LUUTA

1 Biabia, mu mafuku abaadi ba nsushi abakunkusha, nsala ibatuelele muiumbo; ungi muntu bakatukile mu Beteleme mu Yunda, enda mu kushala bu muenyi mu nsenga ya Moabe na mukashi aaye na bana baye balume babidi. 2 Eshina dia yawa muntu nyi Elimeleke,* mukashi aaye baadi Naomi,* na bana baye babaadi Malone* na Kilione.* Babaadi bena Efrata ba mu Beteleme mu Yunda. Babafikile mu nsenga ya Moabe na abo nkuimushala.

3 Kunyima kua mafuku, Elimeleke mulume a Naomi bafuile, na Naomi bashadile na bana baye balume babidi. 4 Kunyima, bana baye babaadi bebakile bakashi babidi bena Moabe; umune baadi Orpa na ungi baadi Luuta. Babaadi bashale kuakua munda mua bipua bifikie ku ekumi. 5 Akupu, bana baye balume babidi Malone na Kilione babafuile namu, na Naomi bashadile bupenka kushi bana baye balume babidi sunga mulume aaye. 6 Biabia babangile luendo na bakashi ba bana baye bua kualukiila muiumbo diaye, muanda babamulunguile mu Moabe’shi, Yehowa balusha binangu kui muilo waye pa kuibapa bia kudia.

7 Bakatukile na bakashi ba bana baye babidi mu mbalo ibaadi mushale. P’abaabadi muishinda abalukiila muiumbo dia Yunda, 8 Naomi balunguile bakashi ba bana baye boso babidi’shi: “Alukiilayi, muntu oso ende ku nshibo kua nyinaye. Yehowa enuleshe kifulo kia lulamato, anka bu bianubekilesha bana bande babidi bafue mpa n’ami. 9 Yehowa akuashe oso a kuanudi bua’shi apete butaale* mu nshibo ya mulume aaye.” Paapa bebanyine kiipa, na abo nkudila ngofu. 10 Kadi babatungunukile na kumulungula’shi: “Nya, atuende nobe kui muilo oobe.” 11 Anka Naomi bebalunguile’shi: “Alukiilayi bana bande. Buakinyi anukimbi kuenda nami? Ne mulombene dingi kutanda bana balume balombene kuinuibakila su? 12 Alukiilayi bana bande. Endayi, muanda napu kununupa bikile bua kutuela ku bulunda. Sunga bi’ekalashi bangibakila lelo uno na natanda bana balume, 13 anutungunuka na kuibatengiela mpa na p’abakulu su? Anupele kuibakilua pa muanda wabo? Nya, bana bande, muanda wenu aunkalakasha ngofu, muanda eyasa dia Yehowa ndingalulukile.”

14 Abadidile’nyi dingi ngofu, akupu Orpa nkuanya nyinaye mueno kiipa na aye nkualukiila. Kadi Luuta bashadile mumulamate. 15 Paapa Naomi bakuile’shi: “Tala! Mukua-n’obe mufuishe namu mulume ngiawa balukiila kui muilo waye na kui b’efile baye. Alukiila na mukua-n’obe.”

16 Kadi Luuta bamulunguile’shi: “Tonkitshishanga buandia nkuleka, bua’shi ngalukiile nkulekie bupenka; muanda koso kuende, nami namu nakende, na kuakua kolala ami namu nyi kuankalala. Muilo oobe awikala muilo wande, n’Efile Mukulu oobe ekala namu Efile Mukulu ande. 17 Kuakua kofuila nyi kuanfuila, na nyi ku’abakanshikila. Yehowa anyokie* ngofu su kingi kintu kukatusha penda lufu kietuabuula nobe.”

18 Pabamuene Naomi’shi Luuta kuete nka kushishimika bua kuenda naye, balekiele kumutosha. 19 Boso babatungunukile na luendo mpa na p’ababafikile ku Beteleme. Musango umune n’abo kufika mu Beteleme, kibundi kishima kibasanyine pa muanda wabo, na bana bakashi babaadi abamba’shi: “Uno nyi Naomi?” 20 Baadi alungula bana bakashi’shi: “Tanungitanyinanga bu Naomi. Ngitanyineyi bu Mara,* muanda Sha Bukome Boso bayikasha nshalelo ande buulo bukile. 21 Nayile muule nda, anka Yehowa bangalusha maasa bisumanga. Buakinyi anungitanyina bu Naomi, aku namu Yehowa nyi muntombokiele, na Sha Bukome Boso nyi mufuishe malua ande?”

22 Bino nyi bibalukiile Naomi akatukila ku Moabe, na Luuta muina Moabe, mukashi a muana aaye. Babafikile mu Beteleme ku mbangilo kua kipungo kia kuumbula orje.

2 Biabia Naomi baadi na ungi mukuabo a ku lupese lua mulume aaye baadi na bupeta buibungi; eshina diaye nyi Boaze, baadi a mu kifuko kia Elimeleke.

2 Dingi efuku, Luuta muina Moabe balunguile Naomi’shi: “Ndekiele namu, nyende mu mafuba nkapumbuule miepu ya ntete kunyima kua muntu andesha kalolo.” Biabia Naomi nkumulungula’shi: “Enda muana ande.” 3 Paapa aye nkuenda, nkubanga kupumbuula muifuba kunyima kua bantu babaadi abaumbula. Kushi’ye kuuka, batuelele muifuba dia Boaze, baadi a mu kifuko kia Elimeleke. 4 Paapa Boaze bafikile akatukila ku Beteleme na aye nkulungula bantu babaadi abaumbula’shi: “Yehowa ekale nenu.” Abo namu nkumualula’shi: “Yehowa akuelele miabi.”

5 Boaze nkuipusha nsongualume baadi atala bantu abaumbula’shi: “A uno nsonguakashi nga nnanyi?” 6 Nsongualume baadi atala bantu abaumbula bamualuluile’shi: “Uno nsonguakashi mmuina Moabe, ekeele mualukiile na Naomi pakatukile muiumbo dia Moabe. 7 Ekeele muntekie’shi: ‘Ne kupumbuula namu na kusangula miepu* ipone kunyima kua bantu bakuete kuumbula?’ Ta mulekie kufuba kubanga ku namashika pafikanga mpa na binobino, bashala mu kitanda nka mu kipindi’mu bua kuikisha.”

8 Paapa Boaze nkulungula Luuta’shi: “Teemesha muana ande. Tuendanga mu kupumbuula mu dingi efuba, tuendanga ingi mbalo nya; shala pepi na bafubi bande bakashi. 9 Tala kalolo mbalo yabakuete kuumbula muifuba, na wende nabo. Ne mulungule bafubi bande balume bua’shi tabakukumanga.* Su bopusha nyota, wende ku malondo a mema otome mema abadi batape kui bafubi bande balume.”

10 Paapa Luuta bakunamine, aye nkukupila mpala paashi na nkumulungula’shi: “Buakinyi ondesha kalolo, buakinyi bombekieela aku namu ne muenyi?” 11 Boaze nkumualuula’shi: “Mbandungule bioso biodi mukitshine nyinobe mueno kunyima kua lufu lua mulume oobe, na biodi mulekie nshobe na nyinobe na kuleka eumbo di bakuenu bua kuenda kui muilo osh’oukanga kumpala. 12 Yehowa akufute bua biabia biodi mukite, na opete efuto* dipuidikie kui Yehowa Efile Mukulu a Isalele, aye obofiki mu kufuamina muushi mua mbaba yaye.” 13 Paapa Luuta bamulunguile’shi: “Nkuminyibue namu nobe nfumuami, muanda bonsamba na buesamba na mufubi oobe mu mushindo aumunyingisha eshimba, sunga bi’ekala’shi ntshi umune a ku bafubi bobe.”

14 Pa nsaa ya kudia, Boaze bamulunguile’shi: “Esesele kuno odie mukate, na osabikie kipese kiobe mu vinegre.” Paapa bashalele ku lupese lua baumbudi. Boaze bamutambikile ndambo ya ntete ikangie, na aye nkudia nkuikuta, nkulama mpa na ingi ndambo ibashadile. 15 Pabebuele bua kuenda mu kupumbuula, Boaze balunguile bafubi baye balume’shi: “Mulekieleyi apumbuule mpa na miepu* itshibe, tanumukitshinanga bi bubi nya. 16 Abitungu numukakile miepu ku bisaasa bianudi bapue kuanya, nuiyilekie kunyima kuenu bua’shi afikie asangule, na tanuakulanga muanda su ngumune wi ku muimika.”

17 Biabia batungunukile na kuumbula muifuba mpa na ku kiolua. Pabaadi mupuule bioso bibaadi mupumbuule, bibatukile bungi bui pepi na kipimo kimune kia efa* a ntete ya orje. 18 Kunyima batshile yaaya ntete na aye nkualukiila mu kibundi, na nyinaye mueno bamuene yaaya ntete ibaadi mupumbuule. Akupu Luuta bamupele’nyi ndambo ya ku bia kudia biaye bibaadi bishale.

19 Paapa nyinaye mueno bamuipuishe’shi: “A lelo opumbulanga kui kunyi? Lelo ofubilanga kui kunyi? Yawa bakulesha kalolo eedibue miabi.” Paapa aye nkulungula nyinaye mueno pabitale kuekalanga mukafubile, amba’shi: “Eshina dia yawa muntu sh’efuba muanyikeele mufube nyi Boaze.” 20 Paapa Naomi balunguile mukashi a muana aaye’shi: “Yehowa aye shi mulekie kulesha kifulo kiaye kia lulamato kui abatala na bafue amuelele miabi.” Naomi batungunukile na kuamba’shi: “Yawa muntu nga mu kifuko kietu. Ngumune a ku bakuudi* betu.” 21 Paapa Luuta muina Moabe bambile’shi: “Andunguile dingi’shi: ‘Shala pepi na ba nsongua abanfubila mpa na pabapuila kuumbula bintu biande bioso.’” 22 Naomi balunguile mukashi a muana aaye Luuta’shi: “Mbikile buwa muan’ande bodia kuenda na bafubi bakashi ba Boaze, pamutue pabadia kukukiengiesha mu dingi ebala.”

23 Biabia aye nkushala pepi na bafubi bakashi ba Boaze na aye nkupumbuula mpa na pabafikile kipungo kia kuumbula orje na blé ku nfudiilo. Na baadi nka mutungunukie na kushala na nyinaye mueno.

3 Biabia nyinaye mueno Naomi bamulunguile’shi: “Muana ande, abitungu nkukimbile mbalo yodia kuikisha,* bua’shi wekale biya. 2 Boaze mmukuetu. Ba nsonguakashi buekalanga nabo mbafubi baye. Buno bufuku apeepula orje ku mbalo ya kupeepuila ntete. 3 Nda oketumpe mema na weshingie muimu wi mapembue e buwa; ofuale bilamba biobe bikile buwa na walaale ku mbalo ya kupeepuila ntete. Kumpala kua’shi w’esesele kuadi, otengiele mpa na papuila kudia na kutoma. 4 P’alala, otale mbalo y’alala kalolo; akupu wende obuule kilamba ki ku mikoolo yaye na olaale paapa. Aye akakulungula akitungu’shi okite.”

5 Luuta bamualuluile’shi: “Nakakitshi mianda yoso ibondungula.” 6 Biabia baadi mualale ku mbalo ya kupeepuila ntete, aye nkukita bioso bibamulunguile nyinaye mueno. 7 Yaaya nsaa Boaze baadi adi na kutoma na baadi na muloo. Akupu bayile aye nkulala ku lupese lua mutuuto wa ntete. Kunyima Luuta nkuisesela kapeela kapeela, aye nkubuula kilamba kibaadi ku ngua yaye, nkulala paapa. 8 Munkatshi mua bufuku, Boaze babangile kusuusa, pabaadi muialuule bamuene muana mukashi mmulaale ku ngua yaye. 9 Bamuipuishe’shi: “Nnobe’nyi?” Aye nkumualula’shi: “Nnami Luuta mufubi oobe. Oola namu kilamba kiobe opuute mufubi oobe, muanda we mukuudi. 10 Aye nkumulungula’shi: “Yehowa akuelele miabi muana ande mukashi. Muanda bolesha’nyi kifulo kia lulamato uno musango kukila musango wa kumpala, p’obe kukutua kulonda ba nsongualume biabekala balanda sunga ba mpeta. 11 Binobino muana ande mukashi, totshinanga nya. Nakukitshina mianda yoso ibotekie, muanda bantu boso ba mu kibundi abauku’shi we mukashi mukile buwa. 12 Eyendo’shi ne mukuudi, anka kui ungi mukuudi a mu kifuko e pepi ngofu kunkila’mi. 13 Shala pano buno bufuku, su ku namashika akumiina kukukuula, mmuanda wi buwa! Akukuule. Kadi su t’akumiina kukukuula, bu bi Yehowa na muwa, ami nabene nakukuula. Lala pano mpa na p’abutooko.”

14 Biabia, baladile ku ngua yaye mpa na ku nakashika, akupu aye nkubuuka pa kafito bua’shi muntu su ngumune tamumonanga. Kunyima Boaze bamulunguile’shi: “Tabaukanga’shi muana mukashi fikile kuno ku mbalo ya kupeepuila ntete.” 15 Bamulunguile dingi’shi: “Tuusha kilamba kia panundu kiodi mufuale, w’ekikuate.” Biabia bekikuatshile, Boaze nkumuelela bipimo* bisamombo bia orje, nkumutenteka bianka, aye nkualukiila mu kibundi.

16 Luuta balukiile kui nyinaye mueno, na nyinaye mueno nkumuipusha’shi: “A mianda ibakidi naminyi muana ande?” Luuta nkumulungula mianda yoso ibaadi Boaze mumukitshine. 17 Bakumbeshe’nyi’shi: “Bampa bino bipimo bisamombo bia orje na bandungula’shi: ‘Tu’alukiilanga kui nyinobe mueno ku maasa bisumanga.’” 18 Paapa Naomi bamulunguile’shi: “Shala pano muana ande, mpa na p’ouku abiende mianda, muanda Boaze tayikisha mpa na p’apu uno muanda lelo uno.”

4 Boaze bakaamiine ku kiibi kia kibundi, aye nkushala kuakua. Na talanga! Mukuudi baadi Boaze muakule bakidile paapa. Boaze nkuamba’shi: “Obe kampanda fika oshale pano.” Yawa muntu bafikile aye nkushala. 2 Kunyima Boaze batshile bakulu ekumi ba kibundi, aye nkuamba’shi: “Shalayi pano.” Abo nkushala.

3 Biabia Boaze balunguile mukuudi’shi: “Abitungu Naomi mukatukile mu Moabe, audishe efuba dibaadi dia mukuetu mulume Elimeleke. 4 Biabia nanangushenanga’shi abitungu nkuukishe uno muanda, nkulungule’shi: ‘Ediule kumpala kua bantu ba mu kibundi na kumpala kua bakulu ba mu muilo wande, su okumiina w’edikuule. Kadi su t’okumiina kuidikuula, ndungule bua’shi nguukie, muanda obe we na matalua kumpala kuande a kuidikuula, ami namu nakulondela kunyima kobe.” Yawa muntu bamualuluile’shi: “Nakumiina kuidikuula.” 5 Paapa Boaze bambile’shi: “Muifuku di’oulu efuba kui Naomi, abitungu wediule’nyi kui Luuta muina Moabe, mukashi a mufue, bua kualushula eshina dia mufue mu bupianyi buaye.” 6 Mukuudi nkumualuula’shi: “Ntshi mulombene kuidikuula, muanda naluisha bupianyi buande’mi nabene. Edikuule obe na matalua ande, muanda ntshi mulombene kuidikuula nya.”

7 Mu mafuku a kala, mu Isalele mubaadi kino kipikua: Bua kushinkamisha muanda oso wawa w’abakitshi utale matalua a kukuula na kuishintushena bintu, bibaadi abitungu’shi muntu afuule sandale na amupe yawa ungi muntu. Bino nyi bibaabadi abashinkamisha’shi abepushena bua muanda kampanda mu Isalele. 8 Biabia pabaadi mukuudi mulungule Boaze’shi, “Ediule obe,” bafuudile sandale aaye. 9 Paapa Boaze balunguile bakulu na muilo oso’shi: “Anue banabene nubemuena* lelo uno’shi, naulu kui Naomi bintu bioso bia Elimeleke na bintu bioso bia Kilione na Malone. 10 Dingi nata Luuta muina Moabe mukashi a Malone bu mukashi ande, bua kualushula eshina dia mufue mu bupianyi buaye, bua’shi eshina dia mufue tadishiminanga munkatshi mua bakuabo na ku kiibi kia kibundi kiabo. Anue banabene nui tumonyi tua uno muanda lelo uno.”

11 Paapa bantu boso babaadi ku kiibi kia kibundi na bakulu babambile’shi: “Tui tumonyi tua uno muanda! Yehowa elele mukashi atuele mu nshibo yobe miabi bua’shi ekale nka bu Rashele na Lea, abo babaadi bebakie nshibo ya Isalele bubidi buabo. Mianda yobe yende kumpala mu Efrata na opete eshina di buwa mu Beteleme. 12 Ku bukuashi bua bana babakakupa kui Yehowa kukiila kui uno nsonguakashi, nshibo yobe ikale nka bu nshibo ya Pereze, baadi Tamare mutandile Yunda.”

13 Biabia Boaze batshile Luuta, aye nkufika mukashi aaye. Bamuladile, na Yehowa nkumukuasha buadia kuimita, aye nkutanda muana mulume. 14 Paapa bana bakashi babalunguile Naomi’shi: “Yehowa atumbishibue, aye shi mukulekie lelo uno kushi mukuudi. Baukishe eshina diaye* mu Isalele. 15 Balushula* muwa oobe na akakukuasha p’okulu, muanda mbamutande kui mukashi a muana oobe, aye mukufule na e buwa kodi kukila bana balume musambobidi.” 16 Paapa Naomi batshile muana, aye nkumutuula mu kiadi kiaye, na nkubanga kumulela. 17 Bankungishanyi bakashi babamupeele eshina. Bamba’shi: “Babatandila Naomi muana mulume,” na babamuudikile bu Obede. Nnaye nshaye na Yesee, nshaye na Davide.

18 Biabia mulongo wa kifuko* kia Pereze nguno: Pereze batandile Esrone; 19 Esrone nkutanda Rame; Rame nkutanda Aminadabe; 20 Aminadabe nkutanda Nasone; Nasone nkutanda Salemone; 21 Salemone nkutanda Boaze; Boaze nkutanda Obede; 22 Obede nkutanda Yesee; na Yesee namu nkutanda Davide.