DETERONOME

1 Ano nyi mayi abaadi Moyise mulungule bena Isalele boso mu kipindi kia nsenga ya Yordane mu kabaaka, mu kipia kitaleene na Sufe, pankatshi pa Parane, Tofele, Labane, Aserote, na Disabe. 2 Kukatuka ku Horebe na ku Kadeshe-barnea abiata mafuku 11 obe ayila eshinda dia Muengie wa Seyire. 3 Muifuku dia kumpala, mueshi wa 11, kipua kia 40, Moyise balunguile bena Isalele bioso bibaadi Yehowa mumutumine eyi bua kuibalungula. 4 Bibaadi kunyima kuaye kutshimuna Sihone nfumu a bena Amore baadi mushale mu Eshebone, na Oge nfumu a mu Bashane baadi mushale mu Ashetarote, mu Edrei. 5 Mu kipindi kia nsenga kia Yordane mu kibundi kia Moabe, Moyise babangile kupatuula uno Muiya, amba’shi:

6 “Ku Horebe Yehowa Efile Mukulu eetu betulunguile’shi: ‘Nubashala mafuku e bungi mu ino nsenga ya ku miengie. 7 Alulukayi nuende batadiile ku nsenga ya ku miengie ya bena Amore, na ku lupese lua ba nkungishanyi nabo boso, mu Araba, mu nsenga ya ku miengie, mu Shefela, mu Negebe na mu nsenga i ku bukunkula bua kalunga, muiumbo dia bena Kanaana, na mu Lebanone, mpa nka na ku muela ukata, muela wa Efrate. 8 Talayi, natuulu eumbo kumpala kuenu. Tuelayi, nupiane eumbo dibaadi Yehowa muitshipe kui ba mashenu, Abalahama, Isaake, na Yakobo bua kuibapa dianka abo na bekulu babo.’

9 “Na naadi muinulungule aa mafuku’shi: ‘Ntshi na mushindo wa kuinukunkusha ami nabene. 10 Yehowa Efile Mukulu eenu mmuinufuimishe, na lelo uno tanudi bungi nka bu nyenyenyi ya muiyilu. 11 Biabia Yehowa Efile Mukulu a ba nkambua benu enufuimishe misango kinunu, na enuelele miabi nka bu bibaadi muinulee. 12 Mbikunyi biandi mulombene kutuala ami nabene bushito buenu, kiita kienu na kuikakena kuenu? 13 Sangulayi bantu be na binangu, ba sha kapatupatu na abauku mianda ba mu bisamba bienu, nakebatuulu buabadia kuikala ba nfumu benu.’ 14 Paapa nubaadi bangaluule’shi: ‘Bibuetulungula bua kukita bi buwa.’ 15 Biabia natshile ba nfumu ba mu bisamba bienu, bantu be na binangu na bamonemone mianda, ami nkuibatuula bu ba nfumu benu, ba nfumu ba bantu kinunu, ba nfumu ba bantu lukama, ba nfumu ba bantu makumi atano, na ba nfumu ba bantu ekumi, na bu batupita ba bisamba bienu.

16 “Mu kiakia kipungo nalunguile ba nsushi benu’shi, ‘P’anuteemesha kilumbu ki munkatshi mua bakuenu, abitungu nusambishe na kululama muanda wi pankatshi pa muntu na mukuabo, sunga na muenyi. 17 T’abitungu nuikale na ntondo p’anusambisha. Abitungu nupushe muntu mukata sunga mupeela nka mu mushindo umune. Tanutshinanga muntu, muanda anusambisha bu’Efile Mukulu; na su kilumbu ki bukopo kuanudi, abitungu nufikie nakio kuandi, na nakekiteemesha.’ 18 Paapa naadi muinulungule mianda yoso ibaadi ayitungu’shi nukite.

19 “Akupu tubakatukile ku Horebe na atue nkutambuka mu kaka kabaaka koso kakata na akatshinyisha, kabanudi bamone patubaadi atuende ku nsenga ya ku miengie ya bena Amore, nka bu bibaadi Yehowa Efile Mukulu eetu muitulungule; na nfudiilo a bioso tubafikile ku Kadeshe-barnea. 20 Paapa naadi muinulungule’shi: ‘Nubafiki ku nsenga ya ku miengie ya bena Amore, yabetupa kui Yehowa Efile Mukulu eetu.’ 21 Talangayi, Yehowa Efile Mukulu eenu benupa eumbo. Kaaminayi nukedipiane, nka bu bibaadi Yehowa Efile Mukulu a ba nkambua benu muinulungule. Tanutshinanga sunga kusuusa.’

22 “Anka boso buenu nubafikile mu kundungula’shi: ‘Tutume bantu kumpala bua’shi bakatale eumbo, bafikie betulungule pabitale eshinda diatudi balombene kuyila na bi bibundi bi’atukasangana.’ 23 Nadi mukumiine bino binangu, nyi buakinyi nadi musangule bana balume 12 ba munkatshi muenu, muntu umune ku kisamba kioso. 24 Babayile, abo nkukaamina dia ku nsenga ya ku miengie, nkufika muibanda dia Eshekole na abo nkuimutala. 25 Babatuadile ndambo ya bimuma bia mu diadia eumbo, abo nkufika nabio kuatudi na nkuitulungula’shi: ‘Eumbo aditupa Yehowa Efile Mukulu eetu di buwa.’ 26 Kadi nubapelele bua kuikukaamina, na anue nkutombokiela eyi dia Yehowa Efile Mukulu eenu. 27 Nubaadi batungunukie na kuunauna mu tushibo tuenu tua mapema nuambanga’shi: “Yehowa baadi muitushikue, nyi buakinyi baadi muitutuushe mu nsenga ya Ejipitu bua kuitupaana kui bena Amore bua’shi betubutule. 28 Aa ma mbalo e mushindo kinyi atukende? Bakuetu babetubofusha pa kuitulungula’shi: “Baba bantu be bukata na be bula kuitukila, bibundi biabo mbikata na mbinyingishibue mpa na muiyilu, na tubamono bana ba bena Anake muanka.”’

29 “Paapa nenulunguile’shi: ‘Tanusuusanga na tanuibatshinanga. 30 Yehowa Efile Mukulu eenu atambuka kumpala kuenu, na akenuluila ngoshi nka bu bibaadi muibikite mu Ejipitu mu meso muenu. 31 Na nuibamone bibaadi Yehowa Efile Mukulu eenu muinusemune mu kabaaka koso kubanudi anuende, mpa na pabanufikile pa ino mbalo, nka bu abisemunaa muntu muana aaye mulume.’ 32 Anka sunga mbiabia bioso, tanui batuule lukumiino mui Yehowa Efile Mukulu eenu, 33 aye baadi atambuka kumpala kuenu muishinda bua kuinukimbila mbalo yanudia kushala. Baadi muileeshe kuanudi ku bukuashi bua kaalo bufuku, na mu kanya ku bukuashi bu’ekumbi bua kuinulesha eshinda dianudia kutambukila.

34 “Yaaya nsaa yoso Yehowa bapushishe bibanudi anuakula, aye nkuinukuatshila nsungu, na nkuitshipa’shi: 35 ‘Takui muntu su ngumune a mu kino kipungo ki bubi akamono nsenga inaadi muitshipe bua kupa ba mashenu, 36 kukaasha penda Kalebe muana a Yefune. Aye akeyimono, na nakamupa aye na bana baye nsenga yadi mukatambukile, muanda mmukookiele Yehowa n’eshimba dimune. 37 (Yehowa baadi mpa na munkuatshile nsungu pa muanda wenu, andungula’shi: “Mpa n’obe namu t’okemutuele. 38 Yoshua muana a Nune ayimanaa kumpala kobe nyi akatuele mu diadia eumbo. Munyingishe,* muanda akakuasha bena Isalele bua kuidipiana.”) 39 Dingi, bana benu banuamba’shi abakekala bu bintu biabadi bapaule, na bana benu bash’abauku lelo uno ki buwa na ki bubi, abo nyi abakemutuele, na nakebapa eumbo bua’shi dikale bu diabo. 40 Anka anue ealuleyi nualukiile mu kabaaka muishinda dia ku Kalunga Kamonga.’

41 “Paapa nubandunguile’shi: ‘Tubaluishisha Yehowa bikata. Binobino atukaamina bua nkalua, nka bu biakule Yehowa Efile Mukulu eetu!’ Na oso a kuanudi batshile kina ngoshi kiaye. Nubaadi anumonoshi mbibofule bua kukaamina ku muengie. 42 Anka Yehowa nkundungula bino, ‘Ebalungule’shi: “Tanukaaminanga bua nkalua nabo, muanda tankekala nenu. Su nubende abakenubutula kui beshikuanyi nenu.”’ 43 Ami nkuinulungula, kadi tanubapushishe. Anka nubaadi batombokiele eyi dia Yehowa, na anue nkutompa kukaamina ku muengie na kuitatula koso. 44 Biabia bena Amore babaadi bashale ku wawa muengie babafikile mu kufumankana nenu, babenubingile nka bu abikitaa nyuki, na abo nkuinupalakasha mu Seyire mpa na ku Orma. 45 Nubalukiile anue nkubanga kudila kumpala kua Yehowa, anka Yehowa tabaadi muinuteemeshe sunga kutuula binangu biaye kuanudi. 46 Nyi buakinyi nubaadi bashale mafuku e bungi mu Kadeshe.

2 “Tubaadi bealuule, atue nkuenda ku kabaaka muishinda dia Kalunga Kamonga, nka bu bibaadi Yehowa mundungule, na atue nkuifunya muengie wa Seyire munda mua mafuku e bungi. 2 Nfudiilo a bioso Yehowa bandunguile’shi: 3 ‘Nubapu kuifunya uno muengie munda mua mafuku e bungi. Binobino endayi batadile kunundu. 4 Tumina muilo eyi’shi: ‘Anukidila pepi na mikalo ya bakuenu, bana ba Esau bashale mu Seyire, na abakenutshinyi. Biabia abitungu nuikale badimukie ngofu. 5 Tanuibolomonanga, muanda nta nkenupa kapindi su nkapela ka muiumbo diabo, sunga kapese ke bukata bua luao, muanda ne mupe Esau muengie wa Seyire buaudia kuikala bu waye. 6 Abitungu nuibape makuta bua bidibua bianukadi, na kuibafuta bua mema anukatomo. 7 Muanda Yehowa Efile Mukulu eenu mmuinuelele miabi mu bioso bianudi bakite. Auku kalolo luendo luenu mu kano kabaaka kakata. Mu bino bipua 40 Yehowa Efile Mukulu eenu ekalanga nenu, na tanui bakutue kantu su nkamune.”’ 8 Biabia tubakidile pepi na bakuetu, bana ba Esau, bashale mu Seyire. Tubashalele kula n’eshinda dia Araba, dia Elate na dia Esiyone-gebere.

“Akupu, tubalulukile atue nkuenda muishinda dia kabaaka ka Moabe. 9 Paapa Yehowa bandunguile’shi: ‘Tanolomonanga bena Moabe sunga kulua nabo ngoshi, muanda tankakupa kapindi su nkapela ka mu nsenga yabo, nemupe bana ba Lota kibundi kia Are bu buabo bupianyi. 10 (Kala bena Emi abaadi bashale mu yaaya mbalo, babaadi bantu be bukome na bakile bungi, na bebula nka bu bena Anake. 11 Bu bikale’shi bena Refa mbefuanene na bena Anake, bena Moabe babaadi abebetanyina bu bena Emi. 12 Kumpala, bena Ori babaadi bashale mu Seyire, kadi bana ba Esau babaadi bebakile bukome, abo nkuibabutula, akupu abo nkushala pa mbalo yabo, nka bu abikakitshi Isalele na nsenga y’abakapiana, yaaya y’abakebapa kui Yehowa.) 13 Binobino sabukayi ebanda dia Zerede.’ Biabia atue nkusabuka ebanda dia Zerede. 14 Tubakitshine bipua 38 kukatuka ku Kadeshe-barnea mpa na pabatusabukile ebanda dia Zerede, na pabafuile bantu boso ba mu kipungo kia bena ngoshi mu kishalelo, nka bu bibaadi Yehowa muitshipe kuabadi. 15 Yehowa baadi moole mboko yaye kuabadi bua kuibabutula mu kishalelo mpa na pababapuile.

16 “Pabafuile bena ngoshi boso ba munkatshi mua muilo, 17 Yehowa besambile’nyi nami, aye nkundungula’shi: 18 ‘Lelo okidila pepi n’eumbo dia Moabe, kuamba’shi Are. 19 P’ofiki pepi na bena Amone, tuebakalakashanga sunga kuibolomona, muanda tankakupa kapindi ka nsenga yabo su nkapela, nadi muiyipe bana ba Lota bua’shi ikale bu yabo. 20 Ino nsenga babaadi abeyimono dingi bu ya bena Refa. (Bena Refa abaadi bemushale kala, na bena Amone babaadi abebetanyina bu bena Zamazume. 21 Babaadi bantu bakata, be bungi na be bula nka bu bena Anake; kadi Yehowa baadi muibabutule kumpala kua bena Amone, bena Amone nkuibabinga, abo nkushala pa mbalo yabo. 22 Bino nyi bibaadi mukitshine bana ba Esau bashale binobino mu Seyire, baadi mubutule bena Ori kumpala kuabo, bana ba Esau babaadi bebakile bukome, na mbashale pa mbalo yabo mpa na lelo uno. 23 Kadi bua bena Awime, babaadi bashale mu ma mbalo e pepi na Gaza mpa na pabafikile bena Kafetorime babaadi abakatukila ku Kafetore mu kuibayipaa na nkushala pa mbalo yabo.)

24 “‘Tuelayi muishinda, nusabukie ebanda dia Arnone. Talayi, natuulu Sihone muina Amore nfumu a bena Eshebone mu maasa muenu, biabia bangayi kuata nsenga yaye na numutuukie ngoshi. 25 Kubanga nka lelo nakakitshi bia’shi bantu boso be muushi mueyilu abapusha nkumo yenu basuuse na bapushe moo wi bukopo. Abekala bakalakashue na abakasuusu pa muanda wenu.’

26 “Kunyima natumine mikiendi ayikatuka mu kabaaka ka Kedemote bua kuenda kui Nfumu Sihone a bena Eshebone, bua kumulungula ano mayi a butaale’shi: 27 ‘Ntadiile nkidile muiumbo diobe. Nakekala nka muishinda, tankende ku mboko ibalume sunga ku ibakashi. 28 Nakadi bia kudia na kutoma mema penda biabia bi’ongudisha. Ntadiile penda nkile lua mikoolo, 29 mpa nka na pankasabuka Yordane ntuele mu nsenga yabetupa kui Yehowa Efile Mukulu eetu. Biabia nyi bibaabadi bankitshine kui bana ba Esau bashale mu Seyire na bena Moabe bashale mu Are.’ 30 Kadi Sihone nfumu a Eshebone ta mukumiine bua’shi tukile, muanda Yehowa Efile Mukulu oobe baadi mutadiile bua’shi ekale na mutue wi bukopo, n’ashi eshimba diaye dipape buadia kumupaana mu maasa muenu nka bu biadi muibikite.

31 “Paapa Yehowa bandunguile’shi, ‘Talanga, napu kubanga kukupa Sihone n’eumbo diaye. Banga kuata eumbo diaye.’ 32 Pabafikile Sihone na bantu baye boso mu kulua netu ku Yasa, 33 Yehowa Efile Mukulu eetu baadi mumupaane mu maasa muetu, biabia atue nkumutshokola na bana baye balume, mpa na muilo waye oso. 34 Mu kiakia kipungo tubakuatshile bibundi biaye bioso, na atue nkubutula kibundi kioso, mpa na bana balume, bana bakashi, na bana bakinga. Tatui balekie muntu su ngumune na muwa. 35 Tubatshile nka penda nyema bu bintu bipaulue, mpa na bintu bibatuatshile mu bibundi bibatudi bakuate. 36 Kubanga ku Arowe e ku bukunkula bu’Ebanda dia Arnone (mpa na kibundi ki muibanda), na ku Gileade takui kibundi su nkimune kiatushi bakuate. Yehowa Efile Mukulu eetu baadi muibipaane bioso mu maasa muetu. 37 Kadi tanuibesesele pepi n’eumbo dia bena Amone, kipindi kioso ki ku bukunkula bu’Ebanda dia Yaboke na bibundi bi mu nsenga ya ku miengie, sunga ingi mbalo yoso ibaadi Yehowa Efile Mukulu eetu muitukandikie.

3 “Paapa tubaadi balulukie, atue nkukaamina n’eshinda dia Bashane. Oge nfumu a Bashane bafikile na muilo waye oso mu kufumankana netu bua kulua ngoshi ku Edrei. 2 Biabia Yehowa nkundungula’shi: ‘Tomutshinanga, muanda nakamutuulu na muilo waye oso na nsenga yaye yoso muiyasa diobe. Okamukitshi nka bu biokitshine Sihone nfumu a bena Amore baadi mushale mu Eshebone.’ 3 Biabia Yehowa Efile Mukulu eetu betupeele dingi Oge nfumu a Bashane na muilo waye oso mu maasa muetu, tubaadi bebayipee, mpa na pakushibaadi kushale muntu su ngumune a ku bantu baye na muwa. 4 Paapa atue nkuata bibundi biaye bioso. Takui kibundi su nkimune kiatushi bebaate. Tubatshile bibundi 60, kipindi kioso kia nsenga kia Argobe, bufumu bua Oge mu Bashane. 5 Bino bibundi bioso bibaadi binyingishibue na bimano bila, bibaadi na biibi, na mioolo. Tubatshile bingi bibundi bi bungi bishi binyingishibue. 6 Anka, tubaadi bebibutule bioso, nka bu biatuikele bakite nfumu Sihone a mu Eshebone, tubaadi babutule kibundi kioso, balume, bakashi, mpa na bana. 7 Tubatshile bimunuanga bioso na bintu bia mu bibundi.

8 “Mu kiakia kipungo tubakuatshile eumbo dia ba nfumu babidi ba bena Amore babaadi mu kipindi kia nsenga kia Yordane, kukatukila Kuibanda dia Arnone mpa na ku muengie wa Hermone, 9 (Muengie ubaadi bena Sidone abetanyina bu Siryone, na bena Amore namu abewitanyina bu Senire), 10 bibundi bioso bia ku kiengiengie, Gileade oso mushima, Bashane oso mushima mpa na ku Saleka na Edrei, bibundi bibaadi bia mu bufumu bua Oge mu Bashane. 11 Nfumu Oge a mu Bashane baadi muntu a nfudiilo a ku bena Refa. Mushete waye ubaadi ukitshibue na biamo, na ukii ku Raba a bena Amone. Bula buao bui kude kitema, na bukata kude inanka, muyile kipimo kia kude kia mafuku oso. 12 Mu kiakia kipungo tubatshile dino eumbo: kukatukila ku Arowe e pepi n’Ebanda dia Arnone, na kia pankatshi kia nsenga ya ku miengie ya ku Gileade, ami nkupa bena kisamba kia Rubene na bena kisamba kia Gade bibundi biabo. 13 Kipindi kia Gileade kibaadi kishale na Bashane mushima, bufumu bua Oge, nemuibipe kipindi kia kisamba kia Manasee. Kipindi kia nsenga kioso kia Argobe kibaadi kia bena Bashane, babaadi abekiuku bu kia bena Refa.

14 “Yaire muana a Manasee batshile kipindi kia nsenga kioso kia Argobe, mpa na ku mikalo ya bena Geshure na bena Maakate, na aye nkuitanyina biabia bibundi bia Bashane muishina diaye, bu Awote-yaire. Abebitanyinaa mu diadia eshina mpa na bu lelo. 15 Nemupe Makire, Gileade. 16 Bena kisamba kia Rubene na kia Gade, nemuibape kipindi kia nsenga kibangie ku Gileade mpa na Kuibanda dia Arnone, munkatshi muebanda nyi mui mikalo yabo, mpa na ku Yaboke ebanda dikale bu mikalo ya bena Amone, 17 pamune na Araba, Yordane na mikalo yaye, kubanga ku Kinerete mpa na ku Kalunga ka Araba, Kalunga ka Mungua,* dia kuushi kua ngalala ya Pisiga dia kutunduka nguba.

18 “Akupu naadi muinutumine eyi’shi: ‘Yehowa Efile Mukulu eenu mmuinupe ino nsenga buanudia kuiyipiana. Biabia bana balume benu boso be bukome baate bina ngoshi na basabukie kumpala kua bakuenu bena Isalele. 19 Nka penda bakashi benu, bana benu, na bimunuanga bienu nyi abakatungunuka na kushala mu bibundi biandi muinupe, (nauku kalolo’shi nui na bimunuanga bi bungi), 20 mpa nka na apakapa Yehowa bakuenu kikiisho bu biadi namu muinupe, na pabakata namu bupianyi bua nsenga yabebapa kui Yehowa Efile Mukulu eenu abuaa bushiya bua Yordane. Paapa anualukiila muntu oso mu nsenga yandi mumupe.’

21 “Mu kiakia kipungo naadi mutumine Yoshua eyi’shi: ‘Buemuena obe nabene Yehowa Efile Mukulu oobe bibakitshina bano ba nfumu babidi. Yehowa akakitshina mafumu oso okapete kuakua nka bi mumune. 22 Tuebatshinanga muanda Yehowa Efile Mukulu eenu nyi enuluila ngoshi.’

23 “Mu kiakia kipungo naadi muisendeele Yehowa, namulungula’shi, 24 ‘Ô Muanana mukile bukata Yehowa! We mubangie kulesha mufubi oobe bukome bobe bukata na mboko yobe i bukome, muanda, efile kinyi muiyilu sunga pa nsenga akitshi midimo ya bukome bu yobe? 25 Kumiina namu nsabukie abuaa bushiya bua Yordane bua’shi mmone eumbo di buwa di abuaa bushiya, na kipindi kia nsenga ki buwa, na Lebanone.’ 26 Anka Yehowa baadi mutungunukie na kunfitshila munda pa muanda wenu, na ta mumpushishe. Yehowa nkundungula’shi: ‘Biabia bibuakula bibakumbana! Tondungulanga dingi wawa muanda. 27 Kaamina ku nsongo kua Pisiga, otale kupona nguba na kunundu, otale kuushi na kutunduka nguba, w’emuene eumbo na meso oobe, muanda t’okasabuka Yordane. 28 Tuula Yoshua bu mukunkushi, omunyingishe na omukankamikie, muanda nnaye akasabuka kumpala kua uno muilo, na nnaye akebakuasha bua kupiana eumbo di’omono.’ 29 Ino mianda yoso ibaadi ikitshikie pabatudi bashale muibanda ditalene na Bete-peore.

4 “Binobino, obe Isalele, teemesha mayi a kulonda na miiya yanenulongiesha bua kukookiela, bua’shi nushale na muwa na nutuele muiumbo diabenupa kui Yehowa Efile Mukulu a bankambua benu, nuidipiane. 2 Ta nui balombene kutenteka sunga kukaasha kintu ku mayi anenupa, bua’shi nukookiele miiya ya Yehowa Efile Mukulu eenu yanenupa.

3 “Anue banabene nuibemuene na meso eenu bikite Yehowa mu muanda utale Baale a Peore; Yehowa Efile Mukulu eenu baadi muipee munkatshi muenu muntu oso baadi mulonde Baale a Peore. 4 Anka anue babaadi bashale balamate kui Yehowa Efile Mukulu eenu, boso buenu nui na muwa lelo uno. 5 Talayi, nemuinulongieshe mayi a kulonda na miiya, nka bu bibaadi Yehowa Efile Mukulu ande mundungule, bua’shi nukebikookiele muiumbo dianukatuele. 6 Abitungu nuiyikookiele kalolo, muanda su nubakitshi biabia anulesha binangu na lushinguluilo kumpala kua miilo yoso ayikapusha ano mayi a kulonda, na ayikamba’shi: ‘Kino kisamba kikata ki na binangu na lushinguluilo binyibinyi.’ 7 Muanda nkisamba kikata kinyi ki na b’efile be pepi nakio bu bikale Yehowa Efile Mukulu eetu pepi netu nsaa yoso y’atumuitanyina? 8 Na nkisamba kinyi ki bukata bino ki na mayi a kulonda alulame bu ino miiya yoso yanenupa lelo uno?

9 “Anka, dimukayi na nuilame, bua’shi tanulubanga mianda yanudi bemuene na meso eenu, na bua’shi tayikatukanga ku mashimba eenu mu mafuku oso a muwa wenu. Abitungu nuiyilongieshe bana benu na bekulu benu. 10 Muifuku dibanuimene kumpala kua Yehowa Efile Mukulu eenu ku muengie wa Horebe, Yehowa bandunguile’shi: ‘Bunga muilo oso pamune kumpala kuande bua’shi nebalungule mayi ande, balongie bia kuntshina mafuku oso abekala na muwa pa nsenga na bealongieshe bana babo.’

11 “Biabia nubafikile pepi na muengie, nuemana kuushi kuao, na muengie ubaadi autembe kaalo kakafikie mpa na muiyilu; na kubaadi mufito, ekumbi, na mufito wi bukopo. 12 Yehowa babangile kuisamba nenu kukatukila mu kaalo. Nubapushishe eyi, anka tanubamuene kintu, kubaadi penda eyi bisumanga. 13 Baadi muinulungule kilombeno kiaye, kibenutekiele buanudia kulonda, kuamba’shi Miiya ekumi. Akupu aye nkuiyifunda ku mabue abidi. 14 Mu kiakia kipungo Yehowa bantekiele buandia kuinulongiesha miiya na mayi aaye anudia nkatumikila muiumbo dianukapiana.

15 “Biabia abitungu nudimukie, muanda tanui bamone kintu su nkimune muifuku dibaadi Yehowa muisambe nenu ku Horebe munkatshi mua kaalo, 16 bua’shi tala nuakita muanda wi bubi, p’anue kuikitshina nkishi e na kinfuanyi kia kintu kampanda, kinfuanyi kia muntu mulume sunga muntu mukashi, 17 kinfuanyi kia nyema oso yawa e pa nsenga sunga kinfuanyi kia konyi kampanda akapapamaa muiyilu, 18 kinfuanyi kia kintu kioso kiakia akiikaka mu nsenga sunga kinfuanyi kia mushipa kampanda wi mu mema. 19 Na p’anuibuesha meso eenu muiyilu na kumona nguba, mueshi na nyenyenyi, kuamba’shi kiluilo kishima kia muiyilu, tanulubishuanga nabio bua kuibinamina na kuibilanguila. Yehowa Efile Mukulu eenu mmuibipe bantu boso be muushi mu’eyilu. 20 Kadi anue, Yehowa mmuinusangule na kuinutuusha mu Ejipitu muilungu dia kaalo di’abasuungulushaa biamo, buanudia kufika muilo waye* wi pabuao, nka bu biabidi lelo uno.

21 “Yehowa baadi munfiitshile munda pa muanda wenu, na nkuitshipa’shi ntansabuka muela wa Yordane bua kutuela mu nsenga i buwa ayinupa Yehowa Efile Mukulu eenu bu bupianyi. 22 Ami nafuila mu dino eumbo; ntansabuka Yordane nya, kadi anue anumusabuka na kupiana ino nsenga i buwa. 23 Nudimukie bua’shi tanulubanga kilombeno kibaadi Yehowa Efile Mukulu eenu mukite nenu, na tanuikitshinanga nkishi, kuamba’shi kinfuanyi kia kintu kioso kiabadi benukandikie kui Yehowa Efile Mukulu eenu. 24 Muanda Yehowa Efile Mukulu eenu enka bu kaalo akabutulaa, Efile Mukulu atekaa’shi bamulamate nka penda aye.

25 “Su bopete bana na bekulu na boshala mafuku e bungi muiumbo, akupu bobanga kukita mianda i bubi na kukita nkishi a mushindo oso wawa, na su anukitshi mianda i bubi ku meso kua Yehowa Efile Mukulu eenu bua kumufiitshisha munda, 26 lelo uno naata eyilu na nsenga bu tumonyi kumpala kuenu’shi, anukashimina bukidi bukidi mu nsenga y’anukapiana kunyima kua kusabuka Yordane. T’anukayisha muanka mafuku e bungi nya, anukabutudibua binyibinyi. 27 Yehowa akenupalakasha munkatshi mua miilo, na nka penda bantu bapeela ba kuanudi nyi abakapanda munkatshi mua miilo muabakenupalakasha kui Yehowa. 28 Na kuakua anukafubila b’efile ba mitshi na ba mabue bakitshibue na maasa a bantu, b’efile bashi balombene kumona, kupusha, kudia sunga kupusha eshiko.

29 “Su kuakua nuakimba Yehowa Efile Mukulu eenu, anukamupete binyibinyi, su nuamukimba n’eshimba dienu dioso na anyima* eenu oso. 30 Ku nfudiilo kua kino kipungo, p’anukekala mu malua akata na apakenufikila ino mianda yoso, paapa anukalukiila kui Yehowa Efile Mukulu eenu na anukateemesha eyi diaye. 31 Muanda Yehowa Efile Mukulu eenu nyi Efile Mukulu e na lusa. T’akenusumbushena sunga kuinubutula, na takalubu kilombeno kibaadi muitshipe kui ba nkambua benu.

32 “Binobino, ipushayi pabitale mafuku a kala, a kumpala kua kipungo kienu, kubanga muifuku dibaadi Efile Mukulu mupangie muntu pa nsenga; kimbuulayi kubanga ku nsongo y’eyilu na ku ingi nsongo y’eyilu. Muanda ukata wi bino ngupue kukitshika su? Sunga kintu ki bino ta kibapuile kupushika? 33 Ta kubekeele ungi muilo upushe eyi di’Efile Mukulu ku’esamba kukatukila mu kaalo mu mushindo wanubaadi bebipushe na washala na muwa? 34 Sunga’shi Efile Mukulu ta batompele kuiatshila kisamba munkatshi mua bingi bisamba, na biimu na bitunduilo, na bilengieleshi, na ngoshi, n’eyasa di bukome, na mboko yolole, na mianda ayitshinyisha bu bibaadi Yehowa Efile Mukulu eenu muinukitshine mu Ejipitu mu meso muenu su? 35 Anue mbenuleshe ino mianda bua’shi nuukie’shi Yehowa nyi Efile Mukulu a binyibinyi; takui ungi kukatusha nka penda aye. 36 Mmukite bia’shi nupushe eyi diaye kukatukila muiyilu bua kuinuludika, na pa nsenga bakitshine bia’shi numone kaalo kakata, na nubapushishe mayi aaye munkatshi mua kaalo.

37 “Bu bibaadi mufule ba nkambua benu na musangule bekulu babo, baadi muinutuushe mu Ejipitu kumpala kuaye na bukome buaye bukata. 38 Na mmubingie kumpala kuenu bisamba bikata na bi bukome kuinukila, bua kuinutuesha na kuinupa nsenga yabio bu bupianyi, nka bu biabidi lelo uno. 39 Biabia, ukaayi kubanga lelo na nulamiine’shi, Yehowa nyi Efile Mukulu a binyibinyi muiyilu na pa nsenga. Takui ungi nya. 40 Abitungu nulame miiya yaye na mayi aaye a kulonda bianenupa lelo uno, bua’shi mianda yenu inuyile kalolo, anue na bana benu abafiki kunyima kuenu, na bua’shi nushale mafuku e bungi mu nsenga ayinupa Yehowa Efile Mukulu eenu.”

41 Mu kiakia kipungo, Moyise batuudile bibundi bisatu ku lupese, dia kutunduka nguba kua Yordane. 42 Bua’shi su muntu ayipaa muin’aye ash’ekalanga mushikue, abitungu asukile ku kimune kia ku biabia bibundi bua’shi ashale na muwa. 43 Biabia bibundi mbino: Besere muibanda dia mu kabaaka bua bena Rubene, Ramote mu Gileade bua bena Gade, na Golane mu Bashane bua bena Manasee.

44 Biabia uno nyi Muiya ubaadi Moyise mulungule muilo wa Isalele. 45 Ino nyi mitentekiesho, miiya, na bitshibilo bibaadi Moyise mupe bena Isalele kunyima kuabo kutuuka mu Ejipitu, 46 mu kipindi kia nsenga ya Yordane, muibanda ditalene na Bete-peore, muiumbo dia nfumu Sihone a bena Amore, baadi mushale mu Eshebone, abaabadi batshimune kui Moyise na bena Isalele kunyima kuabo kutuuka mu Ejipitu. 47 Babatshile eumbo diaye n’eumbo dia Oge nfumu a Bashane, ba nfumu babidi ba bena Amore babaadi bashale mu kipindi kia nsenga kia kutunduka nguba kua Yordane, 48 kukatukila ku Arowe e ku bukunkula bu’Ebanda dia Arnone mpa na ku muengie wa Siyona, kuamba’shi Hermone, 49 na Araba oso mushima mu kipindi kia nsenga kia kutunduka nguba kua Yordane mpa na ku Kalunga ka Araba, kuushi kua Pisiga.

5 Kunyima Moyise bayitanyine bena Isalele boso, aye nkuibalungula’shi: “Teemesha, ô Isalele, miiya na bitshibilo bianenulungula lelo uno, abitungu kuibilonga na kuibitumikila na kalolo koso. 2 Yehowa Efile Mukulu eetu bakitshine netu kilombeno ku Horebe. 3 Yehowa ta mukite kino kilombeno na ba nkambua betu nya, kadi bekikitshine netu, atue boso be na muwa lelo uno. 4 Yehowa besambile nenu ku muengie mpala kua mpala munkatshi mua kaalo. 5 Mu kiakia kipungo naadi muimane pankatshi penu na Yehowa bua kuinulungula eyi dia Yehowa, muanda nubaadi anutshinyi kaalo na tanui bakaamine ku muengie. Aye nkuakula’shi:

6 “‘Nnami Yehowa Efile Mukulu oobe baadi mukutushe mu nsenga ya Ejipitu, mu nshibo ya bupika. 7 Tue mulombene kuikala na bangi b’efile kukatusha nka pend’ami.

8 “‘Tuekitshinanga nkishi sunga kinfuanyi kia kintu kampanda ki muiyilu’mua sunga ki pa nsenga, sunga ki mu mema muushi mua nsenga. 9 Tuebikunaminanga na tabakutakulanga bua kuibilanguila, muanda ami Yehowa Efile Mukulu oobe, n’Efile Mukulu atekaa’shi bandamate nka pend’ami, afuishaa kiimu kui bana bua bilema bia ba mashabo, mpa na ku kipungo kia kasatu na kia kananka bua baba banshikue, 10 kadi naleshaa kifulo kia lulamato mpa na ku kipungo kia kinunu kui baba banfule na abalama miiya yande.

11 “‘Tue mulombene kuteemuna eshina dia Yehowa Efile Mukulu oobe mu mushindo ushi buwa, muanda Yehowa t’akakutua kunyoka muntu oso afubisha eshina diaye mu mushindo ushi buwa.

12 “‘Wekale otentekiesha efuku dia Sabato bua kuidilama dia kishila, nka bu bibaadi Yehowa Efile Mukulu oobe mukutumine eyi. 13 Ofubu na kukita midimo yobe yoso munda mua mafuku asamombo, 14 anka, efuku dia musambobidi, nyi efuku dia Sabato bua Yehowa Efile Mukulu oobe. Tue mulombene kukita mudimo su ngumune, biabikala obe sunga muana oobe mulume, sunga muana oobe mukashi, sunga mpika oobe mulume, sunga mpika oobe mukashi, sunga ngombe oobe, sunga mpunda oobe, sunga ungi nyema oobe oso, sunga muenyi mushale mu bibundi biobe, bua’shi mpika oobe mulume na mpika oobe mukashi bayikishe namu nka bu bioyikishaa. 15 Tentekiesha’shi bodi mpika muiumbo dia Ejipitu, na Yehowa Efile Mukulu oobe bakutushishe muamua n’eyasa diaye di bukome na mboko yolole. Nyi buakinyi Yehowa Efile Mukulu oobe bakutekiele bua kunemeka efuku dia Sabato.

16 “‘Nemeka nshobe na nyinobe, nka bu bibaadi Yehowa Efile Mukulu oobe mukutumine eyi, bua’shi olale mafuku e bungi na mianda yobe yende kalolo mu nsenga y’abakupa kui Yehowa Efile Mukulu oobe.

17 “‘Toyipayishenanga.

22 “Yehowa balunguile kakongie kenu koso kashima ino miiya yoso ku muengie, munkatshi mua kaalo, ekumbi, mufito wi bukopo, n’eyi di bukopo. Kunyima tabaadi muikukumbashe kingi kintu; akupu beyifundile ku mabue abidi a mpelua, aye nkuiampa.

23 “Kadi, nka nuki’anupusha eyi dibaadi aditukila mu mufito, pabaadi muengie autembe kaalo, ba nfumu boso ba bisamba bienu na bakulu babafikile kuandi. 24 Paapa nubambile’shi: ‘Talanga, Yehowa Efile Mukulu eetu betulesha ntumbo yaye na bukata buaye, na tubapusha eyi diaye munkatshi mua kaalo. Lelo uno tubamono’shi Efile Mukulu mmulombene kuisamba na muntu na yawa muntu ashala na muwa. 25 Biabia, buakinyi tui balombene kufua? Muanda kano kaalo ke bukopo ke kuitushiika. Su tubatungunuka na kupusha eyi dia Yehowa Efile Mukulu eetu, atufu binyibinyi. 26 Muanda mmuntu kinyi tabapushishe eyi di’Efile Mukulu e na muwa kuakuila mu kaalo bu biatudi bedipushe, kadi ashala na muwa? 27 Abitungu obe nabene wesesele bua kuteemesha bioso bi’abakula kui Yehowa Efile Mukulu eetu, na obe nyi etulungula bioso bi’abakulungula kui Yehowa Efile Mukulu eetu, na atuibiteemesha na kuibitumikila.’

28 “Biabia Yehowa bateemeshe mayi anubandunguile, na Yehowa kundungula’shi: ‘Nateemesha mayi ababakulungula kui uno muilo. Bioso bibabakula bi buwa. 29 Su mashimba aabo ekala aantshinyi mafuku oso na bakookiela miiya yande yoso; paapa mianda yabo na ya bana babo ayende kalolo bua loso! 30 Enda w’ebalungule’shi: “Alukiilayi ku tushibo tuenu tua mapema.” 31 Anka obe oshala pano nami, bua’shi nkulungule miiya yoso, mayi a kulonda, na bitshibilo biodia kuibalongiesha bua’shi bakebitumikile muiumbo diankebapa buadidia kuikala bu diabo.’ 32 Biabia abitungu nudimukie bua kukita mianda nka bu biabadi benutumine eyi kui Yehowa Efile Mukulu eenu. T’abitungu’shi nuipengie ku mboko ibalume sunga ku ibakashi. 33 Abitungu nutambukile mu mashinda oso abadi benutumine eyi kui Yehowa Efile Mukulu eenu bua kutambukila, bua’shi nushale na muwa na mianda yenu yende kalolo na nufuimishe mafuku eenu muiumbo dianukaata.

6 “Biabia ino nyi miiya na mayi a kulonda, na bitshibilo bibatusha Yehowa bua kuinulongiesha, bua’shi nuibikookiele muiumbo dianukaata p’anukasabuka abua bushiya bua Yordane, 2 bua’shi numone bia kukookiela Yehowa Efile Mukulu eenu na kulama miiya yaye yoso na mayi anenulungula lelo uno, anue na bana benu na bekulu benu, mu mafuku oso a muwa wenu, bua’shi nulale mafuku e bungi. 3 Ô! Isalele, abitungu nuteemeshe na nutumikile kalolo yaaya miiya, bua’shi mianda yenu yoso yende bi buwa na nufuime muiumbo adialala mabeele na buuki, bu bibaadi Yehowa Efile Mukulu a ba nkambua benu muinulee.

4 “Teemesha, Ô! Isalele, Yehowa Efile Mukulu eetu mmuikale Yehowa umune. 5 Abitungu ofule Yehowa Efile Mukulu oobe n’eshimba diobe dioso, na anyima oobe oso, na bukome bobe boso. 6 Ano mayi ankulungula lelo uno abitungu ekale muishimba diobe, 7 na abitungu weatueshe* mui bana bobe na w’ebalungule anka podi mushale ku nshibo na p’otambuka muishinda, p’olaala mpa na p’obuuku. 8 Abitungu weanye bu kitentekiesho kuiyasa diobe, na bu lubango mu mpala yobe. 9 Abitungu weafunde ku ntempa ya biibi bia nshibo yobe na biibi bia lupata.

10 “Nsaa ayinutuesha Yehowa muiumbo dibaadi mulee ba nkambua benu, Abalahama, Isaake, na Yakobo bua kuinupa, eumbo di na bibundi bikata na bi buwa bianushi bebakie, 11 mashibo aule na bintu bioso bi buwa bianushi bakitshine mudimo, biina bia mema bianushi babundule, mafuba a nfinyo na mitshi ya olive bianushi bakune, na p’anudi nubayikuta, 12 nudimukie bua’shi tanulubanga Yehowa baadi muinutushe muiumbo dia Ejipitu, mu nshibo ya bupika. 13 Yehowa Efile Mukulu oobe nyi odia kutshina, aye nyi odia kulanguila, na muishina diaye nyi modia kuitshipa. 14 Tue mulombene kulonda bangi b’efile, efile su ngumune a miilo inuifunyishe, 15 muanda Yehowa Efile Mukulu eenu e munkatshi muenu nyi Efile Mukulu atekaa’shi bamulamate nka penda aye. Bisumanga nsungu ya Yehowa Efile Mukulu eenu ayikenutembela bu kaalo, na kuinubutula pa nsenga.

16 “Tanui balombene kutompa Yehowa Efile Mukulu eenu bu bibanudi bamutompe ku Masa. 17 Abitungu nutumikile miiya ya Yehowa Efile Mukulu eenu n’eshimba dimune, na mitentekiesho yaye mpa na bitshibilo biaye biadi muinutekie bua kukookiela. 18 Abitungu nukite mianda i buwa na ilulame ku meso kua Yehowa, bua’shi mianda yenu yende kalolo na bua’shi nutuele mu nsenga i buwa ibaadi Yehowa muitshipe kui ba nkambua benu, 19 pa kubinga beshikuanyi nenu boso kumpala kuenu bu bibaadi Yehowa mulee.

20 “Mu mafuku e kumpala, apakenuipusha bana benu’shi: ‘Buakinyi Yehowa Efile Mukulu eetu mmuinupe ino mitentekiesho, mayi a kulonda na bino bitshibilo?’ 21 paapa anukaluula bana benu’shi: ‘Tubaadi ba mpika ba Faraone mu Ejipitu, anka Yehowa baadi muitutuushe mu Ejipitu na mboko yaye ya bukome. 22 Mu meso muetu Yehowa baadi atungunuka na kutumina Faraone na ba mu nshibo yaye yoso na bena Ejipitu bitunduilo na bilengieleshi bikata bia kuibabutula nabio. 23 Baadi muitutushe muamua, aye nkuitufuisha pano bua kuitupa eumbo bu bibaadi muitshipe kui ba nkambua betu. 24 Akupu Yehowa baadi muitutekie bua kukookiela ino miiya yoso na kutshina Yehowa Efile Mukulu eetu bua buwa buetu bua loso, bua’shi tushale na muwa nka bu bino biatudi lelo uno. 25 Na atuikala bantu balulame, anka su tubanemeka ino miiya yoso na kukookiela Yehowa Efile Mukulu eetu, nka bu biadi muitutekie.’

7 “Apakakutuesha Yehowa Efile Mukulu oobe muiumbo ditodi pa kuata, akabingi kumpala kobe miilo i na bantu be bungi: bena Ite, bena Girgashi, bena Amore, bena Kanaana, bena Perizi, bena Ivii, na bena Yebuse, bisamba musambobidi bi na bantu be bungi na be bukome kukukila. 2 Yehowa Efile Mukulu oobe akebapaana kodi na okebatshokola. Abitungu w’ebayipee. Tue mulombene kukita nabo kilombeno sunga kuibalesha lusa. 3 Tueyibakishenanga nabo. Topanga bana babo balume bana bobe bakashi na tuatanga bana babo bakashi bua kuibapa bana bobe balume. 4 Muanda abakakatusha bana bobel kuandi na kuibatakula bua kulanguila bangi b’efile; paapa nsungu ya Yehowa ayikakutembela nka bu kaalo, na akakubutula bukidibukidi.

5 “Anka tala kiodia kuibakitshina: Obumbule bilambuilo biabo, otshokole misungu yabo ya kishila, na kutshiba mitshi yabo ya kishila, na kushiika ma nkishi aabo kaalo. 6 Muanda we muilo wa kishila kui Yehowa Efile Mukulu oobe, na Yehowa Efile Mukulu oobe mmukusangule bodia kufika muilo waye, muilo waye wi pabuao munkatshi mua miilo yoso i pa nsenga.

7 “Ta mpa muanda wa’shi nubaadi bungi kukila ingi miilo yoso kubaadi Yehowa muinuleshe kifulo na kuinusangula, mu binyibinyi nubaadi bupeela kukila miilo yoso. 8 Anka mpa muanda Yehowa baadi muinufule na kunemeka mutshipo ubaadi mukite kui ba nkambua benu, nyi buakinyi Yehowa baadi muinutushe na mboko yaye i bukome na kuinukuula mu nshibo ya bupika, aye nkuinukatusha kuiyasa* dia Faraone nfumu a mu Ejipitu. 9 Anuuku kalolo’shi Yehowa Efile Mukulu eenu nyi Efile Mukulu a binyibinyi, Efile Mukulu a lulamato, alamaa kilombeno kiaye na kifulo kia lulamato kui bipungo kinunu bia bantu bamufule na baba abakookiela miiya yaye. 10 Kadi bua baba bamushikue akebafutu musango umune pa kuibabutula. Takakitshi mianda na lulengu bua baba bamushikue nya; akebafutu musango umune. 11 Biabia, etatshisheyi bua kulama miiya, mayi a kulonda na bitshibilo bianenupa lelo uno, p’anue kuibikookiela.

12 “Su nuatungunuka na kuteemesha bino bitshibilo pa kuibilama na kuibikookiela, Yehowa Efile Mukulu eenu akalama kilombeno kiaye na kifulo kiaye kia lulamato nka bu bibaadi muitshipe kui ba nkambua benu. 13 Akenulesha kifulo, kuinuelela miabi na kuinufuimisha. Oolo, akenuelela miabi muiumbo dibaadi muitshipe kui ba nkambua benu bua kuinupa, pa kuinupa bana be bungi. Akelela mpa na bintu bia mu nsenga yenu miabi, ntete yenu, nfinyo yenu ipia, muimu wenu, bana ba ngombe na bana ba mikooko ya mu bikutu bienu. 14 Okekala muilo wedibue miabi kukila miilo yoso; t’akukekala muana mulume sunga muana mukashi a munkatshi muenu akakutua kutanda, sunga nyema yaye t’ayikakutua tuana. 15 Yehowa akakatusha kodi maladi oso, na t’akakufuishisha bipupa bi bukopo bibodi muukie mu Ejipitu. Anka akebifuishila baba boso bakushikue. 16 Abitungu obutule bantu boso babakatuulu mu maasa mobe kui Yehowa. Tuebafuilanga lusa, na t’abitungu ofubile b’efile babo, muanda biabia abikala bu muteo kodi.

17 “Su buakula muishimba diobe’shi, ‘Ino miilo ngitukile bungi. Mbikunyi biandia kuiyibinga?’ 18 Tue mulombene kuibatshina nya. Abitungu otentekieshe bibaadi Yehowa Efile Mukulu oobe mukite Faraone na bena Ejipitu boso, 19 dinyoka dikata dibodi muimuene na meso oobe na bitunduilo na bilengieleshi, eyasa diaye di bukome na mboko yolole bibaadi Yehowa Efile Mukulu oobe mukutushe nabio. Biabia, nyi bi’abakakitshina miilo yoso y’otshinyi kui Yehowa Efile Mukulu oobe. 20 Yehowa Efile Mukulu oobe akebatumina kubofula* mpa nka na apakapu baba abekalanga bashale na abekalanga bafuame kumpala kobe. 21 Tuebatshinanga, muanda Yehowa Efile Mukulu oobe e nobe nyi Efile Mukulu mukata na akutshiina.

22 “Yehowa Efile Mukulu oobe akabingi binyibinyi ino miilo kumpala kobe ku kapela kapela. Ta bi buwa kuiyibutula bukidi bukidi, bua’shi tala nyema ya bukielo yakufuimina. 23 Yehowa Efile Mukulu oobe akapaana ino miilo kodi, na kuiyitshimuna yoso mpa na payibutuka. 24 Akapaana ba nfumu babo mu maasa mobe, na okashimi mashina aabo muushi mu’eyilu. Takui muntu su ngumune akakukambila, mpa na puebabutula boso. 25 Abitungu oshiikie ma nkishi a b’efile babo mu kaalo. Tolakilanga arja na ôlo bi kuanka sunga kuibiata, bua’shi tabikuponeshanga mu muteo, muanda ma nkishi mbintu bi butete ku meso kua Yehowa Efile Mukulu oobe. 26 Tue mulombene kutuesha kintu ki butete mu nshibo mobe, muanda nka bu’kio wekala kintu kia kubutudibua. Abitungu wekishikue n’eshimba diobe dioso, muanda nkintu kia kubutudibua.

8 “Abitungu wekale mudimukie bua kutumikila miiya yoso yankupa lelo uno, bua’shi oshale na muwa na nuifuimeene na kutuela bua kuata nsenga ibaadi Yehowa muitshipe kui ba nkambua benu. 2 Tentekiesha eshinda dila dibaadi Yehowa Efile Mukulu oobe mukutambushe munda mua bino bipua 40 mu kabaaka, bua kukita bia’shi weyishe na kukutompa bua kuuka kibaadi muishimba diobe, su okookiela miiya yaye sunga kupela kuiyikookiela. 3 Baadi mukite bia’shi weyishe na kukutadiila na nsala na mmukudiishe Mana oshiboodi ouku, sunga ashibaadi ba mashobe abauku, bua kukulesha’shi muntu te na muwa penda bua bia kudia,* kadi muntu e na muwa bu’eyi dioso adituuku mukanua mua Yehowa. 4 Bilamba biboodi mufuale ta mbisanukie, sunga ngua yobe tangiule munda mua bino bipua 40. 5 Ouku kalolo muishimba diobe’shi nka bu abilangaa muntu muana aaye, Yehowa Efile Mukulu eenu baadi enulanga.

6 “Abitungu okookiele miiya ya Yehowa Efile Mukulu oobe pa kutambukila mu mashinda aaye na kumutshiina. 7 Muanda Yehowa Efile Mukulu oobe akakutuesha muiumbo di buwa, eumbo di na miela, nsulo na bitonko bia mema aalaala muibanda, na ku miengie, 8 eumbo di na blé, na orje, di na mitshi ya nfinyo, mitshi ya nfigiye, na mitshi ya grenade, eumbo di na muimu wa olive na buuki, 9 eumbo dish’adikakutshikua bia kudia, na tokakutua kintu su nkimune, eumbo di na mabue e na kiamo. Na ku miengie yadio anuikala anubundula kiamo kia munyinga.*

10 “P’okadi na kuikuta, abitungu otumbishe Yehowa Efile Mukulu oobe bu’eumbo di buwa diadi mukupe. 11 Abitungu odimukie bua’shi tolubanga Yehowa Efile Mukulu oobe p’obe kukutua kukookiela miiya yaye, bitshibilo biaye, na mayi aaye ankulungula lelo uno. 12 P’okadi na kuikuta na kuibaka mashibo e buwa na kuimushala, 13 apefuimena nyema yobe ikata na ipela, puekala na kiamo kia arja na ôlo bi bungi, na puekala na bintu bioso bikile bungi, 14 totadilanga eshimba diobe dietatula na kukutakula mu kuluba Yehowa Efile Mukulu oobe baadi mukutushe muiumbo dia Ejipitu, mu nshibo ya bupika, 15 aye baadi mukutambushe mu kabaaka kakata na ka kutshiina, mui nyoka ya lulengo na tuminu, mu nsenga yume ishii mema. Bakitshine bia’shi mema atuukie mu lubuebue lui bukopo, 16 na muamua mu kabaaka baadi mukudiishe Mana abashibaadi abauku kui ba mashobe, bua kukulongiesha kuiyisha na kukutompa bua’shi bikukuashe mu mafuku aafiki. 17 Su wamba muishimba diobe’shi: ‘Nku bukome buande ami nabene na ku bukome bua mboko yande inabene kubampetesha buno bupeta,’ 18 paapa otentekieshe’shi Yehowa Efile Mukulu oobe nyi akupa bukome bua kupeta bupeta, bua kulama kilombeno kiaye kibaadi muitshipe kui ba nkambua bobe, nka bu biabidi lelo uno.

19 “Su efuku kampanda oluba Yehowa Efile Mukulu oobe, olonda bangi b’efile na kuibafubila mpa na kuibenamina, nakushinkamisha lelo uno’shi okabutuka binyibinyi. 20 Okabutudibua nka bu bisamba biababutula kumpala kobe kui Yehowa, muanda tuekele muteemeshe eyi dia Yehowa Efile Mukulu oobe.

9 “Teemesha Ô Isalele, lelo uno osabuka Yordane bua kukaata eumbo di na bisamba bikata na bibukome kukukila, na bibundi bikata binyingishibue mpa na muiyilu, 2 bantu bakata na bala, bana ba bena Anake, baba bouku na boboodi mupushe kuabebakuila’shi: ‘Nnanyi e kuimana kumpala kua bana ba Anake?’ 3 Biabia, uuka lelo uno’shi Yehowa Efile Mukulu eenu akasabuka kumpala kuenu. Enka bu kaalo akabutulaa, na akebabutula. Akebekasha bashi bukome bua’shi nuibabingie bukidibukidi na nuibabutule, nka bu bibaadi Yehowa muinulee.

4 “Apebabingi Yehowa Efile Mukulu oobe kumpala kobe, tuambanga muishimba diobe’shi: ‘Mpa muanda wa kululama kuande nyi kubaadi Yehowa mmuntueshe mu dino eumbo bua kuidiata.’ Aku namu mpa muanda wa bubi bua yaaya miilo nyi kui Yehowa eyibingi kumpala kobe. 5 Ta mpa muanda wa kululama kobe sunga kululama ku’eshimba diobe kotuelela muiumbo diabo bua kuidiata. Anka mpa muanda wa bubi bua yaaya miilo, kui Yehowa Efile Mukulu oobe eyibingi kumpala kobe bua kukumbasha eyi dibaadi Yehowa muitshipe kui ba nkambua benu, Abalahama, Isaake, na Yakobo. 6 Biabia uuka’shi ta mpa muanda wa kululama kobe kuabakupa dino eumbo di buwa kui Yehowa Efile Mukulu eenu bodia kuidiata, muanda nui muilo wi na mutue wi bukopo.

7 “Tentekieshayi kipaso kibaanudi bafiitshishe Yehowa Efile Mukulu eenu munda mu kabaaka, tanuibilubanga efuku su ndimune. Kubanga muifuku dibanukatukile mu Ejipitu mpa na pabanufikile mu ino mbalo, nuibatombokiele Yehowa. 8 Mpa na ku Horebe nubaadi bafiitshishe Yehowa munda, Yehowa baadi muinukuatshile nsungu i bukopo akieba mpa na kuinuipaa. 9 Panakamiine ku muengie bua kupeta mabue a mpelua, mabue a kilombeno kibaadi Yehowa mukite nenu, naadi mushale ku muengie mafuku 40 bufuku na kanya, kushi kudia kintu sunga kutoma mema. 10 Paapa Yehowa bampeele mabue abidi a mpelua abaadi afundibue na munue waye. Ku aa mabue kubaadi mayi oso abaadi Yehowa muisambe nenu ku muengie munkatshi mua kaalo muifuku dibanudi bebungie. 11 Ku nfudiilo kua mafuku 40 bufuku na kanya, Yehowa bampeele mabue abidi a mpelua, mabue a kilombeno, 12 na Yehowa bandunguile’shi: ‘Ebuee, oyikie bukidibukidi, muanda muilo oobe uboodi mutushe mu Ejipitu ukuete kukita mianda i bubi. Babakatuka bukidi muishinda dinaadi muibatumine eyi bua kutambukila. Babekitshina nkishi a kiamo.’ 13 Akupu Yehowa bandunguile’shi: ‘Panatala uno muilo, namono’shi wi na mutue wi bukopo. 14 Ntadiile nebabutule na nshime eshina diabo muushi mu’eyilu, na nkuikashe bu kisamba kikata na ki bukome kuibakila.’

15 “Paapa nayikile ku muengie, pabaadi muengie autembe kaalo, na mabue abidi a kilombeno abaadi mu maasa muande. 16 Akupu panatadile namuene’shi nubaadi baluishishe Yehowa Efile Mukulu eenu. Nubaadi bekitshine kana ka ngombe ka kiamo. Anue nkukatuka bukidibukidi muishinda dibaadi Yehowa muinulungule buanudia kulonda. 17 Paapa natshile mabue abidi, ami nkuiasumbula na maasa ande oso abidi, nkuiatanya mu meso muenu. 18 Akupu nadi muiname kumpala kua Yehowa munda mua mafuku 40 kanya na bufuku, nka bu musango wa kumpala. Ntshinadiile kintu sunga kutoma mema pa muanda wa miluisho yoso ibanudi bakite, p’anue kukita muanda wi bubi ku meso kua Yehowa na kumufiitshisha munda. 19 Naadi na moo wi bukopo muanda wa nsungu i bukopo ibaadi Yehowa muinukuatshile, na baadi akimbi mpa na kuinubutula. Anka, Yehowa baadi munteemeshe’nyi wawa musango.

20 “Yehowa baadi dingi mukuatshile Alona nsungu i bukopo, na baadi akimbi mpa na kumuipaa, kadi naadi mumuiyayile dingi wawa musango bua Alona. 21 Paapa natshile kana ka ngombe, ako kabaadi kenukitshishe muluisho ami nkuikashiika mu kaalo; nkuikafingakasha, nkuikasoosa mpa nka na pabakafikile bu lufufi, na ami nkuela lualua lufufi mu ka muela kabaadi akakatukila ku muengie.

22 “Nubaadi bolomone dingi nsungu ya Yehowa ku Tabera, ku Masa, na ku Kibrote-ataawa. 23 Pabaadi Yehowa muinutume kukatukila ku Kadeshe-barnea, enulungula’shi: ‘Endayi, nukapiane eumbo diankenupa binyibinyi,’ nubaadi dingi batombokiele eyi dia Yehowa Efile Mukulu eenu, ta nubadi baleshe lukumiino muadi na kumukookiela. 24 Kubanga kasha nenuuka nukuete’nka kutombokiela Yehowa.

25 “Naadi mutungunukie na kuinama kumpala kua Yehowa munda mua mafuku 40 kanya na bufuku, naadi muiname biabia muanda Yehowa bambile’shi akiebe kuinubutula. 26 Biabia naadi muiyayile Yehowa, ami nkumulungula’shi: ‘Ô Muanana mukile bukata Yehowa, tobutulanga muilo oobe. Muanda mmuilo oobe wi pabuao,* uboodi mukuule na bukome bobe na ubotushishe mu Ejipitu n’eyasa diobe di bukome. 27 Tentekiesha mufubi oobe Abalahama, Isaake, na Yakobo. Totulanga binangu biobe kui uno muilo wi na mutue wi bukopo, wi n’etombo na aukitshi miluisho. 28 Bisumanga bantu ba muiumbo dibodi muitutushe be kuamba’shi: “Yehowa t’ekalanga na ngobesha ya kuibatuesha mu nsenga ibaadi muibalee, na bu biekalanga muibashikue ekeele muibatushe bua nkebayipaa mu kabaaka.” 29 Muanda mbekale bantu bobe na muilo oobe wi pabuao, buebatushishe ku bukome bobe bukata na mboko yobe yolole.’

10 “Mu kiakia kipungo Yehowa bandunguile’shi: ‘See angi mabue abidi a mpelua nka bu aa a kumpala, na okamine kuno kuandi ku muengie; dingi abitungu okite mushete wa mabaya. 2 Nakafundu ku aa mabue mayi abaadi ku mabue a kumpala obodi mutanye, na abitungu weatuule mu mushete.’ 3 Biabia nakitshine mushete na mabaya a mutshi wa akasia, ami nkusee mabue abidi a mpelua nka bu aa a kumpala, nkukamina ku muengie na aa mabue abidi muiyasa. 4 Biabia Yehowa bafundile ku aa mabue mayi abaadi mufunde ku mabue a kumpala, kuamba’shi Miiya ekumi, yaaya ibaadi muinulungule ku muengie munkatshi mua kaalo, muifuku dibanudi bebungie; na Yehowa beampeele. 5 Paapa nayikile ku muengie na ami nkuela mabue anaadi mukite mu mushete, nka bu bibaadi Yehowa mundungule, muamua nyi muaadi mpa na binobino.

6 “Kunyima bena Isalele babakatukile ku Berote Bene-yakane abo nkuenda ku Mosera. Kuakua nyi kubafuile Alona abo nkumushiika, na muana aaye Eleazare nkubanga kufuba bu tshite muakuidi pa mbalo yaye. 7 Babakatukile kuakua benda ku Gugoda, na bakatuka ku Gugoda benda ku Yotebata, eumbo dia miela.

8 “Mu kiakia kipungo Yehowa basanguile kisamba kia Levi bua’shi kikale akisemuna mushete wa kilombeno wa Yehowa, na kuimana kumpala kua Yehowa bua’shi bamone bia kumufubila, na kuelela bantu miabi muishina diaye, bu biabakuete kuibikita mpa na lelo uno. 9 Nyi buakinyi Levi te na kiaye kipindi sunga bupianyi bu bibapetele bakuabo. Yehowa nyi buaye bupianyi, nka bibaadi Yehowa Efile Mukulu oobe mumulungule. 10 Kadi buande’mi nashele ku muengie munda mua mafuku 40 bufuku na kanya, nka bu binakitshine musango wa kumpala, na Yehowa baadi dingi mumpushishe bua uno musango. Yehowa nkuata kitshibilo kia kupela kukubutula. 11 Akupu Yehowa kundungula’shi, ‘Enda, okunkushe muilo bua’shi ukaate eumbo dinaadi muitshipe kui ba nkambua babo bua kuiupa.’

12 “Binobino Isalele, a Yehowa Efile Mukulu oobe akutekie bua kukita kinyi? Akutekie penda’shi: Otshine Yehowa Efile Mukulu oobe, otambukile mu mashinda aaye oso, omufule, ofubile Yehowa Efile Mukulu oobe n’eshimba diobe dioso na anyima oobe oso, 13 bua kulonda miiya na mayi a Yehowa biankupa lelo uno bua buwa bobe. 14 Tala eyilu, oolo eyilu di kunundu kua mayilu, na nsenga na bioso bi panka mbia Yehowa Efile Mukulu oobe. 15 Anka mpenda ba nkambua bobe nyi babaadi Yehowa muisesele nabo pepi na muibaleshe kifulo kiaye, na mmuinusangule anue bekulu babo munkatshi mua miilo yoso, na lelo uno nui bantu baye. 16 Binobino abitungu osuule eshimba diobe na olekie kuikala na mutue wi bukopo. 17 Muanda Yehowa Efile Mukulu oobe nyi Efile a b’efile, Muanana a ba muanana, Efile Mukulu mukata, sha bukome, na akutshina, sh’akitshinaa muntu su ngumune mianda na ntondo, na sh’akumiinaa bamutshibe milomo. 18 Alesha kululama kui muana mufuishe nshaye* mpa na kui mukashi kilele, mmufule muenyi, amupeya bia kudia na bilamba. 19 Obe namu abitungu ofule muenyi, muanda bodi namu bu muenyi mu eumbo dia Ejipitu.

20 “Yehowa Efile Mukulu oobe nyi odia kutshina, aye nyi odia kufubila, aye nyi odia kulamata, na muishina diaye nyi modia kuitshipa. 21 Nka penda aye nyi odia kutumbisha. Nyi Efile Mukulu oobe mukukitshine ino mianda yoso ikata na ya kukaanya yodi muimuene na meso oobe. 22 Pabayile ba nkambua benu mu Ejipitu babaadi bantu 70, anka binobino Yehowa Efile Mukulu eenu mmuinufuimishe nka bu nyenyenyi ya muiyilu.

11 “Abitungu nufule Yehowa Efile Mukulu eenu na kunemeka mafuku oso bitungo bienu kuadi, kukookiela miiya, mayi a kulonda na bitshibilo. 2 Anuuku’shi lelo nesamba nenu, ta nesamba na bana benu bash’abauku na bashi bamone dinyoka dia Yehowa Efile Mukulu eenu, bukata buaye, eyasa diaye di bukome, na mboko yaye yolole. 3 Ta mbamone bitunduilo sunga mianda ibaadi mukite mu Ejipitu pabitale Faraone nfumu a bena Ejipitu n’eumbo diaye dioso dishima; 4 sunga bibaadi mukite biluilo bia mu Ejipitu, nfualasa na matempu bia Faraone, bibaabadi babuikile kui Kalunga Kamonga pabaabadi abenulondo, Yehowa baadi muibabutule musango umune bua loso. 5 Ta mbamone bibaadi muinukitshine mu kabaaka mpa na pabanufikile mu ino mbalo, 6 sunga bibaadi mukite Datane na Abirame bana ba Eliabe muana a Rubene, pabaadi nsenga ibuulukie yebamina, pamune na ba mu nshibo muabo na tushibo tuabo tua mapema, na bipangua bioso bibaadi abibalondo, mu meso a bena Isalele boso. 7 Meso eenu abaadi emuene mianda yoso ikata ibaadi Yehowa mukite.

8 “Abitungu nulame miiya yoso yanenupa lelo uno, bua’shi nuikale na bukome na nuate eumbo di abuaa bushiya bua Yordane, 9 Na bua’shi nulaale mafuku e bungi muiumbo dibaadi Yehowa muitshipe bua kupa ba nkambua benu, na bekulu babo, eumbo adialaala mabeele na buuki.

10 “Eumbo dianukaata ta di bu Ejipitu, muamua mubanutukile, mubanudi anukunu ntete na anumiamina mema na luao, bu biabamaminaa ku kibunda kikune bisakisaki. 11 Kadi eumbo ditanudi pa kuata nyi eumbo di miengie na mabanda. Bantu be muanka abatomaa mema a mpeshi aafiki muiyilu; 12 Nyi eumbo di’abalamaa kui Yehowa Efile Mukulu oobe. Meso a Yehowa Efile Mukulu oobe aekalaa pa diadia eumbo mafuku oso, kubanga ku mbangilo na ku nfudiilo kua kipua.

13 “Su nuakookiela miiya yande yanenupa lelo uno, na su nuafula Yehowa Efile Mukulu eenu, su nuamufubila n’eshimba dienu dioso na anyima eenu oso, 14 nakanokiesha mpeshi muiumbo dienu mu kipungo kiaye, mpeshi mbedi na mpeshi a nfudiilo, na anukabungu ntete yenu na nfinyo yenu ipia na muimu wenu. 15 Na nakamenesha lubishi mu bipia bienu bua bimunuanga bienu, anukadi na anukekuta. 16 Nudimukie bua’shi mashimba eenu taapambukanga na nuafika mu kulanguila bangi b’efile na kuibakunamina. 17 Bisumanga nsungu ya Yehowa ayikenutembela nka bu kaalo, na akafungu eyilu bua’shi mpeshi tanokanga na nsenga tayitushanga bintu biayo, bua’shi nushimine bukidibukidi muiumbo di buwa di’abenupa kui Yehowa.

18 “Abitungu nutueshe ano mayi ande mu mashimba eenu, na mu binangu bienu, na kuianya bu kitentekiesho ku maasa eenu, na bu lubango mu mpala yenu. 19 Nuialongieshe bana benu, nuibalungule anka panudi bashale ku mashibo, p’anutambuka muishinda, p’anulaala na p’anubuuku. 20 Abitungu nuiafunde ku ntempa ya biibi bia mashibo eenu na ku biibi bia lupata, 21 bua’shi anue na bana benu nukite mafuku e bungi muiumbo dibaadi Yehowa muitshipe bua kupa ba nkambua benu munda mua mafuku oso aekala eyilu kunundu kua nsenga.

22 “Su nubalama kalolo ino miiya yoso yanenupa na nubeyitumikila, p’anue kufula Yehowa Efile Mukulu eenu, su anulondo mashinda aaye oso, na su anulamata kuadi, 23 Yehowa akabingi bino bisamba bioso kumpala kuenu, na anukabingi bisamba bikata na bi na bantu be bungi kuinukila. 24 Mu mbalo yoso ayikashina ngua yenu ayikekala yenu, kubanga ku kabaaka mpa na ku Lebanone, kubanga ku Muela wa Efrate mpa na ku kalunga ka kupona nguba nyi akuikala mikalo yenu. 25 Takui muntu su ngumune akenukambila. Yehowa Efile Mukulu eenu, akapalakasha moo na kutshina pa muanda wenu muiumbo dioso di’anukashina, nka bu bibaadi muinulee.

26 “Talayi, lelo uno natuulu kumpala kuenu muabi na mulua: 27 Anukedibua muabi su nubakokiela miiya ya Yehowa Efile Mukulu eenu yanenupa lelo uno, 28 Anukedibua mulua su nubapele kukookiela miiya ya Yehowa Efile Mukulu eenu na su nubakatuka muishinda dianenutumina eyi lelo uno bua kulonda, na nualonda b’efile banush’anuuku.

29 “P’anukatuele muiumbo di’abenupa kui Yehowa Efile Mukulu eenu, abitungu nuelele bantu miabi ku muengie wa Garizime na kuelela bantu milua ku muengie wa Ebale. 30 Yaaya miengie tayi abuaa bushiya bua Yordane dia kupona nguba, muiumbo dia bena Kanaana bashale mu Araba, ditalene na Gilegale, ku lupese lua mitshi ikata ya Moree? 31 Muanda anukasabuka Yordane na kutuela muiumbo diabenupa kui Yehowa Efile Mukulu eenu. P’anuidiata na p’anuimushala, 32 abitungu nudimukie bua kukookiela mayi a kulonda oso na miiya yantulu kumpala kuenu lelo uno.

12 “Ano nyi mayi a kulonda na bitshibilo bi’anukakookiela mafuku oso anukekala na muwa, muiumbo di’abenupa kui Yehowa Efile Mukulu a ba nkambua benu buadidia kuikala bu dienu. 2 Anukabumbula ma mbalo oso abaadi miilo y’anukabingi ayilanguila b’efile babo, biabikala ku miengie ila sunga ku miengie ipeela, sunga muushi mua mutshi oso utshimpukie. 3 Abitungu nubumbule bilambuilo biabo, nutshokole misungu yabo ya kishila, nushiikie mitshi yabo ya kishila* mu kaalo, na kutshiba ma nkishi a b’efile babo. Anukashimi mu yaaya mbalo mpa na mashina a b’efile babo.

4 “Ta nui balombene kulanguila Yehowa Efile Mukulu eenu mu wawa mushindo. 5 Anka, abitungu nuende nukalanguile Yehowa Efile Mukulu eenu mu mbalo y’asangula bua kutuula eshina diaye, na mbalo yaye ya kushala munkatshi mua bisamba bienu bioso. 6 Kuakua nyi ku’anukende na milambu yenu ya kushiika kaalo, ingi milambu yenu, bi’ekumi bienu, bia buntu bia kuiyasa dienu, milambu yenu ya mutshipo, milambu ya mu kukumiina kuenu, na nyema ya kumpala ya ku nyema yenu ikata na ipeela. 7 Anue na ba mu nshibo yenu abitungu nudiile kuakua, kumpala kua Yehowa Efile Mukulu eenu na kusanka bua midimo yenu yoso, muanda Yehowa Efile Mukulu eenu mmuinuelele miabi.

8 “Ta nui balombene kukita mianda bu biatuiyikitshi lelo mu ino mbalo, mui muntu oso akitshi bi’amono bu bi buwa ku meso kuaye, 9 muanda tanuabandile kufika mu mbalo ya kuikisha na mu bupianyi bu’abenupa kui Yehowa Efile Mukulu eenu. 10 P’anukasabuka Yordane na kushala muiumbo di’abenupa kui Yehowa Efile Mukulu eenu bua’shi dikale dienu, akenukaluila binyibinyi kui beshikuanyi benu boso benuifunyishe na anukashala ku matui talalaa. 11 Anukende na bintu bioso bianenutumina eyi lelo uno ku mbalo y’abakasangula kui Yehowa Efile Mukulu eenu bua kutuula eshina diaye, milambu ya kushiika kaalo, ingi milambu, bi’ekumi bienu, kia buntu kia kuiyasa dienu, na mulambu oso wa mutshipo w’anukakitshi kui Yehowa. 12 Anukasanka kumpala kua Yehowa Efile Mukulu eenu, anue na bana benu balume, bana benu bakashi, ba mpika benu balume na bakashi, na bena Levi bashale mu bibundi* bienu, muanda ta be na kiabo kipindi sunga bupianyi munkatshi muenu. 13 Abitungu nudimukie bua’shi tanutushanga milambu yenu ya kushiika kaalo mu mbalo yoso yaaya y’anumono. 14 Abitungu nutushe milambu yenu ya kushiika nka penda mu mbalo y’abasangula kui Yehowa mu nsenga ya ku kimune kia ku bisamba bienu, na kuakua nyi ku’anukakitshina mianda yoso yanenulungula.

15 “Kadi nsaa yoso yanudi na lukalo na muita, nui balombene kuipaa nyema nuadia muita mu bibundi bienu bioso, muyile muabi awikala Yehowa Efile Mukulu eenu muinuelele. Muntu e butete na muntu shi butete mmulombene kuiudia, nka bu bianudia kudia lukondoolo sunga ntengu. 16 Kadi ta nui balombene kudia mase; anuiapongoola mu nsenga nka bu mema. 17 Mu bibundi bienu, ta nui na matalua a kudia ki’ekumi kia ntete yenu, kia nfinyo yenu ipia, kia muimu wenu, bana mbedi ba nyema yenu ikata na ipeela, milambu yenu ya mitshipo y’anukitshi, milambu ya mu kukumiina kuenu, sunga kia buntu kia kuiyasa dienu. 18 Anukadi bino bintu kumpala kua Yehowa Efile Mukulu eenu mu mbalo y’abakasangula kui Yehowa Efile Mukulu eenu, anue na bana benu balume, bana benu bakashi, na ba mpika benu balume na bakashi na bena Levi bashale mu bibundi bienu; na anukasanka kumpala kua Yehowa Efile Mukulu eenu bua midimo yenu yoso. 19 Mu mafuku oso anushala muiumbo dienu, nudimukie bua’shi tanulenguulanga bena Levi.

20 “Apakatamisha Yehowa Efile Mukulu oobe kipindi kia nsenga yobe nka bu biadi mukulee, na p’okamba’shi: ‘Nakiebe kudia muita,’ muanda we na lukalo lua kudia muita, paapa we mulombene kuiudia nsaa yoso y’okumiina. 21 Su mbalo y’abasangula kui Yehowa Efile Mukulu oobe bua kutuula eshina diaye i kula na podi mushale, biabia we mulombene kuipaa nyema a ku nyema yobe ikata sunga nyema yobe ipeela yabadi bakupe kui Yehowa, nka bu biandi mukulungule, na omudie mu bibundi bienu nsaa yoso y’okumiina. 22 We kumudia nka bu biodia kudia lukondoolo na ntengu; muntu e butete na muntu shi butete mmulombene kuiudia. 23 Anka ikala na kitshibilo ki bukopo kia kupela kudia mase, muanda mase mmuwa,* tue mulombene kudia muwa na muita. 24 Tue mulombene kudia mase. Okeapongoola mu nsenga nka bu mema. 25 Tue mulombene kuiadia bua’shi mianda yoso ikuyile kalolo obe na bana bobe, muanda okuete kukita bi buwa ku meso kua Yehowa. 26 Puende ku mbalo yabadi basangule kui Yehowa Efile Mukulu oobe, okaata nka penda bintu biobe bia kishila na milambu yobe ya mitshipo. 27 Kuakua nyi k’okalambula milambu yobe ya kushiika kaalo, kuamba’shi muita mpa na mase, ku kilambuilo kia Yehowa Efile Mukulu oobe, na abitungu bapongoole mase a milambu yobe ku kilambuilo kia Yehowa Efile Mukulu oobe, anka muita we mulombene kuiudia.

28 “Odimukie bua kukookiela ano mayi oso ankulungula, bua’shi mianda ikuyile kalolo obe na bana bobe mafuku oso, muanda okuete kukita bi buwa na bilulame ku meso kua Yehowa Efile Mukulu oobe.

29 “Apakabutula Yehowa Efile Mukulu oobe bisamba bi’okabingi, na p’oshala muiumbo diabo, 30 odimukie bua’shi tokuatshibuanga mu muteo kunyima kua biabia bisamba kubutudibua kumpala kobe. Tuepushanga pabitale b’efile babo’shi: ‘Bino bisamba bibaadi abilanguila b’efile babio naminyi? Ami namu nakiebe kukita nka biabia.’ 31 Tue mulombene kulanguila Yehowa Efile Mukulu oobe mu wawa mushindo, muanda ino miilo ayikitshinaa b’efile bayo mianda yoso ikile bubi yabadi bashikue kui Yehowa, ayishiiki mpa na bana babo balume na bakashi mu kaalo bua b’efile babo. 32 Kioso kiankutumina eyi lelo uno abitungu w’ekitumikile. Tue mulombene kuikutenteka kintu sunga kuikukaasha kintu.

13 “Su munkatshi muenu muatuuka mutemuki sunga muntu akula mianda ayifiki kumpala ku bukuashi bua bilotua, na enupa kitunduilo sunga aakula muanda aufiki kumpala, 2 na su kiakia kitunduilo sunga wawa muanda w’akuile aufiki kumpala biakumbana, na amba’shi: ‘Tulonde bangi b’efile, b’efile banush’anuuku na tuibafubile,’ 3 ta nui balombene kuteemesha mayi a yawa mutemuki sunga a yawa muntu alotaa, muanda Yehowa Efile Mukulu eenu enutompo bua kuuka su nuibafule Yehowa Efile Mukulu eenu n’eshimba dienu dioso na anyima eenu oso. 4 Yehowa Efile Mukulu eenu nyi anukalondo, aye nyi anukatshinyi, miiya yaye nyi y’anukakookiela, eyi diaye nyi di’anukateemesha; aye nyi anukafubila na anukamulamata nka penda aye. 5 Anka yawa mutemuki sunga yawa muntu alotaa abitungu numuipee, muanda batakula bantu buabadia kutombokiela Yehowa Efile Mukulu eenu baadi muinutushe mu Ejipitu, na baadi muinukuule mu nshibo ya bupika. Yawa muntu akiebe kuinukaasha muishinda dibaadi Yehowa Efile Mukulu eenu muinutumine eyi bua kuitambukila. Abitungu nukaashe kintu ki bubi munkatshi muenu.

6 “Su mukuenu mulume muana a nyinobe, sunga muana oobe mulume sunga muana oobe mukashi, sunga mukashi oobe a kifulo, sunga kuuku oobe a p’eshimba akieba kukupambusha mu bufiefie amba’shi: ‘Tuende tukalanguile bangi b’efile,’ b’efile bosh’ouku sunga bashibaadi ba nkambua bobe baukie, 7 munkatshi mua b’efile ba miilo inuifunyishe, biabekala kula sunga pepi, kukatukila ku lupese lumune lua eumbo dienu mpa na ku lungi lupese, 8 tue mulombene kukookiela biabia bi’akulungula, sunga kumuteemesha, na tue mulombene kumufuila lusa, kumulesha kalolo sunga kumukaluila; 9 kadi abitungu omuipee. Eyasa diobe abitungu dikale dia kumpala bua kumukuma bua kumuipaa, na maasa a bangi bantu aalondo kunyima. 10 Abitungu omuipee pa kumuasa mabue, muanda bakimbi bua nkulubisha kui Yehowa Efile Mukulu oobe, baadi mukutushe mu Ejipitu mu nshibo ya bupika. 11 Biabia bena Isalele boso abakapusha wawa muanda na abakekala na moo, na takui muntu su ngumune akakitshi’nyi muanda wi bubi bui biabia munkatshi muenu.

12 “Su nuapusha mu kimune kia ku bibundi abikenupa Yehowa Efile Mukulu eenu abamba’shi: 13 ‘Bantu bashi kapu mbatuukie munkatshi muenu bua kupambusha bantu ba mu kibundi kiabo pa kuibalungula’shi: “Tuendeyi tukalanguile bangi b’efile,” b’efile banush’abauku,’ 14 abitungu nutaluule wawa muanda, nukimbe bia kuiuka kalolo na nuipushe bantu; su babashinkamisha binyibinyi’shi wawa muanda wi bubi ngukitshikie munkatshi muenu, 15 paapa abitungu’shi nuipee bantu ba mu kiakia kibundi na lupete lua ngoshi. Nubutule kiakia kibundi na bintu bioso bi muanka, mpa na nyema yabo na lupete lua ngoshi. 16 Kunyima anukabungu bintu bioso bipaulue bia mu kiakia kibundi pa mbalo ya bantu boso na nushiikie kibundi kaalo, na bintu bipaulue mu kiakia kibundi abiikala bu mulambu ushima kui Yehowa Efile Mukulu eenu. Kiakia kibundi akikashala bu kikulu* bua loso. Ta mbalombene kuikibakuula dingi nya. 17 Maasa eenu ta ngalombene kuata kintu su nkimune kia ku biabia bi’abatuulu ku lupese bua kubutula, bua’shi Yehowa akatushe nsungu yaye i bukopo na enupushe lusa na kuinulesha kalolo na kuinufuimisha, anka bu bibaadi mulee ba nkambua benu. 18 Muanda abitungu nukookiele Yehowa Efile Mukulu eenu pa kulama miiya yaye yoso yanenupa lelo uno, paapa anukitshi mianda i buwa ku meso kua Yehowa Efile Mukulu eenu.

14 “Nui bana ba Yehowa Efile Mukulu eenu. Biabia tanuitapanga pa mbidi sunga kukuula bikienkienyi* bienu bua muntu mufue. 2 Muanda nui muilo wa kishila kui Yehowa Efile Mukulu eenu, na Yehowa Efile Mukulu eenu mmuinusangule buanudia kufika muilo waye, muilo waye wi pabuao munkatshi mua miilo yoso i pa nsenga.

3 “Ta nui balombene kudia kintu su nkimune ki butete. 4 Tala nyema yanudia kudia: ngombe, mukooko, mbushi, 5 ntengu, lukondoolo, etodia, mbushi a mu kisuku, ngulungu, mukooko wa mu kisuku na mukooko wa ku miengie. 6 Nui balombene kudia nyema oso e na mikona itshibuule pabidi na alushaa mukanua bintu biadi mupue kumina bua kuibisankunya dingi. 7 Kadi ta nui balombene kudia ino nyema ayilondo ayalushaa mukanua bintu biayidi ipue kumina bua kuibisankunya dingi sunga i na mikona itshibuule: kamelo, kalulu na nseshi, muanda ayalushaa mukanua bintu biayidi ipue kumina bua kuibisankunya dingi kadi tayi na mikona itshibuule. I butete kuanudi. 8 Sunga ngulube, muanda e na mikona itshibuule kadi t’alushaa bintu biadi mupue kumina mukanua bua kuibisankunya dingi. E butete kuanudi. Ta nui balombene kudia muita wa yaaya nyema sunga kukuma bitanda biayo.

9 “Ku bintu bioso bi mu mema, bianudi balombene kudia mbino: Biabia bioso bi na lusele lua mmongo na mamba, nui kuibidia. 10 Kadi ta nui balombene kudia biabia bioso bishi na lusele lua mmongo na mamba. Bi butete kuanudi.

11 “Nui balombene kudia konyi koso kashi butete. 12 Kadi ta nui balombene kudia bino bionyi abilondo: mumba, eminyi, n’eminyi difiita. 13 kabemba kamonga, kabemba kafiita, mishindo yoso ya tubemba, 14 manganga a mishindo yoso, 15 mbushi-kionyi,* kipungulu, konyi ka muwete, mishindo yoso ya bibemba-bemba, 16 kapulukutui, efuifui, ebata dia mu mema, 17 kionyi kia pelika, eminyi, kio, 18 kiabula, mishindo yoso ya tulama ngombe, namalambo na mudima. 19 Tu bipangua toso tui na mapushi atutambukaa mu bisaka, tui butete kuanudi. Ta ntulombene kudibua nya. 20 Nui balombene kudia kipangua kioso akipapamaa kishi butete.

21 “Ta nui balombene kudia nyema anudi bapete mufue. Nui kumupa muenyi mushale mu bibundi bienu, na mmulombene kumudia, sunga kumuudisha muenyi. Muanda nui muilo wa kishila kui Yehowa Efile Mukulu eenu.

“Ta nui balombene kuteekiela muana a mbushi mu mabeele a nyinaye.

22 “Abitungu otuushe ki’ekumi kia bintu bioso bioumbula muifuba ku kipua kioso. 23 Kadi ki’ekumi kia ntete yobe, kia nfinyo yobe ipia, kia muimu oobe, na bana mbedi ba ku nyema yobe ikata na nyema yobe ipeela, okebidiila kumpala kua Yehowa Efile Mukulu oobe mu mbalo y’akasangula bua kutuula eshina diaye, bua’shi olongie bia kutshiina Yehowa Efile Mukulu oobe mafuku oso.

24 “Kadi su eshinda ndikile bula na tue mulombene kutuala ki’ekumi ku mbalo yabadi basangule kui Yehowa Efile Mukulu oobe bua kutuula eshina diaye, bu bikale’shi yaaya mbalo i kula na kodi (muanda Yehowa Efile Mukulu oobe akakuelela miabi), 25 paapa we mulombene kuudisha ki’ekumi kiobe na kuata aa makuta nkuenda nao ku mbalo y’abasangula kui Yehowa Efile Mukulu oobe. 26 Na aa makuta we kuula kintu kioso ki’okumiina, ngombe, mukooko, mbushi, nfinyo, na angi maalua aakoluanaa, na kingi kintu kioso akikusankisha; w’ebidiila kuakua kumpala kua Yehowa Efile Mukulu oobe, na kusanka obe na kifuko kiobe. 27 Tanulenguulanga bena Levi be mu bibundi bienu, muanda ta be na kiabo kipindi sunga bupianyi munkatshi muenu.

28 “Ku nfudiilo kua bipua bisatu bioso, abitungu nufikie na ki’ekumi kioso kia bintu bienu bia kiakia kipua na kuibituula munkatshi mua bibundi bienu. 29 Paapa, muina Levi shi na kiaye kipindi sunga bupianyi munkatshi muenu, muntu muenyi, muana mufuishe nshaye,* na mukashi kilele be mu bibundi bienu abakafiki badie bayikute, bua’shi Yehowa Efile Mukulu eenu enuelele miabi mu bioso bi’anukitshi.

15 “Ku nfudiilo kua bipua musambobidi bioso, anukalekieela bantu mabasa aabo. 2 Kuinyi kuakua kulekieela ku’abakakitshi, akukitshika bino: Muntu oso abadi baate ebasa akalekieela muinaye diadia ebasa diadi muate. T’akafutshisha muinaye sunga mukuabo, muanda abakaukisha kulekieela mabasa bua Yehowa. 3 We mulombene kukienda ebasa diobe kui muntu muenyi, anka mukuenu we mulombene kumulekieela ebasa. 4 Kadi muntu su ngumune a munkatshi muenu ta mulombene kufika mulanda, muanda Yehowa akenuelela miabi muiumbo adikenupa Yehowa Efile Mukulu eenu bu bupianyi. 5 Bino abikakitshika nka su bokookieela eyi dia Yehowa Efile Mukulu oobe na kulama kalolo miiya yaye yoso yankupa lelo uno. 6 Muanda Yehowa Efile Mukulu oobe akakuelela miabi nka bu biadi mukulee, na okeyapusha bisamba bi bungi bintu. Anka obe t’okeapula, okakambila miilo i bungi, kadi abo t’abakakukambila.

7 “Su umune a ku bakuenu afika mulanda mu kimune kia ku bibundi bia muiumbo diabenupa kui Yehowa Efile Mukulu eenu, topapishanga eshimba diobe sunga kuikala na minue i bukopo kui mukuenu mulanda. 8 Muanda abitungu’shi omufunguile eyasa diobe na kalolo koso na omuiyapushe bioso biadi nabio lukalo sunga bioso biadi mukutue. 9 Dimuka tala wekala na bino binangu bi bubi muishimba diobe pa kuamba’shi: ‘Kipua kia musambobidi, kipua kia kulekieela bantu mabasa takidi pepi,’ na okutua kulesha mukuenu mulanda kalolo na kumupa kintu. Su edila kui Yehowa pa muanda oobe, wekala bu bakitshi muluisho. 10 Abitungu omupe bintu na kalolo koso, na tomupanga na mashimba abidi, muanda p’okitshi biabia Yehowa Efile Mukulu oobe akakuelela miabi mu bioso bi’okitshi. 11 Muanda akuikala nka balanda muiumbo. Nyi buakinyi nakulungula’shi, ‘Abitungu ofungule eyasa diobe na kalolo koso kui mukuenu akiengie na mulanda muiumbo dienu.’

12 “Su mbakuudishe umune a ku bakuenu muina Ebelu mulume sunga mukashi, na mmukufubile munda mua bipua bisamombo, mu kipua kia musambobodi abitungu omuposole. 13 Na p’omuposola tomulekieelanga enda ku maasa bisumanga. 14 Okamupa bintu bia ku nyema yobe ipeela na kalolo koso, bintu bia ku mbalo ya kufunta ntete, na bia ku kikamino kia muimu na kia nfinyo. Bintu bi’okamupa abikala muyile muabi w’abekala bakuelele kui Yehowa Efile Mukulu oobe. 15 Tentekiesha’shi bodi mpika muiumbo dia Ejipitu, na’shi Yehowa Efile Mukulu oobe baadi mukukuule. Nyi buakinyi nakutumina eyi bua kukita bino lelo uno.

16 “Kadi su akulungula’shi: ‘Tankatuka kobe nya!’ Muanda mmukufule obe na ba mu nshibo mobe, na baadi na muloo pabaadi nobe, 17 paapa okaata mutubulo,* osayikiile etui diaye ku kiibi omutubule, na akafiki mpika oobe bua loso. Abitungu’nyi okite nka biabia bua mpika oobe mukashi. 18 Tomonanga bu muanda wi bukopo su opoosola mpika buadia kuenda, muanda bipua bisamombo biadi mukufubile mbikile efuto di’abapaa muina mufubo misango ibidi, na Yehowa Efile Mukulu oobe mmukuelele miabi mu bioso bikeele bikitshikie.

19 “Abitungu oyikashe muana mbedi a mu nyema yobe yoso ikata na ipeela a kishila bua Yehowa Efile Mukulu oobe. Tue mulombene kukita mudimo su ngupeela na muana mbedi a mu nyema yobe ikata sunga kukuula buaa bua muana mbedi a mu nyema yobe ipeela. 20 Anukamudi obe na ba mu nshibo mobe kumpala kua Yehowa Efile Mukulu oobe ku kipua kioso mu mbalo y’abakasangula kui Yehowa. 21 Kadi su umune a kuayidi e na kilema, asumpikita, mmutunyikie eyiso sunga’shi e na kingi kilema kikata, t’abitungu omuikashe a kishila bua Yehowa Efile Mukulu oobe nya. 22 Paapa anukamudiila mu bibundi bienu, pamune na bantu bashi butete na be butete, nka bu bianudi balombene kudia lukondoolo sunga ntengu. 23 Kadi ta nui balombene kudia mase; abitungu nuiapongoole mu nsenga nka bu mema.

16 “Ikala otentekiesha mueshi wa Abibe,* na kukita Pasaka bua Yehowa Efile Mukulu oobe, muanda mu mueshi wa Abibe, nyi mubaadi Yehowa Efile Mukulu oobe mukutuushe mu Ejipitu bufuku. 2 Na abitungu olambule Yehowa Efile Mukulu oobe mulambu wa Pasaka, watshibue mu nyema yobe ikata na ipeela, pa mbalo y’abakasangula kui Yehowa bua kutuula eshina diaye. 3 Tue mulombene kudia kantu su nkamune ke na kitatusho pamune na wawa mulambu, okadi mikate ishi kitatusho munda mua mafuku musambobidi, kuamba’shi mukate wa malua, muanda bodi mutuukie mu nsenga ya Ejipitu bukidibukidi. Ikala okitshi bino bua kutentekiesha efuku dibodi mutuukie mu nsenga ya Ejipitu mafuku oso wekala na muwa. 4 Tanuikalanga na kitatusho muiumbo dienu dioso munda mua mafuku musambobidi, na t’abitungu ka muita su nkapeela ka ku muita wekalanga mulambule ku kiolua muifuku dia kumpala, kashale bufuku bushima mpa na ku namashika. 5 Tu’ekala na matalua a kulambula mulambu wa Pasaka mu bibundi bioso bi’abakakupa kui Yehowa Efile Mukulu oobe. 6 Anka okeulambula mu mbalo y’abakasangula kui Yehowa Efile Mukulu oobe bua kutuula eshina diaye. Okalambula mulambu wa Pasaka ku kiolua pa kutuela kua nguba, muifuku* dibodi mutuukie mu Ejipitu. 7 Okeuteekie na kuiudiila pa mbalo isangule Yehowa Efile Mukulu oobe, na ku namashika okaluka ku tushibo tobe tua mapema. 8 Okadi mukate ushi kitatusho munda mua mafuku asamombo, na muifuku dia musambobidi akuikala kikongeno kia kishila bua Yehowa Efile Mukulu oobe. Tue mulombene kukita mudimo su ngumune.

9 “Okabadika mbingo musambobidi. Okeyibadika kubanga kuifuku dia kumpala di’abakakisha lupete ku ntete ya mu mafuba ikii imane. 10 Akupu okakitshi Musangelo wa Mbingo bua Yehowa Efile Mukulu oobe, na mulambu wa mu kukumiina kobe wa ku maasa kobe, okatuusha muyile miabi yabadi bakuelele kui Yehowa Efile Mukulu oobe. 11 Okasanka kumpala kua Yehowa Efile Mukulu oobe mu mbalo y’abakasangula kui Yehowa Efile Mukulu oobe bua kutuula eshina diaye, obe na muana oobe mulume, na muana oobe mukashi, mpika oobe mulume na mpika oobe mukashi, muina Levi mushale mu bibundi bienu, muenyi, muana mufuishe nshaye,* na mukashi kilele e munkatshi muenu. 12 Tentekiesha’shi bodi mpika mu Ejipitu, nyi buakinyi abitungu onemekie na kufubila ino miiya.

13 “Okakitshi Musangelo wa Bitanda* munda mua mafuku musambobidi p’okabungu bintu bia ku mbalo yobe ya kufuntshila ntete na bia ku kiengielo kiobe kia muimu na nfinyo. 14 Okasanka ku musangelo oobe, obe na muana oobe mulume, muana oobe mukashi, mpika oobe mulume, mpika oobe mukashi, muina Levi, muenyi, muana mufuishe nshaye, na mukashi kilele be munkatshi mua bibundi bienu. 15 Okakitshi musangelo munda mua mafuku musambobidi bua Yehowa Efile Mukulu oobe mu mbalo y’abakasangula kui Yehowa, muanda Yehowa Efile Mukulu oobe akelela bintu biobe bioso miabi na bioso biokitshi, na okekala na muloo wi bungi.

16 “Misango isatu ku kipua, bana balume boso abakamueneka kumpala kua Yehowa Efile Mukulu oobe ku mbalo y’akasangula: Bua Musangelo wa mikate ishi kitatusho, Musangelo wa Mbingo, na Musangelo wa Bitanda, na muntu su ngumune a kuabadi ta mulombene kumueneka kumpala kua Yehowa ku maasa bisumanga. 17 Kiabuntu ki’abakatuala kui muntu oso akikala muyile miabi y’abakamuelela kui Yehowa Efile Mukulu oobe.

18 “Abitungu otuule ba nsushi na ba tupita bua bisamba bioso mu bibundi bioso biabakakupa kui Yehowa Efile Mukulu oobe, na abitungu basambishe muilo na kululama. 19 Tue mulombene kuluisha bia binyibinyi, na toleshanga ntondo, sunga kukumiina’shi bakutshibe milomo, muanda kutshibibua milomo akubuikila meso a sha binangu na kuluisha mayi a muntu mululame. 20 Abitungu olonde kululama, nka penda kululama, bua’shi otungunukie na kushala na muwa, bua kupiana nsenga y’abakakupa kui Yehowa Efile Mukulu oobe.

21 “Tue mulombene kukuna mutshi su ngumune bua’shi wikale mutshi wa kishila pepi na kilambuilo ki’okitshina Yehowa Efile Mukulu oobe.

22 “Tue mulombene sunga nkuishimikila musungo wa kishila, muanda nyi nkintu ki’abadi bashikue kui Yehowa Efile Mukulu oobe.

17 “Tue mulombene kulambula Yehowa Efile Mukulu oobe ngombe sunga mukooko wi na kilema kampanda su nkimune, muanda abikala butete kui Yehowa Efile Mukulu oobe.

2 “Puandikisha’shi munkatshi muenu, mu kimune kia ku bibundi biabakupa kui Yehowa Efile Mukulu oobe, mui muana mulume sunga muana mukashi akitshi mianda i bubi ku meso kua Yehowa Efile Mukulu oobe na kuipaa kilombeno kiaye, 3 apambuka na kulanguila bangi b’efile, na kuibayinamina sunga kuinamina nguba, mueshi, sunga kiluilo kioso kia muiyilu, muanda wanshi mukulungule bua kukita. 4 P’abakulungula uno muanda, sunga nsaa yueupusha, paapa abitungu okimbuule uno muanda kalolo. Su bibatuuku’shi uno muanda wi butete ngukitshikie mu Isalele, 5 abitungu wende na yawa muana mulume sunga muana mukashi mukite wawa muanda wi bubi ku kiibi kia kibundi, na abitungu baase yawa muana mulume sunga muana mukashi mabue mpa na p’afuila. 6 Abakayipaa yawa muntu mukumbene lufu kukiila ku bu kamonyi bua bantu babidi sunga bantu basatu. Ta mbalombene kumuipaa penda na bukamonyi bua muntu umune. 7 Maasa a ba tumonyi nyi aekala a kumpala bua kubanga kumuipaa, akupu maasa a muilo oso aalondo. Abitungu okatushe kintu ki bubi munkatshi muenu.

8 “Su mu kimune kia ku bibundi bienu kuatuuka kilumbu ki bukopo kusambisha, biakikala kilumbu kitale kuponesha kua mase, bantu abefundena, bu ntomboshi, sunga ungi muanda wa kuikakena, abitungu w’ebuee wende ku mbalo ayikasangula Yehowa Efile Mukulu oobe. 9 Enda kui ba tshite muakuidi bena Levi na nsushi kuete kufuba mu aa mafuku, webalungule muanda oobe, abo abakakulungula kitshibilo. 10 Paapa abitungu okite mianda muyile kitshibilo ki’abakakulungula ku mbalo yabadi basangule kui Yehowa. Abitungu odimukie bua kukita bioso muyile biabadi bakulungule. 11 Abitungu okite mianda muyile muiya w’abakulesha na kitshibilo ki’abakulungula. Tokutuanga kulonda bi’abakulungula, p’obe kuikumba ku mboko ibalume sunga ku mboko ibakashi. 12 Muntu akitshi mianda na kuitatula pa kupela kuteemesha tshite muakuidi afubila Yehowa Efile Mukulu oobe, sunga apele kuteemesha nsushi, abitungu afue. Abitungu okatushe kintu ki bubi mu Isalele. 13 Paapa bantu boso abakapusha wawa muanda abakatshinyi, na t’abakakitshi dingi mianda na kuitatula nya.

14 “P’okatuele mu nsenga ayikupa Yehowa Efile Mukulu oobe, p’okeyata na kushala muanka, su wamba’shi’: ‘Netudile nfumu a kunkunkusha bu abikitaa bingi bisamba bioso binyifunyishe,’ 15 paapa abitungu otuule nfumu nka yawa abasangula kui Yehowa Efile Mukulu oobe. Abitungu osangule nfumu munkatshi mua bakuenu. We mukandikibue bua kutuula muenyi shi mukuenu bu nfumu. 16 Anka, t’abitungu’shi yawa nfumu ekimbile ma nfualasa e bungi sunga kualusha bantu mu Ejipitu bua nkakimba ma nfualasa e bungi, muanda Yehowa mmuinulungule’shi: ‘Tue mulombene dingi kualukila mu dino eshinda.’ 17 Na ta mulombene kuibakila bakashi be bungi, bua’shi eshimba diaye tadipambukanga; na ta mulombene kuikimbila arja na ôlo bikile bungi. 18 P’akashala mu nkuasa aye a bufumu, abitungu efundile mukanda watentula mu ino Miiya, watentula mu mukanda wabadi balame kui ba tshite muakuidi bena Levi.

19 “Akalama wawa mukanda, na abitungu eubadikie mafuku oso a muwa waye, bua’shi alongie bia kutshina Yehowa Efile Mukulu aaye na alame mayi oso a mu ino Miiya na ano mayi a kulonda pa kuiatumikila. 20 P’akitshi biabia t’ekaamisha kunundu kua bakuabo nya, na t’apambuka bua kuenda kula na muiya, biabikala ku mboko ibalume sunga ku mboko ibakashi, bua’shi ashale mafuku e bungi mu Isalele aye na bana baye.

18 “Ba tshite muakuidi bena Levi, kuamba’shi kisamba kishima kia bena Levi, t’abekala na kiabo kipindi sunga bupianyi pamune na Isalele. Abakadi milambu yabadi bashiikie mu kaalo bua Yehowa, ayo ikale bupianyi buaye. 2 Biabia t’abitungu bekale na bupianyi munkatshi mua bakuabo. Yehowa nyi muikale buabo bupianyi, nka bu biadi muibalungule.

3 “Biabia ba tshite muakuidi be na matalua a kupeta bino bintu kui muilo: muntu oso alambula mulambu, biabikala ngombe sunga mukooko, abitungu apee tshite muakuidi kioko kia mboko, mbanga, na kifu. 4 Okamupa dingi ntete yobe ya kumpala, nfinyo yobe ipia, muimu oobe, na buaa bua kumpala buabakuula ku nyema yobe ipeela. 5 Yehowa Efile Mukulu oobe mmusangule Levi na bana baye munkatshi mua bisamba bienu bioso bua’shi bekale abafubu muishina dia Yehowa nsaa yoso.

6 “Anka, su muina Levi bakatuka mu kimune kia ku bibundi bia bena Isalele muayikalanga mushale, na akieba kuenda ku mbalo yabadi basangule kui Yehowa,* 7 akafubu pa ino mbalo muishina dia Yehowa Efile Mukulu aaye anka bu bangi bakuabo bena Levi be kuakua, bemane kumpala kua Yehowa. 8 Akapete bia kudia bi bungi bui mumune na bia bakuabo, kukumbasha ku bintu bi’apete nsaa y’apaana bintu bia ba nkambua baye.

9 “P’okatuele muiumbo di’abakakupa kui Yehowa Efile Mukulu oobe, tue mulombene kuambula bikitshino bi butete bia yaaya miilo. 10 Ta mbalombene kupeta munkatshi muenu muntu su ngumune alambula muan’aye mulume sunga mukashi mu kaalo, muntu akitshi lubuko, muntu apaka maanga, muntu akimbi kuuka mianda ayifiki kumpala, ndoshi, 11 muntu aloo bangi, yawa epusha mianda kui muntu abukaa sunga kui muntu akula mianda ayifiki kumpala, sunga muntu epusha bafue mianda. 12 Muanda muntu oso akitshi yaaya mianda, mmuntu e bubi kui Yehowa, na Yehowa Efile Mukulu oobe abingi ino miilo kumpala kobe pa muanda wa yaaya mianda i bubi. 13 Abitungu’shi wekale kushi kalema kumpala kua Yehowa Efile Mukulu oobe.

14 “Muanda bino bisamba bi’okabingi bibaadi abiteemesha bantu abakitaa mianda ya malenganyi na ababuku, anka Yehowa Efile Mukulu oobe ta mukupe matalua a kukita kintu ki biabia su nkimune. 15 Yehowa Efile Mukulu eenu akenuibueshela mutemuki e bu’mi munkatshi mua bakuenu. Abitungu numuteemeshe. 16 Bino nyi bibodi mutekie Yehowa Efile Mukulu oobe ku Horebe muifuku dibaanudi bebungie, nsaa ibodi muakule’shi: ‘Tankumiina’nyi kuteemesha eyi dia Yehowa Efile Mukulu ande, sunga kumona kano kaalo kakata, bua’shi tala nafua.’ 17 Paapa Yehowa bandunguile’shi: ‘Biabia bibabamba bi buwa. 18 Munkatshi mua bakuabo nakebebueshela mutemuki e bu’be, na nakatuulu mayi ande mukanua muaye, akebalungula bioso biankamutumina eyi. 19 Eyendo, muntu oso sh’akateemesha mayi ande akaakula muishina diande nakamutshibila kiimu.

20 “‘Su mutemuki kampanda akula mianda na kuitatula muishina diande bianshi mumulungule buadia kuakula, sunga’shi akula muishina dia bangi b’efile, abitungu kuipaa yawa mutemuki. 21 Pangi we kuiyipusha muishimba diobe’shi: “Mbikunyi bi’atukauku’shi Yehowa ntamuakule dino eyi?” 22 Su mutemuki kampanda akula muishina dia Yehowa na eyi diaye ta ndilombane sunga kuikala dia binyibinyi, paapa Yehowa ta muakule diadia eyi nya. Yawa mutemuki mmuidiakule mu kuitatula kuaye. T’abitungu omutshine nya.’

19 “Apakabutula Yehowa Efile Mukulu oobe bisamba bi sh’eumbo di’abakakupa kui Yehowa Efile Mukulu oobe, na puebibingi bua kushala mu bibundi biabo na mu ma nshibo aabo, 2 okatuulu ku lupese bibundi bisatu munkatshi mua eumbo di’abakakupa kui Yehowa Efile Mukulu oobe. 3 Okatshibuula nsenga ya muiumbo di’abakakupa kui Yehowa Efile Mukulu oobe mu bipindi bisatu, na kulumbuula mashinda bua’shi muntu oso ayipayishena asuukile mu kimune kia ku biabia bibundi.

4 “Biabia tala bilombene kukitshika su muntu bayipayishena basuukila kuakua bua kupaasha muwa waye: Su ayipaa muinaye kushi pa bukopo na tekalanga mumushikue kumpala; 5 bu kileshesho, su benda mu mutamba na muinaye mu kutshiba nteete, na ebuesha kabengiele bua kutshiba mutshi, kadi kabengiele kapatuka ku mutuela kakupila muinaye na kamuipaa, abitungu yawa muntu bayipayishena asuukile mu kimune kia ku biabia bibundi buadia kushala na muwa. 6 Bisumanga muanda wa nsungu i bukopo, muntu oobola mmulombene kulonda yawa bayipayishena, amubanga na amuipaa, muanda eshinda dia ku kiakia kibundi kia kusuukila ndikile bula. Aku namu yawa bayipayishena ta mukumbene lufu, muanda tabaadi mushikue muinaye kumpala. 7 Nyi buakinyi nakulungula’shi tuula bibundi bisatu ku lupese.’

8 “Su Yehowa Efile Mukulu oobe atamisha kipindi kiobe kia nsenga bu bibaadi muitshipe kui ba nkambua bobe, na su akupa eumbo dioso dibaadi muitshipe bua kupa ba nkambua bobe 9 —anka su bokookiela na lulamato loso miiya yoso yankupa lelo uno, bua kufula Yehowa Efile Mukulu oobe na kutambukila mu mashinda aaye mafuku oso —paapa okakumbasha bingi bibundi bisatu ku bino bisatu. 10 Biabia t’abakasumbula mase a muntu shi musoole su ngumune muiumbo di’abakakupa kui Yehowa Efile Mukulu oobe bu bupianyi, na tuekala n’ebasa dia mase a muntu su ngumune.

11 “Kadi su muntu baadi mushikue muinaye na baadi amutengiela buadia kulua naye ngoshi, amutapa na yawa afua, su yawa muntu asuukila mu kimune kia ku bino bibundi, 12 abitungu bakulu ba mu kibundi kiaye bakamuitamishe kuakua kuadi na bamuele mu maasa a muntu oobola, abitungu yawa muntu afue. 13 Tue mulombene* kumufuila lusa, na abitungu okaashe mu Isalele kuitopeka kua muanda wa kusumbula mase a bantu bashi basoole muanda, bua’shi mianda yobe yoso yende kalolo.

14 “P’okapete bupianyi bobe muiumbo di’abakakupa kui Yehowa Efile Mukulu oobe bodia kuidiata, tue mulombene kutentula mikalo ya nsenga ya muinobe mu mbalo ibaadi ba nkambua beyishimikie.

15 “Ta nui balombene kuamba’shi muntu mmupiile kukiila ku bukamonyi bua muntu umune p’amufundu’shi mmukite kilema kampanda sunga muluisho. Anka abitungu muanda oso ushinkamishue ku bukuashi bua abiakula tumonyi tubidi sunga tumonyi tusatu. 16 Su kamonyi ke na binangu bi bubi kashinkamisha muanda wi bubi pabitale muntu kampanda na amufunda’shi bakitshi muluisho, 17 baba bantu babidi be na kilumbu abakemana kumpala kua Yehowa, kumpala kua ba tshite muakuidi na ba nsushi abekala abafubu mu aa mafuku. 18 Ba nsushi abakakimbuula kalolo bua kuuka wawa muanda, su muntu afundu muinaye nkamonyi ka madimi na bafundu mukuabo na mianda ya madimi, 19 abitungu omukitshine nka bu biabia biakiebanga kukitshina mukuabo. Abitungu okaashe mianda i bubi munkatshi muenu. 20 Baba abashala p’abapusha wawa muanda, moo awibakuata, na tabakitshi’nyi muanda wi bubi bui biabia munkatshi muenu. 21 Tue mulombene* kupusha lusa; abakatuusha muwa bua muwa, eyiso bu’eyiso, eyino bu’eyino, eyasa bu’eyasa na luao bua luao.

20 “Su buende mu kulua ngoshi na beshikuanyi bobe, na bomono’shi nfualasa yabo, matempu aabo a ngoshi, na basalayi babo mbenukile bungi, tuebatshinanga, muanda Yehowa Efile Mukulu oobe bakutushile mu nsenga ya Ejipitu e noobe. 2 Panukiebe kuenda ku ngoshi, tshite muakuidi akafiki esambe na muilo. 3 Akebalungula’shi: ‘Ô Isalele teemeshayi, tanukiebe kulua na beshikuanyi benu, mashimba eenu taabofulanga. Tanutshinanga na tanupampakananga sunga kusuusa pa muanda wabo, 4 muanda Yehowa Efile Mukulu eenu atambuka nenu bua kuinuluila ngoshi na beshikuanyi benu na kuinupaasha.’

5 “Bakunkushi namu abakalungula muilo’shi: “Nnanyi muibakie nshibo ipia na tabandile kuimutuela? Alukiile kuaye. Bisumanga mmulombene kufua mu ngoshi na ungi muntu akemutuele. 6 Nnanyi mukune nfinyo na tabangile kukuula tukuba tuayo? Alukiile ende kuaye ku nshibo. Bisumanga mmulombene kufua mu ngoshi na ungi muntu abanga kukuula tukuba tuayo. 7 Nnanyi muyile mukashi kadi tabandile kumuibakila? Alukiile ende kuaye ku nshibo. Bisumanga mmulombene kufua mu ngoshi na ungi muntu amuibakila.’ 8 Bakunkushi abakalungula dingi muilo’shi: ‘Nnanyi e na moo na nnanyi mubofule kuishimba? Abitungu alukiile kuaye, tala akabofusha mashimba a bakuabo nka bu’ye.’ 9 Apapu bakunkushi kuisamba na muilo, abakatuulu ba nfumu ba basalayi buabadia kukunkusha muilo.

10 “Su buesesela pepi na kibundi kampanda bua kulua nakio ngoshi, abitungu webalungule mianda yabadia kukita bua’shi kuikale butaale. 11 Su bakupa lualuulo lua butaale na bakukanguila biibi biakio, bantu boso ba mu kiakia kibundi abekala bu bobe bua kuibakitshisha midimo i bukopo, na abakakufubila. 12 Kadi su bapela kuipushena nobe mu butaale na bafika mu kulua nobe ngoshi, paapa abitungu wefunyishe kiakia kibundi, 13 na Yehowa Efile Mukulu oobe akapaana kiakia kibundi mu maasa mobe binyibinyi, abitungu oyipee bana balume boso be muanka na lupete lua ngoshi. 14 Anka bakashi, bana, nyema na bintu bioso bi mu kibundi, bipaulue bioso bi muanka, okebiata bu biobe, na okadi bintu bipaulue bia beshikuanyi bobe biabadi bakupe kui Yehowa Efile Mukulu oobe.

15 “Biabia nyi biokakitshi na bibundi bioso bi kula nobe bishi munkatshi mua bibundi bia bino bisamba bi pepi. 16 Anka mu bibundi bia bano bantu bi’abakupa kui Yehowa Efile Mukulu oobe bu bupianyi, tue mulombene kuleka muntu su ngumune na muwa.* 17 Kadi abitungu kuibibutula bioso: Bena Ite, bena Amore, bena Kanaana, bena Perizi, bena Ivii, na bena Yebuse, bu bibaadi Yehowa Efile Mukulu oobe mukutumine eyi; 18 paapa t’abakulongiesha bua kulonda bikitshino biabo bioso bi bubi bibaabadi abakitshi bua b’efile babo, na bakutakula mu kukitshina Yehowa Efile Mukulu oobe muluisho.

19 “Su w’efunyisha kibundi kampanda na wekikuata kunyima ku’anue kulua ngoshi munda mua mafuku e bungi, tue mulombene kuluisha mitshi ya muanka pa kuiyitshiba na kabengiele. We mulombene kudia bikuba biayo, kadi tokuiyitshiba nya. Muanda we kulua na mutshi wa mu kisuku bu bi’abaluiyaa na muntu su? 20 We kuluisha nka mutshi weuku’shi taudibuaa. We kuiutshiba na kuibaka nao bintu bia kuifunyisha nabio kibundi kiolu nakio ngoshi mpa na p’akipono.

21 “Su mu mapia a muiumbo di’abenupa kui Yehowa Efile Mukulu eenu buanudia kuidiata basangana muntu mufue na t’abauku mumuipee, 2 bakulu benu na ba nsushi abende bakapime bula bui pa mbalo i kitanda na bibundi bikiifunyishe. 3 Paapa bakulu ba mu kibundi ki pepi ngofu na kiakia kitanda abaata mu nyema ikata muana a ngombe mukashi abashabandile kufuba naye, yawa abashabandile kuanya kikumbo efuku su ndimune, 4 bakulu ba mu kiakia kibundi abakende na yawa muana a ngombe mukashi muibanda adialala mema diabashabandile kudima sunga kukuna bintu, na abakatshokola yawa muana a ngombe mukashi nshingo muamua muibanda.

5 “Akupu, ba tshite muakuidi bena Levi abakesesela pepi, muanda Yehowa Efile Mukulu oobe mmuibasangule bua kumufubila, bua kuelela bantu miabi muishina dia Yehowa. Abakebalungula bia kupua kilumbu kioso kitale bu ntomboshi. 6 Biabia, bakulu boso ba mu diadia eumbo di pepi na kitanda abakesuula mema ku maasa kunundu kua yawa ngombe mukashi abekeele batshokole nshingo muibanda, 7 na abakakula’shi: ‘Maasa eetu ta ngaponeshe ano mase, na meso eetu ta ngamone muntu muiaponeshe. 8 Ô Yehowa, tosemushanga muilo oobe wa Isalele uboodi mukuule bushito bua kino kilema, na totadilanga kuitopeka kua mase a muntu shi musoole muanda kushale munkatshi mua muilo oobe wa Isalele.’ Paapa buabua bushito bua kusumbula mase t’abukekala pa mbidi pabo. 9 Mu wawa mushindo okakatusha kuitopeka kua mase a muntu shi musoole munkatshi muenu, muanda okitshi biabia bi buwa ku meso kua Yehowa.

10 “Su wenda mu kulua ngoshi na beshikuanyi nobe na Yehowa Efile Mukulu oobe ebatshokola, ebatuula mu maasa mobe na webakuata bu ba mpika, 11 na su munkatshi mua bantu bodi mukuate wemumona mukashi e buwa akusankisha, na omona’shi wekumuata bua’shi ekale bu mukashi oobe, 12 we mulombene kuenda naye kobe. Abitungu akuule nyene yaye na atshibe ngala, 13 na akaashe bilamba bia bupika buaye, ashale mu nshibo mobe. Akadidi nshaye na nyinaye munda mua mueshi ushima, akupu we mulombene kumulala; okafiki bu mulume aaye n’aye namu akafiki bu mukashi oobe. 14 Kadi su ta mukusankishe, we kumulekiela ende koso kuakumina. Kadi tue mulombene kumupaana ku makuta sunga kumukiengiesha, muanda wekalanga mupue kumuisha milongo.

15 “Su muntu ekala na bakashi babidi na mmufule umune kukila ungi, kadi boso babidi mbamutandile bana balume, na muana mbedi nga yawa mukashi ashi mufule, 16 muifuku di’apa bana baye balume bupianyi, takakitshina muana a mukashi adi mufule mianda bu muana mbedi aku namu abitungu eyikitshine muana a mukashi ashi mufule, muikale muana mbedi. 17 Abitungu amone muana a yawa mukashi ashi mufule ngofu bu muana mbedi, na kumupa bintu misango ibidi bia ku bintu bioso biadi nabio, muanda yawa muana nyi mbangilo a bukome buaye bua kutanda. Aye nyi e na matalua a bu muana mbedi.

18 “Su muntu e na muana e na mutue wi bukopo na ntomboshi sh’akookiela nshaye sunga nyinaye, na babatompo kumulanga kadi apele kuibateemesha, 19 abitungu nshaye na nyinaye bamukuate na bende naye kui bakulu ku kiibi kia kibundi kiabo, 20 balungule bakulu ba mu kibundi kiabo’shi: ‘Uno muan’etu e na mutue wi bukopo na ntomboshi, na apele kuitukookiela. Mmuikale mudiafi na ntomi a malofu.’ 21 Paapa bantu boso ba mu kibundi kiabo abamuasa mabue mpa na p’afuila. Abitungu nukatushe mianda i bubi munkatshi muenu, na muina Isalele oso p’apusha biabia atshinyi.

22 “Su muntu akita muluisho ukumbene kibawe kia lufu na nuamuipaa nuamupudika ku mutshi, 23 t’abitungu’shi kitanda kiaye kishale bufuku bushima ku mutshi. Anka abitungu wetatshishe bua kumushiika nka diadia efuku, muanda muntu mupudikibue ku mutshi nkintu kiedibue mulua n’Efile Mukulu, biabia tue mulombene kuluisha eumbo di’abakupa kui Yehowa Efile Mukulu oobe bu bupianyi.

5 “Muana mukashi ta mulombene kufuala bilamba bia muana mulume, sunga muana mulume namu ta mulombene kufuala bilamba bia muana mukashi. Muanda muntu oso akitshi biabia, mmuntu e bubi kumpala kua Yehowa Efile Mukulu oobe.

6 “Su osangana esua dia tonyi muishinda di na bana ba tonyi sunga mayi, biabikala ku mutshi sunga mu nsenga, na nyina ekala mushalele tuana sunga mayi, tue mulombene kuata nyina mpa na tuana tuaye. 7 Abitungu’shi olekiele nyinato eende, kadi we mulombene kuata tuana. Okite bino bua’shi mianda yobe yoso yende kalolo na olale mafuku ebungi.

8 “Su oyibaka nshibo ipia, abitungu wefunyishe ka lupoopo kunundu* kua nshibo yobe, bua’shi tala okakila kifuko kiobe ebasa dia mase su muntu kampanda bekupono.

9 “Tue mulombene kukuna muifuba diobe dia nfinyo ntete ya mishindo ibidi. Bisumanga bintu bioso bi’oumbula pamune na tukuba tua nfinyo abakabinyengie bua kuibifubisha ku mbalo ya kishila.

10 “Tue mulombene kuanya mpunda na ngombe buayidia kudima pamune.

11 “Tue mulombene kufuala kilamba kiabadi bakite na buaa bua nyema na lin bisangie pamune.

12 “Okakitshi tukuba tua buanda tuembele ku nsongo inanka ya kilamba ki’ofuala.

13 “Su mulume ayibakila mukashi na amulala kadi kunyima amushikua, 14 na amufunda’shi e na muikeelo wi bubi, amuyishila nkumo i bubi pa kuamba’shi: ‘Ne muibakile uno mukashi, kadi panamulala ntshimumone kishinkamisho akilesha’shi ekalanga kamame,’ 15 nshaye na nyinaye na mukashi abakatuusha kui bakulu ku kiibi kia kibundi bishinkamisho abilesha’shi muana aabo ekeele kamame . 16 Abitungu nshaye na mukashi alungule bakulu’shi: ‘Ne mupe uno muntu muana ande mukashi bua’shi ekale bu mukashi aaye, anka bamushikua 17 na amufundu’shi muana ande e na muikeelo wi bubi pa kuamba’shi: “Ntshimupete bishinkamisho abilesha’shi muana oobe ekeele kamame.” Anka talayi bishinkamisho abilesha’shi muana ande ekeele kamame.’ Paapa abakafunguula kilamba kumpala kua bakulu ba kibundi. 18 Bakulu ba kibundi abakaata yawa muntu, bamunyokie. 19 Abakamufutshisha shekele* 100 ya arja na abeyipa nshaye na mukashi, muanda badimbiila kamame ka mu Isalele mianda, na atungunuka na kuikala bu mukashi aaye. Yawa muana mulume t’ekala na matalua a kuipaa naye bulunda mafuku oso ekala na muwa.

20 “Anka su mianda y’abamufundu nayo ngia binyibinyi, takui kishinkamisho su nkimune akilesha’shi yawa nsonguakashi baadi kamame, 21 abakamutusha ku kibelo kia nshibo ya nshaye, na bantu ba mu kibundi kiabo bamuase mabue mpa na p’afuila, muanda mmukite muanda wi buufu mu Isalele p’aye kukitshina lukiebanokiebano* mu nshibo ya nshaye. Abitungu okatushe mianda i bubi munkatshi muenu.

22 “Su basangana muana mulume mmulale mukashi abene, abitungu kuibepaa boso babidi, kuamba’shi yawa muana mulume mulale mukashi abene mpa na winyi yawa muana mukashi. Biabia abitungu okatushe mianda i bubi mu Isalele.

23 “Su nsonguakashi ki kamame mbamubangile kui muana mulume, na ungi muana mulume afumankana naye mu kibundi na amulala, 24 abitungu nuende nabo boso babidi ku kiibi kia kiakia kibundi na nuibaase mabue mpa na p’abafuila, nuase muana mukashi mabue muanda ta muele musaase mu kibundi, na muana mulume namu muanda bakuatshisha mukashi a muinaye buufu. Abitungu okatushe mianda i bubi munkatshi muenu.

25 “Kadi su muana mulume afumankana mu kisuku na muana mukashi abadi bapue kubangila, amukuata pa bukopo na amulala, abitungu kuipaa nka penda yawa muana mulume, 26 tokitanga nsonguakashi muanda su ngumune. Muanda nsonguakashi ta mukite muluisho ukumbene lufu. Uno muanda wi mumune na pe muntu atuuku muinaye ngoshi na amuipaa. 27 Muanda mmufumankane naye mu kisuku, na yawa muana mukashi abadi bapue kubangila eelele musaase kadi t’akuikalanga muntu a kumukaluila.

28 “Su muana mulume afumankana na nsonguakashi kamame abashabangiile, amukuata, amulala na bebasangana, 29 abitungu yawa muana mulume ape nshaye na nsonguakashi shekele 50 ya arja, na akafiki bu mukashi aaye. Bu bibamukuatshisha buufu, yawa muana mulume t’ekala na matalua a kuipaa naye bulunda mafuku oso ekala na muwa.

30 “Muana mulume su ngumune ta mulombene kuibakila mukashi a nshaye, bua’shi tala akuatshisha nshaye buufu.

23 “Muana mulume su ngumune abadi batuungule pa kusoosa mabudi aaye sunga abadi batshibe mbidi yaye ya bu mulume, ta mulombene kutuela mu kakongie ka Yehowa.

2 “Muana a mu ki ndumba su ngumune ta mulombene kutuela mu kakongie ka Yehowa. Muntu su ngumune a ku bana baye ta mulombene kutuela mu kakongie ka Yehowa, mpa na ku kipungo ki’ekumi.

3 “Muina Amone sunga muina Moabe ta mulombene kutuela mu kakongie ka Yehowa. Muntu su ngumune a ku bana babo ta mulombene kutuela mu kakongie ka Yehowa, mpa na ku kipungo ki’ekumi, 4 muanda tababaadi bafikie mu kuinukuasha na bia kudia na mema nsaa ibaanudi muishinda anukatuka mu Ejipitu, na babaadi bafute Balame muana a Beore a ku Petore a ku Mesopotami buadia kuinuela milua. 5 Kadi Yehowa Efile Mukulu oobe bapelele kuteemesha Balame. Anka Yehowa Efile Mukulu oobe baadi mushintuule milua yafika bu miabi bobe, muanda Yehowa Efile Mukulu oobe baadi mukufule. 6 Tue mulombene kukimba muloo wabo sunga kukimba buwa buabo mafuku oso w’ekala na muwa.

7 “Tue mulombene kushikua muina Edome, muanda mmukuenu.

“Tue mulombene kushikua muina Ejipitu, muanda bodi bu muenyi muiumbo diabo. 8 Bana babo ba mu kipungo kia kasatu mbalombene kutuela mu kakongie ka Yehowa.

9 “P’okalu ngoshi na beshikuanyi nobe, abitungu welame ku mianda yoso i bubi.* 10 Su muana mulume bafiki butete muanda wa bilume bimutuukie bufuku, abitungu atuukie paasha pa kishalelo na t’alukiilanga dingi muanka. 11 Apalombana kiolua abitungu etumpe mema, na mmulombene kualukiila dingi mu kishalelo pa kutuela kua nguba. 12 Abitungu kulumbuula mbalo ifuame paasha pa kishalelo bua kuendanga mu kusaasuka, na kuakua nyi kokekala wende. 13 Abitungu wekale na ka lukasu mu bintu biobe. Okekafubisha bua kubundula buina bua’shi osaasukie, na kunyima obuikile butshafu bobe. 14 Muanda Yehowa Efile Mukulu oobe akefunyu mu kishalelo kiobe bua nkupaasha, na bua kutuula beshikuanyi bobe mu maasa mobe, biabia abitungu kishalelo kiobe kikale kiselele, bua’shi tamonanga kintu ki butete muanka na aleka kukushindikila.

15 “Su mpika asuuka nfumuaye afika kobe, tue mulombene kumutuula mu maasa mua nfumuaye. 16 E kushala munkatshi muenu mu mbalo yoso yasangula ku kimune kia ku bibundi bienu, koso ku’akumiina. Tue mulombene kumukiengiesha.

17 “Nsonguakashi su ngumune muina Isalele ta mulombene kufika bu ndumba a ku ntempelo, na nsongualume su ngumune muina Isalele ta mulombene kufika bu ndumba a ku ntempelo. 18 Tue mulombene kufika na makuta abadi bafute ndumba mukashi sunga makuta abaadi bafute ndumba mulume mu nshibo ya Yehowa Efile Mukulu oobe bua kukumbasha nao mutshipo, muanda aa makuta oso nkintu ki butete kumpala kua Yehowa Efile Mukulu oobe.

19 “Tue mulombene kuteka mukuenu makasa, biabikala pabitale makuta, bia kudia, sunga kintu kampanda kioso ki’abatekielaa makasa. 20 We kufutshisha muenyi makasa, anka mukuenu tue mulombene kumufutshisha makasa, bua’shi Yehowa Efile Mukulu oobe akuelele miabi mu bioso bi’okakitshi muiumbo diokaata bu bupianyi.

21 “Su buetshipi kui Yehowa, tonyengakananga pa kulombasha mutshipo oobe. Muanda Yehowa Efile Mukulu oobe akakutekie bianka binyibinyi; bisumanga abikala bu’shi bokitshi muluisho su tue muiukumbashe. 22 Kadi su bopele kukita mutshipo tokitshi muluisho nya. 23 Abitungu olombashe mayi a mukanua mobe, na abitungu olombashe mutshipo ubodi mukite bu mulambu wa mu kukumiina kobe kui Yehowa Efile Mukulu oobe.

24 “Su otuela muifuba dia nfinyo dia muinobe, we mulombene kudia tukuba tua nfinyo mpa na apapuila nsala yobe, anka tue mulombene kutuala tungi mu kintu kiobe.

25 “Su otuela muifuba dia ntete dia muinobe, we mulombene kutshiba n’eyasa diobe miepu ibapu kumonga, anka tue mulombene kukisha lupete lua kuumbula nalo muifuba dia ntete dia muinobe.

24 “Su muana mulume ayibakila mukashi, na yawa mukashi taki’amusankisha dingi muanda bapete muanda wi bubi kuadi, abitungu yawa muana mulume amufundile mukanda wa kuipaa nao bulunda, amupe wanka na amubingie kuaye. 2 Kunyima kua kukatuka ku nshibo kua yawa muana mulume, yawa muana mukashi e kufika mukashi a ungi muntu. 3 Su yawa mulume a kabidi amushikua na amufundila mukanda wa kuipaa nao bulunda, amupa wanka, amubinga kuaye, sunga’shi su yawa mulume a kabidi baadi mumuibakile afua, 4 mulume aaye a kumpala baadi mumubingie te na matalua dingi a kumuibakila bu mukashi aaye kunyima kuabo kumuikasha butete, muanda kukita biabia mmuanda wi bubi kui Yehowa, tue mulombene kutuesha muluisho muiumbo di’abakupa kui Yehowa Efile Mukulu oobe bu bupianyi.

5 “Su muana mulume bakatuka mu kuibakila, ta mulombene kuenda ku ngoshi na ta mbalombene kumupa ungi mudimo oso wawa. T’abakamupa mudimo su ngumune munda mua kipua kishima, abitungu ashale kuaye bua kusankisha mukashi aaye.

6 “Muntu su ngumune ta mulombene kuata ebue dia mpelua sunga ebue dia kunundu kuadio bu kieeko bua kintu kiabadi beyapule, muanda biabia abikala bu kuata kintu akikuasha muntu buadia kuikala na muwa* bu kieeko.

7 “Su basangana muntu mmukuate umune a ku bakuabo bena Isalele pa bukopo, amukiengiesha na amupaana, abitungu kuipaa yawa kuatshile muntu pa bukopo. We na kia kukatusha mianda i bubi munkatshi muenu.

8 “Apatuuku mukumbo wa nsudi, okite bioso abikulesha ba tshite muakuidi bena Levi. Okookiele kalolo bioso binaadi muibalungule. 9 Tentekiesha kibaadi Yehowa Efile Mukulu oobe mukitshine Miriame pabanudi muishinda anukatuka mu Ejipitu.

10 “Su bueyapusha muinobe kintu kampanda, totuelanga mu nshibo yaye bua kuiatshila kiakia ki’akiebe nkupa bu kieeko. 11 Abitungu wemane paasha, na yawa muntu odi muiyapushe akutuadile kieeko paasha. 12 Kadi su yawa muntu e mu lukalo, tue mulombene kulala na kiakia kiadi mukupe bu kieeko kobe. 13 Okamualuisha kiakia kiadi mukupe bu kieeko pa kutuela kua nguba na akebuikila kilamba kiaye, akuelele miabi; biabia abikalesha’shi we mululame kumpala kua Yehowa Efile Mukulu oobe.

14 “Tue mulombene kudia makuta a muina mudimo e mu lukalo muikale mulanda, biabikala umune a ku bakuenu sunga muenyi mushale muiumbo dienu mu bibundi bienu. 15 Abitungu omupe efuto diaye nka mu diadia efuku dimune kumpala kua nguba kupona, muanda e mu lukalo na e na muwa ku bukuashi bua diadia efuto diaye. Bisumanga akedidi kui Yehowa pa muanda oobe, na wekala mukite muluisho.

16 “Ta mbalombene kuipaa nshe-muana pa muanda wa muluisho wa muana aye, na ta mbalombene kuipaa muana pa muanda wa muluisho wa nshaye. Muntu oso akayipayibua nka penda bua muluisho waye’ye nabene.

17 “Tue mulombene kuluisha kilumbu kia muenyi sunga kia muana mufuishe nshaye,* tue mulombene kuata kilamba kia mukashi kilele bu kieeko bua kintu kiadi muiyapule. 18 Tentekiesha’shi bodi mpika mu Ejipitu, na Yehowa Efile Mukulu oobe baadi mukukuule muamua. Nyi buakinyi nakutumina eyi bua kukita bino.

19 “P’okaumbula bintu muifuba diobe, su oluba kisaasa muifuba, tualukanga mu kuikiata. Okekilekie bua muenyi, muana mufuishe nshaye na mukashi kilele, bua’shi Yehowa Efile Mukulu oobe akuelele miabi mu bioso bi’okakitshi.

20 “Pokakuula tukuba toobe ku mutshi wa olive, tue mulombene kualukiila bua kukuula tuatua atushala ku ntabi. Oketulekie bua muenyi, muana mufuishe nshaye na mukashi kilele.

21 “Pokuula tukuba tua nfinyo, tue mulombene kualukiila bua kuata tuatua atushala. Wetulekie bua muenyi, muana mufuishe nshaye na mukashi kilele. 22 Tentekiesha’shi bodi mpika muiumbo dia Ejipitu. Nyi buakinyi nakutumina eyi bua kukita bino.

25 “Nsaa i bantu abekakena bua muanda kampanda, abakende kumpala kua ba nsushi, na ba nsushi abakebasambisha, bambe yawa muntu shi musoole’shi, mmululame na yawa musoole’shi e mu kilubilo. 2 Su abitungu’shi bakupile yawa muntu musoole, nsushi akamuladisha mu nsenga, bamukupile kumpala kuaye. Bungi bua nfimbo y’abamukupila abitungu buikale muyile kilubilo kiadi mukite. 3 Be kumukupila nfimbo ifikie na ku 40, kadi kushi kukila paapa. Su batungunuka na kumukupila nfimbo ikile paapa, yawa mukuenu akayishibua milongo kumpala kobe.

4 “Tuanyanga mbangabanga ya ngombe p’afuntu ntete.

5 “Su bana ba muntu mbashale pamune na umune a kuabadi afua kushi kutanda muana mulume, t’abitungu’shi mukashi a yawa mufue bamuibakile kui ungi muntu shi a mu kifuko kiabo. Mukuabo na mulume aaye ende kuadi, amuate bu mukashi aaye pa kumupiana. 6 Muana mbedi abakatanda kui yawa mukashi akatungunusha eshina dia yawa mukuabo mufue, bua’shi eshina diaye tadishiminanga mu Isalele.

7 “Kadi su yawa muntu t’akumiina kuibakila mukashi a mukuabo mufue, yawa mukashi akende kui bakulu ku kiibi kia kibundi, ebalungule’shi: ‘Mukuabo na mulume ande bapele kutungunusha eshina dia mukuabo mu Isalele. T’akumiina kumpiana nya.’ 8 Bakulu ba kiakia kibundi abakamuitanyina bua kuisamba naye. Kadi su apela’nka kupela na amba’shi: ‘Ntankumiina kumuibakila nya,’ 9 paapa mukashi a yawa mukuabo mufue akeseesela kui yawa muntu kumpala kua bakulu, amufuule sandale ku luao luaye, amuase mata mu mpala na amulungule’shi: ‘Bino nyi abitungu kukitshina muntu sh’akumiina’shi mukuabo mufue apete bana.’ 10 Kunyima kua biabia abaketanyina kifuko kiaye* mu Isalele’shi: ‘Nyi nshibo ya muntu abadi bafuule sandale.’

11 “Su bana balume babidi bakuete kulua ngoshi na mukashi a umune a kuabadi afika mu kukaluila mulume aaye, aola eyasa diaye na akuata ku musua wa yawa alu na mulume aaye, 12 abitungu omutshibe eyasa. Tue mulombene kumupusha lusa.

13 “Tue mulombene kuikala na bipimo bibidi bilekene, kikata na kipeela mu mpaya oobe. 14 Tue mulombene kuikala na bintu bibidi bilekene bia kupimina, kikata na kipeela mu nshibo yobe. 15 Abitungu wekale na kipimo kia bushito kilombane na ki buwa, na abitungu wekale na kipimo kia bukata kilombane na ki buwa, bua’shi olaale mafuku e bungi muiumbo di’abakupa kui Yehowa Efile Mukulu oobe. 16 Muanda muntu oso shi mululame akitshi biabia, nyi mmuntu e bubi kumpala kua Yehowa Efile Mukulu oobe.

17 “Tentekiesha bibaadi Amaleke mukukitshie pobodi muishinda okatuka mu Ejipitu, 18 bibaadi mufumankane nobe muishinda na aye nkuluisha boso babaadi kunyima kobe ngoshi nsaa ibodi mukookie na mubofule. Tabaadi mutshine Efile Mukulu nya. 19 Pabakakupa kuikisha kui Yehowa Efile Mukulu oobe kumpala kua beshikuanyi bobe boso bakuifunyishe muiumbo di’abakupa kui Yehowa Efile Mukulu oobe bu bupianyi, abitungu oshime eshina dia Amaleke muushi mu’eyilu. Tolubanga wawa muanda.

26 “Nfudiilo a bioso p’okatuele muiumbo di’abakakupa kui Yehowa Efile Mukulu oobe bu bupianyi, puekala muidiate na puemushala, 2 okaata ndambo ya ku biumbuluanga biobe bioso bia kumpala bia muiumbo di’abakakupa kui Yehowa Efile Mukulu oobe, w’ebiele mu kiseele na wende nabio ku mbalo y’abakasangula kui Yehowa Efile Mukulu oobe bua kutuula eshina diaye. 3 Abitungu wende kui tshite muakuidi kuete kufuba aa mafuku na omulungule’shi: ‘Lelo uno nalungula Yehowa Efile Mukulu oobe’shi, ne mutuele mu nsenga ibaadi Yehowa muitshipe kui ba nkambua betu bua kuitupa.’

4 “Paapa tshite muakuidi akaata kiseele mu maasa mobe na ekituule kumpala kua kilambuilo kia Yehowa Efile Mukulu oobe. 5 Akupu okakula kumpala kua Yehowa Efile Mukulu oobe’shi: ‘Nshami baadi muina Arameya shibaadi na kibundi, bayile mu Ejipitu, aye nkuimushala bu muenyi na bantu bapeela babaadi mu nshibo muaye. Kadi muamua bafikile bu muilo ukata wi bukome, na wi na bantu be bungi. 6 Anka bena Ejipitu babaadi betukiengieshe, nkuitumuesha mpombo na kuitufubisha midimo i bukopo bu bapika. 7 Biabia tubabangile kuidila kui Yehowa, Efile Mukulu a ba nkambua betu, na Yehowa baadi mupushe eyi dietu na bamuene kukiengieshibua kuetu na lukalakashi luetu na bi’abetupombeshanga. 8 Nfudiilo a bioso Yehowa betutushishe mu Ejipitu n’eyasa diaye di bukome na mboko yaye yolole, na mianda ayitshinyisha na bitunduilo na bilengieleshi. 9 Akupu bafikile netu mu ino mbalo, aye nkuitupa ino nsenga, nsenga ayalala mabeele na buuki. 10 Binobino natuala biumbuluanga bia kumpala bibatuusha nsenga yabadi bampe kui Yehowa.

“Abitungu w’ebituule kumpala kua Yehowa Efile Mukulu oobe, na oyiname kumpala kua Yehowa Efile Mukulu oobe. 11 Paapa okasanka bua bintu bioso bi buwa bi’abakakupa kui Yehowa Efile Mukulu oobe, pamune na ba mu nshibo mobe, muina Levi, na muenyi mushale munkatshi muenu.

12 “Popudisha kukatusha ki’ekumi kia bintu biobe bioso mu kipua kia kasatu, kipua kia kutuusha ki’ekumi, okekipa muina Levi, muenyi, muana mufuishe nshaye,* na mukashi kilele, abakekidiila mu bibundi bienu bua’shi bayikute. 13 Akupu okakula kumpala kua Yehowa Efile Mukulu oobe’shi: ‘Nakaasha kipindi kia kishila mu nshibo muande na nekipa muina Levi, muenyi, muana mufuishe nshaye na mukashi kilele, nka bu biodi muntumine eyi bua kukita. Ntshi muipee sunga kusumbushena muiya oobe. 14 Ntshi mudie kintu su nkimune kia ku biabia bintu panekalanga mu maalo, sunga kukatusha kantu su nkapeela panekalanga butete na kutusha kantu su nkapeela bua muntu mufue. Ne mukookiele eyi dia Yehowa Efile Mukulu ande na ne mukite bioso bioyikeele muntumine eyi. 15 Binobino, talanga kukatukila muiyilu mu mbalo yobe ya kishila, na welele muilo oobe wa Isalele na nsenga ibodi muitupe miabi, nka bu bibodi muitshipe kui ba nkambua betu, nsenga ayalala mabeele na buuki.’

16 “Lelo uno, Yehowa Efile Mukulu oobe akutumina eyi bua kukookiela ino miiya yaye na bitshibilo. Abitungu weyilame na kuiyikookiela n’eshimba diobe dioso na anyima oobe oso. 17 Lelo uno, bopete kuno kushinkamisha kui Yehowa’shi, akekala Efile Mukulu oobe p’otambukila mu mashinda aaye na kulama miiya yaye, mayi aaye, na bitshibilo biaye, na p’oteemesha eyi diaye. 18 Na lelo uno, Yehowa bapusha kushinkamisha kobe kua’shi okekala bu muilo waye, muilo waye wi pabuao, nka bu biadi mukulee, na okakookiela miiya yaye yoso 19 na’shi akakutuulu kunundu kua bingi bisamba bioso biadi mukite, akupe kinemo na nkumo mpa na ntumbo, nsaa yuelesha bu muilo wi selele kui Yehowa Efile Mukulu oobe nka bu bibaadi mukulee.”

27 Kunyima Moyise na bakulu ba Isalele babalunguile muilo’shi: “Nukookiele miiya yoso yanenupa lelo uno. 2 Muifuku di’anusabuka Yordane bua kutuela muiumbo adinupa Yehowa Efile Mukulu eenu, abitungu nuimikie mabue akata na nuiashingie ntoshi. 3 Kunyima k’obe bapu kusabuka, w’ekufunde mayi oso a mu ino Miiya, bua’shi otuele mu nsenga yabakupa kui Yehowa Efile Mukulu oobe, nsenga ayalala mabeele na buuki, nka bu bibaadi Yehowa Efile Mukulu a ba nkambua bobe mukulee. 4 P’osabuka muela wa Yordane, abitungu wemikie ano mabue ku muengie wa Ebale na w’eashingie ntoshi, nka bu biankutumina eyi lelo uno. 5 Abitungu w’ekuibakie dingi kilambuilo bua Yehowa Efile Mukulu oobe, kilambuilo kia mabue. Tofubishanga bina mudimo bia kiamo bua kutanya aa mabue. 6 W’ebakila Yehowa Efile Mukulu oobe kilambuilo na mabue oso ashima, na okepalambuila Yehowa Efile Mukulu oobe milambu ya kushiika kaalo. 7 Okepalambuila milambu ya butaale na okeyidiila kuakua, na okasanka kumpala kua Yehowa Efile Mukulu oobe. 8 Okafundu kalolo ku aa mabue mayi oso a mu ino Miiya.”

9 Paapa Moyise na ba tshite muakuidi bena Levi, babesambile na bena Isalele boso, bebalungula’shi: “Shalayi baumiine anue bena Isalele na nuteemeshe. Lelo uno nubafiki bu muilo wa Yehowa Efile Mukulu eenu. 10 Abitungu oteemeshe eyi dia Yehowa Efile Mukulu oobe na kukookiela miiya yaye na mayi aaye a kulonda, ankutumina eyi lelo uno.”

11 Mu diadia efuku Moyise baadi mutumine muilo eyi, eulungula’shi: 12 “Bino bisamba abilondo abikemana ku muengie wa Garizime bua kuelela muilo miabi p’anukasabuka Yordane: Kisamba kia Simeone, kia Levi, kia Yunda, kia Isakare, kia Yosefe, na kia Benyamine. 13 Na bino bisamba abilondo abikemana ku muengie wa Ebale bua kuela milua: kisamba kia Rubene, kia Gade, kia Ashere, kia Zabulone, kia Dane, na kia Neftali. 14 Bena Levi abakalungula bantu boso ba mu Isalele n’eyi di bukopo’shi:

15 “‘Mulua wikale kui muntu asee nkishi sunga akitshi nkishi a kilonda kisunguulue, mudimo wa ku maasa a nsendue na amufuamisha, muanda nkintu ki bubi kui Yehowa.’ (Paapa muilo oso aukaluula’shi, ‘Amene!’)

16 “‘Mulua wikale kui muntu sh’anemeka nshaye na nyinaye.’ (Paapa muilo oso aukaluula’shi, ‘Amene!’)

17 “‘Mulua wikale kui muntu atentuula mikalo ya muinaye.’ (Paapa muilo oso aukaluula’shi, ‘Amene!’)

18 “‘Mulua wikale kui muntu alubisha mpofu eshinda.’ (Paapa muilo oso aukaluula’shi, ‘Amene!’)

19 “‘Mulua wikale kui yawa aluisha kilumbu kia muenyi, kia muana mufuishe nshaye,* sunga kia mukashi kilele.’ (Paapa muilo oso aukaluula’shi, ‘Amene!’)

20 “‘Mulua wikale kui yawa alaala mukashi a nshaye, muanda bakuatshisha nshaye buufu.’ (Paapa muilo oso aukaluula’shi, ‘Amene!’)

21 “‘Mulua wikale kui muntu alaala nyema oso yawa.’ (Paapa muilo oso aukaluula’shi, ‘Amene!’)

22 “‘Mulua wikale kui yawa alaala mukuabo mukashi, biabikala muana a nshaye sunga muana a nyinaye.’ (Paapa muilo oso aukaluula’shi, ‘Amene!’)

23 “‘Mulua wikale kui yawa alaala muko aaye mukashi.’ (Paapa muilo oso aukaluula’shi, ‘Amene!’)

24 “‘Mulua wikale kui yawa ayipaa mukuabo mu bufiefie.’ (Paapa muilo oso aukaluula’shi, ‘Amene!’)

25 “‘Mulua wikale kui yawa akumiina’shi bamutshibe milomo bua kuipaa muntu shi musoole muanda.’ (Paapa muilo oso aukaluula’shi, ‘Amene!’)

26 “‘Mulua wikale kui yawa sh’anemeka mayi a mu ino Miiya na kuiatumikila.’ (Paapa muilo oso aukaluula’shi, ‘Amene!’)

28 “Kadi su oteemesha binyibinyi eyi dia Yehowa Efile Mukulu oobe, pa kutumikila na kalolo koso miiya yoso yankutumina eyi lelo uno, Yehowa Efile Mukulu oobe akakutuulu binyibinyi kunundu kua bisamba bioso bia pa nsenga. 2 Ino miabi yoso ayikafiki kodi na okeyipete, muanda otungunuka na kuteemesha eyi dia Yehowa Efile Mukulu oobe:

3 “Okedibua miabi mu kibundi kikata, na okedibua miabi ku musoko.

4 “Bana bobe, bikuba bia mu nsenga yobe, bana ba nyema yobe, bana ba ngombe na ba mikooko yobe abakedibua miabi.

5 “Kiseele kiobe, n’elonga diobe dia kusobela mikate abikedibua miabi.

6 “Okedibua miabi nsaa y’otuele na okedibua miabi nsaa y’otuuku.

7 “Yehowa akakukuasha bua kutshimuna beshikuanyi abakafiki bua kulua nobe. Abakafikila muishinda dimune bua kulua nobe, kadi abakakusukila mu mashinda musambobidi. 8 Yehowa akelela mashibo oobe a kulamina bintu miabi mpa na midimo yobe yoso y’okitshi, akakuelela miabi muiumbo di’abakupa kui Yehowa Efile Mukulu oobe. 9 Yehowa akakuikasha bu muilo wi selele buaye’ye nabene, nka bu bibaadi muitshipe kodi, muanda otungunuka na kukookiela miiya ya Yehowa Efile Mukulu oobe na kutambukila mu mashinda aaye. 10 Abikatungu miilo yoso ya pa nsenga imone’shi wetaminyibua muishina dia Yehowa na ayikakutshinyi.

11 “Yehowa akafuimisha bana bobe, nyema yobe, na bikuba bia mu nsenga yobe, muiumbo dibaadi Yehowa muitshipe kui ba nkambua bobe bua nkupa. 12 Yehowa akafungula eyilu, nshibo yaye ya kulamina bintu i buwa, bua kupa eumbo diobe mpeshi mu kipungo kiaye na akelela bioso bi’okitshi miabi. Okeyapusha bisamba bi bungi bintu, kadi obe nabene t’okekala na lukalo lua kuiyapula kintu su nkimune. 13 Su botungunuka na kutumikila miiya ya Yehowa Efile Mukulu oobe yankupa lelo uno bua kuiyikookiela na kuiyilama, Yehowa akakuikasha bu mutue kushi bu mukila, na okekala kunundu kushi kuushi. 14 Tue mulombene kuenda kula na mayi a nkupa lelo uno, ku mboko ibalume sunga ibakashi, bua kulonda bangi b’efile na kuibafubila.

15 Kadi su bopele kuteemesha eyi dia Yehowa Efile Mukulu oobe pa kutumikila na kalolo koso miiya yaye yoso na bitshibilo biaye biankupa lelo uno, tala milua yoso ayikakukuata:

16 “Okedibua milua mu kibundi kikata na okedibua milua ku musoko.

17 “Kiseele kiobe, n’elonga diobe dia kusobela mikate abikedibua milua.

18 “Bana bobe, bikuba bia mu nsenga yobe, bana ba ngombe, na ba mikooko yobe abakedibua milua.

19 “Okedibua milua nsaa y’otuele na okedibua milua nsaa y’otuuku.

20 “Yehowa akakutumina milua, kafutakanyi na dinyoka mu midimo yobe yoso y’okitshi mpa nka na p’obutuka na p’oshimina bukidibukidi, muanda wa bikitshino biobe bi bubi na pa muanda bomulubu. 21 Yehowa akakitshi bi’ashi maladi taakatukanga kodi mpa nka na p’akakushimisha muiumbo di’okapiana. 22 Yehowa akakutumina kikoolo kia kiadi, mukumbo wa mbidi kaalo i bukopo, biulua, kibobo ki bukopo bukile, lupete lua ngoshi, munanga wi bukopo na nkongolo; bino bipupa abikakulondo mpa nka na p’okashimina. 23 Eyilu di kunundu kobe adikala nka bu kiamo kia munyinga, na nsenga i muushi mobe ayikala nka bu kiamo. 24 Yehowa akaluula mpeshi a muiumbo diobe bu lusenga na bu lufufi abikuikila muiyilu mpa na p’okabutudibua. 25 Yehowa akakitshi bia’shi beshikuanyi bobe bakutshokole. Okebatuku ngoshi muishinda dimune, anka okebasuku mu mashinda musambobidi elekene; maumbo oso a pa nsenga aakapusha moo p’aakamono mianda i bubi ayinufikila. 26 Bitanda bienu abikafiki bu bidibua bia tonyi toso tua muiyilu na nyema ya pa nsenga, t’akuikala muntu su ngumune eyitshinyisha bua’shi isuukie.

27 “Yehowa akakutumina biulua bu bia bena Ejipitu: nsadi, kinkuse, na ingi mikumbo ya pa kikoba yoshi bia kubuka. 28 Yehowa akakutumina mombe, bu mpofu, na kafutakanyi. 29 Okakunkakana mu kanya elangalanga nka bu abikunkakanaa mpofu bufuku, t’okobesha mu muanda su ngumune okitshi; abekala nka abakunyengie bintu na nkuiba, t’akuikala muntu su ngumune a kukupaasha. 30 Okabangila mukashi, anka ungi muntu akamulaala pa bukopo. Okebaka nshibo anka t’okemushala. Okakunu nfinyo anka t’okadi su ntukuba tuayo tua kumpala. 31 Abakayipaa ngombe oobe mu meso mobe, anka t’okadi ka muita kaye su nkapeela. Abakayibi mpunda oobe mu meso mobe, anka t’akalukiila kodi. Abakapa beshikuanyi bobe mukooko oobe, kadi tu’ekala na muntu a kukupaasha. 32 Abakapa bana bobe balume na bana bobe bakashi bangi bantu mu meso mobe, okekala mafuku oso na lukalo lui bukopo lua kuibamona, anka t’okekala na kia kukita. 33 Abakadi bimuma biobe na bintu bioso bia mu nsenga yobe kui bantu bosh’ouku, abakekala nka abakunyengie bintu na kukuashina. 34 Okapauka mombe bua mianda y’omono.

35 “Yehowa akakutumina biulua bi busungu na bish’abipu ku makunungu na ku matankanta,* kubanga muushi mua ngua mpa na munkatshi mua mutue. 36 Yehowa akakukunkusha obe na nfumu odi muisanguile ku kisamba kiosh’ouku, sunga kishibaadi ba nkambua bobe abauku, na kuakua okafubila bangi b’efile, b’efile ba mitshi na ba mabue. 37 Bantu boso abakapusha moo pa muanda wa abikenufikila, abakenuele miele na abakenusepe munkatshi mua miilo yoso y’abakenutumu kui Yehowa.

38 “Okakunu ntete i bungi muifuba diobe, anka okaumbula bintu bipeela, muanda mpasu ayikebidi. 39 Okadimi efuba na kuimukuna mitshi ya nfinyo, anka t’okatomo nfinyo ya kuanka sunga kuumbula kintu, muanda misanda ayikeyidi. 40 Okekala na mitshi ya olive mu nsenga yobe yoso, anka t’okefikinya muimu pa mbidi, muanda tukuba tobe tua olive atukapono. 41 Okatanda bana balume na bana bakashi, anka t’abakashala bu bobe, muanda abakebakuata bende nabo mu dingi eumbo. 42 Bibumbu bia tuishi abikaulu ku mitshi yobe yoso na ku bikuba bia mu nsenga yobe. 43 Muenyi mushale munkatshi muenu ekala akaamina nka kukaamina kunundu kobe, obe namu okekala nka onyisha kuika. 44 Akekala nka akuiyapusha bintu, anka obe t’okamuiyapusha nya. Aye ekala nka bu mutue, obe namu nka bu mukila.

45 “Ino milua yoso ayikafiki kodi ikulonde na ikukuate mpa nka na p’okabutuka, muanda tue muteemeshe eyi dia Yehowa Efile Mukulu oobe pa kulama miiya yaye, na bitshibilo biaye bibaadi mukutumine eyi. 46 Ino milua ayikashala kodi na kui bekulu bobe bu kitunduilo na bu kudimushua bua loso, 47 muanda tue mufubile Yehowa Efile Mukulu oobe na disanka na muloo kuishimba pobodi na biabia bintu bioso bi bungi. 48 Yehowa akakutumina beshikuanyi, na okebafubila aku we na nsala na nyota, kushi bilamba na we mukutue bintu bioso. Akakutuulu kikumbo kia kiamo mu nshingo mobe mpa nka na p’akakubutula.

49 “Yehowa akakuibueshela kisamba ki kula akikatukila ku nfudiilo kua nsenga, kisamba kioshi’opusha ludimi luakio; akikenutuku mu kabasamushi nka bu mumba, 50 kisamba ki na bukielo kish’akikanemeka bantu bakulu sunga kupusha bana bakinga lusa. 51 Abakadi bana ba bimunuanga biobe na bikuba bia mu nsenga yobe mpa nka na p’okabutudibua. T’abakakulekiela ntete su ngipeela, nfinyo ipia sunga muimu, bana ba mikooko sunga ba ngombe mpa nka na p’abakakubutula. 52 Abakakuifunyisha, bakufungile mu bibundi bienu bioso muiumbo dienu dioso dishima mpa nka na apakapono bimano bienu bila na binyingishibue ngofu bi’anukulupila. Eyendo, abakenuifunyisha binyibinyi mu bibundi bienu bioso bia muiumbo dienu dishima dibaabadi benupe kui Yehowa Efile Mukulu eenu. 53 Paapa okadi bana bobe obe nabene, mbidi ya bana bobe balume na bana bobe bakashi babadi bakupe kui Yehowa Efile Mukulu oobe, muanda abekala benuifunyishe bi bukopo na kuinumuesha malua kui beshikuanyi benu.

54 “Sunga muntu e na kalolo kakile na nshalelo e buwa a munkatshi muenu, t’akapusha lusa bua mukuabo mulume, mukashi aaye adi mufule sunga bua bana baye bashale, 55 t’akebapa ka muita su nkapeela ka ku mbidi ya bana baye yakuete kudia, muanda t’ekala na kingi kintu pa muanda wa kuabadi benuifunyishe bi bukopo na malua abenumuesha kui beshikuanyi benu mu bibundi bienu. 56 Sunga muana mukashi e na kalolo kakile na nshalelo e buwa a munkatshi muenu, shi mulombene kuela binangu su nkapeela bua kuashina luao luaye mu nsenga pa muanda e na kalolo kakile, t’akapusha mulume aaye adi mufule lusa sunga muana aaye mulume, sunga muana aaye mukashi, 57 sunga bua kitandilo akituuku munkatshi mua mikoolo yaye, sunga bua bana baye balume baadi mutande, muanda akebidi ku bufiefie pa muanda wa kuabadi benuifunyishe bi bukopo, na malua abenumuesha kui beshikuanyi benu mu bibundi bienu.

58 “Su tue mukookiele na kalolo koso mayi oso a mu ino Miiya afundibue mu uno mukanda, na tu’emutshine dino eshina dia ntumbo na dia kukaanya dia Yehowa Efile Mukulu oobe, 59 Yehowa akakutumina bipupa bikata obe na bekulu bobe, bipupa bi bukopo na bish’abipu, na maladi e bukopo asha apu. 60 Akakutumina maladi oso a mu Ejipitu obodi otshinyi, na aakakulamata binyibinyi. 61 Yehowa akakutumina mpa na maladi oso na bipupa biabashi bafunde mu mukanda wa ino Miiya mpa nka na p’okabutudibua. 62 Sunga nuafuima nuafika bu nyenyenyi ya muiyilu, anukashala nka bantu bapeela, muanda ta nui bateemeshe eyi dia Yehowa Efile Mukulu eenu.

63 “Na nka bu bibaadi Yehowa na muloo bua kuyiisha mianda yenu kumpala na kuinufuimisha, Yehowa akekala na muloo wa kuinubutula na kuinushimisha; na abakenukatusha muiumbo ditanukiebe kuata.

64 “Yehowa akakupalakasha munkatshi mua miilo yoso, kukatukila ku nfudiilo kua nsenga mpa na ku ingi nfudiilo ya nsenga, na kuakua, okafubila b’efile ba mitshi na ba mabue, b’efile boshibodi ouku sunga bashibaadi ba nkambua bobe abauku. 65 T’okekala mu butaale munkatshi mua biabia bisamba na t’okekala na mbalo y’ashi luao lobe luikishe. Anka Yehowa akakuikasha n’eshimba kuiyilu, akakupa meso akookie na binangu bia kuipusha bu shi na lukulupilo. 66 Muwa oobe aukekala mu masaku akata, na okekala na moo bufuku na kanya; na t’okauku’shi opanda. 67 Ku nakashika okamba’shi: ‘Su tubadia kuikala ku kiolua baboo!’ Na ku kiolua okamba’shi: ‘Su tubadia kuikala ku namashika baboo!’ pa muanda wa moo aukaulu muishimba diobe na pa muanda wa bi’okamono. 68 Yehowa akakualusha mu Ejipitu mu buato, muishinda dibadi mukulungule’shi: ‘Tue mulombene kuidimona’nyi efuku sunga dimune,’ kuakua okepaana obe nabene kui beshikuanyi bobe bu mpika mulume sunga bu mpika mukashi, kadi takuikala muntu a kukuula.

29 Ano mmayi a kilombeno kibaadi Yehowa mulungule Moyise bua kukita na muilo wa Isalele muiumbo dia Moabe, kukatusha kilombeno kibaadi mukite nabo ku Horebe.

2 Akupu Moyise nkuitanyina bena Isalele boso, nkuibalungula’shi: “Nuibemuene anue banabene bibaadi Yehowa mukite Faraone muiumbo dia Ejipitu mu meso muenu, bibaadi mukite bafubi baye boso n’eumbo diaye dioso, 3 dinyoka* dikata dibaadi meso oobe amone, biabia bitunduilo bikata na bilengieleshi. 4 Kadi mpa na lelo uno, Yehowa ta muinupe eshimba dia kupusha na meso bua kumona na matui bua kuteemesha. 5 ‘Panadi nenukunkusha mu kabaaka munda mua bipua 40, bilamba bienu ta mbisaasukie pa mbidi yenu, na sandale yenu ta ngiluile ku ngua yenu. 6 Tanui badie mikate nya, na tanui batome nfinyo sunga angi malofu aakoluana, bua’shi nuukie’shi nnami Yehowa Efile Mukulu eenu.’ 7 Nfudiilo a bioso nubafikile mu ino mbalo, na Sihone nfumu a Eshebone na Oge nfumu a Bashane babafikile mu kulua netu ngoshi, kadi tubaadi bebatshimune. 8 Kunyima tubatshile nsenga yabo, atue nkuiyipa bena Rubene, bena Gade, na kipindi kia kisamba kia Manasee bu bupianyi. 9 Biabia lamayi mayi a kino kilombeno na nuiakookiele, bua’shi mianda yenu yoso y’anukitshi yende kalolo.

10 “Lelo uno, anue boso nui bemane kumpala kua Yehowa Efile Mukulu eenu, ba nfumu ba bisamba bienu, bakulu benu, ba tupita benu, muana mulume oso a mu Isalele, 11 bana benu, bakashi benu na benyi be munkatshi mua kishalelo kienu, kukatukila ku muntu enutshibilaa nteete, mpa na ku muntu enutapilaa mema. 12 Nui pano bua kutuela mu kilombeno kia Yehowa Efile Mukulu eenu na mutshipo waye, biabakitshi nenu kui Yehowa Efile Mukulu eenu lelo uno 13 bua’shi enutuule bu muilo waye lelo uno, na bua’shi ekale Efile Mukulu eenu, nka bu bibaadi muinulee, na nka bu bibaadi muitshipe kui ba nkambua benu, Abalahama, Isaake, na Yakobo.

14 “Anka ta mpenda anue bankitshi nabo kino kilombeno na uno mutshipo, 15 kadi nebikitshi na baba bemane pano netu lelo uno kumpala kua Yehowa Efile Mukulu eetu, na baba bashi netu pano lelo uno. 16 (Muanda anuku kalolo bibaatudi bashale muiumbo dia Ejipitu na bibaatudi bakile munkatshi mua miilo ilekenelekene mu luendo luetu. 17 Na nubaadi anumono bintu biabo bi bubi na ma nkishi aabo e butete* a mitshi, na a mabue, a kiamo kia arja, na a ôlo, abaadi munkatshi muabo.) 18 Nudimukie bua’shi munkatshi muenu lelo uno tamuikalanga muana mulume sunga muana mukashi, kifuko sunga kisamba ki na eshimba adipambuka kui Yehowa Efile Mukulu eenu bua kukafubila b’efile ba yaaya miilo, bua’shi munkatshi muenu tamuikalanga mushi wa mutshi autusha bikuba bi lulengo sunga mutshi wi buulo.

19 “Su muntu ateemesha mayi a uno mutshipo, kadi etatula muishimba diaye na akula’shi: ‘Nakekala mu butaale sunga natungunuka na kutambukila mu mashinda aakumiina eshimba diande.’ Bino mbilombene kuluisha mianda yaye yoso na mpa na ya bangi, 20 Yehowa t’akakumiina bua kumufuila lusa. Anka nsungu ikata ya Yehowa ayikatembela yawa muntu nka bu kaalo, na milua yoso ifundibue mu uno mukanda ayikakuata binyibinyi yawa muntu, na Yehowa akashimi binyibinyi eshina diaye muushi mu’eyilu. 21 Yehowa akamukaasha penda aye munkatshi mua bisamba bioso bia Isalele bua kumukiengiesha muyile milua yoso ya kilombeno ifundibue mu uno mukanda wa Miiya.

22 “Apakamono bana benu ba mu kipungo akifiki na benyi ba muiumbo di kula bipupa bia mu dino eumbo, na maladi abekala beditumine kui Yehowa— 23 sufule na mungua na kaalo akatembe, mu mushindo wa’shi eumbo dioso dishima t’adikakunyibua kintu sunga kumena kintu, na takui mutshi su ngumune aukemumene, nka bu bibaadi Sodome na Gomore, Adima na Seboime bibutukie, pabaadi Yehowa muibibutule mu nsungu yaye i bukopo— 24 Abo na miilo yoso abakakula’shi: ‘Buakinyi Yehowa bakitshi dino eumbo bino? Nkinyi kibafuisha ino nsungu ikata?’ 25 Paapa abakamba’shi: ‘Muanda babaadi basumbushene kilombeno kia Yehowa, Efile Mukulu a ba nkambua babo, kibaadi mukite nabo pabaadi muibatushe muiumbo dia Ejipitu. 26 Kadi babayile, abo nkufubila bangi b’efile na nkuibenamina, b’efile babashibaadi abauku na bashibaadi muibape matalua a kuibalanguila. 27 Biabia Yehowa bakuatshiile dino eumbo nsungu i bukopo na aye nkuiditumina milua yoso ifundibue mu uno mukanda. 28 Nyi buakinyi mu nsungu yaye i bukopo na mu bukielo buaye, Yehowa baadi muibakatushe mu nsenga yabo enda nabo mu dingi eumbo, muabadi mpa na lelo uno.’

29 “Mianda ifuame ngia Yehowa Efile Mukulu eetu, anka mianda yadi mufumbule ngietu na bana betu bua loso, bua’shi tumone bia kutumikila mayi oso a mu ino Miiya.

30 “Apakakukumbena ano mayi oso, miabi na milua biandi mutuule kumpala kobe, na puebitentekiesha mu bisamba bioso mu’abekala bakupalakashe kui Yehowa Efile Mukulu oobe, 2 na p’okalukiila kui Yehowa Efile Mukulu oobe na p’oteemesha eyi diaye muyile bioso biankulungula lelo uno, obe na bana bobe, n’eshimba diobe dioso na anyima oobe oso, 3 paapa, Yehowa Efile Mukulu oobe akalusha bantu bobe babadi bakuate mu bupika na kukulesha lusa, na kuinubunga dingi munkatshi mua miilo yoso mubaadi Yehowa Efile Mukulu oobe muinupalakashe. 4 Sunga biekala’shi muilo oobe wikeele upalakane mpa na ku nfudiilo ku’eyilu, kukatukila kuakua, Yehowa Efile Mukulu oobe akenubungu na nkenualusha. 5 Yehowa Efile Mukulu oobe akakualusha muiumbo dibaadi ba mashobe baate, na okedipiana; akayiisha mianda yobe kumpala na akenufuimisha kukila ba mashobe. 6 Yehowa Efile Mukulu oobe akasuula eshimba diobe n’eshimba dia bana bobe, bu’ashi ofule Yehowa Efile Mukulu oobe n’eshimba diobe dioso na anyima oobe oso, bua’shi oshale na muwa. 7 Paapa Yehowa Efile Mukulu oobe akafuishisha beshikuanyi bobe ino milua yoso, baba babaadi bakushikue na kukukiengiesha.

8 “Paapa okalukiila na okateemesha dingi eyi dia Yehowa na kukookiela miiya yoso yankupa lelo uno. 9 Yehowa Efile Mukulu oobe akanyisha kuyiisha mianda yobe kumpala mu midimo yobe yoso, akafuimisha bana bobe, bimunuanga biobe, na bikunuanga bia mu nsenga yobe. Yehowa akekala dingi na muloo wa nkuelela miabi, nka bu bibaadi muelele ba nkambua bobe miabi. 10 Muanda okateemesha eyi dia Yehowa Efile Mukulu oobe, okakookiela miiya yaye na mayi a kulonda afunde mu uno mukanda wa Miiya, na okalukiila kui Yehowa Efile Mukulu oobe n’eshimba diobe dioso na anyima oobe oso.

11 “Aku namu miiya yankupa lelo uno tayi bukopo kodi, na tayi kula nobe. 12 Tayi muiyilu, bodia kuamba’shi: ‘Nnanyi akakaamina muiyilu bua kuituatshila yanka bua’shi tuiyiteemeshe na kuiyikookiela?’ 13 Na tayi bushiya bua kalunga ka mema, biodia kuamba’shi: ‘Nnanyi asabuka adiaa eshiya dia kalunga ka mema bua nketuatshila yanka, bua’shi tuiyiteemeshe na kuiyikookiela?’ 14 Muanda eyi di pepi nobe ngofu, di mukanua mobe na muishimba diobe obe nabene, bua’shi w’editumikile.

15 “Tala, natuulu lelo uno kumpala kobe muwa na mianda i buwa, lufu na mianda i bubi. 16 Su boteemesha miiya ya Yehowa Efile Mukulu oobe yankupa lelo uno pa kufula Yehowa Efile Mukulu oobe, kulonda mashinda aaye, kukookiela miiya yaye, mayi aaye a kulonda na bitshibilo biaye, paapa okekala na muwa na anukefuimena, na Yehowa Efile Mukulu oobe akakuelela miabi muiumbo di’okaata.

17 “Kadi su eshimba diobe diapambuka kui Efile Mukulu na tue mumuteemeshe, su bakutakula bua kulanguila bangi b’efile, webenamina na webalanguila, 18 nakulungula lelo uno’shi okafu binyibinyi. T’okakitshi mafuku e bungi muiumbo diokashala kunyima k’obe kusabuka Yordane. 19 Lelo uno naata eyilu na nsenga bu tumonyi kodi’shi, natuulu muwa na lufu kumpala kobe, muabi na mulua; na abitungu osangule muwa bua’shi wekale na muwa, obe na bana bobe, 20 p’obe kufula Yehowa Efile Mukulu oobe, na p’obe kuteemesha eyi diaye, na kumulamata, muanda mmuikale muwa oobe, kukiila kuadi okashala mafuku e bungi muiumbo dibaadi Yehowa muitshipe bua kupa ba nkambua bobe, Abalahama, Isaake, na Yakobo.”

31 Akupu, Moyise bayile akalungula bena Isalele boso ano mayi, 2 aye nkuibalungula’shi: “Lelo uno tandi na bipua 120. Ntshi mulombene dingi kuinukunkusha, muanda Yehowa mundungule’shi: ‘T’okasabuka Yordane nya.’ 3 Yehowa Efile Mukulu eenu nyi akasabuka kumpala kuenu, aye nabene nyi akabutula bino bisamba kumpala kuenu, na anukebibingi. Yoshua nyi akenukunkusha bua kusabuka bu bibaadi Yehowa muambe. 4 Yehowa akebakitshi nka bu bibakitshine Sihone na Oge ba nfumu bena Amore, na bibaadi mukitshine eumbo diabo pabaadi muibabutule. 5 Yehowa akebatshokola buenu, na abitungu nuibakite nka muyile bioso biandi muinulungule. 6 Nyingayi mashimba na nukankamane. Tanutshinanga sunga kusuusa kumpala kuabo, muanda Yehowa Efile Mukulu eenu nyi kuete kutambuka nenu. T’akenulekiela sunga kuinusumbushena.”

7 Paapa Moyise nkuitanyina Yoshua na nkumulungula mu meso mua bena Isalele boso’shi: “Nying’eshimba na okankamane, muanda nnobe akatuesha uno muilo mu nsenga ibaadi Yehowa muitshipe kui ba nkambua babo bua kuibapa, na okebapa yanka bu bupianyi. 8 Yehowa nyi atambuka kumpala kobe, akatungunuka na kuikala nobe. T’akakulekiela sunga kukusumbushena. Totshinanga sunga kusuusa.”

9 Akupu Moyise nkufunda ino Miiya, nkuiyipa ba tshite muakuidi na bena Levi abatualaa mushete wa kilombeno wa Yehowa, mpa na bakulu boso ba Isalele. 10 Moyise nkuibatumina eyi, nkuibalungula’shi: “Ku nfudiilo kua bipua musambobidi bioso, mu kipungo kitshibibue kia kipua kia kulekiela bantu mabasa, pa Musangelo wa Bitanda, 11 nsaa ayikemana bena Isalele boso kumpala kua Yehowa Efile Mukulu oobe ku mbalo y’akasangula, abitungu obadikie ino Miiya bua’shi bena Isalele boso beyipushe. 12 Bunga muilo oso pa mbalo imune, balume, bakashi, bana, mpa na muenyi mushale mu bibundi bienu, bua’shi bateemeshe na balongie pabitale Yehowa Efile Mukulu oobe na biabadia kumutshina, na kunemeka mayi oso a mu ino Miiya. 13 Paapa bana babo bashibaadi abauku ino Miiya, abakateemesha na kulonga biabadia kutshina Yehowa Efile Mukulu oobe mafuku oso w’ekala na muwa muiumbo di’okapiana p’okasabuka Yordane.”

14 Paapa Yehowa balunguile Moyise’shi: “Talanga! Nsaa ya lufu lobe ibeseesela pepi. Itanyina Yoshua, wende naye ku kashibo k’epema ka kufumankena, bua’shi mmone bia kumutuula ku mudimo.” Biabia Moyise na Yoshua babayile, abo nkuimana ku kashibo k’epema ka kufumankena. 15 Paapa Yehowa nkumueneka ku kashibo k’epema mu musungo w’ekumbi, na musungo w’ekumbi nkuimana pa kituelelo kia kashibo k’epema.

16 Binobino Yehowa nkulungula Moyise’shi: “Talanga! Todi pepi na kufua, na uno muilo aukabanga kutambuka lusandi lua mu kikudi na b’efile benyi abekala bebefunyishe muiumbo di’abakatuele. Abakandubu na kuipaa kilombeno kinaadi mukite nabo. 17 Biabia, nsungu yande i bukopo ayikebatembela, na nakebabutula, nakafuamisha mpala yande kuabadi mpa na p’abakapuika. Kunyima kua makienga e bungi na tuinyongoshi kuibakuata, abakamba’shi: ‘Ano makienga ngetukuate muanda Efile Mukulu eetu te munkatshi muetu.’ 18 Anka nakatungunuka na kufuamisha mpala yande kuabadi muanda wa mianda yoso i bubi yabadi bakite pabo kulonda bangi b’efile.

19 “Binobino, funda luno loono na w’elulongieshe bena Isalele. Ebalongieshe luanka bua’shi luno loono luikale bu kamonyi pankatshi pande na muilo wa Isalele. 20 Pankebatuesha mu nsenga inaadi muitshipe bua kupa ba nkambua babo, nsenga ayalala mabeele na buuki, na nsaa yabakadi bayikute, na mianda yabo yende kumpala, abakende kui bangi b’efile na abakebafubila, abakakutua kanemo kuandi na abakayipaa kilombeno kiande. 21 Apebakuata malua e bungi na tuinyongoshi, luno loono alukekala bu kamonyi kuabadi (biabia bana babo t’abakelulubu), muanda nemupue kuuka binangu biabadi bapue kubanga kulesha kumpala kua’shi nebatueshe muiumbo dinaadi muitshipe.”

22 Paapa Moyise bafundile luno loono mu diadia efuku na aye nkuilulongiesha bena Isalele.

23 Akupu Aye* nkutuula Yoshua muana a Nune ku mudimo na nkumulungula’shi: “Nying’eshimba na okankamane, muanda nnobe akatuesha bena Isalele muiumbo dinaadi muitshipe bua kuibapa na nakatungunuka na kuikala nobe.”

24 Pabapuile Moyise kufunda mayi oso a ino Miiya mu mukanda, 25 Moyise baadi mutume eyi kui bena Levi babaadi abatuala mushete wa kilombeno wa Yehowa, amba’shi: 26 “Atayi uno mukanda wa Miiya, nuiutule ku lupese lua mushete wa kilombeno wa Yehowa Efile Mukulu eenu, na aukakuasha bu kamonyi kuanudi. 27 Muanda nauku kalolo binangu bienu bia buntomboshi na mutue wenu wi bukopo. Su nukuete kutombokiela Yehowa panki na muwa munkatshi muenu, abikekala naminyi kunyima kua lufu luande! 28 Mbungileyi bakulu boso ba bisamba bienu na ba tupita benu, bua’shi nebalungule ano mayi, bepushishe abo banabene, na naata eyilu na nsenga bu tumonyi kuabadi. 29 Muanda nauku kalolo’shi kunyima kua lufu luande, anukakitshi binyibinyi mianda i bubi na anukakatuka muishinda dinaadi muinutumine eyi bua kulonda. Ku nfudiilo makienga aakenukuata, muanda anukakitshi mianda i bubi ku meso kua Yehowa na anukamufiitshisha munda na bikitshino bienu.”

30 Paapa Moyise nkuambuula mayi a mu luno loono kui kakongie kashima ka Isalele, kubanga ku mbangilo mpa na ku nfudiilo:

 3 Muanda nakaukisha eshina dia Yehowa.

Akulayi pabitale bukata bu’Efile Mukulu!

 5 Abo nyi bakite mianda i bubi.

Ta mbana baye, kilubilo nkiabo’bo banabene.

Kipungo kia bantu be bubi na batuelakane!

15 Pabaadi Yeshurune* mutame, baadi muiyele muiyilu na buntomboshi.

Botamine, obe nkuula na bidiibua bi bungi na nkuneema bushito.

29 Su babaadia kuikala na binangu baboo! Babaadia kunangushena pabitale ino mianda.

Babaadia kunangushena pabitale kibaadia kuibafuila.

B’ebuee na benukuashe.

Na bekale bu mbalo yenu ya kufuamina.

Nayipaa, na nalama na muwa.

44 Paapa Moyise bafikile aye nkuambuula mayi oso a luno loono mu matui mua muilo, pamune na Oshea* muana a Nune. 45 Pabapuile Moyise kulungula bena Isalele boso ano mayi oso, 46 Bebalunguile’shi: “Lamayi kalolo ano mayi oso anenudimusha nao lelo uno, bua’shi nulungule bana benu buabadia kulama mayi oso a mu ino Miiya. 47 Muanda ano ta mayi ashi na muulo kuanudi, kadi aakupetesha muwa, na ku bukuashi buao anukakitshi mafuku e bungi mu nsenga yanukapiana kunyima ku’anue kusabuka Yordane.”

48 Mu diadia efuku dimune Yehowa besambile na Moyise, amulungula’shi: 49 “Kaamina ku uno muengie wa Abarime, Muengie wa Nebo wi mu nsenga ya Moabe, witalene na Yeriko, na otale eumbo dia Kanaana diampa bena Isalele bu bupianyi. 50 Akupu okafuila ku wawa muengie k’okaamina, na okabungibua kui muilo oobe,* nka bu bibaadi Alona mufuile ku muengie wa Hore na aye nkubungibua kui muilo waye, 51 muanda anue boso nubaadi bakutue lulamato kuandi munkatshi mua bena Isalele, ku mema a Meriba ku Kadeshe, mu kabaaka ka Sine, muanda tanubaadi bantumbishe kumpala kua muilo wa Isalele. 52 Okamuena eumbo ku bula, anka t’okatuele mu diadia eumbo diampa muilo wa Isalele nya.”

33 Biabia, ino nyi miabi ibaadi Moyise muntu a Efile Mukulu a binyibinyi muelele bena Isalele kumpala ku’aye kufua. 2 Bambile’shi:

 7 Na baadi muelele Yunda ino miabi, amba’shi:

 8 Bua Levi bakuile’shi:

12 Bua Benyamine bakuile’shi:

13 Bua Yosefe bakuile’shi:

18 Bua Zabulone bakuile’shi:

19 Abaketanyina bantu ku muengie.

Kuakua abakalambula milambu yabo ya kululama.

20 Bua Gade bakuile’shi:

“Miabi ikale kui muntu atamisha mikalo ya Gade.

Ba nfumu ba muilo abakebungila pamune.

22 Bua Dane bakuile’shi:

“Dane mmuana a ntambue.

Aketumbu kukatukila ku Bashane.”

23 Bua Neftali bakuile’shi:

Ata bupianyi bua kupona nguba na kuushi.”

24 Bua Ashere bakuile’shi:

“Ashere edibue miabi na bana be bungi.

29 We a muloo, Ô Isalele!

34 Akupu Moyise bakatukile mu kabaaka ka Moabe, aye nkukaamina ku muengie wa Nebo, ku nsongo kua Pisiga, muitalene na Yeriko. Yehowa nkumuleesha eumbo dioso kukatukila ku Gileade mpa na ku Dane, 2 Neftali oso mushima n’eumbo dia Efraime na Manasee, n’eumbo dioso dishima dia Yunda mpa na ku kalunga ka mema ka kupona nguba,* 3 Negebe na kipindi kia nsenga ya Yordane, ebanda dia Yeriko, kibundi kia mabo, mpa na ku Soware.

4 Paapa Yehowa bamulunguile’shi: “Dino nyi eumbo dinaadi muitshipe kui Abalahama, Isaake, na Yakobo, namba’shi: ‘Nakedipa bekulu bobe.’ Nakulesha dianka na meso oobe, anka t’okasabuka bua kuimutuela.”

5 Kunyima kua biabia, Moyise mufubi a Yehowa bafuile kuakua, muiumbo dia Moabe nka bu bibaadi Yehowa muakule. 6 Bamushiikile muibanda muiumbo dia Moabe, ditalene na Bete-peore. Takui muntu su ngumune auku mbalo i mashama aaye mpa na lelo uno. 7 Moyise baadi na bipua 120 pabafuile. Meso aaye ta ngakookie, na baadi’nka ki na mbidi bukome. 8 Bena Isalele babadidile Moyise mu kabaaka ka Moabe munda mua mafuku 30. Akupu, mafuku a maalo a Moyise abapuile.

9 Yoshua muana a Nune baadi muule na kikudi kia binangu, muanda Moyise bamutentekiele eyasa; na bena Isalele bababangile kumuteemesha, na babakitshine nka bu bibaadi Yehowa mulungule Moyise. 10 Anka, mu Isalele tamutuukie ungi mutemuki bu Moyise, baadi Yehowa auku mpala kua mpala. 11 Bakitshine bitunduilo bioso na bilengieleshi bibaadi Yehowa mumutume bua kukita muiumbo dia Ejipitu, kui Faraone na bafubi baye boso, n’eumbo diaye dioso, 12 pamune n’eyasa di bukome, na bukome bukata bubaadi Moyise muleshe mu meso a bena Isalele boso.