MUKANDA WA KABIDI WA KUILONDENA KUA MIANDA

1 Salomone muana a Davide baadi anyisha kupeta bukome mu bufumu buaye, na Yehowa Efile Mukulu aaye baadi naye, aye nkumuikasha na kinemo kikata.

2 Salomone bayitanyishe Isalele oso mushima: Ba nfumu ba bantu kinunu, ba nfumu ba bantu lukama, ba nsushi, na bakata boso ba Isalele mushima, kuamba’shi ba nfumu ba bifuko bia bamashabo. 3 Akupu Salomone na kakongie koso kashima, babayile ku mbalo i kunundu ya ku Gibeone, muanda kuakua nyi kubaadi kashibo k’epema ka kufumankena ka Efile Mukulu a binyibinyi, kabaadi Moyise mufubi a Yehowa mukite mu kabaaka. 4 Anka, Davide bakaatshile Mushete wa Efile Mukulu a binyibinyi ku Kiriate-yearime, aye nkuiutuula mu mbalo ibaadi muiulumbuluile. Baadi muiushimikile kashibo k’epema mu Yelusalema. 5 Dingi, kilambuilo kia kiamo kia munyinga kibaadi Besalele muana a Uri muana a Ure mukite, babekituudile kumpala kua tabernakele a Yehowa. Salomone na kakongie koso kashima babaadi abatekie kumpala kuakio. 6 Salomone batuushile milambu paapa kumpala kua Yehowa, balambuile milambu 1 000 ya kushiika kaalo pa kilambuilo kia kiamo kia munyinga kia mu kashibo k’epema ka kufumankena.

7 Buabua bufuku, Efile Mukulu bamuenekiele Salomone na nkumulungula’shi: “Teka kiakia kioso kiokumiina’shi nkupe.” 8 Paapa Salomone nkulungula Efile Mukulu’shi: “We muleshe mufubi oobe Davide nshami kifulo kikata kia lulamato, na we muntuule bu nfumu pa mbalo yaye. 9 Binobino, Ô Yehowa Efile Mukulu! Mulayilo oobe ubodi mulee nshami Davide ukumbane namu, muanda we muntuule bu nfumu a uno muilo wi na bantu bakile bungi nka bu lusenga. 10 Biabia mpe namu binangu na kiukilo bua kukunkusha uno muilo,* muanda nnanyi mulombene kusambisha uno muilo oobe wi bukata bino?”

11 Akupu Efile Mukulu nkulungula Salomone’shi: “Bu biabidi’shi luno nyi lukalo lui muishimba diobe, na tue mutekie bupeta, nkumo, sunga lufu lua baba bakushikue, sunga kuteka bua’shi wekale na muwa munda mua mafuku e bungi, kadi botekie binangu na kiukilo bua kusambisha muilo wande wandi mukutuule bu nfumu, 12 nakupa binangu na kiukilo. Nakupa dingi bupeta na nkumo biabashapetele dingi kui ungi nfumu baadi kumpala kobe, sunga akafiki kunyima kobe.”

13 Biabia Salomone bakatukile ku mbalo i kunundu ya ku Gibeone kubaadi kashibo k’epema ka kufumankena, aye nkuenda ku Yelusalema, na baadi akunkusha Isalele. 14 Salomone baadi atungunuka na kupeta matempu na nfualasa;* baadi na matempu 1 400 na nfualasa* 12 000, na baadi muibituule mu bibundi bia matempu na pepi na nfumu mu Yelusalema. 15 Nfumu bakitshine bia’shi kiamo kia arja na ôlo bikale bi bungi mu Yelusalema nka bu mabue, na mabaya a mutshi wa sedre e bungi nka bu mitshi ya sikomore mu Shefela. 16 Nfualasa ya Salomone ibaadi ayifiki mu Ejipitu, na ba nsunga ba nfumu abakitaa nyendo babaadi abaulu bisaka* bia nfualasa ku muulo umune. 17 Etempu dioso adifiki ku Ejipitu dibaadi muulo wa makuta a kiamo kia arja 600, na nfualasa umune baadi muulo wa makuta a kiamo kia arja 150; akupu abo namu babaadi balombene kuibiudisha kui ba nfumu boso ba bena Ite na ba nfumu ba Siri.

2 Biabia Salomone batumine eyi bua’shi bebakie nshibo bua eshina dia Yehowa na ingi nshibo* bua bufumu buaye. 2 Salomone basanguile bafubi ba bisumanga* 70 000 na bantu 80 000 ba kutanya mabue mu miengie, na bantu 3 600 ba kuibakunkusha. 3 Dingi, Salomone batumiine Irame nfumu a Tiire mukandu’shi: “Nkitshine namu mianda nka bu bibodi mukitshine nshami Davide, pobodi mumutumine mabaya a mutshi wa sedre bua kuibaka nshibo yaye ya kushala. 4 Binobino nkuete kuibaka nshibo bua eshina dia Yehowa Efile Mukulu ande, bua kumulambula yanka, bua kushiika kabanda ke mapembue kumpala kuaye, na bua kutuula mikate ya kutuula mu milongo nsaa yoso, na milambu ya kushiika kaalo ku namashika na ku kiolua mu mafuku a nsabato, pa kubaluka kua mueshi na mu bipungo bia misangelo ya Yehowa Efile Mukulu eetu. Muanda uno mmuiya wa loso bua Isalele. 5 Nshibo yangibaka ayikala ikata, muanda Efile Mukulu eetu mmukata kukila bangi b’efile boso. 6 Nnanyi mulombene kumuibakila nshibo i kumulombana? Muanda eyilu, sunga eyilu di kunundu kua mayilu nta ndilombene kumulombana, biabia, a’mi namu ne’nyi bua kumuibakila nshibo, kukatusha penda kumuibakila mbalo ya kufitshisha miishi ya milambu kumpala kuaye? 7 Binobino ntumine namu nsendue auku kufuba kalolo na ôlo, kiamo kia arja, kiamo kia munyinga, buanda bumongolokie, buanda bumonga pididii na buanda bui bulee, na auku kutshiba bintu bia kulengiesha nabio. Akafubila mu Yunda na mu Yelusalema na ba nsendue bande abauku kufuba kalolo babaadi nshami Davide mundekiele. 8 Ontumine dingi mabaya a mutshi wa sedre, a mutshi wa jenevriye na a mutshi wa algume a mu Lebanone. Muanda nauku’shi bafubi bobe abauku kutshiba kalolo mitshi ya mu Lebanone. Bafubi bande abafubu pamune na bafubi bobe, 9 bua kundumbuluila mabaya akile bungi, muanda nshibo yangibaka ayikala ikile bukata. 10 Talanga, nekala napa bafubi bobe bia kudia, bantu abatshibaa mitshi nebapa bipimo 20 000 bia kor bia blé, bipimo 20 000 bia kor bia orje, mbaafu 20 000 ya nfinyo na mbaafu 20 000 ya muimu.”

11 Paapa Irame nfumu a Tiire batumiine Salomone mukanda, amulungula’shi: “Bu bikale’shi Yehowa mmufule muilo waye, mmukutuule bu nfumu aabo.” 12 Akupu Irame bambile dingi’shi: “Yehowa Efile Mukulu a Isalele atumbishibue, aye mupangie eyilu na nsenga, muanda mmupe Nfumu Davide muana e na binangu, muule na kapatupatu na lushinguluilo, ayibakila Yehowa nshibo na ebaka nshibo yaye ya bufumu. 13 Binobino, nakutumina Irame-abi, nsendue auku kufuba kalolo, muule na binangu, 14 mmuana a mukashi muina kisamba kia Dane, kadi nshaye mmuntu a mu Tiire. Auku bia kufuba na ôlo, kiamo kia arja, kiamo kia munyinga, kiamo, mabue, mabaya, buanda bumongolokie, buanda bui bulee, buanda bumonga pididii na bilamba bi buwa. E kukita mifubo yoso ya kulengiesha na kusola kioso akitungibua. Akafubu pamune na ba nsendue bobe abauku kufuba kalolo, na ba nsendue abauku kufuba kalolo ba nfumuami Davide nshobe. 15 Binobino nfumuami atumengie winyi blé, orje, muimu na nfinyo bibaadi mulee bafubi baye. 16 Paapa atukatshibi mitshi mu Lebanone, bungi boso bokumiina, atuiyanya pamune, tukutumine yanka ku Yopee, ifikie ilengame pa mema. Obe namu weyituale ku Yelusalema.”

17 Paapa Salomone nkubadika bana balume boso babaadi bashale bu benyi mu nsenga ya Isalele, kunyima kua kubadika kubaadi nshaye Davide mukite, aye nkupeta bantu 153 600. 18 Biabia aye nkutuula bafubi ba bisumanga* 70 000, bantu 80 000 ba kutanyanga mabue mu miengie, na bantu 3 600 bu bakunkushi ba kutulanga bantu ku mudimo.

3 Akupu, Salomone babangile kuibaka nshibo ya Yehowa mu Yelusalema ku muengie wa Moriya kubaadi Yehowa mumuenekiele nshaye Davide, pa mbalo ya kukupiila ntete ya Ornane muina Yebuse ibaadi Davide mulumbuule. 2 Babangile kuiyibaka mu efuku dia kabidi dia mueshi wa kabidi, mu kipua kia kananka kia kumunana kuaye. 3 Kitako kia nshibo kibaadi Salomone mukite bua kuibaka nshibo ya Efile Mukulu a binyibinyi, kibaadi kude 60 mu bula na kude 20 mu buipi, muyile kipimo kia kala.* 4 Kadimbo ka pa ntuelelo kabaadi bula bua kude 20 mupunda buipi bua nshibo, bula buako bua muiyilu bubaadi bua kude 20,* na baadi mulamikie munda muako ôlo mukile buwa. 5 Mu kadimbo kakata* baadi muimulamikie mabaya a mutshi wa jenevriye, akupu aye nkuimulamika moso ôlo mukile buwa, na aye nkuimulengiesha na bifuatulo bia mabo na shene. 6 Dingi, balamikile mabue a muulo ebuwa bukile ku nshibo, ôlo abaadi mufubishe baadi akatukila ku Parvaime. 7 Akupu, balamikile ôlo ku nshibo, ku mitandalo, ku ntempa ya ku biibi, ku bimano na ku biibi, na aye nkukita bifuatulo bia bakeluba ku bimano.

8 Bakitshine Mbalo Ikile Kishila, bula buayo bubaadi mumune na bukata bua nshibo, kude 20, na bukata buayo bubaadi bua kude 20. Bemulamikile ntalanta* 600 ya ôlo mukile buwa. 9 Bushito bua ôlo ibaabadi bafubishe bua kukita nayo misumadi, bubaadi shekele* 50, na balamikile ôlo mu tudimbo tua kuiyilu.

10 Kunyima bakitshine bakeluba babidi mu Mbalo Ikile Kishila, aye nkuibalamika ôlo. 11 Bula bua mbaba ya baba bakeluba bubaadi bua kude 20. Lubaba lumune lua mukeluba a kumpala lubaadi bula bua kude itano, na lubaadi lukakume ku kimano kia nshibo, na lungi lubaba lubaadi bula bua kude itano, na lubaadi lukakume ku lubaba lua ungi mukeluba. 12 Na lubaba lumune lua ungi mukeluba lubaadi bula bua kude itano, na lubaadi lukakume ku kingi kimano kia nshibo, na lungi lubaba luaye lubaadi bula bua kude itano na lubaadi lukakume ku lubaba lua mukeluba a kumpala. 13 Mbaba ibuule ya bano bakeluba ibaadi bula bua kude 20, babaadi bemane mbatadiile mu Mbalo ya Kishila.

14 Bakitshine kilamba kia lushiko na buanda bui bulee, buanda bumongolokie, buanda bumonga pididii na kilamba kibuwa, na aye nkuikusola bakeluba.

15 Akupu, bakitshine misungo ibidi kumpala kua nshibo, ibaadi bula bua kude 35, na ku mutue kua musungo oso kubaadi bukata bua kude itano. 16 Bakitshine shene i bu mabue a mu nshingo, aye nkuiyituula ku mitue ya misungo. Bakitshine tukuba 100 tua grenade, aye nkulengiesha nato ma shene. 17 Bashimikile yaaya misungo kumpala kua ntempelo, umune ku mboko ibalume* na ungi ku mboko ibakashi,* wa ku mboko ibalume bewitanyine bu Yakine,* na wa ku mboko ibakashi bewitanyine bu Boaze.*

4 Kunyima bakitshine kilambuilo kia kiamo kia munyinga, kibaadi kude 20 mu bula, kude 20 mu buipi na kude 10 mu bula bua muiyilu.

2 Bakitshine Kalunga* ka kilonda kisunguulue. Kabaadi kishengu, kude 10 kubanga ku’yi nsongo na ku ingi nsongo, na kude 5 mu bula bua muiyilu, bibaadi abitungu moshi wa kupima nao wi bula bua kude 30 bua kuikefunyisha. 3 Na kubaadi tusupa tua kulengiesha kuushi kua milomo yako, tubaadi tuikefunyishe koso, tusupa ekumi bua kude umune mu mpese yoso ya Kalunga. Tusupa tubaadi mu milongo ibidi ibaadi ikitshibue pamune nako. 4 Kabaadi katuudibue pa ngombe ilume 12; ngombe 3 itadiile lupese lua kunundu, 3 itadiile lupese lua kupona nguba, 3 itadiile lupese lua kuushi, na 3 itadiile lupese lua kutunduka nguba, na Kalunga kabaadi katuudibue pa yanka, na bifuka biayo bioso bibaadi bitadiile munkatshi. 5 Na mupimbo wako ubaadi bukata bua eyasa* dimune; na ku nsongo kuako kubaadi kukitshibue nka bu ku milomo ku’ekopo, nka bu kilongo kia lise. Kabaadi kalombene kutuela bipimo bia mbaafu* 3 000.

6 Bakitshine dingi malonga ekumi bua kuitumpila mema, aye nkutuula atano ku mboko ibalume atano ku mboko ibakashi, babaadi abasuluila muanka bintu bibaabadi abafubisha bua milambu ya kushiika kaalo. Kadi mema a mu Kalunga, ba tshite muakuidi nyi babaadi abeafubisha bua kuitumpa.

7 Akupu bakitshine bituudilo bia bimunyi ekumi bia ôlo muyile bibaabadi bamulungule, aye nkuibituula mu ntempelo, bitano ku mboko ibalume, bitano ku mboko ibakashi.

8 Bakitshine dingi mesa ekumi aye nkuiatuula mu ntempelo, atano ku mboko ibalume, atano ku mboko ibakashi, aye nkukita bibakudi 100 bia ôlo.

9 Akupu aye nkukita lupango lua ba tshite muakuidi, lupango lukata na biibi bia lupango, na aye nkulamika kiamo kia munyinga ku biibi. 10 Na aye nkutuula Kalunga ku lupese lua mboko ibalume, katadiile pankatshi pa dia kuushi na kutunduka nguba.

11 Irame baadi mukite dingi bintu bia kubuaa nabio buto, bipao na bibakudi.

Biabia Irame bapudiishe mufubo oso ubaadi mukitshine nfumu Salomone mu nshibo ya Efile Mukulu a binyibinyi: 12 Misungo ibidi na bintu bia kulengiesha bi bu bibakudi bibaadi kunundu kua misungo ibidi; bintu bibidi bia kulengiesha bi bu bukondia bua kupuuta bintu bia kulengiesha bi bu bibakudi bibaadi kunundu kua misungo; 13 bikuba 400 bia grenade bua bintu bibidi bia kulengiesha bi bu bukondia, milongo ibidi ya bikuba bia grenade bua kintu kioso kia kulengiesha ki bu bukondia bua kupuuta bintu bia kulengiesha bi bu bibakudi bibaadi kunundu kua misungo; 14 matempu ekumi na malonga ekumi abaadi pa matempu; 15 Kalunga na ngombe ilume 12 ibaadi muushi muako; 16 na bintu bia kubuaa nabio buto, bipao, nsomo, na bintu bioso bibaadi Irame-abive mukitshine nfumu Salomone bia kiamo kia munyinga kiseneshe bua nshibo ya Yehowa. 17 Nfumu bebikitshine mu misheto ya ema i mu ebanda di pepi na muela wa Yordane, pankashi pa Sukote na Sereda. 18 Salomone bakitshine bino bina mufubo bioso bibungi bukile. Bushito bua kiamo kia munyinga tabubaadi abuukibua.

19 Salomone bakitshine bintu bioso bua nshibo ya Efile Mukulu a binyibinyi: Kilambuilo kia ôlo, mesa a kutuudila mikate ya kuleesha; 20 bitudilo bia bimunyi bia ôlo mukile buwa na malampi aabio bua kumunyika kumpala kua kadimbo ka munda ngofu, muyile bibaadi bitekiibue, 21 na bilongo, bimunyi na tumano, bibaadi bia ôlo, kuamba’shi bia ôlo mukile buwa, 22 bintu bia kushima nabio kaalo, bibakudi, makopo, na bintu bia kusemuina kaalo, bioso bibaadi bia ôlo mukile buwa; na kituelelo kia nshibo, biibi biakio bia munda bua Mbalo Ikile Kishila, na biibi bia nshibo ya ntempelo, bioso bia ôlo.

5 Biabia Salomone bapudiishe mufubo oso ubaadi na kia kukita bua nshibo ya Yehowa. Akupu, Salomone batuadile bintu bibaadi nshaye Davide muikashe bia kishila, na aye nkutuula kiamo kia arja, ôlo, na bingi bintu bioso mu tudimbo tua bintu bia muulo bia nshibo ya Efile Mukulu a binyibinyi. 2 Mu aa mafuku Salomone babungile bakulu ba Isalele, ba nfumu boso ba bisamba, ba nfumu ba bifuko bia bamashabo ba Isalele. Babafikile ku Yelusalema bua kusemuna musheto wa kilombeno wa Yehowa kukatukila mu Kibundi kia Davide, kuamba’shi Siyona. 3 Bana balume boso ba mu Isalele babebungile kumpala kua nfumu, ku musangelo ubaadi aukitshika mu mueshi wa musambobidi.

4 Biabia bakulu boso ba Isalele babafikile, na bena Levi nkuibuesha Musheto. 5 Abo nkusemuna Musheto, kashibo k’epema ka kufumankena, na bintu bioso bia kishila bibaadi mu kashibo k’epema. Ba tshite muakuidi na bena Levi nkuibisemuna. 6 Nfumu Salomone na kakongie koso ka Isalele kabaadi ketanyishue bua kufumankana naye, babaadi kumpala kua Musheto. Biabia babaadi balambule mikooko na ngombe ibungi bushi bia kubadika. 7 Akupu ba tshite muakuidi babatuudile musheto wa kilombeno wa Yehowa mu mbalo yao mu kadimbo ka munda ngofu ka nshibo, mu Mbalo Ikile Kishila, muushi mua mbaba ya bakeluba. 8 Mbaba ya bakeluba ibaadi ibaale kunundu kua mbalo ibaadi Musheto, biabia bakeluba babaadi babuikile Musheto na mitandalo yao. 9 Mitandalo ibaadi bula mu mushindo ubaadi nsongo yayo ayimueneka kukatukila mu Mbalo ya Kishila kumpala kua kadimbo ka munda ngofu, anka tayibaadi ayimueneka kukatukila paasha nya. Na i paapa mpa na lelo uno. 10 Mu Musheto tamubaadi kintu, anka penda mabue abidi abaadi Moyise mutuule muanka ku Horebe, pabaadi Yehowa mukite kilombeno na muilo wa Isalele, pabaabadi abatuuku mu Ejipitu.

11 Pabatuukile ba tshite muakuidi mu mbalo ya kishila (muanda ba tshite muakuidi boso babaadi paapa babaadi betooshe, sunga biekala’shi babaadi ba mu kisaka kinyi), 12 batuyimba boso bena Levi babaabadi abakunkusha kui Asafe, kui Emane, kui Yedutune, bana babo pamune na bakuabo babaadi bafuale bilamba bi buwa, mbakuate ma sembale, biombuanga bia mioshi na nseese, babaadi bemane ku lupese lua kutunduka nguba lua kilambuilo, ba tshite muakuidi 120 babaadi abele mpungi pamune nabo. 13 Nsaa ibaadi ayididi mpungi na ibaadi aiyimbi ba tuyimba bua kutumbula Yehowa pamune, na pabaadi apakaamina eyi dia mpungi, sembale na bingi biombuanga, nsaa ibaabadi abatumbisha Yehowa “muanda e buwa, na kifulo kiaye kia lulamato ki kuanka bua loso,” paapa ekumbi dibaudile mu nshibo ya Yehowa. 14 Ba tshite muakuidi tababaadi na mushindo wa kutungunuka na kufuba pa muanda wa ekumbi, muanda ntumbo ya Yehowa ibaudile mu nshibo ya Efile Mukulu a binyibinyi.

6 Mu yaaya nsaa Salomone nkuakula’shi: “Yehowa, buakuile’shi oshala mu mufito wibukopo. 2 Nakuibakila nshibo ya kinemo, bua’shi ikale mbalo yobe ya kushala bua loso.”

3 Akupu nfumu nkualuluka na nkubanga kuelela kakongie koso ka Isalele miabi, pabaadi kakongie koso ka Isalele kemane. 4 Aye nkuakula’shi: “Yehowa Efile Mukulu a Isalele atumbishibue, aye baadi mulee nshami Davide mulayilo mukanua mu’aye aye nabene, na beukumbasha kuiyasa diaye’ye nabene, akula’shi: 5 ‘Kubanga efuku dinaadi mutuushe muilo wande muiumbo dia Ejipitu, ntshi musangule kibundi mu bisamba bioso bia Isalele mua kuibaka nshibo bua’shi eshina diande dishale muanka, ntshi musangule muntu bua’shi ekale mukunkushi a muilo wande wa Isalele. 6 Anka nemusangule Yelusalema bua’shi eshina diande dikale muanka, na nemusangule Davide bua’shi akunkushe muilo wande wa Isalele.’ 7 Na nshami Davide baadi na lukalo lukata lua kuibaka nshibo bua eshina dia Yehowa Efile Mukulu a Isalele. 8 Anka Yehowa balunguile nshami Davide’shi: ‘We na lukalo lukata lua kuibaka nshibo bua eshina diande, na we mukite kalolo pa kuikala na lukalo lui biabia muishimba diobe. 9 Anka tokebaka ino nshibo, kadi muana oobe okatanda* nyi akebaka nshibo bua eshina diande.’ 10 Yehowa bakumbasha mulayilo ubaadi mulee, muanda napiana nshami Davide na nashala mu nkuasa a bufumu a Isalele, nka bu bibaadi Yehowa mulee. Dingi nayibaka nshibo bua eshina dia Yehowa Efile Mukulu a Isalele, 11 na natuulu muanka Mushete wi na mabue a kilombeno kibaadi Yehowa mukite na muilo wa Isalele.”

12 Akupu bayimeene kumpala kua kilambuilo kia Yehowa kumpala kua kakongie koso ka Isalele na aye nkuela maboko muiyilu. 13 (Muanda Salomone baadi mukite kiakuilo kia kiamo kia munyinga, aye nkuikituula munkatshi mua lupango. Kibaadi bula bua kude itano, bukata bua kude itano na bula bua muiyilu bua kude itano, aye nkuimana kuanka.) Bakunamine kumpala kua kakongie koso ka Isalele na aye nkuela maboko muiyilu, 14 nkuakula’shi: “Ô Yehowa Efile Mukulu a Isalele, takui Efile Mukulu e bu’be muiyilu sunga pa nsenga, akumbashaa kilombeno na aleshaa kifulo kia lulamato kui bafubi bobe abatambuka kumpala kobe n’eshimba diabo dioso. 15 Bokumbasha mulayilo ubodi mulee mufubi oobe, nshami Davide. Nnobe nabene* baadi mulee uno mulayilo, na lelo uno bu’eukumbasha n’eyasa diobe. 16 Na binobino, Ô Yehowa Efile Mukulu a Isalele, kumbasha mulayilo oobe ubodi mulee mufubi oobe Davide nshami pobokuile’shi: ‘Takuanaa kukutshikue muntu a mu lutandua* lobe ashala mu nkuasa a bufumu a Isalele, su bana bobe badimuka mu biabakitshi pa kutambukila mu miiya yande, nka bu bibodi mutambukie kumpala kuande.’ 17 Binobino, Ô Yehowa Efile Mukulu a Isalele, kita namu bia’shi mulayilo ubodi mulee mufubi oobe Davide ukumbane.

18 “Anka Efile Mukulu ashala binyibinyi pa nsenga su? Tala! Eyilu, oolo, eyilu dioso tandilombene nkukumbana; paapa ino nshibo inebaka i nkukumbana su! 19 Binobino teemesha luteko lua mufubi oobe na kuiyaya kuaye, Ô Yehowa Efile Mukulu ande, na teemesha musaase wa kuteka bukuashi na luteko lukuete kukuteka mufubi oobe kumpala kobe lelo uno. 20 Meso oobe ekale abuule atadiile ku ino nshibo bufuku na kanya, atadiile ku mbalo ibodi muakule’shi okatuulu eshina diobe, bua kuteemesha luteko alukitshi mufubi oobe, mutadiile ku ino mbalo. 21 Na, teemesha namu kuiyaya kua mufubi oobe bua kukimba bukuashi na kuiyaya kua muilo oobe wa Isalele nsaa yabakutekie mbatadiile ku ino mbalo, na kukatukila mu mbalo yobe yodi mushale muiyilu opushe, oolo, opushe na wetufuile lusa.

22 “Muntu p’akitshina muinaye muluisho na bamutshipisha mutshipo* na ekala muanyibue ku wawa mutshipo,* paakii ku wawa mutshipo* afika kumpala kua kilambuilo kiobe mu ino nshibo, 23 oteemeshe namu kukatukila muiyilu na okite kintu kampanda na otshibile bafubi bobe kiimu pa kunyoka muntu ebubi na pa kumufuishila biadi mukite pamutue waye, na pa kuakula’shi muntu mululame ta musoole muanda* na kumufuta muyile kululama kuaye.

24 “Na su batshokola muilo oobe wa Isalele kui muishikuanyi pamuanda’shi babatungunuka na kukukitshina miluisho, na babalukiila kodi babatumbisha eshina diobe, babakutekie na babeyaya kumpala kobe mu ino nshibo, 25 oteemeshe namu kukatukila muiyilu na obuikile muluisho wa muilo oobe wa Isalele na webalushe mu nsenga ibodi muibape abo na bamashabo kulu.

26 “Apekala eyilu difungie, na takui mpeshi muanda mbatungunukie na nkukitshina miluisho, na babatekie batadiile ku ino mbalo, babatumbisha eshina diobe na babalekie miluisho yabo pamuanda’shi buebayisha milongo,* 27 oteemeshe namu kukatukila muiyilu na obuikile muluisho wa bafubi bobe, wa muilo oobe wa Isalele, muanda webalongiesha pabitale eshinda dibuwa diabadia kutambukila na onokiesha mpeshi mu nsenga yobe ibodi mupe muilo oobe bu bupianyi.

28 “Su kipupa kia nsala kiatuela mu nsenga sunga kipupa kia mukumbo, lupapi lui bukopo alumishaa bikunuanga, maladi a mitshi, mpasu ya nshiye sunga mpasu ayiluishaa bikunuanga; sunga beshikuanyi babo bebaluisha mu kibundi su nkimune kia ku bibundi bia mu nsenga yabo,* sunga kuatuuka kingi kipupa kampanda sunga mukumbo kampanda, 29 luteko loso, kuiyaya koso akukitshi muntu oso yawa sunga muilo oobe oso wa Isalele, (muanda muntu oso auku dikienga diaye na busungu buaye) p’abebuesha maasa aabo batadiile ku ino nshibo, 30 oteemeshe namu kukatukila muiyilu, mbalo yobe yodi mushale, webafuile lusa na ofute muntu oso muyile mashinda aaye oso, muanda ouku eshimba diaye (obe bupenka nyi auku binyibinyi eshimba dia muntu), 31 bua’shi bakutshine pa kutambukila mu mashinda oobe mafuku oso abashala mu nsenga ibodi mupe bamashetu kulu.

32 “Dingi pabitale muntu muenyi shi a mu muilo oobe wa Isalele na mufikie mu nsenga i kula pa muanda w’eshina* diobe dikata, na pabitale eyasa diobe di bukome na mboko yobe yoole, afika na akuteka mutadiile ku ino nshibo, 33 oteemeshe namu kukatukila muiyilu, mbalo yobe yodi mushale, na okite kioso akikutekie muntu muenyi bua’shi bantu boso ba pa nsenga baukie eshina diobe na bakutshine nka bu abikitaa muilo oobe wa Isalele, na baukie’shi eshina diobe nditaminyibue mu ino nshibo inebaka.

34 “Su muilo oobe wenda mu kulua ngoshi na beshikuanyi babo muishinda diodi muibatume, na bakuteka batadiile ku kino kibundi kiodi musangule na batadiile ku nshibo inayibaka bua eshina diobe, 35 biabia oteemeshe namu kukatukila muiyilu luteko luabo na kuiyaya kuabo, na webakuashe.

36 “Su bakukitshina muluisho (muanda takui muntu shakitaa muluisho), webafiitshila munda na webalekieela mu maasa a beshikuanyi babo na beshikuanyi babo bebakuata benda nabo mu ingi nsenga, i kula sunga i pepi, 37 na batundula mu nsenga ibaabadi bende nabo’shi kibaabadi bakite ki bubi, balukiila kodi na beyaya mu nsenga ibaabadi bende nabo, bakula’shi, ‘tui bakite muluisho na tui bakite kilubilo, tui bakite bi bubi,’ 38 na balukiila kodi n’eshimba diabo dioso na anyima* aabo oso mu nsenga ya beshikuanyi babo babaadi bebakuate benda nabo, na bateka batadiile ku nsenga yabo ibodi mupe bamashabo kulu na ku kibundi kibodi musangule, na ku nshibo yandi muibakie bua eshina diobe, 39 biabia oteemeshe namu kukatukila muiyilu mbalo yodi mushale, luteko luabo na kuiyaya kuabo webakuashe, na ofuile muilo obe ukukitshine muluisho lusa.

40 Binobino Ô Efile Mukulu ande, meso oobe ekale namu abuule bua kumona, na matui oobe ekale aatemesha nteko y’abakitshi mu ino mbalo. 41 Binobino Ô Yehowa Efile Mukulu, tuela mu mbalo yobe ya kuikisha, obe na Mushete wa bukome bobe. Ô Yehowa Efile Mukulu, ba tshite muakuidi bobe bekale bafuale kipandilo, na basha lulamato bobe basankie bua mianda yoso ibuwa yokitshi. 42 Ô Yehowa Efile Mukulu, tosumbushenanga muedibue muimu oobe. Otentekieshe namu kifulo kiobe kia lulamato kui mufubi oobe Davide.”

7 Anka Salomone ki’apudisha kuteka, kaalo kabayikile muiyilu kashiika milambu ya kushiika kaalo na ingi milambu, na ntumbo ya Yehowa ibaudile mu nshibo. 2 Ba tshite muakuidi tababaadi na mushindo wa kutuela mu nshibo ya Yehowa, muanda ntumbo ya Yehowa ibaudile mu nshibo ya Yehowa. 3 Pabamuene muilo oso wa Isalele kaalo akayiki muiyilu na ntumbo ya Yehowa ayimueneka kunundu kua nshibo, babayinamine na bakupila mapala paashi mu nsenga mubaabadi balamikie mabue, na batumbula Yehowa “muanda e buwa, na kifulo kiaye kia lulamato ki kuanka bua loso.”

4 Paapa nfumu na muilo oso nkulambula milambu kumpala kua Yehowa. 5 Nfumu Salomone nkulambula ngombe 22 000 na mikooko 120 000. Biabia nfumu na muilo oso nkulambula nshibo ya Efile Mukulu a binyibinyi. 6 Ba tshite muakuidi babaadi bemane mu ma mbalo aabo a mudimo, bena Levi namu babaadi bakuate biombuanga bibaabadi abafubisha bua kuyimbila Yehowa. (Nfumu Davide bakitshine bino biombuanga bua kutumbula Yehowa, “muanda kifulo kiaye kia lulamato ki kuanka bua loso.” Babaadi abakula biabia pabaadi Davide atumbisha Efile Mukulu ku bukuashi buabio.*) Na ba tshite muakuidi babaadi abeele mpungi na eyi di bukopo kumpala kuabo, nsaa ibaadi bena Isalele boso mbemane.

7 Akupu Salomone baadi muikashe mbalo i munkatshi mua lupango i kumpala kua nshibo ya Yehowa ya kishila, muanda mu yaaya mbalo nyi mubaadi na kia kulambula milambu ya kushiika kaalo, na bipese bia muimu bia milambu ya butaale, muanda kilambuilo kia kiamo kia munyinga kibaadi Salomone mukite takibaadi bia kulombana milambu ya kushiika kaalo, milambu ya ntete, na bipese bia muimu. 8 Mu yaaya nsaa Salomone nkukita musangelo munda mua mafuku musambobidi na Isalele oso, kakongie kakile bukata ka bantu abakatukila ku Lebo-amate* mpa na ku Kibandabanda* kia Ejipitu. 9 Kadi mu efuku dia muanda* babakitshine kikongeno ki pabuakio, muanda babaadi balambule kilambuilo munda mua mafuku musambobidi, na abo nkukita musangelo munda mua mafuku musambobidi. 10 Mu efuku dia 23 dia mueshi wa musambobidi, baaluishe muilo ku mashibo aabo abafu’abasankanga na muloo ku mashimba bua mianda yoso ibuwa ibaadi Yehowa mukitshine Davide na Salomone na muilo waye wa Isalele.

11 Biabia, Salomone bapudiishe kuibaka nshibo ya Yehowa na nshibo* ya nfumu, na bintu bioso bibaadi Salomone na lukalo lua kukita pabitale nshibo ya Yehowa na nshibo yaye, aye nkuibikita bioso kalolo. 12 Yehowa bamuenekieele Salomone bufuku, aye nkumulungula’shi: “Napusha luteko lobe, na nasangula ino mbalo bu nshibo ya milambu. 13 Su nashita eyilu, na takui mpeshi, su natuma mpasu bua kubutula eumbo, na su natuma kipupa munkatshi mua muilo wande, 14 su muilo wande, wawa awitamina eshina diande weyisha na wanteka, wakimba mpala yande, na kuleka mianda yabo ibubi, paapa kukatukila muiyilu, nakebapusha na nakebafuila lusa bua miluisho yabo, na kupaasha eumbo diabo. 15 Biabia, meso ande aekala abuule, na matui ande aekala aateemesha nteko yabakitshi pa ino mbalo. 16 Ne musangule na kuikasha ino nshibo bu ya kishila, bua’shi eshina diande dikale muanka bua loso, na meso ande na eshimba diande abikala paapa bua loso.

17 “Anka obe, su otambuka kumpala kuande nka bu bibaadi nshobe Davide mutambukie, pa kukita kintu kioso kiankutumina eyi, na okookiela mayi ande na biimu biande, 18 paapa nakanyingisha nkuasa a bufumu bobe, nka bu binaadi mukite kilombeno na nshobe Davide panamulunguile’shi: ‘Takuanaa kukutshikue muntu a mu lutandua lobe ashala mu nkuasa a bufumu a Isalele.’ 19 Anka su oleka kundonda na tue mutumikile mayi ande na miiya yande yandi mutuule kumpala kobe, na buende mu kufubila bangi b’efile na kuibenamina, 20 nakakaasha Isalele mu nsenga yande yandi muibape, na nshibo yandi muikashe ya kishila bu’eshina diande nakeyikatusha ku meso kuande, nakeyiikasha bu kintu kia kubepuula* na kintu kia kusenga munkatshi mua miilo yoso. 21 Na ino nshibo ayikekala nshibo iluishibue. Muntu oso akakidi pepi nayo akeyitala na kukaanya pa kuakula’shi: ‘Buakinyi Yehowa bakitshi ino nsenga na ino nshibo bino?’ 22 Akupu abakakula’shi: ‘Mpa muanda babasumbushena Yehowa Efile Mukulu a bamashabo kulu baadi muibatuushe muiumbo dia Ejipitu, na babalamata bangi b’efile, babebenamina na babebafubila. Nyi buakinyi bebafuishila ano makienga oso.’”

8 Ku nfudiilo kua bipua 20 bibaadi Salomone muibakie nshibo ya Yehowa na nshibo* yaye aye nabene, 2 Salomone baadi muibakuule bibundi bibaadi Irame mumupe, na aye nkutuula muanka bena Isalele. 3 Dingi Salomone bayile ku kibundi kia Amate-soba, aye nkuikikuata. 4 Kunyima, aye nkunyingisha* kibundi kia Tademore mu kabaaka na bibundi bioso bia kulamina bintu bibaadi muibakie mu Amate. 5 Baadi dingi muibakie* Bete-orone a kunundu na Bete-orone a kuushi, bibaadi bibundi binyingishibue, na bimano, biibi na bibayilo, 6 na Baalate, mpa na bibundi bioso bia kulamina bintu bia Salomone, bibundi bioso bia matempu, bibundi bia bantu abatambushaa nfualasa, na bintu bioso bibaadi nabio Salomone lukalo bua kuibaka mu Yelusalema, mu Lebanone, na muiumbo dioso dibaadi ku matalua aaye.

7 Bua bantu boso babaadi bashale ba ku bena bena Ite, bena Amore, bena Perizi, bena Ivii, na bena Yebuse, bashibaadi bena Isalele, 8 bana babo babaadi bashale muiumbo, baba bashibaadi bena Isalele bayipee, Salomone baadi muibetanyishe bua kukita mifubo pa bukopo bu ba mpika mpa na lelo. 9 Anka Salomone tabaadi muikashe muina Isalele su ngumune mpika bua mudimo waye, muanda babaadi bilobo biaye bia ngoshi, bakata baye ba basalayi, na bakata ba bantu baye abatambushaa matempu na abatambushaa nfualasa. 10 Kubaadi bakata 250 ba bakunkushi ba Nfumu Salomone, babaadi kunundu kua bantu.

11 Salomone baadi dingi mukatushe muana mukashi a Faraone mu Kibundi kia Davide, akamutuula ku nshibo ibaadi mumuibakile, muanda bakuile’shi: “Sunga biekala’shi mmukashi ande, nta mulombene kushala mu nshibo ya Davide Nfumu a Isalele, muanda ma mbalo abaabadi batuule mushete wa Yehowa nga kishila.”

12 Akupu, Salomone balambuile milambu ya kushiika kaalo kui Yehowa pa kilambuilo kia Yehowa kibaadi muibakie kumpala kua kadimbo ka pa ntuelelo. 13 Balondele kiubishi kia ku efuku n’efuku na aye nkulambula milambu muyile muiya wa Moyise pabitale mafuku a Sabato, pa kubaluka kua mueshi na misangelo isatu ya ku kipua—Musangelo wa Mikate ishi Kitatusho, Musangelo wa Mbingo na Musangelo wa Bitanda. 14 Batuudile bisaka bia ba tshite muakuidi bua midimo yabo muyile muiya wa nshaye Davide, na batuudile bena Levi pa mbalo yabo ya mudimo bua kutumbisha Efile Mukulu na kufuba kumpala kua ba tshite muakuidi muyile kiubishi kia ku efuku dioso, na batuudile balami ba ku biibi mu bisaka biabo bua biibi bilekenelekene, muanda biabia nyi bibaadi abiakula muiya wa Davide muntu a Efile Mukulu a binyibinyi. 15 Tababakutshile kulonda muiya ubaadi nfumu mupe ba tshite muakuidi na bena Levi pabitale muanda oso wawa sunga pabitale mashibo a kulamina bintu. 16 Biabia mudimo wa Salomone ubaadi ulumbulue kalolo kakile, kubanga muifuku dibaabadi bakite kitako kia nshibo ya Yehowa mpa na payibapuile. Biabia nshibo ya Yehowa ibapuile yoso.

17 Kunyima kua biabia, Salomone bayile ku Esiyone-gebere na ku Elate ku bukunkula bua kalunga mu nsenga ya Edome. 18 Ku bukuashi bua bafubi baye, Irame batumiine Salomone mashuwa na bantu abauku kutambusha kalolo mashuwa pa mema. Babayile ku Ofire na bafubi ba Salomone, baata kuakua ntalanta* 420 ya ôlo na beyituadila Nfumu Salomone.

9 Ndalamumba a ku Sheba bapushishe nkumo pabitale Salomone, biabia bafikile mu Yelusalema bua kutompa Salomone na nkonko ibukopo.* Babafikile mu kumushindikila kui kibumbu kikata kia bantu, na tumelo tusemune muimu wa bome na ôlo ebungi bukile na mabue a muulo. Batuelele mui Salomone na amulungula mianda yoso ibaadi nayo muishimba. 2 Salomone bamualuluile ku nkonko yaye yoso, takui kintu su nkimune kibaadi kikambile* Salomone bua kumupatuluila.

3 Pabaadi ndalamumba a ku Sheba mumone binangu bia Salomone, nshibo ibaadi muibakie, 4 biakudia bia ku mesa aaye, mushindo ubaadi bafubi baye abashala pa mesa, mufubo wa kupa bantu biakudia ubaadi aukitshi bafubi baye pa kudia na nfuadilo aabo, beedi baye ba maalua na nfuadilo aabo, na milambu yaye ya kushiika kaalo ibaadi alambula pa kiubishi ku nshibo ya Yehowa, bibaadi bimukaanyishe ngofu. 5 Biabia aye nkulungula nfumu’shi: “Nkumo yandi mupushe mu nsenga yande pabitale mianda yodi mukite,* na pabitale binangu biobe ayikalanga ya binyibinyi. 6 Anka ntshikeele mukumiine yaaya nkumo mpa na panafiki na nebiimuena na meso ande. Talanga, tabekeele bandungule sunga kia pankatshi kia binangu biobe bikata. Mianda inamono ngikile kula nkumo yandi mupushe. 7 Bantu bobe mbasha muloo, na bafubi bobe mbasha muloo, abo abemanaa kumpala kobe nsaa yoso bateemeshanga binangu biobe! 8 Yehowa Efile Mukulu oobe atumbishibue, aye basanka n’obe, pa’ye kukutuula mu nkuasa aaye a bufumu bu nfumu abadi basangule kui Yehowa Efile Mukulu oobe. Bu bikaleshe’shi Efile Mukulu oobe mmufule Isalele, na akumiina’shi ekale kuanka bua loso, bakutuulu bu nfumu bua kusambisha na kululama na kukunkusha na kululama.”

9 Akupu aye nkupa nfumu ntalanta* 120 ya ôlo na muimu wi bungi wa bome, na mabue a muulo. Kubanga nka paapa takubaadi kufikie dingi muimu wa bome wi bungi bui biabia bu ubaadi ndalamumba a ku Sheba mupe Nfumu Salomone.

10 Dingi, bafubi ba Irame na bafubi ba Salomone babatuadile ôlo kukatukila ku Ofire, babatuadile dingi mitshi ya algume na mabue a muulo. 11 Nfumu nkukitshisha bikamiino bia nshibo ya Yehowa na bia nshibo* ya nfumu na mitshi ya algume, mpa na nseese na biombuanga bia mioshi bua tuyimba. Mu Yunda tamubaadi mubande kumueneka bintu bi biabia nya.

12 Nfumu Salomone bapeele dingi ndalamumba a ku Sheba bioso bibaadi nabio lukalo na bioso bibaadi mutekie, bintu bi bungi kukila na biinyi bibaadi mumutuadile. Akupu, ndalamumba a ku Sheba bakatukile na alukiila ku nsenga yaye pamune na bafubi baye.

13 Bushito bua ôlo bubaadi abufiki kui Salomone mu kipua kimune bubaadi bua ntalanta 666 ya ôlo, 14 kukatusha biabia bibaabadi abatuala kui ba nsunga abakitaa nyendo, kui bangi ba nsunga na kui ba nfumu boso ba bena Arabe na ba guvernere ba muiumbo, babaadi abatuadila Salomone ôlo na kiamo kia arja.

15 Nfumu Salomone baadi mukite ngabo ikata 200 ya ôlo musangie na kingi kiamo (ngabo oso baadi muate shekele* 600 ya ôlo musangie na kingi kiamo), 16 na ngabo ipeela* 300 ya ôlo musangie na kingi kiamo (ngabo oso mupeela baadi muate mine* isatu ya ôlo). Akupu nfumu baadi muiyituule mu Nshibo ya mu Mutamba wa Lebanone.

17 Nfumu baadi dingi mukite nkuasa a bufumu mukata a mibanga na aye nkulamika kuanka ôlo mukile buwa. 18 Kubaadi bikamiino bisamombo ku nkuasa a bufumu, na kubaadi kituudilo kia mikolo kia ôlo kilamate ku nkuasa, na ku mpese yoso ibidi ya nkuasa kubaadi ma mbalo a kutuudila maboko, na ntambue ibidi ibaadi imane ku mpese ya ma mbalo a kutuudila maboko. 19 Kubaadi ntambue 12 imane pa bikamiino bisamombo, ntambue umune ku lupese loso lua bikamiino bisamombo. Takui bungi bufumu bubaadi bukite nkuasa a bufumu e biabia. 20 Makopo oso a nfumu Salomone abaadi a ôlo, na bintu bioso bia mu Nshibo ya mu Mutamba wa Lebanone bibaadi bia ôlo mukile buwa. Takubaadi kintu su nkimune kikitshibue na kiamo kia arja, muanda kiamo kia arja takibaadi na muulo mu mafuku a Salomone. 21 Muanda mashuwa a nfumu abaadi aende ku Tarsise na bafubi ba Irame. Mususa umune mu bipua bisatu, aa mashuwa a ku Tarsise abaadi aafiki na ôlo, na kiamo kia arja, na mibanga, na nkima na tonyi tua nduba.

22 Biabia nfumu Salomone baadi mukile bangi ba nfumu boso ba pa nsenga ku bupeta na ku binangu. 23 Ba nfumu ba pa nsenga yoso babaadi abakimbi kuimonena na Salomone bua kupusha binangu biaye bibaadi Efile Mukulu a binyibinyi muele muishimba diaye. 24 Oso a kuabadi baadi amutuadila kia buntu: bintu bikitshibue na kiamo kia arja, bintu bikitshibue na ôlo, bilamba, bina ngoshi, muimu wa bome, nfualasa na mpunda; na bino bibaadi abitungunuka ku kipua kioso. 25 Salomone baadi na bikutu 4 000 bia nfualasa yaye, na matempu, na nfualasa 12 000, na baadi muibituule mu bibundi bia matempu na pepi na nfumu mu Yelusalema. 26 Salomone baadi mumune ba nfumu boso kukatukila ku Muela* mpa na ku nsenga ya bena Filistine na ku mukalo wa Ejipitu. 27 Nfumu bakitshine bia’shi kiamo kia arja kikale ki bungi mu Yelusalema nka bu mabue, na mitshi ya sedre ikale ibungi nka bu mitshi ya sikomore mu Shefela. 28 Na babaadi abatuadila Salomone nfualasa ya mu Ejipitu, na ya mu angi maumbo oso.

29 Ingi mianda ya Salomone, kubanga ku mbangilo mpa na ku nfudiilo, ngifundibue mu mayi abafundile mutemuki Natane, mu butemuki bua Akiya muina Shilo, na mu mianda itale bimonua bia Ido muntu amonaa mianda pabitale Yeroboame muana a Nebate. 30 Salomone baadi mukunkushe mu Yelusalema, kuamba’shi mu Isalele oso mushima munda mua bipua 40. 31 Akupu Salomone nkufua nka bu bamashaye kulu. Biabia babamushiikile mu Kibundi kia nshaye Davide, na muana aaye mulume Roboame nkufika nfumu pa mbalo yaye.

10 Roboame bayile ku Shekeme muanda Isalele oso baadi mufikie ku Shekeme bua kumutuula bu nfumu. 2 Mususa umune pabaadi Yeroboame muana a Nebate muibipushe (baadi ki’nka mu Ejipitu muanda baadi musuukie pa muanda wa nfumu Salomone), Yeroboame nkukatuka mu Ejipitu, nkualukiila. 3 Biabia babatumine bantu bua kumuitanyina. Akupu Yeroboame na Isalele oso mushima babayile kui Roboame na bakula’shi: 4 “Nshobe baadi muikashe kikumbo kietu bushito. Anka su bobofusha mufubo wibukopo wa nshobe na bopelepesha kikumbo ki bushito* kiadi muitutentekie, atukufubila.”

5 Aye nkuibalungula’shi: “Nualukiile kuandi kunyima kua mafuku asatu.” Biabia bantu nkuenda. 6 Nfumu Roboame nkuteka binangu kui bantu bakulu* babaadi bafubile nshaye Salomone pabaadi ki na muwa, ebepusha’shi: “Elango kinyi dianutuusha bua kumona bia kualula uno muilo?” 7 Abo nkumualula’shi: “Su welesha bu muntu ebuwa kui uno muilo na kuibasankisha, na webapa lualulo luibuwa, abekala bafubi bobe bua loso.”

8 Anka baadi mupele elango dibaadi bantu bakulu* bamupe, na aye nkuteka binangu kui ba nsongualume babaadi bakule naye na babaadi binobino bafubi baye. 9 Aye nkuibepusha’shi: “Elango kinyi dianutuusha bua kumona biatudia kualula uno muilo ubandungula’shi, pelepesha kikumbo kibaadi nshobe muitutentekie?” 10 Ba nsongualume babaadi bakule naye nkumulungula’shi: “Bino nyi abitungu’shi olungule muilo ubakulungula’shi, ‘nshobe baadi muikashe kikumbo kietu bushito, anka obe abitungu wetupelepeshe kianka’; bino nyi abitungu’shi webalungule: ‘Munue wande upeela awikala ukata kukila kifuka kia nshami. 11 Nshami baadi muinutentekie kikumbo ki bushito, anka ami nenukumbashila kuanka bungi bushito. Nshami baadi muinunyokie na nfimbo, anka ami nenunyoko na nfimbo ibukopo.’”

12 Yeroboame na muilo oso nkufika kui Roboame muifuku dia kasatu nka bu bibaadi nfumu muakule’shi: “Nualukiile kuandi muifuku dia kasatu.” 13 Anka nfumu nkuibalula bi bubi bukile. Biabia Nfumu Roboame bapelele elango dibaadi bantu bakulu* bamupe. 14 Aye nkuibalungula muyile elango dia ba nsongualume, akula’shi: “Nakekasha kikumbo kienu bushito bukile, na nakekukumbasha’nyi bungi bushito. Nshami baadi muinunyokie na nfimbo anka ami nenunyoko na nfimbo ibukopo.” 15 Biabia nfumu baadi mupele kuteemesha muilo, muanda Efile Mukulu a binyibinyi nyi baadi mukite bia’shi mianda ikitshikie biabia, bua kukumbasha eyi dibaadi Yehowa mulungule Yeroboame muana a Nebate kukiila kui Akiya muina Shilo.

16 Pabaadi Isalele oso mumone’shi nfumu bapele kuibateemesha, muilo ubaluluile nfumu’shi: “Nkinyi kiatupete kui Davide? Tatui na bupianyi mui muana a Yesee. Muntu oso alukiile kui b’efile baye Ô Isalele! Binobino kunkusha nshibo yobe Ô Davide!” Nyi bena Isalele nkualukiila ku mashibo* aabo.

17 Anka Roboame batungunukile na kumuna bena Isalele babaadi bashale mu bibundi bia Yunda.

18 Akupu Nfumu Roboame nkutuma Hadolame baadi atala baba babaabadi betanyishe bua kukita mifubo pa bukopo, anka bena Isalele nkumuasa mabue aye nkufua. Nfumu Roboame nkupeta mushindo wa kukaamina muitempu diaye bua kusuukila ku Yelusalema. 19 Kubanga nka paapa, bena Isalele mbatombokiele nshibo ya Davide mpa na lelo uno.

11 Pabaadi Roboame mufikie mu Yelusalema, mususa umune babungile nshibo ya Yunda na ya Benyamine, kubaadi bilobo bia ngoshi 180 000 bilongieshibue kalolo* bua nkalua ngoshi na Isalele, bua kualuisha Roboame bufumu. 2 Akupu eyi dia Yehowa dibafikile kui Shemaya muntu a Efile Mukulu a binyibinyi diakula’shi: 3 “Lungula Roboame muana a Salomone nfumu a Yunda na bena Isalele boso be mu nsenga ya Yunda na ya Benyamine bino, 4 ‘Yehowa bakula’shi: “Tabitungu nuende nukalue na bakuenu. Oso a kuanudi alukiile ku nshibo yaye, muanda nnami bakitshi bua’shi bino bikitshikie.”’” Biabia abo nkukookiela eyi dia Yehowa na nkualukiila ku mashibo aabo, tababayile mu kulua na Yeroboame nya.

5 Roboame bashalele mu Yelusalema, na aye nkuibaka bibundi binyingishibue mu Yunda. 6 Bibundi bibayibakile mbino: Beteleme, Etame, Tekoa, 7 Bete-sure, Soko, Adulame, 8 Gate, Maresha, Zife, 9 Adoraime, Lakishe, Azeka, 10 Soreya, Ayalone na Ebrone, bino nyi bibundi binyingishibue bibaadi mu Yunda na mu Benyamine. 11 Dingi, banyingiishe ngofu ma mbalo anyingishibue, aye nkuimutuula bakunkushi. Baadi atuulu muanka biakudia, muimu na nfinyo. 12 Batuudile mu bibundi bilekenelekene ngabo ikata na milumbu, na aye nkunyingisha biabia bibundi ngofu. Kisamba kia Yunda na kia Benyamine bibashadile ku matalua aaye.

13 Ba tshite muakuidi na bena Levi ba mu Isalele mushima babakatukile mu ma mbalo abaabadi bashale, abo nkufika mu kumukuatshishena. 14 Bena Levi babalekiele ma mbalo aabo a kudishila nyema na bintu biabo, abo nkuenda mu kushala mu Yunda na ku Yelusalema, muanda Yeroboame na bana baye babebabingile bua’shi tabafubilanga dingi Yehowa bu ba tshite muakuidi. 15 Akupu Yeroboame nkutuula baye ba tshite muakuidi bua ma mbalo e kunundu, na bua ba demo be bu bipembue na tuana tua ngombe tubaadi mukite. 16 Na bantu ba mu bisamba bioso bia Isalele babaadi abakumina kukimba Yehowa Efile Mukulu a Isalele, babalondele ba tshite muakuidi ku Yelusalema bua nkalambula Yehowa Efile Mukulu a bamashabo kulu milambu. 17 Babaadi banyingishe bufumu bua Yunda munda mua bipua bisatu, na abo nkukuatshishena Roboame muana a Salomone, muanda babaadi batambukile mu mashinda a Davide na a Salomone munda mua bipua bisatu.

18 Akupu Roboame nkuibakila Mahalate muana mukashi a Yerimote muana a Davide, nyinaye na Yerimote baadi Abihaile muana mukashi a Eliabe muana a Yesee. 19 Muenda mafuku aye nkumutandila bano bana: Yeushe, Shemariya na Zakame 20 Kunyima bayibakiile Maaka muikulu a Absalome. Kunyima kua mafuku aaye nkumuntandila: Abiya, Atai, Ziza na Shelomite. 21 Roboame baadi mufule Maaka muikulu a Absalome ngofu kukila bangi bakashi baye na makupi aaye. Baadi na bakashi 18 na makupi 60, na batandile bana balume 28, na bana bakashi 60. 22 Biabia Roboame basanguile Abiya muana a Maaka bu nfumu na bu mukunkushi munkatshi mua bakuabo, muanda baadi akiebe kumutuula bu nfumu. 23 Anka bakitshine mianda na binangu, aye nkutuma bangi bana baye balume mu bibundi bioso bia Yunda na bia Benyamine bibaadi binyingishibue, baadi muibape biakudia bibungi na aye nkuibaatshila bakashi bebungi.

12 Kunyima kua bufumu bua Roboame kunyingishibua ngofu na kunyima ku’aye kupeta bukome, baadi musumbushene miiya ya Yehowa, mpa na bena Isalele boso namu babakitshine nka biabia. 2 Mu kipua kia katano kia kumunana kua nfumu Roboame, nfumu Shishake a mu Ejipitu bafikile mu kutuuka Yelusalema ngoshi, muanda babakutshilue lulamato kui Yehowa. 3 Baadi na matempu 1 200, bantu abatambushaa nfualasa 60 000 na basalayi bebungi bukile babaadi mukatukie nabo mu Ejipitu—Bena Libi, bena Sukiyime na bena Etshopi. 4 Bakuatshile bibundi binyingishibue bia mu Yunda, nfudiilo a bioso aye nkufika ku Yelusalema.

5 Mutemuki Shemaya bayile kui Roboame na bakunkushi ba mu Yunda babaadi bebungie ku Yelusalema pa muanda wa Shishake, aye nkuibalungula’shi: “Yehowa amba bino: ‘Bu bianudi bansumbushene, ami namu ne muinusumbushene, nenutuulu mu maasa a Shishake.”’ 6 Paapa nfumu na bakunkushi ba Isalele nkuiyisha, abo nkuakula’shi: “Yehowa mmululame.” 7 Pabamuene Yehowa’shi babeyisha, eyi dia Yehowa dibafikile kui Shemaya diakula’shi: “Bu biabidi’shi babeyisha, ntanebabutula nya, na mu kapindi kapeela’mu nebapaasha. Ntampongoola nsungu yande mu Yelusalema kukiila kui Shishake. 8 Kadi abakafiki bafubi baye, biabia abakamono kuilekena kui pankatshi pa kunfubila na kufubila ba nfumu ba angi maumbo.”

9 Biabia nfumu Shishake a mu Ejipitu bafikile mu kutuuka Yelusalema ngoshi, aye nkuata bintu bia muulo bia mu nshibo ya Yehowa na bintu bia muulo bia mu nshibo ya nfumu, batshile bintu bioso mpa na ngabo ya ôlo ibaadi Salomone mukite. 10 Biabia Nfumu Roboame nkukita ngabo ya kiamo kia munyinga pa mbalo ya ngabo ya ôlo, na aye nkuiyipa bakata ba balami babaadi abalama ku kituelelo kia nshibo ya nfumu. 11 Nsaa yoso ibaadi nfumu afiki ku nshibo ya Yehowa, balami babaadi abatuele abakeyata, akupu babaadi abakeyalusha mu kadimbo ka balami. 12 Pa muanda’shi nfumu baadi muiyishe, Yehowa balekiele kuibafiitshila munda, na tabaadi mumuipee na muilo oso, kukatusha biabia, kubaadi ingi mianda ibuwa mu Yunda.

13 Nfumu Roboame baadi munyingishe bufumu buaye mu Yelusalema, baadi na bipua 41 pabaadi mufikie nfumu, na baadi mumunane munda mua bipua 17 mu Yelusalema, kibundi kibaadi Yehowa musangule mu bisamba bioso bia Isalele bu mbalo ya kutuula eshina diaye. Eshina dia nyinaye na nfumu Roboame dibaadi Naama muina Amone. 14 Kadi bakitshine mianda ibubi, muanda tabaadi na kitshibilo muishimba diaye kia kukimba Yehowa.

15 Mianda ya Roboame kubanga ku mbangilo mpa na ku nfudiilo, nginfundibue mu mayi a mutemuki Shemaya, na mu mayi a Ido muntu amonaa mianda, e mu mianda ya kuilondena kua bifuko ibaabadi bafunde. Kubaadi ngoshi mafuku oso pankantshi pa Roboame na Yeroboame. 16 Akupu Roboame nkufua nka bu bamashaye kulu na abo nkumushiika mu Kibundi kia Davide, na muana aaye mulume Abiya nkufika nfumu pa mbalo yaye.

13 Mu kipua kia 18 kia kumunana kua Nfumu Yeroboame, Abiya bafikile nfumu mu Yunda. 2 Baadi mumunane munda mua bipua bisatu mu Yelusalema. Eshina dia nyinaye dibaadi Mikaya muana mukashi a Uriyele a ku Gibeya. Dingi kubaadi ngoshi pankatshi pa Abiya na Yeroboame.

3 Biabia Abiya bayile mu ngoshi na kiluilo kia bilobo bia ngoshi 400 000 bilongieshibue* kalolo, Yeroboame namu balongiele basalayi baye mu milongo bua kulua naye, babaadi bilobo bia ngoshi 800 000 bilongieshibue kalolo bua kulua ngoshi. 4 Abiya bemeene ku muengie wa Semarayime wi mu nsenga ya ku miengie ya Efraime, aye nkuakula’shi: “Nteemesheyi, Ô Yeroboame na Isalele oso. 5 Tanuuku’shi Yehowa Efile Mukulu a Isalele mmutuule Davide bu nfumu a Isalele bua loso, aye na bana baye kukiila ku kilombeno kia mungua* su? 6 Kadi Yeroboame muana a Nebate mufubi a Salomone muana a Davide bebuele, aye nkutombokiela nfumu aaye. 7 Na bantu ba bisumanga, bantu bashibaadi na kia kukita, babebungile kuadi. Babakidile Roboame muana a Salomone bukome, muanda Roboame baadi ki nsongua, shi na eshimba dinyingie, na tabaadi mulombene kuibakambila.

8 “Binobino nukuete kumona’shi nui kutshokola bufumu bua Yehowa bui mu maasa a bana ba Davide, muanda nui kibumbu kikata, na nui na tuana tua ngombe tua ôlo tubaadi Yeroboame mukite bua’shi tuikale bu b’efile benu. 9 Nui babingie ba tshite muakuidi ba Yehowa bekulu ba Alona, na bena Levi, na nubatuulu benu ba tshite muakuidi, nka bu abikitaa bantu ba mu angi maumbo. Na muntu oso baadi afiki na muana a ngombe mulume, na mikooko ilume musambobidi, baadi afiki tshite muakuidi a b’efile ba madimi. 10 Kadi buetu’tue, Yehowa nyi Efile Mukulu eetu, na tatui bamusumbushene. Ba tshite muakuidi beetu bekulu ba Alona, bakuete kufubila Yehowa, na bena Levi bakuete kuibakuatshishena ku mudimo. 11 Abafitshisha milambu ya kushiika kaalo kui Yehowa ku namashika koso na ku kiolua, mikate ya kutuula mu milongo* i pa mesa a ôlo mukile buwa, bakuete kutembesha bimunyi bi ku bituudilo bia bimunyi bia ôlo ku kiolua kioso, muanda tukuete kulombasha mashito eetu bua Yehowa Efile Mukulu eetu. Kadi anue nui bamusumbushene. 12 Binobino talayi! Efile Mukulu a binyibinyi e neetu, kuete kuitukunkusha, pamune na ba tshite muakuidi baye bakuete kuela mpungi, bua kuitulungula bua’shi tubangie kulua nenu ngoshi. Biabia anue bena Isalele, tanuluanga na Yehowa Efile Mukulu a ba nkambua benu, muanda tanobesha su nkapeela.”

13 Kadi Yeroboame batumine bangi basalayi baye buabadia kukafuama kunyima kua bena Yunda, biabia basalayi baye babaadi kumpala kua bena Yunda, na baba babaadi bafuame babaadi kunyima kuabo. 14 Pabaadi bana balume ba mu Yunda bealuule, babamuene’shi abitungu balue ngoshi na basalayi be kumpala na be kunyima kuabo. Biabia bababangile kudidila Yehowa, nsaa ibaadi ba tshite muakuidi abeele mpungi na eyi di bukopo. 15 Bana balume ba mu Yunda babelele musaase wa ngoshi. Nsaa ibaadi bana balume ba mu Yunda beele musaase wa ngoshi, Efile Mukulu a binyibinyi bakitshine bia’shi Abiya na Yunda batshokole Yeroboame na bena Isalele boso. 16 Bena Isalele nkusuuka Yunda, na Efile Mukulu nkuibatuula mu maasa mua Yunda. 17 Abiya na bantu baye babayipayile bena Isalele bakile bungi, bana balume 500 000 balongieshibue* kalolo bia kulua ngoshi babafuile. 18 Biabia mu yaaya nsaa, bana balume ba mu Isalele babaadi bayishibue milongo, muanda bana balume ba mu Yunda babaadi bebatshokole bu bibaabadi bakulupile mui Yehowa Efile Mukulu a ba nkambua babo. 19 Abiya baadi mutungunukie na kuibingena na Yeroboame, aye nkumunyenga bino bibundi: Betele na tubibundi tumuifunyishe, Yeshana na tubibundi tumuifunyishe na Efraine na tubibundi tumuifunyishe. 20 Yeroboame tabaadi dingi mupetuule bukome mu mafuku a Abiya. Akupu Yehowa bamuipayile.

21 Kadi Abiya banyishile kupeta bukome, muenda mafuku, bayibakiile bakashi 14, aye nkutanda bana balume 22 na bana bakashi 16. 22 Ingi mianda ya Abiya, bikitshino biaye na mayi aaye, mbifundibue mu mayi a mutemuki Ido.

14 Akupu Abiya bafuile nka bu bamashaye kulu, na abo nkumushiika mu Kibundi kia Davide, na muana aaye mulume Asa nkufika nfumu pa mbalo yaye. Mu mafuku a kumunana kua Asa, nsenga ibekeele mu butaale munda mua bipua ekumi.

2 Asa bakitshine mianda ibuwa na ilulame ku meso kua Yehowa Efile Mukulu aaye. 3 Bakatuishe bilambuilo bia b’efile benyi na ma mbalo e kunundu, abumbula misungu ya kishila na kutshiba mitshi ya kishila.* 4 Dingi, balunguile bena Yunda buabadia kukimba Yehowa Efile Mukulu a ba nkambua babo, na buabadia kutumikila Miiya na mayi aaye. 5 Biabia bakatuishe mu bibundi bioso bia Yunda ma mbalo e kunundu na bilambuilo bia kushiikila kabanda. Mu mafuku aaye, bufumu bubekeele mu butaale. 6 Bayibakile bibundi binyingishibue mu Yunda, muanda eumbo dibaadi mu butaale, na takubaadi ngoshi munda mua biabia bipua, muanda Yehowa bamupeele butaale. 7 Balunguile bena Yunda’shi: “Tuibakieyi bino bibundi na tuibiifunyishe na bimano na bitenta, biibi na bibayilo, muanda eumbo dikii ku matalua eetu, bu biatudi bakimbe Yehowa Efile Mukulu eetu. Tui bamukimbe, na mmuitupe butaale ku mpese yoso.” Biabia, babaadi boobeshe mudimo wabo wa luibako.

8 Asa baadi na kiluilo kia bana balume 300 000 ba mu Yunda, babaadi na ngabo ikata na milumbu. Na mu Benyamine mubaadi bilobo bia ngoshi 280 000 bibaadi abituala ngabo ipeela* na babaadi abalu na mata.

9 Kunyima, Zera a mu Etshopi bafikile mu kulua nabo ngoshi na kiluilo kia basalayi 1 000 000 na matempu 300. Pabafikile ku Maresha, 10 Asa bayile mu kufumankana nabo, abo nkuilonga mu milongo bua kulua ngoshi mu ebanda dia Sefata ku Maresha. 11 Biabia Asa nkuidila kui Yehowa Efile Mukulu aaye na nkuakula’shi: “Ô Yehowa, obe okuashaa bantu, biabekala bebungi sunga bapeela, biabekala’shi be na bukome sunga kukutua bukome. Etukuashe namu, Ô Yehowa Efile Mukulu eetu, muanda tui bakulupile modi, na tubafiki mu kulua na kino kibumbu mu eshina diobe. Ô Yehowa, we Efile Mukulu eetu. Totadilanga namu muana a muntu bua’shi akukambile.”

12 Paapa Yehowa bakitshine bia’shi Asa na Yunda batshimune bena Etshopi. Na bena Etshopi nkusuuka. 13 Asa na muilo babatungunukile na kuibingena nabo mpa na ku Gerare, na bena Etshopi babaadi abende na kufua mpa na pababapuile boso, muanda Yehowa na kiluilo kiaye nyi babaadi abebayipaa. Akupu basalayi ba bena Yunda babapawile bintu bikile bungi. 14 Dingi, babaadi babutule bibundi bioso bibaadi bifunyishe Gerare, muanda Yehowa baadi muibakuatshishe moo ukata; na abo nkupaula bintu mu biabia bibundi bioso, muanda mubaadi bintu bibungi bia kupaula. 15 Abo nkutuelela’nyi bantu babaadi mu tushibo tua mapema na bimunuanga biabo, babatshile nyema ipeela ikile bungi na tumelo, kunyima abo nkualukila ku Yelusalema.

15 Binyi biabia, kikudi ki’Efile Mukulu nkuyikila Azariya muana a Odede. 2 Biabia bayile mu kufumankana na Asa, amulungula’shi: “Nteemeshe, Ô Asa na Yunda oso mushima na Benyamine! Yehowa ekala nenu anka su nubashala bamulamate. Su nubamukimbi, akakitshi bia’shi numupete, kadi su nubamusumbushena, akenusumbushena namu. 3 Munda mua mafuku ebungi, Isalele tabaadi na Efile Mukulu a binyibinyi, tabaadi na tshite muakuidi alongiesha sunga muiya. 4 Kadi pabaabadi mu makienga, babaadi balukiile kui Yehowa Efile Mukulu a Isalele na bamukimba, aye namu nkukita bia’shi bamupete. 5 Mu aa mafuku takubaadi muntu ende mu luendo mu butaale,* muanda kubaadi kafutakanyi munkatshi mua bantu ba mu maumbo oso. 6 Kisamba kibaadi akibutula kingi kisamba na kibundi akibutula kingi kibundi, muanda Efile Mukulu baadi muibatadiile mu kafutakanyi na mu makienga a mishindo yoso. 7 Kadi obe ikala mukankamane na tobofulanga, muanda okapete efuto bua mudimo oobe.”

8 Anka Asa kiapusha ano mayi na butemuki bua mutemuki Odede, banyingile eshimba na aye nkukatusha ma nkishi e butete mu nsenga yoso ya Yunda na ya Benyamine, na mu bibundi bia mu nsenga ya ku miengie ya Efraime bibaadi munyengie, aye nkulumbuula kilambuilo kia Yehowa kibaadi kumpala kua kadimbo ka pa ntuelelo a nshibo ya Yehowa. 9 Babungile pamune Yunda oso na Benyamine mpa na benyi babaadi munkatshi muabo, kukatukila mu nsenga ya Efraime, ya Manasee na ya Simeone, muanda babasukile mu Isalele bakile bungi benda kuadi, nsaa ibabamuene’shi Yehowa Efile Mukulu aaye e naye. 10 Biabia, babebungile pamune ku Yelusalema mu mueshi wa kasatu wa kipua kia 15 kia kumunana kua Asa. 11 Mu diadia efuku, babalambuile Yehowa milambu ya mu bintu bibaabadi banyengie, ngombe 700 na mikooko 7 000. 12 Dingi, babatuelele mu kilombeno bua kukimba Yehowa Efile Mukulu a bamashabo kulu, na eshimba diabo dioso na anyima* aabo oso. 13 Muntu oso shibaadi akimbi Yehowa Efile Mukulu a Isalele baadi na kia kuipayibua, biabikala mukata sunga mupeela, muana mulume sunga muana mukashi. 14 Biabia babakitshine mutshipo kui Yehowa na eyi dibukopo, na misaase ya muloo, na kudila kua mpungi na kua lusengua. 15 Na bena Yunda babasankile bua wawa mutshipo, muanda babaadi beukite na eshimba diabo dioso. Abo nkumukimba n’eshimba dimune, na aye nkukita bia’shi bamupete, biabia Yehowa batungunukile na kuibapa butaale ku mpese yoso.

16 Nfumu Asa baadi mpa na mukatushe nyinaye kulu Maaka muasu wa bu ndalamumba, muanda baadi mukite nkishi e butete bua lulanguilo lua mutshi wa kishila. Asa nkutshiba nkishi e butete a nyinaye kulu, aye nkumufingakasha na nkumushiika kaalo mu Ebanda dia Kidrone. 17 Anka ma mbalo e kunundu taabaadi akatushibue mu Isalele nya. Sunga mbiabia eshimba dia Asa dibaadi dishima kui* Efile Mukulu mu muwa* waye oso. 18 Na aye nkutuesha mu nshibo ya Efile Mukulu a binyibinyi bintu bibaadi aye na nshaye bekashe bia kishila: kiamo kia arja, ôlo, na bingi bintu bilekene. 19 Takubaadi ngoshi muiumbo, mpa na mu kipua kia 35 kia kumunana kua Asa.

16 Mu kipua kia 36 kia kumunana kua Asa, Nfumu Baasha a Isalele nkuenda mu kuluisha Yunda na nkubanga kuibaka* Rama bua kukutshishua muntu oso yawa bua kutuuka sunga kutuela mu nsenga ya nfumu Asa a Yunda. 2 Nyi Asa nkuata kiamo kia arja na ôlo bibaadi mu nshibo ya bintu bia muulo ya Yehowa na mu nshibo* ya nfumu, aye nkuibitumina Nfumu Ben-hadade a mu Siri baadi mushale mu Damase, akula’shi: 3 “Kui kilombeno pakantshi pande nobe na pankatshi pa nshami na nshobe. Nakutumina kiamo kia arja na ôlo. Fika oyipe kilombeno na nfumu Baasha a Isalele bua’shi akatukie kuandi.”

4 Ben-hadade nkuteemesha nfumu Asa na aye nkutuma bakata ba biluilo biaye bua kuluisha bibundi bia Isalele, na abo nkukuata kibundi kia Iyone, Dane, Abele-maime, na ma mbalo oso a kulamina bintu a mu bibundi bia Neftali. 5 Pabapushishe Baasha biabia, mususa umune balekiele kuibaka* Rama na aye nkuimika mifubo. 6 Akupu nfumu Asa nkuitanyisha Yunda oso, na abo nkusemuna mabue na mabaya a ku Rama abaadi Baasha ebaka nao, na nfumu Asa nkuibifubisha bua kuibaka* Geba na Misepa.

7 Mu yaaya nsaa, Anani muntu amonaa mianda bafikile kui Nfumu Asa a mu Yunda amulungula’shi: “Bu bibokulupila nfumu a Siri na tue mukulupile Yehowa Efile Mukulu oobe, nyi buakinyi kiluilo kia nfumu a Siri kibapanda mu maasa oobe. 8 Bena Etshopi, na bena Libi babaadi kiluilo kikile bukata, ki na matempu e bungi na bantu abatambusha nfualasa, kadi bu biboodi mukulupile Yehowa, baadi muibatuule mu maasa mobe. 9 Muanda meso a Yehowa aamonaa bioso abikitshika pa nsenga, bua kulesha bukome buaye* kui baba bamukulupile n’eshimba diabo dioso. Bu bibokitshi mianda kushi binangu, kubanga binobino, abekala’nka abakuluisha ngoshi.”

10 Anka Asa nkufiitshila muntu amonaa mianda munda na nkumuela mu lukano, muanda bakuatshile nsungu bua mianda ibamulunguile. Mu kiakia kipungo kimune, Asa babangile kukiengiesha bangi bantu munkatshi mua muilo. 11 Mianda itale Asa, kubanga ku mbangilo mpa na ku nfudiilo, ngifundibue mu Mukanda wa mianda ya ba Nfumu ba Yunda na ba Isalele.

12 Mu kipua kia 39 kia kumunana kuaye, Asa bapetele mukumbo ku ngua yaye, mpa na pabaadi pamukambile wawa mukumbo. Sunga mbibaadi akumbu, tabaadi mukimbe Yehowa, kadi bakimbile bantu ababukishenaa. 13 Akupu Asa nkufua nka bu bamashaye kulu, mu kipua kia 41 kia kumunana kuaye. 14 Biabia babamushiikile mu mashama akata abaadi muikitshine mu kibundi kia Davide, babamuladishile pa ka lusala pababaadi bapongoole muimu wa bome, na muimu wa mapembue ubaabadi bakite pa kusanga bintu bia mapembue bilekenelekene. Dingi babaadi bamutembeeshe elungulungu dia kaalo ke bukopo pa kumushiika.

17 Biabia, muana aaye mulume Yeoshafate nkufika nfumu pa mbalo yaye, akupu banyingiishe bufumu buaye mu Isalele. 2 Batuudile biluilo bia basalayi mu bibundi bioso binyishibue bia Yunda, aye nkutuula bisaka bia basalayi mu nsenga ya Yunda na mu bibundi bia Efraime bibaadi nshaye Asa munyengie. 3 Yehowa baadi mutungunukie na kuikala na Yeoshafate, muanda baadi mutambukile mu mashinda a nshaye kulu Davide, kushi kufubila b’efile ba Baale. 4 Muanda bakimbile Efile Mukulu a nshaye na kulonda miiya yaye, kushi kulonda bikitshino bia Isalele. 5 Yehowa baadi mutungunukie na kunyingisha bufumu buaye. Na bena Yunda boso babatungunukile na kupa Yeoshafate bia buntu, aye nkupeta bupeta na ntumbo ibungi. 6 Baadi na eshimba dinyingie bua kutambukila mu mashinda a Yehowa, biabia bakatuishe mpa na ma mbalo e kunundu na mitshi ya kishila* mu Yunda.

7 Mu kipua kia kasatu kia kumunana kuaye, bayitanyishe bano bakunkushi: Ben-haile, Obadia, Zekariya, Netanele na Mikaya, aye nkuibatuma buabadia kukalongiesha mu bibundi bia Yunda. 8 Bena Levi babaadi nabo mbano: Shemaya, Netanya, Zebadia, Asahele, Shemiramote, Yehonatane, Adoniya, Tobiya na Tobe-adoniya. Ba tshite muakuidi Elishama na Yehorame babaadi nabo. 9 Babayile na mukanda wa Miiya ya Yehowa, abo nkubanga kulongiesha mu Yunda. Babaadi befunye mu bibundi bioso bia Yunda, abend’alongieshanga munkatshi mua muilo.

10 Yehowa bakuatshiishe mafumu oso abaadi efunyishe Yunda moo ukata, na tababatompele dingi kulua na Yeoshafate. 11 Bena Filistine babatuadiile Yeoshafate bia buntu na makuta bu efuto. Bena Arabe babamutuadiile mikooko ilume 7 700 na bipembue 7 700 ya ku nyema yabo.

12 Yeoshafate baadi anyisha kupeta bukome, na batungunukile na kuibaka ma mbalo anyingishibue na bibundi bia kulamina bintu mu Yunda. 13 Baadi mulamishe bintu bibungi mu bibundi bia Yunda, baadi na basalayi, bilobo bia ngoshi mu Yelusalema. 14 Bano basalayi babaadi bebabungie muyile bifuko bia bamashabo, mu kisamba kia Yunda, Adena baadi mukata a ba nfumu ba bantu kinunu, baadi na bilobo bia ngoshi 300 000. 15 Yehokanane baadi ku bukunkushi buaye, baadi na basalayi 280 000. 16 Amasiya muana a Zikri, baadi muipaane aye nabene mu kufubila Yehowa, baadi namu ku bukunkushi buaye, baadi na bilobo bia ngoshi 200 000. 17 Mu kisamba kia Benyamine mubaadi Eliada, kilobo kia ngoshi, baadi na basalayi 200 000 babaadi abalu na mata na ngabo. 18 Na Yehozabade baadi ku bukunkushi buaye, baadi na basalayi 180 000 babaadi na bina ngoshi. 19 Bano basalayi nyi babaadi abafubila nfumu, kushi kubadika baba babaadi nfumu mutuule mu bibundi binyingishibue bia mu Yunda oso mushima.

18 Yeoshafate baadi na bupeta na ntumbo ikile bungi, anka bakitshine kilombeno kia bulunda na Akabe. 2 Biabia kunyima kua bipua, baadi mualale kui Akabe ku Samadiya, na Akabe nkumuipayila aye na bantu babaadi nabo mikooko na ngombe bikile bungi. Aye nkumushiishikila buabadia kukaamina mu kulua ngoshi na kibundi kia Ramote-gileade. 3 Akupu, Akabe Nfumu a Isalele nkuipusha Yeoshafate Nfumu a Yunda’shi: “Wende nami ku Ramote-gileade?” Aye namu nkumualula’shi: “Ne nka bu’be, muilo wande winka bu muilo oobe na atukukuatshishena mu ngoshi.”

4 Anka Yeoshafate nkulungula nfumu a Isalele’shi: “Banda kuipusha namu Yehowa pabitale uno muanda.” 5 Biabia nfumu a Isalele nkubunga batemuki, bantu 400, nkuibepusha’shi: “Abitungu nende mu kulua ngoshi na Ramote-gileade, su ntshendanga?” Abo nkumualula’shi: “Nda, na Efile Mukulu a binyibinyi akamutuulu mu maasa a nfumu.”

6 Yeoshafate nkuipusha’shi: “Muno ta mui mutemuki a Yehowa su? Tuipushe dingi kukiila kuadi.” 7 Biabia nfumu a Isalele nkulungula Yeoshafate’shi: “Mukii ungi muntu umune atudi balombene kuipusha Yehowa kukiila kuadi; anka ne mumushikue, muanda misango yoso t’atemukaa mianda i buwa pabintale, nka i bubi. Nyi Mikaya muana a Imela.” Ndio Yeoshafate nkumulungula’shi: “Nfumu ta mulombene kuakula muanda wi biabia.”

8 Biabia nfumu a Isalele nkuitanyina mufubi a muibalasa na nkumulungula’shi: “Fika bukidi na Mikaya muana a Imela.” 9 Binyi biabia, nfumu a Isalele na Yeoshafate nfumu a Yunda babaadi bashale muntu oso mu nkuasa aaye a bufumu, bafuale bilamba bia bufumu, babaadi bashale pa mbalo ya kukupiila ntete ku kituelelo kia kibelo kia Samadiya, na batemuki boso abaadi abatemuka kumpala kuabo. 10 Akupu Sedekiya muana a Kenaana bakitshine nsengua ya kiamo na amba’shi: “Yehowa bamba bino’shi, ‘Na ino nsengua okatapa* bena Siri mpa na puebapudisha.’” 11 Bangi batemuki boso abaadi abatemuka nka mushindo umune, bambanga’shi: “Nda ku Ramote-gileade na okatshokola; Yehowa akamutuulu mu maasa a nfumu.”

12 Biabia mukiendi bayile mu kuitanyina Mikaya bamulunguile’shi: “Tala! Batemuki boso babakula mianda i buwa pabitale nfumu. Nakusendeela, nobe namu mayi oobe ekale bu aabo, wakule mianda i buwa.” 13 Anka Mikaya nkuakula’shi: “Na bi Yehowa binyibinyi na muwa, kiakia akindungula Efile Mukulu ande nyi kiankakula.” 14 Akupu aye nkutuela mui nfumu, na nfumu nkumuipusha’shi: “Mikaya abitungu tuende mu kulua ngoshi na Ramote-gileade su tatuendanga?” Mususa umune, aye nkumualula’shi: “Nda na okatshokola; abakatuudibua mu maasa oobe.” 15 Biabia nfumu nkumulungula’shi: “Abitungu nkutshipishe misusa bungi kinyi bua’shi ondungule nka penda bia binyibinyi kushi kingi kintu muishina dia Yehowa?” 16 Biabia aye nkuakula’shi: “Namono bena Isalele boso mbapalakane ku miengie nka bu mikooko ishi na mulami. Yehowa akula’shi: ‘Bano bantu tabe na nfumu. Tadiila oso a kuabadi alukiile ku nshibo kuaye mu butaale.’”

17 Akupu nfumu a Isalele nkulungula Yeoshafate’shi: “Tanyikalanga mukulungule’shi, ‘T’atemukaa mianda i buwa pabintale, nka penda mianda i bubi su’?”

18 Akupu Mikaya nkuakula’shi: “Biabia, teemesha eyi dia Yehowa: Nemumone Yehowa mmushale mu nkuasa aaye a bufumu, na kiluilo kioso kia muiyilu nkimane ku mboko yaye ibalume na ku mboko yaye ibakashi. 19 Akupu Yehowa nkuakula’shi: ‘Nnanyi akadimbi Akabe Nfumu a Isalele bua’shi ende na akafuile ku Ramote-gileade?’ Na muikeyilu umune baadi akula muanda umune pabaadi ungi muikeyilu akula ungi muanda. 20 Akupu ungi muikeyilu* nkuifubuila, nkuimana kumpala kua Yehowa na nkuakula’shi, ‘Namudimbi.’ Yehowa nkuipusha’shi, ‘Webikitshi naminyi?’ 21 Aye nkualula’shi, ‘Nende na neyikashe bu kikudi akidimbanaa mukanua mua batemuki baye boso. Biabia aye nkuakula’shi, ‘Omudimbi, na dingi obesha. Nda na webikite.’ 22 Binobino Yehowa mmutuule kikudi akidimbanaa mukanua mua bano batemuki bobe, anka Yehowa bakula’shi dikienga adikufikila.”

23 Sedekiya muana a Kenaana nkuifubuila na nkukupila Mikaya kapata kuitama na nkuakula’shi: “Kikudi kia Yehowa kibankidi bua’shi kiakule nobe, kibakidila eshinda kinyi?” 24 Mikaya nkualula’shi: “Tala! Okamono eshinda diakibakidila muifuku diokatuele mu kadimbo ka munda ngofu bua kufuama.” 25 Akupu nfumu a Isalele nkuakula’shi: “Ata Mikaya omualushe kui Amone nfumu a kibundi na kui Yoashe muana a nfumu. 26 Webalungule’shi: ‘Nfumu bakula’shi: “Elayi uno muntu mu lukano na nuikale anumupa mukate upeela na mema mpa na pankalukiila mu butaale.”’” 27 Mikaya nkuakula’shi: “Su walukiila mu butaale, Yehowa ta muisambe nami.” Akupu aye nkulombasha’shi: “Anue bantu boso, lamiinayi uno muanda.”

28 Biabia nfumu a Isalele na Yeoshafate nfumu a Yunda nkuenda ku Ramote-gileade. 29 Nfumu a Isalele nkulungula Yeoshafate’shi: “Nedimbi bu ungi muntu na ntuele mu ngoshi, anka abitungu ofuale bilamba biobe bia bufumu.” Biabia nfumu a Isalele nkuidimba bu ungi muntu na abo nkutuela mu ngoshi. 30 Binobino nfumu a Siri baadi mutumine bakata baye ba matempu eyi’shi: “Tanuluanga na muntu su ngumune, biabikala musalayi sunga mukata a basalayi, kukatusha penda nfumu a Isalele.” 31 Anka bakata ba matempu baki’abamono Yeoshafate, abambile’shi: “Nyi nfumu a Isalele.” Biabia abalulukile bua kulua naye; na Yeoshafate nkubanga kuela misaase bua’shi bamukuashe, paapa Yehowa nkumukuasha. Musango umune Efile Mukulu nkukita bia’shi bakatukie kuadi. 32 Pabaadi bakata ba matempu bamone’shi ta nfumu a Isalele, mususa umune abalekiele kumulonda.

33 Anka ungi muntu nkuela mukietue waye kushi kuuka, na nkuasa nfumu a Isalele pankatshi pa malunga a ekotshi diaye dia tu biamo. Biabia nfumu nkulungula muntu atambushaa etempu diaye’shi: “Ekonye na otuukie nami mu ngoshi,* muanda natapika bi bubi ngofu.” 34 Ngoshi ibafikile bukopo bukile mu diadia efuku dioso, na bibaadi abitungu kukuatshishena nfumu a Isalele bua’shi ashale muimane mu etempu, bua kumona bena Siri mpa na ku kiolua, na aye nkufua pa kupona kua nguba.

19 Akupu, Yeoshafate Nfumu a mu Yunda nkualukiila ku nshibo* kuaye mu butaale mu Yelusalema. 2 Yehu muana a Anani muntu amonaa mianda, bayile mu kufumankana na nfumu Yeoshafate na amulungula’shi: “Omono’shi bi buwa kukuasha bantu bebubi na kufula baba bashikue Yehowa su? Nyi buakinyi Yehowa bakufiitshila munda. 3 Sunga mbiabia, Efile Mukulu mmumone mianda ibuwa modi, we mukaashe mitshi ya kishila* muiumbo, na we mulumbuule eshimba diobe bua kukimba Efile Mukulu a binyibinyi.”

4 Yeoshafate baadi mutungunukie na kushala mu Yelusalema, aye nkubanga dingi kuenda na kutala bantu, kubanga ku Beere-sheba mpa na ku nsenga ya miengie ya Efraime, bua kuibalusha kui Yehowa Efile Mukulu a ba nkambua babo. 5 Batuudile dingi ba nsushi muiumbo, mu bibundi bioso binyingishibue bia Yunda, mu kibundi na kibundi. 6 Aye nkulungula ba nsushi’shi: “Nutaluule kalolo mianda yoso yanukitshi, muanda tanukuete kusambisha bua muntu, kadi nukuete kusambisha bua Yehowa, na e nenu nsaa yoso yanutshibi biimu. 7 Binobino kutshina kua Yehowa kuikale nenu, ikalayi badimukie mu bioso bianukitshi, muanda Yehowa Efile Mukulu eetu mmululame na te na ntondo, takumiinaa kutshibibua milomo.”

8 Dingi Yeoshafate batuudile mu Yelusalema bangi ba ku bena Levi na ba tshite muakuidi na bangi ba ku ba nfumu ba bifuko bia bena Isalele, buabadia kufubila Yehowa bu ba nsushi, na bua kusambisha bilumbu bia bantu ba mu Yelusalema. 9 Aye nkuibatumina eyi na nkuamba’shi: “Talayi bianudia kukita mianda mu kutshina kua Yehowa na lulamato n’eshimba dienu dioso: 10 Nsaa yoso ayifiki bakuenu bashale mu bibundi biabo na kilumbu kia kuponesha mase, sunga pabitale kuipaa muiya, eyi sunga bitshibilo, abitungu nuibadimushe bua’shi tabekalanga bapiile ku meso kua Yehowa, bisumanga nsungu yaye ayinufuila anue na bakuenu. Biabia nyi abitungu’shi nukite bua’shi tanuikalanga bapiile. 11 Amariya mukata a batshite muakuidi ngi enukunkusha mu mianda yoso itale Yehowa. Zebadia muana a Ismaele mukata a nshibo ya Yunda, ekala akunkusha mianda yoso itale nfumu, na bena Levi abekala abafubu bu bakunkushi benu. Ikalayi banyingie, nuipaane ku mudimo, na Yehowa ekale na baba boso abakitshi mianda ibuwa.”

20 Kunyima kua biabia, bena Moabe na bena Amone, pamune na bangi bena Amonime,* babafikile mu kulua ngoshi na Yeoshafate. 2 Biabia babalunguile Yeoshafate’shi: “Kui kibumbu kikata kia bantu abafiki mu kulua nobe, abakatukila ku nsenga ya kalunga* mu Edome, be mu Asasone-tamare, kuamba’shi mu Ene-gedi.” 3 Paapa moo wi bukopo nkukuata Yeoshafate, aye nkuata kitshibilo kia kukimba Yehowa. Biabia aye nkulungula bena Yunda boso buabadia kuishidika. 4 Akupu bantu ba mu Yunda nkuibunga pamune bua kuipusha Yehowa. Babakatukile mu bibundi bioso bia Yunda bafika bua kuipusha Yehowa.

5 Paapa Yeoshafate bayimene kumpala kua kakongie ka Yunda na ka Yelusalema ku nshibo ya Yehowa, kumpala kua lupango lupia. 6 Na aye nkuakula’shi:

“Ô Yehowa Efile Mukulu a bamashetu kulu! Obe we Efile Mukulu muiyilu. Na we na matalua pa mafumu oso a bisamba. Mu eyasa diobe mui bukome, na takui muntu a kukukambila. 7 Ô Efile Mukulu eetu! Tobodi mubingie bantu ba mu ino nsenga kumpala kua muilo oobe wa Isalele, na obe nkuiyipa bekulu* ba Abalahama kuuku oobe bu bupianyi bua loso? 8 Babaadi bemushale, na abo nkukuibakila mbalo ya kishila bua eshina diobe, bamba’shi: 9 ‘Su malua etukuata, biabikala ku lupete lua ngoshi, dinyoka, kipupa sunga nsala, na su tuafika mu kuimana kumpala kua ino nshibo na kumpala kobe (muanda eshina diobe di mu ino nshibo) na tuakuitamina bua kuitukuasha ku malua eetu, wetuteemeshe namu na wetupaashe.’ 10 Binobino tala bano bantu ba bena Amone, bena Moabe na bantu ba ku nsenga ya miengie ya Seyire. Tobodi mukumiine bua’shi bena Isalele bebatuukie ngoshi pabaabadi abakatuka mu nsenga ya Ejipitu. Babaadi beebekumbe, na tababaadi bebabutule. 11 Binobino ngiu t’abetualuisha bubi ku buwa, p’abo kufika mu kuitubinga mu nsenga yobe ibodi muitupe bu bupianyi. 12 Ô Efile Mukulu eetu! Tuebatshibila namu kiimu su? Muanda tatui na bukome kumpala kua kino kibumbu kikata kia bantu bakuete kufika mu kuituluisha. T’atuuku kiatudia kukita, kadi meso eetu ngatadiile kodi.”

13 Mu yaaya nsaa, bena Yunda boso babaadi bemane kumpala kua Yehowa, pamune na bakashi babo, bana babo, mpa na bana babo bakinga.

14 Akupu, nka muamua munkatshi mua kakongie, kikudi kia Yehowa nkuyikila Yahaziyele muana a Zekariya, muana a Benaya, muana a Yeyele, muana a Matanya muina Levi a mu bana ba Asafe. 15 Aye nkuakula’shi: “Nteemesheyi anue boso bena Yunda, na anue bantu ba mu Yelusalema, mpa na obe nfumu Yeoshafate! Yehowa enulungula bino’shi: ‘Tanutshinanga sunga kusuusa pa muanda wa kino kibumbu kikata kia bantu, muanda ngoshi nta ngienu, anka ngia Efile Mukulu. 16 Malooba nualale mu kufumankana nabo. Abakafikila mu eshinda dia Zize, na anukebapete ku nfudiilo kua ebanda di kumpala kua kabaaka ka Yeruwele. 17 Tabitungu’shi nulue nabo ino ngoshi. Nushale bemane kushii kusaana, numone abinupaasha Yehowa. Ô Yunda na Yelusalema, tanutshinanga sunga kusuusa. Malooba nuende mu kufumankana nabo, na Yehowa ekala nenu.’”

18 Musango umune Yeoshafate bayinamine, aye nkukupila mpala paashi, bena Yunda boso na bantu ba mu Yelusalema babeyelele paashi kumpala kua Yehowa bua kulanguila Yehowa. 19 Akupu, bena Levi babaadi bekulu ba Kehate na bena Kora, babebuele bua kutumbisha Yehowa Efile Mukulu a Isalele na eyi di bukopo.

20 Babakatukile ku namashika buee muifuku dibalondele, abo nkuenda mu kabaaka ka Tekoa. Pabaabadi abatuuku, Yeoshafate bemeene kumpala kuabo na akula’shi: “Nteemesheyi, Ô Yunda na anue bantu ba mu Yelusalema! Tuulayi lukumiino mui Yehowa Efile Mukulu eenu bua’shi numone bia kushala banyingie. Tuulayi lukumiino mui batemuki baye, paapa mianda yenu yoso ayende kalolo.”

21 Kunyima kua’ye kuisamba na muilo, batuudile bantu buabadia kuyimbila Yehowa na kumutumbisha mbafuale bilamba bia kishila, nsaa ibaabadi abatambuka kumpala kua basalayi, bambanga’shi: “Tumbulayi Yehowa, muanda kifulo kiaye kia lulamato ki kuanka bua loso.”

22 Pabaababangile kuyimba na muloo oso ngono ya kutumbisha Efile Mukulu, Yehowa batuudile mu kateo bena Amone, bena Moabe na bantu ba ku nsenga ya ku mienge ya Seyire babafikile mu kulua na Yunda, na abo nkubanga kuiyipayishena. 23 Bena Amone na bena Moabe, babalulukiile bantu ba ku nsenga ya ku miengie ya Seyire, abo nkubanga kulua nabo bua kuibabutula na kuibashimisha. Pababapuile kuipaa bantu ba ku Seyire, bababangile kuiyipayishena abo banabene.

24 Kadi pabafikile bena Yunda pa kitenta kia mulami kia mu kabaaka, na abo nkutala kubaadi kibumbu kikata kia bantu, babamuene bitanda biabo mbilale mu nsenga. Takubaadi muntu e na muwa su ngumune. 25 Biabia Yeoshafate na muilo waye, babafikile mu kupaula bintu biabo, babapetele bintu bibungi, bilamba na bintu bi buwa bibaabadi baate mpa na pabaabakutshile bia kuibisemuna. Babakitshine mafuku asatu bua kutunda bintu bibaabadi bapaule, muanda bibaadi bikile bungi. 26 Mu efuku dia kananka, babaadi bebungie mu Ebanda dia Belaka, na abo nkutumbisha Yehowa kuakua. Nyi buakinyi babaudikile yaaya mbalo bu Ebanda dia Belaka,* abeditaaminaa biabia mpa na lelo.

27 Akupu, bana balume boso ba mu Yunda na ba mu Yelusalema na Yeoshafate baadi kumpala kuabo babalukiile ku Yelusalema na muloo, muanda Yehowa baadi muibekashe na muloo p’aye kutshokola beshikuanyi babo. 28 Biabia babafikile mu Yelusalema abend’ayimbanga na biombuanga bia mioshi, nseese na mpungi, abo nkuenda ku nshibo ya Yehowa. 29 Pabaadi mafumu oso a mu maumbo apushe’shi Yehowa baalu na beshikuanyi ba bena Isalele, abapushile moo wibukopo bua Efile Mukulu. 30 Biabia bufumu bua Yeoshafate bubekeele mu butaale, muanda Efile Mukulu aaye batungunukile na kumupa butaale ku mpese yoso.

31 Yeoshafate batungunukile na kumunana mu Yunda. Baadi na bipua 35 pabafikile nfumu, na baadi mumunane munda mua bipua 25 mu Yelusalema. Eshina dia nyinaye dibaadi Azuba muana a Shileki. 32 Batungunukile na kulonda eshinda dia nshaye Asa. Ta baadi muimukatukie, na bakitshine mianda i buwa ku meso kua Yehowa. 33 Anka ma mbalo e kunundu taabadi akatushibue, na bantu tababaadi babande kuata kitshibilo kia kulanguila Efile Mukulu a bamashabo kulu.

34 Ingi mianda ya Yeoshafate, kubanga ku mbangilo mpa na ku nfudiilo, ngifundibue mu mayi a Yehu muana a Anani, e mu Mukanda wa ba Nfumu ba Isalele. 35 Kunyima kua biabia, Yeoshafate Nfumu a Yunda bakitshine kilombeno na Nfumu Akaziase a mu Isalele baadi akitshi mianda ibubi. 36 Biabia baadi muipushene naye bua kukita mashuwa bua kuenda ku Tarsise, na babakitshine mashuwa mu Esiyone-gebere. 37 Anka Eliezere muana a Dodawaku a ku Maresha, baadi mutemukile Yeoshafate amulungula’shi: “Bu bibokitshi kilombeno na Akaziase, Yehowa aluisha mifubo yobe.” Biabia mashuwa abeyinyine mu mema, ao nkuluila, taabamuene’nyi bia kuenda ku Tarsise.

21 Akupu Yeoshafate nkufua nka bu bamashaye kulu, na aye nkushiikibua nka bu bamashaye kulu mu Kibundi kia Davide; na muana aaye Yehorame nkufika nfumu pa mbalo yaye. 2 Bakuabo, bana balume ba Yeoshafate babaadi: Azariya, Yekiele, Zekariya, Azariya, Mikaele na Shefatia. Bano boso babaadi bana balume ba Yeoshafate Nfumu a Isalele. 3 Na nshabo bebapeele biabuntu bibungi bia kiamo kia arja, ôlo na bintu bia muulo, pamune na bibundi binyingishibue bia mu Yunda. Kadi bufumu bebupeele Yehorame muanda aye nyi baadi muana a kumpala.

4 Pabaadi Yehorame mubangie kukunkusha pa mbalo ya nshaye, banyingiishe bufumu buaye p’aye kuipaa bakuabo balume boso, mpa na bangi bakunkushi ba mu Isalele. 5 Yehorame baadi na bipua 32 pabafikile nfumu, na aye nkumunana mu Yelusalema munda mua bipua muanda. 6 Baadi mulonde eshinda dia ba nfumu ba Isalele, nka bu bibaadi bikite baba ba mu nshibo ya Akabe, muanda baadi muibakile muana mukashi a Akabe, na baadi mutungunukie na kukita mianda ibubi ku meso kua Yehowa. 7 Anka Yehowa tabaadi mukumiine kufuishila nshibo ya Davide kabutu, pa muanda wa kilombeno kibaadi mukite na Davide, muanda baadi mumulee bua kumupa kimunyi, aye na bana baye bua loso.

8 Mu mafuku a Yehorame, Edome baadi mutombokiele Yunda na aye nkutuula aaye nfumu. 9 Biabia Yehorame na bakata baye ba basalayi nkusabuka nkuenda kuakua na matempu aaye oso, aye nkuibua bufuku na nkutshokola bena Edome babaadi bamuifunyishe, na bakata ba matempu. 10 Anka Edome mmutungunukie na kutombokiela Yunda mpa na lelo uno. Libena namu baadi mumutombokiele mu aa mafuku, muanda baadi mutombokiele Yehowa Efile Mukulu a ba nkambua baye. 11 Bakitshine’nyi ma mbalo e kunundu ku miengie ya Yunda bua kutakula bantu ba mu Yelusalema bua kutambuka masandi a mu kikudi, aye nkupambusha bena Yunda.

12 Nfudiilo a bioso, bapetele mukanda aukatukila kui mutemuki Eliya, ubaadi awamba’shi: “Tala abiakula Yehowa Efile Mukulu a Davide nkambua oobe, ‘Tue mutambukile mu mashinda a nshobe Yeoshafate, sunga mu mashinda a Asa Nfumu a Yunda. 13 Anka, okuete kutambukila mu mashinda a ba nfumu ba Isalele, na otakula Yunda na bantu ba mu Yelusalema bua kutambuka masandi a mu kikudi nka bu masandi a mu nshibo ya Akabe, na we muipee mpa na bakuenu balume ba mu nshibo ya nshobe, babaadi bakukile. 14 Biabia, Yehowa akanyoko muilo oobe, bana bobe na bakashi bobe, na akaluisha bintu biobe bioso. 15 Okakumbu mikumbo ibungi efuku dioso, mpa na mukumbo wa mala, mpa na apakakutuuku mala paasha.”’

16 Akupu, Yehowa baadi mutakule bena Filistine na bena Arabe babaadi pepi na bena Etshopi buabadia kuluisha Yehorame. 17 Babayile mu Yunda bemutuela pa bukopo, abo nkunyenga bintu bioso bibaadi mu nshibo* ya nfumu, na abo nkukuata bakashi baye na bana baye, bashadile penda na muana aaye umune a mukala, Yeokaze.* 18 Kunyima kua biabia bioso, Yehowa bamukumbiishe mukumbo wibukopo wa mala, wabashibaadi na mushindo wa kubuka. 19 Kunyima kua mafuku, kunyima kua bipua bibidi kukila, mala aaye abatuukile pa muanda wa wawa mukumbo, na wawa mukumbo nkumukambila, aye nkufua. Muilo waye taubaadi umutembeeshe elungu dia kaalo pa kumushiika bu bibaabadi bakitshine bamashaye kulu. 20 Baadi na bipua 32 pabafikile nfumu, aye nkumunana mu Yelusalema munda mua bipua muanda. Takui muntu su ngumune baadi muinyongole pabaadi mufue. Biabia babamushiikile mu Kibundi kia Davide, kadi kushi mu mashama a ba nfumu.

22 Biabia bantu ba mu Yelusalema babatuudile muana aaye mukinga ku boso Akaziase bu nfumu pa mbalo yaye, muanda kisaka kia bantomboshi kibafikile mu kishalelo na bena Arabe, kibayipayile bana baye bakulu boso. Biabia Akaziase muana a Yehorame nkubanga kukunkusha bu nfumu mu Yunda. 2 Akaziase baadi na bipua 22 pabafikile nfumu, na aye nkumunana mu Yelusalema munda mua kipua kimune. Eshina dia nyinaye dibaadi Ataliya muikulu* a Omeri.

3 Aye namu baadi mulonde eshinda dia nshibo ya Akabe, muanda nyinaye baadi amupa binangu bia kukita mianda ibubi. 4 Baadi mutungunukie na kukita mianda ibubi ku meso kua Yehowa nka bu nshibo ya Akabe, muanda abo nyi babafikile bantu ba kumupanga malango kunyima kua lufu lua nshaye, na abo nkumuipayisha. 5 Balondele elango diabo, aye nkuenda na Yehorame muana a Nfumu Akabe a mu Isalele mu kuluisha Azaele Nfumu a Siri ngoshi ku Ramote-gileade. Kuakua nyi kubaadi beedi ba mikietue batape Yehorame. 6 Aye nkualukiila ku Izreele bua kuibukisha malonda abaabadi bamutape ku Rama, pabaadi mulue ngoshi na Azaele Nfumu a Siri.

Akaziase* muana a Yehorame nfumu a Yunda, bayile ku Izreele mu kumona Yehorame muana a Akabe muanda babaadi bamutape.* 7 Kadi Efile Mukulu bakitshine bia’shi, nsaa ayende Akaziase kua Yehorame akafuile kuakua. Pabafikile Akaziase kuanka, babayile na Yehorame bua nkafumankana na Yehu muikulu* a Nimeshi, abaabadi beele muimu kui Yehowa bua kubutula nshibo ya Akabe. 8 Pababangile Yehu kunyoka nshibo ya Akabe, basangene bakunkushi ba Yunda, na bana balume ba bakuabo na Akaziase, bafubi ba Akaziase, na aye nkuibayipaa. 9 Akupu babangile kuikimbena na Akaziase, abo nkukamukuata kubaadi mufuame mu Samadiya, na nkumutuala kui Yehu. Kunyima abo nkumuipaa na nkumushiika, muanda babambile’shi: “Mmuikulu a Yeoshafate baadi mukimbe Yehowa na eshimba diaye dioso.” Takubaadi muntu su ngumune a mu nshibo ya Akaziase baadi na bukome bua kukunkusha bufumu.

10 Pabaadi Ataliya nyinaye na Akaziase mumone’shi muana aaye bafu, bebuele bua kuipaa lutandua loso lua bufumu* lua mu nshibo ya Yunda. 11 Anka, Yehoshebate muana mukashi a nfumu, batshile Yoashe muana a Akaziase amukatusha mu bufiefie munkatshi mua bana ba nfumu babaadi na kia kuipayibua, aye nkumutuula na muleshi aaye mu kadimbo ka kulala ka munda. Yeoshabate muana mukashi a Nfumu Yehorame (baadi mukashi a tshite muakuidi Yehoyada na mukuabo mukashi na Akaziase) baadi mobeshe kumufuamisha bua’shi Ataliya tamumonanga, kupela kua’shi amuipaa. 12 Baadi mushale mufuame nabo munda mua bipua bisamombo mu nshibo ya Efile Mukulu a binyibinyi, pabaadi Ataliya amunana muiumbo.

23 Mu kipua kia musambobidi, Yehoyada bakitshine mianda na eshimba dinyingie, aye nkukita kilombeno na ba nfumu ba bantu lukama, kuamba’shi: Azariya muana a Yeroame, Ismaele muana a Yehokanane, Azariya muana a Obede, Maaseya muana a Adaya na Elishafate muana a Zikri. 2 Biabia babayile mu Yunda oso mushima, abo nkubunga bena Levi mu bibundi bioso bia Yunda, na ba nfumu ba bifuko bia bena Isalele. Pababafikile mu Yelusalema, 3 kakongie kashima kabakitshine kilombeno na nfumu mu nshibo ya Efile Mukulu a binyibinyi. Akupu Yehoyada nkuibalungula’shi:

“Talayi! Muana a nfumu akakunkusha nka bu bibaadi Yehowa mulee pabitale bana ba Davide. 4 Bino nyi abitungu’shi nukite: Kia bisatu kia kumpala kia ba tshite muakuidi na bena Levi akifubu muifuku dia Sabato akikala akilama ku biibi, 5 kingi kia bisatu akikala ku nshibo* ya nfumu, na kingi kia bisatu akikala ku Kiibi kia Kitako, bantu boso abekala mu mpango ya nshibo ya Yehowa. 6 Tanutadilanga muntu su ngumune atuele mu nshibo ya Yehowa, kukatusha penda ba tshite muakuidi na bena Levi bakuete kufuba. Abo mbalombene kutuela, muanda nkisaka kia kishila, na bantu boso abakalombasha bitungo biabo kui Yehowa. 7 Abitungu bena Levi befunyishe nfumu mu mpese yoso, muntu oso a kuanudi muikale na bina ngoshi biaye muiyasa diaye. Muntu oso atuele mu nshibo ayipayibua. Nuikale na nfumu koso kuende.”*

8 Bena Levi na Yunda oso nkukita nka bibaadi tshite muakuidi Yehoyada mutume eyi. Biabia oso a kuabadi nkuata bantu baye babaadi na kia kufuba muifuku dia Sabato pamune na baba bashibaadi na kia kufuba muifuku dia Sabato, muanda tshite muakuidi Yehoyada tabaadi mutadiile bisaka bia bantu buabidia kualukila kuabo. 9 Akupu, tshite muakuidi Yehoyada nkupa ba nfumu ba bantu lukama milumbu na ngabo ipeela,* na ngabo i kishengu bibaadi bia Nfumu Davide, bibaadi mu nshibo ya Efile Mukulu a binyibinyi. 10 Batuudile bantu boso mu ma mbalo aabo, muntu oso na bina ngoshi biaye muiyasa diaye, kubanga ku lupese lua mboko ibalume lua nshibo mpa na ku lupese lua mboko ibakashi, pepi na kilambuilo, na pepi na nshibo, befunyishe nfumu. 11 Akupu abo nkutuusha muana a nfumu paasha, nkumufuadika kifulu kia bufumu* ku mutue, na nkutuula paadi Bukamonyi,* abo nkumuikasha nfumu, na Yehoyada na bana baye balume nkumuela muimu. Abo nkubanga nkuakula’shi: “Nfumu ekale na muwa bua loso!”

12 Pabaadi Ataliya mupushe tuleo tua bantu abasuuku lubilo na abasaamuna nfumu, mususa umune bafikile kui bantu ku nshibo ya Yehowa. 13 Akupu bamuene nfumu mmuimane kuakua pepi na musungo waye dia pa kibelo. Bakunkushi na bantu abelaa mpungi babaadi na nfumu, na bantu boso ba muiumbo babaadi abasanka na kuela mpungi, na tuyimba tubaadi na biombuanga tubaadi atukunkusha bantu babaadi abayimbi na muloo. Biabia Ataliya nkusaana bilamba biaye na nkuela musaase’shi: “Babandiila lukuku! Babandiila lukuku!” 14 Anka, tshite muakuidi Yehoyada nkutuusha ba nfumu ba bantu lukama, baba babaabadi batuule kunundu kua kiluilo kia ngoshi na nkuibalungula’shi: “Mukatusheyi mu milongo, na su muntu bamulondo numuipee ku lupete lua ngoshi!” Muanda tshite muakuidi bakuile’shi: “Tanumuipanga mu nshibo ya Yehowa.” 15 Biabia babamukuatshile benda naye ku nshibo* ya nfumu pa ntuelelo a Kibelo kia Nfualasa, musango umune abo nkumuipayila paapa.

16 Akupu, Yehoyada nkukita kilombeno pankatshi paye na nfumu na muilo oso, bua’shi batungunukie na kuikala bu muilo wa Yehowa. 17 Kunyima kua biabia, bantu babafikile ku nshibo* ya Baale na nkuiyibumbula, abo nkubumbula bilambuilo biaye na baluishakasha ma nkishi aaye oso na bayipaa Matane, tshite muakuidi a Baale kumpala kua bilambuilo. 18 Akupu Yehoyada nkutuula ba tshite muakuidi na bena Levi bua kukunkusha nshibo ya Yehowa. Abo nyi babaadi Davide mutuule mu bisaka bua kutala nshibo ya Yehowa, kulambula Yehowa milambu ya kushiika kaalo muyile biabadi bafunde mu Miiya ya Moyise. Babaadi na kia kuibikita na muloo bayimbanga ngono, nka bu bibaadi Davide muleshe. 19 Batuudile dingi balami ku biibi bia nshibo ya Yehowa, bua’shi muntu su ngumune e butete bua muanda oso wawa tatuelanga. 20 Dingi Yehoyada batshile ba nfumu ba bantu lukama, bakata, bakunkushi ba muilo, na bantu boso ba muiumbo, abo nkuenda na nfumu kukatukila ku nshibo ya Yehowa. Akupu, abo nkutuelela dia ku kiibi kia kunundu kia nshibo* ya nfumu, na abo nkushadika nfumu mu nkuasa a bufumu. 21 Biabia bantu boso ba muiumbo babasankile na kibundi nkuikala mu butaale, muanda babaadi bayipee Ataliya ku lupete lua ngoshi.

24 Yoashe baadi na bipua musambobidi pabafikile nfumu, aye nkumunana munda mua bipua 40 mu Yelusalema. Eshina dia nyinaye dibaadi Sibiya a ku Beere-sheba. 2 Yoashe batungunukile na kukita mianda i buwa ku meso kua Yehowa mafuku oso a tshite muakuidi Yehoyada. 3 Akupu, Yehoyada bamuatshiile bakashi babidi, aye nkutanda bana balume na bana bakashi.

4 Kunyima, Yoashe baadi na lukalo muishimba diaye lua kulumbuula nshibo ya Yehowa. 5 Biabia, babungile ba tshite muakuidi na bena Levi pamune, aye nkuibalungula’shi: “Endayi mu bibundi bia Yunda, nukongole makuta kui bena Isalele boso bua kulumbuula ku kipua na kipua nshibo ya Efile Mukulu eenu. Abitungu nukite uno muanda bukidibukidi.” Anka, bena Levi tababaadi bakite bukidibukidi. 6 Paapa nfumu bayitanyine Yehoyada mukata a ba tshite muakuidi, amulungula’shi: “Buakinyi tue mutekie bena Levi buabadia kukaata bitadi bia kishila mu Yunda na mu Yelusalema, kuamba’shi bitadi bia kishila bia kakongie ka Isalele bua kashibo k’epema ka Bukamonyi, bibaadi Moyise mufubi a Yehowa mutume eyi buabadia kutuusha? 7 Muanda bana ba Ataliya, yawa mukashi ebubi babaadi batuele mu nshibo ya Efile Mukulu a binyibinyi, na bafubisha bintu bioso bia kishila bia mu nshibo ya Yehowa bua ba Baale.” 8 Biabia, nfumu batumine eyi, abo nkukita kashete, nkuikatuula paasha, pa kibelo kia nshibo ya Yehowa. 9 Kunyima kua biabia, babelele musaase mu Yunda oso mushima na mu Yelusalema bua kutuadila Yehowa bitadi bia kishila, bibaadi Moyise mufubi a Efile Mukulu a binyibinyi mukamikie bena Isalele mu kabaaka. 10 Bakunkushi boso na muilo oso babasankile, na abo nkutungunuka na kutuala bia buntu na kuibiela mu kashete mpa na pabakaudile.*

11 Nsaa yoso ibaadi bena Levi abakaata kashete bua kuenda nako kui nfumu, na abamono’shi makuta abafuimi mu kashete, mufundi a mikanda a nfumu na muntu abaabadi batuule kui mukata a ba tshite muakuidi, babaadi abakatusha makuta mu kashete, akupu babaadi abekalusha pa mbalo yako. Biabia nyi bibaabadi abakitshi ku efuku dioso, na abo nkukongola makuta ebungi. 12 Akupu, nfumu na Yehoyada babaadi abeapa bantu babaadi abatala mudimo wa nshibo ya Yehowa, abo namu babaadi abeafutu bantu babaadi abatanya mabue na ba nsendue bua kulumbuula nshibo ya Yehowa, mpa na bafubi ba biamo na biamo bia munyinga bua kulumbuula nshibo ya Yehowa. 13 Baba babaadi abakunkusha mudimo bababangile kufuba, na mudimo wa kulumbuula nshibo ya Efile Mukulu ubaadi awende kumpala ku bukunkushi buabo, abo nkualushuula nshibo ya Efile Mukulu a binyibinyi nka bibayidi kumpala, na abo nkuiyinyingisha. 14 Anka bakiabapu mudimo, babayile mu kualusha makuta abashadile kui nfumu na Yehoyada, abo nkuiafubisha bua kukita bina mudimo bia mu nshibo ya Yehowa, na bina mudimo bia kukita nabio mudimo, na bia kulambula nabio milambu na makopo, na bina mudimo bia ôlo na bia kiamo kia arja. Babaadi abalambula milambu ya kushiika kaalo mu nshibo ya Yehowa pa kiubishi mu mafuku oso abaadi Yehoyada na muwa.

15 Yehoyada banunupile, aye nkukita bipua bibungi, bafuile na bipua 130. 16 Biabia babamushiikile mu Kibundi kia Davide pamune na ba nfumu, muanda bakitshine mianda ibuwa mu Isalele pabitale Efile Mukulu a binyibinyi na nshibo yaye.

17 Kunyima kua lufu lua Yehoyada, bakunkushi ba Yunda babafikile, abo nkuinamina nfumu, na nfumu nkuibateemesha. 18 Babaadi basumbushene nshibo ya Yehowa Efile Mukulu a ba nkambua babo, abo nkubanga kufubila mitshi ya kishila* na ma nkishi. Biabia Efile Mukulu nkukuatshila Yunda na Yelusalema nsungu, muanda babaadi bapiile. 19 Yehowa baadi atungunuka na kuibatumina batemuki bua kuibalusha kuadi, babaadi abebadimusha, anka babapelele kuteemesha.

20 Paapa kikudi kia Efile Mukulu nkuyikila Zekariya muana a tshite muakuidi Yehoyada, bemeene pa mbalo itentame aye nkuibalungula’shi: “Efile Mukulu a binyibinyi amba’shi: ‘Buakinyi anupele kukookiela miiya ya Yehowa? Mianda yenu yanukitshi tayende kumpala nya! Bu bianudi basumbushene Yehowa, aye namu enusumbushena.’” 21 Anka babaadi badiile Zekariya lukuku, na nfumu nkutuma eyi, abo nkumuasa mabue mu lupango lua nshibo ya Yehowa. 22 Biabia Nfumu Yoashe tabaadi mutentekieshe kifulo kia lulamato kibaadi nshaye* Yehoyada mumuleshe, bayipayile muana aaye. Pabaadi Zekariya taafu, bakuile’shi: “Yehowa amone uno muanda na akufute muyile bikitshino biobe.”

23 Ku mbangilo kua kipua, kiluilo kia bena Siri kibafikile mu kuluisha Yoashe ngoshi, abo nkutuelela bena Yunda na bena Yelusalema. Akupu abo nkuipaa bakunkushi boso ba muilo, na abo nkutumina nfumu a Damase bintu bioso bibaabadi bapaule. 24 Sunga biekala’shi kiluilo kia bena Siri kibafikile mu kuibaluisha ngoshi kibaadi na basalayi bapeela, Yehowa batuudile kiluilo kia bena Yunda kibaadi na basalayi bebungi mu maasa muabo, muanda babaadi basumbushene Yehowa Efile Mukulu a ba nkambua babo. Biabia bena Siri babaadi batshibile Yoashe kiimu. 25 Kadi pababakatukile kuadi (muanda babamulekiele mmutapikie ngofu), bafubi baye babaadi bamudiile lukuku, muanda baadi mupongoole mase a bana* ba tshite muakuidi Yehoyada. Babamuipayiile ku lusala luaye. Biabia bafuile, abo nkumushiika mu Kibundi kia Davide, anka tababamushiikile mu mashama a ba nfumu.

26 Bantu babaadi bamudiile lukuku mbano: Zabade muana a Shimeate muina Amone, na Yehozabade muana a Shimerite muina Moabe. 27 Pabitale bana baye, na matemuki ebungi abaabadi bamutemukile, na kulumbuula kua nshibo ya Efile Mukulu a binyibinyi, bioso mbifundibue mu Mukanda wa ba Nfumu. Na muana aaye Amasiase nkufika nfumu pa mbalo yaye.

25 Amasiase baadi na bipua 25 pabafikile nfumu, na aye nkumunana munda mua bipua 29 mu Yelusalema. Eshina dia nyinaye dibaadi Yehoadane a mu Yelusalema. 2 Batungunukile na kukita mianda i buwa ku meso kua Yehowa, anka kushi na eshimba diaye dioso. 3 Nk’aye ki’anyingisha bufumu buaye, Amasiase bayipayile bafubi baye babaadi bayipee nshaye nfumu. 4 Anka tabaadi muipee bana babo muyile bibaadi bifundibue mu mukanda wa Miiya ya Moyise, mubaadi Yehowa muakule’shi: “Ta mbalombene kuipaa ba nshe bana pa muanda wa bana babo, na ta mbalombene kuipaa bana pa muanda wa bamashabo. Kadi muntu oso akayipayibua bua muluisho waye’ye nabene.”

5 Amasiase babungile bena Yunda pamune, na aye nkuibemika muyile bifuko bia bamashabo, muyile ba nfumu ba bantu kinunu na ba nfumu ba bantu lukama bua bena Yunda boso na bena Benyamine. Babadikile bantu babaadi na bipua kubanga pa 20 mpa na kukaamina, aye nkupeta bantu 300 000, bilobo bia ngoshi bilongieshibue kalolo bua kulua ngoshi, bibaadi abiuku bia kulua na milumbu na ngabo ikata. 6 Dingi, bafutshile bilobo bia ngoshi 100 000 bia mu Isalele ntalanta* 100 ya kiamo kia arja. 7 Kadi ungi muntu a Efile Mukulu a binyibinyi nkufika kuadi na nkumulungula’shi: “Ô nfumu, totadilanga kiluilo kia Isalele bua’shi kiende nobe, muanda Yehowa te na Isalele, te na muntu su ngumune a ku bena Efraime. 8 Anka, enda obe nabene, na okite mianda na eshimba dinyingie mu ngoshi. Bisumanga Efile Mukulu a binyibinyi akakitshi bia’shi opone kumpala kua muishikuanyi, muanda Efile Mukulu e na bukome bua kukuasha sunga bua kuponesha.” 9 Biabia, Amasiase nkuipusha muntu a Efile Mukulu a binyibinyi’shi: “Kadi nakitshi naminyi bua ntalanta 100 yanekele mupe basalayi ba bena Isalele?” Muntu a Efile Mukulu a binyibinyi nkumualula’shi: “Yehowa e na ngobesha ya kukupa bintu bibungi kukila biabia.” 10 Paapa, Amasiase nkualusha bisaka bia basalayi ba mu Efraime babafikile kuadi, aye nkuibatuma mu ma mbalo aabo. Anka, babaadi bakuatshile bena Yunda nsungu ikile, abo nkualuka kuabo na nsungu ibukopo.

11 Biabia Amasiase nkunyinga eshimba, na nkukunkusha bisaka biaye bia basalayi mu Ebanda dia mungua, aye nkuipaa basalayi ba bena Seyire 10 000. 12 Bantu ba mu Yunda babakuatshile bantu 10 000 na muwa. Akupu, abo nkuenda nabo ku nsongo kua lubuebue, na kuakua abo nkuibasukuma muushi, na abo nkusaasuka tupese tupese. 13 Kadi bantu ba mu kisaka kia basalayi babaadi Amasiase mualushe bua’shi tabendanga naye mu ngoshi, babaadi abakatuka mu Samadiya, abende mu kupaula bintu mu bibundi bia Yunda mpa na ku Bete-orone, kuakua babayipayile bantu 3 000, abo nkupaula bintu bikile bungi.

14 Kadi kunyima kua Amasiase kualukila kubaadi mukayipee bena Edome, batuadile b’efile ba bena Seyire, aye nkuibekasha bu b’efile baye, na nkubanga kuibenamina na kuibashiikila milambu. 15 Biabia Yehowa nkukuatshila Amasiase nsungu ibukopo, aye nkumutumina mutemuki bamulunguile’shi: “Buakinyi olondo b’efile ba uno muilo bashi bapaashe muilo wabo mu maasa mobe?” 16 Pabaadi kiamulungula biabia, nfumu bamuipuishe’shi: “Tui bakusangule bodia kupa nfumu malango su? Umiina! Buakinyi okiebe’shi bakuipee?” Mutemuki nkubanda kuumiina, akupu aye nkuakula dingi’shi: “Nanguku’shi Efile Mukulu mmuate kitshibilo kia kukubutula, muanda bokitshi uno muanda na bopele kuteemesha elango dinankupa.”

17 Pabaadi Amasiase Nfumu a Yunda mupue kuisamba na bantu abamupaa malango, batumine mukiendi kui Yoashe muana a Yeokaze muana a Yehu nfumu a Isalele’shi: “Fika tulue ngoshi.”* 18 Nfumu Yoashe a Isalele nkutumina nfumu Amasiase a Yunda uno mukandu’shi: “Milobo ya mu Lebanone ibaadi itumine mutshi wa sedre wa mu Lebanone mukandu’shi, ‘Paa muana ande mulume muana oobe mukashi bu mukashi aaye.’ Anka nyema a kisuku a mu Lebanone bakidile pepi, na ashina milobo. 19 We muakule’shi, ‘Tala! Nayipaa Edome.’ Nyi buakinyi eshimba diobe di na kuitatula, muanda okumiina kupeta ntumbo. Anka binobino, shala mu nshibo* mobe. Buakinyi wekimbila dikienga na kupona, na kufikisha Yunda mu kupona?”

20 Anka Amasiase tabaadi muteemeshe, muanda bino bibaadi abikatukila kui Efile Mukulu a binyibinyi bua kuibatuula mu maasa mua muishikuanyi, muanda’shi babaadi balonde b’efile ba bena Edome. 21 Biabia nfumu Yoashe a Isalele nkukaamina, aye na nfumu Amasiase a Yunda, nkulua ngoshi ku Bete-shemeshe a Yunda. 22 Isalele nkutshokola Yunda, biabia muntu oso nkusuukila ku nshibo kuaye. 23 Nfumu Yoashe a Isalele nkukuata nfumu Amasiase a Yunda muana a Yoashe muana a Yeokaze* ku Bete-shemeshe, akupu aye nkumutuala ku Yelusalema na aye nkubumbula mudimba wa Yelusalema. Kubangila ku Kibelo kia Efraime mpa na ku Kibelo kia Kuipaka, kubaadi kude* 400. 24 Aye nkuata ôlo oso na kiamo kia arja na bintu bioso bibaadi mu nshibo ya Efile Mukulu a binyibinyi na* Obede-edome na mu ma mbalo a kulamina bintu bia muulo bia nshibo* ya nfumu, mpa na bantu babaabadi bakuate. Akupu aye nkualukiila ku Samadiya.

25 Amasiase muana a Yoashe nfumu a Yunda bekeele na muwa munda mua bipua 15 kunyima kua lufu lua Yoashe muana a Yeokaze nfumu a Isalele. 26 Ingi mianda ya Amasiase, kubanga ku mbangilo mpa na ku nfudiilo, ta ngifundibue mu Mukanda wa mianda ya ba Nfumu ba Yunda na ba Isalele su? 27 Kubanga nsaa ibaadi Amasiase mulekie kulonda Yehowa, babamudidiile lukuku mu Yelusalema na aye kusuukila ku Lakishe. Anka abo nkutuma bantu bua kumulonda ku Lakishe, na abo nkumuipayila kuakua. 28 Biabia abo nkualukiila naye bamutuale pa nfualasa, na abo nkumushiika mu Yelusalema pamune na bamashaye kulu mu kibundi kia Yunda.

26 Akupu bantu boso ba mu Yunda nkuata Oziase baadi na bipua 16, nkumutuula bu nfumu pa mbalo ya nshaye Amasiase. 2 Aye nkuibakulula kibundi kia Elote na nkuikialushila Yunda kunyima kua nfumu* kufua, na ku’abo kumushiika bu bamashaye kulu. 3 Oziase baadi na bipua 16 pabafikile nfumu, na baadi mumunane munda mua bipua 52 mu Yelusalema. Eshina dia nyinaye dibaadi Yekoliya a mu Yelusalema. 4 Batungunukile na kukita mianda ibuwa ku meso kua Yehowa nka bu bibaadi bikite nshaye Amasiase. 5 Batungunukile na kukimba Efile Mukulu mu mafuku a Zekariya, yawa baadi mumulongieshe bia kutshina Efile Mukulu a binyibinyi. Munda mua mafuku abaadi akimbi Yehowa, Efile Mukulu a binyibinyi bakitshine bia’shi mianda yaye yende kalolo.

6 Bayile na akalua na bena Filistine, abumbula kimano kia kibundi kia Gate, kia Yabene na kia Ashedode. Akupu, aye nkuibaka bibundi mu nsenga ya Ashedode na mu bingi bipindi bia nsenga bia bena Filistine. 7 Efile Mukulu a binyibinyi batungunukile na kumukuasha mu ngoshi ibaadi alu na bena Filistine, bena Arabe babaadi bashale mu Gurebaale mpa na bena Meune. 8 Bena Amone bababangile kutuadila Oziase milambu. Nfudiilo a bioso, nkumo yaye ibapalakene, ayo nkukafika mpa na mu Ejipitu, muanda bapetele bukome bukile bungi. 9 Dingi, Oziase bayibakile bitenta mu Yelusalema pepi na Kiibi kia Muipaka, pepi na Kiibi kia Kuibanda na pepi na Musungo ukuatshishene mudimba, aye nkuibinyingisha. 10 Akupu, bayibakile bitenta mu kabaaka na aye nkubundula biina bia kulamina mema bibungi (muanda baadi na bimunuanga bikile bungi,) bakitshine dingi biabia mu Shefela na muibanda. Baadi na ba bidime na bantu babaadi abadimi milundo yaye ya nfinyo mu miengie na mu Karmele, muanda baadi mukumiine kudima.

11 Oziase bapetele kiluilo kia basalayi ki na bina ngoshi. Babaadi abende mu ngoshi mbelumbuule mu bisaka. Babaadi bebabadikie, bebafunda mashina kui mufundi Yeyele na kui kapita Maaseya baadi ku bukunkushi bua Ananiya umune a ku bakunkushi. 12 Bungi boso bua ba nfumu ba bifuko bia bamashabo babaadi kunundu kua bino bilobo bia ngoshi bubaadi 2 600. 13 Kiluilo kibaadi ku matalua aabo kibaadi na bantu 307 500, belumbuule bua kulua ngoshi, basalayi be bukome balombene kukuatshishena nfumu p’akalu na beshikuanyi baye. 14 Oziase bapeele kiluilo kiaye kioso kishima ngabo, milumbu, bifulu, makotshi a tu biamo, mata na mabue a mu ndundo. 15 Dingi, ku Yelusalema bakitshine mashiinyi a ngoshi abaabadi bakite kui basha binangu. Babaadi beatuule ku bitenta na mu mapaka a midimba, na babaadi abaasa nao mikietue na mabue akata. Biabia, nkumo yaye ibapalakene ngofu mpa na mu maumbo e kula, muanda bapetele bukuashi bukata na bapetele bukome.

16 Kadi, nka’ye kiapete bukome, babangile kuikaamisha muishimba diaye, na abio nkumufikisha ku kabutu, bakitshine mianda na kukutua lulamato kui Yehowa Efile Mukulu aaye, pa kutuela mu ntempelo a Yehowa bua kushiika kabanda* pa kilambuilo kia kabanda. 17 Musango umune, tshite muakuidi Azariya na bangi ba tshite muakuidi ba Yehowa 80 banyingie mashimba babamulondele muamua. 18 Abo nkusaashila Nfumu Oziase, na nkumulungula’shi: “Obe Oziase tuena matalua a kushiikila Yehowa kabanda, anka penda ba tshite muakuidi nyi balombene kushiika kabanda, muanda abo mbana ba Alona, baba babadi bekashe ba kishila. Tuuka mu mbalo ya kishila, muanda bokitshi mianda na kukutua kua lulamato, na topete ntumbo kui Yehowa Efile Mukulu oobe bua bino bibokitshi.”

19 Kadi Oziase baadi na kintu kia kushiikila kabanda mu maasa muaye, bakuatshile nsungu ibukopo, na yaaya nsaa ibaadi mukuatshile ba tshite muakuidi nsungu, nsudi ibamutuukile mu mpala mu meso mua ba tshite muakuidi, kumpala kua kilambuilo kia kabanda mu nshibo ya Yehowa. 20 Pabaadi Azariya mukata a ba tshite muakuidi na ba tshite muakuidi boso bealuule kuadi, babamuene’shi nsudi ibamutuuku mu mpala, biabia abo nkumutuusha bukidibukidi muamua, na aye nabene nkutuuka bukidibukidi, muanda Yehowa bamunyokiele.

21 Nfumu Oziase bashadile na nsudi mpa na kuifuku dia lufu luaye, na batungunukile na kushala mu nshibo ya pa bupenka pa muanda wa nsudi, muanda babamubingile mu nshibo ya Yehowa. Muana aaye Yotame baadi atala mianda ya mu nshibo* ya nfumu, asambishanga bantu ba muiumbo.

22 Ingi mianda ya Oziase, kubanga ku mbangilo mpa na ku nfudiilo, ngifundibue kui mutemuki Yeshaya muana a Amoze. 23 Akupu, Oziase bafuile nka bu bamashaye kulu, na abo nkumushiika pamune na bamashaye kulu, kadi mu kipindi kia nsenga kibaadi pepi na mashama a ba nfumu, muanda babambile’shi: “E na nsudi.” Na muana aaye Yotame nkufika nfumu pa mbalo yaye.

27 Yotame baadi na bipua 25 pabafikile nfumu, na aye nkumunana munda mua bipua 16 mu Yelusalema. Eshina dia nyinaye dibaadi Yerusha muana a Zadoke. 2 Batungunukile na kukita mianda ibuwa ku meso kua Yehowa nka bu bibaadi bikite nshaye Oziase, anka tabatuelele mu ntempelo a Yehowa. Sunga mbiabia, bantu babaadi nka abakitshi mianda ibubi. 3 Baadi muibakie kibelo kia kunundu kia nshibo ya Yehowa, aye nyi baadi muibakie kipindi kikata kia kimano kia Ofele. 4 Baadi muibakie dingi bibundi mu nsenga ya ku miengie ya Yunda, aye nkuibaka ma mbalo anyingishibue na bitenta mu mitamba. 5 Baluile ngoshi na nfumu a Amone na aye nkumutshimuna, biabia mu kiakia kipua, bena Amone nkumupa ntalanta 100 ya kiamo kia arja, bipimo bia kor* bia blé 10 000, na bipimo 10 000 bia orje. Bena Amone babamufutshile dingi bino bintu mu kipua kia kabidi na kia kasatu. 6 Biabia, Yotame baadi mutungunukie na kupeta bukome, muanda baadi muate kitshibilo kia kutambukila mu mashinda a Yehowa Efile Mukulu aaye.

7 Ingi mianda ya Yotame, ngoshi yaye yoso, na mashinda aaye, mbifundibue mu Mukanda wa ba nfumu ba Isalele na ba Yunda. 8 Baadi na bipua 25 pabafikile nfumu, na aye nkumunana munda mua bipua 16 mu Yelusalema. 9 Akupu, Yotame bafuile nka bu bamashaye kulu na abo nkumushiika mu Kibundi kia Davide. Na muana aaye Akaze nkufika nfumu pa mbalo yaye.

28 Akaze baadi na bipua 20 pabafikile nfumu, na aye nkumunana munda mua bipua 16 mu Yelusalema, tabaadi mukite mianda ibuwa ku meso kua Yehowa bu bibaadi nshaye kulu Davide mukite. 2 Anka baadi mulonde eshinda dia ba nfumu ba Isalele, na aye nkukita mpa na ma nkishi a kilonda* a ba Baale. 3 Baadi mpa na mufitshishe miishi ya milambu mu Ebanda dia Muana a Hinome,* na nkushiika bana baye mu kaalo, aye nkulonda bikitshino bi bubi bukile bia miilo ibaadi Yehowa mubingie kumpala kua bena Isalele. 4 Dingi, baadi mutungunukie na kulambula milambu, na kufitshisha miishi ya milambu ku ma mbalo e kunundu, ku miengie ipeela na muushi mua mutshi oso utshimpukie.

5 Biabia, Yehowa Efile Mukulu aaye nkumutuula mu maasa mua nfumu a Siri, babaadi bamutshimune, abo nkukuata bapika bakile bungi na nkuenda nabo ku Damase. Bamutuudile dingi mu maasa mua nfumu a Isalele, bayipayile bantu baye bakile bungi. 6 Biabia Peka muana a Remaliya bayipayile muifuku dimune bantu 120 000 mu Yunda, boso babaadi balume banyingie mashimba, muanda babaadi basumbushene Yehowa Efile Mukulu a ba nkambua babo. 7 Na Zikri, kilobo kia ngoshi kia mu Efraime, kibayipayile Maaseya muana a nfumu na Azerikame baadi atala mianda ya muibalasa mpa na Elkana baadi mulondele nfumu. 8 Dingi, bena Isalele babakuatshile bakuabo 200 000 benda nabo, kubaadi bakashi, ba nsongualume na ba nsonguakashi. Babapawile dingi bintu bikile bungi, abo nkuibituala mu Samadiya.

9 Kadi mutemuki a Yehowa abetamina bu Odede baadi paapa. Bayile mu kufumankana na kiluilo kibaadi akifiki ku Samadiya na nkuibalungula’shi: “Talayi! Bu bikeele Yehowa Efile Mukulu a ba nkambua benu mukuatshile Yunda nsungu, nyi buakinyi ekeele muibatuule mu maasa muenu, anka, nubebayipaa na nsungu ikile bukopo, ikafikie mpa na muiyilu. 10 Binobino, anukiebe kutuula bantu ba mu Yunda na ba mu Yelusalema bu bafubi benu balume na bu bafubi benu bakashi. Kadi tanuuku’shi n’anue namu nuibapiile kumpala kua Yehowa Efile Mukulu eenu su? 11 Binobino nteemesheyi, na nuposole bakuenu banudi bakuate, muanda Yehowa mmuinukuatshile nsungu ibukopo.”

12 Paapa, bangi ba ku ba nfumu ba bena Efraime, kuamba’shi: Azariya muana a Yehokanane, Berekiya muana a Meshilemote, Yeizekiya muana a Shalume na Amasa muana a Adelayi, babebuele bua kusaashila baba babaadi abalukila mu ngoshi. 13 Abo nkuibalungula’shi: “Tanutuelanga muno na bantu banudi bakuate, muanda atuikala bapiile kumpala kua Yehowa. Biabia bianukimbi kukita abifuimisha miluisho yetu na kunyisha kuitupiisha, muanda miluisho yetu tayidi ikile bungi, na Efile Mukulu mmukuatshile Isalele nsungu ibukopo.” 14 Biabia basalayi babapeele bakunkushi na kakongie kashima, bantu babaabadi bakuate na bintu bibaabadi bapaule. 15 Akupu, bantu babaabadi basangule muyile mashina aabo babebuele, nkuata bantu babaadi bakuatshibue, na abo nkuata bilamba mu bintu bibaabadi bapaule, nkupa baba boso babaadi musua. Babaadi bebafuadikie bilamba, abo nkuibapa nsandale, bia kudia na bia kutoma, na muimu wa kuifikinya.* Dingi babatuadile baba babaadi babofule ku mpunda, abo nkuenda nabo kui bakuabo mu Yeriko, kibundi kia mabo. Akupu, abo nkualukila ku Samadiya.

16 Mu aa mafuku, nfumu Akaze batekiele ba nfumu ba Asiri bua’shi bamukuashe. 17 Bena Edome babafikile dingi mu kuluisha Yunda ngoshi, na abo nkukuata bantu, nkuenda nabo. 18 Bena Filistine namu, babatuelele mu bibundi bia Shefela na mu Negebe a Yunda, abo nkukuata Bete-shemeshe, Ayalone, Gederote, Soko na bibundi bimuifunyishe, Timena na bibundi bimuifunyishe, Gimezo na bibundi bimuifunyishe. Abo nkuimushala. 19 Yehowa bayishile Yunda milongo pa muanda wa Akaze nfumu a Isalele, muanda baadi mutadiile Yunda bua kukita mianda kushi kuikanda, abo nkukita miluisho ibungi na nkukutua lulamato kui Yehowa.

20 Tilgate-pilenesere nfumu a Asiri bafikile mu kulua naye, aye nkumukiengesha pamutue pa kumunyingisha. 21 Muanda Akaze baadi mupaule bintu bia mu nshibo ya Yehowa, bintu bia mu nshibo* ya nfumu na bintu bia mu mashibo a bakunkushi, aye nkuibipa nfumu a Asiri bu biabuntu. Anka tabibamukuashile ku kintu su nkimune. 22 Na mu kipungo kibaadi mu dikienga, Nfumu Akaze banyishile’nyi kukita mianda ibubi ku meso kua Yehowa. 23 Aye nkubanga kulambula b’efile ba ku Damase babaadi bamutshimune milambu, na aye nkuakula’shi: “Bu bikale’shi b’efile ba ba nfumu ba bena Siri bakuete kuibakuasha, nebalambula milambu bua’shi bankuashe namu.” Anka babaadi bamufikishe aye na Isalele oso mushima mu kupona. 24 Dingi, Akaze bakonguele bina mudimo bia mu nshibo ya Efile Mukulu a binyibinyi, akupu aye nkutanya tupesetupese bina mudimo bia mu nshibo ya Efile Mukulu a binyibinyi, nkufunga biibi bia nshibo ya Yehowa, na nkuikitshina bilambuilo mu mapaka oso a Yelusalema. 25 Bakitshine ma mbalo e kunundu mu bibundi bioso bia Yunda bua kufitshisha miishi ya milambu kui bangi b’efile, aye nkukuatshisha Yehowa Efile Mukulu a ba nkambua baye nsungu.

26 Ingi mianda ya Akaze, pabitale bioso bibakitshine kubanga ku mbangilo mpa na ku nfudiilo, ngifundibue mu Mukanda wa ba Nfumu ba Yunda na ba Isalele. 27 Akupu Akaze bafuile nka bu bamashaye kulu, na abo nkumushiika mu kibundi kia Yelusalema, muanda tababayile naye mu mashama a ba nfumu ba Isalele. Na muana aaye Ezekiya nkufika nfumu pa mbalo yaye.

29 Ezekiya baadi na bipua 25 pabafikile nfumu, na aye nkumunana munda mua bipua 29 mu Yelusalema, eshina dia nyinaye dibaadi Abiya, muana mukashi a Zekariya. 2 Batungunukile na kukita mianda ibuwa ku meso kua Yehowa nka bu bibaadi nshaye kulu Davide mukite. 3 Mu kipua kia kumpala kia bufumu buaye, mu mueshi wa kumpala, bafunguile biibi bia nshibo ya Yehowa, na aye nkuibilumbuula. 4 Akupu, aye nkuitanyisha ba tshite muakuidi na bena Levi, nkuibabunga pa mbalo ya bantu boso dia kutunduka nguba. 5 Aye nkuibalungula’shi: “Anue bena Levi, nteemesheyi. Binobino etoosheyi, na nutooshe nshibo ya Yehowa Efile Mukulu a ba nkambua benu, na nukatushe bintu bi butete mu mbalo iselele. 6 Muanda bamashetu babaadi bakutue lulamato, na abo nkukita mianda ibubi ku meso kua Yehowa Efile Mukulu eetu. Babaadi bamusumbushene, abo nkukumba meso* aabo ku tabernakele a Yehowa, na nkumutapa mongo. 7 Babaadi dingi bashite biibi bia kadimbo ka pa ntuelelo, abo nkushima bimunyi. Babalekiele kushiika kabanda, na kulambula Efile Mukulu a Isalele milambu ya kushiika kaalo mu mbalo ya kishila. 8 Biabia, Yehowa mmukuatshile Yunda na Yelusalema nsungu ibukopo, na aye nkuibekasha bu kintu akikuatshisha moo, akikaanyisha na kia kusenga, nka bu bianukuete kuibimona anue banabene. 9 Nyi buakinyi bamashetu kulu mbepayibue ku lupete lua ngoshi, na mbakuate bana betu balume, bana betu bakashi na bakashi betu benda nabo. 10 Binobino, ne na lukalo muishimba diande lua kukita kilombeno na Yehowa Efile Mukulu a Isalele, bua’shi nsungu yaye ibukopo ikatukie kuatudi. 11 Bana bande, ino nta nsaa yanudia kulenguula mianda,* muanda Yehowa mmuinusangule buanudia kuimana kumpala kuaye, bua kumufubila bu bafubi baye, na buanudia kumufitshishila miishi ya milambu.”

12 Mu yaaya nsaa, bano bena Levi babebuele bua kukita mudimo: Mu bena Kehate mubaadi Mahate muana a Amasayi na Yowele muana a Azariya. Mu bena Merari mubaadi Kishe muana a Abdi na Azariya muana a Yehalelele. Mu bena Gershone mubaadi Yowa muana a Zima na Edene muana a Yowa. 13 Mu bana ba Elizafane mubaadi Shimiri na Yewele. Mu bana ba Asafe mubaadi Zekariya na Matanya. 14 Mu bana ba Emane mubaadi Yekiele na Shimeyi. Mu bana ba Yedutune mubaadi Shemaya na Uziele. 15 Akupu bababungile bakuabo, abo nkuitoosha na nkufika nka bu bibaadi nfumu muibatumine eyi muyile eyi dia Yehowa, bua kutoosha nshibo ya Yehowa. 16 Ba tshite muakuidi babatuelele mu nshibo ya Yehowa bua kuiyisuula, abo nkutuusha bintu bioso bi butete bibabapetele mu ntempelo a Yehowa, akupu abo nkuibituusha paasha mu lupango lua nshibo ya Yehowa. Bena Levi namu babebiatshile abo nkuibituala paasha Muibanda dia Kidrone. 17 Biabia, bababangile kuikasha ntempelo a kishila muifuku dia kumpala dia mueshi wa kumpala, babakafikile pa kadimbo ka pa ntuelelo ka nshibo ya Yehowa muifuku dia muanda. Babaadi batooshe nshibo ya Yehowa munda mua mafuku muanda, na muifuku dia ekumi na dia kasamombo dia mueshi wa kumpala, babapuile mudimo.

18 Kunyima kua biabia, babayile kui nfumu Ezekiya abo nkumulungula’shi: “Tubaapu kutoosha nshibo yoso ya Yehowa, kilambuilo kia milambu ya kushiika kaalo na bina mudimo biakio bioso, mesa a mikate* ya kutuula mu milongo na bina mudimo biao bioso. 19 Na bina mudimo bioso bibaadi nfumu Akaze mutuule ku lupese mu mafuku abaadi akitshi mianda na kukutua kua lulamato mu bufumu buaye. Tubebilumbuula, tubebiikasha bia kishila na tubebituulu kumpala kua kilambuilo kia Yehowa.”

20 Paapa nfumu Ezekiya bebuele ku namashika, aye nkubunga bakunkushi ba kibundi, abo nkuenda ku nshibo ya Yehowa. 21 Babayile na ngombe ilume musambobidi, mikooko ilume musambobidi, mikooko yana ilume musambobidi na bipembue musambobidi bu mulambu wa miluisho bua bufumu, bua mbalo ya kishila na bua Yunda. Biabia balunguile ba tshite muakuidi, bana ba Alona buabadia kuibilambula pa kilambuilo kia Yehowa. 22 Kunyima abo nkuipaa ngombe, na ba tshite muakuidi nkumiamina mase ku kilambuilo, akupu abo nkuipaa mikooko ilume na abo nkumiamina mase ku kilambuilo, kunyima abo nkuipaa mikooko yana ilume na nkumiamina mase ku kilambuilo. 23 Akupu, babayile na bipembue bia mulambu wa miluisho kumpala kua nfumu na kua kakongie, abo nkutuula maasa aabo pa biabia bipembue. 24 Ba tshite muakuidi nkuibiipaa na nkuibilambula bu mulambu wa miluisho, babamiamine mase aabio pa kilambuilo bua kukita bia’shi miluisho ya Isalele oso mushima ibuikidibue, muanda nfumu bambile’shi mulambu wa kushiika kaalo, na mulambu wa miluisho abikala bua Isalele oso mushima.

25 Mu yaaya nsaa, batuudile bena Levi ku nshibo ya Yehowa na sembale, biombuanga bia mioshi na nseese, muyile eyi dia Davide na Gade muntu baadi amuena nfumu bimonua, na Natane mutemuki, muanda dino eyi dibakatukile kui Yehowa kukiila kui batemuki baye. 26 Biabia bena Levi babaadi bemane na biombuanga bia Davide, na ba tshite muakuidi babaadi na mpungi.

27 Akupu, Ezekiya nkutuma eyi bua’shi balambule milambu ya kushiika kaalo ku kilambuilo. Pabababangile kulambula, loono lua Yehowa lubabangile, pamune na mpungi, mu kuipushena na biombuanga bia Davide Nfumu a Isalele. 28 Pabaadi loono na mpungi abiyimbibua, kakongie koso kashima kabayinamine, mpa na pababapuile kulambula milambu ya kushiika kaalo. 29 Anka bakiabapu kulambula milambu, nfumu na bantu boso babaadi naye babayinamine, abo nkukupila mapala paashi. 30 Biabia nfumu Ezekiya na bakunkushi babalunguile bena Levi bua kutumbisha Yehowa na mayi a Davide na a Asafe muntu baadi amono mianda. Paapa babatumbiishe Efile Mukulu na muloo wibungi, babayinamine na abo nkukupila mapala paashi.

31 Akupu, Ezekiya bakuile’shi: “Bu bianudi batuudibue ku lupese bua Yehowa, fikayi na nutuadile Yehowa milambu na milambu ya lutumbu mu nshibo yaye.” Biabia kakongie kababangile kutuala milambu na milambu ya lutumbu, na muntu oso bafikile na milambu ya kushiika kaalo mu kukumiina kuaye. 32 Bungi bua milambu ya kushiika kaalo bubaadi kakongie kafikie nabo bubaadi ngombe 70, mikooko ilume 100 na mikooko ilume yana 200, bino bioso babebitushile bu mulambu wa kushiika kaalo bua Yehowa. 33 Na milambu ya kishila ibaadi ngombe 600 na mikooko 3 000. 34 Anka, takubaadi ba tshite muakuidi be bungi balombene kukaasha misokia ya nyema ya milambu ya kushiika kaalo, biabia bakuabo bena Levi babebakuashile mpa na pabapuile mudimo na pabapuile ba tshite muakuidi kuitoosha, muanda bena Levi babaadi bepaane mu kuitoosha kukila ba tshite muakuidi. 35 Dingi, kubaadi milambu ya kushiika kaalo ibungi, mpa na bipese bia muimu bia milambu ya butaale na milambu ya bitomuanga bua milambu ya kushiika kaalo. Biabia nyi bibabaadi balushuule* mudimo wa nshibo ya Yehowa. 36 Biabia Ezekiya na muilo ushima babasankile bua mianda yoso ibaadi Efile Mukulu a binyibinyi mukitshine muilo, muanda bino bioso bibaadi bikitshikie bukidibukidi.

30 Ezekiya batumine eyi mu Isalele na mu Yunda oso mushima, aye nkufundila bena Efraime na bena Manasee mikanda bua’shi bafikie ku nshibo ya Yehowa mu Yelusalema, buabadia kukitshina Yehowa Efile Mukulu a Isalele Pasaka. 2 Anka, nfumu, bakunkushi baye na kakongie koso kashima ka mu Yelusalema, babatshile kitshibilo kia kukita Pasaka mu mueshi wa kabidi, 3 muanda tababaadi na mushindo wa kumukita mu mafuku abamukitaa pa kiubishi, muanda ba tshite muakuidi bebungi tababaadi betooshe, na muilo taubaadi wibungie ku Yelusalema. 4 Nfumu na kakongie kashima babamuene’shi kino kitshibilo kibuwa. 5 Biabia babaadi baate kitshibilo kia kuela musaase mu Isalele mushima kubanga ku Beere-sheba mpa na ku Dane bua’shi bantu bafikie, na bakitshine Yehowa Efile Mukulu a Isalele Pasaka mu Yelusalema, muanda tababaadi bamukite pamune muyile bibaadi bifundibue.

6 Akupu bantu* babaadi nfumu na bakunkushi batume na mikanda, babayile mu Isalele oso na mu Yunda, nka bu bibaadi nfumu muibatumine eyi bua kuakula’shi: “Bantu ba mu Isalele, alukiilayi kui Yehowa Efile Mukulu a Abalahama, a Isaake na a Isalele, bua’shi aye namu alukiile kui baba bashale babaadi bapande kuiyasa dia ba nfumu ba Asiri. 7 Tanukitanga mianda bu ba nkambua benu na bakuenu babakutshile lulamato kui Yehowa Efile Mukulu a ba nkambua babo, mu kipaso kibaadi muibekashe bu kintu akikuatshisha moo, nka bu bianukuete kuibimona. 8 Binobino tanupapishanga mashimba bu ba nkambua benu. Kokielayi Yehowa na nufikie ku mbalo yaye ya kishila ibaadi muikashe ya kishila bua loso, na nufubile Yehowa Efile Mukulu eenu, bua’shi nsungu yaye ibukopo ikatukie kuanudi. 9 Muanda su nubalukiila kui Yehowa, bakuenu na bana benu, abakebafuila lusa kui bantu bebakuate na kuibalekiela bua’shi balukile mu dino eumbo, muanda Yehowa Efile Mukulu eenu nsha lusa n’eshimba dia kalolo, na t’akenusumbushena su nubalukila kuadi.”

10 Biabia bantu babaadi na mikanda babayile mu kibundi na kibundi mu eumbo dioso dia Efraime, dia Manasee na dia Zabulone, anka bantu babaadi abebasepe na kuibasenga. 11 Kadi, bangi bantu ba mu Ashere, ba mu Manasee na ba mu Zabulone babaadi beyishe, abo nkufika mu Yelusalema. 12 Eyaasa dia Efile Mukulu a binyibinyi dibaadi dingi mu Yunda bua kuibabunga,* buabadia kulombasha bibaadi nfumu na bakunkushi bebatumine eyi bua kukita muyile eyi dia Yehowa.

13 Bantu bakile bungi babebungile mu Yelusalema bua kukita Musangelo wa Mikate ishi Kitatusho mu mueshi wa kabidi. Babaadi kibumbu kikile bukata. 14 Abebuele, abo nkukatusha bilambuilo bibaadi mu Yelusalema, nkukatusha bilambuilo bioso bia kushiikila kabanda, nkuibisumbula Muibanda dia Kidrone. 15 Akupu babayipayile nyema bua mulambu wa Pasaka muifuku dia 14 dia mueshi wa kabidi. Ba tshite muakuidi na bena Levi babapushile buufu, biabia abo nkuitoosha na nkufika na milambu ya kushiika kaalo ku nshibo ya Yehowa. 16 Babemeene mu ma mbalo aabo a mafuku oso, muyile Miiya ya Moyise muntu a Efile Mukulu a binyibinyi. Akupu ba tshite muakuidi nkumiamina mase abaabadi abebatambika kui bena Levi. 17 Kubaadi bantu bebungi mu kakongie bashibaadi betooshe, na bena Levi nyi babaadi abatala mudimo wa kuipaa nyema ya milambu ya Pasaka bua baba boso bashibaadi betooshe, bua kuibekasha ba kishila kumpala kua Yehowa. 18 Muanda bantu bebungi, bikishekishe baba babaadi abakatukila ku Efraime, ku Manasee, ku Isakare na ku Zabulone, tababaadi betooshe, anka babaadi badie Pasaka mu kuikutuena na biabia bibaadi bifundibue. Kadi Ezekiya nkuibatekiela, amba’shi: “Yehowa, aye Efile Mukulu e buwa, aleeshe lusa kui 19 yawa oso mulumbuule eshimba diaye bua kukimba Efile Mukulu a binyibinyi, Yehowa Efile Mukulu a ba nkambua baye, sunga biekala’shi ta mmuitooshe muyile miiya ya musangelo wa kishila.” 20 Paapa Yehowa nkupushiisha Ezekiya na aye nkufuila muilo lusa.

21 Biabia bena Isalele babaadi mu Yelusalema nkukita Musangelo wa Mikate ishi Kitatusho munda mua mafuku musambobidi na muloo wibungi, na bena Levi na ba tshite muakuidi babaadi abatumbisha Yehowa kuifuku n’efuku, bayimbilanga Yehowa na biombuanga biabo na eyi dibukopo. 22 Dingi Ezekiya besambile na bena Levi boso babaadi abafubila Yehowa na binangu, aye nkuibanyingisha. Babaadiile munda mua mafuku musambobidi a musangelo, balambulanga milambu ya butaale na kutumbula Yehowa Efile Mukulu a ba nkambua babo.

23 Paapa kakongie kashima kabaatshile kitshibilo kia kukita musangelo munda mua angi mafuku musambobidi, biabia abo nkuiukita munda mua angi mafuku musambobidi na muloo wibungi. 24 Na Ezekiya nfumu a Yunda nkutuushila kakongie ngombe 1 000 na mikooko 7 000, bakunkushi namu babatuushile bua kakongie ngombe 1 000 na mikooko 10 000. Na ba tshite muakuidi babaadi abetoosha bakile bungi. 25 Paapa, kakongie koso ka Yunda, ba tshite muakuidi, bena Levi, kakongie koso kabafikile mu nsenga ya Isalele na benyi babaadi bashale mu nsenga ya Isalele babafikile, na baba babaadi mu Yunda, babatungunukile na kusanka. 26 Kubaadi muloo wibungi mu Yelusalema, muanda kubanga mu mafuku a Salomone muana a Davide nfumu a Isalele, muanda wi bino taubaadi ubande kukitshika mu Yelusalema. 27 Nfudiilo a bioso, ba tshite muakuidi bena Levi nkuibua, na nkuelela muilo miabi, Efile Mukulu nkupusha mayi aabo, luteko luabo nkukafika muiyilu, mu mbalo yaye ya kishila.

31 Musango umune n’abo kupua kukita bino bioso, bena Isalele boso babaadi paapa babayile mu bibundi bia Yunda, abo nkubumbula misungo ya kishila, nkutshiba mitshi ya kishila,* nkuluisha ma mbalo e kunundu na bilambuilo mu Yunda oso mushima na mu Benyamine mpa na mu Efraime na mu Manasee, mpa na pababebibutuile bioso. Kunyima kua biabia, bena Isalele boso babalukile mu bibundi biabo, muntu na muntu ku nshibo kuaye.

2 Akupu Ezekiya batuudile ba tshite muakuidi na bena Levi mu bisaka biabo, tshite muakuidi oso, na muina Levi oso bua midimo yabo, bua’shi bekale abatuusha milambu ya kushiika kaalo na milambu ya butaale, bua kufuba, kutumbula na kutumbisha ku biibi bia mpango* ya ntempelo a Yehowa. 3 Nfumu batushishe ndambo ya ku bintu biaye aye nabene bua milambu ya kushiika kaalo, pamune na milambu ya kunamashika na ya ku kiolua, milambu ya kushiika kaalo bua Sabato, bua kubaluka kua mueshi na bua misangelo, muyile bibaadi bifundibue mu Miiya ya Yehowa.

4 Dingi, batumiine bantu babaadi bashale mu Yelusalema eyi, buabadia kupa ba tshite muakuidi na bena Levi bintu biabo bibalombene, bua’shi bamone bia kuipaana ngofu ku muiya wa Yehowa. 5 Musango umune n’aye kutuma eyi, bena Isalele babatushile bikuba bia kumpala na ntete bibungi, pamune na nfinyo ipia, muimu, buuki na bintu bioso bia mu mafuba. Babatuadile ki’ekumi kia bintu bioso, bintu bikile bungi. 6 Na bantu ba mu Isalele na bano babaadi bashale mu bibundi bia Yunda babatuadile namu ki’ekumi kia ngombe, mikooko na ki’ekumi kia bintu bia kishila, bibaabadi bekashe bia kishila bua Yehowa Efile Mukulu aabo, babebituadile bebituula mituuto na mituuto. 7 Mu mueshi wa kasatu babaabangile kutuula bia buntu biabo mu mituuto na babapuile kuibibunga mu mueshi wa musambobidi. 8 Pabaadi Ezekiya na bakunkushi bamone ino mituuto ya bintu, babatumbiishe Yehowa na aabo nkuelela muilo waye wa Isalele miabi.

9 Ezekiya bayipuishe ba tshite muakuidi na bena Levi pabitale ino mituuto ya bintu, 10 Na Azariya mukata a ba tshite muakuidi a mu nshibo ya Zadoke bamualuluile’shi: “Kasha babangile kutuala bia buntu mu nshibo ya Yehowa, bantu bakuete kudia abekuta, na bingi bintu abishala bibungi, muanda Yehowa kuete kuelela muilo waye miabi, na ino mituuto ibungi ya bintu nyi ibashala.”

11 Paapa Ezekiya nkuibalungula bua kulumbuula tudimbo* tua kulamina bintu mu nshibo ya Yehowa, na abo kuitulumbuula. 12 Babatungunukile na kutuala bia buntu, bi’ekumi na bintu bia kishila. Konania muina Levi nyi ababatuudile bua kutala bino bintu bioso, na mukuabo Shimeyi baadi mumulondele. 13 Yekiele, Azaziya, Nahate, Asahele, Yerimote, Yosabade, Eliyele, Ishimakiya, Mahate na Benaya babaadi abakuasha Konania na mukuabo Shimeyi, muyile eyi dibaadi Nfumu Ezekiya mutume. Azariya namu baadi atala mianda ya mu nshibo ya Efile Mukulu a binyibinyi. 14 Na Koree muana a Yimina muina Levi baadi alama ku kiibi kia ku lupese lua kutunduka nguba, baadi atala milambu ibaadi bantu abatuusha mu kukumiina kuabo bua Efile Mukulu a binyibinyi, na baadi abila biabuntu bibabaadi abapa Yehowa na bintu bikile kishila. 15 Edene, Minyamine, Yeshua, Shemaya, Amariya na Shekania babaadi ku bukunkushi buaye mu bibundi bia ba tshite muakuidi, mu ma mbalo aabo a kukulupila, bua kuabila bakuabo bintu mu mushindo umune, mu bisaka bilekenelekene, kubanga ku bakulu mpa na ku bakinga. 16 Kukatusha biabia, biabia bintu babaadi bebiabile dingi bantu babaadi bafundibue mashina ku milongo ya ba nkambua, kuamba’shi bana balume babaadi abafiki efuku dioso mu kufuba ku nshibo ya Yehowa, mpa na kukumbasha mudimo wa mu kisaka kiabo, na bana babo balume babaadi na bipua bisatu na kukaamina.

17 Kufunda kua mashina a ba tshite muakuidi kubaadi kukitshikie muyile bifuko bia bamashabo, anka bu bibaadi bikitshikie namu kufundibua kua bena Levi babaadi na bipua kubanga pa 20 na kukaamina, muyile midimo ya bisaka biabo. 18 Kuno kufundibua kua mashina kubaadi kubungie mpa na bakashi babo, bana babo boso balume na bakashi na kakongie kashima, muanda babaadi belame ba kishila bua kukita mudimo wa kishila mu ma mbalo aabo a kukulupila, 19 pamune na bekulu ba Alona, ba tshite muakuidi babaadi bashale mu mapia a kudishila nyema efunyishe bibundi biabo. Mu bibundi bioso babaadi basangule bana balume muyile mashina aabo, bua kupa bana balume boso ba ku ba tshite muakuidi biakudia, mpa na baba boso babaadi bafundibue mashina ba mu bena Levi.

20 Ezekiya bakitshine bino mu Yunda mushima, aye nkutungunuka na kukita mianda ibuwa na ilulame na lulamato loso kumpala kua Yehowa Efile Mukulu aaye. 21 Na mudimo oso ubaadi akitshi bua kukimba Efile Mukulu aaye, biabikala pabitale nshibo ya Efile Mukulu a binyibinyi, sunga pabitale Miiya na mayi, baadi ebikitshi n’eshimba dimune, na mianda yaye yoso ibaadi ayende kumpala.

32 Kunyima kua ino mianda yoso na bino bikitshino bia lulamato, Nfumu Senakeribe a mu Asiri bafikile aye nkutuelela Yunda, aye nkuifunyisha bibundi binyingishibue, muanda baadi na kitshibilo kia kubumbula midimba ifunyishe bibundi na kuibikuata.

2 Pabamuene Ezekiya’shi Senakeribe bafiki na akimbi kulua ngoshi na Yelusalema, 3 kunyima ku’aye kuisamba na bakunkushi na bilobo bia ngoshi, batshile kitshibilo kia kushika mishima ya mema ibaadi paasha pa kibundi, na abo nkumukuatshishena. 4 Bantu bebungi babebungile pamune, abo nkushika mishima yoso ya mema na tusulo tua mema tubaadi atualala muiumbo, bakula’shi: “T’abitungu’shi ba nfumu ba bena Asiri bafikie bapete mema ebungi nya.”

5 Dingi, baadi muipaane mu kuibaka mudimba ubaadi upone, na aye nkuibaka bitenta kuanka, aye nkuibaka ungi mudimba paasha. Baadi mulumbuule dingi ka muengie* ka mu Kibundi kia Davide, na nkukita bina ngoshi na ngabo ikile bungi. 6 Akupu, batuudile bakata ba basalayi buabadia kutala muilo, aye nkuibabunga pa mbalo ya bantu boso ku kiibi kia kibundi, na aye nkuibanyingisha pa kuakula’shi: 7 “Nyingayi mashimba na nukankamane. Tanutshinanga sunga kusuusa pa muanda wa nfumu a Asiri na kibumbu kioso kia bantu be naye, muanda be n’etu bebungi kukila baadi nabo. 8 Aye e na mboko ya musamba,* anka atue tui na Yehowa Efile Mukulu bua kuitukuasha na kuituluila ngoshi.” Ano mayi a Ezekiya nfumu a Yunda abaadi anyingishe muilo ngofu.

9 Kunyima kua bino, pabaadi Senakeribe nfumu a Asiri ku Lakishe na kiluilo kiaye kioso kikile bukata, batumine bafubi baye ku Yelusalema kui Ezekiya nfumu a Yunda na kui bena Yunda babaadi ku Yelusalema, bua kuibalungula’shi:

10 “Teemeshayi abiakula Senakeribe nfumu a Asiri: ‘Nnanyi anukuete kukulupila p’anue kushala mu Yelusalema, aku namu mbamuifunyishe? 11 Tanumono’shi Ezekiya kuete kuinudimba bua kuinuipayisha na nsala na nyota, p’aye kuakula’shi: “Yehowa Efile Mukulu eetu etupasha ku maasa kua nfumu a Asiri”? 12 Ta nguno Ezekiya baadi mukatushe ma mbalo e kunundu a Efile Mukulu eenu na bilambuilo Biaye, akupu aye nkulungula Yunda na Yelusalema’shi: “Abitungu nuikale anuinama nka kumpala kua kilambuilo kimune na abitungu nuikale anufitshisha miishi ya milambu yenu kuanka”? 13 Tanuuku biangikalanga ami na ba nkambua bande bakitshine miilo yoso ya angi maumbo? B’efile ba bisamba bia angi maumbo babaadi bapaashe maumbo aabo mu maasa muande su? 14 Efile kinyi a ku b’efile boso ba bino bisamba bibaadi ba nkambua bande babutule baadi mupaashe muilo waye mu maasa muande, bua’shi Efile Mukulu eenu amone bia kuinupaasha mu maasa muande? 15 Biabia tanutadilanga’shi Ezekiya enudimbe sunga kuinulubisha mu uno mushindo. Tanumukulupilanga, muanda takui efile su ngumune a kisamba sunga a bufumu kampanda baadi mupashe muilo waye mu maasa muande, sunga mu maasa mua ba nkambua bande. Biabia Efile Mukulu eenu t’enupaasha mu maasa muande su nkapeela!’”

16 Bafubi baye babakuile ingi mianda ibungi ibubi pabitale Yehowa Efile Mukulu a binyibinyi na pabitale Ezekiya mufubi aaye. 17 Senakeribe bafundile’nyi mikanda bua kukaa Yehowa Efile Mukulu a Isalele na bua kuakula mianda ibubi pabimutale, amba’shi: “Nka bu bibaadi b’efile ba bisamba bia angi maumbo bakutue kupasha miilo yabo mu maasa muande, biabia Efile Mukulu a Ezekiya t’apaasha muilo waye mu maasa muande.” 18 Bababangile kuela bantu ba mu Yelusalema babaadi ku kimano misaase na eyi dibukopo mu ludimi lua bena Yunda, bua kuibatshinyisha na kuibakuatshisha moo bua’shi bamone bia kukuata kibundi. 19 Babakuile bi bubi bua Efile Mukulu a Yelusalema nka bu bibaabadi bakule bua b’efile ba miilo ya pa nsenga, b’efile bakitshibue na maasa a bana ba bantu. 20 Nfumu Ezekiya na mutemuki Yeshaya muana a Amoze babatungunukile na kuteka bua uno muanda, na kuidila kui Efile Mukulu a muiyilu bua’shi ebakuashe.

21 Biabia Yehowa batumine muikeyilu, aye nkuipaa bilobo biaye bioso bia ngoshi, bakunkushi na ba nfumu mu kishalelo kia nfumu a Asiri, biabia aye nkualukila muiumbo diaye na buufu. Kunyima, batuelele mu nshibo* ya efile aaye, na muamua, bangi ba ku bana baye nkumuipaa na lupete lua ngoshi. 22 Biabia, Yehowa bapaashile Ezekiya na bantu ba mu Yelusalema mu maasa mua Senakeribe Nfumu a Asiri na mu maasa mua bangi boso, aye nkuibapa butaale mpese yoso. 23 Bantu bebungi babatuadiile Yehowa bia buntu ku Yelusalema, na abo nkutuadila Ezekiya Nfumu a Yunda bintu bia muulo, na bantu ba ingi miilo bababangile kumunemeka ngofu.

24 Mu aa mafuku Ezekiya nkukumba na baadi pepi na kufua. Batekiele Yehowa, aye nkumualula na nkumupa kitunduilo. 25 Kadi Ezekiya tabaadi muleeshe lutumbu bua kalolo kabaabadi bamukitshine, muanda babangile kuitatula muishimba diaye. Biabia Efile Mukulu nkumukuatshila nsungu na nkukuatshila mpa na Yunda na Yelusalema nsungu. 26 Anka, Ezekiya nkuiyisha bua kuitatula kubaadi muishimba diaye, aye na bantu ba mu Yelusalema. Biabia Yehowa tabaadi muibanyokie mu mafuku a Ezekiya.

27 Ezekiya bapetele bupeta bukile bungi na ntumbo, na aye nkuibaka mashibo a kulamina kiamo kia arja, ôlo, mabue a muulo, muimu wa bome, ngabo na bingi bintu bia muulo bioso. 28 Dingi, bayibakile ma mbalo a kulamina ntete, nfinyo ipia na muimu, mpa na bikutu bia nyema yoso ilekenelekene na bikutu bia mikooko. 29 Baadi dingi muibakie bibundi, na aye nkupeta bimunuanga bikile bungi, na nyema ikata na ipeela, muanda Efile Mukulu baadi mumupe bintu bikile bungi. 30 Ezekiya nyi baadi mushikie mushima wa mema wa kunundu kua Giyone, aye nkuiwutadiisha lupese lua kupona nguba kua Kibundi kia Davide, na Ezekiya baadi obesha mu midimo yaye yoso ibaadi akitshi. 31 Anka, pabaadi bakunkushi ba mu Babilone batume mikiendi kuadi bua kukamuipusha bua kitunduilo kibaadi kituukie muiumbo, Efile Mukulu a binyibinyi baadi mumutadiile bua’shi akite mianda aye nabene bua kumutompa, bua’shi aukie bioso bibaadi muishimba diaye.

32 Ingi mianda ya Ezekiya na bikitshino biaye bia kifulo kia lulamato, mbifundibue mu kimonua kia mutemuki Yeshaya muana a Amoze, mu Mukanda wa ba Nfumu ba Yunda na ba Isalele. 33 Akupu, Ezekiya bafuile nka bu bamashaye kulu, na abo nkumushiika dia pa ka muengie mu mashama a bana ba Davide, bena Yunda boso na bantu ba mu Yelusalema babamupeele kinemo pa lufu luaye. Na muana aaye Manasee nkufika nfumu pa mbalo yaye.

33 Manasee baadi na bipua 12 pabafikile nfumu, na aye nkumunana munda mua bipua 55 mu Yelusalema.

2 Baadi mukite mianda ibubi ku meso kua Yehowa, alondanga bikitshino bi bubi bia miilo ibaadi Yehowa mubingie kumpala kua muilo wa Isalele. 3 Baadi muibakuule ma mbalo e kunundu abaadi nshaye Ezekiya mubumbule, aye nkuibakila ba Baale bilambuilo na nkukita mitshi ya kishila.* Aye nkuinamina kiluilo kioso kia muiyilu na nkuikifubila. 4 Baadi dingi muibakie bilambuilo mu nshibo ya Yehowa, ibaadi Yehowa muakule pabiyitale’shi: “Eshina diande adikala mu Yelusalema bua loso.” 5 Aye nkuibakila kiluilo kioso kia muiyilu bilambuilo mu mpango ibidi ya nshibo ya Yehowa. 6 Balambuile bana baye balume mu kaalo Muibanda dia Muana a Hinome, bapakile manga, nkukita lubuko, malenganyi, aye nkutuula bantu ababukaa na abamonaa mianda ayifiki kumpala. Aye nkukita mianda ibubi ku meso kua Yehowa mu mushindo ukile bubi, bua kumufiitshisha munda.

7 Aye nkutuula nkishi abaadi mukite mu nshibo ya Efile Mukulu a binyibinyi, ibaadi mulungule Davide na muana aaye Salomone pa muanda wayo’shi: “Mu ino nshibo na mu Yelusalema, mbalo yandi musangule munkatshi mua bisamba bioso bia Isalele, nakatuulu eshina diande bua loso. 8 Na tankakitshi dingi bia’shi ngua ya Isalele ikatukie mu nsenga inaadi mupe bamashabo kulu, anka su bakookiela na kalolo koso bioso binaadi muibatumine eyi, Miiya yoso, mayi na bitshibilo binaadi muibape kukiila kui Moyise.” 9 Manasee batungunukile na kupambusha Yunda na bantu ba mu Yelusalema, ebafikisha mu kukita mianda ibubi bukile, kukila miilo ibaadi Yehowa mushimishe kumpala kua bena Isalele.

10 Yehowa batungunukile na kuisamba na Manasee na muilo waye, anka tababaadi bateemeshe. 11 Biabia Yehowa nkuibatumina ba nfumu ba kiluilo kia nfumu a Asiri, babakuatshile Manasee bamupatshika ndobo, na abo nkumuanya nkano ibidi ya kiamo kia munyinga na nkuenda naye ku Babilone. 12 Mu makienga aaye, baadi muiyayile Yehowa Efile Mukulu aaye bua kumufuila lusa,* aye nkutungunuka na kuiyisha ngofo kumpala kua Efile Mukulu a ba nkambua baye. 13 Manasee batungunukile na kuteka Efile Mukulu, na Aye nkumuteemesha na nkupusha kuiyaya kuaye, Aye nkumualusha mu Yelusalema mu bufumu buaye. Biabia Manasee baukile’shi Yehowa nyi Efile Mukulu a binyibinyi.

14 Kunyima kua bino, bayibakile mudimba wi bula paasha pa Kibundi kia Davide ku lupese lua kupona nguba kua Giyone, muibanda mpa na ku Kiibi kia Mishipa, baadi muikiifunyishe mpa na ku Ofele, dingi batuudile bakata ba kiluilo kia basalayi mu bibundi bioso binyingishibue bia Yunda. 15 Akupu, aye nkukatusha b’efile benyi na binfuanyi mu nshibo ya Yehowa, na bilambuilo bioso bibaadi muibakie ku muengie wa nshibo ya Yehowa na mu Yelusalema, na aye nkuibisumbula paasha pa kibundi. 16 Balumbuluile dingi kilambuilo kia Yehowa, aye nkubanga kulambula milambu ya butaale na milambu ya lutumbu panka. Aye nkunyingisha Yunda buabadia kufubila Yehowa Efile Mukulu a Isalele. 17 Anka bantu babaadi bakiabatushila milambu pa ma mbalo e kunundu, sunga biekala’shi babaadi abeyilambula penda Yehowa Efile Mukulu aabo.

18 Ingi mianda ya Manasee, luteko luaye lubakitshine kui Efile Mukulu, na mayi a bantu abamonaa mianda babaadi abamudimusha muishina dia Yehowa Efile Mukulu a Isalele, mbifundibue mu mianda ya ba nfumu ba Isalele. 19 Dingi, luteko luaye na bibaabadi bamualule ku kuiyaya kuaye, miluisho yaye yoso ibaadi mukite na kukutua kuaye kua lulamato, ma mbalo e kunundu abaadi muibakie, mitshi ya kishila* ibaadi mushimikie na ma nkishi abaadi mukite kumpala kuaye kuiyisha, mbifundibue mu mayi a bantu baye abamonaa mianda. 20 Akupu Manasee bafuile nka bu bamashaye kulu, na abo nkumushiika pepi na nshibo yaye, na muana aaye Amone nkufika nfumu pa mbalo yaye.

21 Amone baadi na bipua 22 pabafikile nfumu, na aye nkumunana munda mua bipua bibidi mu Yelusalema. 22 Batungunukile na kukita mianda ibubi ku meso kua Yehowa, nka bu bibaadi bikite nshaye Manasee. Dingi, Amone baadi atuusha milambu kui ma nkishi oso abaadi nshaye Manasee mukite, na baadi mutungunukie na kuiafubila. 23 Anka tabaadi muiyishe kumpala kua Yehowa bu bibaadi nshaye Manasee muiyishe. Kadi, Amone baadi mukite mianda ibubi ibungi. 24 Biabia bafubi baye nkumudiila lukuku na nkumuipayila mu nshibo muaye. 25 Anka, bantu ba muiumbo nkuipaa baba boso babaadi badiile Nfumu Amone lukuku, na abo nkutuula muana aaye Yoziase bu nfumu pa mbalo yaye.

34 Yoziase baadi na bipua muanda pabafikile nfumu, na aye nkumunana munda mua bipua 31 mu Yelusalema. 2 Baadi mukite mianda ibuwa ku meso kua Yehowa na baadi mulonde mashinda a nshaye kulu Davide, tabaadi mutupilue enda ku mboko ibalume sunga ku mboko ibakashi.

3 Mu kipua kia 8 kia kumunana kuaye, pabaadi ki ka nsongualume, babangile kukimba Efile Mukulu a nshaye kulu Davide. Mu kipua kiaye kia 12, babangile kukatusha ma mbalo e kunundu mu Yunda na mu Yelusalema, na mitshi ya kishila,* ma nkishi na ma nkishi a kilonda.* 4 Dingi, babaadi babumbule bilambuilo bia ba Baale mu meso muaye, aye nkuluisha bilambuilo bia kushiikila kabanda bibaadi kunundu kuabio. Baadi dingi musaasule mitshi ya kishila,* ma nkishi na ma nkishi a kilonda,* aye nkuibifingakasha bu bukula, na nkuibupalakasha kunundu kua mashama a baba babaadi abealambula milambu. 5 Aye nkushiika mifufua ya ba tshite muakuidi kaalo pa bilambuilo biabo. Biabia nyi bibaadi mutooshe Yunda na Yelusalema.

6 Na mu bibundi bia Manasee, bia Efraime, bia Simeone mpa na ku Neftali, na mu bikulu bibaadi biifunyishe biabia bibundi, 7 babumbuile bilambuilo, na nkufingakasha mitshi ya kishila* na ma nkishi, nkuibiikasha bu bukula. Aye nkubumbula bilambuilo bia kushiikila kabanda mu nsenga yoso ya Isalele, akupu, aye nkualukila ku Yelusalema.

8 Mu kipua kia 18 kia kumunana kuaye, pabaadi mutooshe eumbo na ntempelo, batumine Shafane muana a Asalia, Maaseya mukata a kibundi na Yowa muana a Yoakaze baadi mufundi, bua kulumbuula nshibo ya Yehowa Efile Mukulu aaye. 9 Babayile kui tshite muakuidi mukata Ilikiya, abo nkumupa makuta abaabadi bafikie nao ku nshibo ya Efile Mukulu, abaabadi bakongole kui bena Levi babaadi abalama ku biibi, kui bena Manasee bena Efraime na kui bangi bena Isalele boso, mpa na kui Yunda na Benyamine na bantu ba mu Yelusalema. 10 Akupu babeapeele baba babaabadi batuule bua kutala mifubo ku nshibo ya Yehowa. Bafubi ba mu nshibo ya Yehowa namu babaadi beafubishe bua kulumbuula nshibo. 11 Babeapeele ba nsendue na bebaki bua kuula mabue abadi basee na mabaya a kufubisha bu bibayi na bu mitandalo, bua kulumbuula mashibo abaadi ba nfumu ba Yunda batadiile aaluila.

12 Baba bantu babakitshine mudimo n’eshimba dimune. Bena Levi babaabadi batuule bua kuibakunkusha babaadi: Yahate, Obadia muina Merari, Zekariya na Meshulame muina Kehate. Na bena Levi boso babaadi abauku kuyimba kalolo, 13 babaadi abakunkusha bafubi ba bisumanga,* na babaadi abakunkusha baba boso babaadi abafubu midimo ilekene ya mishindo yoso. Bangi ba ku bena Levi babaadi bafundi, bakunkushi na balami ba ku biibi.

14 Pabaabadi abaata makuta abaabadi balambule mu nshibo ya Yehowa, tshite muakuidi Ilikiya bapetele mukanda wa Miiya ya Yehowa ubaadi mupe muilo waye kukiila kui Moyise. 15 Biabia Ilikiya nkulungula mufundi Shafane’shi: “Napete mukanda wa Miiya mu nshibo ya Yehowa.” Paapa Ilikiya nkupa Shafane wawa mukanda. 16 Akupu Shafane bayile na mukanda kui nfumu na nkumulungula’shi: “Bafubi bobe bakuete kukita midimo yoso yabadi bebape. 17 Babapongoola makuta ekeele mu nshibo ya Yehowa, na babeapa baba babadi batuule na baba bakuete kukita mudimo.” 18 Dingi mufundi Shafane nkulungula nfumu’shi: “Kui mukanda ubabampa kui tshite muakuidi Ilikiya.” Akupu Shafane nkubanga kuiubadika kumpala kua nfumu.

19 Nka nfumu ki’apusha mayi a mu Miiya, basaanuine bilamba biaye. 20 Akupu nfumu nkutumina Ilikiya, Ahikame muana a Shafane, Abadone muana a Mika, mufundi Shafane na Asaya mufubi a nfumu dino eyi’shi: 21 “Ndayi nukepushe Yehowa pa muanda wande, na pa muanda wa baba bashale mu Isalele na mu Yunda, pabitale mayi a mu mukanda ubabapete, muanda nsungu ya Yehowa yaketupongoluela ngikata, pa muanda bamashetu kulu tababaadi bakookiele eyi dia Yehowa pa kutumikila bioso bifundibue mu uno mukanda.”

22 Biabia Ilikiya, pamune na bantu babaadi nfumu mutume nkuenda kui mutemuki mukashi Ulda. Baadi mukashi a Shalume muana a Tikua, muana a Arkase, mulami a mbalo ya kulamina bilamba, na baadi mushale mu Kipindi Kipia kia kibundi kia Yelusalema na abo nkuisamba naye kuakua. 23 Aye nkuibalungula’shi: “Yehowa Efile Mukulu a Isalele bakula bino’shi, ‘Lungulayi yawa muntu benutumu kuandi’shi: 24 “Yehowa bakula bino’shi, ‘nafuisha dikienga mu ino mbalo na kui bantu bemushale, milua yoso ifundibue mu mukanda wabekeele babadikie kumpala kua nfumu a Yunda ayikalombana. 25 Muanda babansumbushena na bakuete kufitshisha miishi ya milambu bua bangi b’efile bua kunfiitshisha munda na mufubo oso wa maasa aabo, nsungu yande ayikapongoloka ino mbalo na tayikapu.’” 26 Anka kui nfumu a Yunda ekeele muinutume bua kuipusha Yehowa, abitungu numulungule bino’shi, “Yehowa Efile Mukulu a Isalele bakula’shi: ‘Pabitale mayi wekeele mupushe, 27 pa muanda eshimba diobe dibenyongola* na bueyisha kumpala kua Efile Mukulu pobopusha mayi aaye pabitale ino mbalo na bantu bemushale, na bueyisha kumpala kuande, bosaana bilamba biobe na bodidi kumpala kuande, ami namu nakupushiisha, nyi abiakula Yehowa. 28 Nyi buakinyi nakakubungu kui bamashobe kulu na abakakushiiki mu butaale, meso oobe taakamono dikienga dioso diankafuisha mu ino mbalo na kui bantu bemushale.’”’”

Akupu abo nkutuadila nfumu lualulo. 29 Biabia nfumu nkutuma eyi, na abo nkuitanyisha bakulu boso ba mu Yunda na ba mu Yelusalema. 30 Kunyima kua biabia, nfumu nkukaamina ku nshibo ya Yehowa na bantu boso ba mu Yunda, bantu boso bashale mu Yelusalema, ba tshite muakuidi, bena Levi—bantu boso, biabikala bakata sunga bashadile. Aye nkuibabadikila mayi oso a mu mukanda wa kilombeno ubaabadi bapete mu nshibo ya Yehowa. 31 Nfumu nkuimana pa mbalo yaye na nkukita kilombeno* kumpala kua Yehowa’shi, alondo Yehowa na alama mayi aaye, mitentekiesho yaye na miiya yaye n’eshimba diaye dioso na anyima* aaye oso, pa kukookiela mayi a kilombeno abaadi afundibue mu uno mukanda. 32 Dingi baadi munyingishe bantu boso babaadi mu Yelusalema na mu Benyamine buabadia kukumiina kiakia kilombeno. Paapa bantu ba mu Yelusalema babakitshine mianda muyile kilombeno kia Efile Mukulu, Efile Mukulu a ba nkambua babo. 33 Akupu Yoziase bakatuishe bintu* bioso bi butete bibaadi muiumbo dishima dia Isalele, na aye nkunyingisha muntu oso a mu Isalele bua kufubila Yehowa Efile Mukulu aabo. Munda mua muwa waye oso, tababaadi balekie kulonda Yehowa Efile Mukulu a ba nkambua babo.

35 Yoziase bakitshinyine Yehowa Pasaka mu Yelusalema. Babayipayile nyema bua mulambu wa Pasaka muifuku dia 14 dia mueshi wa kumpala. 2 Batuudile ba tshite muakuidi ku midimo yabo, aye nkuibanyingisha bua kulombasha mudimo wabo wa mu nshibo ya Yehowa. 3 Akupu, balunguile bena Levi babaadi balongieshi ba Isalele oso mushima na babaadi ba kishila ku meso kua Yehowa’shi: “Tuulayi Mushete wa kishila mu nshibo ibaadi Salomone muana a Davide nfumu a Isalele muibakie, tanuikala anuiwutuala dingi ku mapampa eenu. Binobino fubilayi Yehowa Efile Mukulu eenu na Isalele muilo waye. 4 Elumbuuleyi mu bifuko bia bamashenu muyile bisaka bienu, mu kuipushena na bibaabadi bafunde kui Davide Nfumu a Isalele na kui muana aaye Salomone. 5 Imanayi mu ma mbalo a kishila, nuibungie pamune muyile bifuko bia bakuenu, bua kufubila muilo, oso a kuabadi abitungu ekale mu kisaka kia kifuko kia bena Levi. 6 Nuipee nyema bua mulambu wa Pasaka na nuitooshe, nulumbuule bintu bua’shi bakuenu bakumbashe eyi dia Yehowa dibaadi muakule ku bukuashi bua Moyise.”

7 Yoziase batuushile nyema bua muilo, mikooko yana ilume na bipembue biana bua mulambu wa Pasaka bua bantu boso babaadi paapa, nyema yoso ibaadi 30 000 na ngombe 3 000. Ino nyema yoso, nfumu nyi beyituushile. 8 Bakunkushi babatuushile namu bia buntu bu mulambu wa mu kukumiina kuabo bua muilo, bua ba tshite muakuidi na bua bena Levi. Ilikiya, Zekariya na Yekiele bakunkushi ba nshibo ya Efile Mukulu a binyibinyi babapeele ba tshite muakuidi nyema 2 600 bua mulambu wa Pasaka na ngombe 300. 9 Konania na mukuabo Shemaya na Netanele, pamune na Ashabiya, Yeyele na Yosabade babaadi bakata ba bena Levi, babatuushile bua bena Levi nyema 5 000 bua mulambu wa Pasaka na ngombe 500.

10 Babapuile kulumbula bintu bioso, na ba tshite muakuidi nkuimana pa ma mbalo aabo, bena Levi nkuimana mu bisaka biabo nka bu bibaadi nfumu muibatumine eyi. 11 Babayipayile nyema ya mulambu wa Pasaka, na ba tshite muakuidi babaadi abamiamina mase abaabadi abebatambika, pabaadi bena Levi ababambula misokia ya nyema. 12 Akupu, babalumbuluile milambu ya kushiika kaalo bua kuiyabila bantu, babaadi bebungie mu bisaka muyile bifuko bia bamashabo, bua’shi bamone bia kuiyilambula kui Yehowa muyile bibaadi bifundibue mu mukanda wa Moyise, babakitshine nka biabia na ngombe. 13 Babateekiele* nyema ya mulambu wa Pasaka muyile kipikua, abo nkuteeka milambu ya kishila mu ngieso, mu ngieso ya buma na mu mpano, akupu abo nkuenda nabio kui muilo oso. 14 Kunyima, babalumbuluile bintu buabo na bua ba tshite muakuidi, muanda ba tshite muakuidi, bana ba Alona, babaadi abatuusha milambu ya kushiika kaalo na bipese bia muimu mpa na ku kiolua. Biabia bena Levi nkulumbuula bintu buabo banabene na bua ba tshite muakuidi, bana ba Alona.

15 Ba tuyimba, bana ba Asafe babaadi pa ma mbalo aabo muyile muiya wa Davide, wa Asafe, wa Emane na wa Yedutune muntu baadi amuena nfumu bimonua, na balami ba ku biibi babaadi ku biibi bilekenelekene. Tababaadi na lukalo lua kukatuka pa ma mbalo aabo a mudimo, muanda bakuabo bena Levi babaadi abebalumbuluila bintu. 16 Mu diadia efuku, babapuile kulumbuula bioso bibaadi Yehowa atekie buabadia kukita Pasaka, na bua kulambula milambu ya kushiika kaalo ku kilambuilo kia Yehowa muyile eyi dia Nfumu Yoziase.

17 Bena Isalele babaadi paapa babakitshine Pasaka mu yaaya nsaa na Musangelo wa Mikate ishi Kitatusho munda mua mafuku musambobidi. 18 Kubanga mu mafuku a mutemuki Samuele, tababaadi bakite ungi Pasaka e biabia mu Isalele, na takui ungi nfumu a Isalele bakitshine Pasaka bu yawa ababakitshine kui Yoziase, ba tshite muakuidi, bena Levi, Yunda oso mushima na bena Isalele babaadi paapa, na bantu ba mu Yelusalema. 19 Babakitshine uno Pasaka mu kipua kia 18 kia kumunana kua Yoziase.

20 Kunyima kua bino bioso, pabapuile Yoziase kulumbuula ntempelo,* Neko nfumu a Ejipitu bafikile mu kulua ngoshi ku Karkemishe pepi na Efrate. Paapa, Yoziase nkuenda bua kulua naye. 21 Kadi Neko batumine mikiendi kuadi bua kumulungula’shi: “Ô nfumu a Yunda, a uno muanda ngukutale ku kinyi? Ntshi mufikie mu kulua nobe lelo, anka ne mufikie mu kulua na ingi nshibo, na Efile Mukulu mmuakule’shi abitungu nkite bukidibukidi. Biabia bua buwa bobe, tokumanga kuluisha Efile Mukulu e nami, bisumanga akubutula.” 22 Kadi Yoziase tabaadi mukumiine kuleka, anka baadi mushintule bilamba biaye bua’shi bantu tabamutundulanga buadia kulua naye ngoshi, na tabateemeshe mayi a Neko abaadi aakatuka mukanua mua Efile Mukulu. Bafikile mu kulua ngoshi mu Ebanda dia Megido.

23 Na beedi ba mikietue nkuasa nfumu Yoziase, nfumu nkulungula bafubi baye’shi: “Nkatusheyi pano, muanda natapika ngofu.” 24 Biabia, bafubi baye babamukatuishe muitempu na bamuela muitempu diaye dia kabidi dia ngoshi, benda naye ku Yelusalema. Biabia bafuile, na abo nkumushiika mu mashama a bamashaye kulu, na Yunda oso mushima na Yelusalema nkudila Yoziase. 25 Na Yelemiya bayimbile loono lua maalo bua Yoziase, na ba tuyimba boso balume na bakashi mbatungunukie na kuyimba pabitale Yoziase mu ngono yabo ya maalo mpa na lelo uno. Babatshile kitshibilo kia’shi bekale abayimbi yaaya ngono mu Isalele, na mbeyifunde mu ngono ya maalo.

26 Ingi mianda ya Yoziase na bikitshino biaye bia kifulo kia lulamato, bibaadi mulonde mianda ibaadi ifundibue mu Miiya ya Yehowa, 27 na bibakitshine, kubanga ku mbangilo mpa na ku nfudiilo, mbifundibue mu Mukanda wa ba Nfumu ba Isalele na ba Yunda.

36 Akupu, bantu ba muiumbo nkuata Yeokaze muana mulume a Yoziase, nkumutuula bu nfumu pa mbalo ya nshaye mu Yelusalema. 2 Yeokaze baadi na bipua 23 pabafikile nfumu, na aye nkumunana munda mua mieshi isatu mu Yelusalema. 3 Anka, nfumu a Ejipitu bamukatuishe ku bufumu mu Yelusalema, aye nkutshibila eumbo kibawo kia ntalanta* 100 ya kiamo kia arja na ntalanta umune a ôlo. 4 Dingi, nfumu a Ejipitu nkutuula Eliyakime mukuabo na Yeokaze bu nfumu a Yunda na a Yelusalema, na nkushintula eshina diaye bu Yehoyakime, anka Neko nkuata mukuabo Yeokaze na nkuenda naye mu Ejipitu.

5 Yehoyakime baadi na bipua 25 pabafikile nfumu, na aye nkumunana munda mua bipua 11 mu Yelusalema. Batungunukile na kukita mianda ibubi ku meso kua Yehowa Efile Mukulu aaye. 6 Nabukondonosore Nfumu a Babilone bafikile mu kulua naye, bua’shi amukuate na ende naye ku Babilone mmumuanye nkano ibidi ya kiamo kia munyinga. 7 Nabukondonosore batshile bingi bintu bia mu nshibo ya Yehowa aye nkuenda nabio ku Babilone, na nkuibituula muibalasa diaye ku Babilone. 8 Ingi mianda ya Yehoyakime, mianda ibutete ibakitshine na ingi mianda ibubi ibabapetele muadi, mbifundibue mu Mukanda wa ba Nfumu ba Isalele na ba Yunda, na muana aaye Yehoyakine nkufika nfumu pa mbalo yaye.

9 Yehoyakine baadi na bipua 18 pabafikile nfumu, na aye nkumunana munda mua mieshi isatu na mafuku ekumi mu Yelusalema, na batungunukile na kukita mianda ibubi ku meso kua Yehowa. 10 Ku mbangilo kua kipua,* Nfumu Nabukondonosore batumine bantu bua’shi bakamukuate bende naye ku Babilone, na bintu bia muulo bia mu nshibo ya Yehowa. Aye nkutuula Sedekiya mukuabo na nshaye bu nfumu a Yunda na a Yelusalema.

11 Sedekiya baadi na bipua 21 pabafikile nfumu, na aye nkumunana munda mua bipua 11 mu Yelusalema. 12 Batungunukile na kukita mianda ibubi ku meso kua Yehowa Efile Mukulu aaye. Tabaadi muiyishe kumpala kua mutemuki Yelemiya baadi akula kuiyi dia Yehowa. 13 Dingi, batombokiele nfumu Nabukondonosore, aye baadi mumutshipishe muishina dia Efile Mukulu, baadi nka na mutue wibukopo aye nkupapisha eshimba, na nkupela kualukila kui Yehowa Efile Mukulu a Isalele. 14 Bakata boso ba ba tshite muakuidi, mpa na muilo, babanyishile kukutua lulamato p’abo kukita mianda ibutete ya ingi miilo, na abo nkuikasha nshibo ya Yehowa butete, ibaadi muikashe ya kishila mu Yelusalema.

15 Yehowa Efile Mukulu a ba nkambua babo batungunukile na kuibadimusha kukiila kui batumibua, baadi ebadimusha misango na misango muanda baadi apushila muilo waye lusa na mbalo yaye ya kushala. 16 Babatungunukile na kuyisha batumibua ba Efile Mukulu milongo, kusenga mayi aaye na kusepa batemuki baye, mpa na pabaadi Yehowa mukuatshile muilo waye nsungu ibukopo, mpa na pabaukutshilue lukulupilo lua kupaashibua.

17 Biabia Efile Mukulu nkutakula nfumu a bena Kaldeya bua kuibaluisha ngoshi, na aye nkuipaa ba nsongualume babo na lupete lua ngoshi mu nshibo yabo ya kishila. Tabapushile muntu su ngumune lusa, biabikala nsongualume sunga nsonguakashi,* muntu mununu sunga e na kilema. Efile Mukulu batuudile bintu bioso mu maasa muaye. 18 Bintu bioso bia mu nshibo ya Efile Mukulu a binyibinyi, bikata na bipeela, mpa na bupeta bua mu nshibo ya Yehowa na bupeta bua mu nshibo ya nfumu na bakunkushi baye, bebituadile bioso mu Babilone. 19 Bashiikile nshibo ya Efile Mukulu a binyibinyi kaalo, nkubumbula bimano bia Yelusalema, nkushiika bitenta biaye binyingishibue kaalo, na nkuluisha bintu bioso bia muulo. 20 Batuadile bantu babapandile ku lupete lua ngoshi mu Babilone, abo nkufika bafubi baye na bafubi ba bana baye, mpa na pababangile bufumu bua bena Pelese kukunkusha, 21 bua kulombasha eyi dia Yehowa dibakuile kukiila kui Yelemiya, mpa na pabaadi nsenga ifute nsabato yayo. Mafuku oso abayidi ishale bisumanga ibaadi ilame nsabato, bua kulombasha bipua 70.

22 Mu kipua kia kumpala kia Nfumu Siruse a Pelese, bua’shi eyi dia Yehowa dibaadi muakule kukidila kui Yelemiya dikumbane, Yehowa baadi mutakule Nfumu Siruse a Pelese bua kuukisha mukandu mu bufumu buaye boso, mukandu ubaadi dingi mufunde akula’shi: 23 “Nfumu Siruse a Pelese bakula bino: ‘Yehowa Efile Mukulu a muiyilu bampa mafumu oso a pa nsenga, na bampa mufubo wa kumuibakila nshibo mu Yelusalema e mu Yunda. Muntu oso yawa e munkatshi muenu a mu muilo waye oso, Yehowa Efile Mukulu aaye ekale naye, na akaamine kuakua.’”