MUKANDA WA KABIDI WA SAMUELE

1 Kunyima kua lufu lua Saule, p’abaadi Davide mualukiile kubaadi mukepee bena Ameleke, Davide bashadile mu Sikelage munda mua mafuku abidi. 2 Muifuku dia kasatu ungi nsongualume bafikile, akatukila mu kishalelo kia ngoshi kia Saule, baadi na bilamba bisanukie na baadi muipongie nsenga mu mutue. P’abafikile pepi na Davide baponene mu nsenga, aye nkukupila mpala paashi.

3 Davide nkumuipusha’shi: “A okatukila kunyi?” Aye nkumualula’shi: “Nasuuku mu kishalelo kia ngoshi kia bena Isalele.” 4 Davide nkumuipusha’shi: “A mianda ibakitshika naminyi kuakua? Ndungule namu.” Aye nkumualula’shi: “Bantu babasuuku ngoshi, na bebungi babaafu. Mpa na Saule na muana aaye Yonatane babaafu namu.” 5 Akupu Davide nkuipusha yawa nsongualume baadi mumutuadile mukandu’shi: “A bouku naminyi’shi Saule na Muana aaye Yonatane babaafu?” 6 Yawa nsongualume nkumualula’shi: “Nakidilanga ku muengie wa Ngilboa, namono Saule mmueme ku mulumbu waye, matempu na bantu abatambusha nfualasa babaadi abefubuila lubilo lubilo kuadi. 7 Pabaadi muialuule aye nkumona, bangitanyiine, ami nkuamba’shi: ‘Nnami uno.’ 8 Aye nkungipusha’shi: ‘A nnobe nnanyi?’ Ami nkumualula’shi: ‘Ne muina Amaleke.’ 9 Akupu aye nkundungula’shi: ‘Fika namu ongipee muanda ne mukalakashue bikile, anka nkiantala.’ 10 Biabia ami nkufika kuadi nkumuipaa, muanda naukanga’shi nta mulombene kupanda bu biayikalanga mupone mu nsenga mutapikie ngofu. Akupu, ami nkuata kifulu kiaye kia bufumu kikeele ku mutue waye na kikano kikeele ku mboko yaye, na nafiki nabio binobino kui Nfumuami.”

11 Paapa Davide nkusaana bilamba biaye, na bantu boso babaadi naye babakitshine namu nka biabia. 12 Abadidile abeele misaase i bukopo, abo nkuishidika mpa na ku kiolua bua Saule, bua muana aaye Yonatane, bua bantu ba Yehowa na bua nshibo ya Isalele, muanda babaadi bayipayibue ku lupete lua ngoshi.

13 Akupu, Davide nkuipusha yawa nsongualume baadi mumutuadile mukandu’shi: “A we a kunyi?” Aye nkumualula’shi: “Ne muana a muenyi muina Amaleke.” 14 Paapa Davide nkumuipusha’shi: “Buakinyi tue mutshine bua kuipaa muedibue muimu a Yehowa?” 15 Biabia Davide nkuitanyina umune a ku ba nsongualume baye, nkumulungula’shi: “Fika omuipee.” Yawa nkufika, na nkumuipaa. 16 Davide nkumulungula’shi: “Mase oobe e pa mbidi p’obe obe nabene, muanda buefundu p’obe kuakula’shi: ‘Ami nyi ipayile muedibue muimu a Yehowa.’”

17 Paapa Davide nkuyimba uno musambo wa maalo pabitale Saule na muana aaye Yonatane, 18 na batumine eyi bua’shi beulongieshe bantu ba mu Yunda. Wawa musambo wa maalo ubaadi na mutue wa muanda awamba’shi: “Buta,” na mbeufunde mu mukanda wa Jashare:

19 “Ô Isalele! Bantu bobe ba ntumbo babafuila ku miengie yobe.

Tala bibapono bantu be bukome mu ngoshi!

Na ngabo ya Saule, tayikii dingi yedibue muimu.

25 Tala bibapono bantu be bukome mu ngoshi!

Yonatane bafuila ku miengie yobe!

Kifulo kiobe kibodi mmufule, kibaadi buwa kukila kifulo kia bakashi.

2 Kunyima kua mafuku, Davide nkuipusha Yehowa’shi: “Ne kukaamina mu kushala mu kimune kia ku bibundi bia Yunda su?” Yehowa nkumualula’shi: “Oolo, we kukaamina.” Akupu Davide nkumuipusha’shi: “Nyende kuikunyi?” Aye nkumualula’shi: “Enda ku Ebrone.” 2 Biabia Davide nkuenda ku Ebrone na bakashi baye babidi, Akinoame a mu Izreele na Abigaile muina Karmele mukashi kilele a Nabale. 3 Davide bayile dingi na bantu babaadi nabo, muntu oso na ba mu nshibo yaye, abo nkukashala mu bibundi bifunyishe Ebrone. 4 Akupu bantu ba mu Yunda babafikile, abo nkuela Davide muimu kuakua bua kuikala bu nfumu a kisamba kia Yunda.

Babalunguile Davide’shi: “Bantu ba mu Yabeshe-gileade nyi bashiikie Saule.” 5 Biabia Davide nkutuma mukandu kui bantu ba mu Yabeshe-gileade na nkuibalungula’shi: “Yehowa enuelele miabi, muanda nui baleshe nfumu eenu Saule kifulo kia lulamato p’anue kumushiika. 6 Yehowa enuleshe kifulo kia lulamato bua loso. Ami namu nakenulesha kalolo bua bino bianudi bakite. 7 Binobino kankamanayi na nunyingie mashimba, muanda nfumu eenu Saule bapu kufua, na bena kisamba kia Yunda mbangiele muimu bua’shi nekale bu nfumu aabo.”

8 Kadi Abnere muana a Nere nfumu a kiluilo kia Saule, batshile Ishiboshete muana a Saule, basabuka naye Yordane benda ku Mahanaime. 9 Bamutudile bua’shi ekale nfumu a bena Gileade, a bena Ashure, a Izreele, a Efraime, a Benyamine na a Isalele oso mushima. 10 Ishiboshete muana a Saule baadi na bipua 40 p’abafikile bu nfumu a Isalele, baadi mukunkushe munda mua bipua bibidi. Anka nshibo ya Yunda ibaadi ayikuatshishena Davide. 11 Davide baadi mukunkushe bu nfumu mu Ebrone munda mua bipua musambobidi na mieshi isamombo.

12 Muenda mafuku, Abnere muana a Nere na bafubi ba Ishiboshete muana a Saule babakatukile ku Mahanaime abo nkuenda ku Gibeone. 13 Yoabe muana a Seruya na bafubi ba Davide babayile namu, abo nkukafumankana nabo kuishiba dia mema dia Gibeone; kisaka kimune kibaadi kimeene alu lupese lu’eshiba, na kingi namu alua lungi lupese lu’eshiba. 14 Nfudiilo a bioso, Abnere nkulungula Yoabe’shi: “Tadiila ba nsongualume batuukie balue ngoshi* kumpala kuetu.” Biabia Yoabe nkuakula’shi: “Bibuwa be kutuuka.” 15 Paapa babebuele muyile bungi bubaabadi batshibe. Ku bantu ba Ishiboshete muana a Saule, babasanguile bena Benyamine 12, ku lupese lua bafubi ba Davide, abo nkusangula bantu 12. 16 Abo nkuikuatena muntu na muinaye ku mutue, na oso a kuabadi nkukinkila muinaye lupete mu mbafu. Boso babaponene pamune mu nsenga abo nkufua. Nyi buakinyi yaaya mbalo i ku Gibeone babeyitanyine bu Elekate-azurime.

17 Ngoshi ibalondele mu diadia efuku dimune ibaadi bukopo bukile. Nfudiilo a bioso, bafubi ba Davide nkutshimuna Abnere na bena Isalele. 18 Aku namu, Yoabe, Abishai na Asahele, bana balume basatu ba Seruya babaadi paapa, na Asahele baadi asuku lubilo nka bu lukondolo lui mu mapia. 19 Asahele babangile kuibingena na Abnere kushii kuikumba ku mboko ibalume sunga ku mboko ibakashi. 20 Pabaadi Abnere muialule ku mongo, bayipuishe’shi: “Nnobe yawa Asahele?” Asahele nkumualula’shi: “Oolo nnami.” 21 Akupu, Abnere nkumulungula’shi: “Enda ku mboko yobe ibalume sunga ku mboko yobe ibakashi, okuate umune a ku ba nsongualume, omuate kioso kiomupete nakio bua’shi kikale kiobe.” Kadi Asahele tabalekiele kuibingena na Abnere nya. 22 Abnere nkulungula dingi Asahele’shi: “Leka kuibingena nami, buakinyi okumiina’shi nkuipee? Muanda su nakuipaa, nekala na buufu bua kutala mukuenu Yoabe.” 23 Anka Asahele tabalekiele kuibingena naye, paapa Abnere nkumukupila kitako kia mulumbu muifu, na kitako kia mulumbu nkumutubula, nkutuuka na ku mongo, baponene aye nkufua musango umune. Muntu oso baadi afiki pa mbalo ibaadi Asahele mufuile, baadi emana kapindi.

24 Akupu Yoabe na Abishai babayile mu kuibingena na Abnere. Pa kutuela kua nguba, babafikile pa ka muengie ka Ama ketalene na Giya muishinda adiende ku kabaaka ka Gibeone. 25 Kuakua, bena Benyamine babebungile pamune kunyima kua Abnere, abo nkukita kisaka kimune, na abo nkuimana ku nsongo kua ka muengie. 26 Paapa Abnere belele Yoabe musaase amuipusha’shi: “Lupete lua ngoshi alutungunuka’nka na kuipaa kushii kukooka su? T’ouku’shi nfudiilo a uno muanda ekala mukile bubi su? Otengiela mpa na ku nsaa kinyi bua kulungula bantu bua’shi balekie kuibingena na bakuabo?” 27 Paapa Yoabe nkumualula’shi: “Bu bikale binyibinyi Efile Mukulu a binyibinyi na muwa, su tue muakule, bantu babadia kuleka kuibingena na bakuabo nka ku namashika.” 28 Akupu, Yoabe nkudidisha mpungi, bantu baye nkuleka kuibingena na bena Isalele, na ngoshi nkuimana.

29 Abnere na bantu baye babatambukile mu Araba buabua bufuku bushima abo nkusabuka Yordane, n’abo nkukiila mu kibandabanda kioso kishima, nfudiilo a bioso abo nkufika mu Mahanaime. 30 P’abaadi Yoabe mualukiile mu kulonda Abnere, babungile bantu boso pamune, ku bafubi ba Davide kubaadi bafubi 19 babaadi bayipayibue kukatusha Asahele. 31 Kadi bafubi ba Davide babaadi batshimune bena Benyamine na bantu ba Abnere, abo nkuipaa bantu 360. 32 Babatshile Asahele, abo nkumushiika mu mashama a nshaye abaadi mu Beteleme. Akupu Yoabe na bantu baye babatambukile bufuku bushima, abo nkufika ku Ebrone pepi na bufuku kutoka.

3 Ngoshi ibaadi pankatshi pa nshibo ya Saule na nshibo ya Davide ibaadi nka ayitungunuka; Davide baadi anyisha kupeta bukome, anka nshibo ya Saule ibaadi nka ayende na kubofula.

2 Muenda mafuku, babatandiile Davide bana balume mu Ebrone, muana aaye mbedi baadi Amenone, abatandile na Akinoame a ku Izreele. 3 Muana aaye a kabidi baadi Kileabe, abatandile na Abigaile mukashi kilele a Nabale muina Karmele, muana a kasatu baadi Absalome, abatandile na Maaka muana mukashi a Talmayi nfumu a Geshure. 4 A kananka baadi Adoniya, muana a Agite, a katano baadi Shefatia, muana a Abitale. 5 A kasamombo baadi Itreame, ababatandile kui Egla ungi mukashi a Davide, babatandiile Davide bano bana boso mu Ebrone.

6 Pabaadi apatungunuka ngoshi ibaadi pankatshi pa nshibo ya Saule na nshibo ya Davide, Abnere baadi atungunuka na kunyingisha matalua aaye mu nshibo ya Saule. 7 Anka Saule baadi na ungi mukashi a ekupi, abaabadi abetanyina bu Rispa, muana a Aya. Dingi efuku Ishiboshete nkuipusha Abnere’shi: “Buakinyi we mulaale ekupi dia nshami?” 8 Paapa Abnere bakuatshile nsungu i bukopo bua aa mayi abakuile Ishiboshete na nkuamba’shi: “Ami ne mbua a mu nsenga ya Yunda su? Ne muleeshe kifulo kia lulamato kui nshibo ya nshobe Saule, kui bakuabo na kui ba kuuku baye mpa na lelo uno, na ntshi mukuluishishe pa kukupaana mu maasa mua Davide, kadi lelo uno onsambisha bua kilema kiandi mukite na mukashi? 9 Efile Mukulu annyokie ngofu su nakutua kukitshina Davide mianda nka bu bibaadi Yehowa muitshipe kuadi: 10 Bua kukatusha bufumu mu nshibo ya Saule, na kunyingisha nkuasa a bufumu a Davide mu Isalele na mu Yunda, kubanga ku Dane mpa na ku Beere-sheba.” 11 Paapa Ishiboshete tabaadi mualule Abnere muanda su ngumune, muanda baadi amutshinyi.

12 Musango umune Abnere nkutuma mikiendi kui Davide, aye nkuamba’shi: “A eumbo ndia nnanyi?” Aye nkukumbasha’shi: “Kita nami kilombeno, nakakitshi kioso kiandi mulombene kukita bua’shi bena Isalele boso bekale ku lupese lobe.” 13 Paapa Davide nkumualula’shi: “Bibuwa! Nakitshi nobe kilombeno. Kadi nakutekie kintu kimune, ontuadile Mikale muana mukashi a Saule, bisumanga topimanga kufika mu kummona.” 14 Akupu Davide nkutuma mikiendi kui Ishiboshete muana a Saule’shi: “Mpe mukashi ande Mikale, anaadi mubangile na minyonga* 100 ya bena Filistine.” 15 Paapa Ishiboshete batumine bantu buabadia nkamuata kui mulume aaye Paletiele muana a Laishe. 16 Kadi mulume aaye bamushindikiile, baadi adidi pabaadi ende na kumulonda mpa na ku Bakurime. Akupu Abnere nkumulungula’shi: “Alukiila kobe!” Aye nkualukiila.

17 Binyi biabia, Abnere batumine eyi kui bakulu ba Isalele’shi: “Takudi mafuku, anukiebanga’shi Davide ekale nfumu eenu. 18 Binobino ataayi kitshibilo, muanda Yehowa mmulungule Davide’shi: ‘Ku bukuashi bua mufubi ande Davide, nakapaasha muilo wande wa Isalele ku maasa kua bena Filistine, na ku maasa kua beshikuanyi babo boso.’” 19 Akupu Abnere nkuisamba na bena Benyamine, kunyima bayile dingi ku Ebrone bua kuisamba na Davide pa bupenka, bua kumulungula bibaadi Isalele na bena Benyamine boso bakumiine.

20 Pabaadi Abnere na bantu 20 bafikie ku Ebrone kui Davide, Davide baadi muibateekieshe madio akata. 21 Akupu, Abnere nkulungula Davide’shi: “Muanana nfumuami, ntadiile namu nyende, nkakubungile bena Isalele boso bua’shi bakite nobe kilombeno, biabia wekala nfumu kui bantu boso bokumiina.” Paapa Davide nkulekiela Abnere, aye nkuenda mu butaale.

22 Nka paapa, Yoabe na bafubi ba Davide babalukiile kubaabadi bakapaule bintu. Babafikile na bintu bibungi bibaabadi bakanyengie. Abnere baadi mupue kukatuka kui Davide ku Ebrone, muanda Davide baadi mumualushe mu butaale. 23 Pabafikile Yoabe na basalayi baye boso, babalunguile Yoabe’shi: “Abnere muana a Nere fikanga kui nfumu, na bamualusha, balukiila mu butaale.” 24 Biabia Yoabe nkutuela mui nfumu na nkumuipusha’shi: “A kibokitshi nkinyi? Abnere bafiki kodi, buakinyi bomulekiela bua’shi alukiile kushii muanda? 25 Aku namu ouku Abnere muana a Nere kalolo, fikile pano bua kukudimba, bua kuuka koso kuende na kioso kiokitshi.”

26 Biabia Yoabe bakatukile mui Davide, aye nkutuma bantu buabadia kulonda Abnere, babamupetele dia pa kiina kia kulamina mema kia Sira, abo nkualukila naye, kadi Davide tabaukanga muanda nya. 27 Pabaadi Abnere mualukile ku Ebrone, Yoabe bayile naye ku lupese dia ku kiibi kia kibundi buabadia kuisamba pabupenka. Anka kuakua, bamukinkiile lupete muifu, aye nkufua, bamuipayile muanda Abnere baadi muipee mukuabo Asahele. 28 Kunyima pabapushile Davide wawa muanda, bambile’shi: “Ami na bufumu buande, tatui n’ebaasa dia mase kumpala kua Yehowa bua Abnere muana a Nere bua loso. 29 Anka diadia ebaasa dikale pa mapampa pa Yoabe na bantu boso ba mu nshibo ya nshaye. Mafuku oso akuikala’nka muana mulume a mu kifuko kia Yoabe, e na mukumbo wa bintu abimutuku mu musua sunga e na nsudi, muana mulume muikale kishetshi sunga afu ku lupete lua ngoshi sunga shi na bia kudia.” 30 Biabia, Yoabe na mukuabo Abishai, babayipayile Abnere, muanda baadi muipee mukuabo Asahele mu ngoshi ku Gibeone.

31 Akupu, Davide nkulungula Yoabe na bantu boso babaadi nabo’shi: “Saanayi bilamba bienu, na nufuale ma mpaya, nudile Abnere.” Nfumu Davide nabene baadi alondo kunyima kua ka lusala kabaabadi batuadile kitanda. 32 Babashiikile Abnere ku Ebrone, na nfumu nkudila n’eyi di bukopo ku mashama a Abnere, muilo oso ubadidile namu. 33 Paapa, Nfumu bayimbile loono lua maalo bua Abnere, aye nkuamba’shi:

“Abnere baadia kufua lufu bu lua muntu shi na binangu su?

Aku namu bofu nka bu muntu abadi bayipee kui bantomboshi.”

Paapa, bantu boso babaabangile dingi kumudila.

35 Kunyima nka mu diadia efuku, pakubaadi kukii kutoka, bantu babafikile mu kupa Davide bia kudia bua kumusamba, anka Davide batshipile’shi: “Efile Mukulu annyokie ngofu su nadia kintu su nkimune kumpala kua nguba kutuela.” 36 Bantu boso babamuene wawa muanda, ao nkuibasankisha. Anka bu mianda yoso ibaadi nfumu akitshi, wawa muanda ubaadi usankishe bantu boso. 37 Biabia bantu boso mpa na Isalele mushima babaukile mu diadia efuku’shi, nta nfumu bayipayile Abnere muana a Nere nya. 38 Biabia nfumu balunguile bafubi baye’shi: “Tanuuku’shi mmukunkushi na mmuntu mukata bafu lelo uno mu Isalele su? 39 Lelo uno ne mubofule, sunga biekala’shi ne muedibue muimu bu nfumu, na bano bana ba Seruya be bukielo biabia. Yehowa afute muntu e bubi muyile bubi buaye.”

4 Pabaadi Ishiboshete muana a Saule mupushe’shi Abnere bafu ku Ebrone, bakutshile bukome,* na bena Isalele boso babaadi bakalakashue. 2 Kubaadi bantu babidi babaadi abakunkusha bisaka bia bantomboshi bia muana a Saule, umune babaadi abamuitanyina bu Baana, ungi namu bu Rekabe. Babaadi bana ba Rimone muina Berote a mu kisamba kia Benyamine. (Muanda kibundi kia Berote babaadi abekiata namu bu ki mu nsenga ya Benyamine. 3 Bena Berote babaadi basukile ku Gitaime, na mbashale kuakua bu benyi mpa na lelo uno.)

4 Aku namu Yonatane muana a Saule baadi na muana mulume baadi asumpikita. Baadi na bipua bitano pababafikile na mukandu aukatukila ku Izreele pabitale lufu lua Saule na Yonatane, muleshi aaye baadi mumusemune, aye nkusuuka naye, kadi pabaadi asuuku na moo, muana baadi mupone aye nkulemana. Babaadi abamuitanyina bu Mefiboshete.

5 Rekabe na Baana, bana ba Rimone muina Berote, babayile ku nshibo ya Ishiboshete mu kanya ke bukopo, babamusangene mmulale ayikisha mu nsaa ya midi. 6 Babatuelele mu nshibo yaye bu bantu abafiki mu kukimba ntete ya blé, akupu abo nkukupila Ishiboshete kintu muifu, na nkusuuka mu bufiefie. 7 Pabaabatuelele mu nshibo, babamupetele mmulale mu kadimbo kaye ka kulaala ku lusala, abo nkumukupila nkumuipaa, kunyima abo nkutshiba mutue waye. Akupu babatshile mutue waye, abo nkutambuka muishinda dia Araba bufuku bushima. 8 Babatuadile mutue wa Ishiboshete kui Davide mu Ebrone, na abo nkumulungula’shi: “Mutue wa Ishiboshete muana a Saule muishikuanyi oobe baadi akimbi kukuipaa biaudi’bi. Lelo uno Yehowa baobuela muanana nfumuetu kui Saule na bana baye.”

9 Biabia, Davide nkualula Rekabe na mukuabo Baana bana ba Rimone muina Berote’shi: “Bu bikale binyibinyi Yehowa na muwa, aye mumpaashe ku masaku oso, 10 pabaadi ungi muntu muntuadile mukandu’shi: ‘Saule bafu,’ bamuene’shi bantuadila mukandu wibuwa, kadi namukuatshile ami nkumuipaa ku Sikelage. Diadia nyi efuto dibapetele yawa muntu kuandi. 11 Kadi bi kuikala naminyi bua bantomboshi babayipaa muntu mululame e ku lusala mu nshibo yaye? Ntshi mulombene kuinunyoka muanda nubasumbula mase aaye, na kuinushimisha pa nsenga su?” 12 Paapa Davide batumine ba nsongualume baye bua kuibayipaa, abo nkutshiba maasa na ngua yabo, na nkuibapudika pepi n’eshiba dia mema mu Ebrone. Kadi babatshile mutue wa Ishiboshete abo nkuiushiika mu mashama a Abnere mu Ebrone.

5 Kunyima, bisamba bioso bia Isalele bibafikile kui Davide ku Ebrone biamulungula’shi: “Talanga! Ouku kalolo’shi tui mase* amune. 2 Mu mafuku ashale pabaadi Saule bu nfumu eetu, obe nyi baadi akunkusha Isalele mu ngoshi. Na Yehowa bakulunguile’shi: ‘Okalama muilo wande wa Isalele na okafiki nfumu mu Isalele.’” 3 Biabia bakulu boso ba Isalele, babafikile kui Nfumu Davide mu Ebrone, aye nkukita nabo kilombeno mu Ebrone kumpala kua Yehowa. Akupu abo nkuela Davide muimu bu nfumu a Isalele.

4 Davide bafikile bu nfumu pabaadi na bipua 30, aye nkumunana munda mua bipua 40. 5 Mu Ebrone, baadi mukunkushe Yunda munda mua bipua 7 na mieshi 6, na mu Yelusalema, baadi mukunkushe Isalele oso mushima na Yunda munda mua bipua 33. 6 Nfumu na bantu baye babayile mu Yelusalema bua kulua na bena Yebuse babaadi bashale muiumbo. Bena Yebuse babasepele Davide bamba’shi: “Tue mulombene kutuela muno! Sunga ba mpofu na bantu be na bilema mbalombene kukubinga.” Muanda babaadi abanangushena’shi: ‘Davide nta mulombene kutuela mu kibundi kiabo.’ 7 Anka Davide banyengiele kifuamino kia mu Siyona, kiabetamina binobino bu Kibundi kia Davide. 8 Biabia mu diadia efuku Davide bambile’shi: “Bantu abakalu na bena Yebuse, abitungu bayile mu eshinda dia mukola wa mema wabadi babundule, bua kukepaa bantu be na bilema na ba mpofu babadi bashikue kui Davide!” Nyi buakinyi abambaa’shi: “Ba mpofu na bantu be na bilema nta mbalombene kutuela mu nshibo.” 9 Biabia Davide bashalele mu kiakia kifuamino, kibabetanyine* kunyima bu Kibundi kia Davide. Davide nkubanga kuibaka ku mpese yakio yoso, kubanga ku ka muengie* mpa na munda. 10 Biabia Davide baadi nka anyisha kupeta bukome, na Yehowa Efile Mukulu a biluilo baadi naye.

11 Irame nfumu a Tiire batumine bantu kui Davide, aye nkumutumina dingi mabaya a mutshi wa cèdre, ba nsendue ba mabaya na bantu abatanyaa mabue bua kuibaka midimba, abo nkubanga kuibakila Davide nshibo. 12 Paapa Davide nkuuka’shi Yehowa baadi mumutuule binyibinyi bu nfumu a Isalele, na baadi mukaamishe bufumu buaye, pa muanda wa muilo Waye wa Isalele.

13 Kunyima kua kukatuka ku Ebrone, Davide batshile angi makupi, n’aye nkuibakila bangi bakashi mu Yelusalema, na abo nkutandila Davide bangi bana balume na bana bakashi. 14 Mashina a bana babaabadi bamutandile mu Yelusalema ngano: Shamua, Shobabe, Natane, Salomone, 15 Ibaare, Elishuwa, Nefege, Yafiya, 16 Elishama, Eliada na Elifelete.

17 Pabapushile bena Filistine’shi mbele Davide muimu bu nfumu a Isalele, bena Filistine boso babafikile mu kukimba Davide. Pabaadi Davide mupushe wawa muanda, bayile akafuama mu kifuamino. 18 Kunyima bena Filistine babafikile, abo nkupalakana Muibanda dia Bena Refa. 19 Davide nkuipusha Yehowa’shi: “Nyende nkalue na bena Filistine su? Webatuulu muiyasa diande?” Paapa Yehowa nkumulungula’shi: “Enda, muanda natuulu binyibinyi bena Filistine muiyasa diobe.” 20 Biabia, Davide bayile ku Baale-perazime, aye nkuibayipaa kuanka. Paapa bambile’shi: “Yehowa banshituila eshinda munkatshi mua beshikuanyi bande, anka bu mema e mpumo ababumbula mumba.” Nyi buakinyi bayitanyine yaaya mbalo bu Baale-perazime. 21 Bena Filistine nkuleka ma nkishi aabo kuakua, na Davide na bantu baye nkuiata nkuenda nao.

22 Kunyima bena Filistine babafikile dingi abo nkupalakana Muibanda dia Bena Refa. 23 Paapa Davide nkuipusha Yehowa, anka Aye nkumualula’shi: “Tuebatukanga ngoshi musango umune, anka ebefunye ku mongo, otuukile mu mitshi ya Baka. 24 Na p’okapusha tuleo bu tuleo tua bantu abatambuka atutukila kunundu kua mitshi ya baka, paapa okite mianda n’eshimba dinyingie, muanda Yehowa ekala mukile kumpala kobe bua kuipaa kiluilo kia bena Filistine.” 25 Biabia Davide bakitshine’nka bibaadi Yehowa mumulungule bua kukita, aye nkuipaa bena Filistine, kukatukila ku Geba mpa na ku Gezere.

6 Dingi Davide babungile basalayi boso ba mu Isalele abauku kulua ngoshi, babaadi bana balume 30 000. 2 Paapa Davide na bantu boso babaadi nabo babatuelele muishinda, benda batadiile ku Baale-yunda bua kukata Mushete wa Efile Mukulu a binyibinyi, kumpala kua wawa Mushete nyi kubaadi bantu abetanyina eshina dia Yehowa a biluilo, aye mushale mu nkuasa a bufumu kunundu* kua bakeluba. 3 Anka babatuudile Mushete wa Efile Mukulu a binyibinyi ku etempu dipia, bua kuiukatusha mu nshibo ya Abinadabe ibaadi pa ka muengie. Uza na Akiyo bana balume ba Abinadabe babaadi abakunkusha diadia etempu dipia.

4 Paapa, babakatushile Mushete wa Efile Mukulu a binyibinyi ku nshibo ya Abinadabe ibaadi pa ka muengie, na Akiyo baadi atambuka kumpala kuao. 5 Davide na bantu boso ba mu nshibo ya Isalele, babaadi abasanka kumpala kua Yehowa na biombuanga bia mishindo yoso, bikitshibue na mabaya a mitshi ya jenevriye, lusese, bingi biombuanga bia mioshi, matumba, masaka na sembale. 6 Kadi pabaabafikile pa mbalo ya kukupiila ntete ya Nakone, ngombe ibakiebele kuponesha Mushete wa Efile Mukulu a binyibinyi, biabia Uza nkoola eyasa diaye nkuiukuata. 7 Paapa nsungu ya Yehowa nkutembela Uza, n’Efile Mukulu a binyibinyi nkumuipaa nka mu yaaya mbalo, muanda bakutshile kanemo kui Efile Mukulu, aye nkufuila nka paapa, pepi na Mushete wa Efile Mukulu a binyibinyi. 8 Kadi Davide bakuatshile nsungu, muanda nsungu ya Yehowa ibukopo ibaadi itembele Uza. Abayitanyinaa yaaya mbalo bu Pereze-uza mpa na lelo. 9 Diadia efuku, Davide batshinyine Yehowa ngofu, aye nkuamba’shi: “A Mushete wa Yehowa wi kufika kuandi naminyi?” 10 Davide tabaadi dingi mukumiine bua kuenda na Mushete wa Yehowa ku kibundi kia Davide kubaadi mushale. Pamutue pa biabia, baadi mukeutudishe mu nshibo mua Obede-edome muina Gate.

11 Mushete wa Yehowa ubashalele mu nshibo ya Obede-edome muina Gate munda mua mieshi isatu, na Yehowa baadi nka elela Obede-edome na ba mu nshibo yaye yoso miabi. 12 Babalunguile nfumu Davide’shi: “Yehowa kuete kuelela nshibo ya Obede-edome na bintu biaye bioso miabi, muanda Mushete wa Efile Mukulu a binyibinyi wi muaye.” Biabia Davide bayile mu kuata Mushete wa Efile Mukulu a binyibinyi mu nshibo mua Obede-edome, aye nkuiusemusha bua kuenda nao mu Kibundi kia Davide, bantu boso babaadi na muloo wibungi. 13 Pabaadi bantu babaadi basemune Mushete wa Yehowa beele matabula asamombo, Davide balambuile ngombe mulume na nyema munune.

14 Davide baadi ashi masha, na baadi efunyu na bukome buaye boso kumpala kua Yehowa, yaaya nsaa Davide baadi mufuale kilamba kia efode kia lin. 15 Davide na bantu boso ba mu nshibo ya Isalele babatuadile Mushete wa Yehowa, abende na kuela tukundakunda tua muloo pamune na kudila kua lusengua. 16 Kadi pabafikile Mushete wa Yehowa mu Kibundi kia Davide, Mikale muana mukashi a Saule batadile kuididishi, aye nkumona nfumu Davide etumbu na kusha na kuifunya kumpala kua Yehowa, paapa aye nkubanga kumubepuula muishimba diaye. 17 Biabia babafikile na Mushete wa Yehowa, abo nkuiutuula pa mbalo yao, munda mua kashibo k’epema kabaadi Davide muiukitshine. Akupu, Davide balambuile milambu ya kushiika kaalo na milambu ya butaale kumpala kua Yehowa. 18 Pabapuile Davide kulambula milambu ya kushiika kaalo na milambu ya butaale, belele muilo miabi muishina dia Yehowa a biluilo. 19 Akupu, baadi muabile muilo oso, kibumbu kioso kishima kia Isalele, bana balume na bana bakashi, muntu oso mukate wi bu nkata, ka mukate kakitshibue na tukuba tua date na ka mukate kakitshibue na tukuba tua nfinyo tuume. Akupu bantu boso nkualukila, muntu oso ku nshibo yaye.

20 Pabalukile Davide kuaye bua kuelela ba mu nshibo yaye miabi, Mikale muana a Saule bafikile mu kufumankana naye. Aye nkuamba’shi: “Nfumu a Isalele bepelesha lelo, p’aye kufuula bilamba kumpala kua bapika bakashi ba bafubi baye, nka bu bilombene kukita muntu shi na binangu!” 21 Paapa Davide balunguile Mikale’shi: “Nasankanga kumpala kua Yehowa aye baadi munsangule pamutue pa nshobe na ba mu nshibo yaye yoso, na baadi muntuule bu mukunkushi a muilo wa Yehowa wa Isalele. Nyi buakinyi nasanka kumpala kua Yehowa. 22 Na neyisha’nyi bikile mpa na paapa na kunyisha’nyi kuipeelesha ku meso kuande ami nabene. Kadi bua bapika bakashi bobokula, abo nyi abakantumbisha.” 23 Biabia Mikale muana a Saule tabatandile muana su ngumune mpa na ku lufu luaye.

7 Pabaadi nfumu mupue kushala mu nshibo yaye, na Yehowa amupa butaale kui beshikuanyi baye boso babaadi bamuifunyishe, 2 paapa nfumu Davide balunguile mutemuki Natane’shi: “Talanga, ami ngiu ne mushale mu nshibo ikitshibue na mabaya a cèdre, aku namu Mushete w’Efile Mukulu a binyibinyi ngushale mu bilamba bia mapema.” 3 Paapa Natane nkumulungula’shi: “Enda okakite kioso ki muishimba diobe, muanda Yehowa e nobe.”

4 Mu buabua bufuku, eyi dia Yehowa dibafikile kui Natane diamulungula’shi: 5 “Enda okalungule mufubi ande Davide’shi: ‘Yehowa amba’shi: “Obe nyi angibakila nshibo yandia kushala su? 6 Muanda ntambandile kushala mu nshibo kubanga mu efuku dinatushile muilo wa Isalele mu Ejipitu mpa na lelo uno, kadi nadi nende aku na aku mu nshibo ya epema na mu tabernakele. 7 Munda mua mafuku oso anaadi nende na bena Isalele boso, tanalunguile umune a ku ba nfumu ba bisamba bia bena Isalele banaadi mutuule bua kulama muilo wande’shi: ‘Buakinyi tue mungibakile nshibo ya mabaya a cèdre?’”’ 8 Biabia, olungule mufubi ande Davide’shi: ‘Yehowa a biluilo amba bino: “Naadi mukuate mu mapia muboodi olama mikooko, bua’shi ofikie mukunkushi a muilo wande wa Isalele. 9 Nekala nobe koso kuende, na nakakatusha beshikuanyi bobe boso kumpala kobe, nakakitshi bia’shi eshina diobe diende nkumo nka bu mashina a bantu bakata ba pa nsenga. 10 Nakasangula mbalo bua muilo wande wa Isalele na nebatuule muanka, abakemushala kushii muntu a kuibakalakasha dingi, na bantu bebubi tabakebakiengiesha’nyi dingi bu mu mafuku a kala, 11 kubanga mu mafuku anaadi mutule ba nsushi bua kukunkusha muilo wande wa Isalele. Nakakupa butaale kui beshikuanyi bobe boso.

“‘“Yehowa mmukulungule dingi’shi, Yehowa akakuibakila nshibo. 12 Apakafiki mafuku oobe ku nfudiilo, na p’okalala bua kuikisha na ba nkambua bobe, paapa nakebuesha lutandua* lobe kunyima kobe, kuamba’shi muana oobe, na nakanyingisha bufumu buaye. 13 Aye nyi akebaka nshibo bua eshina diande, na nakanyingisha nkuasa a bufumu buaye bua loso. 14 Nakekala nshaye, aye namu akekala muana ande. P’akitshi bibubi, nakamuludika* na namunyoko na nfimbo bu abikitaa bantu. 15 Ntakakatusha kifulo kiande kia lulamato kuadi, bu bianekeele muikikatushe kui Saule, yawa anaadi mukatushe kumpala kobe. 16 Nshibo yobe na bufumu bobe, abikala mu kukaluilua kumpala kobe bua loso. Nkuasa oobe a bufumu akanyingishibua bua loso.”’”

17 Natane nkulungula Davide ano mayi oso na kino kimonua kioso kibamuene.

18 Paapa Nfumu Davide bafikile, aye nkushala mu nsenga kumpala kua Yehowa, nkuakula’shi: “Ô Muanana Mukile Bukata Yehowa, ami ne’nyi? Na kifuko kiande ki kinyi bodia kuntuala kula kui biabia? 19 Kukatusha biabia, Ô Muanana Mukile Bukata Yehowa, we mundungule dingi’shi, kifuko kia mufubi oobe akikayisha ngofu mu mafuku e kumpala, na bino abikala bu muiya bua bantu boso, Ô Muanana Mukile Bukata Yehowa! 20 Ami mufubi oobe Davide ne kukulungula dingi kinyi bu bionguku kalolo kakile? Ô Muanana Mukile Bukata Yehowa! 21 We mukite ino mianda yoso ikata na we muiyifumbuile mufubi oobe mu kuipushena na eyi diobe, muanda nyi abikuminanga eshimba diobe. 22 Ô Muanana Mukile Bukata Yehowa, nyi buakinyi we mukata binyibinyi. Takui muntu su ngumune e biodi, na takui ungi Efile Mukulu, kukatusha nka penda obe. Mianda yoso yatudi bapushe ayibishinkamisha. 23 Na ngungi muilo kinyi wa pa nsenga wi bu muilo oobe wa Isalele? Efile Mukulu bayile, aye nkuibakuula bu muilo waye, baadi muukishe eshina diaye p’aye kuibakitshina mianda ikata na ya kukaanya. Bobingile bisamba na b’efile babo pa muanda wa muilo oobe, ubodi mukuule mu Ejipitu. 24 We mutuule muilo oobe wa Isalele bu muilo oobe’be nabene bua loso. Na obe Yehowa we mufikie bu Efile Mukulu aabo.

25 “Binobino Ô Yehowa Efile Mukulu, kumbasha namu mulayilo oobe odi mulee mufubi oobe na kifuko kiaye bua loso. Na okite namu nka bu biodi mulee. 26 Eshina diobe ditumbishibue bua loso, bua’shi bantu bakule’shi: ‘Yehowa a biluilo nyi Efile Mukulu bua Isalele, na kifuko kia mufubi oobe Davide kinyingishibue namu kumpala kobe. 27 Muanda obe Yehowa a biluilo, Efile Mukulu a Isalele, boodi mufumbuile mufubi oobe omulungula’shi: ‘Nakakuibakila nshibo.’ Nyi buakinyi mufubi oobe anyingi eshimba bua kukita luno luteko kodi. 28 Binobino, Ô Muanana Mukile Bukata Yehowa! We Efile Mukulu a binyibinyi, na mayi oobe nga binyibinyi, na we mulee mufubi oobe ino mianda i buwa. 29 Bikulongamine namu bua kuelela kifuko kia mufubi oobe miabi, na kitungunukie na kuikala kumpala kobe bua loso. Muanda obe Muanana Mukile Bukata Yehowa nyi muibilee, na kifuko kia mufubi oobe kiedibue namu miabi ayikatukila kodi bua loso.”

8 Kunyima kua mafuku, Davide baadi mutshimune bena Filistine, aye nkuibamuna, na Davide nkunyenga bena Filistine kibundi kia Metege-ama.

2 Baadi mutshimune dingi bena Moabe, aye nkuibaladisha paashi na nkuibapima na moshi. Baadi mupime bantu babaadi na kia kuipaa, abo nkutuuka bula bua mioshi ibidi, na bantu babaadi na kia kuleka na muwa, nkutuuka bula bua moshi umune. Biabia bena Moabe babafikile bena mudimo ba Davide, abo nkubanga kumupa milambu.

3 Davide nkutshimuna dingi Adadezere muana a Rehobe nfumu a ku Soba, pabaadi Adadezere ende ku musulo wa Efrate bua kukalushula matalua aaye. 4 Davide bakuatshile bantu ba Adadezere abatambushaa nfualasa 1 700 na basalayi 20 000 abatambukaa lua ngua. Na Davide nkutshiba mishila ya mu nkonyeno a mikoolo ya nfualasa yoso ibaadi ayikaka matempu, anka aye nkuleka nfualasa 100.

5 Pabaadi bena Siri ba ku Damase bafikie mu kukuasha Adadezere nfumu a ku Soba, Davide bayipayile bena Siri 22 000. 6 Kunyima, Davide batuudile bisaka bia basalayi mu Siri a Damase, na bena Siri babafikile bafubi ba Davide na babaadi abamupa milambu. Yehowa baadi akuasha Davide bua kutshimuna koso kuende. 7 Dingi, Davide batshile ngabo i bishengu ya ôlo ya basalayi ba Adadezere, aye nkuenda nayo ku Yelusalema. 8 Nfumu Davide batshile biamo bia munyinga bikile bungi mu Beta na mu Berota bibundi bia Adadezere.

9 Aku namu Nfumu Toyi a ku Amate bapushishe’shi Davide mmutshimune kiluilo kioso kia Adadezere. 10 Paapa Toyi batumine muana aaye Yorame kui Nfumu Davide bua’shi amuipushe biadi, na amutumbule bua biadi mulue na Adadezere amutshimuna. Muanda Adadezere baadi alu ngoshi na Toyi misango ibungi. Na Toyi batumiine Davide bintu bia arja, bia ôlo na bia kiamo kia munyinga. 11 Nfumu Davide baadi muibikashe bia kishila bua Yehowa, pamune na kiamo kia arja na ôlo bibaadi muikashe bia kishila, biabia bibaatshile ku bisamba bioso bibaadi mumune: 12 Bia mu Siri, bia mu Moabe, bena Amone, bena Filistine, bena Amaleke, na bia mu bintu bibaabanyengiele Adadezere muana a Rehobe nfumu a Soba. 13 Davide baadi mupete dingi nkumo ibungi pabaadi mualukie kubaadi mukayipee bena Edome 18 000 mu Ebanda dia Mungua. 14 Batuudile bisaka bia basalayi mu Edome na mu bibundi bioso bia Edome. Na bena Edome boso babafikile bafubi ba Davide. Yehowa baadi akuasha Davide bua kutshimuna koso kuende.

15 Davide baadi mutungunukie na kumunana mu Isalele oso mushima na baadi asambisha muilo waye oso na kululama. 16 Yoabe muana a Seruya baadi mukata a basalayi, Yeoshafate muana a Akilude baadi mufundi a mianda ya nfumu. 17 Zadoke muana a Akitube na Akimeleke muana a Abiatare babaadi ba tshite muakuidi, Selaya namu baadi mufundi. 18 Benaya muana a Yehoyada baadi mukata a bena Kerete na bena Pelete. Bana balume ba Davide babaadi na miasu ikata.*

9 Akupu Davide nkuipusha’shi: “Kukii muntu a mu nshibo ya Saule andi mulombene kulesha kifulo kia lulamato pa muanda wa Yonatane su?” 2 Binyi biabia kubaadi mufubi a mu nshibo ya Saule abetanyina bu Ziba. Davide nkumuitanyina, nkumuipusha’shi: “Nnobe Ziba su?” Aye nkualula’shi: “Oolo nfumuami, nami uno ami mufubi oobe.” 3 Nfumu nkumuipusha dingi’shi: “Kukii muntu a mu nshibo ya Saule, andi mulombene kulesha kifulo kia lulamato kia Efile Mukulu su?” Ziba nkumualula’shi: “Kui muana mulume a Yonatane mushale, e na kilema ku mikolo yoso ibidi.” 4 Nfumu nkumuipusha dingi’shi: “E kunyi?” Ziba nkumualula’shi: “E kua Makire muana a Amiele ku Lo-debare.”

5 Nfumu Davide batumine bantu musango umune bua’shi bakamuate kua Makire muana a Amiele ku Lo-debare. 6 Pabaadi Mefiboshete muana a Yonatane muikulu a Saule mufikie kui Davide, bakunamine eela mpala paashi. Paapa Davide bamuitanyine’shi : “Mefiboshete!” Aye nkualula’shi: “Nnami uno, ami mufubi oobe.” 7 Davide bamulunguile’shi: “Totshinanga, muanda nakulesha binyibinyi kifulo kia lulamato pa muanda wa nshobe Yonatane. Nakualuisha nsenga yoso ya Saule nshobe-kulu, na wekala odiila ku mesa ande mafuku oso.”

8 Paapa bayinamine aye nkuamba’shi: “A’mi mufubi oobe ne’nyi, bua’shi otume binangu biobe kui mbua mufue bu’mi?” 9 Biabia, nfumu bayitanyishe Ziba mufubi a Saule amulungula’shi: “Bintu bioso bibaadi bia Saule na ba mu nshibo muaye boso, nebipa muikulu a nfumu oobe. 10 Okamudimina nsenga yaye, obe na bana bobe balume na bafubi bobe, na anukaumbula bintu bioso biayitusha bua kudisha bantu ba mu kifuko kia muikulu a nfumu oobe. Kadi Mefiboshete muikulu a nfumu oobe, ekala adiila ku mesa ande mafuku oso.”

Binyi biabia, Ziba baadi na bana 15 na bafubi 20. 11 Paapa Ziba balunguile nfumu’shi: “Ami mufubi oobe, nakitshi mianda yoso yabandungula kui nfumuami bua kukita.” Biabia Mefiboshete baadi adi ku mesa a Davide, nka bu umune a ku bana ba nfumu. 12 Mefiboshete baadi dingi na muana mulume ki mukinga, abetanyina bu Mika. Na bantu boso ba mu nshibo ya Ziba babafikile bafubi ba Mefiboshete. 13 Mefiboshete bashalele mu Yelusalema, muanda baadi adiila ku mesa a nfumu mafuku oso. Baadi na kilema ku mikolo yoso ibidi.

10 Kunyima, nfumu a bena Amone bafuile, na muana aaye Anune nkufika nfumu pa mbalo yaye. 2 Paapa Davide nkuamba’shi: “Nalesha Anune muana a Nakashe kifulo kia lulamato, anka bu bibaadi nshaye mundeshe namu kifulo kia lulamato.” Biabia Davide nkutuma bafubi baye, buabadia kumusamba bua lufu lua nshaye. Kadi pabafikile bafubi ba Davide mu nsenga ya bena Amone, 3 bakunkushi ba bena Amone babalunguile Anune nfumu aabo’shi: “Omono’shi Davide nkinemo kiapa nshobe, p’aye kutuma bantu buabadia kukusamba su? T’omono’shi batumu bafubi baye bua kuuka bi kibundi na kuikitalula kalolo, bua kumona bia kufika mu kuikiponesha?” 4 Biabia Anune bakuatshile bafubi ba Davide, aye nkuibakuula miefu kipindi, nkutshiba bilamba biabo nyaa na ku matako, akupu aye nkuibabinga. 5 Pababalunguile Davide wawa muanda, batumine bantu musango umune buabadia kufumankana nabo, muanda babaadi bebayishe milongo ngofu. Nfumu Davide nkuibalungula’shi: “Shalayi mu Yeriko mpa nka na apamene miefu yenu, akupu nualukiile.”

6 Kunyima kua mafuku bena Amone babamuene’shi babafiki bu kintu ki butete kui Davide, biabia bena Amone babatumine bantu buabadia kukafuta bena Siri ba ku Bete-rehobe, na bena Siri ba ku Soba buabadia kuibakuatshishena mu ngoshi. Babaadi basalayi 20 000 abatambukaa lua ngua. Nfumu a Maaka baadi na basalayi 1 000 na bantu 12 000 ba ku Ishetobe. 7 Pabaadi Davide mupushe wawa muanda, batumine Yoabe na kiluilo kioso kishima pamune na bilobo biaye bia ngoshi. 8 Bena Amone babatuukile, abo nkuilonga mu milongo bua kulua ngoshi ku kiibi kia kibundi. Yaaya nsaa, bena Siri ba ku Soba na ba ku Rehobe pamune na basalayi ba ku Ishetobe na ba ku Maaka, babaadi pa bupenka munkatshi a kipia.

9 Pabamuene Yoabe’shi basalayi ba beshikuanyi bakuete kuenda na kufika kuadi dia kumpala na kunyima, basanguile basalayi abauku kulua ngoshi kalolo ba mu Isalele, aye nkuibatuula mu milongo buabadia kulua ngoshi na bena Siri. 10 Baatshile basalayi babashadile, aye nkuibapa mukuabo Abishai bua’shi ebatuule mu milongo buabadia kulua na bena Amone. 11 Akupu Yoabe bambile’shi: “Su bena Siri babankidi bukome, abitungu ofikie ompashe, kadi su bena Amone babakukidi bukome, paapa ami namu nafiki nkupaashe. 12 Abitungu tuikale bakankamane na banyingie mashimba bua muilo wetu na bua bibundi bia Efile Mukulu eetu, na Yehowa namu akakitshi kiakia kibuwa ku meso kuaye.”

13 Paapa Yoabe na bantu baye babayile mu kulua na bena Siri, na bena Siri nkusuuka. 14 Pabaadi bena Amone bamone’shi bena Siri babasuuku, babaadi basuukie Abishai abo nkuenda mu kibundi. Kunyima kua biabia, Yoabe bakatukile kui bena Amone aye nkuenda ku Yelusalema.

15 Pabamuene bena Siri’shi bena Isalele babebatshimuna, babebungile dingi. 16 Paapa Adadezere baadi muitanyishe bena Siri ba ku nsenga ya Muela,* na abo nkufika ku Elame, Shobake nfumu a kiluilo kia Adadezere nyi baadi ebakunkusha.

17 Pababalunguile Davide uno muanda, babungile bena Isalele boso musango umune, abo nkusabuka Yordane bua kuenda ku Elame. Akupu bena Siri babelongiele mu milongo bua kulua ngoshi na Davide, na abo nkubanga kulua naye. 18 Kadi bena Siri babasuukile bena Isalele, Davide nkuipaa bena Siri 700 babaadi abatambusha matempu, na bantu babaadi abatambusha nfualasa 40 000, na bayipayile Shobake, nfumu a kiluilo kiabo kia ngoshi, aye nkufuila paapa. 19 Pabaadi ba nfumu boso na bafubi ba Adadezere bamone’shi babebatshimuna kui bena Isalele, babakitshine bukidibukidi kipuano kia butaale na bena Isalele, abo nkubanga kuibafubila. Bena Siri babaadi na moo wa kukuasha dingi bena Amone.

11 Ku mbangilo kua kipua, mu mafuku aendaa ba nfumu ku ngoshi, Davide batumine Yoabe na bafubi baye, na kiluilo kioso kia ngoshi kia bena Isalele buabadia kukabutula bena Amone, na abo nkuifunyisha Raba, anka Davide bashadile mu Yelusalema.

2 Dingi efuku ku kiolua, Davide babukile ku lusala luaye, na aye nkubanga kuifunya kunundu kua musaka* waye wa nshibo ya bufumu. Pabaadi kuakua kunundu, bamuene muana mukashi etumpu mema, yawa muana mukashi baadi buwa bukile. 3 Davide batumine muntu bua’shi akepushe bua kuuka yawa muana mukashi. Yawa muntu balukile amulungula’shi: “Nyi Bate-sheba muana a Eliame, mukashi a Uriya muina Ite.” 4 Paapa Davide batumine bantu buabadia kukamuata. Biabia Bate-sheba batuelele kuadi, Davide nkumulala. (Uno muanda ubakitshikile pabaadi Bate-sheba etoosha ku butete* buaye.) Kunyima kua biabia, balukile kuaye.

5 Bate-sheba bapetele eyimi, na aye nkutuma mukandu kui Davide’shi: “Ne na eyimi.” 6 Paapa Davide batumiine Yoabe mukandu’shi: “Tuma Uriya muina Ite kuno kuandi.” Yoabe nkutuma Uriya kui Davide. 7 Pabaadi Uriya mufikie kuadi, Davide bamuipuishe bibaadi Yoabe, bibaadi bisaka bia basalayi, na bibaadi ngoshi ayikitshika. 8 Paapa Davide balunguile Uriya’shi: “Enda kobe okayikishe.”* Pabatuukile Uriya mu nshibo ya nfumu, babamulondele na kia buntu* kia kalolo kia kui nfumu. 9 Anka Uriya baladile ku kituelelo kia nshibo ya nfumu na bangi bafubi boso ba nfumuaye, tabalukiile kuaye ku nshibo nya. 10 Biabia babalunguile Davide’shi: “Uriya ta muende kuaye nya.” Paapa Davide nkuipusha Uriya’shi: “Bokatuka ku luendo lula, buakinyi tue muende kobe?” 11 Uriya nkualula Davide’shi: “Mushete, na bena Isalele na bena Yunda, mbashale mu tushibo tua mapema, nfumuami Yoabe na bafubi ba nfumuami mbashale mu mapia. Biabia buakinyi ne kuenda kuande bua kudia na kutoma na kulala mukashi ande? Bu biodi binyibinyi na muwa, netshipi’shi, nta kukita muanda wi biabia nya!”

12 Paapa Davide balunguile Uriya’shi: “Shala pano dingi lelo uno, maloba nankutadiila wende.” Biabia Uriya bashalele mu Yelusalema diadia efuku, n’efuku dibalondele. 13 Kunyima Davide bamuitanyishe bua’shi afikie mu kudia na kutoma naye, n’aye nkumukoluesha malofu. Kadi ku kiolua, bayile mu kulala pamune na bafubi ba nfumuaye, anka tabayile mu kulala kuaye ku nshibo nya. 14 Ku namashika, Davide bafundiile Yoabe mukanda, aye nkuiutuma na Uriya. 15 Mu wawa mukanda baadi mufunde’shi: “Tuula Uriya mu mulongo wa kumpala, mbalo i ngoshi i bukopo. Akupu walukie kunyima, omulekie bua’shi bamuipee.”

16 Yoabe baadi auku kibundi kalolo, na batuudile Uriya mu mbalo ibaadi auku’shi ibaadi bilobo bia ngoshi bia beshikuanyi. 17 Pabaadi bantu ba mu kibundi batukie bua kulua na Yoabe, bangi ba ku bafubi ba Davide babafuile, na Uriya muina Ite baadi mu baba bantu. 18 Paapa Yoabe nkutumina Davide mukandu, bua kumulungula mianda yoso ibaadi ikitshikie ku ngoshi. 19 Balunguile muntu bayile na mukandu’shi: “P’opudisha kulungula nfumu mianda yoso ikitshikie ku ngoshi, 20 nfumu mmulombene kukuata nsungu, na akulungula’shi: ‘Buakinyi nui besesele pepi na kibundi biabia bua kulua ngoshi? T’anukanga’shi babaadia kuinuasa mikietue dia kunundu kua kimano? 21 Nnanyi bayipayile Abimeleke muana a Yerubeshete? Ta mmuana mukashi a ku Tebese bamuashile ebue dia mpelua kukatukila kunundu kua kimano su? Biabia buakinyi nuikeele beseesele pepi na kimano? Paapa omulungule’shi: ‘Mufubi oobe Uriya muina Ite mmufue n’aye namu.’”

22 Yawa muntu bayile, aye nkulungula Davide mianda yoso ibaadi Yoabe mumutume bua kumulungula. 23 Akupu, yawa muntu nkulungula Davide’shi: “Bantu babo betukidile bukome, na batuukile bua kulua netu mu mapia. Kadi tuibabingile mpa na ku kituelelo kia kiibi kia kibundi. 24 Beedi ba mikietue abaasanga bafubi bobe mikietue kukatukila kunundu kua kimano, na bangi bafubi bobe mbafue, mpa na mufubi oobe Uriya muina Ite mmufue namu.” 25 Paapa Davide nkulungula yawa muntu bafikile na mukandu’shi: “Enda okalungule Yoabe bino: ‘Uno muanda taukukalakashanga nya, muanda lupete lua ngoshi aluipaa muntu oso kushii kusangula. Nyingishayi ngoshi bua’shi nunyengie kiakia kibundi.’ Akupu onyingishe Yoabe.”

26 Pabaadi mukashi a Uriya mupushe’shi mulume aaye bafu, babangile kudila mulume aaye. 27 Musango umune pabapuile kipungo kia maalo, Davide batumine bantu buabadia kukaata Bate-sheba, na abo nkufika naye kuaye ku nshibo, aye nkufika mukashi aaye, n’aye nkumutandila muana mulume. Kadi biabia bibaadi Davide mukite bibaadi bibubi ngofu ku meso kua Yehowa.

12 Biabia Yehowa nkutuma Natane kui Davide. Batuelele muadi aye nkumulungula’shi: “Kubaadi bantu babidi mu kingi kibundi, umune mpeta na ungi mulanda. 2 Yawa baadi mpeta, baadi na mikooko ikile ibungi na ngombe; 3 kadi yawa muntu mulanda tabaadi na kintu nya, baadi penda na kana ka mukooko kakashi kapela kabaadi muule. Baadi ekalama, na kabakudile kuaye pamune na bana baye. Kabaadi akadi biakudia biaye bipela bibaadi nabio, na kutoma mu kipulu kiaye, na kabaadi akalala mu maboko aaye. Kabafikile nka bu muana aaye mukashi. 4 Dingi efuku yawa mpeta bapetele muenyi, kadi, pamutue pa kuata umune wa ku mikooko yaye sunga ngombe bua kutekiela yawa muenyi kidibua, bakatshile kana ka mukooko ka yawa muntu mulanda bua kuteekiela yawa muntu bafikile kuaye.”

5 Paapa Davide nkukuatshila yawa muntu nsungu ibukopo, na nkulungula Natane’shi: “Bu bikale binyibinyi Yehowa na muwa, muntu mukite biabia mmulombene lufu! 6 Na abitungu afute misango inanka yawa muana a mukooko, muanda bibakitshi tabilesha lusa nya.”

7 Paapa Natane nkulungula Davide’shi: “Yawa muntu nnobe! Yehowa Efile Mukulu a Isalele akula’shi: ‘Naadi mukuele muimu bua’shi wekale nfumu a Isalele, na nakupashile ku maasa kua Saule. 8 Nakimbanga kukupa nshibo ya nfumu oobe, na kukupa bakashi ba nfumu oobe, na ne mukupe nshibo ya Isalele na ya Yunda. Su biabia tabikalanga bikukumbane, nakimbanga dingi kukupa bingi bintu bibungi. 9 Biabia buakinyi we musabuule eyi dia Yehowa, p’obe kukita mianda ibubi ku meso kuaye? We muipee Uriya muina Ite na lupete lua ngoshi, akupu buata mukashi aaye bua’shi ekale mukashi oobe kunyima k’obe kuipaa mulume aaye na lupete lua ngoshi lua bena Amone. 10 Binobino, lupete lua ngoshi t’alukakatuka mu nshibo yobe nya, muanda bonsabuula p’obe kuata mukashi a Uriya muina Ite bua’shi ekale mukashi oobe.’ 11 Yehowa amba’shi: ‘Nakakufuishisha malua aatukila mu nshibo yobe obe nabene. Na nakaata bakashi bobe, nebape ungi muntu* mu meso mobe, na akebalala mu kanya elangalanga. 12 Obe we mukite uno muanda mu bufiefie, anka ami, nakeukitshi mu meso mua bena Isalele boso na mu kanya elangalanga.’”

13 Paapa Davide balunguile Natane’shi: “Ne mukitshine Yehowa muluisho.” Natane baluluile Davide’shi: “Yehowa namu bakufuila lusa bua muluisho oobe, t’ofu nya. 14 Sunga mbiabia, bu biodi mukutue kanemo kakata kui Yehowa mu uno muanda, muana ababakatuka mu kukutandila afu binyibinyi.”

15 Akupu, Natane balukile kuaye ku nshibo.

Na Yehowa babangile kukumbisha muana baadi mukashi a Uriya mutandile Davide. 16 Davide nkuisendeela Efile Mukulu a binyibinyi bua muana. Davide tabaadi adi kintu su nkimune, p’abaadi alukila kuaye, baadi alala bufuku bushima nka mu nsenga. 17 Biabia bakulu ba mu nshibo yaye babafikile mu kuimana pepi naye, abo nkutompa kumuibuesha mu nsenga, kadi baadi apele, na tabaadi akiebe kudia nabo nya. 18 Muifuku dia musambobidi, muana bafuile, kadi bafubi ba Davide babaadi abatshinyi bua kumulungula’shi muana baafu. Babaadi abamba’shi: “P’ekeele muana na muwa tumulunguile, anka ta muituteemeshe. Binobino su tuamulungula’shi muana baafu, mulombene kukita muanda wibubi.”

19 Pabaadi Davide mumone’shi bafubi baye bakuete kuunauna, baukile’shi muana bapu kufua. Davide nkuibepusha’shi: “Muana bapu kufua su?” Abo nkumualula’shi: “Oolo bapu kufua.” 20 Biabia Davide bebuele mu nsenga, aye nkuitumpa mema, nkuifikinya muimu, nkushintuula bilamba, na aye nkuenda ku nshibo ya Yehowa, aye nkukupila mpala paashi. Kunyima balukile kuaye ku nshibo, aye nkuteka bua’shi bamupe bia kudia, aye nkudia. 21 Bafubi baye nkumuipusha’shi: “Buakinyi bokitshi biabia? P’ekeele muana na muwa, wekele muishidikie, na odilanga nka kudila, kadi nka muana kiafu, buebo, na bodi bia kudia.” 22 Bebaluluile’shi: “Apekalanga muana na muwa, n’eshidikanga na nadilanga, muanda nanangushenanga’shi: ‘Yehowa e kunfuila lusa na aleka muana na muwa.’ 23 Kadi binobino bu bibaapu kufua, buakinyi abitungu neshidikie dingi? Ne kumualusha na muwa su? Ami nakende kuadi, anka aye t’akalukila kuandi nya.”

24 Kunyima, Davide nkusamba mukashi aaye Bate-sheba. Batuelele kuadi, aye nkumulala. Muenda mafuku, Bate-sheba batandile muana mulume, Davide nkumudika bu Salomone.* Yehowa baadi mufule Salomone, 25 Nyi buakinyi batumine mutemuki Natane bua’shi bamudikie bu Yedidia* muanda Yehowa baadi mumufule.

26 Yoabe batungunukile na kulua ngoshi na kibundi kia Raba a bena Amone, na aye nkukuata kibundi kia bufumu. 27 Biabia Yoabe batumine mikiendi kui Davide amulungula’shi: “Ne mulue na kibundi kia Raba na ne mukuate kibundi kia mema.* 28 Binobino, bunga bisaka bia basalayi bishale, ofikie mu kuifunyisha kibundi, na wekikuate. Bisumanga, ami nyi akakuata kibundi, na abakantumbisha ami.”

29 Biabia Davide nkubunga bisaka bioso bia basalayi, aye nkuenda ku Raba, na nkulua na kibundi ngoshi, aye nkuikikuata. 30 Akupu batshile kifulu kia ntumbo kibaadi ku mutue wa Malekame, bushito buakio bubaadi bua ntalanta umune a ôlo, babaadi bekilengieshe na mabue a muulo, babekitudile ku mutue wa Davide. Davide batshile dingi bintu bikile bungi bibaabadi banyengie mu kiakia kibundi. 31 Batuadile dingi bantu babaadi mu kiakia kibundi, aye nkuibatula bua kukitanga midimo i bukopo ya kutanya mabue, kufuba na biamo bi maashi, tubengiele tua biamo, na kubula matafuadi. Bakitshine bino bua bibundi bioso bia bena Amone. Nfudiilo a bioso Davide balukile na basalayi baye boso mu Yelusalema.

13 Absalome muana a Davide baadi na mukuabo mukashi e buwa bukile abetanyinaa bu Tamare, na Amenone ungi muana a Davide bamutomene kifulo. 2 Amenone baadi mukalakashue bikata bua wawa muanda, aye nkubanga mpa na kukumba muanda wa mukuabo mukashi Tamare. Amenone tabaadi na mushindo wa kumukita kintu su nkimune, muanda baadi kamame. 3 Amenone baadi na kuuku aaye abetanyinaa bu Yehonadabe muana a Shimeya mukuabo na Davide, na Yehonadabe baadi na mayele akile. 4 Biabia Yehonadabe bayipuishe Amenone’shi: “Buakinyi obe muana a nfumu we mukalakashue ku namashika koso? Buakinyi tokumiina kundungula?” Paapa Amenone nkumualula’shi: “Ne mufule ngofu Tamare, mukuabo na mukuetu Absalome.” 5 Yehonadabe nkumualula’shi: “Lala ku lusala lobe, wedimbe bu muntu e na maladi. Apafiki nshobe mu kukutala, omulungule’shi: ‘Kumiina namu bua’shi mukuetu mukashi Tamare afikie, ampe bia kudia. Su bateekie mu meso muande bia kudia biabapaa muntu akumbu, nebidiila kuiyasa diaye.’”

6 Biabia Amenone baladile ku lusala, aye nkuidimba maladi, na nfumu bafikile mu kumumona. Amenone nkumulungula’shi: “Kumiina namu bua’shi mukuetu mukashi Tamare afikie, ankitshine mu meso muande tu mikate tubidi tui bu eshimba, bua’shi netudiile mu maasa muaye.” 7 Paapa Davide batumine mukandu ku nshibo kui Tamare amulungula’shi: “Enda namu kua mukuenu mulume Amenone, omutekiele bia kudia.” 8 Biabia Tamare bayile kua mukuabo Amenone kubaadi mulale. Batshile musabu wa bukula, aye nkuiufunta, nkukita tu mikate mu meso muaye, aye nkuituteeka. 9 Akupu batshile mpano, aye nkumupa tuanka. Kadi Amenone bapelele kudia, aye nkuamba’shi: “Bantu boso batuukie paasha!” Biabia bantu boso babatuukile.

10 Paapa Amenone balunguile Tamare’shi: “Fika na bia kudia mu kadimbo ka kulala, bua’shi nebidiile ku maasa kobe.” Biabia Tamare batshile tu mikate tubakitshine tui bu eshimba, nkuitutuadila mukuabo mulume Amenone mu kadimbo ka kulala. 11 Pabamutuadiile tuanka bua kudia, bamukuatshile aye nkumulungula’shi: “Mukuetu mukashi, fika namu nkulale.” 12 Kadi Tamare nkumulungula’shi: “Nya mukuetu mulume! Tonkuatshishanga namu bufu, muanda wi bino taukitshikaa mu Isalele, tokitanga uno muanda wi bufu bino. 13 A ami namu ne kunyingiila bufu bui bino naminyi? Na obe namu, abakakumono bu muntu shi na muulo mu Isalele. Talanga, esambe namu na nfumu, takapele bua’shi ongate nya.” 14 Kadi Amenone bapelele kumuteemesha, aye nkumukila bukome, na nkumukuatshisha bufu pa kumulala pa bukopo. 15 Paapa Amenone babangile kushikua Tamare bikata, mu kipaso kia’shi mushikua ubaadi mumushikue, ubaadi bukopo kukila kifulo kibaadi mumufule. Aye nkumulungula’shi: “Ebue wende!” 16 Kadi Tamare nkumulungula’shi: “Nya mukuetu mulume, muanda kumbinga binobino kui bubi kukila na biabia bibonkitshi!” Kadi Amenone bapelele kumuteemesha.

17 Paapa Amenone bayitanyine nsongualume baadi amufubila, amulungula’shi: “Katusha uno muana mukashi kumpala kuande, akupu oshite ku kiibi.” 18 (Tamare baadi mufuale nkandio a pa buaye, muanda biabia nyi bilamba bibaabadi abafuala kui bana bakashi ba nfumu babaadi tumame.) Biabia mufubi a Amenone bamutushile paasha, aye nkushita ku kiibi. 19 Paapa Tamare beyelele buto mu mutue, aye nkusaana nkandio aaye e buwa abaadi mufuale, nkuitenteka maboko mu mutue, aye nkuenda na kudila eele misaase.

20 Paapa mukuabo Absalome nkumuipusha’shi: “Mukuenu mulume Amenone wekele naye nyi bakukitshi biabia? Binobino umiina mukuetu mukashi. Muanda aye mmukuenu mulume. Totulanga uno muanda kuishimba.” Akupu, Tamare bashalele pa bupenka mu nshibo ya mukuabo Absalome. 21 Pabapushile nfumu Davide ino mianda yoso, bafitshile munda ngofu. Kadi tabaadi akumiina kukita kintu su nkimune ki kuinyongosha muana aaye Amenone, muanda baadi mumufule na baadi muana aaye mbedi. 22 Absalome tabalunguile Amenone muanda su ngumune, biabikala wibuwa sunga wibubi. Absalome baadi mushikue Amenone muanda baadi mukuatshishe mukuabo mukashi Tamare bufu.

23 Kunyima kua bipua bibidi bishima, bantu babaadi abakuula buaa bua mikooko ya Absalome babaadi ku Baale-asore pepi na Efraime. Absalome nkuitanyisha bana boso ba nfumu. 24 Biabia Absalome bayile kui nfumu, aye nkumulungula’shi: “Mufubi oobe akuudisha buaa bua mikooko yaye. Nfumu na bafubi baye bakumiine namu kuenda nami.” 25 Kadi nfumu nkulungula Absalome’shi: “Nya muana ande, su atue boso tubende, atuikala bu bushito kodi.” Sunga biekala’shi baadi amushishikila, nfumu tabaadi mukumiine kuenda, anka baadi mumuelele miabi. 26 Akupu Absalome nkumulungula’shi: “Su obe tokumiina kuenda, kumiina namu bua’shi mukuetu Amenone ende netu.” Nfumu nkumuipusha’shi: “Buakinyi abitungu nka ende nobe?” 27 Kadi Absalome baadi mushishikile nfumu, biabia aye nkutuma Amenone na bangi bana ba nfumu boso.

28 Akupu Absalome nkulungula bafubi baye’shi: “Talayi kalolo, su nubamono’shi Amenone bakuatshika maalua, na nenulungula’shi: ‘Muipeyi!’ Paapa abitungu numuipee. Tanutshinanga, nnami benulungula. Nyingayi mashimba na nukankamane.” 29 Biabia bafubi ba Absalome babayipayile Amenone, nka bu bibaadi Absalome muibatumine eyi. Paapa, bangi bana boso ba nfumu babebuele, oso a kuabadi nkukaamina ku mpunda aaye, abo nkusuuka. 30 Pabaabadi bakii muishinda, mukandu ubakafikile kui Davide’shi: “Absalome bayipaa bana boso ba nfumu, takui su ngumune bapanda.” 31 Paapa nfumu nkuibua, nkusaana bilamba biaye, na aye nkulala mu nsenga, bafubi baye boso babaadi bemane pepi naye na bilamba biabo bisanukie.

32 Kadi Yehonadabe muana a Shimeya mukuabo na Davide bakuile’shi: “Nfumuami tanangushenanga’shi mbayipee bana boso ba nfumu, muanda nka penda Amenone nyi mufue. Absalome nyi tumine eyi bua kumuipaa, baadi muate kino kitshibilo kubanga muifuku dibaadi Amenone mukuatshishe mukuabo mukashi Tamare bufu. 33 Biabia, nfumuami tatulanga binangu ku mukandu wa’shi: ‘Bana boso ba nfumu babaafu.’ Nka penda Amenone nyi baafu.”

34 Mu yaaya nsaa, Absalome basuukile. Kunyima, mulami a kibundi babushishe meso, aye nkumona bantu bebungi babaadi abafiki muishinda dibaadi ku lupese lua muengie. 35 Paapa Yehonadabe balunguile nfumu’shi: “Talanga! Bana ba nfumu babalukila. Bibakitshika nka bu biankulunguile ami mufubi oobe.” 36 Pabaadi nka kiapudisha kuakula, bana ba nfumu babatuelele abafiki na kudila n’eyi di bukopo. Nfumu na bafubi baye boso bababangile kudila ngofu. 37 Kadi Absalome basuukile, aye nkuenda kui Talmayi muana a Amihude nfumu a mu Geshure. Davide badidile muana aaye munda mua mafuku e bungi. 38 Kunyima kua Absalome kusuuka na kuenda ku Geshure, bashalele kuakua bipua bisatu.

39 Nfudiilo a bioso, nfumu Davide bapushile lukalo lui bukopo lua kuenda mu kumona Absalome, muanda baadi mupue kusambibua bua lufu lua Amenone.

14 Paapa, Yoabe muana a Seruya bapushishe’shi nfumu e na lukalo lui bukopo lua kumona Absalome. 2 Biabia Yoabe batumine muntu ku Tekoa bua kuitanyina muana mukashi e na binangu bibungi, aye nkulungula yawa muana mukashi’shi: “Edimbe bu obe e mu maalo, na ofuale bilamba bia maalo, tueshinganga muimu nya. Kita nka bu obe e mu maalo a muntu mupue kufua takudi mafuku e bungi. 3 Akupu, wende okesambe na nfumu bino.” Paapa, Yoabe nkumulungula biadia kukaakula.

4 Yawa muana mukashi muina Tekoa, bayile kui nfumu, aye nkupona kuushi kua ngua yaye, nkukupila mpala paashi na nkuakula’shi: “Nfumuami nkuashe namu!” 5 Nfumu nkumualula’shi: “A muanda oobe wi naminyi?” Yawa muana mukashi nkumulungula’shi: “Ne mukashi kilele, mulume ande mmufue. 6 Ami mufubi oobe nekeele na bana balume babidi, dingi efuku, babaluile ngoshi mu kisuku. Takubaadi muntu a kuibasunga, umune nkukupila muinaye, nkumuipaa. 7 Binobino bena kifuko kiande boso babangibuela ami mufubi oobe, abandungula’shi: ‘Etupe yawa muana ipayile mukuabo bua’shi tumuipee, bua koobola lufu lua mukuabo aadi muipee, atumuipaa, sunga biekala’shi nnaye mpianyi!’ Aku namu su bakita biabia, abashimi ekala dimune diandi mushale nadio* aditembe, na abashimi eshina dia mulume ande na lutandua luaye pano pa nsenga.”

8 Paapa nfumu nkulungula yawa muana mukashi’shi: “Alukila kobe, natumu eyi pabitale muanda oobe.” 9 Biabia, yawa muana mukashi muina Tekoa balunguile nfumu’shi: “Ô muanana nfumuami, kilema kikale kuandi na kui nshibo ya nshami, anka nfumu na nkuasa aaye a bufumu bikale bishii na muanda.” 10 Nfumu bamulunguile’shi: “Su muntu akulungula ungi muanda, ofikie naye kuandi, paapa takukalakasha dingi nya.” 11 Kadi muana mukashi bambile’shi: “Nfumu atentekieshe namu Yehowa Efile Mukulu aaye, bua’shi muntu aobola mase, takitanga muanda wibubi, na ayipaa muana ande.” Nfumu nkumualula’shi: “Bu bikale binyibinyi Yehowa na muwa, lunyene su ndumune lua muana oobe talupono mu nsenga.” 12 Yawa muana mukashi bambile’shi: “Kumiina namu bua’shi ami mufubi oobe, ndungule namu nfumuami kishima kimune.” Biabia nfumu nkumulungula’shi: “Akula!”

13 Yawa muana mukashi nkuamba’shi: “Biabia, buakinyi we munangushene kukitshina muilo wa Efile Mukulu muanda wi biabia? Apakula nfumu bino, etopeka aye nabene, muanda nfumu tamualushe muana aaye aadi mubingie. 14 Atufu binyibinyi na atuikala’nka bu mema abadi bapongoole mu nsenga, abashii balombene kuata dingi. Anka Efile Mukulu tamulombene kushimisha muwa wa muntu, na akimbi tubingilo tua’shi, yawa muntu abadi babingie, tashalanga’nka mubingibue. 15 Nekalanga mufikie mu kulungula muanana nfumuami ino mianda, muanda bantu abekalanga bankuatshishe moo. Biabia ami mufubi oobe nkuamba’shi: ‘Mbande kuenda mu kuisamba na nfumu. Pangi nfumu mmulombene kulombasha abimutekie mpika aaye. 16 Nfumu e kuteemesha na apaasha mpika aaye ku eyasa dia muntu akiebe kunshimisha ami na muana ande penda umune bua kuitukutshisha bupianyi buabadi betupe kui Efile Mukulu.’ 17 Nyi buakinyi mufubi oobe ambile’shi: ‘Eyi dia muanana nfumuami dinyingishe,’ muanda muanana nfumuami e nka bu muikeyilu a Efile Mukulu a binyibinyi pabitale kushinguula kua kibuwa na kibubi. Yehowa Efile Mukulu oobe ekale nobe.”

18 Paapa nfumu nkualula yawa muana mukashi’shi: “Ndungule namu bioso biankuipusha, tonfuamishanga kintu su nkimune.” Muana mukashi nkumulungula’shi: “We kuakula muanana nfumuami.” 19 Nfumu nkumuipusha’shi: “Yoabe nyi mukulungule ino mianda yoso su?” Muana mukashi nkumualula’shi: “Ô muanana nfumuami! bu biodi binyibinyi na muwa, bi nka bu bibakula muanana nfumuami, mufubi oobe Yoabe nyi ndunguile bua kufika, na bua kuakula ano mayi oso. 20 Mufubi oobe Yoabe mmukite bino bua’shi oshintuule mueneno oobe a mianda, anka nfumuami e na binangu nka bu bia muikeyilu a Efile Mukulu a binyibinyi, na auku mianda yoso ayikitshika muiumbo.”

21 Paapa nfumu nkulungula Yoabe’shi: “Bibuwa, nakitshi biabia bibuakula, enda okafikie na Absalome.” 22 Paapa Yoabe bayinamine, nkukupila mpala mu nsenga na nkusaamuna nfumu. Yoabe nkuamba’shi: “Ô muanana nfumuami!lelo uno ami mufubi oobe nauku’shi ne mukuminyibue nobe, muanda nfumu bakitshi nka bu bibamutekie mufubi aaye.” 23 Akupu Yoabe bebuele, aye nkuenda ku Geshure nkufika na Absalome ku Yelusalema. 24 Kadi nfumu bambile’shi: “Alukiile kuaye, tafikanga mu kummona nya.” Biabia Absalome balukiile kuaye, kadi tabaadi muimonene na nfumu nya.

25 Binyi biabia, mu Isalele oso mushima takubaadi muntu su ngumune abaabadi abakaanyisha ngofu bua buwa buaye bu Absalome. Kubanga muushi mua luao luaye mpa na munkatshi mua mutue waye, tabaadi na kalema su nkamune. 26 Ku nfudiilo kua kipua kioso—baadi akuula nyene yaye muanda ibaadi ayimuele bushito—p’abaabadi abapimi bushito bua nyene yaye, ibaadi bushito bua shekele* 200 muyile ebue dia kupima nadio* dia nfumu. 27 Babaadi batandile Absalome bana balume basatu, na muana mukashi umune e n’eshina bu Tamare. Baadi mukashi e buwa biabia.

28 Biabia Absalome bashalele bipua bibidi bishima mu Yelusalema, anka tabaadi mumone nfumu nya. 29 Absalome bayitamine Yoabe buadia kumutuma kui nfumu, anka Yoabe tabaadi mukumine kufika kuadi. Bamuitanyine dingi musango wa kabidi, aye nkupela’nyi kufika kuadi. 30 Nfudiilo a bioso Absalome balunguile bafubi baye’shi: “Efuba dia Yoabe di pepi na diande, na orje yaye i muanka. Biabia, endayi nukediele kaalo.” Bafubi ba Absalome nkuenda, nkuela efuba dia Yoaba kaalo. 31 Paapa Yoabe bebuele, aye nkuenda kua Absalome nkumuipusha’shi: “Buakinyi bafubi bobe babeele efuba diande kaalo?” 32 Absalome nkualula Yoabe’shi: “Talanga, nkutumiine mukandu wa’shi: ‘Fika nkutume kui nfumu bua’shi omuipushe’shi: “Buakinyi ne mukatukie ku Geshure? Bibaadia kuikala buwa su nadia kuikala mushale kuakua. Binobino, nakiebe kuimonena na nfumu, su ne musoole muanda, mmulombene kungipaa.”’”

33 Biabia Yoabe bayile kui nfumu na aye nkumulungula uno muanda. Akupu nfumu bayitanyine Absalome, pabafikile Absalome kui nfumu, baadi muyiname kumpala kuaye, aye nkukupila mpala paashi kumpala kua nfumu, akupu nfumu banyine Absalome kiipa.

15 Kunyima kua ino mianda yoso, Absalome baadi mukitshishe etempu diaye, aye nkukimba nfualasa na bantu 50 babaadi abasuuku lubilo kumpala kuaye. 2 Absalome baadi abuuku ku namashika koso, akemana ku lupese lua eshinda dibaadi adiende ku kiibi kia kibundi. Pabaadi muntu oso yawa afiki na kilumbu bua’shi nfumu ekisambishe, Absalome baadi amuitanyina na kumulungula’shi: “A we a mu kibundi kinyi?” Yawa muntu baadi amualula’shi: “Mufubi oobe nga mu kimune kia mu bisamba bia Isalele.” 3 Absalome baadi alungula yawa muntu’shi: “Talanga, kilumbu kiobe ki buwa na akipushika, kadi nfumu ta muate mpango bua’shi kuikale muntu a kuteemesha kilumbu kiobe.” 4 Akupu Absalome baadi akula’shi: “Su babaadia kuikala bantuule bu nsushi mu eumbo baboo! Muntu oso e na kilumbu kiaye badia kufika kuandi, na nadia kukita bia’shi bekisambishe na kululama.”

5 Pabaadi muntu eseesela pepi naye bua kumuinamina, Absalome baadi aola eyasa diaye, amukuata na kumuanya kiipa. 6 Absalome baadi akitshi biabia kui bena Isalele boso babaadi abende kui nfumu bua’shi atshibe bilumbu biabo. Biabia, Absalombe batungunukile na kuyiba mashimba a bena Isalele.

7 Ku nfudiilo kua bipua binanka,* Absalome balunguile nfumu’shi: “Kumiina namu’shi nyende ku Ebrone nkakumbashe mutshipo unaadi mukite kui Yehowa. 8 Muanda ami mufubi oobe, nekalanga mukite uno mutshipo panekalanga mu Geshure mu Siri’shi: ‘Su Yehowa bangalusha ku Yelusalema, nakalambula* Yehowa mulambu.’” 9 Paapa nfumu bamulunguile’shi: “Enda mu butaale.” Absalome nkuibua, aye nkuenda ku Ebrone.

10 Kunyima Absalome batumine ba mpuupa mu bisamba bioso bia Isalele bua kulungula bantu’shi: “Anka nukia nupusha eyi dia mpungi, nuambe’shi: ‘Absalome bafiki nfumu mu Ebrone.’” 11 Binyi biabia, Absalome baadi muende na bantu 200 ba ku Yelusalema, baadi muibetanyine abo nkuenda kushii kuuka muanda, tababaukanga kintu su nkimune kibaadi akikitshika. 12 Dingi, pabaadi Absalome atusha milambu, batumine bantu ku Gilo buabadia kukayitanyina Ahitofele muina Gilo, yawa baadi apa Davide malango. Lukuku lubaadi nka aluende na kutama, na bantu babaadi abakuatshishena Absalome babaadi abende na kufuima.

13 Kunyima kua mafuku, ungi muntu bafikile mu kulungula Davide’shi: “Mashimba a bena Isalele abapu kuenda kui Absalome.” 14 Musango umune, Davide balunguile bafubi baye boso babaadi nabo mu Yelusalema’shi: “Ebueyi tusuukie, bisumanga takui muntu su ngumue a kuatudi apanda ku maasa kua Absalome! Kitayi bukidi, bisumanga e kufika bukidibukidi etusangana, etufuishila malua, na ayipaa bantu ba mu kibundi na lupete lua ngoshi!” 15 Paapa, bafubi ba nfumu nkumualula’shi: “Kitshibilo kioso akiata muanana nfumuetu, atuikilondo.” 16 Biabia nfumu bayile na ba mu nshibo yaye yoso, kadi balekiele nka makupi ekumi buaadia kutala nshibo. 17 Nfumu batungunukile na luendo luaye, na bantu boso babaadi abamulondo, babayimene ku Bete-merake.

18 Bafubi baye boso babayile naye, na boso bena Kerete, bena Pelete na bena Gate. Bana balume 600 babakatukile ku Gate bamulonda, babaadi abakidi kumpala kua nfumu, na nfumu baadi ebataluula. 19 Paapa nfumu balunguile Itayi muina Gate’shi: “Buakinyi obe namu okumina kuenda netu? Alukiila okashale na nfumu mupia, muanda we muenyi na we musuukie mu kibundi kienu. 20 Ofikile aa maloba, biabia lelo ne kukulungula’shi ofikie wende na kuumbakana netu koso kuatuende, aku namu ntanguku kuinyi kuanyende? Alukiila obe na bantu bobe, Yehowa akuleshe kifulo kia lulamato na ekale nobe mafuku oso, obe na bakuenu!” 21 Kadi Itayi nkualula nfumu’shi: “Bu bikale binyibinyi Yehowa na muwa, na bikale binyibinyi muanana nfumuami na muwa, kuakua akuikala muanana nfumuami, nyi kuangikala namu ami mufubi oobe, biabikala bua lufu sunga bua muwa!” 22 Paapa Davide nkulungula Itayi’shi: “Enda, osabukie adia eshiya.” Biabia Itayi muina Gate nkusabuka adia eshiya pamune na bantu baye boso na bifuko biabo.

23 Bantu boso ba muiumbo babaadi abadidi bikata, pabaadi apasabuka bano bantu boso ebanda dia Kidrone, na nfumu baadi muimane pepi na ebanda. Bantu boso babasabukile babayile muishinda ditadiile ku kabaaka. 24 Zadoke namu baadi paapa, baadi na bena Levi boso, basemune mushete wa kilombeno wa Efile Mukulu a binyibinyi, abo nkuyisha Mushete wa Efile Mukulu a binyibinyi. Abiatare namu bafikile, nsaa ibaadi bantu boso abasabuka ebanda. 25 Kadi nfumu balunguile Zadoke’shi: “Ata Mushete wa Efile Mukulu a binyibinyi walukile nao mu kibundi. Su nakuminyibua ku meso kua Yehowa, akangalusha namu bua’shi neumone na mbalo yaudi ushale. 26 Kadi su akula’shi: ‘Tue mukuminyibue nami,’ paapa ankitshine bioso abimueneka bibuwa ku meso kuaye.” 27 Nfumu nkulungula tshite muakuidi Zadoke’shi: “Tue muntu amonaa mianda su? Alukiila mu kibundi mu butaale, na wende na bana benu babidi, Akimase muana oobe a Yonatane muana a Abiatare. 28 Talanga, ami nakanyengakana pa mafua a Yordane pepi na mu kabaaka, mpa na pampetela mukandu aufiki kuanudi.” 29 Biabia Zadoke na Abiatare babaatshile mushete wa Efile Mukulu a binyibinyi, abo nkualukila ku Yelusalema, na nkushala kuakua.

30 Pabaadi Davide ende na kukaamina muengie wa olive, baadi ende na kudila. Baadi muibuikile kilamba ku mutue, na baadi atambuka ku ngua muasa. Bantu boso babaadi naye, nkuipuuta namu bilamba ku mitue yabo, na babaadi abende na kudila pabaabadi abende na kukaamina. 31 Kunyima babalunguile Davide’shi: “Ahitofele e munkatshi mua bantu bakuete kudia lukuku na Absalome.” Paapa Davide bakuile’shi: “Ô Yehowa! Fuutakasha namu elango dia Ahitofele.”

32 Pabaadi Davide mufikie ku nsongo kua muengie kubaadi bantu na kiubishi kia kuinama kumpala kua Efile Mukulu, Ushayi muina Arke baadi paapa, mmutengiele bua kufumankana naye, baadi na musapi usanukie na baadi muipongie nsenga mu mutue. 33 Biabia Davide nkumulungula’shi: “Su bosabuka nami adia eshiya, wekala bu bushito kuandi. 34 Kadi su bualuka mu kibundi, na bolungula Absalome’shi: ‘Ô nfumuami, ne mufubi oobe! Naadi mufubile nshobe kala, anka binobino ne mufubi oobe,’ paapa we mulombene kuluisha elango dia Ahitofele. 35 Tshite muakuidi Zadoke na Abiatare abekala nobe kuakua. Paapa abitungu olungule tshite muakuidi Zadoke na Abiatare mianda yoso yopusha mu nshibo ya nfumu. 36 Talanga, be na bana babo balume babidi, Akimase muana a Zadoke na Yonatane muana a Abiatare, kioso kiopusha kuakua, webatume bua’shi bafikie mu kundungula.” 37 Biabia Ushayi kuuku a Davide bayile mu kibundi, yaaya nsaa Absalome baadi atuele mu Yelusalema.

16 Pabaadi Davide mukile kapela pa nsongo a muengie, basangene Ziba mufubi a Mefiboshete amutengiela na mpunda ibidi ibaadi isemune mikate 200, tu mikate 100 tua tukuba tua nfinyo tuume na tu mikate 100 tukitshibue na tumuma* tua mu kipungo kia kibobo ki bukopo, n’elondo dikata dia nfinyo. 2 Paapa nfumu nkuipusha Ziba’shi: “Buakinyi bofiki na bino bintu?” Ziba nkumualula’shi: “Nafiki na mpunda bua’shi ba mu nshibo ya nfumu bakaamine, natuala mikate na tumuma tua mu kipungo kia kibobo ki bukopo, bua’shi ba nsongualume badie, nfinyo bua’shi baba abakooko mu kabaaka batome.” 3 Paapa nfumu nkumuipusha’shi: “A muana* a nfumu oobe e kunyi?” Ziba namu nkulungula nfumu’shi: “Bashala mu Yelusalema, muanda bakula’shi: ‘Lelo uno, nshibo ya Isalele ayingaluisha bufumu bua nshami.’” 4 Akupu nfumu nkulungula Ziba’shi: “Talanga, bintu bioso bikeele bia Mefiboshete tabidi biobe.” Ziba nkumualula’shi: “Nayinama kumpala kobe. Nkuminyibue namu ku meso kobe muanana nfumuami.”

5 Pabaadi nfumu Davide mufikie ku Bakurime, ungi muntu a mu kifuko kia Saule abetanyina bu Shimeyi muana a Gera, batuukile ende na kuela milua na eyi di bukopo pabaadi efubuila kui Davide. 6 Baadi aasa Davide mabue, na bafubi boso ba Nfumu Davide, pamune na bantu boso, na bilobo bia ngoshi bibaadi ku mboko yaye ibalume na ku mboko yaye ibakashi. 7 Shimeyi baadi ende na kuela nfumu milua’shi: “Katuka, katuka akua, obe muntu ayipayishenaa! Muntu a bisumanga’be! 8 Binobino Yehowa bakunyoko bua ebaasa dia mase oso oboodi mupongoole mu nshibo ya Saule, yawa odi muate mbalo y’okuete kukunkusha bu nfumu, kadi Yehowa batuulu bufumu mu maasa mua muana oobe Absalome. Binobino malua abakukuata, muanda we na ebaasa dia mase!”

9 Akupu, Abishai muana a Seruya nkulungula nfumu’shi: “Buakinyi uno mbua mufue eele nfumuami milua? Ntadiile namu nyende kuadi mmutshibe mutue.” 10 Kadi nfumu nkumulungula’shi: “A mmuanda kinyi wanunkimbila anue bana ba Seruya? Mutadiileyi angiele milua, su Yehowa nyi mumulungule’shi: ‘Ela Davide milua!’ Biabia nnanyi a kumulungula’shi: ‘Buakinyi okitshi biabia?’” 11 Akupu Davide nkulungula Abishai na bafubi baye boso’shi: “Su muana ande kapumba, yawa andi mutande akimbi muwa wande, tui kuamba naminyi bua uno muina Benyamine? Mutadileyi angiele milua, muanda Yehowa nyi mumulungule bua kuibikita! 12 Pangi Yehowa amono malua ande, na Yehowa ankitshina bi buwa pamutue pa milua yabangiele lelo uno.” 13 Biabia Davide na bantu baye babatungunukile na luendo, Shimeyi namu baadi atambuka ku bukunkula bua muengie mu lupese luabo, ende na kuela milua na eyi di bukopo, ebaasanga mabue na lufuufi lui bungi.

14 Nfudiilo a bioso, nfumu na bantu boso babaadi naye babakafikile mbakookie ku mbalo ibaabadi abende, akupu, babashalele bua kuikisha.

15 Mu yaaya nsaa, Absalome na bantu boso ba mu Isalele babaadi abamukuatshishena babafikile mu Yelusalema, na Ahitofele baadi nabo. 16 Nsaa ibaadi Ushayi muina Arke baadi kuuku a Davide mufikie kui Absalome, bamulunguile’shi: “Nfumu ekale na muwa bua loso! Nfumu ekale na muwa bua loso!” 17 Paapa Absalome nkuipusha Ushayi’shi: “Bino bibokitshi nyi kulesha kifulo kia lulamato kui kuuku oobe su? Buakinyi tue muende na kuuku oobe?” 18 Paapa Ushayi nkualula Absalome’shi: “Nya, ne ku lupese lua muntu abadi basangule kui Yehowa, abadi basangule kui uno muilo na kui bantu boso ba mu Isalele. Yawa muntu nyi anshala naye. 19 Dingi neakuila’shi nnanyi anfubila? Nta muana aaye su? Biabia nka bu biangikalanga mufubile nshobe, nakufubila namu.”

20 Paapa Absalome nkulungula Ahitofele’shi: “Mpe namu elango, tukite kinyi binobino?” 21 Ahitofele nkulungula Absalome’shi: “Lala makupi a nshobe aadi mulekie bua kulama nshibo. Apakapusha bena Isalele boso’shi bueyikasha obe nabene kintu ki butete kui nshobe, baba abakukuatshishena abakanyingi.” 22 Biabia abo nkushimikila Absalome kashibo k’epema kunundu kua nshibo, na Absalome nkubanga kulala makupi a nshaye mu meso mua bena Isalele boso.

23 Mu aa mafuku, babaadi abamono elango aditusha Ahitofele nka bu eyi dia Efile Mukulu a binyibinyi. Biabia nyi bibaabadi abanemeka malango oso a Ahitofele, biabikala kui Davide sunga Absalome.

17 Biabia Ahitofele balunguile Absalome’shi: “Ntadiile namu nsangule bantu 12 000, bua’shi tuibingene na Davide buno bufuku. 2 Nakamubasamusha nsaa yadi mukookie kushi bukome, mmutueshe mu kafutaakanyi. Bantu boso baadi nabo abakasuuku, na nakayipaa penda nfumu. 3 Akupu nakalusha bantu boso kodi. Muanda kualukila kuabo, akuikala muyile akikitshikila muntu okuete kukimba. Paapa, bantu boso abekala mu butaale.” 4 Uno muanda ubaadi usankishe Absalome na bakulu boso ba Isalele.

5 Anka Absalome bakuile’shi: “Tubandeyi namu kuitanyina Ushayi muina Arke, tupushe biakula.” 6 Biabia Ushayi nkufika kui Absalome. Akupu Absalome nkumulungula’shi: “Dino nyi elango dibabetupa kui Ahitofele, abitungu tuidikookiele su? Su tatuidikookiela, obe etulungule kia kukita.” 7 Paapa Ushayi nkulungula Absalome’shi: “Elango dibaatusha Ahitofele uno musango tadii buwa!”

8 Ushayi nkuamba dingi’shi: “Ouku kalolo’shi nshobe na bantu baye mbilobo bia ngoshi, na be na bukielo nka bu nyema a urse bashimisha bana baye mu kisuku. Dingi nshobe nkilobo kia ngoshi, nta mulombene kulala pamune na bantu boso. 9 Ino nsaa mmufuame mu lubuebue,* sunga mu ingi mbalo. Su abanga kulua netu, baba abapusha uno muanda abamba’shi: ‘Babatshimuna bantu abalondanga Absalome!’ 10 Sunga muntu e n’eshimba di bukopo bu dia ntambue akatshinyi, muanda bena Isalele boso abauku’shi nshobe nkilobo kia ngoshi, na’shi bantu baadi nabo be na mashimba anyingie. 11 Biabia, ami nakupa dino elango: Babungie bena Isalele boso kodi, kubanga ku Dane mpa na ku Beere-sheba, bekale bungi nka bu lusenga lua ku bukunkula bua kalunga ka mema, na webakunkushe mu ngoshi. 12 Atukamutukila mbalo yoso yadi, na atukamupaatuka na kiluilo kikata kia basalayi nka bu lume alupono mu nsenga, takui muntu su ngumune a kuabadi akapanda, biabikala aye sunga bantu be naye. 13 Su afuama mu kibundi kampanda, bena Isalele boso abaata mioshi banye kiakia kibundi, na tuikikakie mpa na muibanda, mu kipaso kia’shi takushalanga sunga ebue diakio.”

14 Paapa Absalome na bantu boso ba mu Isalele nkuakula’shi: “Elango dia Ushayi muina Arke di buwa kukila elango dia Ahitofele!” Muanda Yehowa baadi mupue kuata kitshibilo kia kuluisha elango dia Ahitofele di buwa, bua’shi Yehowa amone bia kufuishila Absalome malua.

15 Kunyima, Ushayi bakalunguile tshite muakuidi Zadoke na Abiatare’shi: “Ahitofele baapa Absalome na bakulu ba Isalele dino elango, ami namu nebapa dino elango. 16 Binobino, tumayi eyi bukidibukidi kui Davide numudimushe’shi: ‘Toshalanga pepi na mafua a Yordane e pepi na mu kabaaka buno bufuku, abitungu osabukie nka binobino, bisumanga mbalombene kubutula nfumu na bantu boso baadi nabo.’”

17 Yonatane na Akimase babaadi abatengiela ku Ene-rogele, muanda tababaadi abakumina kutuela mu kibundi bua’shi tala bebamona kui bantu. Biabia mufubi mukashi bayile, aye nkuibalungula bioso bibaadi abikitshika, abo namu babayile mu kulungula nfumu Davide. 18 Anka ungi nsongualume bebamuene, aye nkukalungula Absalome. Biabia Yonatane na Akimase babayile bukidibukidi kua ungi muntu mu Bakurime, yawa muntu baadi na buina mu lupango luaye. Abo nkutuela mu buabua buina. 19 Mukashi a yawa muntu baatshile kilamba, ekibuikila ku buabua buina, aye nkupalakasha kunundu kuabo ntete yabadi batue. Takui muntu su ngumune baadi auku wawa muanda. 20 Bafubi ba Absalome babafikile kui yawa muana mukashi bamuipusha’shi: “Yonatane na Akimase be kunyi?” Yawa muana mukashi nkuibalula’shi: “Bakilanga pano mbatadiile dia ku mema.” Paapa baba bantu babebakimbile, anka tambebapete, nyi abo nkualukila ku Yelusalema.

21 Kunyima kua baba bantu kualukila, babatuukile mu buina, abo nkuenda mu kulungula Nfumu Davide. Babambile’shi: “Ebueyi bukidibukidi nusabukie mema, muanda dino nyi elango dibatusha Ahitofele pabinutale.” 22 Musango umune Davide na bantu baye boso babebuele, abo nkusabuka Yordane. Pakuamba’shi bufuku butokie, boso babapuile kusabuka, takubashele muntu su ngumune.

23 Pabamuene Ahitofele’shi ntambalonde elango diaye, aye nkuadisha kishalelo pa mpunda aaye, na nkualuka mu kibundi kiabo. Kunyima kua’ye kulungula ba mu nshibo yaye kiabadia kukita, bepudikile. Biabia bafuile, abo nkumushiika mu mbalo ya kushiikila bantu ya ba nkambua baye.

24 Mu yaaya nsaa, Davide bayile ku Mahanaime, Absalome namu basabukile Yordane na bantu boso ba mu Isalele. 25 Absalome batuudile Amasa bu mukata a kiluilo kia basalayi pa mbalo ya Yoabe. Amasa baadi muana a ungi muntu abetanyina bu Itra muina Isalele, abatandile na Abigaile muana a Nakashe, mukuabo mukashi na Seruya nyinaye na Yoabe. 26 Absalome na bena Isalele babatuudile kishalelo kiabo mu nsenga ya Gileade.

27 Musango umune pabafikile Davide mu Mahanaime, Shobi muana a Nakashe a ku Raba a bena Amone, Makire muana a Amiele a ku Lo-debare na Barzilayi muina Gileade a ku Rogelime, 28 babatuadile bia kuladila, malonga a kudiila, ngieso ya buma, ntete ya blé, ntete ya orje, bukula, ntete ikangie, nkunde ikata na ipela, na ingi ntete yume, 29 buuki, manteka, mikooko na fromage. Babafikile na bino bintu bioso bua’shi Davide na bantu babaadi nabo badie. Muanda babambile’shi: “Bantu be na nsala na mbakokie na nyota mu kabaaka.”

18 Akupu Davide nkubadika bantu babaadi nabo, na nkutuula ba nfumu ba bantu kinunu na ba nfumu ba bantu lukama. 2 Davide batumine bantu babaadi nabo mu bisaka bisatu, kisaka kia kumpala ku bukunkushi bua Yoabe, kisaka kia kabidi ku bukunkushi bua Abishai mukuabo na Yoabe muana a Seruya, na kisaka kia kasatu ku bukunkushi bua Itayi muina Gate. Akupu nfumu bebalunguile’shi: “Ami namu nende nenu.” 3 Kadi babamulunguile’shi: “Tue mulombene kuenda netu, muanda su tubasuuku, tabebimono bu kintu, na su kia bibidi kia bantu ba kuatudi bafua, tabebimono bu muanda nya, muanda obe we mukile bantu 10 000 ba kuatudi. Biabia mbikile buwa bua’shi oshale mu kibundi, wekale wetutumina bukuashi.” 4 Paapa nfumu nkuibalungula’shi: “Bioso abimueneka buwa ku meso kuenu nebikitshi.” Biabia nfumu baadi muimane ku bukunkula bua kiibi kia kibundi, pabaadi bantu boso abatuuku mu bisaka bia bantu lukama na mu bisaka bia bantu kinunu. 5 Biabia, nfumu baadi mutumine Yoabe, Abishai na Itayi dino eyi’shi: “Tanukitshinanga muana ande Absalome bibubi pa muanda wande.” Bantu boso babapushishe pabaadi Davide atumina ba nfumu ba bisaka eyi pabitale Absalome.

6 Bantu ba Davide nkuenda mu kisuku bua kulua na bena Isalele, na bababangile kulua ngoshi mu mutamba wa Efraime. 7 Babatshokuele bena Isalele kui bantu ba Davide, na mu diadia efuku babayipayile bantu be bungi bukile—bantu 20 000 bishima. 8 Ngoshi ibapalakene mu kiakia kipindi kioso. Dingi, mutamba ubadiile bantu kukila bantu babafuile ku lupete lua ngoshi mu diadia efuku.

9 Nfudiilo a bioso, Absalome bafumankene na bafubi ba Davide mpala kua mpala. Absalome baadi mukaamine ku mpunda, na mpunda nkukidila muushi mua ntabi ipindakane ya mutshi ukata, mutue wa Absalome nkupatama munkatshi mua wawa mutshi ukata, mpunda nkutungunuka na kuenda, aye nkushala muembeele mu lupunga.* 10 Ungi muntu bamumuene, aye nkulungula Yoabe’shi: “Talanga, namono Absalome mmuembeele mu mutshi ukata.” 11 Yoabe nkulungula yawa muntu’shi: “Su omumonanga, buakinyi tue mumuipee musango umune? Paapa nadia kukupa na muloo oso makuta ekumi a kiamo kia arja na mukaba.” 12 Kadi yawa muntu nkulungula Yoabe’shi: “Sunga biekala’shi bodia kumpa makuta a arja 1 000, ntshinadia koola eyasa diande kui muana a nfumu nya, muanda tupushishe nsaa inutumiine nfumu eyi, obe, Abishai na Itayi’shi: ‘Nukaluile muana ande Absalome.’ 13 Su naadia kukutua kukookiela namuipaa, uno muanda taubadia kukutua kuukibua kui nfumu, na obe tobodia kunkaluila.” 14 Paapa Yoabe nkuakula’shi: “Ntshi na dingi nsaa yandia kukisha nobe!” Akupu baatshile mikietue isatu muiyasa diaye, nkuiyikinkila Absalome mu kiadi,* aku namu Absalome baadi ki na muwa munkatshi mua ntabi ya mutshi ukata. 15 Akupu, bafubi ekumi babaadi abasemuna bina ngoshi bia Yoabe, babafikile abo nkukupila Absalome mpa na pabafuile. 16 Yoabe belele mpungi, aye nkulungula bantu bua kuimika ngoshi, abo nkualukiila, na nkuleka kuibingena na Isalele. 17 Babatshile Absalome, abo nkumusumbula mu mutamba mu buina bukata, na nkumupuuta mutuuto wa mabue ukile bukata. Bena Isalele boso babasuukile, abo nkualuka ku mashibo kuabo.

18 Binyi biabia, pabaadi Absalome ki na muwa, baadi muikitshine aye nabene musungo muibanda dia nfumu, muanda bambile’shi: “Tshi na muana mulume a kutungunusha eshina diande.” Biabia baudikile wawa musungo eshina diaye, na abewitanyinaa bu musungo wa Absalome mpa na lelo uno.

19 Paapa Akimase muana a Zadoke bambile’shi: “Ndekie namu nyende lubilo, nkalungule nfumu uno mukandu, muanda Yehowa bamukitshina mianda na kululama, p’aye kumupoososha kui beshikuanyi baye.” 20 Kadi Yoabe nkumulungula’shi: “T’otuala uno mukandu lelo nya, omutuadila mukandu dingi efuku, kushii lelo, muanda mmuana a nfumu bafu.” 21 Akupu Yoabe balunguile ungi muina Kushe’shi: “Enda, okalungule nfumu biabia bibomono.” Paapa yawa muina Kushe nkuinama kumpala kua Yoabe, na nkubanga lubilo. 22 Akimase muana a Zadoke nkulungula dingi Yoabe’shi: “Sunga kuakitshika muanda kinyi, ntadiile namu nsuukie ndonde muina Kushe.” Kadi Yoabe bamulunguile’shi: “Buakinyi okimbi nka kuenda muana ande, aku namu takui mukandu odia kukakula?” 23 Kadi bambile’shi: “Sunga kuakitshika kinyi, ntadiile nka nyende.” Biabia Yoabe bamulunguile’shi: “Enda!” Paapa Akimase bayile lubilo muishinda dia distrike dia Yordane, na nfudiilo a bioso aye nkukila muina Kushe.

24 Penyi paapa, Davide baadi mushale pankatshi pa biibi bibidi bia kibundi, mulami a kibundi bakaamine kunundu kua kiibi kibaadi pepi na ku kimano. Bebuesheshe meso aye nkumona muntu e bupenka asuuku lubilo. 25 Biabia mulami a kibundi belele musaase, aye nkulungula nfumu. Nfumu nkumualula’shi: “Su e bupenka, e na mukandu wa kuakula.” Pabaadi yawa muntu anyisha kuiseesela pepi, 26 mulami a kibundi bamuene ungi muntu afiki lubilo. Yawa mulami a kibundi nkulungula muntu baadi alama ku kiibi’shi: “Talanga, kui ungi muntu kuete kufika lubilo bupenka!” Paapa nfumu nkuakula’shi: “Yawa namu’nyi, afiki na mukandu.” 27 Mulami a kibundi bakuile’shi: “Namono’shi muntu a kumpala asuuku nka bu Akimase muana a Zadoke,” biabia nfumu nkuakula’shi: “Mmuntu e buwa, na afiki na mukandu wibuwa.” 28 Pabafikile Akimase, belele nfumu musaase, nkumulugula’shi: “Mianda yoso ayende kalolo!” Paapa aye nkuinama kumpala kua nfumu, na nkukupila mpala paashi. Akupu nkuakula’shi: “Yehowa Efile Mukulu oobe atumbishibue, aye batuulu mu maasa mobe bantu abatombokielanga muanana nfumuami!”

29 Anka nfumu bamuipuishe’shi: “Muana ande Absalome e biiya su?” Akimase bamulunguile’shi: “Petutumanga Yoabe na mufubi oobe bua kufika kodi, mmonanga’shi kui kafutakanyi ke bukopo, anka ntanguku’shi mbuakinyi.” 30 Biabia nfumu bamulunguile’shi: “Eseesele ku lupese, oyimane paapa.” Biabia Akimase beseesele ku lupese, aye nkuimana paapa.

31 Akupu, muina Kushe bafikile, aye nkuakula’shi: “Muanana nfumuami akumiine namu uno mukandu: Lelo uno Yehowa bakukitshina mianda na kululama p’aye kukupoososha ku maasa kua baba boso babaadi bakutombokiele.” 32 Kadi nfumu nkuipusha muina Kushe’shi: “Muana ande Absalome e biiya su?” Muina Kushe nkumualula’shi: “Beshikuanyi boso ba muanana nfumuami, na baba boso bakutombokiele abakiebe kukukitshina bibubi, bekale’nka bu yawa nsongualume!”

33 Uno muanda ubaadi ukalakashe nfumu ngofu, aye nkukaamina mu kadimbo ka kunundu, kabaadi kunundu kua kiibi kia lupata na aye nkubanga kudila, baadi ende na kuakula’shi: “Muana ande Absalome, muana ande, muana ande Absalome! Su nadia kuikala sunga mufue pa mbalo yobe, muana ande Absalome, muana ande baboo!”

19 Babakalunguile Yoabe’shi: “Nfumu kuete kudila na e mu maalo bua Absalome.” 2 Biabia kutshimuna* kua diadia efuku kubalulukile bu maalo bua muilo oso ushima, muanda babapushishe’shi nfumu mmuinyongole ngofu bua muana aaye. 3 Bantu babalukile mu kibundi diadia efuku mbaumine nka bu bantu be na bufu muanda babasuku mu ngoshi. 4 Nfumu baadi muibuikile kilamba kumpala na baadi mutungunukie na kudila n’eyi di bukopo’shi: “Muana ande Absalome! Absalome muana ande, muana ande baboo!”

5 Akupu, Yoabe batuelele kui nfumu, amulungula’shi: “Lelo uno bokuatshisha bafubi bobe boso bufu, abo babapaasha muwa oobe na miuwa ya bana bobe balume, ya bana bobe bakashi, ya bakashi bobe na ya makupi oobe. 6 We mufule baba bakushikue, na we mushikue baba bakufule, lelo uno bolesha patoka’shi bakata ba kiluilo kiobe na bafubi bobe tabe na muulo kodi, muanda nanshinkamisha’shi su Absalome badia kuikala na muwa lelo uno na atue boso tuafua, bibaadia kuikala buwa ku meso kobe. 7 Binobino ebue, otuukie paasha na onyingishe bafubi bobe, muanda netshipi muishina dia Yehowa’shi su tue mutuukie paasha, takui muntu su ngumune ashala nobe buno bufuku. Bino abikala bubi kukila mianda yoso ibubi yodi mufumankane nayo kubanga ku bukinga bobe mpa na lelo uno.” 8 Biabia nfumu bebuele na aye nkushala ku kiibi kia kibundi, na babalunguile bantu boso’shi: “Binobino nfumu mmushale ku kiibi kia kibundi.” Akupu, bantu boso babafikile kumpala kua nfumu.

Kadi bena Isalele babapuile kusuuka, muntu oso enda ku nshibo kuaye. 9 Bantu boso ba mu bisamba bioso bia Isalele babaadi abekakena, abamba’shi: “Nfumu baadi muitupaashe kui beshikuanyi betu, na baadi muitupaashe kui bena Filistine; kadi binobino basuuku kibundi pa muanda wa Absalome. 10 Na winyi Absalome atuikalanga bele muimu bua’shi etukunkushe ngiawa bapu kufua mu ngoshi. Biabia buakinyi tanukitshi kintu su nkimune bua kualusha nfumu mu kibundi?”

11 Nfumu Davide batumine mukandu kui tshite muakuidi Zadoke na Abiatare, ebalungula’shi: “Esambeyi na bakulu ba Yunda nuibalungule’shi: ‘Buakinyi anukiebe kuikala bantu ba nfudiilo bua kualusha nfumu muibalasa diaye, aku namu nfumu mmupushe mukandu wa bena Isalele boso kuno kuaye ku nshibo? 12 Nui bakuetu na nui mase* ande. Biabia buakinyi anukiebe kuikala bantu ba nfudiilo bua kualusha nfumu?’ 13 Na nulungule Amasa’shi: ‘Obe tue mase ande* su? Biabia Efile Mukulu annyokie ngofu, su kubanga binobino toyikala mukata a kiluilo kiande kia ngoshi pa mbalo ya Yoabe.”’

14 Biabia bakumine mashimba a bantu boso ba mu Yunda, abo nkufika nka bu muntu umune. Babatumine eyi kui nfumu bua kumulungula’shi: “Alukila obe na bafubi bobe boso.”

15 Nfumu babangile luendo bua kualukila, aye nkufika ku Yordane, bantu ba mu Yunda babafikile ku Gilegale bua kufumankana na nfumu na kumusabusha muela wa Yordane. 16 Paapa Shimeyi muana a Gera, muina Benyamine a ku Bakurime bafikile lubilo na bantu ba mu Yunda bua kufumankana na nfumu Davide. 17 Baadi na bantu 1 000 ba ku Benyamine. Mpa na Ziba mufubi a mu nshibo ya Saule bafikile bukidibukidi ku Yordane na bana baye 15 na bafubi baye 20 bua kukuukila nfumu. 18 Basabukile* abua bushiya bua kukuasha ba mu nshibo ya nfumu bua’shi basabukie, na kukita kioso akikumiina nfumu. Kadi Shimeyi muana a Gera beyelele pashi kumpala kua nfumu, pabaadi nfumu takiebe kusabuka Yordane. 19 Balunguile nfumu’shi: “Muanana nfumuami tantopekanga, na tatentekieshanga kilubilo kibaakitshine mufubi aaye muifuku dibaadi muanana nfumuami akatuka ku Yelusalema. Nfumuami tatulanga namu uno muanda kuishimba, 20 muanda mufubi oobe auku’shi naadi mukite muluisho, nyi buakinyi lelo uno ne muntu a kumpala ku bantu boso ba mu nshibo ya Yosefe bafiki mu kufumankana na muanana nfumuami.”

21 Musango umune, Abishai muana a Seruya nkuakula’shi: “Abitungu Shimeyi ayipayibue, muanda mmuele muedibue muimu a Yehowa milua.” 22 Kadi Davide nkuakula’shi: “A uno muanda nguinutale ku kinyi anue bana ba Seruya, buakinyi anukiebe kukita bianshakumiina? Lelo uno mbalombene kuipaa muntu mu Isalele su? Tanuku’shi lelo ne nfumu mu Isalele mushima?” 23 Paapa nfumu nkulungula Shimeyi’shi: “Tofu nya.” Akupu nfumu nkuitshipa kuadi.

24 Mefiboshete muikulu a Saule bafikile namu mu kutundayisha nfumu. Kubanga muifuku dibayile nfumu mpa na pabalukiile mu butaale, tabaadi muitumpe mema ku ngua yaye, tabaadi mutshibe miefu sunga kutumpa bilamba biaye. 25 Kadi pabafikile* ku Yelusalema mu kuimonena na nfumu, nfumu bamuipuishe’shi: “Mefiboshete buakinyi tuemuende nami?” 26 Paapa bamualuluile’shi: “Muanana nfumuami, mufubi ande ekeele mundimbe. Muanda ami mufubi oobe nambile’shi: ‘Bu biandi mulemane, banganyine kishalelo pa mpunda bua’shi nkamine nyende na nfumu.’ 27 Kadi mmundimbiile mianda kui muanana nfumuami. Sunga mbiabia, obe muanana nfumuami we’nka bu muikeyilu a Efile Mukulu a binyibinyi, kita kiakia kioso kiomono’shi ki buwa ku meso kobe. 28 Obe muanana nfumuami bodia kuikala muipee bantu boso ba mu nshibo ya nshami, kadi we muntule ami mufubi oobe pamune na baba abadiyaa ku mesa oobe. Biabia buakinyi nekuidila’nyi kui nfumu?”

29 Anka nfumu nkumulungula’shi: “Buakinyi okiotungunuka na kuakula biabia? Ne muate kitshibilo kia’shi obe na Ziba nuiabishene mafuba.” 30 Paapa Mefiboshete nkulungula nfumu’shi: “Mutadiile aate mafuba oso, bu bikale’shi muanana nfumuami balukila binobino ku nshibo kuaye mu butaale.”

31 Akupu, Barzilayi muina Gileade bakatukile ku Rogelime, aye nkuenda ku Yordane bua kusabusha nfumu muela wa Yordane. 32 Barzilayi baadi mupue kununupa bikile, baadi na bipua 80 na baadi apa nfumu bia kudia pabaadi mushale ku Mahanaime, muanda baadi na bupeta bui bungi. 33 Paapa nfumu nkulungula Barzilayi’shi: “Sabuka wende nami, na nekala nankupa bia kudia mu Yelusalema.” 34 Kadi Barzilayi nkulungula nfumu’shi: “Kubanshadila dingi mafuku* bungi kinyi buandia kuikala na muwa, bua’shi nyende na nfumu ku Yelusalema? 35 Lelo uno tandi na bipua 80. Ne mulombene dingi kushingula bibuwa na bibubi su? Mufubi oobe mmulombene dingi kupusha muenyi wa kiadi na kiatomo? Nki mulombene dingi kushingula eyi dia tuyimba tulume na tukashi? Buakinyi mufubi oobe mmulombene kuikala bu bushito kui muanana nfumuami? 36 Mbilombane penda’shi mufubi oobe afikie mu kuleka nfumu ku Yordane. Buakinyi abitungu’shi nfumu ampe dino efuto di biabia? 37 Ntadiile namu ami mufubi oobe ngalukile, bua’shi nkafuile mu kibundi kietu pepi na mashama a nshami na a nyinami. Kadi mufubi oobe Kimame biadi’bi. Mutadiile asabukie na muanana nfumuami, na we kumukitshina bioso abimueneka buwa ku meso kobe.”

38 Paapa nfumu nkumulungula’shi: “Bi buwa, Kimame asabuka nami na nakamukitshina bioso biomono’shi bi buwa ku meso kobe; kioso kiontekie nankukitshina kianka.” 39 Bantu boso bababangile kusabuka Yordane, kumpala kua nfumu kusabuka, bakuatshile Barzilayi kiipa na aye nkumuelela miabi; akupu Barzilayi nkualukila kuaye. 40 Nsaa ibaadi nfumu musabukie bua kuenda ku Gilegale, Kimame basabukile naye. Bantu boso ba mu Yunda na kia pankatshi kia bantu ba mu Isalele babafikile mu kusabusha nfumu.

41 Akupu, bangi balume boso ba mu Isalele babaadi befubuile kui nfumu, abo nkumuipusha’shi: “Buakinyi bakuetu bena Yunda mbakuyibe na bantu boso ba mu nshibo yobe na benusabusha Yordane pamune na bafubi bobe boso?” 42 Bantu boso ba mu Yunda nkualula bantu ba mu Isalele’shi: “Muanda nfumu mmukuetu a mu kifuko. Buakinyi anuitukuatshila nsungu? Tatui badie kintu kia nfumu su nkimune, na nfumu ta mmuitupe kia buntu.”

43 Akupu, bantu ba mu Isalele babaluluile bantu ba mu Yunda’shi: “Atue tui bisamba ekumi, biabia tui na matalua ebungi kui Davide kuinukila. Kadi buakinyi nuibetubepuule? Tubadia kuikala ba kumpala ba kufika mu kuata nfumu eetu bua kumualusha.” Anka bena Yunda babaadi bakambile bena Isalele mu kuakua kuikakena.

20 Binyi biabia, kubaadi ungi muntu baadi mutushe kafutakanyi abetanyina bu Sheba muana a Bikiri muina Benyamine, belele mpungi aye nkuakula’shi: “Tatui na kiatupete kui Davide, tatui na bupianyi mui muana a Yesee. Anue bena Isalele, muntu oso alukile kui b’efile* baye!” 2 Paapa bantu boso ba mu Isalele babalekiele kulonda Davide, abo nkubanga kulonda Sheba muana a Bikiri. Kadi bantu ba mu Yunda babaadi bashale balamate nfumu aabo, kubanga ku Yordane mpa na ku Yelusalema.

3 Pabafikile Davide ku nshibo yaye ku Yelusalema, batshile makupi ekumi abalekiele bua kulama nshibo, aye nkuiatuula mu nshibo na bantu ba kuialama. Baadi ebapa bia kudia, anka tabaadi muibalale dingi. Babashadile balamibue mpa na muifuku dia lufu luabo, babaadi nka bu bakashi kilele, sunga biekala’shi babaadi na mulume ki na muwa.

4 Akupu nfumu balunguile Amasa’shi: “Nakupa mafuku asatu bua kuitanyina bantu ba mu Yunda bua’shi bafikie pano, na obe namu abitungu wekale pano.” 5 Biabia Amasa bayile mu kuitanyina bena Yunda, anka bafikile kunyima kua mafuku abaabadi bamutshibile. 6 Akupu Davide balunguile Abishai’shi: “Sheba muana a Bikiri mmulombene kuitukitshina bibubi kukila mpa na bibetukitshina Absalome. Biabia, ata bafubi ba nfumu oobe, webingene naye, bua’shi takatuelanga mu kibundi kinyingishibue, na apanda ku maasa kuetu.” 7 Biabia, bafubi ba Yoabe, bena Kerete, bena Pelete na bilobo bioso bia ngoshi nkuilondena naye. Babakatukile mu Yelusalema bua kuilondena na Sheba muana a Bikiri. 8 Pabaabafikile pepi na ebue dikata dia ku Gibeone, Amasa bafikile mu kufumankana nabo. Binyi biabia, Yoabe baadi mufuale bilamba biaye bia ngoshi, na baadi na lupete lua ngoshi mu kipusu kialo lubaadi musomekie mu kifuka. Pabaadi efubuila kui Amasa, lupete lubaponene.

9 Yoabe nkuipusha Amasa’shi: “We biiya mukuetu?” Akupu, Yoabe bakuatshile muefu wa Amasa na mboko yaye ibalume, nka bu’shi akimbi kumufifia ku milomo. 10 Amasa tabaadi mutuule binangu ku lupete lua ngoshi lubaadi muiyasa dia Yoabe, biabia Yoabe nkumukinkila luanka muifu, mala aaye nkupongoloka mu nsenga. Yoabe bamukinkiile luanka nka wawa musango umune, aye nkumuipaa. Akupu, Yoabe na mukuabo Abishai, babatungunukile na kuibingena na Sheba muana a Bikiri.

11 Umune a ku ba nsongualume ba Yoabe baadi muimane pepi na Amasa akulanga’shi: “Muntu oso e ku lupese lua Yoabe, na muntu oso e ku lupese lua Davide, alonde Yoabe!” 12 Penyi paapa, Amasa baadi ebungulusha mu mase aaye munkatshi mua eshinda. Pabamuene yawa nsongualume’shi bantu boso abayimana paapa, bakatuishe Amasa muishinda, aye nkumutuula mu kisuku. Akupu bamubuikile kilamba, muanda bamuene’shi bantu boso babaadi abemana nsaa ibaabadi abafiki paadi. 13 Pabamukatuishe muishinda, bantu boso bababangile kulonda Yoabe bua kuibingena na Sheba muana a Bikiri.

14 Sheba bakidile mu bisamba bioso bia Isalele mpa na ku Abele a Bete-maaka. Bena Bikiri babebungile namu, abo nkuenda kuadi.

15 Yoabe na bantu baye babafikile abo nkumuifunyisha mu kibundi kia Abele a Bete-maaka, bu bibaadi’shi kibundi kibaadi kiifunyishue na mutuuto wa nsenga bua kuikikaluila, abo namu bababungile mutuuto wa nsenga ukafikie mpa na ku kimano. Paapa bantu boso ba Yoabe babaabangile kubumbula kimano bua kuikiponesha. 16 Ungi muana mukashi sha binangu belele musaase kukatukila mu kibundi, akula’shi: “Teemeshayi namu balumiana, teemeshayi! Lungulayi namu Yoabe’shi: ‘Afikie muno, mmulungule muanda.’” 17 Biabia Yoabe bayile kui yawa muana mukashi, na yawa muana mukashi nkumuipusha’shi: “Nnobe Yoabe?” Aye nkumualula’shi: “Oolo nnami.” Akupu yawa muana mukashi nkumulungula’shi: “Teemesha eyi dia mufubi oobe.” Yoabe nkumulungula’shi: “Akula, nkuete kuteemesha.” 18 Yawa muana mukashi nkuakula’shi: “Kubanga kala, abakulaa’shi: ‘Tuende tukepushe mianda mu Abele, biabia nyi abipu muanda.’ 19 Ami nalesha mpala ya bantu ba sha butaale na ba sha lulamato ba mu Isalele. Obe okiebe kubutula kibundi ki bu nyina bana mu Isalele. Buakinyi okiebe kushimisha bupianyi bua Yehowa?” 20 Yoabe nkumualula’shi: “Tshi mulombene kuikishimisha sunga kuikibutula. 21 Tabi biabia nya. Anka ungi muntu abetanyina bu Sheba, muana a Bikiri a ku nsenga ya ku miengie ya Efraime, mmutombokiele nfumu Davide. Su nubantambika penda yawa muntu umune, nakatuka mu kibundi.” Akupu yawa muana mukashi nkulungula Yoabe’shi: “Talanga, abakuasa mutue waye kunundu kua kimano!”

22 Musango umune, yawa muana mukashi sha binangu bayile kui bantu boso, abo nkutshiba mutue wa Sheba muana a Bikiri, na nkuiwasa Yoabe. Paapa Yoabe belele mpungi, bantu baye boso nkukatuka mu kibundi, muntu oso nkualuka ku nshibo yaye. Akupu Yoabe nkualukila ku Yelusalema kui nfumu.

23 Mu kiakia kipungo, Yoabe baadi akunkusha kiluilo kioso kia basalayi kia bena Isalele. Benaya muana a Yehoyada, baadi akunkusha bena Kerete na bena Pelete. 24 Adolame baadi akunkusha baba babaadi abakitshi midimo ya pa bukopo. Yeoshafate muana a Akilude, baadi mufundi a mianda ya nfumu. 25 Sheva baadi mufundi. Zadoke na Abiatare babaadi ba tshite muakuidi. 26 Na Ira a ku Yaire, bafikile bu umune a ku ba tshite muakuidi ba Davide.

21 Kubatuelele nsala mu mafuku a Davide munda mua bipua bisatu bilondene, biabia Davide nkuipusha Yehowa, na Yehowa nkumulungula’shi: “Saule na ba mu nshibo muaye be na ebaasa dia mase, muanda bayipayile bena Gibeone.” 2 Biabia, nfumu bayitanyine bena Gibeone, aye nkuisamba nabo. (Aku namu bena Gibeone tababaadi bena Isalele, kadi babaadi bena Amore babaadi bashale. Bena Isalele babaadi betshipe bua kuibaleka na muwa. Anka bua kisumi kiaye bua bena Isalele na bena Yunda, Saule bakiebele kubutula bena Gibeone.) 3 Davide bayipuishe bena Gibeone’shi: “A nkinyi kiandia kuinukitshina? Na mbikunyi biandia kukaasha uno muluisho, bua’shi nuelele bupianyi bua Yehowa miabi?” 4 Bena Gibeone babamualuluile’shi: “Tatui na muanda na arja sunga ôlo pabitale mianda ibaadi Saule na kifuko kiaye betukitshine. Na tatui na matalua a kuipaa muntu su ngumune mu Isalele.” Paapa Davide nkuibalungula’shi: “Kioso kianundungula, nenukitshina.” 5 Babalunguile nfumu’shi: “Yawa muntu baadi akiebe kuituipaa boso, na baadi muele binangu bia kuitushimisha mu nsenga ya Isalele, 6 betupe bana baye balume musambobidi, atupudika bitanda biabo kumpala kua Yehowa mu Gibeya a Saule, yawa abaabadi basangule kui Yehowa.” Paapa nfumu nkuibalungula’shi: “Nenupa banka.”

7 Anka nfumu bapushishe Mefiboshete muana a Yonatane muikulu a Saule lusa, pa muanda wa mutshipo ubaadi Davide mukite na Yonatane muana a Saule kumpala kua Yehowa. 8 Biabia nfumu batshile Amonyi na Mefiboshete bana babidi ba Rispa muana mukashi a Aya, babaadi mutandile Saule, na bana batano ba Mikale muana mukashi a Saule babaadi mutandile Adriele muana a Barzilayi muina Mehola. 9 Biabia aye nkuibapa bena Gibeone, na abo nkupudika bitanda biabo ku muengie, kumpala kua Yehowa. Abo boso musambobidi babafuile pamune, babebayipayile mu mafuku a ku mbangilo a kipungo kia kuumbula bintu, ku mbangilo kua kipungo kia kuumbula orje. 10 Akupu, Rispa muana mukashi a Aya batshile mpaya, aye nkumuadisha pa lubuebue kubanga ku mbangilo kua kipungo kia kuumbula bintu, mpa na pabaadi mpeshi munokiele bitanda. Tabaadi mutadiile bua’shi tonyi tuyikie pa bitanda mu kanya, sunga’shi nyema ya bukielo ya mu kisuku ifikie pepi nabio bufuku.

11 Akupu babalunguile Davide biabia bibaadi Rispa, ekupi dia Saule, muana mukashi a Aya mukite. 12 Biabia Davide bayile, aye nkuata mifufua ya Saule na mifufua ya muana aaye Yonatane kui bakunkushi ba mu Yabeshe-gileade. Abo nyi babaadi beyiibe pa mbalo ya bantu boso mu Bete-shane, mbalo ibaadi bena Filistine bapudikie Saule na Yonatana, mu efuku dibaadi bena Filistine bayipee Saule ku Ngilboa. 13 Bakaatshile mifufua ya Saule na mifufua ya muana aaye Yonatane, na bababungile’nyi mifufua ya bangi bantu babaabadi bayipee.* 14 Akupu, babashiikile mifufua ya Saule na ya muana aaye Yonatane mu eumbo dia Benyamine mu Sela, mu mashama a nshaye Kishe. Kunyima ku’abo kukita mianda yoso ibaadi nfumu muibatumine eyi, Efile Mukulu bateemeshe kuiyaaya kuabo bua eumbo.

15 Kubatukile dingi ngoshi pankatshi pa bena Filistine na bena Isalele. Biabia Davide na bafubi baye nkuenda mu kulua ngoshi na bena Filistine, anka Davide bakookiele. 16 Ungi muntu a ku bena Refa abetanyina bu Ishibi-benobe baadi na mulumbu wa kiamo kia munyinga, ubaadi bushito bua shekele* 300, na baadi na lupete lua ngoshi lupia, bakiebele kuipaa Davide. 17 Musango umune, Abishai muana a Seruya bafikile mu kumukuasha, na aye nkuipaa yawa muina Filistine. Paapa bantu ba Davide nkumutshipisha uno mutshipo, abo nkuamba’shi: “Tuendanga dingi netu mu ngoshi, t’abitungu’shi oshime elampi dia Isalele nya!”

18 Kunyima kua biabia, kubatukile dingi ngoshi na bena Filistine ku Gobe. Paapa Sibekayi muina Usha, nkuipaa Safe baadi muikulu a bena Refa.

19 Kubatukile’nyi ngoshi na bena Filistine ku Gobe, Elanane muana a Yaare-oregime muina Beteleme, bayipayile Goliate muina Gate, mutuela wa mulumbu waye ubaadi bukata nka bu mutshi wabanyinaa buanda ku kiamo kia kuluka nakio bilamba.

20 Ngoshi ibatukile dingi ku Gate, kubaadi muntu baadi bula bua kukaanya, baadi na minue 6 ku eyaasa dioso, na mana 6 ku luao loso, yoso ibaadi 24. Aye namu baadi muikulu a bena Refa. 21 Baadi nka aolomona bena Isalele. Biabia Yonatane muana a Shimeyi mukuabo na Davide bamuipayile.

22 Bano bantu bananka babaadi bena Refa ba ku Gate, na babaadi bebayipee kui Davide na bafubi baye.

22 Na Davide baadi muyimbile Yehowa uno musambo, muifuku dibaadi Yehowa mumupaashe ku maasa kua beshikuanyi baye boso, na kuiyasa dia Saule. 2 Bambile’shi:

“Yehowa ndubuebue luande na kifuamino kiande, aye nyi ampaasha.

11 Bakaamine pa mukeluba, na aye nkufika afu’apapamanga.

Pabafikile baadi amueneka pa mbaba ya kipangua kia mu kikudi.*

13 Makala a kaalo akatembe bi bukopo, abaadi aatukila ku etaata dibaadi ku mpala kuaye.

14 Yehowa babangile kukungula muiyilu nka bu kapandapanda.

Sha Kuiyilu Kula bakitshine bia’shi eyi diaye dipushikie.

15 Baashile mikietue yaye, aye nkuibapalakasha.

17 Kukatukila muiyilu baadi moole mboko yaye.

Bankuatshile, aye nkuntusha mu mema e bula.

20 Bantuadile mu mbalo ishii masaku.*

Bampaashile, muanda baadi munfule.

21 Yehowa anfutu muyile kululama kuande.

Anfutu muanda ntshi musoole muanda.

Aye nyi ngabo kui baba boso abakimbi kifuamino muadi.

32 Muanda nnanyi muikale Efile Mukulu, kukatusha Yehowa?

Na nnanyi muikale ebue, kukatusha nka penda Efile Mukulu eetu?

44 Okampaasha ku bilema biabangamba kui bantu ba mu muilo wande.

47 Yehowa e na muwa! Ebue diande ditumbishibue!

Efile Mukulu, aye muikale ebue dia kipandilo kiande atumbishibue.

49 Ampaasha kui beshikuanyi bande.

23 Mayi a nfudiilo a Davide ngano:

 5 Nshibo yande tayi namu biabia kumpala ku’Efile Mukulu su?

8 Mashina a bilobo bia ngoshi bia Davide ngano: Yosheba-basebete muina Takemoni baadi kunundu kua bilobo bia ngoshi bisatu. Ungi musango bayipayile bantu 800 na mulumbu waye. 9 Babaadi bamulondele kui Eleazare muana a Dodo, muana a Ahone, Eleazare baadi munkatshi mua bilobo bia ngoshi bisatu bibaadi na Davide nsaa ibabaadi bolomone bena Filistine. Bena Filistine babaadi bebungie bua kulua ngoshi, kadi pabaadi bena Isalele basuukie, 10 Eleazare bashadile muimane, na aye nkutungunuka na kuipaa bena Filistine mpa na pababofuele mboko yaye, na eyasa diaye diakooka kukuata lupete. Biabia Yehowa bafuishile kutshokola kukata mu diadia efuku, akupu bantu babamulondele bua kuata bintu bia baba babaadi bayipayibue.

11 Babaadi bamulondele kui Shama muana a Ageye muina Arare, bena Filistine babaadi bebungile ku Lehi mbalo ibaadi efuba diule na tukunde tumonga. Paapa bantu babasuukile bena Filistine. 12 Kadi aye bayimene munkatshi mu’efuba aye nkuidikaluila, na nkutungunuka na kuipaa bena Filistine, biabia Yehowa bafuishishe kutshimuna* kukata.

13 Mu kipungo kia kuumbula bintu, bantu basatu ba ku bakata 30 babayile kui Davide mu lubuebue lua Adulame, kisaka kia basalayi ba bena Filistine kibaadi kituule kishalelo kiabo Muibanda dia bena Refa. 14 Mu aa mafuku Davide baadi mu kifuamino, kadi basalayi ba bena Filistine babaadi mu Beteleme. 15 Paapa Davide nkulesha lukalo luaye amba’shi: “Su nadia kutoma mema e mu buina bua kulamina mema bui pepi na kiibi kia Beteleme baboo!” 16 Paapa biabia bilobo bisatu bia ngoshi nkutuela mu kishalelo kia bena Filistine pa bukopo, na nkutapa mema mu buina bua kulamina mema bubaadi ku kibelo kia Beteleme abo nkuiatuadila Davide, kadi bapelele kuiatoma aye kuiapongoola mu nsenga kumpala kua Yehowa. 17 Bambile’shi: “Ô Yehowa, ntshi mulombene kukita su nkapeela muanda wi bino! Ne kutoma mase a bantu batuule muwa wabo mu masaku su?” Paapa bapelele kutoma aa mema. Ino nyi mianda ibaadi bilobo biaye bisatu bia ngoshi bikite.

18 Abishai mukuabo na Yoabe muana a Seruya baadi namu kunundu kua kingi kisaka kia bilobo bisatu, dingi efuku bayipayile bantu 300 na mulumbu waye, na baadi na nkumo nka bu ya biabia bilobo bisatu. 19 Sunga biekala’shi baadi mukile kuukibua a ku baba basatu, na’shi baadi mukata aabo, tabaadi mufikie mu mulongo wa biabia bilobo bisatu bia kumpala.

20 Benaya muana a Yehoyada baadi muntu sh’eshimba dinyingie bakitshine mianda ikata i bungi ku Kabeseele, bayipayile bana babidi ba Ariyele muina Moabe. Bayikile’nyi mu buina bua mema ayipaa ntambue efuku dibaadi adinoko neje. 21 Nnaye dingi baadi muipee ungi muana mulume muina Ejipitu baadi bula bua kukaanya. Sunga biekala’shi yawa muina Ejipitu baadi na mulumbu muiyasa, aye bayile mu kulua naye na mukombo, amunyenga mulumbu muiyasa, aye nkumuipaa nka na wawa mulumbu waye. 22 Ino nyi mianda ibaadi Benaya muana a Yehoyada mukite, na baadi na nkumo nka bu ya biabia bilobo bisatu bia ngoshi. 23 Sunga biekala’shi baadi muukibue ngofu kukila mpa na biabia bilobo 30, tabaadi mufikie mu mulongo wa biabia bilobo bia ngoshi bisatu. Anka Davide bamutudile kunundu kua bantu babaadi abamulama.

24 Asahele mukuabo na Yoabe baadi munkatshi mua bilobo 30, mashina a biabia bilobo ngano: Elanane muana a Dodo a ku Beteleme, 25 Shama muina Arode, Elika muina Arode, 26 Elese muina Palete, Ira muana a Ikeshe muina Tekoa, 27 Abiezere muina Anatote, Mebunayi muina Usha, 28 Zalmone muina Ahohi, Marayi muina Netofa, 29 Elebe muana a Baana muina Netofa, Itayi muana a Ribayi a ku Gibeya a Benyamine, 30 Benaya muina Piratone, Idayi a ku bibandabanda* bia Gashe, 31 Abi-alebone muina Raba, Azemawete muina Bakurime, 32 Eliaba muina Shalabone, bana ba Yashene, Yonatane, 33 Shama muina Arare, Akiame muana a Sharare muina Arare, 34 Elifelete muana a Akasebayi muana a Maakate, Eliame muana a Ahitofele muina Gilo, 35 Eselo muina Karmele, Parayi muina Arabe, 36 Igale muana a Natane a ku Soba, Bani muina Gade, 37 Zeleke muina Amone, Nakrayi muina Berote, yawa baadi atuadila Yoabe muana a Seruya bina ngoshi, 38 Ira muina Yitre, Garebe muina Yitre, 39 na Uriya muina Ite, boso babaadi 37.

24 Nsungu ya Yehowa ibaadi itembele dingi bena Isalele pabaadi ungi muntu mutakule Davide* bua kukitshina muilo bibubi, amulungula’shi: “Enda okabadikie bena Isalele na bena Yunda.” 2 Paapa nfumu balunguile Yoabe mukata a kiluilo kia ngoshi baadi naye’shi: “Enda namu kui bisamba bioso bia Isalele kukatukila ku Dane mpa na ku Beere-sheba, obadikie muilo buashi ngukie bungi buao.” 3 Kadi Yoabe balunguile nfumu’shi: “Yehowa Efile Mukulu oobe afuimishe muilo misango 100, na meso a muanana nfumuami amone uno muanda. Kadi buakinyi muanana nfumuami akiebe kukita muanda wi biabia?”

4 Anka nfumu bakamikile Yoabe na ba nfumu ba kiluilo. Biabia Yoabe na ba nfumu ba kiluilo nkukatuka kumpala kua nfumu, abo nkuenda mu kubadika muilo wa Isalele. 5 Babasabukile Yordane abo nkutuula kishalelo kiabo mu Arowe, dia ku mboko ibalume* ya kibundi munkatshi mua ebanda, mbatadiile lupese lua ku bena Gade na ku Yazere. 6 Kunyima babayile ku Gileade na muiumbo dia Tahatime-hodeshi, abo nkuenda nyaa na ku Dane-yane na abo nkuifunya nkuenda ku Sidone. 7 Akupu babayile ku mbalo inyingishibue ya Tiire, na mu bibundi bioso bia bena Ivii na bia bena Kanaana, na nfudiilo a bioso abo nkukafudiila ku Negebe a Yunda, ku Beere-sheba. 8 Biabia babakidile muiumbo dioso na abo nkufika ku Yelusalema ku nfudiilo kua mieshi kitema na mafuku 20. 9 Paapa Yoabe nkulungula nfumu bungi bua bantu babaabadi bafunde mashina. Mu Isalele mubaadi bilobo bia ngoshi 800 000 bibaadi abiuku kulua na mpete ya ngoshi, na mu Yunda mubaadi bantu 500 000.

10 Kunyima kua Davide kubadika muilo, eshimba* diaye dibabangile kumutopeka. Paapa Davide nkulungula Yehowa’shi: “Nakitshi muluisho ukata p’ami kukita bino. Bua binobino Yehowa fuila namu mufubi oobe lusa, muanda nakitshi mianda bu muntu shi na binangu.” 11 Pababuukile Davide ku nakashika, eyi dia Yehowa dibafikile kui mutemuki Gade baadi alungula Davide bimonua, diakula’shi: 12 “Nda okalungule Davide’shi, ‘Yehowa amba bino: “Nakutudila manyoka asatu kumpala kobe. Sangula dimune diandi mulombene kukutumina.”’” 13 Paapa Gade bayile kui Davide amulungula’shi: “Nkinyi kiosangula ku bino bintu bisatu: Bipua musambobidi bia nsala bifikie muiumbo diobe su? Su okiebe kuikala osuuku beshikuanyi bobe munda mua mieshi isatu pabebingena nobe? Su okumiina’shi kuikale kipupa munda mua mafuku asatu muiumbo diobe? Biabia ela binangu kalolo bua’shi ondungule kiandia kukalula yawa ekeele muntume.” 14 Paapa Davide balunguile Gade’shi: “Uno muanda aunkalakasha ngofu. Nakumiina’shi tupone muiyasa dia Yehowa, muanda lusa luaye ndukata; anka ntankumiina kupona muiyasa dia muana a muntu.”

15 Paapa Yehowa batumine kipupa mu Isalele kubanga ku nakashika mpa na ku nsaa itshibibue, bantu 70 000 babafuile kubanga ku Dane mpa na ku Beere-sheba. 16 Pabaadi muikeyilu muoole mboko yaye mmuiyitadiishe ku Yelusalema bua kumubutula, Yehowa baadi muinyongole bua aa malua, na aye nkulungula muikeyilu baadi ayipaa bantu’shi: “Bibakumbana! Isha mboko yobe.” Muikeyilu a Yehowa baadi pepi na mbalo ya kukupiila ntete ya Arauna muina Yebuse.

17 Pabaadi Davide mumone muikeyilu baadi ayipaa bantu, balunguile Yehowa’shi: “Ami nyi mukite muluisho, na ami nyi mukite bibubi; kadi ino mikooko namu, a wayo ngunyi? Ami nyi odia kunyoka na ba mu nshibo ya nshami.”

18 Biabia Gade bafikile kui Davide diadia efuku amulungula’shi: “Ebuee wende okebakile Yehowa kilambuilo ku mbalo ya kukupiila ntete ya Arauna muina Yebuse.” 19 Paapa Davide bakaamine muyile bibamulunguile Gade, nka bu bibaadi Yehowa mutume eyi. 20 Pabaadi Arauna mutale muushi, bamuene nfumu na bafubi baye abafiki kuadi, musango umune bayile mu kufumankana nabo, aye nkuinamina nfumu na nkukupila mpala paashi. 21 Paapa Arauna bakuile’shi: “Buakinyi muanana nfumuami bafiki kui mufubi aaye?” Davide nkualula’shi: “Nafiki mu kukuwula mbalo ya kukupiila ntete bua kuibakila Yehowa kilambuilo, bua’shi kipupa akipaa bantu kiimane.” 22 Kadi Arauna balunguile Davide’shi: “Eyaate muanana nfumuami na olambuile panka biabia bioso biokumiina. Ngombe ngiyi bua milambu ya kushiika kaalo, mabaya abakakaa kui ngombe bua kufunta ntete, na kikumbo biodia kufubisha bu nteete biabidi’bi. 23 Bino bioso Ô nfumu, ami Arauna nakupa bianka.” Akupu Arauna nkulungula nfumu’shi: “Yehowa Efile Mukulu oobe akuleshe kalolo.”

24 Anka nfumu balunguile Arauna’shi: “Nya, nakuwulu bianka bua nkupa makuta. Ntandambula Yehowa Efile Mukulu ande milambu ya kushiika kaalo yashantushila kintu su nkimune.” Biabia Davide nkuwula mbalo ya kukupiila ntete na ngombe ku shekele* 50 ya kiamo kia arja. 25 Davide bayibakiile Yehowa kilambuilo mu yaaya mbalo, aye nkulambula milambu ya kushiika kaalo na milambu ya butaale. Paapa Yehowa nkupusha kuidila kuaye pa muanda wa eumbo, na kipupa kibaadi akipaa bena Isalele nkuimana.