akalungula yawa muntu’shi te butete.

24 “Na su muntu e na mukufu* wa kaalo, na muamua mu mukufu mubatuuku ebashi dimongolokie sunga ditooka, 25 paapa tshite muakuidi akamutaluula. Su asangana’shi buaa bui pa diadia ebashi bubatooko, na pabepuka kukila ingi mbalo yoso, nyi nsudi ibatuuku mu mukufu, na tshite muakuidi amba’shi yawa muntu e butete. Nyi nsudi. 26 Kadi su tshite muakuidi batala ebashi, bamono’shi ta mui buaa butooka, na tandipuukie kukila aa angi mambalo oso, na ndifiitulukie, paapa tshite muakuidi akamutuulu pa mbalo ya bupenka munda mua mafuku musambobidi. 27 Tshite muakuidi akataluula yawa muntu muifuku dia musambobidi, na su ebashi dibapalakana pa kikoba, akamulungula’shi e butete. Nyi nsudi. 28 Kadi su ebashi dibashala nka yaaya mbalo imune, ta dipalakane pa kikoba na ndifiitulukie, mpenda kuula kua mukufu, tshite muakuidi akamulungula’shi te butete, muanda mpenda mukufu awikalanga uule.

29 “Su muana mulume sunga muana mukashi ekala na mukumbo wa pa kikoba ku mutue sunga ku kisaa, 30 tshite muakuidi akataluula yaaya mbalo i mukumbo. Na su paapa pe mukumbo mpepukie kukila mbalo yoso, na buaa bui panka mbumongolokie sunga’shi tabudi pala-pala, tshite muakuidi amulungula’shi e butete; nyi mukumbo wa kikoba kia ku mutue sunga miefu. Nsudi ya ku mutue sunga ku kisaa. 31 Su tshite muakuidi bamono’shi yaaya mbalo i mukumbo tangiipukie kukila mbalo yoso na ta mui buaa bufiita, paapa abitungu’shi tshite muakuidi atuule yawa muntu pa mbalo ya bupenka munda mua mafuku musambobidi. 32 Tshite muakuidi akatala yaaya mbalo i maladi muifuku dia musambobidi, su aa maladi tangapalakane na buaa bumongolokie ta butuukie panka, na yaaya mbalo i mukumbo tangiipukie kukila ingi mbalo yoso, 33 abitungu yawa muntu ekuule, anka takuulanga yaaya mbalo i maladi. Paapa tshite muakuidi akamutulu dingi mbalo ya bupenka munda mua angi mafuku musambobidi.

34 Tshite muakuidi akataluula’nyi mbalo i maladi muifuku dia musambobidi, su maladi e ku kikoba kia ku mutue na ku kisaa ta ngapalakane pa kikoba, na su yaaya mbalo i mukumbo tangiipukie kukila ingi mbalo yoso, tshite muakuidi akamba yawa muntu’shi te butete, abitungu asuule bilamba biaye na ekala shi butete. 35 Kadi su biamueneka’shi mukumbo ukuete kupalakana pa kikoba kunyima kuaye kutooshibua, 36 tshite muakuidi ataluula yawa muntu, na su mukumbo ngupalakane pa kikoba, tshite muakuidi t’ekala na lukalo lua kutala su buaa mbumongolokie; yawa muntu e butete. 37 Kadi su tshite muakuidi bataluula, bamono’shi mukumbo tangupalakane na buaa bufiita mbumene yaaya mbalo, mukumbo wa yawa muntu ubapu. Te butete nya, na tshite muakuidi amulungula’shi te butete.

38 “Su mabashi atuuka pa kikoba kia muana mulume sunga mukashi, na aa mabashi ngatooka, 39 tshite muakuidi akeataluula. Su aa mabashi e pa kikoba ngatookolokie, mmukumbo wa pa kikoba ushi na muanda. Yawa muntu te butete nya.

40 “Su nyene ya muntu yatukuka na ashala n’ebala, yawa muntu te butete nya. 41 Su atukuka nyene mu mpala na yaaya mbalo yatuuka ebala, te butete nya. 42 Su elonda dimongolokie diamutuuka muibala sunga mu mpala muaye, nyi nsudi ibamutuuku muibala sunga mu mpala muaye. 43 Tshite muakuidi akamutaluula, na su mbalo iuule bua mukumbo ngimongolokie muibala munkatshi mua mutue waye, sunga mu mpala na abimueneka’shi nsudi i pa kikoba kiaye, 44 e na nsudi. Na e butete, tshite muakuidi akamba’shi e butete, muanda wa mukumbo wi mu mutue muaye. 45 Bua muntu e na nsudi, abitungu asaane bilamba biaye na kuleka nyene yaye kushi kuiyitshiba, na abitungu apuute muefu wa mulomo waye wa kunundu, na kuela musaase’shi: ‘Ne butete, ne butete!’ 46 Ekala butete mu mafuku oso adi na mukumbo. Bu biadi butete, abitungu ashale pa mbalo ya bupenka. Akashala paasha pa kishalelo.

47 Su maladi a nsudi abandakana ku kilamba, biakikala kia buaa bua mikooko sunga kia lin, 48 bia bikala ku buanda bua mbula sunga ku buanda bua mbuipi bua kilamba kia lin, sunga kikitshibue na buaa bua mikooko, sunga ku musokia sunga ku kingi kintu kioso kikitshibue na musokia, 49 na su ebashi dia maladi di bulese sunga dimongolokie diandakana ku kilamba, ku musokia, sunga ku buanda bua mbula sunga bua mbuipi, sunga ku kingi kintu kioso kia musokia, kuakua nkuandakana kua maladi a nsudi, na abitungu kulesha tshite muakuidi kiakia kintu. 50 Tshite muakuidi akataluula diadia ebashi, na akatuulu biabia bintu bioso bikume ku diadia ebashi pabuabio munda mua mafuku musambobidi. 51 Nsaa y’ataluula ebashi muifuku dia musambobidi, na amona’shi ndipalakane ku kilamba, ku buanda bua mbula sunga bua mbuipi bua kilamba, sunga ku musokia (sunga biekala’shi abafubisha wawa musokia bua mudimo kinyi), diadia ebashi nyi nsudi i bukopo, kiakia kintu ki butete. 52 Paapa abitungu ashiikie kiakia kilamba mu kaalo, sunga buanda bua mbula sunga bua mbuipi bua kilamba kia buaa bua mikooko, sunga kia lin, sunga kingi kintu kioso kia musokia ki na diadia ebashi, muanda nsudi i bukopo. Abitungu kuikishiika mu kaalo.

53 “Kadi su tshite muakuidi bekitaluula na bamono’shi ebashi ta dipalakane ku kilamba, sunga ku buanda bua mbula sunga ku buanda bua mbuipi bua kilamba, sunga ku kingi kintu kia musokia, 54 paapa tshite muakuidi akatumu eyi bua’shi basuule kiakia kintu ki na ebashi, na akekituulu pa buakio munda mua angi mafuku musambobidi. 55 Akupu tshite muakuidi akekitaluula kunyima kuabo kuikisuula kalolo. Su akimueneka’shi ta nkilekene na biakimuenekanga kumpala, sunga biekala’shi ebashi ta dipalakane, ki butete. Abitungu kuikishiika mu kaalo, muanda kibapu kudiibua, biabikala munda sunga paasha.

56 “Kadi su tshite muakuidi bekitaluula na bamono’shi yaaya mbalo ayikalanga ebashi ibapeele kunyima kuabo kuikisuula kalolo, akedilamuna ku kilamba sunga ku musokia, sunga ku buanda bua mbula sunga ku bua mbuipi bua kilamba. 57 Kadi su diadia ebashi diki’adimueneka pa ingi mbalo ya kilamba, sunga ya buanda bua mbula sunga bua mbuipi bua kilamba, sunga kingi kintu kioso kia musokia, paapa dikuete kupalakana, na abitungu kushiika kintu kioso ki na ebashi mu kaalo. 58 Kadi su ebashi dibashimina ku kilamba, sunga ku buanda bua mbula sunga ku bua mbuipi bua kilamba, sunga ku kingi kintu kioso kia musokia kiodi mupue kusuula, paapa abitungu kuikisuula dia kabidi, na t’akikala butete nya.

59 “Uno nyi mmuiya pabitale mukumbo wa nsudi wi ku kilamba kia buaa bua mukooko sunga kia lin, sunga ku buanda bua mbula sunga bua mbuipi bua kilamba, sunga ku kingi kintu kioso kia musokia, bua kuamba’shi ki butete, sunga’shi ta ki butete.”

14 Yehowa batungunukile na kuisamba na Moyise, aye nkuamba’shi: 2 “Uno awikala muiya pabitale sha nsudi muifuku dia kutooshibua kuaye, efuku diabamutuala kui tshite muakuidi. 3 Tshite muakuidi akende paasha pa kishalelo na akamutaluula. Su nsudi ngipue, 4 tshite muakuidi akamulungula bua’shi afikie na tonyi tubidi tushi butete tui na muwa, katabi ka mutshi wa sedre, buanda bumonga pididii, na izope bua kutooshibua kuaye. 5 Tshite muakuidi akatumu eyi bua’shi bayipee konyi kamune muilonga dia buma, di na mema abadi batape mu muela. 6 Kadi abitungu aate konyi ke na muwa, katabi ka mutshi wa sedre, na buanda bumonga pididii, na izope ebisabikie pamune mu mase a konyi kabadi bayipee kunundu kua mema abadi batape mu muela. 7 Kunyima, amiamine yawa etoosha ku nsudi yaye mase misango musambobidi, na kuamba’shi te butete, na akaposola konyi ke na muwa mu kisuku.

8 “Yawa etoosha abitungu asuule bilamba biaye na ekuule nyene yaye yoso, na kuitumpa mema, paapa akekala shi butete. Kunyima mmulombene kutuela mu kishalelo, anka akashala paasha pa kashibo kaye k’epema munda mua mafuku musambobidi. 9 Muifuku dia musambobidi, abitungu akuule nyene yaye yoso, akuule miefu na bikienkienyi. Kunyima kuaye kukuula nyene yaye yoso, asuula bilamba biaye na etumpe mema, paapa ekala shi butete.

10 “Muifuku dia muanda, aata mikooko ilume ibidi ikii yana ishi na kilema, mukooko ukashi ushi na kilema wa kipua kimune, kia mbisatu ki’ekumi kia kipimo kia efa* kia bukula bui buwa busangibue na muimu bu mulambu wa ntete, na kipimo kimune kia loge* kia muimu; 11 tshite muakuidi amuamba’shi te butete, ende na yawa muntu etoosha na milambu kumpala kua Yehowa, ku kituelelo kia kashibo k’epema ka kufumankena. 12 Tshite muakuidi akaata mukooko umune ulume ukii wana na kuiulambula bu mulambu wa kuitopeka, pamune na kipimo kimune kia loge kia muimu, na akekipuku aku-naku bu mulambu wa kupuka kumpala kua Yehowa. 13 Kunyima, akayipaa mukooko wana ulume mu mbalo ya kishila, mu mbalo yabayipayilaa mulambu wa muluisho na mulambu wa kushiika kaalo, muanda mulambu wa kuitopeka ngua tshite muakuidi, nka bu mulambu wa muluisho. Nkintu kikile kishila.

14 “Akupu, tshite muakuidi akaata ndambo ya mase a mulambu wa kuitopeka na akeyishingi ku nsongo y’etui dibalume na ku kiala kia mboko ibalume, na ku ena dikata dia mukolo ubalume wa yawa kuete kuitoosha. 15 Tshite muakuidi akaata kipimo kia loge kia muimu, na apongoole ndambo muiyasa diaye dibakashi. 16 Kunyima, tshite muakuidi akasabika munue waye ubalume mu muimu wi muiyasa diaye dibakashi, na kumiamina ndambo ya muimu na munue waye misango musambobidi kumpala kua Yehowa. 17 Paapa tshite muakuidi akashingi ndambo ya muimu aushala muiyasa diaye ku nsongo y’etui dibalume na ku kiala kia mboko ibalume, na ku ena dikata dia mukoolo ubalume wa yawa kuete kuitoosha, kunundu kua mase a mulambu wa kuitopeka. 18 Tshite muakuidi akashingi muimu ushale muiyasa diaye mu mutue mua yawa kuete kuitoosha ku nsudi, na tshite muakuidi akakitshi bia’shi miluisho ya yawa muntu ibuikidiibue kumpala kua Yehowa.

19 “Tshite muakuidi akalambula mulambu wa muluisho na kukita bia’shi yawa muntu atooshibue ku butete buaye, akupu tshite muakuidi akayipaa mulambu wa kushiika kaalo. 20 Tshite muakuidi akalambula mulambu wa kushiika kaalo na mulambu wa ntete pa kilambuilo, na akakitshi bia’shi miluisho ya yawa muntu ibuikiilue, paapa t’akekala’nyi butete.

21 “Kadi su mmulanda na te na mushindo, paapa akaata muana a mukooko mulume bu mulambu wa kuitopeka wa mulambu wa kupuka, bua’shi miluisho yaye ibuikiilue, pamune na ki’ekumi kimune kia kipimo kia efa kia bukula bui buwa busangibue na muimu bu mulambu wa ntete, kipimo kimune kia loge kia muimu, 22 na tukutshikutshi tubidi sunga tuana tua nkudimba tubidi muyile mushindo waye. Kamune akekala bu mulambu wa muluisho, na kangi bu mulambu wa kushiika kaalo. 23 Muifuku dia muanda, akafiki nato kui tshite muakuidi ku kituelelo kia kashibo k’epema ka kufumankena kumpala kua Yehowa, bua kushinkamisha kutooshibua kuaye.

24 “Tshite muakuidi akaata mukooko ulume wana wa mulambu wa kuitopeka, na kipimo kimune kia loge kia muimu, akebipuku aku-naku bu mulambu wa kupuka kumpala kua Yehowa. 25 Akupu, tshite muakuidi akayipaa wawa mukooko wana wa mulambu wa kuitopeka, na akaata ndambo ya mase a wawa mulambu wa kuitopeka na kuiashinga ku nsongo y’etui dibalume na ku kiala kia mboko i balume na ku ena dikata dia mukoolo ubalume wa yawa muntu etoosha. 26 Tshite muakuidi akapongoola ndambo ya muimu muiyasa diaye dibakashi, 27 na munue w’eyasa diaye dibalume, akamiamina ndambo ya muimu wi muiyasa diaye dibakashi misango musambobidi kumpala kua Yehowa. 28 Tshite muakuidi akashingi ndambo ya muimu wi muiyasa diaye ku nsongo ku’etui dibalume, na ku kiala ki’eyasa dibalume na ku ena dikata dia mukoolo ubalume wa yawa kuete kuitoosha, pa yaaya mbalo imune yashinganga mase a mulambu wa kuitopeka. 29 Akupu, tshite muakuidi akashingi muimu ubashala muiyasa diaye mu mutue mua yawa muntu kuete kuitoosha, buadia kukita bia’shi miluisho ya yawa muntu ibuikiilue kumpala kua Yehowa.

30 “Akalambula tukutshikutshi sunga tuana tua nkudimba muyile mushindo wi na yawa muntu, 31 tuatua tonyi tuakapete akatusha kamune bu mulambu wa muluisho, na kangi bu mulambu wa kushiika kaalo pamune na mulambu wa ntete; na tshite muakuidi akakitshi bia’shi miluisho ya yawa muntu etoosha ilekielue kumpala kua Yehowa.

32 “Uno ndio muiya utale muntu baadi na maladi a nsudi, kadi shi na mushindo muifuku dia kutooshibua kuaye.”

33 Akupu, Yehowa balunguile Moyise na Alona’shi: 34 “P’anukatuele mu nsenga ya Kanaana yankenupa bua’shi ikale yenu, na pankambukisha nshibo kampanda ya muiumbo dienu na mukumbo wa nsudi, 35 yawa sha nshibo abitungu afikie alungule tshite muakuidi’shi: ‘Kui mukumbo kampanda ubakuata nshibo yande.’ 36 Tshite muakuidi akatumu eyi bua’shi batuushe bintu bioso bi mu nshibo kumpala kua’shi afikie mu kutala yaaya mbalo i mukumbo, tala amba’shi bintu bioso bi mu nshibo bi butete; akupu akatuele mu nshibo bua kuiyitaluula. 37 Akataluula yaaya mbalo ikuatshikie mukumbo, su bimano* bi na mabashi amongolokie na e bulese na aamueneka bu atuele mu bimano, 38 tshite muakuidi akatuuku mu yaaya nshibo na kuiyifunga munda mua mafuku musambobidi.

39 “Muifuku dia musambobidi, tshite muakuidi akalukiila bua kutaluula nshibo. Su mukumbo ngupalakane ku bimano bia nshibo, 40 tshite muakuidi akatumu eyi bua’shi bakaashe mabue akuatshibue na mukumbo, beasumbule paasha pa kibundi mu mbalo y’abasumbuilaa bintu bi butete. 41 Paapa abitungu akooleeshe munda mua nshibo kalolo, biabia bintu bi’abakoolo na bintu biabekalanga bemushine bi’abalamuna, abakebisumbula paasha pa kibundi mu mbalo y’abasumbuilaa bintu bi butete. 42 Abakalusha angi mabue pa mbalo ya aa mabue abekeele bakatushe, na abakaata ungi potopoto buabadia kushina mu nshibo.

43 “Kadi su mukumbo ubalukiila mu nshibo kunyima kuabo kulamuna mabue, na kuimukoola, na kushina dia kabidi, 44 tshite muakuidi akatuele mu nshibo na kuiyitaluula. Su mukumbo ngupalakane mu nshibo, yaaya nsudi i bukopo i mu nshibo. Yaaya nshibo i butete. 45 Paapa akabumbusha nshibo, na kusemuisha mabue, mabaaya na bintu bioso biabekalanga bashine na balamikie mu nshibo paasha pa kibundi ku mbalo yabasumbuilaa bintu bi butete. 46 Kadi muntu oso atuele mu nshibo mu mafuku abaadi beyifungie, ekala butete mpa na ku kiolua; 47 muntu oso alaala mu yaaya nshibo abitungu asuule bilamba biaye, na muntu oso emudiila abitungu asuule bilamba biaye.

48 “Kadi su tshite muakuidi afika na amona’shi mukumbo ta ngupalakane mu nshibo kunyima kuabo kuiyishina dia kabidi, paapa akamba’shi nshibo tayi butete, muanda mukumbo ubapu. 49 Bua’shi nshibo tayikalanga butete, akaata tonyi tubidi, katabi ka mutshi wa sedre, buanda bumonga pididii na izope. 50 Akayipaa konyi kamune muilonga dia buma, di na mema abadi batape mu musulo. 51 Akupu aata katabi ka mutshi wa sedre, izope, buanda bumonga pididii na konyi kashale na muwa, ebisabikie mu mase a konyi kekele muipee na mu mema abadi batape mu musulo, na abitungu ebimiamine ku nshibo misango musambobidi. 52 Akayikasha nshibo bu ishi butete na mase a konyi, mema abadi batape mu musulo, konyi ke na muwa, katabi ka mutshi wa sedre, izope na buanda bumonga pididii. 53 Kunyima akapoosola konyi ke na muwa mu kisuku paasha pa kibundi na kutoosha nshibo, paapa tayikala butete nya.

54 “Uno nyi muiya pabitale nsudi ya mishindo yoso, ya ku kikoba kia ku mutue sunga ku kisaa, 55 nsudi ya ku bilamba sunga ya mu nshibo, 56 na pabitale biwulua, mpapa na mabashi, 57 bua kutala su kintu kampanda ki butete na su ta ki butete. Uno mmuiya pabitale nsudi.”

15 Yehowa batungunukile na kuisamba na Moyise na Alona, ebalungula’shi: 2 “Esambeyi na bena Isalele nuibalungule’shi: ‘Su muana mulume e na bintu abimutuuku mu musua waye, bino bintu abimuikasha e butete. 3 Yawa muntu e butete muanda wa biabia bintu abimutuuku, biabikala’shi bikuete kutungunuka na kumutuuka mu musua waye, sunga’shi mbikamiine muanka, ekala nka butete.

4 “Lusala loso luikele lulaale yawa muntu e na bintu abimutuuku, aluikala butete, na kintu kioso kiekeele mushale akikala n’akio butete. 5 Muntu oso akumu ku lualua lusala luaye, abitungu atumpe bilamba biaye na etumpe mema, ekala butete mpa na ku kiolua. 6 Muntu oso ashala pa kintu akikalanga yawa muntu e na bintu abimutuuku mushale, asuule* bilamba biaye na etumpe mema, na ekala butete mpa na ku kiolua. 7 Muntu oso akumu yawa muntu e na bintu abimutuuku, asuule bilamba biaye na kuitumpa mema, na ekala butete mpa na ku kiolua. 8 Su muntu e na bintu abimutuuku aasa muntu shi butete mata, yawa abaasa abitungu asuule bilamba biaye na kuitumpa mema, na ekala butete mpa na ku kiolua. 9 Kishalelo kioso akishala yawa muntu e na bintu abimutuuku akikala butete. 10 Muntu oso akumu kintu kikeele yawa muntu mushalele, ekala butete mpa na ku kiolua, na muntu oso asemuna biabia bintu, abitungu asuule bilamba biaye na etumpe mema, ekala butete mpa na ku kiolua. 11 Su muntu e na bintu abimutuuku ta muisuule mema ku maasa, na su akuma muntu, yawa abakumu abitungu asuule bilamba biaye na etumpe mema, ekala butete mpa na ku kiolua. 12 Kintu kioso ki’ema kiabakumu kui yawa muntu atuukibua na bintu, abitungu bekitanye, na kintu kioso kia mutshi abitungu bekitumpe mema.

13 Su biabia bintu abiikasha yawa muntu butete bibemana, abadika mafuku musambobidi bua kutooshibua kuaye, na abitungu atumpe bilamba biaye na kuitumpa mema abadi batape mu musulo, na ekala shi butete. 14 Muifuku dia muanda, aata tukutshikutshi tubidi sunga tuana tua nkudimba tubidi ende nato ku kituelelo kia kashibo k’epema na kuitupa tshite muakuidi kumpala kua Yehowa. 15 Tshite muakuidi aketulambula kumpala kua Yehowa, kamune bua mulambu wa muluisho, na kangi kamune bua mulambu wa kushiika kaalo, na akamuikasha shi butete ku bintu abimutuukanga.

16 “Kadi su bilume biatuuka muana mulume, abitungu etumpe mema mbidi yaye yoso ishima na ekala butete mpa na ku kiolua. 17 Na abitungu asuule bilamba bioso na musokia oso wi na bilume, na ekala butete mpa na ku kiolua.

18 “‘Su muana mulume alaala muana mukashi na amuela bilume, abitungu betumpe mema na abekala butete mpa na ku kiolua.

19 “‘Su muana mukashi e na mase aamutuuku, ekala butete munda mua mafuku musambobidi muanda wa kuadi ku mueshi. Oso muntu amukumu ekala butete mpa na ku kiolua. 20 Kintu kioso kialadila paapa padi butete muanda wakuadi ku mueshi, akikala butete, mpa na kintu kioso ki’ashala akikala butete. 21 Muntu oso akumu lusala luaye abitungu asuule bilamba biaye na etumpe mema, ekala butete mpa na ku kiolua. 22 Muntu oso akumu ku kintu kampanda kioso ki’ekeele mushale, abitungu asuule bilamba biaye na kuitumpa mema, na ekala butete mpa na ku kiolua. 23 Muntu oso akumu lusala, sunga ku kingi kintu kioso kuikeele yawa muana mukashi mushale ekala butete mpa na ku kiolua. 24 Su mulume alaala yawa muana mukashi na mase a yawa muana mukashi e ku mueshi amukuma, yawa muana mulume ekala butete munda mua mafuku musambobidi, na lusala loso luekala mulaale aluikala butete.

25 “‘Su muana mukashi e na mase aamutuuku munda mua mafuku e bungi, aku namu ta mafuku aaye a kuenda ku mueshi, sunga’shi su mase amutuuka kukila mafuku akitaa p’endaa ku mueshi, ekala butete munda mua mafuku oso aamutuuku aa mase, anka bu p’ekalaa ku mueshi. 26 Lusala loso lualaala mu mafuku aamutuuku aa mase, aluikala butete nka bu abikalaa lusala lualaala padi ku mueshi, na pa kintu kioso ki’ashala akikala butete nka bu abikalaa padi ku mueshi. 27 Muntu oso ekukumu ekala butete, na abitungu asuule bilamba biaye, etumpe mema na ekala butete mpa na ku kiolua.

28 “‘Anka, apemana mase kumutuuka, abadika mafuku musambobidi, na kunyima nyi ekale shi butete. 29 Muifuku dia muanda, aata tukutshikutshi tubidi sunga tuana tua nkudimba tubidi, ende nato kui tshite muakuidi ku kituelelo kia kashibo k’epema ka kufumankena. 30 Tshite muakuidi etulambula, kamune bu mulambu wa muluisho, na kangi bu mulambu wa kushiika kaalo, na amuikashe bu shi butete ku mase aamutukanga kumpala kua Yehowa.

31 “‘Biabia abitungu nulame bena Isalele bua’shi tabafuanga mu butete buabo, pa kuluisha tabernakele ande e munkatshi muabo.

32 “‘Uno nyi mmuiya pabitale muana mulume e na bintu abimutuuku, muana mulume e butete muanda wa bilume bimutuukie, 33 muana mukashi e butete muanda wa kuadi ku mueshi, muana mulume sunga muana mukashi e na bintu abimutuuku mu mbidi, na muana mulume alaala mukashi e butete.’”

16 Yehowa besambile na Moyise kunyima kua lufu lua bana balume babidi ba Alona babafuile muanda babaadi besesele kui Yehowa mu mushindo wash’akumiina. 2 Yehowa balunguile Moyise’shi: “Lungula mukuenu Alona’shi, ta nsaa yoso yaaya yadi mulombene kutuela mu mbalo ya kishila kunyima kua kilamba kia lushiko ki kumpala kua mpuuto a mushete, bua’shi tala afua, muanda nekala namueneka kunundu kua mpuuto muikumbi.

3 “Bintu bi’abakafiki nabio kui Alona p’akatuele mu mbalo ya kishila mbino: muana a ngombe mulume bua mulambu wa muluisho na mukooko ulume bua mulambu wa kushiika kaalo. 4 Akafuala musapi wa kishila wa lin, na tuputula tua muushi tua lin bua kushikiila mbidi yaye, na afuala mukaba wa lin na lubango lua lin ku mutue waye. Nyi mbilamba bia kishila. Akebifuala kunyima kua kuitumpa mema.

5 “Akaata bipembue bibidi biana kui muilo wa Isalele bu mulambu wa muluisho, na mukooko ulume umune bu mulambu wa kushiika kaalo.

6 Akupu, Alona akalambula ngombe mulume bu mulambu wa muluisho buaye’ye nabene, na akakitshi bia’shi miluisho yaye na ya ba mu nshibo muaye ibuikiilue.

7 “Kunyima akaata bipembue bibidi ebimiikie kumpala kua Yehowa ku kituelelo kia kashibo k’epema ka kufumankena. 8 Alona akeele bubale bua biabia bipembue bibidi, bubale bumune bua Yehowa, na bungi bubale bua Azazele.* 9 Alona akalambula mbushi abasanguile bua Yehowa na kumutusha bu mulambu wa muluisho. 10 Kadi mbushi abasanguile bua Azazele abitungu bafikie naye e na muwa, bamuimikie kumpala kua Yehowa, babuikile miluisho pa mbidi yaye bua’shi bamutume mu kabaaka bua Azazele.

11 “Alona akalambula ngombe mulume a mulambu wa muluisho buaye’ye nabene, na kukita bia’shi abuikiile miluisho yaye na ya ba mu nshibo muaye; kunyima akayipaa ngombe mulume a mulambu wa muluisho e kuanka buaye.

12 “Akupu, akaata kintu kia kusemuina kaalo kiuule na makala aatembe aakatukila ku kilambuilo ki kumpala kua Yehowa, na maasa abidi auule kabanda ke mapembue, na ende nabio kunyima kua kilamba kia lushiko. 13 Akashiiki dingi kabanda mu kaalo kumpala kua Yehowa, na miishi ya kabanda ayikabuikila mpuuto a mushete e kunundu kua Mushete wa bukamonyi, bua’shi tala afua.

14 “Akaata ndambo ya mase a yawa ngombe mulume, eamiamine na munue waye kumpala kua mpuuto lupese lua kutunduka nguba, na akamiamina ndambo ya mase na munue waye misango musambobidi kumpala kua mpuuto.

15 “Kunyima akayipaa kipembue kia mulambu wa muluisho, kiakia kia muilo, na akatuele na mase aakio kunyima kua kilamba kia lushiko, na kukita na aa mase nka bu biakitshine na mase a ngombe mulume; na akeamiamina dia ku mpuuto na kumpala kua mpuuto.

16 “Akakitshi bia’shi miluisho ya mbalo ya kishila ibuikidiibue pabitale bikitshino bi butete bia bena Isalele na pabitale bilubilo biabo na miluisho yabo, na bino nyi biakakitshi bua kashibo k’epema ka kufumankena, ke munkatshi muabo abo bakuete kukita bikitshino bi butete.

17 “Ungi muntu ta mulombene kuikala mu kashibo k’epema ka kufumankena nsaa ayituele tshite muakuidi bua kukita bia’shi miluisho ya pa mbalo iselele ibuikidiibue mpa na p’atuuku. Akakitshi bia’shi miluisho yaye na ya ba mu nshibo muaye ibuikiilue, mpa na ya kakongie kashima ka bena Isalele.

18 “Kunyima akatuuku bua kuenda ku kilambuilo ki kumpala kua Yehowa, na kukita bia’shi miluisho yaye ibuikiilue, akaata ndambo ya mase a ngombe mulume, na ndambo ya mase a kipembue eyishingie ku nsengua ya kilambuilo ku mpese yoso. 19 Akamiamina dingi ndambo ya mase ku kilambuilo na munue waye misango musambobidi, na kuikitoosha bua kuikikasha kia kishila ku bikitshino bi butete bia bena Isalele.

20 “Kunyima ku’aye kutoosha mbalo ya kishila na kashibo k’epema ka kufumankena, na kilambuilo ku miluisho, paapa akatuusha kipembue ki na muwa. 21 Alona akatenteka maasa aaye oso abidi ku mutue wa kiakia kipembue ki na muwa, na kutonda miluisho yoso na bilubilo bioso bia bena Isalele, akebituulu pa mutue wa kipembue na kuikituma mu kabaaka ku bukuashi bua muntu abadi bapue kusangula. 22 Kipembue akikasemuna bilubilo biabo bioso mu kabaaka, na tshite muakuidi akekitumu mu kabaaka.

23 “Kunyima Alona akatuele mu kashibo k’epema ka kufumankena na akatusha bilamba bia lin bi’ekeele mufuale patuelele mu mbalo ya kishila, ebilekie muamua. 24 Abitungu etumpe mema mu mbalo ya kishila na afuale bingi bilamba; kunyima atuuku alambule mulambu waye wa kushiika kaalo na mulambu wa muilo wa kushiika kaalo, na akitshi bia’shi miluisho yaye na miluisho ya muilo ibuikiilue. 25 Akashiiki muimu wa mulambu wa muluisho ku kilambuilo.

26 “Muntu kalekiele kipembue bua Azazele abitungu asuule bilamba biaye na etumpe mema, kunyima mmulombene kualuka mu kishalelo.

27 Abakende na ngombe mulume a mulambu wa muluisho na kipembue kia mulambu wa muluisho paasha pa kishalelo, biabia biabatshile mase benda nao ku mbalo ya kishila bua kubuikila miluisho, na abakashiiki misokia yayo, muita wayo, na tufi tuayo mu kaalo. 28 Muntu ebishiiki mu kaalo abitungu asuule bilamba biaye na etumpe mema, kunyima mmulombene kualuka mu kishalelo.

29 “Uno muanda aukekala bu muiya wa loso kuanudi: Muifuku di’ekumi dia mueshi wa musambobidi, anukenyooko,* na ta nui balombene kukita mudimo su ngumune, biabikala muana a kibundi sunga muntu muenyi mushale munkatshi muenu. 30 Mu diadia efuku, abakabuikiila miluisho yenu, buanudia kuikala batooshibue. Anuikala batooshibue ku miluisho yenu yoso kumpala kua Yehowa. 31 Nyi efuku dia sabato dianudia kuikisha ku midimo yenu yoso, na abitungu nuinyookie. Mmuiya wa loso.

32 “Tshite muakuidi muedibue muimu na abadi batuule ku mudimo bua kufuba pa mbalo ya nshaye bu tshite muakuidi, akakitshi bia’shi miluisho ibuikiilue na akafuala bilamba bia lin, bilamba bia kishila. 33 Akakitshi bia’shi miluisho ya mbalo ikile kishila, ya kashibo k’epema ka kufumankena na ya kilambuilo ibuikiilue, na akakitshi bia’shi miluisho ya ba tshite muakuidi na miluisho ya bantu boso ba mu kakongie ibuikiilue. 34 Bino abikekala bu muiya wa loso kuanudi, bua kukita bia’shi miluisho yoso ya bena Isalele ibuikiilue musango umune ku kipua kioso.”

Biabia Alona bakitshine nka bu bibaadi Yehowa mulungule Moyise.

17 Yehowa balunguile dingi Moyise’shi: 2 “Esambe na Alona na bana baye na bena Isalele boso, webalungule’shi, ‘Yehowa amba bino:

3 “‘“Su muntu a mu muilo wa Isalele ayipaa ngombe sunga mukooko ulume wana, sunga mbushi, biabikala mu kishalelo sunga paasha pa kishalelo, 4 kushii kufika naye ku kituelelo kia kashibo k’epema ka kufumankena bua kumulambula Yehowa kumpala kua tabernakele a Yehowa, yawa muntu ekala n’ebasa dia mase. Muanda bapongoola mase, na abitungu kukaasha* yawa muntu munkatshi mua muilo waye. 5 Bino abikuasha bua’shi milambu yabalambulanga kui bena Isalele mu kisuku, babangie kufika nayo binobino kui Yehowa, ku kituelelo kia kashibo k’epema ka kufumankena, bua kuiyipa tshite muakuidi. Abakatuusha ino milambu bu milambu ya butaale kui Yehowa. 6 Na tshite muakuidi akamiamina mase ku kilambuilo kia Yehowa, ku kituelelo kia kashibo k’epema ka kufumankena, na kushiika muimu mu kaalo buaudia kutuusha mapembue e buwa kui Yehowa. 7 Biabia ta mbalombene kulambula dingi milambu kui ba demo* be bu bipembue babakuete kutambuka nabo masandi. Uno awikala bu muiya wa loso buenu munda mua bipungo bienu bioso.”’

8 “W’ebalungule’shi: ‘Muntu oso a mu muilo wa Isalele sunga muenyi mushale munkatshi muenu atusha mulambu wa kushiika sunga ungi mulambu 9 sh’eutuala ku kituelelo kia kashibo k’epema ka kufumankena bua kuiulambula Yehowa, abitungu kumukaasha munkatshi mua muilo waye.

10 “‘Su muntu a mu muilo wa Isalele sunga muenyi mushale munkatshi muenu adia mase a kintu kioso kiakia, mbinyibinyi nakapele yawa muntu kuete kudia mase na kumukaasha munkatshi mua muilo waye. 11 Muanda muwa wa kipangua kioso wi mu mase aakio, na ami nemuinupe anka ku kilambuilo bua kubuikiila miluisho yenu, muanda mase ngi aakuasha bua kubuikiila miluisho ku bukuashi bua muwa wi muanka. 12 Nyi buakinyi nalungula bena Isalele’shi: “Muntu su ngumune a munkatshi muenu ta mulombene kudia mase, sunga muenyi mushale munkatshi muenu ta mulombene kuiadia.”

13 “‘Su muina Isalele sunga muenyi mushale munkatshi muenu bakuata nyema sunga konyi akadibua ku muteo waye, abitungu apongoole mase paashi na kuiabuikiila lusenga. 14 Muanda muwa wa kipangua kioso mmase aakio, muanda muwa wi mu mase. Nyi buakinyi nalungula bena Isalele’shi: “Ta nui balombene kudia mase a kipangua su nkimune, muanda muwa wa kipangua kioso wi mu mase aakio. Muntu oso eadi abitungu kumuipaa.” 15 Su muntu oso yawa, biabikala muina Isalele sunga muenyi adia nyema adi mupete mufue, sunga abadi basasule kui ungi nyema a bukielo, abitungu asuule bilamba biaye na etumpe mema, ekala butete mpa na ku kiolua; kunyima t’ekala’nyi butete nya. 16 Kadi su ta musuule* bilamba na kuitumpa mema, akasemuna bushito bua kilubilo kiaye.’”

18 Yehowa batungunukile na kuisamba na Moyise, amulungula’shi: 2 “Esambe na bena Isalele, webalungule’shi, ‘Nnami Yehowa Efile Mukulu eenu. 3 Ta nui balombene kukita mianda bu bi’abakitanga mu Ejipitu, eumbo dianuikalanga bashale, na ta nui balombene kukita mianda bu biabakitaa mu Kanaana muanyende neenu. Ta nui balombene kulonda bipikua biabo. 4 Anukakookiela miiya yande, na kulama mayi ande a kulonda, na anukatambukila muanka. Nnami Yehowa Efile Mukulu eenu. 5 Anukalama mayi ande a kulonda na miiya yande; muntu oso akakitshi biabia akekala na muwa ku bukuashi buayo. Nnami Yehowa.

6 “‘Muntu su ngumune a munkatshi muenu ta mulombene kuisesela* pepi na mukuabo bua kumulaala.* Nnami Yehowa. 7 Tue mulombene kuilaalena na nshobe, na tue mulombene kulaala nyinobe. Muanda nyinobe, biabia tue mulombene kumulaala.

8 “‘Tue mulombene kulaala mukashi a nshobe. Muanda kukita biabia nkukuatshisha nshobe buufu.*

9 “‘Tue mulombene kulaala mukuenu mukashi,* biabikala muana a nshobe sunga muana a nyinobe, sunga ekala mutandibue mu nshibo imune nobe, sunga ekala mutandibue mu ingi nshibo.

10 “‘Tue mulombene kulaala muana mukashi a muan’obe mulume, sunga muana mukashi a muan’obe mukashi, muanda mmusua oobe

11 “‘Tue mulombene kulaala muana mukashi a mukashi a nshobe, yawa abadi batande kui nshobe, muanda mmukuenu mukashi.

12 “‘Tue mulombene kulaala mukuabo na nshobe mukashi, muanda mmase amune na nshobe.

13 “‘Tue mulombene kulaala mukuabo na nyinobe mukashi, muanda mmase amune na nyinobe.

14 “‘Tue mulombene kukuatshisha mukuabo na nshobe buufu* pa kulaala mukashi aaye. Muanda e bu nyinobe.

15 Tue mulombene kulaala mukashi a muan’obe, muanda mmukashi a muan’obe, biabia tue mulombene kumulaala nya.

16 “‘Tue mulombene kulaala mukashi a mukuenu, muanda nkukuatshisha mukuenu buufu.*

17 “‘Tue mulombene kulaala mukashi mpa na muan’aye. Tue mulombene kuata muana mukashi a muan’aye mulume sunga muana mukashi a muan’aye mukashi bua kumulaala. Muanda mbena kifuko; kukita biabia mmuanda wi buufu.

18 “‘Tue mulombene kuibakila mukuabo na mukashi oobe bua’shi ekale bu mukua-naaye, na kumulaala paki mukuabo mukashi na muwa.

19 “‘Tue mulombene kulaala mukashi padi ku mueshi, muanda e butete.

20 “‘Tue mulombene kulaala mukashi a muinobe, muanda weyikasha butete.

21 “‘Tue mulombene kukumiina’shi balambule muan’obe su ngumune kui Moleke. Tue mulombene kusabulusha eshina di’Efile Mukulu oobe mu wawa mushindo. Nnami Yehowa.

22 “‘Tue mulombene kulaala muana mulume bu biabalalaa muana mukashi. Mmuanda wi bubi bukile.

23 “‘Muana mulume ta mulombene kulaala nyema, muanda eyikasha butete; sunga muana mukashi ta mulombene kuipaana aye nabene kui nyema bua’shi nyema amulaale. Mmuanda ukilekile bubi.

24 “‘Ta nui balombene kuiyikasha butete sunga na umune wa ku ino mianda, muanda ku ino mianda yoso, nyi kubaadi bisamba biambingi kumpala kuenu biyikashe butete. 25 Nyi buakinyi eumbo di butete na nakedinyooko pa muanda wa kilema kiadio, na eumbo adikalasa bantu be muanka. 26 Kadi anue, abitungu nulame mayi ande a kulonda na miiya yande, na ta nui balombene kukita muanda su ngumune wa ku ino mianda i butete, biabikala muina Isalele sunga muenyi mushale munkatshi muenu. 27 Muanda bantu babaadi bashale muiumbo kumpala kuenu babaadi bakite ino mianda yoso i bubi, na binobino eumbo di butete 28 Paapa eumbo t’adikenulasa muanda wa’shi nubediluisha, bu bi’adikalasa bantu babaadi bemushale kumpala kuenu. 29 Muntu oso akitshi umune wa ku ino mianda i bubi, abitungu kumukatusha* munkatshi mua muilo waye. 30 Abitungu nulame miiya yande, na tanukitanga muanda su ngumune wi bubi wa ku mianda ibaabadi bakite kumpala kuenu, bua’shi tanuiyikashanga butete ku ino mianda. Nnami Yehowa Efile Mukulu eenu.’”

19 Yehowa besambile’nyi na Moyise, amba’shi: 2 “Esambe na muilo ushima wa bena Isalele, webalungule’shi: ‘Abitungu nuikale beselele, muanda ami Yehowa Efile Mukulu eenu n’eselele.

3 “‘Abitungu oso a kuanudi anemekie* nshaye na nyinaye, na kulama sabato yande. Nnami Yehowa Efile Mukulu eenu. 4 Tanulondanga b’efile bashi na muulo, sunga kuikitshina b’efile ba kilonda kisunguulue. Nnami Yehowa Efile Mukulu eenu.

5 “‘Su anulambula Yehowa mulambu wa butaale, nuiulambule mu mushindo wa’shi enukumiine. 6 Abitungu kuiudia nka mu diadia efuku na muifuku adilondo, kadi biabia abishala mpa na muifuku dia kasatu mbia kushiika mu kaalo. 7 Su muntu adia kantu su nkapeela ka ku wawa mulambu muifuku dia kasatu, paapa taudi bu kintu ki butete kiabashi balombene kukumiina. 8 Yawa eudi akasemuna bushito bua kilema kiaye, muanda baluisha kintu kia kishila kia Yehowa, na yawa muntu abitungu kumukaasha* munkatshi mua muilo waye.

9 “‘P’anuumbula bintu bia mu mafuba* muiumbo dienu, tanui balombene kuumbula bintu bioso mpa na biabia bi ku masongo a efuba, na tanui balombene kusangula biabia abipono p’anuumbula. 10 Dingi, tanui balombene kupumbuula tukuba tua nfinyo tua muifuba dienu dia nfinyo, sunga kusangula tukuba tua nfinyo tupone muifuba dienu dia nfinyo. Anukebilekie bua balanda na benyi. Nnami Yehowa Efile Mukulu eenu.

11 “‘Tue mulombene kuiba, tue mulombene kudimba, na tanuikitshishenanga mianda na bulamalama. 12 Ta nui balombene kuitshipa muishina diande bua mianda ya madimi, na kuluisha eshina di’Efile Mukulu eenu. Nnami Yehowa. 13 Tue mulombene kudiila muinobe bintu biaye, sunga kunyenga muntu bintu biaye. Tue mulombene kulama bufuku bushima efuto dia muntu odi muate ku mudimo mpa na p’abutooko.

14 “‘Tue mulombene kuela nshikue mulua, sunga kutuula kikokoshi kumpala kua mpofu, abitungu otshine Efile Mukulu oobe. Nnami Yehowa.

15 “‘Ta nui balombene kusambisha bilumbu na kukutua kululama. Tue mulombene kulesha mulanda ntondo sunga kuikala ku lupese lua mpeta. Okasambisha muinobe na kululama.

16 “‘Tue mulombene kupalakasha mianda ya madimi munkatshi mua muilo wenu. Tue mulombene kukita kintu su nkimune kia kutuula muwa wa muinobe* mu masaku. Nnami Yehowa.

17 “‘Tue mulombene kushikua mukuenu muishimba diobe. Abitungu olangie mukuenu bua’shi tosemunanga naye muluisho.

18 “‘Tueobuelanga* sunga kulamina muinobe nsungu, abitungu ofule muinobe nka bu biodi muifule obe nabene. Nnami Yehowa.

19 “Abitungu nulame miiya yande: Ta nui balombene kukita bia’shi nyema yenu ibidi ilekene itentamishene. Tue mulombene kukuna ntete ya mishindo ibidi ilekene muifuba diobe, na tue mulombene kufuala kilamba kikitshibue na buanda bua mishindo ibidi ilekene.

20 “‘Su muntu alaala mukashi, aku namu yawa mukashi mmufubi abadi balamine ungi muntu, na tababandile kumukuula sunga kumupa bulungantu, akuikala dinyoka. Anka t’abebayipaa nya, muanda t’abekalanga babande kuposola yawa mukashi. 21 Yawa muntu akafiki na mulambu wa kuitopeka kui Yehowa ku kituelelo kia kashibo k’epema ka kufumankena, mulambu wa kuitopeka wa mukooko ulume. 22 Tshite muakuidi akakitshi bia’shi muluisho wabadi bakite kui yawa muntu ubuikidibue kumpala kua Yehowa na wawa mukooko ulume wa mulambu wa kuitopeka, na abakamufuila lusa bua muluisho wadi mukite.

23 “‘Su nubatuele muiumbo na nuakuna mutshi wa kudia, anukamono’shi bikuba biao bi butete, na mbikandikiibue. Bikuba biao abikala bikandikiibue munda mua bipua bisatu. Ta nui balombene kuibidia. 24 Kadi mu kipua kia kananka, bikuba biao bioso abikala bia kishila, buanudia kusanka kumpala kua Yehowa. 25 Na mu kipua kia katano, nui balombene kudia bikuba biao na kuibikumbasha ku bintu bi’anuumbula. Nnami Yehowa Efile Mukulu eenu.

26 Ta nui balombene kudia kintu su nkimune ki na mase.

“‘Ta nui balombene kukimba kuuka mianda ayifiki kumpala sunga kukita mianda ya malenganyi.

27 “‘Ta nui balombene kukuula nyene i ku mpese kua mitue yenu, sunga kuluisha nsongo ya miefu yenu.

28 “‘Tanuitapanga nsalo pa mbidi muanda wa muntu mufue, na tanuisolanga pa mbidi. Nnami Yehowa.

29 “‘Tokuatshishanga muan’obe mukashi buufu pa kumuikasha bu ndumba, bisumanga eumbo adiluila na bundumba na adikala diule na bikitshino bi bubi.

30 “‘Abitungu nulame sabato yande, na kunemeka mbalo yande ya kishila. Nnami Yehowa.

31 “‘Tuendanga kui bantu ababukaa, na tuepushanga mianda kui bantu abakula mianda ayifiki kumpala, bisumanga biabia abikuikasha butete. Nnami Yehowa Efile Mukulu oobe.

32 “‘Okemana kumpala kua muntu e na nfuidi, na abitungu kunemeka muntu mukulu, na kutshina Efile Mukulu oobe. Nnami Yehowa.

33 “‘Su muenyi ashala nobe muiumbo dienu, tomukiengieshanga. 34 Muenyi mushale nenu ekala kuanudi nka bu muan’a kibundi; abitungu kumufula nka bu’be nabene, muanda n’anue namu nubaadi beenyi mu nsenga ya Ejipitu. Nnami Yehowa Efile Mukulu oobe.

35 “‘Tue mulombene kufubisha bipimo bia madimi mu kupima bintu bia bula, bia bushito sunga bia bukata. 36 Anukafubisha bipimo bi buwa, bipimo bi buwa bia bintu bi bushito, kipimo ki buwa kia bintu biume,* na kipimo ki buwa kia bintu bisungulukie.* Nnami Yehowa Efile Mukulu oobe, baadi mukutushe mu nsenga ya Ejipitu. 37 Biabia anukalama mayi ande oso a kulonda na miiya yande yoso na kuiyikookiela. Nnami Yehowa.’”

20 Yehowa besambile dingi na Moyise, amulungula’shi: 2 “Lungula bena Isalele’shi: ‘Muina Isalele oso na muenyi mushale mu Isalele alambula muan’aye kui Moleke, abitungu kumuipaa binyibinyi. Bantu ba muiumbo abakamuipaa pa kumuasa mabue. 3 Nakasumbushena yawa muntu, na nakamukatusha* munkatshi mua muilo waye, muanda balambula muan’aye kui Moleke. Baluisha mbalo yande ya kishila na baluisha eshina diande dia kishila. 4 Su bantu ba muiumbo babuikila meso mu kukumiina kuabo ku muanda wi biabia apakalambula yawa muntu muan’aye kui Moleke kushi kuipaa yawa muntu, 5 paapa ami nabene nakasumbushena yawa muntu na kifuko kiaye. Nakamukatusha munkatshi mua muilo waye, pamune na boso abamukuatshishenanga mu kutambuka masandi na Moleke.

6 “‘Bua muntu ende kui bantu ababukaa na baaba abakulaa mianda ayifiki kumpala bua kutambuka nabo masandi a mu kikudi, nakamusumbushena na kumukatusha munkatshi mua muilo waye.

7 “‘Abitungu nuiyikashe ba kishila na kufika beselele, muanda nnami Yehowa Efile Mukulu eenu. 8 Na abitungu nulame mayi ande a kulonda na kuiakokiela. Nnami Yehowa enuikasha beselele.

9 “‘Muntu su ngumune eele nshaye sunga nyinaye mulua abitungu kumuipaa. Bu biadi muele nshaye sunga nyinaye mulua, mase aaye e pa mbidi paaye.

10 “‘Binobino pabitale muntu atambuka lusandi na mukashi a ungi muntu: Abitungu kuipaa yawa muntu batambuka lusandi na mukashi a muinaye, kuamba’shi yawa muana mulume na yawa muana mukashi. 11 Muntu alaala mukashi a nshaye akuatshisha nshaye buufu.* Baba bantu boso babidi abitungu kuibayipaa. Mase aabo e pa mbidi pabo. 12 Su muntu alaala mukashi a muan’aye, abitungu kuibayipaa boso babidi. Nyi mmuanda ukilekile bubi. Mase aabo aekala pa mbidi pabo.

13 “‘Su mulume alaala muinaye mulume bu bi’abalaalaa na muana mukashi, boso buabo babakitshi muanda wi bubi. Abitungu kuibepaa. Mase aabo e pa mbidi pabo.

14 “‘Su muntu aata mukashi, akupu alaala nyinaye na yawa mukashi, mmuanda ukile butete, abitungu kuibashiika boso basatu mu kaalo, bua’shi muikeelo wi butete tautungunukanga munkatshi muenu.

15 “‘Su muntu alaala nyema, abitungu bamuipee mpa na kuipaa yawa nyema. 16 Su muana mukashi epaana aye nabene kui nyema bua’shi nyema amulaale, abitungu wepee yawa muana mukashi na yawa nyema. Abitungu kuibayipaa binyibinyi. Mase aabo aekala pa mbidi pabo.

17 “‘Su muana mulume alaala mukuabo mukashi, biabikala muana a nshaye sunga muana a nyinaye, na bemonena misua, nyi mmuanda wi buufu. Abitungu kuibayipaa kumpala kua muilo oso ushima. Muanda bakuatshisha mukuabo mukashi buufu. Akasemuna bushito bua kilema kiaye.

18 “‘Su muana mulume alaala muana mukashi e ku mueshi, bubidi buabo babamono mase aaye a ku mueshi. Abitungu kuibakatusha* munkatshi mua muilo wabo.

19 “‘Tue mulombene kulaala mukuabo na nshobe mukashi sunga mukuabo na nyinobe mukashi, muanda biabia abikuatshisha mukuenu buufu. Boso buenu anukasemuna bushito bua kilubilo kienu. 20 Su muntu alaala mukashi a mukuabo na nshaye sunga mukashi a masaba* aaye, bakuatshisha masaba aaye buufu. Boso buabo abakasemuna bushito bua kilubilo kiabo. Abitungu bafue* kushi kutanda. 21 Su muntu aata mukashi a mukuabo, nyi mmuanda wi buufu. Bakuatshisha mukuabo buufu. Abitungu bafue* kushi kutanda.

22 “‘Biabia anukalama mayi ande oso a kulonda na miiya yande yoso na kuiyikookiela, bua’shi mu nsenga yanyende nenu buanudia nkashala tayinulasanga. 23 T’abitungu nulonde bipikua bia miilo yankabingi kumpala kuenu; muanda ino miilo ngikite ino mianda yoso, nyi buakinyi nemuiyishikue. 24 Nyi buakinyi nemuinulungule’shi: “Anukaata nsenga yabo, na nakenupa yanka bu yenu, nsenga ayalaala mabeele na buuki. Nnami Yehowa Efile Mukulu eenu, muinutuule pa buenu munkatshi mua ingi miilo.” 25 Abitungu nutuule kuilekena pankatshi pa nyema e butete na shi butete, pankatshi pa konyi ke butete na kashi butete; ta nui balombene kuiyikasha butete na nyema, sunga konyi, sunga kingi kintu kioso akiikaka mu nsenga, kiakia kiandi mutuule ku lupese buanudia kuikimona bu ki butete. 26 Abitungu nuikale beselele kuandi, muanda ami Yehowa n’eselele, na nemuinutuule pa buenu munkatshi mua miilo bua’shi nuikale bantu bande.

27 “‘Muana mulume oso yawa sunga muana mukashi abuku, sunga akula mianda ayifiki kumpala, abitungu kumuipaa binyibinyi. Abitungu kuibaasa mabue mpa na biabafu. Mase aabo e pa mbidi pabo.’”

21 Yehowa nkulungula dingi Moyise’shi: “Esambe na ba tshite muakuidi bana ba Alona, webalungule’shi: ‘Muntu su ngumune a munkatshi muenu teyikashanga butete pa kuifubuila pepi na kitanda munkatshi mua muilo wabo. 2 Mmulombene kuibikita nka su mukuabo a munda baafu, sunga nyinaye, nshaye, muan’aye mulume, muan’aye mukashi sunga mukuabo mulume, 3 mmulombene dingi kuiyikasha butete bua mukuabo mukashi a munda, anka su ki kamame na tababandile kumuibakila. 4 Ta mulombene kuiyikasha butete sunga kuiluisha bua mukashi e na mulume a munkatshi mua muilo wabo. 5 Ba tshite muakuidi ta mbalombene kukuula nyene mu mitue yabo sunga kuluisha nsongo ya miefu yabo mpa na kuitapa pa mbidi. 6 Abitungu bekale beselele kui Efile Mukulu aabo, na t’abitungu basabulushe eshina di’Efile Mukulu aabo nya, muanda bakuete kutuusha milambu ya Yehowa ishikiibue mu kaalo, na bia kudia bi’Efile Mukulu aabo, nyi buakinyi abitungu bekale ba kishila. 7 Ta mbalombene kuibakila ndumba, sunga mukashi abadi bekashe butete, sunga mukashi muipelene na mulume aaye, muanda tshite muakuidi nga kishila kui Efile Mukulu aaye. 8 Abitungu omuikashe a kishila, muanda naye akatuusha bia kudia bi’Efile Mukulu oobe. Muanda ami Yehowa enuikasha ba kishila n’eselele.

9 “‘Binobino su muana mukashi a tshite muakuidi eluisha aye nabene p’aye kutambuka kindumba, kuete kukuatshisha nshaye buufu. Biabia abitungu kumushiika kaalo.

10 “‘Tshite muakuidi mukata a ku bakuabo, abaabadi beele muimu wa kishila mu mutue na abaabadi batuule ku mudimo bua kufuala bilamba bia bu tshite muakuidi, ta mulombene kulekiela nyene yaye ishi ilumbuule, sunga kusaana bilamba biaye. 11 Tshite muakuidi mukata ta mulombene kuifubuila pepi na kitanda kia muntu; biakikala kia nshaye sunga kia nyinaye, ta mulombene kuibikita, bua kupela kuikala butete. 12 Ta mulombene kutuuka mu mbalo ya kishila sunga kuluisha mbalo ya kishila y’Efile Mukulu aaye, muanda kitunduilo kia kuilambula kui Efile Mukulu, muimu w’Efile Mukulu aaye wi pa mbidi paye. Nnami Yehowa.

13 “‘Abitungu ayibakile nka mukashi kamame. 14 Ta mulombene kuiyibakishena na mukashi a mu lufuila, mukashi muipelene na mulume aaye, mukashi abadi baluishe sunga ndumba; anka akebakila mukashi kamame a munkatshi mua muilo wabo. 15 Ta mulombene kuluisha bana baye munkatshi mua muilo waye, muanda nnami Yehowa baadi mumuikashe a kishila.’”

16 Yehowa baadi mutungunukie na kuisamba na Moyise, amulungula’shi: 17 “Lungula Alona’shi: ‘Muntu su ngumune a ku bana bobe e na kilema ta mulombene kuiseesela* ku kilambuilo bua kulambula Efile Mukulu aaye bidibua mu bipungo bienu bioso. 18 Su muntu e na kilema, ta mulombene kuiseesela ku kilambuilo nya: Yawa oso muikale mpofu, kishetshi, sunga e na mpala ipengame, sunga e na kipindi kia mbidi kila kukila bingi, 19 muntu e na luao lutshokokie sunga eyasa ditshokokie, 20 muntu e na katumba, kipiindi, muntu e na eyiso di na kilema, muntu e na mpusu, muntu e na kinkuse* sunga e na mabudi aluile. 21 Muana mulume su ngumune e na kilema a ku bana ba tshite muakuidi Alona ta mulombene kuifubuila pepi bua kulambula Yehowa milambu ishikiibue mu kaalo. Bu biadi na kilema, ta mulombene kuiseesela bua kutuusha bia kudia bi’Efile Mukulu nya. 22 E kudia bia kudia bi’Efile Mukulu aaye bia ku bintu bikile kishila na bia ku bintu bia kishila. 23 Anka ta mulombene kuiseesela pepi na kilamba kia lushiko sunga kuiseesela pepi na kilambuilo, muanda e na kilema; na ta mulombene kuluisha mbalo ya kishila, muanda nnami Yehowa ebekasha ba kishila.’”

24 Paapa Moyise nkuisamba na Alona na bana baye mpa na muilo ushima wa Isalele.

22 Yehowa nkuisamba dingi na Moyise, nkumulungula’shi: 2 “Lungula Alona na bana baye badimukie pabitale mushindo wabafubisha bintu bia kishila bia bena Isalele, na tabaluishanga eshina diande dia kishila pabitale bintu biabekasha bia kishila buande. Nnami Yehowa. 3 Ebalungule’shi: ‘Mu bipungo bienu bioso, muntu oso a ku bana benu su ngumune e butete esesela pepi na bintu bia kishila, biabekasha bia kishila kui bena Isalele bua Yehowa, abitungu kuipaa yawa muntu. Nnami Yehowa. 4 Muntu su ngumune a ku bana ba Alona e na nsudi sunga e na bintu abimutuuku mu musua, ta mulombene kudia bintu bia kishila mpa na p’afiki shi butete, sunga muntu mukume muntu e butete kuekalanga mukume kitanda, sunga muntu ekalanga mutushe bilume, 5 sunga yawa akumu tu bipangua* tui butete atutambukaa mu bisaka, sunga yawa akumu muntu e butete bua muanda kampanda oso wawa, bilombene kumuikasha butete. 6 Yawa ebikumu ekala butete mpa na ku kiolua, na t’adi kintu kia kishila su nkimune, abitungu etumpe mema. 7 Apapono nguba t’ekala dingi butete nya, paapa mmulombene kudia bintu bia kishila, muanda mbia kudia biaye. 8 Na ta mulombene dingi kudia nyema aadi mupete mufue, sunga abadi basasule kui nyema a bukielo, na kuiyikasha butete na yawa nyema. Nnami Yehowa.

9 “‘Abitungu balame miiya yande, na tabakitanga muanda wi bubi su ngumune bua’shi tala bafua, muanda wa’shi babaluisha bintu bia kishila. Nnami Yehowa ebekasha ba kishila.

10 “‘Muntu su ngumune shi na matalua ta mulombene kudia kintu kia kishila su nkimune. Sunga muenyi mushale kua tshite muakuidi, sunga muntu abadi baate ku mudimo ta mulombene kudia kintu kia kishila su nkimune. 11 Kadi su tshite muakuidi aula muntu na makuta aaye, yawa muntu mmulombene kudia bintu bia kishila. Na mpika abadi batandile mu nshibo ya tshite muakuidi mmulombene kudia bintu bia kishila. 12 Su muana mukashi a tshite muakuidi bamuibakila kui muntu shi tshite muakuidi, ta mulombene kudia bintu bia kishila bi’abatusha kui muilo. 13 Kadi su muana a tshite muakuidi afuisha mulume, sunga’shi epeleena na mulume aaye, su te na muana, na su alukiila ashala kua nshaye nka bu pabaadi ku bukinga, mmulombene kudia bia kudia bia nshaye; kadi muntu su ngumune shi na matalua ta mulombene kuibidia.

14 “‘Binobino, su muntu adia kintu kia kishila kushi’ye kuuka, abitungu akumbashe kia mbitano kia muulo wa kiakia kintu na kutuusha mulambu wi selele kui tshite muakuidi. 15 Biabia t’abitungu’shi ba tshite muakuidi baate na muulo upeela bintu bia kishila bia bena Isalele biabakuete kulambula Yehowa, 16 na kukita bia’shi bantu banyookibue p’abo kudia bintu biabo bia kishila; muanda nnami Yehowa ebekasha beselele.’”

17 Yehowa batungunukile na kuisamba na Moyise, amba’shi: 18 “Lungula Alona na bana baye na bena Isalele boso’shi: ‘Su muina Isalele sunga muenyi mushale mu Isalele alambula mulambu wa kushiika kaalo kui Yehowa bua kukumbasha mitshipo yadi mukite, sunga p’atusha mulambu wa mu kukumiina kuaye, 19 su akiebe kukuminyiibua, abitungu alambule nyema mulume shi na kilema aadi muate mu nyema yaye ikata, mikooko ilume iki yaana, sunga mbushi. 20 Ta nui balombene kulambula nyema ena kilema, muanda panukitshi biabia tanukuminyiibua nya.

21 “‘Su muntu alambula Yehowa mulambu wa butaale bua kukumbasha mutshipo waye, sunga bu mulambu wa mu kukumiina kuaye, abitungu alambule nyema shi na kilema a mu nyema yaye ikata sunga ipeela, bua’shi amone bia kukumiinyibua. Yawa nyema ta mulombene kuikala na kilema su nkimune. 22 Ta nui balombene kulambula nyema mufue meso, mutshokokie, mutapikie, e na nsundu, e na mpusu sunga e na kinkuse;* ta nui balombene kulambula Yehowa nyema e biabia su ngumune, sunga kulambula nyema e biabia ku kilambuilo bua Yehowa. 23 We mulombene kulambula ngombe mulume sunga mukooko wi na mukoolo ula sunga mboko ila ikile ingi bu mulambu wa mu kukumiina kobe, kadi ta ba kuiukumiina bu mulambu wa kulombasha mutshipo. 24 Tue mulombene kulambula Yehowa nyema e na mabudi aluile, asaasukie, abadi batungule sunga abadi batshibe, ta nui balombene kulambula nyema i biabia muiumbo dienu. 25 Ta nui balombene kukumiina nyema i biabia ku maasa kua muenyi bua kuiyituusha bu kidibua ki’Efile Mukulu eenu, muanda tayi buwa na i na kilema. Tayikakuminyibua nya.’”

26 Yehowa bakuile’nyi na Moyise, amulungula’shi: 27 “P’abatanda muana a ngombe mulume sunga muana a mukooko ulume, sunga mbushi, akashala na nyinaye munda mua mafuku musambobidi, kadi kubanga muifuku dia muanda mbalombene kumukumiina bu mulambu, mulambu ushiikibue mu kaalo bua Yehowa. 28 Pabitale ngombe sunga mukooko, ta nui balombene kuiwipaa efuku dimune na muana aao.

29 “Su anulambula Yehowa mulambu wa lutumbu, nuiulambule mu mushindo wadia kuinukumiina. 30 Abitungu kuiudia nka diadia efuku. Ta nui balombene kuleka kantu su nkapeela mpa na ku nakashika. Nnami Yehowa.

31 “Abitungu nulame miiya yande na kuiyitumikila. Nnami Yehowa. 32 Ta nui balombene kusabuula eshina diande dia kishila, na abitungu kungikasha a kishila munkatshi mua bena Isalele. Nnami Yehowa enuikasha ba kishila, 33 enutuusha mu nsenga ya Ejipitu bua’shi neleeshe bu Efile Mukulu kuanudi. Nnami Yehowa.”

23 Yehowa batungunukile na kuisamba na Moyise, amulungula’shi: 2 “Esambe na bena Isalele, webalungule’shi: ‘Misangelo ya bipungo ya Yehowa yanukaukisha, ayikala bikongeno bia kishila. Ino nyi misangelo yanukakitshi:

3 “‘Anukakitshi midimo munda mua mafuku asamombo, kadi muifuku dia musambobidi nyi efuku dia sabato dia kuikisha ku midimo yoso, nkikongeno kia kishila. Ta nui balombene kukita mudimo su ngumune. Diadia efuku adikala sabato bua Yehowa mu ma mbalo oso anukashala.

4 “‘Misangelo ya bipungo ya Yehowa, bikongeno bia kishila bianukaukisha mu kipungo kiabio kitshibibue mbino: 5 Muifuku 14 dia mueshi wa kumpala pa kamuilua nshobe, nyi Pasaka bua Yehowa.

6 “‘Muifuku 15 dia wawa mueshi akuikala Musangelo wa Mikate ishi kitatusho bua Yehowa. Munda mua mafuku musambobidi anukadi mikate ishi kitatusho. 7 Muifuku dia kumpala, akuikala kikongeno kia kishila. Tanukakitshi mudimo wi bukopo su ngumune. 8 Anka anukalambula Yehowa mulambu ushikiibue mu kaalo munda mua mafuku musambobidi. Muifuku dia musambobidi, akuikala kikongeno kia kishila. Ta nui balombene kukita mudimo wi bukopo su ngumune.’”

9 Yehowa batungunukile na kuisamba na Moyise, nkuamba’shi: 10 “Lungula bena Isalele’shi: ‘Panukatuele muiumbo dianenupa, na panukaumbula bintu bia muanka, abitungu nufikie na ndambo ya bintu bienu bia kumpala bianuumbula kui tshite muakuidi. 11 Akapuku biabia bintu aku-naku kumpala kua Yehowa bua’shi nukumiinyibue. Tshite muakuidi akebipuku butookie bu’efuku dia Sabato. 12 Muifuku dianupuku biabia bintu, abitungu nulambule Yehowa mukooko ulume uki wana ushi na kilema wi mu kipua kimune, bu mulambu wa kushiika kaalo. 13 Mulambu wa ntete wa wawa mukooko, awikala bi’ekumi bibidi bia kipimo kia efa* kia bukula buibuwa busangibue na muimu, bu mulambu wa Yehowa ushiikibue mu kaalo autusha mapembue e buwa. Mulambu wao wa kitomuanga awikala kia mbinanka kia kipimo kia hine* kia nfinyo. 14 Ta nui balombene kudia mukate su ngumune, sunga ntete ikangie, sunga ntete ipia mpa na ku diadia efuku, panufiki na mulambu w’Efile Mukulu. Nyi mmuiya wa loso munda mua bipungo bienu bioso, koso kuanukashala.

15 “‘Abitungu nubadikie sabato musambobidi, kubanga butookie bu’efuku dia sabato, kubanga muifuku dianufiki na ndambo ya biumbuluanga bia mulambu wa kupuka. Abitungu yaaya mbingo ikale ishima. 16 Okabadika mafuku 50 mpa na kuifuku adilondo dia sabato a musambobidi, paapa okalambula mulambu upia wa ntete kui Yehowa. 17 Anukafiki kuenu na mikate ibidi bu mulambu wa kupuka. Yaaya mikate abitungu kuiyikita na bi’ekumi bibidi bia efa a bukula bui buwa. Abitungu kuiyikita na kitatusho, mbiumbuluanga bibedi bia Yehowa. 18 Anukalambula yaaya mikate na mikooko ilume yana musambobidi ishi na kilema ya kipua kimune, na ngombe muana mulume na mikooko ibidi ilume. Ayikala bu mulambu wa kushiika kaalo bua Yehowa, pamune na mulambu wa ntete na milambu ya bitomuanga, bu mulambu ushiikibue mu kaalo, autusha mapembue e buwa kui Yehowa. 19 Abitungu nulambule muana a mbushi bu mulambu wa muluisho, na mikooko yana ibidi ilume ya kipua kimune bu mulambu wa butaale. 20 Tshite muakuidi akebipuku aku-naku pamune na mikate ikitshibue na biumbuluanga bia kumpala na mikooko yana ibidi ilume bu mulambu wa kupuka kumpala kua Yehowa. Abikala bu kintu kia kishila kui Yehowa bua tshite muakuidi. 21 Mu diadia efuku anukaukisha pabitale kikongeno kienu kia kishila. T’abitungu nukite mufubo wi bukopo su ngumune. Uno mmuiya wa loso mu ma mbalo oso anukashala bua bipungo bienu bioso.

22 “‘Panuumbula bintu bia mu nsenga yenu, ta nui balombene kuumbula mpa na bintu bi ku nsongo kua mafuba* eenu, na ta nui balombene kusangula biabia abipono panuumbula. Abitungu nuibilekie bua balanda na benyi. Nnami Yehowa Efile Mukulu eenu.’”

23 Yehowa batungunukile na kuisamba na Moyise, amulungula’shi: 24 “Lungula bena Isalele’shi: ‘Muifuku dia kumpala dia mueshi wa musambobidi, abitungu nuikishe ku midimo yoso, nyi efuku dia kutentekiesha diabakaukisha pabakeele mpungi, kikongeno kia kishila. 25 T’anukakitshi mufubo wi bukopo su ngumune, na anukalambula Yehowa mulambu ushiikibue mu kaalo.’”

26 Yehowa besambile dingi na Moyise, amulungula’shi: 27 “Anka muifuku di’ekumi dia wawa mueshi wa musambobidi nyi Efuku dia kubuikiila miluisho. Abitungu nukite kikongeno kia kishila na nuinyokie,* na nutuushe mulambu ushiikibue mu kaalo kui Yehowa. 28 Ta nui balombene kukita mufubo su ngumune mu dino efuku dipabuadio, muanda nyi efuku dia kubuikiilua miluisho, buanudia kulekielua miluisho yenu kumpala kua Yehowa Efile Mukulu eenu. 29 Yawa oso sh’enyoko diadia efuku, abakamukaasha* munkatshi mua muilo waye. 30 Muntu oso akakitshi mudimo kampanda mu diadia efuku, nakamukaasha munkatshi mua muilo waye. 31 Ta nui balombene kukita mudimo su ngumune. Uno nyi mmuiya wa loso bua bipungo bienu bioso koso kuanukashala. 32 Diadia nyi efuku dia sabato buanudia kuikisha ku midimo yenu yoso, na muifuku dia kitema dia mueshi, anukenyoko ku kiolua. Anukakitshi sabato eenu kubanga ku kiolua mpa na ku kiolua ki’efuku adilondo.”

33 Yehowa batungunukile na kuisamba na Moyise, amulungula’shi: 34 “Lungula bena Isalele’shi: ‘Muifuku 15 dia mueshi wa musambobidi, amuikala Musangelo wa bitanda* munda mua mafuku musambobidi bua Yehowa. 35 Muifuku dia kumpala akuikala kikongeno kia kishila, na tanukakitshi mudimo wi bukopo su ngumune. 36 Munda mua mafuku musambobidi abitungu nulambule Yehowa milambu ishiikibue mu kaalo. Muifuku dia muanda, anukitshi kikongeno kia kishila na anukalambula Yehowa mulambu ushiikibue mu kaalo. Nyi nkikongeno kikata. Ta nui balombene kukita mudimo wi bukopo su ngumune.

37 “‘Yaaya ndio misangelo ya bipungo ya Yehowa yanukaukisha bu bikongeno bia kishila bua kulambula Yehowa mulambu ushikiibue mu kaalo: mulambu wa kushiika kaalo, mulambu wa ntete na milambu ya bitomuanga muyile biabia abitekibua bu’efuku dioso. 38 Ino milambu ngia kukumbasha ku bianulambulaa mu mafuku a sabato ya Yehowa, na bia buntu bienu na milambu yanulambulaa bua kukumbasha nayo mitshipo, na milambu ya mu kukumiina kuenu ayitungu’shi nupe Yehowa. 39 Kadi, muifuku 15 dia mueshi wa musambobidi, p’anuikala bauumbule bintu bia mu nsenga, anukakitshi musangelo wa Yehowa munda mua mafuku musambobidi. Muifuku dia kumpala anuikisha ku midimo yoso, na muifuku dia muanda anuikisha’nyi ku midimo yoso. 40 Muifuku dia kumpala, anukaata bikuba bia mitshi ikata, malala a mabo, ntabi ya mitshi i na masaki e bungi, na mitshi ya mu mabanda, na anukasanka kumpala kua Yehowa Efile Mukulu eenu munda mua mafuku musambobidi. 41 Anukeukitshi bu musangelo wa Yehowa munda mua mafuku musambobidi ku kipua. Anukeukitshi mu mueshi wa musambobidi bu muiya wa loso munda mua bipungo bienu bioso. 42 Anukashala mu bitanda munda mua mafuku musambobidi. Bena Isalele boso abakashala mu bitanda, 43 bua’shi bana benu ba mu bipungo abifiki baukie’shi mu bitanda nyi munaadi mushadikie bena Isalele panaadi nebatusha muiumbo dia Ejipitu. Nnami Yehowa Efile Mukulu eenu.’”

44 Biabia Moyise nkulungula bena Isalele pabitale misangelo ya bipungo ya Yehowa.

24 Yehowa batungunukile na kuisamba na Moyise, amulungula’shi: 2 “Lungula bena Isalele bakutumine muimu wi buwa wa olive yabadi batue bua kuela mu bimunyi, bua’shi bimunyi bikale abitembe nsaa yoso. 3 Alona akakitshi bia’shi bimunyi bi kumpala kua kilamba kia lushiko kia mushete wa Bukamonyi ki mu kashibo k’epema ka kufumankena bikale abitembe nsaa yoso kumpala kua Yehowa, kubanga ku kiolua mpa na ku nakashika. Mmuiya wa loso munda mua bipungo bienu bioso. 4 Akalongo bimunyi ku kitudilo kia bimunyi kia ôlo mukile buwa kumpala kua Yehowa nsaa yoso.

5 “Okaata bukula buibuwa, okite mikate 12 ibu nkata. Mukate oso awikala ukitshibue na bi’ekumi bibidi bia efa. 6 Okeyituulu mu milongo ibidi, mulongo umune awikala na mikate isamombo, ku mesa a ôlo mukile buwa kumpala kua Yehowa. 7 Okatuulu oliba mukile buwa pa mulongo oso wa mikate, okamulambula pa mbalo ya mikate bu mulambu ushiikibue mu kaalo bua Yehowa. 8 Muifuku dioso dia sabato, abitungu mikate ikale ayitudibua kumpala kua Yehowa. Kino nkilombeno kia loso na bena Isalele. 9 Ayikekala ya Alona na bana baye, na abakeyidiila mu mbalo ya kishila, muanda nkintu kikile kishila kui tshite muakuidi kia ku milambu ya Yehowa ishiikibue mu kaalo. Uno mmuiya wa loso.”

10 Aku namu munkatshi mua bena Isalele mubaadi ungi muntu, nshaye baadi muina Ejipitu na nyinaye baadi muina Isalele. Dingi efuku yawa muntu baluile ngoshi na muina Isalele mu kishalelo. 11 Yawa muana a muana mukashi muina Isalele babangile kukaa Eshina* na kuidiela milua. Biabia babayile naye kui Moyise. Aku namu nyinaye baadi Shelomite muana a Dibri a mu kisamba kia Dane. 12 Babamulamine mpa na pabatukile kitshibilo kia Yehowa.

13 Kunyima Yehowa nkulungula Moyise’shi: 14 “Tuusha yawa muntu elele eshina diande mulua paasha pa kishalelo, na boso bamupushishe kuele eshina diande mulua batuule maasa aabo mu mutue waye, kunyima muilo oso umuase mabue. 15 Akupu, olungule bena Isalele’shi: ‘Su muntu eela Efile Mukulu aaye mulua, akasemuna bushito bua muluisho waye. 16 Biabia yawa akaa eshina dia Yehowa abitungu kumuipaa binyibinyi. Abitungu muilo oso ushima umuase mabue. Muenyi akayipayibua mu mushindo umune na muina Isalele su bakaa Eshina.

17 “‘Su muntu ayipaa muinaye, abitungu kumuipaa binyibinyi. 18 Muntu oso akupila nyema a paasha na kumuipaa abitungu afute yawa nyema, muwa ku muwa. 19 Su muntu atapa muinaye, paapa abitungu kumukitshina namu nka bu bibakitshina muinaye. 20 Kutshokoshena bua kutshokoshena, eyiso bu’eyiso, eyino bu’eyino, abakamutapa elonda nka bu diadia diadi mutapishene. 21 Muntu akupila nyema na kumuipaa akamufutu, kadi muntu akupila ungi muntu na kumuipaa abitungu kumuipaa namu.

22 “‘Akuikala muiya umune buenu boso, biabikala bua muenyi sunga bua muina Isalele, muanda nnami Yehowa Efile Mukulu eenu.’”

23 Kunyima Moyise besambile na bena Isalele, na abo nkutusha yawa baadi muele eshina di’Efile Mukulu milua paasha pa kishalelo, abo nkumuasa mabue. Paapa bena Isalele babakitshine nka bu bibaadi Yehowa mulungule Moyise.

25 Yehowa besambile dingi na Moyise ku muengie wa Sinayi, amulungula’shi: 2 “Esambe na bena Isalele, webalungule’shi: ‘P’anukatuele mu nsenga yankenupa, paapa nsenga ayikanemeka sabato bua Yehowa. 3 Munda mua bipua bisamombo anukakunu bintu mu mafuba* eenu, na munda mua bipua bisamombo anukasosuela nfinyo yenu, na anukaumbula bintu bia mu nsenga yenu. 4 Kadi mu kipua kia musambobidi, akuikala kuikisha bua nsenga, nyi sabato bua Yehowa. Tue mulombene kukuna bintu muifuba diobe, sunga kusosuela efuba diobe dia nfinyo. 5 Tue mulombene kuumbula bintu biimenene ku biabia bibaadi bishale paboodi muumbule, na tue mulombene kutshiba tukuba tobe tua nfinyo ku nfinyo yobe yo’shi musosuele. Akikala kipua kia kuikisha bua nsenga. 6 Anka, we mulombene kudia bintu abiimenena muiumbo mu kipua kia sabato; obe, mpika oobe mulume, mpika oobe mukashi, muntu oodi muate ku mudimo na benyi bashale nobe mbalombene kuibidia, 7 na nyema ya mu kisuku na nyema ya paasha. Bintu bioso abiimenena mu nsenga mbia kudia.

8 “‘Okabadika bipua musambobidi bia sabato, bipua musambobidi misango musambobidi, na mafuku a bipua musambobidi bia sabato aekala bipua 49. 9 Muifuku di’ekumi dia mueshi wa musambodibi, okeele mpungi; Muifuku dia kubuikiila miluisho, okakitshi bia’shi mpungi ipushikie muiumbo dienu dioso. 10 Anukekasha kipua kia 50 bu kia kishila, na anukekasha bena eumbo boso bulungantu.* Akikala Kipua kia bulungantu kuanudi, na muntu oso akaluka mu nsenga yaye na kui kifuko kiaye. 11 Kiakia kipua kia 50 akikala kipua kia bulungantu kuanudi. T’anukakunu bintu sunga kuumbula biaba biimenene ku bintu bibaadi bishale, na t’anukatshibi tukuba tuenu tua nfinyo ku nfinyo yenu yanushi basosuele. 12 Muanda kiakia Nkipua kia bulungantu. Akikala kia kishila kuanudi. Anukadi nka penda biabia bintu abiimenena.

13 Mu kiakia Kipua kia bulungantu, muntu oso akaluka mu nsenga yaye. 14 Su oudisha kintu kampanda, sunga’shi oula kintu kampanda kui muinobe, tanuidimbenanga. 15 Okaulu kipindi kia nsenga kui muin’obe muyile bungi bua bipua bibakidi kubanga ku Kipua kia bulungantu, na akakuudisha kipindi kia nsenga muyile bungi bua bipua bibashala bia kuumbula bintu. 16 Su nkushale bipua bi bungi, abitungu yawa audisha akamishe muulo, kadi su nkushale bipua bipeela abitungu yawa audisha ayishe muulo, muanda akuudisha bipua bibashala bia kuumbula. 17 Muntu su ngumune a munkatshi muenu tadimbanga mukuabo, abitungu nutshine Efile Mukulu eenu, muanda nnami Yehowa Efile Mukulu eenu. 18 P’anukookiela mayi ande a kulonda na p’anulama miiya yande, anukashala mu butaale muiumbo dienu. 19 Nsenga ayikatusha bikuba biayo, anukadi na anukekuta na anukashala muanka mu kukaluilua.

20 “‘Kadi su nuakamba’shi: “A mu kipua kia musambobidi atukadi kinyi su t’atukunu sunga kuumbula?” 21 Nakenuelela miabi yande mu kipua kia kasamombo, na nsenga ayikatuusha bintu bi bungi bikumbane bua bipua bisatu. 22 Akupu anukakunu bintu mu kipua kia muanda, na anukadi bintu bia kala bibanudi babiikie mpa na mu kipua kia kitema. Mpa na apakakomo bintu bipia, anuikala’nka anudi biabia bia kala.

23 “‘Ta nui balombene kupaana nsenga bua loso, muanda nsenga ngiande. Muanda ku meso kuande, nui bu benyi bashale kuabene. 24 Muiumbo dioso dishima adikala dienu, anukapa bantu matalua a kukuula nsenga.

25 “‘Su mukuenu afika mulanda, na abitungu’shi apaane kipindi kiaye kia nsenga, abitungu mukuudi, mukuabo a mu kifuko afikie akuule biabia bibaudisha mukuabo. 26 Kadi su muntu te na mukuudi, kadi afika mpeta na apeta mushindo wa kukuula kipindi kiaye kia nsenga, 27 akataluula muulo wa kiakia kipindi kia nsenga muyile bungi bua bipua bibapu kukila kasha ekipaana, na kufuta yawa baadi mumuule kianka makuta aashala. Paapa mmulombene kuatuula kipindi kiaye kia nsenga.

28 “‘Kadi su ta mupete mushindo wa kuikikuula, kiakia ki’ekalanga mupaane akishala kia yawa ekiudile mpa na ku Kipua kia bulungantu; na abakamualuisha kianka mu Kipua kia bulungantu, na akaatuula kipindi kiaye kia nsenga.

29 “‘Su muntu apaana nshibo yaye mu kibundi kiifunyishue na bimano, matalua aaye a kuiyikuula aatungunuka mpa na ku nfudiilo kua kipua, kubanga kuifuku dibaadi muiyiudishe; ekala na matalua a kuiyikuula munda mua kipua kishima. 30 Kadi su ta mbeyikuule ku nfudiilo kua kipua kishima, yaaya nshibo i mu kibundi kiifunyishue na bimamo ayikala ya yawa muntu beyiulu bua loso munda mua bipungo na bipungo. T’abakeyalusha mu Kipua kia bulungantu nya. 31 Anka, mashibo a mu kibundi kishi kiifunyishue na bimano, abakeata nka bu bipindi bia nsenga bia muiumbo. Matalua a kukuula aa mashibo aatungunuka, na abakealusha mu Kipua kia bulungantu.

32 “‘Bua mashibo a bena Levi e mu bibundi biabo, bena Levi abekala na matalua akuiakuula bua loso. 33 Su ta mbakuule nshibo ya muina Levi, yaaya nshibo yabadi bapaane mu kibundi kia bena Levi abakeyalusha mu Kipua kia bulungantu, muanda mashibo a mu bibundi bia bena Levi ngaabo munkatshi mua bena Isalele. 34 Dingi, ta mbalombene kupaana mapia a kudishila nyema efunyishe bibundi biabo, muanda mbupianyi buabo bua loso.

35 “‘Su mukuenu mushale pepi nobe afika mulanda na te na mushindo wa kukumbasha nkalo yaye, abitungu omukuashe bu biodi mulombene kukuasha muenyi mushale kuabene, bua’shi yawa mukuenu ashale na muwa munkatshi muenu. 36 Tokimbanga makasa sunga nteteko kuadi. Abitungu otshine Efile Mukulu oobe, na mukuenu ashala na muwa munkatshi muenu. 37 Tue mulombene kumuiyapusha makuta oobe na kumuteka makasa, sunga kumupa bia kudia biobe bua kupeta makasa. 38 Nnami Yehowa Efile Mukulu eenu baadi muinutushe mu nsenga ya Ejipitu bua kuinupa nsenga ya Kanaana, na kuileesha bu Efile Mukulu eenu.

39 “‘Su mukuenu mushale pepi nobe afika mulanda na abitungu’shi epaane kodi, tue mulombene kumukitshisha midimo i bukopo bu mpika. 40 Okamukitshina mianda nka bu muina mudimo mulombene efuto, nka bu muenyi. Na akakufubila mpa na mu Kipua kia bulungantu. 41 Kunyima akakatuka kobe, aye na bana baye, na akalukiila kui kifuko kiaye. Akalukiila mu nsenga ya ba nkambua baye. 42 Muanda bena Isalele mba mpika bande banyikalanga mutushe mu nsenga ya Ejipitu. Ta mbalombene kuiudisha abo banabene bu bi’abaudishaa mpika. 43 Tue mulombene kumukengiesha, abitungu otshine Efile Mukulu oobe. 44 Ba mpika bobe balume sunga bakashi abitungu bafikie mu miilo inuifunyishe, kuakua nyi kodi mulombene kuula mpika mulume sunga mukashi. 45 Nui balombene dingi kuula ba mpika kui bana ba benyi bashale munkatshi muenu, na kui bana babo babadi batande muiumbo dienu, na abekala benu. 46 Nui balombene kuibalekiela bana benu bu bupianyi bua’shi bekale ba mpika babo bua loso. Nui balombene kuibaata bu bena mudimo, kadi ta nui balombene kukengiesha bakuenu bena Isalele.

47 “‘Kadi su muenyi sunga muntu mushale munkatshi muenu afika mpeta, mukuenu e pepi naye ekala mulanda, na eudisha kui yawa muenyi sunga kui muntu mushale munkatshi muenu, sunga kui mukuabo na yawa muenyi, 48 atungunuka na kuikala na matalua adia kukuudibua sunga kunyima kua kuiudisha aye nabene. Umune a ku bakuabo mmulombene kumukuula, 49 sunga mukuabo na nshaye mmulombene kumukuula, sunga ungi mukuabo oso a mu kifuko mmulombene kumukuula.

“‘Na su aye nabene bafiki mpeta, mmulombene kuikuula. 50 Abadika na yawa muntu baadi mumuule mafuku akile kubanga ku kipua kibaadi muipaane kuadi mpa na ku Kipua kia bulungantu, na bungi bua makuta ababaadi bamuule nao abuikala muyile bungi bua bipua. Abakabadika mafuku aaye a kufuba mu kiakia kipungo nka bu biababadikaa mafuku a muntu abadi baate ku mudimo. 51 Su kubashala bipua bi bungi, akafutu muulo wa kukuudibua kuaye muyile bungi bua bipua bibashala. 52 Kadi su kubashala penda bipua bipela mpa na ku Kipua kia bulungantu, paapa akabadika bungi bua bipua bibashala na kufuta muulo wa kukuudibua kuaye muyile biabia bipua bibashala. 53 Atungunuka na kumufubila ku kipua na kipua bu muntu abadi baate ku mudimo; na okatala bua’shi mukata aaye tamukiengieshanga. 54 Anka, su ta mulombene kuikuula mu wawa mushindo, paapa akatuuku bulungantu mu Kipua kia bulungantu, aye mpa na bana baye.

55 “‘Muanda bena Isalele mba mpika bande, banyikalanga mutushe muiumbo dia Ejipitu. Nnami Yehowa Efile Mukulu eenu.

26 “Ta nui balombene kuikitshina b’efile bashi na muulo, tanuiyimikilanga nkishi sunga musungu wa kishila, ta nui balombene kutuula nkishi a ebue mu nsenga yenu na kumuinamina; muanda ami Yehowa n’Efile Mukulu eenu. 2 Abitungu nulame sabato yande na kunemeka* mbalo yande ya kishila. Nnami Yehowa.

3 “‘Su nuatungunuka na kutambukila mu mayi ande a kulonda na kutumikila miiya yande, 4 nakenunokiesha mpeshi mu kipungo kiaye, na nsenga ayikatuusha bintu biayo, na mitshi ya muiumbo ayikatuusha bikuba biayo. 5 Kipungo kienu kia kupuula ntete akikafiki mpa na ku kipungo kia kukuula tukuba tua nfinyo, na kipungo kienu kia kukuula tukuba tua nfinyo akikende mpa na mu kipungo kia kukuna; anukadi bidibua bienu nuikute muanda anukashala mu kuiyikeela muiumbo dienu. 6 Nakatuulu butaale muiumbo na anukalaala kushi muntu enukuatshisha moo; nakakaasha nyema ya bukielo ya mu kisuku muiumbo, na lupete lua ngoshi talukakidila muiumbo dienu. 7 Anukalondo beshikuanyi nenu na anukebatshokola ku lupete luenu lua ngoshi. 8 Bantu batano ba kuanudi abakebingena na bantu 100, na bantu 100 ba kuanudi abakebingena na bantu 10 000, anukatshokola beshikuanyi nenu ku lupete luenu lua ngoshi.

9 “‘Nakenukumiina na nakenufuimisha, nakalama kilombeno kiande kiandi mukite nenu. 10 Panuki’abadi bintu bia kikubu bia kipua kishale, anukekala na lukalo lua kukaasha biabia bintu bia kala bua kulekiela bipia mbalo. 11 Nakatuulu tabernakele ande munkatshi muenu, na tankenusumbushena nya. 12 Nakatambuka munkatshi muenu na nakekala Efile Mukulu eenu, na anue anukekala muilo wande. 13 Nnami Yehowa Efile Mukulu eenu baadi muinutushe mu Ejipitu bua’shi tanuikalanga dingi ba mpika babo, natshokola kikumbo kienu buanudia kutambuka mitue muiyilu.

14 “‘Anka su nuapela kunteemesha sunga kulama ano mayi oso, 15 na su nuasumbushena miiya yande na kushikua bitshibilo biande, anupele kulonda mayi ande oso na kusumbushena kilombeno kiande, 16 ami namu nakenukitshina ino mianda ayilondo: Nakenunyoko na dikienga, kikoolo kia kiadi na mukumbo wa mbidi kaalo i bukopo, bino abikakitshi bia’shi meso enu taamonanga kalolo, na kuinubofusha mbidi. Anukakunu bintu bienu mu bisumanga, muanda beshikuanyi nenu nyi abakebidi. 17 Nakenusumbushena, na beshikuanyi nenu abakenutshokola; baaba benushikue abakenukiengiesha, na anukasuuku kushi muntu enubingi.

18 “‘Su biekala’shi ino mianda yoso yenufuila kadi tanunteemesha, nakenunyoko misango ikile pa musambobidi muanda wa miluisho yenu. 19 Nakafudiisha kuitatula na mutue wenu wi bukopo, nakekasha eyilu dienu bukopo nka bu kiamo, na nsenga yenu nka bu kiamo kia munyinga. 20 Anukaluisha bukome buenu mu bisumanga, muanda nsenga yenu tayikatusha bintu, na mitshi yenu ya muiumbo tayikapa bikuba nya.

21 “‘Kadi su anutungunuka na kuntombokiela na kupela kunteemesha, nakenunyoko misango ikile pa musambobidi muyile miluisho yenu. 22 Paapa nakatumu nyema ya mu kisuku i bukielo munkatshi muenu, ayikakuata bana benu, na ayikepaa nyema yenu ya paasha na kupeelesha bungi buenu, biabia mu mashinda muenu t’amuikala amutambukila bantu.

23 “‘Kadi su kunyima kua ino mianda yoso tanukumiina dinyoka diande na anutungunuka nka na kuntombokiela, 24 paapa ami namu nakenutombokiela, nakenunyoko misango musambobidi muanda wa miluisho yenu. 25 Nakeobuela pa kuinufuishila lupete lua ngoshi, muanda nubayipaa kilombeno. Su nuasuuka mu bibundi bienu, nakenutumina maladi munkatshi muenu, na kuinupaana mu maasa a beshikuanyi benu. 26 Pankaluisha bintu bienu bia kulamina mikate, bana bakashi ekumi abakekiela mikate penda mu nfuulo umune na abakenuabila yanka muyile kipimo kitshibiibue; paapa anukadi kadi t’anuikuta.

27 “‘Kadi su kunyima kua bino bioso t’anunteemesha na anutungunuka nka na kuntombokiela, 28 ami namu nakanyisha kuinutombokiela, na nakenunyoko misango musambobidi muanda wa miluisho yenu. 29 Paapa anukadi mbidi ya bana benu balume na mbidi ya bana benu bakashi. 30 Nakaluisha ma mbalo eenu a kishila na kubumbula bilambuilo bienu bia kushiikila kabanda, nakatenteka bitanda bienu kunundu kua ma nkishi eenu e butete ashi na muwa, na kuinupusha butete. 31 Nakapaana bibundi bienu ku lupete lua ngoshi, na mu ma mbalo eenu a kishila amuikala bisumanga, na tankapusha mapembue e buwa a milambu yenu. 32 Ami nabene nakaluisha eumbo, na beshikuanyi benu bemushale abakakaanya pabakamono biabia. 33 Nakenupalakasha munkatshi mua miilo, na kuibuesha lupete kunyima kuenu, eumbo dienu adikashala bisumanga; bibundi bienu abikabutudibua.

34 “‘Paapa, nsaa yanudi muiumbo dia beshikuanyi benu, nsenga ayikafutu sabato yayo mu mafuku oso ayishala bisumanga. Mu kiakia kipungo nsenga ayikekisha, muanda abitungu ifute sabato yayo. 35 Ayikekisha mafuku oso ayikashala bisumanga, muanda panubaadi muanka tayibaadi iikishe mu mafuku a sabato.

36 “‘Na bua baaba boso abakapanda, nakausha mashimba aabo na moo mu bibundi bia beshikuanyi babo; mpa na tuleo tu’esaki diabapapula kui lupunga atukebasuukisha, na abakasuuku nka bu muntu asuuku lupete lua ngoshi, na kupona kushi muntu ebalondo. 37 Abakekokoshena nka bu muntu asuuku lupete lua ngoshi, aku namu takui muntu ebabingi. T’anukobesha kukambila beshikuanyi benu. 38 Anukafu munkatshi mua miilo, na eumbo dia beshikuanyi nenu adikenubutula. 39 Baaba bakuanudi abakashala abakanyangila mu maumbo a beshikuanyi nenu muanda wa bilema bienu. Eyendo, abakanyanga muanda wa bilema bia bamashabo. 40 Akupu abakatondo bilema biabo na kukutua kululama na bilema bia bamashabo, na kukumiina’shi mbakite mianda na kukutua kua lulamato p’abo kuntombokiela. 41 Paapa ami namu naadi muibatombokiele pa kuibatuala muiumbo dia beshikuanyi babo.

“‘Pangi yaaya nsaa eshimba diabo dishi disadiibue* ndilombene kuiyisha, na be kufuta bilubilo biabo. 42 Na nakatentekiesha kilombeno kiande na Yakobo, na kilombeno kiande na Isaake, na kutentekiesha kilombeno kiande na Abalahama, na nakatentekiesha eumbo. 43 Muanda pabaabadi basumbushene nsenga, ibaadi ayifutu sabato yayo na kushala bisumanga kushi bantu, na abakafutu bilubilo biabo, muanda babaadi basumbushene bitshibilo biande na kushikua miiya yande. 44 Kadi sunga mbiabia bioso, p’abekala muiumbo dia beshikuanyi babo, tankebasumbushena bua loso nya, sunga kuibapela mpa na kufika mu kuibabutula, bilombene kuipaa kilombeno kiande kiandi mukite nabo, muanda nnami Yehowa Efile Mukulu aabo. 45 Pa muanda wabo nakatentekiesha kilombeno kinaadi mukite na ba nkambua babo banaadi mutushe mu nsenga ya Ejipitu ku meeso kua miilo, bua kuileesha’shi n’Efile Mukulu aabo. Nnami Yehowa.’”

46 Ano nyi mayi a kulonda, bitshibilo na miiya ibaadi Yehowa mutuule pankatshi paaye na bena Isalele ku muengie wa Sinayi ku bukuashi bua Moyise.

27 Yehowa batungunukile na kuisamba na Moyise, amulungula’shi: 2 “Esambe na bena Isalele, webalungule’shi: ‘Su muntu akita mutshipo wi pabuao wa kutuusha kui Yehowa muulo wabadi batshibe bua muntu, 3 muulo utshibibue bua muana mulume kubanga mu bipua 20 mpa na ku 60 awikala wa shekele 50 ya kiamo kia arja muyile kipimo kia shekele kia ku mbalo ya kishila. 4 Kadi su mmuana mukashi, muulo utshibibue awikala wa shekele 30. 5 Kadi su muntu e na bipua kubanga ku 5 mpa na ku 20, muulo utshibibue bua muana mulume awikala shekele 20 na bua muana mukashi, shekele 10. 6 Su muana e na mueshi umune mpa na ku bipua bitano, muulo utshibibue bua muana mulume awikala wa shekele itano ya kiamo kia arja, na shekele isatu ya kiamo kia arja bua muana mukashi.

7 “‘Su muntu e na bipua 60 na kukila paapa, muulo utshibibue awikala wa shekele 15 bua muana mulume, na shekele 10 bua muana mukashi. 8 Kadi su yawa muntu mmulanda na ta mulombene kufuta muulo utshibibue, akemana kumpala kua tshite muakuidi, na tshite muakuidi akamutshibila muulo. Tshite muakuidi akataluula kilombene kutuusha yawa muntu eele mutshipo muyile kupeta kuaye.

9 “‘Su mutshipo ngutale nyema e buwa abadi balombene kulambula Yehowa, kioso kiabadi balombene kupa Yehowa akifiki kintu kia kishila. 10 Ta mbalombene kumupiana sunga kushintula e buwa pa mbalo ya e bubi, sunga e bubi pa mbalo ya e buwa. Kadi su bamushintula na ungi nyema, yawa a kumpala na yawa aabashintula, yoso ayifiki ya kishila. 11 Kadi su nyema e butete abashi balombene kutuusha bu mulambu kui Yehowa, paapa akemika yawa nyema kumpala kua tshite muakuidi. 12 Tshite muakuidi akatshibi muulo waye muyile bi nyema, bua kuuka su e buwa sunga’shi e bubi. Muulo wabakatshibi kui tshite muakuidi aukashala nka biabia. 13 Kadi su yawa muntu akumiina kumukuula, abitungu atushe kia mbitano kia muulo waye bua kukumbasha ku muulo utshibibue.

14 “‘Binobino, su muntu akiebe kulambula nshibo yaye bu kintu kia kishila kui Yehowa, tshite muakuidi akeele muulo wa yaaya nshibo, biayikala i buwa sunga i bubi. Muulo wayo awikala muyile muulo wabakeele kui tshite muakuidi. 15 Kadi su yawa muntu mulambule nshibo yaye akiebe kuiyikuula, paapa abitungu akumbashe kia mbitano kia makuta ku muulo wabadi batshibe, na ayikafiki bu yaye.

16 Su muntu alambula kipindi kiaye ki’efuba kui Yehowa, muulo wadio awikala muyile bungi bua mbio ayitungu kuimukuna: kipimo kimune kia omere* kia ntete ya orje akikala shekele 50 ya kiamo kia arja. 17 Su alambula efuba diaye mu Kipua kia bulungantu, muulo wadio utshibibue aushala nka biabia. 18 Kadi su alambula efuba diaye kunyima kua Kipua kia bulungantu, tshite muakuidi akataluula muulo muyile bipua bibashala mpa na ku Kipua kia bulungatu akilondo, na muulo aukayishibua muyile muulo wabadi batshibe. 19 Kadi su yawa baadi muikashe efuba diaye bu dia kishila akiebe kuidikuula, abitungu atushe kia mbitano kia makuta bua kukumbasha ku muulo utshibibue, na diadia efuba adishala diaye. 20 Kadi su ta mukuule diadia efuba na bedipaana kui ungi muntu, ta mbalombene dingi kuidikuula nya. 21 P’abalusha efuba mu Kipua kia bulungantu, adikekala bu kintu kia kishila kui Yehowa, bu efuba diabadi bamulambule. Na adikafiki bu dia ba tshite muakuidi.

22 Su muntu alambula Yehowa efuba dibaadi muule, dishi dia mu bipindi bia nsenga bia bupianyi buaye, 23 tshite muakuidi akataluula muulo awikala nao diadia efuba mpa na ku Kipua kia bulungantu, na yawa muntu akatuusha muulo ubabamutekie nka mu diadia efuku. Nyi nkintu kia kishila bua Yehowa. 24 Mu Kipua kia bulungantu, efuba adikalukiila kui yawa abaadi muule, yawa sha nsenga.

25 “‘Muulo oso wabatshibi abitungu wikale muyile kipimo kia shekele kia ku mbalo iselele. Shekele umune e na gera* 20.

26 “‘Anka, muntu su ngumune ta mulombene kulambula muana mbedi a nyema, muanda mmutandibue bu muana a mbedi bua Yehowa. Biabikala ngombe sunga mukooko, muanda mbipue kuikala bia Yehowa. 27 Kadi su yawa nyema e munkatshi mua nyema i butete na amukuula muyile muulo wabadi batshibe, akatenteka kia mbitano kia wawa muulo. Kadi su ta mbamukuule, abakamupaana muyile muulo wabadi batshibe.

28 “‘Kadi kintu su nkimune akilambula muntu kui Yehowa bua loso kia mu bintu biaye, ta mbalombene kuikipaana sunga kuikikuula, biabikala muntu sunga nyema, sunga efuba. Kintu kioso kiabadi balambule bua loso, nkintu kikile kishila bua Yehowa. 29 Dingi, muntu abadi batshibile kiimu abadi batuule ku lupese bua kubutudibua, ta mbalombene kumukuula. Abitungu ayipayibue binyibinyi.

30 “‘Ki’ekumi kioso kia nsenga, biakikala biumbuluanga bia muifuba sunga bikuba bia mitshi, mbia Yehowa. Nkintu kia kishila bua Yehowa. 31 Su muntu akieba kukuula ki’ekumi kiaye, abitungu ekukumbashe kia mbitano. 32 Kadi, bua pabitale ki’ekumi kia nyema ikata sunga ipeela, kintu kioso akikilaa muushi mua mukombo wa mulami a nyema, nyema a ekumi ekala kintu kia kishila bua Yehowa. 33 T’akataluula bua kumona’shi e buwa sunga’shi e bubi, na ta mulombene kumushintuula. Kadi su amushintula, yawa nyema a kumpala na yawa abashintula ayikala ya kishila. Ta mbalombene kuiyikuula nya.’”

34 Ino ndio miiya ibaadi Yehowa mupe Moyise ku muengie wa Sinayi bua bena Isalele.