YOSHUA

1 Kunyima kua lufu lua Moyise mufubi a Yehowa, Yehowa balunguile Yoshua* muana a Nune, mukuashi a Moyise’shi: 2 “Moyise mufubi ande baafu. Binobino ebuee osabukie Yordane obe na uno muilo oso na otuele mu nsenga yanebapa, yampa muilo wa Isalele. 3 Mbalo yoso ayikashina ngua yenu nakenupa yanka, nka bu binaadi mulee Moyise. 4 Nsenga yenu ayikabangila kukatuka ku kabaaka mpa na ku Lebanone na ku muela ukata, Efrate, nsenga yoso ya bena Ite na ku Kalunga Kakata* dia kupona nguba. 5 Muntu su ngumune t’akobesha kuimana kumpala kobe mafuku a muwa oobe oso. Nakekala nobe nka bu binaadi na Moyise. Tankakulekiela sunga nkusumbushena. 6 Ikala n’eshimba dinyingie, na wekale na bukome, muanda nnobe akakitshi bia’shi uno muilo upiane nsenga inaadi muitshipe kui ba mashabo bua kuibapa yanka.

7 “Ikala nka penda n’eshimba dinyingie na wekale na bukome bui bungi, na okookiele kalolo Muiya oso ubaadi mufubi ande Moyise mukutumine eyi. Tueutupiluanga wenda ku mboko ibalume sunga ku mboko ibakashi, bua’shi okite mianda na binangu koso kuende. 8 Uno mukanda wa Muiya t’abitungu ukatukie kukanua kobe, na abitungu w’eubadikie n’eyi diikie* kanya na bufuku, bua’shi okookiele kalolo bioso bifundibue muanka; biabia mianda yobe ayikende kumpala na paapa okakitshi mianda na binangu. 9 Ntshimukutumine eyi su? Ikala n’eshimba dinyingie na wekale na bukome. Tuekalanga na moo sunga kutshina, muanda Yehowa Efile Mukulu oobe e nobe koso kuende.”

10 Akupu Yoshua nkutumina bakunkushi ba muilo eyi’shi: 11 “Efunyeyi mu kishalelo na nutumine muilo dino eyi’shi: ‘Lumbuulayi bia kudia, muanda mu mafuku asatu’mu anusabuka Yordane bua kutuela na kuata nsenga ayinupa Yehowa Efile Mukulu eenu bu yenu.’”

12 Na Yoshua nkulungula bena Rubene, bena Gade, na kipindi kia kisamba kia Manasee’shi: 13 “Tentekieshayi eyi dibaadi Moyise mufubi a Yehowa muinutumine’shi: ‘Yehowa Efile Mukulu eenu enupa kuikisha na mmuinupe ino nsenga. 14 Bakashi benu, bana benu na bimunuanga bishale mu nsenga inupe Moyise buno bushiya* bua Yordane, anka bilobo bienu bioso bia ngoshi abitungu bisabukie biilumbuule bua kulua ngoshi kumpala kua bakuenu. Abitungu nuibakuashe 15 mpa na p’abapa bakuenu kuikisha kui Yehowa, nka bu biadi muinupe, nabo namu baate nsenga y’abebapa kui Yehowa Efile Mukulu eenu. Akupu nualukiile mu nsenga yabadi benupe bua kushala, na nushale muanka, nsenga yabadi benupe kui Moyise mufubi a Yehowa lupese lua kutunduka nguba kua Yordane.’”

16 Abaluluile Yoshua’shi: “Atukitshi kioso kibuetutumina eyi, na atuende koso kuetutumu. 17 Atukupushisha nka bu bibaatudi atupushisha Moyise mu muanda oso ubaadi muakule. Anka Yehowa Efile Mukulu oobe ekale nobe nka bu bibaadi na Moyise. 18 Muntu oso atombokiela eyi diobe na sh’akookiela eyi dioso di’omutumina ayipayibua. Ikala nka penda n’eshimba dinyingie na wekale na bukome.”

2 Akupu Yoshua muana a Nune nkutuma bana balume babidi mu bufiefie bu ba mpuupa kukatukila ku Shitime. Ebalungula’shi: “Ndayi nukatale nsenga, bikishekishe Yeriko.” Biabia babayile na bafika ku nshibo ya ndumba e n’eshina bu Rahabe, na abo nkushala kuakua. 2 Abo nkulungula nfumu a Yeriko’shi: “Bana balume bena Isalele babafiki muno buno bufuku mu kupuupa nsenga.” 3 Nyi nfumu a Yeriko nkutumina Rahabe eyi’shi: “Tuusha bana balume bafikie na bashale mu nshibo yobe, muanda mbafikie mu kupuupa nsenga yoso.”

4 Anka yawa muana mukashi batshile baba bana balume babidi ebafuamisha. Akupu aye nkuakula’shi: “Oolo, bana balume babidi bafikile kuandi, anka tangukanga ku’abakatukilanga. 5 Patapelanga mufito, nsaa itabakanga kiibi kia kibundi baba bana balume batuukile. Tanguku kuende baba bana balume, anka su nuebalonda bukidi anuibabanga.” 6 (Aku namu baadi muibakaamishe ku musaka na ebafuamisha munkatshi mua tu mitshi tua lin tubaadi mulongie ku musaka.) 7 Biabia baba bantu nkuibalonda muishinda dia ku Yordane mu ma mbalo abasabukila lua ngua, na babaadi bafungie kiibi kia kibundi nka baba bantu babaadi abebalondo baki’abatuuku.

8 Kumpala kua’shi baba ba mpuupa babidi balale, yawa muana mukashi bakaamine mu musaka mubaabadi. 9 Aye nkulungula baba bana balume’shi: “Nauku’shi Yehowa enupa ino nsenga na’shi nuibetukuatshishe moo. Bantu boso ba mu ino nsenga mbabofule ku mashimba pa muanda wenu, 10 muanda tuibapushe bibaadi Yehowa mukamishe mema a Kalunga Kamonga kumpala kuenu pabaanudi bakatukie mu Ejipitu, na bibaanudi bakite ba nfumu babidi ba bena Amore, Sihone na Oge, babaanudi babutule abuaa bungi bushiya* bua Yordane. 11 Patupushishe bianka, tuikeele babofule ku mashimba, na takui muntu su ngumune munyingie eshimba* pa muanda wenu, muanda Yehowa Efile Mukulu eenu nyi Efile Mukulu amuaa muiyilu mula na pano pa nsenga. 12 Binobino nenuseendela namu, etshipeyi kuandi muishina dia Yehowa’shi, pa muanda nenulesha kifulo kia lulamato, anue namu anulesha nshibo ya nshami kifulo kia lulamato; na abitungu numpe kitunduilo akishinkamisha’shi anukakumbasha eyi* dienu. 13 Abitungu nupaashe muwa wa nshami na wa nyinami, na miuwa ya bakuetu balume na bakashi, na ya boso babadi nabo, na abitungu nuitupaashe* ku lufu.”

14 Biabia baba bana balume nkumulungula’shi: “Atutuusha miuwa yetu buenu!* Su tue muakule pabitale kiatudi bafuile, paapa atukakulesha kifulo kia lulamato na lulamato apetupa Yehowa ino nsenga.” 15 Kunyima kua biabia baadi muibayishe p’edidishi na moshi, muanda nshibo yaye ibaadi ilamate ku mudimba wa kibundi. Baadi mushale ku mudimba. 16 Akupu aye nkuibalungula’shi: “Ndayi ku miengie na nufuame kuakua munda mua mafuku asatu, bua’shi baba abenulondo tabenupetanga. Biabia apalukiila baba abenulondo, nui balombene kutungunuka na luendo luenu.”

17 Baba bana balume nkumulungula’shi: “Atukalombasha uno mutshipo ubuetutshipisha 18 nka su p’atutuele muiumbo buanya uno moshi wa buanda bumonga pididii kuididishi kubuetuishisha. Abitungu obungie nshobe, nyinobe, bakuenu na ba mu nshibo ya nshobe boso mu nshibo mobe. 19 Su muntu atuuka paasha pa nshibo yobe, mase aaye aekala pa mutue waye, na atue tatuikala na muanda. Anka su muanda wi bubi wafikila* muntu su ngumune ashala nobe mu nshibo, mase aaye aekala pa mitue yetu. 20 Anka su wakula kiatudi bafuile, t’atukalombasha mutshipo wekeele muitutshipishe.” 21 Aye nkuibalula’shi: “Bikitshikie muyile mayi eenu.”

Akupu aye nkuibatadiila na abo nkuenda. Kunyima aye nkuanya moshi umonga pididii kuididishi. 22 Biabia babakatukile na benda ku miengie na bashala kuakua munda mua mafuku asatu, mpa na pabalukiile baba babaadi abebalondo. Bantu babaadi abebalondo babaadi bebakimbe mu mashinda oso anka ta babaadi bebapete. 23 Akupu baba bana balume babidi nkuika ku miengie na nkusabuka muela, nkufika kui Yoshua muana a Nune. Abo nkumulondela mianda yoso ibaadi ibakitshikile. 24 Abo nkulungula Yoshua’shi: “Yehowa betupa nsenga ishima. Bantu boso ba mu ino nsenga mbabofule ku mashimba pa muanda wetu.”

3 Akupu Yoshua nkuibua namashika buee na aye na bena Isalele* boso nkukatuka ku Shitime na nkufika ku Yordane. Abo nkulaala kuakua kumpala kua kusabuka.

2 Kunyima kua mafuku asatu, bakunkushi nkuifunya mu kishalelo 3 na nkutumina muilo eyi’shi: “Nka’nue baki’abamono ba tshite muakuidi bena Levi mbasemune mushete wa kilombeno wa Yehowa Efile Mukulu eenu, nukatukie mbalo yanudi na nuiulonde. 4 Anka nuikale nao kula kipindi kia kude* pepi na 2 000; tanuifubuilanga pepi nao su nkapeela, bua’shi nuukie eshinda dia kuenda, muanda tanuayile dingi mu dino eshinda.”

5 Nyi Yoshua nkulungula muilo’shi: “Eyikasheyi ba kishila, muanda maloba Yehowa akitshi mianda ya kukaanya munkatshi muenu.”

6 Akupu Yoshua nkulungula ba tshite muakuidi’shi: “Semunayi mushete wa kilombeno na nukile kumpala kua muilo.” Biabia abo nkusemuna mushete wa kilombeno na nkukila kumpala kua muilo.

7 Akupu Yehowa nkulungula Yoshua’shi: “Lelo uno nabanga kukutumbisha ku meso kua Isalele oso, bua’shi baukie’shi nekala nobe nka bu binaadi na Moyise. 8 Tumina ba tshite muakuidi basemune mushete wa kilombeno dino eyi’shi: ‘Nka nukianuashina mu mema a Yordane, nushale bemane mu Yordane.’”

9 Na Yoshua nkulungula bena Isalele’shi: “Fikayi pano na nuteemeshe mayi a Yehowa Efile Mukulu eenu.” 10 Akupu Yoshua nkuakula’shi: “Ku bino nkuanukauku’shi Efile Mukulu ena muwa e munkatshi muenu, na’shi akabingi binyibinyi kumpala kuenu bena Kanaana, bena Ite, bena Ivii, bena Perizi, bena Girgashi, bena Amore, na bena Yebuse. 11 Mushete wa kilombeno wa Nfumu a nsenga yoso ukuete aukidi kumpala kuenu autuele mu Yordane. 12 Binobino atayi bantu 12 ba mu bisamba bia Isalele, muntu umune mu kisamba kioso, 13 nka ngua ya ba tshite muakuidi basemune mushete wa Yehowa, Nfumu a nsenga yoso iki’ayikumu mema a Yordane, mema a Yordane aafiki kunundu aalekie kualaala na emane bu mudimba.”

14 Biabia pabakatukile muilo ku tushibo tuabo tua mapema kumpala kua kusabuka Yordane, ba tshite muakuidi babaadi basemune mushete wa kilombeno babakidile kumpala kua muilo. 15 Nka bantu babaadi basemune Mushete baki’abafiki ku Yordane na ba tshite muakuidi babaadi basemune Mushete bashine mu mema (Yordane aulaa akidi mpa na ku biese biaye mafuku oso a kuumbula), 16 mema abaadi aalaala aafiki kunundu abeemene. Ao nkuimana bu mudimba kula ngofu ku Adama kibundi ki pepi na Saretane, pabaadi mema aalaala dia ku Kalunga ka mema ka Araba, Kalunga ka mungua* akame, mema abalekiele kualaala. Na muilo nkusabuka bushiya buitalene na Yeriko. 17 Pabaadi ba tshite muakuidi babaadi basemune mushete wa kilombeno wa Yehowa bashale bemane pa nsenga yuume munkatshi mua Yordane, Isalele oso basabukile pa nsenga yuume mpa na pabapuile muilo oso kusabuka Yordane.

4 Nka muilo oso uki’aupu kusabuka Yordane, Yehowa balunguile Yoshua’shi: 2 “Ata bana balume 12 mu muilo, muana mulume umune ku kisamba kioso, 3 na ebatumine dino eyi’shi: ‘Atayi mabue 12 munkatshi mua Yordane, mu mbalo ikeele ngua ya ba tshite muakuidi imane, na nuiatuale, nuende nao na nuiatuule mu mbalo y’anulala.’”

4 Biabia Yoshua nkuitanyina bana balume 12 babaadi musangule mu bena Isalele, muana mulume umune ku kisamba kioso, 5 na Yoshua nkuibalungula’shi: “Kilayi kumpala kua mushete wa Yehowa Efile Mukulu eenu munkatshi mua Yordane, na oso a kuanudi asemune ebue dimune kuipampa diaye muyile bungi bua bisamba bia bena Isalele, 6 buaadia kuikala bu kitunduilo munkatshi muenu. Su mu mafuku e kumpala bana* benu benuipusha’shi, ‘Buakinyi nui na ano mabue?’ 7 Abitungu nuibalungule’shi: ‘Mema a Yordane abaadi emane kumpala kua mushete wa kilombeno wa Yehowa. Paubaadi usabukie Yordane, mema a Yordane abaadi emane. Ano mabue aekala bu kitentekiesho kia loso kui muilo wa Isalele.’”

8 Biabia bena Isalele abakitshine nka bu bibaadi Yoshua muibatumine eyi. Abo nkuata mabue 12 munkatshi mua Yordane nka bu bibaadi Yehowa mulungule Yoshua, buaadia kuikala bungi bui mumune na bua bisamba bia bena Isalele. Abo nkuiata, nkuenda nao ku mbalo ibaabadi na kia kulala na nkuiatuula paapa.

9 Yoshua namu nkuimika mabue 12 munkatshi mua Yordane pa mbalo ibaadi ngua ya ba tshite muakuidi abaadi basemune mushete wa kilombeno imane, na aa mabue a ki yaaya mbalo mpa na lelo.

10 Ba tshite muakuidi babaadi basemune mushete abashele bemane munkatshi mua Yordane, mpa na pabakumbene mianda yoso ibaadi Yehowa mutumine Yoshua eyi bua kulungula muilo bua kukita mu kuipushena na bioso bibaadi Moyise mutumine Yoshua eyi. Yaaya nsaa yoso muilo ubaadi ausabuka bukidibukidi. 11 Nka muilo oso uki’aupu kusabuka, mushete wa Yehowa na ba tshite muakuidi abasabukile namu muilo aumono. 12 Na bena Rubene, bena Gade, na kipindi kia kisamba kia Manasee abasabukile kumpala kua bangi bena Isalele belumbuule bua ngoshi, nka bu bibaadi Moyise muibalungule. 13 Basalayi pepi 40 000 be na bina ngoshi abasabukile kumpala kua Yehowa batadiile ku kabaaka ka Yeriko.

14 Mu diadia efuku Yehowa baadi mutumbishe Yoshua mu meso mua Isalele oso, na abaadi bamunemekie ngofu munda mua mafuku a muwa waye oso, nka bu bibaabadi banemekie Moyise ngofu.*

15 Akupu Yehowa nkulungula Yoshua’shi: 16 “Tumina ba tshite muakuidi basemune mushete wa bu Kamonyi eyi buabadia kutuuka mu Yordane.” 17 Biabia Yoshua nkutumina ba tshite muakuidi eyi’shi: “Tuukayi mu Yordane.” 18 Pabaadi ba tshite muakuidi basemune mushete wa kilombeno wa Yehowa batuukie munkatshi mua Yordane, na pabaadi ngua ya ba tshite muakuidi yashine pa nsenga yuume, mema a Yordane ababangile dingi kualaala na ao nkuula mpa na ku biese nka bu kumpala.

19 Muilo ubasabukile Yordane muifuku di’ekumi dia mueshi wa kumpala, na ao nkushala ku Gilegale ku mukalo wa kutunduka nguba kua Yeriko.

20 Anka bua aa mabue 12 abaabadi baate ku Yordane, Yoshua baadi muiemikie ku Gilegale. 21 Akupu Yoshua nkulungula bena Isalele’shi: “Mu mafuku aafiki, bana benu p’abakepusha ba mashabo’shi, ‘Ano mabue aapushisha kinyi?’ 22 Nupatuluile bana benu’shi: ‘Isalele baadi musabukie Yordane pa nsenga yuume 23 pabaadi Yehowa Efile Mukulu eenu mukamishe mema a Yordane kumpala kuabo mpa na pabaabadi bamusabukie, nka bu bibaadi Yehowa Efile Mukulu eenu mukite kalunga kamonga pabaadi muikakamishe kumpala kuetu, mpa na pabaatudi bekasabukie. 24 Baadi mukite bino bua’shi miilo yoso ya pa nsenga iukie bi eyasa dia Yehowa na bukome, na bua’shi nuikale nka anutshinyi Yehowa Efile Mukulu eenu.”

5 Mususa umune pabaadi ba nfumu boso ba bena Amore babaadi lupese lua* kupona nguba kua Yordane na ba nfumu boso ba bena Kanaana, babaadi pepi na kalunga ka mema bapushe’shi, Yehowa baadi mukamishe mema a Yordane kumpala kua bena Isalele mpa na p’abaabadi basabukie, babaadi babofule ku mashimba na t’ababaadi dingi n’eshimba dinyingie* pa muanda wa bena Isalele.

2 Mu kiakia kipungo, Yehowa balunguile Yoshua’shi: “Kita tupete tua mabue na osale* bana balume ba Isalele.” 3 Biabia Yoshua bakitshine tupete tua mabue na asala bana balume ba Isalele ku Gibeate-aralote.* 4 Yoshua baadi muibasale muanda’shi bana balume boso ba muilo babaadi batuukie mu Ejipitu, bana balume boso babaadi na bipua bia kuenda ku ngoshi, babaadi bafuile muishinda mu kabaaka kunyima kuabo kutuuka mu Ejipitu. 5 Bana balume boso babaadi batuukie mu Ejipitu babaadi bapue kusadibua, anka bana balume boso babaadi batandikue muishinda mu kabaaka kunyima ku’abo kutuuka mu Ejipitu, t’ababaadi basadibue. 6 Bena Isalele babaadi batambukie bipua 40 mu kabaaka mpa na pabafuile muilo oso, kuamba’shi bantu babaadi na bipua bia kuenda ku ngoshi babaadi batuukie mu Ejipitu bashibaadi bakookiele eyi dia Yehowa. Yehowa baadi muitshipe kuabadi’shi t’ebatadiila buabadia kumona nsenga ibaadi Yehowa muitshipe kui ba mashabo kulu bua kuitupa, nsenga ayalala mabeele na buuki. 7 Biabia bana babo balume babaatshile mbalo yabo. Baba babaadi Yoshua musale; t’ababaadi basadibue muanda t’ababaadi bebasale mu luendo.

8 Pababapuile kusala bana balume boso, babaadi bashale mbalo ibaabadi mu kishalelo mpa na pabaadi papande malonda.

9 Akupu Yehowa nkulungula Yoshua’shi: “Lelo uno nakatusha kuanudi kusengibua kua bena Ejipitu.” Biabia abo nkuitanyina yaaya mbalo bu Gilegale* mpa na lelo uno.

10 Bena Isalele abatungunukile na kushala ku Gilegale, na babakitshine Pasaka muifuku 14 dia mueshi, ku kiolua mu kabaaka ka Yeriko. 11 Na bababangile kudia bintu bia mu yaaya nsenga efuku dibalondele Pasaka, mikate ishi kitatusho na ntete ikangie, nka mu diadia efuku dimune. 12 Biabia mane abalekiele kumueneka muifuku dibalondele pababaadi badie bingi bintu bia mu yaaya nsenga; takubaadi dingi mane bua bena Isalele, anka ababangile kudia bintu bia mu nsenga ya Kanaana mu kiakia kipua.

13 Pabaadi Yoshua pepi na Yeriko, babushile meso na amona muntu muimane kumpala kuaye na lupete lua ngoshi muiyasa diaye. Yoshua bayile kuadi na amuipusha’shi: “We ku lupese luetu su we ku lupese lua beshikuanyi betu?” 14 Aye nkumualula’shi: “Nya, anka nafiki bu nfumu a kiluilo kia Yehowa. Biabia Yoshua nkupona, nkukupila mpala paashi, nkuinama na nkumulungula’shi: “Nfumuami e na muanda kinyi wa kulungula mufubi aaye?” 15 Nfumu a kiluilo kia Yehowa nkualula Yoshua’shi: “Fuula sandale yobe, muanda mbalo yodi muimane ngia kishila.” Musango umune Yoshua nkukita nka biabia.

6 Anka Yeriko baadi mufungibue bi bukopo muanda wa bena Isalele; takui muntu su ngumune baadi atuuku na takui muntu su ngumune baadi atuele.

2 Akupu Yehowa nkulungula Yoshua’shi: “Tala, nakupa Yeriko na nfumu aaye na bilobo biaye bia ngoshi. 3 Anue boso bantu abalu ngoshi abitungu nuifunye kibundi, nuende na kuifunya kibundi musango umune. Anukitshi biabia munda mua mafuku asamombo. 4 Nuikale na ba tshite muakuidi musambobidi basemune mpungi ya nsengua ya mukooko ulume musambobibi kumpala kua Mushete. Anka muifuku dia musambobidi, abitungu nuende na kuifunya kibundi misango musambobidi na abitungu ba tshite muakuidi beele mpungi. 5 Apadidi nsengua ya mukooko ulume, nka nuki’anupusha kudila kua mpungi,* abitungu bantu boso beele musaase wi bukopo wa ngoshi. Paapa mudimba wa kibundi aupono paashi, na bantu abatuele, muntu oso mululame kumpala kuaye.”

6 Biabia Yoshua muana a Nune nkubunga ba tshite muakuidi na nkuibalungula’shi: “Atayi mushete wa kilombeno, na abitungu ba tshite muakuidi musambobidi basemune mpungi ya nsengua ya mukooko ulume musambobidi kumpala kua Mushete wa Yehowa.” 7 Akupu aye nkulungula bantu’shi: “Bangayi luendo nuende na kuifunya kibundi, na abitungu basalayi bena bina ngoshi bakile kumpala kua Mushete wa Yehowa.” 8 Nka bu bibaadi Yoshua mulungule bantu, ba tshite muakuidi musambobidi basemune mpungi ya nsengua ya mukooko ulume musambobidi kumpala kua Yehowa, abakidile kumpala, beela mpungi na mushete wa kilombeno wa Yehowa ubaadi awibalondo. 9 Na basalayi be na bina ngoshi abakidile kumpala kua ba tshite muakuidi abaadi abende na kuela mpungi, na bangi basalayi abaadi kunyima kua Mushete pabaadi mpungi ayende na kudila.

10 Yoshua baadi mutumine bantu eyi’shi: “Tanuelanga musaase. Sunga mayi eenu taapushikanga, kishima su nkimune takitukanga mukanua muenu mpa n’efuku dianenulungula’shi, ‘Elayi misaase!’ Paapa nyi p’anuele misaase.” 11 Baadi mukite bia’shi Mushete wa Yehowa wifunye kibundi, wikifunye mususa umune, kunyima abalukiile mu kishalelo na abo nkulaala kuakua.

12 Efuku dibalondele Yoshua babuukile ku namashika buee, na ba tshite muakuidi abasemuine Mushete wa Yehowa, 13 na ba tshite muakuidi musambobidi basemune mpungi ya nsengua ya mukooko ulume musambobidi abaadi abatambuka kumpala kua Mushete wa Yehowa, bendanga na kuela mpungi. Basalayi be na bina ngoshi abaadi abende kumpala kuabo pabaadi bangi basalayi abalondo Mushete wa Yehowa nsaa ibaadi mpungi ayende na kudila. 14 Muifuku dia kabidi abaadi befunye kibundi mususa umune, kunyima abalukiile ku kishalelo. Abakitshine biabia munda mua mafuku asamombo.

15 Muifuku dia musambobidi ababuukile namashika buee nka bufuku buki’abutooko, na abo nkuifunya kibundi mu mushindo umune misusa musambobidi. Nka mu diadia efuku dimune nyi mubaabadi befunye kibundi misusa musambobidi. 16 Na pa mususa wa musambobidi, ba tshite muakuidi abelele mpungi, na Yoshua nkulungula bantu’shi: “Elayi misaase, muanda Yehowa benupa kibundi! 17 Kibundi na bintu bioso bi muanka mbia kubutula; bioso mbia Yehowa. Nka penda Rahabe ndumba nyi mulombene kushala na muwa, aye na boso badi nabo mu nshibo, muanda baadi mufuamishe mikiendi yatutumine. 18 Anka tanuatanga kintu kioso kia kubutula, bua’shi tanulakilanga kintu kia kubutula na nuekiata, nuekasha kishalelo kia Isalele bu kintu kia kubutula pa kuikifuishila makienga.* 19 Anka kiamo kia arja kioso, ôlo oso na bintu bioso bia kiamo kia munyinga, na kiamo kioso, mbia kishila bua Yehowa. Abitungu biende mu mbalo ya kulamina bintu bia muulo bia nshibo ya Yehowa.”

20 Akupu bantu nkuela musaase pabaabadi bapushe kudila kua mpungi. Nka bantu baki’abapusha kudila kua mpungi na beela musaase wi bukopo wa ngoshi, mudimba ubaponene paashi. Kunyima kua biabia bantu abatuelele mu kibundi, muntu oso mululame kumpala kuaye, na abakuatshile kibundi. 21 Ababutuile bioso bibaadi mu kibundi ku lupete lua ngoshi, bana balume, bana bakashi, ba nsongua na banunu, ngombe, mikooko na mpunda.

22 Yoshua nkulungula bana balume babidi abayile mu kupuupa nsenga’shi: “Ndayi mu nshibo mua yawa ndumba, numutuushe na bantu baye boso, nka bu bianubaadi betshipe kuadi.” 23 Biabia baba ba nsongualume ba mpuupa abatuelele na abo nkutuusha Rahabe pamune na nshaye, nyinaye, bakuabo, na bantu baye boso; oolo abatuushile kifuko kiaye kioso, na bebatuala kushi masaku mu mbalo kampanda paasha pa kishalelo kia Isalele.

24 Akupu abashiikile kibundi na bintu bioso bi muanka kaalo. Anka kiamo kia arja, ôlo, bintu bia kiamo kia munyinga,* na kiamo abaadi bebituule mu mbalo ya kulamina bintu bia muulo bia nshibo ya Yehowa. 25 Nka penda Rahabe ndumba na ba mu nshibo mua nshaye na bantu baye boso nyi babaabadi bapaashe kui Yoshua; na mmushale mu Isalele mpa na lelo, muanda baadi mufuamishe mikiendi ibaadi Yoshua mutume bua kupuupa Yeriko.

26 Mu aa mafuku Yoshua bakitshine uno mutshipo’shi:* “Muntu abanga kuibakuula kino kibundi kia Yeriko edibue mulua kumpala kua Yehowa. P’ashimika bitako biakio muan’aye mbedi afu, p’eele biibi biakio muan’aye a mukala afu.”

27 Biabia Yehowa baadi na Yoshua, na nkumo yaye ibapalakene pa nsenga ishima.

7 Anka bena Isalele abaadi bakutue lulamato pabitale bintu bibaadi na kia kubutudibua, muanda Akane muana a Karmi, muana a Zabadi, muana a Zera, a mu kisamba kia Yunda, batshile bimune bia ku bintu bibaadi abitungu kubutula. Pa muanda wa biabia nsungu ya Yehowa nkutembela bena Isalele.

2 Akupu Yoshua batumine bantu kukatukila ku Yeriko benda ku Ai, e pepi na Bete-awene, na kutunduka nguba kua Betele, ebalungula’shi: “Kaaminayi na nupuupe nsenga.” Biabia baba bantu babakaamine na bapuupa Ai. 3 Pabaabadi balukile kui Yoshua, babamulunguile’shi: “T’abitungu’shi bantu boso bakaamine kuanka. Bantu bafikie ku binunu bibidi sunga bisatu mbakumbane bua kutshokola Ai. Tokokieshanga bantu boso pa kuibatuma kuakua, muanda kui bantu bapeela.”

4 Biabia bantu bafikie ku 3 000 babakaamine kuanka, anka abo nkusuuka bantu ba ku Ai. 5 Bantu ba ku Ai nkuipaa bantu 36, na abo nkuibalonda kukatukila paasha pa kibelo kia kibundi mpa na ku Shebarime,* na abo nkutungunuka na kuibayipa mu ngalaala. Biabia bantu nkubofula ku mashimba na abo nkupusha moo.

6 Nyi Yoshua nkusaana bilamba biaye na nkupona nkukupila mpala paashi kumpala kua Mushete wa Yehowa mpa na ku kiolua, aye na bakulu ba Isalele na babaadi nka abepongo lufuinkinyi ku mitue yabo. 7 Yoshua nkuakula’shi: “Muanana Nfumu Yehowa, buakinyi bosabusha uno muilo oso Yordane penda bua kuitutuula mu maasa a bena Amore bua’shi betubutule? Tubadia kuikala winyi bashale abuaa bushiya* bua Yordane! 8 Nfuile lusa Yehowa, nkinyi kiandia kuakula binobino pano pa basuuku* Isalele kumpala kua beshikuanyi baye? 9 Apakebipusha bena Kanaana na bantu boso ba mu yaaya nsenga, abaketuifunyisha na bashime eshina dietu pa nsenga, paapa okakitshi kinyi pabitale eshina diobe dikata?”

10 Yehowa nkualula Yoshua’shi: “Ebuee! Buakinyi we mukupile mpala yobe paashi? 11 Isalele mmukite muluisho. Mbayipee kilombeno kiande kianekeele muibatumine eyi buabadia kukookiela. Mbaate bimune bia ku bintu abitunganga kubutula, bebiyiba na bebifuamisha mu bintu biabo. 12 Nyi buakinyi bena Isalele t’abakobesha kutshokola beshikuanyi babo. Abakaluluka na basuukie beshikuanyi babo, muanda babekala bu kintu kia kubutula. Su tanui bakatushe munkatshi muenu kintu kia kubutula tanekala dingi nenu. 13 Ebuee na oyikashe muilo bu wa kishila! Ebalungule’shi, ‘Malooba eyikasheyi ba kishila, muanda Yehowa Efile Mukulu a Isalele bakula bino’shi: “Kintu kia kubutula ki munkatshi muenu, Ô Isalele. T’anukobesha kutshokola beshikuanyi benu mpa na p’anukatusha kintu kia kubutula munkatshi muenu. 14 Anufiki ku namashika, kisamba ku kisamba, na kisamba ki’abasangula kui Yehowa akifubuila pepi, kifuko ku kifuko, na kifuko ki’abasangula kui Yehowa akifubuila pepi, nshibo na nshibo, na nshibo y’abasangula kui Yehowa ayifubuila pepi muntu ku muntu. 15 Na yawa abakuata na kintu kia kubutula ashiikibua kaalo, aye na biaye bioso, muanda bayipaa kilombeno kia Yehowa na pa muanda bakitshi kintu ki buufu mu Isalele.”’”

16 Biabia Yoshua babuukile ku namashika buee na ayitanyisha Isalele, kisamba ku kisamba, na kisamba kia Yunda nkusangudibua. 17 Aye nkuitanyisha bifuko bia Yunda bua’shi bifubuile pepi, na kifuko kia bena Zera kibaadi kisangudibue, kunyima aye nkuitanyisha kifuko kia bena Zera bua’shi kifubuile pepi, muntu ku muntu, na Zabadi baadi musangudibue. 18 Nfudiilo a bioso aye nkuitanyisha nshibo ya Zabadi bua’shi ifubuile pepi, muntu ku muntu, na Akane muana a Karmi, muana a Zabadi, muana a Zera a mu kisamba kia Yunda baadi musangudibue. 19 Akupu Yoshua nkulungula Akane’shi: “Muana ande, nakusendeela, tumbisha Yehowa Efile Mukulu a Isalele na tonda kuadi. Ndungule namu kibokitshi. Tuekinfuamishanga.”

20 Akane nkualula Yoshua’shi: “Binyibinyi nnami mukitshine Yehowa Efile Mukulu a Isalele muluisho, na bino nyi biandi mukite. 21 Pammuene munkatshi mua bintu bipaulue kilamba ki buwa kia muulo akifiki ku Shineare na shekele* 200 ya kiamo kia arja, na mulungo umune wa ôlo wi bushito bua shekele 50 nemuibilakile na nebiata. Mbishiikue mu nsenga mu kashibo kande k’epema pamune na makuta muushi muabio.”

22 Mususa umune Yoshua nkutuma bantu, abo nkuenda lubilo ku kashibo k’epema. Na kilamba kibaadi kifuamishue mu kashibo kaye k’epema na makuta muushi muakio. 23 Biabia abo nkutuusha biabia bintu mu kashibo k’epema na nkuibituala kui Yoshua na kui bena Isalele boso na abo nkuibituula kumpala kua Yehowa. 24 Akupu Yoshua pamune na Isalele oso babatshile Akane muana a Zera, kiamo kia arja, kilamba kia muulo, mulungo wa ôlo, pamune na bana baye balume, bana baye bakashi, ngombe yaye, mpunda yaye, mikooko yaye na mbushi yaye, kashibo kaye k’epema, na bintu biaye bioso, na benda nabo Muibanda dia Akore. 25 Yoshua nkuakula’shi: “Buakinyi buetutuadila makienga?* Yehowa a kutuadila makienga lelo uno.” Nyi Isalele oso nkumuasa mabue na kifuko kiaye, kunyima abo nkuibashiika kaalo. Bino nyi bibaabadi bebayipee boso na mabue. 26 Na bababungile mututo ukata wa mabue kunundu kuaye, wi kuanka mpa na lelo uno. Nyi nsungu ikata ya Yehowa nkuika. Nyi buakinyi abetanyina yaaya mbalo bu Ebanda dia Akore* mpa na lelo uno.

8 Akupu Yehowa nkulungula Yoshua’shi: “Totshinanga sunga kuikala na moo. Ata bantu boso abaluiya ngoshi wende mu kutuuka Ai ngoshi. Tala, natuulu nfumu a Ai, muilo waye, kibundi kiaye, na nsenga yaye mu maasa oobe. 2 Kita Ai na nfumu aaye nka bu biokitshine Yeriko na nfumu aaye, anka nuate bintu bipaulue bia muanka na nyema bua’shi bikale bienu. Tuula bantu buabadia kubelama kunyima kua kibundi.”

3 Biabia Yoshua na bantu boso abaluiyaa ngoshi abayile mukutuuka Ai ngoshi. Yoshua nkusangula bilobo bia ngoshi 30 000 na nkuibatuma bufuku. 4 Aye nkuibatumina dino eyi’shi: “Talayi, abitungu nubelame kunyima kua kibundi. Tanuendanga kula ngofu na kibundi, na anue boso nuikale belumbuule. 5 Ami na bantu boso bandi nabo atuifubuila pepi na kibundi, na p’abatuuku bua kulua netu bu mususa wa kumpala, atuibasuuku. 6 P’abetulondo, atuibakakila kula na kibundi, muanda abakula’shi, ‘Bakuete kuitusuuka nka bu mususa wa kumpala.’ Na atuibasuuku. 7 Paapa anukatuka mbalo yanudi babelame nukuate kibundi; Yehowa Efile Mukulu eenu ekituulu mu maasa eenu. 8 Nka nukianukuata kibundi, nuikishiikie kaalo. Abitungu nukite muyile eyi dia Yehowa. Ano nyi mayi ande anenutumina.”

9 Akupu Yoshua nkuibatuma na abo nkuenda ku mbalo yabadia kubelama: abo nkubelama pankatshi pa Betele na Ai, dia kupona nguba kua Ai, anka Yoshua na baba bangi bantu nkulala buabua bufuku.

10 Kunyima Yoshua nkubuuka ku namashika buee na nkubunga basalayi, aye na bakulu ba Isalele nkuenda nabo ku Ai. 11 Bantu boso abaluiyaa ngoshi babaadi naye, abayile batadiile ku kibundi. Abo nkutuula kishalelo kiabo dia kunundu kua Ai. Ebanda dibaadi pankatshi p’abo na Ai. 12 Yaaya nsaa baadi mupue kuata bantu bafikie ku 5 000 ebatuula buabadia kubelama pankatshi pa Betele na Ai, dia kupona nguba kua kibundi. 13 Biabia bantu abatuudile kishalelo kikata dia kunundu kua kibundi na bantu abalamaa ku mongo abaadi ku lupese lua kupona nguba kua kibundi, na Yoshua nkuenda buabua bufuku munkatshi mu’ebanda.

14 Nka nfumu a Ai ki’amono bino, aye na bantu ba mu kibundi abatuukile bukidibukidi ku namashika buee bua kulua ngoshi na Isalele ku mbalo kampanda italene na kabaaka. Anka tabaadi auku’shi mbamubelamine dia kunyima kua kibundi. 15 Pabaadi bantu ba mu Ai bebatuukie ngoshi, Yoshua na Isalele oso babasuukile muishinda dia ku kabaaka. 16 Akupu abaadi betanyine bantu boso ba mu kibundi buabadia kuibalonda; pabaabadi abalondo Yoshua abaadi abakakiibua kula na kibundi. 17 Takubaadi muana mulume su ngumune baadi mushale mu Ai na mu Betele shibaadi muende mu kulonda Isalele. Abalekiele kibundi kioso muasa na benda mu kulonda Isalele.

18 Yehowa nkulungula Yoshua’shi: “Funka mulumbu wi muiyasa diobe dia ku Ai, muanda nakupa anka muiyasa diobe.” Biabia Yoshua nkufunka mulumbu ubaadi muiyasa diaye dia ku kibundi. 19 Nsaa ibaadi Yoshua moole eyasa diaye bantu abaadi babelame abebuele bukidibukidi mbalo ibaabadi na abo nkutuela lubilo mu kibundi, nkuikikuata. Na abo nkushiika kibundi kaalo mususa umune.

20 Pabaadi bantu ba ku Ai balulukie, abamuene miishi ya kaalo ayituuku mu kibundi ayikaamina muiyilu, na tababaadi na bukome bua kusuukila ku lupese su ndumune. Akupu bantu abaadi abasuukila dia ku kabaaka abalulukile babanga kuibalonda. 21 Pabaadi Yoshua na Isalele oso bamone’shi bantu babaadi babelame babakuata kibundi na pabaabadi bamone miishi ya kaalo ayituuku mu kibundi ayikaamina, abalulukile na abo nkubanga kulua na bantu ba mu Ai. 22 Na baba babaadi bakuate kibundi abatuukile bua kufumankana nabo, biabia bantu ba mu Ai nkutuela munkatshi mua bena Isalele babaadi luno lupese na bangi abaadi alua lupese, na abo nkuibayipaa mpa na paku’shibaadi kushale muntu e na muwa su ngumune sunga baadi musuukie. 23 Anka abo nkukuata nfumu a Ai na muwa na abo nkumutuala kumpala kua Yoshua.

24 Kunyima kua Isalele kupudisha kuipaa bantu boso ba mu Ai mu mapia, mu kabaaka mubaabadi bebalonde, na kunyima kua kuipaa muntu a nfudiilo ku lupete lua ngoshi, Isalele oso balukiile ku Ai na ayipaa boso babashele muanka ku lupete lua ngoshi. 25 Boso babafuile mu diadia efuku, kubanga ku bana balume mpa na ku bana bakashi babaadi 12 000, bantu boso ba mu Ai. 26 Yoshua tabaadi mualushe eyasa dibaadi mufunkie nadio mulumbu mpa na pabaadi mubutule bantu ba mu Ai boso. 27 Anka Isalele nkuata nyema bu yaye na bintu bipaulue bia mu kibundi muyile mayi abaadi Yehowa mutumine Yoshua.

28 Yoshua nkushiika Ai kaalo na nkumuikasha bu mututo wa mabue, wi kuanka mpa na lelo uno. 29 Aye nkupudika nfumu a Ai ku mutshi mpa na ku kiolua, na pabaadi nguba pa kutuela, Yoshua nkutuma eyi bua’shi bayishe kitanda kiaye ku mutshi. Akupu abo nkuikisumbula ku kituelelo kia kibelo kia kibundi na nkuibuesha mututo ukata wa mabue paadi, wi kuanka mpa na lelo uno.

30 Kunyima kua biabia Yoshua baadi muibakile Yehowa Efile Mukulu a Isalele kilambuilo ku Muengie wa Ebale, 31 nka bu bibaadi Moyise mufubi a Yehowa mutumine bena Isalele eyi na bu biabidi bifundibue mu mukanda wa Muiya wa Moyise’shi: “Kilambuilo kia mabue ashima abashi bafube na kina mufubo kia kiamo su nkimune.” Abo nkulambula panka milambu ya kushiika kaalo kui Yehowa mpa na milambu ya butaale.

32 Aye nkutentuila kuakua ku mabue Muiya ubaadi Moyise mufunde kumpala kua bena Isalele. 33 Bena Isalele boso, bakulu babo, bakunkushi, na ba nsushi babo abaadi bemane ku mpese yoso ibidi ya Mushete betalene na ba tshite muakuidi bena Levi abaadi basemune mushete wa kilombeno wa Yehowa. Bantu benyi babaadi panka mpa na bena Isalele ba butandua. Kia pankatshi kiabo kibaadi kimane kitalene na Muengie wa Garizime na kingi kia pankatshi kitalene na Muengie wa Ebale (nka bu bibaadi Moyise mufubi a Yehowa mupue kutuma eyi), bua kuelela muilo wa Isalele miabi. 34 Kunyima babadikile n’eyi di bukopo mayi oso e mu Muiya, miabi na milua, muyile bioso bibaadi bifundibue mu mukanda wa Muiya. 35 Ta kubaadi eyi su ndimune dia ku mayi oso abaadi Moyise mutume eyi dishibaadi Yoshua mubadikie n’eyi di bukopo kumpala kua kakongie koso ka Isalele mpa na kua bana bakashi, bana na benyi abaadi bashale* munkatshi muabo.

9 Pabaadi ba nfumu boso babaadi ku lupese lua kutunduka nguba kua Yordane bapushe bibaadi bikitshikie, baba be ku miengie, mu Shefela, ku bukunkula boso bua Kalunga Kakata,* na betalene na Lebanone, bena Ite, bena Amore, bena Kanaana, bena Perizi, bena Ivii, na bena Yebuse— 2 abaadi bebungie pamune bua kulua ngoshi na Yoshua na Isalele.

3 Bantu ba mu Gibeone namu babaadi bapushe bibaadi Yoshua mukite Yeriko na Ai. 4 Biabia abakitshine mianda na mayele na baata bia kudia beela mu mifuko iluile beyitenteka pa mpunda yabo, pamune na malondo a nfinyo a misokia ya nyema abaadi atanyikie na beateluula; 5 ku ngua babaadi na sandale iluile yabadi batele, na babaadi bafuale bilamba biluile. Mikate yoso ibaabadi batuale ibaadi yume na ayifingakana. 6 Akupu abo nkuenda kui Yoshua ku kishalelo ku Gilegale na nkumulungula aye na bantu ba Isalele’shi: “Atufiki kuiumbo di kula. Biabia kitayi namu netu kilombeno.” 7 Anka bantu ba Isalele nkulungula bena Ivii’shi: “Pangi nui bashale pepi netu. Biabia mbikunyi biatudia kukita nenu kilombeno?” 8 Abo nkualula Yoshua’shi: “Tui bafubi* bobe.”

Nyi Yoshua nkuibepusha’shi: “Nui bananyi na anufiki kunyi?” 9 Abo nkumualula’shi: “Bafubi bobe abafiki kuiumbo di kula ngofu pa muanda w’eshina dia Yehowa Efile Mukulu oobe, muanda tui bapushe pabitale nkumo yaye na bioso biadi mukite mu Ejipitu 10 na pabitale bioso bibaadi mukite ba nfumu babidi ba bena Amore babaadi abuaa bushiya* bua Yordane, nfumu Sihone a Eshebone na nfumu Oge a Bashane baadi mu Ashetarote. 11 Nyi buakinyi bakulu betu na bantu boso ba muiumbo dietu babetulungula’shi, ‘Atayi bia kudia bua luendo na nuende mu kufumankana nabo. Nuibalungule’shi: “Atuikala bafubi benu; biabia kitayi namu netu kilombeno.”’ 12 Ino mikate yatuatshile bu bia kudia bietu ikiikele kaalo muifuku diatukatukile ku mashibo eetu bua kufika kuanudi. Binobino ibapu kuuma na ayifingakana. 13 Na ano malondo a nfinyo a misokia ya nyema ekeele apia patuikeele beaushe, anka binobino abapu kutanyika. Na bilamba bietu na sandale yetu bibaluila pa muanda wa bula bu’eshinda.”

14 Nyi bantu ba Isalele nkuata* ndambo ya bia kudia biabo, anka tababaadi bepushe Yehowa akitungu’shi bakite. 15 Biabia Yoshua nkukita nabo butaale na nkukita nabo kilombeno bua kuibaleka na muwa, na ba nfumu ba kakongie nkuitshipa kuabadi bua kukumbasha diadia eyi.

16 Ku nfudiilo kua mafuku asatu, kunyima ku’abo kukita nabo kilombeno, abaadi bapushe’shi tababaadi bakatukie kui bula, babaadi bashale pepi nabo. 17 Akupu bena Isalele babayile na bafika mu bibundi biabo muifuku dia kasatu; bibundi biabo bibaadi: Gibeone, Kefira, Berote, na Kiriate-yearime. 18 Anka bena Isalele tababaadi bebatukie ngoshi, muanda ba nfumu ba kakongie babaadi betshipe kuabadi muishina dia Yehowa Efile Mukulu a Isalele. Biabia kakongie koso kababangile kuunauna pabitale ba nfumu. 19 Nyi ba nfumu boso nkulungula kakongie koso’shi: “Bu biatuikeele betshipe kuabadi muishina dia Yehowa Efile Mukulu a Isalele, tatui na matalua a kuibakitshina bi bubi. 20 Atukitshi bino: atuibalekie na muwa bua’shi nsungu y’Efile Mukulu tayifikanga kuatudi pa muanda wa mutshipo watuikeele betshipe kuabadi.” 21 Na ba nfumu nkuibalungula dingi’shi: “Ebalekieyi na muwa, anka bekale abasangula nteete na kutapa mema bua kakongie koso.” Bino nyi bia bebalayile kui ba nfumu.

22 Yoshua nkuibetanyina na nkuibalungula’shi: “Buakinyi nuibetudimbe pa kuakula’shi, ‘Atufiki ku mbalo i kula ngofu nenu,’ aku namu nuibashale pepi netu? 23 Kubanga binobino nubedibua mulua, na anuikala nka ba mpika abasangula nteete na kutapa mema bua nshibo y’Efile Mukulu ande.” 24 Abo nkualula Yoshua’shi: “Mpa muanda bekeele balungule bafubi bobe patooka’shi, Yehowa Efile Mukulu oobe baadi mutumine mufubi aaye Moyise eyi bua kuinupa nsenga yoso, na kubutula bantu boso be mushale kumpala kuenu. Biabia tuikeele na moo bua miuwa* yetu pa muanda wenu, nyi buakinyi tubakitshi biabia. 25 Binobino tui mu maasa mobe. Etukite kiakia kioso kiomono’shi ki buwa na nkilulame.” 26 Na bino nyi bibaadi mukite nabo; baadi muibapaashe ku maasa a bena Isalele na tababaadi bebayipee. 27 Anka diadia efuku, Yoshua nkuibekasha bantu abasangula nteete na abatapa mema bua kakongie na bua kilambuilo kia Yehowa ku mbalo ibaadi na kia kusangula, na mbashale nka mbiabia mpa na lelo uno.

10 Nka Adoni-zedeke nfumu a Yelusalema ki’apusha’shi Yoshua baadi mukuate Ai na amubutula, akita Ai na nfumu aaye nka bu bibaadi mukite Yeriko na nfumu aaye, na bibaadi bena Gibeone bepushene na Isalele bua kuikala mu butaale na bashala munkatshi muabo, 2 baadi mukalakashue ngofu, muanda Gibeone baadi kibundi kikata, nka bu kimune kia ku bibundi bia ba nfumu. Kibaadi kikile Ai bukata, na bana balume boso ba muanka babaadi bilobo bia ngoshi. 3 Biabia Adoni-zedeke nfumu a Yelusalema nkutuma uno mukandu kui Oame nfumu a Ebrone, Pireame nfumu a Yarmute, Yafiya nfumu a Lakishe, na kui Debire nfumu a Eglone’shi: 4 “Fikayi nunkuashe bua’shi tutuukie Gibeone ngoshi, muanda bepushena bua kuikala mu kipuano na Yoshua na bena Isalele.” 5 Nyi ba nfumu batano ba bena Amore, nfumu a Yelusalema, nfumu a Ebrone, nfumu a Yarmute, nfumu a Lakishe, na nfumu a Eglone nkuibunga pamune na biluilo biabo, na abo nkuenda nkuifunyisha kibundi kia Gibeone bua kuikiluisha ngoshi.

6 Biabia bantu ba ku Gibeone nkutumina Yoshua mukandu ku kishalelo ku Gilegale’shi: “Tolubanga* ba mpika bobe. Fika bukidi! Etupaashe na etukuashe! Ba nfumu boso ba bena Amore ba ku nsenga ya ku mienge babebungu pamune bua kulua netu.” 7 Nyi Yoshua nkukatuka ku Gilegale na bantu boso abaluiyaa ngoshi na bilobo bia ngoshi.

8 Akupu Yehowa nkulungula Yoshua’shi: “Tuebatshinanga, muanda nebatuulu mu maasa oobe. Su ngumune a kuabadi taobesha kukutshokola.” 9 Yoshua bebatuukile ngoshi mu kabasamushi kunyima kua kutambuka bufuku bushima kukatukila ku Gilegale. 10 Yehowa nkuibatuesha mu kafutakanyi kumpala kua Isalele, na abo nkuibayipa ngofu ku Gibeone, nkuibalonda muishinda adikaamina ku Bete-orone na nkuibayipaa mpa na ku Azeka na ku Makeda. 11 Pabaabadi mu ngalaala ya Bete-orone abende na kusuuka Isalele, Yehowa baadi muibanokieeshe mabue a kasangu kukatukila muiyilu mpa na ku Azeka, na abo nkufua. Biabia, baba babaadi bafue ku mabue a kasangu babaadi bungi kukila babaadi bafue ku lupete lua ngoshi lua bena Isalele.

12 Yaaya nsaa, muifuku dibaadi Yehowa mutshokole bena Amore ku meso kua bena Isalele, nyi mubaadi Yoshua mulungule Yehowa kumpala kua Isalele’shi:

13 Biabia nguba baadi mushale muimane, na mueshi taubaadi usane mpa na pabaadi muilo wiobuele kui beshikuanyi babo. Ta mbifundibue mu mukanda wa Yashare su? Nguba baadi mushale muimane munkatshi mu’eyilu na tabaadi mutuele bukidibukidi pepi n’efuku dishima. 14 Takuekeele efuku bu diadia, biabikala kumpala sunga kunyima kuadio, dibaadi Yehowa muteemeshe eyi dia muntu, muanda Yehowa baadi aluila Isalele ngoshi.

15 Kunyima kua biabia Yoshua na Isalele oso babalukiile mu kishalelo ku Gilegale.

16 Yaaya nsaa, ba nfumu batano babaadi basuukie na bafuama mu lubuebue ku Makeda. 17 Akupu babalunguile Yoshua’shi: “Mbasangane ba nfumu batano mbafuame mu lubuebue ku Makeda.” 18 Biabia Yoshua nkuakula’shi: “Bungulushayi mabue akata ku kituelelo kia lubuebue na nutuule bantu bua kuibalama. 19 Anka anue bangi tanuimananga. Londayi beshikuanyi benu na nuibayipee p’abende na kusuuka. Tanuibatadiilanga buabadia kutuela mu bibundi biabo, muanda Yehowa Efile Mukulu eenu benupa banka mu maasa eenu.”

20 Pabapuile Yoshua na bena Isalele kuibayipaa ngofu pepi na kuibabutula boso, kukasha penda bantu bapeela babaadi basuukie na babaadi batuele mu bibundi bi na midimba ibukopo, 21 bantu boso babaadi balukiile kui Yoshua kushi masaku mu kishalelo ku Makeda. Takui muntu su ngumune baadi muakule bena Isalele eyi* di bubi. 22 Akupu Yoshua nkuakula’shi: “Fungulayi kituelelo kia lubuebue na nutuushe baba ba nfumu batano nufikie nabo kuandi.” 23 Nyi abo nkutuusha baba ba nfumu batano mu lubuebue, nkufika nabo kuadi: nfumu a Yelusalema, nfumu a Ebrone, nfumu a Yarmute, nfumu a Lakishe, na nfumu a Eglone. 24 Pababafikile na baba ba nfumu kui Yoshua, Yoshua bayitanyishe bana balume boso ba Isalele na alungula bakunkushi ba bantu abaluiya ngoshi babaadi bende naye’shi: “Efubuileyi kuno. Ashinayi mu makoshi* a bano ba nfumu.” Biabia abo nkuifubuila na nkuashina mu makoshi aabo. 25 Akupu Yoshua nkuibalungula’shi: “Tanutshinanga sunga kuikala na moo. Ikalayi n’eshimba dinyingie na bukome, muanda bino nyi abikitshi Yehowa beshikuanyi benu boso banukuete kulua nabo.”

26 Nyi Yoshua nkuibakupila, nkuibayipaa na kuibapudika ku mitshi itano, na abo nkushala bapudikie ku yaaya mitshi mpa na ku kiolua. 27 Pabaadi nguba t’apono, Yoshua batumine eyi buabadia kuibayisha ku mitshi na kuibasumbula mu lubuebue mubaabadi bafuame. Akupu babaatudile mabue akata ku kituelelo kia lubuebue, na ngashale paapa mpa na lelo.

28 Yoshua bakuatshile Makeda mu diadia efuku na ayipaa bantu boso ba muanka ku lupete lua ngoshi, aye nkubutula nfumu aaye na muntu oso* baadi muanka, kushi kuleka muntu su ngumune na muwa. Baadi mukite nfumu a Makeda nka bu bibaadi mukite nfumu a Yeriko.

29 Akupu Yoshua pamune na Isalele oso nkukatuka ku Makeda nkuenda ku Libena, na nkulua ngoshi na Libena. 30 Yehowa baadi mutuule dingi Libena na nfumu aaye mu maasa a Isalele, na abo nkuikibutula na nkuipaa muntu oso baadi muanka ku lupete lua ngoshi, kushi kuleka muntu su ngumune na muwa muanka. Biabia abakitshine nfumu akio nka bu bibaabadi bakite nfumu a Yeriko.

31 Kunyima Yoshua pamune na Isalele oso nkukatuka ku Libena nkuenda ku Lakishe, na abo nkutuula kishalelo kuakua na nkumuluisha ngoshi. 32 Yehowa nkutuula Lakishe mu maasa a Isalele na abo nkumukuata muifuku dia kabidi. Abo nkuipaa muntu oso baadi muanka ku lupete lua ngoshi, nka bu bibaabadi bakite Libena.

33 Akupu Orame nfumu a Gezere nkuenda mu kukuasha Lakishe, anka Yoshua nkumuipaa na bantu baye mpa na pakushibaadi kushale muntu su ngumune na muwa.

34 Akupu Yoshua pamune na Isalele oso nkukatuka ku Lakishe nkuenda ku Eglone, na nkutuula kishalelo kuakua na nkulua naye ngoshi. 35 Abo nkuikikuata na nkuipaa bantu boso ba mu kiakia kibundi ku lupete lua ngoshi. Abo nkubutula muntu oso baadi muanka mu diadia efuku, nka bu bibaabadi bakite Lakishe.

36 Akupu Yoshua pamune na Isalele oso nkukatuka ku Eglone nkuenda ku Ebrone, na nkumuluisha ngoshi. 37 Abaadi bekikuate na bayipaa bantu boso ba muanka, nfumu aakio, na bantu ba mu bibundi bikifunyishe ku lupete lua ngoshi, kushi kuleka muntu su ngumune na muwa. Nka bu bibaadi mukite Eglone, baadi mubutule muntu oso baadi muanka.

38 Nfudiilo a bioso Yoshua pamune na Isalele oso nkuenda ku kibundi kia Debire na nkuikiluisha ngoshi. 39 Aye nkuikikuata, nfumu aakio, na bibundi bioso bikifunyishe na abo nkuibepaa ku lupete lua ngoshi, nkubutula muntu oso a muanka, kushi kuleka muntu su ngumune a muanka. Baadi mukite Debire na nfumu aaye nka bu bibaadi mukite Ebrone na Libena na nfumu aaye.

40 Yoshua baadi mutshokole nsenga yoso: bibundi bia ku muengie, Negebe, Shefela, ma ngalaala na ba nfumu babio boso, kushi kuleka muntu su ngumune na muwa; baadi mubutule bantu boso,* nka bu bibaadi Yehowa Efile Mukulu a Isalele mutume eyi. 41 Yoshua baadi muibatshokole kukatukila ku Kadeshe-barnea mpa na ku Gaza na nsenga yoso ya Goshene mpa na ku Gibeone. 42 Yoshua baadi mukuate bano ba nfumu boso na bibundi biabo, bioso mususa umune, muanda nyi Yehowa Efile Mukulu a Isalele baadi kuete kuluila Isalele ngoshi. 43 Akupu Yoshua nkualukiila na Isalele oso mu kishalelo ku Gilegale.

11 Nka Yabine nfumu a Asore ki’apusha uno muanda, batumine eyi kui Yobabe nfumu a Madone, kui nfumu a Shimerone, kui nfumu a Akeshafe, 2 kui ba nfumu babaadi mu nsenga ya ku miengie dia kunundu, kui baba babaadi mu kabaaka* dia kuushi kua Kinerete, kui baba be mu Shefela na kui be mu ngalaala ya Dore dia kupona nguba, 3 kui bena Kanaana be dia kutunduka nguba na be dia kupona nguba, kui bena Amore, kui bena Ite, kui bena Perizi, kui bena Yebuse be mu nsenga ya ku miengie na kui bena Ivii be kuushi kua muengie wa Hermone mu nsenga ya Misepa. 4 Biabia abo nkufika na biluilo biabo bioso, kibumbu kikata kia bantu be bungi nka bu lusenga lua ku kiese kia kalunga ka mema, pamune na nfualasa ikile bungi na matempu a ngoshi. 5 Baba ba nfumu boso nkuipushena mbalo yakufumankena, na abo nkufika nkutuula kishalelo pamune ku mema a Merome bua kulua na Isalele ngoshi.

6 Nyi Yehowa nkulungula Yoshua’shi: “Topushanga moo pa muanda wabo, muanda malooba pepi na ino nsaa, nakebatuulu mu maasa mua Isalele, na anuibayipaa binyibinyi. Abitungu nutshibe mishila ya pa makunungu ya nfualasa yabo, na nushiikie matempu aabo mu kaalo.” 7 Yoshua pamune na bantu boso abaluiyaa ngoshi, nkuibatuuka ngoshi mu kabasamushi ku bukunkula bua mema a Merome. 8 Yehowa nkuibatuula mu maasa a Isalele, na abo nkuibatshokola, nkuibalonda mpa na ku Sidone Mukata na ku Miserefote-maime na Muibanda dia Misepa dia kutunduka nguba, na abo nkuibayipa mpa na pakushibaadi kushale muntu na muwa. 9 Akupu Yoshua nkuibakita nka bibaadi Yehowa mumulungule; aye nkutshiba mishila ya pa makunungu ya nfualasa yabo na nkushiika matempu aabo mu kaalo.

10 Akupu, Yoshua balukiile na akuata Asore na ayipaa nfumu aaye ku lupete lua ngoshi, muanda kumpala Asore baadi kunundu kua ano mafumu oso. 11 Abo nkuipaa muntu oso* baadi muanka ku lupete lua ngoshi, na nkuibabutula. Tababaadi balekie muntu su ngumune na muwa. Akupu aye nkushiika Asore kaalo. 12 Yoshua nkukuata bibundi bioso bia bano ba nfumu na nkutshokola ba nfumu babio boso ku lupete lua ngoshi. Aye nkuibabutula, nka bu bibaadi Moyise mufubi a Yehowa mutume eyi. 13 Anka Isalele tabaadi mushiikie kibundi su nkimune kia ku bibundi bibaadi pa tu miengie kaalo, kukatusha penda Asore; nka penda Asore nyi abaabadi bashiikie kaalo kui Yoshua. 14 Bena Isalele babaadi baate bintu bipaulue bioso bia bino bibundi na nyema, anka abo nkuipaa muntu oso ku lupete lua ngoshi mpa na pabaabadi bashimishe muntu oso. Tababaadi balekie muntu su ngumune na muwa. 15 Anka bu bibaadi Yehowa mutumine mufubi aaye Moyise eyi, nyi bibaadi Moyise mutumine Yoshua eyi, na biabia mbibaadi Yoshua mukite. Tabaadi mulekie muanda su ngumune ushi ukitshibue ku mianda yoso ibaadi Yehowa mutumine Moyise eyi.

16 Yoshua nkukuata ino nsenga yoso, nsenga ya ku miengie, Negebe oso, nsenga yoso ya Goshene, Shefela, Araba, na nsenga ya ku miengie ya Isalele na ma Shefela* aayo, 17 kukatukila ku muengie wa Halake aukaamina ku Seyire, mpa na ku Baale-gade Muibanda dia Lebanone di kuushi kua muengie wa Hermone, aye nkukuata ba nfumu babio, nkuibatshokola na nkuibayipaa. 18 Yoshua baadi mulue ngoshi na bano ba nfumu boso munda mua mafuku e bungi. 19 Takubaadi kibundi su nkimune kibaadi kipushene na bena Isalele bua kuikala nabo mu butaale kukaasha bena Ivii abaadi bashale mu Gibeone. Abaadi batshokole bingi bibundi bioso pa kulua ngoshi. 20 Yehowa nyi baadi mutadiile mashimba aabo bua’shi apape bua kulua ngoshi na Isalele, bua’shi ebabutule kushi lusa. Abaadi na kia kuibashimisha nka bu bibaadi Yehowa mutumine Moyise eyi.

21 Mu kiakia kipungo, Yoshua baadi mubutule bena Anake abaadi bashale mu nsenga ya ku miengie mpa na baba babaadi bashale ku Ebrone, Debire, ku Anabe na ba ku nsenga ya ku miengie yoso ya Yunda na ba ku nsenga ya ku miengie yoso ya Isalele. Yoshua baadi muibabutule abo na bibundi biabo. 22 Takubaadi kushale muina Anake su ngumune mu nsenga ya bena Isalele; abaadi bashale nka penda mu Gaza, mu Gate na mu Ashedode. 23 Biabia Yoshua nkukuata nsenga yoso nka bu bibaadi Yehowa mulee Moyise, akupu Yoshua nkuiyipa Isalele bu bupianyi muyile bipindi biabo bua kuiyaba munkatshi mua bisamba biabo. Na nsenga ibekeele mu butaale kushi ngoshi.

12 Bano nyi ba nfumu ba nsenga ibaadi bena Isalele batshokole, ba sha nsenga ibaabadi baate lupese lua kutunduka nguba kua Yordane, kukatukila ku Ebanda* dia Arnone mpa na ku Muengie wa Hermone na Araba oso dia kutunduka nguba: 2 Nfumu Sihone a bena Amore baadi mushale mu Eshebone, baadi amunana mu kibundi kia Arowe kibaadi ku bukunkula bua Ebanda dia Arnone,* na kukatukila munkatshi mua ebanda, na kia pankatshi kia Gileade mpa na ku Ebanda dia Yaboke,* mukalo wa bena Amone. 3 Baadi dingi amunu Araba mpa na ku Kalunga ka mema ka Kinerete,* dia kutunduka nguba mpa na ku Kalunga ka mema ka Araba, Kalunga ka mungua* dia kutunduka nguba batadiile dia ku Bete-yeshimote na dia kuushi muushi mua ma ngalaala a Pisiga.

4 Na nsenga ya nfumu Oge a Bashane, baadi umune a ku bena Refa ba nfudiilo na baadi mushale mu Ashetarote na mu Edrei 5 na baadi amunana ku Muengie wa Hermone mu Saleka, na mu Bashane oso, mpa na ku mukalo wa bena Geshure, na bena Maakate na kia pankatshi kia Gileade, dia ku nsenga ya nfumu Sihone a Eshebone.

6 Moyise mufubi a Yehowa na bena Isalele nkuibatshokola, kunyima kua biabia Moyise mufubi a Yehowa nkupa bena Rubene, bena Gade na kipindi kia kisamba kia Manasee nsenga yabo bu bupianyi.

7 Bano nyi ba nfumu ba nsenga ibaadi Yoshua na bena Isalele batshokole lupese lua kupona nguba kua Yordane, kukatukila ku Baale-gade Muibanda dia Lebanone, mpa na ku Muengie wa Halake aukaamina ku Seyire, kunyima kua biabia Yoshua nkupa bisamba bia Isalele nsenga yabo bu bupianyi muyile bipindi biabo, 8 mu miengie, mu Shefela, mu Araba, mu ma ngalaala, mu kabaaka, na mu Negebe, kuamba’shi nsenga ya bena Ite, bena Amore, bena Kanaana, bena Perizi, bena Ivii, na bena Yebuse:

13 Binobino Yoshua baadi mupue kununupa na baadi na bipua bi bungi. Biabia Yehowa nkumulungula’shi: “Bopu kununupa na toodi na bipua bi bungi; anka kuki kushale kipindi kikata kia nsenga akitungu kukuata.* 2 Nsenga ishale nyi ngino: nsenga yoso ya bena Filistine na yoso ya bena Geshure 3 (kukatuka ku kieleela kia Nile* ki dia kutunduka nguba kua* Ejipitu mpa na ku mukalo wa Ekrone dia kunundu, ibaabadi abaata bu nsenga ya bena Kanaana) mpa na yaaya ya ba nfumu batano ba bena Filistine, kuamba’shi, ya bena Gaza, bena Ashedode, bena Ashekelone, bena Gate, na bena Ekrone, na yaaya ya bena Awime 4 dia kuushi; nsenga yoso ya bena Kanaana; Meara a bena Sidone mpa na ku Afeke dia ku mukalo wa bena Amore; 5 nsenga ya bena Gebale na yoso ya Lebanone dia kutunduka nguba, kukatukila ku Baale-gade dia kuushi kua Muengie wa Hermone ku Lebo-amate;* 6 bantu boso ba ku nsenga ya ku miengie kukatukila ku Lebanone mpa na ku Miserefote-maime; na bena Sidone boso. Nakebabingi* kumpala kua bena Isalele. Obe we na penda kia kuiyipa bena Isalele bu bupianyi, nka bu biandi mukutumine eyi. 7 Abitungu wabile bisamba kitema na kipindi kia kisamba kia Manasee ino nsenga bu bupianyi.”

8 Kingi kipindi kia kisamba kia Manasee, bena Rubene, na bena Gade babaatshile bupianyi buabo bubaadi Moyise muibape lupese lua kutunduka nguba kua Yordane, nka bu bibaadi Moyise mufubi a Yehowa muibapee; 9 kukatukila ku Arowe, e ku bukunkula bu’Ebanda dia Arnone,* na kibundi ki munkatshi mua ebanda, na mbalo yoso ibatame i kunundu ya Medeba mpa na ku Dibone; 10 na bibundi bioso bia nfumu Sihone a bena Amore, baadi amunana mu Eshebone, mpa na ku mikalo ya bena Amone; 11 dingi Gileade na nsenga ya bena Geshure na bena Maakate na Muengie oso wa Hermone na Bashane oso mpa na ku Saleka; 12 bufumu boso bua Oge mu Bashane, baadi amunana mu Ashetarote na mu Edrei. (baadi umune a ku bena Refa ba nfudiilo.) Moyise baadi muibatshokole na ebabinga.* 13 Anka bena Isalele tababaadi babingie* bena Geshure na bena Maakate, muanda Geshure na Maakate mbashale munkatshi mua Isalele mpa na lelo.

14 Nka penda kisamba kia bena Levi nyi kiashibaadi mupe bupianyi. Milambu ishiikibue mu kaalo bua Yehowa Efile Mukulu a Isalele nyi buabo bupianyi, nka bu bibaadi muibalee.

15 Akupu Moyise nkupa kisamba kia bena Rubene bupianyi muyile bifuko biabo, 16 na nsenga yabo ibaadi kukatukila ku Arowe, e ku bukunkula bua Ebanda dia Arnone* na kibundi ki munkatshi mua ebanda, na mbalo yoso ibatame i kunundu i pepi na Medeba; 17 Eshebone na bibundi biaye bioso bi pa mbalo ibatame i kunundu, Dibone, Bamote-baale, Bete-baale-meone, 18 Yasa, Kedemote, Mefaate, 19 Kiriataime, Sibima, na Serete-shahare e pa muengie wi pepi n’ebanda, 20 Bete-peore, ma ngalaala a Pisiga, Bete-yeshimote, 21 bibundi bioso bia pa mbalo ibatame i kunundu, na bufumu boso bua nfumu Sihone a bena Amore baadi amunana mu Eshebone. Moyise baadi mumutshokole mpa na Ewi, Rekeme, Zure, Ure, na Reba, ba nfumu bena Madiane babaadi ku bukunkushi bua Sihone babaadi bashale mu yaaya nsenga. 22 Balame muana a Beore muina lubuko, baadi umune a ku bantu babaabadi bayipee kui bena Isalele ku lupete lua ngoshi pamune na bangi bantu babaabadi bayipee. 23 Mukalo wa bena Rubene ubaadi Yordane, na ino nsenga ibaadi bupianyi bua bena Rubene muyile bifuko biabo, na bibundi na tu bibundi tuabio tui pepi.

24 Dingi Moyise bapeele kisamba kia Gade bupianyi, bena Gade muyile bifuko biabo, 25 na mu nsenga yabo mubaadi Yazere na bibundi bioso bia Gileade, na kia pankatshi kia nsenga ya bena Amone mpa na ku Arowe muitalene na Raba; 26 na kukatukila ku Eshebone mpa na ku Ramate-misipe na Betonime, na kukatukila ku Mahanaime mpa na ku mukalo wa Debire; 27 na muibanda, Bete-arane, Bete-nimra, Sukote na Safone, bingi bibundi bia bufumu bua nfumu Sihone a Eshebone bibaadi bishale, na Yordane bu mukalo kukatukila kuushi ku nfudiilo kua Kalunga ka Kinerete* lupese lua kutunduka nguba lua Yordane. 28 Buno nyi bubaadi bupianyi bua bena Gade muyile bifuko biabo, na bibundi na tu bibundi tuabio tui pepi .

29 Dingi, Moyise bapeele kipindi kia kisamba kia Manasee, kuamba’shi kia pankatshi kia kisamba kia Manasee bupianyi muyile bifuko biabo. 30 Nsenga yabo ibaadi ayikatukila ku Mahanaime na yata Bashane oso, bufumu boso bua nfumu Oge a Bashane, mpa na tu bibundi toso tua tushibo tua mapema tua Yaire mu Bashane, bibundi 60. 31 Na kia pankatshi kia Gileade, na Ashetarote na Edrei, bibundi bia bufumu bua nfumu Oge mu Bashane, babaadi bebipe bana ba Makire, muana a Manasee, kuamba’shi kia pankatshi kia bana ba Makire muyile bifuko biabo.

32 Buno nyi bupianyi bubaadi Moyise muibape mu kabaaka ka Moabe abua bushiya bua Yordane, dia kutunduka nguba kua Yeriko.

33 Anka Moyise tabaadi mupee kisamba kia bena Levi bupianyi. Yehowa Efile Mukulu a Isalele nyi buabo bupianyi, nka bu bibaadi muibalee.

14 Buno nyi bupianyi bubaadi bena Isalele baate mu nsenga ya Kanaana, bubaadi tshite muakuidi Eleazere na Yoshua muana a Nune na ba nfumu ba bifuko bia ba mashabo ba bisamba bia Isalele bebape bua kupiana. 2 Abaadi bebape bupianyi buabo pa kuta bubale, nka bu bibaadi Yehowa mutume eyi kukiila kui Moyise bua bisamba kitema na kipindi. 3 Moyise baadi mupe bingi bisamba bibidi na kipindi bupianyi abua bushiya* bua Yordane, na bena Levi tabaadi muibape bupianyi munkatshi muabo. 4 Abaadi abaata Manasee na Efraime lutandua lua Yosefe bu bisamba bibidi; bena Levi tababaadi bebape kipindi kia nsenga, kukaasha penda bibundi bia kushala na mapia a kudishila nyema bua bimunuanga biabo na bua bintu biabo. 5 Biabia bena Isalele nkuaba nsenga nka bu bibaadi Yehowa mutumine Moyise eyi.

6 Akupu bana balume ba Yunda nkuifubuila kui Yoshua mu Gilegale, na Kalebe muana a Yefune muina Kenizi, abo nkumulungula’shi: “Ouku kalolo bibaadi Yehowa mulungule Moyise muntu a Efile Mukulu a binyibinyi pabikutale na pabintale ku Kadeshe-barnea. 7 Naadi na bipua 40 pabaadi Moyise mufubi a Yehowa muntume ku Kadeshe-barnea mu kupuupa nsenga, na panalukiile nakuile mianda nka biayibaadi.* 8 Sunga’shi bakuetu babatuyile nabo abaadi babofushe muilo kuishimba, naadi mulonde Yehowa Efile Mukulu ande n’eshimba dioso. 9 Mu diadia efuku, Moyise baadi muitshipe amba’shi: ‘Nsenga ibaadi ngua yobe yashine ayikekala bupianyi bua loso bobe na bua bana bobe, muanda we mulonde Yehowa Efile Mukulu ande n’eshimba dioso.’ 10 Binobino nka bu bibaadi mulee, Yehowa mmundame na muwa bino bipua 45 kubanga pabaadi Yehowa mukite uno mulayilo kui Moyise pabaadi bena Isalele abatambuka mu kabaaka; nkinka kuanka mpa na lelo, muikale na bipua 85. 11 Na lelo ne na bukome nka bu bunaadi nabo muifuku dibaadi Moyise muntume. Binobino bukome buande buinka bu biabubaadi mu aa mafuku, bua kulua ngoshi na bua kukita ingi mifubo. 12 Biabia mpe ino nsenga ya ku miengie ibaadi Yehowa mulee diadia efuku. Sunga bodi mupushe mu diadia efuku’shi bena Anake babaadi muanka na bibundi bi na midimba i bukopo, binyibinyi* Yehowa akekala nami na nakebabingi* nka bu bibaadi Yehowa mulee.”

13 Biabia Yoshua nkuelela Kalebe muana a Yefune miabi na nkumupa Ebrone bu bupianyi. 14 Nyi buakinyi Ebrone mbupianyi bua Kalebe muana a Yefune muina Kenizi mpa na lelo, muanda baadi mulonde Yehowa Efile Mukulu a Isalele n’eshimba dioso. 15 Kumpala eshina dia Ebrone dibaadi Kiriate-arba, (Arba baadi muntu mukata munkatshi mua bena Anake). Na nsenga ibekeele mu butaale kushi ngoshi.

15 Nsenga ibaabadi bape* kisamba kia Yunda bua bifuko biabo ibaadi yende mpa na ku mukalo wa Edome mu kabaaka ka Sine, mpa na ku nfudiilo ya Negebe i dia kuushi. 2 Mukalo wabo wa dia kuushi aukatukila ku nsongo kua Kalunga ka mungua,* kukatukila ku kiese kitalene na dia kuushi. 3 Awende dia kuushi mpa na kuishinda adikaamina ku Akrabime, aukidi utadiile ku Sine, akupu aukaamina kukatukila kuushi mpa na ku Kadeshe-barnea, awende mpa na ku Esrone, aukaamina ku Adare, na awifunyu utadiile ku Karka. 4 Akupu ubaadi aukidi mpa na ku Asemone na awende mpa na ku Kibandabanda* kia Ejipitu, na mukalo ubaadi aufudiila ku Kalunga ka mema.* Uno nyi ubaadi mukalo wabo wa dia kuushi.

5 Mukalo wa dia kutunduka nguba ubaadi Kalunga ka mungua* aukaamina mpa na ku nfudiilo kua Yordane, na mukalo wa muipaka wa dia kunundu ubaadi kiese kia kalunga ka mema, ku nfudiilo kua Yordane. 6 Mukalo ubaadi aukaamina mpa na ku Bete-ogla na aukidila dia kunundu kua Bete-araba, na mukalo ubaadi aukaamina mpa na ku ebue dia Boane muana a Rubene. 7 Mukalo ubaadi aukaamina mpa na ku Debire Muibanda dia Akore na wekonya dia kunundu utadiile ku Gilegale, muitalene n’eshinda adikaamina ku Adumime, kuamba’shi dia kuushi kua kibandabanda, na mukalo ubaadi aukidi utadiile ku mema a Ene-shemeshe na aufudiila ku Ene-rogele. 8 Mukalo ubaadi aukaamina mpa na Kuibanda dia Muana a Hinome mpa na ku ngalaala ya muina Yebuse dia kuushi, kuamba’shi Yelusalema, mukalo ubaadi aukaamina mpa na ku nsongo kua muengie witalene n’Ebanda dia Hinome dia kupona nguba, wi ku nfudiilo kua Ebanda dia Refayime dia kunundu. 9 Mukalo ubaadi utshibibue kukatukila ku nsongo kua muengie mpa na ku nsulo ya mema a Nefetowa na ubaadi awende mpa na ku bibundi bia ku muengie wa Efrone; na mukalo ubaadi utshibibue mpa na ku Baala, kuamba’shi, Kiriate-yearime. 10 Mukalo ubaadi awifunyu kukatukila ku Baala dia kupona nguba utadiile ku Muengie wa Seyire na ubaadi aukidi utadiile ku ngalaala ya Muengie wa Yearime dia kunundu, kuamba’shi, Kesalone na ubaadi awalaala utadiile ku Bete-shemeshe na aukidi utadiile ku Timena. 11 Mukalo ubaadi awende mpa na ku ngalaala ya Ekrone dia kunundu, na mukalo ubaadi utshibibue mpa na ku Shikelone na aukidi utadiile ku Muengie wa Baala, awende mpa na ku Yabenele na mukalo ubaadi aufudiila ku kalunga ka mema.

12 Mukalo wa dia kupona nguba ubaadi Kalunga Kakata* na biese biako. Uno nyi ubaadi mukalo wa bana ba Yunda muyile bifuko biabo ku mpese yoso.

13 Yoshua baadi mupe Kalebe muana a Yefune kipindi kia nsenga munkatshi mua lutandua lua Yunda kuiyi dia Yehowa, kuamba’shi Kiriate-arba (Arba baadi nshaye na Anake), kuamba’shi Ebrone. 14 Biabia Kalebe nkubinga muanka bana basatu ba Anake: Sheshayi, Ahimane, na Talmayi lutandua lua Anake. 15 Akupu aye nkukatuka kuakua, nkuenda mu kulua ngoshi na bantu ba ku Debire. (Kumpala eshina dia Debire dibaadi Kiriate-sefere.) 16 Akupu Kalebe nkuakula’shi: “Muntu akalu na bena Kiriate-sefere na akuata kibundi kiabo, namupa muana ande mukashi Akesa bu mukashi aaye.” 17 Na Otenyele muana a Kenaze, mukuabo mulume na Kalebe nkuikikuata. Biabia Kalebe nkumupa muana aaye mukashi Akesa bu mukashi aaye. 18 Pabaadi Akesa ende ku nshibo ya mulume aaye, baadi mutakule mulume aaye bua kuteka nshaye efuba. Akupu aye nkuika ku mpunda* aaye. Kalebe nkumuipusha’shi: “Okiebe kinyi?” 19 Aye nkuakula’shi: “Ngielele namu miabi, muanda we mumpe kipindi kia nsenga dia kuushi;* mpe namu dingi Gulote-maime.”* Biabia aye nkumupa Gulote a kunundu na Gulote a kuushi.

20 Buno mbubaadi bupianyi bua kisamba kia Yunda muyile bifuko biabo.

21 Bibundi bibaadi ku nfudiilo kua kisamba kia Yunda dia ku mukalo wa Edome dia kuushi bibaadi: Kabeseele, Edere, Yagure, 22 Kina, Dimona, Adada, 23 Kedeshe, Asore, Itenane, 24 Zife, Teleme, Bealote, 25 Asore-adata, na Keriyote-esrone, kuamba’shi Asore, 26 Amame, Shema, Molada, 27 Azare-gada, Eshemone, Bete-pelete, 28 Azare-shuale, Beere-sheba, Biziotiya, 29 Baala, Ime, Eseme, 30 Eletolade, Kesile, Orma, 31 Sikelage, Mademane, Sanesana, 32 Lebaote, Shilehime, Aine, na Rimone, bioso bibaadi bibundi 29 pamune na tu bibundi tuabio tui pepi.

33 Mu Shefela mubaadi: Eshetaole, Soreya, Ashena, 34 Zanowa, Ene-ganime, Tapua, Ename, 35 Yarmute, Adulame, Soko, Azeka, 36 Sharaime, Aditaime, Gedera, na Gederotaime,* bibundi 14 na tu bibundi tuabio tui pepi.

37 Senane, Adasha, Migedale-gade, 38 Dileane, Misepa, Yoketele, 39 Lakishe, Bosokate, Eglone, 40 Kabone, Lahamase, Kitelishe, 41 Gederote, Bete-dagone, Naama, na Makeda, bibundi 16 na tu bibundi tuabio tui pepi.

42 Libena, Etere, Ashane, 43 Ifeta, Ashena, Nezibe, 44 Keila, Akezibe, na Maresha, bibundi kitema na tu bibundi tuabio tui pepi.

45 Ekrone na bibundi biaye bimuifunyishe na tu bibundi tuaye tui pepi; 46 kukatukila ku Ekrone dia kupona nguba, bibundi bioso bi ku bukunkula bua Ashedode na tu bibundi tuabio tui pepi.

47 Ashedode, bibundi biaye bimuifunyishe na tu bibundi tuaye tui pepi; Gaza bibundi biaye bimuifunyishe na tu bibundi tuaye tui pepi, kuika mpa na ku kibandabanda kia Ejipitu, Kalunga kakata,* na nsenga imukungile.

48 Mu nsenga ya ku miengie, Shamire, Yatire, Soko, 49 Dana, Kiriate-sanna, kuamba’shi Debire, 50 Anabe, Eshetemo, Anime, 51 Goshene, Olone, Gilo, bibundi 11 na tu bibundi tuabio tui pepi.

52 Arabe, Duma, Eshane, 53 Yanume, Bete-tapua, Afeka, 54 Umeta, Kiriate-arba, kuamba’shi Ebrone, na Siyore, bibundi kitema na tu bibundi tuabio tui pepi.

55 Maone, Karmele, Zife, Yuta, 56 Izreele, Yokedeame, Zanowa, 57 Kayine, Gibeya, na Timena, bibundi ekumi na tu bibundi tuabio tui pepi.

58 Alule, Bete-sure, Gedore, 59 Maarate, Bete-anote, na Eletekone, bibundi bisamombo na tu bibundi tuabio tui pepi.

60 Kiriate-baale, kuamba’shi Kiriate-yearime, na Raba, bibundi bibidi na tu bibundi tuabio tui pepi.

61 Mu kabaaka, Bete-araba, Midine, Sekaka, 62 Nibeshane, Kibundi kia mungua, na Ene-gedi, bibundi bisamombo na tu bibundi tuabio tui pepi.

63 Bua bena Yebuse babaadi bashale mu Yelusalema, bana balume ba Yunda tababaadi bobeshe kuibabinga, biabia bena Yebuse baki’abatungunuka na kushala mu Yelusalema na muilo wa Yunda mpa na lelo uno.

16 Nsenga ibaadi ipete lutandua lua Yosefe pa kuta bubale* ibaadi ayikatukila ku Yordane pepi na Yeriko, ayende mpa na ku mema e dia kutunduka nguba kua Yeriko, ayikidila mu kabaaka akakaamina kukatukila ku Yeriko mpa na ku nsenga ya ku miengie ya Betele. 2 Ibaadi ayende kukatukila ku Betele baadi a Luze na ayitungunuka mpa na ku mukalo wa bena Arke ku Atarote, 3 akupu ibaadi ayalala dia kupona nguba itadiile ku mukalo wa bena Yafelete mpa na ku mukalo wa Bete-orone a kuushi na Gezere, na ibaadi ayifudiila ku kalunga ka mema.

4 Biabia lutandua lua Yosefe, Manasee na Efraime, babatshile nsenga yabo. 5 Mukalo wa lutandua lua Efraime muyile bifuko biabo ubaadi bino: Mukalo wa bupianyi buabo dia kutunduka nguba ubaadi Atarote-adare, mpa na ku Bete-orone a kunundu, 6 na mukalo ubaadi awende mpa na ku kalunga ka mema. Mikemetate baadi dia kunundu, na mukalo ubaadi wende wefunya dia kutunduka nguba kua Tanate-silo, na ubaadi aukidi dia kutunduka nguba kua Yanowa. 7 Akupu ubaadi awalaala kukatukila ku Yanowa mpa na ku Atarote na ku Naara, na ubaadi aukafiki mpa na ku Yeriko wenda mpa na ku Yordane. 8 Kukatuka ku Tapua, mukalo ubaadi autungunuka dia kupona nguba utadiile ku kibandabanda kia Kana, na ubaadi aufudiila ku kalunga ka mema. Buno nyi bupianyi bua kisamba kia Efraime muyile bifuko biabo; 9 lutandua lua Efraime namu lubaadi na bingi bibundi munkatshi mua bupianyi bua Manasee, bibundi bioso na tu bibundi tuabio tui pepi.

10 Anka tababaadi babingie bena Kanaana babaadi bashale mu Gezere, na bena Kanaana baki’abatungunuka na kushala munkatshi mua Efraime mpa na lelo na abaadi abebakitshisha mifubo pa bukopo.

17 Akupu bubale nkuponena kisamba kia Manasee muanda baadi muana mbedi a Yosefe. Bu bibaadi Makire muana mbedi a Manasee na nshaye na Gileade, muntu aluiyaa ngoshi, baadi mupete Gileade na Bashane. 2 Na bubale nkuponena lungi lutandua lua Manasee lubaadi lushale muyile bifuko biabo, bua bana ba Abiezere, bana ba Eleke, bana ba Asriele, bana ba Shekeme, bana ba Kefere, na bana ba Shemida. Bano nyi babaadi bana balume ba lutandua lua Manasee muana a Yosefe muyile bifuko biabo. 3 Anka Selofehade muana a Kefere, muana a Gileade, muana a Makire, muana a Manasee, tabaadi mutande bana balume, anka penda bana bakashi, na mashina a bana baye bakashi abaadi: Mahela, Nowa, Ogla, Milka, na Tirsa. 4 Biabia babayile kumpala kua tshite muakuidi Eleazare, Yoshua muana a Nune na ba nfumu, bakula’shi: “Yehowa nyi baadi mutumine Moyise eyi bua kuitupa bupianyi munkatshi mua bakuetu.” Biabia kuiyi dia Yehowa bebapeele bupianyi munkatshi mua bakuabo na nshabo balume.

5 Abaadi dingi bape Manasee bingi bipindi ekumi bia nsenga kukatusha nsenga ya Gileade na Bashane ibaadi abua bushiya* bua Yordane, 6 muanda bana bakashi ba Manasee babapetele bupianyi pamune na bana baye balume, na nsenga ya Gileade ibafikile ya lutandua lubaadi lushale lua Manasee.

7 Na mukalo wa Manasee ubaadi aukatukila ku Ashere awende mpa na ku Mikemetate, muitalene na Shekeme, na mukalo ubaadi autungunuka utadiile dia kuushi* mpa na ku nsenga ya bantu ba Ene-Tapua. 8 Nsenga ya Tapua ibafikile ya Manasee, anka kibundi kia Tapua ku mukalo wa Manasee kibaadi kia lutandua lua Efraime. 9 Na mukalo ubaadi awalaala dia ku Kibandabanda kia Kana, kuushi kua kibandabanda. Kuakua kubaadi bibundi bia Efraime munkatshi mua bibundi bia Manasee, na mukalo wa Manasee ubaadi dia kunundu kua kibandabanda, na ubaadi aufudiila ku kalunga ka mema. 10 Lupese lua kuushi lubaadi lua Efraime, na lupese lua kunundu lubaadi lua Manasee, kalunga ka mema kabaadi mukalo waye, na dia kunundu babaadi* abakafiki mpa na ku Ashere na dia kutunduka nguba mpa na ku Isakare.

11 Mu nsenga ya Isakare na Ashere, babaadi bape Manasee Bete-sheane na bibundi biaye bimuifunyishe, Ibeleame na bibundi biaye bimuifunyishe, bantu ba mu Dore na bibundi biaye bimuifunyishe, bantu ba mu Ene-dore na bibundi biaye bimuifunyishe, bantu ba mu Tanake na bibundi biaye bimuifunyishe, bantu ba mu Megido na bibundi biaye bimuifunyishe, bibundi bisatu bia pa muengie.

12 Anka lutandua lua Manasee talubaadi lobeshe kuata bino bibundi; bena Kanaana babaadi bashidiile bua kushala mu ino nsenga. 13 Pabekeele bena Isalele na bukome, bababangile kukitshisha bena Kanaana mifubo pa bukopo, anka tababaadi bebabingie* boso.

14 Lutandua lua Yosefe nkulungula Yoshua’shi: “Buakinyi buetupa* penda kipindi kimune bu bupianyi? Tui muilo ukata, muanda Yehowa mmuituelele miabi mpa na binobino.” 15 Yoshua nkuibalula’shi: “Su nui muilo ukata, kaaminayi ku mutamba nuteme kuakua mbalo buenu mu nsenga ya bena Perizi na bena Refa, muanda nsenga ya ku miengie ya Efraime ngikile bupeela buenu.” 16 Akupu lutandua lua Yosefe nkuakula’shi: “Nsenga ya ku miengie t’ayitulombana, na bena Kanaana boso bashale mu nsenga ya muibanda be na matempu a ngoshi e na tupete tula tua kiamo* ku bipombo, biabikala baba be mu Bete-sheane na bibundi bimuifunyishe na baba be Muibanda dia Izreele.” 17 Biabia Yoshua nkulungula bana ba Yosefe, Efraime na Manasee’shi: “Nui muilo ukata na nui na bukome bui bungi. Tanupete penda kipindi kimune kia nsenga nya, 18 anka nsenga ya ku miengie ayikala dingi yenu. Sunga biabidi’shi mmutamba, anuiuteme na awikala nfudiilo ya nsenga yenu. Muanda anukabingi bena Kanaana, sunga biabadi bukome na biabadi na matempu a ngoshi e na tupete tula tua kiamo* ku bipombo.”

18 Akupu kakongie koso ka Isalele nkuibunga ku Shilo, na abo nkushimika kashibo k’epema ka kufumankena kuakua, muanda binobino nsenga ibaadi ku matalua aabo. 2 Anka kukibaadi bisamba musambobidi bia bena Isalele bibaadi bishale bishibaadi bibande kupeta bupianyi. 3 Biabia Yoshua nkulungula bena Isalele’shi: “Anuladikiisha bua kuenda mu kuata nsenga inupe Yehowa Efile Mukulu a ba mashenu kulu mpa na ku nsaa kinyi? 4 Mpeyi bana balume basatu mu kisamba kioso nebatume; abitungu bende na befunye mu nsenga, beyisole muyile bupianyi buabo. Akupu balukiile kuandi. 5 Abitungu beyabe munkatshi muabo mu bipindi musambobidi. Yunda ashale mu nsenga yaye dia kuushi, na bana ba Yosefe abashala mu nsenga yabo dia kunundu. 6 Anka anue, solayi nsenga mu bipindi musambobidi, na nuibintuadile, na nenuteela bubale pano kumpala kua Yehowa Efile Mukulu eetu. 7 Anka bena Levi ta be na kipindi kia nsenga munkatshi muenu, muanda bu tshite muakuidi bua Yehowa nyi buabo bupianyi; na Gade, Rubene, na kipindi kia kisamba kia Manasee mbapue kupeta buabo bupianyi lupese lua kutunduka nguba kua Yordane, bubaadi Moyise mufubi a Yehowa muibape.”

8 Baba bana balume nkuilumbula bua kuenda, na Yoshua nkutumina baba babaadi na kia kusola nsenga ano mayi’shi: “Ndayi na nuifunye mu nsenga na nualukiile kuandi, nenuteela bubale pano kumpala kua Yehowa mu Shilo.” 9 Nyi baba bana balume nkuenda na nkuifunya mu nsenga, nkuiyisola muyile bibundi mu bipindi musambobidi, abo nkuiyifunda mu mukanda. Kunyima kua biabia abo nkualuka kui Yoshua ku kishalelo ku Shilo. 10 Akupu Yoshua nkuibateela bubale ku Shilo kumpala kua Yehowa. Yoshua nkuabila bena Isalele nsenga kuakua muyile bipindi biabo.

11 Bubale nkutuuka bua kisamba kia Benyamine muyile bifuko biabo, na nsenga ya bubale buabo ibaadi pankatshi pa bantu ba Yunda na bantu ba Yosefe. 12 Ku lupese lua dia kunundu, mukalo wabo ubaadi aubanga ku Yordane, na aukaamina dia ku ngalaala ya Yeriko dia kunundu na aukaamina ku muengie dia kupona nguba, na awende mpa na ku kabaaka ka Bete-awene. 13 Na kukatuka kuakua mukalo ubaadi autungunuka awende mpa na ku Luze, dia kuushi kua ngalaala ya Luze, kuamba’shi Betele; na ubaadi awalaala ku Atarote-adare ku muengie wi kuushi kua Bete-orone a kuushi. 14 Na mukalo ubaadi utshibibue dia ku lupese lua kupona nguba na wenda wefunya utadiile dia kuushi kukatukila ku muengie witalene na Bete-orone dia kuushi; na ubaadi aufudiila ku Kiriate-baale, kuamba’shi, Kiriate-yearime, kibundi kia Yunda. Luno nyi lupese lua kupona nguba.

15 Lupese lua kuushi, mukalo ubaadi aukatuka ku nfudiilo kua Kiriate-yearime na awende utadiile dia kupona nguba; ubaadi awende mpa na ku nsulo ya mema a Nefetowa. 16 Mukalo ubaadi awalaala ku nfudiilo kua muengie witalene n’Ebanda dia Muana a Hinome, wi Muibanda dia bena Refa dia kunundu, na ubaadi awalaala Muibanda dia Hinome, utadiile ku ngalaala ya bena Yebuse dia kuushi, awende mpa na ku Ene-rogele. 17 Na ubaadi utshibibue utadiile dia kunundu na awende mpa na ku Ene-shemeshe, akupu ubaadi awende mpa na ku Gelilote, muitalene n’eshinda adikaamina ku Adumime, na ubaadi awalaala mpa na ku ebue dia Boane muana a Rubene. 18 Ubaadi autungunuka ku ngalaala i dia kunundu italene na Araba na ubaadi awalaala mpa na ku Araba. 19 Na mukalo ubaadi autungunuka ku ngalaala ya dia kunundu kua Bete-ogla, na ubaadi aufudiila ku kiese kia dia kunundu kua Kalunga ka mungua* ku nfudiilo ya dia kuushi ya Yordane. Uno nyi ubaadi mukalo wa dia kuushi. 20 Na Yordane baadi bu mukalo wa lupese lua kutunduka nguba. Buno mbubaadi bupianyi bua lutandua lua Benyamine muyile bifuko biabo, muyile mikalo yabo mu mpese yoso.

21 Na bibundi bia kisamba kia Benyamine muyile bifuko biabo bibaadi: Yeriko, Bete-ogla, Emeke-kesise, 22 Bete-araba, Semarayime, Betele, 23 Awime, Para, Ofra, 24 Kefare-amoni, Ofeni na Geba, bibundi 12 na tu bibundi tuabio tui pepi.

25 Gibeone, Rama, Berote, 26 Misepa, Kefira, Moza, 27 Rekeme, Irpeele, Tarala, 28 Sela, Elefe, Yebuse, kuamba’shi, Yelusalema, Gibeya, na Kiriate, bibundi 14 na tu bibundi tuabio tui pepi.

Buno nyi bubaadi bupianyi bua lutandua lua Benyamine muyile bifuko biabo.

19 Akupu bubale bua kabidi nkutuuka bua Simeone, bua kisamba kia Simeone muyile bifuko biabo. Na bupianyi buabo bubaadi mu bupianyi bua Yunda. 2 Bupianyi buabo bubaadi Beere-sheba na Sheba, Molada, 3 Azare-shuale, Bala, Eseme, 4 Eletolade, Betule, Orma, 5 Sikelage, Bete-markabote, Azare-susa, 6 Bete-lebaote, na Sharuhene, bibundi 13 na tu bibundi tuabio tui pepi; 7 Aine, Rimone, Etere, na Ashane, bibundi binanka na tu bibundi tuabio tui pepi; 8 na tu bibundi toso tubaadi tuifunyishe bino bibundi mpa na ku Baalate-bere, Rama a kuushi. Buno nyi bubaadi bupianyi bua kisamba kia Simeone muyile bifuko biabo. 9 Bupianyi bua lutandua lua Simeone bubaadi buatshibue mu kipindi kia nsenga kibaabadi bape Yunda, muanda kipindi kia Yunda kibaadi kibakile bukata. Biabia lutandua lua Simeone lubapetele kipindi kia nsenga mu bupianyi buabo.

10 Akupu bubale bua kasatu bubatuukile bua lutandua lua Zabulone muyile bifuko biabo, na mukalo wa bupianyi buabo ubaadi awende mpa na ku Saride. 11 Mukalo wabo ubaadi aukaamina dia kupona nguba utadiile ku Mareala na ubaadi aukafiki mpa na ku Dabeshete, akupu ubaadi awende ku ebanda* ditalene na Yokeneame. 12 Na ubaadi aukatuka ku Saride dia kutunduka nguba, awende ku mukalo wa Kislote-tabore na ubaadi autuuku ku Daberate akupu aukaamina ku Yafiya. 13 Kukatuka kuakua ubaadi autungunuka dia kutunduka nguba mpa na ku Gate-efere, ku Ete-kazine, na autuuku ku Rimone, na ubaadi awende ku Neya. 14 Na dia kunundu, mukalo ubaadi awifunyu dia ku Anatone, na ubaadi aufudiila ku Ebanda dia Ifeta-ele, 15 na Katate, Nahalale, Shimerone, Idala, na Beteleme, bibundi 12 na tu bibundi tuabio tui pepi. 16 Buno nyi bubaadi bupianyi bua lutandua lua Zabulone muyile bifuko biabo. Bino nyi bibaadi bibundi biabo na tu bibundi tuabio tui pepi.

17 Bubale bua kananka nkutuuka bua Isakare, bua lutandua lua Isakare muyile bifuko biabo. 18 Na mukalo wabo ubaadi ukafikie ku Izreele, Kesulote, Shuneme, 19 Afaraime, Shione, Anaharate, 20 Rabite, Kishione, Ebese, 21 Remete, Ene-ganime, Ene-adda, na Bete-pasese. 22 Na mukalo ubaadi ukafikie mpa na ku Tabore na ku Shahasima, na ku Bete-shemeshe, nfudiilo ya mukalo wabo ibaadi ku Yordane, bibundi 16 na tu bibundi tuabio tui pepi. 23 Buno nyi bubaadi bupianyi bua kisamba kia Isakare muyile bifuko biabo, bibundi na tu bibundi tuabio tui pepi.

24 Akupu bubale bua katano nkutuuka bua kisamba kia Ashere muyile bifuko biabo. 25 Na mukalo wabo ubaadi Elekate, Ali, Betene, Akeshafe, 26 Alameleke, Amade, na Mishale. Ubaadi ukafikie dia kupona nguba ku Karmele na ku Shihore-libenate, 27 na ubaadi awalukiila utadiile dia kutunduka nguba ku Bete-dagone, na ubaadi aukafiki mpa na ku Zabulone na ku Ebanda dia Ifeta-ele dia kunundu, dia ku Bete-emeke na ku Neyele, na ubaadi aukafiki mpa na ku Kabule dia ku mboko ibakashi, 28 na ku Ebrone, ku Rehobe, ku Ammone mpa na ku Sidone Mukata. 29 Mukalo ubaadi awalukiila ku Rama awende mpa na ku kibundi ki na midimba i bukopo kia Tiire. Akupu ubaadi awalukiila ku Osa, na ubaadi aufudiila ku kalunga ka mema mu nsenga ya Akezibe, 30 Uma, Afeke, na Rehobe, bibundi 22 na tu bibundi tuabio tui pepi. 31 Buno nyi bubaadi bupianyi bua kisamba kia Ashere muyile bifuko biabo. Bino nyi bibaadi bibundi biabo na tu bibundi tuabio tui pepi.

32 Bubale bua kasamombo nkutuuka bua lutandua lua Neftali, bua lutandua lua Neftali muyile bifuko biabo. 33 Mukalo wabo ubaadi aubangila ku Kelefe, kukatukila ku mutshi ukata mu Saananime na awende ku Adami-nekebe na ku Yabenele mpa na ku Lakume; na ubaadi aufudiila ku Yordane. 34 Mukalo ubaadi awalukiila dia kupona nguba utadiile dia ku Azenote-tabore na kukatukila kuakua ubaadi awende mpa na ku Ukoke na aukafiki ku Zabulone dia kuushi na ku Ashere dia kupona nguba na ku Yunda, ku Yordane lupese lua kutunduka nguba. 35 Na bibundi bi na midimba i bukopo bibaadi Sidime, Sere, Ammate, Rakate, Kinerete, 36 Adama, Rama, Asore, 37 Kedeshe, Edrei, Ene-asore, 38 Yireone, Migedale-ele, Oreme, Bete-anate, na Bete-shemeshe, bibundi 19 na tu bibundi tuabio tui pepi. 39 Buno nyi bubaadi bupianyi bua kisamba kia Neftali muyile bifuko biabo, bibundi na tu bibundi tuabio tui pepi.

40 Bubale bua musambobidi nkutuuka bua kisamba kia Dane muyile bifuko biabo. 41 Na mukalo wa bupianyi buabo ubaadi Soreya, Eshetaole, Ir-shemeshe, 42 Shalabine, Ayalone, Itela, 43 Elone, Timena, Ekrone, 44 Eleteke, Gibetone, Baalate, 45 Yehude, Bene-berake, Gate-rimone, 46 Me-Yarkone, na Rakone, na mukalo ubaadi witalene na Yopee. 47 Anka nsenga ya Dane ibaadi ikile bupeela buabo. Nyi abo nkukaamina na nkulua na Lesheme ngoshi, abo nkumukuata na nkuipaa bantu abaadi muanka ku lupete lua ngoshi. Akupu abo nkumuata na nkushala muanka, na abo nkushintula eshina dia Lesheme bu Dane, eshina dia nshabo-kulu. 48 Buno nyi bubaadi bupianyi bua kisamba kia Dane muyile bifuko biabo. Bino nyi bibaadi bibundi biabo na tu bibundi tuabio tui pepi.

49 Bino nyi bibabapuile kuabila nsenga ya kupiana muyile bipindi biayo. Akupu bena Isalele nkupa Yoshua muana a Nune bupianyi munkatshi muabo. 50 Kuiyi dia Yehowa abamupeele kibundi kibaadi mutekie, Timenate-sera, mu nsenga ya ku miengie ya Efraime, aye nkuibakuula kiakia kibundi na nkushala muanka.

51 Buno nyi bupianyi bubaadi tshite muakuidi Eleazare, Yoshua muana a Nune, na ba nfumu ba bifuko bia ba mashabo ba bisamba bia Isalele baabile pa kuta bubale mu Shilo kumpala kua Yehowa, ku kituelelo kia kashibo k’epema ka kufumankena. Bino nyi bibaabadi bapudishe kuaba nsenga.

20 Akupu Yehowa nkulungula Yoshua’shi: 2 “Lungula bena Isalele’shi, ‘Esanguileyi bibundi bia kusuukila binaadi muinulungule kukiila kui Moyise, 3 bua’shi yawa ayipaa muntu kampanda* kushi pa bukopo sunga kushi kuuka asuukile muanka. Na abikala bibundi bianudia kusuukila muntu aobola mase. 4 Abitungu asuukile mu kimune kia ku bino bibundi na ayimane ku kituelelo kia kibelo kia kibundi na alungule bakulu ba kiakia kibundi muanda waye. Akupu abitungu bamutambule mu kibundi, bamupe mbalo na ashale nabo. 5 Su muntu aobola mase amulonda, t’abatuulu muntu bayipayishena mu maasa muaye, muanda bayipa muntu naye kushi kuuka, na t’ekalanga mubadiile kumushikua. 6 Abitungu ashale mu kiakia kibundi mpa na p’ayimana kumpala kua kakongie bua kusamba, na ashala muanka mpa na apafu tshite muakuidi mukata afubu mu aa mafuku. Akupu muntu muipayishene mmulombene kualukiila mu kibundi mu’ekalanga musuukie, na mmulombene kutuela mu kibundi kiabo na mu nshibo muaye.’”

7 Abo nkuikasha a kishila* Kedeshe mu Ngalileya, mu nsenga ya ku miengie ya Neftali, Shekeme mu nsenga ya ku miengie ya Efraime, na Kiriate-arba, kuamba’shi, Ebrone, mu nsenga ya ku miengie ya Yunda. 8 Mu nsenga ya Yordane dia kutunduka nguba kua Yeriko, abasanguile Besere mu kabaaka pa mbalo ibatame i kunundu mu nsenga ya kisamba kia Rubene, Ramote mu Gileade mu nsenga ya kisamba kia Gade, na Golane mu Bashane mu nsenga ya kisamba kia Manasee.

9 Bino nyi bibekeele bibundi bibaabadi basangule bua bena Isalele boso na bua bantu benyi bashale munkatshi muabo, bua’shi yawa oso ayipaa muntu kampanda* kushi pa bukopo asuukile muanka, na tafuanga ku maasa kua muntu aobola mase kumpala kua’shi ayimane kumpala kua kakongie bua kusamba.

21 Ba nfumu ba bifuko bia ba mashabo bia bena Levi nkuifubuila kui tshite muakuidi Eleazare, Yoshua muana a Nune, na ba nfumu ba bifuko bia mashabo ba bisamba bia Isalele, 2 abo nkuisamba nabo mu Shilo mu nsenga ya Kanaana, nkuakula’shi: “Yehowa baadi mutume eyi kukiila kui Moyise bua’shi betupe bibundi muatudia kushala, pamune na mapia abio a kudishila nyema bua bimunuanga bietu.” 3 Biabia kuiyi dia Yehowa bena Isalele nkupa bena Levi bino bibundi na mapia abio a kudishila nyema mu bupianyi buabo’bo banabene.

4 Bubale nkupoona bifuko bia bena Kehate, na babapeele bena Levi babaadi lutandua lua tshite muakuidi Alona pa kuta bubale bibundi 13 bia mu nsenga ya kisamba kia Yunda, ya kisamba kia Simeone, na ya kisamba kia Benyamine.

5 Bua bangi bena Kehate babaadi bashale, babebapeele* bibundi ekumi bia mu nsenga ya bifuko bia kisamba kia Efraime, ya kisamba kia Dane, na ya kipindi kia kisamba kia Manasee.

6 Na bua bena Gershone, babebapeele bibundi 13 bia mu nsenga ya bifuko bia kisamba kia Isakare, ya kisamba kia Ashere, ya kisamba kia Neftali, na ya kipindi kia kisamba kia Manasee mu Bashane.

7 Bua bena Merari muyile bifuko biabo, kubaadi bibundi 12 bia mu nsenga ya kisamba kia Rubene, ya kisamba kia Gade, na ya kisamba kia Zabulone.

8 Biabia nyi bibundi bibaadi bena Isalele bape bena Levi na mapia abio a kudishila nyema pa kuta bubale nka bu bibaadi Yehowa mutume eyi kukiila kui Moyise.

9 Biabia mu kisamba kia Yunda na mu kisamba kia Simeone, babebapeele bino bibundi biabadi batemune mashina pano, 10 bena Kehate babaadi lutandua lua Alona ba mu kisamba kia Levi, nyi babapetele kumpala ndambo ya bibundi, muanda bubale bua musango wa kumpala bubaponene pabadi. 11 Abo nkuibapa Kiriate-arba (Arba baadi nshaye na Anake), kuamba’shi, Ebrone, mu nsenga ya ku miengie ya Yunda na mapia a kudishila nyema amuifunyishe. 12 Anka mapia a kibundi na tu bibundi tuakio tui pepi babebipeele Kalebe muana a Yefune bu biaye.

13 Bana ba tshite muakuidi Alona, babebapeele kibundi kia kusuukila bua muntu ayipayishena, kuamba’shi Ebrone na mapia aaye a kudishila nyema, na Libena na mapia aaye a kudishila nyema, 14 Yatire na mapia aaye a kudishila nyema, Eshetemoa na mapia aaye a kudishila nyema, 15 Olone na mapia aaye a kudishila nyema, Debire na mapia aaye a kudishila nyema, 16 Aine na mapia aaye a kudishila nyema, Yuta na mapia aaye a kudishila nyema, na Bete-shemeshe na mapia aaye a kudishila nyema, bibundi kitema bia mu nsenga ya bino bisamba bibidi.

17 Mu kisamba kia Benyamine: Gibeone na mapia aaye a kudishila nyema, Geba na mapia aaye a kudishila nyema, 18 Anatote na mapia aaye a kudishila nyema, na Alemone na mapia aaye a kudishila nyema, bibundi binanka.

19 Bibundi bioso bibaabadi bape lutandua lua Alona, ba tshite muakuidi, bibaadi bibundi 13 na mapia abio a kudishila nyema.

20 Bua bingi bifuko bia bena Kehate bibaadi bishale munkatshi mua bena Levi babaadi bebipe bibundi mu nsenga ya kisamba kia Efraime pa kuta bubale. 21 Babebapeele kibundi kia kusuukila bua muntu ayipayishena, kuamba’shi, Shekeme na mapia aaye a kudishila nyema mu nsenga ya ku miengie ya Efraime, Gezere na mapia aaye a kudishila nyema, 22 Kibesaime na mapia aaye a kudishila nyema, na Bete-orone na mapia aaye a kudishila nyema, bibundi binanka.

23 Mu kisamba kia Dane: Eleteke na mapia aaye a kudishila nyema, Gibetone na mapia aaye a kudishila nyema, 24 Ayalone na mapia aaye a kudishila nyema, Gate-rimone na mapia aaye a kudishila nyema, bibundi binanka.

25 Na mu kipindi kia kisamba kia Manasee: Tanake na mapia aaye a kudishila nyema, na Gate-rimone na mapia aaye a kudishila nyema, bibundi bibidi.

26 Bifuko bia bena Kehate bibaadi bishale, bibapetele bibundi ekumi na mapia abio a kudishila nyema.

27 Na bena Gershone ba mu bifuko bia bena Levi babaadi bapete kui kipindi kia kisamba kia Manasee kibundi kia kusuukila bua muntu ayipayishena, kuamba’shi, Golane mu Bashane na mapia aaye a kudishila nyema, na Beshetera na mapia aaye a kudishila nyema, bibundi bibidi.

28 Na mu kisamba kia Isakare: Kishione na mapia aaye a kudishila nyema, Daberate na mapia aaye a kudishila nyema, 29 Yarmute na mapia aaye a kudishila nyema, na Ene-ganime na mapia aaye a kudishila nyema, bibundi binanka.

30 Mu kisamba kia Ashere: Mishale na mapia aaye a kudishila nyema, Abadone na mapia aaye a kudishila nyema, 31 Elekate na mapia aaye a kudishila nyema, na Rehobe na mapia aaye a kudishila nyema, bibundi binanka.

32 Mu kisamba kia Neftali: kibundi kia kusuukila bua muntu ayipayishena, kuamba’shi, Kedeshe mu Ngalileya na mapia aaye a kudishila nyema, Amote-dore na mapia aaye a kudishila nyema, Kartane na mapia aaye a kudishila nyema, bibundi bisatu.

33 Bibundi bioso bia bena Gershone muyile bifuko biabo bibaadi 13 na mapia abio a kudishila nyema.

34 Bifuko bia bena Merari, bena Levi babaadi bashale babapetele kui kisamba kia Zabulone: Yokeneame na mapia aaye a kudishila nyema, Karta na mapia aaye a kudishila nyema, 35 Dimina na mapia aaye a kudishila nyema, na Nahalale na mapia aaye a kudishila nyema, bibundi binanka.

36 Na mu kisamba kia Rubene: Besere na mapia aaye a kudishila nyema, Yasa na mapia aaye a kudishila nyema, 37 Kedemote na mapia aaye a kudishila nyema, na Mefaate na mapia aaye a kudishila nyema, bibundi binanka.

38 Na mu kisamba kia Gade: kibundi kia kusuukila bua muntu ayipayishena, kuamba’shi Ramote mu Gileade na mapia aaye a kudishila nyema, Mahanaime na mapia aaye a kudishila nyema, 39 Eshebone na mapia aaye a kudishila nyema, na Yazere na mapia aaye a kudishila nyema, bioso bibundi binanka.

40 Bibundi bioso bibaabadi bape bena Merari muyile bifuko biabo, bifuko bia bena Levi bibaadi bishale, bibaadi bibundi 12.

41 Bibundi bioso bia bena Levi bibaadi mu nsenga ya bena Isalele bibaadi bibundi 48 na mapia aabio a kudishila nyema. 42 Kibundi kioso kia ku bino bibundi kibaadi na mapia aakio a kudishila nyema e kifunyishe, nyi bibabidi bua bino bibundi bioso.

43 Biabia Yehowa bapeele Isalele nsenga yoso ibaadi muitshipe bua kupa ba mashabo kulu, na abo nkuiyata na nkushala muanka. 44 Yehowa bebapeele dingi kuikisha mu mpese yoso, nka bu bibaadi muitshipe kui ba mashabo kulu, na takui muishikuanyi su ngumune a ku beshikuanyi babo boso baadi mulombene kuibatshokola. Yehowa bebapeele beshikuanyi babo boso mu maasa aabo. 45 Takui mulayilo* su ngumune wa ku milayilo yoso i buwa ibaadi Yehowa mulee nshibo ya Isalele ushibaadi ukumbane; yoso ibaadi ikumbane.

22 Akupu Yoshua bayitanyishe bena Rubene, bena Gade, na kipindi kia kisamba kia Manasee 2 na nkuibalungula’shi: “Nuibakite bioso bibaadi Moyise mufubi a Yehowa muinutumine eyi, na nuibakookiele eyi diande mu bioso biandi muinutumine eyi. 3 Ta nuibasumbushene bakuenu mu kino kipungo kioso mpa na lelo; na nuibakookiele muiya wa Yehowa Efile Mukulu eenu. 4 Binobino Yehowa Efile Mukulu eenu bapa bakuenu kuikisha, nka bu bibaadi muibalee. Biabia nuibalombene kualukiila ku tushibo tuenu tua mapema mu nsenga ibaadi Moyise mufubi a Yehowa muinupe abua bushiya* bua Yordane. 5 Anka nuikale badimukie bua kutumikila mayi na Muiya bibaadi Moyise mufubi a Yehowa muinupe, pa kufula Yehowa Efile Mukulu eenu, pa kutambukila mu mashinda aaye oso, pa kutumikila mayi aaye, pa kumulamata, na pa kumufubila n’eshimba dienu dioso na anyima* eenu oso.”

6 Akupu Yoshua nkuibelela miabi, nkuibalusha, na abo nkuenda ku tushibo tuabo tua mapema. 7 Moyise baadi mupue kupa kipindi kia kisamba kia Manasee bupianyi mu Bashane, na kingi kipindi kia kisamba, Yoshua baadi muikipe nsenga lupese lua kupona nguba kua Yordane, pamune na bakuabo. Dingi, pabaadi Yoshua muibalushe ku tushibo tuabo tua mapema, baadi muibelele miabi 8 na ebalungula’shi: “Alukiilayi ku tushibo tuenu tua mapema na bupeta bui bungi, na bimunuanga bikile bungi, na kiamo kia arja, na ôlo, na kiamo kia munyinga, na kiamo, na bilamba bikile bungi. Atayi kienu kipindi kia bintu bianudi bapaule kui beshikuanyi benu pamune na bakuenu.”

9 Akupu bena Rubene, bena Gade, na kipindi kia kisamba kia Manasee nkukatuka kui bangi bena Isalele, ku Shilo mu nsenga ya Kanaana, na abo nkualukiila mu nsenga ya Gileade, nsenga ya bupianyi buabo ibaabadi bashale kuiyi dibaadi Yehowa mutume kukiila kui Moyise. 10 Pababafikile pepi na Yordane mu nsenga ya Kanaana, bena Rubene, bena Gade, na kipindi kia kisamba kia Manasee, abebakile kilambuilo kuakua pepi na Yordane, kilambuilo kikata na akikaanyisha. 11 Kunyima bena Isalele abapushishe’shi: “Bena Rubene, bena Gade, na kipindi kia kisamba kia Manasee abebaka kilambuilo ku mukalo wa nsenga ya Kanaana pepi na Yordane lupese lua bena Isalele.” 12 Pabapushishe bena Isalele biabia, kakongie kashima ka bena Isalele kabebungile ku Shilo bua kuenda mu kulua nabo ngoshi.

13 Akupu bena Isalele abatumine Finease muana a tshite muakuidi Eleazare kui bena Rubene, bena Gade, na kipindi kia kisamba kia Manasee mu nsenga ya Gileade, 14 na ba nfumu ekumi babaadi naye, nfumu umune bua kifuko kioso kia ba mashaye ba bisamba bioso bia Isalele, oso a kuabadi muikale nfumu a kifuko kia ba mashaye munkatshi mua binunu bia Isalele. 15 Pababafikile kui bena Rubene, bena Gade, na kipindi kia kisamba kia Manasee mu nsenga ya Gileade, babebalunguile’shi:

16 “Kakongie kashima ka Yehowa kabakula bino’shi: ‘Uno mmuanda kinyi wa kukutua lulamato ubanukitshina Efile Mukulu a Isalele? Nubalekie kulonda Yehowa p’anue kuibaka kilambuilo na p’anue kutombokiela Yehowa. 17 Kilubilo kiatubaadi bakite ku Peore ta nkikumbane su? Ta tuabandile kuitoosha ku kianka mpa na lelo, sunga bibaadi kipupa kifikile kakongie ka Yehowa. 18 Anukiebe lelo uno kuleka kulonda Yehowa! Su nubatombokiela Yehowa lelo uno, malooba akafitshila kakongie kashima ka Isalele munda. 19 Binobino su mpa muanda wa’shi nsenga yenu i butete, sabukayi abua bushiya mu nsenga ya Yehowa mushale tabernakele a Yehowa, na nushale munkatshi muetu, anka tanutombokielanga Yehowa, na tanuituikashanga ba ntomboshi p’anue kuibaka kilambuilo, kukatusha kilambuilo kia Yehowa Efile Mukulu eetu. 20 Pabaadi Akane muana a Zera mukite muanda wa kukutua lulamato pabitale kintu kia kubutula, nsungu tayibaadi ifikile kakongie kashima ka Isalele su? Na tabaadi mufue bupenka bua kilubilo kiaye nya.’”

21 Nyi bena Rubene, bena Gade, na kipindi kia kisamba kia Manasee nkualula ba nfumu ba binunu ba Isalele’shi: 22 “Yehowa,* Efile Mukulu a b’efile! Yehowa, Efile Mukulu a b’efile! Auku, na Isalele namu akauku. Su tubaadi batombokie na kukutua lulamato kui Yehowa, t’etupashanga lelo uno. 23 Su tui bebakie kilambuilo bua kupela kulonda Yehowa na bua kulambula milambu ya kushiika kaalo, milambu ya ntete, na milambu ya butaale panka, Yehowa etunyookie. 24 Nya, tui bebikite bua kangi kabingilo, muanda tuibakule’shi, ‘Mu mafuku aafiki, bana benu abakalungula bana betu’shi: “Nkipuano kinyi kianudi nakio na Yehowa Efile Mukulu a Isalele? 25 Yehowa mmutuule Yordane bu mukalo pankatshi petu nenu, anue bena Rubene na bena Gade. Tanui na kintu su nkimune kia kukita pabitale Yehowa.” Na bana benu abakakutshishua bana betu kulanguila* Yehowa.’

26 “Biabia tu’akuile’shi, ‘Tuibakieyi kilambuilo, kishi kia milambu ya kushiika kaalo sunga milambu, 27 anka bua’shi kikale bu kamonyi pankatshi petu nenu, na lutandua* luetu alulondo kunyima kuetu’shi, atufubila Yehowa na milambu yetu ya kushiika kaalo, na milambu yetu, na milambu yetu ya butaale, bua’shi bana benu tabalungulanga bana betu mu mafuku aafiki’shi: “Tanui na kintu su nkimune kia kukita pabitale Yehowa.”’ 28 Biabia tu’akuile’shi, ‘Su betulungula biabia atue na lutandua luetu mu mafuku aafiki, atukakula’shi: “Talayi kilambuilo ki mumune na kilambuilo kia Yehowa kibaadi ba mashetu kulu bakite, kishi kia milambu ya kushiika kaalo sunga milambu, kadi bua’shi kikale bu kamonyi pankatshi petu nenu.”’ 29 Tatui balombene su nkapeela kutombokiela Yehowa na kuleka kulonda Yehowa pa kuibaka kilambuilo bua milambu ya kushiika kaalo, milambu ya ntete, na milambu, kukatusha kilambuilo kia Yehowa Efile Mukulu eetu ki kumpala kua tabernakele aaye!”

30 Pabapushishe tshite muakuidi Finease, ba nfumu ba kakongie, na ba nfumu ba binunu ba Isalele babaadi naye mayi abaadi akule lutandua lua Rubene, lua Gade, na lua Manasee, abapushishe muloo. 31 Biabia Finease muana a tshite muakuidi Eleazare nkulungula lutandua lua Rubene, lua Gade, na lua Manasee’shi: “Lelo uno tubauku’shi Yehowa e munkatshi muetu, muanda ta nuibakitshine Yehowa uno muanda wa kukutua lulamato nya. Binobino Yehowa tetunyoko nya.”

32 Akupu Finease muana a tshite muakuidi Eleazare na ba nfumu nkukatuka kui bena Rubene, na bena Gade mu nsenga ya Gileade nkualukiila mu nsenga ya Kanaana, na abo nkulungula bangi bena Isalele bibaabadi bakule. 33 Na uno mukandu ubaadi usankishe bena Isalele. Akupu bena Isalele nkutumbisha Efile Mukulu, na tababaadi bakule ungi muanda pabitale kuenda mu kulua ngoshi na bena Rubene, na bena Gade bua kubutula nsenga ibaabadi bashale.

34 Biabia bena Rubene na bena Gade babaudikile kiakia kilambuilo* eshina, muanda “nyi nkamonyi pankatshi petu’shi, Yehowa nyi Efile Mukulu a binyibinyi.”

23 Mafuku e bungi kunyima kua Yehowa kupa Isalele kuikisha kui beshikuanyi baye boso babaadi bamuifunyishe, pabaadi Yoshua mupue kununupa na muikale na bipua bi bungi, 2 Yoshua bayitanyishe Isalele oso, bakulu baye, ba nfumu baye, ba nsushi baye, na ba kunkushi baye, na aye nkuibalungula’shi: “Napu kununupa; tandi na bipua bi bungi. 3 Na nuibemuene anue banabene bioso bikite Yehowa Efile Mukulu eenu ino miilo yoso pa muanda wenu, muanda Yehowa Efile Mukulu eenu nyi baadi enuluila ngoshi. 4 Nemuinuabe pa kuta bubale* nsenga ya miilo ibaadi ishale bu bupianyi bua bisamba bienu, mpa na nsenga ya miilo yoso inaadi mubutule, kukatukila ku Yordane mpa na ku Kalunga Kakata* dia kupona nguba. 5 Na Yehowa Efile Mukulu eenu nyi baadi ebabingi kumpala kuenu, na baadi muibabingie* buenu, na nubaadi baate nsenga yabo bu yenu nka bu bibaadi Yehowa Efile Mukulu eenu muinulee.

6 “Binobino abitungu nunyingie mashimba ngofu bua kukookiela na kutumikila bioso bifundibue mu mukanda wa Muiya wa Moyise, kushi kuiutupilua ku mboko ibalume sunga ku mboko ibakashi, 7 kushi kuisanga na ino miilo ishaale nenu. T’abitungu nuteemune sunga mashina a b’efile babo sunga kuitshipa mu mashina aabo, na t’abitungu nuibafubile sunga kuibayinamina. 8 Anka abitungu nushale balamate Yehowa Efile Mukulu eenu, nka bu bianubebikitshi mpa na lelo. 9 Yehowa akabingi miilo ikata na i bukome kumpala kuenu, muanda takui muntu su ngumune mobeshe kuimana kumpala kuenu mpa na lelo. 10 Penda muntu umune a kuanudi akebingena na bantu kinunu, muanda Yehowa Efile Mukulu eenu kuete kuinuluila ngoshi, nka bu bibaadi muinulee. 11 Biabia ikalayi badimukie nsaa yoso pa kufula Yehowa Efile Mukulu eenu.

12 “Anka su nuasumbushena Efile Mukulu na nualamata bantu bashale ba ku ino miilo iki nenu na nueyibakishena nabo, na nuesanga nabo, abo namu besanga nenu, 13 abitungu nuukie binyibinyi’shi Yehowa Efile Mukulu eenu t’akatungunuka na kubinga* ino miilo buenu. Ayikekala bu kateo buenu, bu nfimbo mu mbafu yenu, na bu milobo mu meso eenu mpa na p’anukashimina mu ino nsenga i buwa inupe Yehowa Efile Mukulu eenu.

14 “Binobino talayi! Tandi pa kufua,* na anuuku kalolo na mashimba eenu oso, na ayima* yenu yoso’shi takui eyi su ndimune dia ku milayilo yoso i buwa ibaadi Yehowa Efile Mukulu eenu muinulee dishi dikumbane. Oso ngenukumbene. Eyi su ndimune dia ku anka ta ndikutue kukumbana. 15 Kadi nka bu bibaadi binulombene milayilo yoso i buwa ibaadi Yehowa Efile Mukulu eenu muinulee, mu mushindo umune Yehowa enufuishila makienga oso abaadi mulee* na enushimisha mu ino nsenga i buwa ibaadi Yehowa Efile Mukulu eenu muinupe. 16 Su nuayipaa kilombeno kia Yehowa Efile Mukulu eenu kibaadi muinutumine eyi bua kulama, na su nuenda na nualanguila bangi b’efile na nuebayinamina, paapa nsungu ya Yehowa ayinutembela na anushimina bukidibukidi mu nsenga i buwa ibaadi muinupe.”

24 Akupu Yoshua nkubunga bisamba bioso bia Isalele pamune ku Shekeme na nkuitanyisha bakulu ba Isalele, ba nfumu babio, ba nsushi babio, na bakunkushi babio, na abo nkuimana kumpala ku’Efile Mukulu a binyibinyi. 2 Yoshua nkulungula muilo oso’shi: “Yehowa Efile Mukulu a Isalele bakula bino’shi: ‘Ba mashenu kulu abaadi bashale abua bushiya bua Muela* takudi bipua bi bungi, Tera nshaye na Abalahama na nshaye na Naore, abaadi abalanguila bangi b’efile.

3 “‘Muenda mafuku natshile nshenu Abalahama abua bushiya bua Muela* namuifunyisha mu nsenga yoso ya Kanaana na nayikasha lutandua* luaye lui bungi. Ami nkumupa Isaake; 4 akupu ami nkupa Isaake Yakobo na Esau. Kunyima ami nkupa Esau muengie wa Seyire bu waye; anka Yakobo na bana baye nkualaala mu Ejipitu. 5 Kunyima ami nkutuma Moyise na Alona, ami nkutumina Ejipitu bipupa na ami nkuinutuusha. 6 Panaadi natuusha ba mashenu mu Ejipitu na anue nkufika ku Kalunga ka mema, bena Ejipitu abaadi abalondo ba mashenu na matempu a ngoshi na basalayi bakaamine pa tubalo mpa na ku Kalunga Kamonga. 7 Abo nkubanga kuela misaase kui Yehowa, nyi aye nkutuula mufito pankatshi penu na bena Ejipitu na nkualusha kalunga ka mema pabadi, ako nkuibabuikila, na meso eenu ngamone binaadi mukite mu Ejipitu. Akupu anue nkushala mu kabaaka munda mua bipua* bi bungi.

8 “‘Ami nkuenda nenu mu nsenga ya bena Amore babaadi bashale abua bushiya* bua Yordane, na abo nkuinuluisha ngoshi. Anka ami nkuinupa banka mu maasa eenu bua’shi nuate nsenga yabo bu yenu, na ami nkuibabutula kumpala kuenu. 9 Akupu Balake muana a Zipore, nfumu a Moabe, nkuibua na nkuluisha Isalele ngoshi. Biabia aye nkuitanyisha Balame muana a Beore bua kuinuela mulua. 10 Anka ntshinadi muteemeshe Balame. Biabia aye nkuinuelela miabi misusa i bungi, na ami nkuinupaasha mu maasa aaye.

11 “‘Akupu anue nkusabuka Yordane, nkufika ku Yeriko. Na bakunkushi* ba Yeriko, bena Amore, bena Perizi, bena Kanaana, bena Ite, bena Girgashi, bena Ivii, na bena Yebuse nkuinuluisha ngoshi, anka ami nkuinupa banka mu maasa eenu. 12 Biabia ami nkukita bia’shi babofule ku mashimba,* na abo nkusuuka kumpala kuenu, ba nfumu babidi ba bena Amore. Tabibaadi ku lupete luenu lua ngoshi sunga ku buta buenu. 13 Nyi binaadi muinupe nsenga yanushibaadi bafumbakene, na bibundi bianushibaadi bebakie na anue nkushala muanka. Nukuete kudia tukuba tua mu mafuba a nfinyo na tua mu mafuba a olive tuanushibaadi bakune.’

14 “Biabia tshinayi Yehowa na numufubile na lulamato loso,* nukatushe b’efile babaadi ba mashenu kulu bafubile abua bushiya bua Muela na mu Ejipitu, na nufubile Yehowa. 15 Binobino su abimueneka bi bubi kuanudi bua kufubila Yehowa, sangulayi anue banabene lelo uno yawa anufubila, biabikala b’efile babaadi ba mashenu kulu bafubile abua bushiya bua Muela sunga b’efile ba bena Amore ba sha nsenga yanudi bashale. Anka ami na ba mu nshibo muande, atufubila Yehowa.”

16 Biabia muilo nkualula’shi: “Tatui balombene su nkapeela kusumbushena Yehowa bua kulanguila bangi b’efile. 17 Yehowa Efile Mukulu eetu nyi baadi muitutuushe na ba mashetu mu nsenga ya Ejipitu, mu nshibo ya bupika, na nnaye baadi mukite bino bitunduilo bikata mu meso muetu na muitulame muishinda dioso mubatudi batambukie na munkatshi mua miilo yoso mubatudi bakidile. 18 Yehowa baadi mubingie miilo yoso mpa na bena Amore abaadi bashale mu nsenga kumpala kuetu. Biabia natue namu, atufubila Yehowa, muanda nyi Efile Mukulu eetu.”

19 Akupu Yoshua nkulungula muilo’shi: “Tanui balombene kufubila Yehowa, muanda nyi Efile Mukulu eselele; Efile Mukulu atekaa’shi bamulamate nka penda aye. T’enufuila lusa bua kuipaa kuenu kua miiya* na bua miluisho yenu. 20 Su nuasumbushena Yehowa na nuafubila b’efile benyi, aye namu akenusumbushena na kuinubutula kunyima kua kuinukitshina bi buwa.”

21 Anka muilo nkulungula Yoshua’shi: “Nya, atue atufubila Yehowa!” 22 Biabia Yoshua nkulungula muilo’shi: “Nui tumonyi buenu’nue banabene’shi, nubasangula anue banabene bua kufubila Yehowa.” Abo nkuakula’shi: “Tui tumonyi.”

23 “Biabia, katushayi b’efile benyi be munkatshi muenu, na nufubile Yehowa Efile Mukulu a Isalele n’eshimba dienu dioso.” 24 Muilo nkualula Yoshua’shi: “Atufubila Yehowa Efile Mukulu eetu, na atukookiela eyi diaye!”

25 Biabia Yoshua nkukita na muilo kilombeno mu diadia efuku na nkuibelela muiya na kitshibilo mu Shekeme. 26 Akupu Yoshua nkufunda ano mayi mu mukanda wa Muiya w’Efile Mukulu, na nkuata ebue dikata nkuidituula muushi mua mutshi ukata wi pepi na mbalo ya kishila ya Yehowa.

27 Yoshua nkulungula muilo oso’shi: “Talayi! Dino ebue adikekala bu kamonyi kuatudi, muanda dibapusha mianda yoso ibetulungula Yehowa, na adikekala bu kamonyi kuanudi, bua’shi tanupelanga Efile Mukulu eenu.” 28 Biabia Yoshua nkualusha muilo, muntu oso ku bupianyi buaye.

29 Kunyima kua ino mianda, Yoshua muana a Nune mufubi a Yehowa, nkufua na bipua 110. 30 Biabia abo nkumushiika mu nsenga ya bupianyi buaye mu Timenate-sera, i mu nsenga ya ku miengie ya Efraime, dia kunundu kua Muengie wa Gashe. 31 Isalele batungunukile na kufubila Yehowa mafuku oso a Yoshua, na mafuku oso a bakulu babaadi na muwa kunyima kua lufu lua Yoshua, na babaadi abauku bioso bibaadi Yehowa mukitshine Isalele.

32 Mifufua ya Yosefe ibaadi bena Isalele batuukie nayo mu Ejipitu, babaadi beyishikie mu Shekeme mu kipindi ki’efuba kibaadi Yakobo muule kui bana ba Amore, nshaye na Shekeme ku makuta 100; na akio nkufika bupianyi bua bana ba Yosefe.

33 Eleazare muana a Alona bafuile n’aye. Biabia abo nkumushiika ku ka Muengie kapeela ka Finease muana aaye, kabaabadi bamupe mu nsenga ya ku miengie ya Efraime.