MUKANDA WA KUMPALA WA SAMUELE

1 Kubaadi muntu a ku Ramataime-Sofime* ku nsenga ya ku miengie ya Efraime, ababadi abetanyina bu Elkana muana a Yorame, muana a Elihu, muana a Tohu, muana a Zufe muina Efraime. 2 Baadi na bakashi babibi; umune babaadi abamuitanyina bu Aana, ungi namu bu Penina. Penina baadi na bana, anka Aana tabaadi na bana nya. 3 Ku kipua kioso Elkana baadi akatuka mu kibundi kiabo bua kukaamina ku Shilo bua kulanguila na kulambula Yehowa a biluilo milambu. Kuakua nyi kubaadi bana babidi ba Eli, Ofeni na Finease abafubila Yehowa bu ba tshite muakuidi.

4 Dingi efuku Elkana balambuile mulambu, aye nkupa mukashi aaye Penina pamune na bana baye boso balume na bakashi bisudi bia muita. 5 Kadi bapeele Aana kisudi kia muita kikile kia boso, muanda baadi mufule Aana ngofu kukila Penina. Anka Yehowa tabaadi mupe Aana bana* nya. 6 Dingi mukua-naye baadi amusengie mafuku oso bua kumutapa kuishimba, muanda Yehowa tabaadi mumupe bana. 7 Penina baadi akitshi bino ku kipua kioso. Nsaa yoso ibaadi Aana akaamina ku nshibo ya Yehowa, Penina baadi amusengie ngofu, biabia Aana baadi adidi na tabaadi adi kintu. 8 Kadi mulume aaye Elkana bamulunguile’shi: “Aana, buakinyi okuete kudila, buakinyi tokuete kudia, na buakinyi we muinyongole biabia? Ami ntshi na muulo kodi kukila bana balume ekumi su?”

9 Paapa Aana bebuele kunyima kuabo kudia na kutoma ku Shilo. Mu yaaya nsaa, tshite muakuidi Eli baadi mushale mu nkuasa ku kibelo kia ntempelo* a Yehowa. 10 Aana baadi muinyongole ngofu, biabia, aye nkubanga kuteka Yehowa na kudila ngofu kushi kuleka. 11 Akupu bakitshine uno mutshipo’shi: “Ô Yehowa a biluilo! Su botala dikienga dia mufubi oobe na bontentekiesha, na tue mulube mufubi oobe na su opa mufubi oobe muana mulume, nakamupa Yehowa munda mua mafuku oso a muwa waye, na kabuembe takakakidi ku mutue waye.”

12 Pabaadi Aana kuete kuteka Yehowa munda mua kipindi kila, Eli baadi amutala ku milomo. 13 Aana baadi akula munda munda, nka penda milomo yaye nyi ibaadi ayisaana, kadi eyi diaye tadibaadi adipushika nya. Nyi Eli nkunangushena’shi baadi mukolue. 14 Eli nkumulungula’shi: “Wekala mukolue bino mpa na ku nsaa kinyi? Leka kutoma nfinyo.” 15 Paapa Aana bamualuluile’shi: “Nya, nfumu’ami! Ne mukashi e na kinyongua kikata; ntshi mutome nfinyo sunga kingi kintu akikoluanaa, anka, nkuete kulungula Yehowa mianda yandi nayo muishimba. 16 Tomonanga mufubi oobe bu mukashi a bisumanga, muanda kinyongua kikata kiandi nakio muishimba nyi kibantakula bua kuteka mpa na binobino.” 17 Paapa Eli nkumualula’shi: “Nda mu butaale, n’Efile Mukulu a Isalele akulombeshe biabia bibomutekie.” 18 Paapa Aana nkumulungula’shi: “Mufubi oobe atungunukie na kukuminyibua nobe.” Akupu bayile aye nkudia, na mpala yaye tayibaadi dingi na kinyongua.

19 Akupu babebuele ku namashika pa kafito, abo nkuinama kumpala kua Yehowa, kunyima babaalukiile ku nshibo yabo mu Rama. Elkana baladile mukashi aaye Aana, na Yehowa nkumutentekiesha. 20 Munda mua kipua* kimune Aana bayimiite, na aye nkutanda muana mulume, nkumudika bu Samuele,* muanda bakuile’shi: “Ne mumutekie kui Yehowa.”

21 Kunyima kua mafuku Elkana bakaamiine na ba mu nshibo yaye ishima bua kulambula mulambu wa ku kipua kui Yehowa, na kutuusha mulambu wa mutshipo waye. 22 Anka Aana tabaadi mukaamine nabo, muanda balunguile mulume aaye’shi: “Su nalekiesha muana koomua, namutuala; paapa akemana kumpala kua Yehowa na akashala nka kuakua.” 23 Mulume aaye Elkana nkumulungula’shi: “Kita kiakia ki’omono’shi ki buwa. Shala ku nshibo mpa na p’omulekiesha koomua. Yehowa alombashe biodi muakule.” Biabia Aana bashadile ku nshibo bua koomesha muana aaye mpa na pabamutshibiishe koomua.

24 Musango umune n’aye kumutshibisha koomua, bamutuadile ku Shilo, pamune na ngombe mulume a bipua bisatu, kipimo kimune kia efa* kia bukula, n’elondo dikata dia nfinyo, na bafikile ku nshibo ya Yehowa ku Shilo na aye nkutuala ka nsongualume. 25 Kunyima babayipayile yawa ngombe, na abo nkuenda na muana kui Eli. 26 Akupu Aana bamulunguile’shi: “Nfuile namu lusa mfumu’ami! Bu biodi binyibinyi na muwa nfumu’ami, nnami muana mukashi baadi muimane pepi nobe ino mbalo bua kuteka Yehowa. 27 Naadi natekie bua uno muana, na Yehowa bandombesha binadi mumutekie. 28 Binobino, ami namu namuiyapusha Yehowa, muanda mafuku oso a muwa waye, ne mumuiyapushe Yehowa.”

Na aye* nkuinama paapa kumpala kua Yehowa.

2 Akupu Aana nkuteka’shi:

11 Akupu Elkana nkualuka ku nshibo kuaye mu Rama, anka muana aaye nkufika mufubi a Yehowa kumpala kua tshite muakuidi Eli.

12 Kadi bana balume ba Eli babaadi bantu be bubi; tababaadi abanemeka Yehowa. 13 Pamutue pa kusankila bintu bibaadi ba tshite muakuidi na matalua a kupeta kui muilo, tala bibaabadi abakitshi: Nsaa yoso ibaadi muntu alambula mulambu, mufubi a tshite muakuidi baadi afiki na lusomo lui na meeno asatu muiyasa pabaadi muita ausaka, 14 na baadi elusomeka muilonga, mu lueso, mu lupuki sunga mu kifuadi. Tshite muakuidi baadi aata kioso kibaadi akituku kisomekie ku lusomo. Biabia nyi bibaabadi abakitshina bena Isalele boso babaadi abafiki ku Shilo. 15 Dingi, mpa na kumpala kua’shi muntu baadi alambula ashiikie muimu mu kaalo, mufubi a tshite muakuidi baadi afiki amulungula’shi: “Pa tshite muakuidi muita wa kuekiela. T’akakumina kuata muita oobe uteekie, akumina penda ubishi.” 16 Pabaadi muntu amualula’shi: “Abitungu babande kushiika muimu mu kaalo, kunyima we mulombene kuata kioso ki’okumiina,” mufubi a tshite muakuidi baadi amualuula’shi: “Nya, mpe nka binobino; bisumanga newata pa bukopo!” 17 Paapa muluisho wa bafubi ubafikile ukile bukata kumpala kua Yehowa, muanda baba bantu tababaadi abanemaka milambu ya Yehowa.

18 Samuele baadi afubu kumpala kua Yehowa, mmufuale kilamba kia efode kia lin, sunga bi’ekalashi baadi ki muana mukinga. 19 Dingi, ku kipua kioso nyinaye baadi amutelela ka musapi kashi na maboko, na baadi amutuadila kanka pabaadi afiki na mulume aaye bua kulambula mulambu wa ku kipua. 20 Dingi efuku Eli baadi muelele Elkana na mukashi aaye miabi, amba’shi: “Yehowa akupe muana kukiila kui uno mukashi pa mbalo ya uno muana anudi beyapushe Yehowa.” Kunyima babalukiile kuabo. 21 Yehowa baadi mutentekieshe Aana, biabia aye nkuimita; na nkutanda bangi bana balume basatu na bana bakashi babidi. Na Samuele baadi atungunuka na kukula kumpala kua Yehowa.

22 Mu kiakia kipungo Eli baadi mupue kununupa ngofu, kadi baadi mupushe mianda yoso ibaadi bana baye abakitshina bena Isalele boso, na bibaabadi abalaala bakashi babaadi abafubu ku kituelelo kia kashibo k’epema ka kufumankena. 23 Baadi nka ebalungula’shi: “Buakinyi anutungunuka na kukita mianda i bino? Muanda nkuete kupusha mianda i bubi ayakula bantu boso pabinutale. 24 Nya bana bande, mianda yankuete kupusha munkatshi mua muilo wa Yehowa tayi buwa. 25 Su muntu akitshina ungi muntu muluisho, ungi muntu mmulombene kumuakuila* kui Yehowa; kadi su muntu akitshina Yehowa muluisho, nnanyi mulombene kumutekiela?” Anka babapelele kuteemesha nshabo, muanda Yehowa baadi muate kitshibilo kia kuibayipaa. 26 Mu yaaya nsaa, Samuele baadi atungunuka na kukula na kukuminyibua kui Yehowa mpa na kui muilo.

27 Ungi muntu a Efile Mukulu bafikile kui Eli, amulungula’shi: “Yehowa akula’shi, ‘Ntshinadi muileshe patooka kui nshibo ya nshobe pabaabadi mu bupika mu Ejipitu mu nshibo ya Faraone su? 28 Namusanguile munkatshi mua bisamba bioso bia Isalele buadia kunfubila bu tshite muakuidi, buadia kutusha milambu ku kilambuilo kiande, bua kulambula kabanda, na kufuala efode kumpala kuande; na napeele nshibo ya nkambua oobe milambu yoso ishiikie mu kaalo ya bena Isalele. 29 Buakinyi anubepuula milambu yandi mutekie buabadia kutuusha mu nshibo yande? Buakinyi otungunuka na kupa bana bobe kinemo kunkila’mi, na buakinyi anuidiisha bipindi bikile buwa bia milambu yoso biabakuete kutusha kui muilo wande wa Isalele?

30 “‘Nyi buakinyi Yehowa Efile Mukulu a Isalele amba’shi: “Mbinyibinyi naadi muambe’shi ba mu nshibo yobe na ba mu nshibo ya nkambua oobe abakanfubila mafuku oso.” Kadi binobino Yehowa amba’shi: “Tabiakukitshika nya, muanda baba abannemeka nakebanemeka, kadi baba abambepuula nakebabepuula.” 31 Talanga! Kui mafuku aakafiki ankapeelesha bukome bobe na bukome bua ba mu nshibo ya nshobe, mu mushindo wa’shi takui muntu su ngumune a mu nshibo yobe akashala na muwa mpa na ku bununu. 32 Nakakitshina Isalele mianda yoso i buwa, anka obe okatala muishikuanyi mu nshibo yande, na t’akukekala dingi muntu mununu mu nshibo yobe. 33 Muntu a kuanudi anshankakatusha ku mudimo wa ku kilambuilo kiande akakitshi bia’shi meso oobe akookie na akakuinyongosha, anka bantu be bungi ba mu nshibo yobe abakepayibua ku lupete lua ngoshi. 34 Na akikafikila bana bobe balume babidi Ofeni na Finease akikekala bu kitunduilo kodi; boso babidi abakafu muifuku dimune. 35 Kunyima nakesanguila tshite muakuidi sha lulamato, akakitshi mianda muyile eshimba diande; na nakamuibakila nshibo ayishala bua loso, akatambukila kumpala kua muedibue muimu ande bua loso. 36 Muntu oso ashala mu nshibo yobe akafiki na amuinamine bua kupeta ekuta na bia kudia, na akamulungulashi: “Mpe namu umune wa ku midimo ya ba tshite muakuidi, bua’shi mpete kia kudia.”’”*

3 Mu aa mafuku, Samuele baadi afubila Yehowa kumpala kua Eli, anka eyi dia Yehowa tadibaadi adikamba kupushika mu aa mafuku nya; bimonua tabibaadi bikambe kuikala kuanka.

2 Dingi efuku, Eli baadi mulale pa mbalo yaye ya mafuku oso, na meso aaye abaadi apue kukooka; tabaadi akamba kumona kalolo nya. 3 Kimunyi ki’Efile Mukulu takibaadi kibande kushima, na Samuele baadi mulale mu ntempelo* a Yehowa, mu mbalo ibaadi Mushete w’Efile Mukulu. 4 Paapa Yehowa betanyine Samuele, Samuele nkualuula’shi: “Nnami uno.” 5 Bayile lubilo kui Eli amulungula’shi: “Nnami uno, muanda bongitanyina.” Kadi Eli bamulunguile’shi: “Ntshi mukuitanyine. Alukiila okalaale.” Biabia balukiile aye nkulaala. 6 Yehowa bamuitanyine dingi’shi: “Samuele!” Paapa Samuele babukile aye nkuenda kui Eli, nkumulungula’shi: “Nnami uno, muanda bongitanyina.” Kadi Eli nkumulungula’shi: “Ntshi mukuitanyine muana ande. Alukiila okalaale.” 7 (Samuele tabaadi mubande kuuka Yehowa, na Yehowa tabaadi mubande kuisamba naye efuku su ndimune.) 8 Yehowa nkumuitamina’nyi musango wa kasatu’shi: “Samuele!” Samuele nkubuuka na nkuenda kui Eli, nkumulungula’shi: “Nnami uno, muanda bongitanyina.”

Paapa Eli nkushinguula’shi Yehowa nyi baadi ayitanyina kaka ka nsongualume. 9 Biabia Eli balunguile Samuele’shi: “Alukiila okalaale, su bakuitanyina dingi, omualule’shi: ‘Akula Yehowa, muanda mufubi oobe ateemesha.’” Samuele bayile, aye nkulaala pa mbalo yaye.

10 Yehowa bafikile aye nkuimana paapa, na nkuitanyina nka bu ingi misango’shi: “ Samuele, Samuele!” Paapa Samuele nkuamba’shi: “Akula, muanda mufubi oobe kuete kukuteemesha.” 11 Yehowa balunguile Samuele’shi: “Tala! Nakiebe kukita muanda mu Isalele aukashiki matui a muntu oso eupusha. 12 Mu diadia efuku nakakumbasha bioso binaadi muakule pabitale Eli na kifuko kiaye, kubanga ku mbangilo mpa na ku nfudiilo. 13 Abitungu omulungule’shi nakanyooko ba mu nshibo yaye bua loso, bua kilema kiauku, muanda bana baye abeele Efile Mukulu mulua, kadi tamuibasashile. 14 Nyi buakinyi ne muitshipe kui Eli na kui ba mu nshibo yaye’shi, takui mulambu su ngumune ulombene kubuikila muluisho wabo.”

15 Samuele balaadile mpa na ku nakashika; akupu bakanguile biibi bia ku nshibo ya Yehowa. Samuele baadi na moo bua kulungula Eli pabitale kiakia kimonua. 16 Kadi Eli bayitanyine Samuele amulungula’shi: “Samuele, muana ande!” Samuele nkuamba’shi: “Nnami uno.” 17 Eli bamuipuishe’shi: “Bakulungula muanda kinyi? Bua lusa, tueunfuamishanga. Efile Mukulu akunyookie ngofu su bonfuamisha kantu su nkamune ka ku bioso bibakulungula.” 18 Biabia Samuele bamulunguile mianda yoso, ta mumufuamishe muanda su ngumune. Eli nkuamba’shi: “Nyi Yehowa. Akite kiakia ki’amono’shi ki buwa ku meso kuaye.”

19 Samuele baadi atungunuka na kukula, na Yehowa baadi naye, ta mutadiile eyi diaye su ndimune diashala kushi kukumbana. 20 Bena Isalele boso kubanga ku Dane mpa na ku Beere-sheba babaukile’shi babasangula Samuele buadia kuikala mutemuki a Yehowa. 21 Na Yehowa batungunukile na kumueneka ku Shilo, muanda Yehowa baadi eleesha kui Samuele ku Shilo ku bukuashi bu’eyi dia Yehowa.

4 Na mayi a Samuele abakafikile kui bena Isalele boso.

Kunyima bena Isalele babayile mu kulua na bena Filistine; babatuudile kishalelo kiabo pepi na Ebenezere, na kishalelo kia bena Filistine kibaadi ku Afeke. 2 Bena Filistine babelongiele mu milongo bua kulua na bena Isalele, anka ngoshi tayibaadi ikile kalolo ku lupese lua bena Isalele nya, bena Filistine babaadi bebatshokole. Bena Filistine nkuipaa balume bafikie ku 4 000 babaadi abalu ngoshi mu kipia. 3 Pabaabadi balukiile mu kishalelo, bakulu ba Isalele babambile’shi: “Buakinyi Yehowa batadiila lelo uno bua’shi bena Filistine betutshokole? Tuendeyi tukaate mushete wa kilombeno wa Yehowa wi ku Shilo, bua’shi wikale netu na witupashe ku maasa kua beshikuanyi betu.” 4 Biabia babatumine bantu ku Shilo, n’abo nkukafika na mushete wa kilombeno wa Yehowa a biluilo, aye mushale mu nkuasa a bufumu kunundu* kua bakeluba. Bana babidi ba Eli, Ofeni na Finease babaadi dingi paapa pa mbalo ibaadi mushete wa kilombeno w’Efile Mukulu a binyibinyi.

5 Biabia, anka mushete wa kilombeno wa Yehowa uki’aufiki mu kishalelo, bena Isalele boso bababangile kuela misaase i bukopo, mu mushindo ubaadi utshinkishe mpa na nsenga. 6 Pabapushishe bena Filistine tuleo tua yaaya misaase i bukopo, babambile’shi: “Buakinyi kui misaase i bukopo bino mu kishalelo kia bena Ebelu?” Akupu babaukile’shi mushete wa Yehowa ngufikie mu kishalelo. 7 Paapa moo nkukuata bena Filistine, muanda babambile’shi: “Efile Mukulu bafiki mu kishalelo!” Babambile’nyi’shi: “Tubamono malua baboo, muanda kasha kintu ki bino takiabandile kukitshika! 8 Tubamono malua baboo! A nnanyi etupaasha kuiyaasa dia uno Efile Mukulu mukata? Uno Efile Mukulu nyi baadi muipee bena Ejipitu na malua a mishindo yoso mu kabaaka. 9 Anue bena Filistine nyingayi mashimba na nukite mianda bu bana balume, bua’shi tanufubilanga bena Ebelu bu biabadi benufubile. Kitayi mianda bu bana balume na nulue ngoshi!” 10 Biabia bena Filistine babaluile ngoshi na abo nkutshokola bena Isalele, na muntu oso basuukile enda ku kashibo kaye k’epema. Babayipayile bantu bebungi; na munkatshi mua bena Isalele, kubafuile basalayi 30 000 babaadi lua ngua. 11 Dingi babanyengiele Mushete wa Kilombeno w’Efile Mukulu, na bana babidi ba Eli, Ofeni na Finease babafuile.

12 Muntu a mu kisamba kia Benyamine bakatukile lubilo kubabaadi abaluila ngoshi na aye nkukafika ku Shilo nka mu diadia efuku, bilamba biaye bibaadi bisanukie na baadi muipongie nsenga mu mutue. 13 Pabafikile, Eli baadi mushale mu nkuasa pepi n’eshinda kuete kutengiela, muanda baadi na moo bua Mushete w’Efile Mukulu a binyibinyi. Yawa muntu batuelele mu kibundi bua kuukisha mukandu, na kibundi kishima kibabangile kudila. 14 Pabapushishe Eli tuleo tua kuakua kudila, bayipuishe’shi: “A tuno tuleo ntua kinyi?” Yawa muntu umune bafikile bukidibukidi mu kulungula Eli mukandu. 15 (Eli baadi na bipua 98 na baadi mupue kufua meso, tabaadi mulombene dingi kumona nya.) 16 Paapa yawa muntu balunguile Eli’shi: “Ami nyi muntu bakatuka kuabaluila ngoshi! Nekusuuku nka lelo uno.” Eli bamuipuishe’shi: “A nkinyi kibakitshika muana ande?” 17 Yawa muntu bafikile na mukandu bambile’shi: “Isalele basuuku bena Filistine, na kubafu bantu be bungi bukile; mpa na bana bobe babidi, Ofeni na Finease babaafu, babanyengie na mushete w’Efile Mukulu a binyibinyi.”

18 Pabaadi nka yawa muntu ki’atemuna Mushete w’Efile Mukulu a binyibinyi, Eli baponene mualame mu nkuasa abaadi mushale pepi na kiibi, batshokokiele nshingo aye nkufua, muanda baadi mununu na baadi bushito. Baadi musambishe Isalele munda mua bipua 40. 19 Mukashi a muana aaye, mukashi a Finease baadi n’eyimi na baadi pepi na kutanda. Pabapushishe mukandu wa’shi mbanyengie mushete w’Efile Mukulu a binyibinyi, na’shi nshaye mueno na mulume aaye babaafu, baadi muiname muanda munda mubamukuatshile musango umune, na aye nkutanda. 20 Aye taadi afu, bakashi babaadi bemane pepi naye babamulunguile’shi: “Totshinanga, muanda botanda muana mulume.” Anka tabaadi muibaluule sunga kutuula binangu biaye kuakua. 21 Kadi baudikile yawa muana bu Ikabode,* muanda bambile’shi: “Ntumbo ibakatuka mu Isalele ibende mu bupika.” Bakuile bino muanda babaadi banyengie Mushete w’Efile Mukulu a binyibinyi na bua kibaadi kifikile nshaye mueno mpa na mulume aaye. 22 Bambile’shi: “Ntumbo ibakatuka mu Isalele ibende mu bupika, muanda babaadi banyengie Mushete w’Efile Mukulu a binyibinyi.”

5 Pabaadi bena Filistine banyengie Mushete w’Efile Mukulu a binyibinyi ku Ebenezere, babayile nao ku Ashedode. 2 Bena Filistine babaatshile Mushete w’Efile Mukulu a binyibinyi beutuula mu ntempelo a Dagone, pepi na nkishi a Dagone. 3 Pababuukile bena Ashedode efuku dibalondele ku namashika, babasangene Dagone mmupone akupila mpala paashi kumpala kua Mushete wa Yehowa. Abo nkuata Dagone nkumualusha pa mbalo yaye. 4 Pababutokiele dingi ku namashika muifuku dibalondele, babasangene dingi Dagone mmupone akupila mpala paashi kumpala kua Mushete wa Yehowa. Mutue wa Dagone na maasa aaye oso abidi bibaadi bitshibibue biatudibua mu kibelo. Anka penda kipindi kiaye kibaadi bu mushipa nyi kibaadi kishale kishima. 5 Nyi buakinyi mpa na lelo uno, mu Ashedode ba tshite muakuidi ba Dagone, na baba boso abatuelaa mu ntempelo a Dagone, t’abashinaa pa kibelo kia ntempelo a Dagone.

6 Mboko ya Yehowa nkunyoka bena Ashedode, aye nkuibakiengiesha bi bukopo, nkutumina Ashedode na bibundi bibefunyishe nsadi. 7 Pabaadi bantu ba mu Ashedode bamone kibakitshikile, babakuile’shi: “Ta bibuwa tulekie Mushete w’Efile Mukulu a Isalele ushale netu, muanda betukiengiesha atue n’efile eetu Dagone.” 8 Akupu abo nkuitamisha ba nfumu boso ba bena Filistine, nkuibepusha’shi: “Tui kukita kinyi na Mushete w’Efile Mukulu a Isalele?” Abo nkuibaluula’shi: “Abitungu kutuma Mushete w’Efile Mukulu a Isalele ku Gate.” Paapa abo nkutuma Mushete w’Efile Mukulu a Isalele kuakua.

9 Pabafikile Mushete kuakua, Yehowa banyokiele bantu ba mu kiakia kibundi, abo nkukuatshika moo wi bukopo. Aye nkunyoka bantu ba mu kiakia kibundi kubanga ku bantu bashadile mpa na ku bantu bakata, p’aye kuibatumina nsadi. 10 Paapa abo nkutuma Mushete w’Efile Mukulu a binyibinyi ku Ekrone. Biabia, anka Mushete w’Efile Mukulu a binyibinyi ukiaufi ku Ekrone, bena Ekrone bababangile kuela misaase’shi: “Babatuala Mushete w’Efile Mukulu a Isalele kuatudi bua kuituipaa na muilo wetu!” 11 Akupu abo nkuitanyina ba nfumu boso ba bena Filistine, nkuibalungula’shi: “Alushayi Mushete w’Efile Mukulu a Isalele, walukiile kubaudi bua’shi atue na muilo wetu tatufuanga.” Muanda bantu boso ba mu kibundi babaadi na moo wa lufu; Efile Mukulu a binyibinyi baadi muibakiengieshe bi bukopo, 12 na bantu bashibaadi bafue babaadi bakuatshikie nsadi. Na kudila kua bena kibundi bua kukimba bukuashi kubakaamine mpa na muiyilu.

6 Mushete wa Yehowa nkushala mu nsenga ya bena Filistine munda mua mieshi musambobidi. 2 Bena Filistine nkuitanyina ba tshite muakuidi na bantu ababukaa, nkuibepusha’shi: “Tukite kinyi na Mushete wa Yehowa? Etulunguleyi biatudia kuiwalusha kubaudi.” 3 Abo nkuibaluula’shi: “Su anukumiina kualusha Mushete wa kilombeno wa Yehowa Efile Mukulu a Isalele, tanuiwalushanga kushi mulambu. Abitungu nuiwalushe na mulambu wa kushimisha nao miluisho. Anka su nubakitshi biabia nyi nupaashibue, na anukauku buakinyi ekeele muinunyookie mu uno mushindo.” 4 Bena Filistine nkuibayipusha’shi: “Mmulambu kinyi wa kushimisha nao miluisho watudia kumutumina?” Abo nkuibaluula’shi: “Muyile bungi bua ba nfumu ba bena Filistine, tumayi nsadi ya ôlo itano, na mpuku ya ôlo itano, muanda kino kipupa kimune nkikuate oso a kuanudi na ba nfumu benu. 5 Abitungu nukite bintu bi bu nsadi na bintu bi bu mpuku, biabia abinufuishila malua muiumbo, na nutumbishe Efile Mukulu a Isalele. Pangi e kuleka kuinukiengiesha na kukiengiesha efile eenu mpa na eumbo dienu. 6 Buakinyi anupapisha mashimba eenu bu bibaadi bena Ejipitu na Faraone bapapishe mashimba aabo? Pabaadi Efile Mukulu muibanyokie, babaadi baposole bena Isalele na abo nkuenda. 7 Binobino lumbuulayi etempu dipia na ngombe ibidi i na bana yabash’elele kikumbo mu nshingo. Akupu nuanye ngombe kuitempu, anka nuiyikaashe bana bayo, nuibalushe ku nshibo. 8 Atayi Mushete wa Yehowa nuiutule kuitempu, na nuele bintu bia ôlo bi’anumutumina bu mulambu wa kushimisha nao miluisho mu ka mushete na nuikatuule ku lupese luao. Akupu nuiutume 9 na nutale akikitshika: Su wayila muishinda dia ku Bete-shemeshe ngutadiile muiumbo diao, paapa atuuku’shi nnaye muitukitshine uno muanda wi bubi. Kadi su ta mbikitshikie biabia, atuuku’shi ta naye muitukiengieshe; mbikitshikile.”

10 Bena Filistine babaakitshine nka biabia. Babaatshile ngombe ibidi i na bana, abo nkuiyanya kuitempu, na abo nkuela bana mu kikutu. 11 Akupu babatuudile Mushete wa Yehowa kuitempu, na kashete kabaadi mpuku na nsadi ya ôlo. 12 Na ngombe ibayile ngitadiile muishinda dia ku Bete-shemeshe. Ibashadile nka mu diadia eshinda ikuete kuenda na kudila; tayibaadi iipengie ku mboko ibalume sunga ku ibakashi. Mu yaaya nsaa yoso, ba nfumu ba bena Filistine babaadi abatambuka kunyima kuayo mpa na ku mikalo ya ku Bete-shemeshe. 13 Bantu ba mu Bete-shemeshe babaadi abaumbula blé muibanda, pabababushishe meso, abo nkumona Mushete, babasankile ngofu. 14 Etempu nkutuela muifuba dia Yoshua a ku Bete-shemeshe na adio nkuimana pepi n’ebue dikata. Na babatanyine mabaya a etempu, abo nkulambula ngombe bu mulambu wa kushiika kaalo kui Yehowa.

15 Bena Levi babayishile Mushete wa Yehowa na kashete kabaadi pepi nao, mubaadi bintu bia ôlo, abo nkuibituula p’ebue dikata. Bantu ba mu Bete-shemeshe nkutuusha milambu ya kushiika kaalo na abo nkulambula Yehowa milambu mu diadia efuku.

16 Pabaadi ba nfumu batano ba bena Filistine bamone biabia, babalukiile ku Ekrone mu diadia efuku. 17 Ino nyi nsadi ya ôlo ibaadi bena Filistine batumine Yehowa bu mulambu wa kushimisha nao miluisho; imune bua Ashedode, imune bua Gaza, imune bua Ashekelone, imune bua Gate, na imune bua Ekrone. 18 Na bungi bua mpuku ya ôlo bubaadi muyile bungi bua bibundi bioso bia bena Filistine bibaadi bia ba nfumu batano, biabikala bibundi bibaadi binyingishibue, sunga tu bibundi.

Ebue dikata kubaabadi batuule Mushete wa Yehowa, ndikale bu kamonyi mpa na lelo uno muifuba dia Yoshua a ku Bete-shemeshe. 19 Kadi Efile Mukulu bayipayile bantu ba mu Bete-shemeshe, muanda babatadile Mushete wa Yehowa. Munkatshi mua muilo bayipayile bantu 50 070,* na muilo nkutuela mu maalo muanda Yehowa bayipayile bantu ba kuabadi bakile bungi. 20 Biabia bantu ba mu Bete-shemeshe babayipuishe’shi: “A nnanyi mulombene kuimana pepi na Yehowa, uno Efile Mukulu eselele, na su akatuka kuatudi ende kui ba nnanyi?” 21 Biabia babatumine mikiendi kui bantu ba mu Kiriate-yearime bua kuibalungula’shi: “Bena Filistine mbalushe Mushete wa Yehowa. Alaalayi nuiwate buanudia kukaamina nao.”

7 Biabia bantu ba ku Kiriate-yearime babafikile abo nkuata Mushete wa Yehowa, nkukaamina nao ku nshibo ya Abinadabe ku muengie, na abo nkusangula* muana aaye Eleazare bua’shi ekale alama Mushete wa Yehowa.

2 Kubakidile bipua bi bungi, bipua 20, kubanga muifuku dibaadi Mushete ufikie ku Kiriate-yearime, akupu bena Isalele bababangile kukimba* Yehowa. 3 Paapa Samuele nkulungula bena Isalele boso’shi: “Su nubaluka kui Yehowa n’eshimba dienu dioso, kaashayi b’efile benyi na binfuanyi bia Ashitorete munkatshi muenu, na nufubile nka Yehowa aye nabene n’eshimba dienu dioso, na akenupaasha kuiyasa dia bena Filistine.” 4 Biabia bena Isalele nkukatusha ba Baale na binfuanyi bia Ashitorete, abo nkufubila nka penda Yehowa.

5 Paapa Samuele nkuamba’shi: “Bungayi bena Isalele boso ku Misepa, na nakatekie Yehowa pa muanda wenu.” 6 Nyi abo nkuibunga ku Misepa, abo nkutapa mema na nkuiapongoola kumpala kua Yehowa, abo nkuishidika diadia efuku kushi kudia. Kuakua, abo nkuamba’shi: “Tuibakitshine Yehowa muluisho.” Na Samuele nkubanga kufuba bu nsushi munkatshi mua bena Isalele ku Misepa.

7 Pabaadi bena Filistine bapushe’shi bena Isalele mbebungie ku Misepa, ba nfumu ba bena Filistine babayile mu kulua ngoshi na bena Isalele. Pabapushishe bena Isalele biabia, moo ubebakuatshile pa muanda wa bena Filistine. 8 Paapa bena Isalele babalunguile Samuele’shi: “Tolekanga kuitanyina Yehowa Efile Mukulu eetu bua’shi etukuashe, na etupashe kuiyasa dia bena Filistine.” 9 Paapa Samuele batshile muana a mukooko ukuete koomua, aye nkumulambula bu mulambu ushima wa kushiika kaalo kui Yehowa; Samuele nkuteka Yehowa bukuashi pabitale bena Isalele, na Yehowa nkumualuula. 10 Pabaadi Samuele alambula mulambu wa kushiika kaalo, bena Filistine nkuiseesela buabadia kulua na bena Isalele. Mu diadia efuku, Yehowa nkudidishila bena Filistine tupandapanda tui bukopo, aye nkuibatuesha mu kafutakanyi, na bena Isalele nkuibatshimuna. 11 Paapa bena Isalele nkutuuka mu Misepa, n’abo nkuilondena na bena Filistine, abo nkuibayipaa mpa na kuushi kua Bete-kare. 12 Paapa Samuele nkuata ebue, nkuidishimika pankatshi pa Misepa na Yeshana na nkuidiudika bu Ebenezere,* muanda bambile’shi: “Mpa na binobino Yehowa betukuasha.” 13 Paapa babaadi batshokole bena Filistine, na tababaadi bafikie dingi mu nsenga ya bena Isalele; eyasa dia Yehowa dibatungunukile na kuluisha bena Filistine ngoshi munda mua mafuku oso a Samuele. 14 Dingi, bena Isalele babaatshile bibundi biabo bibaadi bena Filistine banyengie, kukatukila ku Ekrone mpa na ku Gate, na bena Isalele nkupetuula nsenga yabo ibaadi bena Filistine banyengie.

Dingi kubaadi butaale pankatshi pa bena Isalele na bena Amore.

15 Samuele batungunukile na kusambisha Isalele munda mua muwa waye oso. 16 Kipua kioso baadi efunyu mu Isalele ende ku Betele, ku Gilegale na ku Misepa, na baadi asambisha mu aa ma mbalo oso. 17 Anka baadi alukiila ku Rama, muanda nyi kubaadi nshibo yaye, na kuakua baadi asambisha’nyi Isalele. Ku Rama baadi muibakile Yehowa kilambuilo.

8 Pabafikile Samuele mununu, batuudile bana baye buabadia kusambisha Isalele. 2 Eshina dia muana aaye mbedi dibaadi Yowele, na dia muana aaye a kabidi dibaadi Abiya; abaadi abasambiisha ku Beere-sheba. 3 Anka bana baye tababaadi abalondo kileshesho kiaye; babaadi abakumiina kupeta bintu mu mushindo ushi buwa, babaadi abakumiina’shi bebatshibe milomo, tababaadi abatshibi bilumbu kalolo nya.

4 Kunyima kua mafuku, bakulu boso ba Isalele babebungile pamune na abo nkufika kui Samuele ku Rama. 5 Abo nkumulungula’shi: “Talanga! Todi mununu, kadi bana bobe ta bakuete kulonda kileshesho kiobe. Binobino etutudile nfumu a kuitusambisha nka bu biabidi mu bingi bisamba bioso.” 6 Anka tabibaadi bisankishe Samuele pababamulunguile’shi: “Etupe nfumu a kuitusambisha.” Paapa Samuele nkuteka Yehowa, 7 na Yehowa balunguile Samuele’shi: “Teemesha muanda oso w’abakulungula kui muilo; muanda ta nobe ababasumbushena, kadi nnami ababasumbushena bua’shi ntshikalanga nfumu aabo. 8 Abakitshi nka bu bibabaadi bakite kubanga muifuku dinaadi muibatuushe mu Ejipitu mpa na lelo uno; babaadi batungunukie na kunsumbushena bua kukafubila bangi b’efile, na biabia nyi bibabakukitshina namu. 9 Binobino ebateemeshe. Anka abitungu w’ebadimushe kalolo; webalungule abikekala nfumu akebakunkusha na matalua a kuibateka.”

10 Biabia Samuele nkulungula muilo ubaadi aumutekie nfumu bioso bibaadi Yehowa mumulungule. 11 Bambile’shi: “Nfumu akenukunkusha akekala na matalua a kuteka ino mianda ayilondo: Akaata bana benu balume ebatuule ku matempu aaye na kuibekasha bu bantu ba kutambusha nfualasa yaye, bangi abekala abasuuku kumpala kua matempu aaye. 12 Na aketudila ba nfumu ba bantu kinunu, na ba nfumu ba bantu makumi atano, bangi abekala abamudimina, abaumbula bintu biaye, abakitshi bina ngoshi biaye na bintu bia ku matempu aaye. 13 Akaata bana benu bakashi bua’shi bekale abakitshi muimu,* abateekie na abakitshi mikate. 14 Akaata mafuba eenu akile buwa, mafuba eenu a tukuba tua nfinyo, mafuba eenu a mitshi ya olive eape bafubi baye. 15 Akaata ki’ekumi kia mafuba eenu a ntete, na ki’ekumi kia mafuba eenu a tukuba tua nfinyo, na akebipa bantu bakata abafubu kuaye na bafubi baye. 16 Akaata dingi bafubi benu balume na bafubi benu bakashi, ngombe yenu ikile buwa na mpunda yenu, na akebituulu ku mudimo waye. 17 Akaata ki’ekumi kia mikooko yenu, na anue anukekala bafubi baye. 18 Efuku adikafiki di’anukadidi bua nfumu anubesanguila, anka Yehowa t’akenupushisha mu diadia efuku nya.”

19 Anka muilo taubaadi uteemeshe bibaadi Samuele muiulungule, babambile’shi: “Takui muanda nya, atue atukiebe nka’shi tuikale na nfumu kunundu kuetu. 20 Paapa atukekala nka bu bingi bisamba bioso, na nfumu eetu aketusambisha, aketukunkusha na aketuluila ngoshi.” 21 Kunyima kua Samuele kupusha bioso bibaadi muilo wakule, baadi muibiambuluile Yehowa. 22 Yehowa nkulungula Samuele’shi: “Ebateemeshe, na otuule nfumu a kuibakunkusha.” Samuele nkulungula bantu ba mu Isalele’shi: “Oso a kuanudi abitungu alukiile mu kibundi kiabo.”

9 Kubaadi ungi muntu a mu kisamba kia Benyamine abetanyinaa bu Kishe, muana a Abiele, muana a Zerore, muana a Bekorate, muana a Apia, muina Benyamine baadi na bupeta bui bungi. 2 Baadi na muana mulume abetanyinaa bu Saule, Saule baadi nsongua na baadi buwa bukile, takui muntu su ngumune mu Isalele baadi buwa kumukila, baadi mukile bantu boso bula na babaadi abamufikila nka pa mapampa.

3 Pabaadi mpunda ya Kishe, nshaye na Saule ishimine, Kishe balunguile muan’aye Saule’shi: “Ata namu mufubi umune nuende nukakimbe mpunda.”* 4 Babaadi bakiile mu nsenga ya ku miengie ya Efraime na mu nsenga ya Shalisha, anka tababaadi bapete mpunda. Abo nkukiila mu nsenga ya Shalime, anka mpunda tayibaadi kuakua. Abo nkukiila mu nsenga yoso ya bena Benyamine, anka tababeyipetele.

5 Pababafikile mu nsenga ya Zufe, Saule balunguile mufubi aaye abaadi naye’shi: “Fika tualukie, tala nshami abanga kuikalakasha buetu pamutue pa kuikalakasha bua mpunda.” 6 Mufubi baadi mumualule’shi: “Tala, mu kino kibundi mui muntu a Efile Mukulu, nyi mmuntu abanemekaa ngofu. Mianda yoso y’akula ikuete kukumbana. Fika tuende kuanka. Pangi mmulombene kuitulesha eshinda diatudia kuyila.” 7 Paapa Saule nkualuula mufubi aaye’shi: “Su tubende kuakua, atutuadila yawa muntu kinyi? Tatui na mikate mu ma mpaya eetu; tatui na kia buntu kiatudia nkapa yawa muntu a Efile Mukulu a binyibinyi. Nkinyi kiatudi nakio?” 8 Mufubi nkualuula Saule’shi: “Tala! Ne na kia binanka kia shekele* a kiamo kia arja. Nakekipa muntu a Efile Mukulu a binyibinyi, na aketulungula eshinda diatudia kuyila.” 9 (Kala mu Isalele, muntu baadi ende mu kukimba Efile Mukulu baadi akula’shi: “Fika tuende kui muntu amonaa mianda.” Muanda yawa atuitanyina bu mutemuki lelo uno, kala babaadi abamuitanyina bu muntu amonaa mianda.) 10 Akupu Saule nkulungula mufubi aaye’shi: “Biabia bibuakula bi buwa. Fika tuende.” Biabia abo nkuenda mu kibundi mubaadi muntu a Efile Mukulu a binyibinyi.

11 Pababaadi abakaamina mu kibundi, babafumankene na ba nsonguakashi babaadi abatuuku, abende mu kutapa mema. Abo nkuibepusha’shi: “Muntu amonaa mianda e mu ino mbalo su?” 12 Babaluluile’shi: “E kuanka. Tala, enka kumpala kuenu’ku. Ndayi bukidi, muanda lelo mmufikie mu kibundi, muanda bantu abalambula mulambu lelo pa mbalo i kunundu. 13 Anka nukianutuele mu kibundi, anumupete kumpala kua’shi akaamine ku mbalo i kunundu mu kudia. Bantu ta mbalombene kudia kumpala kua’shi afikie, muanda nnaye elela mulambu muabi. Kunyima ku’aye kuiwelela miabi, baba betaminyibue mbalombene kudia. Biabia kaaminayi bukidibukidi, na anumupete.” 14 Biabia babakaamiine mu kibundi. Pababatuelele mu kibundi, babamuene Samuele afiki mu kufumankana naabo bua kuenda naabo ku mbalo i kunundu.

15 Efuku dimune kumpala kua Saule kufika, Yehowa balunguile Samuele’shi: 16 “Malooba mu ino nsaa, nakakutumina muntu a mu nsenga ya Benyamine. Abitungu omuele muimu bu mukunkushi a muilo wande wa Isalele, na akapaasha muilo wande ku maasa kua bena Filistine. Muanda nemumone dikienga dia muilo wande, na kudila kuabo nkufikie kuandi.” 17 Pabaadi Samuele mumone Saule, Yehowa bamulunguile’shi: “Uno nyi muntu ankulunguile’shi, ‘Naye akunkusha muilo wande.’”

18 Paapa Saule nkuisesela kui Samuele ku kiibi kia kibundi, nkumuipusha’shi: “Ndungule namu, a nshibo ya muntu amonaa mianda i kuikunyi?” 19 Samuele nkualuula Saule’shi: “Muntu amonaa mianda nnami uno. Kila kumpala kuande tukaamine ku mbalo i kunundu, na anukadi nami lelo uno. Ku namashika nakulekie wende, na nakulungula mianda yoso y’okiebe kuuka.* 20 Tuekalakashanga bua mpunda ishimiine takudi mafuku asatu, muanda tabapuile kuiyipeta. Bintu bioso bi buwa bia mu Isalele mbia nnanyi? Ta mbiobe na nshibo ishima ya nshobe su?” 21 Paapa Saule nkualuula’shi: “Ami ntshi muina Benyamine a mu kisamba kikile bupeela kia mu Isalele su? Na kifuko kiande, ta nkifuko kikile bupeela kia mu kisamba kia Benyamine su? Kadi buakinyi bondungula biabia?”

22 Biabia Samuele batshile Saule na mufubi aaye enda nabo mu nshibo ya kudiila, aye nkuibapa mbalo ikile buwa munkatshi mua bantu babaabadi betamine, kubaadi bantu bafikie ku 30. 23 Samuele balunguile muntu baadi ateekie’shi: “Fika na muita wankupeele nakulungula’shi, ‘Eutuule ku lupese.’” 24 Paapa muntu baadi ateekie nkuibuesha kioko na bintu bibaadi panka, aye nkuibituula kumpala kua Saule. Samuele nkulungula Saule’shi: “Babatuulu kumpala kobe bintu biabekalanga balame. Dia, muanda babaadi bakulamine bianka bua nsaa bu ino. Muanda nebalunguile’shi, ‘Ne muitanyine beenyi.’” Biabia Saule badiile na Samuele diadia efuku. 25 Akupu babayikile ku mbalo i kunundu benda mu kibundi, na Samuele batungunukile na kuisamba na Saule kunundu kua nshibo. 26 Bababuukile kumpala kua nsaa, na ku namashika Samuele nkuitamina Saule kunundu kua nshibo, nkumulungula’shi: “Elumbuule bua’shi nkutueshe kuishinda.” Biabia Saule nkuilumbuula, aye na Samuele nkutuuka paasha. 27 Pababadi abalaala dia ku nfudiilo kua kibundi, Samuele balunguile Saule’shi: “Lungula mufubi oobe bua’shi abadiile,” biabia mufubi nkubadiila. “Kadi obe imana, bua’shi nkulungule eyi di’Efile Mukulu.”

10 Paapa Samuele batshile kalondo ka muimu, aye nkuiupongooluela Saule mu mutue. Bamuanyine kiipa amulungula’shi: “Yehowa bakuele muimu bodia kuikala bu mukunkushi a muilo* waye. 2 Lelo uno, kunyima k’obe kundeka, okapete bantu babidi bemane pepi na mashama a Rashele mu nsenga ya Benyamine ku Selesa, abakakulungula’shi: ‘Tabapuile kupeta mpunda yoyile mu kukimba, binobino nshobe bapu kuluba muanda wa mpunda, t’ekalakasha b’obe. Kuete kuamba’shi: “A nakitshi naminyi bua muana ande.”’ 3 Okatukie kuakua wende mpa na ku mutshi ukata wa ku Tabore, kuakua okafumankana na bana balume basatu abende mu kulanguila Efile Mukulu a binyibinyi ku Betele, umune mmutuale bana ba mbushi basatu, ungi mmutuale mikate isatu, na ungi namu mmutuale elondo dikata dia nfinyo. 4 Abakakuipusha biodi na abakakupa mikate ibidi, abitungu okumiine yaaya mikate y’abakupa. 5 Kunyima kua biabia okende ku muengie w’Efile Mukulu a binyibinyi kui kisaka kia basalayi kia bena Filistine. P’okafiki mu kibundi, okafumankana na batemuki abaalala, abakatuka ku mbalo i kunundu, kumpala kuabo akuikala bantu abend’ayimbanga na bindaala, matumba, milengie na lusese, abo namu abekala abende na kutemuka. 6 Kikudi kia Yehowa akikakupa bukome, na okatemuka pamune nabo, na okashintuluka wekale bu ungi muntu. 7 Apakakumbana bino bitunduilo bioso, kita kioso kiodi mulombene kukita, muanda Efile Mukulu a binyibinyi e nobe. 8 Paapa obadiile kumpala kuande wende ku Gilegale, ami namu nakakulondo kuakua bua kutusha milambu ya kushiika kaalo na milambu ya butaale. Abitungu otengiele mafuku musambobidi mpa na panfiki kodi. Paapa nakakulungula kiodia kukita.”

9 Musango umune pabaadi Saule muialuule bua kukatuka kui Samuele, Efile Mukulu babangile kushintuula eshimba diaye buadidia kufika bu dia ungi muntu, na bino bitunduilo bioso bibakumbene mu diadia efuku. 10 Biabia babakatukile paapa benda ku muengie, na kisaka kia batemuki kibafumankene naye. Musango umune kikudi ki’Efile Mukulu nkumupa bukome, aye nkubanga kutemuka munkatshi muabo. 11 Pabaadi bantu boso babaadi abamuuku bamumone atemuka pamune na batemuki, abo nkuilungushena’shi: “A nkinyi kibafikila muana a Kishe? Saule taadi namu munkatshi mua batemuki?” 12 Paapa ungi muntu a mu yaaya mbalo nkuamba’shi: “A nshabo nnanyi?” Nyi buakinyi bababangile kuamba’shi: “Saule taadi namu munkatshi mua batemuki?”

13 Pabapuile kutemuka, bayile ku mbalo i kunundu. 14 Kunyima, mukuabo na nshaye na Saule bebepuishe na mufubi aaye’shi: “A nuyile kunyi?” Paapa Saule nkumulungula’shi: “Tuyile mu kukimba mpunda, kadi patumuene’shi tatui beyipete, nyi tubende kui Samuele.” 15 Mukuabo na nshaye na Saule nkumuipusha’shi: “Ndungule namu, a Samuele kulunguile kinyi?” 16 Saule nkualuula mukuabo na nshaye’shi: “Etulunguile’shi mpunda tayipuile kumueneka.” Kadi Saule tabaadi mumulungule bibaadi Samuele muakule pabitale bufumu.

17 Kunyima kua biabia Samuele nkuitamisha muilo kumpala kua Yehowa ku Misepa. 18 Balunguile bena Isalele’shi: “Talayi abiamba Yehowa Efile Mukulu a Isalele: ‘Nnami baadi mutushe Isalele mu Ejipitu na baadi muinupaashe kuiyasa dia bena Ejipitu na kuiyasa dia mafumu oso abaadi aenukiengiesha. 19 Kadi lelo uno nubasumbushena Efile Mukulu eenu baadi muinupaashe ku malua oso na ku makienga eenu, na nubamba’shi: “Nya, etutudile nfumu a kuitukunkusha.” Binobino, imanayi kumpala kua Yehowa muyile bisamba bienu na muyile bifuko* bienu.’”

20 Biabia Samuele bayitanyine bisamba bioso bia Isalele buabidia kuiseesela pepi, na babasanguile kisamba kia Benyamine. 21 Akupu bayitanyine kisamba kia Benyamine buakidia kuiseesela pepi muyile bifuko biakio, na babasanguile kifuko kia bena Matri. Nfudiilo a bioso babasanguile Saule muana a Kishe. Kadi pababayile mu kumukimba, ta mbamupete nya. 22 Biabia babepuishe Yehowa’shi: “Yawa muntu tafikile pano?” Yehowa baluluile’shi: “E panka, mmufuame munkatshi mua mabofo.” 23 Biabia babayile lubilo abo nkumuata kuakua kubaadi mufuame. Pabayimene munkatshi mua bantu, baadi mukile bantu boso bula na babaadi abamufikila nka pa mapampa. 24 Samuele nkulungula bantu boso’shi: “Nubamono muntu abadi basangule kui Yehowa su? Takui muntu su ngumune ebu’ye munkatshi mua bantu boso.” Na bantu boso bababangile kuela misaase’shi: “Nfumu ekale na muwa bua loso!”

25 Samuele balunguile bantu bintu bibaadi nfumu na matalua a kuibateka, ebifunda mu mukanda na eutula kumpala kua Yehowa. Akupu Samuele bapalakeshe bantu boso, muntu oso enda ku nshibo kuaye. 26 Saule namu bayile kuaye ku Gibeya, na bilobo bia ngoshi bibaadi Yehowa mukume mashimba aabio, bibayile naye. 27 Kadi bangi bantu ba bisumanga babambile’shi: “A uno muntu namu aketupaasha naminyi?” Biabia abo kumubepuula, na ta bamutumine kia buntu su nkimune. Kadi Saule tabakuile muanda su ngumune.

11 Kunyima Nakashe muina Amone bafikile aye nkutuula kishalelo bua kulua na bena Yabeshe mu Gileade. Bantu boso ba mu Yabeshe babalunguile Nakashe’shi: “Kita netu kilombeno, na atukakufubila.” 2 Nakashe muina Amone bebalunguile’shi: “Nakitshi nemu kilombeno nka su nubakumbasha uno muanda: Benutubule anue boso meso abalume. Nakitshi bino bua kuyisha bena Isalele boso milongo.” 3 Bakulu ba mu Yabeshe babamualuluile’shi: “Etupe namu mafuku musambobidi bua’shi tutume mikiendi mu bibundi bioso bia mu Isalele. Su takui muntu su ngumune a kuitupaasha, paapa atuipaana kodi.” 4 Pabafikile mikiendi ku Gibeya kubaadi Saule mushale na ayo nkulungula muilo ano mayi, muilo ushima ubadidile na mayi e bukopo.

5 Mu yaaya nsaa Saule baadi alukiila ku mafuba na kisaka kiaye kia ngombe, aye nkuipusha’shi: “A mmuanda kinyi wi munkatshi mua muilo? Buakinyi bakuete kudila?” Nyi abo nkumulungula mayi abafikile nao bantu ba ku Yabeshe. 6 Kikudi ki’Efile Mukulu kibapeele Saule bukome pabapushishe aa mayi, na nsungu i bukopo nkumukuata. 7 Aye nkuata ngombe ibidi, nkuiyitshiba bisudibisudi, na nkuibituma mu bibundi bioso bia Isalele na mikiendi ibaadi ayamba’shi: “Bino nyi biabakakitshi ngombe ya muntu oso sh’alondo Saule na Samuele!” Na moo wa Yehowa nkukuata muilo, boso nkufika kintu kimune.* 8 Akupu bebabadikile, ku Bezeke kubaadi bena Isalele 300 000 na bantu ba mu Yunda 30 000. 9 Paapa babalunguile mikiendi ibafikile’shi: “Bino nyi bianudia kulungula bantu ba mu Yabeshe mu Gileade, ‘Malooba nsaa ayifiki kanya bukopo, anupaashibua.’” Paapa mikiendi ibayile ayo nkulungula bena Yabeshe. Babapushishe muloo wi bungi. 10 Biabia bantu ba mu Yabeshe babalunguile Nakashe’shi: “Malooba atuituulu mu maasa mobe, na we kuitukitshina bioso bi’okumiina.”

11 Muifuku dibalondele, Saule baadi muabuule bantu mu bisaka bisatu, na abo nkutuela mu kishalelo kumpala kua bufuku kutooka,* abo nkuipaa bena Amone mpa na pabafikile kanya bukopo. Baba babapandile babaadi bapalakane, ta kubaadi bantu babidi ba kuabadi babaadi bashale pamune. 12 Paapa bantu nkulungula Samuele’shi: “Mba nnanyi abakulanga’shi, ‘Saule e kuikala namu bu nfumu eetu su?’ Ebatuusheyi bua’shi tuibayipee.” 13 Anka Saule bakuile’shi: “Takui muntu su ngumune ayipayibua lelo, muanda lelo uno Yehowa bapaasha Isalele.”

14 Kunyima Samuele balunguile bantu’shi: “Fikayi tuende ku Gilegale buatudia kushinkamisha dingi Saule bu nfumu.” 15 Biabia bantu boso babayile ku Gilegale, na kuakua abatudile Saule bu nfumu kumpala kua Yehowa. Akupu babalambuile milambu ya butaale kuakua kumpala kua Yehowa, Saule na bena Isalele boso abakitshine musangelo na muloo wi bungi.

12 Nfudiilo a bioso Samuele nkulungula bena Isalele boso’shi: “Nakitshi bioso bianuntekiele, na natuulu nfumu bua kuinukunkusha. 2 Binobino talayi nfumu enukunkusha! Anka ami napu kukula, tandi na nfuidi, bana bande be munkatshi muenu, na nemuinukunkushe kubanga ku bukinga buande mpa na lelo uno. 3 Binobino nami uno. Su nui na muanda wa kuakula pabintale, ewakuleyi kumpala kua Yehowa na kua muedibue muimu aaye: Ne muate ngombe sunga mpunda a nnanyi? Kui muntu andi munyengie bintu biaye sunga andi mukiengieshe su? Nnanyi andi mukumiine bua’shi antshibe milomo buandia kuluisha kiimu? Aakule, namualuisha bintu biaye.” 4 Biabia babamualuluile’shi: “Tue muituate bintu na tuemuitukiengieshe na tuemukumiine kintu su nkimune ku maasa a muntu.” 5 Biabia Samuele bebalunguile’shi: “Yehowa nyi nkamonyi, na muedibue muimu aaye nyi nkamonyi kuanudi’shi, lelo uno tanui bapete muanda su ngumune wa kunfunda nao.” Nyi abo nkuakula’shi: “Oolo, nyi nkamonyi.”

6 Biabia Samuele nkulungula muilo’shi: “Yehowa, aye baadi mufubishe Moyise na Alona na baadi mutuushe ba nkambua benu mu Ejipitu, nyi nkamonyi. 7 Binobino shalayi bemane, na nakenusambisha kumpala kua Yehowa muyile mianda yoso ya kululama ibaadi Yehowa muinukitshine na mukitshine ba nkambua benu.

8 “Pabaadi Yakobo mufikie mu Ejipitu, na ba nkambua benu nkubanga kuitanyina Yehowa bua kuibakuasha, Yehowa batumine Moyise na Alona bua kutuusha ba nkambua benu mu Ejipitu, na kuibatuula buabadia kushala mu ino mbalo. 9 Kadi babalubile Yehowa Efile Mukulu aabo, na aye nkuibapaana mu maasa mua Sisera nfumu a kiluilo kia Asore na mu maasa mua bena Filistine na mu maasa mua nfumu a Moabe, abo nkubanga kuibaluisha ngoshi. 10 Paapa babayitanyine Yehowa bua kuibakuasha, bamba’shi: ‘Tuibakite muluisho, muanda tui balekie Yehowa bua kukafubila ba Baale na binfuanyi bia Ashitorete; binobino etupaashe namu ku maasa kua beshikuanyi betu bua’shi tumone biatudia kukufubila.’ 11 Paapa Yehowa batumine Yerubaale, Bedane, Yefeta na Samuele, abo nkuinupaasha ku maasa kua beshikuanyi babaadi benuifunyishe bua’shi numone bia kushala mu butaale. 12 Panubamuene’shi Nakashe nfumu a bena Amone bafiki mu kuinutuuka ngoshi, nubatungunukile na kundungula’shi: ‘Takui muanda nya, atue atukiebe nka’shi tuikale na nfumu e kunundu kuetu, sunga biekala’shi Yehowa Efile Mukulu enu nyi muikale Nfumu enu. 13 Binobino talayi nfumu anudi basangule, yawa anuikele batekie. Yehowa benutuudila nfumu kunundu kuenu. 14 Biabia, su nuatshiina Yehowa na kumufubila, na kukookiela eyi diaye, na t’anutombokiela miiya ya Yehowa, na su anue na nfumu kuete kuinukunkusha nualonda Yehowa Efile Mukulu enu, mmuanda wibuwa. 15 Kadi su t’anukookiela eyi dia Yehowa, na anutombokiela miiya ya Yehowa, eyasa dia Yehowa adikenunyoko na ba mashenu. 16 Binobino imanayi paapa numone muanda ukata aukiebe kukita Yehowa mu meso muenu. 17 Anuuku’shi lelo tui mu kipungo kia kuumbula blé, anka nayitanyina Yehowa bua kukupisha tupandapanda na kunokiesha mpeshi, paapa anukauku na kupusha’shi nui bakite muanda wibubi ku meso kua Yehowa p’anue kuteka nfumu bua kuinukunkusha.”

18 Yaaya nsaa Samuele nkuitanyina Yehowa, na Yehowa nkukupisha tupandapanda na nkunokiesha mpeshi mu diadia efuku, na bantu boso babaadi na moo ukata bua Yehowa na Samuele. 19 Bantu boso babalunguile Samuele’shi: “Teka namu Yehowa Efile Mukulu oobe bua bafubi bobe, t’atukumiina kufua nya, muanda tubatenteka dingi ku miluisho yetu yoso ungi muanda wibubi, p’atue kuteka nfumu.”

20 Paapa Samuele nkulungula bantu’shi: “Tanutshinanga. Anuuku’shi nui bakite ino mianda yoso ibubi, anka tanulekanga kulonda Yehowa, na kufubila Yehowa n’eshimba dienu dioso. 21 Tanulekanga kumulonda, bua kulonda b’efile ba madimi* bashi balombene kuinukuasha na kuinupaasha, muanda mmankishi ashi na muulo. 22 Kadi, pa muanda w’eshina diaye dikata, Yehowa t’akalekieela muilo waye nya, muanda Yehowa mmuinusangule bua kuinuikasha bu muilo waye. 23 Kadi buande’mi bi bukopo buandia kukitshina Yehowa muluisho p’ami kuleka kuinutekiela, na natungunuka na kuinulongiesha eshinda dibuwa na dilulame. 24 Anka tshinayi Yehowa na numufubile na lulamato n’eshimba dienu dioso, muanda mmuinukitshine mianda ikile bukata. 25 Kadi su anukitshi mianda ibubi mu nkomanga, anukashimina, anue na nfumu enu.”

13 Saule baadi na bipua . . . pabafikile bu nfumu a Isalele, na aye nkukunkusha munda mua bipua bibidi. 2 Saule basanguile balume 3 000 ba mu Isalele, balume 2 000 ba kuabadi babaadi na Saule ku Mikemashe na ku nsenga ya ku miengie ya Betele. Na balume 1 000 babaadi na Yonatane ku Gibeya a Benyamine. Aye nkulungula bantu babashadile bua kualukiila mu tushibo tuabo tua mapema. 3 Akupu Yonatane bayipayile kisaka kia basalayi kia bena Filistine kibaadi ku Geba, na bena Filistine abo nkupusha wawa muanda. Saule nkuelesha mpungi muiumbo dioso dishima p’aye kuamba’shi: “Bena Ebelu bapushe!” 4 Bena Isalele boso babapushishe uno mukandu’shi: “Saule mmuipee kisaka kia basalayi kia bena Filistine, na binobino Isalele bafiki bu kintu kibutete kui bena Filistine.” Biabia babayitanyine muilo buaudia kulonda Saule ku Gilegale.

5 Bena Filistine namu babaadi bebungie pamune bua kulua na bena Isalele, babaadi na matempu a ngoshi 3 000 na bantu bakaamine pa mpunda 6 000 na basalayi bebungi nka bu lusenga lua ku kiese kia Kalunga; abakaamiine abo nkutuula kishalelo kiabo ku Mikemashe dia kutunduka nguba kua Bete-awene. 6 Na bantu ba mu Isalele babamuene’shi babaadi mu lukalakashi, muanda babaadi bebafinakashe bi bukopo; biabia bantu babayile mu kufuama mu mbuebue, mu mena, mu mabue, mu mashibo e muushi mua nsenga na mu biina bia mema. 7 Bangi bena Ebelu babasabukile mpa na Yordane, benda muiumbo dia Gade na Gileade. Kadi Saule baadi ki ku Gilegale, na bantu boso babaadi abamulondo babaadi abasuusu bua moo. 8 Batungunukile na kutengiela munda mua mafuku musambobidi mpa nka na pabakumbene nsaa ibaadi Samuele mutshibe, anka Samuele tabaadi mufikie ku Gilegale na bantu bababangile kupalakana. 9 Nfudiilo a bioso Saule bambile’shi: “Ntumineyi mulambu wa kushiika kaalo na milambu ya butaale.” Na aye nkulambula mulambu wa kushiika kaalo.

10 Kadi, anka aye kiapudisha kulambula mulambu wa kushiika kaalo, Samuele bafikile. Biabia Saule bayile bua kufumankana naye na kumusema. 11 Paapa Samuele nkuamba’shi: “A kibokitshi nkinyi?” Saule nkualuula’shi: “Mmonanga’shi muilo ukuete kukatuka kuandi, na obe tue mufikie pa nsaa itshibibue, na’shi bena Filistine abebunganga pamune ku Mikemashe. 12 Ndio ami nkuiakuila’shi: ‘Binobino bena Filistine abafiki kuno kuandi mu kunduisha ku Gilegale, na ntshi mukimbe bukuashi kui Yehowa, biabia ami nkumona’shi abitungu ntushe mulambu wa kushiika kaalo.”

13 Paapa Samuele nkulungula Saule’shi: “Bokitshi mianda bu muntu shi na binangu! Tue mukookiele muiya ubaadi Yehowa Efile Mukulu oobe mukupe. Su bodia kuiukookiela, Yehowa badia kunyingisha bufumu bobe kui bena Isalele bua loso. 14 Anka binobino, bufumu bobe t’abukayisha, Yehowa akasangula muntu asankisha eshimba diaye, na Yehowa akamutuulu bu nfumu pa muilo waye muanda tue mukookiele bibaadi Yehowa mukutumine eyi.”

15 Samuele nkukatuka ku Gilegale aye nkukaamina ku Gibeya a Benyamine, na Saule babadikile bantu; bantu babaadi bashale naye babaadi bafikie ku 600. 16 Saule, muana aaye Yonatane, na bantu babaadi bashale nabo, babaadi bashalele mu Geba a Benyamine, bena Filistine babaadi batuule kishalelo kiabo ku Mikemashe. 17 Bisaka bisatu bia basalayi bibaadi abituuku mu kishalelo kia bena Filistine. Kisaka kimune kibaadi akiyila muishinda dia ku Ofra ku eumbo dia Shuwale; 18 Kingi kisaka kibaadi akiyila muishinda dia Bete-orone na kisaka kia kasatu kibaadi akiyila muishinda adiende mpa na ku mikalo i kunundu ku’ebanda dia Seboime dia ku kabaaka.

19 Mu kiakia kipungo, takubaadi nsendue su ngumune mu eumbo dioso dia Isalele, muanda bena Filistine abaadi bambe’shi: “T’abitungu’shi bena Ebelu bekitshiine mpete ya ngoshi sunga milumbu nya.” 20 Na bena Isalele boso babaadi abende kui bena Filistine buabadia kunoonesha nkasu yabo, mpiki yabo, tubengiele tuabo na mpete yabo ya kuumbula nayo. 21 Babaadi abafutu pime* umune bua kunoonesha nkasu, mpiki, nkanya ya meno asatu, tubengiele, na bua kulumbuula mutshi wi na nsongo ya kiamo w’abaludikaa nao ngombe. 22 Nyi buakinyi muifuku dia ngoshi takubaadi muntu su ngumune a ku bantu babaadi na Saule na Yonatane baadi na lupete lua ngoshi sunga mulumbu; anka penda Saule na muana aaye Yonatane nyi babaadi na bina ngoshi.

23 Aku namu kisaka kia basalayi ba bena Filistine kibafikile kiayimana pa lupongo lua ku Mikemashe.

14 Dingi efuku Yonatane muana a Saule balunguile mufubi baadi amutuadila bina ngoshi’shi: “Fika tusabukie tuende kui basalayi ba bena Filistine bakuete kulama alua lupese.” Anka tabaadi mulungule nshaye nya. 2 Saule baadi mushale pepi na Gibeya muushi mua mutshi wa grenade ku Migrone, na baadi na bantu bafikie ku 600. 3 (Na Akiya muana a Akitube mukuabo na Ikabode muana a Finease, muana a Eli baadi tshite muakuidi a Yehowa ku Shilo baadi mufuale efode.) Bantu tababaadi abauku’shi Yonatane baadi muende. 4 Pankatshi pa mbalo ibaadi Yonatane akiebe kusambukila bua kuenda kui basalayi ba bena Filistine, kubaadi lubuebue lui nsongo bu eyino lupese lumune, na ku lungi lupese kubaadi lungi lubuebue lui nsongo bu eyino. Eshina dia lumune dibaadi Bosese na eshina dia lungi dibaadi Sene. 5 Lubuebue lumune lubaadi bu musungo lupese lua kunundu luitalene na Mikemashe na lungi namu lubaadi lupese lua kuushi luitalene na Geba.

6 Paapa Yonatane balunguile muntu baadi amusemuina bina ngoshi’shi: “Fika tusambukie tuende kui bano basalayi bashi basadiibue, pangi Yehowa e kuitukuasha, muanda takui kintu kilombene kukutshishua Yehowa bua kupaasha, biabikala na bantu bebungi, sunga na bantu bapeela.” 7 Paapa muntu baadi amusemuina bina ngoshi biaye bamualuluile’shi: “Kita kioso akikutumu eshimba diobe bua kukita, enda koso k’okumiina, ami nakulondo koso kuende.” 8 Paapa Yonatane bambile’shi: “Atusambuka kui abaa bantu na atuilesha kuabadi. 9 Su betulungula’shi: ‘Imanayi nka paapa mpa na p’atufiki kuanudi, atukemana nka paapa patudi, t’atukaamina kuabadi nya. 10 Kadi su betulungula’shi: ‘Kaaminayi kuno kuatudi!’ Paapa atukakaamina, muanda Yehowa akebatuulu mu maasa eetu. Kino nyi akikala bu kitunduilo kietu.”

11 Paapa abo boso babidi nkuilesha kui basalayi ba bena Filistine. Bena Filistine nkuamba’shi: “Talayi! Bena Ebelu babatuuku mu mena muabekalanga bafuame.” 12 Biabia basalayi babalunguile Yonatane na muntu baadi amusemuina bina ngoshi’shi: “Kaaminayi kuno kuatudi, atuinupa dilongiesha!” Musango umune Yonatane nkulungula muntu baadi amusemuina bina ngoshi’shi: “Ndonde, muanda Yehowa ebatuulu mu maasa mua Isalele.” 13 Paapa Yonatane babangile kukaamina na maboko na mikoolo, muntu baadi amusemuina bina ngoshi baadi kunyima kuaye; bena Filistine nkubanga kupona kumpala kua Yonatane, na muntu baadi asemuna bina ngoshi biaye baadi ebayipaa kunyima kuaye. 14 Mu ngoshi ya kumpala ibaadi Yonatane na muntu baadi amusemuina bina ngoshi balue, abaadi bayipee bantu bafikie ku 20 mu mbalo ipeela.*

15 Paapa moo nkupalakana mu kishalelo, mpa na kui kisaka kia basalayi babaadi kumpala kua kishalelo, sunga bisaka bia basalayi bibaabadi abatumu bua kulua na bena Isalele bibapushishe moo wibukopo. Nsenga ibabangile kutshinka, na moo w’Efile Mukulu ubebakuatshile. 16 Balami ba Saule babaadi ku Gibeya a Benyamine babamuene’shi, kafutakanyi kabaadi akapalakana mu kishalelo kioso kia bena Filistine.

17 Saule nkulungula basalayi boso babaadi nabo’shi: “Ebadikisheneyi bua kuuka bashi panka.” Pabababadikile, babamuene’shi Yonatane na muntu amusemuinaa bina ngoshi tabe panka. 18 Saule nkulungula Akiya’shi: “Eseesele na mushete w’Efile Mukulu a binyibinyi pepi!” (Muanda bena Isalele babaadi na mushete w’Efile Mukulu a binyibinyi aa mafuku.) 19 Pabaadi Saule esamba na tshite muakuidi, kafutakanyi kabaadi mu kishalelo kia bena Filistine kabaadi akanyisha kufuima. Paapa Saule balunguile tshite muakuidi’shi: “Leka biabia biokitshi.” 20 Saule na basalayi baye boso babebungile benda mu kulua ngoshi, pabaabafikile kuakua, babapetele bena Filistine bakuete kuiyipayishena na mpete ya ngoshi, na kafutakanyi kabaadi bukopo. 21 Dingi, bena Ebelu batabekalanga ku lupese lua bena Filistine na babafikile nabo mu kishalelo, babalukiile ku lupese lua bena Isalele babaadi ku bukunkushi bua Saule na Yonatane. 22 Bantu boso ba bena Isalele babaadi bafuame mu nsenga ya ku miengie ya Efraime babapushishe’shi bena Filistine bakuete kusuuka, biabia abo namu nkubanga kuibalonda bua kulua nabo. 23 Biabia Yehowa bapaashile Isalele mu diadia efuku, ngoshi ibayile yakafika mpa na ku Bete-awene.

24 Anka, bana balume ba mu Isalele babaadi bakookie muanda Saule baadi muibeleshe mutshipo wa’shi: “Mulua wikale kui muntu adi kantu sunga nkapeela kumpala kua’shi kiolua kikumbane, mpa nka na pankeobuela kui beshikuanyi bande. Biabia muntu su ngumune tabadiile kantu.

25 Paapa bantu boso babatuelele mu mutamba, mu nsenga mubaadi buuki. 26 Pabatuelele bantu mu mutamba, babasangene buuki abunoko, anka takui muntu su ngumune baadi muibulambe, muanda babaadi abatshinyi mutshipo. 27 Kadi Yonatane tabapushishe pabaadi nshaye mukamikie bantu mutshipo, biabia aye nkoola mukombo ubaadi muiyasa diaye, nkuiusabika ku kisaa kia buuki. Pabebulambile, baadi mupetuule bukome.* 28 Umune a ku basalayi bamulunguile’shi: “Nshobe mmutshipishe bantu mutshipo wibukopo amba’shi: ‘Mulua wikale kui muntu adi kintu lelo!’ Nyi buakinyi bantu mbakookie.” 29 Yonatane nkualuula’shi: “Nshami bafuishila eumbo malua akata. Nalamba penda tu buuki tupeela, tala binampetuula bukome. 30 Banda kunangushena su lelo uno basalayi bekeele badie bintu bibabapete kui beshikuanyi babo! Babadia kuipaa bena Filistine bakile bungi.”

31 Diadia efuku babatungunukile na kuipaa bena Filistine kubanga ku Mikemashe mpa na ku Ayalone, basalayi babakookiele ngofu. 32 Biabia bantu bababangile kuluila na luabi loso bintu bipaulue, abo nkuata mikooko, ngombe na bana ba ngombe, abo nkuibipayila mu nsenga na nkudia muita na mase. 33 Abo nkukebilungula Saule’shi: “Pusha! Bantu babakitshina Yehowa muluisho pa kudia muita na mase.” Aye nkualuula’shi: “Nubakitshi mianda na kukutua lulamato. Mbunguluileyi ebue dikata pano binobino.” 34 Akupu Saule nkuibalungula’shi: “Palakanayi kui bantu nuibalungule bino: ‘Abitungu oso a kuanudi afikie na ngombe na mukooko waye ebiipayile pano, akupu mmulombene kuibidia, tanukitshinanga dingi Yehowa muluisho pa kudia muita na mase.’” Biabia oso a kuabadi bafikile na ngombe buabua bufuku na aye nkumuipayila paapa p’ebue dikata. 35 Paapa Saule nkuibakila Yehowa kilambuilo. Kino kibaadi kilambuilo kia kumpala kibaadi muibakile Yehowa.

36 Kunyima Saule bambile’shi: “Tualaleyi tulonde bena Filistine buno bufuku na tuibapaule bintu mpa na p’abutooko. T’atulekie muntu su ngumune na muwa.” Babamualuluile’shi: “Kita kioso kiomono’shi kibuwa ku meso kobe.” Kadi tshite muakuidi bambile’shi: “Tuipushe Efile Mukulu a binyibinyi pano.” 37 Biabia Saule bayipuishe Efile Mukulu’shi: “Ndonde bena Filistine su? Okebatuulu mu maasa mua bena Isalele?” Kadi Efile Mukulu ta mmumualuule mu diadia efuku. 38 Paapa Saule nkuitanyina bakata ba basalayi, nkuibalungula’shi: “Kimbayi bua kuuka’shi mmuluisho kinyi ubakitshibua lelo uno. 39 Ku muanda bu bikale Yehowa binyibinyi na muwa, aye bapaasha Isalele, sunga biatuuka’shi muana ande Yonatane nyi bakitshi muluisho, abitungu afue.” Anka muntu su ngumune ta mmumualuule. 40 Paapa aye nkulungula bena Isalele boso’shi: “Anue ikalayi ku lupese lumune, ami na muana ande Yonatane tuikale ku luetu lupese.” Paapa muilo nkualuula Saule’shi: “Kita kioso kiomono’shi kibuwa ku meso kobe.”

41 Biabia Saule balunguile Yehowa’shi: “Ô Efile Mukulu a Isalele! Aluula na Tumime.” Paapa Tumime basanguile Yonatane na Saule, na aye nkulekiela bangi bantu. 42 Paapa Saule nkuamba’shi: “Etueleleyi bubale na muana ande Yonatane.” Abo nkusangula Yonatane. 43 Biabia Saule balunguile Yonatane’shi: “Ndungule, a nkinyi kiokitanga?” Yonatane bamulunguile’shi: “Ndambanga tu ndambo tua buuki ku nsongo ya mukombo wikele muiyasa diande. Nnami uno! Nakumiina kufua!”

44 Paapa Saule nkuamba’shi: “Efile Mukulu annyokie bi bukopo su tue mufue Yonatane.” 45 Anka bantu nkulungula Saule’shi: “Yonatane afue—aye batshimuna ino ngoshi ikata bua bena Isalele? Biabia ta mbilombene kukitshika! Bu bikale binyibinyi Yehowa na muwa, sunga ndunyene lumune lua ku mutue waye t’alupono mu nsenga, muanda nku bukuashi bu’Efile Mukulu kubakitshi biabia lelo.” Paapa bantu nkupaasha Yonatane, na ta mmufue nya.

46 Biabia Saule balekiele kuibingena na bena Filistine, na bena Filistine nkualukiila mu nsenga yabo.

47 Saule nkunyingisha bufumu buaye mu Isalele na nkulua na beshikuanyi baye boso babaadi mu mpese yoso, bena Moabe, bena Amone, bena Edome, ba nfumu ba Soba na bena Filistine; na koso kubaadi ende baadi ebatshimuna. 48 Baadi mulue na kishima, aye nkutshimuna bena Amaleke, na nkupaasha Isalele ku maasa kua bantu babaadi abamupaula.

49 Bana balume ba Saule babaadi Yonatane, Ishuwi, na Malaki-shuwa. Baadi’nyi na bana bakashi babidi; mukulu baadi Merabe, na mukinga baadi Mikale. 50 Mukashi a Saule babaadi abamuitanyina bu Akinoame, muana mukashi a Akimase. Nfumu a kiluilo kiaye kia ngoshi babaadi abamuitanyina bu Abnere muana a Nere, mukuabo na nshaye na Saule. 51 Kishe nyi baadi nshaye na Saule, na Nere nshaye na Abnere baadi muana a Abiele.

52 Mu mafuku oso a Saule kubaadi ngoshi i bukopo na bena Filistine. Pabaadi Saule amono muana mulume oso mukankamane na munyingie eshimba, baadi amutuesha mu busalayi.

15 Akupu, Samuele balunguile Saule’shi: “Yehowa baadi muntume bua kukuela muimu bua’shi wekale nfumu a muilo waye wa Isalele; binobino teemesha abiakula Yehowa. 2 Yehowa a biluilo amba’shi: ‘Nakasambisha bena Amaleke bua bibaabadi bakite bena Isalele nsaa ibaabadi bebaluishe ngoshi, pabaabadi muishinda abakatuka mu Ejipitu. 3 Binobino enda, okayipee bena Amaleke na webabutule na bintu bioso biabadi nabio, tuebalekanga* na muwa nya, abitungu webayipee. Oyipee muana mulume na muana mukashi, muana mukinga na muana tooka, ngombe na mukooko, kamelo na mpunda.’” 4 Paapa Saule bayitanyishe bantu aye nkuibabadika ku Telaime: Kubaadi basalayi 200 000 abatambukaa lua ngua, na basalayi 10 000 ba mu Yunda.

5 Saule bayile mpa na ku kibundi kia Amaleke, aye na basalayi baye babafuamine muibanda buabadia kulua na bena Amaleke. 6 Akupu Saule balunguile bena Keni’shi: “Endayi, nukatukie munkatshi mua bena Amaleke bua’shi ntshinuipanga pamune nabo. Muanda nubaadi baleshe muilo ushima wa Isalele kifulo kia lulamato nsaa ibaabadi abatuuku mu Ejipitu.” Biabia bena Keni babakatukile munkatshi mua bena Amaleke. 7 Kunyima Saule bayipayile bena Amaleke kukatukila ku Awila mpa na ku Shure, muitalene na Ejipitu. 8 Bakuatshile Agage nfumu a Amaleke, kadi bangi bantu boso aye nkuibayipaa na lupete lua ngoshi. 9 Anka, Saule na bantu baye babalekiele Agage na muwa, nyema ikile buwa, mikooko, ngombe, nyema itame, mikooko ilume na bintu bioso bibaadi buwa. Tababaadi bakumiine kuibibutula, kadi bintu bioso bishibaadi na muulo na biabashibaadi bakumiine, abaadi bebibutule.

10 Akupu eyi dia Yehowa nkufika kui Samuele nkumulungula’shi: 11 “Nenyongola buakinyi nasanguile Saule bu nfumu, muanda bampele na ta mukookiele mayi ande.” Wawa muanda ubaadi ukalakashe Samuele ngofu na aye nkudidila Yehowa bufuku bushima. 12 Ku nakashika buee pabebuele Samuele bua kukamona Saule, babalunguile Samuele’shi: “Saule mmuende ku Karmele, na kuakua mmuiyibakile musungo* bua’shi bamutentekieshanga. Akupu katukile kuakua, alaala ku Gilegale.” 13 Nfudiilo a bioso, pabaadi Samuele mufikie kui Saule, Saule bamulunguile’shi: “Yehowa akuelele miabi. Nakookiela eyi dia Yehowa.” 14 Anka Samuele bamuipuishe’shi: “Buakinyi napusha kudila kua mikooko na kua ngombe?” 15 Saule nkumualuula’shi: “Basalayi bekeele beyinyengie kui bena Amaleke, abo nkuleka mikooko na ngombe ikile buwa, nkufika nayo bua kuiyilambula Yehowa; anka biabia bintu bioso bikele bishale abaadi bebibutule.” 16 Paapa Samuele nkulungula Saule’shi: “Imena nka paapa! Imana nkulungule bibandungula Yehowa buno bufuku.” Saule nkumulungula’shi: “Akula!”

17 Samuele nkumulungula’shi: “Toboodi wemono na muulo upeela pabaabadi bakutuule bu nfumu a bisamba bia Isalele na pabaadi Yehowa mukuele muimu bu nfumu a Isalele su? 18 Kunyima Yehowa bakutumine akulungula’shi: ‘Nda okabutule bena Amaleke muanda wa miluisho yabadi bakite. Olue nabo ngoshi mpa nka na pokebabutula boso.’ 19 Kadi buakinyi tue mutumikile eyi dia Yehowa? Anka we muende lubilo na luabi loso mu kuata bintu bipaulue, obe nkukita muanda wi bubi ku meso kua Yehowa.”

20 Anka, Saule balunguile Samuele’shi: “Kadi ne mukookiele eyi dia Yehowa! Ne muende kubaadi Yehowa muntume, ami nkufika na Agage nfumu a Amaleke, kadi nkubutula bena Amaleke. 21 Anka bantu babaadi baate mikooko na ngombe mu bintu bibaatudi bapaule, bintu bi buwa bia mu bintu bibaatudi na kia kubutula bua kuibilambula Yehowa Efile Mukulu oobe ku Gilegale.”

22 Akupu Samuele nkuakula’shi: “Yehowa asankilaa milambu ya kushiika, kukila kukookiela eyi dia Yehowa su? Tala! Kukookiela nkukile mulambu, na kuteemesha, nkukile muimu wa mikooko ilume;* 23 Muanda bu ntomboshi bui mumune na muluisho wa lubuko, na kukita mianda na nkomanga kui mumune na kukita mianda ya malenganyi na kulanguila ma nkishi. Bu bibosumbushena eyi dia Yehowa, aye namu bakusumbushena bua’shi tuekalanga dingi nfumu.”

24 Paapa Saule nkualuula Samuele’shi: “Nakitshi muluisho, muanda nakutua kukookiela eyi dia Yehowa na mayi oobe, nekalanga mutshine bantu nateemesha kibaabadi bandungule. 25 Binobino, nfuile namu lusa bua muluisho wande, na walukie nami bua’shi nkayiname kumpala kua Yehowa.” 26 Kadi Samuele nkulungula Saule’shi: “Ntangalukiila nobe muanda bosumbushena eyi dia Yehowa, na Yehowa namu bakusumbushena bua’shi totungunukanga na kuikala nfumu a Isalele.” 27 Pabaadi Samuele muialuule bua kuenda, Saule bamukuatshile ku luembe lua musapi waye ushi na maboko, anka alo nkusanuka. 28 Paapa Samuele nkumulungula’shi: “Lelo uno Yehowa bakunyengie bufumu bua Isalele, na ebupa ungi muntu mukukile. 29 Efile Mukulu mukile bukata a Isalele takadimbi nya, sunga kushintuula* binangu biaye, muanda te bu muntu bua’shi ashintuule binangu biaye.”

30 Paapa Saule nkualuula’shi: “Nakitshi muluisho, anka nakuisendeela, mpe namu kinemo kumpala kua bakulu ba mu muilo wande na kumpala kua Isalele. Alukiila namu nami bua’shi nkayiname kumpala kua Yehowa Efile Mukulu oobe.” 31 Paapa Samuele nkualukiila na Saule, biabia Saule nkukayinama kumpala kua Yehowa. 32 Samuele nkuamba’shi: “Fikayi na nfumu Agage a ku Amaleke pano pepi nami.” Agage bayile kuadi na moo* wi bukopo mpa n’eshimba kuiyilu, muanda Agage baadi eakuila’shi: ‘Mbinyibinyi tabangipaa’nyi.’ 33 Anka, Samuele nkuamba’shi: “Nka bi bakashi bebungi mbakutue bana kukiila ku lupete lobe lua ngoshi, nyi abikakutua namu nyinobe bana munkatshi mua bakashi naye.” Paapa Samuele nkuipaa Agage kumpala kua Yehowa mu Gilegale.

34 Akupu Samuele bayile ku Rama, na Saule bayile kuaye ku Gibeya a Saule. 35 Samuele tabamuene dingi Saule mpa nka na pabafuile, muanda baadi muinyongole bikata bua Saule. Paapa Yehowa nkuinyongola bua kibaadi mutuudile Saule bu nfumu a Isalele.

16 Nfudiilo a bioso Yehowa nkulungula Samuele’shi: “Okekala na kinyongua bua Saule mpa na ku nsaa kinyi, aku namu ne mupue kumusumbushena bua’shi tekalanga bu nfumu a Isalele? Wusha muimu mu lusengua loobe na wende. Nankutumu kui Yesee muina Beteleme, muanda ne musangule umune a ku bana baye buadia kuikala nfumu.” 2 Anka Samuele nkualuula’shi: “Ne kuenda kuadi naminyi? Muanda su Saule bebipusha angipaa.” Yehowa nkumualuula’shi: “Ata muana a ngombe wende naye na wambe’shi: ‘Nafiki mu kulambula Yehowa mulambu.’ 3 Oyitanyine Yesee bua’shi apetekielue kolambula; akupu nakakulungula kiodia kukita. Abitungu ongielele yawa ankakuleesha muimu.”

4 Samuele bakitshine nka biabia bibamulunguile Yehowa. Pabafikile mu Beteleme na bakulu ba kibundi bamumona, bababangile kusuusa, abo nkumulungula’shi: “Bofiki bua butaale su?” 5 Aye nkualuula’shi: “Oolo nafiki bua butaale. Nafiki mu kulambula Yehowa mulambu, etoosheyi na nufikie nupetekielue kuandambula.” Akupu aye nkuikasha Yesee na bana baye balume ba kishila, na nkuibetanyina bua’shi bafikie bapetekielue ku mulambu. 6 Pabaabafikile, na aye nkumona Eliabe, bambileshi: “Kushi mpaka uno nyi muedibue muimu a Yehowa muimane kumpala kuaye.” 7 Kadi Yehowa nkulungula Samuele’shi: “Totalanga mpala sunga bula buaye muanda ta nnaye andi musangule. Muanda mmueneno a muntu mmuilekene na mmueneno a Efile Mukulu, muntu atalaa abimueneka ku meso anka Yehowa atalaa bi muishimba.” 8 Akupu Yesee nkuitanyina Abinadabe na nkumukisha kumpala kua Samuele, anka Samuele bakuile’shi: “Sunga aye Yehowa ta mumusangule nya.” 9 Akupu Yesee nkumulesha Shama, kadi Samuele nkuakula’shi: “Sunga aye’nyi Yehowa ta mumusangule nya.” 10 Biabia Yesee bakishishe bana baye musambobidi kumpala kua Samuele, anka Samuele balunguile Yesee’shi: “Yehowa ta mmusangule su ngumune a kuabadi.”

11 Nfudiilo a bioso Samuele nkuipusha Yesee’shi: “Bano nyi bana bobe balume boso su?” Yesee nkualuula’shi: “Nya, mukinga ku boso tafikile mpa na binobino, e mu kisuku mualama mikooko.” Nyi Samuele nkulungula Yesee’shi: “Tuma muntu bua’shi akamukimbe muanda t’atushala bua kudia su tafikile pano.” 12 Paapa Yesee nkutuma muntu bua’shi akamukimbe, aye nkufika naye. Baadi nsongualume e na meso ebuwa na mpala ibuwa. Paapa Yehowa nkuamba’shi: “Ebuee omuele muimu, muanda nnaye andi musangule!” 13 Paapa Samuele nkuata lusengua lui muimu nkuela Davide muimu kumpala kua bakuabo balume. Kubanga nka mu diadia efuku, kikudi kia Yehowa kibabangile kupa Davide bukome. Kunyima, Samuele balukiile ku Rama.

14 Binobino kikudi kia Yehowa kibakatukile mui Saule, na Yehowa nkulekiela kikudi kibubi bua kumutshinyisha. 15 Bafubi ba Saule nkumulungula’shi: “Okuete kumona’shi Efile Mukulu mmutadiile kikudi kibubi bua’shi kikutshinyishe. 16 Binobino nfumuetu, tumina bafubi bobe eyi, buabadia kukukimbila muana mulume auku kuyimba lusese kalolo. Nsaa yoso ayitadiila Efile Mukulu’shi kikudi kibubi kikufikile, yawa muntu akayimbi lusese na okapusha bibuwa.” 17 Paapa Saule nkulungula bafubi baye’shi: “Nkimbileyi muana mulume auku kuyimba lusese kalolo na numuntuadile.”

18 Umune a ku bafubi baye nkuakula’shi: “Tala, nauku umune a ku bana ba Yesee a ku Beteleme, auku kuyimba lusese kalolo, e na eshimba dinyingie na mmuikale kilobo kia ngoshi. Auku kuakula kalolo, dingi ebuwa bukile, na Yehowa e naye.” 19 Paapa Saule nkutumina Yesee mukandu na nkuakula’shi: “Ntumine muana oobe mulume Davide, yawa alamaa mikooko.” 20 Biabia Yesee nkuata mikate, mulangi wa musokia wi na nfinyo na muana a mbushi, nkuibianya ku mpunda bua’shi muana aaye Davide ebituadile Saule. 21 Biabia Davide bafikile kua Saule, aye nkubanga kumufubila. Saule nkumufula ngofu. Na Davide nkufika bu muntu a kumusemuina bina ngoshi. 22 Saule nkutuma dingi mukandu kui Yesee’shi: “Tadiila namu Davide bua’shi ekale anfubila, muanda bansankisha.” 23 Nsaa yoso ibaadi ayitadiila Efile Mukulu’shi kikudi kibubi kifikile Saule, Davide baadi ata lusese na abanga kuyimba, paapa Saule baadi apusha biya, na kikudi kibubi kibaadi akimukatuka.

17 Biabia, bena Filistine bababungile biluilo biabo bua kulua ngoshi. Babaadi bebungile ku Soko a mu Yunda, na abo nkutuula kishalelo kiabo pankatshi pa Soko na Azeka mu Efese-damime. 2 Saule na bantu ba mu Isalele babaadi bebungie, abo nkutuula kishalelo kiabo muibanda dia Ela, na abo nkuilonga bua kulua ngoshi na bena Filistine. 3 Bena Filistine babaadi ku lupese lumune lua muengie, na bena Isalele babaadi ku lungi lupese lua muengie, na ebanda dibaadi pankatshi paabo.

4 Akupu, kingi kilobo kibatuukile mu kishalelo kia bena Filistine, eshina diaye nyi Goliate a ku Gate, bula buaye bubaadi bua kude isamombo n’eyasa* dibaale. 5 Baadi na kifulu kia munyinga ku mutue waye, na baadi mufuale ekotshi dia tu biamo tui bu mambamamba, bushito bua diadia ekotshi dia tu biamo tua munyinga bubaadi bua shekele* 5 000. 6 Baadi na bintu bia kushikiila mikoolo yaye bia kiamo kia munyinga na baadi na mulumbu wa kiamo kia munyinga mu mongo muaye. 7 Mutuela wa mulumbu waye ubaadi bukata nka bu mutshi w’abanyinaa buanda ku kiamo kia kuluka nakio bilamba, na nsongo ya kiamo kia mulumbu waye ibaadi bushito bua shekele* 600, na muntu baadi amusemuina ngabo baadi atambuka kumpala kuaye. 8 Akupu bayimene, aye nkuela musaase kui basalayi ba bena Isalele na nkuibalungula’shi: “Buakinyi nubatuuku na nubelongo bua kulua ngoshi, ami ne muina Filistine, anue tanui bafubi ba Saule su? Sangulayi muntu a kuanudi, afikie mu kulua nami. 9 Su yawa muntu balu nami na bangipaa, paapa atue atufiki bafubi benu. Kadi su’mi namukabila na namuipaa, anue anufiki bafubi betu na anuitufubila.” 10 Akupu yawa muina Filistine bakuile’shi: “Lelo uno nkuete koolomona basalayi ba bena Isalele. Mpeyi muntu, bua’shi tulue naye!”

11 Pabaadi Saule na bena Isalele boso bapushe ano mayi a muina Filistine, babatshinyine, moo wibukopo nkuibakuata.

12 Binyibiabia Davide baadi muana a Yesee muina Efrata a mu Beteleme a Yunda. Yesee baadi na bana balume muanda, mu mafuku a Saule, Yesee baadi mupue kununupa. 13 Bana ba Yesee balume basatu bakulu, babalondele Saule ku ngoshi. Ku baba bana basatu babayile ku ngoshi, kubaadi Eliabe muana mbedi, Abinadabe muana a kabidi, na Shama muana a kasatu. 14 Davide nyi baadi ka mukala, na baba bana balume basatu bakulu babalondele Saule.

15 Pabaadi afubila Saule, Davide baadi nka ende alukiila ku Beteleme bua kutala mikooko ya nshaye. 16 Mu yaaya nsaa Goliate* baadi nka afiki emana ku namashika na ku kiolua munda mua mafuku 40 bua kuibolomona.

17 Akupu Yesee nkulungula muana aaye Davide’shi: “Ata namu kino kipimo kia efa* kia ntete ikangie na ino mikate ekumi, otuadile bukidibukidi ba tutu bobe ku kishalelo. 18 Ata bino bipese bia fromage* ekumi okebipe mukata a bantu kinunu; dingi, oyipushe bua kuuka su ba tutu bobe be biya, akupu walukiile ondungule biabadi.” 19 Bana ba Yesee babaadi na Saule, na bangi basalayi boso ba mu Isalele muibanda dia Ela bua kulua na bena Filistine.

20 Biabia Davide nkubuuka ku namashika aye nkulekiela ungi muntu bua kulama mikooko. Banyine bintu biaye aye nkuenda nka bu bimulunguile Yesee, pabafikile ku kishalelo, basangene basalayi abende ku mbalo ya kuluila ngoshi, abeele misaase ya ngoshi. 21 Basalayi ba bena Isalele babemene abetalena na basalayi ba bena Filistine bua kulua ngoshi. 22 Davide balekiele musango umune mabofo aaye kui muntu alamaa mabofo, nkuenda lubilo ku mbalo ya kuluila ngoshi, pabafikile, babangile kuipusha bi bakuabo.

23 Pabaadi kiesamba nabo, kilobo kiabetamina bu Goliate muina Filistine a mu Gate kibafikile. Baadi akatukila ku mbalo ya kuluila ngoshi ya bena Filistine, aye nkuakula dingi aa mayi amune nka bu kumpala na Davide nkuiapusha. 24 Pabamuene basalayi ba bena Isalele yawa muntu, moo wibukopo ubebakuatshile, abo nkusuuka. 25 Bena Isalele babaadi abakula’shi: “Nubamono yawa muntu kuete kufika kuno? Kuete kufika bua koolomona basalayi ba Isalele. Nfumu akapa muntu amuipaa bupeta bui bungi, akamupa mpa na muana aaye mukashi, akakitshi bia’shi nshibo ya nshaye tayifutanga bitadi na bingi bitungo mu Isalele.”

26 Biabia Davide babangile kuipusha bantu babaadi bemane pepi naye’shi: “Nkinyi ki’abakakitshina muntu ayipaa awa muina Filistine na kukatusha buufu kui bena Isalele? Muanda awa muina Filistine namu nnanyi bua koolomona basalayi b’Efile Mukulu e na muwa?” 27 Paapa bantu babamulunguile nka aa mayi amune bu kumpala, abo nkuamba’shi: “Tala bi’abakakitshina muntu amuipaa.” 28 Pabaadi tutu aaye Eliabe mupushe Davide ku’esamba na bantu, bamukuatshiile nsungu ibukopo na nkuamba’shi: “Buakinyi bofiki kuno? Na we mulekie yaaya mikooko ipeela na nnanyi mu kabaaka? Nauku kalolo nkomanga yobe na binangu bibubi bi muishimba diobe, bofiki penda bua kumona ngoshi.” 29 Nyi Davide nkualuula’shi: “A mmuanda kinyi wibubi unakitshi? Nele penda lukonko!” 30 Biabia aye nkuialuula kui ungi muntu, na nkumuela nka lualua lukonko lumune, na aye namu nkumualuula nka bu biabamualuluile kumpala.

31 Bantu babapushile mayi abaadi Davide muakule, abo nkukealungula Saule. Biabia Saule nkumuitanyina. 32 Davide nkulungula Saule’shi: “Muntu su ngumune tabofulanga kuishimba pamuanda waye. Ami mufubi oobe nende bua kulua ngoshi na uno muina Filistine.” 33 Kadi Saule nkulungula Davide’shi: “Obe tue mulombene kuenda mu kulua na yawa muina Filistine, muanda okii muana mukinga na aye mmusalayi kubanga ku bukinga buaye.” 34 Akupu Davide nkulungula Saule’shi: “Ami mufubi oobe, naadi mulami a mikooko ya nshami, na ntambue bafikile akuata mukooko mu kikutu, ungi musango’nyi nyema a Urse bafikile aye nkukita nka biabia. 35 Neyilondele ami nkuiyipaa na ami nkupaasha mikooko mukanua muayo, payibafikile bua kulua nami, neyikuatshile ku buaa* ami nkuiyikupila, nkuiyipaa.” 36 Ami mufubi oobe nayipayile ntambue na nyema a Urse, uno muina Filistine shii musadiibue afiki nka bu umune a ku yaaya nyema, muanda boolomona basalayi b’Efile Mukulu e na muwa. 37 Akupu Davide nkukumbasha’shi: “Yehowa baadi mumpaashe ku ngala ya ntambue na ya nyema a Urse, nnaye akampaasha’nyi ku maasa kua uno muina Filistine.” Biabia Saule nkulungula Davide’shi: “Enda, Yehowa ekale nobe.”

38 Paapa Saule nkufuadika Davide bina ngoshi biaye. Bamufuadikile kifulu kia kiamo kia munyinga ku mutue, aye nkumufuadika ekotshi dia tu biamo. 39 Akupu Davide basomekiele lupete lua ngoshi lua Saule ku mukaba waye, aye nkutompa kutambuka, anka tabaadi obesha nya, muanda tabaadi muibiubiile, nyi Davide nkulungula Saule’shi: “Ntangobesha kutambuka na bino bintu muanda ntshi muibiubiile.” Paapa Davide bebifuudile. 40 Akupu bakuatshile mukombo muiyasa diaye, aye nkusangula mabue atano a minono mu ka muela, nkuiela mu ka mpaya kaaye ka bu mulami a mikooko, baadi na ndundo* aaye a tonyi mu maasa, aye nkubanga kuifubuila kui muina Filistine.

41 Yawa muina Filistine baadi anyisha kuifubuila kui Davide, na muntu baadi amusemuina ngabo yaye, baadi kumpala. 42 Pabaadi yawa muina Filistine mumone Davide, babangile kumusepa na kapeesha kooso muanda Davide baadi amueneka muana mukinga na baadi buwa bukile. 43 Biabia muina Filistine nkuipusha Davide’shi: “Ami ne mbua su, bua’shi ofikie kuandi na mitshi?” Paapa aye nkuela Davide milua muishina dia b’efile baye. 44 Biabia muina Filistine nkulungula Davide’shi: “Fika kuandi, nankapa tonyi tua muiyilu na nyema ya mu kisuku muita oobe.”

45 Davide namu nkualuula muina Filistine’shi: “Ofiki kuandi na muele wa ngoshi na mulumbu ukata na upeela, kadi ami nafiki kodi muishina dia Yehowa a biluilo, Efile Mukulu a basalayi ba Isalele, yawa oboolomona. 46 Lelo uno, Yehowa akakutuulu mu maasa muande, nakuipaa nkutshibe mutue, dingi’nyi lelo uno nakapa tonyi tua muiyilu na nyema ya mu kisuku bitanda bia basalayi ba bena Filistine, na miilo yoso ya pa nsenga ayikauku’shi kui Efile Mukulu mu Isalele. 47 Na bantu boso bebungie pano abakauku’shi Yehowa t’apashaa na lupete lua ngoshi sunga na mulumbu, muanda ngoshi ngia Yehowa na akenupaana anue boso mu maasa muetu.”

48 Paapa Goliate babangile’nyi kuiseesela bua kufumankana na Davide, kadi Davide nkuenda lubilo ku mbalo ya kuluila ngoshi, mu kufumankana na Goliate.* 49 Davide belele eyasa mu ka mpaya kaaye nkuata ebue na nkuidiasa, bedikupiile muina Filistine mu mpala adio nkumutuela, aye nkupona mukupile mpala paashi. 50 Biabia Davide nkutshokola muina Filistine na ndundo a tonyi n’ebue, bamuashile aye nkumuipaa sunga biekala’shi Davide tabaadi na lupete lua ngoshi mu maasa muaye. 51 Davide batungunukile na kuenda lubilo kuadi, aye nkuimana mu lupese muaye, na nkuata lupete lua ngoshi lua muina Filistine aye nkuilusomona mu kipusu, bua kushinkamisha’shi bafu binyibinyi, bamutshibile nalo mutue. Pabamuene bena Filistine’shi kilobo kiabo kibaafu, babasuukile.

52 Paapa basalayi ba bena Isalele na ba mu Yunda babaabangile kuela biila, abo nkuilondena na bena Filistine kukatukila muibanda mpa na ku biibi bia Ekrone, na bitanda bia bena Filistine bibaadi abiende na kupona muishinda kubanga ku Sharaime mpa na ku Gate na ku Ekrone. 53 Kunyima kua bena Isalele kualukiila kubaabadi abelondena na bena Filistine, babapawile bintu mu kishalelo kiabo.

54 Akupu Davide batuadile mutue wa Goliate* ku Yelusalema, kadi batuudile bina ngoshi bia Goliate mu kashibo kaye k’epema.

55 Pabaadi Saule mumone Davide ende mu kufumankana na Goliate,* bayipuishe Abnere mukata a kiluilo kia ngoshi’shi: “Abnere, awa muana nga nnanyi?” Abnere nkumualuula’shi: “Bu biodi binyibinyi na muwa nfumuami, ntanguku!” 56 Na nfumu nkumulungula’shi: “Nkimbile bua kuuka su yawa nsongualume mmuana a’nyi.” 57 Musango umune na Davide kualukiila ku ngoshi ibaluile na muina Filistine, Abnere bamuatshile aye nkuenda naye kui Saule, Davide baadi na mutue wa Goliate* mu maasa muaye. 58 Paapa Saule nkuipusha Davide’shi: “A we muana a’nyi?” Davide nkumualuula’shi: “Ne muana a mufubi oobe Yesee muina Beteleme.”

18 Nsaa ibaadi Davide mupudishe kuisamba na Saule, Yonatane na Davide babadiile bu kuuku buibukopo,* Yonatane babangile kufula Davide nka bu bibaadi muifule aye nabene. 2 Kubanga nka diadia efuku Saule baadi mulame Davide, tabaadi mumutadiile’nyi buadia kualukila ku nshibo ya nshaye. 3 Yonatane na Davide nkukita kilombeno, muanda Yonatane baadi mumufule nka bu’ye nabene. 4 Yonatane bafuudile musapi waye ushi na maboko ubaadi mufuale, aye nkuiupa Davide pamune na kilamba kiaye kia ngoshi, lupete luaye lua ngoshi, buta buaye na mukaba waye. 5 Davide babangile kutuuka bua kuenda mu ngoshi, baadi akatshimuna koso kubaadi Saule amutumu, biabia Saule nkumutuula bu mukata a basalayi, na bino nkusankisha bantu boso na bafubi ba Saule.

6 Nsaa ibaadi Davide na bangi basalayi abalukiila kubaabadi bakayipee bena Filistine, bana bakashi babaadi abatuuku mu bibundi bioso bia Isalele abayimbi na kusha na muloo na tu matumba na bindaala bua kutundayisha nfumu Saule. 7 Baba bana bakashi babaadi abasanka babaadi abayimbi’shi:

8 Saule bakuatshile nsungu ibukopo muanda uno musambo taubaadi umusankishe nya, muanda bambile’shi: “Bano bana bakashi abayimbi’shi Davide bayipaa binunu makumi, kadi ami abamba’shi nayipaa binunu. Kintu kimune kibashala kiabadia kumupa mpenda bufumu!” 9 Kubanga nka diadia efuku, Saule tabaadi’nyi akulupila Davide.

10 Muifuku dibalondele, Efile Mukulu baadi mutadiile bua’shi kikudi ki bubi kikuate Saule, aye nkubanga kukita mianda mu nshibo muaye nka bu muntu bashimisha binangu.* Pabaadi Davide ayimbi na lusese nka bu angi mafuku oso, Saule baadi na mulumbu muiyasa diaye, 11 aye nkuasa Davide mulumbu na nkuamba’shi: ‘Nabambika Davide ku kimano!’ Kadi Davide baadi muepe misango yoso ibidi. 12 Paapa Saule babangile kupusha Davide moo muanda Yehowa baadi na Davide, anka baadi mupue kukatuka kui Saule. 13 Biabia Saule nkukatusha Davide pepi naye, aye nkumutuula bu nfumu a bantu kinunu, na Davide baadi akunkusha kiluilo mu ngoshi. 14 Davide baadi atungunuka na koobesha* mu bioso bibaadi akitshi, na Yehowa baadi naye. 15 Pabaadi Saule mumone’shi Davide baadi obesha mu mianda ibungi ibaadi akitshi, babangile kumutshina. 16 Kadi bena Isalele boso na bena Yunda babaadi bafule Davide muanda nnaye baadi ebakunkuksha mu ngoshi yabo.

17 Kunyima Saule nkulungula Davide’shi: “Merabe muana ande mukashi mbedi biadi’bi, nakupa anka bu mukashi oobe. Anka abitungu otungunukie na kulesha eshimba dinyingie ku mudimo wande, na kulua ngoshi ya Yehowa.” Muanda Saule baadi eakuila’shi: ‘Eyasa diande t’adimukumu bua kumuipaa, bena Filistine nyi abamuipaa.’ 18 Paapa Davide nkulungula Saule’shi: “Ami namu ne’nyi, na kifuko kia nshami mu Isalele ki kinyi buandia kufika bu muko a nfumu?” 19 Anka, pabalombene nsaa ya’shi Saule ape Davide muana aaye mukashi Merabe, yawa muana mukashi babaadi bapue kumupa Adriele muina Mehola bu mukashi.

20 Aku namu, Mikale muana mukashi a Saule baadi mufule Davide, abo nkulungula Saule uno muanda, ao nkumusankisha. 21 Biabia Saule nkuakula’shi: “Namupa anka buadia kuikala bu muteo kuadi, bua’shi bena Filistine bamone bia kumuipaa.” Paapa Saule nkulungula dingi Davide bua musango wa kabidi’shi: “Lelo ofiki bu muko* ande.” 22 Dingi Saule nkulungula bafubi baye’shi: “Esambeyi na Davide mu bufiefie, numulungule’shi: ‘Talanga! Nfumu asankaa nobe biabia, na bafubi baye boso mbakufule ngofu. Biabia, kumiina kuikala muko a nfumu.’” 23 Pabaadi bafubi ba Saule balungule Davide ino mianda, Davide bebalunguile’shi: “Anue anumono’shi mmuanda ubofule bua kuikala bu muko a nfumu su? Aku namu ami ne mulanda na muntu abataa na muulo upeela?” 24 Paapa bafubi nkukalungula Saule’shi: “Ano nyi mayi abakula Davide.”

25 Biabia Saule bebalunguile’shi: “Tala bianudia kukalungula Davide: ‘Nfumu t’atekie eondo nya, akimbi penda minyonga* 100 ya bena Filistine, buadia kuiobuela kui beshikuanyi baye.’” Muanda Saule baadi akimbi’shi bakayipee Davide kui bena Filistine. 26 Bafubi ba Saule babakalunguile Davide ano mayi, na abaadi asankishe Davide, aye nkukumiina bua kuikala bu muko a nfumu. Kumpala kua’shi nsaa ibaabadi batshibe ilombane, 27 Davide bayile na bantu baye, abo nkuipaa bena Filistine 200, na Davide nkutuadila nfumu minyonga yabo yoso buadia kuikala bu muko a nfumu. Paapa Saule nkumupa muana aaye mukashi Mikale bu mukashi aaye. 28 Saule baadi mushinkamishe’shi Yehowa baadi na Davide na’shi muana aaye mukashi Mikale baadi mufule Davide. 29 Bino bibaadi bitakule Saule bua kunyisha kutshina Davide, na Saule nkufika muishikuanyi a Davide munda mua mafuku oso a muwa waye.

30 Ba nfumu ba bena Filistine babaadi abatuuku bua kulua ngoshi, kadi misango yoso ibaabadi abatuuku, Davide baadi ebatshimuna kukila bangi bafubi ba Saule boso; na eshina diaye dibanyishile kuenda nkumo.

19 Kunyima Saule balunguile muana aaye Yonatane na bafubi baaye boso’shi akiebe kuipaa Davide. 2 Bu bibaadi Yonatane muana a Saule mufule Davide ngofu, Yonatane balunguile Davide’shi: “Nshami Saule kuete kukimba kukuipaa, ku namashika abitungu wekale mudimukie wende pa mbalo ifuame na oshale kuakua. 3 Ami nakende na nshami mu kisuku na nakemana pepi naye pa mbalo yuekala mufuame. Nakesamba na nshami pa bikutale, su nauka muanda kampanda, nakakulungula wanka.”

4 Biabia Yonatane nkuisamba na nshaye Saule, nkumulungula mianda ibuwa pabitale Davide’shi: “Nfumu takitshinanga Davide mufubi aaye muanda wibubi, muanda aye ta mukukitshine muanda wibubi nya, na mianda yadi mukukitshine ngikukuashe. 5 Baadi mutuule muwa waye mu masaku bua kuipaa Goliate,* mu kipaso kibaadi Yehowa mukuashe bena Isalele boso bua kutshimuna, obe nabene buebimuene obe nkusanka ngofu. Buakinyi okimbi kukita muluisho pa kuponesha mase a muntu shii musoole muanda, na kuipaa Davide aku namu ta mukite muanda?” 6 Paapa Saule nkupushisha Yonatane na nkuitshipa’shi: “Bu bikale binyibinyi Yehowa na muwa, Davide t’ayipayibua nya.” 7 Kunyima Yonatane bayitanyine Davide aye nkumulungula yaaya mianda yoso. Akupu Yonatane bayile na Davide kui Saule na aye nkutungunuka na kumufubila nka bu kumpala.

8 Kunyima kua mafuku, ngoshi ibatuukile dingi, Davide nkuenda, aye nkulua na bena Filistine na nkuibepaa bakile bungi, abo nkumusuuka.

9 Dingi efuku pabaadi Saule mushale mu nshibo muaye mukuate mulumbu muiyasa, Yehowa baadi mutadiile kikudi kibubi bua’shi kimufuile, Davide namu baadi ayimbi na lusese. 10 Saule bakiebele kubamba Davide ku kimano na mulumbu kadi Davide nkuiwepa, ao nkushimata ku kimano, Davide basuukile aye nkupanda buabua bufuku. 11 Kunyima Saule batumine bantu bua’shi balame nshibo ya Davide bua kumuipaa ku namashika, kadi Mikale mukashi a Davide bamulunguile’shi: “Su tue musuukie buno bufuku, malooba abakuipaa.” 12 Musango umune Mikale bayishiishe Davide kuididishi bua’shi asuukie amone bia kupanda. 13 Mikale batshile nkishi a terafime* aye nkumutuula ku lusala, nkuata kilamba kibaadi kikitshibue na buaa bua mbushi, nkuikituula pa mbalo pabaadi Davide atuulu mutue waye na nkuikipuuta na kingi kilamba.

14 Binobino Saule batumine bantu buabadia nkakuata Davide, kadi Mikale bakuile’shi: “E na maladi.” 15 Biabia Saule nkutuma dingi bantu bua kutala Davide na nkuibalungula’shi: “Muntuadileyi nka kuakua ku lusala luaye bua’shi ayipayibue.” 16 Pabafikile baba bantu abo nkutuela, babamuene nkishi a terafime ku lusala na kilamba kikitshibue na buaa bua mbushi kibaadi pa mbalo apatudilaa Davide mutue waye. 17 Paapa Saule nkulungula Mikale’shi: “Buakinyi we mundimbe biabia na bolekie muishikuanyi ande bua’shi asuukie?” Nyi Mikale nkualuula Saule’shi: “Ekeele mundungule’shi: ‘Ndekiele nyende, bisumanga nakuipaa!”

18 Biabia Davide basuukile na aye nkupanda, nkuenda kui Samuele ku Rama. Aye nkumulungula bioso bibaadi Saule mumukitshine, akupu aye na Samuele babayile abo nkushala mu Nayote. 19 Kunyima kua mafuku babalunguile Saule’shi: “Tala! Davide e mu Nayote ku Rama.” 20 Musango umune Saule batumine bantu buabadia kukuata Davide. Pababayile, babasangene batemuki bapue kukula abatemuka, na Samuele baadi muimane ebakunkusha, paapa kikudi ki’Efile Mukulu nkuikila bantu babaadi Saule mutume, abo nkubanga namu kukita mianda nka bu batemuki.

21 Pabaabalunguile Saule bianka, batumine musango umune bangi bantu, abo nkubanga kukita namu mianda nka bu batemuki. Kadi Saule batumine’nyi dingi bangi bantu, kisaka kia kasatu, na abo nkubanga kukita dingi’nyi mianda nka bu batemuki. 22 Nfudiilo a bioso Saule nabene bayile ku Rama. Pabafikile pa buina bukata bua kulamina mema mu Seku, bayipuishe’shi: “Samuele na Davide be kunyi?” Abo nkumualuula’shi: “Be’kuaa ku Nayote mu Rama.” 23 Pabaadi Saule muishinda bua kuenda ku Nayote mu Rama, kikudi ki’Efile Mukulu kibamuikiile namu aye nkubanga kukita mianda muishinda nka bu mutemuki mpa na pabafikile ku Nayote mu Rama. 24 Aye namu, bafuudile bilamba biaye, na nkubanga kukita mianda bu mutemuki kumpala kua Samuele, baladile mu nsenga musua diadia efuku dishima na buabua bufuku bushima. Nyi buakinyi abamba’shi: “Saule taadi namu munkatshi mua batemuki?”

20 Paapa Davide basuukile aye nkukatuka ku Nayote mu Rama. Anka bayile kui Yonatane amulungula’shi: “A ne musoole muanda kinyi? Nkilema kinyi kiandi mukite, na mmuanda kinyi wi bubi wandi mukitshine nshobe wa kuete kunkimba bua kungipaa?” 2 Paapa Yonatane nkumulungula’shi: “Ta mbilombene kukitshika nya! T’ofu nya. Tala! Nshami ta mmulombene kukita muanda su ngumune biawikala ukata sunga upeela kuashi mundungule. Na nshami mmulombene kunfia muanda wi bino naminyi? Ta mbilombene kukitshika nya.” 3 Kadi Davide nkuitshipa dingi kui Yonatane’shi: “Nshobe auku binyibinyi’shi we munfule, e kuamba’shi: ‘Tanuiwukishanga Yonatane uno muanda bisumanga enyongola.’ Kadi bu bikale binyibinyi Yehowa na muwa, na biodi’be binyibinyi na muwa, kui nka penda etabula dimune pankatshi pande na lufu!”

4 Akupu Yonatane nkulungula Davide’shi: “Kioso kiondungula bua kukita, nakukitshina kianka.” 5 Davide nkulungula Yonatane’shi: “Malooba mueshi aubaluka, na abikatungu’shi nshale na nfumu bua kudia, abitungu ondekie nyende nkafuame mu kisuku mpa na ku kiolua ki’efuku dia kasatu. 6 Su nshobe batundula’shi ntshi panka, omulungule’shi: ‘Davide ekele muntekie matalua bua kuenda bukidibukidi mu kibundi kiabo mu Beteleme, muanda kifuko kiabo kioso kishima akikala kuakua bua kutuusha mulambu wa ku kipua.’ 7 Su nshobe aluula’shi: ‘Mmuanda wibuwa,’ biabia abilesha’shi mufubi oobe ekala mu butaale. Kadi su bakuata nsungu, paapa oshinkamishe’shi e na kitshibilo kia kunkitshina bibubi. 8 Biabia, ndeshe ami mufubi oobe kifulo kia lulamato, muanda we mukite kilombeno na mufubi oobe kumpala kua Yehowa. Su ne mukite muanda wibubi, ngipee obe nabene, buakinyi we kuntuala kui nshobe?”

9 Paapa Yonatane nkumualuula’shi: “Ntshi mulombene kukukitshina muanda wi biabia, su nauka’shi nshami e na kitshibilo kia kukukitshina muanda wi bubi, buakinyi ne kupela kukulungula?” 10 Paapa Davide nkuipusha Yonatane’shi: “Nnanyi akangukisha su nshobe bakualuula bibubi?” 11 Yonatane balunguile Davide’shi: “Fika tuende mu kisuku.” Paapa bubidi buabo nkuenda mu kisuku. 12 Na Yonatane nkulungula Davide’shi: “Yehowa Efile Mukulu a Isalele ekale kamonyi, malooba sunga aa malooba pa nsaa i bino, natuele nshami munda bua kuuka binangu biaye su e na binangu bi buwa pa bikutale, paapa nakatumu muntu bua’shi akuukishe. 13 Kadi su nshami e na binangu bia kukukitshina muanda wibubi, Yehowa annyokie ngofu su ntshi mukulungule bianka na nkulekiela bua’shi wende mu butaale. Yehowa ekale noobe nka bu bibaadi na nshami. 14 Obe namu tokandesha kifulo kia lulamato kia Yehowa panki na muwa sunga nafua su? 15 Tokumanga kukatusha kifulo kiobe kia lulamato kui ba mu nshibo muande, sunga apakabutula Yehowa beshikuanyi boso ba Davide pa nsenga.” 16 Biabia Yonatane nkukita kilombeno na ba mu nshibo ya Davide, amba’shi: “Yehowa akatshibila beshikuanyi ba Davide kiimu.” 17 Paapa Yonatane nkuelesha dingi Davide mutshipo pabitale kifulo kiaye kuadi, muanda Yonatane baadi mufule Davide nka bu bibaadi muifule aye nabene.

18 Akupu, Yonatane nkulungula Davide’shi: “Malooba mueshi aubaluka, na abakamono’shi tue panka muanda pa mbalo yobe t’apekala muntu. 19 Muifuku dia kasatu abakanyisha’nyi kutundula’shi tue panka, biabia abitungu’shi wende ku mbalo iboodi mufuame diadia dingi efuku, na oshale kuakua pepi n’ebue. 20 Biabia, nakaasa mikietue isatu ku lupese lu’ebue nka bu’mi kuete kuasa kintu. 21 Nakatumu mufubi ande mmulungule’shi: ‘Enda okaate mikietue.’ Su namulungula’shi: ‘Tala! Mikietue i nka mu lupese lobe muamua eyate,’ paapa we mulombene kualuka, muanda bu bikale binyibinyi Yehowa na muwa, abilesha’shi takui muanda su ngumune odia kutshina, takui masaku. 22 Kadi su nalungula nsongualume’shi: ‘Tala! Mikietue ikii kumpala kobe, paapa abitungu okatukie muanda Yehowa bakumiina’shi wende. 23 Pabitale kipuano kia bu kuuku ki pankatshi p’obe nami, Yehowa ekale pankatshi petu bua loso.”

24 Biabia Davide nkufuama mu kisuku, pabaadi mueshi ubalukie, nfumu Saule bashalele ku mesa bua kudia. 25 Nfumu baadi mushale pa mbalo yaye ya mafuku oso dia ku kimano, Yonatane baadi muitalene naye, na Abnere baadi mushale ku lupese lua Saule, kadi mbalo ya Davide ibaadi bisumanga. 26 Diadia efuku Saule tabakuile muanda, muanda baadi eakuila’shi: ‘Kui kuikala muanda kampanda ukitshikie umuikashe butete. Eyendo, e kuikala butete.’ 27 Muifuku dia kabidi kunyima kua mueshi kubaluka, mbalo ya Davide ibaadi nka bisumanga, biabia Saule nkuipusha muana aaye Yonatane’shi: ‘Buakinyi muana a Yesee ta mmufikie mu kudia biabikala malooba sunga lelo?” 28 Yonatane nkualuula Saule’shi: “Davide ekele muntekie matalua bua kuenda ku Beteleme. 29 Ambile’shi: ‘Ndekiele namu nyende, muanda kifuko kietu akikatuusha mulambu mu kibundi, dingi mukuetu mmungitanyishe, biabia su we munfule, ndekiele namu nyende kushi bantu kuuka nkemonene na bakuetu.’ Nyi buakinyi ta mufikie ku mesa a nfumu.” 30 Paapa Saule nkukuatshila Yonatane nsungu i bukopo nkumulungula’shi: “Muana a mukashi ntomboshi’be, omono’shi ntanguku’shi we musangule bua kuikala ku lupese lua muana a Yesee? Mmuanda wi buufu bukata kodi na kui nyinobe. 31 Mafuku oso aekala muana a Yesee na muwa pa nsenga, obe tokakunkusha bu nfumu na bufumu bobe tabuikala bunyingishibue, biabia tuma muntu binobino bua’shi akamungatshile muanda abitungu afue.”

32 Anka, Yonatane balunguile nshaye Saule’shi: “Buakinyi abitungu kumuipaa? Mmuanda kinyi wadi musoole?” 33 Paapa Saule nkuasa Yonatane mulumbu bua’shi amuipee. Biabia Yonatane nkuuka’shi nshaye baadi na kitshibilo kia kuipaa Davide. 34 Yonatane nkuibua musango umune ku mesa na nsungu i bukopo, tabadiile kintu su nkimune diadia efuku dia kabidi kunyima kua mueshi kubaluka, muanda baadi na kinyongua bua Davide, na nshaye baadi mumukuatshishe buufu.

35 Ku namashika, Yonatane bayile mu kisuku nka bu bibaabadi bepushene na Davide, na mufubi aaye mukinga baadi naye. 36 Yonatane nkulungula mufubi aaye’shi: “Suuka namu lubilo ongatshile mikietue yankiebe kuasa.” Mufubi basuukile lubilo, na Yonatane nkuasa mukietue kumpala kuaye. 37 Pabafikile mufubi pa mbalo ibaadi Yonatane muase mukietue, Yonatane bamuelele musaase amulungula’shi: “Mukietue tawi kumpala kobe su?” 38 Yonatane belele’nyi mufubi aaye musaase nkumulungula’shi: “Nyisha! Enda bukidi! Tonyengakananga!” Paapa mufubi a Yonatane basanguile mikietue, aye nkualuka kui nfumuaye. 39 Mufubi tabaukanga muanda su ngumune pabitale kibaadi akikitshika, nka penda Yonatane na Davide nyi babaadi abauku kiabilesha. 40 Akupu Yonatane bapeele mufubi aaye bina ngoshi biaye amulungula’shi: “Enda nabio paasha.”

41 Pabaadi mufubi a Yonatane mualukiile, Davide batuukile mu mbalo ibaadi paapa pepi, dia kuushi. Akupu aye nkukupila mpala paashi na nkuinama misango isatu, abo nkuianyena biipa na boso nkudila, kadi Davide nyi badidile bikile. 42 Yonatane nkulungula Davide’shi: “Enda mu butaale, muanda atue boso bubidi tui betshipe muishina dia Yehowa tuamba’shi: ‘Yehowa ekale pankatshi p’obe n’ami, na pankatshi pa bekulu bobe na bekulu bande bua loso.”

Paapa Davide bakatukile aye nkuenda, Yonatane namu balukiile paasha.

21 Kunyima, Davide bafikile ku Nobe kui tshite muakuidi Akimeleke. Akimeleke babangile kusuusa pabaadi mufumankane na Davide, amuipusha’shi: “Buakinyi we bupenka kushi ungi muntu?” 2 Davide nkualuula tshite muakuidi Akimeleke’shi: “Nfumu mmuntume bua kukita muanda kampanda, kadi mmundungule’shi: ‘Muntu su ngumune taukanga kiankutumu bua nkakita sunga biandi mukulungule.’ Biabia ne muipushene na ba nsongualume bande buatudia nkemonena mbalo kampanda. 3 Su we na mikate itano eyimpe namu, sunga kingi kintu kioso ki kuanka.” 4 Kadi tshite muakuidi baluluile Davide’shi: “Takui mikate ya bisumanga nya, kadi kui nka mikate ya kishila. Bantu bobe mbalombene kuiyidia anka su ta mbalale bakashi kano kabidi.” 5 Davide namu nkualuula tshite muakuidi’shi: “Mu nyendo yetu ishale patuyile mu ngoshi, t’atuikalanga balale bakashi, su bantu bande abelama ba kishila p’atukitaa midimo ya bisumanga, tui kuamba naminyi bua lelo uno!” 6 Paapa tshite muakuidi nkupa Davide mikate ya kishila, muanda takubaadi ingi mikate kukatusha penda mikate ya kuleesha ibaabadi bakatushe kumpala kua Yehowa nka mu diadia efuku, bua’shi bamone bia kualusha mikate ipia.

7 Mu diadia efuku, umune a ku bafubi ba Saule baadi paapa mbamukuate kumpala kua Yehowa. Eshina diaye baadi Doege muina Edome nfumu a balami ba mikooko ba Saule.

8 Paapa Davide balunguile Akimeleke’shi: “We na mulumbu sunga lupete lua ngoshi pano su? Muanda ntshi muate lupete luande lua ngoshi sunga kina ngoshi kampanda, muanda mudimo wabadi bantume kui nfumu bua kukita ngua bukidibukidi.” 9 Tshite muakuidi nkumualuula’shi: “Pano ne na lupete lua ngoshi lua Goliate muina Filistine, yawa oboodi muipee muibanda dia Ela, ne muilufungiile mu kilamba nelutula kunyima kua efode, su okiebe kuiluata eluate, muanda nka penda alo nyi luandi nalo pano.” Davide nkumulungula’shi: “Elumpe muanda takui lungi lupete lua ngoshi lui biabia.”

12 Aa mayi abakalakeshe Davide bikile, na aye nkubanga kutshina Akishe nfumu a Gate ngofu. 13 Biabia, aye nkuidimba mombe kumpala kuabo, na baadi akitshi mianda nka bu sha mombe pabaadi munkatshi muabo. Baadi asolo bintu ku biibi bia pa kibelo kia kibundi na baadi anosha nta ku miefu. 14 Nfudiilo a bioso, Akishe balunguile bafubi baye’shi: “Anumono’shi uno muntu e na mombe, kadi buakinyi anufiki naye kuandi? 15 Anupuandikisha’shi ntshi na bantu be na mombe bebungi bua’shi nuntumine ungi muntu e na mombe su? Ntankumiina uno muntu kuande nya.”

22 Biabia, Davide bakatukile kuakua aye nkukafuama mu lubuebue lua Adulame. Pabaadi bakuabo na bantu boso ba mu nshibo ya nshaye bapushe wawa muanda, babayile kuakua kubaadi. 2 Bantu boso babaadi mu lukalakashi, babaadi na mabaasa na babaadi benyongole, babayile kuadi, aye nkufika nfumuabo. Bantu babaadi naye babaadi bafikie ku 400.

3 Kunyima Davide bakatukile paapa, aye nkuenda ku Misepa mu Moabe, alungula nfumu a Moabe’shi: “Tadiila namu nshami na nyinami bashale nobe mpa na panguku biabakankitshina kui Efile Mukulu.” 4 Biabia aye nkuibaleka kui nfumu a Moabe, na babashalele naye munda mua kipungo kioso kibaadi Davide mufuame.

5 Kunyima kua mafuku, mutemuki Gade balunguile Davide’shi: “Toshalanga mu ino mbalo yodi mufuame, alukiila mu nsenga ya Yunda.” Paapa Davide bakatukile aye nkuenda mu mutamba wa Erete.

6 Saule bapushishe’shi mbamone Davide na bantu baye. Yaaya nsaa Saule baadi mushale mu Gibeya muushi mua mutshi wa tamarise ubaadi pa ka muengie, baadi na mulumbu waye muiyasa, na bafubi baye boso babaadi bamuifunyishe. 7 Paapa Saule nkulungula bafubi baye babaadi bamuifunyishe’shi: “Nteemesheyi namu anue bena Benyamine. Muana a Yesee akenupa namu boso mafuba na mafuba a tukuba tua nfinyo su? Akenutuulu namu boso bu ba nfumu ba bantu kinunu, na ba nfumu ba bantu lukama su? 8 Anue boso nui bandiile lukuku, takui muntu su ngumune mundungule’shi muana ande mmukite kilombeno na muana a Yesee! Takui muntu e nami lusa su ngumune. Na takui muntu su ngumune mundungule’shi muana ande mmutakule mufubi ande buadia kuntombokiela na kundiila lukuku bu biabidi lelo uno.”

9 Paapa Doege muina Edome baadi muimane paapa na baadi mukata a bafubi ba Saule baluluile’shi: “Mmuene muana a Yesee p’afikile ku Nobe kui Akimeleke muana a Akitube. 10 Baadi mumuipuishe mianda kui Yehowa aye nkumupa bia kudia, bamupeele mpa na lupete lua ngoshi lua Goliate muina Filistine.” 11 Musango umune, nfumu nkuitanyisha tshite muakuidi Akimeleke muana a Akitube, na ba tshite muakuidi boso ba mu nshibo ya nshaye babaadi ku Nobe. Biabia, boso buabo babafikile kui nfumu.

12 Saule bambile’shi: “Nteemeshe namu muana a Akitube!” Yawa nkumualuula’shi: “Nankuteemesha nfumuami.” 13 Saule nkumulungula’shi: “Buakinyi nuibandiile lukuku, obe na muana a Yesee? We mumupe mikate na lupete lua ngoshi, na we mumuipuishe mianda kui Efile Mukulu, aku namu mmuntombokiele na mmufuame atengiela buadia kunduisha nka bu biabidi lelo uno.” 14 Paapa Akimeleke nkualuula nfumu’shi: “Munkatshi mua bafubi bobe boso kui muntu a kukulupila* kukila Davide su? Aye mmuko a nfumu na mmukata a baba abakulama, na abamunemekaa mu nshibo yobe. 15 Lelo nyi efuku dia kumpala ndiangipuisha Davide mianda kui Efile Mukulu su? Efuku su ndimune ntshi mulombene kukudiila lukuku obe nfumu! Tonyenyekanga ami mufubi oobe sunga nshibo ishima ya nshami kino kilumbu, muanda ami mufubi oobe ntangukanga muanda su ngumune wa ku bino bioso.”

16 Kadi nfumu nkumulungula’shi: “Obe Akimeleke abitungu ofue, obe na nshibo yoso ishima ya nshobe.” 17 Paapa nfumu nkulungula bantu abamulamaa babaadi bamuifunyishe’shi: “Endayi nuipee ba tshite muakuidi ba Yehowa, muanda mbakuatshishene Davide, abaukanga’shi kuete kusuuka kadi ta mbandungule.” Anka bafubi ba nfumu ta mbakumiine koola maasa aabo bua kuipaa ba tshite muakuidi ba Yehowa. 18 Paapa nfumu nkulungula Doege’shi: “Obe enda okayipee ba tshite muakuidi!” Musango umune Doege muina Edome bayile, aye nkuipaa ba tshite muakuidi aye nabene. Mu diadia efuku bayipayile bantu 85 babaadi bafuale bilamba bia efode bia lin. 19 Babutuile’nyi Nobe, kibundi kia ba tshite muakuidi, aye nkuipaa na lupete lua ngoshi, balume, bakashi, bana mpa na bana bakinga, ngombe, mpunda mpa na mikooko.

20 Anka, muana umune a Akimeleke, muana a Akitube abetanyina bu Abiatare bapandile, aye nkusuuka bua kulonda Davide. 21 Abiatare nkulungula Davide’shi: “Saule bayipaa ba tshite muakuidi ba Yehowa.” 22 Paapa Davide nkulungula Abiatare’shi: “Mu diadia efuku pabaadi Doege muina Edome paapa, naukile’shi akalungula Saule. Lufu lua baba bantu boso ba mu nshibo ya nshobe lui pa mapampa ande ami nabene. 23 Shala nami. Totshinanga nya, muanda muntu akimbi muwa oobe akimbi muwa wande; nakukaluila kalolo.”

23 Kunyima kua mafuku, babalunguile Davide’shi: “Bena Filistine bakuete kuluisha Keila, na bakuete kupaula ntete mu ma mbalo a kukupiila ntete.” 2 Biabia Davide nkuipusha Yehowa’shi: “Nyende nkalue na baba bena Filistine?” Yehowa nkualuula Davide’shi: “Enda okalue na bena Filistine na opaashe Keila.” 3 Kadi bantu ba Davide nkumulungula’shi: “Tala, muno mu Yunda muatudi tukuete kupusha moo; abikala naminyi su tuenda mu kulua na basalayi ba bena Filistine ku Keila!” 4 Paapa Davide nkuipusha dingi Yehowa. Yehowa nkumualuula’shi: “Ebuee, walaale ku Keila, muanda nakatuulu bena Filistine muiyasa diobe.” 5 Biabia Davide bayile na bantu baye ku Keila, abo nkulua ngoshi na bena Filistine; bayipayile bena Filistine bakile bungi aye nkuata nyema yabo, na Davide nkupaasha bantu ba mu Keila.

6 Binobino, pabaadi Abiatare muana a Akimeleke musuukile kui Davide ku Keila, baadi na efode. 7 Babalunguile Saule’shi: “Davide mmufikie ku Keila.” Paapa Saule nkuamba’shi: “Efile Mukulu bamumpa,* muanda bekuata aye nabene mu kateo p’aye kutuela mu kibundi ki na biibi na tulee.” 8 Biabia Saule bayitanyishe bantu boso ku ngoshi, bua’shi baalale ku Keila na befunyishe Davide na bantu baye. 9 Pabaadi Davide mupushe’shi Saule akiebe kufika mu kumuluisha, balunguile tshite muakuidi Abiatare’shi: “Fika na efode pano.” 10 Paapa Davide nkuteka’shi: “Ô Yehowa Efile Mukulu a Isalele! Mufubi oobe bapusha’shi Saule akiebe kufika ku Keila bua kubutula kibundi pa muanda wande. 11 Bakunkushi ba Keila abantuulu muiyasa diaye su? Saule afiki kuno nka bu biandi mupushe ami mufubi oobe su? Ô Yehowa Efile Mukulu a Isalele! Aluula namu mufubi oobe.” Paapa Yehowa nkumualuula’shi: “Afiki.” 12 Davide nkuipusha’shi: “Bakunkushi ba Keila abakantuulu ami na bafubi bande muiyasa dia Saule su?” Yehowa nkumualuula’shi: “Oolo, abakenutuulu muiyasa diaye.”

13 Musango umune, Davide na bantu baye babaadi bakafikie ku 600, abakatukile mu Keila abo nkuenda koso kubaabadi balombene kuenda. Pabaadi Saule mupushe’shi Davide mmusuukie akatuka ku Keila, ta mmuilondene’nyi naye. 14 Davide bashalele mu kabaaka mu ma mbalo e bukopo bua kukekufika, ku miengie ya mu kabaaka ka Zife, Saule baadi amukimbi mafuku oso kushi kukooka, kadi Yehowa tabaadi mutuule Davide muiyasa diaye. 15 Pabaadi Davide mu kabaaka ka Zife ku Oreshe, babamulunguile’shi,* Saule baadi amukimbi buadia kumuipaa.

16 Paapa Yonatane muana a Saule bayile kui Davide ku Oreshe, na nkumukuasha bua’shi apete bukome mui Yehowa. 17 Aye nkumulungula’shi: “Totshinanga, muanda nshami Saule t’akupete nya, okekala nfumu a Isalele, ami namu nankulondela, mpa na nshami Saule auku biabia.” 18 Paapa bubidi buabo babakitshine kilombeno kumpala kua Yehowa, Davide bashele ku Oreshe na Yonatane nkualukiila kuaye.

19 Kunyima kua mafuku, bantu ba mu Zife babakaamine kui Saule ku Gibeya, abo nkuamba’shi: “Davide ta mmufuame pepi netu mu Oreshe ku muengie wa Hakila wi kuushi* kua Yeshimone,* mu ma mbalo e bukopo bua nkekufika su? 20 Biabia obe nfumu, we mulombene kufika kuatudi nsaa yoso yokumiina, atukapaana Davide mu maasa mobe.” 21 Paapa Saule nkuamba’shi: “Yehowa enuelele miabi, muanda nubampushisha lusa. 22 Ndayi namu bua’shi nukimbe bia kuuka mbalo yadi na kuuka muntu mumuene, muanda mbandungule’shi mmudimukie bikile. 23 Nukimbe kalolo bua kuuka ma mbalo a kuete kufuamina na nuntuadile bishinkamiisho. Paapa nakende nenu, su e mu diadia eumbo nakamukimbi munkatshi mua bifuko bioso bia Yunda.”

24 Biabia babakatukile abo nkubadiila ku Zife kumpala kua Saule, Davide na bantu baye babaadi mu kabaaka ka Maone, mu Araba kuushi kua Yeshimone. 25 Kunyima, Saule balondele na bantu baye bua kumukimba. Pabaabalunguile Davide, musango umune bayile ku lubuebue aye nkushala mu kabaaka ka Maone. Pabapushishe Saule biabia, balondele Davide mu kabaaka ka Maone. 26 Pabafikile Saule ku lupese lua muengie, Davide na bantu baye namu babaadi ku lungi lupese lua wawa muengie umune, Davide baadi akitshi bukidibukidi bua’shi amone bia kusuuka Saule, kadi Saule na bantu baye babaadi nka abanyisha kuiseesela pepi na Davide na bantu baaye bua kuibakuata. 27 Anka kubafikile muntu alungula Saule’shi: “Fika bukidibukidi, muanda bena Filistine babafiki mu kuluisha eumbo!” 28 Nyi Saule nkuleka kulonda Davide nkuenda mu kulua na bena Filistine. Nyi buakinyi babayitanyine yaaya mbalo bu Lubuebue lua Kuiabulushena.

29 Paapa Davide bakatukile kuakua, aye nkuenda mu kushala ku Ene-gedi mu ma mbalo e bukopo bua nkekufika.

24 Pabaadi nka Saule kialuka mu kuilondena na bena Filistine, babamulunguile’shi: “Tala! Davide e mu kabaaka ka Ene-gedi.”

2 Paapa, Saule nkuata bana balume 3 000 ba mu Isalele mushima, aye nkuenda nabo mu kukimba Davide na bantu baye ku mbuebue ibaadi mbushi ya mu mangulu ayishala. 3 Saule bafikile ku bikutu bia mikooko bikitshibue na mabue, bibaadi ku bukunkula bu’eshinda pa mbalo ibaadi lubuebue, aye nkutuela muamua bua kusaasuka, aku namu Davide na bantu baye babaadi bashale ku nfudiilo kua lualua lubuebue. 4 Bantu ba Davide nkumulungula’shi: “Dino nyi efuku adikulungula Yehowa’shi: ‘Tala! Natuulu muishikuanyi nobe mu maasa mobe, we kumukitshina kioso kiokumiina.’” Biabia Davide nkuibuaa, nkutshiba bipeela bipeela luembe lua musapi wa Saule ushi na maboko. 5 Kunyima, eshimba* dia Davide dibabangile kumukupila muanda baadi mutshibe luembe lua musapi wa Saule ushi na maboko. 6 Paapa Davide nkulungula bantu baye’shi: “Ku meso kua Yehowa, ntshi mulombene koola mboko yande, bua kukitshina nfumuami muedibue muimu a Yehowa muanda wibubi biabia, muanda nyi mmuedibue muimu a Yehowa.” 7 Pabakuile Davide biabia, bantu baye ta mbakitshine Saule muanda wibubi, paapa Saule bebuele aye nkutuuka mu lubuebue, nkutungunuka na luendo.

8 Akupu Davide batuukile mu lubuebue na aye nkuela Saule musaase’shi: “Muanana nfumuami!” Pabatadile Saule kunyima, Davide bayinamine aye nkukupila mpala paashi. 9 Davide balunguile Saule’shi: “Buakinyi oteemesha mayi a bantu abakula’shi: ‘Tala! Davide akiebe nkukitshina bibubi’? 10 Lelo uno, meso oobe abemuena bibakutuulu Yehowa muiyasa diande mu lubuebue, anka ungi muntu pandungulanga bua kukuipaa, nkufuilanga lusa, na namualuula’shi: ‘Ntshi mulombene kuibuesha mboko yande bua kukitshina nfumuami bibubi nya, muanda mmuedibue muimu a Yehowa.’ 11 Binobino obe nshami, tala luembe lua musapi oobe ushi na maboko lui muiyasa diande; muanda nsaa inatshibi luembe lua musapi oobe ushi na maboko, nadia kuikala mu kuipee anka ntshi mukuipee, we kumona na kupusha binobino’shi ntankimbi kukukitshina bibubi sunga kukutombokiela, na ntshi mukukitshine muluisho, sunga biekala’shi we munshikue na okimbi kungipaa. 12 Yehowa ekale nsushi pankatshi pande nobe, na Yehowa eobuele kodi pa muanda wande, anka eyasa diande t’adikukitshina bibubi nya. 13 Anka bu abiakula lukindi lua kala’shi: ‘Mianda ibubi ayituukilaa kui bantu bebubi, kadi’mi ntankukitshina bibubi nya. 14 Ô nfumu a Isalele a we mutuukie bua kulonda’nyi? A nnanyi okuete kuibingena naye? Nnami mbua mufue? Nkusa a bisumanga? 15 Yehowa ekale nsushi na atshibe kiimu pankatshi pande nobe, ataluula uno muanda na kungakuila, akatshibi kiimu na kumpaasha kuiyasa diobe.”

16 Pabaadi Davide mupudishe kumulungula ano mayi, Saule bakuile’shi: “Muana ande Davide, dino eyi diampusha ndiobe su?” Paapa Saule babangile kudila n’eyi di bukopo. 17 Aye nkulungula Davide’shi: “We mululame ngofu kunkila, bonkitshina mianda ibuwa, anka ami nakukitshina mianda ibubi. 18 Oolo, lelo bondungula muanda wibuwa wekele mukite, bopele kungipaa pekeele Yehowa muntuule mu maasa mobe. 19 Muanda nnanyi a kumona muishikuanyi naye kadi amulekiela kushi kumukitshina bibubi? Yehowa akufute pa kukukitshina mianda ibuwa bua kiakia kibonkitshina lelo uno. 20 Tala! Binobino nauku binyibinyi’shi okekala nfumu, na bufumu bua Isalele abukakitshi mafuku e bungi kodi. 21 Binobino etshipe kuandi muishina dia Yehowa’shi, tokashimisha lutandua luande, na tokashimisha eshina diande mu nshibo ya nshami.” 22 Paapa Davide nkuitshipa kui Saule, na kunyima Saule nkualukiila kuaye. Kadi Davide na bantu baye babalukiile ku mbalo ibaabadi bafuame.

25 Kunyima kua mafuku, Samuele bafuile; bena Isalele boso babebungile bua kumudila, abo nkumushiika pepi na nshibo yaye mu Rama. Akupu Davide bayile mu kabaaka ka Parane.

2 Binobino, kubaadi ungi muntu mu Maone baadi akitshina mudimo ku Karmele. Yawa muntu baadi na bupeta buibungi bukile, baadi na mikooko 3 000, na mbushi 1 000, na mu aa mafuku baadi akuula buaa bua mikooko yaye ku Karmele. 3 Eshina dia yawa muntu nyi Nabale, na mukashi aaye babaadi abamuitanyina bu Abigaile, mukashi baadi na binangu bibungi na baadi buwa bukile, kadi mulume aaye baadi muina Kalebe, baadi na mianda ibukopo na baadi akitshi mianda ibubi. 4 Davide pabaadi mu kabaaka baadi mupushe nkumo ya’shi Nabale kuete kukuula buaa bua mikooko yaye. 5 Biabia, Davide batumine ba nsongualume ekumi kuadi, aye nkuibalungula’shi: “Ndayi ku Karmele, na p’anufiki kui Nabale, numungipuishe biadi. 6 Akupu numulungule’shi: ‘Okite mafuku ebungi na wekale bi buwa,* nshibo yobe ishima ikale bi buwa, na bintu biobe bioso bikale kalolo. 7 Biabia, ne mupushe’shi okuete kukuula mikooko yobe buaa, pabaatudi na balami ba mikooko yobe, tatui bebakitshine muanda su ngumune wi bubi, na ta mbashimishe kintu su nkimune mafuku oso abaabadi ku Karmele. 8 Ipusha bantu bobe abakulungula. Biabia kuukila namu bantu bande kalolo muanda tui bafikie mu nsaa ya muloo, nakusendeela bua’shi ope namu bafubi bobe na muana oobe Davide kioso kiodi nakio.’”

9 Paapa bantu ba Davide babayile abo nkulungula Nabale ino mianda yoso muishina dia Davide. P’ababapuile kumulungula, 10 Nabale nkualuula bafubi ba Davide’shi: “A Davide namu nnanyi, muana a Yesee nnanyi? Ano mafuku bafubi bebungi bakuete kusuuka ba nfumuabo. 11 Ne kuata mikate yande, mema ande na muita wandi mulumbuule bua bantu abakuula buaa bua mikooko yande, nebipe bantu banshanguku sunga kuabafiki?”

12 Paapa bafubi ba Davide nkualukiila na nkumulungula ano mayi oso. 13 Musango umune Davide nkulungula bantu baye’shi: “Muntu oso aate lupete luaye lua ngoshi!” Biabia abo boso babasomekiele mpete yabo ya ngoshi mu mikaba, Davide namu nkusomeka luaye lupete. Bantu bafikie ku 400 babayile na Davide, kadi bantu 200 babashadile bua kulama mabofo.

14 Mu yaaya nsaa, umune a ku bafubi balunguile Abigaile mukashi a Nabale’shi: “Talanga! Davide batumu bafubi baye kukatukila mu kabaaka buabadia kusema nfumuetu, kadi nfumuetu bebakaa. 15 Aku namu baba bantu bekeele netu kalolo biabia, ta mbetukitshine muanda wibubi, tatui bashimishe kantu su nkamune mafuku oso atuikalanga nabo mu mapia. 16 Bekeele nka bu mudimba wituifunyishe awitukaluila, biabikala bufuku sunga kanya munda mua nsaa yoso yatubaadi atulama mikooko pepi nabo. 17 Binobino, kimba kiodia kukita muanda masaku aafikila nfumuetu na ba mu nshibo yaye yoso ishima, na nfumuetu mmuikale muntu a bisumanga, takui muntu e kuisamba naye.”

18 Paapa Abigaile nkuata bukidibukidi mikate 200, malondo akata abidi a nfinyo, mikooko itano yabadi bapue kulumbuula, bipimo bitano bia sea* bia ntete ikangie, tu mikate 100 tua tukuba tua nfinyo tuume, na tu mikate 200 tukitshibue na tumuma tua nfigiye tuume, aye nkutenteka bino bintu bioso ku mpunda. 19 Akupu aye nkulungula bafubi baye’shi: “Badilayi; nenulondo.” Kadi ta mmulungule mulume aaye Nabale muanda su ngumune.

20 Pabaadi mukaamine ku mpunda ende na kualaala muengie ngumushikiile, baadi mufumankane musango umune na Davide na bantu baye abafiki batadiile kuadi. 21 Paapa Davide baadi akula’shi: “Ne mulame mu bisumanga bintu bioso bia uno muntu mu kabaaka, takui kintu su nkimune kiekele mushimishe, kadi binobino bangaluisha bubi ku buwa. 22 Su naleka muana mulume* su ngumune na muwa mu nshibo ya Nabale, Efile Mukulu anyokie ngofu beshikuanyi ba Davide.”*

23 Pabaadi Abigaile mumone Davide, bayikile bukidibukidi ku mpunda, nkuinama kumpala kua Davide na nkuiyela mpala paashi. 24 Aye nkupona ku ngua yaye na nkuakula’shi: “Nfumuami, kilema kikale kuandi, tadiila namu mufubi oobe esambe nobe na oteemeshe mayi a mufubi oobe mukashi. 25 Obe nfumuami, totuulanga namu binangu kui uno muntu a bisumanga Nabale, muanda nka bu abilesha eshina diaye dia bu Nabale,* te na binangu. Kadi ami mufubi oobe mukashi nfumuami, ntshikeele mumone bantu buekele mutume. 26 Binobino nfumuami, bu bikale binyibinyi Yehowa na muwa, na biodi obe na muwa, Yehowa nyi bakukanda bua’shi tuekalanga muibaasa dia mase, na tueobuelanga obe nabene. Beshikuanyi bobe obe nfumuami na baba boso abakimbi kukukitshina bibubi, bekale nka bu Nabale. 27 Binobino nfumuami, kumiina namu kino kia buntu kibakutuadila mufubi oobe mukashi, wekipe bantu bobe abakulondo nfumuami. 28 Fuila namu mufubi oobe mukashi lusa nfumuami, Yehowa akakitshi bia’shi bekulu bobe bakunkushe bu ba nfumu munda mua mafuku ebungi, muanda obe nfumuami okuete kulua ngoshi ya Yehowa, na tue mukite muanda wibubi su ngumune munda mua mafuku oobe oso. 29 Su muntu kampanda ebuaa, akulonda bua kukuipaa, Yehowa Efile Mukulu oobe akakukaluila, alame muwa oobe nka bu muiwanye mu kibuta kia muwa ki kuadi. Kadi miuwa ya beshikuanyi bobe akeyisumbula nka bu mabue abasumbula na ndundo a tonyi. 30 Nsaa y’abakukitshina obe nfumuami mianda yoso ibuwa yabadi bakulee kui Yehowa na p’akutuulu bu mukunkushi a Isalele, 31 t’okekala na muanda aukukalakasha muishimba diobe sunga kuinyongola muanda wa’shi bodi mupongoole mase kushi muanda, na muanda wa’shi bodi muiobuele obe nabene. Nsaa ayikakitshina Yehowa nfumuami ino mianda ibuwa, ontentekieshe namu ami mufubi oobe mukashi.”

32 Paapa Davide nkulungula Abigaile’shi: “Yehowa Efile Mukulu a Isalele atumbishibue, aye bakutumu lelo uno bua kufumankana nami! 33 Efile Mukulu akuelele miabi bua binangu biobe bi buwa, muanda lelo uno bonkutshisha bua’shi ntshikalanga muibaasa dia mase sunga kuiobuela ami nabene. 34 Bisumanga, bu bikale binyibinyi Yehowa Efile Mukulu a Isalele na muwa, aye bankanda bua kukukitshina bibubi, su tue mufikie bukidibukidi mu kufumankana nami, maloba ku namashika, takubadia kushala muana mulume su ngumune na muwa mu nshibo ya Nabale.” 35 Biabia Davide nkukumiina bintu bibaadi Abigaile mumutuadile na nkumulungula’shi: “Alukiila kobe mu butaale. Tala, nateemesha mayi oobe na nakalombasha biabia bibontekie.”

36 Paapa Abigaile nkualukiila kui Nabale, bamupetele mu nshibo yaye akitshi musangelo nka bu nfumu, Nabale baadi na muloo na baadi mukolue ngofu. Abigaile tabamulunguile muanda su ngumune mpa na pabaabutookiele ku namashika. 37 Ku namashika, pabaadi malofu atandukie Nabale, mukashi aaye Abigaile bamulunguile ino mianda. Eshimba diaye nkufika nka bu dia muntu mufue, aye nkushala muume nka bu ebue. 38 Akupu, kunyima kua mafuku afikie ku ekumi, Yehowa bayipayile Nabale.

39 Pabapushile Davide’shi Nabale baafu, bambile’shi: “Yehowa atumbishibue aye batshibi kilumbu kiande ku bibaadi Nabale munkee, na kunkanda ami mufubi aaye bua’shi ntshikitanga muanda wibubi su ngumune, Yehowa baaluisha Nabale mianda yaye ibubi.” Kunyima, Davide batumine bantu buabadia kulungula Abigaile’shi akimbi kumuibakila. 40 Paapa bafubi ba Davide nkuenda kui Abigaile ku Karmele, na nkumulungula’shi: “Davide betutumu bua’shi tukuate wekale bu mukashi aaye.” 41 Abigaile nkuibua musango umune nkuinama mpala paashi na nkuakula’shi: “Nakumiina kuikala bu mufubi bua kusuula ngua ya bafubi ba nfumuami.” 42 Paapa Abigaile nkuibuaa bukidibukidi nkukaamina ku mpunda aaye, bafubi baye bakashi batano babaadi abamulondo kumongo kuaye, abo nkushindikila bantu babaadi Davide mutume, na Abigaile nkufika bu mukashi aaye.

43 Davide baadi dingi muibakile Akinoame a ku Izreele, na abo nkufika boso babidi bakashi baye.

44 Kadi Saule baadi mupue kuata muana aaye mukashi Mikale baadi bu mukashi a Davide, aye nkumupa Paleti muana a Laishe a mu Galime.

26 Kunyima kua mafuku, bantu ba ku Zife babafikile kui Saule ku Gibeya, bamulungula’shi: “Davide mmufuame ku muengie wa Hakila witalene na Yeshimone.”* 2 Biabia Saule bebuele aye nkuenda mu kabaaka ka Zife na bantu 3 000 babaadi musangule mu Isalele, bua kuenda mu kukimba Davide mu kabaaka ka Zife. 3 Saule baadi mutuule kishalelo ku muengie wa Hakila, witalene na Yeshimone pepi n’eshinda. Mu aa mafuku, Davide baadi mushale mu kabaaka, na aye nkupusha’shi Saule baadi mufikie mu kumukimba muamua mu kabaaka. 4 Biabia Davide nkutuma bantu bua kutala su Saule mmufikie binyibinyi. 5 Kunyima Davide bayile ku mbalo ibaadi Saule mutuule kishalelo kiaye, aye nkumona pabaadi Saule na Abnere muana a Nere nfumu a kiluilo kiaye kia ngoshi balale. Saule baadi mulale munkatshi mua kishalelo na basalayi babaadi bamuifunyishe ku mpese yoso. 6 Paapa Davide nkuipusha Akimeleke muina Ite, na Abishai muana a Seruya mukuabo na Yoabe’shi: “A nnanyi ende nami mu kishalelo kui Saule?” Abishai nkumualuula’shi: “Ami nende nobe.” 7 Biabia Davide na Abishai babayile kui basalayi, abo nkusangana Saule mmulale munkatshi mua kishalelo, mulumbu waye ngushimikie mu nsenga pepi na mutue waye, Abnere na basalayi babaadi balale bamuifunyishe.

8 Paapa Abishai nkulungula Davide’shi: “Lelo uno Efile Mukulu batuulu muishikuanyi nobe mu maasa mobe, binobino kumiina namu mmubambe mu nsenga na mulumbu, musango nka umune, ntangalusha misango ibidi nya.” 9 Kadi Davide balunguile Abishai’shi: “Tomukitshinanga bibubi, muanda nnanyi a kuibuesha eyasa diaye bua kukitshina muedibue muimu a Yehowa bibubi, na ashala bu shii musoole muanda?” 10 Davide nkuamba’nyi’shi: “Bu bikale binyibinyi Yehowa na muwa, Yehowa nabene akamuipaa, sunga’shi efuku diaye dia kufua adikumbana afue, sunga’shi akafuila mu ngoshi. 11 Ku meso kua Yehowa, ntshi mulombene koola mboko yande, bua kukitshina muedibue muimu a Yehowa muanda wibubi biabia! Biabia ata namu mulumbu wi pepi na mutue waye, na kalondo ka mema tuende.” 12 Biabia Davide nkuata mulumbu na kalondo ka mema bibaadi pepi na mutue wa Saule, abo nkuenda. Takui muntu su ngumune bebamuene sunga kuuka kibaabakitshine, na takui muntu babuukile, boso babaadi balale muanda Yehowa baadi muibaladishe tulo tui bukopo. 13 Paapa Davide nkusambuka lungi lupese nkukemana ku nsongo kua muengie, kula na mbalo ibaadi Saule.

14 Na Davide nkuela basalayi na Abnere muana a Nere musaase nkuibalungula’shi: “Abnere, okuete kumpusha su?” Abnere nkualuula’shi: “Nnobe’nyi akalakasha nfumu?” 15 Davide nkuipusha Abnere’shi: “We mulume su? Kui muntu e biodi mu Isalele? Buakinyi tue mushale mupasukie bua kulama muanana nfumu oobe? Muanda kui musalayi fikanga bua kuipaa muanana nfumu oobe. 16 Biabia bibokitshi tabi buwa nya, bu bikale binyibinyi Yehowa na muwa, we mukumbene lufu, muanda tue mushale mupasukie bua kulama nfumu oobe muedibue muimu a Yehowa. Binobino banda kutala, a mulumbu wa nfumu na kalondo kaye ka mema bikele pepi na mutue waye bi kuikunyi?”

17 Paapa Saule nkutundula eyi dia Davide na nkuipusha’shi: “Muana ande Davide, dino eyi diampusha ndiobe su?” Davide nkumualuula’shi: “Oolo, muanana nfumuami.” 18 Davide nkuamba’nyi’shi: “Buakinyi nfumuami kuete kuibingena nami ami mufubi aaye? A kiandi mukite nkinyi, na mmuanda kinyi wandi musoole? 19 Nfumuami, nteemeshe namu ami mufubi oobe. Su Yehowa nyi mukutakule bua kunkiengiesha, akumiine namu mulambu wande wa ntete. Kadi su mbantu bakutakule, bedibue mulua ku meso kua Yehowa, muanda mbambingie lelo uno bua’shi ntshikalanga pamune na bupianyi bua Yehowa. Abamba’shi: ‘Enda okafubile bangi b’efile!’ 20 Biabia, tokumiinanga’shi mase ande apone mu nsenga kula na mpala ya Yehowa, muanda nfumu a Isalele mmufikie bua kukimba nkusa a bisumanga, anka bu’shi kuete kuibingena na nkuadi ku miengie.”

21 Saule nkumulungula’shi: “Ne muluishe. Alukiila muana ande Davide, ntakukitshina’nyi bibubi nya, muanda lelo uno buata muwa wande na muulo. Mbinyibinyi ne mukite mianda kushi binangu na ne mu kilubilo kikata.” 22 Davide nkumualuula’shi: “Mulumbu wa nfumu biaudi’bi. Nsongualume umune afikie ewate. 23 Yehowa nyi akafutu muntu oso muyile kululama kuaye na lulamato luaye, muanda lelo uno Yehowa kutuulanga mu maasa muande, kadi ntshi mukumiine kukitshina muedibue muimu a Yehowa bibubi. 24 Talanga! Nka bu biangatanga muwa oobe na muulo lelo uno, biabia muwa wande wikale namu na muulo ku meso kua Yehowa na ampaashe ku makienga ande oso.” 25 Saule nkualuula Davide’shi: “Efile Mukulu akuelele miabi muana ande Davide. Mbinyibinyi, okakitshi mianda ikata, okoobesha binyibinyi.” Akupu Davide bakatukile aye nkuenda, Saule nkualukiila kuaye.

27 Anka, Davide baadi muiakuile muishimba diaye’shi: “Dingi efuku, Saule angipaa. Kibuwa kiandia kukita nkia kusuukila mu nsenga ya bena Filistine; paapa Saule, akakooko kunkimba mu nsenga yoso ya bena Isalele, na nakapanda ku maasa kuaye.” 2 Biabia Davide nkuibuaa na bantu 600 babaadi naye, abo nkuenda kui Akishe muana a Maoka baadi nfumu a mu Gate. 3 Davide na bantu baye nkushala na Akishe mu Gate, muntu oso baadi na kifuko kiaye, Davide namu baadi na bakashi baye babidi, Akinoame a mu Izreele na Abigaile muina Karmele, mukashi kilele a Nabale. 4 Pabaadi Saule mupushe mukandu wa’shi Davide basuukila ku Gate, balekiele kumukimba.

5 Akupu Davide nkulungula Akishe’shi: “Su ne mukuminyibue ku meso kobe, mpe namu mbalo mu kimune kia ku bibundi bipeela bua’shi nkashalele kuakua. Buakinyi ami mufubi oobe ne kushala pamune nobe muno muipata?”* 6 Biabia, mu diadia efuku, Akishe nkumupa kibundi kia Sikelage, nyi buakinyi kibundi kia Sikelage nkia ba nfumu ba Yunda mpa na lelo uno.

7 Mafuku abaadi Davide mushale mu nsenga ya bena Filistine abaadi kipua kimune na mieshi inanka. 8 Davide na bantu baye babaadi abende mu kutuelela bena Geshure, bena Gerizi na bena Amaleke, muanda babaadi bashale mu nsenga ibaadi ibangile ku Telame mpa na ku Shure yalale mpa na ku Ejipitu. 9 Pabaadi Davide ebatuelela bua kulua nabo, tabaadi alekie muana mulume sunga muana mukashi na muwa, kadi baadi ata mikooko, ngombe, mpunda, tumelo na bilamba, kunyima baadi alukiila kui Akishe. 10 Paapa Akishe baadi amuipusha’shi: “A lelo we mukatuelele ba nnanyi?” Davide baadi amualuula’shi: “Ne mukatuele dia kuushi kua Yunda,” sunga’shi: “Dia kuushi kua bena Yeramele,” sunga’shi: “Dia kuushi kua bena Keni.” 11 Davide tabaadi alekie muana mulume sunga muana mukashi na muwa bua’shi tala afika ku Gate, muanda baadi amba’shi: “Bua’shi tabafikanga mu kulungula bena Gate’shi, bino nyi bikite Davide.” (Na bino nyi bibaadi akitshi mafuku oso abaadi mushale mu nsenga ya bena Filistine.) 12 Paapa Akishe nkukulupila Davide, baadi eakuila’shi: ‘Davide bapu kufika binyibinyi bu kintu akituusha eshiko dibubi munkatshi mua muilo waye wa Isalele, biabia ashala nka bu mufubi ande.’

28 Mu aa mafuku, bena Filistine babaadi babungie biluilo biabo bua kulua na bena Isalele, biabia Akishe nkulungula Davide’shi: “Ouku kalolo’shi obe na bantu bobe anuende nami mu kulua ngoshi.” 2 Paapa Davide nkulungula Akishe’shi: “Obe nabene ouku kalolo akikakitshi mufubi oobe.” Akishe nkulungula Davide’shi: “Nyi buakinyi nakakutuulu bu muntu a kundama nsaa yoso.”

3 Binyi biabia, Samuele baadi mupue kufua, na bena Isalele boso abapuile kumudila, abo nkumushiika mu kibundi kiaye mu Rama. Anka Saule baadi mupue kukatusha muiumbo bantu ababukaa na abakula mianda ayifiki kumpala.

4 Bena Filistine babebungile, abo nkuenda na nkutuula kishalelo kiabo mu Shuneme. Saule namu babungile bena Isalele boso abo nkutuula kishalelo kiabo mu Gilboa. 5 Pabamuene Saule kishalelo kia bena Filistine, moo ubamukuatshile na eshimba diaye nkusuusa ngofu. 6 Sunga biekala’shi Saule baadi ayipusha Yehowa mianda, Yehowa tabaadi amualuula nya, biabikala mu bilotua, ku bukuashi bua Urime, sunga ku bukuashi bua batemuki. 7 Nfudiilo a bioso, Saule balunguile bafubi baye’shi: “Nkimbileyi muana mukashi abukaa bua’shi nkamuipushe mianda.” Bafubi baye nkumualuula’shi: “Kui muana mukashi abukaa mu Ene-dore.”

8 Paapa Saule nkushintuula bilamba bua’shi tabamuukanga, na aye nkuenda bufuku na bafubi baye babidi kui yawa muana mukashi, aye nkumulungula’shi: “Nkitshine namu lubuko, ondungule mianda i kumpala na ontushile muntu ankulungula.” 9 Biabia yawa muana mukashi nkumulungula’shi: “Ouku bikite Saule, biadi mukatushe bantu ababukaa, na abakulaa mianda ayifiki kumpala muiumbo, binobino buakinyi okimbi kuntompa bua’shi ongipayishe?” 10 Paapa Saule nkuitshipa kuadi muishina dia Yehowa pa kuamba’shi: “Bu bikale binyibinyi Yehowa na muwa, t’otuelakana su nkapeela bua uno muanda!” 11 Paapa yawa muana mukashi nkumuipusha’shi: “Okiebe nkutuushile nnanyi?” Saule nkumualuula’shi: “Ntuushile Samuele.” 12 Yawa muana mukashi pabamuene “Samuele” baadi muele musaase n’eyi di bukopo alungula Saule’shi: “Buakinyi bondimbi? We Saule!” 13 Nfumu Saule nkumulungula’shi: “Totshinanga, bomono kinyi?” Yawa muana mukashi nkumualuula’shi: “Nkuete kumona muntu e nka bu efile kuete kukaamina atuukila muushi mua nsenga.” 14 Paapa aye nkumuipusha’shi: “E naminyi?” Yawa muana mukashi nkumualuula’shi: “Nkuete kumona muana mulume mukulu mufuale musapi ushi na maboko.” Paapa Saule nkushinguula’shi yawa muntu baadi “Samuele,” aye nkuinama na nkukupila mpala paashi.

15 Paapa “Samuele” nkuipusha Saule’shi: “Buakinyi onkalakasha p’obe kungitanyisha?” Saule nkualuula’shi: “Ne na muanda wi bukopo. Bena Filistine bakuete kulua nami anka Efile Mukulu takii nami, takuete kungaluula’nyi sunga nku bukuashi bua batemuki, sunga mmu bilotua, nyi buakinyi nakuitanyina bua’shi ondungule biandia kukita.”

16 Na “Samuele” nkumulungula’shi: “Buakinyi ongipusha aku Yehowa takii nobe na taadi muishikuanyi oobe? 17 Yehowa nabene akakitshi biabia bibaadi mupue kukulungula ku bukuashi buande: Yehowa akakuata bufumu na ebupe muinobe Davide. 18 Muanda tue mukookiele eyi dia Yehowa na kubutula bena Amaleke babaadi bamukuatshishe nsungu i bukopo, nyi buakinyi Yehowa akukitshi bino lelo uno. 19 Yehowa akakupaana obe na bena Isalele mu maasa mua bena Filistine, malooba obe na bana bobe anuikala nami. Yehowa akapaana kiluilo kia bena Isalele mu maasa mua bena Filistine.”

20 Musango umune Saule baponene aye nkutandabala mu nsenga, moo wibukopo ubamukuatshile pabapushile mayi a “Samuele.” Tabaadi mushale na ka bukome su nkapeela, muanda tabaadi mudie mu diadia efuku dioso dishima, na bufuku boso bushima. 21 Yawa muana mukashi pabafikile pepi na Saule, bamuene’shi mmukalakashibue ngofu, aye nkumulungula’shi: “Ami mufubi oobe nkookielanga kiakia kiondungulanga bua kukita, na ntuulanga muwa wande mu masaku bua kutumikila biondungulanga. 22 Binobino, bua lusa nteemeshe namu, nkupe namu kapese ka mukate bua’shi odie bua kupetuula bukome kumpala kodia kuenda muishinda.” 23 Kadi bapelele aye nkuamba’shi: “Ntandi nya.” Anka bafubi baye na yawa muana mukashi babaadi nka abamushiishikila. Nfudiilo a bioso aye nkuibateemesha, nkuibuaa nkushala ku lusala. 24 Yawa muana mukashi baadi na kana ka ngombe katame mu nshibo muaye, na aye nkuikaata nkuikayipaa bukidibukidi, na batshile bukula aye nkuibusoba nkukita mikate ishi kitatusho. 25 Paapa aye nkuibipa Saule na bena mudimo baye, abo nkudia, akupu abo nkuenda nka buabua bufuku.

29 Bena Filistine babaadi babungie biluilo biabo bioso bia ngoshi ku Afeke, na bena Isalele babaadi batuule kishalelo kiabo pepi na mushima wa mema ubaadi pepi na Izreele. 2 Ba nfumu ba bena Filistine babaadi abakisha basalayi babo mu bisaka bia bantu lukama na bia bantu kinunu, kadi Davide na bantu baye namu babaadi abalondo kunyima na Akishe. 3 Anka bakunkushi ba bena Filistine babayipuishe’shi: “A bano bena Ebelu abakitshi kinyi pano?” Akishe baluluile bakunkushi ba bena Filistine’shi: “Uno nyi Davide mufubi a Nfumu Saule a mu Isalele, e nami takudi kipua kimune na mieshi. Ntshi mumone muanda su ngumune wibubi kuadi kubanga efuku dibaadi musuukile kuande mpa na lelo uno.” 4 Kadi bakunkushi ba bena Filistine babamukuatshiile nsungu bamulungula’shi: “Alusha uno muntu alukiile ku mbalo yodi mumupe bua kushala, tendanga netu mu ngoshi bisumanga aketualulukila, muanda kintu kibuwa kiadia kukita bua’shi epushene na nfumuaye, nkia kumutuadila mitue ya bantu betu. 5 Uno ta ndio Davide abaabadi bayimbile na kusha, bambanga’shi:

6 Paapa Akishe bayitanyine Davide amulungula’shi: “Bu bikale binyibinyi Yehowa na muwa, obe we mululame na nakumiina kuenda nobe ku ngoshi na kiluilo kiande, muanda ntshi mumone muanda wibubi kodi kubanga muifuku dibodi mufikie kuandi mpa na lelo uno. Anka ba nfumu ta be na lukulupilo modi. 7 Biabia alukiila mu butaale, na tokitanga muanda su ngumune ush’ausankisha ba nfumu ba bena Filistine.” 8 Paapa Davide nkuipusha nfumu Akishe’shi: “Buakinyi, a nakitshi kinyi? Mbubi kinyi bodi musangane kuandi’mi mufubi oobe kubanga efuku dinafikile kodi mpa na lelo uno? Buakinyi ntshi mulombene kuenda nobe na nakalua na beshikuanyi ba muanana nfumuami?” 9 Akishe nkualuula Davide’shi: “Mu ande mmueneno, we muntu e buwa bukile na we nka bu muikeyilu a Efile Mukulu. Anka bakunkushi ba bena Filistine mbakule’shi: ‘Tendanga netu ku ngoshi.’ 10 Biabia obuukie ku nakashika buee na bafubi ba nfumobe bafikie nobe, nuibue nuende ku nakashika buee su paasha pabapu kutooka.”

11 Paapa Davide na bantu baye nkuibuaa ku nakashika buee bua kualuka muiumbo dia bena Filistine, kadi bena Filistine babayile ku Izreele.

30 Muifuku dia kasatu, pabaadi Davide na bantu baye bafikie ku Sikelage, babasangene bena Amaleke mbatuele dia kuushi* na mu Sikelage, babaadi balue ngoshi na kibundi kia Sikelage na abo nkuikiela kaalo. 2 Babakuatshile bana bakashi na bantu boso babaadi muanka, kubanga ku bakinga mpa na ku bakulu, tababaadi bayipee muntu su ngumune, kadi babaadi bebakuate abo nkuenda nabo. 3 Pabaadi Davide na bantu baye bafikie mu kibundi, babekisangene mbekiele kaalo, na bakashi babo, bana babo balume na bana babo bakashi babaadi bebakuate abo nkuenda nabo. 4 Biabia Davide na bantu babaadi nabo nkubanga kudila ngofu, mpa na pabaabakutshilue dingi bukome bua kudila. 5 Dingi, bena Amaleke babakuatshile bakashi babidi ba Davide, Akinoame a ku Izreele na Abigaile a ku Karmele mukashi kilele a Nabale, abo nkuenda nabo. 6 Davide baadi na kinyongua kikata, muanda bantu baye babaadi abakimbi kumuasa mabue, babaadi na nsungu ibukopo bu bibaabadi bashimishe bana babo balume na bana babo bakashi. Kadi Davide baadi mupete bukome ku bukuashi bua Yehowa Efile Mukulu aaye.

7 Davide nkulungula tshite muakuidi Abiatare muana a Akimeleke’shi: “Fika namu na efode pano.” Biabia Abiatare nkufika na efode kui Davide. 8 Davide nkuipusha Yehowa’shi: “Nelondene na kino kisaka kia ba ntomboshi su? Nakebakuata?” Efile Mukulu nkumulungula’shi: “Ebalonde, okebakuata binyibinyi na okapaasha bintu na bantu babadi bakuate.”

9 Musango umune Davide nkuibua na bantu 600 babaadi nabo, abo nkuenda mpa na mu Kibandabanda* kia Besore mbalo ibashadile bangi bantu. 10 Davide baadi mutungunukie na kuilondena nabo na bantu 400 babaadi naye, kadi bantu 200 babaadi bakookie ngofu bashibaadi na mushindo wa kusambuka Kibandabanda kia Besore babashadile.

11 Babasangene muina Ejipitu mu mapia, abo nkuenda naye kui Davide, nkumupa bia kudia na mema a kutoma, 12 na kapese ka mukate kakitshibue na tukuba tua nfigiye tuume, na tu mikate tubidi tua tukuba tua nfinyo tuume, aye nkudia na nkupetuula bukome, muanda tabaadi mudie kantu su nkamune sunga kutoma mema munda mua mafuku asatu ashima. 13 Davide nkumuipusha’shi: “A we mufubi a’nyi, na kuenu nkunyi?” Aye nkumualuula’shi: “Ne mufubi muina Ejipitu, mpika a muina Amaleke, kadi nfumuami ekeele mundekie muanda nekeele na maladi takudi mafuku asatu. 14 Tuikeele bakatuelele bantu dia kuushi* muiumbo dia bena Kerete na mu nsenga ya Yunda, na kuushi ku’eumbo dia Kalebe, atue nkushiika Sikelage kaalo.” 15 Paapa Davide nkumuipusha’shi: “We kukandesha kui kiakia kisaka kia ba ntomboshi?” Aye nkumualuula’shi: “Su wetshipa kuandi muishina di’Efile Mukulu’shi tongipaa, na’shi tokantuulu mu maasa mua nfumuami, nakakulesha kui kiakia kisaka kia ba ntomboshi.”

16 Paapa yawa muntu nkuenda na Davide kui kiakia kisaka kia ba ntomboshi, babebasangene mbapalakane mu kiakia kipindi kioso kia nsenga. Baabadi abadi na kutoma, abasanka muanda wa bintu bioso bibungi bibaabadi bapaule muiumbo dia bena Filistine na dia Yunda. 17 Paapa Davide nkuibayipaa kubanga ku namashika buee mpa na ku kiolua; takui muntu su ngumune bapandile kukatusha penda bantu 400 babasuukile mbakaamine ku tumelo. 18 Davide nkupetuula dingi bintu bioso bibaadi bena Amaleke baate, na aye nkupaasha bakashi baye babidi. 19 Takui kintu kiabo su nkimune kibashimiine, kikata sunga kipeela. Babaadi bapetuule bana babo balume na bana babo bakashi na bintu bibaabadi baate; Davide nkualushula bintu bioso bibaabadi banyengie. 20 Paapa Davide nkuata bisaka bioso bia mikooko na bia ngombe bia baba ba ntomboshi, na bantu ba Davide babaadi abeyikunkusha kumpala kua bimunuanga biabo. Babaadi abamba’shi: “Bino mbintu bipaulue bia Davide.”

21 Akupu Davide bafikile kui bantu 200 babaadi bashale pepi na Kibandabanda kia Besore, muanda babaadi bakookie ngofu bakutua kuenda naye, babatuukile bua kufumankana na Davide na bantu babaadi naye. Pabaadi Davide muiseesele kuabadi, bebepuishe biabadi. 22 Anka, bantu boso ba bisumanga na be bubi ba ku baba babayile na Davide babakuile’shi: “Bu bikale’shi ta mbende netu, t’atuibapa bintu biabekele banyengie biatubapetuula nya, muntu oso aate penda mukashi aaye na bana baye ende.” 23 Kadi Davide bebalunguile’shi: “Bakuetu, tanui balombene kukita biabia na bintu bibaabetupa kui Yehowa. Mmuitukaluile na mmutuule mu maasa muetu kisaka kia ba ntomboshi kifikile mu kuituluisha ngoshi. 24 Takui muntu a kukumiina bino bianuamba. Bintu abipete yawa yile mu ngoshi, abikala bi mumune na bia yawa shadile bua kulama mabofo. Boso abapete bintu bi bungi bui mumune.” 25 Kubanga nka diadia efuku, ano mayi abakuile Davide, abafikile bu muiya na bu eyi dia kulonda mu Isalele mpa na lelo uno.

26 Pabaadi Davide mualukiile ku Sikelage, batumiine bakulu ba mu Yunda babaadi ba kuuku baye ndambo ya ku bintu bibaabadi banyengie, amba’shi: “Kienu kia buntu kia ku bintu biabadi banyengie beshikuanyi ba Yehowa biakidi’bi.” 27 Bebitumiine baba babaadi ku Betele, babaadi ku Ramote a Negebe,* baba baabadi ku Yatire, 28 babaadi ku Arowe, babaadi ku Sifemote, babaadi ku Eshetemoa, 29 babaadi ku Rakale, kui baba babaadi mu bibundi bia bena Yeramele, baba babaadi mu bibundi bia bena Keni, 30 babaadi mu bibundi bia Orma, babaadi mu bibundi bia Borashane, babaadi mu bibundi bia Atakye, 31 kui baba babaadi ku Ebrone, na mu ma mbalo oso mubaadi Davide na bantu baye bakidile.

31 Bena Filistine babaadi abalu ngoshi na bena Isalele. Basalayi ba bena Isalele babaadi basuukie kumpala kua bena Filistine, bena Filistine nkuipaa bebungi ba kuabadi ku Muengie wa Ngilboa. 2 Bena Filistine babaabangile kuilondena na Saule na bana baye, abo nkuipaa Yonatane, Abinadabe na Malaki-shuwa, bana ba Saule. 3 Ngoshi ibaadi inunkile Saule, beedi ba mikietue babamuene mbalo ibaadi Saule, abo nkumutapa ngofu. 4 Akupu Saule nkulungula muntu baadi amutuadila bina ngoshi’shi: “Ata lupete lobe lua ngoshi ongipee, tala bano bantu bashi basadiibue bafika mu kunkitshina mianda kushii lusa, na bangipaa.” Kadi muntu baadi amutuadila bina ngoshi tabaadi mukumiine, muanda baadi apusha moo wi bukopo. Biabia Saule nkuata lupete, nkuiyipaa aye nabene. 5 Pabamuene yawa muntu baadi amutuadila bina ngoshi’shi Saule baafu, batshile lupete luaye, aye nkuiyipaa namu. 6 Biabia Saule na bana baye balume basatu, muntu baadi amutuadila bina ngoshi, na bantu baye boso babafuile boso mu diadia efuku. 7 Pabaadi bena Isalele babaadi bashale mu nsenga ya mabanda na mu nsenga ya Yordane bamone’shi basalayi ba bena Isalele babasuuku, na’shi Saule na bana baye babaafu, bababangile kusuuka na kuleka bibundi biabo; akupu bena Filistine babafikile, abo nkuimushala.

8 Efuku dibalondele, pabayile bena Filistine mu kuata bintu bia bantu bababayipayile, babapetele Saule na bana baye balume basatu mbafue ku muengie wa Ngilboa. 9 Paapa babatshibile mutue wa Saule na nkumuata bina ngoshi biaye, abo nkutuma eyi mu nsenga ishima ya bena Filistine bua’shi bapalakashe wawa mukandu mu mashibo* a ma nkishi aabo na kui muilo. 10 Akupu babatuudile bina ngoshi biaye mu ntempelo a Ashitorete na abo nkupudika kitanda kiaye ku kimano kia Bete-shane. 11 Pabaadi bantu ba mu Yabeshe-gileade bapushe bibaadi bena Filistine bakitshine Saule, 12 bilobo bioso bia ngoshi bibebuele, abio nkuenda bufuku bushima na nkuata kitanda kia Saule na bia bana baye balume ku kimano kia Bete-shane. Babalukiile nabio ku Yabeshe, abo nkuibiela kaalo kuakua. 13 Kunyima babaatshile mifufua yabo, abo nkuiyishiika muushi mua mutshi wa tamarise mu Yabeshe, na abo nkuishidika munda mua mafuku musambobidi.