ESELA

1 Mu kipua kia kumpala kia nfumu Siruse a Pelese, buashi eyi dia Yehowa dibaadi muakule kukidila kui Yelemiya dikumbane, Yehowa baadi mutakule nfumu Siruse a Pelese bua kuukisha mukandu mu bufumu buaye boso, mukandu ubaadi dingi mufunde akula’shi:

2 “Nfumu Siruse a Pelese bakula bino’shi, ‘Yehowa Efile Mukulu a eyilu bampa mafumu oso a pa nsenga, na bampa mufubo wa kumuibakila nshibo mu Yelusalema e mu Yunda. 3 Muntu oso yawa e munkatshi muenu a mu muilo waye oso, Efile Mukulu aaye ekale naye, na akaamine ku Yelusalema e mu Yunda, na ebakuule nshibo ya Yehowa Efile Mukulu a Isalele, aye nyi Efile Mukulu a binyibinyi sha nshibo ibaadi mu Yelusalema.* 4 Muntu oso mushale bu muenyi, sunga ekala mbalo kinyi bamukuashe kui bankungishanyi naye* pa kumupa kiamo kia arja, ôlo, bingi bintu biabo na bimunuanga, pamune na mulambu wa mu kukumiina bua nshibo y’Efile Mukulu a binyibinyi ibaadi mu Yelusalema.’”

5 Akupu ba nfumu ba bifuko bia ba mashabo ba Yunda na ba Benyamine, ba tshite muakuidi na bena Levi, muntu oso abaabadi batakule kui Efile Mukulu a binyibinyi, baadi muilumbuule bua kukaamina na bua kuibakuula nshibo ya Yehowa ibaadi mu Yelusalema. 6 Baba boso babaadi bebefunyishe babaadi bebakuashe pa kuibapa* bintu bia kiamo kia arja na bia ôlo, bingi bintu biabo, bimunuanga, na bintu bia muulo, kukatusha milambu yoso ya mu kukumiina kuabo.

7 Dingi nfumu Siruse baadi mutuushe bintu bia nshibo ya Yehowa, bibaadi Nabukondonosore muate ku Yelusalema na atuula mu nshibo y’efile aaye. 8 Nfumu Siruse a Pelese baadi muibituushe ku bukunkushi bua Mitredate mulami a mmono baadi muibibadikile Shesebazare* nfumu a Yunda.

9 Bintu bibaabadi babadikie nyi mbino: Bintu 30 bia ôlo bi bu biseele, bintu 1 000 bia kiamo kia arja bi bu biseele, bingi bintu 29 bia kushintuula, 10 bibakudi bipeela bia ôlo 30, bibakudi bipeela bia kiamo kia arja 410, na bingi bintu 1 000. 11 Bintu bioso bia ôlo na bia kiamo kia arja bibaadi 5 400, Shesebazare baadi muende na bino bintu bioso pabaadi bantu babaabadi bakuate benda nabo batuukie mu Babilone akupu balukiila mu Yelusalema.

2 Bano nyi bantu ba mu provense babaadi batuukie ku bantu babaabadi bakuate benda nabo, baba babaadi nfumu Nabukondonosore a Babilone mukuate enda nabo ku Babilone na babaadi kunyima balukiile mu Yelusalema na mu Yunda muntu oso mu kibundi kiabo, 2 baba babaadi bafikie na Zorobabele, Yeshua, Neemiya, Selaya, Reelaya, Mordekayi, Bilshane, Mispare, Biguwai, Rehume, na Baana.

Mu bungi bua bana balume bena Isalele mubaadi: 3 bana ba Paroshe, 2 172; 4 bana ba Shefatia, 372; 5 bana ba Ara, 775; 6 bana ba Pahate-moabe, ba ku bana ba Yeshua na Yoabe, 2 812; 7 bana ba Elame, 1 254; 8 bana ba Zatu, 945; 9 bana ba Zakai, 760; 10 bana ba Bani, 642; 11 bana ba Bebai, 623; 12 bana ba Azegade, 1 222; 13 bana ba Adonikame, 666; 14 bana ba Biguwai, 2 056; 15 bana ba Adine, 454; 16 bana ba Atere, ba mu nshibo ya Ezekiya, 98; 17 bana ba Besayi, 323; 18 bana ba Yora, 112; 19 bana ba Ashume, 223; 20 bana ba Gibare, 95; 21 bana ba Beteleme, 123; 22 bana balume ba ku Netofa, 56; 23 bana balume ba ku Anatote, 128; 24 bana ba Azemawete, 42; 25 bana ba Kiriate-yearime, Kefira na Berote, 743; 26 bana ba Rama na Geba, 621; 27 bana balume ba ku Mikemase, 122; 28 bana balume ba ku Betele na ku Ai, 223; 29 bana ba Nebo, 52; 30 bana ba Mangebishe, 156; 31 bana ba ungi Elame, 1 254; 32 bana ba Arime, 320; 33 bana ba Lode, Adide na Ono, 725; 34 bana ba Yeriko, 345; 35 bana ba Senaa, 3 630.

36 Ba tshite muakuidi: bana ba Yedaya ba mu kifuko kia Yeshua, 973; 37 bana ba Imere, 1 052; 38 bana ba Pashure, 1 247; 39 bana ba Arime, 1 017.

40 Bena Levi: bana ba Yeshua na Kadimiyele, ba ku bana ba Odawiya, 74. 41 Tuyimba: bana ba Asafe, 128. 42 Bana ba balami ba biibi: bana ba Shalume, bana ba Atere, bana ba Talmone, bana ba Akube, bana ba Atita, bana ba Shobai, boso, 139.

43 Bafubi ba ku ntempelo:* bana ba Ziha, bana ba Asufa, bana ba Tabaote, 44 bana ba Kerose, bana ba Siha, bana ba Padone, 45 bana ba Lebana, bana ba Agaba, bana ba Akube, 46 bana ba Agabe, bana ba Salemayi, bana ba Anana, 47 bana ba Gidele, bana ba Ngakare, bana ba Reaya, 48 bana ba Resine, bana ba Nekonda, bana ba Gazame, 49 bana ba Uza, bana ba Paseya, bana ba Besai, 50 bana ba Asana, bana ba Meune, bana ba Nefushime, 51 bana ba Bakebuke, bana ba Akufa, bana ba Arure, 52 bana ba Baselute, bana ba Mekida, bana ba Aresha, 53 bana ba Barkose, bana ba Sisera, bana ba Tema, 54 bana ba Neziya na bana ba Atifa.

55 Bana ba bafubi ba Salomone: bana ba Sotayi, bana ba Soferete, bana ba Peruda, 56 bana ba Yaala, bana ba Darekone, bana ba Gidele, 57 bana ba Shefatia, bana ba Atile, bana ba Pokerete-hasefaine na bana ba Ami.

58 Bafubi boso ba ku ntempelo,* na bana ba bafubi ba Salomone babaadi 392.

59 Bano nyi babaadi batuukile ku Tele-mala, Tele-harsha, Kerube, Adone, na Imere anka tababaadi bia kushinkamisha bifuko bia ba mashabo na kuabadi batuukile bua kuuka su babaadi bena Isalele: 60 Bana ba Delaya, bana ba Tobia, bana ba Nekonda, 652. 61 Na ku bana ba ba tshite muakuidi: Bana ba Abaya, bana ba Akose, bana ba Barzilayi baadi muibakile mukashi ku bana bakashi ba Barzilayi muina Gileade na babaadi abamuitanyina muishina dia muko aaye. 62 Babaadi bakimbe mashina a bantu ba mu bifuko biabo mu mikanda, anka tababaadi beapete, nyi buakinyi tababaadi bebatuule bu ba tshite muakuidi.* 63 Guvernere* baadi muibalungule’shi, ntambalombene kudia bintu bikile kishila mpa na pa kuikala tshite muakuidi mulombene kuipusha Efile Mukulu ku bukuashi bua Urime na Tumime.

64 Bungi bua bantu ba kakongie koso bubaadi 42 360, 65 kukatusha ba mpika babo balume na bakashi babaadi 7 337; babaadi dingi na tuyimba 200 tulume na tukashi. 66 Nfualasa yabo ibaadi 736, mpunda yabo ikata ibaadi 245, 67 tumelo tuabo tubaadi 435, mpunda yabo ipeela ibaadi 6 720.

68 Pababafikile ku nshibo ya Yehowa mu Yelusalema, bangi ba ku ba nfumu ba bifuko bia ba mashabo, babatuushishe milambu mu kukumiina kuabo bua nshibo y’Efile Mukulu a binyibinyi, bua kuiyibakuula* mu mbalo ya ibaadi. 69 Muyile bintu bibaabadi nabio, babatuushishe drakme* ya ôlo 61 000, mine* ya kiamo kia arja 5 000, na ma nkandio 100 bua ba tshite muakuidi bua kukuatshishena mufubo. 70 Na ba tshite muakuidi, bena Levi, bangi bantu, tuyimba, balami ba ku biibi na bafubi ba ku ntempelo* babashalele mu bibundi biabo, na bangi bena Isalele* boso babashalele mu bibundi biabo.

3 Pabakumbene mueshi wa musambobidi bena Isalele* babaadi mu bibundi biabo, babebungile pamune mu Yelusalema bekale eyi dimune. 2 Yeshua muana a Yehozadake na bakuabo ba tshite muakuidi na Zorobabele muana a Salatiele na bakuabo balume, nkuibua na nkuibaka kilambuilo ki’Efile Mukulu a Isalele, buashi bepalambule milambu ya kushiika kaalo bu biabidi bifundibue mu Muiya wa Moyise muntu a Efile Mukulu a binyibinyi.

3 Biabia abo nkuibaka kilambuilo pa mbalo yakibaadi kumpala, sunga bibaabadi abatshinyi bantu ba maumbo ebefunyishe, na abo nkubanga kulambula Yehowa milambu ya kushiika kaalo panka, milambu ya kushiika kaalo ya ku namashika na ya ku kiolua. 4 Akupu abo nkukita musangelo wa bitanda,* muyile bifundibue, na kuifuku n’efuku, babaadi abalambula bungi butshibibue bua milambu ya kushiika kaalo bubaadi butekibue bu’efuku dioso. 5 Akupu abaadi balambule milambu ya kushiika kaalo ya pa kiubishi na milambu ya mieshi ipia, na milambu bua misangelo yoso ya bipungo ya kishila bua Yehowa, mpa na milambu ya mu kukumiina ibaadi muntu oso mulambule kui Yehowa. 6 Kubanga muifuku dia kumpala dia mueshi wa musambobidi, ababangile kulambula Yehowa milambu ya kushiika kaalo, sunga mbiabashibaadi babande kuibaka kitako kia ntempelo a Yehowa.

7 Abo nkupa bantu abatanyaa mabue na ba nsendue makuta, na nkupa bena Sidone na bena Tiire bia kudia, bia kutoma na muimu, buabadia kufika na mabaya a mutshi wa sedre pa mema a kalunga, kukatukila ku Lebanone na ku Yopee, muyile matalua abaabadi bebape kui Siruse nfumu a Pelese.

8 Mu kipua kia kabidi kunyima kuabo kufika ku nshibo y’Efile Mukulu a binyibinyi ku Yelusalema mu mueshi wa kabidi, Zorobabele muana a Salatiele, Yeshua muana a Yehozadake na bangi bakuabo balume, ba tshite muakuidi, bena Levi na baba boso babaadi bafikie ku Yelusalema abakatuka kubaabadi bebakuate benda nabo, nkubanga mufubo; babatudile bena Levi kubanga ku bipua 20 na kunundu bua kukunkusha mufubo wa nshibo ya Yehowa. 9 Biabia Yeshua, bana baye na bakuabo balume, na Kadimiyele na bana baye, bana ba Yunda, babebungile pamune bua kukunkusha baba abaadi abakitshi mufubo mu nshibo y’Efile Mukulu a binyibinyi, pamune na bana ba Enadade, bana babo na bakuabo balume bena Levi.

10 Pabaadi bebaki bebakie kitako kia ntempelo a Yehowa, ba tshite muakuidi bafuale bilamba biabo bia bu tshite muakuidi, bekale na mpungi na bena Levi, bana ba Asafe bekale na sembale, babemene bua kutumbisha Yehowa muyile bukunkushi bua nfumu Davide a Isalele. 11 Na ababangile kuyimba na kupuula, pa kutumbisha na kutumbula Yehowa, “muanda e buwa; kifulo kiaye kia lulamato kui Isalele ki kuanka bua loso.” Akupu bantu boso babelele musaase n’eyi di bukopo bua kutumbisha Yehowa muanda kitako kia nshibo ya Yehowa kibaadi kibakibue. 12 Ba tshite muakuidi bebungi, bena Levi na ba nfumu ba bifuko, bantu banunu babaadi bamone nshibo ya kala babadidile n’eyi di bukopo pabaabadi bamone kitako kia ino nshibo akibakibua, pabaadi bangi be bungi abele misaase ya muloo n’eyi di bukopo. 13 Biabia bantu tababaadi bia kutundula misase ya muloo na mayi a kudila, muanda bantu babaadi abele misaase n’eyi di bukopo mu kipaso kibaadi mayi aapushika kula ngofu.

4 Pabaadi beshikuanyi ba Yunda na ba Benyamine bapushe’shi, bantu babaabadi bakuate benda nabo akupu balukiila, bakuete kuibaka ntempelo a Yehowa Efile Mukulu a Isalele, 2 mususa umune babafikile kui Zorobabele na ba nfumu ba bifuko, bebalungula’shi: “Etutadileyi tuibakie nenu; muanda nka bu anue, natue atulanguilaa* Efile Mukulu eenu, na tuibamulambule milambu kubanga mafuku a nfumu Esakadone a Asiri baadi mufikie n’etu pano.” 3 Anka Zorobabele, Yeshua na ba nfumu ba bifuko ba Isalele nkuibalungula’shi: “Tanuina kia kuibaka netu nshibo y’Efile Mukulu eetu, muanda atue banabene atuibakila Yehowa Efile Mukulu a Isalele nshibo nka bu bibaadi Siruse nfumu a Pelese muitutumine eyi.”

4 Akupu bantu ba muiumbo babaadi nka ababofusha bantu ba mu Yunda ku mashimba* bua kuibatshinyisha buashi balekie kuibaka. 5 Babaadi bafute bantu abatuushaa malango bua kuluisha mpango yabo mafuku oso a Siruse nfumu a Pelese, mpa na mu mafuku a kumunana a Daryuse nfumu a Pelese. 6 Ku mbangilo kua kumunana kua Asueruse babafundile mukanda, bua kufunda bantu ba mu Yunda na ba mu Yelusalema. 7 Na mu mafuku a nfumu Artakesese a Pelese, Bishelame, Mitredate, Tabele, na bangi benabo babaadi bafundile nfumu Artakesese mukanda, abo nkualula wawa mukanda mu kina Arameya, beufunda mu nfundilo a kina Arameya.*

8 * Rehume mukata a bafubi ba mbulamatadi, na skribe Shimishai babafundiile nfumu Artakesese mukanda bua kufunda Yelusalema, bakula’shi: 9 (Wawa mukanda ubaadi aufiki kui Rehume mukata a bafubi ba mbulamatadi, skribe Shimishai na bangi benaye boso, ba nsushi, baba balondele ba guvernere, bafundi, bantu ba mu Ereke, bantu ba mu Babilone na bantu ba mu Susa, kuamba’shi bena Elame. 10 Na ingi miilo ibaadi Asenapare muntu mukata na a kinemo mukuate enda nayo na eyituula mu bibundi bia Samadiya na bangi bantu ba mu nsenga i abua bushiya bua muela,* na binobino 11 mianda ibaabadi bafunde mu mukanda ubaabadi bamutumine ngino.)

“Kui nfumu Artakesese atue bafubi bobe, bantu ba mu nsenga i abua bushiya bua muela, tubakutumina uno mukanda: Na binobino 12 nfumu aukie’shi bena Yunda bakatukie kodi bafika kuatudi, mbafikie ku Yelusalema, bakuete kuibakuula kibundi kia buntomboshi na ki bubi na bakuete kupudisha midimba na kulumbuula bitako. 13 Binobino nfumu aukie’shi, su kino kibundi kibebakuulua, na midimba yakio ibaapu, tabekala abafutu kitadi, efuto, sunga kitadi ki’eshinda na bino abikitshi biashi mu tushete tua nfumu mutuele makuta apeela. 14 Bu biatukuete atupete efuto dia muibalasa,* ta bibuwa buetu kumona muanda wi bubi bui bino aufikila nfumu, nyi buakinyi tubatumu uno mukanda bua kuukisha nfumu, 15 buashi bakimbuule mu mukanda wa mianda ya ba mashabo kulu. Su bokitshi biabia, okauku’shi kino kibundi, nkibundi kia buntomboshi, mui bantu abakitshina ba nfumu na ma provense bibubi, na muanka mui bantu abatakulaa bangi ku buntomboshi kubanga mu mafuku a kala. Nyi buakinyi kino kibundi kibaadi kibutudibue. 16 Atuukisha nfumu’shi su kino kibundi kibebakuulua, na midimba yakio ibapu tokekala na matalua* pa nsenga i abua bushiya bua muela.”

17 Nfumu nkutuma eyi kui Rehume mukata a bafubi ba mbulamatadi, na skribe Shimishai na bangi benabo bashale mu Samadiya, na bantu ba mu nsenga i abua bushiya bua muela’shi:

“Nenusemeyi! Binobino 18 mukanda ubanuitutumina ubabadikibua* kalolo kumpala kuande. 19 Kuiyi diande, mbakimbuule na basangana’shi, kubanga ku kala kino kibundi, kibaadi akitombokiela ba nfumu, na buntomboshi na buluishi bibaadi muanka. 20 Mu Yelusalema mubaadi ba nfumu be bukome babaadi bamune nsenga yoso i abua bushiya bua muela, na babaadi bebafute kitadi, efuto na kitadi ki’eshinda. 21 Binobino tuma eyi buashi baba bantu bemikie mufubo, buashi kiakia kibundi takibakuluanga mpa na pantumu eyi. 22 Dimukayi, tanulengulanga uno muanda buashi uno muanda wi bubi bui bino taufikilanga nfumu.”

23 Kunyima ku’abo kubadika mukanda wa nfumu Artakesese kumpala kua Rehume, skribe Shimishai na benabo, babayile bukidibukidi ku Yelusalema kui bena Yunda, bebakitshisha pa bukopo bua kuimika mufubo. 24 Mu aa mafuku nyi mubaadi mufubo wa nshibo y’Efile mukulu ibaadi mu Yelusalema wimane na ubaadi ushale nka wimane mpa na mu kipua kia kabidi kia kumunana kua nfumu Daryuse a Pelese.

5 Akupu mutemuki Agai na mutemuki Zekariya muikulu a Ido, nkutemukila bena Yunda babaadi mu Yunda na mu Yelusalema muishina di’Efile Mukulu a Isalele baadi kunundu kuabo. 2 Nyi pabaadi Zorobabele muana a Salatiele na Yeshua muana a Yehozadake babangie kuibakuula nshibo y’Efile Mukulu ibaadi mu Yelusalema; na batemuki b’Efile Mukulu babaadi nabo na babaadi abebakuatshishena. 3 Mu aa mafuku Tatenai guvernere a nsenga i abua bushiya bua muela,* na Shetare-bozenai na benabo babafikile kuabadi na bebepusha’shi: “Nnanyi muinutumine eyi bua kuibaka ino nshibo na bua kupudisha luno luibako?” 4 Akupu abo nkuibepusha’shi: “Mashina a bantu bakuete kufuba ku luno luibako mbananyi?” 5 Anka Efile Mukulu baadi alama* bakulu ba bena Yunda na tababaadi bebemikie mpa na pabaabadi na kia kutumina Dariuse mukiendi, na pabadia kualukiila mukanda aufiki kui nfumu pabitale uno muanda.

6 Uno nyi mukanda ubaadi Tatenai guvernere a nsenga i abua bushiya bua muela, na Shetare-bozenai na benaye ba guvernere bamulondele ba nsenga i abua bushiya bua muela, batumine nfumu Dariuse; 7 abo nkumutumina mukiendi, na bino nyi bibabadi bafunde mu mukanda:

“Kui nfumu Dariuse:

“Butaale buikale nobe! 8 Nfumu aukie’shi tuikeele bende mu provense a Yunda, ku nshibo y’Efile Mukulu mukata, na ikuete kuibakibua na mabue akata abadi babungulushe mu yaaya mbalo, na bakuete kuela mitandalo mu midimba. Muilo ukuete kufuba na katshintshi na mufubo ukuete kuenda kumpala muyile kuikitshisha kuabo. 9 Akupu tuikeele bepushe bakulu babo’shi: ‘Nnanyi muinutumine eyi buanudia kuibaka ino nshibo na kupudisha luno luibako?’ 10 Tuikeele dingi bebepushe mashina aabo, buashi tufunde mashina a bantu bakuete kukunkusha mufubo na tukulungule anka.

11 “Lualulo luabekeele betupe nyi nduno: ‘Tui bafubi b’Efile Mukulu a eyilu na nsenga na tukuete kuibakuula nshibo ibaadi ibakue takudi bipua bibungi, ibaadi nfumu mukata a Isalele muibakie na eyipudisha. 12 Anka pa muanda ba mashetu kulu abaadi bafiitshishe Efile Mukulu a eyilu munda, bebatudile mu maasa a nfumu Nabukondonosore a Babilone muina Kaldeya baadi mubumbule ino nshibo na akuata muilo enda nao mu Babilone. 13 Kadi mu kipua kia kumpala kia nfumu Siruse a Babilone, nfumu Siruse batumine eyi bua kuibakuula ino nshibo y’Efile Mukulu. 14 Dingi nfumu Siruse baadi mutuushe mu ntempelo a Babilone bintu bia ôlo na kiamo kia arja bia mu nshibo y’Efile Mukulu, bibaadi Nabukondonosore muate mu ntempelo mu Yelusalema na enda nabio ku ntempelo a Babilone, babaadi bebipe muntu e na eshina bu Shesebazare* abaabadi batuule bu guvernere kui Siruse. 15 Siruse nkumulungula’shi: “Ata bino bintu, nda webituule mu ntempelo e mu Yelusalema, na nshibo y’Efile Mukulu ibakuulue mu mbalo ibayidi kumpala.” 16 Akupu uno Shesebazare nkufika na aye nkuibaka bitako bia nshibo y’Efile Mukulu i mu Yelusalema; na kubanga nka paapa ikiayibakibua mpa na binobino, anka tayapuile nya.’

17 “Binobino, su nfumu akumiina bakimbule mu bintu bia muulo bia nfumu bi kuakua ku Babilone, bua kuuka su nfumu Siruse baadi mutume eyi bua kuibakuula yaaya nshibo y’Efile Mukulu mu Yelusalema na betutumine kitshibilo kia nfumu pabitale uno muanda.”

6 Nyi pabaadi nfumu Dariuse mutume eyi, na abo nkukimbuula mu nshibo mubaabadi abalamina mikanda ya mianda ya kala na bintu bia muulo mu Babilone. 2 Na babaadi basangane mufungofungo mu mbalo ibakue na midimba i bukopo ku Ekebatana mu provense a Mede, na mianda ibaabadi bafunde muanka nyi ngino:

3 “Mu kipua kia kumpala kia nfumu Siruse, nfumu Siruse batumine eyi pabitale nshibo y’Efile Mukulu mu Yelusalema’shi: ‘Nshibo ibakuulue mu mbalo yabekala abalambula milambu, na abitungu bebakie bitako biayo, bula buayo bua muiyilu abuikala kude* 60, na mu bukata buayo amuikala kude 60, 4 ikale na milongo isatu ya mabue akata abungulushe mu yaaya mbalo na mulongo umune wa mabaya, na baate makuta mu nshibo ya nfumu bua kufuta bino bintu. 5 Dingi bintu bia ôlo na bia kiamo kia arja bia nshibo y’Efile Mukulu, bibaadi Nabukondonosore mutuushe mu ntempelo baadi mu Yelusalema na enda nabio mu Babilone, bialushibue buashi bebituule mu mbalo yabio mu ntempelo mu Yelusalema na bilamibue mu nshibo y’Efile Mukulu.’

6 “Binobino Tatenai guvernere a nsenga i abua bushiya bua muela,* Shetare-bozenai na benobe ba guvernere bakulondele, ba nsenga i abua bushiya bua muela tanuifubuilanga kuakua. 7 Tanukutshishuanga mufubo wa yaaya nshibo y’Efile Mukulu. Guvernere a bena Yunda na bakulu ba bena Yunda abebakuula yaaya nshibo y’Efile Mukulu mu mbalo ya ibaadi kala. 8 Dingi natumu eyi pabitale kianudia kukitshina baba bakulu ba bena Yunda, bua kuibakuula yaaya nshibo y’Efile Mukulu: Baate makuta mu makuta a nfumu, mu bitadi biabadi bakongole mu nsenga i abua bushiya bua muela, beape bukidibukidi baba bantu buashi batungunukie na mufubo kushi kuimika. 9 Na kintu kioso kiabadi nakio lukalo—ngombe yana, mikooko na mikooko yana bua milambu ya kushiika kaalo bu’Efile Mukulu a eyilu, ntete ya blé, mungua, nfinyo na muimu, nka bu abiakula ba tshite muakuidi be mu Yelusalema, abitungu nutungunukie na kuibapa bianka efuku dioso kushi kuleka, 10 buashi batungunukie na kulambula milambu ayisankisha Efile Mukulu a eyilu na batekie bua muwa wa nfumu na wa bana baye. 11 Natumu dingi eyi’shi su muntu ayipaa uno muiya abakakatusha ebaya ku nshibo yaye, abakamukaamisha kuanka na bamuanye, na nshibo yaye ayikafiki bu nkumba a bantu* boso bua kino kilubilo. 12 Na Efile Mukulu baadi mukite biashi eshina diaye dikale kuakua, akatushe nfumu oso sunga muilo oso awibuesha eyasa diao bua kuipaa uno muiya na kubumbula yaaya nshibo y’Efile Mukulu i mu Yelusalema, ami Dariuse natumu dino eyi. Beditumikile bukidibukidi.”

13 Akupu Tatenai guvernere a nsenga i abua bushiya bua muela, Shetare-bozenai na benabo nkukita bukidibukidi mianda yoso ibaadi nfumu Dariuse mutume eyi. 14 Na bakulu ba bena Yunda babatungunukile na kuibaka na kuyisha mifubo kumpala, banyingishibue na mayi a butemuki a mutemuki Agai na Zekariya muikulu a Ido; abo nkupudisha kuibaka nshibo kuiyi di’Efile Mukulu a Isalele na kuiyi dia Siruse, dia Dariuse, na dia Artakesese nfumu a Pelese. 15 Babapuile kuibaka nshibo muifuku dia kasatu, dia mueshi wa Adare* mu kipua kia kasamombo kia kumunana kua nfumu Dariuse.

16 Akupu bena Isalele, ba tshite muakuidi, bena Levi na bangi bantu babaabadi bakuate benda nabo akupu balukiila, babalambuile Efile Mukulu ino nshibo na muloo. 17 Bua kulambula ino nshibo y’Efile Mukulu babatushishe ngombe 100, mikooko 200, mikooko yana 400, na mbushi ilume 12 bu mulambu wa muluisho wa Isalele oso muyile bungi bua bisamba bia Isalele. 18 Abo nkutuula ba tshite muakuidi mu bisaka biabo, na bena Levi mu bisaka biabo bua mufubo w’Efile Mukulu mu Yelusalema muyile biabadi bafunde mu mukanda wa Moyise.

19 Na bantu babaabadi bakuate benda nabo akupu balukiila, nkukita Pasaka muifuku 14 dia mueshi wa kumpala. 20 Ba tshite muakuidi na bena Levi boso babaadi betooshe, biabia babadi boso batooshibue, abo nkuipaa nyema ya mulambu wa Pasaka bua bantu boso babaabadi bakuate benda nabo akupu balukiila, bua ba tshite muakuidi n’abo na buabo abo banabene. 21 Akupu bena Isalele babaabadi bakuate benda nabo akupu balukiila, babaadi beyidie pamune na bantu boso babaadi bebungie kuabadi na babaadi belamune ku butete bua miilo ya mu nsenga bua kulanguila* Yehowa Efile Mukulu a Isalele. 22 Babaadi bakite dingi musangelo wa mikate ishi kitatusho munda mua mafuku musambobidi na muloo oso muanda Yehowa baadi mukite biashi bekale na muloo na baadi mukite biashi nfumu a Asiri ekale nabo kalolo, nyi aye nkuibakuatshishena* mu mufubo wa nshibo y’Efile Mukulu a binyibinyi, Efile Mukulu a Isalele.

7 Kunyima kua ino mianda, mu mafuku a kumunana kua nfumu Artakesese a Pelese, Esela baadi mualukiile. Baadi muana a Selaya, muana a Azariya, muana a Ilikiya, 2 muana a Shalume, muana a Zadoke, muana a Akitube, 3 muana a Amariya, muana a Azariya, muana a Merayote, 4 muana a Zeraya, muana a Uzi, muana a Buki, 5 muana a Abishuwa, muana a Finease, muana a Eleazare, muana a Alona mukata a ba tshite muakuidi. 6 Uno Esela baadi akatukila ku Babilone. Baadi muntu atentulaa bifundue* baadi auku kalolo* Muiya wa Moyise ubaadi Yehowa Efile Mukulu a Isalele mutuushe. Nfumu baadi mumupe bintu bioso bibaadi mutekie, muanda Yehowa Efile Mukulu aaye baadi naye.*

7 Bangi bena Isalele, ba tshite muakuidi, bena Levi, tuyimba, balami ba ku biibi na bafubi ba ku ntempelo* babakaamine ku Yelusalema mu kipua kia musambobidi kia kumunana kua nfumu Artakesese. 8 Na Esela bafikile ku Yelusalema mu mueshi wa katano mu kipua kia musambobidi kia kumunana kua nfumu. 9 Muifuku dia kumpala dia mueshi wa kumpala, babangile luendo kukatukila ku Babilone na aye nkufika mu Yelusalema muifuku dia kumpala dia mueshi wa katano, muanda Efile Mukulu aaye baadi naye. 10 Esela baadi mulumbuule eshimba* diaye bua kulonga Muiya wa Yehowa na bua kuiutumikila, na bua kulongiesha miiya yaye na biimu biaye mu Isalele.

11 Uno nyi mukanda ubaadi nfumu Artakesese mupe tshite muakuidi Esela, muntu atentulaa bifundue,* muntu auku kulonga kalolo* mayi a Yehowa na miiya yaye kui Isalele:

12 * “Artakesese nfumu a ba nfumu, kui tshite muakuidi Esela, muntu atentulaa* Muiya wa Efile Mukulu a eyilu: Butaale bui bungi buikale nobe. Na binobino 13 natumu eyi’shi mu bufumu buande muntu oso a mu muilo wa Isalele mpa na ba tshite muakuidi na bena Levi, akumiina kuenda nobe ku Yelusalema ende. 14 Muanda nfumu na bantu baye musambobidi abatuushaa malango, mbakutume bua kutaluula su Muiya wa Efile Mukulu oobe odi nao,* bakuete kuiutumikila mu Yunda na mu Yelusalema, 15 na bua kuata kiamo kia arja na ôlo bituushe nfumu na bantu baye abatuushaa malango mu kukumiina kuabo, bapa Efile Mukulu a Isalele, sha kishalelo kiaye kikale mu Yelusalema, 16 na kiamo kia arja kioso na ôlo biodi mupete mu provense oso a Babilone pamune na kia buntu kituushe muilo na ba tshite muakuidi mu kukumiina kuabo bua nshibo y’Efile Mukulu aabo i mu Yelusalema. 17 Na abitungu oule bukidibukidi na aa makuta ngombe, mikooko, mikooko yana, pamune na milambu yayo ya ntete na milambu yayo ya kitomuanga, na abitungu webilambule pa kilambuilo kia nshibo y’Efile Mukulu obe mu Yelusalema.

18 “Na kiakia kioso akimueneka ki buwa ku meso kobe na kua bakuenu bua kukita, nuibalombene kui kikita na kiamo kia arja na ôlo abishala, muyile kikiebe ki’eshimba di’Efile Mukulu eenu. 19 Na bintu bioso biabadi bakupe bua mufubo wa nshibo y’Efile Mukulu oobe, abitungu webituushe kumpala ku’Efile Mukulu mu Yelusalema. 20 Na bingi bintu abitungu bua nshibo y’Efile Mukulu oobe biabakutekie bua kutuusha, ofubishe makuta a mu kashete ka nfumu bua kuibituusha.

21 “Ami nfumu Artakesese natumu eyi kui balami boso ba tushete tua makuta be mu nsenga i abua bushiya bua muela’shi,* kintu kioso akinutekie tshite muakuidi Esela muntu atentulaa* Muiya w’Efile Mukulu a eyilu, nuikikite bukidibukidi, 22 mpa na ku ntalanta* 100 ya kiamo kia arja bipimo bia kor* 100 bia ntete ya blé, bipimo bia mbaafu 100 bia nfinyo, bipimo bia mbaafu* 100 bia muimu na mungua kushi kutshiba bungi. 23 Mianda yoso yabadi batume eyi kui Efile Mukulu a eyilu, ikitshibue na kisumi bua nshibo y’Efile Mukulu a eyilu buashi nsungu tayifikilanga bufumu bua nfumu na bana baye. 24 Na abenudimusha dingi’shi, tabitungu kufutshisha su ngumune a ku ba tshite muakuidi, bena Levi, tuyimba, balami ba ku biibi na bafubi ba ku ntempelo* na bantu abafubaa ku ino nshibo y’Efile Mukulu kitadi su nkimune, efuto sunga kitadi ki’eshinda.

25 “Na obe Esela muyile binangu biabadi bakupe kui Efile Mukulu oobe,* tuula bantu abakuatshishenaa ba nsushi na ba nsushi bua kusambisha muilo oso wi mu nsenga i abua bushiya bua muela, baba boso abauku miiya y’Efile Mukulu oobe; na abitungu olongieshe muntu oso sheyiuku. 26 Na muntu oso sh’akokiela Muiya w’Efile Mukulu oobe na muiya wa nfumu abitungu atshibilue kiimu bukidibukidi, biakikala kia lufu, kumubinga muiumbo, kumutshibila kibawe sunga kumuela mu lukano.”

27 Yehowa Efile Mukulu a ba mashobe kulu atumbishibue, aye batakula nfumu bua kulengiesha nshibo ya Yehowa mu Yelusalema! 28 Na bandesha kifulo kia lulamato kumpala kua nfumu, kua bantu baye abatuushaa malango na kua bakunkushi boso ba nfumu be bukome. Biabia ami nkunyinga eshimba* muanda Yehowa Efile Mukulu ande baadi naami, na ami nkubunga bantu* abakunkushaa mu Isalele bua kuenda nami.

8 Bano nyi ba nfumu ba bifuko na mashina a bantu abaabadi bafunde ku kifuko na kifuko, babaadi batuukie nami mu Babilone mu mafuku a kumunana kua nfumu Artakesese: 2 mu bana ba Finease, Gershome; mu bana ba Itamare, Ndaniele; mu bana ba Davide, Atushe; 3 mu bana ba Shekanya, mu bana ba Paroshe, Zekariya, na aye baadi na bana balume 150 babaabadi bafunde mashina; 4 mu bana ba Pahate-moabe, Elieho-enai muana a Zeraya, na aye baadi na bana balume 200; 5 mu bana ba Zatu, Shekania, muana a Yahaziyele, na aye baadi na bana balume 300; 6 mu bana ba Adine, Ebede muana a Yonatane, na aye baadi na bana balume 50; 7 mu bana ba Elame, Yeshaya muana a Ataliya, na aye baadi na bana balume 70; 8 mu bana ba Shefatia, Zebadia muana a Mikaele, na aye baadi na bana balume 80; 9 mu bana ba Yoabe, Obadia muana a Yekiele, na aye baadi na bana balume 218; 10 mu bana ba Bani, Shelomite muana a Yosifiya, na aye baadi na bana balume 160; 11 mu bana ba Bebai, Zekariya muana a Bebai, na aye baadi na bana balume 28; 12 mu bana ba Azegade, Yohanane muana a Akatane, na aye baadi na bana balume 110; 13 mu bana ba Adonikame baba babaadi ba nfudiilo, mashina aabo ngano: Elifelete, Yeyele, na Shemaya na abo babaadi na bana balume 60; 14 na mu bana ba Biguwai, Utai, na Zabude na abaadi na bana balume 70.

15 Nebabungile ku muela awalala ku Akawa, na atue nkushala kuakua munda mua mafuku asatu. Anka panaadi mutalule muilo na ba tshite muakuidi, ntshi naadi mupete muntu su ngumune a ku bena Levi paapa. 16 Biabia ami nkuitanyisha Eliezere, Ariyele, Shemaya, Elenatane, Yaribe, Elenatane, Natane, Zekariya, na Meshulame babaadi abakunkusha bantu, na Yoyaribe na Elenatane babaadi balongieshi. 17 Akupu ami nkuibatumina eyi pabitale Ido mukunkushi a mbalo ibaabadi abetanyina bu Kasifiya, ami nkuibalungula bua kulungula Ido na bakuabo balume bafubi ba ku ntempelo,* abaadi mu Kasifiya bua kuitutuadila bafubi bua nshibo y’Efile Mukulu eetu. 18 Bu bibaadi Efile Mukulu eetu e netu* abaadi betutuadile muntu mudimukie mu bana ba Maheli muikulu a Levi muana a Isalele, kuamba’shi, Sherebiya na bana baye balume na bakuabo balume, bantu 18; 19 na Ashabiya aye baadi na Yeshaya a ku bena Merari, bakuabo balume na bana babo balume, bantu 20. 20 Kubaadi bafubi ba ku ntempelo* 220, abaadi Davide na bakunkushi batuule bua kukuasha bena Levi, boso buabo abaadi bebatemune mu mashina aabo.

21 Akupu ami nkulungula bantu boso bua kuishidika kuakua ku muela wa Akawa, buatudia kuiyisha kumpala kua Efile Mukulu eetu, bua kukimba bukunkushi buaye bua luendo luetu, buetu, bua bana betu, na bua bintu bietu bioso. 22 Naadi mupushe buufu bua kuteka nfumu basalayi na bantu abatambushaa nfualasa bua kuitukaluila muishinda kui beshikuanyi betu, muanda tubaadi balungule nfumu’shi: “Efile Mukulu eetu, e na baba boso abamukimbi, anka bukome buaye na nsungu yaye bi kui baba boso abamusumbushena.” 23 Biabia atue nkuishidika na nkuteka Efile Mukulu eetu pabitale uno muanda, na aye nkuteemesha kuiyaya kuetu.

24 Biabia ami nkusangula bakata ba ba tshite muakuidi 12 kuamba’shi, Sherebiya na Ashabiya pamune na bakuabo balume ekumi. 25 Akupu ami nkuibapimina kiamo kia arja, ôlo, na bintu, kia buntu kibaadi nfumu na bantu baye abatuushaa malango, na bakunkushi baye, na bena Isalele boso babaadi paapa batuushe bua nshibo y’Efile Mukulu eetu. 26 Kunyima ku’ami kuibipima naadi muibape ntalanta* 650 ya kiamo kia arja, bintu bia kiamo kia arja 100 bi muulo wa ntalanta ibidi, ntalanta ya ôlo 100, 27 bibakudi bipeela 20 bia ôlo bi muulo wa darike* 1 000, na bintu bibidi bia kiamo kia munyinga ki buwa kimonga akipenyapenya bi buwa nka bu ôlo.

28 Akupu ami nkuibalungula’shi: “Nui beselele kui Yehowa na bintu bi selele, na kiamo kia arja na ôlo, nkia buntu kia mu kukumiina kiabadi batuushe bua Yehowa, Efile Mukulu a ba mashenu kulu. 29 Nuibilame kalolo mpa na pa nuibipimi kumpala kua bakata ba ba tshite muakuidi, bena Levi na bakunkushi ba bifuko bia Isalele mu Yelusalema, mu tudimbo* tua nshibo ya Yehowa.” 30 Biabia ba tshite muakuidi na bena Levi, nkuata kiamo kia arja, ôlo, na bintu bibaabadi bebapimine buashi bebituale ku Yelusalema ku nshibo ya Efile Mukulu eetu.

31 Nfudiilo a bioso atue nkukatuka ku muela wa Akawa mu efuku dia 12 dia mueshi wa kumpala bua kuenda ku Yelusalema, na Efile Mukulu eetu baadi netu na baadi muitupaashe ku maasa a beshikuanyi betu na kui bantu abatuukishenaa muishinda bua kukitshishena bibubi. 32 Biabia tubafikile ku Yelusalema na atue nkushala kuakua munda mua mafuku asatu. 33 Na muifuku dia kananka tubapimine kiamo kia arja, ôlo, na bintu mu nshibo y’Efile Mukulu eetu, na atue nkuibipa Meremote muana a tshite muakuidi Uriyah, na aye baadi na Eleazare muana a Finease, na abo abaadi na bena Levi, Yosabade muana a Yeshua na Noadiya muana a Binuwi. 34 Bintu bioso bibaadi bibadikibue na bipimibue, na bushito boso bubaadi bufundibue. 35 Bantu boso babaabadi bakuate benda nabo mu dingi eumbo, akupu balukiila, nkulambula Efile Mukulu a Isalele milambu ya kushiika kaalo, ngombe ilume 12 bua Isalele oso, mikooko ilume 96, mikooko ilume yana 77, na mbushi ilume 12, bu mulambu wa muluisho; bino bioso bibaadi mulambu wa kushiika kaalo bua Yehowa.

36 Akupu atue nkupa bantu abaleshaa mpala ya nfumu* na ba guvernere ba mu nsenga i abua bushiya bua muela* mukanda wa nfumu, na abo nkukuatshishena muilo na nshibo y’Efile Mukulu a binyibinyi.

9 Nka baki’abapu kukita ino mianda, bakunkushi babafikile kuandi na bandungula’shi: “Muilo wa Isalele, ba tshite muakuidi, na bena Levi, ntambelamune ku miilo ya mu nsenga na ku bikitshino biayo bibubi, bikitshino bia bena Kanaana, bena Ite, bena Perizi, bena Yebuse, bena Amone, bena Moabe, bena Ejipitu na bia bena Amore. 2 Abo na bana babo balume mbebakile bangi ba ku bana babo bakashi. Binobino abo bekale lutandua* lua kishila babesanga na miilo ya mu nsenga, bakunkushi na bakunkushi bebalondele, nyi ba kumpala kukita kino kikitshino kia kukutua lulamato.”

3 Nka ami ki’apusha uno muanda nasanuine bilamba biande na ekotshi diande dishi na maboko, na ami nkutukula nyene ya ku mutue wande na miefu yande na ami nkushala paashi muinyongole ngofu. 4 Akupu bantu boso babaadi abanemeka ngofu* mayi a Efile Mukulu a Isalele, nkunyifunyisha pa muanda wa kukutua kua lulamato kua bantu babaabadi bakuate benda nabo akupu balukiila, panaadi mushale paashi muinyongole ngofu mpa na ku nsaa ya mulambu wa ntete wa ku kiolua.

5 Pa nsaa ya mulambu wa ntete wa ku kiolua nebuele na bilamba biande, n’ekotshi diande dishi na maboko bisane na naleka kuinyongola na ami nkukunama nkuela maboko muiyilu kui Yehowa Efile Mukulu ande. 6 Na ami nkuakula’shi: “Ô Efile Mukulu ande napusha buufu na namono’shi, ntshimukumbene kuibuesha mpala yande kodi, Ô Efile Mukulu ande, muanda bilubilo bietu bibafuimi ku mitue yetu na kupiila kuetu kubakaamina mpa na muiyilu. 7 Kubanga mu mafuku a ba mashetu kulu mpa na lelo uno, kupiila kuetu nkukata na pa muanda wa bilubilo bietu, atue, ba nfumu betu, na ba tshite muakuidi betu, tuibatudiibue mu maasa a ba nfumu ba angi maumbo, ku lupete lua ngoshi, mu kukuatshibua, mu kupaulua na mu kukuatshishua bufu bu biabidi lelo uno. 8 Anka binobino bua kapindi kapeela, Yehowa Efile Mukulu eetu, buetulesha lusa pakutadila’shi bangi bakuatudi bapande, na pa kuitukaluila mu mbalo yobe iselele buashi meso eetu apenyepenye, Ô Efile Mukulu eetu, na buetupa dingi bukome mu bupika buetu. 9 Muanda sunga biatudi ba mpika, Efile Mukulu eetu ntamuitusumbushene mu bupika buetu, anka mmuituleshe kifulo kiaye kia lulamato kumpala kua ba nfumu ba Pelese, bua kuitupa dingi bukome bua kuibakuula nshibo y’Efile Mukulu eetu, na kuibakuula ma mbalo aayo aluile na bua kuitupa mudimba wa mabue* mu Yunda na mu Yelusalema.

10 “Anka kunyima kua ino mianda kukitshika tui kuakula naminyi Ô Efile Mukulu eetu? Muanda tuibasumbushene miiya yobe, 11 iboodi muitupe kukiila kui bafubi bobe batemuki wakula’shi: ‘Nsenga yanukatuele nuate bu yenu nyi nsenga i butete, pa muanda wa butete bua miilo ya mu yaaya nsenga, pa muanda wa bikitshino biabo bibubi biabadi baushe muanka na mianda yabo i butete kubanga ku ayi nsongo mpa na ku ingi nsongo. 12 Dingi tanupanga bana babo balume bana benu bakashi, sunga kukumiina bana babo bakashi bua bana benu balume, na tanuibakuashanga buabadia kuikala mu butaale na kupeta bupeta, buashi nuikale na bukome na nudie bintu bibuwa bia mu nsenga na nuiyate bua bana benu bua loso.’ 13 Na kunyima kua mianda yoso itufikile pa muanda wa bikitshino bietu bibubi, na wa kupiila kuetu kukata, sunga mbiabia obe Efile Mukulu eetu tuemuitukitshine mianda muyile kilubilo kietu na wemukumiine’shi atue be pano tupande— 14 abitungu tuipee dingi miiya yobe na tuiyibakishene na miilo ikuete kukita ino mianda ibubi su? Tuetufiitshila munda ngofu na wetubutule atue boso kushi kuleka muntu su ngumune na muwa su? 15 Ô Yehowa Efile Mukulu a Isalele, we mululame muanda bangi ba kuatudi mbapande bashala na muwa mpa na lelo uno. Pano tui kumpala kobe mu kupiila kuetu, muanda bi bukopo kuimana kumpala kobe pa muanda wa bino.”

10 Pabaadi Esela atekie na atondo miluisho, adilanga mulale mpala paashi kumpala kua nshibo y’Efile Mukulu a binyibinyi, kibumbu kikata kia bana balume, bana bakashi na bana, kia bena Isalele kibebungile kuadi kiamuifunyisha muanda bantu babaadi abadidi ngofu. 2 Akupu Shekanya muana a Yekiele a ku bana ba Elame nkulungula Esela’shi: “Tubakutua lulamato kui Efile Mukulu eetu pa kuibakila* bakashi benyi ba miilo i muiumbo, sunga mbiabia kukii dingi lukulupilo bua Isalele. 3 Binobino, tukiteyi kilombeno n’Efile Mukulu eetu, pa kubinga bakashi boso na bana babadi batande mu kuipushena na bukunkushi bua Yehowa na bua baba abanemeka ngofu* eyi di’Efile Mukulu eetu. Tukiteyi mianda muyile Muiya. 4 Ebuee muanda uno muanda nyi mbushito bobe, na tui nobe. Nyinga eshimba na okite kiakia akitungu.”

5 Biabia Esela nkuibua na nkutshipisha bakata ba ba tshite muakuidi, bena Levi na Isalele oso mutshipo wakukita biabekeele bakule. Nyi abo nkukita mutshipo. 6 Binobino Esela nkukatuka kumpala kua nshibo y’Efile Mukulu a binyibinyi, na nkuenda ku kadimbo* ka Yehokanane muana a Eliashibe. Sunga bibayile kuakua, tabaadi mudie kidibua sunga kutoma mema, muanda baadi mu maalo pa muanda wa kukutua lulamato kua bantu babaabadi bakuate benda nabo akupu balukiila.

7 Akupu abo nkuukisha mu Yunda na mu Yelusalema oso’shi, bantu boso babaabadi bakuate kala benda nabo akupu balukiila, bebungie ku Yelusalema; 8 na muyile kitshibilo kia bakunkushi na bakulu, muntu oso shafiki munda mua mafuku asatu, abamunyengie bintu biaye bioso, na bamubingie mu kakongie ka bantu babaabadi bakuate benda nabo akupu balukiila. 9 Biabia bantu boso ba Yunda na ba Benyamine babebungile pamune ku Yelusalema munda mua mafuku asatu, kuamba’shi muifuku dia 20 dia mueshi wa kitema. Bantu boso babaadi bashale mu lupango lua nshibo y’Efile Mukukulu a binyibinyi, abasuusu pa muanda wa uno muanda na pa muanda wa mpeshi ebukopo baadi anoko.

10 Tshite muakuidi Esela nkuibua na nkuibalungula’shi: “Nubakutua lulamato pa kuibakila bakashi benyi, na nubafuimisha kupiila kua Isalele. 11 Binobino tondayi miluisho kui Yehowa Efile Mukulu a ba mashenu kulu, na nukite kikiebe ki’eshimba diaye. Elamuneeyi kui miilo ya muiumbo na kui bano bakashi benyi.” 12 Nyi kakongie koso nkualula na eyi di bukopo’shi: “Atukitshi nka bu bibuakula. 13 Anka bantu be bungi, na nyi nkipungo kia mpeshi, bi bukopo kushala bemane paasha, na muanda t’awata efuku dimune sunga mafuku abidi muanda tuibaleshe buntomboshi bukile mu uno muanda. 14 Biabia bakunkushi betu bemeene namu kakongie koso na baba boso mu bibundi bietu bebakile bakashi benyi bafikie pa nsaa itshibibue, pamune na bakulu na ba nsushi ba kibundi kioso, mpa na patukatusha sungu i bukopo y’Efile Mukulu eetu kuatudi pabitale uno muanda.”

15 Anka Yonatane muana a Asahele na Yazeya muana a Tikwa abaadi bapele uno muanda, Meshulame na Shabetayi bena Levi nkuibakuatshishena. 16 Anka bantu babaabadi bakuate kala benda nabo akupu balukiila nkukita bibaabadi bepushene, na tshite muakuidi Esela na ba nfumu ba bifuko muyile mashibo a ba mashabo, boso babaabadi bateemune mu mashina aabo, babebungile pa bupenka muifuku dia kumpala dia mueshi w’ekumi bua kutala uno muanda; 17 na muifuku dia kumpala dia mueshi wa kumpala, babaadi bapudishe kutalula muanda wa bana balume boso babaadi bebakile bakashi benyi. 18 Babaadi basangane’shi, bangi ba ku bana ba ba tshite muakuidi babaadi bebakile bakashi benyi: Mu bana ba Yeshua muana a Yehozadake na bakuabo balume, Maaseya, Eliezere, Yaribe, na Gedalia. 19 Anka abaadi balee* bua kubinga bakashi babo, na bu bibaabadi bapiile, oso a kuabadi baadi na kia kutuusha mukooko ulume.

20 Mu bana ba Imere mubaadi Hanani na Zebadia; 21 mu bana ba Arime mubaadi Maaseya, Eliya, Shemaya, Yekiele na Oziase; 22 mu bana ba Pashure mubaadi Elioenai, Maaseya, Ismaele, Netanele, Yosabade na Eleasa. 23 Mu bena Levi mubaadi Yosabade, Shimeyi, Kelaya, (kuamba’shi Kelita), Petaya, Yunda, na Eliezere; 24 mu tuyimba mubaadi Eliashibe; na mu balami ba biibi mubaadi Shalume, Teleme na Uri.

25 Mu bena Isalele mu bana ba Paroshe mubaadi Ramiya, Iziya, Malikiya, Miyamine, Eleazare, Malikiya na Benaya; 26 mu bana ba Elame mubaadi Matanya, Zekariya, Yekiele, Abdi, Yelemote na Eliya; 27 mu bana ba Zatu mubaadi Elioenai, Eliashibe, Matanya, Yelemote, Zabade na Aziza; 28 mu bana ba Bebai mubaadi Yehokanane, Ananiya, Zabayi na Atelayi; 29 mu bana ba Bani mubaadi Meshulame, Maluka, Adaya, Yashube, Sheale na Yelemote; 30 mu bana ba Pahate-moabe mubaadi Adana, Kelale, Benaya, Maaseya, Matanya, Besalele, Binuwi na Manasee; 31 mu bana ba Arime mubaadi Eliezere, Ishiya, Malikiya, Shemaya, Shimeone, 32 Benyamine, Maluka na Shemariya; 33 mu bana ba Ashume mubaadi Matenayi, Matata, Zabade, Elifelete, Yelemai, Manasee na Shimeyi; 34 mu bana ba Bani mubaadi Madayi, Amalame, Uele, 35 Benaya, Bedeya, Keluhi, 36 Vanya, Meremote, Eliashibe, 37 Matanya, Matenayi na Yaasai; 38 mu bana ba Binuwi mubaadi Shimeyi, 39 Shelemeya, Natane, Adaya, 40 Makenadebayi, Shashayi, Sharayi, 41 Azarele, Shelemeya, Shemariya, 42 Shalume, Amariya na Yosefe; 43 mu bana ba Nebo mubaadi Yeyele, Matitiya, Zabade, Zebina, Yadai, Yowele na Benaya. 44 Bano boso babaadi bebakile bakashi benyi, na abo nkubinga bakashi babo pamune na bana babo.