ESTERE

1 Mu mafuku a Asueruse,* kuamba’shi yawa Asueruse baadi amunana mu ma provense 127 kubanga ku Inde mpa na ku Etshopi,* 2 mu aa mafuku Nfumu Asueruse baadi amunana mu Shushane* ebalasa dinyingishibue, 3 mu kipua kia kasatu kia kumunana kuaye, baadi mukite musangelo bua bakunkushi baye boso na bafubi baye boso. Kiluilo kia basalayi kia bena Pelese na kia bena Mede, bantu ba kinemo na bakunkushi ba ma provense babafikile ku musangelo, 4 na munda mua mafuku e bungi, mafuku 180, baadi muibaleshe bupeta bua bufumu buaye bua ntumbo, bukata na ntumbo ya bukome buaye. 5 Pabaadi ano mafuku apue, nfumu baadi mukite musangelo munda mua mafuku musambobidi bua bantu boso babaadi mu Shushane ebalasa diyingishibue, kubanga kui basha kinemo mpa na kui bashi na kinemo, mu lupango lua efuba dia ebalasa dia nfumu. 6 Babaadi balengieshe mu lupango na lin, bilamba bikitshibue na butongo buibuwa na bilamba bia bulee bianyibue bi bukopo na mioshi ya kilamba kibuwa, na buanda bumongolokie buabadi banye ku bikano bia kiamo kia arja, misungo ikitshibue na marbre, ma nkuasa ebuwa abadi bakite na ôlo na kiamo kia arja bituule paashi palamikie mabue a porferi, marbre atooka, mabue a muulo na marbre afiita.

7 Babaadi bape bantu nfinyo mu bipulu* bia ôlo kipulu kioso kibaadi kilekene na kingi, na nfinyo ya nfumu ibaadi ibungi muyile bupeta bua nfumu. 8 Pabitale kutoma malua, muiya ubaadi’shi, tabatakulanga muntu pabukopo,* muanda nfumu baadi mulungule bafubi ba muibalasa bua kulekiela muntu oso akite bi’akumiina.

9 Ndalamumba Vasti n’aye namu baadi mukite musangelo bua bana bakashi ku nshibo ya nfumu* Asueruse.

10 Muifuku dia musambobidi, pabaadi nfumu na muloo pa muanda wa nfinyo, balunguile Mehumana, Bizeta, Arbona, Bigeta, Abagata, Zetare na Karkase bafubi musambobidi ba nfumu, babaadi bafubi ba nfumu Asueruse aye nabene, 11 bua kufika na ndalamumba Vasti kui nfumu mufuale lubango lua bufumu, bua kulesha muilo na bakunkushi biadi buwa, muanda baadi buwa bukile. 12 Anka ndalamumba Vasti baadi nka apele kufika kubaadi nfumu amuitanyina kukiila kui bafubi ba muibalasa, biabia nfumu nkufiita munda ngofu na nsungu yaye ibaadi bukopo.

13 Akupu nfumu nkuisamba na bantu ba sha binangu babaadi abauku mianda ibaadi ipue kukitshika* (muanda mu uno mushindo nyi mubaadi mianda ya nfumu ayifiki kui baba boso abauku miiya kalolo na abauku kusambisha mianda, 14 na bantu baye abatuushaa malango babaadi pepi naye nyi mbano: Karshena, Shetare, Adamata, Tarsise, Merese, Marsena, na Memukane, bakunkushi musambobidi ba bena Pelese na bena Mede, babaadi abatuele mui nfumu na babaadi na miasu ikata mu bufumu). 15 Nfumu nkuipusha’shi: “Muyile muiya, nkinyi akitungu kukita na ndalamumba Vasti muanda ta mukookiele ku eyi dikeele nfumu Asueruse mutume kukiila kui bafubi ba muibalasa?”

16 Nyi Memukane nkuakula kumpala kua nfumu na kua bakunkushi’shi: “Ndalamumba Vasti tamukitshine penda nfumu bibubi, anka mmukitshine mpa na bakunkushi boso na bantu boso ba mu ma provense* oso a Nfumu Asueruse bibubi. 17 Muanda bibakitshi ndalamumba abikaukibua kui bakashi boso, na abakabepuula balume babo, na bakule’shi ‘Nfumu Asueruse tumine eyi bua’shi ndalamumba Vasti afikie kuadi, anka aye nkupela kufika.’ 18 Lelo uno bakashi ba bakunkushi ba bena Pelese na ba bena Mede abauku bibakitshi ndalamumba, abakalungula bakunkushi boso ba nfumu, bino abikafuisha kasaabu na nsungu. 19 Su nfumu akumiina, atuushe muiya, na wawa muiya ufundibue mu miiya ya bena Pelese na bena Mede, isha kushintulua, awamba’shi, Vasti ta mmulombene dingi kufika kumpala kua Nfumu Asueruse; na nfumu ape ungi muana mukashi mumukile muasu wa bu ndalamumba. 20 Na apakaukibua muiya wa nfumu mu bufumu buaye boso, bakashi boso abakanemeka balume babo, kubanga kui basha kinemo mpa na kui bashi na kinemo.”

21 Bino binangu nkusankisha nfumu na bakunkushi, na nfumu nkukita bibaadi Memukane muakule. 22 Biabia nfumu nkutuma mikanda mu ma provense oso a bufumu buaye, provense oso mu nfundilo aye na muilo oso mu ludimi luao, bua’shi mulume ekale nfumu* mu nshibo muaye na akule ludimi lua muilo waye.

2 Kunyima kua ino mianda, pabaadi nsungu ya nfumu Asueruse itshimbe, baadi mutentekieshe bibaadi Vasti mukite na kitshibilo kibaabadi baate pa bimutale. 2 Akupu bafubi ba nfumu aye nabene nkuakula’shi: “Abitungu kukimbila nfumu ba nsonguakashi bebuwa ba ki tumame. 3 Na nfumu asangule bantu mu ma provense oso a bufumu buaye, buashi babungie ba nsonguakashi boso bebuwa ba ki tumame ku Shushane* ebalasa dinyingishibue, ku nshibo ya bana bakashi. Bebatuule mu maasa mua Egee muntu mutungulue a nfumu na mulami a bana bakashi, na bebape bintu bia kuilengiesha nabio buashi batuukie buwa. 4 Na nsonguakashi oso akasankisha nfumu ngofu akekala bu ndalamumba pa mbalo ya Vasti.” Biabia binangu nkusankisha nfumu na aye nkukita nka biabia.

5 Mu Shushane ebalasa dinyingishibue, mubaadi ungi muana mulume muina Yunda abaabadi abetanyina bu Mordekayi muana a Yaire, muana a Shimeyi, muana a Kishe, muina Benyamine, 6 abaabadi bakuate mu Yelusalema benda naye pamune na bantu babaabadi bende nabo na Nfumu Yekoniase* a Yunda, baadi nfumu Nabukondonosore a Babilone mukuate enda naye. 7 Baadi akusha* Adasa* kuamba’shi Estere, muana a muyomba aaye, muanda Estere tabaadi na nshaye sunga nyinaye. Uno nsonguakashi baadi buwa bua mbidi na buwa bua mpala bukile, na pabafuile nshaye na nyinaye Mordekayi bamuatshile bu muana aaye mukashi. 8 Pabaabadi baukishe eyi na muiya bia nfumu na pabaabadi babungie ba nsonguakashi ku Shushane ebalasa dinyingishibue kubaabadi ku bukunkushi bua Egee, Estere namu babaadi bende naye ku nshibo* ya nfumu ibaadi ku bukunkushi bua Egee mulami a bana bakashi.

9 Egee baadi asankila uno nsonguakashi na aye nkumulesha kalolo,* biabia aye nkukita bukidibukidi buashi bamupe bintu bia kuilengiesha nabio buashi atuukie buwa na buashi bamupe bia kudia biaye, na aye nkumutudila ba nsonguakashi musambobidi babaabadi basangule ku ba nsonguakashi abafubaa mu nshibo ya nfumu. Aye nkumutuma’nyi mu mbalo ikile buwa ya mu nshibo ya bana bakashi. 10 Estere tabaadi muakule muanda su ngumune pabitale muilo wabo sunga bakuabo, muanda Mordekayi baadi mumutoshe bua kulungula muntu su ngumune muanda. 11 Efuku dioso Mordekayi baadi akindakana kumpala kua lupango lua nshibo ya bana bakashi bua kuuka su Estere e bibuwa na bua kuuka mianda ibaabadi abamukitshina.

12 Nsonguakashi oso baadi ende waye musango kui nfumu Asueruse kunyima kuaye kukumbasha mieshi 12 ibaabadi batshibile bana bakashi bua kuilengiesha bua kuikala buwa. Bibaabadi abelengiesha bua kuikala buwa mbino: Abaadi abelengiesha mieshi isamombo na muimu wa mire na ingi mieshi isamombo na muimu wa bome na ingi mimu ilekene bua kuikasha mbidi buwa. 13 Yaaya nsaa nyi ibaadi nsonguakashi alombana bua kutuela mui nfumu, pabaadi nsonguakashi akatuka ku nshibo ya bana bakashi* bua kuenda ku nshibo ya nfumu, babaadi abamupa kioso kibaadi atekie. 14 Baadi atuele ku kiolua mui nfumu na ku namashika baadi alukiila ku nshibo ya kabidi ya bana bakashi, ibaadi ku bukunkushi bua Shashegaza muntu mutungulue a nfumu, mulami a bangi bakashi ba nfumu. Yawa nsonguakashi tabaadi alukiila dingi kui nfumu nka su nfumu baadi mumusankile ngofu na su baadi mutemune eshina diaye bua’shi bamuitanyine.

15 Na pabakumbene musango wa Estere muana a Abihaile muyomba a Mordekayi, baadi mumuate bu muana aaye mukashi bua kutuela mui nfumu, tabaadi mutekie kintu su nkimune kukatusha penda bibaadi bimulungule Egee muntu mutungulue a nfumu, mulami a bana bakashi. (Aa mafuku oso, Estere baadi asankisha muntu oso baadi amumono.) 16 Babayile na Estere kui nfumu Asueruse ku nshibo yaye ya bufumu mu mueshi w’ekumi, kuamba’shi, mueshi wa Tebete,* mu kipua kia musambobidi kia kumunana kuaye. 17 Na nfumu nkufula Estere kukila bangi bana bakashi boso, baadi mumusankishe ngofu na aye nkumufula* kukila bangi bana bakashi tumame boso. Biabia nfumu nkumufuadika lubango lua bufumu ku mutue waye na nkumuikasha ndalamumba pa mbalo ya Vasti. 18 Na nfumu nkukita musangelo ukata bua bakunkushi baye boso na bafubi baye, musangelo wa Estere. Akupu aye nkuukisha’shi abitungu baposole* bantu mu ma provense, na aye nkupa bantu bia buntu muyile bupeta bua nfumu.

19 Pabababungile bana bakashi tumame* bua musango wa kabidi, Mordekayi baadi mushale ku kibelo kia nfumu. 20 Estere tabaadi muakule muanda su ngumune pabitale bakuabo na pabitale muilo wabo, nka bu bibaadi Mordekayi mumulungule; Estere baadi mutungunukie na kukita bibaadi abiakula Mordekayi nka bu bibaadi akitshi pabaadi ki mu maasa muaye.

21 Mu aa mafuku, pabaadi Mordekayi mmushale ku kibelo kia nfumu, Bigetane na Tereshe bafubi babidi ba muibalasa dia nfumu, balami ba ku biibi, babaadi bafiite munda na abo nkudia lukuku bua kuipaa nfumu Asueruse. 22 Anka Mordekayi baadi mupushe wawa muanda, na mususa umune aye nkulungula ndalamumba Estere. Estere namu nkulungula nfumu pa mbalo ya Mordekayi. 23 Biabia babaadi bakimbuule wawa muanda kalolo na basangana’shi ngua binyibinyi, abo nkupudika baba bantu boso babidi ku mutshi; bino bioso babaadi bebifunde mu mukanda wa mianda ya aa mafuku kumpala kua nfumu.

3 Kunyima kua biabia nfumu Asueruse baadi mukaamishe Amane muana a Amedata muina Agage muasu na aye nkumutumbisha pa kumupa muasu wi kunundu kua bangi bakunkushi boso babaadi naye. 2 Na bafubi boso ba nfumu babaadi ku kibelo kia nfumu babaadi abenama na kukupila mpala paashi kumpala kua Amane, muanda bino nyi bibaadi nfumu mutume eyi pa bimutale. Anka Mordekayi baadi mupele kuinama sunga kukupila mpala paashi. 3 Biabia bafubi ba nfumu babaadi ku kibelo kia nfumu nkuipusha Mordekayi’shi: “Buakinyi okuete kupela kukookiela eyi dia nfumu?” 4 Babaadi abamuipusha efuku dioso, anka tabaadi ebateemesha. Akupu babaadi balungule Amane bua kutala su mmulombene kutadiila muikelo wa Mordekayi bu bibaadi muibalungule’shi mmuina Yunda.

5 Pabaadi Amane mumone’shi Mordekayi bapele kumuinamina na kumukupiila mpala pashi, Amane bafiitshile munda ngofu. 6 Aye nkuata kitshibilo kia kuipaa Mordekayi, kadi bamuene’shi kuipaa penda Mordekayi takukumbana nya, muanda babamulunguile pabitale muilo wa Mordekayi. Biabia Amane babangile kukimba bia kubutula bena Yunda boso babaadi mu bufumu bua Asueruse, muilo oso wa Mordekayi.

7 Mu mueshi wa kumpala, kuamba’shi mueshi wa Nisane,* mu kipua kia 12 kia kumunana kua nfumu Asueruse, babaadi bele Pure (kuamba’shi kuta bubale) kumpala kua Amane bua kuuka efuku na mueshi wabidia kukitshika, na abo nkupona mu mueshi wa 12, kuamba’shi mueshi wa Adare.* 8 Amane balunguile nfumu Asueruse’shi: “Kui muilo kampanda upalakane munkatshi mua miilo mu ma provense oso a bufumu bobe, wi na miiya ilekene na miiya ya ingi miilo yoso; na tabakuete kukookiela miiya ya nfumu nya, kuibalekiela nka biabia takui buwa bua nfumu. 9 Su abisankisha nfumu batuushe muiya na beufunde, awamba’shi abitungu babutule bena Yunda. Nakafutu bafubi ntalanta* 10 000 ya kiamo kia arja buashi beyeele mu kashete ka nfumu.”*

10 Nyi nfumu nkukasha kakano kaye ka kuela nako kitampi ku munue waye nkuikapa Amane muana a Amedata muina Agage baadi muishikuanyi a bena Yunda. 11 Nfumu nkulungula Amane’shi: “Kiamo kia arja na muilo bi mu maasa mobe, kita nabo bioso biokumiina.” 12 Babaadi betanyishe bafundi ba nfumu mu efuku dia 13 dia mueshi wa kumpala. Abo nkufunda mayi oso a Amane abaadi mutumine bantu abalesha mpala ya nfumu, ba guvernere ba ma provense na bakunkushi ba miilo ilekene, muyile nfundilo a mu provense oso na ludimi lua muilo oso. Babaadi bafunde muishina dia Nfumu Asueruse na bela kitampi na kakano ka nfumu.

13 Babatumine yaaya mikanda mu ma provense oso a nfumu na bantu abatualaa mikanda, mu yaaya mikanda mubaadi muiya awamba’shi abitungu bashimishe, bayipee na babutule bena Yunda boso, ba nsongua, bantu bakulu, bana na bana bakashi muifuku dimune, mu efuku dia 13 dia mueshi wa 12, kuamba’shi mueshi wa Adare, na baate bintu biabo. 14 Mianda i mu mukanda babaadi na kiakuiyikasha bu muiya mu ma provense oso na kuiyilungula miilo yoso, buashi belumbuule bua diadia efuku. 15 Bantu abatualaa mikanda, babayile nayo bukidibukidi muyile eyi dia nfumu; muiya nkupalakana mu Shushane* ebalasa dinyingishibue. Akupu nfumu na Amane nkushala bua kutoma, kadi kibundi kia Shushane kibaadi mu kafutakanyi.

4 Pabapushishe Mordekayi mianda yoso ibaadi ikitshikie, basanuine bilamba biaye aye nkufuala mpaya na nkuiponga buto. Akupu bayile munkatshi mua kibundi na kuela misaase i bukupo na kinyongua kikata. 2 Bayile emana kumpala kua kibelo kia nfumu, muanda muntu mufuale mpaya tabaadi mulombene kutuela ku kibelo kia nfumu. 3 Na mu provense oso mubaadi eyi dia nfumu na muiya waye bifikie, mubaadi maalo akata munkatshi mua bena Yunda, babaadi abeshidika, abadidi na kuela misaase. Be bungi ba kuabadi babaadi abalaala mu ma mpaya na mu buto. 4 Pabaadi bafubi bakashi ba Estere na bantu baye batungulue bafikie kuadi mu kumulungula kibakitshikile, ndalamumba baadi muinyongole ngofu. Akupu aye nkutumina Mordekayi bilamba bia kufuala pamutue pa kufuala mpaya, anka bebipelele. 5 Biabia Estere baadi muitanyine Atake umune a ku bantu batungulue ba nfumu, abaabadi batuule kui nfumu bua kufubila Estere, aye nkumutuma kui Mordekayi buashi amuipushe buakinyi kuete kukita biabia na kiinyi kibakitshika.

6 Biabia Atake nkuenda kui Mordekayi ku mbalo ya bantu boso ya kibundi kumpala kua kibelo kia nfumu. 7 Mordekayi bamulunguile mianda yoso ibaadi imufikile, mpa na bungi bua makuta bubaadi Amane mulee bua kuela mu kashete ka nfumu bua kubutula bena Yunda. 8 Bamupele dingi mukanda wa muiya ubaabadi bele mu Shushane bua kuibabutula. Atake baadi na kia kuenda mu kuiulesha Estere na kumupatuluila wanka, na kumulungula buashi ende kui nfumu akamusendeele buashi ebapushe lusa na aye nabene akuile muilo waye kuadi.

9 Atake baadi mualukiile na alungula Estere bibaadi Mordekayi muakule. 10 Estere batumine Atake buashi alungule Mordekayi’shi: 11 “Bafubi boso ba nfumu na muilo wi mu ma provense a nfumu abauku’shi, su muana mulume sunga muana mukashi atuela mu lupango lua munda lua nfumu kuabashi bamuitanyine, kui muiya penda umune wabafubisha awamba’shi: Abitungu bamuipee; mmulombene kushala na muwa nka su nfumu bamololuela mukombo waye wa ôlo. Na ta mbangitanyine bua kutuela mui nfumu takudi mafuku 30.”

12 Pabaabalunguile Mordekayi bibakuile Estere, 13 Mordekayi baluluile Estere’shi: “Topuandikishanga’shi bu biodi mu nshibo ya nfumu abakulekieela pabayipaa bangi bena Yunda boso. 14 Muanda su boumiina mu ino nsaa, bukuashi na kupaashibua kua bena Yunda akutukila ingi mbalo, kadi obe na kifuko kia nshobe anufu. Na nnanyi auku su bodi mufikie mukashi a nfumu bua mianda bu ino?”

15 Biabia Estere nkualula Mordekayi’shi: 16 “Nda okabungie bena Yunda boso be mu Shushane* na nuishidikie pa muanda wande. Tanudianga sunga kutoma munda mua mafuku asatu kanya na bufuku. Ami na bafubi bande bakashi namu atuishidika. Nakatuele mui nfumu, sunga biekala’shi mbikutuene na muiya, su abitungu’shi nfue nakafu.” 17 Biabia Mordekayi bayile na akita bioso bibamulunguile Estere.

5 Mu efuku dia kasatu, Estere bafuadile bilamba biaye bia bufumu, emana mu lupango lua munda lua nshibo ya nfumu,* muitalene na nshibo ya nfumu, pabaadi nfumu mmushale mu nkuasa aaye a bufumu mu nshibo ya nfumu mmuitalene na kituelelo. 2 Pabaadi nfumu mumone Ndalamumba Estere mmuimane mu lupango, baadi mupushe muloo pa kumumona, na aye nkololuela Estere mukombo waye wa ôlo ubaadi mu eyasa diaye. Estere nkuifubuila pepi na nkukuma ku nsongo ya mukombo.

3 Nfumu nkumuipusha’shi: “Ndalamumba Estere, a mmuanda kinyi? Okiebe kinyi? Sunga nkiapankatshi kia bufumu buande nankupa kianka!” 4 Estere nkumualula’shi: “Su abisankisha nfumu, nfumu afikie namu lelo na Amane ku kidibua kiandi mulumbuluile nfumu.” 5 Biabia nfumu nkulungula bantu baye’shi: “Lungulayi Amane afikie bukidibukidi bu bibatekie Estere.” Paapa nfumu na Amane babayile ku kidibua kibaadi Estere mulumbuule.

6 Pabaabadi abatomo nfinyo, nfumu balunguile Estere’shi: “We na lukalo na kinyi? Nankupa kianka! Okiebe kinyi? Sunga nkiapankatshi kia bufumu buande nankupa kianka!” 7 Estere nkumualula’shi: “Kiandi nakio lukalo na kiankiebe nkino, 8 su nemukuminyibue ku meso kua nfumu na su abisankisha nfumu bua kumpa kiandi nakio lukalo na kiantekie, nfumu na Amane bafikie malooba ku kidibua kia nebalumbuluila; na malooba nakalungula nfumu kiandi nakio lukalo.”

9 Diadia efuku Amane baadi mutuukie na muloo na musangale. Anka pabaadi Amane mumone Mordekayi mu kibelo kia nfumu na atundula’shi Mordekayi tabaadi muibue na asusa kumpala kuaye, Amane baadi mufiitshile Mordekayi sungu i bukopo. 10 Anka Amane baadi muikande na alukiila ku nshibo yaye. Akupu aye nkuitanyisha ba kuuku baye na mukashi aaye Zereshe. 11 Amane baadi etumbisha muanda baadi na bupeta bui bungi, bana be bungi, na muanda nfumu baadi mumukaamishe muasu na amutuula kunundu kua bangi bakunkushi na bafubi ba nfumu.

12 Amane bakumbeshe’shi: “Kukasha biabia, Ndalamumba Estere ekalanga mungitanyine penda ami bua kudia na nfumu ku kidibua kiekalanga mulumbuule. Bangitanyina’nyi buandia kuikala naye na nfumu malooba. 13 Kadi ino mianda yoso tayinsankisha pankiamono Mordekayi muina Yunda mmushale ku kibelo kia nfumu.” 14 Biabia mukashi aaye Zereshe na bakuku baye boso nkumulungula’shi: “Tuma eyi bayimikie mutshi wi bula bua kude 50.* Na kunakashika olungule nfumu’shi abitungu bapudikie Mordekayi kuanka. Kunyima wende na nfumu ku kidibua na muloo oso.” Bino binangu bibaadi bisankishe Amane ngofu, biabia aye nkutuma eyi buashi bemikie mutshi.

6 Buabua bufuku nfumu tabaadi mulale nya.* Biabia aye nkuteka bua’shi bamutuadile mukanda wa mianda ya aa mafuku, na abo nkuiubadikila nfumu. 2 Mu wawa mukanda babapetele mbalo ifunde bibaadi Mordekayi muakule pabitale Bigetane na Tereshe bafubi babidi ba muibalasa dia nfumu, balami ba ku biibi, babaadi badie lukuku bua kuipaa Nfumu Asueruse. 3 Nfumu nkuipusha’shi: “Nkinemo kinyi na mbuedi kinyi buabadi bape Mordekayi bua uno muanda?” Nyi bafubi ba nfumu aye nabene nkumualula’shi: “Ta mbamukitshine kintu su nkimune.”

4 Kunyima nfumu bayipuishe’shi: “Nnanyi e mu lupango?” Aku namu Amane baadi mufikie mu lupango lua paasha lua nshibo ya nfumu* bua kuteka nfumu bua’shi bapudikie Mordekayi ku mutshi ubaadi mumulumbuluile. 5 Bafubi ba nfumu babamualuluile’shi: “Amane nyi muimane mu lupango.” Nfumu nkuibalungula’shi: “Mutuesheyi.”

6 Pabatuelele Amane, nfumu bamuipuishe’shi: “Nkinyi kiabadi balombene kukitshina muntu abakiebe kupa kinemo kui nfumu?” Amane nkuiakuila muishimba diaye’shi: “Nnanyi ungi abadi balombene kupa kinemo kui nfumu kunkasha ami?” 7 Biabia Amane nkualula nfumu’shi: “Bua yawa muntu abakiebe kupa kinemo kui nfumu, 8 abitungu bafikie na kilamba kia bufumu akifualaa nfumu, na nfualasa abakaaminaa kui nfumu, bafuadikie nfualasa lubango lua bufumu ku mutue. 9 Akupu bape umune a ku bakunkushi bakata ba nfumu kiakia kilamba na yawa nfualasa, na bafuadikie yawa muntu abakiebe kupa kinemo kui nfumu kiakia kilamba, bamukaamishe ku yawa nfualasa na befunye naye pa mbalo ya bantu boso ya kibundi. Akupu bele misaase kumpala kuaye’shi: ‘Bino nyi biabakitshinaa muntu abakiebe kupa kinemo kui nfumu.’” 10 Musango umune nfumu nkulungula Amane’shi: “Kita bukidi! Ata kiakia kilamba na nfualasa, na okitshine Mordekayi muina Yunda mushale ku kibelo kia nfumu nka biabia bibuakula. Tolekanga kintu su nkimune ku biabia bibuakula.”

11 Biabia Amane nkuata kiakia kilamba na nfualasa, nkuikifuadika Mordekayi na nkumukaamisha pa nfualasa, na nkumuifunyisha pa mbalo ya bantu boso ya kibundi, aye nkuela misaase nkumpala kuaye’shi: “Bino nyi biabakitshinaa muntu abakiebe kupa kinemo kui nfumu!” 12 Kunyima kua biabia Mordekayi balukiile ku kibelo kia nfumu, kadi Amane nkualukiila ku nshibo kuaye lubilo mmuinyongole ngofu na mmuibuikile ku mutue. 13 Pabaadi Amane mulungule mukashi aaye Zereshe na ba kuuku baye boso mianda yoso ibaadi imufikile, bantu baye abamupeyaa binangu na mukashi aaye Zereshe babamulunguile’shi: “Su uno Mordekayi obobanga kuinamina mmuina Yunda, tokamutshimuna nya; nfudiilo a bioso okapono kumpala kuaye.”

14 Pabaabadi bakiabesamba naye, bafubi ba muibalasa dia nfumu babafikile bamuata benda naye bukidibukidi ku kidibua kibaabadi balumbule kui Estere.

7 Biabia nfumu na Amane nkufika ku kidibua kibaadi Estere mulumbuule. 2 Muifuku dia kabidi pabaabadi abatomo nfinyo, nfumu bayipuishe Estere dingi’shi: “Ndalamumba Estere, we na lukalo na kinyi? Nankupa kianka! Okiebe kinyi? Sunga nkiapankatshi kia bufumu buande nankupa kianka!” 3 Ndalamumba Estere nkumualula’shi: “Su ne mukuminyibue ku meso kobe, Ô nfumu, na su abisankisha nfumu, nankutekie na nkuisendeela bua’shi opaashe muwa* wande na muilo wande. 4 Muanda ami na muilo wande mbetuudishe buashi betushimishe, betuipe na betubutule. Su babaadia kuituudisha sunga mbu ba mpika balume na bakashi, nadia kuumiina. Kadi muanda wi bubi bui bino tabitungu ukitshikie, muanda auluishisha nfumu.”

5 Biabia Nfumu Asueruse nkuipusha Ndalamumba Estere’shi: “Mmutu kinyi bakitshi muanda wi biabia na e kunyi?” 6 Estere nkualula’shi: “Muluishi na muishikuanyi eetu nguno Amane muntu e bubi.”

Amane nkubanga kususa muanda wa nfumu na wa ndalamumba. 7 Nfumu nkuibua na nsungu i bukopo, nkukatuka ku kidibua na nkuenda mu lupango lua ebalasa, anka Amane nkuibua nkubanga kusendeela Ndalamumba Estere buashi apaashe muwa* waye, muanda baadi mumone’shi, nfumu baadi muate kitshibilo kia kumunyoka. 8 Pabaadi nfumu mukatukie mu lupango lua muibalasa, alukiila mu nshibo mubaadi kidibua, bamuene Amane mmuisumbule mu nkuasa mubaadi Estere. Nfumu nkuakula na kukaanya koso’shi: “T’akiebe dingi kulala na ndalamumba pa bukopo mu nshibo muande?” Musango umune nka nfumu kiakula biabia, babaadi babuikile Amane ku mpala. 9 Arbona umune a ku bafubi ba muibalasa dia nfumu, nkuakula’shi: “Amane mmulumbule’nyi mutshi buabadia kupudika Mordekayi, Mordekayi baadi muakule muanda ubaadi upaashe nfumu. Wawa mutshi nguimikue ku nshibo ya Amane, wi bula bua kude 50.”* Nyi nfumu nkuakula’shi: “Mupudikieyi kuanka.” 10 Biabia abo nkupudika Amane ku mutshi ubaadi mulumbuluile Mordekayi, na nsungu ya nfumu nkupeela.

8 Mu diadia efuku Nfumu Asueruse baadi mupe Ndalamumba Estere bintu bioso bia Amane muishikuanyi a bena Yunda; na Mordekayi bafikile kumpala kua nfumu, muanda Estere baadi muakule’shi, Morderkayi mmukuabo a mu kifuko. 2 Akupu nfumu nkufuula kakano kaye ka kuela nako kitampi kabaadi munyengie Amane, nkuikapa Mordekayi. Na Estere nkutuula Mordekayi bu mukunkushi a bintu bioso bia Amane.

3 Kukasha biabia Estere baadi muisambe dingi na nfumu. Aye nkupona ku mikoolo yaye, nkudila na nkumuisendeela buashi akatushe bubi bubaadi Amane muina Agage mukite na kukutshishua lukuku lubaadi Amane mudiile bena Yunda. 4 Nfumu nkololuela Estere mukombo waye wa ôlo, Estere nkuibua na nkuimana kumpala kua nfumu. 5 Aye nkuakula’shi: “Su abisankisha nfumu, na su nemukuminyibue naye, su mbikuminyibue kui nfumu na su nasankisha nfumu, bafunde mukanda awipaa mikanda ibaadi ifunde Amane muntu baadi mudie lukuku, muana a Amedata muina Agage bua kuipaa bena Yunda boso be mu ma provense a nfumu. 6 Muanda mbikunyi biandi mulombene koobesha kumona makienga aakafikila muilo wande, na mbikunyi biandi mulombene koobesha kumona kubutudibua kua kifuko kiande?”

7 Nyi nfumu nkulungula Ndalamumba Estere na Mordekayi muina Yunda’shi: “Talayi! Napu kupa Estere bintu bioso bia Amane na ntumine eyi buabadia kupudika Amane ku mutshi, muanda wa lukuku lubaadi mudie bua kubutula bena Yunda. 8 Binobino fundayi mukanda muishina dia nfumu, nufunde mianda yoso yanumono’shi mbua buwa bua bena Yunda na nuikuele kitampi na kakano ka nfumu ka kuela nako kitampi, muanda mukanda ufundibue muishina dia nfumu na wedibue kitampi na kakano ka nfumu ka kuela nako kitampi, ntambalombene kuiushintula.”

9 Biabia babaadi betanyishe bafundi ba nfumu muifuku dia 23 dia mueshi wa kasatu, kuamba’shi mueshi wa Sivane,* na babaadi bafunde bioso bibaadi Mordekayi mutumine bena Yunda eyi, bantu abalesha mpala ya nfumu, ba guvernere, na bakunkushi ba ma provense kubanga ku Inde mpa na ku Etshopi, ma provense 127, mu nfundilo a mu provense oso na mu ludimi lua muilo oso, mu nfundilo na mu ludimi lua bena Yunda.

10 Mordekayi baadi muiyifunde muishina dia Nfumu Asueruse na aye nkuela kuanka kitampi na kakano ka nfumu ka kuela nako kitampi, na aye nkutuma yaaya mikanda na bantu abatualaa mikanda abakaaminaa pa nfualasa; babaadi bakaamine pa nfualasa ayitualaa mikanda lubilo lukile, y’abafubishaa bua mudimo wa muibalasa. 11 Mu yaaya mikanda nfumu baadi mupe bena Yunda babaadi mu bibundi bioso bilekene matalua a kuibunga bua kukaluila miuwa* yabo na kushimisha, kuipaa na kubutula kiluilo kioso kia muilo oso wawa sunga kia provense oso yawa akibatuuku ngoshi, mpa na bana bakashi na bana, na bua kuata bintu biabo. 12 Bino bibaadi na kia kukitshika muifuku dimune mu ma provense oso a Nfumu Asueruse, muifuku dia 13 dia mueshi wa 12, kuamba’shi, mueshi wa Adare.* 13 Mianda ibaabadi bafunde mu wawa mukanda bibaadi abitungu beyikashe bu muiya mu ma provense oso. Bibaadi abitungu beyilungule bantu ba miilo yoso, buashi bena Yunda bekale belumbuule mu diadia efuku bua kuiobuela kui beshikuanyi babo. 14 Bantu abatualaa mikanda abakaaminaa pa nfualasa ayitualaa mikanda y’abafubishaa bua mudimo wa muibalasa babayile mususa umune na bukidibukidi bua kukokiela ku eyi dia nfumu. Babaadi dingi baukishe wawa muiya mu Shushane* ebalasa dinyingishibue.

15 Mordekayi bakatukile kumpala kua nfumu mufuale kilamba kia bufumu ki na elangi dia bulese na ditooka, mufuale kifulu kikata kia bufumu kia ôlo na kilamba kia buanda bui buwa bumongolokie panundu pa kilamba kiaye kia bufumu. Na bantu ba mu kibundi kia Shushane babaadi abeele misase ya muloo. 16 Bibaadi kuikisha, muanda wa muloo ukile na kinemo bua bena Yunda. 17 Mu ma provense oso na mu bibundi bioso, mbalo yoso ibaadi eyi dia nfumu na muiya waye biukishibue, bena Yunda babaadi na muloo ukile, babaadi abateekie bidibua na kukita misangelo. Bantu bebungi ba ingi miilo babaadi abeamba bu bena Yunda, muanda babaadi abatshinyi bena Yunda.

9 Muifuku dia 13 dia mueshi wa 12, kuamba’shi mueshi wa Adare,* efuku dibaadi aditungu kulombasha eyi na muiya wa nfumu, muifuku dibaadi beshikuanyi ba bena Yunda abakulupila’shi abebatshimuna, mianda ibashintulukile, bena Yunda babaadi batshimune baba babaadi bebashikue. 2 Bena Yunda babaadi bebungie mu bibundi biabo bi mu ma provense oso a Nfumu Asueruse bua kulua na baba boso babaadi abakiebe kuibakita bibubi, na takui muntu su ngumune baadi mulombene kuimana kumpala kuabo, miilo yoso ibaadi ayibatshinyi. 3 Na bakunkushi boso ba ma provense, bantu abalesha mpala ya nfumu, ba guvernere, na bantu babaadi abatala mifubo ya nfumu babaadi abakuatshishena bena Yunda, muanda babaadi abatshinyi Mordekayi. 4 Mordekayi baadi mufikie na bukome bui bungi mu nshibo ya nfumu,* na nkumo yaye ibaadi ayipalakana mu ma provense oso, muanda bukome bua Mordekayi bubaadi abuende nka na kufuima.

5 Bena Yunda babaadi bayipee beshikuanyi babo boso ku lupete lua ngoshi, bebayipaa na kuibabutula; babaadi bakite kioso kibaabadi abakumiina kukita baba babaadi bebashikue. 6 Mu Shushane* ebalasa dinyingishibue bena Yunda babaadi bayipee na kubutula bana balume 500. 7 Babaadi’nyi bayipee Parshandata, Dalefone, Asepata, 8 Porata, Adaliya, Aridata, 9 Parmashata, Arisayi, Aridayi, Vayizata, 10 bana balume ekumi ba Amane muana a Amedata, muishikuanyi a bena Yunda. Anka kunyima ku’abo kuibayipaa tababaatshile kintu kiabo su nkimune.

11 Mu diadia efuku babalunguile nfumu bungi bua bantu babaabadi bayipee mu Shushane ebalasa dinyingishibue.

12 Nfumu nkulungula ndalamumba Estere’shi: “Mu Shushane ebalasa dinyingishibue bena Yunda babayipaa na kubutula bana balume 500 na bana balume ekumi ba Amane. Paapa mu angi ma provense a nfumu abashala mbakite kinyi? Binobino we na lukalo na kinyi? Nankupa kianka. Otekie dingi kinyi? Nankupa kianka.” 13 Estere nkualula’shi: “Su abisankisha nfumu, bena Yunda be mu Shushane bapebue matalua a kukita dingi malooba muyile uno muiya wa lelo; na bitanda ekumi bia bana balume ba Amane bebipudikie ku mutshi.” 14 Biabia nfumu baadi mutume eyi buashi bakite bianka. Babaadi bapalakashe uno muiya mu Shushane, na abo nkupudika bitanda ekumi bia bana balume ba Amane.

15 Bena Yunda babaadi mu Shushane nkuibunga dingi muifuku dia 14 dia mueshi wa Adare, na abo nkuipaa bana balume 300 mu Shushane, anka tababaatshile kintu kiabo su nkimune.

16 Bangi bena Yunda babaadi mu ma provense a nfumu nkuibunga n’abo namu bua kukaluila miuwa yabo. Abo nkutshimuna beshikuanyi babo, na nkuipaa bantu 75 000 ba ku baba babaadi bebashikue, anka tababaatshile kintu kiabo su nkimune. 17 Bibaadi muifuku dia 13 dia mueshi wa Adare, na muifuku dia 14 babaadi bekishe na bedikasha bu efuku dia kukita musangelo na dia muloo.

18 Bena Yunda babaadi mu Shushane babaadi bebungie muifuku dia 13 na dia 14, muifuku dia 15 babaadi bekishe na abo nkuidikasha bu efuku dia kukita musangelo na dia muloo. 19 Nyi buakinyi bena Yunda babaadi bashale mu bibundi bi mu ma distrike e kula, babaadi bekashe efuku dia 14 dia mueshi wa Adare bu efuku dia muloo na dia kukita musangelo, na dia kuitumishena bia kudia.

20 Mordekayi bafundile yaaya mianda, na atuma mikanda kui bena Yunda bashale mu ma provense oso a Nfumu Asueruse, e kula na e pepi. 21 Baadi muibatumine eyi bua kukitanga musangelo muifuku dia 14 na dia 15 dia mueshi wa Adare, ku kipua kioso, 22 muanda mu aa mafuku bena Yunda babaadi bekishe kui beshikuanyi babo, na mu wawa mueshi kinyongua kiabo kibaadi kishintulukie kiafika muloo, na efuku diabo dia kudila diafika efuku dia kukita musangelo. Mu aa mafuku babaadi na kia kukita misangelo, kuikala na muloo, kuitumishena bia kudia na kupa balanda bia buntu.

23 Bena Yunda babaadi bakumiine’shi abekala abakitshi musangelo mu aa mafuku ku kipua kioso na kutumikila bibaadi Mordekayi muibafundile. 24 Muanda Amane muana a Amedata muina Agage muishikuanyi a bena Yunda boso, baadi mudie lukuku lua kubutula bena Yunda, baadi muele Pure, kuamba’shi kuta bubale, bua kuibakuatshisha moo na kuibabutula. 25 Anka pabafikile Estere kumpala kua nfumu, nfumu baadi mutume eyi buashi bafunde muiya awamba’shi: “Lukuku lui bubi luadi mudiile bena Yunda, lumualulukile aye nabene”; na babaadi bapudikie Amane na bana baye balume ku mutshi. 26 Nyi buakinyi babaadi baudikie aa mafuku bu Purime, eshina adifiki ku kishima Pure.* Biabia pa muanda wa bioso bibaadi bifundibue mu uno mukanda na pa muanda wa bibaabadi bamone na bibaadi bibafikile, 27 bena Yunda babaadi beyelele muiya abo banabene na bana babo na bantu boso babaadi bebungie kuabadi, bua kuikala abasangela aa mafuku abidi kushi kuleka na kutumikila bibaabadi bafunde pabitale aa mafuku mu mafuku atshibibue ku kipua kioso. 28 Babaadi na kia kutentekiesha ano mafuku na kukita misangelo mu kipungo kioso, kifuko kioso, provense oso na mu kibundi kioso; bena Yunda tababaadi balombene kuleka kukita misangelo mu ano mafuku a Purime, na bana babo tababaadi balombene kuleka kutentekiesha anka.

29 Akupu Ndalamumba Estere muana a Abihaile na Mordekayi muina Yunda babafubiishe matalua abaabadi nao bua kufunda mukanda wa kabidi bua kushinkamisha’shi musangelo wa Purime awikala aukitshika. 30 Mordekayi batumine mikanda ibaadi na bishima bia butaale na bia binyibinyi kui bena Yunda boso babaadi mu ma provense 127 abaadi Asueruse amunana, 31 bua kushinkamisha’shi abitungu banemekie mafuku a Purime mu mafuku atshibibue, nka bu bibaadi Mordekayi muina Yunda na Ndalamumba Estere bebatumine eyi bua kukita, na muyile muiya ubaabadi beyelele abo banabene na bana babo bua kunemeka mafuku a Purime, mpa na kuishidika na kuiyaya. 32 Na eyi dibaadi Estere mutume, dibaadi dishinkamishe ino mianda pabitale Purime, na abo nkuidifunda mu mukanda.

10 Nfumu Asueruse baadi akitshisha bantu ba muiumbo midimo pa bukopo mpa na bantu ba mu bisangi bia kalunga ka mema.

2 Mianda yoso ikata na ya bukome ibaadi mukite, na mianda yoso ayilesha bukata bua Mordekayi abaabadi bakaamishe muasu kui nfumu, ta ngifundibue mu mukanda wa mianda ya mu mafuku a ba nfumu ba Mede na ba Pelese su? 3 Muanda Mordekayi muina Yunda baadi mulondele Nfumu Asueruse. Baadi muntu mukata munkatshi mua bena Yunda na bakuabo boso babaadi abamunemeka, baadi mufube ngofu bua buwa bua bantu ba muilo wabo, na baadi akuila lutandua luabo loso buashi luikale mu butaale.