LOONO LUA SALOMONE
1 Loono* lukile buwa lua Salomone:
2 “Onfifie ku milomo na kukanua kobe,
muanda mishindo yobe ya kulesha kifulo, i buwa kukila nfinyo.
3 Mapembue a muimu oobe e buwa bukile.
Eshina diobe di’nka bu muimu wi mapembue wabadi bapongoole.
Nyi buakinyi ba nsonguakashi mbakufule.
4 Enda nami,* tusuukie lubilo.
Nfumu mmuntueshe mu tudimbo tuaye!
Tuikale na muloo na tusankie pamune.
Tutumbishe* mishindo yobe ya kulesha kifulo kukila nfinyo.
Ba nsonguakashi be na kabingilo ka kukufula.
5 Anue bana bakashi ba mu Yelusalema, ne fiita anka ne buwa,
Nka bu tushibo tua mapema tua mu Kedare, na bu tushibo
tua mapema tua Salomone.
6 Tanunshimikanga meso, muanda ne fiita,
Muanda kaanya nyi kanfiitshishe.
Bakuetu balume bekele banfiitshile munda;
Bantuula bu mulami a mafuba a nfinyo,
Anka diande efuba dia nfinyo, ntshi muidilame nya.
7 Obe ande a kifulo kikata bandanga kundungula,
Mbalo kinyi yokadishilaa lombe* lobe lua nyema,
Mu kaanya w’eyiladishaa mbalo kinyi?
Buakinyi ne kuikala bu mukashi
muipombeele kilamba* ku meso
Munkatshi mua kibumbu kia nyema ya bakuku bobe?”
8 “Obe mukashi mukile bakashi boso buwa, su t’oukanga,
Londa mu mikona ya lombe lua nyema.
Na odiishe bana ba mbushi yobe pepi na tushibo tua mapema tua balami.”
9 “Obe ande a kifulo, we’nka bu mpunda mukashi munkatshi mua
Matempu a Faraone.
10 Matama oobe ngalongame na bintu* biodi muialengieshe nabio,
Nshingo yobe ngilongame na mabue a mu nshingo.
11 Atukakukitshina bintu bia kuilengiesha nabio bia ôlo
Bilamikie kiamo kia arja.”
12 “Nsaa i nfumu mushaale ku mesa aaye a kishengu,
Malashi* ande aatusha mapembue.
13 Andi mufule e kuandi nka bu kafuko ka mire ke mapembue ebuwa,
Akalala bufuku bushima pankatshi pa mabeele ande.
14 Andi mufule e kuandi nka bu kisaasa kia bilongo bia enee
Munkatshi mua mafuba a nfinyo a Ene-gedi.”
15 “Obe ande a kifulo, we buwa biabia!
Oolo, we buwa biabia. Meso oobe e nka bu a nkudimba.”
16 “Obe ande a kifulo, we buwa biabia, na onsankisha.
Lusala luetu lui munkatshi mua mapupua a mitshi.
17 Mitandalo ya nshibo yetu ngia mitshi ya sedre,
Na makomba etu nga mitshi ya jenevriye.
2 “Nenka bu kilongo* kia mu mapia, ki ku bukunkula
bua kalunga ka mema. Kilongo kia lise kia mu mabanda.”
2 “Anka bu kilongo kia lise munkatshi mua milobo,
Nyi bi ande a kifulo munkatshi mua ba nsonguakashi.”
3 “Anka bu mutshi wa pome munkatshi mua mitshi
Ya mu mutamba, nyi bi ande a kifulo munkatshi mua ba nsongualume.
Ne na lukalo lukata lua kushala mu mutaala waye,
Na kikuba kiaye ki nsaasa mukanua muande.
4 Mmuntueshe mu nshibo* i na bia kudia bia musangelo,
Na kifulo kiaye kibaadi bu ebendela adipuku kunundu kua mutue wande.
5 Mpeyi bukome na mikate ya tukuba tua nfinyo;
Nyingisheyi na bikuba bia pome,
Muanda ne na maladi a kifulo.
6 Mboko yaye ibakashi i muushi mua mutue wande,
Na mboko yaye ibalume ayinganya kiipa.
7 Bana bakashi ba mu Yelusalema, nenutekie bua’shi nuitshipe,
Kui nkondoolo na kui ntengu ikashi ya mmapia’shi:
Tanutompanga kuibuesha sunga kubusha kifulo muandi mpa na p’akifikila.
8 Nkuete kupusha eyi dia ande a kifulo!
Talayi! Ngiawa kuete kufika,
Afu’akaminanga miengie ikata, etumbanga miengie ipeela.
9 Ande a kifulo enka bu lukondoolo, enka bu ntengu muana.
Biadi’bia, mmuimane kunyima kua mudimba wetu,
Atadila ku madidishi,
Eelobo ku miasa ya ku madidishi.
10 Ande a kifulo andungula’shi:
‘Ebuee, obe andi mufule,
Obe ande e buwa tuende pamune.
11 Tala! kipungo kia mpeshi kibapu kukila.
Mpeshi takianoko, bende.
12 Bilongo bibapu kutuka muiumbo,
Kipungo kia kulumbula mitshi ya nfinyo kibalombana,
Na loono lu’ekutshi alupushika muiumbo dietu.
13 Tukuba tua kumpala tua mutshi wa nfigiye tubamongo;
Mitshi ya nfinyo ibatusha bilongo na ayitusha mapembue.
Ebuee obe ande a kifulo.
Na ofikie obe ande e buwa tuende pamune.
14 Ayi baboo nkudimba ande! e mu bipoko bia lubuebue,
Mu ma mbalo afuame ngofu a lubuebue,
Kumiina namu nkumone na mpushe eyi diobe,
Muanda eyi diobe adinsankisha, na muenekielo oobe e buwa bukile.’”
15 “Etukuatshileyi mikiengie,
Tuana tua mikiengie tukuete kuluisha mafuba a nfinyo,
Muanda mafuba etu a nfinyo ngeele bilongo.”
16 “Ande a kifulo ngande, na ami ne aye.
Kuete kudishila mikooko yaye mu bilongo bia lise.
17 Mpa na apapuku kapapi ka muifuku bipeela bipeela
Na apashimina miesheshi. Alukiila bukidi, obe ande a kifulo,
Anka bu lukondoolo sunga bu ntengu muana pa miengie itutshibuule.*
3 “Bufuku boso bushima ku lusala luande,
Nakimbanga yawa andi mufule.
Ne mumukimbe, anka kushi kumumona.
2 Neebo nefunye mu kibundi;
Mu miseese na mu ma mbalo aebungilaa bantu be bungi,
Ntadiileyi nkimbe yawa andi mufule.
Ne mumukimbe, anka ntshi mumupete.
3 Balami abalamaa kibundi mbafumankane nami p’abefunyanga.
Ami nkuibepusha’shi: ‘Tanuibamone namu yawa andi mufule su?’
4 Nka’mi kiebakidi,
Napetele yawa ande a kifulo.
Namulameete kushi’mi kumuleka
Mpa na panamutuadile mu nshibo ya nyinami,
Mu kadimbo ka munda ka yawa bantandile.
5 Bana bakashi ba mu Yelusalema, nenutekie bua’shi nuitshipe,
Kui nkondoolo na kui ntengu ikashi ya mmapia’shi:
Tanutompanga kuibuesha sunga kubusha kifulo muandi mpa na p’akifikila.”
6 “A’kia kintu akikaamina akitukila dia ku kabaaka bu miishi nkinyi,
Ki mapembue bu mire na bu oliba,
Na bukula boso bua mapembue e buwa bua ba nsunga?”
7 “Nkipoyo kia Salomone.
Bana balume 60 be bukome mbekifunyishe,
Ba munkatshi mua bilobo bia mu Isalele,
8 Boso buabo be na mpete ya ngoshi,
Mbebalongieshe bia kulua ngoshi,
Oso a kuabadi e na lupete lua ngoshi mu kifuka
Bua kuikaluila ku masaku bufuku.”
9 “Nkipoyo kia bufumu kia Nfumu Salomone
Kiadi muikitshine aye nabene na mitshi ya ku Lebanone.
10 Mmukite mikoolo yakio na kiamo kia arja,
Kia kuemena mmuikikite na ôlo.
Kishalelo kiakio mmuikikite na bilamba bia lene
Munda muakio mbemulengieshe kalolo na kifulo
Kui ba nsonguakashi ba mu Yelusalema.”
11 “Anue ba nsonguakashi ba mu Siyona,
Tukayi nutale nfumu Salomone,
Mmufuale kifulu kia ntumbo* kia bulunda kibaadi nyinaye
Mumukitshine muifuku di’eyibakishi diaye,
Muifuku dibaadi eshimba diaye na muloo.”
4 “Obe ande a kifulo, we buwa biabia!
Oolo, we buwa biabia.
Meso oobe e nka bu a nkudimba mu kilamba kiodi muipute ku mutue.
Nyene yobe i nka bu kisaka kia mbushi
Akialala ku miengie ya Gileade.
2 Meeno oobe e nka bu lombe lua mikooko lubabakatuka mu kukuula buaa,
Babakatuka mu kuiyitumpa mema
Na yoso i na mpasa
Na takui su ngumune ushimishe muana nya.
3 Milomo yobe i nka bu moshi umonga pididi,
Na ngakuilo oobe e buwa bukile.
Matama oobe e nka bu kipese kia kikuba kia grenade
Mu kilamba kiodi muipute ku mutue.
4 Nshingo yobe i nka bu kitenta kia Davide,
Kibakiibue na milongo ya mabue
Kuabadi bapudikie ngabo kinunu,
Ngabo yoso ya bilobo i bishengu.
5 Mabeele oobe abidi enka bu tuana tubidi tua ntengu,
Mpasa ya lukondoolo,
Ayidila munkatshi mua bilongo bia lise.”
6 “Mpa na apapuku kapapi ka muifuku bipeela bipeela,
Na apashimina miesheshi, nakamina ku muengie wa mire
Na ku muengie upela wa oliba.”
7 “Obe ande a kifulo we buwa biabia obe oso mushima,
Tue na kalema su nkapela nya.
8 Obe ande andi mufule fika tukatukie ku Lebanone,
Oolo, fika tukatukie ku Lebanone.
Tuikie ku nsongo ya muengie wa Amana,
Kukatukila ku nsongo ya muengie wa Senire, ku muengie wa Hermone,
Ku ma mbalo aafuaminaa ntambue, na ku miengie ya ngie.
9 Obe ande a kifulo, obe mukuetu mukashi, bonkupisha eshimba,
Penda pobontala musango umune,
Na penda ebue dimune dia ku mabue oobe a mu nshingo.
10 Mukuetu mukashi, obe ande a kifulo, mishindo yobe ya kulesha kifulo i buwa bukile!
Mishindo yobe ya kulesha kifulo ibuwa kukila nfinyo,
Na mapembue a malashi oobe e buwa kukila bintu bioso bia mapembue!
11 Obe ande a kifulo, ku milomo yobe akunoko buuki.
Buuki na mabeele bi muushi mu’edimi diobe,
Na mapembue a bilamba biobe e nka bu mapembue a ku Lebanone.
12 Mukuetu mukashi, yawa ande a kifulo, e nka bu lupango lukangie,
Oolo, lupango lukangie, nsulo yele kitampi.
13 Ntabi* yobe nyi mpaladiso* a mitshi ya grenade
I na bikuba bi buwa bukile, na tu mitshi tua enee, mpa na tu mitshi tua nare,
14 Nare na safrone, elengie di mapembue* na kanele,
Na mitshi ya bipaso bioso ayitushaa oliba, mire na alowe,
Pamune na malashi oso akile buwa.
15 We nsulo ya mema mu lupango, kitonko* kia mema ataale
Na tu misulo atualala kukatukila ku Lebanone.
16 Buuka, obe lupapi lua kunundu;
Fika, obe lupapi lua kuushi.
Puka kapeela kapeela mu lupango luande.
Bua’shi mapembue aalo apalakane.”
“Oolo, yawa ande a kifulo atuele mu lupango luaye
Na adie bikuba bikile buwa.”
5 “Nemutuele mu lupango luande,
Oolo mukuetu mukashi, ande a kifulo.
Ami nkuabila mire ande na bintu biande bia mapembue.
Ami nkudia bisa biande bia buuki na kulamba buuki;
Nemutome nfinyo yande na mabeele ande.”
“Diayi ba kuuku bande!
Tomayi na nukolue mishindo ya kulesha kifulo!”
2 “Ne mulaale, ank’eshimba diande ndipasukie.
Napusha yawa andi mufule kuakookola ku kiibi.” Amba’shi:
“Nshituile, oh! mukuetu mukashi, ande a kifulo,
Nkudimba ande, obe ande shi na kalema!
Muanda mutue wande ngutope na makopola a lume,
Nyene yande ngiifungie na lume lua bufuku.”
3 “‘Napu kufuula nkandio ande.
Abitungu mmufuale dingi?
Napu kutumpa ngua yande.
Abitungu neyifiitshishe dingi?’
4 Yawa andi mufule bakatusha eyasa diaye ku muasa wa kiibi,
Eshimba diande dibabanga kuikalakasha bua kumumona.
5 Nabuukile bua kushituila yawa andi mufule;
Maasa ande abaadi aanoko mire,
Na minue yande ibaadi ayinokiesha muimu wa mire,
Ku bikuatshilo bia kalee ka kiibi.
6 Nadi mushituile yawa andi mufule,
Anka andi mufule tekalanga dingi panka, tabaadi mupue kuenda.
Binangu bibaadi bimpalakane* panasangene’shi mmupue kuenda.
Namukimbile, anka ntshi namupetele nya.
Namuitanyine, anka tamungaluule.
7 Balami ba kibundi babaadi abefunyu abaadi bafumankane nami.
Abankupile, abo nkuntapa.
Balami ba bimano babanyengiele kilamba kiande kia kuiputa ku mutue.
8 Bana bakashi ba mu Yelusalema, nenutekie bua’shi nuitshipe’shi:
Su nubamono yawa andi mufule,
Numulungule’shi ne na maladi a kifulo.”
9 “Yawa odi mufule mmukile bangi balume ku kinyi,
Obe e buwa kukila bakashi boso?
Banda kuitulungula, yawa odi mufule mmukile bangi ku kinyi,
Bua’shi w’etueleshe mutshipo wi biabia?”
10 “Ande a kifulo kuete kupenyapenya na mmumongolokie;
Be kumutundula munkatshi mua balume binunu ekumi.
11 Mutue waye ngua ôlo, ôlo mukile buwa.
Nyene yaye iifungie inka bu malala aepuku,
Ngifiite nka bu kionyi ki’eganga.
12 Meso aye enka bu nkudimba i ku tu misulo tua mema,
Ayitumpu mu mabeele,
Ishale kuishiba dia mema diuule.
13 Matama aye enka bu bibunda bia mitshi ya mapembue,
Mbunda i na bintu bia mapembue.
Milomo yaye mbilongo bia lise, ayinoko muimu wa mire.
14 Maasa aye mbikano bia ôlo, bilengieshue na mabue a krizolite.
Efu diaye di bu mubanga wa ngiefu useneshue, ubuikilue na mabue a safire.
15 Mikolo yaye, mmisungu ya marbre ishimikue
pa bishalelo bia ôlo mukile buwa.
Mmuenekielo aye ebuwa nka bu ku Lebanone, e bula nka bu mitshi ya sedre.
16 Mukanua muaye mui nsaasa,
Na biaye bioso bi buwa ngofu.
Anue bana bakashi ba mu Yelusalema, bino nyi bi yawa andi mufule
Oolo, yawa ande a kifulo.”
6 “Obe mukile bakashi boso buwa,
A yawa odi mufule bende kunyi?
Yawa odi mufule batadiila eshinda kinyi?
Tumukimbe boso pamune nobe.”
2 “Ande a kifulo aalalanga mu lupango luaye,
Ku bibunda bia mitshi ya mapembue,
Mu kudiisha nyema yaye mu mafuba
Na kuabila bilongo bia lise.
3 Ami ne a yawa andi mufule,
Na yawa andi mufule ngande.
Kuete kudishila mikooko yaye munkatshi mua bilongo bia lise.”
4 “Obe ande a kifulo we buwa nka bu Tirza,*
Na we mulongame nka bu Yelusalema,
Okanyisha nka bu bisaka bia basalayi biifunyishe mabendela abio.
5 Kumba meso oobe kuandi,
Muanda p’ontala, binangu abimpalakana.
Nyene yobe i nka bu kisaka kia mbushi
Akialala mu ngalala ya muengie wa Gileade.
6 Meeno oobe e nka bu lombe lua mikooko
Ibabakatuka mu kutumpa mema,
Yoso i na mpasa,
Na takui su ngumune ushimishe muana nya.
7 Matama oobe e nka bu kipese kia kikuba kia grenade
Mu kilamba kiodi muipute ku mutue.
8 Kui kuikala ba ndalamumba 60,
Na makupi 80,
Na ba nsonguakashi bakile bungi.
9 Kadi kuinka penda umune muikale nkudimba ande, ande shi na kalema.
Nyi muan’eleka kui nyinaye.
Mbamufule ngofu kui yawa bamutandile.
Ba nsonguakashi abamutala, abamuamba bu sha muabi;
Ba ndalamumba na makupi, abamusamuna.
10 ‘Awaa muana mukashi apenyapenya bu ku nkielo nnanyi,
E buwa bu mueshi wi kifunda,
Apenyapenya bu etaata dia nguba,
Akaanyisha bu bisaka bia basalayi biifunyishe mabendela abio?’”
11 “Nekalanga mualale kuifuba dia mitshi ya bikuba abitushaa mmundi
Bua kumona mitshi imene muibanda,
Bua kumona su mulundo wa tukuba tua nfinyo ngutushe ntonga,
Na su mutshi wa grenade ubatusha bilongo.
12 Kumpala kua’shi nebitundule,
Lukalo luande lubantuadile mpa na ku matempu a bantu ba kineemo.”
13 “Alukiila, alukiila, obe muina Shulame!
Alukiila, alukiila,
Bua’shi tukubandile!”
“Buakinyi anubandila muina Shulame?”
“Muanda e bu maasha a bisaka bibidi!”*
7 “Nyi bi ngua yobe buwa bino mu sandale yobe,
Obe muana mukashi mukile kineemo!
Bifunda bia kifuka kiobe bi bu mabue a muulo,
Nka bu mudimo wa ku maasa kua nsendue.
2 Musuku oobe wi bu elonga di kishengu.
Nfinyo yabadi basobe ta ngilombene kuimukutshikua.
Efu diobe dinka bu mututo wa blé,
Ndiifunyishue na bilongo bia lise.
3 Mabeele oobe abidi e nka bu tuana tubidi tua ntengu,
Mpasa ya lukondoolo.
4 Nshingo yobe i nka bu kitenta kia mibanga.
Meso oobe e nka bu mashiba a mema a ku Eshebone,
Pepi na kiibi kia Bate-rabime.
Mpembe yobe i nka bu kitenta kia Lebanone,
Kitadile ku Damase.
5 Mutue oobe aukupa ntumbo nka bu muengie wa Karmele,
Nyene yobe iifungie i nka bu lene mumongolokie.
Eshimba dia nfumu ndikakibue na nyene yobe yembeele.
6 Obe ande a kifulo, nyi biodi buwa biabia! onsankisha biabia
Kukila bintu bioso abinsankishaa.
7 We bula nka bu ebo,
Na mabeele oobe namu e nka bu bisaasa bia tukuba tua date.
8 Nambile’shi, ‘nakamina kuibo
Bua’shi nkuate biaashi biadio.’
Mabeele oobe ekale nka bu bisaasa bia tukuba tua nfinyo,
Muwa oobe wi mapembue ebuwa nka bu bikuba bia pome,
9 Na mukanua* mobe muinka bu nfinyo mukile buwa.”
“Alaala mu mudibu mua yawa andi mufule,
Bu nfinyo ayipongoloka bipeela bipeela ku milomo ya baba balaale.
10 Ami ne a yawa andi mufule,
Na lukalo luaye lui kuandi.
11 Obe ande a kifulo, fika,
Tuende mu mapia;
Tushale mu mitshi ya enee.
12 Tubuukie pa kafito tuende mu mafuba a nfinyo
Tukatale su milundo ya nfinyo ibatusha ntonga
Na su bilongo bibafunguluka,
Na su mitshi ya grenade ibeele bilongo.
Kuakua nakakulesha biandi mukufule.
13 Bikuba bia mandrangore abipalakasha mapembue aabio;
Na ku biibi bietu kui bikuba bia mishindo yoso.
Bipia mpa na bia kala,
Nadi mukulamine bianka obe andi mufule.
8 “Su bodia kuikala bu mukuetu mulume baboo!
Yawa baadi moomue ku mabeele a nyinami!
Na su nakusangana paasha, nadia nkufifia ku milomo,
Na muntu su ngumune tabadia kunsabuula.
2 Nadia nkukunkusha;
Nakutuala mu nshibo ya nyinami, aye bandongieshe.
Nadia nkupa nfinyo musangie na bintu
bia mapembue ebuwa bodia kutoma,
Mema e nsaasa a bikuba bia grenade.
3 Mboko yaye ibakashi ibadia kuikala muushi mua mutue wande,
Na mboko yaye ibalume ibadia kunganya kiipa.
4 Bana bakashi ba mu Yelusalema, nenutekie bua’shi nuitshipe:
Tanutompanga kuibuesha sunga kubusha kifulo muandi mpa na p’akifikila.”
5 “A uno muana mukashi akamiina ku kabaaka nnanyi
Muyeme kui yawa adi mufule?”
“Nakubusha mushi mua mitshi ya pome.
Muamua nyi mubaadi nyinobe mukiengie na munda mua kukutanda.
Muamua nyi mubakutandiile nyinobe
6 Ntule bu kitampi muishimba diobe,
Na bu kitampi ku mboko yobe,
Muanda kifulo ki na bukome nka bu lufu,
Na lukalo lui nalo muntu lua kulamata nka penda
yawa adi mufule lui bukome nka bu mashama.*
Na ndimi ya kaalo ka kifulo, ayitembe bu kaalo ke bukopo,
Ndimi ya kaalo ka Yah.*
7 Sunga mema e mpumo i bukopo ta ngalombene kushima kaalo ka kifulo,
Sunga miela ta ngilombene kuikialasha.
Su muntu atusha bupeta boso bua mu nshibo yaye pa muanda wa kifulo,
Be kuibusabuula ngofu.”
8 “Tui na muin’etu mukashi
Shabandile kumena mabeele.
Atukakitshi kinyi bua muin’etu mukashi
Efuku di’abakamuele eyi bua kumuibakila?”
9 “Su e bu kimano,
Atukebaka kimano kia kiamo kia arja kunundu kua mutue waye,
Kadi su e bu kiibi,
Atukekishiki n’ebaya dia mutshi wa sedre.”
10 “Ne kimano,
Na mabeele ande e nka bu bitenta.
Biabia mmulombene kumona’shi
Ne na butaale.
11 Salomone baadi n’efuba dia nfinyo mu Baale-amone.
Bedipeele ba kidime bua kuidilama.
Kidime oso baadi atusha arja kinunu bua bikuba bibaadi emukuula.
12 Ne na efuba diande’mi nabene.
Obe Salomone, arja kinunu ngiobe,
Na arja nkama ibidi ngia baba abalama bikuba bia mu diadia efuba.”
13 “Obe mushale mu mafuba,
Ba kuuku abateemeshaa eyi diobe.
Kumiina namu nediteemeshe.”
14 “Obe ande a kifulo, fika bukidi,
Na okundukie lubilo bu lukondoolo
Sunga bu muana a ntengu kunundu kua miengie ya bintu bia mapembue.”
Sunga “loono lua ku ngono.”
Kish ku kish. “nkakie.”
Sunga “tuakule pabitale.”
Sunga “kisaka kia nyema.”
Sunga “kilamba kia maalo.”
Sunga pangi “munkatshi mua nyeene yanye.”
Kish ku kish. “malashi a nare.”
Kish ku kish. “Safran.”
Kish ku kish. “nshibo ya nfinyo.”
Sunga pangi “miengie i na mitenta.” sunga miengie ya “betere.”
Sunga “kifulu kia bilongo.”
Sunga pangi “kikoba.”
Sunga “lupango.”
Kish ku kish. “Kane.”
sunga “mushima.”
Sunga pangi “kikudi kibaadi kintupikie.”
Sunga “Kibundi ki buwa.”
Sunga “masha a manayine.”
Kish ku kish. “Kilakalaka.”
Sunga “Hadese.” Kuamba’shi mashaama a bantu boso. Tala Kipatuluilo kia bishima.
Nyi mushindo wa kufunda eshina dia Yehowa mu kitshibo.