MBADIKO

1 Na Yehowa nkuisamba na Moyise mu kabaaka ka Sinayi mu kashibo k’epema ka kufumankena, muifuku dia kumpala dia mueshi wa kabidi, mu kipua kia kabidi kia kutuuka kuabo kua muiumbo dia Ejipitu. Aye nkuamba’shi: 2 “Badika kakongie koso ka bena Isalele* muntu na muntu muyile bifuko biabo, muyile mashina a ba mashabo kulu, muyile bungi bua mashina a bana balume boso. 3 Obe na Alona abitungu nufunde baba boso be na bipua 20 na kunundu, balombene kuenda ku ngoshi muyile biluilo biabo.

4 “Wate muana mulume umune mu kisamba kioso; oso a kuabadi ekale mutue wa nshibo ya ba mashabo. 5 Ano nyi mashina a bana balume abakakukuasha: Mu kisamba kia Rubene, Elizure muana mulume a Shedere; 6 mu kisamba kia Simeone, Shelumyele muana mulume a Zurishadayi; 7 mu kisamba kia Yunda, Nasone muana mulume a Aminadabe; 8 mu kisamba kia Isakare, Netanele muana mulume a Zuware; 9 mu kisamba kia Zabulone, Eliabe muana mulume a Kelone; 10 bana ba Yosefe: Mu kisamba kia Efraime, Elishama muana mulume a Amihude; mu kisamba kia Manasee, Gamaliele muana mulume a Pedashure; 11 mu kisamba kia Benyamine, Abidane muana mulume a Gideoni; 12 mu kisamba kia Dane, Ahiezere muana mulume a Amishadayi; 13 mu kisamba kia Ashere, Pagiele muana mulume a Okrane; 14 mu kisamba kia Gade, Eliasafe muana mulume a Dewele; 15 mu kisamba kia Neftali, Ahira muana mulume a Enane. 16 Bano nyi babaabadi basangule mu kakongie. Nyi ba nfumu ba bisamba bia ba mashabo, ba nfumu ba binunu bia Isalele.”

17 Biabia Moyise na Alona nkuata bano bana balume babaabadi basangule muyile mashina aabo. 18 Abo nkubunga kakongie koso muifuku dia kumpala dia mueshi wa kabidi, bua’shi bafunde muntu na muntu muyile eshina diaye, muyile kifuko kiabo na muyile mashina a ba mashabo kulu, ba bipua kubanga pa 20 na kunundu, 19 nka bu bibaadi Yehowa mutumine Moyise eyi. Biabia aye nkuibafunda mu kabaaka ka Sinayi.

20 Bana ba Rubene, lutandua lua muana mbedi a Isalele, abaadi bafundibue muyile mashina aabo, muyile bifuko biabo, na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi abaadi babadikiibue muntu na muntu, 21 na bungi bua bantu ba mu kisamba kia Rubene babaabadi bafunde bubaadi 46 500.

22 Bantu ba mu lutandua lua Simeone abaadi babadikiibue muyile mashina aabo, muyile bifuko biabo, na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi abaadi babadikiibue muntu na muntu, 23 na bungi bua bantu ba mu kisamba kia Simeone babaabadi bafunde bubaadi 59 300.

24 Bantu ba mu lutandua lua Gade abaadi babadikiibue muyile mashina aabo, muyile bifuko biabo, na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi abaadi babadikiibue, 25 na bungi bua bantu ba mu kisamba kia Gade babaabadi bafunde bubaadi 45 650.

26 Bantu ba mu lutandua lua Yunda abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 27 na bungi bua bantu ba mu kisamba kia Yunda babaabadi bafunde bubaadi 74 600.

28 Bantu ba mu lutandua lua Isakare abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 29 na bungi bua bantu ba mu kisamba kia Isakare babaabadi bafunde bubaadi 54 400.

30 Bantu ba mu lutandua lua Zabulone abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 31 na bungi bua bantu ba mu kisamba kia Zabulone babaabadi bafunde bubaadi 57 400.

32 Bantu ba mu lutandua lua Yosefe kukidila ku kisamba kia Efraime abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 33 na bungi bua bantu ba mu kisamba kia Efraime babaabadi bafunde bubaadi 40 500.

34 Bantu ba mu lutandua lua Manasee abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 35 na bungi bua bantu ba mu kisamba kia Manasee babaabadi bafunde bubaadi 32 200.

36 Bantu ba mu lutandua lua Benyamine abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 37 na bungi bua bantu ba mu kisamba kia Benyamine babaabadi bafunde bubaadi 35 400.

38 Bantu ba mu lutandua lua Dane abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 39 na bungi bua bantu ba mu kisamba kia Dane babaabadi bafunde bubaadi 62 700.

40 Bantu ba mu lutandua lua Ashere abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 41 na bungi bua bantu ba mu kisamba kia Ashere babaabadi bafunde bubaadi 41 500.

42 Bantu ba mu lutandua lua Neftali abaadi babadikiibue muyile mashina aabo, muyile bifuko biabo na muyile mashina a ba mashabo kulu. Bana balume boso ba bipua kubanga pa 20 na kunundu, abaadi balombene kuenda ku ngoshi babaadi babadikiibue, 43 na bungi bua bantu ba mu kisamba kia Neftali babaabadi bafunde bubaadi 53 400.

44 Bano nyi babaabadi bafunde kui Moyise na Alona na kui ba nfumu 12 ba Isalele, oso a kuabadi alesha mpala ya nshibo ya ba mashaye. 45 Bena Isalele boso ba bipua kubanga pa 20 na kunundu, abaadi balombene kufuba mu kiluilo mu Isalele abaadi bafundibue muyile mashina a ba mashabo kulu, 46 na bungi boso bua bantu babaabadi bafunde bubaadi 603 550.

47 Anka bena Levi abo tababaadi bebafunde muyile bisamba bia ba mashabo nya. 48 Biabia Yehowa kulungula Moyise’shi: 49 “Nka penda kisamba kia Levi nkioshi mulombene kufunda, na tosanganga bungi buabo na bua bangi bena Isalele. 50 Abitungu otuule bena Levi ku tabernakele a Bukamonyi na ku bintu biaye bioso. Abakasemuna tabernakele na bintu biaye bioso, abakafubu kuanka, na kishalelo kiabo akikekala kifunyishe tabernakele. 51 Nsaa yoso ayitungu kukaasha tabernakele, abitungu bena Levi bamupomone; na nsaa yoso ayitungu kualushula tabernakele, abitungu bena Levi bamushimikie; na muntu* oso efubuila pepi naye kua’shi mupebue matalua abitungu ayipayibue.

52 “Abitungu muina Isalele oso ashimikie kashibo kaye k’epema mu kishalelo kiabadi bamutuule, muntu oso muyile kipindi kiaye kia bisamba bisatu* muyile biluilo biabo. 53 Abitungu kishalelo kia bena Levi kifunyishe tabernakele a Bukamonyi, bua’shi nsungu yande tayifikanga kui kakongie ka bena Isalele; na abitungu bena Levi bekale na mufubo wa kupasukila* tabernakele a Bukamonyi.”

54 Bena Isalele nkukita bioso bibaadi Yehowa mutumine Moyise eyi. Abo nkukita nka biabia.

2 Yehowa balunguile Moyise na Alona’shi: 2 Abitungu bena Isalele bashale mbalo yabadi bape kipindi kiabo kia bisamba bisatu, muntu oso muikale pepi n’ebendela* dia nshibo ya ba mashaye. Abitungu bashale betalene na kashibo k’epema, na bekefunyishe.

3 “Kipindi kia bisamba bisatu kia kishalelo kia Yunda muyile biluilo biabo, akikashala lupese lua kutunduka nguba; nfumu a bana ba Yunda nyi Nasone muana mulume a Aminadabe. 4 Baba babadi bafunde mu kiluilo kiaye be 74 600. 5 Kisamba kia Isakare akikashala pepi naye; nfumu a bana ba Isakare nyi Netanele muana mulume a Zuware. 6 Baba babadi bafunde mu kiluilo kiaye be 54 400. 7 Akupu nyi nkisamba kia Zabulone; nfumu a bana ba Zabulone nyi Eliabe muana mulume a Kelone. 8 Baba babadi bafunde mu kiluilo kiaye be 57 400.

9 “Baba boso babadi bafunde mu biluilo bia kishalelo kia Yunda be 186 400. Abitungu bende ba kumpala.

10 “Kipindi kia bisamba bisatu kia kishalelo kia Rubene muyile biluilo biabo akikekala dia kuushi; nfumu a bana ba Rubene nyi Elizure muana mulume a Shedere. 11 Baba babadi bafunde mu kiluilo kiaye be 46 500. 12 Kisamba kia Simeone akikashala pepi naye; nfumu a bana ba Simeone nyi Shelumyele muana mulume a Zurishadayi. 13 Baba babadi bafunde mu kiluilo kiaye be 59 300. 14 Akupu nyi nkisamba kia Gade; nfumu a bana ba Gade nyi Eliasafe muana mulume a Rewele. 15 Baba babadi bafunde mu kiluilo kiaye be 45 650.

16 “Baba boso babadi bafunde mu biluilo bia kishalelo kia Rubene be 151 450. Abitungu bende ba kabidi.

17 “P’abakatusha kashibo k’epema ka kufumankena, kishalelo kia bena Levi abitungu kikale munkatshi mua bingi bishalelo.

“Abitungu bende belondene muyile biabakuete kushala, kisamba kioso mu mbalo yakio muyile bipindi biabo bia bisamba bisatu.

18 “Kipindi kia bisamba bisatu kia kishalelo kia Efraime muyile biluilo biabo akikekala dia kupona nguba; nfumu a bana ba Efraime nyi Elishama muana mulume a Amihude. 19 Baba babadi bafunde mu kiluilo kiaye be 40 500. 20 Kisamba kia Manasee akikekala pepi naye; nfumu a bana ba Manasee nyi Gamaliele muana mulume a Pedashure. 21 Baba babadi bafunde mu kiluilo kiaye be 32 200. 22 Akupu nyi nkisamba kia Benyamine; nfumu a bana ba Benyamine nyi Abidane muana mulume a Gideoni. 23 Baba babadi bafunde mu kiluilo kiaye be 35 400.

24 Baba boso babadi bafunde mu biluilo bia kishalelo kia Efraime be 108 100. Na abitungu bende ba kasatu.

25 Kipindi kia bisamba bisatu kia kishalelo kia Dane muyile biluilo biabo akikekala dia kunundu; nfumu a bana ba Dane nyi Ahiezere muana mulume a Amishadayi. 26 Baba babadi bafunde mu kiluilo kiaye be 62 700. 27 Kisamba kia Ashere akikashala pepi naye; nfumu a bana ba Ashere nyi Pagiele muana mulume a Okrane. 28 Baba babadi bafunde mu kiluilo kiaye be 41 500. 29 Akupu nyi nkisamba kia Neftali; nfumu a bana ba Neftali nyi Ahira muana mulume a Enane. 30 Baba babadi bafunde mu kiluilo kiaye be 53 400.

31 “Baba boso babadi bafunde mu kishalelo kia Dane be 157 600. Abitungu bende ba nfundiilo muyile bipindi biabo bia bisamba bisatu.”

32 Bano nyi bena Isalele babaabadi bafunde muyile mashina a ba mashabo kulu; bungi bua boso babaadi mu bishalelo babaabadi bafunde bua kuenda ku ngoshi bubaadi 603 550. 33 Anka tababaadi bafunde bena Levi na bangi bena Isalele, nka bu bibaadi Yehowa mutumine Moyise eyi. 34 Bena Isalele abakitshine bioso bibaadi Yehowa mutumine Moyise eyi. Bino nyi bibaabadi abashala muyile bipindi biabo bia bisamba bisatu, na bibaabadi abende, muntu oso muyile kifuko kiabo na muyile mashibo a ba mashabo.

3 Uno nyi muisambo wa kifuko* kia Alona na kia Moyise, muifuku dibaadi Yehowa muisambe na Moyise ku muengie wa Sinayi. 2 Ano nyi mashina a bana balume ba Alona: Nadabe muana mbedi, Abihu, Eleazare na Itamare. 3 Ano nyi mashina a bana balume ba Alona, ba tshite muakuidi bedibue muimu babaadi batuudibue* bua kufuba bu ba tshite muakuidi. 4 Anka Nadabe na Abihu babafuile kumpala kua Yehowa pabaabadi balambule kaalo kashi kakuminyibue kumpala kua Yehowa mu kabaaka ka Sinayi, na tababaadi batande bana. Anka Eleazare na Itamare babatungunukile na kufuba bu ba tshite muakuidi pamune na Alona nshabo.

5 Akupu Yehowa nkulungula Moyise’shi: 6 “Fika na bena Levi na w’ebemikie kumpala kua tshite muakuidi Alona na bekale abamufubila. 7 Abitungu bakumbashe mifubo yabo pabimutale na pabitale kakongie koso kumpala kua kashibo k’epema ka kufumankena pa kukumbasha mufubo wabo utale tabernakele. 8 Abitungu balame bintu bioso bia mu kashibo k’epema ka kufumankena na kukumbasha mifubo yabo pabitale bena Isalele, pa kukita mifubo itale tabernakele. 9 Abitungu wate bena Levi webape Alona na bana baye balume. Mbapebue, bapebue kuadi batshibue kui bena Isalele. 10 Abitungu otuule Alona na bana baye balume bu ba tshite muakuidi, na abitungu bakumbashe mifubo yabo ya bu ba tshite muakuidi, muntu* oso shi mupebue matalua efubuila pepi na mbalo ya kishila, abitungu ayipayibue.”

11 Yehowa nkutungunuka na kuisamba na Moyise, amulungula’shi: 12 Buande’mi naata bena Levi munkatshi mua bena Isalele pa mbalo ya bana mbedi boso ba bena Isalele, na bena Levi abekala bande. 13 Muanda bana mbedi boso mbande. Muifuku dinaadi muipee bana mbedi boso muiumbo dia Ejipitu, naadi muikashe bana mbedi boso ba mu Isalele bu bakishila kuandi, kubanga ku muntu mpa na ku nyema. Abekala bande. Nnami Yehowa.”

14 Yehowa nkuisamba dingi na Moyise mu kabaaka ka Sinayi, nkumulungula’shi: 15 “Funda bana balume ba Levi muyile mashina a ba mashabo kulu na muyile bifuko biabo. Abitungu ofunde bana balume boso kubanga ku a mueshi umune na kunundu.” 16 Biabia Moyise nkuibafunda, nka bu bibaadi Yehowa mumutumine eyi. 17 Ano nyi mashina a bana balume ba Levi: Gershone, Kehate na Merari.

18 Ano nyi mashina a bana balume ba Gershone muyile bifuko biabo: Libeni na Shimeyi.

19 Bana balume ba Kehate muyile bifuko biabo babaadi: Amalame, Isala, Ebrone na Uziele.

20 Bana balume ba Merari muyile bifuko biabo babaadi: Maheli na Mushi.

Bino nyi bifuko bia bena Levi muyile mashibo a ba mashabo.

21 Kifuko kia bena Libeni na kifuko kia bena Shimeyi mbituukile kui Gershone. Bino nyi bifuko bia bena Gershone. 22 Bungi bua bana balume babo boso ba mueshi umune na kunundu babaabadi bafunde bubaadi 7 500. 23 Bifuko bia bena Gershone bibaadi bishale ku nfindo kua tabernakele dia kupona nguba. 24 Nfumu a nshibo ya ba mashabo a bena Gershone baadi Eliasafe muana mulume a Laele. 25 Mufubo wa bana ba Gershone mu kashibo k’epema ka kufumankena ubaadi wa kulama tabernakele na kashibo k’epema, kibuikiilo kiako, kilamba kia lushiko kia ku kituelelo kua kashibo k’epema ka kufumankena, 26 bilamba biembeele bia lupango, kilamba kia lushiko kia ku kituelelo kua lupango luifunyishe tabernakele na kilambuilo, mioshi ya kashibo k’epema, na mifubo yoso itale bino bintu.

27 Kifuko kia bena Amalame, kifuko kia bena Isala, kifuko kia bena Ebrone na kifuko kia bena Uziele mbituukile kui Kehate. Bino nyi bifuko bia bena Kehate. 28 Bungi bua bana balume boso ba mueshi umune na kunundu bubaadi 8 600; mufubo wabo ubaadi wa kulama mbalo ya kishila. 29 Bifuko bia bana ba Kehate bibaadi bishale dia kuushi kua tabernakele. 30 Nfumu a nshibo ya ba mashabo a bifuko bia bena Kehate baadi Elizafane muana mulume a Uziele. 31 Mufubo wabo ubaadi wa kulama Mushete, mesa, kitudilo kia bimunyi, bilambuilo, bintu abifubishua mu mbalo ya kishila, kilamba kia lushiko na mifubo yoso itale bino bintu.

32 Nfumu mukata a bena Levi baadi Eleazare muana mulume a tshite muakuidi Alona, baadi akunkusha baba abatala mifubo ya mbalo ya kishila.

33 Kifuko kia bena Maheli na kifuko kia bena Mushi mbituukile kui Merari. Bino nyi bifuko bia Merari. 34 Bungi bua bana balume boso ba mueshi umune na kunundu babaadi bafundibue bubaadi 6 200. 35 Nfumu a nshibo ya ba mashabo a bifuko bia Merari baadi Zuryele muana mulume a Abihaile. Abaadi bashale dia kunundu kua tabernakele. 36 Bana ba Merari abaadi na mufubo wa kutala ma kadre a tabernakele, mitandalo yaye, bibayi biaye, bitako biaye bitubule, bintu biaye bioso, na mifubo yoso itale biabia bintu, 37 mpa na bibayi bioso bifunyishe lupango na bitako bialo bitubule, bilu bialo na mioshi yabio.

38 Moyise na Alona na bana baye, nyi babaadi bashale dia kutunduka nguba betalene na tabernakele kumpala kua kashibo k’epema ka kufumankena. Babaadi na mufubo wa kulama mbalo ya kishila bu kitungo kiabo kui bena Isalele. Muntu* oso shi mupebue matalua baadi efubuila pepi na mbalo ya kishila baadi na kia kuipayibua.

39 Bana balume boso ba bena Levi ba mueshi umune na kunundu, babaadi Moyise na Alona bafunde ku eyi dia Yehowa muyile bifuko biabo, babaadi 22 000.

40 Akupu Yehowa nkulungula Moyise’shi: “Funda bana mbedi balume boso ba bena Isalele ba mueshi umune na kunundu, webabadikie na ofunde mashina aabo. 41 Abitungu ongatshile bena Levi, pa mbalo ya bana mbedi boso ba bena Isalele, na wate nyema ya paasha ya bena Levi pa mbalo ya bana mbedi boso ba nyema ya paasha ya bena Isalele. Nnami Yehowa.” 42 Akupu Moyise nkufunda bana mbedi boso ba bena Isalele, nka bu bibaadi Yehowa mumutumine eyi. 43 Bungi bua bana mbedi boso balume ba mueshi umune na kunundu babaabadi bafunde muyile mashina aabo bubaadi 22 273.

44 Yehowa batungunukile na kuisamba na Moyise amulungula’shi: 45 “Ata bena Levi pa mbalo ya bana mbedi boso ba bena Isalele na ata nyema ya paasha ya bena Levi pa mbalo ya nyema yabo ya paasha, na abitungu bena Levi bekale bande. Nnami Yehowa. 46 Bu muulo wa nkuulo wa bana mbedi ba bena Isalele 273 basubukie kui bena Levi, 47 abitungu wate shekele* itano bua muntu oso, muyile kipimo kia shekele a mu mbalo ya kishila.* Shekele umune e gera* 20. 48 Abitungu ope Alona na bana baye makuta bu muulo wa nkuulo wa baba basubukie kui bena Levi.” 49 Biabia Moyise nkuata makuta a muulo wa nkuulo kui baba babaadi basubukie ku muulo wa nkuulo wa bena Levi. 50 Aye nkuata makuta kui bana mbedi ba bena Isalele, shekele 1 365 muyile kipimo kia shekele a mu mbalo ya kishila. 51 Akupu Moyise nkupa Alona na bana baye makuta a muulo wa nkuulo muyile eyi* dia Yehowa, nka bu bibaadi Yehowa mutumine Moyise eyi.

4 Yehowa nkulungula Moyise na Alona’shi: 2 “Abitungu kubadika bana balume ba Kehate munkatshi mua bana balume ba Levi muyile bifuko biabo, na muyile mashina a ba mashabo kulu, 3 baba boso be na bipua kubanga ku 30 mpa na ku 50 be mu kisaka kiabadi bape mufubo wa kufuba mu kashibo k’epema ka kufumankena.

4 “Uno nyi mufubo wa bana ba Kehate mu kashibo k’epema ka kufumankena. Nyi nkintu kikile kishila: 5 Apakatuka bena Isalele bua kuenda mu ingi mbalo, Alona na bana baye abatuele bakaashe kilamba kia kutshibuula nakio na bekipuute ku mushete wa Bukamonyi. 6 Abatuulu panundu pao kibuikilo kia musokia wa nkongie na kuadisha panka kilamba ki bukopo kia bulese na kutuula mitandalo ya kusemuna nayo pa mbalo yayo.

7 “Abakaadisha dingi kilamba kia bulese pa mesa a mikate ya kulesha na abatuulu panka malonga, makopo, bibakudi, na mbidika ya mulambu wa kitomuanga; mulambu wa pa kiubishi wa mikate abitungu ushale panka. 8 Abakaadisha pa bianka kilamba kimonga pididii na kupuuta mesa na kibuikilo kia musokia wa nkongie na kutuula mitandalo ya kusemuna nayo pa mbalo yayo. 9 Akupu baate kilamba kia bulese bapuute kitudilo kia bimunyi bu’etaata pamune na bimunyi biakio, tumano tuakio, bintu biakio bia kuatshila kaalo, na bintu biakio bioso bi’abafubishaa bua kulamina muimu wa kuela mu bimunyi. 10 Abekipombeela na bintu biakio bioso mu kibuikilo kia musokia wa nkongie na kuikituula pa mutandalo bua kuikituala. 11 Na abaadisha kilamba kia bulese pa kilambuilo kia ôlo, bekipuute na kibuikilo kia musokia wa nkongie na kutuula mitandalo ya kusemuna nayo pa mbalo yayo. 12 Abaata bintu bioso bia mufubo bi’abafubaa nabio mu mbalo ya kishila, bebiele mu kilamba kia bulese bebipuute na kibuikilo kia musokia wa nkongie na kuibituula pa mutandalo bua kuibituala.

13 “Abakatusha buto* pa kilambuilo na baadishe kilamba kimongolokie kia lin panka. 14 Abatuulu panka bintu biakio bioso bi’abafubisha nsaa y’abafubu ku kilambuilo: bintu bia kuatshila kaalo, nkanya, bipao, na bibakudi, bintu bioso bia ku kilambuilo; baadishe panka kibuikilo kia musokia wa nkongie na kutuula mitandalo ya kusemuna nayo pa mbalo yayo.

15 “Apakatuka bena Isalele bua kuenda mu ingi mbalo, Alona na bana baye abitungu bapudishe kupuuta mbalo ya kishila na bintu bia mu mbalo ya kishila bioso. Akupu bana ba Kehate abatuele bua kuibituala, anka t’abakumanga ku mbalo ya kishila bisumanga abafu. Bino bintu nyi bushito* bua bana ba Kehate butale kashibo k’epema ka kufumankena.

16 “Eleazare muana a tshite muakuidi Alona nyi e na bushito bua kutala muimu wa kuela mu bimunyi, kabanda ke mapembue, mulambu wa ntete wa pa kiubishi na muimu wa kishila.* Atala tabernakele oso na bioso bi muanka mpa na mbalo ya kishila na bintu biayo.”

17 Yehowa balunguile dingi Moyise na Alona’shi: 18 “Tanutadilanga’shi kisamba kia bifuko bia bena Kehate kikatushibue munkatshi mua bena Levi. 19 Anka ebakitshineyi biabia bua’shi bashale na muwa na tabafuanga muanda wa’shi abefubuila pepi na bintu bikile kishila. Alona na bana baye abatuele na bape oso a kuabadi mufubo waye na akitungu’shi asemune. 20 T’abitungu’shi batuele bua kumona bintu bia kishila sunga bua kapindi kapeela.”

21 Akupu Yehowa nkulungula Moyise’shi: 22 “Abitungu kubadika bana ba Gershone muyile mashina a ba mashabo kulu na muyile bifuko biabo. 23 Abitungu ofunde baba boso be na bipua kubanga ku 30 mpa na ku 50 be mu kisaka kiabadi bape mufubo wa kufuba mu kashibo k’epema ka kufumankena. 24 Bino nyi bintu biabadi bape bifuko bia bena Gershone bua kutala na bua kusemuna: 25 Abakasemuna bilamba bia tabernakele, kashibo k’epema ka kufumankena, kibuikilo kiako, na kibuikilo kia musokia wa nkongie ki kunundu kuako, kilamba kia lushiko ki ku kituelelo kua kashibo k’epema ka kufumankena, 26 bilamba biembeele bia lupango, kilamba kia lushiko ki ku kituelelo kua lupango kifunyishe tabernakele na kilambuilo, mioshi yako na bintu bioso bi’abafubisha mu mufubo wa tabernakele. Uno nyi wabo mufubo. 27 Alona na bana baye nyi abakunkusha mufubo oso na mashito a bena Gershone; nuibape ano mashito oso bu mufubo wabo. 28 Uno nyi mufubo autungu’shi bifuko bia bena Gershone bifube mu kashibo k’epema ka kufumankena, na Itamare muana mulume a tshite muakuidi Alona nyi akunkusha mifubo yabo.

29 “Pabitale bana balume ba Merari, w’ebafunde muyile bifuko biabo na muyile nshibo ya ba mashabo. 30 W’ebafunde kubanga ku bipua 30 mpa na ku 50, baba boso be mu kisaka kiabadi bape mufubo wa kufuba ku kashibo k’epema ka kufumankena. 31 Bino nyi bintu abitungu’shi basemune pabitale mufubo wabo wa ku kashibo k’epema ka kufumankena: ma kadre a tabernakele, mitandalo, bibayi biaye, bitako biaye bitubule: 32 bibayi bifunyishe lupango, bitako bialo bitubule, bilu bialo, na mioshi yabio pamune na bintu bialo bioso na mifubo yoso itale bino bintu. W’ebape bintu abitungu’shi basemune muyile mashina aabo. 33 Uno nyi mufubo wa bifuko bia bana ba Merari ku kashibo k’epema ka kufumankena, ku bukunkushi bua Itamare muana mulume a tshite muakuidi Alona.”

34 Nyi Moyise na Alona na ba nfumu ba kakongie nkufunda bana ba bena Kehate muyile bifuko biabo na muyile mashibo a ba mashabo, 35 baba boso be na bipua kubanga ku 30 mpa na ku 50 babaadi mu kisaka kiabadi bape mufubo wa kufuba ku kashibo k’epema ka kufumankena. 36 Bungi bua baba boso babaabadi bafunde muyile bifuko biabo bubaadi 2 750. 37 Bano nyi babaabadi bafunde mu bifuko bia bena Kehate, baba boso abaadi abafubu ku kashibo k’epema ka kufumankena. Moyise na Alona abaadi bebafunde ku eyi dia Yehowa kukiila kui Moyise.

38 Bana balume ba Gershone abaadi bafundibue muyile bifuko biabo na muyile nshibo ya ba mashabo, 39 baba boso be na bipua kubanga ku 30 mpa na ku 50 babaadi mu kisaka kiabadi bape mufubo wa kufuba ku kashibo k’epema ka kufumankena. 40 Bungi bua baba boso babaabadi bafunde muyile bifuko biabo na muyile nshibo ya ba mashabo bubaadi 2 630. 41 Kuno nyi kufundibua kua bifuko bia bana ba Gershone, baba boso babaadi abafubu ku kashibo k’epema ka kufumankena. Moyise na Alona babaadi bebafunde ku eyi dia Yehowa.

42 Bana balume ba Merari babaadi bafundibue muyile bifuko biabo na muyile nshibo ya ba mashabo, 43 baba boso be na bipua kubanga ku 30 mpa na ku 50 abaadi mu kisaka kiabadi bape mufubo wa kufuba ku kashibo k’epema ka kufumankena. 44 Bungi bua baba boso babaabadi bafunde kuabadi muyile bifuko biabo bubaadi 3 200. 45 Kuno nyi kufundibua kua bifuko bia bana ba Merari, babaadi Moyise na Alona bafunde ku eyi dia Yehowa kukiila kui Moyise.

46 Moyise na Alona na ba nfumu ba Isalele nkufunda bano bena Levi boso muyile bifuko biabo na muyile mashibo a ba mashabo; 47 babaadi na bipua kubanga ku 30 mpa na ku 50, na boso babaadi bebape mufubo wa kufuba na kusemuna mashito atale kashibo k’epema ka kufumankena. 48 Bungi bua baba babaabadi bafunde bubaadi 8 580. 49 Babaadi bafundibue ku eyi dia Yehowa kukiila kui Moyise, oso a kuabadi muyile mufubo ubaabadi bamupe na bushito buaye; babaadi bafundibue nka bu bibaadi Yehowa mutumine Moyise eyi.

5 Yehowa nkulungula dingi Moyise’shi: 2 “Tumina bena Isalele eyi buabadia kubinga mu kishalelo muntu oso e na nsudi, muntu oso e na bintu abimutuuku mu mbidi na muntu oso muikashue butete kui kitanda kia muntu.* 3 Biabikala mulume sunga mukashi, abitungu w’ebabingie. Abitungu w’ebabingie paasha pa kishalelo bua’shi tabambukishanga bishalelo bia baba bandi mushale munkatshi muabo.” 4 Bena Isalele babakitshine nka biabia na bebabinga paasha pa kishalelo. Bena Isalele abaadi bakite nka bibaadi Yehowa mulungule Moyise.

5 Yehowa nkutungunuka na kulungula Moyise’shi: 6 “Lungula bena Isalele’shi: ‘Su muana mulume sunga muana mukashi akita muluisho ku miluisho ayikitaa bana ba bantu na akutua lulamato kui Yehowa, yawa muntu* bapiila. 7 Abitungu atonde* muluisho wadi mukite na alushe bintu bioso bu efuto bua kupiila kuaye na akumbashe dingi kia bitano kia muulo wabio; abitungu ebipe yawa adi muluishishe. 8 Anka su yawa muntu abadi bakitshine muluisho te na mukuabo a kuata efuto, abitungu bedialushe kui Yehowa na dikale dia tshite muakuidi, kukatusha penda mukooko ulume wa kubuikila nao miluisho wabakamubuikiila nao miluisho.

9 “‘Bia buntu bioso bia kishila abituusha bena Isalele kui tshite muakuidi, abikala bia tshite muakuidi. 10 Bintu bia kishila bia muntu oso abikala biaye’ye nabene. Anka kintu kioso ki’abapa tshite muakuidi kui muntu, akikala kia tshite muakuidi.’”

11 Yehowa nkutungunuka na kulungula Moyise’shi: 12 “Esambe na bena Isalele na w’ebalungule’shi, ‘Bino nyi abitungu kukita su mukashi a muntu bakitshi muluisho na bakutua lulamato kuadi 13 na ungi muana mulume balaala naye, anka muanda ta ngukiibue kui mulume aaye na ubashala ufuame, aku namu beyikasha butete kumpala ku’Efile Mukulu anka takui kamonyi na ta mbamukuate: 14 Su mulume akuata mukao na amona’shi mukashi aaye bakutua lulamato biabikala’shi beyikasha butete sunga’shi ta muiyikashe butete, 15 abitungu yawa mulume atuale mukashi aaye kui tshite muakuidi, pamune na mulambu wa mukashi aaye, ki’ekumi kia kipimo kia efa* kia bukula bua orje. T’abitungu apongoole panka muimu, sunga kuela oliba panka, muanda nyi mulambu wa ntete wa mukao, mulambu wa ntete wa kutentekiesha kupiila.

16 “‘Tshite muakuidi efubuila naye kumpala na amuimikie kumpala kua Yehowa. 17 Tshite muakuidi akaata mema a kishila mu kintu ki’ema, na akaata ndambo ya lufufi lua nsenga mu tabernakele na eluele mu mema. 18 Na tshite muakuidi akayimika muana mukashi kumpala kua Yehowa, na angule nyene ya muana mukashi na atuule mu maasa aaye mulambu wa ntete wa kutentekiesha, kuamba’shi mulambu wa ntete wa mukao, na tshite muakuidi ekala na mema e buulo muiyasa diaye aafuishaa mulua.

19 “‘Akupu tshite muakuidi akatshipisha muana mukashi pa kumulungula’shi: “Su ungi muana mulume ta mmulaale nobe p’oki ku matalua a mulume oobe na tue mukite muluisho na weyikasha butete, ano mema e buulo aafuishaa mulua t’aakukitshi kintu. 20 Anka su we mukite muluisho p’oki ku matalua a mulume oobe pa kuiyikasha butete na we mulaale na ungi muana mulume kukatusha mulume oobe—” 21 Tshite muakuidi akatshipisha muana mukashi mutshipo wi na mulua, na tshite muakuidi akalungula muana mukashi’shi: “Yehowa akite bia’shi bekale abakutemuna bu kileshesho kia mulua na kia mutshipo munkatshi mua muilo oobe, apakitshi Yehowa bia’shi totandanga bana* na efu diobe diule. 22 Ano mema aafuishaa mulua aatuele mu mala oobe bua’shi efu diobe diule na kukita bia’shi totandanga bana.”* Na abitungu muana mukashi akule’shi: “Amene! Amene!”*

23 “‘Akupu, abitungu’shi tshite muakuidi afunde yaaya milua mu mukanda na eyishime mu mema e buulo. 24 Akupu akatomesha yawa muana mukashi mema e buulo aafuishaa mulua na aa mema aafuishaa mulua aatuele muadi na amukiengieshe. 25 Na tshite muakuidi aata mulambu wa ntete wa mukao muiyasa dia yawa muana mukashi na apukie mulambu wa ntete aku-naku kumpala kua Yehowa, na eutuale pepi na kilambuilo. 26 Tshite muakuidi akaata eyasa diule dia mulambu wa ntete bu kitunduilo kia mulambu na eufitshishe miishi pa kilambuilo, akupu akatomesha yawa muana mukashi aa mema. 27 Nsaa y’amutomesha aa mema, su yawa muana mukashi mmuiyikashe butete, akita kikitshino kia kukutua kululama kui mulume aaye, mema aafuisha mulua aatuele muadi na aamukiengiesha, efu diaye adiulu, t’atanda bana na abakatemuna yawa muana mukashi bu kileshesho kia mulua munkatshi mua muilo waye. 28 Anka su yawa muana mukashi ta muiyikashe butete na mmutoshibue, t’akapete diadia dinyoka, akemita na atande bana.

29 “‘Uno nyi muiya pabitale mukao, nsaa i muana mukashi akitshi muluisho na eyikasha butete p’adi ku matalua a mulume aaye, 30 sunga nsaa i muana mulume e na mukao na amono’shi mukashi aaye bakutua lulamato; abitungu emikie mukashi aaye kumpala kua Yehowa, na abitungu tshite muakuidi amukitshine uno muiya oso. 31 Mulume t’akekala na muanda, anka mukashi akasemuna bushito bua kupiila kuaye.’”

6 Yehowa nkulungula dingi Moyise’shi: 2 “Esambe na bena Isalele, w’ebalungule’shi, ‘Su muana mulume sunga muana mukashi akita mutshipo wi pabuao wa kuikala bu Munazi* kui Yehowa, 3 abitungu elame ku nfinyo na ku angi maalua aakoluanaa. T’abitungu atome vinegre a nfinyo sunga vinegre a kintu kioso kiakia akikoluanaa. T’abitungu atome kintu kioso kiakia kikitshibue na tukuba tua nfinyo, biatuikala tubishi sunga tuume. 4 Mafuku oso a bunazi buaye t’abitungu adie kintu kioso kikitshibue na tukuba tua nfinyo kubanga ku tukuba tua nfinyo tushi tumongie mpa na ku bipusu biato.

5 “‘Mu mafuku oso a mutshipo wa bunazi buaye, kabuembe t’akakidi ku mutue waye. Abitungu ashale e selele pa kuleka nyene ya ku mutue kuaye ikule mpa na apapu mafuku a kutuudibua kuaye ku lupese bua Yehowa. 6 T’abitungu efubuile pepi na kitanda kia muntu* mu mafuku oso ekala mutudibue ku lupese bua Yehowa. 7 Sunga nshaye, nyinaye, mukuabo mulume sunga mukuabo mukashi afua, t’abitungu eyikashe butete, muanda kitunduilo kia bunazi buaye kui Efile Mukulu aaye ki ku mutue waye.

8 “‘E selele kui Yehowa mafuku oso a bunazi buaye. 9 Su muntu afua lufu lua kibatu pepi naye, na ekasha nyene yaye butete ayilesha kutudibua kuaye ku lupese bu’Efile Mukulu,* abitungu akuule nyene ya ku mutue waye muifuku dia kutooshibua kuaye. Abitungu eyikuule muifuku dia musambobidi. 10 Na muifuku dia muanda, abitungu atuale tukutshikutshi tubidi sunga tu nkudimba tuana tubidi kui tshite muakuidi ku kituelelo kia kashibo k’epema ka kufumankena. 11 Tshite muakuidi alumbuula kamune bu mulambu wa muluisho na kangi bu mulambu wa kushiika kaalo na kubuikila muluisho waye utale kitanda kia muntu.* Akupu abitungu ekashe mutue waye wi selele mu diadia efuku. 12 Na abitungu etuule dingi ku lupese bua Yehowa bua mafuku aaye a bunazi, na atuale mukooko ulume wana mu kipua kiao kia kumpala bua mulambu wa kutopekua. Anka mafuku aaye a kumpala taabadikiibua muanda mmuikashe bunazi buaye butete.

13 “‘Uno nyi muiya pabitale Munazi: P’akumbasha mafuku a bunazi buaye, abende naye ku kituelelo kia kashibo k’epema ka kufumankena. 14 Kuakua abitungu alambule mulambu waye kui Yehowa: Mukooko ulume umune wana ushi na kilema mu kipua kiao kia kumpala bu mulambu wa kushiika kaalo, mukooko ukashi umune wana ushi na kilema mu kipua kiao kia kumpala bu mulambu wa muluisho; mukooko ulume umune ushi na kilema bu mulambu wa butaale, 15 kiseele kia mikate ishi na kitatusho i bu nkata ya bukula bukile buwa busangie na muimu, galete ishi na kitatusho ishingue muimu, na mulambu waye wa ntete na milambu yayo ya kitomuanga. 16 Tshite muakuidi ebituala kumpala kua Yehowa na alambula mulambu waye wa muluisho na mulambu waye wa kushiika kaalo. 17 Tshite muakuidi alambula mukooko ulume bu mulambu wa butaale kui Yehowa pamune na kiseele kia mikate ishi na kitatusho, alambula dingi mulambu wao wa ntete na mulambu wao wa kitomuanga.

18 “‘Akupu, abitungu Munazi ekuule nyene ya ku mutue kuaye ishikeele itshibibue ku kituelelo kia kashibo k’epema ka kufumankena, na aata nyene ya ku mutue kuaye ikule p’ekeele mu bunazi buaye, eyeele mu kaalo ke muushi mua mulambu wa butaale. 19 Na abitungu tshite muakuidi aate kioko kia mboko kia mukooko ulume kiteekie, mukate umune ushi na kitatusho wi bu nkata mu kiseele, na galete umune shi na kitatusho, ebituule mu maasa mua Munazi kunyima kuaye baapu kukuula kitunduilo kia bunazi buaye. 20 Na abitungu tshite muakuidi ebipukie aku-n’aku bu mulambu wa kupuka kumpala kua Yehowa. Nyi nkintu kia kishila bua tshite muakuidi, pamune na luidi lua mulambu wa kupuka na kioko kia mukoolo kia kia buntu. Akupu Munazi mulombene kutoma nfinyo.

21 “‘Uno nyi muiya utale Munazi akitshi mutshipo: su akita mutshipo na ekala na mushindo wa kutuusha mulambu kui Yehowa ukile bitekibue mu bunazi buaye, abitungu alombashe mutshipo waye bua kunemeka muiya utale bunazi buaye.’”

22 Akupu Yehowa nkulungula Moyise’shi: 23 “Lungula Alona na bana baye’shi, ‘Bino nyi abitungu’shi nuelele muilo wa Isalele miabi. Nuiulungule’shi:

24 “Yehowa akuelele miabi na akulame.

25 Yehowa akumunyikie mpala yaye, na akukumiine.

26 Yehowa ebueshe mpala yaye kodi na akupe butaale.”’

27 Na abitungu batuule eshina diande pa muilo wa Isalele, bua’shi newelele miabi.”

7 Muifuku dibaadi Moyise mupudishe kushimika tabernakele, baadi mumuele muimu na amuikasha a kishila, pamune na bintu biaye bioso, kilambuilo, na bintu biakio bioso. Pabapuile kuela bino bintu muimu na kuibikasha bia kishila, 2 ba nfumu ba Isalele, ba nfumu ba mashibo a ba mashabo babaatushishe mulambu. Bano ba nfumu ba bisamba babaadi bakunkushe kufunda kua mashina a bantu 3 babaadi batuale kumpala kua Yehowa milambu yabo: matempu asamombo abuikile, ngombe ilume 12, etempu dimune bua ba nfumu babidi; na ngombe mulume umune bua muntu oso; na abo nkuiyituala kumpala kua tabernakele. 4 Yehowa nkulungula Moyise’shi: 5 “Tambula bino bintu, muanda abikafubishua bua mufubo wa ku kashibo k’epema ka kufumankena, na abitungu w’ebipe bena Levi, muntu oso muyile abitungu bua mifubo yaye.”

6 Biabia Moyise nkutambula matempu na ngombe na aye nkuibipa bena Levi. 7 Baadi mupe bana ba Gershone matempu abidi na ngombe ilume inanka, muyile bibaadi abitungu bua mifubo yabo; 8 baadi mupe bana ba Merari matempu ananka na ngombe ilume muanda, muyile bibaadi abitungu bua mifubo yabo; ku bukunkushi bua Itamare muana mulume a tshite muakuidi Alona. 9 Anka tabaadi mupe bana ba Kehate kintu su nkimune, muanda mifubo yabo ibaadi ya kufuba mu mbalo ya kishila, na babaadi abasemuna bintu bia kishila pa mapampa aabo.

10 Ba nfumu babaadi batuale mulambu wabo pabaabadi balambule kilambuilo muifuku dibaabadi bekiele muimu. Pabaadi ba nfumu batuale mulambu wabo kumpala kua kilambuilo, 11 Yehowa balunguile Moyise’shi: “Efuku dioso, umune a ku ba nfumu atuala mulambu waye bua kulambula kua kilambuilo.”

12 Baadi mutuale mulambu waye muifuku dia kumpala nyi Nasone muana a Aminadabe a mu kisamba kia Yunda. 13 Mulambu waye ubaadi: elonga dimune dia kiamo kia arja di bushito bua shekele* 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila,* bioso bibidi biuule na bukula bui buwa busangie na muimu bua mulambu wa ntete; 14 ekopo* dimune dia ôlo di bushito bua shekele ekumi, diuule na kabanda; 15 ngombe mulume muana umune, mukooko ulume umune na mukooko ulume wana umune mu kipua kiao kia kumpala bua mulambu wa kushiika kaalo; 16 muana a mbushi umune bua mulambu wa muluisho; 17 na bua mulambu wa butaale, ngombe ibidi, mikooko ilume itano, mbushi ilume itaano, na mikooko ilume yana itano ya kipua kimune. Uno nyi ubaadi mulambu wa Nasone muana a Aminadabe.

18 Muifuku dia kabidi, Netanele muana a Zuware, nfumu a kisamba kia Isakare baadi mutuushe mulambu. 19 Baadi mutuushe waye mulambu wa: elonga dimune dia kiamo kia arja di bushito bua shekele 130, na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 20 ekopo dimune dia ôlo dia shekele ekumi, diuule na kabanda; 21 ngombe mulume muana umune, mukooko ulume umune, na mukooko ulume wana umune mu kipua kiao kia kumpala bua mulambu wa kushiika kaalo; 22 muana a mbushi umune bua mulambu wa muluisho; 23 na bua mulambu wa butaale, ngombe ibidi, mikooko ilume itano, mbushi ilume itano na mikooko ilume yana itano yoso ya kipua kimune. Uno nyi ubaadi mulambu wa Netanele muana a Zuware.

24 Muifuku dia kasatu, nfumu a bana ba Zabulone, Eliabe muana a Kelone, 25 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 26 ekopo dimune dia ôlo di bushito bua shekele ekumi, diuule na kabanda; 27 ngombe mulume muana umune, mukooko ulume umune, na mukooko ulume wana umune mu kipua kiao kia kumpala bua mulambu wa kushiika kaalo; 28 muana a mbushi umune bua mulambu wa muluisho; 29 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Eliabe muana a Kelone.

30 Muifuku dia kananka, nfumu a bana ba Rubene, Elizure muana a Shedere, 31 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 32 ekopo dimune dia ôlo di bushito bua shekele ekumi diuule na kabanda; 33 ngombe mulume muana umune, mukooko ulume umune, na mukooko ulume wana umune mu kipua kiao kia kumpala bua mulambu wa kushiika kaalo; 34 muana a mbushi umune bua mulambu wa muluisho; 35 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Elizure muana a Shedere.

36 Muifuku dia katano, nfumu a bana ba Simeone, Shelumyele muana a Zurishadayi, 37 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 38 ekopo dimune dia ôlo di bushito bua shekele ekumi diuule na kabanda; 39 ngombe mulume muana umune, mukooko ulume umune na mukooko ulume wana umune mu kipua kiao kia kumpala bua mulambu wa kushiika kaalo; 40 muana a mbushi umune bua mulambu wa muluisho; 41 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Shelumyele muana a Zurishadayi.

42 Muifuku dia kasamombo, nfumu a bana ba Gade, Eliasafe muana a Dewele, 43 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 44 ekopo dimune dia ôlo di bushito bua shekele ekumi diuule na kabanda; 45 ngombe mulume muana umune, mukooko ulume umune, na mukooko ulume wana umune mu kipua kiao kia kumpala bua mulambu wa kushiika kaalo; 46 muana a mbushi umune bua mulambu wa muluisho; 47 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Eliasafe muana a Dewele.

48 Muifuku dia musambobidi, nfumu a bana ba Efraime, Elishama muana a Amihude, 49 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 50 ekopo dimune dia ôlo di bushito bua shekele ekumi diuule na kabanda; 51 ngombe mulume muana umune, mukooko ulume umune, na mukooko ulume wana umune mu kipua kiao kia kumpala bua mulambu wa kushiika kaalo; 52 muana a mbushi umune bua mulambu wa muluisho; 53 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Elishama muana a Amihude.

54 Muifuku dia muanda, nfumu a bana ba Manasee, Gamaliele muana a Pedashure, 55 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 56 ekopo dimune dia ôlo di bushito bua shekele ekumi diuule na kabanda; 57 ngombe mulume muana umune, mukooko ulume umune, na mukooko ulume wana umune mu kipua kiao kia kumpala, bua mulambu wa kushiika kaalo; 58 muana a mbushi umune bua mulambu wa muluisho; 59 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Gamaliele muana a Pedashure.

60 Muifuku dia kitema, nfumu a bana ba Benyamine, Abidane muana a Gideoni, 61 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 62 ekopo dimune dia ôlo di bushito bua shekele ekumi diuule na kabanda; 63 ngombe mulume muana umune, mukooko ulume umune, na mukooko ulume wana umune mu kipua kiao kia kumpala, bua mulambu wa kushiika kaalo; 64 muana a mbushi umune bua mulambu wa muluisho; 65 na bua mulambu wa butaale, ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Abidane muana a Gideoni.

66 Muifuku di’ekumi, nfumu a bana ba Dane, Ahiezere muana a Amishadayi, 67 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 68 ekopo dimune dia ôlo di bushito bua shekele ekumi diuule na kabanda; 69 ngombe mulume muana umune, mukooko ulume umune, na mukooko ulume wana umune mu kipua kiao kia kumpala, bua mulambu wa kushiika kaalo; 70 muana a mbushi umune bua mulambu wa muluisho; 71 na bua mulambu wa butaale: ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Ahiezere muana a Amishadayi.

72 Muifuku dia 11, nfumu a bana ba Ashere, Pagiele muana a Okrane, 73 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 74 ekopo dimune dia ôlo di bushito bua shekele ekumi diuule na kabanda; 75 ngombe mulume muana umune, mukooko ulume umune, na mukooko ulume wana umune mu kipua kiao kia kumpala, bua mulambu wa kushiika kaalo; 76 muana a mbushi umune bua mulambu wa muluisho; 77 na bua mulambu wa butaale: ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Pagiele muana a Okrane.

78 Muifuku dia 12, nfumu a bana ba Neftali, Ahira muana a Enane, 79 baadi mutuushe waye mulambu wa: elonga dimune dia kiamo kia arja di bushito bua shekele 130 na kibakudi kimune kia kiamo kia arja ki bushito bua shekele 70 muyile kipimo kia shekele a mu mbalo ya kishila, bioso bibidi biuule na bukula bui buwa busangie na muimu bua mulambu wa ntete; 80 ekopo dimune dia ôlo di bushito bua shekele ekumi diuule na kabanda; 81 ngombe mulume muana umune, mukooko ulume umune, na mukooko ulume wana umune mu kipua kiao kia kumpala, bua mulambu wa kushiika kaalo; 82 muana a mbushi umune bua mulambu wa muluisho; 83 na bua mulambu wa butaale: ngombe ibidi, mikooko ilume itano, mbushi ilume itano, na mikooko ilume yana itano yoso ya kipua kimune. Uno nyi ubaadi mulambu wa Ahira muana a Enane.

84 Uno nyi mulambu wa kulambula kilambuilo ubaadi ba nfumu ba Isalele batuushe pabaabadi bekiele muimu: malonga 12 a kiamo kia arja, bibakudi 12 bia kiamo kia arja, makopo 12 a ôlo; 85 elonga dioso dia kiamo kia arja dibaadi bushito bua shekele 130 na kibakudi kioso kibaadi bushito bua shekele 70, arja oso a bino bintu baadi bushito bua shekele 2 400 muyile kipimo kia shekele a mu mbalo ya kishila; 86 makopo 12 a ôlo auule na kabanda, ekopo dioso dikale bushito bua shekele ekumi muyile kipimo kia shekele a mu mbalo ya kishila, ôlo oso a makopo baadi bushito bua shekele 120. 87 Nyema yoso bua mulambu wa kushiika kaalo ibaadi ngombe ilume 12, mikooko ilume 12, mikooko ilume yana 12 yoso ya kipua kimune na milambu yayo ya ntete, na bana ba mbushi 12 bua mulambu wa muluisho; 88 na nyema yoso ya mulambu wa butaale ibaadi ngombe ilume 24, mikooko ilume 60, mbushi ilume 60, na mikooko ilume yana 60 yoso ya kipua kimune. Uno nyi ubaadi mulambu wa kulambula kilambuilo kunyima kuakio kuedibua muimu.

89 Pabaadi Moyise atuele mu kashibo k’epema ka kufumankena bua kuisamba n’Efile Mukulu,* baadi apusha eyi adisamba naye kukatukila kunundu kua mpuuto a mushete wa Bukamonyi, dia munkatshi mua bakeluba babidi; na Efile Mukulu baadi esamba naye.

8 Yehowa balunguile Moyise’shi: 2 “Lungula Alona’shi, ‘Nsaa y’otembesha bimunyi, abitungu biabia bimunyi musambobidi bimunyikie mbalo i kumpala kua kitudilo kia bimunyi.’” 3 Biabia Alona nkukita bino: Aye nkutembesha biabia bimunyi bua’shi bimunyikie mbalo i kumpala kua kitudilo kia bimunyi, nka bibaadi Yehowa mutumine Moyise eyi. 4 Kitudilo kia bimunyi kibaadi kikitshibue bino: kibaadi kikitshibue na ôlo mufushue; kubanga ku mukoolo wakio mpa na ku bilongo biakio, kibaadi kikitshibue na ôlo mufushue. Kitudilo kia bimunyi kibaadi kikitshibue muyile kimonua kibaadi Yehowa muleshe Moyise.

5 Yehowa nkulungula dingi Moyise’shi: 6 “Ata bena Levi munkatshi mua bena Isalele, na w’ebatooshe. 7 Bino nyi abitungu’shi w’ebatooshe: W’ebamiamine mema a kutoosha nao muluisho, na abitungu bakuule mbidi yabo yoso na kabuembe, batumpe bilamba biabo na b’etooshe. 8 Akupu baate ngombe mulume muana na mulambu waye wa ntete wa bukula buibuwa busangie na muimu, na wate ungi ngombe mulume muana bua mulambu wa muluisho. 9 Na abitungu wende na bena Levi kumpala kua kashibo k’epema ka kufumankena na obungie kakongie koso ka bena Isalele. 10 P’otuala bena Levi kumpala kua Yehowa, abitungu bena Isalele batentekie bena Levi maasa aabo. 11 Abitungu Alona alambule* bena Levi kumpala kua Yehowa bu mulambu wa kupuka aufiki kui bena Isalele, na abitungu bakumbashe mufubo wa Yehowa.

12 “Akupu bena Levi batentekie maasa aabo pa mitue ya ngombe ilume na balambule Yehowa umune bu mulambu wa muluisho na ungi bu mulambu wa kushiika kaalo bua’shi bena Levi bafuidibue lusa. 13 Na wemikie bena Levi kumpala kua Alona na bana baye balume na w’ebalambule* bu mulambu wa kupuka kui Yehowa. 14 Abitungu wabuule bena Levi kui bena Isalele, na bena Levi abekala bande. 15 Akupu, bena Levi abatuele bua kufuba mu kashibo k’epema ka kufumankena. Bino nyi abitungu’shi w’ebatooshe na w’ebalambule* bu mulambu wa kupuka. 16 Muanda mbapebue, bapebue kuandi, baatshibue munkatshi mua bena Isalele. Nebaata bu bande pa mbalo ya bana mbedi* boso ba bena Isalele. 17 Muanda muana mbedi oso a munkatshi mua bena Isalele ngande, biabikala muntu sunga nyema. Naadi muibekashe ba kishila buande muifuku dinaadi muipee bana mbedi boso muiumbo dia Ejipitu. 18 Nakaata bena Levi pa mbalo ya bana mbedi boso ba munkatshi mua bena Isalele. 19 Nakapa bena Levi bu bapebue kui Alona na bana baye balume munkatshi mua bena Isalele, bua’shi bakitshine bena Isalele mufubo ku kashibo k’epema ka kufumankena na bakite bia’shi bena Isalele bafuidibue lusa, bua’shi kipupa su nkimune takifikanga munkatshi mua bena Isalele, muanda muilo wa Isalele nguifubuile pepi na mbalo ya kishila.”

20 Moyise na Alona na kakongie koso ka bena Isalele babaadi bakite bino pabitale bena Levi. Bino nyi bibaadi bena Isalele bakite pabitale bena Levi muyile bioso bibaadi Yehowa mutumine Moyise eyi. 21 Biabia bena Levi abaadi betooshe na batumpa bilamba biabo, kunyima Alona baadi muibalambule bu mulambu wa kupuka kumpala kua Yehowa. Akupu Alona nkukita bia’shi bafuidibue lusa bua kuibatoosha. 22 Kunyima bena Levi babaadi batuele bua kukumbasha mufubo wabo ku kashibo k’epema ka kufumankena kumpala kua Alona na bana baye balume. Nka bibaadi Yehowa mutumine Moyise eyi pabitale bena Levi, biabia nyi bibaabadi bakite pa bibatale.

23 Biabia Yehowa nkulungula Moyise’shi: 24 “Bino mbitale bena Levi: Muana mulume e na bipua kubanga pa 25 na kunundu, atuele mu kisaka kia baba abakitshi mufubo mu kashibo k’epema ka kufumankena. 25 Anka kunyima kuaye kukita bipua 50, akakatuka mu kisaka kia baba bakuete kufuba na t’afubu dingi. 26 Mmulombene kukuasha bakuabo bakuete kufuba ku kashibo k’epema ka kufumankena, anka aye t’abitungu afube kuanka nya. Bino nyi abitungu’shi okite pabitale bena Levi na mifubo yabo.”

9 Yehowa nkulungula Moyise mu kabaaka ka Sinayi mu mueshi wa kumpala wa kipua kia kabidi kunyima ku’abo kutuuka muiumbo dia Ejipitu’shi: 2 “Abitungu bena Isalele balumbuule mulambu wa Pasaka pa nsaa itshibiibue. 3 Abitungu nuiulumbuule pa nsaa itshibibue muifuku 14 dia uno mueshi pa kamuilua nshobe. Abitungu nuiulumbuule muyile miiya yao yoso na muyile bioso biabeukitaa.”

4 Biabia Moyise nkulungula bena Isalele buabadia kulumbuula mulambu wa Pasaka. 5 Akupu, abo nkulumbuula mulambu wa Pasaka mu kabaaka ka Sinayi, muifuku dia 14 dia mueshi wa kumpala pa kamuilua nshobe. Biabia bena Isalele nkukita muyile bioso bibaadi Yehowa mutumine Moyise eyi.

6 Anka, kubaadi bana balume abaadi beyikashe butete pa kukuma kitanda,* biabia t’ababaadi na mushindo wa kulumbuula mulambu wa Pasaka mu diadia efuku. Nyi baba bana balume nkuenda kumpala kua Moyise na Alona mu diadia efuku 7 na balungula Moyise’shi: “Tui butete muanda tui bakume kitanda.* Buakinyi tui kukutua kulambula Yehowa mulambu pa nsaa itshibibue munkatshi mua bena Isalele?” 8 Nyi Moyise nkuibalungula’shi: “Tengielayi paapa, mbande kupusha eyi aditumu Yehowa pabinutale.”

9 Akupu Yehowa nkulungula Moyise’shi: 10 “Lungula bena Isalele’shi, ‘Sunga’shi muntu a munkatshi muenu sunga a mu bipungo bienu abifiki eyikasha butete pa kukuma kitanda, sunga’shi e mu luendo lula, abitungu nka’shi alumbuuluile Yehowa mulambu wa Pasaka. 11 Abitungu beulumbuule muifuku dia 14 dia mueshi wa kabidi pa kamuilua nshobe. Abitungu beudie pamune na mikate ishi na kitatusho na masaki e buulo. 12 T’abitungu balekie kuanka kintu su nkimune mpa na ku namashika, na t’abitungu batanye mufufua wao su ngumune. Abitungu beulumbuule muyile miiya yoso itale Pasaka. 13 Anka su muntu t’ekalanga butete, sunga’shi t’ekalanga mu luendo lula na balenguula kulumbuula mulambu wa Pasaka, yawa muntu* abitungu akatushibue* munkatshi mua muilo waye, muanda ta mulambule Yehowa mulambu pa nsaa itshibiibue. Yawa muntu akanyokiibua bua muluisho waye.

14 “‘Na su muntu muenyi mmushale nenu, abitungu n’aye namu alumbuule mulambu wa Pasaka bua Yehowa. Abitungu ebikite muyile miiya ya Pasaka na muyile bi’abeukitaa. Akuikala muiya umune buenu boso, bua muntu muenyi na bua muina Isalele.’”

15 Muifuku dibaabadi bashimikie tabernakele, ekumbi dibaadi dibuikile tabernakele, kashibo k’epema ka Bukamonyi, anka ku kiolua kiakia kibaadi akimueneka bu kaalo kibaadi kishale kunundu kua tabernakele mpa na ku namashika. 16 Kibaadi akitungunuka na kukitshika nyi nkino: Ekumbi dibaadi adimubuikila mu kanya, na kiakia kibaadi akimueneka bu kaalo kibaadi akimubuikila bufuku. 17 Nsaa yoso ibaadi ekumbi adiibo kunundu kua kashibo k’epema, bena Isalele babaadi ababanga luendo mususa umune, na mbalo ibaadi ekumbi adimana, nyi ibaadi bena Isalele abashala. 18 Bena Isalele abaadi ababanga luendo pabaadi Yehowa atumu eyi, na babaadi abashala pabaadi Yehowa atumu eyi. Pabaadi ekumbi diki’nka dimane kunundu kua tabernakele, abaadi abashala nka paapa. 19 Pabaadi ekumbi adimana kunundu kua tabernakele bua mafuku e bungi, bena Isalele abaadi abakokiela Yehowa na ta babaadi abende. 20 Ingi misusa, ekumbi dibaadi adimana kunundu kua tabernakele bua mafuku apeela. Pabaadi Yehowa atumu eyi, babaadi abashala nka paapa, na pabaadi Yehowa atumu eyi abaadi ababanga luendo. 21 Ingi misusa ekumbi dibaadi adimana penda kubanga ku kiolua mpa na ku namashika, na pabaadi ekumbi adiibo ku namashika, abaadi ababanga luendo. Nsaa ibaadi ekumbi adiibo sunga kanya sunga bufuku, abaadi ababanga luendo. 22 Nsaa yoso ibaadi ekumbi ndimane kunundu kua tabernakele, biabikala mafuku abidi, mueshi sunga mafuku e bungi, bena Isalele babaadi abashala nka paapa na ta babaadi ababanga luendo. Anka pabaadi ekumbi adiibo, babaadi ababanga luendo. 23 Babaadi abashala pabaadi Yehowa atumu eyi, na babaadi ababanga luendo pabaadi Yehowa atumu eyi. Abaadi abakumbasha kitungo kiabo kui Yehowa ku eyi dibaadi Yehowa mutume kukiila kui Moyise.

10 Akupu Yehowa nkulungula Moyise’shi: 2 “Ekitshine mpungi ibidi; ifushue na kiamo kia arja na wekale w’eyifubisha bua kuitanyina kakongie na bua kukatuka mu bishalelo. 3 P’abeyele yoso ibidi, abitungu kakongie koso kafikie kodi ku kituelelo kia kashibo k’epema ka kufumankena. 4 Su abele penda mpungi umune, nka penda ba nfumu, ba nfumu ba binunu ba Isalele nyi abafiki kodi.

5 “Nsaa y’abele mpungi n’eyi adikaamina na kuika, abitungu baba be mu bishalelo bia dia kutunduka nguba babangie luendo. 6 P’abele mpungi n’eyi adikaamina na kuika bua mususa wa kabidi, abitungu baba be mu bishalelo bi dia kuushi babangie luendo. Abitungu beele mpungi mu uno mushindo nsaa yoso ayibanga kimune kia ku bishalelo luendo.

7 “Nsaa yu’etanyina kakongie bua kuibunga, abitungu wele mpungi, anka kushi n’eyi adikaamina na kuika. 8 Abitungu bana ba Alona, ba tshite muakuidi, bekale abeele mpungi, na kuiyifubisha akukekala bu muiya wa loso buenu mu bipungo bienu bioso.

9 “Su abitungu nuende mu kulua ngoshi na muishikuanyi kuete kuinukiengiesha mu nsenga yenu, abitungu nuele mpungi ya ngoshi, biabia Yehowa Efile Mukulu eenu akenutentekiesha na akenupaasha kui beshikuanyi benu.

10 “Na dingi, mu bipungo bienu bia miloo, kuamba’shi: misangelo yenu na ku mbangilo kua mieshi yenu, abitungu nuele mpungi p’anulambula milambu yenu ya kushiika kaalo, na milambu yenu ya butaale; ayikakuasha bu kitentekiesho buenu kumpala ku’Efile Mukulu eenu. Ami ne Yehowa Efile Mukulu eenu.”

11 Muifuku dia 20 dia mueshi wa kabidi mu kipua kia kabidi, ekumbi dibebuele kunundu kua tabernakele a Bukamonyi. 12 Biabia bena Isalele nkubanga kukatuka mu kabaaka ka Sinayi muyile bibaabadi balumbuule bua kubanga luendo, na ekumbi nkuimana mu kabaaka ka Parane. 13 Uno ubaadi mususa wa kumpala ubaabadi babangie luendo muyile eyi dibaadi Yehowa mutume kukiila kui Moyise.

14 Biabia kipindi kia bisamba bisatu kia kishalelo kia bana ba Yunda muyile bisaka biabo bia basalayi nkubanga luendo kumpala, na Nasone muana a Aminadabe baadi kunundu kua kisaka kiabo kia basalayi. 15 Netanele muana a Zuware baadi kunundu kua kisaka kia basalayi kia kisamba kia bana ba Isakare. 16 Eliabe muana a Kelone baadi kunundu kua kisaka kia basalayi kia kisamba kia bana ba Zabulone.

17 Pabaabadi bakatushe tabernakele, bana ba Gershone na bana ba Merari, abaadi abasemuna tabernakele nkubanga luendo.

18 Akupu, kipindi kia bisamba bisatu kia kishalelo kia Rubene nkubanga luendo muyile bisaka biabo bia basalayi, na Elizure muana a Shedere baadi kunundu kua kisaka kiabo kia basalayi. 19 Shelumyele muana a Zurishadayi baadi kunundu kua kisaka kia basalayi kia kisamba kia bana ba Simeone. 20 Eliasafe muana a Dewele baadi kunundu kua kisaka kia basalayi kia kisamba kia bana ba Gade.

21 Akupu bena Kehate, abaadi abasemuna bintu bia mbalo ya kishila, nkubanga luendo. Tabernakele baadi na kia kushimikiibua nsaa y’abafiki.

22 Akupu, kipindi kia bisamba bisatu kia kishalelo kia bana ba Efraime nkubanga luendo muyile bisaka biabo bia basalayi, na Elishama muana a Amihude baadi kunundu kua kisaka kiabo kia basalayi. 23 Gamaliele muana a Pedashure, baadi kunundu kua kisaka kia basalayi kia kisamba kia bana ba Manasee. 24 Abidane muana a Gideoni baadi kunundu kua kisaka kia basalayi kia kisamba kia bana ba Benyamine.

25 Akupu, kipindi kia bisamba bisatu kia kishalelo kia bana ba Dane nkubanga luendo muyile bisaka biabo bia basalayi, abaadi ba nfudiilo kukatuka bua kukaluila bingi bishalelo, na Ahiezere muana a Amishadayi baadi kunundu kua kisaka kiabo kia basalayi. 26 Pagiele muana a Okrane baadi kunundu kua kisaka kia basalayi kia kisamba kia bana ba Ashere. 27 Ahira muana a Enane baadi kunundu kua kisaka kia basalayi kia kisamba kia bana ba Neftali. 28 Uno nyi mushindo wa kubanga luendo ubaadi bena Isalele na bisaka biabo bia basalayi balonde pabaabadi ababanga luendo.

29 Akupu Moyise nkulungula Obabe muana a Rewele* muina Madiane muko mulume a Moyise’shi: “T’atuende mbalo ibaadi Yehowa muakule’shi, ‘Nakenupa yanka.’ Fika tuende, na atukakukitshina mianda na kalolo, muanda Yehowa mmulee Isalele mianda ibuwa.” 30 Anka aye nkumualula’shi: “Tanende nya. Nalukiila muiumbo diande na kui bena kifuko kiande.” 31 Nyi Moyise nkumulungula’shi: “Tuetulekanga namu, muanda obe ouku mbalo ayitungu’shi tushale mu kabaaka, na we mulombene kuikala bu mukunkushi* eetu. 32 Na su buende netu, mianda yoso ibuwa ayiketukitshina Yehowa, atukakukitshina binyibinyi yanka.”

33 Biabia ababangile luendo lua mafuku asatu kukatukila ku muengie wa Yehowa na mushete wa kilombeno wa Yehowa, ubaadi ubadiile kumpala kuabo bua luendo lua mafuku asatu bua kuibakimbila mbalo ya kushala. 34 Na ekumbi dia Yehowa dibaadi kunundu kuabo mu kanya mubaabadi bakatukie mu kishalelo.

35 Nsaa yoso ibaabadi abasemuna Mushete, Moyise baadi akula’shi: “Ebuee, Yehowa, baluishi bobe bapalakane, na baba bakushikue basuukie kumpala kobe.” 36 Na pabaabadi abeutuulu, baadi akula’shi: “Alukiila Yehowa, kui binunu bia Isalele bibungi bushi kubadikua.”*

11 Binobino muilo ubabangile kuidila bi bukopo kumpala kua Yehowa. Pabaadi Yehowa muibipushe bakuatshile nsungu i bukopo na kaalo akafiki kui Yehowa kababangile kuibatembela na kushiika bangi ku mpese ya kishalelo. 2 Pababangile muilo kudidila Moyise, Moyise baadi muisendeele Yehowa, na kaalo nkushima. 3 Biabia abo nkuudika yaaya mbalo bu Tabera,* muanda kaalo akafiki kui Yehowa kabaadi kebatembele.

4 Kisaka kia bantu besangie* babaadi munkatshi muabo, nkulesha luabi na bena Isalele namu nkubanga kudila dingi na kuakula’shi: “Nnanyi etupa muita wa kudia? 5 Atutentekiesha mishipa yatubaadi atudi bisumanga mu Ejipitu, na makaka, pasteke, puaro, tutungulu, na tutungulu tua ayi! 6 Anka binobino tukuete* kushimisha bukome. T’atumono kingi kintu kukatusha penda ano mane.”

7 Anka, mane abaadi nka bu ntete ya koriandre, na abaadi aamueneka bu bedeliume. 8 Muilo ubaadi aupalakana awiasangula na awiapele ku mabue a mpelua sunga kuiatua mu kinue. Akupu babaadi abeatekie mu ngieso sunga kuiakita mikate i bishengu, na mukanua abaadi nka bu mukate wi muenyi wele muimu. 9 Pabaadi lume aluiki mu kishalelo bufuku, mane abaadi nao aayiki.

10 Moyise bapushishe muilo audidi mu kifuko na kifuko kioso, muntu oso pa kituelelo kia kashibo kaye k’epema. Yehowa bafitshile munda ngofu, na Moyise namu baadi muinyongole ngofu. 11 Akupu Moyise nkulungula Yehowa’shi: “Buakinyi we mukiengieshe mufubi oobe? Buakinyi ntshi mukumiinyibue ku meso kobe p’obe kutuula bushito bua uno muilo oso pa mbidi pande? 12 Nnami muimite uno muilo oso su? Nnami muiutande bua’shi ondungule’shi, ‘Eusemune mu kiadi kiobe nka bu abisemuna mufubi* muana tooka bua kuenda mu nsenga iboodi muitshipe bua kupa ba mashabo? 13 Napete muita wa kupa uno muilo oso kuikunyi? Muanda ukuete nka kudila kumpala kuande’shi, ‘Etupe muita wa kudia!’ 14 Tangobesha kutuala uno muilo oso bupenka buande; nyi mbushito bu nkidile. 15 Su bino nyi bioyikala onkitshina mianda, ngipee namu nka binobino. Su ne mukumiinyibue ku meso kobe, tokumiinanga’shi mmone dingi angi makienga.”

16 Yehowa nkualula Moyise’shi: “Bunga bana balume 70 ba ku bakulu ba Isalele. Bana balume bouku’shi mbakulu na mba nfumu ba muilo, wende nabo ku kashibo k’epema ka kufumankena na wemane nabo kuakua. 17 Nayiki nesambe nobe kuakua, na nakasha ndambo ya kikudi ki poodi nebape kianka, na abakukuasha bua kutuala bushito bua muilo bua’shi tuebutualanga bupenka. 18 Abitungu olungule muilo’shi, ‘Eyikasheyi selele bua malooba, muanda anudi binyibinyi muita, muanda nuibadile kumpala kua Yehowa na nuakula’shi: “Nnanyi etupa muita wa kudia? Mu Ejipitu tuikeele biya.” Yehowa enupa binyibinyi muita, na anudi. 19 T’anuiudi penda efuku dimune, sunga mafuku abidi, sunga mafuku atano, sunga mafuku ekumi sunga mafuku 20, 20 Anka anuiudi mueshi ushima, mpa na p’awinutuuku mu minongie ya mpembe na p’awinutondo, muanda nuibasumbushene Yehowa aye e munkatshi muenu, na nuikeele badile kumpala kuaye nuamba’shi: “Buakinyi tuibatuukie mu Ejipitu?”’”

21 Akupu Moyise nkuakula’shi: “Bantu bandi nabo be bana balume 600 000, anka obe wakula’shi, ‘Nebapa muita wabadia kudia munda mua mueshi ushima’! 22 Sunga mikooko na ngombe yoso yayipayibua, ngilombene kuibalombana su? Sunga mishipa yoso ya mu kalunga ka mema ya kuatshibua, ngilombene kuibalombana su?”

23 Yehowa nkulungula Moyise’shi: “Eyasa dia Yehowa ndiipi su? Binobino omono su binakula abikukitshikila sunga kukutua nkukitshikila.”

24 Biabia Moyise nkutuuka na nkulungula muilo mayi a Yehowa. Aye nkubunga bana balume 70 ba ku bakulu ba muilo na nkuibemika befunyishe kashibo k’epema. 25 Akupu Yehowa nkuika muikumbi, nkuisamba naye na nkukatusha ndambo ya kikudi kibaadi paadi na nkuikipa oso a ku bakulu 70. Nka kikudi kiki’akishala pabadi, bababangile kukita mianda bu batemuki,* anka tababaadi bebikite dimo.

26 Kubaadi bantu babidi ba ku baba bana balume babaadi baki mu kishalelo. Mashina aabo abaadi Eldade na Medade. Na kikudi nkubanga kushala pabadi, bu bibaabadi munkatshi mua baba babaabadi bafunde mashina, anka tababaadi bende ku kashibo k’epema. Biabia bababangile kukita mianda bu batemuki mu kishalelo. 27 Ungi nsongualume nkuenda lubilo na nkukalungula Moyise’shi: “Eldade na Medade bakuete kukita mianda bu batemuki mu kishalelo!” 28 Nyi Yoshua muana a Nune mukuashi a Moyise kubanga ku bu nsongua buaye nkualula’shi: “Nfumuami Moyise, ebatoshe!” 29 Anka Moyise nkumulungula’shi: “We na kiutu pa muanda wande su? Nya, nakumiina’shi bantu boso ba mu muilo wa Yehowa bekale batemuki, na’shi Yehowa ebape kikudi kiaye!” 30 Kunyima Moyise balukiile mu kishalelo pamune na bakulu ba Isalele.

31 Akupu lupapi alufiki kui Yehowa nkuibuaa na nkubanga kutakula tupopo kukatukila ku kalunga ka mema na nkuituponesha mu mpese ya kishalelo, munda mu’efuku dimune dia luendo alu lupese na efuku dingi dia luendo lungi lupese, mu mpese yoso ya kishalelo na tubaadi paashi mututo wi bula bua muiyilu bua kude* ibidi. 32 Biabia diadia efuku dioso na bufuku boso, n’efuku dibalondele dioso, muilo taubaadi ulaale, ubaadi nka ausangula tupopo. Takui muntu baadi musangule tui bungi bui muushi mua omere* ekumi, na babaadi abetuanyika ku mpese yoso ya kishalelo. 33 Anka pabaadi muita uki pankatshi pa meno aabo, kumpala kua’shi beusankunye, nsungu ya Yehowa kutembela muilo, na Yehowa nkubanga kuipaa bantu bebungi ba kuabadi.

34 Biabia babaadi baudikie yaaya mbalo bu Kibrote-ataawa,* muanda nyi mubaabadi bashiikie bantu babaadi baleshe luabi. 35 Kukatuka ku Kibrote-ataawa muilo ubayile ku Aserote, na wabanga kushala ku Aserote.

12 Miriame na Alona ababangile kuakula Moyise bi bubi pabitale mukashi muina Kushe abaadi muibakile, muanda baadi muibakile mukashi muina Kushe. 2 abaadi abamba’shi: “Yehowa mmuakule penda kukidila kui Moyise su? Ta mmuakule namu kukidila kuatudi?” Na Yehowa baadi ateemesha. 3 Anka Moyise baadi muntu muiyishe ngofu kukila bantu boso pa nsenga.

4 Mususa umune Yehowa nkulungula Moyise na Alona na Miriame’shi: “Tuukayi busatu buenu nuende ku kashibo k’epema ka kufumankena.” Biabia boso basatu nkutuuka. 5 Na Yehowa nkuika mu musungo w’ekumbi, nkuimana ku kituelelo kia kashibo k’epema na nkuitanyina Alona na Miriame. Boso babidi nkuifubuila kumpala. 6 Akupu aye nkuakula’shi: “Teemeshayi namu mayi ande. Su kubadia kuikala mutemuki a Yehowa munkatshi muenu, nadia kuiukisha kuadi mu kimonua na nadia kuisamba naye mu kilotua. 7 Anka tabi biabia bua mufubi ande Moyise! Mmupebue bushito bua nshibo* yande yoso. 8 Nesambaa naye mpala na mpala,* patooka, kushi mu nkindi na amonaa kimuenekielo kia Yehowa. Biabia, buakinyi ta nuibatshine kuakula mufubi ande Moyise bi bubi?”

9 Biabia nsungu ya Yehowa nkuibatembela, akupu aye nkukatuka kuabadi. 10 Ekumbi nkukatuka kunundu kua kashibo k’epema na Miriame nkukuatshika na nsudi itooka nka bu neje. Akupu Alona nkualuluka kui Miriame, na nkumona’shi baadi mukuatshikie na nsudi. 11 Mususa umune Alona nkulungula Moyise’shi: “Nakusendeela nfumuami! Tuetulaminanga namu uno muluisho! Tubakitshi mianda kushi binangu. 12 Bua lusa, tomutadilanga atungunukie na kuikala bu muntu mufue, mutandikue na kipindi kia mbidi kinyangie!” 13 Na Moyise nkubanga kuela misaase kui Yehowa’shi: “Ô Efile Mukulu, bua lusa mupaashe namu! Bua lusa!”

14 Yehowa nkualula Moyise’shi: “Su nshaye baadia kumufidila mata mu mpala, ta badia kuikala mukuatshishue buufu munda mua mafuku musambobidi su? Atudibue ku lupese munda mua mafuku musambobidi paasha pa kishalelo, na kunyima bekumualusha muanka.” 15 Biabia Miriame baadi mutudibue ku lupese munda mua mafuku musambobidi paasha pa kishalelo, na muilo taubaadi ukatukie yaaya mbalo mpa na pabaabadi balushe Miriame muanka. 16 Akupu muilo nkukatuka ku Aserote na nkubanga kushala mu kabaaka ka Parane.

17 Pabaadi Moyise ebatumu mu kupuupa nsenga ya Kanaana, bebalunguile’shi: “Kaaminayi ku Negebe, akupu nukaamine ku miengie. 18 Abitungu nutale bi nsenga na su bantu be mushale be bukome sunga’shi mbabofule, mbapela sunga’shi be bungi, 19 na su nsenga i buwa sunga’shi i bubi, na su bibundi biabadi bashale bi na midimba i bukopo sunga’shi tabi na midimba i bukopo. 20 Na nutale su nsenga i na bupeta* sunga’shi ngilanda* na su mui mitshi sunga’shi ta mui mitshi. Abitungu nuikale n’eshimba dinyingie na nuate ndambo ya bikuba bia mu yaaya nsenga.” Bibaadi kipungo kia tukuba tua nfinyo tua kumpala tumongie.

21 Biabia babayile na bapuupa nsenga kubangila ku kabaaka ka Sine mpa na ku Rehobe pepi na ku Lebohamate.* 22 P’ababakaamine ku Negebe, babafikile ku Ebrone kubaadi kushale Ahimane, Sheshayi, na Talmayi bena Anake. Babaadi bebakie Ebrone bipua musambobidi kumpala kua Soane a mu Ejipitu. 23 P’ababafikile muibanda* dia Eshekole, babatshibile lutabi lui na kisaasa kia tukuba tua nfinyo, kibaabadi na kia kusemuna kui bantu babidi ku mushiyo, abo nkutuala dingi mpa na ndambo ya bikuba bia grenade na tukuba tua nfigiye. 24 Babaadi baudikie yaaya mbalo bu ebanda* dia Eshekole* pa muanda wa kisaasa kibaadi bena Isalele batshibe kuakua.

25 Ku nfudiilo kua mafuku 40, babalukiile kunyima ku’abo kupuupa nsenga. 26 Biabia abo nkualukiila kui Moyise na Alona na kui kakongie koso ka bena Isalele mu kabaaka ka Parane ku Kadeshe. Babaadi balungule kakongie koso mianda ibaabadi bakamone na bebalesha bikuba bia mu yaaya nsenga. 27 Bino nyi bibaabadi balungule Moyise: “Tutuelele mu nsenga yuekele muitutume, na mbinyibinyi ayalala mabeele na buuki, bikuba bia muanka biabidi’bi. 28 Anka bantu ba mu yaaya nsenga be bukome, na bibundi bi na midimba i bukopo, mbikile bukata. Tubemumono dingi bena Anake. 29 Bena Amaleke mbashale mu nsenga ya Negebe, na bena Ite, bena Yebuse, na bena Amore mbashale mu miengie, bena Kanaana mbashale pepi na kalunga ka mema na ku bukunkula bua muela wa Yordane.”

30 Kalebe batompele kuuminyisha* bantu babaadi bemane kumpala kua Moyise pa kuakula’shi: “Tukaamineyi nka binobino, na tuibashinkamishe’shi atuata yaaya nsenga, muanda tui kutshokola binyibinyi bantu be muanka.” 31 Anka bantu babayile naye nkuakula’shi: “Tatui balombene kulua na baba bantu, muanda be bukome kuitukila.” 32 Na babatungunukile na kulungula bena Isalele mianda i bubi pabitale nsenga ibaabadi bakapuupe, bambanga’shi: “Nsenga yatudi bakapuupe nyi nsenga ayidiya bantu bashale muanka, na bantu boso batumuene muanka bekeele bipambe. 33 Na tuibamone muanka ba Nefilime, bana ba Anake, bekulu ba ba Nefilime; p’atuipuandikishanga nabo atuimonanga nka bu mpasu, nabo namu abetumonanga nka biabia.”

14 Akupu kakongie koso kabakaamishe eyi na muilo ubatungunukile na kuela misaase na kudila buabua bufuku boso bushima. 2 Bena Isalele boso ababangile kuunauna pabitale Moyise na Alona, na kakongie koso kabebakuile bi bubi kambanga’shi: “Tubadia kufuila muiumbo dia Ejipitu sunga kufuila muno mu kabaaka! 3 Buakinyi Yehowa betutuala mu ino nsenga bua’shi tufue ku lupete lua ngoshi? Abakuata bakashi betu na bana betu bende nabo. Tambikile buwa bua’shi tualukiile mu Ejipitu su?” 4 Abaadi mpa na abelungushena’shi: “Tusanguleyi nfumu, tualukiile mu Ejipitu!”

5 Bua biabia, Moyise na Alona nkupona, nkukupila mapala aabo paashi kumpala kua kakongie koso ka bena Isalele kabaadi kebungie. 6 Yoshua muana a Nune na Kalebe muana a Yefune abaadi munkatshi mua baba abayile mu kupuupa nsenga, abasanuine bilamba biabo, 7 na abo nkulungula kakongie koso ka Isalele’shi: “Nsenga yatuyile mu kupuupa nyi nsenga i buwa, i buwa bukile. 8 Su tuakumiinyibua na Yehowa, etutuala binyibinyi mu yaaya nsenga na etupa yanka, nsenga ayalala mabeele na buuki. 9 Anka t’abitungu nutombokiele Yehowa, t’abitungu nutshine bantu ba mu yaaya nsenga, muanda atuibatshokola* mususa umune. Tabaki dingi na akuibakaluila, na Yehowa e netu. Tanuibatshinanga.”

10 Anka, kakongie kashima kabambile bua kuibasa mabue. Kadi ntumbo ya Yehowa nkumueneka kui muilo oso wa Isalele pa kashibo k’epema ka kufumankena.

11 Akupu Yehowa nkulungula Moyise’shi: “Uno muilo aukutua kundesha kanemo mpa na ku mafuku kinyi, na abakutua kukumiina muandi mpa na ku mafuku kinyi, sunga biandi mukite bino bitunduilo bioso munkatshi muabo? 12 Imana nebakupile na kipupa na nebabutule, na nkuikashe obe muilo ukata na wi bukome kuibakila.”

13 Kadi Moyise nkulungula Yehowa’shi: “Paapa bena Ejipitu, muboodi mutuushe uno muilo ku bukome bobe abakapusha, 14 na abakebilungula bantu ba mu ino nsenga. Abo namu mbapushe’shi obe Yehowa we munkatshi mua uno muilo na we muibamuenekiele mpala kua mpala. We Yehowa na ekumbi diobe ndimane kunundu kuabo, na okuete kutambuka kumpala kuabo mu musungo w’ekumbi mu kanya na mu musungo wa kaalo bufuku. 15 Su oyipaa uno muilo oso mususa umune,* miilo ipushe nkumo yobe ayamba’shi: 16 ‘Yehowa tekeele na ngobesha ya kutuala uno muilo mu nsenga yekeele muitshipe bua kuibapa, nyi bebayipaa mu kabaaka.’ 17 Bua lusa Yehowa, binobino bukome bobe buikale bukata, nka bu bibodi mulee pobuambile’shi: 18 ‘Yehowa sh’akuataa nsungu bukidi na muule ndaa na kifulo kia lulamato, afuilaa bantu lusa ku bilema na ku bilubilo, anka t’akatadiila su nkapeela muntu mupiile kushi kumunyooka, afuishaa kiimu kui bana bua bilema bia ba mashabo, mpa na ku kipungo kia kasatu na kia kananka.’ 19 Fuila namu uno muilo lusa bua kilubilo kiao muyile kifulo kiobe kikata kia lulamato, nka bu biodi muiufuile lusa kukatuka mu Ejipitu mpa na binobino.”

20 Akupu Yehowa nkuakula’shi: “Nebafuila lusa muyile eyi diobe. 21 Kadi, ku lungi lupese, na biandi binyibinyi na muwa, nsenga ishima ayiushibua na ntumbo ya Yehowa. 22 Anka takui muntu su ngumune a ku bantu bamone ntumbo yande na bitunduilo biandi mukite mu Ejipitu na mu kabaaka, kadi mutungunukie na kuntompa ino misango ekumi na shi muteemeshe eyi diande 23 akamono nsenga yandi muitshipe kui ba mashabo. Nya, su ngumune a ku baba bakutue kundesha kanemo, t’akeyimono. 24 kadi muanda mufubi ande Kalebe ekeele na mueneno muilekeene na mmutungunukie na kunkookiela n’eshimba dimune, nakamutuesha binyibinyi mu nsenga muekeele muende, na bekulu baye abakeyipiana. 25 Bu biabidi’shi bena Amaleke na bena Kanaana mbashale muibanda, abitungu nualukiile malooba, nuende batadiile ku kabaaka, muishinda dia Kalunga Kamonga.”

26 Akupu Yehowa nkulungula Moyise na Alona’shi: 27 “Kano kakongie ke bubi akatungunuka na kuunauna pa muanda wande na ku nsaa kinyi? Nemupushe bikuete kuunauna bena Isalele pa muanda wande. 28 Ebalunguleyi’shi, bino nyi abiakula Yehowa: ‘“Na biandi binyibinyi na muwa, nenukitshi nka bu bianenupushishe anuakula!” 29 Bitanda bienu abipono mu kano kabaaka, oolo, baba boso ba kuanudi bena bipua kubanga ku 20 na kunundu bekeele bafundibue, baba boso ba kuanudi bekeele baunaune pa muanda wande. 30 Muntu su ngumune a kuanudi t’atuele mu nsenga yandi muitshipe bua’shi nushale muanka kukatusha penda Kalebe muana a Yefune na Yoshua muana a Nune.

31 “‘“Nakatuesha bana benu muanka banubaadi bakule’shi, abakebakuata bende nabo na abakauku nsenga yanudi bapele. 32 Anka bitanda bienu’nue abikapono mu kano kabaaka. 33 Bana benu abakekala balami ba mikooko mu kabaaka munda mua bipua 40, na abakafutu bua bikitshino bienu bia kukutua kululama* mpa na apakapono kitanda kia muntu a nfudiilo a kuanudi mu kabaaka. 34 Muyile bungi bua mafuku anudi bapuupe nsenga, mafuku 40, efuku dimune bua kipua kimune, efuku dimune bua kipua kimune, anukafutu bua bilubilo bienu munda mua bipua 40, muanda anukauku akipushisha kuntombokiela.*

35 “‘“Nnami Yehowa bakula. Bino mbiankakitshina kano kakongie koso ke bubi, baba boso bekeele bebungie bua kuntombokiela: Abakapuika mu kano kabaaka na abakafu mu ino mbalo. 36 Bantu babaadi Moyise mutume mu kupuupa nsenga na babaadi bafikishe kakongie kashima mu kuunauna pabimutale pababaadi balukiile bakula bi bubi pabitale yaaya nsenga, 37 oolo, bantu babaadi balukiile bakula bi bubi pabitale yaaya nsenga abakakupilua bafue kumpala kua Yehowa. 38 Anka Yoshua muana a Nune na Kalebe muana a Yefune babaadi munkatshi mua baba abaadi bende mu kupuupa nsenga, nyi abakashala binyibinyi na muwa.”’”

39 Pabaadi Moyise mulungule bena Isalele boso ano mayi, muilo ubabangile kudila ngofu. 40 Dingi, bababuukile ku namashika buee na batompa kukaamina ku nsongo kua muengie bambanga’shi: “Tuibelumbuule bua kukaamina ku mbalo ikeele Yehowa muakule muanda tuibakite muluisho.” 41 Anka Moyise nkuakula’shi: “Buakinyi anupele kukookiela eyi dia Yehowa? Bino t’abikumbana nya. 42 Tanukaaminanga nya; muanda Yehowa t’enenu na beshikuanyi benu abakenutshokola. 43 Muanda bena Amaleke na bena Kanaana mbenutengiele bua kulua nenu, na anukapono ku lupete lua ngoshi. Muanda nuibapele kulonda Yehowa, Yehowa t’akekala nenu.”

44 Sunga mbiabia, babaadi bende pa bukopo dia ku muengie, anka mushete wa kilombeno wa Yehowa taubaadi ukatukie munkatshi mua kishalelo na Moyise namu tabaadi mukatukie munkatshi mua kishalelo. 45 Akupu bena Amaleke na bena Kanaana abaadi bashale ku wawa muengie nkuika na nkulua nabo, nkuibabinga mpa na ku Orma.

15 Yehowa balunguile dingi Moyise’shi: 2 “Lungula bena Isalele’shi, ‘P’anukatuele mu nsenga yanenupa bua kushala, 3 na p’anulambula Yehowa mulambu ushiikibue kaalo watshibue ku ngombe sunga ku mikooko, biabikala mulambu wa kushiika kaalo sunga mulambu wa kukumbasha mutshipo wi pabuao, sunga mulambu autuusha muntu mu kukumiina kuaye, sunga mulambu wa mu bipungo bienu bia misangelo, bua kutuushisha Yehowa mapembue e buwa,* 4 yawa alambula mulambu waye abitungu dingi alambule Yehowa mulambu wa ntete wa bukula bui buwa, ki’ekumi kia kipimo kia efa* busangie na kia binanka kia kipimo kia hine* kia muimu. 5 Abitungu dingi nulambule nfinyo bu mulambu wa kitomuanga, kia binanka kia kipimo kia hine, pamune na mulambu wa kushiika kaalo sunga bua mulambu wa mukooko ulume wana oso. 6 Bua mukooko ulume, abitungu nulambule mulambu wa ntete wa kia bibidi ki’ekumi kia kipimo kia efa, kia bukula bui buwa busangie na kia bisatu kia kipimo kia hine a muimu. 7 Abitungu nulambule nfinyo bu mulambu wa kitomuanga kia bisatu kia kipimo kia hine, bu mapembue e buwa* kui Yehowa.

8 “‘Kadi su abitungu’shi nulambule ngombe mulume bu mulambu wa kushiika kaalo sunga bu mulambu wa kukumbasha mutshipo wi pabuao, sunga bu mulambu wa butaale kui Yehowa, 9 abitungu nutuushe dingi mulambu wa ntete wa kia bisatu ki’ekumi kia kipimo kia efa kia bukula bui buwa busangie na kia pankatshi kia kipimo kia hine a muimu pamune na yawa ngombe mulume. 10 Abitungu nulambule dingi nfinyo bu mulambu wa kitomuanga, kia pankatshi kia kipimo kia hine bu mulambu ushiikibue kaalo, bu mapembue e buwa* kui Yehowa. 11 Bino nyi abitungu kukita bua ngombe mulume oso, bua mukooko ulume oso, bua mukooko ulume wana oso sunga bua mbushi oso. 12 Sunga nualambula nyema i bungi naminyi, bino nyi abitungu’shi nukite bua oso a kuayidi muyile bungi buayo. 13 Bino nyi abitungu’shi muina Isalele oso a butandua alambule mulambu ushikiibue kaalo bu mapembue e buwa* kui Yehowa.

14 “‘Su abitungu’shi muntu muenyi mushale nenu sunga mushale munkatshi muenu munda mua mafuku e bungi alambule n’aye namu mulambu ushiikibue kaalo bu mapembue e buwa* kui Yehowa, abitungu akite nka bu bi’anukitshi. 15 Anue bena kakongie na muntu muenyi mushale nenu, anuikala na muiya umune. Aukekala muiya wa loso bua bipungo bienu bioso. Muntu mushale bu muenyi ekala mumune nenu kumpala kua Yehowa. 16 Akuikala muiya umune na kitshibilo kimune bu’enu na bua muntu muenyi mushale nenu.’”

17 Yehowa nkutungunuka na kulungula Moyise’shi: 18 “Lungula bena Isalele’shi, ‘P’anutuele mu nsenga yanende nenu 19 na p’anudi kidibua* kioso kiakia kia mu yaaya nsenga, abitungu nutuushe kia buntu kui Yehowa. 20 Abitungu nutuushe kia buntu kia bukula bui na bisekie kia biumbuluanga bia kumpala bu mikate i bu nkata. Anukekituusha nka bu bi’anutuushaa kia buntu akikatukila ku mbalo ya kufunta ntete. 21 Abitungu nupe Yehowa bukula buenu bui na bisekie bua ndambo ya biumbuluanga bienu bia kumpala bu kia buntu mu bipungo bienu bioso.

22 “‘Binobino su nuakita kilubilo na nuakutua kukookiela ino miiya yoso yabadi bape Moyise kui Yehowa, 23 yoso ibaadi Yehowa muinutumine eyi kukiila kui Moyise, kubanga kuifuku dibaadi Yehowa mutume eyi mpa na bua bipungo bienu bioso abifiki, 24 na su kilubilo takibaadi kikitshibue pa bukopo na su kakongie takabaadi kaukie, abitungu kakongie koso katuushe ngombe mulume muana umune bu mulambu wa kushiika kaalo bua mapembue e buwa* kui Yehowa, pamune na mulambu waye wa ntete na mulambu waye wa kitomuanga muyile abikitshikaa pa kiubishi, na mbushi muana umune bu mulambu wa muluisho. 25 Tshite muakuidi akabuikiila kakongie koso ka bena Isalele miluisho na abakafuidibua lusa, muanda kilubilo takibaadi kikitshibue pa bukopo na bekeele batuale bu mulambu wabo kui Yehowa, mulambu ushiikibue kaalo na mulambu wabo wa muluisho kumpala kua Yehowa bua kilubilo kiabo. 26 Kakongie koso ka bena Isalele akakafuidibua lusa mpa na muenyi mushale munkatshi muabo, muanda bantu boso ta mbakite kilubilo pa bukopo.

27 “‘Su muntu* akita muluisho kushi pa bukopo, biabia abitungu atuushe mbushi mukashi e mu kipua kia kumpala bua mulambu wa muluisho. 28 Na tshite muakuidi akabuikila muluisho wa yawa muntu* mukite kilubilo pa kukita muluisho kushi pa bukopo kumpala kua Yehowa, bua kubuikila wawa muluisho na akafuidibua lusa. 29 Akuikala muiya umune bua bena Isalele ba butandua na bua muenyi mushale munkatshi muenu pabitale kukita muanda kampanda kushi pa bukopo.

30 “‘Kadi muntu* akitshi muanda kampanda pa bukopo biabikala muina Isalele a butandua sunga muntu muenyi, bakaa Yehowa na abitungu akatushibue* munkatshi mua muilo waye. 31 Pa muanda babepuula eyi dia Yehowa na bayipaa muiya waye, abitungu yawa muntu* akatushibue kushi mpaka. Kilubilo kiaye ki pa mbidi paye.’”

32 Pabaadi bena Isalele mu kabaaka, abasangene muntu kuete kusangula nteete muifuku dia Sabato. 33 Baba abaadi bamusangane asangula nteete abaadi bende naye kui Moyise na Alona na kui kakongie koso. 34 Abaadi bamulame muanda kibaadi akitungu’shi bamukite takibaadi kibande kuukibua.

35 Biabia Yehowa nkulungula Moyise’shi: “Abitungu yawa muntu ayipayibue kushi mpaka, na abitungu kakongie koso kamuase mabue paasha pa kishalelo.” 36 Nyi kakongie koso nkuenda naye paasha pa kishalelo na nkumuasa mabue aye nkufua, nka bu bibaadi Yehowa mutumine Moyise eyi.

37 Yehowa nkulungula dingi Moyise’shi: 38 “Lungula bena Isalele’shi, abitungu bekitshine malenda a buanda ku bikupa bia bilamba biabo mu bipungo biabo bioso, na beele moshi wa bulee kunundu kua malenda a buanda e ku kikupa kia kilamba. 39 ‘Abitungu nuikale na ano malenda a buanda bua’shi nuikale anuiamono na anutentekiesha miiya yoso ya Yehowa na kuiyikookiela. T’abitungu nulonde mashimba eenu na meso eenu, abinutakula ku bundumba bua mu kikudi. 40 Bino abikenukuasha bua kutentekiesha na anukakookiela miiya yande yoso na kuikala beselele kui Efile Mukulu eenu. 41 Nnami Yehowa Efile Mukulu eenu, benutuushishe muiumbo dia Ejipitu bua kulesha’shi n’Efile Mukulu eenu. Nnami Yehowa Efile Mukulu eenu.’”

16 Akupu Kora muana a Isala, muana a Kehate, muana a Levi, bebuele pamune na Datane na Abirame bana ba Eliabe, na One muana a Pelete ba ku bana ba Rubene. 2 Babebuele bua kuluisha Moyise pamune na bana balume bena Isalele 250, ba nfumu ba kakongie, bantu abalesha mpala ya kakongie, bantu bende nkumo. 3 Biabia abebungile pamune bua kuluisha Moyise na Alona na nkuibalungula’shi: “Nubakishakisha! Kakongie koso keselele na bantu boso, na Yehowa e munkatshi muabo. Biabia, buakinyi anuituulu kunundu kua kakongie ka Yehowa?”

4 Pabapushishe Moyise biabia, mususa umune baponene akupila mpala paashi. 5 Akupu aye nkulungula Kora na baba boso babaadi bamukuatshishene’shi: “Kunakashika Yehowa akalesha yawa e bu aaye na yawa eselele na yawa mulombene kuifubuila kuadi, na yawa oso akasangula nyi akefubuila kuadi. 6 Kitayi bino: Obe Kora na baba boso bakukuatshishene atayi bintu bia kusemuina kaalo, 7 malooba nuele kaalo muanka na nutuule kabanda panka kumpala kua Yehowa, na yawa muntu abakasangula kui Yehowa, aye nyi eselele. Anue bana ba Levi, nubakishakisha!”

8 Akupu Moyise nkulungula Kora’shi: “Anue bana ba Levi, nteemesheyi namu. 9 Mmuanda upeela kuanudi p’ekale Efile Mukulu a Isalele muinulamuune kui kakongie ka Isalele na mukumiine’shi nuifubuile kuadi bua kukumbasha mufubo wa tabernakele a Yehowa na kuimana kumpala kua kakongie bua kuikafubila, 10 na biadi muinutuale obe na bakuenu bana ba Levi pepi naye su? Anukiebe dingi kuikala bu ba tshite muakuidi su? 11 Nyi buakinyi obe na baba boso bakukuatshishene bakuete kuibunga pamune, nukuete kuluisha Yehowa. Anka Alona nnanyi buanudia kuunauna pabimutale?”

12 Kunyima Moyise nkuitanyisha Datane na Abirame bana ba Eliabe, anka abo nkuakula’shi: “T’atufiki nya! 13 Bioyikeele muitutuushe mu nsenga ayalala mabeele na buuki bua kuituipayisha mu kabaaka ta mbikumbane? Binobino, t’okiebe dingi kuiyikasha bu nfumu kunundu kuetu* su? 14 Mbinyibinyi’shi, tuemuitutuale mu nsenga ayalala mabeele na buuki sunga kuitupa bupianyi bua mafuba na bua mafuba a nfinyo nya. Okiebe kutunya meso a bano bantu su? T’atufiki nya!”

15 Biabia Moyise nkukuata nsungu ikile na nkulungula Yehowa’shi: “Tokumiinanga milambu yabo ya ntete. Ntshi muibanyengie mpunda su ngumune, sunga kukitshina muntu su ngumune a kuabadi bi bubi.”

16 Akupu Moyise nkulungula Kora’shi: “Malooba, obe na baba boso bakukuatshishene nufikie kumpala kua Yehowa, obe, abo, na Alona. 17 Muntu oso aate kintu kiaye kia kusemuina kaalo emuele kabanda, na muntu oso afikie na kintu kiaye kia kusemuina kabanda kumpala kua Yehowa, bintu bia kusemuina kabanda 250, nobe’nyi na Alona muntu oso aate kintu kiaye kia kusemuina kaalo.” 18 Biabia oso a kuabadi nkuata kintu kiaye kia kusemuina kaalo, abo nkuimuela kaalo na kabanda na nkuimana pa kituelelo kia kashibo k’epema ka kufumankena pamune na Moyise na Alona. 19 Pabaadi Kora mubungie baba abamukuatshishena bua kuibaluisha ku kituelelo kia kashibo k’epema ka kufumankena, ntumbo ya Yehowa ibamuenekieele kakongie kashima.

20 Yehowa nkulungula Moyise na Alona’shi: 21 “Katukayi munkatshi mua kino kisaka, bua’shi nebabutule nka binobino.” 22 Bua biabia, abo nkupona nkukupila mapala aabo paashi na nkuakula’shi: “Ô Efile Mukulu, obe apeyaa bantu* boso muwa, muluisho wa muntu umune wi nkutakula mu kukuatshila kakongie koso nsungu su?”

23 Akupu Yehowa nkulungula Moyise’shi: 24 “Lungula kakongie’shi, ‘Katukayi pepi na kashibo k’epema ka Kora, ka Datane na ka Abirame!’”

25 Akupu Moyise nkuibua na nkuenda kui Datane, Abirame, na bakulu ba Isalele nkuenda naye. 26 Aye nkulungula kakongie’shi: “Ndayi namu kula na tushibo tua mapema tua bano bantu babi na tanukumanga kintu kiabo su nkimune, tala nuayipayibua mu muluisho wabo oso.” 27 Mususa umune abayile kula mu mpese yoso ya kashibo k’epema ka Kora, ka Datane, na ka Abirame, Datane na Abirame nkutuuka, nkuimana pa kituelelo kia tushibo tuabo tua mapema pamune na bakashi babo, bana babo na bana babo bakinga.

28 Akupu Moyise nkuakula’shi: “Ku bino nyi kuanukauku’shi Yehowa muntume bua kukita ino mianda yoso, ntshimuibikite mu’mi nabene.* 29 Su bano bantu bafua lufu alufuiyaa bantu boso na su dinyooka diabo di mumune na dia bantu boso, paapa Yehowa ta muntume. 30 Kadi su Yehowa ebakitshina muanda kampanda wa kukaanya na nsenga yabuuluka* yebamina na bintu biabo bioso, na bayika mu Mashama* na muwa, anukauku binyibinyi’shi bano bantu babakutua kanemo kui Yehowa.”

31 Nka’ye kiapudisha kuakula ano mayi, nsenga nkutanyika muushi mua ngua yabo. 32 Nsenga nkubuuluka* na nkuibamina pamune na bifuko biabo, na bantu boso ba Kora na bintu biabo bioso. 33 Biabia abo na bantu babo boso nkuika na muwa mu Mashama,* na nsenga nkuibabuikila, biabia abo nkushimina munkatshi mua kakongie. 34 Bena Isalele boso babaadi bebefunyishe nkusuuka pa muanda wa misaase yabo, muanda babaadi abakula’shi: “Atutshinyi tala nsenga yetumina!” 35 Akupu kaalo akafiki kui Yehowa nkutaatshisha baba bana balume 250 babaadi abalambula kabanda.

36 Nyi Yehowa nkulungula Moyise’shi: 37 “Lungula Eleazare muana a tshite muakuidi Alona bua kukatusha bintu bia kusemuina kaalo, muanda mbia kishila. Omulungule dingi bua kupalakasha kaalo kula. 38 Bintu bia kusemuina kaalo bia bantu bekeele bakite muluisho ubebafikisha mukushimisha miuwa yabo webikite tulata tupelepele tua kulamika ku kilambuilo, muanda bekeele bende nabio kumpala kua Yehowa, na mbifikie bia kishila. Abikala bu kitunduilo kui bena Isalele.” 39 Biabia tshite muakuidi Eleazare batshile bintu bia kusemuina kaalo bia kiamo kia munyinga* bibaabadi bafikie nabio kui baba babaabadi bashiikie kaalo na ebibaata na kitotua bua kulamika ku kilambuilo, 40 nka bu bibaadi Yehowa muakule kukiila kui Moyise. Kibaadi kitentekiesho bua bena Isalele kia’shi muntu su ngumune* shi mupeebue matalua shi a mu lutandua lua Alona, ta mmulombene kuifubuila bua kushiika kabanda kumpala kua Yehowa, na bua’shi muntu su ngumune tekalanga bu Kora na bantu babaadi abamukuatshishena.

41 Muifuku dibalondele, kakongie kashima ka bena Isalele kababangile kuunauna pabitale Moyise na Alona, bambanga’shi: “Anue bubidi nubayipaa muilo wa Yehowa.” 42 Pabaadi kakongie kebungie pamune bua kuluisha Moyise na Alona, babalulukile batadiila dia ku kashibo k’epema ka kufumankena, ekumbi nkuikabuikila na ntumbo ya Yehowa ibabangile kumueneka.

43 Moyise na Alona nkuenda kumpala kua kashibo k’epema ka kufumankena, 44 na Yehowa nkulungula Moyise’shi: 45 “Balumiena, katukayi munkatshi mua kano kakongie, bua’shi nekabutule nka binobino.” Bua biabia, abo nkupona, nkukupila mapala aabo paashi. 46 Akupu Moyise nkulungula Alona’shi: “Ata kintu kia kusemuina kaalo, wemuele kaalo ka ku kilambuilo, wemuele kabanda na wende bukidibukidi kui kakongie na w’ekabuikiile miluisho, muanda Yehowa mmufiite munda. Kipupa kibabanga!” 47 Mususa umune, Alona nkuikiata nka bu bibaadi Moyise muakule na nkuenda lubilo munkatshi mua kakongie na kipupa kibaadi kipue kubanga munkatshi mua muilo. Biabia aye nkuela kabanda mu kintu kia kusemuina kaalo na nkubanga kubuikiila muilo miluisho. 48 Baadi nka muimane pankatshi pa bantu bafue na be na muwa, na nfudiilo a bioso kipupa nkuimana. 49 Baba babafuile ku kipupa babaadi bantu 14 700, kukatusha baba babaafuile pa muanda wa Kora. 50 Nfudiilo a bioso, pabaadi Alona mualukiile kui Moyise ku kituelelo kia kashibo k’epema ka kufumankena, kipupa kibaadi kipue kuimana.

17 Yehowa nkulungula Moyise’shi: 2 “Esambe na bena Isalele na wate kuabadi mukombo umune ku nshibo yoso ya ba mashabo, kui ba nfumu ba nshibo yoso ya ba mashabo, yoso mikombo 12. Ofunde eshina dia muntu oso pa mukombo waye. 3 Ofunde eshina dia Alona pa mukombo wa Levi, muanda kui mukombo umune wa nfumu a nshibo yoso ya ba mashabo. 4 Otuule mikombo mu kashibo k’epema ka kufumankena kumpala kua mushete wa Bukamonyi, mbalo yanenumuenekielaa pa kiubishi. 5 Na mukombo wa yawa muntu ansangula aukatuusha ntonga, na nakemika kuunauna kua bena Isalele pabintale, na kua bakuete kuunauna dingi pabinutale.”

6 Biabia Moyise nkulungula bena Isalele, na ba nfumu babo boso nkumupa mikombo, mukombo umune bua nfumu oso a nshibo ya ba mashabo, mikombo 12, na mukombo wa Alona ubaadi na’o namu paapa. 7 Akupu Moyise nkutuula mikombo kumpala kua Yehowa mu kashibo k’epema ka Bukamonyi.

8 Muifuku dibalondele, pabaadi Moyise mutuele mu kashibo k’epema ka Bukamonyi, mukombo wa Alona bua nshibo ya Levi ubaadi utuushe ntonga na ubaadi na ntonga, bilongo na tukuba tua amande tumongie. 9 Akupu Moyise nkukatuka na mikombo yoso kumpala kua Yehowa, nkuenda nayo kui muilo oso wa Isalele. Abo nkuiyitala, na muntu oso nkuata mukombo waye.

10 Akupu Yehowa nkulungula Moyise’shi: “Alusha mukombo wa Alona kumpala kua mushete wa Bukamonyi bua’shi wikale bu kintu kia kulama bu kitunduilo bua bana ba buntomboshi, bua’shi kuunauna kuabo pabintale kuimane na tabafuanga.” 11 Mususa umune Moyise nkukita nka bu bibaadi Yehowa mumutumine eyi. Aye nkukita nka biabia.

12 Akupu bena Isalele nkulungula Moyise’shi: “Binobino, atufu, atubutuka binyibinyi, atue boso atubutuka! 13 Muntu su ngumune efubuila pepi na tabernakele a Yehowa afu! Abitungu tufue mu wawa mushindo su?”

18 Akupu Yehowa nkulungula Alona’shi: “Obe na bana bobe balume na nshibo ya ba mashobe anukatuala bushito bua kilubilo kioso kiakia ki’abakitshina mbalo ya kishila, na obe na bana bobe balume anukatuala bushito bua kilubilo kioso kiakia ki’abakitshina bu tshite muakuidi buenu. 2 Oyitanyine dingi bakuenu balume ba mu kisamba kia Levi, kisamba kia ba mashobe kulu, bua’shi bebungie kodi na bakufubile na bana bobe balume kumpala kua kashibo k’epema ka Bukamonyi. 3 Abitungu bakumbashe mifubo yabo pabikutale na pabitale kashibo koso k’epema. Anka t’abitungu befubuile pepi na bintu bia mu mbalo ya kishila na kilambuilo, bua’shi abo sunga obe tanufuanga. 4 Abakebungu kodi na kulombasha mifubo yabo pabitale kashibo k’epema ka kufumankena na mifubo yoso itale kashibo k’epema, na muntu su ngumune shi mupebue matalua* ta mulombene kuifubuila pepi nenu. 5 Abitungu nukumbashe mufubo wenu pabitale mbalo ya kishila na pabitale kilambuilo, bua’shi ingi nsungu tayifuilanga muilo wa Isalele. 6 Ami nemuate bakuenu balume, bena Levi munkatshi mua bena Isalele bu kia buntu buenu. Mbapebue kui Yehowa bua kukumbasha mufubo wa ku kashibo k’epema ka kufumankena. 7 Obe na bana bobe balume, nui na bushito bua kulombasha mifubo ya bu tshite muakuidi itale kilambuilo na bintu bi kunyima kua kilamba kia lushiko, na abitungu nukite uno mufubo. Nenupa mufubo wa bu tshite muakuidi bu kia buntu, na muntu su ngumune shi mupebue matalua* efubuila pepi abitungu ayipayibue.”

8 Yehowa nkulungula dingi Alona’shi: “Nakutuulu bua kutala bia buntu biabampa. Nakupa obe na bana bobe balume kipindi kia bintu bioso bia kishila bi’abalambula kui bena Isalele bu kipindi ki’abekala abenupa bua loso. 9 Bino nyi abikala biobe mu milambu ikile kishila ishiikibue kaalo: milambu yoso yabalambula mpa na milambu yabo ya ntete, milambu yabo ya muluisho na milambu yabo ya kushimisha nayo miluisho yabantuadila. Nyi nkintu kikile kishila bobe na bua bana bobe balume. 10 Anukeudiila mu mbalo ikile kishila. Muana mulume oso ekuiudia. Akikala kintu kia kishila kodi. 11 Bino bingi’nyi mbiobe: bia buntu bi’abatuusha kui bena Isalele pamune na milambu yoso ya kupuka. Nakupa bianka obe na bana bobe balume na bana bobe bakashi bu kipindi ki’abekala abenupa bua loso. Muntu oso shi butete mu nshibo yobe mulombene kuibidia.

12 “Muimu oso wi buwa ngofu, nfinyo yoso ipia i buwa ngofu na ntete, biumbuluanga biabo bia kumpala, bi’abapa Yehowa, nakupa bianka. 13 Biumbuluanga bia kumpala bia kintu kioso kia mu nsenga yabo, bi’abatuala kui Yehowa, abikala biobe. Muntu oso shi butete mu nshibo yobe mulombene kuibidia.

14 “Kintu kioso kituudibue ku lupese* mu Isalele bua muanda kampanda wa kishila akikala kiobe.

15 “Muana mbedi oso a kintu kioso ki na muwa,* abalambula kui Yehowa, biabikala a muntu sunga a nyema, ekala oobe. Anka abitungu okuule muana mbedi a bantu, na abitungu okuule dingi muana mbedi a nyema i butete. 16 Abitungu omukuule na muulo wa nkuulo padi na mueshi umune na kunundu, ku muulo wabadi batshibe wa shekele* itano ya kiamo kia arja, muyile kipimo kia shekele a ku mbalo ya kishila.* Muikale gera* 20. 17 Anka t’abitungu okuule muana mbedi mulume a ngombe sunga muana mbedi mulume a mukooko, sunga muana mbedi a mbushi. Nyi mbintu bia kishila. Abitungu omiamine mase aayo pa kilambuilo, na kufitshisha muimu wayo miishi bu mulambu ushiikibue mu kaalo bua mapembue e buwa* kui Yehowa. 18 Na muita wayo awikala oobe. Awikala oobe nka bu luidi lua mulambu wa kupuka, na bu kioko kibalume. 19 Bia buntu bioso bia kishila abilambula bena Isalele kui Yehowa, nakupa bianka obe na bana bobe balume na bana bobe bakashi bu kipindi ki’abekala abakupa bua loso. Nyi nkilombeno kia mungua* kia loso kumpala kua Yehowa bobe na bua lutandua lobe.”

20 Yehowa nkulungula dingi Alona’shi: “T’okekala na bupianyi mu nsenga yabo, na t’okapete kipindi su nkimune kia nsenga munkatshi muabo. Ne kipindi kiobe na bupianyi bobe munkatshi mua bena Isalele.

21 “Binobino napa bana balume ba Levi ki’ekumi kioso mu Isalele bu bupianyi bua mufubo wabakuete kukita, mufubo wa kashibo k’epema ka kufumankena. 22 Bena Isalele ta mbalombene kuifubuila dingi pepi na kashibo k’epema ka kufumankena, bisumanga abakitshi muluisho na abafu. 23 Abitungu bena Levi banabene bakite mufubo wa kashibo k’epema ka kufumankena, na nnabo abasemuna bushito bua kilubilo kiabo. Nyi muiya wa loso munda mua bipungo bienu bioso bua’shi tabapetanga bupianyi munkatshi mua bena Isalele. 24 Muanda nemupe bena Levi bu bupianyi, ki’ekumi akilambula bena Isalele, ki’abalambula kui Yehowa. Nyi buakinyi nemuibalungule’shi, ‘T’anupete bupianyi munkatshi mua bena Isalele.’”

25 Akupu Yehowa nkulungula Moyise’shi: 26 “Lungula bena Levi’shi, ‘Anupete kui bena Isalele ki’ekumi kianenupa bu bupianyi buenu, na abitungu nutuushe kuanka ki’ekumi kia ku ki’ekumi bu kia buntu kui Yehowa. 27 Na akikala bu kia buntu kienu, nka bu ntete ya pa mbalo ya kufunta ntete sunga bintu bi bungi bia ku kikamino kia nfinyo sunga ku kikamino kia muimu. 28 Mu uno mushindo nyi muanutuusha namu kia buntu kui Yehowa ku bi’ekumi bioso bi’anupete kui bena Isalele, na ku bianka nkuanupa tshite muakuidi Alona kia buntu kia Yehowa. 29 Anupa Yehowa bia buntu bia mishindo yoso bia ku bia buntu bi buwa ngofu bi’abenupa bu kintu kia kishila.’

30 “Na abitungu w’ebalungule’shi, ‘P’anutuusha bintu bi buwa ngofu bia ku bianka, paapa abishala abikala bia bena Levi nka bu bintu bia pa mbalo ya kufunta ntete na bu bintu bia ku kikamino kia nfinyo sunga kikamino kia muimu. 31 Anue na bifuko bienu anuikidi mu mbalo yoso yaaya, muanda nyi efuto dienu bua mufubo wenu w’anukitshi ku kashibo k’epema ka kufumankena. 32 T’anukitshi muluisho mu uno muanda p’anutuusha bintu bi buwa ngofu bia ku bianka, na t’abitungu nuate na muulo upeela bintu bia kishila bia bena Isalele, bisumanga anufu.’”

19 Yehowa nkulungula dingi Moyise na Alona’shi: 2 “Uno nyi muiya ubeele Yehowa’shi, ‘Lungula bena Isalele bakuatshile ngombe monga mukashi e buwa shi na kilema na abashabandile kuanya ku kikumbo. 3 Omupe tshite muakuidi Eleazare, na aye atuuku naye paasha pa kishalelo na bamuipee kumpala kuaye. 4 Akupu tshite muakuidi Eleazare aate ndambo ya aa mase ku munue waye, na eamiamine misusa musambobidi dia ku kituelelo kia kashibo k’epema ka kufumankena. 5 Akupu bashiikie yawa ngombe mukashi kaalo mu meso muaye. Musokia waye, muita waye, mase aaye pamune na tufi tuaye bebishiikie kaalo. 6 Na tshite muakuidi aate mabaya a mutshi wa sedre, wa izope, na buanda bumonga pididii ebiele mu kaalo kabakuete kushiika yawa ngombe mukashi. 7 Akupu tshite muakuidi atumpe bilamba biaye na etumpe mema, kunyima mmulombene kutuela mu kishalelo; anka tshite muakuidi ekala butete mpa na ku kiolua.

8 “‘Yawa ekeele mushiikie ngombe mukashi mu kaalo atumpe bilamba biaye na etumpe mema,* na ekala butete mpa na ku kiolua.

9 “‘Muntu shi butete abungie buto bua yawa ngombe mukashi na ebutuule paasha pa kishalelo mu mbalo itooshibue, na kakongie ka bena Isalele kebulame bua’shi bebusangie na mema aafubishua bua kutooshibua. Nyi mulambu wa muluisho. 10 Yawa abungu buto bua yawa ngombe mukashi atumpe bilamba biaye na ekala butete mpa na ku kiolua.

“‘Uno nyi muiya wa loso bua bena Isalele na bua muntu muenyi mushale munkatshi muabo. 11 Muntu oso akumu kitanda kia muntu,* ekala butete munda mua mafuku musambobidi. 12 Yawa muntu etoosha na mema* muifuku dia kasatu, na ekala mutooshibue muifuku dia musambobidi. Anka su ta muitooshe muifuku dia kasatu, muifuku dia musambobidi t’ekala mutooshibue. 13 Muntu oso akumu kitanda kia muntu mufue* na sh’etoosha ekasha tabernakele a Yehowa butete, na abitungu yawa muntu* akatushibue* mu Isalele. Atungunuka na kuikala butete muanda ta mbamumiamine mema a kutooshibua nao. Butete buaye abushala pa mbidi paye.

14 “‘Uno nyi muiya wa kulonda nsaa ayifu muntu mu kashibo k’epema: Muntu oso atuele mu kashibo k’epema na muntu oso ekeele mu kashibo k’epema abekala butete munda mua mafuku musambobidi. 15 Kintu kioso kia kuela bintu ki muasa kiabashi baanye kibuikilo kuanka, ki butete. 16 Muntu oso akumu muntu abadi bayipe paasha ku lupete lua ngoshi, sunga kitanda, sunga mufufua wa muntu sunga mashama ekala butete munda mua mafuku musambobidi. 17 Abitungu baatshile yawa muntu e butete ndambo ya buto bua mulambu wa muluisho wa bekeele bashiikie kaalo na bebuele mu kintu, bapongoole mema a mu muela panka. 18 Akupu muntu shi butete aate izope amuele mu aa mema na amumiamine pa kashibo k’epema, pa bintu bioso na pa bantu* boso bekeele yaaya mbalo na pe muntu oso kumine mufufua sunga muntu abadi bayipee, sunga kitanda sunga mashama. 19 Muntu shi butete eamiamina kui muntu e butete muifuku dia kasatu na muifuku dia musambobidi amutoosha ku muluisho; akupu atumpe bilamba biaye na etumpe mema, na ku kiolua ekala shi butete.

20 “‘Anka muntu e butete na sh’etoosha, abitungu yawa muntu* akatushibue* mu kakongie, muanda baluisha mbalo ya kishila ya Yehowa. T’abekalanga ba mumiamine mema a kutoosha nao, biabia e butete.

21 “‘Uno awikala muiya wa loso buabo: Muntu amiamina mema a kutoosha nao, abitungu atumpe bilamba biaye, na muntu akumu mema a kutoosha nao ekala butete mpa na ku kiolua. 22 Kintu kioso ki’abakumu kui muntu* e butete akikala butete, na muntu e kikumu ekala butete mpa na ku kiolua.’”

20 Mu mueshi wa kumpala, kakongie koso ka bena Isalele kabafikile mu kabaaka ka Sine, na muilo nkubanga kushala mu Kadeshe. Kuakua nyi kubaadi Miriame mufuile na ashiikibua.

2 Biabia takubaadi mema bua kakongie, na abo nkuibunga pamune bua kutombokiela Moyise na Alona. 3 Muilo ubaadi awikakena na Moyise wambanga’shi: “Tubadia winyi kufua pafuile bakuetu kumpala kua Yehowa! 4 Buakinyi nuibafikie na kakongie ka Yehowa mu kano kabaaka, bua’shi atue na nyema yetu tufuile muno? 5 Na buakinyi nuibetutuushe mu Ejipitu bua kufika netu mu ino mbalo i bubi? Takui mbalo ya kukuna mbio na takui mitshi ya nfigiye, mitshi ya nfinyo, mitshi ya grenade, na takui mema a kutoma.” 6 Akupu Moyise na Alona nkukatuka kui kakongie, nkuenda ku kituelelo kia kashibo k’epema ka kufumankena na abo nkupona, nkunkupila mapala aabo paashi, na ntumbo ya Yehowa nkubanga kuibamuenekiela.

7 Nyi Yehowa nkulungula Moyise’shi: 8 “Ata mukombo na obungie kakongie pamune, obe na mukuenu Alona, nulungule lubuebue mu meso muabo bualudia kutuusha mema, na w’ebatuushishe mema mu lubuebue na ope kakongie na nyema yako mema a kutoma.”

9 Biabia Moyise nkuata mukombo ubaadi kumpala kua Yehowa nka bu bibaadi mumutumine eyi. 10 Akupu Moyise na Alona bababungile kakongie pamune kumpala kua lubuebue na aye nkuibalungula’shi: “Teemeshayi, anue ba ntomboshi! Abitungu’shi tuinutuushishe mema mu luno lubuebue su?” 11 Nyi Moyise nkuibuesha mboko yaye, nkukupila lubuebue misango ibidi na mukombo waye, mema e bungi nkubanga kutuuka, na kakongie na nyema yako nkubanga kutoma.

12 Kunyima Yehowa nkulungula Moyise na Alona’shi: “Pa muanda ta nuibaleshe lukumiino muandi na ta nuibangikashe a kishila ku meso kua muilo wa Isalele, tanutuesha kano kakongie mu nsenga yanekapa.” 13 Aa nyi mema a Meriba* kubaadi bena Isalele bekakeene na Yehowa, na aye nkuiyikasha a kishila munkatshi muabo.

14 Akupu Moyise nkutuma mikiendi kui nfumu a Edome kukatukila ku Kadeshe bua kumulungula’shi: “Mukuenu Isalele bakula’shi, ‘Ouku kalolo nkalakashi yoso yatudi bafumankane nayo. 15 Ba mashetu babayile mu Ejipitu, na atue nkushala mu Ejipitu bipua* bi bungi, na bena Ejipitu nkuitukiengiesha atue na ba mashetu. 16 Nfudiilo a bioso atue nkuidila kui Yehowa, aye nkuituteemesha, nkutuma muikeyilu na aye nkuitutuusha mu Ejipitu, na binobino tui mu Kadeshe, kibundi ki ku mikalo ya nsenga yobe. 17 Etutadiile namu tukidile mu nsenga yobe. T’atukidila muifuba sunga efuba dia nfinyo su ndimune, na t’atutomo mema a mu mushima su ngumune. Atutambukila Muishinda dia Nfumu kushi kualuluka ku mboko ibalume sunga ku mboko ibakashi mpa na p’atukidi mu nsenga yobe.’”

18 Anka Edome nkumulungula’shi: “Tokidilanga mu nsenga yetu. Bisumanga nafiki na lupete lua ngoshi mu kufumankana nobe.” 19 Kadi bena Isalele nkumulungula’shi: “Atukidila muishinda dikata, na su atue sunga nyema yetu tuatoma mema oobe, atufutu. Tatui na lukalo na kingi kintu, atukimbi penda kukila lua mikoolo.” 20 Anka aye nkuakula’shi: “T’okidi nya.” Bua biabia Edome nkuenda mu kufumankana naye na bantu be bungi na kiluilo kia basalayi* ki bukome. 21 Biabia Edome bapelele kutadiila Isalele bua’shi akidile mu nsenga yaye; nyi Isalele nkuyila dingi eshinda.

22 Muilo wa Isalele, kakongie koso kashima nkukatuka ku Kadeshe na nkufika ku muengie wa Hore. 23 Akupu Yehowa nkulungula Moyise na Alona ku muengie wa Hore ku mikalo ya nsenga ya Edome’shi: 24 “Alona akabungibua kui muilo waye. T’akatuele mu nsenga yankapa bena Isalele, muanda anue boso babidi nuikeele batombokiele eyi diande pabitale mema a Meriba. 25 Ata Alona na muana aaye Eleazare okaamine nabo ku muengie wa Hore. 26 Katusha Alona bilamba biaye na w’ebifuadikie muana aaye Eleazare na Alona afuila kuakua.”*

27 Biabia Moyise nkukita nka bibaadi Yehowa mutume eyi, na abo nkukaamina ku muengie wa Hore mu meso mua kakongie koso. 28 Moyise nkukatusha Alona bilamba na nkuibifuadika muana aaye Eleazare. Kunyima kua biabia Alona nkufuila kuakua ku nsongo kua muengie. Akupu Moyise na Eleazare nkuika ku muengie. 29 Pabamuene kakongie koso’shi Alona baafu, nshibo yoso ya Isalele ibadidile Alona munda mua mafuku 30.

21 Pabaadi nfumu muina Kanaana a Arade, baadi mushale mu Negebe mupushe’shi Isalele mmufikie muishinda dia Atarime, baadi mutuukie Isalele ngoshi na akuata bangi ba kuabadi enda nabo. 2 Biabia Isalele kuitshipa kui Yehowa’shi: “Su bompa bano bantu muiyasa diande, nabutula binyibinyi bibundi biabo.” 3 Nyi Yehowa nkuteemesha eyi dia Isalele na nkuibapa bena Kanaana, na abo nkuibabutula abo na bibundi biabo. Nyi buakinyi abaudikile yaaya mbalo bu Orma.*

4 Pabaabadi abatungunuka na luendo luabo kukatukila ku muengie wa Hore abakidila muishinda dia Kalunga Kamonga bua kuifunya nsenga ya Edome, muilo* ubaadi ukookie bua luendo. 5 Na muilo ubaadi nka awakula bi bubi pabitale Efile Mukulu na Moyise, wambanga’shi: “Buakinyi nuibetutuushe mu Ejipitu buatudia kufua mu kabaaka? Tamui bia kudia sunga mema, na tuibapue kushikua uno mukate ushi kapu.” 6 Biabia Yehowa nkutuma nyoka ya bulembe* munkatshi mua muilo, na ayo nkusuma muilo, na bena Isalele be bungi nkufua.

7 Biabia muilo nkufika kui Moyise na nkuakula’shi: “Tubakitshi muluisho p’atue kuakula bibubi pabitale Yehowa na pabikutale. Etutekiele namu kui Yehowa, akaashe nyoka kuatudi.” Na Moyise nkuibatekiela. 8 Akupu Yehowa nkulungula Moyise’shi: “Kita kinfuanyi kia nyoka a bulembe* na wekituule ku mutshi. P’abasumu muntu, abitungu ekitale bua’shi ashale na muwa.” 9 Mususa umune Moyise nkukita nyoka a kiamo kia munyinga, nkumutuula ku mutshi, pabaadi muntu asumibua na nyoka na atala ku nyoka a kiamo kia munyinga,* baadi apaanda.

10 Kunyima kua biabia bena Isalele nkubanga luendo na nkushala mu Obote. 11 Akupu abo nkukatuka ku Obote na nkushala mu Iye-abarime mu kabaaka ketalene na Moabe dia kutunduka nguba. 12 Abakatukile kuakua na abo nkushala pepi n’Ebanda* dia Zerede. 13 Abakatukile kuakua na abo nkushala mu nsenga ya Arnone, i mu kabaaka kakatukile ku mikalo ya bena Amore, muanda Arnone nyi mukalo wa Moabe, pankatshi pa Moabe na bena Amore. 14 Nyi buakinyi mukanda wa Ngoshi ya Yehowa awakula bua “Wahebe mu Sufa na mabanda a Arnone, 15 na ngalaala* ya mabanda ayende mpa na ku kibundi kia Are na ayifumankana na mukalo wa Moabe.”

16 Akupu abo nkuenda ku Beere. Uno nyi mushima ubaadi Yehowa mulungule Moyise’shi: “Bunga muilo na neupe mema.”

17 Mu aa mafuku Isalele bayimbile luno loono’shi:

“Tuusha mema, obe mushima,* puulayi!*

21 Akupu Isalele nkutuma mikiendi kui Sihone nfumu a bena Amore, bua kumulungula’shi: 22 “Etutadiile tukidile mu nsenga yobe. T’atukidila muifuba sunga muifuba dia nfinyo su ndimune. T’atutomo mema a mu mushima su ngumune. Atukidila Muishinda dia nfumu mpa na p’atukidi mu nsenga yobe.” 23 Anka Sihone tabaadi mutadiile Isalele bua kukidila mu nsenga yaye. Anka, baadi mubungie bantu baye boso na enda mu kulua ngoshi na Isalele mu kabaaka, aye nkufika ku Yasa na nkubanga kulua na Isalele. 24 Anka Isalele nkumutshokola na lupete lua ngoshi na nkuata nsenga yaye kubanga ku Arnone mpa na ku Yaboke, pepi na bena Amone, muanda Yazere e ku mikalo kua nsenga ya bena Amone.

25 Biabia Isalele nkuata bino bibundi bioso, na abo nkubanga kushala mu bibundi bioso bia bena Amore, mu Eshebone na bibundi bioso bimuifunyishe. 26 Muanda Eshebone baadi kibundi kia Sihone, nfumu a bena Amore baadi mulue na nfumu a bena Moabe na amuata nsenga yaye yoso mpa na ku Arnone. 27 Nyi akufiki lukindi lua kusenga aluamba’shi:

“Fikayi ku Eshebone.

Kibundi kia Sihone kibakiibue na bitako biakio bikale bukopo.

28 Muanda kaalo nkatuukie mu Eshebone, ludimi lua kaalo ndutuukie mu kibundi kia Sihone.

Luataatshisha Are a Moabe, ba nfumu ba ma mbalo e kunundu kua Arnone.

29 Malua kodi Moabe! Anukabutudibua anue bena Kemoshe!

Akekasha bana bobe balume bu bantu bafu’abasukanga, na bana bobe bakashi bu bantu bakuatshibue kui Sihone nfumu a bena Amore.

31 Biabia Isalele nkubanga kushala mu nsenga ya bena Amore. 32 Akupu Moyise nkutuma bana balume mu kupuupa Yazere. Abo nkukuata bibundi bimuifunyishe na abo nkubinga bena Amore abaadi muanka. 33 Kunyima kua biabia abalulukile na bakaamina n’eshinda dia Bashane. Oge nfumu a Bashane bafikile na muilo waye oso mu kufumankana nabo bua kulua ngoshi ku Edrei. 34 Yehowa nkulungula Moyise’shi: “Tomutshinanga, muanda nakamutuulu na muilo waye oso na nsenga yaye muiyasa diobe, na okamukitshi nka bu biokitshine Sihone nfumu a bena Amore baadi mushale mu Eshebone.” 35 Biabia abo nkumuipaa pamune na bana baye balume na muilo waye oso, mpa na pakushibaadi kushale muntu su ngumune a ku bantu baye na muwa na abo nkuata nsenga yaye.

22 Akupu bena Isalele bababangile luendo na bashala mu kabaaka ka Moabe ketalene na Yeriko, bushiya bua Yordane. 2 Balake muana a Zipore bamuene bioso bibaadi Isalele mukite bena Amore, 3 na Moabe nkupusha moo ngofu muanda wa muilo, pa muanda ubaadi bungi bukile; binyibinyi Moabe nkupusha moo pa muanda wa bena Isalele. 4 Biabia Moabe nkulungula bakulu ba Madiane’shi: “Binobino kano kakongie akadi bioso bituifunyishe, nka bu ngombe adi lubishi lui mu mafuba.”

Balake muana a Zipore nyi baadi nfumu a Moabe mu aa mafuku. 5 Aye nkutuma mikiendi kui Balame muana a Beore ku Petore, e ku bukunkula bua Muela* muiumbo diaye dia butandua. Aye nkumuitanyisha nkuakula’shi: “Tala! Kui muilo utuukie mu Ejipitu. Ngupuute panundu pa nsenga, na ngushale witalene nami. 6 Binobino, fika namu na ongielele uno muilo mulua, muanda wi bukome kunkila. Pangi ne mulombene kuiutshokola na kuiubinga mu ino nsenga, muanda nauku kalolo’shi yawa oso welela miabi, edibua miabi na yawa oso wele mulua edibua mulua.”

7 Biabia bakulu ba Moabe na bakulu ba Madiane nkubanga luendo na efuto dia lubuko mu maasa aabo na nkuenda kui Balame, nkumulungula mukandu wa Balake. 8 Nyi aye nkuibalungula’shi: “Lalayi pano, na nenulungula eyi dioso adindungula Yehowa.” Biabia ba nfumu ba Moabe nkushala na Balame.

9 Akupu Efile Mukulu nkufika kui Balame na nkumuipusha’shi: “Bano bantu be nobe mbananyi?” 10 Balame nkualula Efile Mukulu a binyibinyi’shi: “Balake muana a Zipore, nfumu a Moabe nyi bantumina mukandu’shi, 11 ‘Tala! muilo utuukie mu Ejipitu ngupuute panundu pa nsenga. Binobino fika weungielele mulua. Pangi nekobesha kulua nao na kuiubinga.’” 12 Anka Efile Mukulu nkulungula Balame’shi: “T’abitungu wende nabo, t’abitungu wele wawa muilo mulua, muanda nguedibue miabi.”

13 Balame nkubuuka ku namashika na nkulungula ba nfumu ba Balake’shi: “Ndayi mu nsenga yenu, muanda Yehowa bapele nenda nenu.” 14 Biabia ba nfumu ba Moabe nkubanga luendo na nkualukiila kui Balake, nkumulungula’shi: “Balame bapele kufika netu.”

15 Anka Balake nkutuma dingi ba nfumu be bungi bukile na ba kinemo kikata kukila ba kisaka kia kumpala. 16 Abo nkufika kui Balame na nkumulungula’shi: “Balake muana a Zipore bakula’shi, ‘Totadilanga namu kintu su nkimune kikukutshishue bua kufika kuandi, 17 muanda nakupa kinemo kikata na nakitshi kioso kiondungula bua kukita. Biabia, fika namu ongielele uno muilo mulua.’” 18 Anka Balame nkualula bafubi ba Balake’shi: “Sunga Balake ampa nshibo yaye iuule na kiamo kia arja na ôlo, ntshi mulombene kukita kintu su nkimune kikutuene n’eyi dia Yehowa Efile Mukulu ande, biakikala kipeela sunga kikata. 19 Anka bandayi kushala pano dingi buno bufuku bua’shi nguukie kingi kintu akindungula Yehowa.”

20 Akupu Efile Mukulu nkufika kui Balame bufuku na nkumulungula’shi: “Su bano bantu babafiki mukukuitanyisha, enda nabo. Anka we mulombene kuakula nka penda mayi ankulungula bua kuakula.” 21 Biabia Balame nkubuuka ku namashika, nkuadisha kishalelo pa mpunda* aaye na nkuenda na ba nfumu ba Moabe.

22 Anka nsungu y’Efile Mukulu nkuteemba muanda baadi ende, na muikeyilu a Yehowa nkuimana muishinda bua kumukutshishua kuenda. Balame baadi mukaamine ku mpunda aaye na bafubi baye babidi babaadi naye. 23 Mpunda pa bamuene muikeyilu a Yehowa mmuimane muishinda na lupete lua ngoshi muiyasa diaye, batompele kukatuka muishinda bua kuenda mu kisuku. Anka Balame babangile kukupila mpunda bua kumualusha muishinda. 24 Akupu muikeyilu a Yehowa nkuimana mu kashinda kapeela pankatshi pa mafuba abidi a nfinyo, kekale na midimba ya mabue mpese yoso ibidi. 25 Mpunda pa bamuene muikeyilu a Yehowa, babangile kuifina ku mudimba na aye nkufikiina luao lua Balame ku mudimba, na Balame nkubanga dingi kumukupila.

26 Muikeyilu a Yehowa nkukila dingi kumpala na nkuimana mu mbalo ipeela ngofu ishibaadi na mushindo wa kuenda ku mboko ibalume sunga ku mboko ibakashi. 27 Mpunda pa bamuene muikeyilu a Yehowa, baladile paashi Balame mushale panundu paye, biabia Balame bakuatshile nsungu na aye nkutungunuka na kukupila mpunda na mukombo waye. 28 Nfudiilo a bioso, Yehowa nkuakusha* mpunda na mpunda nkulungula Balame’shi: “Nakukitshi kinyi bua’shi onkupile ino misusa isatu?” 29 Balame nkualula mpunda’shi: “Pa muanda bommono ku bisumanga. Su nadia kuikala na lupete muiyasa diande, nadia nkuipa!” 30 Akupu mpunda nkulungula Balame’shi: “Ntshi mpunda oobe odi mukaamine munda mua muwa oobe oso mpa na lelo uno su? Tandi mukukite dimo bino su?” Aye nkualula’shi: “Nya!” 31 Nyi Yehowa nkubuula meso a Balame, na aye nkumona muikeyilu a Yehowa mmuimane muishinda na lupete lua ngoshi muiyasa diaye. Mususa umune aye nkuinama na nkukupila mpala yaye paashi.

32 Akupu muikeyilu a Yehowa nkumulungula’shi: “Buakinyi bokupila mpunda oobe ino misusa isatu? Tala! Ami nabene nafiki mu nkukutshishua kuenda, muanda eshinda diobe ndikutuene na kikiebe ki’eshimba diande. 33 Mpunda ekeele mummone na batompo nkunyikumba ino misuusa isatu. Puandikisha’shi tabaadia kuikala munyikumbe! Nadia nkuipaa na naleka mpunda na muwa.” 34 Balame nkulungula muikeyilu a Yehowa’shi: “Nakitshi muluisho, muanda ntanguukanga’shi nnobe ekeele muimane muishinda bua kufumankana nami. Binobino, su bi bubi ku meso kobe, nalukiila.” 35 Anka muikeyilu a Yehowa nkulungula Balame’shi: “Nda na bano bantu, kadi wakule nka penda mayi a nkulungula.” Biabia Balame nkutungunuka na kuenda na ba nfumu ba Balake.

36 Pabaadi Balake mupushe’shi Balame bafiki, batuukile musuusa umune mu kufumankana naye ku kibundi kia Moabe ki ku bukunkula bua Arnone ku mikalo ya yaaya nsenga. 37 Balake nkulungula Balame’shi: “Ntshikeele mu kuitanyishe? Buakinyi tuekeele mufikie kuandi? Opuandikishanga’shi ntshi mulombene nkupa kinemo kikata?” 38 Balame nkualula Balake’shi: “Bi buwa, binobino binafiki kodi’bi. Anka abantadiila bua kuakula muanda kampanda su? Nakula nka penda mayi aele Efile Mukulu mukanua muande.”

39 Biabia Balame nkuenda na Balake na abo nkufika ku Kiriate-ushote. 40 Balake nkulambula ngombe na mikooko na nkutumina Balame na ba nfumu babaadi naye ndambo. 41 Ku namashika Balake nkuata Balame na nkukaamina naye ku Bamote-baale; bua’shi amone muilo oso.

23 Akupu Balame nkulungula Balake’shi: “Ibaka pa ino mbalo bilambuilo musambobidi, na ondumbuluile ngombe ilume musambobidi na mikooko ilume musambobidi.” 2 Mususa umune Balake nkukita nka bibaadi Balame muakule. Balake na Balame nkulambula ngombe mulume na mukooko ulume pa kilambuilo kioso. 3 Akupu Balame nkulungula Balake’shi: “Shala pano pepi na mulambu oobe wa kushiika kaalo, ami nende. Pangi Yehowa esamba nami. Kioso kiandungula nakulungula kianka.” Biabia aye nkuenda ku nsongo kua ka muengie.

4 Akupu Efile Mukulu nkuisamba na Balame, baadi mumulungule’shi: “Nebaka bilambuilo musambobidi mu mulongo na nalambula ngombe mulume na mukooko ulume pa kilambuilo kioso.” 5 Yehowa nkuela dino eyi mukanua mua Balame’shi: “Alukiila kui Balake na bino nyi biodia kuakula.” 6 Biabia aye nkualukiila na nkumona Balake na bakulu boso ba Moabe mbemane pepi na mulambu wa kushiika kaalo wa Balake. 7 Akupu aye nkuakula luno lukindi’shi:

‘Fika ongielele Yakobo mulua.

Oolo, fika oponeeshe Isalele kilumbu.’

 8 Mbikunyi biandi mulombene kuela mulua baba bashi bedibue mulua kui Efile mukulu?

Na mbikunyi biandi mulombene kuponeesha kilumbu baba babashi baponeeshe kilumbu kui Yehowa?

11 Akupu Balake nkulungula Balame’shi: “Nkinyi kibonkitshi? Nafiki nobe bua’shi wele beshikuanyi bande mulua, anka tuemukite kingi kintu nka penda kuibelela miabi.” 12 Aye nkumualula’shi: “T’abitungu’shi ngakule kiakia kioso akiele Yehowa mukanua muande su?”

13 Balake nkumulungula’shi: “Tuende namu ingi mbalo yodi mulombene kuibamona. Tuebamono boso nya, anka webamono penda ndambo. Ebangieele mulua kukatukila yaaya mbalo.” 14 Biabia aye nkuenda naye muifuba dia Sofime, ku songo kua Pisiga, na nkuibaka bilambuilo musambobidi na aye nkulambula ngombe mulume na mukooko ulume pa kilambuilo kioso. 15 Nyi Balame nkulungula Balake’shi: “Shala paapa pepi na mulambu oobe wa kushiika kaalo pa nende mu kuisamba n’Efile Mukulu akuaa.” 16 Na Yehowa nkuisamba na Balame na nkuela dino eyi mukanua muaye’shi: “Alukiila kui Balake, na bino mbiodia kuakula.” 17 Biabia aye nkualukiila kuadi na nkumona’shi baadi nka amutengiela pepi na mulambu waye wa kushiika kaalo, na bakulu ba Moabe babaadi naye. Balake nkumuipusha’shi: “Yehowa bakula kinyi?” 18 Akupu aye nkumulungula luno lukindi’shi:

“Ebuee Balake, na opushe.

Nteemeshe muana a Zipore.

P’akula muanda kampanda, teukitshi su?

P’alaa muanda kampanda, t’eukumbasha su?

22 Efile Mukulu kuete kuibatuusha mu Ejipitu.

E kuabadi nka bu mbo.

Mu ino nsaa be kuakula pabitale Yakobo na Isalele’shi:

‘Tala mianda ibakitshi Efile Mukulu!’

25 Akupu Balake nkulungula Balame’shi: “Su tue mulombene kuiwela mulua, biabia tuewelelanga miabi.” 26 Balame nkualula Balake’shi: “Ntangikalanga mukulungule’shi, ‘Nakitshi bioso abiakula Yehowa’?”

27 Balake nkulungula Balame’shi: “Fika namu tuende dingi ingi mbalo. Pangi abikala bi buwa ku meso ku’ Efile Mukulu a binyibinyi bua’shi webangieele mulua kukatukila yaya mbalo.” 28 Nyi Balake nkuenda na Balame ku nsongo kua Peore, mutadiile dia ku Yeshimone.* 29 Akupu Balame nkulungula Balake’shi: “Ibaka bilambuilo musambobidi pa ino mbalo, na ondumbuluile ngombe ilume musambobidi na mikooko ilume musambobidi.” 30 Balake nkukita nka bibaadi Balame muakule, na aye nkulambula ngombe mulume na mukooko ulume pa kilambuilo kioso.

24 Pabamuene Balame’shi kuelela Isalele miabi kubaadi akusankisha* Yehowa, tabaadi dingi muende mu kukimba bitunduilo bia mianda i bubi, anka baadi mutadiishe mpala yaye mu kabaaka. 2 Pabaadi Balame mubuushe meso na amona Isalele mmushale muyile bisamba biaye, kikudi ki’Efile Mukulu kibaadi kimuikile. 3 Aye nkuakula luno lukindi’shi:

10 Balake nkufiitshila Balame nsungu. Balake nkukupila bikufi bia kapeesha na nkulungula Balame’shi: “Nekeele mukuitanyine bua kuela beshikuanyi bande milua, anka binobino tuemukite kintu su nkimune nka penda kuibelela miabi ino misusa isatu. 11 Binobino alukiila ku nshibo kobe nka binobino. Nakimbanga nkupa kinemo kikata, anka Yehowa bakukutshishua kiakia kinemo.”

12 Balame nkualula Balake’shi: “Ntangikalanga mulungule mikiendi y’otumine’shi, 13 ‘sunga Balake ampa nshibo yaye iule na kiamo kia arja na ôlo, tankitshi kintu su nkimune mumi nabene* kikutuene na eyi dia Yehowa, biakikala ki buwa sunga ki bubi. Nakula nka penda abindungula Yehowa su’? 14 Binobino tanende kui muilo wande. Fika nkulungule kiabakakitshina muilo oobe kui uno muilo mu mafuku aafiki.”* 15 Biabia aye nkuakula luno lukindi’shi:

20 Pabamuene Amaleke, batungunukile na kuakula lukindi luaye’shi:

21 Pabamuene bena Keni, batungunukile na kuakula lukindi luaye’shi:

“Mbalo yobe ya kushala ngilamibue kalolo na kishalelo kiobe nkibakue p’ebue.

22 Anka kui muntu ashiiki Kayine kaalo.

Kubashala mafuku bungi kinyi kumpala kua’shi Asiri akukuate ende nobe?”

23 Na aye nkutungunuka na kuakula lukindi luaye’shi:

“Malua! Nnanyi akashala na muwa apakakitshi Efile Mukulu bino?

Anka aye namu akabutuka.”

25 Akupu Balame nkuibuaa na nkuenda, nkualukiila kuaye. Balake namu nkuenda diaye eshinda.

25 Pabaadi Isalele mushale mu Shitime, muilo ubabangile kukita lukiebanokiebano na ba nsonguakashi ba Moabe. 2 Bana bakashi nkuitanyisha muilo bua kulambula b’efile babo milambu, na muilo nkubanga kudia na kuinamina b’efile babo. 3 Biabia Isalele nkulamata ku lulanguilo lua Baale a Peore, na Yehowa nkufiitshila Isalele nsungu i bukopo. 4 Yehowa nkulungula Moyise’shi: “Ata bakunkushi* boso ba uno muilo na w’ebapudikie kumpala kua Yehowa mu kanya elangalanga,* bua’shi nsungu i bukopo ya Yehowa ikatukie kui Isalele.” 5 Akupu Moyise nkulungula ba nsushi ba Isalele’shi: “Muntu oso a kuanudi ayipee bantu baye balamate ku lulanguilo lua Baale a Peore.”

6 Nka paapa, muina Isalele umune bafikile na muana mukashi muina Madiane kui bakuabo balume mu meso a Moyise na a kakongie koso ka bena Isalele, pabaabadi abadidi ku kituelelo kia kashibo k’epema ka kufumankena. 7 Pabaadi Finease muana a Eleazare muana a tshite muakuidi Alona mumone biabia, mususa umune bebuele munkatshi mua kakongie na aata mulumbu muiyasa diaye. 8 Akupu aye nkulonda yawa muana mulume muina Isalele mu kashibo k’epema, na nkuibatubula boso babidi, yawa muana mulume muina Isalele na aye nkutubula yawa muana mukashi ku musua waye. Biabia kipupa kibaadi kui bena Isalele nkuleka. 9 Baba babafuile ku kiakia kipupa babaadi bantu 24 000.

10 Akupu Yehowa kulungula Moyise’shi: 11 “Finease muana a Eleazare muana a tshite muakuidi Alona bakatusha nsungu yande kui muilo wa Isalele, muanda ta muibatadiile bua’shi balanguile ungi efile munkatshi muabo kukatusha pend’ami. Biabia ntshi mubutule bena Isalele sunga biabidi’shi natekaa’shi bandamate nka pend’ami. 12 Nyi buakinyi namba’shi: ‘Binobino nakitshi naye kilombeno kiande kia butaale. 13 Na akikekala bu kilombeno kia loso kia bu tshite muakuidi buaye na bua lutandua luaye, muanda ta muibatadiile’shi balanguile ungi efile kukatusha pend’ami na bakitshi bia’shi muilo wa Isalele ufuidibue lusa.’”

14 Eshina dia muana mulume muina Isalele baadi muipayibue pamune na muana mukashi muina Madiane dibaadi Zimeri muana a Salu, nfumu a kifuko kia ba mashaye kia bena Simeone. 15 Eshina dia muana mukashi muina Madiane baadi muipayibue dibaadi Kozebi muana a Zure, Zure baadi nfumu a kisamba mu Madiane.

16 Kunyima Yehowa nkulungula Moyise’shi: 17 “Tuuka bena Madiane ngoshi na w’ebayipee, 18 muanda bekeele benukiengieshe pa kuinukitshina mianda na mayele mu muanda utale Peore na Kozebi muana a nfumu a Madiane, mukuabo mukashi baadi muipayibue muifuku dibaadi dikitshikie kipupa mu muanda utale Peore.”

26 Kunyima kua kipupa, Yehowa balunguile Moyise na Eleazare muana a tshite muakuidi Alona’shi: 2 “Badikayi bungi bua bantu ba kakongie koso ka Isalele kubanga pa bipua 20 na kunundu muyile mashibo a ba mashabo, nubadikie mu Isalele baba boso balombene kuenda ku ngoshi.” 3 Biabia Moyise na tshite muakuidi Eleazare nkuisamba nabo mu kabaaka ka Moabe pepi na Yordane ku Yeriko bebalungula’shi: 4 “Ebabadikieyi kubanga pa bipua 20 na kunundu, nka bu bibaadi Yehowa mutumine Moyise eyi.”

Binobino bana ba Isalele babaadi batuukie muiumbo dia Ejipitu babaadi: 5 Rubene muana mbedi a Isalele; bana ba Rubene babaadi: Kui Anoke nkutuukile kifuko kia bena Anoke, kui Palu nkutuukile kifuko kia bena Palu; 6 kui Esrone nkutuukile kifuko kia bena Esrone; kui Karmi nkutuukile kifuko kia bena Karmi. 7 Bino nyi bibaadi bifuko bia bena Rubene, na bungi bua bantu babo babaabadi bafunde bubaadi 43 730.

8 Muana a Palu baadi Eliabe. 9 Na bana ba Eliabe babaadi Nemuele, Datane na Abirame. Uno Datane na Abirame babaadi bantu abalesha mpala ya kakongie babaadi batombokiele Moyise na Alona pamune na kisaka kia Kora pabaabadi batombokiele Yehowa.

10 Akupu nsenga ibabuulukile* na y’ebamina. Kadi Kora bafuile na baba abaadi abamukuatshishena pabaadi kaalo katatshishe bana balume 250. Na abo nkufika kileshesho akidimusha. 11 Anka bana ba Kora ta babaadi bafue.

12 Bana ba Simeone muyile bifuko biabo babaadi: Kui Nemuele nkutuukile kifuko kia bena Nemuele; kui Yamine nkutuukile kifuko kia bena Yamine; kui Yakine nkutuukile kifuko kia bena Yakine; 13 kui Zera nkutuukile kifuko kia bena Zera; kui Shaule nkutuukile kifuko kia bena Shaule. 14 Bino nyi bibaadi bifuko bia bena Simeone: bantu 22 200.

15 Bana ba Gade muyile bifuko biabo babaadi: Kui Zefone nkutuukile kifuko kia bena Zefone; kui Agi nkutuukile kifuko kia bena Agi; kui Shuni nkutuukile kifuko kia bena Shuni; 16 kui Ozeni nkutuukile kifuko kia bena Ozeni; kui Eri nkutuukile kifuko kia bena Eri; 17 kui Arode nkutuukile kifuko kia bena Arode; kui Areli nkutuukile kifuko kia bena Areli. 18 Bino nyi bibaadi bifuko bia bana ba Gade, na bantu babo babaabadi bafunde babaadi 40 500.

19 Bana ba Yunda babaadi Ere na Onane. Anka Ere na Onane babafuile mu nsenga ya Kanaana. 20 Na bana ba Yunda muyile bifuko biabo babaadi: Kui Shela nkutuukile kifuko kia bena Shela; kui Pereze nkutuukile kifuko kia bena Pereze; kui Zera nkutuukile kifuko kia bena Zera. 21 Na bana ba Pereze babaadi: Kui Esrone nkutuukile kifuko kia bena Esrone, kui Amule nkutuukile kifuko kia bena Amule. 22 Bino nyi bibaadi bifuko bia Yunda, na bantu babo babaabadi bafunde babaadi 76 500.

23 Bana ba Isakare muyile bifuko biabo babaadi: kui Tola nkutuukile kifuko kia bena Tola; kui Puva nkutuukile kifuko kia bena Puva; 24 kui Yashube nkutuukile kifuko kia bena Yashube; kui Shimerone nkutuukile kifuko kia bena Shimerone. 25 Bino nyi bibaadi bifuko bia Isakare na bantu babo babaabadi bafunde babaadi 64 300.

26 Bana ba Zabulone muyile bifuko biabo babaadi: kui Serede nkutuukile kifuko kia bena Serede; kui Elone nkutuukile kifuko kia bena Elone; kui Yaleele nkutuukile kifuko kia bena Yaleele. 27 Bino nyi bibaadi bifuko bia bena Zabulone, na bantu babo babaabadi bafunde babaadi 60 500.

28 Bana ba Yosefe muyile bifuko biabo babaadi: Manasee na Efraime. 29 Bana ba Manasee babaadi: Kui Makire nkutuukile kifuko kia bena Makire; na Makire nkutanda Gileade; kui Gileade nkutuukile kifuko kia bena Gileade. 30 Bano nyi babaadi bana ba Gileade: kui Yezere nkutuukile kifuko kia bena Yezere; kui Eleke nkutuukile kifuko kia bena Eleke; 31 kui Asriele nkutuukile kifuko kia bena Asriele; kui Shekeme nkutuukile kifuko kia bena Shekeme; 32 kui Shemida nkutuukile kifuko kia bena Shemida; kui Kefere nkutuukile kifuko kia bena Kefere. 33 Binobino Selofehade muana a Kefere tabaadi mutande bana balume, anka penda bana bakashi, na mashina a bana bakashi ba Selofehade abaadi: Mahela, Nowa, Ogla, Milka na Tirsa. 34 Bino nyi bibaadi bifuko bia Manasee, na bantu babo babaabadi bafunde babaadi 52 700.

35 Bano nyi babaadi bana ba Efraime muyile bifuko biabo: Kui Shutela nkutuukile kifuko kia bena Shutela; kui Bekele nkutuukile kifuko kia bena Bekele, kui Tahane nkutuukile kifuko kia bena Tahane. 36 Na bano nyi babaadi bana ba Shutela, kui Erane nkutuukile kifuko kia bena Erane. 37 Bino nyi bibaadi bifuko bia bana ba Efraime, na bantu babo babaabadi bafunde babaadi 32 500. Bano nyi babaadi bana ba Yosefe muyile bifuko biabo.

38 Bana ba Benyamine muyile bifuko biabo babaadi: Kui Bela, nkutuukile kifuko kia bena Bela; kui Ashebele, nkutuukile kifuko kia bena Ashebele; kui Ahirame nkutuukile kifuko kia bena Ahirame; 39 kui Shefufame, nkutuukile kifuko kia bena Shufame; kui Ufame, nkutuukile kifuko kia bena Ufame. 40 Bana ba Bela babaadi Arde na Namane: kui Arde, nkutuukile kifuko kia bena Arde; kui Namane, nkutuukile kifuko kia bena Namane. 41 Bano nyi babaadi bana ba Benyamine muyile bifuko biabo, na bantu babo babaabadi bafunde babaadi 45 600.

42 Bano nyi babaadi bana ba Dane muyile bifuko biabo: Kui Shuhame, nkutuukile kifuko kia bena Shuhame. Bino nyi bibaadi bifuko bia Dane muyile bifuko biabo. 43 Bifuko bioso bia bena Shuhame, bantu babaabadi bafunde mu biabia bifuko babaadi 64 400.

44 Bana ba Ashere muyile bifuko biabo babaadi: Kui Yimina, nkutuukile bifuko bia bena Yimina; kui Ishuwi, nkutuukile kifuko kia bena Ishuwi; kui Beriya, nkutuukile kifuko kia bena Beriya; 45 kui bana ba Beriya: kui Hebere nkutuukile kifuko kia bena Hebere, kui Malekiele nkutuukile kifuko kia bena Malekiele. 46 Eshina dia muana mukashi a Ashere dibaadi Sera. 47 Bino nyi bibaadi bifuko bia bana ba Ashere, na bantu babo babaabadi bafunde babaadi 53 400.

48 Bana ba Neftali muyile bifuko biabo babaadi: Kui Yaseele, nkutuukile kifuko kia bena Yaseele; kui Guni, nkutuukile kifuko kia bena Guni; 49 kui Yesere, nkutuukile kifuko kia bena Yesere, kui Shileme, nkutuukile kifuko kia bena Shileme. 50 Bino nyi bibaadi bifuko bia Neftali muyile bifuko biabo, na bantu babo babaabadi bafunde babaadi 45 400.

51 Bungi boso bua bena Isalele babaabadi bafunde bubaadi: 601 730.

52 Kunyima kua biabia, Yehowa balunguile Moyise’shi: 53 “Wabile bano bantu nsenga bu bupianyi muyile mashina abadi bafunde.* 54 Bua bisaka bikata, abitungu otamishe bupianyi, na bua bisaka bipeela abitungu opeeleshe bupianyi. Ope kisaka kioso bupianyi muyile bungi bua baba babadi bafunde. 55 Anka abitungu bate bubale bua kuabila nsenga. Abitungu bapete bupianyi buabo muyile mashina a bisamba bia ba mashabo. 56 Bupianyi boso abukapebua pa kuta bubale na abebuabila bisaka bikata na bipeela.”

57 Bano nyi bena Levi babaabadi bafunde muyile bifuko biabo: Kui Gershone, nkutuukile kifuko kia bena Gershone; kui Kehate, nkutuukile kifuko kia bena Kehate; kui Merari, nkutuukile kifuko kia bena Merari. 58 Bino nyi bifuko bia bena Levi: Kifuko kia bena Libeni, kifuko kia bena Ebrone, kifuko kia bena Maheli, kifuko kia bena Mushi, kifuko kia bena Kora.

Kehate nkutanda Amalame. 59 Eshina dia mukashi a Amalame dibaadi Yokebede, muana mukashi a Levi abaabadi batandile Levi mu Ejipitu kui mukashi aaye. Na aye nkutandila Amalame Alona, Moyise na mukuabo mukashi Miriame. 60 Akupu, abo nkutandila Alona Nadabe, Abihu, Eleazare na Itamare. 61 Anka Nadabe na Abihu babafuile muanda babaadi balambule kaalo kashi kakumiinyibue kumpala kua Yehowa.

62 Bungi boso bua baba babaabadi bafunde bubaadi 23 000, bana balume boso kubanga ku a mueshi umune na kunundu. Tababaadi bafundibue munkatshi mua bena Isalele, muanda tababaadia kuibapa bupianyi munkatshi mua bena Isalele.

63 Bano mbabaadi Moyise na tshite muakuidi Eleazare bafunde pabaabadi bafunde bena Isalele mu kabaaka ka Moabe pepi na Yordane ku Yeriko. 64 Anka munkatshi muabo takui muntu su ngumune baadi mufundibue kui Moyise na kui tshite muakuidi Alona pabaabadi babadikie bena Isalele mu kabaaka ka Sinayi. 65 Muanda Yehowa baadi muakule pabibatale’shi: “Kushi mpaka abakafu mu kabaaka.” Takui muntu su ngumune baadi mushale kukatusha penda Kalebe muana a Yefune na Yoshua muana a Nune.

27 Akupu, bana bakashi ba Selofehade muana a Kefere, muana a Gileade, muana a Makire, muana a Manasee ba mu bifuko bia Manasee muana a Yosefe nkufika. Mashina a bana baye bakashi abaadi Mahela, Nowa, Ogla, Milka na Tirsa. 2 Abo nkuimana kumpala kua Moyise, kua tshite muakuidi Eleazare, kua ba nfumu na kua kakongie koso ku kituelelo kia kashibo k’epema ka kufumankena bakula’shi: 3 “Nshetu mmufue mu kabaaka, anka tabaadi munkatshi mua kisaka kibaadi kiibungie bua kutombokiela Yehowa, baba babaadi bakuatshishene Kora, kadi mmufue bua muluisho waye’ye nabene na ta mutande muana mulume su ngumune. 4 Buakinyi eshina dia nshetu di kushimina mu kifuko kiaye muanda wa’shi ta mutande muana mulume? Etupe bupianyi munkatshi mua bakuabo na nshetu.” 5 Nyi Moyise nkutuala muanda wabo kumpala kua Yehowa.

6 Akupu Yehowa kulungula Moyise’shi: 7 “Bana bakashi ba Selofehade abakula bia binyibinyi. Abitungu nka w’ebape yabo nsenga bu bupianyi munkatshi mua bakuabo balume na nshabo na w’ebape bupianyi bua nshabo. 8 Na lungula bena Isalele’shi, ‘Su muntu afua kushi kutanda muana mulume, abitungu nupe muan’aye mukashi bupianyi buaye. 9 Na su t’e na muana mukashi su ngumune, nupe bakuabo balume bupianyi buaye. 10 Su t’e na mukuabo mulume su ngumune, nupe bakuabo balume na nshaye bupianyi buaye. 11 Na su nshaye te na bakuabo balume, nupe mukuabo a mu kifuko abadi naye mase amune bupianyi buaye na abuikala buaye. Uno aukekala muiya bua bena Isalele, nka bu bibaadi Yehowa mutumine Moyise eyi.’”

12 Akupu Yehowa nkulungula Moyise’shi: “Kaamina ku muengie wa Abarime, na omone nsenga yankapa bena Isalele. 13 P’ueyimono, okabungibua n’obe kui muilo oobe, nka bu bibaadi mukuenu Alona mubungibue kuaudi, 14 Muanda pabaadi kakongie kekakene nami mu kabaaka ka Sine, bodi mutombokiele eyi diande dia kungikasha a kishila kumpala kuabo ku bukuashi bua mema. Ano nyi mema a Meriba ku Kadeshe mu kabaaka ka Sine.”

15 Akupu Moyise nkulungula Yehowa’shi: 16 “Yehowa Efile Mukulu apeyaa bantu boso muwa, tula namu panundu pa kakongie muntu 17 mulombene kutuuka na kutuela kumpala kuabo, na akebatuusha na kuibatuesha bua’shi kakongie ka Yehowa t’akekalanga bu mikooko ishi na mulami.” 18 Biabia Yehowa nkulungula Moyise’shi: “Ata Yoshua muana a Nune, muntu e na kikudi muadi na omutentekie eyasa diobe. 19 Akupu omuimikie kumpala kua tshite muakuidi Eleazare na kumpala kua kakongie koso, na omupe mufubo mu meso muabo. 20 Omupe ndambo ya matalua* oobe, bua’shi kakongie koso ka bena Isalele kamuteemeshe. 21 Akemana kumpala kua tshite muakuidi Eleazare, akamuipuisha bitshibilo abifiki kui Yehowa ku bukuashi bua Urime. Ku eyi diaye abakatuuku na ku eyi diaye abakatuele, aye na bena Isalele boso na kakongie koso.”

22 Biabia Moyise nkukita nka bu bibaadi Yehowa mumutumine eyi. Aye nkuata Yoshua na nkumuimika kumpala kua tshite muakuidi Eleazare na kumpala kua kakongie koso, 23 aye nkumutenteka maasa, na nkumupa mufubo nka bu bibaadi Yehowa muakule kukiila kui Moyise.

28 Akupu Yehowa nkulungula Moyise’shi: 2 “Tumina bena Isalele eyi na w’ebalungule’shi, ‘Abitungu nundambule mulambu wande, bia kudia* biande. Milambu yande ishiikibue kaalo i mapembue e buwa* abitungu nuiyituushe mu bipungo biayo bitshibibue.’

3 “Na ebalungule’shi, ‘Uno nyi mulambu ushiikibue kaalo w’anulambula kui Yehowa: kuifuku, mikooko ilume yana ibidi i buwa ya kipua kimune bu mulambu wa kushiika kaalo pa kiubishi. 4 Olambule mukooko ulume wana umune ku namashika na ungi mukooko ulume wana w’eulambule pa kamuilua nshobe,* 5 pamune na ki’ekumi kia kipimo kia efa* kia bukula bui buwa busangie na kia binanka kia kipimo kia hine* kia muimu wa olive yabadi batue bu mulambu wa ntete. 6 Nyi mulambu wa kushiika kaalo pa kiubishi ubaabadi batume eyi bua kutuusha ku muengie wa Sinayi wi mapembue e buwa, mulambu ushiikibue kaalo bua Yehowa, 7 pamune na mulambu wao wa kitomuanga, kia binanka kia hine bua mukooko ulume wana oso. Opongoole pa mbalo ya kishila maalua aakoluana bu mulambu wa kitomuanga kui Yehowa. 8 Na okalambula wawa ungi mukooko ulume wana pa kamuilua nshobe.* Okeulambula bu mulambu ushiikibue kaalo, na mulambu wa ntete wi mumune na wa ku namashika, na mulambu wao wa kitomuanga wi mumune wi mapembue e buwa kui Yehowa.

9 “‘Anka, muifuku dia Sabato, mulambu awikala wa mikooko ilume yana i buwa ya kipua kimune, bi’ekumi bibidi bia kipimo kia efa bia bukula bui buwa busangie na muimu bu mulambu wa ntete, pamune na mulambu wao wa kitomuanga. 10 Uno nyi mulambu wa kushiika kaalo bua Sabato, pamune na mulambu wa kushiika kaalo wa pa kiubishi na mulambu wao wa kitomuanga.

11 “‘Ku mbangilo kua mueshi* oso anukalambula Yehowa mulambu wa kushiika kaalo wa ngombe ilume yana ibidi, mukooko ulume umune na mikooko ilume yana musambobidi i buwa yoso ya kipua kimune, 12 na bi’ekumi bisatu bia bipimo bia bukula bui buwa busangie na muimu bu mulambu wa ntete wa ngombe mulume oso, na bi’ekumi bibidi bia bipimo bia bukula bui buwa busangie na muimu bu mulambu wa ntete bua mukooko ulume umune, 13 na ki’ekumi kia kipimo kia bukula bui buwa busangie na muimu bu mulambu wa ntete bua mukooko ulume wana oso, bu mulambu wa kushiika kaalo, mapembue e buwa,* mulambu ushiikibue kaalo bua Yehowa. 14 Na milambu yayo ya kitomuanga ayikala: kia pankatshi kia kipimo kia hine kia nfinyo bua ngombe mulume, kia bisatu kia kipimo kia hine bua mukooko ulume na kia binanka kia kipimo kia hine bua mukooko ulume wana. Uno nyi mulambu wa kushiika kaalo wa ku mueshi autuushibua mueshi oso munda mua kipua. 15 Kukatusha mulambu wa kushiika kaalo wa pa kiubishi pamune na mulambu wao wa kitomuanga, abitungu dingi kulambula mbushi muana umune bu mulambu wa muluisho kui Yehowa.

16 “‘Muifuku dia 14 dia mueshi wa kumpala, akuikala Pasaka bua Yehowa. 17 Muifuku dia 15 dia wawa mueshi, akuikala musangelo. Mikate ishi kitatusho ayidibua munda mua mafuku musambobidi. 18 Muifuku dia kumpala akuikala kikongeno kia kishila. T’abitungu nukite mufubo su ngumue wi bukopo. 19 Na anulambula bu mulambu wa kushiika kaalo ushiikibue kaalo bua Yehowa ngombe ilume yana ibidi, mukooko ulume umune na mikooko ilume yana musambobidi, yoso ya kipua kimune. Abitungu nulambule nyema i buwa. 20 Anuiyilambula na milambu yayo ya ntete ya bukula bui buwa busangie na muimu, bi’ekumi bisatu bua ngombe mulume umune na bi’ekumi bibidi bua mukooko ulume. 21 Anukalambula ki’ekumi bua mukooko oso ulume wana wa ku mikooko ilume yana musambobidi, 22 mpa na mbushi umune bu mulambu wa muluisho bua kubuikila miluisho yenu. 23 Kukatusha mulambu wa kushiika kaalo, wa ku namashika wikale mulambu wa kushiika kaalo wa pa kiubishi, anukatuusha’nyi ino. 24 Anulambula ino milambu mu mushindo umune efuku dioso munda mua mafuku musambobidi bu bia kudia,* mulambu ushiikibue kaalo wi mapembue e buwa kui Yehowa. Abitungu kuiulambula pamune na mulambu wa kushiika kaalo wa pa kiubishi na mulambu wao wa kitomuanga. 25 Muifuku dia musambobidi anukitshi kikongeno kia kishila. T’abitungu nukite mufubo su ngumune wi bukopo.

26 “‘Muifuku dia biumbuluanga bia kumpala, p’anulambula mulambu upia wa ntete kui Yehowa, anukitshi kikongeno kia kishila mu musangelo wenu wa mbingo. T’abitungu nufube mufubo su ngumune wi bukopo. 27 Anukalambula bu mulambu wa kushiika kaalo bua mapembue e buwa kui Yehowa: ngombe ilume yana ibidi, mukooko ulume umune na mikooko ilume yana musambobidi, yoso ya kipua kimune, 28 na bu mulambu wayo wa ntete wa bukula bui buwa busangie na muimu, bi’ekumi bisatu bua ngombe mulume oso, bi’ekumi bibidi bua wawa mukooko umune ulume, 29 na ki’ekumi bua mukooko oso ulume wana wa ku mikooko ilume yana musambobidi, 30 mpa na mbushi umune bua kubuikila miluisho yenu. 31 Anukeyilambula pamune na mulambu wa kushiika kaalo wa pa kiubishi na mulambu wao wa ntete. Abitungu ikale nyema i buwa, pamune na milambu yayo ya kitomuanga.

29 “‘Muifuku dia kumpala dia mueshi wa musambobidi, abitungu nukite kikongeno kia kishila. T’abitungu nukite mufubo su ngumune wi bukopo. Nyi efuku di’anukeele mpungi. 2 Anukalambula mulambu wa kushiika kaalo bua mapembue e buwa* kui Yehowa: ngombe mulume muana umune, mukooko ulume umune na mikooko ilume yana musambobidi yoso ya kipua kimune, nyema yoso ikale i buwa, 3 na mulambu wayo wa ntete wa bukula bui buwa busangie na muimu, bi’ekumi bisatu bia kipimo kia efa bua ngombe mulume, bi’ekumi bibidi bua mukooko ulume, 4 na ki’ekumi kimune bua mukooko oso ulume wa ku mikooko ilume musambobidi, 5 na mbushi mulume muana umune bu mulambu wa muluisho bua kubuikila miluisho yenu. 6 Ino ngia kulombasha ku mulambu wa kushiika kaalo wa ku mueshi na mulambu wao wa ntete na mulambu wa kushiika kaalo pa kiubishi na mulambu wao wa ntete, pamune na milambu yayo ya kitomuanga, muyile bi’abeyituushaa pa kiubishi, bu mapembue e buwa, mulambu ushiikibue kaalo bua Yehowa.

7 “‘Muifuku di’ekumi dia uno mueshi wa musambobidi, abitungu nukite kikongeno kia kishila, na nuinyokie.* T’abitungu nukite mufubo su ngumune. 8 Anukalambula Yehowa mulambu wa kushiika kaalo, bu mapembue e buwa: ngombe mulume muana umune, mukooko ulume umune, na mikooko ilume yana musambobidi yoso ya kipua kimune, nyema yoso ikale i buwa. 9 Na bu mulambu wayo wa ntete wa bukula bui buwa busangie na muimu, bi’ekumi bisatu bua ngombe mulume, bi’ekumi bibidi bua mukooko umune ulume, 10 ki’ekumi kia mukooko oso ulume wana wa ku mikooko ilume yana musambobidi, 11 na muana a mbushi umune bu mulambu wa muluisho, kukaasha mulambu wa muluisho wa kubuikila nao muluisho na mulambu wa kushiika kaalo pa kiubishi, na mulambu wao wa ntete, pamune na milambu yayo ya kitomuanga.

12 “‘Na muifuku dia 15 dia mueshi wa musambobidi, abitungu nukite kikongeno kia kishila. T’abitungu nukite mufubo su ngumune wi bukopo, na abitungu nukite musangelo bua Yehowa munda mua mafuku musambobidi. 13 Na anukalambula bu mulambu wa kushiika kaalo, mulambu ushiikibue kaalo wi mapembue e buwa kui Yehowa: ngombe ilume yana 13, mikooko ilume ibidi, na mikooko ilume yana 14 yoso ya kipua kimune, nyema yoso ikale i buwa, 14 na bu mulambu wayo wa ntete wa bukula bui buwa busangie na muimu, bi’ekumi bisatu bua ngombe mulume oso a ku yaaya ngombe 13 ilume, bi’ekumi bibidi bua mukooko oso ulume wa ku yaaya mikooko ilume ibidi, 15 na ki’ekumi bua mukooko oso ulume wana wa ku yaaya mikooko ilume yana 14, 16 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete na mulambu wao wa kitomuanga.

17 “‘Na muifuku dia kabidi: ngombe ilume yana 12, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 18 mulambu wayo wa ntete, milambu yayo ya kitomuanga bua ngombe ilume, mikooko ilume na mikooko ilume yana muyile bungi buayo nka bu bi’abalambulaa pa kiubishi, 19 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete, pamune na milambu yayo ya kitomuanga.

20 “‘Muifuku dia kasatu: ngombe ilume 11, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 21 mulambu wayo wa ntete, milambu yayo ya kitomuanga bua ngombe ilume, mikooko ilume, na mikooko ilume yana muyile bungi buayo nka bu bi’abalambulaa pa kiubishi, 22 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete na mulambu wao wa kitomuanga.

23 “‘Muifuku dia kananka: ngombe ilume ekumi, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 24 mulambu wayo wa ntete, milambu yayo ya kitomuanga bua ngombe ilume, mikooko ilume, na mikooko ilume yana muyile bungi buayo nka bu bi’abalambulaa pa kiubishi, 25 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete, na mulambu wao wa kitomuanga.

26 “‘Muifuku dia katano: ngombe ilume kitema, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 27 mulambu wayo wa ntete, milambu yayo ya kitomuanga bua ngombe ilume, mikooko ilume na mikooko ilume yana muyile bungi buayo nka bu bi’abalambulaa pa kiubishi, 28 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete na mulambu wao wa kitomuanga.

29 “‘Muifuku dia kasamombo: ngombe ilume muanda, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 30 mulambu wayo wa ntete, milambu yayo ya kitomuanga bua ngombe ilume, mikooko ilume, na mikooko ilume yana muyile bungi buayo nka bu bi’abalambulaa pa kiubishi, 31 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete, na milambu yao ya bitomuanga.

32 “‘Muifuku dia musambobidi: ngombe ilume musambobidi, mikooko ilume ibidi, mikooko ilume yana 14 yoso ya kipua kimune, nyema yoso ikale i buwa, 33 mulambu wayo wa ntete, milambu yayo ya kitomuanga bua ngombe ilume, mikooko ilume, na mikooko ilume yana muyile bungi buayo bu bi’abalambulaa pa kiubishi, 34 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete, na mulambu wao wa kitomuanga.

35 “‘Muifuku dia muanda, abitungu nukite kikongeno kikata. T’abitungu nukite mufubo su ngumune wi bukopo. 36 Na anukalambula bu mulambu wa kushiika kaalo, mulambu ushiikibue kaalo wi mapembue e buwa kui Yehowa: ngombe mulume umune, mukooko ulume umune, na mikooko ilume yana musambobidi yoso ya kipua kimune, nyema yoso ikale i buwa, 37 mulambu wayo wa ntete, milambu yayo ya kitomuanga bua ngombe mulume, mikooko ilume na mikooko ilume yana muyile bungi buayo nka bu bi’abalambulaa pa kiubishi, 38 na muana a mbushi umune bu mulambu wa muluisho, kukaasha mulambu wa kushiika kaalo pa kiubishi, mulambu wao wa ntete na mulambu wao wa kitomuanga.

39 “‘Bino nyi bi’anukalambula Yehowa mu bipungo bienu bia misangelo, kukumbasha ku milambu yenu ya mutshipo na milambu yenu yanutuusha mu kukumiina kuenu bu milambu yenu ya kushiika kaalo, milambu yenu ya ntete, milambu yenu ya kitomuanga na milambu yenu ya butaale.’” 40 Moyise balunguile bena Isalele mianda yoso ibaadi Yehowa mumutumine eyi.

30 Akupu Moyise nkulungula ba nfumu ba bisamba bia Isalele’shi: “Yehowa mmutume dino eyi’shi: 2 Su muana mulume akita mutshipo kui Yehowa sunga akita mutshipo* wa kuikutshishua kintu kampanda, t’abitungu akutue kulombasha eyi diaye. Abitungu akite kioso ki’ekeele muitshipe bua kukita.

3 “Na su muana mukashi akita mutshipo kui Yehowa sunga akita mutshipo wa kuikutshishua kintu kampanda pa ki nsongua na pa ki ku nshibo ya nshaye, 4 nshaye apusha mutshipo waye sunga mutshipo waye wa kuikutshishua kintu kampanda wadi mukite, na akutua kuakula muanda, mitshipo yaye yoso ayikala kuanka, na mutshipo oso wa kuikutshishua kintu kampanda wadi mukite awikala kuanka. 5 Anka su nshaye bamupelesha nsaa y’apusha’shi mmukite mitshipo sunga mitshipo ya kuikutshishua kintu kampanda, tayikala kuanka. Yehowa amufuila lusa muanda nshaye nyi bamupelesha.

6 “Anka su bamuibakila kui mulume paki ku mutshipo waye sunga ku mulayilo waye wadi mukite kushi kuela binangu 7 na mulume aaye apusha wawa muanda na akutua kuakula muanda kampanda muifuku diadi muiupushe, mitshipo yaye sunga mitshipo yaye ya kuikutshishua kintu kampanda yadi mukite ayikala kuanka. 8 Anka su mulume aaye amupelesha muifuku diadi mupushe wawa muanda, mulume aaye mmulombene kuipaa mutshipo sunga mulayilo wekeele mukite kushi kuela binangu, na Yehowa amufuila lusa.

9 “Su mukashi kilele sunga mukashi muipee eyibakishi akita mutshipo, muanda oso wadi mulee bua kukita abitungu eukumbashe.

10 “Su muana mukashi akita mutshipo sunga mutshipo wa kuikutshishua kintu kampanda paki mu nshibo mua mulume aaye 11 na mulume aaye apusha wawa muanda na akutua kuakula muanda kampanda sunga kupela, mitshipo yaye yoso sunga mutshipo oso wa kuikutshishua kintu kampanda ayikala kuanka. 12 Su muifuku diadi mupushe yaaya mianda mulume aaye bayipa mitshipo yoso sunga mutshipo wa kuikutshishua kintu kampanda wadi mukite, tayikala kuanka. Mulume aaye beyipaa na Yehowa afuila mukashi lusa. 13 Bua mulayilo oso sunga mutshipo oso utale mutshipo wa kuikutshishua kintu kampanda,* bua kuisumina bingi bintu, mulume aaye mmulombene kuiukumiina sunga kuiupela. 14 Anka su muenda mafuku mulume aaye ta muakule muanda, bakumiina mitshipo yaye yoso sunga mitshipo yaye ya kuikutshishua kintu kampanda yadi mukite. Beyikumiina muanda ta muakule muanda efuku diamupushishe eyikitshi. 15 Anka su eyipaa kunyima kua ndambo ya mafuku n’aye kuiyipusha, atuala bushito bua kilubilo kia mukashi aaye.

16 “Ino nyi miiya ibaadi Yehowa mutumine Moyise eyi pabitale mulume na mukashi aaye, na pabitale nshe bana na muana aaye nsonguakashi ki ku nshibo kua nshaye.”

31 Akupu Yehowa nkulungula Moyise’shi: 2 “Obuela bena Isalele kui bena Madiane. Kunyima okabungibua kui muilo oobe.”

3 Nyi Moyise nkulungula muilo’shi: “Payi bana balume be munkatshi muenu bina ngoshi bua nkalua na Madiane na bua kulombasha koobola kua Yehowa kui Madiane. 4 Abitungu nutume bana balume 1 000 ba kisamba kioso mu bisamba bioso bia Isalele ku ngoshi.” 5 Ku binunu bia bena Isalele, babaadi basangule 1 000 ku kisamba kioso, bana balume 12 000 bena bina ngoshi bua nkalua.

6 Akupu Moyise nkutuma bana balume 1 000 ba mu kisamba kioso ku ngoshi, na Finease muana a tshite muakuidi Eleazare bayile na kiluilo kia basalayi, baadi na bintu bia kishila na mpungi ya ngoshi muiyasa diaye. 7 Babaluile na Madiane ngoshi nka bu bibaadi Yehowa mutumine Moyise eyi, na abo nkuipaa muana mulume oso. 8 Babayipayile ba nfumu batano ba Madiane: Ewi, Rekeme, Zure, Ure na Reba pamune na bangi bantu babaabadi bayipee. Abaadi dingi bayipee Balame muana a Beore ku lupete lua ngoshi. 9 Bena Isalele babakuatshile bakashi na bana ba Madiane benda nabo. Babaadi dingi bapaule nyema yabo yoso ya paasha, bimunuanga biabo bioso na bintu biabo bioso. 10 Na abo nkushiika bibundi biabo bioso mubaabadi bashale na bishalelo* biabo bioso kaalo. 11 Abo nkuata bioso bibaabadi banyengie na bioso bibaabadi bapaule, bantu na nyema. 12 Akupu abo nkutuala bantu babaabadi bakuate, bintu bibaabadi bapaule, na bintu bibaabadi banyengie kui Moyise, kui tshite muakuidi Eleazare na kui kakongie ka bena Isalele, mu kishalelo ki mu kabaaka ka Moabe pepi na Yordane ku Yeriko.

13 Nyi Moyise na tshite muakuidi Eleazare na ba nfumu boso ba kakongie nkutuuka mu kufumankana nabo paasha pa kishalelo. 14 Anka Moyise nkukuatshila bantu babaabadi batuule bua kuludika bisaka bia basalayi nsungu, ba nfumu ba binunu na ba nfumu ba nkama babaadi abalukiila ku ngoshi. 15 Moyise nkuibalungula’shi: “Nubalekie bana bakashi boso na muwa? 16 Abo nyi babaadi batakule bena Isalele ku eyi dia Balame mu kukutua lulamato kui Yehowa mu muanda utale Peore, na kipupa nkukuata kakongie ka Yehowa. 17 Binobino abitungu nuipee bana bakinga boso balume na nuipee muana mukashi oso mupue kulala na mulume. 18 Anka nulame na muwa ba nsonguakashi boso bashaladile na balume. 19 Abitungu nushale paasha pa kishalelo munda mua mafuku musambobidi. Oso a kuanudi muipee muntu* na oso a kuanudi mukume kitanda kia muntu abadi bayipee abitungu etooshe muifuku dia kasatu na muifuku dia musambobidi, anue na bantu banudi bakuate. 20 Na abitungu nutooshe kilamba kioso, kintu kioso kikitshibue na musokia, kintu kioso kikitshibue na buaa bua mbushi na kintu kioso kikitshibue na mabaya ku muluisho.”

21 Akupu tshite muakuidi Eleazare nkulungula bana balume ba mu kiluilo babaadi bende ku ngoshi’shi: “Uno nyi muiya ubabatumina Moyise kui Yehowa’shi, 22 ‘Anka penda ôlo, kiamo kia arja, kiamo kia munyinga, kiamo, kiamo kia etene na kia polombe, 23 kintu kioso kilombene kukambila kaalo, abitungu nuikikishe mu kaalo, na akikala kitooshibue. Anka abitungu nuikitooshe dingi na mema akutoosha nao. Kintu kioso kishi kilombene kukambila kaalo abitungu nuikitumpe na mema. 24 Na abitungu nutumpe bilamba bienu muifuku dia musambobidi na nuikale bashi butete, akupu nuibalombene kutuela mu kishalelo.’”

25 Akupu Yehowa nkulungula Moyise bino’shi: 26 “Badika bungi bua bintu biabadi bapaule, bungi bua bantu babadi bakuate na bungi bua nyema; w’ebikite pamune na tshite muakuidi Eleazare na ba nfumu ba bifuko ba kakongie. 27 Wabuule bintu biabekeele bapaule mu bipindi bibidi bua kuibiabila baba bekeele bende ku ngoshi na bangi bena kakongie boso. 28 Abitungu wate kui basalayi bekeele bende ku ngoshi bu kitadi bua Yehowa anyima* umune mu anyima 500 yoso, mu bantu, mu ngombe, mu mpunda na mu mikooko na mbushi. 29 W’ekiate mu kia pankatshi kiabo na w’ekipe tshite muakuidi Eleazare bu kia buntu kia Yehowa. 30 Mu kia pankatshi ki’abapa bena Isalele, abitungu wate umune mu 50, mu bantu, mu ngombe, mu mpunda, mu mikooko na mbushi, na mu nyema ya paasha ya mishindo yoso na w’ebipe bena Levi, abatalaa mifubo itale tabernakele a Yehowa.”

31 Biabia Moyise na tshite muakuidi Eleazare babakitshine nka bibaadi Yehowa mutumine Moyise eyi. 32 Bintu bibaabadi banyengie, bibaadi bishale ku bintu bibaabadi bapaule, bibaabadi baate kui bantu abaadi bende ku ngoshi, bibaadi mbushi na mikooko 675 000, 33 ngombe 72 000, 34 na mpunda 61 000. 35 Bungi bua bana bakashi bashibaadi babande kulala na balume bubaadi 32 000. 36 Kia pankatshi kibaabadi babile baba abaadi bende ku ngoshi kibaadi mikooko na mbushi 337 500. 37 Kitadi kia Yehowa kibaabadi baate ku mikooko na mbushi kibaadi 675. 38 Kubaadi ngombe 36 000 na kitadi kiayo bua Yehowa kibaadi 72. 39 Kubaadi mpunda 30 500, na kitadi kiayo bua Yehowa kibaadi 61. 40 Kubaadi bantu* 16 000, na kitadi kiabo bua Yehowa kibaadi bantu* 32. 41 Akupu Moyise nkupa tshite muakuidi Eleazare kitadi bu kia buntu kia Yehowa, nka bu bibaadi Yehowa mutumine Moyise eyi.

42 Ku kia pankatshi kia bintu bia bena Isalele, kibaadi Moyise muabuule ku kipindi kia bintu bia bantu babaadi balue ngoshi, 43 kia pankatshi kia mikooko na mbushi kibaadi 337 500, 44 ngombe 36 000, 45 mpunda 30 500, 46 na bantu* 16 000. 47 Akupu Moyise nkuata kia pankatshi kia bintu bia bena Isalele, muntu umune mu bantu 50, na nyema umune mu nyema 50 na nkuibipa bena Levi, babaadi abatala mufubo wa ku tabernakele a Yehowa, nka bu bibaadi Yehowa mutumine Moyise eyi.

48 Akupu bantu ba mu binunu ba mu kiluilo kia basalayi babaabadi basangule, ba nfumu ba binunu na ba nfumu ba nkama, abaadi befubuile kui Moyise, 49 na abo nkulungula Moyise’shi: “Bafubi bobe ababadika bungi bua bantu bekeele ku ngoshi be ku bukunkushi buetu, na takui muntu su ngumune a kuatudi mushimine. 50 Biabia kumiina namu oso a kuatudi alambule kiadi mupete bu mulambu kui Yehowa: bintu bikitshibue na ôlo, shene ya ku mikoolo, bikano bia ku maboko, tukano tua kuela nato kitampi, tudibu tua ku matui, na bingi bikano bua kubuikila miluisho yetu kumpala kua Yehowa.”

51 Biabia Moyise na tshite muakuidi Eleazare nkukumiina ôlo aabo, kuamba’shi bikano bioso. 52 Ôlo oso a kia buntu kibaadi ba nfumu ba binunu na ba nfumu ba nkama balambule Yehowa baadi bungi bua shekele* 16 750. 53 Muntu oso a mu kiluilo kia basalayi baadi muate biaye bintu ku bintu bibaabadi bapaule. 54 Moyise na tshite muakuidi Eleazare abaadi bakumiine ôlo baadi mutuushe ba nfumu ba binunu na ba nfumu ba nkama na bamutuala ku kashibo k’epema ka kufumankena bu kitentekiesho bua muilo wa Isalele kumpala kua Yehowa.

32 Bana balume ba Rubene na bana balume ba Gade abaadi na bimunuanga bi bungi bukile, na abo nkumona’shi nsenga ya Yazere na ya Gileade ibaadi buwa bua bimunuanga. 2 Nyi bana balume ba Gade na bana balume ba Rubene nkuifubuila kui Moyise, kui tshite muakuidi Eleazare, kui ba nfumu ba kakongie na nkuakula’shi: 3 “Atarote, Dibone, Yazere, Nimra, Eshebone, Eleale, Sebane, Nebo, na Beone, 4 nsenga ibaadi Yehowa mutshokole kumpala kua kakongie ka Isalele, nyi nsenga i buwa bua bimunuanga, na bafubi bobe be na bimunuanga bi bungi.” 5 Abo nkutungunuka’shi: “Su tuibakuminyibue ku meso kobe, kumiina namu bape bafubi bobe ino nsenga bu yabo. Tuetusabushanga bushiya bua Yordane.”

6 Akupu Moyise nkulungula bana balume ba Gade na bana balume ba Rubene’shi: “Bakuenu balume abende ku ngoshi panudi anue bashale pano su? 7 Buakinyi anubofusha muilo wa Isalele bua’shi tausabukanga bua kutuela mu nsenga yabebapa binyibinyi kui Yehowa? 8 Biabia nyi bibakitshine ba mashenu panadi muibatume kukatukila ku Kadeshe-barnea bua kukatala nsenga. 9 Pabaabakamiine kuibanda dia Eshekole na bamona nsenga, abaadi babofushe muilo wa Isalele buaudia kutuela mu nsenga ibaadi Yehowa na kia kuibapa. 10 Nsungu ya Yehowa ibatembele mu diadia efuku na aye nkuitshipa’shi: 11 ‘Bana balume batuukie mu Ejipitu be na bipua kubanga pa 20 na kunundu, t’abakamono nsenga inaadi muitshipe kui Abalahama, Isaake, na Yakobo, muanda ta mbandonde n’eshimba dioso— 12 Kukaasha Kalebe muana a Yefune muina Kenizi na Yoshua muana a Nune, muanda abaadi balonde Yehowa n’eshimba dioso.’ 13 Biabia nsungu ya Yehowa nkutembela Isalele na aye nkuibaumbakasha mu kabaaka munda mua bipua 40, mpa na pabapuile kipungo kioso kia bantu abaadi abakitshi bi bubi ku meso kua Yehowa. 14 Binobino nubebo pa mbalo ya ba mashenu bu bana ba bankitshishi ba miluisho, abakaamisha nsungu ya Yehowa kui Isalele. 15 Su nubalekie kumulonda, akebalekieela binyibinyi dingi mu kabaaka, na anukabutusha uno muilo oso.”

16 Kunyima abo nkuifubuila kuadi na nkuakula’shi: “Etutadiile tuibakie pano bikutu bia mabue bua bimunuanga bietu na bibundi bua bana betu. 17 Anka atutungunuka na kuikala belumbuule bua ngoshi na atuende kumpala kua bena Isalele mpa na p’atuibafikisha mu mbalo yabo, pekale bana betu mbashale mu bibundi bi na midimba ibukopo bua kuibakaluila kui bantu ba muiumbo. 18 T’atualukiila ku mashibo etu mpa na apapete muina Isalele oso yaye nsenga bu bupianyi. 19 Muanda t’atupete nabo bupianyi abuaa bungi bushiya bua Yordane, muanda tuibapete buetu bupianyi dia ku lupese lua kutunduka nguba kua Yordane.”

20 Moyise nkuibalula’shi: “Su nuakita bino, nuata bina ngoshi kumpala kua Yehowa bua kuenda ku ngoshi; 21 na su oso a kuanudi aata bi na ngoshi, asabuka Yordane kumpala kua Yehowa bu bia kuete kubinga beshikuanyi baye kumpala kuaye 22 mpa na apakakuatshibua nsenga kumpala kua Yehowa, yaaya nsaa nuibalombene kualukiila na anuikala kushi muanda kumpala kua Yehowa na kua Isalele. Akupu ino nsenga ayikala bu yenu kumpala kua Yehowa. 23 Anka su ta nuibakite bino anukitshina Yehowa muluisho. Yaaya nsaa ukayi’shi muluisho wenu awinukuata. 24 Biabia nui balombene kuibaka bibundi bua bana benu na bikutu bua mikooko na mbushi yenu, anka abitungu nukite bianubalaa.”

25 Bana balume ba Gade na bana balume ba Rubene nkulungula Moyise’shi: “Bafubi bobe abakitshi nka bu bibebatumina nfumuami eyi. 26 Bana betu, bakashi betu, bimunuanga bietu na nyema yetu yoso ya paasha abikashala kuakua mu bibundi bia Gileade, 27 anka bafubi bobe abasabuka abuaa bushiya, muana mulume oso muikale na bina ngoshi, bua kuenda mu kulua ngoshi kumpala kua Yehowa, nka bu bibakula nfumuami.”

28 Biabia Moyise nkutuma eyi pabibatale kui tshite muakuidi Eleazare, kui Yoshua muana a Nune na kui ba nfumu ba bifuko ba bisamba bia Isalele. 29 Moyise nkuibalungula’shi: “Su bana balume ba Gade na bana balume ba Rubene basabuka nenu abuaa bungi bushiya bua Yordane, muana mulume oso muikale na bina ngoshi bua kulua ngoshi kumpala kua Yehowa, na nsenga yakuatshibua kumpala kuenu, paapa anukebapa nsenga ya Gileade bu yabo. 30 Anka su ta mbaate bina ngoshi na basabuka nenu abuaa bushiya, abakashala munkatshi muenu mu nsenga ya Kanaana.”

31 Biabia bana balume ba Gade na bana balume ba Rubene nkualula’shi: “Kiakia ki’abalungula bafubi bobe kui Yehowa nyi ki’atukitshi. 32 Atuata bina ngoshi na tusabukie abuaa bushiya kumpala kua Yehowa bua kuenda mu nsenga ya Kanaana, anka nsenga y’atupiana ayikala buno bushiya bua Yordane.” 33 Biabia Moyise nkuibapa, kuamba’shi bana balume ba Gade, bana balume ba Rubene, na kipindi kia kisamba kia Manasee muana a Yosefe, bufumu bua Sihone nfumu a bena Amore, na bufumu bua Oge nfumu a Bashane, nsenga na bibundi bi mu aa ma mbalo na bibundi bifunyishe yaaya nsenga.

34 Na bana balume ba Gade nkuibaka* Dibone, Atarote, Arowe, 35 Atorote-shofane, Yazere, Yogboa, 36 Bete-nimra, na Bete-arane, bibundi bi na midimba ibukopo, na abo nkuibaka bikutu bia mabue bua mikooko na mbushi. 37 na bana balume ba Rubene nkuibaka Eshebone, Eleale, Kiriataime, 38 Nebo, na Bete-baale-meone, mashina aabio abaadi beashintuule—na Sibima; na abo nkubanga kuudika dingi bibundi bibaabadi bebakuule mashina.

39 Bana balume ba Makire muana a Manasee nkuenda ku Gileade, nkumukuata na nkubinga bena Amore babaadi muanka. 40 Biabia Moyise nkupa Makire muana a Manasee Gileade, na aye nkubanga kushala muanka. 41 Na Yaire muana a Manasee bayile kuabadi na akuata bibundi biabo bia tushibo tua mapema, na abanga kuibitanyina bu Awote-yaire.* 42 Na Noba nkuenda, nkukuata Kenate na bibundi bimuifunyishe, na aye nkubanga kumuitanyina bu Noba muyile eshina diaye.

33 Luno nyi luendo lubaadi bena Isalele bakite mu bipindi bipindi p’ababatuukile muiumbo dia Ejipitu muyile bisaka* biabo ku bukunkushi bua Moyise na Alona. 2 Moyise baadi afundu ku eyi dia Yehowa ma mbalo abaabadi ababangila luendo luabo mu bipindi-bipindi, na luno nyi luendo luabo mu bipindi-bipindi kukatukila ku mbalo kampanda na ku ingi: 3 Muifuku dia 15 dia mueshi wa kumpala babakatukile ku Ramesese. Muifuku dibalondele Pasaka, bena Isalele babatuukile na kushinkamisha* koso mu meso a bena Ejipitu boso. 4 Mu yaaya nsaa bena Ejipitu abaadi abashiiki bana mbedi boso babaadi Yehowa muipee munkatshi muabo, muanda Yehowa baadi mutshibile b’efile babo kiimu.

5 Biabia bena Isalele babakatukile ku Ramesese, bakashala ku Sukote. 6 Akupu babakatukile ku Sukote bakashala ku Etame, e ku bukunkula bua kabaaka. 7 Kunyima babakatukile ku Etame na balukiila batadiile dia ku Pihahirote, muitalene na Baale-sefone, na abo nkushala kumpala kua Migedole. 8 Kunyima kua biabia babakatukile ku Pihahirote na bakidila munkatshi mua kalunga ka mema batadiile dia ku kabaaka, batungunuka na luendo munda mua mafuku asatu mu kabaaka ka Etame na bakashala ku Mara.

9 Akupu babakatukile ku Mara na bafika ku Elime. Ku Elime kubaadi nsulo ya meema 12 na mabo 70, biabia abashalele kuakua. 10 Akupu babakatukile ku Elime, bakashala pepi na Kalunga Kamonga. 11 Kunyima abakatukile ku Kalunga Kamonga bakashala mu kabaaka ka Sine. 12 Akupu babakatukile mu kabaaka ka Sine bakashala ku Dofeka. 13 Kunyima abakatukile ku Dofeka bakashala ku Alushe. 14 Akupu babakatukile ku Alushe bakashala ku Refidime, kushibaadi mema a kutoma bua muilo. 15 Kunyima kua biabia babakatukile ku Refidime bakashala mu kabaaka ka Sinayi.

16 Kunyima babakatukile mu kabaaka ka Sinayi bakashala ku Kibrote-ataawa. 17 Akupu babakatukile ku Kibrote-ataawa bakashala ku Aserote. 18 Kunyima abakatukile ku Aserote bakashala ku Ritema. 19 Akupu babakatukile ku Ritema bakashala ku Rimone-Pereze. 20 Akupu abakatukile ku Rimone-Pereze bakashala ku Libena. 21 Abakatukile ku Libena bakashala ku Risa. 22 Kunyima babakatukile ku Risa bakashala ku Kehelata. 23 Akupu babakatukile ku Kehelata bakashala ku muengie wa Shefere.

24 Kunyima abakatukile ku muengie wa Shefere bakashala ku Arada. 25 Akupu babakatukile ku Arada bakashala ku Makehelote. 26 Akupu babakatukile ku Makehelote bakashala ku Tahate. 27 Kunyima babakatukile ku Tahate bakashala ku Tera. 28 Akupu babakatukile ku Tera bakashala ku Miteka. 29 Kunyima babakatukile ku Miteka bakashala ku Ashemona. 30 Akupu babakatukile ku Ashemona bakashala ku Mosera. 31 Akupu babakatukile ku Mosera bakashala ku Bene-yakane. 32 Babakatukile ku Bene-yakane bakashala ku Ore-agidigade. 33 Kunyima babakatukile ku Ore-agidigade bakashala ku Yotebata. 34 Akupu babakatukile ku Yotebata bakashala ku Abrona. 35 Akupu babakatukile ku Abrona bakashala ku Esiyone-gebere. 36 Kunyima babakatukile ku Esiyone-gebere bakashala ku kabaaka ka Sine, kuamba’shi, Kadeshe.

37 Kunyima babakatukile ku Kadeshe bakashala ku muengie wa Hore, ku mikalo ya nsenga ya Edome. 38 Na tshite muakuidi Alona nkukaamina ku Muengie wa Hore ku eyi dia Yehowa na aye nkufuila kuakua mu kipua kia 40 kunyima kua bena Isalele kutuuka muiumbo dia Ejipitu, muifuku dia kumpala dia mueshi wa katano. 39 Alona baadi na bipua 123 pabafuile ku muengie wa Hore.

40 Nfumu a Arade muina Kanaana baadi mushale mu Negebe mu nsenga ya Kanaana, bapushishe pabitale kufika kua bena Isalele.

41 Kunyima kua mafuku babakatukile ku muengie wa Hore bakashala ku Salemona. 42 Akupu babakatukile ku Salemona bakashala ku Punone. 43 Kunyima babakatukile ku Punone bakashala ku Obote. 44 Akupu babakatukile ku Obote bakashala ku Iye-abarime, ku mikalo ya Moabe. 45 Kunyima babakatukile ku Iyime bakashala ku Dibone-gade. 46 Akupu babakatukile ku Dibone-gade bakashala ku Alemone-dibelataima. 47 Akupu babakatukile ku Alemone-dibelataima bakashala mu miengie ya Abarime kumpala kua Nebo. 48 Nfudiilo a bioso babakatukile ku miengie ya Abarime bakashala mu kabaaka ka Moabe pepi na Yordane ku Yeriko. 49 Abatungunukile na kushala pepi na Yordane, kukatukila ku Bete-yeshimote mpa na ku Abele-shitime, mu kabaaka ka Moabe.

50 Yehowa balunguile Moyise mu kabaaka ka Moabe pepi na Yordane ku Yeriko’shi: 51 “Lungula bena Isalele’shi: ‘Nukuete kusabuka bushiya bua Yordane bua kutuela mu nsenga ya Kanaana. 52 Abitungu nubingie kumpala kuenu bantu boso bashale mu yaaya nsenga, nubutule nkishi yabo yoso ya mabue, nkishi yabo yoso ya bilonda,* na nubumbule ma mbalo aabo oso a kishila e kunundu. 53 Na abitungu nuate yaaya nsenga na nushale muanka, muanda nenupa binyibinyi yaaya nsenga bu yenu. 54 Abitungu nuabe nsenga pa kuta bubale munkatshi mua bifuko bienu bua’shi ikale yenu. Bua kisaka kikata abitungu nutamishe bupianyi buakio, na bua kisaka kipeela abitungu nupeeleshe bupianyi buakio. Bupianyi bua muntu oso abuikala muyile amupoona bubale. Anukapete yenu mbalo bu bupianyi muyile bisamba bia ba mashenu.

55 “‘Anka su tanuibabingie bantu ba mu yaaya nsenga kumpala kuenu, baba banukalekie bua’shi bashale abakekala bu bintu abisosomena mu meso muenu na bu milobo mu mbafu yenu, na abakenukalakasha mu nsenga y’anukashala. 56 Na nakenukitshi biabia biankimbanga kuibakita.’”

34 Yehowa nkulungula dingi Moyise’shi: 2 “Lungula bena Isalele ino mianda’shi: ‘P’anutuele mu nsenga ya Kanaana, ino nyi nsenga ayikekala bu bupianyi buenu, nsenga ya Kanaana muyile mikalo yayo.

3 “‘Mukalo wenu wa kuushi aubangila ku kalunga ka Sine ku lupese lua Edome, na mukalo wenu wa kuushi dia kutunduka nguba, aubangila dia ku nsongo kua Kalunga ka Mungua.* 4 Mukalo wenu awikonyo ukidile dia kuushi ku’eshinda adiende ku Akrabime na utungunukie mpa na ku Sine, na nfudiilo yao ayikala dia kuushi kua Kadeshe-barnea. Akupu awende mpa na ku Azare-adare, utungunukie mpa na ku Asemone. 5 Mukalo aukekonyo dia ku Asemone mpa na ku kibandabanda kia Ejipitu, nfudiilo yao ayikala ku Kalunga ka mema.*

6 “‘Mukalo wenu wa kupona nguba awikala Kalunga kakata* na kiese kiako. Uno aukekala mukalo wenu wa dia kupona nguba.

7 “‘Uno nyi mukalo wenu wa kunundu: Kubanga ku Kalunga kakata, anukeele mukalo wenu mpa na ku muengie wa Hore. 8 Kubanga ku muengie wa Hore anuele mukalo mpa na ku Lebohamate,* na nfudiilo ya mukalo ayikala Sedade. 9 Na mukalo aukende mpa na ku Zifro, na nfudiilo yao ayikala Azare-enane. Uno nyi awikala mukalo wenu wa kunundu.

10 “‘Akupu nuele mukalo wenu wa kutunduka nguba kubanga ku Azare-enane mpa na ku Shefame. 11 Mukalo aubanga ku Shefame wende mpa na ku Ribela dia kutunduka nguba kua Aine, na mukalo awiiki, usambukie ngalaala ya dia kutunduka nguba kua Kalunga ka Kinerete. 12 Mukalo aukende mpa na ku Yordane, na nfudiilo yao ayikala Kalunga ka Mungua. Ino nyi ayikekala nsenga yenu na mikalo yayo iyifunyishe.’”

13 Biabia Moyise nkulungula bena Isalele’shi: “Ino nyi nsenga yanukaabila bu bupianyi buenu pa kuta bubale, nka bu bitume Yehowa eyi bua kupa bisamba kitema na kipindi. 14 Muanda kisamba kia bena Rubene muyile bifuko biabo, kisamba kia bena Gade muyile bifuko biabo, na kipindi kia kisamba kia Manasee mbipue kupeta buabio bupianyi. 15 Bisamba bibidi na kipindi mbipue kupeta buabio bupianyi kutunduka nguba kua nsenga ya Yordane, pepi na Yeriko dia akutundukilaa nguba.”

16 Yehowa nkulungula dingi Moyise’shi: 17 “Ano nyi mashina a bantu abakabila nsenga bua’shi ikale yenu: Tshite muakuidi Eleazare na Yoshua muana a Nune. 18 Na anuata nfumu umune mu kisamba kioso bua kuabila nsenga bu bupianyi buenu. 19 Mashina a baba bantu ngano: Mu kisamba kia Yunda, Kalebe muana a Yefune; 20 mu kisamba kia bana ba Simeone, Shemuele muana a Amihude; 21 mu kisamba kia Benyamine, Elidade muana a Kiselone; 22 mu kisamba kia bana ba Dane, nfumu umune, Buki muana a Yogli; 23 ku bana ba Yosefe mu kisamba kia bana ba Manasee, nfumu umune, Anyele muana a Efode; 24 mu kisamba kia bana ba Efraime, nfumu umune, Kemuele muana a Shiftane; 25 mu kisamba kia bana ba Zabulone, nfumu umune, Elizafane muana a Parnake; 26 mu kisamba kia bana ba Isakare, nfumu umune, Paletiele muana a Azane; 27 mu kisamba kia bana ba Ashere, nfumu umune, Akihude muana a Shelomii; 28 mu kisamba kia bana ba Neftali, nfumu umune, Pedahele muana a Amihude.” 29 Bano nyi babaadi Yehowa mutumine eyi bua kuabila bena Isalele nsenga, mu nsenga ya Kanaana.

35 Yehowa balunguile Moyise mu kabaaka ka Moabe pepi na Yordane ku Yeriko’shi: 2 “Lungula bena Isalele’shi abitungu bape bena Levi bibundi bia kushala mu bupianyi buabakapete, na abitungu bape bena Levi mapia a kudishila nyema efunyishe bibundi. 3 Abakashala mu biabia bibundi, na mapia a kudishila nyema aekala bua bimunuanga biabo, bintu biabo na bua ingi nyema yabo yoso. 4 Mapia a kudishila nyema a bibundi anukapa bena Levi aekala bukata bua kude* 1 000 kukatukila ku mudimba ku mpese yoso ya kibundi. 5 Nupime paashi pa kibundi kude 2 000 lupese lua kutunduka nguba, kude 2 000 lupese lua kuushi, kude 2 000 lupese lua kupona nguba, na kude 2 000 lupese lua kunundu, kibundi kikale munkatshi. Ano nyi aekala mapia a kudishila nyema a bibundi biabo.

6 “Anukapa bena Levi bibundi bisamombo bia kusuukila, anukebapa bianka bua’shi muntu ayipayishena asuukile kuakua, mpa na bingi bibundi 42. 7 Bibundi bioso bi’anupa bena Levi abikala 48, pamune na mapia abio a kudishila nyema. 8 Bibundi bi’anuibapa abituukila mu bupianyi bua bena Isalele. Mu kisaka kikata anuimuata bibungi, na mu kisaka kipeela anuimuata bipeela. Kisaka kioso akipa bena Levi ndambo ya bibundi biakio muyile bupianyi buakipete.”

9 Yehowa batungunukile na kulungula Moyise’shi: 10 “Lungula bena Isalele’shi: ‘Anusabuka Yordane bua kuenda mu nsenga ya Kanaana. 11 Abitungu nusangule bibundi bibofule bua kuenda abikala bu bibundi bia kusuukila, mulombene kusuukila yawa ayipaa muntu* kampanda kushi pa bukopo. 12 Bino bibundi abikala bianudia kusuukila muntu aobola mase, bua’shi muntu ayipayishena tafuanga mpa na p’emana kumpala kua kakongie bua kusamba. 13 Bibundi bisamombo bia kusuukila bi’anukatuusha abikakuasha bua wawa muanda. 14 Anukatuusha bibundi bisatu luno lupese lua Yordane na bibundi bisatu mu nsenga ya Kanaana bua’shi bikale bu bibundi bia kusuukila. 15 Bino bibundi bisamombo abikala bu bia kusuukila bua bena Isalele, bua muntu muenyi, na bua muntu mufilukie e munkatshi muabo, bua’shi muntu oso ayipaa muntu* kampanda kushi pa bukopo asuukile muanka.

16 “‘Anka su amukupila na kilonda na afua, yawa muntu ngipayishanyi. Muntu ayipayishena abitungu ayipayibue binyibinyi. 17 Na su amukupila n’ebue dilombene kuipaa na afua, yawa muntu ngipayishanyi. Muntu ayipayishena abitungu ayipayibue binyibinyi. 18 Na su amukupila na kintu kikitshibue na mutshi kilombene kuipaa na afua, yawa muntu ngipayishanyi. Muntu ayipayishena abitungu ayipayibue binyibinyi.

19 “‘Muntu aobola mase nyi e na kia kuipaa muntu ayipayishena. Nsaa y’afumankana naye, aye nabene amuipaa. 20 Su lufu lubatuuku pa muanda’shi ekeele mumusukume pa muanda wa mushikua sunga kumuasa kintu kampanda na binangu bibubi,* 21 sunga’shi pa muanda wa mushikua bamukupila n’eyasa diaye na baafu, yawa bamukupila ayipayibua binyibinyi. Nyi ngipayishanyi. Muntu aobola mase ayipaa muntu bayipayishena p’afumankana naye.

22 “‘Anka su ta pa bukopo na ta pa muanda wa mushikua p’ekeele mumusukume sunga kumuasa kintu kampanda kushi na binangu bi bubi,* 23 sunga’shi t’ekeele mumumone amuponeesha ebue na t’ekeele muishikuanyi aaye, sunga’shi t’akimbanga kumukitshina bi bubi, na yawa muntu afua, 24 abitungu kakongie katshibe muanda pankatshi pa muntu bamukupila na muntu aobola mase, muyile miiya. 25 Akupu abitungu kakongie kapaashe muntu bayipayishena ku maasa a muntu aobola mase, na kamualushe mu kibundi kiaye kia kusuukila mu’ekeele musuukile, na ashale muanka mpa na apafu tshite muakuidi mukata abaabadi beele muimu wa kishila.

26 “‘Anka su muntu muipayishene batuuku paasha pa mukalo wa kibundi kiaye kia kusuukila mu’ekeele musuukile 27 na muntu aobola mase bamupete paasha pa mukalo wa kibundi kiaye kia kusuukila na bayipaa muntu muipayishene, t’ena ebasa dia mase. 28 Muanda abitungu ashale mu kibundi kiaye kia kusuukila mpa na apafu tshite muakuidi mukata. Anka kunyima kua lufu lua tshite muakuidi mukata, muntu muipayishene mmulombene kualukiila mu nsenga yaye. 29 Ino mianda ayikala kuanudi bu miiya bua kutshiba kiimu mu bipungo bienu bioso, mu ma mbalo eenu oso anudi bashale.

30 “‘Yawa oso ayipaa muntu* abitungu ayipayibue bu ngipayishanyi ku bishinkamisho* bia tumonyi; anka muntu* su ngumune ta mmulombene kuipayibua su kui penda bishinkamisho bia kamonyi kamune. 31 T’abitungu nuate nkuulo bua muwa* wa ngipayishanyi mulombene lufu, muanda abitungu ayipayibue binyibinyi. 32 Na t’abitungu nuate nkuulo bua muntu musuukile mu kibundi kiaye kia kusuukila, bua kumutadiila bua’shi alukiile mu kushala mu nsenga yaye kumpala kua lufu lua tshite muakuidi mukata.

33 “‘T’abitungu nuluishe nsenga yanudi bashale, muanda mase aaluisha nsenga, na ta nkulombene kuikala kubuikila kua miluisho bua mase apongoolue pa nsenga kukaasha penda mase a yawa muiapongoole. 34 T’abitungu nuluishe nsenga yanudi bashale na yandi nami mushale; muanda ami Yehowa nemushale munkatshi mua muilo wa Isalele.’”

36 Ba nfumu ba bifuko ba bekulu ba Gileade muana a Makire muana a Manasee ba mu bifuko bia bana ba Yosefe babafikile na besamba na Moyise na ba nfumu, ba nfumu ba bifuko bia bena Isalele. 2 Abo nkuakula’shi: “Yehowa mmutumine nfumuami eyi bua kuabila bena Isalele nsenga bu bupianyi pa kuta bubale; na Yehowa baadi mutumine nfumuami eyi bua kupa bana bakashi ba Selofehade mukuetu mulume bupianyi buaye. 3 Su bebebakila kui bantu ba kingi kisamba kia bena Isalele, bupianyi bua baba bana bakashi abukatushibua ku bupianyi bua ba mashetu na bebukumbashe ku bupianyi bua kisamba ki’abakatuele, biabia atushimisha kipindi kia bupianyi bua betupeele pa kuta bubale. 4 Binobino, apakumbana Kipua kia bulungantu bua muilo wa Isalele, bupianyi bua baba bana bakashi abukakumbashibua ku bupianyi bua kisamba ki’abakatuele, biabia atushimisha kipindi kia bupianyi bua kisamba kia ba mashetu.”

5 Akupu ku eyi dia Yehowa, Moyise nkutumina bena Isalele eyi’shi: “Bibakula kisamba kia bana ba Yosefe mbia binyibinyi. 6 Dino nyi eyi dibatumu Yehowa bua bana bakashi ba Selofehade’shi: ‘Mbalombene kuibakilua kui muntu oso abakumiina. Anka abitungu bebebakile nka kui muntu a mu kifuko kia kisamba kia nshabo. 7 Bupianyi su mbumune bua bena Isalele ta mbulombene kukatuka ku kingi kisamba bua kuenda ku kingi kisamba, muanda abitungu bena Isalele balamate ku bupianyi bua kisamba kia ba mashabo. 8 Na muana mukashi oso e na bupianyi munkatshi mua bisamba bia Isalele abitungu ebakilue nka kui muntu a mu kisamba kia nshaye, bua’shi bena Isalele balame bupianyi bua ba mashabo. 9 Bupianyi su mbumune ta mbulombene kukatuka ku kingi kisamba bua kuenda ku kingi kisamba, muanda abitungu bisamba bia Isalele bilamate ku bupianyi buabio.’”

10 Bana bakashi ba Selofehade babakitshine nka bibaadi Yehowa mutumine Moyise eyi. 11 Biabia Mahela, Tirsa, Ogla, Milka, na Nowa, bana bakashi ba Selofehade babaadi bebakilue kui bana balume ba bakuabo na nshabo. 12 Babafikile bakashi ba bantu ba mu bifuko bia Manasee muana a Yosefe bua’shi bupianyi buabo bushale mu kisamba kia kifuko kia nshabo.’”

13 Ano nyi mayi na bitshibilo bibaadi Yehowa mupe bena Isalele kukidila kui Moyise mu kabaaka ka Moabe pepi na Yordane ku Yeriko.