NEEMIYA

1 Mayi a Neemiya* muana a Akaliya: Mu mueshi wa Kisleve,* mu kipua kia 20, naadi mu Shushane* ebalasa dinyingishibue. 2 Mu aa mafuku Anani, umune a ku bakuetu bafikile na bangi bantu ba mu Yunda, na ami nkuibepusha pabitale bena Yunda babaadi bapande ku bantu babaabadi bakuate benda nabo akupu balukiila, na pabitale Yelusalema. 3 Abo nkualula’shi: “Bantu bashale kuakua mu provense babaadi bapande ku bantu babaabadi bakuate benda nabo akupu balukiila, nshalelo abo e bukopo bukile na e buufu. Midimba ya Yelusalema ngibumbukie, na biibi biaye mbishikibue kaalo.”

4 Nk’ami ki’apusha ano mayi, nashalele paashi na nabanga kudila na ami nkutuula maalo munda mua mafuku, natungunukile na kuishidika na kuteka kumpala ku’Efile Mukulu a eyilu. 5 Nakuile’shi: “Ô Yehowa Efile Mukulu a eyilu, Efile Mukulu mukata na akutshina, alombashaa kilombeno kiaye na aleshaa kifulo kia lulamato kui baba bamufule na abakookiela miiya yaye, 6 Tee namu matui oobe na obuule meso oobe bua kuteemesha luteko lua mufubi oobe, lua nkuete kuteka lelo uno kanya na bufuku pabitale bafubi bobe bena Isalele, pa nkuete kutonda miluisho ikukitshine muilo wa Isalele. Tui bakite miluisho ami na nshibo ya nshami. 7 Binyibinyi tui bakukitshine mianda ibubi pa kupela kutumikila mayi, miiya na bitshibilo bibodi mupe mufubi oobe Moyise.

8 “Tentekiesha namu eyi* dibodi mutumine mufubi oobe Moyise’shi: ‘Su nuakutua lulamato, nakenupalakasha munkatshi mua miilo. 9 Anka su nualukiila kuandi na nuatumikila miiya yande na kuiyikookiela, sunga muilo oobe wekala upalakane mpa na ku nfudilo kua eyilu, nakeubungu kubangila kuakua, neutuale mu mbalo yandi musangule bua kutuula eshina diande.’ 10 Nyi mbafubi bobe na muilo oobe, odi mukuule na bukome bobe bukata n’eyasa diobe di bukome. 11 Ô Yehowa, tee namu matui oobe ku luteko lua mufubi oobe, na ku luteko lua bafubi bobe abasankila kutshina eshina diobe, na kita namu bia’shi mianda ya mufubi oobe ikile kalolo lelo uno, na uno muntu ampushishe lusa.”

Mu aa mafuku nadi muedi a maalua a nfumu.

2 Mu mueshi wa Nisane* mu kipua kia 20 kia kumunana kua Nfumu Artakesese, babaadi batuule nfinyo kumpala kuaye, na nka bu pakiubishi natshile nfinyo neyipa nfumu, anka kasha ntshinadi mumuenekie muinyongole biabia kumpala kuaye. 2 Biabia nfumu nkungipusha’shi: “Buakinyi omueneka muinyongole biabia aku namu t’okuete kukumba? We na muanda muishimba diobe, nyi buakinyi we muinyongole.” Panapushishe bino, napushishe moo ukile.

3 Nyi ami nkulungula nfumu’shi: “Nfumu ekale na muwa bua loso! Ne kukutua kuinyongola naminyi pekale kibundi, mbalo yabadi bashiikie bamashami kulu ngiluishibue na biibi biakio mbishikiibue kaalo?” 4 Akupu nfumu nkungipusha’shi: “Okiebe kinyi?” Mususa umune ami nkuteka Efile Mukulu a eyilu. 5 Akupu ami nkulungula nfumu’shi: “Su abisankisha nfumu, na su mufubi oobe mukuminyibue nobe, ntume ku Yunda mu kibundi kibaabadi bashiikie bamashami kulu bua’shi nekibakuule.” 6 Akupu nfumu na ndalamumba aaye mushale ku lupese luaye, nkungipusha’shi: “Luendo lobe aluata mafuku bungi kinyi, na walukiila mafuku kinyi?” Biabia abio nkusankisha nfumu bua kuntuma, na ami nkumulungula mafuku a nkalukiila.

7 Ami nkulungula nfumu’shi: “Su abisankisha nfumu, bampe mikanda bua ba guvernere ba mu nsenga i abua bushiya bua muela,* bua’shi bantadiile nkile mu nsenga yabo mpa na pankafiki mu Yunda, 8 mpa na mukanda wa nkapa Asafe mulami a Mutamba wa Nfumu, bua’shi ampe mabaya akupua nao biibi bia Mbalo Inyingishibue* ya Nshibo,* na bua midimba ya kibundi na bua nshibo ya nkashala.” Biabia nfumu nkuiyimpa, muanda Efile Mukulu ande baadi nami.

9 Nfudiilo a bioso ami nkufika kui ba guvernere ba mu nsenga i abua bushiya bua muela, ami nkuibapa mikanda ya nfumu, nfumu baadi dingi muntume na bakata ba kiluilo kia basalayi na bantu abatambushaa nfualasa. 10 Pabaadi Sanabalata muina Orone na Tobia mufubi muina Amone bapushe biabia, tababaadi basankie bibaadi muntu mufikie mu kukitshina muilo wa Isalele muanda wibuwa.

11 Nfudiilo a bioso ami nkufika ku Yelusalema, na ami nkushala kuanka munda mua mafuku asatu. 12 Nebuele bufuku, ami na ndambo ya bantu banaadi nabo, na ntshinaadi mulungule muntu su ngumune bibaadi Efile Mukulu muele muishimba diande bua kukitshina Yelusalema, na ntshinaadi na nyema kukatusha penda nyema anaadi mukaamine. 13 Na bufuku ami nkutuukila ku Kiibi kia Kuibanda, ami nkukidila kumpala kua Mushima wa Nyoka Mukata mpa na ku Kiibi kia Mituto ya Buto, na ami nkutaluula midimba ya Yelusalema ibaadi ibumbukie na biibi biaye bibaadi bishiikibue kaalo. 14 Ami nkukidila ku Kiibi kia Mushima na Kuishiba dia mema dia nfumu, na takubaadi mbalo ya kukila na nyema anaadi mukaamine. 15 Anka buabua bufuku, ami nkutungunuka n’ebanda,* na ami nkutungunuka na kutaluula mudimba, kunyima ami nkualukiila na nkutuelela ku Kiibi kia Kuibanda, akupu ami nkualukiila.

16 Bidonda bia bakunkushi tabibaadi abiuku kunaadi muende na kinaadi nakitshi, muanda ntshinaadi mubande kulungula bena Yunda, ba tshite muakuidi, bantu ba kinemo, bidonda bia bakunkushi na bangi bafubi muanda su ngumune. 17 Nfudiilo a bioso ami nkuibalungula’shi: “Nukuete kumona nshalelo e bukopo atudi naye, bi Yelusalema mmuluishibue na bishikibue biibi biaye kaalo. Fikayi tuibakuule midimba ya Yelusalema bua’shi buno buufu tabutungunukanga.” 18 Akupu ami nkuibalungula bibaadi nami Efile Mukulu ande , na dingi ami nkuibalungula mayi abaadi nfumu mundungule. Nyi abo nkuakula’shi: “Tuibueyi na tuibakie.” Biabia abo nkuinyingishena* bua kukita mufubo wibuwa.

19 Binobino pabaadi Sanabalata muina Orone, Tobia mufubi muina Amone na Gesheme muina Arabe bapushe bianka, ababangile kuitusepa na kuitubepuula, bakula’shi: “Nukuete kukita kinyi? Anukiebe kutombokiela nfumu su?” 20 Anka naluluile’shi: “Efile Mukulu a eyilu, Aye nyi akitshi bia’shi mufubo wetu wende kumpala, na atue bafubi baye atuibo na tuibakie; anka anue tanui na kintu su nkimune mu Yelusalema, sunga matalua, sunga muanda wakuinutentekiesha nao.”

3 Tshite muakuidi mukata Eliashibe na bakuabo ba tshite muakuidi nkuibua bua kuibaka Kibelo kia Mikooko. Abo nkuikikasha kia kishila* na nkuela biibi biakio; abo nkuikikasha kia kishila mpa na ku Kitenta kia Mea, na ku Kitenta kia Ananele. 2 Bantu ba mu Yeriko babaadi abebaka pepi nabo na Zakure muana a Imeri, baadi namu ebaka pepi nabo.

3 Bana ba Asena nkuibaka Kibelo kia Mishipa, abo nkuikilamika mabaya, akupu nkuela biibi biakio, tulee na bibao biakio. 4 Na Meremote muana a Uriya muana a Akose baadi mulumbuule mudimba pepi nabo, Meshulame muana a Berekiya muana a Meshezabele baadi mulumbuule mudimba pepi nabo, na Zadoke muana a Baana baadi mulumbuule mudimba pepi nabo. 5 Na bena Tekoa abaadi balumbuule mudimba pepi nabo, anka bantu babo ba kinemo tababaadi beyishe bua kukita* mufubo wa bakata babo.

6 Yoyada muana a Paseya na Meshulame muana a Besodeya abaadi balumbuule Kibelo kia Kibundi kia Kala; abo nkuikilamika mabaya na nkuela biibi biakio, tulee na bibao biakio. 7 Melatiya muina Gibeone na Yadone muina Meronote abaadi balumbuule mudimba pepi nabo, bantu ba mu Gibeone na ba mu Misepa babaadi ku matalua a guvernere a nsenga i abua bushiya bua muela.* 8 Uziele muana a Araya umune a ku ba nsendue ba ôlo baadi mulumbuule mudimba pepi nabo na Ananiya umune a ku bantu abakitaa malashi baadi alumbuula mudimba pepi naye; na abo nkulamika mabue paashi mu Yelusalema mpa na ku mu Mudimba Ukata. 9 Refaya muana a Ure, mukunkushi a kipindi kia distrike dia Yelusalema, baadi mulumbuule mudimba pepi nabo. 10 Yedaya muana a Arumafe baadi mulumbuule mudimba pepi nabo kumpala kua nshibo yaye, na Atushe muana a Ashabeneya baadi alumbuula mudimba pepi naye.

11 Malikiya muana a Arime na Ashube muana a Pahate-moabe babaadi balumbuule kingi kipindi,* mpa na Kitenta kia ma Nfuulo. 12 Na Shalume muana a Alokeshe, mukunkushi a kipindi kia distrike dia Yelusalema baadi mulumbuule mudimba pamune na bana baye bakashi.

13 Anune na bantu ba mu Zanowa abaadi balumbuule Kibelo kia Kuibanda; abo nkuikibaka akupu nkuela biibi biakio tulee na bibao biakio, na abo nkulumbuula kude* 1 000 ya mudimba mpa na ku Kibelo kia Mituto ya Buto. 14 Malikiya muana a Rekabe, mukunkushi a distrike dia Bete-akereme baadi mulumbuule Kibelo kia Mituto ya Buto; aye nkuikibaka, nkuela biibi biakio, tulee na bibao biakio.

15 Shalune muana a Koloze, mukunkushi a distrike dia Misepa baadi mulumbuule Kibelo kia Mushima; aye nkuikibaka na musaka wakio, nkuela biibi biakio tulee na bibao biakio, aye nkulumbuula dingi mudimba w’Eshiba dia Mema dia mukola pepi n’Efuba dia Nfumu, mpa na ku kikaamino akialala kukatukila ku Kibundi kia Davide.

16 Nehemiya muana a Azebuke, mukunkushi a kipindi kia distrike dia Bete-sure, baadi mulumbuule mudimba pepi naye kukatukila kumpala kua mashama a ba nfumu* a Davide mpa na kuishiba dia mema dibaabadi bebakie, mpa na ku nshibo ya Bilobo bia ngoshi.

17 Bena Levi babaadi balumbuule mudimba pepi naye mbano: Rehume muana a Bani na Ashabiya, mukunkushi a kipindi kia distrike dia Keila baadi pepi naye, baadi mulumbuule mudimba bua distrike diaye. 18 Bakuabo balume babaadi balumbuule mudimba mbano: Bawayi muana a Enadade, mukunkushi a kipindi kia distrike dia Keila.

19 Esere muana a Yeshua, mukunkushi a Misepa, baadi alumbuula kingi kipindi pepi naye kumpala ku’eshinda adikaamina ku mbalo ya kulamina bina ngoshi ku musungo ukuatshishene mudimba.

20 Baruke muana a Zabayi baadi mufube na kisumi, na aye nkulumbuula kingi kipindi pepi naye, kukatukila ku Musungo ukuatshishene mudimba mpa na ku kituelelo kia nshibo ya tshite muakuidi mukata Eliashibe.

21 Meremote muana a Uriya muana a Akose baadi mulumbuule kingi kipindi pepi naye kukatukila ku kituelelo kia nshibo ya Eliashibe mpa na ku nfudiilo kua nshibo ya Eliashibe.

22 Ba tshite muakuidi, bantu ba mu distrike dia Yordane abaadi balumbuule mudimba pepi naye. 23 Benyamine na Ashube abaadi balumbuule mudimba pepi nabo kumpala kua nshibo yabo. Azariya muana a Maaseya muana a Ananya baadi mulumbuule mudimba pepi nabo, pepi na nshibo yaye. 24 Binuwi muana a Enadade baadi mulumbuule kingi kipindi pepi naye, kubangila ku nshibo ya Azariya mpa na ku Musungo ukuatshishene mudimba mpa na kuipaka.

25 Palale muana a Uzayi baadi mulumbuule mudimba kumpala kua Musungo ukuatshishene mudimba na kitenta akituukila ku Nshibo* ya Nfumu, kitenta kia Lupango lua Mulami. Baadi mumulondele nyi Pedaya muana a Paroshe.

26 Bafubi ba ku ntempelo* babaadi bashale mu Ofele, babaadi balumbuule mudimba mpa na kumpala kua Kibelo kia Mema dia kutunduka nguba na kitenta kibaadi kituukie ndambo.

27 Bena Tekoa babaadi balumbuule kingi kipindi pepi nabo, kubangila kumpala kua kitenta kibaadi kituukie ndambo mpa na ku mudimba wa Ofele.

28 Ba tshite muakuidi babaadi balumbuule mudimba ubaadi kunundu kua Kibelo kia Nfualasa, tshite muakuidi oso muikale kumpala kua nshibo yaye.

29 Zadoke muana a Imere, baadi mulumbuule mudimba pepi nabo kumpala kua nshibo yaye.

Na Shemaya muana a Shekanya, mulami a Kibelo kia Kutunduka Nguba baadi mulumbuule mudimba pepi naye.

30 Ananiya muana a Shelemeya na Anune muana a kasamombo a Zalafe, babaadi balumbuule kingi kipindi pepi naye.

Meshulame muana a Berekiya, baadi mulumbuule mudimba kumpala kua kadimbo kaye.

31 Malikiya umune a ku ba nsendue ba ôlo, baadi mulumbuule mudimba pepi naye mpa na ku nshibo ya bafubi ba ku ntempelo* na ba nsunga, kumpala kua Kibelo kia Kutaluula mpa na ku kadimbo ka kuiyilu ka muipaka.

32 Ba nsendue ba ôlo na ba nsunga, abaadi balumbuule mudimba pankatshi pa kadimbo ka kuiyilu ka muipaka na Kibelo kia Mikooko.

4 Binobino nka Sanabalata ki’apusha’shi tukuete kuibakuula mudimba, bafiitshile munda ngofu, na aye nkutungunuka na kusenga bena Yunda. 2 Na aye nkuakula ku meso kua bakuabo na kua kiluilo kia basalayi kia Samadiya’shi: “Bano bena Yunda bashi kapu bakuete kukita kinyi? Abekitshina uno mufubo abo banabene su? Abalambula milambu su? Abapudisha muifuku su? Ababushuula mabue ataate mu mituto ya bintu biluishibue bi na lufufi su?”

3 Anka Tobia muina Amone baadi muimane ku lupese luaye, nkuakula’shi: “Sunga mukiengie wakaamina ku bi’abebaka, aubumbula mudimba wabo wa mabue.”

4 Ô Efile Mukulu eetu, pusha, muanda bakuete kuitubepula na kita bia’shi kuitusenga kuabo kualukile pa mitue yabo, na’shi bekale bu bintu bipaulue na bebakuate bende nabo mu dingi eumbo. 5 Na t’obuikilanga bubi buabo sunga kushimisha muluisho wabo kumpala kobe, muanda abakaa bantu abebaka.

6 Biabia tubatungunukile na kuibaka mudimba, atue nkufumakasha mudimba oso na nkuibakuula kia pankatshi kia mu bula buao bua muiyilu, na muilo ubatungunukile na kutuula eshimba diao ku mufubo.

7 Nka Sanabalata, Tobia, bena Arabe, bena Amone na bena Ashedode baki’abapusha’shi kulumbuula kua midimba ya Yelusalema kukuete kuenda kumpala, na’shi miasa ikuete kushikibua babaafiitshile munda ngofu. 8 Abo nkudia lukuku bua kufika mu kuluisha Yelusalema ngoshi, na bua kutuusha kafutakanyi muanka. 9 Tubatekiele Efile Mukulu eetu, na atue nkutuula balami bakuitukaluila kuabadi kanya na bufuku.

10 Anka bantu ba mu Yunda abaadi abamba’shi: “Bukome bua bantu abafubu* bubapeele, na bintu biluile bi bungi; tatobesha kuibaka mudimba.”

11 Beshikuanyi betu babaadi nk’abakula’shi: “Kumpala kua’shi baukie bianka sunga kuitumona, atufiki munkatshi muabo mususa umune tuibayipee na tuimikie mufubo.”

12 Nsaa yoso ibaadi bena Yunda bashale pepi nabo abatuele, abaadi nk’abetulungula misusa yoso’shi:* “Beshikuanyi abetutuelela mu mpese yoso, abafiki kuatudi mu mpese yoso.”

13 Biabia natudile bantu mu bipindi bi kuushi ngofu bia mbalo i kunyima kua mudimba ku ma mbalo aamueka, na ami nkuibatuula na mpete yabo, na mikietue yabo, na mata abo muyile bifuko biabo. 14 Pa namuene moo ubaabadi nao, nebuele mususa umune na ami nkulungula bantu ba kinemo, bindonda bia bakunkushi na bangi bantu boso’shi: “Tanuibatshinanga. Tentenkieshayi Yehowa, aye mukata na a kutshina; na luayi bua bakuenu, bua bana benu balume na bana benu bakashi, bua bakashi benu na bua mashibo eenu.”

15 Binobino kunyima kua beshikuanyi betu kupusha’shi tubauku bibaabadi abakitshi, na’shi Efile Mukulu a binyibinyi baluisha mpango yabo, atue boso tubalukiile mu kufuba ku mudimba. 16 Kubanga diadia efuku, kia pankatshi kia bantu bande abaadi abafubu, na kingi kia pankatshi abaadi abakuata ngabo, mata na bikotshi bi na tu biamo. Na bakunkushi babaadi bemane kunyima kua bena Yunda 17 babaadi abebaka mudimba. Baaba babaadi abatuala bushito abaadi abafubu na mboko imune, ingi mboko ngikuate kina ngoshi. 18 Muntu oso baadi ebaka, baadi na lupete luanye mu kifuka pabaadi ebaka, na muntu baadi na kia kuela mpungi baadi muimane ku lupese luande.

19 Akupu ami nkulungula bantu ba kinemo, bindonda bia bakunkushi na bantu boso’shi: “Mufubo wi bungi ku mudimba, na tuibapalakane ku mudimba bekale kula muntu na mukuabo. 20 Panupusha kudila kua mpungi, ebungieyi pamune kuno kuatudi. Efile Mukulu eetu etuluila ngoshi.”

21 Biabia tubatungunukile na kufuba pabaadi kia pankatshi kia bangi bantu mbakuate milumbu, kubanga ku namashika buee mpa na apatuuku nyenyenyi. 22 Mu aa mafuku nalunguile muilo’shi: “Muana mulume oso pamune na mufubi aaye balale munda mua Yelusalema, betulame bufuku na bafube mu kanya.” 23 Biabia sunga ami, sunga bakuetu, sunga bafubi bande, sunga balami babaadi bandonde, tatubaadi atufuulu bilamba bietu, na oso akuatudi baadi nka mukuate kina ngoshi kiaye mu eyasa diaye dibalume.

5 Anka balume na bakashi babo babaadi abedidi ngofu pa muanda wa bakuabo bena Yunda. 2 Bangi abaadi abakula’shi: “Atue na bana betu balume na bana betu bakashi tui bungi, abitungu tupete ntete ya kudia bua kushala na muwa.” 3 Bangi namu abaadi abakula’shi: “Tukuete kutuusha mafuba eetu, mafuba eetu a nfinyo, na mashibo eetu bu kieko bua kupeta ntete mu kipungo kia nsala.” 4 Bangi namu abaadi abakula’shi: “Tuibeyapule makuta, tuayeeka mafuba eetu na mafuba eetu a nfinyo bua kufuta kitadi kia nfumu. 5 Atue na bakuetu tui mase amune,* na bana betu be nka bu bana benu; aku namu tuina kia kupaana bana betu balume na bana betu bakashi mu bupika na bangi ba ku bana betu bakashi mbapue kuikala mu bupika. Anka tatui na bukome bua kuimika uno muanda, muanda mafuba eetu na mafuba eetu a nfinyo nga bangi bantu.”

6 Naadi mufiite munda ngofu panapushishe kuidila ku’abo na ano mayi. 7 Biabia naadi munangushene ku ino mianda muishimba diande, na ami nkusaashila bantu ba kinemo na bindonda bia bakunkushi, ami nkuibalungula’shi: “Oso a kuanudi kuete kuteka mukuabo makasa.”

Dingi natshile mpango ya kukita kikongeno kikata pa muanda wabo. 8 Na ami nkuibalungula’shi: “Tuibakite muetu moso bua kukuula bakuetu bena Yunda babaabadi baudishe miilo, anka binobino anukiebe kuudisha bakuenu bua’shi tuibakuule dingi?” Pababapushishe biabia abaadi bashale baumiine na bakutua kia kuakula. 9 Akupu ami nkuakula’shi: “Bianukuete kukita ta bibuwa, tanui balombene kutambuka mu kutshina ku’Efile Mukulu eetu, bua’shi miilo, beshikuanyi betu tabetusenganga su? 10 Dingi ami, bakuetu, na bafubi bande tukuete kuibeyapusha makuta na ntete kushi kuibateka makasa. Tulekieyi namu kuiyapusha na makasa. 11 Ebaluisheyi namu nka lelo uno mafuba aabo, mafuba a nfinyo, mafuba aabo a olive, mashibo aabo, mpa na kia pa lukama* kia makuta, kia ntete, kia nfinyo ipia na kia muimu kianukuete kuibateka bu makasa.”

12 Nyi abo nkuakula’shi: “Atuibaluisha bino bintu na tatui batekie kintu. Atukitshi nka bibuakula.” Biabia ami nkuitanyina ba tshite muakuidi, na ami nkutshipisha bantu mutshipo buabadia kukumbasha uno mulayilo. 13 Dingi, naadi mukuukule kilamba* kiande na n’akula’shi: “Efile Mukulu a binyibinyi akuukule mu uno mushindo nshibo, na bintu bia muntu oso sh’akumbasha uno mulayilo, na amukuukule mu uno mushindo na ashale bisumanga.” Nyi kakongie koso nkuakula’shi: “Amene!”* Na abo nkutumbisha Yehowa, na bantu nkukita bibaabadi balee.

14 Dingi, kubanga muifuku dibaadi nfumu Artakesese muntuule bu guvernere aabo mu nsenga ya Yunda, kubanga mu kipua kia 20 mpa na mu kipua kia 32 kia nfumu Artakesese, kuamba’shi bipua 12, ami sunga bakuetu tatubaadi badie biakudia bi’abapeyaa guvernere. 15 Anka ba guvernere ba kala abaadi kumpala kuande, abaadi batentekie muilo bushito, na babaadi abebaata shekele* 40 ya kiamo kia arja bua mikate na nfinyo efuku dioso. Dingi, bafubi babo abaadi bakiengieshe muilo. Anka ami ntshinaadi mukite biabia muanda wa kutshina Efile Mukulu.

16 Dingi, n’ami namu nemufube ku uno mudimba, na tatui bapete efuba su ndimune; bafubi bande boso babaadi bebungie kuakua bua kufuba. 17 Kubaadi bena Yunda 150 na bindonda bia bakunkushi babaadi abadi ku mesa ande mpa na bantu ba mu miilo abaadi bafikie kuatudi. 18 Efuku dioso babaadi abantekiela* ngombe umune mulume, mikooko ibuwa bukile isamombo na tonyi, na mususa umune mu mafuku ekumi, tubaadi na nfinyo ibungi ya mishindo yoso. Sunga mbiabia ntshinaadi mutekie biakudia bi’abapeyaa guvernere, muanda muilo ubaadi upue kusemuna bushito buao bua mufubo. 19 Ô Efile Mukulu ande, ntentekieshe namu na ongielele miabi* bua bioso biandi mukitshine uno muilo.

6 Pababalunguile Sanabalata, Tobia, Gesheme muina Arabe na bangi beshikuanyi betu’shi, nebakuula mudimba, na’shi tankushale miasa (sunga biekala’shi mu aa mafuku ntshinadi mubande kuela biibi ku bibelo), 2 Mususa umune Sanabalata na Gesheme nkuntumina uno mukiendi’shi: “Fika tuipushene nsaa yatudia kufumankana mu bibundi bia muibanda dia Ono.” Anka babaadi abadi lukuku bua kunkitshina bibubi. 3 Biabia ami nkuibatumina mikiendi na nkuamba’shi: “Nemuipaane mu mufubo ukata, ntshi bia kualala. Ntshimulombene kuleka mufubo wemana bua’shi nfikie kuakua kuanudi.” 4 Babaadi bantumine wawa mukiendi umune misusa inanka, na mususa oso naadi nebapa nka lualua lualulo lumune.

5 Akupu Sanabalata baadi muntumine mufubi aaye na wawa mukiendi umune mususa wa katano, muikale na mukanda ubuule muiyasa diaye. 6 Mu wawa mukanda mubaadi mufundibue’shi: “Bantu ba mu ingi miilo bakuete kuakula’shi, obe na bena Yunda nukuete kudia lukuku lua kutombokiela nfumu na Gesheme namu kuete kuibiakula. Nyi buakinyi okuete kuibaka mudimba; na muyile biabakula obe nyi ekala nfumu aabo. 7 Dingi wemutuule batemuki bua kuakula pabikutale mu Yelusalema oso’shi: ‘Kui nfumu mu Yunda!’ Na binobino abalungula nfumu ino mianda. Biabia fika tuisambe uno muanda pamune.”

8 Anka naadi mumutumine luno lualulo’shi: “Ku mianda yoso ibokula ntankukitshikie muanda su ngumune, okuete kuiyipuandikisha obe nabene.”* 9 Muanda boso buabo babaadi abakiebe kuitutshinyisha bakulanga’shi: “T’abanyingi mashimba bua kukita mufubo* na taukitshika.” Binobino nantekie buashi onyingishe.*

10 Akupu nayile ku nshibo kua Shemaya muana a Delaya muana a Mehetabele mu mafuku ashibaadi atuuku mu nshibo muaye. Aye nkundungula’shi: “Tuipushene nsaa yatudia kufumankana ku nshibo y’Efile Mukulu a binyibinyi, mu ntempelo na tufungie bibelo bia ntempelo, muanda abafiki bua nkuipaa. Abafiki bufuku bua nkuipaa.” 11 Anka ami nkuakula’shi: “Muntu bu’mi ne mulombene kusuuka su? Muntu bu’mi ne mulombene kutuela mu ntempelo na kushala na muwa? Tanemutuele!” 12 Akupu natunduile’shi Efile Mukulu tabaadi mumutume, anka nyi Tobia na Sanabalata babaadi bamufute bua kuakula buno butemuki bua kundimba. 13 Babaadi bamufute bua kuntshinyisha na bua kuntakula mu kukita muluisho, bua’shi bapete kabingilo ka kuluisha nkumo yande bua kungakula bibubi.

14 O Efile Mukulu ande, tentekiesha Tobia na Sanabalata na bikitshino biabio, na otentekieshe dingi mutemuki mukashi Noadiya na bangi batemuki babaadi nka abatompo kuntshinyisha misusa yoso.

15 Mudimba ubapuile muifuku dia 25 dia mueshi wa Elule,* kunyima kua mafuku 52.

16 Pabaadi beshikuanyi betu boso bebipushe na miilo yoso ituifunyishe ibimone, mususa umune abakuatshikile buufu ngofu, na abo nkushinguula’shi uno mufubo ubaadi ukitshikie ku bukuashi bu’Efile Mukulu eetu. 17 Mu aa mafuku bantu ba kinemo ba mu Yunda babaadi abatumina Tobia mikanda ibungi, na Tobia baadi ebaluula. 18 Bantu bebungi mu Yunda babaadi betshipe bua kumulamata, muanda baadi muko a Shekanya muana a Ara, na muana aaye Yehokanane baadi muibakile muana mukashi a Meshulame muana a Berekiya. 19 Babaadi dingi abandungula misusa yoso mianda ibuwa pabimutale, akupu abende mu kumulungula biangakula. Kunyima Tobia baadi antumina mikanda bua kuntshinyisha.

7 Nka mudimba uki’aupu kuibakuulua, naadi muele biibi; akupu ami nkutuula balami ba ku biibi, tuyimba na bena Levi. 2 Akupu ami nkutuula mukuetu mulume Anani bu mukunkushi a Yelusalema, na Ananiya bu mukata a mbalo inyingishibue, muanda baadi muntu a kukulupila ngofu na baadi atshinyi Efile Mukulu a binyibinyi kukila bangi bantu bebungi. 3 Biabia ami nkuibalungula’shi: “Abitungu bibelo bia Yelusalema bishale bifungie mpa na mu midi* na pa bakuete kulama, abitungu bashite biibi na kuibibaa. Na nusangule bantu ba mu Yelusalema bua kuikala balami, bangi balame ku ma mbalo anuibatuulu na bangi namu kumpala kua mashibo aabo.” 4 Aku namu kibundi kibaadi kikata na ki bula, mubaadi bantu bapeela na tababaadi bebakuule mashibo nya.

5 Anka Efile Mukulu ande baadi muntakule bua kubunga bantu ba kinemo, bindonda bia bakunkushi na muilo bua’shi bebafunde mashina muyile kuilondena kua bifuko biabo. Akupu napetele mukanda ufunde mashina muyile kuilondena kua bifuko bia bantu babafikile kumpala, na ami nkupeta mbafunde muanka’shi:

6 Bano nyi bantu ba mu provense babaabadi bakuate benda nabo akupu balukiila, baba babaadi nfumu Nabukondonosore a Babilone mukuate enda nabo na babaadi kunyima balukiile mu Yelusalema na mu Yunda, muntu oso mu kibundi kiabo, 7 baba babaadi bafikie na Zorobabele, Yeshua, Neemiya, Azariya, Ramiya, Nahamani, Mordekayi, Bilshane, Misperete, Biguwai, Nehume, na Baana.

Mu bungi bua bana balume bena Isalele mubaadi: 8 bana ba Paroshe, 2 172; 9 bana ba Shefatia, 372; 10 bana ba Ara, 652; 11 bana ba Pahate-moabe, ba ku bana ba Yeshua na Yoabe, 2 818; 12 bana ba Elame, 1 254; 13 bana ba Zatu, 845; 14 bana ba Zakai, 760; 15 bana ba Binuwi, 648; 16 bana ba Bebai, 628; 17 bana ba Azegade, 2 322; 18 bana ba Adonikame, 667; 19 bana ba Biguwai, 2 067; 20 bana ba Adine, 655; 21 bana ba Atere, ba mu nshibo ya Ezekiya, 98; 22 bana ba Ashume, 328; 23 bana ba Besayi, 324; 24 bana ba Arife, 112; 25 bana ba Gibeone, 95; 26 bana balume ba ku Beteleme na ku Netofa, 188; 27 bana balume ba ku Anatote, 128; 28 bana balume ba ku Bete-azemawete, 42; 29 bana balume ba ku Kiriate-yearime, ku Kefira na ku Berote, 743; 30 bana balume ba ku Rama na ku Geba, 621; 31 bana balume ba ku Mikemase, 122; 32 bana balume ba ku Betele na ku Ai, 123; 33 bana balume ba ku ungi Nebo, 52; 34 bana ba ungi Elame, 1 254; 35 bana ba Arime, 320; 36 bana ba Yeriko, 345; 37 bana ba Lode, Adide na Ono, 721; 38 bana ba Senaa, 3 930.

39 Ba tshite muakuidi: bana ba Yedaya ba mu kifuko kia Yeshua, 973; 40 bana ba Imere, 1 052; 41 bana ba Pashure, 1 247; 42 bana ba Arime, 1 017.

43 Bena Levi: bana ba Yeshua, ba Kadimiyele, ba ku bana ba Odewa, 74. 44 Tuyimba: bana ba Asafe, 148. 45 Balami ba ku biibi: bana ba Shalume, bana ba Atere, bana ba Talmone, bana ba Akube, bana ba Atita, bana ba Shobai, 138.

46 Bafubi ba ku ntempelo:* bana ba Ziha, bana ba Asufa, bana ba Tabaote, 47 bana ba Kerose, bana ba Sia, bana ba Padone, 48 bana ba Lebana, bana ba Agaba, bana ba Salemayi, 49 bana ba Anana, bana ba Gidele, bana ba Ngakare, 50 bana ba Reaya, bana ba Resine, bana ba Nekonda, 51 bana ba Gazame, bana ba Uza, bana ba Paseya 52 bana ba Besai, bana ba Meunime, bana ba Nefushime, 53 bana ba Bakebuke, bana ba Akufa, bana ba Arure, 54 bana ba Baselite, bana ba Mekida, bana ba Aresha, 55 bana ba Barkose, bana ba Sisera, bana ba Tema, 56 bana ba Neziya na bana ba Atifa.

57 Bana ba bafubi ba Salomone: bana ba Sotayi, bana ba Soferete, bana ba Perida, 58 bana ba Yaala, bana ba Darekone, bana ba Gidele, 59 bana ba Shefatia, bana ba Atile, bana ba Pokerete-hasefaine na bana ba Amone. 60 Bafubi boso ba ku ntempelo, na bana ba bafubi ba Salomone babaadi 392.

61 Bantu babaadi batuukile ku Tele-mala, Tele-harsha, Kerube, Adone, na Imere, anka tababaadi bia kushinkamisha bifuko bia bamashabo na kuabadi batuukile bua kuuka su babaadi bena Isalele nyi mbano: 62 bana ba Delaya, bana ba Tobia, bana ba Nekonda, 642. 63 Na mu ba tshite muakuidi: bana ba Abaya, bana ba Akose, bana ba Barzilayi baadi muibakile mukashi ku bana bakashi ba Barzilayi muina Gileade na babaadi abamuitanyina muishina dia muko aaye. 64 Babaadi bakimbe mashina a bantu ba mu bifuko biabo mu mikanda, anka tababaadi beapete, nyi buakinyi tababaadi bebatuule bu ba tshite muakuidi.* 65 Guvernere baadi muibalungule’shi, t’abitungu badie bintu bikile kishila mpa na pa kuikala tshite muakuidi mulombene kuipusha Efile Mukulu ku bukuashi bua Urime na Tumime.

66 Bungi bua bantu ba kakongie koso bubaadi 42 360, 67 kukatusha ba mpika babo balume na bakashi babaadi 7 337; babaadi dingi na tuyimba 245 tulume na tukashi. 68 Nfualasa yabo ibaadi 736, mpunda yabo ikata ibaadi 245, 69 tumelo tuabo tubaadi 435, mpunda yabo ipeela ibaadi 6 720.

70 Bangi ba ku ba nfumu ba bifuko bia bamashabo, babaadi bakuatshishene mufubo. Guvernere baadi muele mu mbalo ya kulamina bintu bia muulo drakme* ya ôlo 1 000, bibakudi 50, na ma nkandio a ba tshite muakuidi 530. 71 Na bangi ba ku ba nfumu ba bifuko bia bamashabo babaadi bele mu mbalo ya kulamina bintu bia muulo bia luibako drakme ya ôlo 20 000, na mine* ya kiamo kia arja 2 200. 72 Na bangi bantu babatuushishe drakme ya ôlo 20 000, mine ya kiamo kia arja 2 000, na ma nkandio a ba tshite muakuidi 67.

73 Na ba tshite muakuidi, bena Levi, balami ba ku biibi, tuyimba, bangi bantu, bafubi ba ku ntempelo, na bangi bena Isalele* boso babashalele mu bibundi biabo. Pabakumbene mueshi wa musambobidi bena Isalele babaadi bapue kushala mu bibundi biabo.

8 Akupu bantu boso nkuibunga na eyi dimune pa mbalo ya bantu boso kumpala kua Kiibi kia Mema, na abo nkulungula Esela muntu atentulaa bifundue* bua kufika na mukanda wa Miiya ya Moyise, ubaadi Yehowa mutumine Isalele eyi. 2 Biabia muifuku dia kumpala dia mueshi wa musambobidi, tshite muakuidi Esela bafikile na Miiya kumpala kua kakongie ka bana balume, bana bakashi na boso babaadi balombene kuteemesha na kupusha. 3 Na aye nkuiubadika na eyi dibukopo kumpala kua mbalo ya bantu boso, kumpala kua Kiibi kia Mema, kubanga pa kutooka kua bufuku mpa na mu midi, aye nkuiyibadikila bana balume, bana bakashi, na boso babaadi balombene kupusha; na bantu babaadi bateemeshe na kalolo koso pabaabadi ababadika mukanda wa Miiya. 4 Esela muntu atentulaa bifundue baadi muimane pa estrade* a mabaya abaabadi bakite bua wawa muanda; Matitiya, Shema, Anaya, Uriya, Ilikiya na Maaseya babaadi bemane ku lupese luaye lubalume; na Pedaya, Mishaele, Malikiya, Ashume, Ashebadana, Zekariya na Meshulame babaadi bemane ku lupese luaye lubakashi.

5 Esela nkubuula mukanda mu meso mua bantu boso, muanda baadi kunundu kua bantu boso. Nka’ye kieubuula, bantu boso babaadi bebuee. 6 Akupu Esela nkutumbisha Yehowa Efile Mukulu a binyibinyi, Efile Mukulu mukata, nyi bantu boso nkualula’shi, “Amene* Amene!” na abo nkuibuesha maboko aabo muiyilu. Akupu abo nkukunama kumpala kua Yehowa na nkuinyika mapala aabo paashi. 7 Na Yeshua, Bani, Sherebiya, Yamine, Akube, Shabetayi, Odiya, Maaseya, Kelita, Azariya, Yosabade, Anana, na Peleya babaadi bena Levi, babaadi abapatuluila bantu Miiya, pabaadi bantu bashale nka bemane. 8 Babatungunukile na kubadika mukanda, Miiya y’Efile Mukulu a binyibinyi na eyi dibukopo, beyipatulanga kalolo na kuiyipushisha; biabia abo nkukuasha bantu bua kupusha bibaabadi ababadika.

9 Neemiya baadi guvernere* mu aa mafuku, tshite muakuidi Esela baadi dingi muntu atentulaa bifundue, na bena Levi babaadi abalongiesha bantu, babalunguile bantu boso’shi: “Dino efuku ndia kishila bua Yehowa Efile Mukulu eenu. Tanuikalanga mu maalo sunga kudila.” Muanda bantu boso babaadi abadidi pabaabadi abapusha mayi a mu Miiya. 10 Bebalunguile’shi: “Ndayi, nudie bintu bikile buwa* na nutome bintu bi nsaasa, na nutumine baba bashi na kintu ndambo ya bia kudia; muanda dino efuku ndia kishila bua Nfumuetu, na tanuinyongolanga, muanda muloo wa Yehowa nyi mbukome* buenu.” 11 Na bena Levi babaadi abauminyisha bantu boso, bakulanga’shi: “Uminayi! muanda dino efuku ndia kishila, na tanuinyongolanga.” 12 Biabia bantu boso babayile bua kudia, bua kutoma na bua kutumina bangi ndambo ya bia kudia, na bua kuikala mu muloo ukata, muanda abaadi bapushe mayi abaabadi bebalungule.

13 Na muifuku dia kabidi, ba nfumu ba bifuko bia bamashabo ba muilo oso, ba tshite muakuidi na bena Levi babebungile kui Esela muntu atentulaa bifundue bua kupeta mpushisho e bungi a mayi a mu Miiya. 14 Mu Miiya ibaadi Yehowa mutume eyi kukidila kui Moyise, abapetele mbafunde muanka’shi, abitungu bena Isalele bashale mu bitanda* mu mafuku a musangelo, mu mueshi wa musambobidi, 15 na’shi abitungu baukishe na baakule mu bibundi biabo bioso na mu Yelusalema oso’shi: “Ndayi ku nsenga ya ku miengie, nufikie na ntabi i na mapupua ya mitshi ya olive, mitshi ya muimu, mitshi ya mirte na malala, na ntabi i na mapupua ya ingi mitshi bua kukita bitanda, muyile biabidi bifundibue.”

16 Biabia bantu babayile na abo nkufika na ntabi bua kukita bitanda, muntu oso ku musaka wa nshibo yaye, mu mpango yabo, mu mpango ya nshibo y’Efile Mukulu a binyibinyi, mu mbalo ya bantu boso ya Kiibi kia Mema na mu mbalo ya bantu boso ya Kiibi kia Efraime. 17 Biabia bantu boso ba mu kakongie babaadi balukiile kubaabadi bebakuate benda nabo, babaakitshine bitanda na bashala muanka, muanda bena Isalele tababaadi bebikite mu uno mushindo kubanga mu mafuku a Yoshua muana a Nune mpa na mu diadia efuku, biabia kubaadi muloo ukata. 18 Na efuku dioso, abaadi ababadika mukanda wa Miiya y’Efile Mukulu a binyibinyi, kubanga muifuku dia kumpala mpa na ku efuku dia nfudiilo. Na babaadi bakite musangelo munda mua mafuku musambobidi, na kubaadi kikongeno ki pabuakio muifuku dia muanda nka bu bibaabidi bitekibue.

9 Muifuku dia 24 dia mueshi wa musambobidi bena Isalele babebungile; babaadi abeshidika bafuale ma mpaya na abepongo lufuinkinyi. 2 Akupu baba babaadi bena Isalele nkuiabuula kui bantu benyi boso, abo nkuimana na nkutonda miluisho yabo na bilubilo bia bamashabo. 3 Abo nkuimana nka yaaya mbalo ibaabadi na nkubadika na eyi dibukopo mukanda wa Miiya ya Yehowa Efile Mukulu aabo munda mua nsaa isatu;* na munda mua ingi nsaa isatu babaadi abatondo miluisho na kuinama kumpala kua Yehowa Efile Mukulu aabo.

4 Yeshua, Bani, Kadimiyele, Shebanya, Buni, Sherebiya, Bani, na Kenani nkuimana pa estrade* a bena Levi, na abo nkuteka Yehowa Efile Mukulu aabo na eyi dibukopo. 5 Na Yeshua, Kadimiyele, Bani, Ashabeneya, Sherebiya, Odiya, Shebanya, na Petaya boso bekale bena Levi nkuakula’shi: “Ebueyi na nutumbishe Yehowa Efile Mukulu eenu bua ikalayika. Na batumbishe eshina diobe dia ntumbo, dikale dikata kukila miabi yoso na ntumbo yoso ilombene bantu kutuusha.

6 “We bupenka obe Yehowa; we mukite eyilu, oolo, eyilu dioso na kiluilo kiadio, nsenga na bioso bi panka, tulunga tua mema na bioso bi muanka. Na we muibilame bioso na muwa, na kiluilo kia muiyilu kikuete kuinama kumpala kobe. 7 We Yehowa Efile Mukulu a binyibinyi, baadi musangule Abalama na omutuusha mu Ure a bena Kaldeya, na omuudika eshina bu Abalahama. 8 B’opetele’shi eshimba diaye dibaadi dilamate kodi, biabia obe nkukita naye kilombeno bua kumupa nsenga ya bena Kanaana, bena Ite, bena Amore, bena Perizi, bena Yebuse, na bena Girgashi, bua kuiyipa lutandua* luaye; na obe nkukumbasha milayilo yobe, muanda we mululame.

9 “Biabia bomuene dikienga dia bamashetu kulu mu Ejipitu, na obe nkupusha kuidila kuabo ku Kalunga Kamonga. 10 Nyi obe nkukita bitunduilo na bilengieleshi bua kunyoka Faraone, bafubi baye boso, na bantu boso ba muiumbo diaye, muanda bodi ouku’shi babaadi bakiengieshe muilo oobe. Obe nkuikitshina eshina di kuanka mpa na lelo. 11 Na obe nkutshibuula kalunga ka mema kumpala ku’abo, abo nkusabuka kalunga ka mema pa nsenga yume, na obe nkusumbula bantu babaadi abebalondo muushi mua kalunga ka mema nka bu ebue di’abasumbula mu mema aatunkatunka. 12 Bodi muibaludikie mu kanya na musungo w’ekumbi, bufuku na musungo wa kaalo, bua kuibamunyikila muishinda dibaabadi na kia kuenda. 13 Na bodi muikie ku muengie wa Sinayi, w’esamba nabo kukatukila muiyilu na w’ebapa biimu bilulame, miiya ya binyibinyi,* na mayi ebuwa. 14 Bodi muibaukishe Sabato oobe a kishila, na webapa mayi na miiya kukiila kui mufubi oobe Moyise. 15 Pabaabadi na nsala, bodi muibape mikate kukatukila muiyilu, na bodi muibatushishe mema mu lubuebue pabaabadi na nyota, na bodi muibalungule bua kutuela na bua kuata nsenga ibodi muitshipe* bua kuibapa.

16 “Anka abo, bamashetu kulu, babaadi na kuitatula, abo nkuikala na mutue wi bukopo, na tababaadi abateemesha miiya yobe. 17 Babaadi bapele kuteemesha, na tababaadi batentekieshe bikitshino biobe bia kukaanya bibodi mukite munkatshi muabo, anka abo nkuikala na mutue wibukopo* na abo nkusangula nfumu bua kualukila mu bupika buabo mu Ejipitu. Anka obe w’Efile Mukulu afuidishenaa lusa,* sha kalolo na lusa, sh’akuataa nsungu bukidi na muule ndaa na kifulo kia lulamato, na tobodi muibasumbushene nya. 18 Sunga bibaabadi bekitshine nkishi a kilonda* a kana ka ngombe na bakulanga’shi: ‘Uno nyi Efile Mukulu oobe baadi mukutuushe mu Ejipitu,’ na bakita mianda ibungi ya kukutua kanemo, 19 sunga mbiabia, mu lusa lobe lukata, tobodi muibasumbushene mu kabaaka. Mu kanya musungo w’ekumbi taubaadi ukatukie kuabadi bua kuibaludika muishinda, na bufuku musungo wa kaalo taubaadi ulekie kuibamunyika muishinda dibaabadi na kia kuenda. 20 Na bodi muibape kikudi kiobe kibuwa buashi bekale na binangu, tobodi muibasumine mane oobe, na bodi muibape mema pabaabadi na nyota. 21 Bodi muibape bia kudia mu kabaaka munda mua bipua 40. Tababaadi bakutue kintu su nkimune. Bilamba biabo tabibaadi bisanukie, na mikoolo yabo tayibaadi iule.

22 “Bodi muibape mafumu na miilo, weyitshibuula bipindi bipindi, biabia babaatshile nsenga ya Sihone bu yabo, kuamba’shi, nsenga ya nfumu Eshebone, mpa na nsenga ya Oge nfumu a Bashane. 23 Na bodi muikashe bana babo bungi nka bu nyenyenyi ya muiyilu. Akupu obe nkuibatuesha mu nsenga ibodi mulee bamashabo kulu’shi abemutuele na beyate bu yabo. 24 Biabia bana babo babemutuelele na baata nsenga bu yabo, na bodi mutshokole bena Kanaana babaadi bashale mu yaaya nsenga kumpala kuabo na bodi muibatuule mu maasa muabo, na ba nfumu babo na miilo ya mu yaaya nsenga, buashi bebakite kioso kiab’akumiina. 25 Babakuatshile bibundi binyingishibue na nsenga i na bufukie,* abo nkuata mashibo aule na bintu bi buwa bia mishindo yoso, mishima ipue kubundula, mafuba a mitshi ya nfinyo, mafuba a mitshi ya olive na mitshi i bungi ayipeyaa bikuba. Babaadi badie, bekuta na batama, na abaadi basankie mu kalolo kobe kakata.

26 “Anka babaadi bapele kukookiela, bakutombokiela na bapela kukookiela Miiya yobe.* Babayipayile batemuki babaadi abebadimusha buashi balukiile kodi, na abo nkukita mianda ibungi ya kukutua kanemo. 27 Pa muanda wa biabia, bodi muibatuule mu maasa mua beshikuanyi babo, babaadi nka abebakiengiesha. Anka pabaabadi mu dikienga babaadi abedidi kodi, na bodi webateemesha kukatukila muiyilu; na pa muanda wa lusa lobe lukata bodi webapa bapaashi bua kuibapaasha ku maasa a beshikuanyi babo.

28 “Nka obe ki’ebapaasha, babaadi abakitshi dingi mianda ibubi ku meso kobe, na bodi webatadiila mu maasa mua beshikuanyi babo babaadi abebamunu.* Akupu babaadi abalukiila kodi bua nkuteka bukuashi, bodi webateemesha kukatukila muiyilu na bodi webapaasha misusa i bungi pa muanda wa lusa lobe lukata. 29 Sunga bibodi mutungunukie na kuibadimusha bua kualukiila ku Miiya yobe, babaadi bakite mianda na kuitatula bapela kuteemesha mayi oobe; na babaadi bakite miluisho muanda tababaadi bakookiele miiya yobe ayipeyaa muntu eyikookiela muwa. Anka babaadi bakutape mongo na bekala na mutue wi bukopo na bapela kuteemesha. 30 Bodi muibaleshe luishinko munda mua bipua bi bungi, na bodi mutungunukie na kuibadimusha ku bukuashi bua kikudi kiobe kukidila kui batemuki bobe, anka tababaadi bateemeshe. Nfudiilo a bioso bodi muibatuule mu maasa mua bantu ba mu maumbo ebefunyishe. 31 Mu lusa lobe lukata tobodi muibashimishe sunga kuibasumbushena, muanda we Efile Mukulu sha kalolo na lusa.

32 “Binobino Ô Efile Mukulu eetu, Efile Mukulu mukata, sha Bukome na akutshina, mukumbashe kilombeno kiaye na muleshe kifulo kia lulamato, tobepulanga namu makienga oso atudi bapete, atue, ba nfumu betu, bakunkushi betu, ba tshite muakuidi betu, batemuki betu, bamashetu kulu na muilo oobe oso kubanga mafuku a ba nfumu ba Asiri mpa na lelo. 33 Mu mianda yoso itufikile wemuleshe kululama, muanda wemukite mianda na lulamato; anka atue ngibakite mianda i bubi. 34 Anka ba nfumu betu, bakunkushi betu, ba tshite muakuidi betu, na bamashetu kulu, tababaadi bakookiele Miiya yobe na tababaadi bateemeshe mayi oobe sunga mitentekiesho* yobe ibodi muibadimushe nayo. 35 Sunga pabaabadi mu bufumu buabo na abasanka na bintu bibungi bibuwa bibodi webapa, sunga bibaabadi mu nsenga ikata na i bufukie ibodi muibape, tababaadi bakufubile na tababaadi balekie bikitshino biabo bibubi. 36 Anka lelo uno tui ba mpika, olo ba mpika mu nsenga ibodi mupe bamashetu kulu bua kudia bikuba biayo na bintu biayo bibuwa. 37 Bintu bia mu yaaya nsenga bibungi mbia ba nfumu bobodi mutuule kunundu kuetu pa muanda wa miluisho yetu. Atue na bimunuanga bietu bakuete kuitukunkusha nka bi’abakumiina na tui mu dikienga dikata.

38 “Pa muanda wa bino bioso, atukitshi kilombeno tuikifunde mu mukanda, na bakunkushi betu, bena Levi betu na ba tshite muakuidi betu abekishinkamisha pa kuikiela kitampi.”

10 Bantu babaadi bashinkamishe bianka pa kuela kitampi kiabo panka mbano:

9 Bena Levi babaadi bebishinkamishe mbano: Yeshua muana a Azaniya, Binuwi a ku bana ba Enadade, Kadimiyele, 10 na bakuabo balume: Shebanya, Odiya, Kelita, Peleya, Anana, 11 Mika, Rehobe, Ashabiya, 12 Zakure, Sherebiya, Shebanya, 13 Odiya, Bani na Beninu.

14 Ba nfumu ba muilo babaadi bebishinkamishe mbano: Paroshe, Pahate-moabe, Elame, Zatu, Bani, 15 Buni, Azegade, Bebai, 16 Adoniya, Biguwai, Adine, 17 Atere, Ezekiya, Azure, 18 Odiya, Ashume, Besayi, 19 Arife, Anatote, Nebayi, 20 Mangepiyashe, Meshulame, Ezire, 21 Meshezabele, Zadoke, Yaduwa, 22 Pelatiya, Anana, Anaya, 23 Oshea, Ananiya, Ashube, 24 Alokeshe, Pileha, Shobeke, 25 Rehume, Ashabena, Maaseya, 26 Akiya, Anana, Anane, 27 Maluka, Arime na Baana.

28 Bangi bantu kusanga na ba tshite muakuidi, bena Levi, balami ba ku biibi, tuyimba, bafubi ba ku ntempelo,* na muntu oso baadi muilamune kui bantu ba mu angi maumbo bua kukookiela Miiya y’Efile Mukulu a binyibinyi, pamune na bakashi babo, bana babo balume na bana babo bakashi, boso babaadi na kiukilo na balombene kupusha,* 29 nkuikumbasha kui bakuabo balume, bantu babo ba kinemo, na nkutshipa mutshipo awibatuadila mulua su ta mbeukumbashe, bua kukookiela Miiya y’Efile Mukulu a binyibinyi, ibaabadi bebape kukiila kui Moyise mufubi a Efile Mukulu a binyibinyi, na bua kukookiela na kalolo koso mayi oso a Yehowa Nfumu eetu, biimu biaye na miiya yaye. 30 Tatupa bantu ba mu ino nsenga bana betu bakashi na t’atuata bana babo bakashi bua kuibapa bana betu balume.

31 Su bantu ba mu ino nsenga bafika na bintu biabo na ntete ya mishindo yoso bua kuudisha muifuku dia Sabato, tatuibaulu kintu su nkimune muifuku dia Sabato sunga muifuku dia kishila. Dingi mu kipua kia musambobidi atulekie nsenga ikishe na atulekieela bantu mabasa.

32 Dingi tubeyelela muiya wa’shi, muntu oso a kuatudi atuushe kia bisatu kia shekele* ku kipua kioso bua mufubo wa nshibo* y’Efile Mukulu eetu, 33 bua mikate ituule mu milongo,* mulambu wa ntete wa pa kiubishi, mulambu wa kushiika kaalo wa pa kiubishi bua Sabato na bua mieshi ipia, na bua misangelo ya mu bipungo bitshibibue, bua bintu bia kishila, bua milambu ya muluisho bua kubuikila miluisho ya Isalele, na bua mufubo oso wa nshibo y’Efile Mukulu eetu.

34 Dingi tui bate bubale bua kuuka’shi nkifuko kinyi kia ba tshite muakuidi, bena Levi na bantu akitungu’shi kituale nteete ku nshibo y’Efile Mukulu eetu mu bipungo bitshibibue, ku kipua kioso, bua kuiyishiika kaalo pa kilambuilo kia Yehowa Efile Mukulu eetu muyile biabidi bifundibue mu Miiya. 35 Dingi ku kipua kioso atutuala ku nshibo ya Yehowa biumbuluanga bia kumpala bia nsenga yetu na biumbuluanga bia kumpala bia mitshi ya mishindo yoso ayipeyaa bikuba, 36 mpa na bana mbedi ba munkatshi mua bana betu balume na ba bimunuanga bietu, muyile biabidi bifundibue mu Miiya, na bana mbedi ba ngombe yetu, mbushi na mikooko yetu. Atuibituala ku nshibo y’Efile Mukulu eetu, kui ba tshite muakuidi bakuete kufuba ku nshibo y’Efile Mukulu eetu. 37 Dingi, atutuala kui ba tshite muakuidi ku tudimbo tua kulamina bintu* tua nshibo y’Efile Mukulu eetu, bukula bui na bisekie bua biumbuluanga bietu bia kumpala, bia buntu bietu, bikuba bia mitshi ya mishindo yoso, nfinyo ipia na muimu. Na atutuala kui bena Levi ki’ekumi kia bintu bioso abituusha nsenga yetu, muanda bena Levi nyi bakuete kukongola bi’ekumi mu bibundi bietu bioso bi’abadimaa.

38 Abitungu tshite muakuidi muana a Alona ekale na bena Levi nsaa i bena Levi abakongola ki’ekumi; na abitungu bena Levi balambule ki’ekumi kia ku ki’ekumi ku nshibo y’Efile Mukulu eetu, ku tudimbo tua nshibo ya kulamina bintu. 39 Muanda ku tudimbo tua kulamina bintu nyi akutungu’shi bena Isalele na bana balume ba bena Levi batuale kia buntu kia ntete, nfinyo ipia na muimu. Na kuakua nyi kui bintu bia mbalo ya kishila, mpa na ba tshite muakuidi abafubaa kuanka, balami ba ku biibi na tuyimba. T’atulenguula nshibo y’Efile Mukulu eetu nya.

11 Binobino bakunkushi ba muilo babaadi bashale mu Yelusalema; anka bangi bantu babaadi bate bubale bua’shi kifuko kimune mu bifuko ekumi kishale mu Yelusalema, kibundi ki selele, na bingi kitema bishale mu bingi bibundi. 2 Dingi bantu babaadi belele bana balume babaadi bakumiine abo banabene kushala mu Yelusalema miabi.

3 Na bano nyi ba nfumu ba ma provense babaadi bashale mu Yelusalema. (Bangi bena Isalele, ba tshite muakuidi, bena Levi, bafubi ba ku ntempelo* na bana ba bafubi ba Salomone, babaadi bashale mu bingi bibundi bia Yunda, muntu oso mu kipindi kiaye aye nabene mu kibundi kiabo.

4 Bangi bantu ba mu kisamba kia Yunda na kia Benyamine babaadi nabo bashale mu Yelusalema.) Mu bantu ba mu kisamba kia Yunda mubaadi Ataya muana a Oziase, muana a Zekariya muana a Amariya muana a Shefatia muana a Mahalalele a ku bana ba Pereze, 5 na Maaseya muana a Baruke muana a Koloze muana a Azaya muana a Adaya muana a Yoyaribe muana a Zekariya muana a muina Shela. 6 Bana boso ba Pereze babaadi bashale mu Yelusalema babaadi bana balume be bukome 468.

7 Mu kisamba kia Benyamine mubaadi: Salu muana a Meshulame muana a Yowede muana a Pedaya muana a Kolaya muana a Maaseya muana a Itiyele muana a Yeshaya, 8 na kunyima kuaye kubaadi Gabayi na Salayi, bantu 928; 9 Yowele muana a Zikri baadi mukunkushi a kibundi, na Yunda muana a Asenuwa baadi mumulondele mu kutala kua kibundi.

10 Mu ba tshite muakuidi mubaadi: Yedaya muana a Yoyaribe, Yakine, 11 Selaya muana a Ilikiya muana a Meshulame muana a Zadoke muana a Merayote muana a Akitube, mukunkushi a nshibo* y’Efile Mukulu a binyibinyi, 12 na bakuabo balume babaadi abafubu ku ntempelo, bantu 822; na Adaya muana a Yeroame muana a Peliya muana a Amesi muana a Zekariya muana a Pashure muana a Malikiya, 13 na bakuabo balume, ba nfumu ba bifuko bia bamashabo, bantu 242; na Amashasai muana a Azarele muana a Asai muana a Meshilemote muana a Imere, 14 na bakuabo balume babaadi bukome na basha eshimba dinyingie, bantu 128; mukunkushi aabo baadi Zabadiele, muntu a mu kifuko kiende nkumo.

15 Mu bena Levi mubaadi: Shemaya muana a Ashube muana a Azerikame muana a Ashabiya muana a Buni, 16 na Shabetayi na Yosabade, babaadi munkatshi mua ba nfumu ba bena Levi, babaadi abatala mufubo ubaadi aukitshika paasha pa nshibo y’Efile Mukulu a binyibinyi; 17 na Matanya, muana a Mika muana a Zabadi muana a Asafe mukunkushi a bantu babaadi abayimbi, baadi akunkusha ngono ya ntumbo nsaa ya kuteka, na Bakebukiya mukuashi aaye, na Abada muana a Shamua muana a Galale muana a Yedutune. 18 Bena Levi boso babaadi mu kibundi ki selele, babaadi 284.

19 Balami ba ku biibi babaadi: Akube, Talmone na bakuabo balume babaadi abalama ku biibi, bantu 172.

20 Bangi bena Isalele, ba tshite muakuidi na bena Levi babaadi mu bingi bibundi bioso bia Yunda, muntu oso mu kipindi kiaye kia bupianyi.* 21 Bafubi ba ku ntempelo babaadi bashale mu Ofele. Ziha na Gishipa babaadi abakunkusha bafubi ba ku ntempelo.

22 Mukunkushi a bena Levi mu Yelusalema baadi Uzi muana a Bani muana a Ashabiya muana a Matanya muana a Mika a ku bana ba Asafe, tuyimba; Uzi baadi atala mufubo wa nshibo y’Efile Mukulu a binyibinyi. 23 Muanda nfumu baadi mutume eyi pabibatale, na abaadi abapa tuyimba bungi bua bintu butshibibue muyile nkalo ya kuifuku n’efuku. 24 Na Petaya muana a Meshezabele a ku bana ba Zera muana a Yunda, baadi muntu apeyaa nfumu malango* pabitale mianda yoso ya muilo.

25 Pabitale tu bibundi tua kushala na mapia aato, bangi bantu ba Yunda babaadi bashale mu Kiriate-arba na tu bibundi tuaye tumuifunyishe, mu Dibone na tu bibundi tuaye tumuifunyishe, mu Yekabesele na tu bibundi tuaye, 26 mu Yeshua, mu Molada, mu Bete-pelete, 27 mu Azare-shuale, mu Beere-sheba na tu bibundi tuaye tumuifunyishe, 28 mu Sikelage, mu Mekona na tu bibundi tuaye tumuifunyishe, 29 mu Ene-rimone, mu Soreya, na mu Yarmute, 30 mu Zanowa, mu Adulame na tu bibundi tuabio tuibifunyishe, mu Lakishe na mapia aaye, na mu Azeka na tu bibundi tuaye tumuifunyishe. Babaadi bashale kubanga ku Beere-sheba mpa na ku ebanda dia Hinome.

31 Bantu ba mu kisamba kia Benyamine babaadi mu Geba, mu Mikemashe, mu Ai, mu Betele na mu tu bibundi tumuifunyishe, 32 mu Anatote, mu Nobe, mu Ananya, 33 mu Asore, mu Rama, mu Gitaime, 34 mu Adide, mu Seboime, mu Nebalete, 35 mu Lode na mu Ono, ebanda dia ba nsendue. 36 Na bingi bisaka bia bena Levi ba ku Yunda, babaadi bebituule bua kushala mu nsenga ya Benyamine.

12 Ba tshite muakuidi na bena Levi babaadi bakaamine ku YelusalemA na Zorobabele muana a Salatiele na Yeshua mbano: Selaya, Yelemiya, Esela, 2 Amariya, Maluka, Atushe, 3 Shekania, Rehume, Meremote, 4 Ido, Ginetoi, Abiya, 5 Miyamine, Madiya, Bilga, 6 Shemaya, Yoyaribe, Yedaya, 7 Salu, Amoke, Ilikiya na Yedaya. Bano nyi babaadi bakata ba ba tshite muakuidi na bakuabo mu mafuku a Yeshua.

8 Bena Levi babaadi: Yeshua, Binuwi, Kadimiyele, Sherebiya, Yunda na Matanya baadi akunkusha ngono ya lutumbu na bakuabo balume. 9 Na Bakebukiya na Uni bakuabo balume babaadi abemana betalene nabo bua kufuba bu balami.* 10 Yeshua nkutanda Yoyakime, Yoyakime nkutanda Eliashibe na Eliashibe nkutanda Yoyada. 11 Yoyada nkutanda Yonatane, Yonatane nkutanda Yaduwa.

12 Mu mafuku a Yoyakime, babaadi ba tshite muakuidi, ba nfumu ba bifuko bia bamashabo mbano: Bua kifuko kia Selaya, Meraya; bua kifuko kia Yelemiya, Ananiya; 13 bua kifuko kia Esela, Meshulame; bua kifuko kia Amariya, Yehokanane; 14 bua kifuko kia Meliku, Yonatane; bua kifuko kia Shebanya, Yosefe; 15 bua kifuko kia Arime, Adana; bua kifuko kia Merayote, Elkayi; 16 bua kifuko kia Ido, Zekariya; bua kifuko kia Ginetone, Meshulame; 17 bua kifuko kia Abiya, Zikri; bua kifuko kia Minyamine, . . . ;* bua kifuko kia Moadiya, Piletayi; 18 bua kifuko kia Bilga, Shamua; bua kifuko kia Shemaya, Yehonatane; 19 bua kifuko kia Yoyaribe, Matenayi; bua kifuko kia Yedaya, Uzi; 20 bua kifuko kia Salayi, Kalayi; bua kifuko kia Amoke, Ebere; 21 bua kifuko kia Ilikiya, Ashabiya; bua kifuko kia Yedaya, Netanele.

22 Mu mafuku a Eliashibe, Yoyada, Yohanane na Yaduwa, ba nfumu ba bifuko bia bamashabo bia bena Levi, babaadi bafundibue nka bu bibaabadi bafunde ba tshite muakuidi mpa na mu mafuku a bufumu bua Dariuse muina Pelese.

23 Bena Levi babaadi ba nfumu ba bifuko bia bamashabo, babaadi bafundibue mu mukanda wa mianda ya aa mafuku, mpa na ku mafuku a Yohanane muana a Eliashibe. 24 Ba nfumu ba bena Levi babaadi: Ashabiya, Sherebiya na Yeshua muana a Kadimiyele, na bakuabo balume babaadi bemane betalene nabo bua kutumbisha na kutumbula Efile Mukulu, muyile mayi a David muntu a Efile Mukulu a binyibinyi, kisaka kia balami kikale ku lupese lua kingi kisaka. 25 Matanya, Bakebukiya, Obadia, Meshulame, Talmone na Akube babaadi balami ba ku biibi, babaadi abalama tudimbo tua kulamina bintu tubaadi pepi na biibi. 26 Bano bantu babaadi bafube mu mafuku a Yoyakime muana a Yeshua, muana a Yosadake na mu mafuku a guvernere Neemiya na tshite muakuidi Esela muntu atentulaa bifundue.*

27 Pa kulambula midimba ya Yelusalema babaadi bakimbe bena Levi koso kubaabadi bashale bafika nabo mu Yelusalema bua kusangela kulambula kua midimba na muloo, na ngono ya lutumbu, ma sembale, biombuanga bi na mioshi na nseese. 28 Na bana ba Tuyimba* babaadi bebungie pamune abakatukila ku distrike ku mpese yoso ya Yelusalema, mu tu bibundi tua bena Netofa, 29 mu Bete-gilegale, na mu mapia a Geba na ku Azemawete, muanda tuyimba tubaadi tuibakie tu bibundi tua badia kushala mu mpese yoso ya Yelusalema. 30 Ba tshite muakuidi na bena Levi nkuitoosha abo banabene, abo nkutoosha muilo, biibi, na mudimba.

31 Akupu naadi mukaamishe bakunkushi ba bena Yunda ku nsongo kua mudimba. Ami nkusangula bisaka bibidi bikata bia tuyimba bua kunyimba ngono ya lutumbu, na kisaka kioso kia tuyimba babaadi abekilondo mu mongo kui kisaka kia bantu, na kisaka kimune kia tuyimba kibaadi akiende kitadiile dia ku lupese lua mboko ibalume lua mudimba dia ku Kiibi kia Mituto ya Buto. 32 Oshaya na kia pankatshi kia bakunkushi ba Yunda babaadi abatambuka kunyima kuabo. 33 Pamune na Azariya, Esela, Meshulame, 34 Yunda, Benyamine, Shemaya na Yelemiya. 35 Bangi bana ba ba tshite muakuidi babaadi na mpungi babaadi nabo mbano: Zekariya muana a Yonatane muana a Shemaya muana a Matanya muana a Mikaya muana a Zakure muana a Asafe, 36 na bakuabo balume, Shemaya, Azarele, Milalayi, Gilalayi, Maayi, Netanele, Yunda na Anani, na biombuanga bia Davide muntu a Efile Mukulu a binyibinyi; Esela muntu atentulaa bifundue baadi atambuka kumpala kuabo. 37 Ku Kiibi kia Mushima, babayile batadiile kumpala, bakaamina ku Kikaamino kia Kibundi kia Davide, abo nkukidila muishinda adikaamina ku mudimba wi kunundu kua Nshibo ya Davide, abo nkuenda mpa na ku Kiibi kia Mema dia kutunduka nguba.

38 Kingi kisaka kia tuyimba tua ngono ya lutumbu kibaadi akiyila lungi lupese, na naadi nekilondo na kia pankatshi kia bantu, atue nkuyila dia kunundu kua mudimba nkukidila kunundu kua Kitenta kia ma Nfuulo mpa na ku Mudimba Ukata 39 na kunundu kua Kiibi kia Efraime mpa na ku Kiibi kia Kibundi kia Kala, atue nkuenda mpa na ku Kiibi kia Mishipa, ku Kitenta kia Ananele, ku Kitenta kia Mea mpa na ku Kiibi kia Mikooko; na atue nkuimena ku Kiibi kia Balami.

40 Nfudiilo a bioso bisaka bibidi bibaadi abiyimbi ngono ya lutumbu bibemeene kumpala kua nshibo y’Efile Mukulu a binyibinyi; ami namu na kia pankatshi kia bindonda bia bakunkushi tubemeene, 41 na ba tshite muakuidi: Eliyakime, Maaseya, Minyamine, Mikaya, Eliyoenai, Zekariya na Ananiya babaadi na mpungi, 42 na Maaseya, Shemaya, Eleazare, Uzi, Yehokanane, Malikiya, Elame, na Esere. Na tuyimba tubaadi atuyimbi na eyi di bukopo ku bukunkushi bua Izrakiya.

43 Mu diadia efuku babaadi balambule milambu ibungi na babaadi basankie, muanda Efile Mukulu a binyibinyi baadi muibekashe na muloo wibungi. Bana bakashi na bana, n’abo namu babaadi basankie, biabia muloo wa Yelusalema ubaadi aupushika mpa na kui bula ngofu.

44 Mu diadia efuku bana balume babaadi batudibue bua kutala mashibo abaabadi abafubisha bua kulamina bintu, bia buntu, biumbuluanga bia kumpala, na bi’ekumi. Muanka babaadi ababungu bintu bia mu mafuba a mu bibundi muyile bungi bubaadi Miiya autekie bua ba tshite muakuidi na bena Levi, muanda bantu ba mu Yunda babaadi na muloo pa muanda ba tshite muakuidi na bena Levi babaadi abafubu ku ntempelo. 45 Na bababangile kukumbasha mifubo y’Efile Mukulu aabo na mufubo wa kutooshibua, nka bu bibaadi bikite tuyimba na balami ba ku biibi, muyile mayi a Davide na muana aaye Salomone. 46 Muanda kala mu mafuku a Davide na a Asafe, kubaadi bakunkushi ba tuyimba na ba ngono ya kutumbisha na kutumbula Efile Mukulu. 47 Mu mafuku a Zorobabele na mu mafuku a Neemiya, Isalele oso baadi apa tuyimba na balami ba ku biibi bintu muyile nkalo ya kuifuku n’efuku. Babaadi dingi abatuulu bintu ku lupese bua bena Levi, na bena Levi babaadi abatuulu bintu ku lupese bua bana ba Alona.

13 Mu diadia efuku babaadi babadikile bantu mukanda wa Moyise, na babaadi bapete mmufunde’shi muina Amone sunga muina Moabe tamulombene kutuela mu kakongie ka Efile Mukulu a binyibinyi, 2 muanda tababaadi bende mu kufumankana na bena Isalele bua kuibapa mikate na mema, anka babaadi bafute Balame bua kuela bena Isalele mulua. Anka Efile Mukulu eetu baadi mushintuule mulua wafika miabi. 3 Nka baki’abapusha Muiya, bababangile kukatusha bantu boso benyi mu Isalele.*

4 Kumpala kua bino, tshite muakuidi baadi atala tudimbo tua kulamina bintu* tua nshibo* y’Efile Mukulu eetu baadi Eliashibe, mukuabo na Tobia. 5 Eliashibe baadi mupe Tobia kadimbo kakata ka kulamina bintu, mubaabadi kumpala abatuulu mulambu wa ntete, oliba, na bintu na ki’ekumi kia ntete, nfinyo ipia, na muimu bibaabadi batume eyi bua kupa bena Levi, tuyimba, na balami ba ku biibi, pamune na kia buntu bua ba tshite muakuidi.

6 Mu aa mafuku oso ntshinaadi mu Yelusalema, muanda nayile kui nfumu Artakesese a Babilone mu kipua kia 32 kia kumunana kuaye; na kunyima kua mafuku natekiele nfumu matalua bua kuenda. 7 Akupu nafikile ku Yelusalema na namona muanda wibubi bukile ubaadi Eliashibe mukite p’aye kupa Tobia kadimbo ka kulamina bintu mu lupango lua nshibo y’Efile Mukulu a binyibinyi. 8 Bino tabibaadi binsankishe su nkapeela, biabia ami nkusumbula bintu bioso bia mu nshibo ya Tobia paasha pa kadimbo ka kulamina bintu. 9 Kunyima kua biabia natumine eyi, na abo nkusuula tudimbo tua kulamina bintu; na ami nkualusha muanka bintu bia nshibo y’Efile Mukulu a binyibinyi, pamune na mulambu wa ntete na oliba.

10 Dingi napetele’shi tababaadi abapa bena Levi bintu bibaadi abitungu’shi bebape, biabia bena Levi na tuyimba babaadi abafubu babaadi bakatukie, benda muntu oso ku efuba diaye. 11 Biabia naadi musaashile bindonda bia bakunkushi na nakula’shi: “Buakinyi nshibo y’Efile Mukulu a binyibinyi ibalenguulua?” Akupu nebabungile pamune na nebalusha ku mifubo yabo. 12 Bena Yunda boso babafikile na ki’ekumi kia ntete, kia nfinyo ipia, na kia muimu mu tudimbo tua kulamina bintu. 13 Akupu natudile tshite muakuidi Shelemeya, Zadoke muntu atentulaa bifundue,* na Pedaya umune a ku bena Levi bua kutala tudimbo tua kulamina bintu, Anana muana a Zakure muana a Matanya baadi mukuashi aabo, muanda bano bantu babaadi bantu ba kukulupila. Mufubo wabo ubaadi wa kuabila bakuabo bintu.

14 Ô Efile Mukulu ande, ntentekieshe namu pabitale uno muanda, na tolubanga bikitshino biande bia kifulo kia lulamato biandi mukite bua nshibo y’Efile Mukulu ande na bua mifubo yayo.*

15 Mu aa mafuku namuene bantu ba mu Yunda abafuntu tukuba tua nfinyo mu ma mbalo a kufuntshila tukuba tua nfinyo muifuku dia Sabato, babunganga mituto ya ntete na beyitentekanga pa ma mpunda, na batuelanga na nfinyo, tukuba tua nfinyo, tukuba tua nfigiye, na bushito bua mishindo yoso mu Yelusalema muifuku dia Sabato. Biabia naadi muibadimushe bua’shi tabaudishanga bintu mu diadia efuku.* 16 Na bena Tiire babaadi bashale mu kibundi, babaadi abafiki na mishipa na bintu bia kuudisha bia mishindo yoso, baudishanga bianka kui bantu ba mu Yunda na mu Yelusalema muifuku dia Sabato. 17 Biabia ami nkusaashila bantu ba kinemo ba Yunda na nkuibalungula’shi: “Muanda kinyi wibubi bui bino wa nukuete kukita, anukutua kunemeka mpa n’efuku dia sabato? 18 Bino ta nyi bibaadi bamashenu kulu bakite, biabia Efile Mukulu eetu nkufuisha dino dikienga dioso kuatudi na ku kino kibundi su? Binobino bu bianushikuete kunemeka sabato, nukuete kufuimisha nsungu y’Efile Mukulu kui Isalele.”

19 Biabia pabaadi nguba t’atuele naadi mutume eyi buabadia kukanga biibi bia ku bibelo bia Yelusalema kumpala kua Sabato kubanga. Naadi dingi mutume eyi buashi tabakangulanga biibi mpa na apapu Sabato, na ami nkutuula bangi ba ku bafubi bande ku biibi buashi muntu su ngumune tatuelanga na bushito muifuku dia Sabato. 20 Biabia ba nsunga na bantu abaudishaa bintu bia mishindo yoso, babaadi balale paasha pa Yelusalema dimune sunga kabidi. 21 Akupu ami nkuibadimusha na nkuibalungula’shi: “Buakinyi nukuete kulala paasha kumpala kua mudimba? Su nubakitshi dingi bino, nenubingi pa bukopo.” Kubanga nka paapa ta mbafikie dingi muifuku dia Sabato.

22 Na naadi mulungule bena Levi buabadia kuikala na kiubishi kia kuitoosha na kufika mu kulama biibi bua kulama efuku dia Sabato dia kishila. Bua bino dingi, ntentekieshe namu pabitale uno muanda, Ô Efile Mukulu ande, na ondeshe lusa muyile kifulo kiobe kia lulamato ki bungi.

23 Mu aa mafuku, naadi mumone dingi bena Yunda babaadi bebakile* bakashi bena Ashedode, bena Amone na bena Moabe. 24 Kia pankatshi kia bana babo kibaadi aki’akula kina Ashedode, na kingi kia pankatshi kibaadi aki’akula ndimi ya miilo ilekenelekene, anka su ngumune a kuabadi tabaadi auku kuakula ludimi lua bena Yunda. 25 Biabia ami nkuibasaashila, nkuibela mulua, na nkukupila bangi bana balume, ami nkuibatukula nyene na nkuibatshipisha muishina di’Efile Mukulu’shi: “T’abitungu nupe bana babo balume bana benu bakashi, na t’abitungu nukumiine bana babo bakashi bua bana benu balume sunga buenu. 26 Ta mpa muanda wabo ubaadi Salomone nfumu a Isalele mukite miluisho? Ta kubaadi nfumu bu aye munkatshi mua miilo ibungi; na Efile Mukulu aaye baadi mumufule, nyi buakinyi Efile Mukulu baadi mumutuule bu nfumu a Isalele. Anka bakashi benyi nkumutakula mpa n’aye mu kukita miluisho. 27 Ta nkibeshi kibanukitshi p’anue kukita muanda wibubi bui bino bukata pa kukutua lulamato kui Efile Mukulu eetu p’anue kuibakila bakashi benyi?”

28 Umune a ku bana ba Yoyada muana a tshite muakuidi mukata Eliashibe bekeele muko a Sanabalata muina Orone. Biabia ami nkumubinga kula nami.

29 Ô Efile Mukulu ande, ebatentekieshe namu, muanda mbaluishe bu tshite muakuidi na kilombeno kiobe na ba tshite muakuidi na bena Levi.

30 Na naadi muibatooshe ku butete boso bua bantu benyi, akupu natuudile ba tshite muakuidi na bena Levi ku mifubo, muntu oso ku mufubo waye, 31 Na n’atshile mpango buashi bekale abatuala nteete mu mafuku atshibibue na pabitale biumbuluanga bia kumpala.

Ô Efile Mukulu ande, ntentekieshe namu na ongielele miabi.*