MUKANDA WA KUMPALA KUI BENA KODINDA

1 Ami Mpoolo muitaminyibue bua kuikala mutumibua a Nkidishitu Yesu ku kikiebe ki’eshimba di’Efile Mukulu, pamune na mukuetu Sostene, 2 kui kakongie k’Efile Mukulu ke mu Kodinda, kuanudi anue babadi bekashe beselele mu buumune na Nkidishitu Yesu, betaminyibue bua kuikala beselele, pamune na bantu ba ma mbalo oso abetanyina eshina dia Nfumuetu Yesu Nkidishitu, muikale Nfumuabo na Nfumuetu namu:

3 Kalolo na butaale abifiki kui Efile Mukulu Nshetu na kui Yesu Nkidishitu Nfumuetu, bikale nenu.

4 Nkuete kutumbula Efile Mukulu ande misango yoso pa muanda wenu, bua kalolo kaye kadi muinupe mui Nkidishitu Yesu; 5 muanda mu buumune naye, Efile Mukulu mmuinuikashe ba mpeta mu bintu bioso, muinupe kapatupatu ke bungi ka kuakula na kiukilo ki bungi, 6 nka bu bikale bukamonyi pabitale Nkidishitu mbunyingie munkatshi muenu, 7 bua’shi tanukutuanga kia buntu su nkimune panukuete kutengiela na mashimba kuiyilu kumueka* kua Nfumuetu Yesu Nkidishitu. 8 Akenunyingisha dingi mpa na ku nfudiilo bua’shi tabenutopekanga bua muanda su ngumune, muifuku dia Nfumuetu Yesu Nkidishitu. 9 Efile Mukulu baadi muinuitanyine bua kuikala mu buumune na Muan’aye Yesu Nkidishitu Nfumuetu e na lulamato.

10 Binobino bakuetu, nenusendeela muishina dia Nfumuetu Yesu Nkidishitu’shi, anue boso nuikale anuakula mu kuipushena na takuikalanga kuitshibuula munkatshi muenu, anka nuikale binyibinyi mu buumune na binangu bimune na mueneno umune. 11 Muanda bakuetu, bangi bantu ba mu nshibo mua Klowe mbandungule’shi, kui kuitshibuula munkatshi muenu. 12 Nakimbi kuamba bino, anuamba’shi: “Ami ne a Mpoolo,” kadi ungi namu’shi: “Ami ne a Apolose,” ungi’shi: “Ne a Kefase,”* kadi ungi namu’shi: “Ne a Nkidishitu.” 13 Nkidishitu muiabuule su? Mpoolo baadi mukookolue ku mutshi pa muanda wenu? Nubaadi babatshishibue muishina dia Mpoolo su? 14 Natumbula Efile Mukulu bu bianshi mubatshishe muntu su ngumune a munkatshi muenu, kukaasha penda Krispuse na Gayuse, 15 buashi tala muntu su ngumune amba’shi nubaadi babatshishibue muishina diande. 16 Eyendo, naadi mubatshishe dingi ba mu nshibo mua Stefana. Kadi bua bangi babashala, tanguku su nemubatshishe ungi muntu. 17 Muanda Nkidishitu muntume kushi bua kubatshisha, kadi bua kulungula mukandu wibuwa; kushi na ngakuilo a ba sha binangu bua’shi mutshi wa makienga wa Nkidishitu, taufikanga bu kintu kia bisumanga.

18 Muanda mukandu pabitale mutshi wa makienga, nyi nkulotakana kui baaba abakabutudibua, anka kuatudi’tue abakapashibua, nyi bukome bu’Efile Mukulu. 19 Muanda mbifundibue’shi: “Nakashimisha binangu bia ba sha binangu, na nakasumbushena kapatupatu ka baaba bapatulukie.” 20 A muntu sha binangu e kunyi? A mufundi* e kuikunyi? Sha mpaka a mu uno ndumbuluilo e kuikunyi? Efile Mukulu ta muikashe binangu bia pa nsenga bu kulotakana su? 21 Muanda muyile binangu bi’Efile Mukulu, ba pa nsenga ta mbafikie mu kuuka Efile Mukulu muyile binangu biabo, Efile Mukulu baadi na muloo wa kupaasha baaba abakumiina, kukiila ku kulotakana kua kiakia ki’abalambukisha.

22 Muanda bena Yunda abatekie bitunduilo na bena Greke abakimbi binangu; 23 anka atue, atulungula pabitale Nkidishitu baadi muipayibue ku mutshi, kui bena Yunda nyi mmuanda wa kikokoshi kadi kui ingi miilo nyi mmuanda wa kulotakana. 24 Anka, kui baaba betaminyibue, bena Yunda sunga bena Greke, Nkidishitu mbukome bu’Efile Mukulu na binangu bi’Efile Mukulu. 25 Muanda kintu kilotakane ki’Efile Mukulu, ki na binangu kukila bantu, na kintu kibofule ki’Efile Mukulu, ki bukome kukila bantu.

26 Muanda bakuetu, nukuete kumona’shi muyile kuitaminyibua kuenu, takui ba sha binangu be bungi muyile mueneno a bantu,* takui ba sha bukome be bungi sunga bantu be bungi ba mu bifuko bia bantu bakata,* 27 kadi Efile Mukulu mmusangule bintu bilotakane bia pa nsenga bua kukuatshisha ba sha binangu buufu; n’Efile Mukulu mmusangule bintu bibofule bia pa nsenga bua kukuatshisha bintu bi bukome buufu; 28 na Efile Mukulu mmusangule bintu bishi na muulo bia pa nsenga na bintu bi’ababepuula, bintu bishi kuanka bua kufuisha bintu bi kuanka bu bia bisumanga, 29 bua’shi muntu su ngumune t’etumbishanga ku meso ku’Efile Mukulu. 30 Anka nku bukuashi buaye kuanudi mu buumune na Nkidishitu Yesu, mufikie kuatudi bu binangu abifiki kui Efile Mukulu, dingi bululame, buiselele, na kupoososhibua ku bukuashi bua nkuulo, 31 bua’shi bikale nka bu biabidi bifundibue’shi: “Yawa etumbisha, etumbiishe mui Yehowa.”

2 Nyi buakinyi bakuetu, panafikile kuanudi bua kuinulungula mianda ifuame ya kishila y’Efile Mukulu, ntshi mufikie na ngakuilo a kapatupatu sunga na binangu bia kuinukitshisha pa bukopo nya. 2 Muanda naadi muate kitshibilo kia kupela kuuka kintu su nkimune munkatshi muenu, kukaasha penda Yesu Nkidishitu, aye abaabadi bayipee ku mutshi. 3 Na nafikile kuanudi na kubofula na kutshina na kusuusa kui bungi; 4 na bishima biande na bulungudi buande, ta bibaadi na mayi a binangu a kuinukuminyisha mianda, anka bibadi kushinkamisha kua kikudi na bukome bu’Efile Mukulu, 5 bua’shi lukumiino luenu taluikalanga luimeene mu binangu bia bantu, kadi luikale luimeene mu bukome bu’Efile Mukulu.

6 Binobino atuisambila bua binangu munkatshi mua baaba banyingie mu kikudi, kushi binangu bia uno ndumbuluilo a mianda, sunga bia bakunkushi ba uno ndumbuluilo a mianda, bash’abakekala dingi kuanka. 7 Anka atuisambila bua binangu bi’Efile Mukulu mu mianda ifuame ya kishila, binangu bifuame bibaadi Efile Mukulu mubadiile kulumbuula kumpala kua ndumbuluilo a mianda, bua ntumbo yetu. 8 Bino binangu takui mukunkushi a uno ndumbuluilo su ngumune ebiuuku, muanda su babaadi abebiuuku, ta babadia kuipaa* Nfumu sha ntumbo. 9 Kadi nka bu biabidi bifundibue’shi: “Eyiso ta dibaadi dimone, etui ta dibaadi dipushe, na mianda ibaadi Efile Mukulu mulumbuule bua baaba bamufule, tayibaadi ituele muishimba dia muntu.” 10 Muanda kuatudi, nyi kubaadi Efile Mukulu muiyifumbule ku bukuashi bua kikudi kiaye, muanda kikudi akikimbulaa mu mianda yoso, mpa na mu mianda ifuame y’Efile Mukulu.

11 Muanda, nnanyi munkatshi mua bantu auku mianda ya muntu kukaasha penda kikudi kia muntu ki muadi? Biabia, takui muntu su ngumune namu auku mianda y’Efile Mukulu kukaasha penda kikudi ki’Efile Mukulu. 12 Kadi atue, ta tuibapete kikudi kia pa nsenga, anka tui bapete kikudi akifiki kui Efile Mukulu, bua’shi tuukie mianda yabadi betupe kui Efile Mukulu na kalolo kooso. 13 Dingi atuakula ino mianda, kushi na bishima bilongieshibue na binangu bia bantu, kadi na bishima bilongieshibue na kikudi, mu uno mushindo, atupatuula mianda ya mu kikudi na bishima bia mu kikudi.

14 Anka muntu a ku mbidi t’akuminaa mianda ya kikudi ki’Efile Mukulu, muanda kuadi, inka bu kulotakana; na ta mulombene kuiyuka, muanda abeyitalulaa mu kikudi. 15 Kadi muntu a mu kikudi atalulaa mianda yoso, anka aye nabene tabamutalulaa kui muntu su ngumune. 16 Muanda “nnanyi mufikie mu kuuka binangu bia Yehowa buadia kumulongiesha?” Anka atue, tui na binangu bia Nkidishitu.

3 Biabia bakuetu, ntshi mobeshe kuakula nenu bu akula na bantu ba mu kikudi, kadi ne bu akula na bantu ba ku mbidi, bu bana bakinga mu Nkidishitu. 2 Nenupeele mabeele, kushi bidibua bi bukopo, muanda tanubaadi bakambe kunyinga. Sunga mbiabia, tanuabandile kukamba kunyinga mpa na binobino, 3 muanda nuki’nka bantu ba ku mbidi. Bu bikale mukao na kuikakena munkatshi muenu, bino t’abilesha’shi nui’nka ku mbidi, na nukuete kukita mianda nka bu abikitaa bantu ba pa nsenga su? 4 Muanda pe muntu amba’shi: “Ami ne a Mpoolo,” ungi namu’shi “Ami ne a Apolose,” ta nukuete kukita mianda nka bu bantu ba pa nsenga su?

5 Biabia, a Apolose nnanyi? A Mpoolo nnanyi? Mbafubi benukuashe bua kufika bena kukumiina, muyile bibaadi Muanana mukuashe oso a kuabadi bua kufika muina kukumiina. 6 Ami nakunyine, Apolose bamiamine mema, anka Efile Mukulu nyi baadi atungunuka na kukusha, 7 biabia, e na muulo ta nguno akunu, sunga yawa amiamina mema, anka nyi Efile Mukulu kuete kukusha. 8 Sunga biekala’shi yawa akunu na yawa amiamina mema be kintu kimune*, muntu oso akapete efuto muyile mufubo* waye. 9 Muanda tukuete kufuba pamune n’Efile Mukulu. Nui efuba di’Efile Mukulu dikuete kudimibua, luibako lu’Efile Mukulu.

10 Muyile buntu bu’Efile Mukulu bubaadi mumpe, nemushimikie kitako bu muibaki sha binangu, kadi ungi namu kuete kuibaka kunundu kuakio. Anka muntu oso adimukie pabitale mushindo wayibaka kuanka. 11 Muanda takui ungi muntu mulombene kushimika kingi kitako, kukaasha kiakia kibaadi kishimikue, kikale Yesu Nkidishitu. 12 Biabia, su muntu ayibaka pa kino kitako na ôlo, na kiamo ki’ebakanyi, na mabue a muulo wi bukopo, na mabaya, na lubishi na nsonyi, 13 mufubo wa muntu oso aukamueneka patooka biaudi, muanda efuku adikeulesha, aukaleshibua ku bukuashi bua kaalo, muanda kaalo akakalesha bikale mufubo wa muntu na muntu. 14 Su mufubo wa muntu wadi muibakie panka ubashala, akapete efuto; 15 su mufubo wa muntu ubapi kaalo, ashimisha, kadi aye nabene akapashibua; sunga mbiabia, abikekala nka bu bapashibua mu kaalo.

16 Tanuuku’shi nui ntempelo a Efile Mukulu na’shi kikudi ki’Efile Mukulu ki muanudi? 17 Su muntu abutula ntempelo a Efile Mukulu, Efile Mukulu akamubutula; muanda ntempelo a Efile Mukulu nga kishila, na yawa ntempelo, nnanue.

18 Muntu su ngumune t’edimbanga: Su muntu anangushena’shi e na binangu mu uno ndumbuluilo, ekale mubulakane, bua’shi ekale na binangu. 19 Muanda binangu bia mu uno ndumbuluilo, nyi kulotakana ku meso ku’Efile Mukulu, muanda mbifundibue’shi: “Akuataa ba sha binangu ku mayele aabo e bubi.” 20 na dingi: “Yehowa auku’shi ngielelo a binangu a ba sha binangu, te na muulo.” 21 Biabia muntu su ngumune t’etumbishanga mui bantu, muanda bintu bioso mbienu, 22 biabikala Mpoolo sunga Apolose, sunga Kefase* sunga bia pano,* sunga muwa sunga lufu, sunga bintu bia binobino sunga bintu abikafiki, bintu bioso mbienu; 23 anka anue namu nui ba Nkidishitu; Nkidishitu namu ng’Efile Mukulu.

4 Abitungu betumone bu bafubi ba Nkidishitu na bu balami ba mianda ifuame ya kishila y’Efile Mukulu. 2 Biabia, kiabatengiela kui balami mbua’shi bebapete na lulamato. 3 Buande’mi namono’shi ta bii na muulo wa’shi nunsambishe, sunga’shi bansambishe kui ba nsushi.* Mu binyibinyi, ntshi kuete sunga ami nabene kuitshibila kiimu. 4 Muanda buande’mi, ntanetopeka bua muanda su ngumune. Anka, bino t’abilesha’shi ne mululame; muanda Yehowa nyi kuete kuntshibila kiimu. 5 Biabia, tanusambishanga muanda su ngumune kumpala kua nsaa ilombane, mpa na apafiki Muanana. Akatuusha mianda ifuame ya mmufito patooka, na akafumbula mianda i mu mashimba, na paapa muntu oso akapete ntumbo yaye kui Efile Mukulu.

6 Binobino bakuetu, ino mianda nemuiyakule bua’shi ami na Apolose tuikale bu kileshesho bua buwa buenu, bua’shi ku bukuashi buetu, nutumikile dino eyi dia kulonda adiamba’shi: “Tanuendanga kula na mianda ifundibue,” bua’shi tanuikalanga baule na kuitatula, pa kutumbisha ungi muntu na kupeesha ungi. 7 Muanda, nnanyi akuikasha bu muilekene na ungi muntu? Dingi, nkinyi kiodi nakio kiabashi bakupe? Biabia, su mbakupe kianka, buakinyi okuete kuitumbisha nka bu’shi ta mbakupe kianka?

8 Nuibapue kuikuta su? Tanudi ba mpeta? Tanubangile kukunkusha kushi’tue kuikala kuanka su? Nakuminanga’shi nubangie kukunkusha, bua’shi tumone bia kukunkusha nenu bu ba nfumu. 9 Muanda abimueka’shi Efile Mukulu mmuitutule patooka bu batumibua ku nfudiilo, buatudia kutshibilua kibawe kia lufu, muanda tui bafikie bu kintu kia kubandila kui ba pa nsenga, kui mikeyilu na kui bantu. 10 Tui balotakane pa muanda wa Nkidishitu; kadi anue nui na binangu mu Nkidishitu; tui babofule, anka anue nuibanyingie; anue nuibanemekibue, anka atue tuibayishibue milongo. 11 Mpa na binobino, tukuete kutungunuka na kukienga na nsala na nyota, tui na bulanda bua bilamba,* tukuete kukupidibua, na tui bakutue mashibo a kushala 12 na atufumbakana pa kufuba na maasa etu. P’abetukaa, atuibelela miabi; p’abetukiengiesha, atunyingiila na luishinko loso; 13 p’abetudimbila mianda, atue atuibalula na kalolo koso; tuibafikie bu bintu bia butshiafu bia pa nsenga, butshiafu bua ku bintu bioso.

14 Nenufundila ino mianda kushi bua kuinukuatshisha buufu, anka bua kuinudimusha bu bana bande ba kifulo. 15 Muanda sunga biekala’shi nui kuikala na balami 10 000 mu Nkidishitu, tanui na ba nshenu be bungi; muanda nemufikie nshenu mu Nkidishitu ku bukuashi bua mukandu wibuwa. 16 Biabia, nenunyingisha buanudia kungambula. 17 Nyi buakinyi nenutumina Timote, muanda nyi muan’ande a kifulo na lulamato mu Muanana. Akenutentekiesha mishindo yande ya kukita mianda mu mudimo wa Nkidishitu Yesu, nka bu biankuete kulongiesha mu ma mbalo oso, mu tukongie toso.

18 Bangi abaadi baule na kuitatula pa kupuandikisha’shi, tanfiki dingi kuanudi. 19 Anka su Yehowa akumiina, nafiki kuanudi binobino, na nakauku, kushi penda ngakuilo a baaba baule na kuitatula, kadi mpa na bukome buabo. 20 Muanda Bufumu bu’Efile Mukulu ta muanda utale ngakuilo, anka nyi muanda utale bukome abufiki kui Efile Mukulu. 21 Biabia, nkinyi kianukumina? Nfikie kuanudi na lufimbo, su nfikie na kifulo na kikudi kia butaale?

5 Tukuete kupusha abakula bua lukiebanokiebano* mukantshi muenu, na lualua lukiebanokiebano* ta lui sunga munkatshi mua bantu ba ingi miilo—abamba’shi kui muntu atambuka na mukashi a nshaye. 2 Na anuitumbisha bua uno muanda? Tanubadia kuikala mu maalo, bua’shi muntu mukite uno muanda akatushibue munkatshi muenu su? 3 Sunga bianshi nenu ku mbidi, ne nenu mu kikudi na nemupue kusambisha muntu mukite wawa muanda nkabu’shi nekele nenu. 4 Panudi bebungie pamune muishina dia Nfumuetu Yesu, na pakuuka’shi ne nenu mu kikudi pamune na bukome bua Nfumuetu Yesu, 5 abitungu nuele yawa muntu mu maasa mua Satana bua kufua ku mbidi, bua’shi kikudi kikale kia kupaashibua muifuku dia Muanana.

6 Kuitumbisha kuenu takui buwa. Tanuuku’shi ndambo ipeela ya kitatusho* ayitatushaa musabu oso? 7 Katushayi kitatusho kia kala buashi nuikale bu musabu upia, muanda tanui na kitatusho. Bu bikale’shi Nkidishitu muan’etu a mukooko a Pasaka mupue kutushibua bu mulambu. 8 Biabia, tatuikalanga atukitshi musangelo na kitatusho kia kala, sunga na kitatusho kia mianda ibubi na ya buntomboshi, anka tuiukiteyi na mikate ya bululame na binyibinyi.

9 Mu mukanda wande, nemuinufundile bua kupela kuikala mu bukuuku* na bantu ba sha lukiebanokiebano, 10 ta mbantu ba sha lukiebanokiebano boso ba pano pa nsenga sunga ba sha luabi sunga ba ngifi, sunga balanguidi ba ma nkishi. Muanda su bibadia kuikala biabia, nubadia kukatuka pano pa nsenga. 11 Kadi binobino, nenufundila bua kupela kuikala mu kipuano na muntu oso etaminyibua bu mukuetu, muikale ntambushi a lusandi sunga muntu e na luabi, alanguila ma nkishi, akayishenaa, akolua maalua sunga ngifi, na tanudianga sunga na yawa muntu. 12 Kusambisha kua be paasha pa kakongie nkuntale ku kinyi? Anue tanukuete kusambisha baaba be munda mua kakongie, 13 p’Efile Mukulu kuete kusambisha baaba be paasha? “Katushayi yawa muntu e bubi munkatshi muenu.”

6 Su muntu a kuanudi e na muanda na muinaye, ende nao ku tumiladi, pamutue pa kuenda nao kui beselele? 2 T’anuuku’shi beselele abakatshibila ba pa nsenga kiimu? Su anue nyi abakatshibila ba pa nsenga kiimu, tanui na mushindo wa kupudisha tu mianda tupeela su? 3 T’anuuku’shi atukatshibila mikeyilu kiimu? Biabia buakinyi tatui balombene kuibikita bua mianda ya mu uno nshalelo? 4 Biabia, su nui na muanda wa mu uno nshalelo autungu kusambisha, buakinyi nui kuata bantu bababepuula kui kakongie buabadia kuikala bu ba nsushi benu? 5 Nakula bua kuinukuatshisha buufu. Munkatshi muenu, ta mui muntu su ngumune e na kinangu mulombene kusambisha bakuabo su? 6 Pamutue pa biabia, ungi mukuetu akafundu ungi ku tumiladi, kumpala kua bantu bashi bena kukumiina!

7 Biabia, nui bapue kuikala mu kilema panuifundena munkatshi muenu. Buakinyi kupela kukumiina bua’shi benuluishishe? Buakinyi kupela kukumiina’shi benunyenga bintu? 8 Kadi pamutue pa biabia, nnanue bakuete kuluishisha bakuenu, na kuibanyenga bintu!

9 T’anuuku’shi bantu bashi balulame t’abakapiana Bufumu bu’Efile Mukulu su? Tanuidimbanga. Ba ntambushi a lusandi, balanguidi ba ma nkishi, ba sha lukiebanokiebano, balume abakumiina’shi bebalale kui balume nabo, sunga balume abalala balume nabo, 10 ba ngifi, basha luabi, ba nkodi ba maalua, bantu abakayishenaa, na banyenganyi ba bintu t’abakapiana Bufumu bu’Efile Mukulu nya. 11 Aku namu nyi bibaadi bangi ba munkatshi muenu. Anka nubaadi batoshiibue; nubaadi bekashue ba kishila; na nubaadi bekashue balulame muishina dia Nfumuetu Yesu Nkidishitu, na kikudi ki’Efile Mukulu etu.

12 Mbampe bulungantu bua kukita bintu bioso, anka bioso ta bi na bukuashi nya. Mbampe bulungantu bua kukita bintu bioso, kadi tandekiela kintu su nkimune bua kidia kunkunkusha.* 13 Bidibua bi kuanka bua kifu, na kifu ki kuanka bua bidibua, anka Efile Mukulu akebishimisha bioso. Mbidi tayikuanka bua lukiebanokiebano,* kadi i kuanka bua Muanana, na Muanana e kuanka bua mbidi. 14 Anka Efile Mukulu baadi mubuushe Muanana ku lufu, na aketubuusha namu ku lufu ku bukuashi bua bukome buaye.

15 T’anuuku’shi mbidi yenu nyi mbipindi bia mbidi ya Nkidishitu su? Biabia, ne kulamuna bipindi bia mbidi ya Nkidishitu, bua kuibibunga pamune na ndumba su? Biabia tabiakukitshika nya! 16 T’anuuku’shi yawa elaalena na ndumba, ekala naye mbidi imune su? Muanda Efile Mukulu amba’shi: “Bubidi buabo, abakekala mbidi imune.” 17 Anka yawa ebungu na Muanana, e naye mu buumune mu kikudi. 18 Sukayi lukiebanokiebano!* Muanda, ungi muluisho oso ulombene muntu kukita, wi paasha pa mbidi yaye, anka yawa akitshi lukiebanokiebano, aluishiisha mbidi yaye’ye nabene. 19 T’anuuku’shi mbidi yenu nyi ntempelo a kikudi kiselele ki muanudi kianudi bapete kui Efile Mukulu? Dingi, tanui kuanka buenu’nue banabene, 20 muanda nubaadi baudibue ku muulo wibukopo. Biabia, tumbishayi Efile Mukulu mu mbidi yenu.

7 Binobino, pabitale mianda ibanudi banfundile, mbikile buwa bua’shi muana mulume takumanga muana mukashi;* 2 kadi pa muanda wa kufuima kua lukiebanokiebano,* muana mulume oso ekale na mukashi aye, na muana mukashi oso ekale na mulume aye. 3 Mulume alombeeshe mukashi kitungo* kiaye, na mukashi namu akitshine mulume aye namu nka biabia. 4 Mukashi te na matalua ku mbidi yaye, anka mulume aye ngi e nao; mu mushindo umune, mulume namu te na matalua ku mbidi yaye, anka mukashi aye ngi e nao. 5 Muntu tasuminanga muinaye nya, anka su nuibepushene bua kipungo kapanda, bua’shi numone bia kuipaana mu nteko, akupu nuibungie dingi pamune bua’shi tala Satana atungunuka na kuinutompa bua kukutua kuenu kua kuikanda. 6 Biabia, nui balombene kukita bino bia nenulungula, anka nta muiya nya. 7 Kadi nakumina’shi bantu balume boso bekale bino biandi. Anka muntu oso e na kiaye kia buntu kiadi mupete kui Efile Mukulu, au na kia mushindo kampanda, ungi namu na kia ungi mushindo.

8 Binobino nalungula baaba bashi bebakile na bakashi kilele’shi, mbikile buwa bashala nka biabia biandi’mi. 9 Anka su taboobesha kuikanda, beyibakishene, muanda mbikile buwa kuibakila pe kukienga na lukalo lua kuilaalena luibukopo.

10 Napa baaba bebakile mayi a kulonda, kadi ta nnami nya, nyi Muanana, mukashi telekenanga na mulume aye. 11 Anka su elekena naye, ashale kushi kuibakilua, sunga’shi bepushene na mulume aye; na mulume namu tapelanga mukashi aye.

12 Kadi kui bangi, ta Muanana nya, anka nnami amba’shi: Su mukuetu e na mukashi shi muina kukumiina na yawa mukashi akumiina kushala naye, tamupelanga nya; 13 na su mukashi e na mulume shi muina kukumiina, na yawa mulume akumiina kushala naye, tamupelanga nya. 14 Muanda eyibakishi* dia mulume shi muina kukumiina ndikashibue bu dia kishila pa muanda wa mukashi aye, n’eyibakishi dia mukashi shi muina kukumiina ndikashue bu dia kishila pa muanda wa mukuetu mulume; bisumanga bana benu abadia kuikala bu be butete, anka binobino mba kishila. 15 Kadi su yawa shi muina kukumiina ata kitshibilo kia kuenda,* mulekieele ende; mukuetu mulume sunga mukashi ta muanyibue mu mianda i biabia nya, anka Efile Mukulu mmuinuitanyine mu butaale. 16 Anka obe mukashi, ouku naminyi su nnobe akapaasha mulume oobe, sunga obe mulume, ouku naminyi su nnobe akapaasha mukashi oobe?

17 Biabia, muntu oso ekale na nshalelo muyile biabadi bamupe kui Yehowa, na muntu oso atambukie muyile bibaabadi bamuitanyine kui Efile Mukulu. Na buno nyi buludiki buantusha mu tukongie toso. 18 Kui muntu baadi mupue kusadiibua pabaabadi bamuitanyine su? Tashimishanga kusadiibua kuaye. Kui muntu baadi muitaminyibue shabandile kusadiibua su? Tasadiibuanga nya. 19 Kusadiibua takui na muulo, na kukutua kusadiibua takui na muulo; kadi ki na muulo nkukookiela miiya y’Efile Mukulu. 20 Muntu oso ashale nka mu mushindo ubaadi, pabaabadi bamuitanyine. 21 Bodi muitaminyibue pobodi mpika su? Tuekalakashanga bua uno muanda; anka su wemulombene kuikala bulungantu, ebikite binobino. 22 Muanda muntu oso baadi muitaminyibue mu Muanana pabaadi mpika, mmufungushibue na Muanana; mu mushindo umune, muntu oso badi muitaminyibue pabadi mulungantu, nyi mpika a Nkidishitu. 23 Nubaadi baudibue ku muulo wi bukopo; biabia lekayi kufika ba mpika ba bantu. 24 Bakuetu, muntu oso ashale nka mu mushindo ubaadi, pabaabadi bamuitanyine, kumpala ku’Efile Mukulu.

25 Binobino pabitale baaba be bukupi, ntshi na muiya wa Muanana, kadi natuusha ande mueneno bu muntu e na lulamato abaabadi baleshe lusa kui Muanana. 26 Biabia namono’shi muanda wa nkalakashi i ano mafuku, mbikile buwa bua’shi muana mulume ashale nka biabia biadi. 27 We na mukashi su? Tokimbanga bia kuilekena naye. Tue na mukashi su? Tokimba bia kumupeta. 28 Kadi sunga oyibakila, t’okitshi muluisho nya. Na yawa ki kamame su ebakilua, takitshi muluisho nya. Anka baaba abeyibakishena abekala na nkalakashi* mu mbidi yabo. Kadi ami nakiebe kuinukaluila ku yanka.

29 Dingi bakuetu, nenulungula’shi nsaa ibashala ngipela. Kubanga binobino, baaba be na bakashi bekale nka bu bashi nabo, 30 na baaba abadidi bekale bu bash’abadidi, na baaba abasanka bekale bu bash’abasanka, na baaba abaulu bekale bu bashi na bintu, 31 na baaba abafubisha bia pa nsenga bekale bu bashi banemeene muanka; muanda mianda ya pa nsenga ikuete kushintuluka. 32 Mu binyibinyi, ntankumina’shi nuikale na tuinyongoshi nya. Mulume shi muibakile ekalakasha bua mianda ya Muanana, biadia kukuminyibua naye. 33 Kadi mulume muibakile ekalakasha bua mianda ya pa nsenga, biadia kukuminyibua na mukashi aye, 34 na mmuiabuule. Dingi mukashi shi muibakilue, sunga kamame, ekalakasha bua mianda ya Muanana, buadia kuikala eselele ku mbidi na mu binangu biaye. Anka mukashi muibakilue ekalakasha bua mianda ya pa nsenga, biadia kukuminyibua na mulume aye. 35 Anka nakula ino mianda bua buwa buenu, kushi bua kuinukitshisha,* kadi bua kuinutakula ku kiakia ki buwa, na buanudia kuipaana ku mufubo wa Muanana kushi kapungakanyi.*

36 Anka su muntu apuandikisha’shi kuete kukita bishi bilombene p’aye kushala bukupi, na su bapu kukila kipungo kia bu nsongua,* biabia tala kiadi mulombene kukita: Akite kiakia ki’akumiina; takitshi muluisho nya. Beyibakishene. 37 Kadi su muntu mmuate kitshibilo muishimba diaye na ta kuete kuialashena, na e na matalua ku kikiebe ki’eshimba diaye, na mmuiatshile kitshibilo kia kushala bukupi, akitshi bibuwa. 38 Biabia, yawa atuele mu eyibakishi* akitshi bibuwa, kadi yawa sh’atuele muanka akitshi bikile buwa.

39 Mukashi mmuanyibue ku muiya wa mulume aye, pakii mulume na muwa. Kadi su mulume aye baafu, e bulungantu bua kuibakilua kui ungi mulume akumiina, kadi nka penda mu Muanana. 40 Kadi mu ande mueneno, ekala na muloo wi bungi su ashala nka biabia biadi; ku shi mpaka, namonoshi n’ami namu ne na kikudi ki’Efile Mukulu.

8 Binobino, pabitale bidibua biabadi balambule ma nkishi: Atuuku’shi atue boso tui na kiukilo. Kiukilo akitakulaa mu kuitatula, anka kifulo akinyingishaa. 2 Su muntu anangushena’shi auku kintu kampanda, tabandile kuikiuka mu mushindo autungu’shi ekiukie nya. 3 Kadi su muntu mmufule Efile Mukulu, yawa muntu aukibua n’Efile Mukulu.

4 Binobino, pabitale kudia bidibua bilambulue ma nkishi, atuuku’shi nkishi nkintu kia bisumanga, na kui Efile Mukulu nka umune. 5 Biabia sunga kuekala baaba babetanyina bu b’efile, biabikala muiyilu sunga pa nsenga, nka bu biabidi’shi kui “b’efile” be bungi na ba “muanana” be bungi, 6 kadi buetu’tue, kui’nka penda Efile Mukulu umune, Yaya, kuadi nyi akutukila bintu bioso, n’atue tui kuanka buaye; na kui Muanana nka penda umune Yesu Nkidishitu, kukiila kuadi nyi kupangibue bintu bioso, n’atue tui kuanka ku bukuashi buaye.

7 Anka ta bantu boso be na kino kiukilo. Kadi bangi, bu bibaabadi abalanguila ma nkishi kala, su abadi bintu bilambulue ma nkishi, abamono bu bakuete kuiyilanguila, na bu bikale’shi kondo kabo k’eshimba nkabofule, akaluila. 8 Kadi biakudia, t’abituikasha pepi n’Efile Mukulu; su tatuibebidie, t’atushimisha kintu, na su atuibidi, t’atupete kintu. 9 Anka tungunukayi na kuikala badimukie, bua’shi bulungantu buenu bua kuiatshila bitshibilo tabukokoshanga babofule. 10 Muanda su muntu akumona obe e na kiukilo, odi mu ntempelo a ma nkishi, kondo k’eshimba ka yawa muntu kabofule, ta nkalombene kumutakula bua kudia bintu bilambulue ma nkishi su? 11 Biabia pa muanda wa kiukilo kiobe, muntu sha kondo k’eshimba kabofule ashimina, mukuenu abadi bafuile kui Nkidishitu. 12 P’oluishisha bakuenu mu kiakia kipaso na otapa kondo kabo k’eshimba kabofule, oluishisha Nkidishitu. 13 Nyi buakinyi su kidibua akikokosha mukuetu, tandi dingi muita nya, bua kupela kukokosha mukuetu.

9 Ami ntshi bulungantu su? Ntshi mutumibua? Ntshi mumone Yesu Nfumuetu su? Anue tanui bipeta bia mufubo* wande mu Muanana su? 2 Sunga biekala’shi ntshi mutumibua kui bangi, ne binyibinyi mutumibua kuanudi! Muanda nui kitampi akishinkamisha’shi ne mutumibua mu mufubo wa Muanana.

3 Nakula bino kui baaba abansambisha’shi: 4 Atue tatui na bulungantu* bua kudia na kutoma su? 5 Atue tatui na bulungantu bua’shi muntu oso bamushindikila kui mukashi aaye muina kukumiina, bu biabakuete kuibikita kui bangi batumibua na bakuabo na Muanana, na Kefase* su? 6 Su nka’mi na Barnabase nyi bashi na matalua a kukita mufubo wa maasa bua kuikuasha? 7 Musalayi kinyi e kufuba mu makuta aye’ye nabene? Nnanyi mulombene kukuna mutshi wa nfinyo na kukutua kudia tumuma tuao? Mulami kinyi a lombe lua nyema mulombene kukutua kutoma mabele a nyema yaye?

8 Nkuete kuakula ino mianda muyile mueneno a bu muntu su? Sunga’shi Miiya t’ayakula namu ino mianda? 9 Muanda mbifundibue mu Muiya wa Moyise’shi: “Tuanyanga mbangabanga ya ngombe p’afuuntu ntete.” Efile Mukulu kuete kuikalakasha nka penda bua ngombe su? 10 Ta mpa muanda wetu pakuila biabia su? Oolo, bino bibaadi bifundibue binyibinyi buetu, muanda muntu adimi ntete na yawa eyifuuntu, abebikitaa na lukulupilo lua kupeta efuto.

11 Su tubaadi bakune bintu bia mu kikudi munkatshi muenu, bi kuikala kukishakisha su tuaumbula bukuashi bua bintu bia ku mbidi kuanudi su? 12 Su bangi be na aa matalua a kuibiteka kuanudi, atue namu tatui nao akile bungi su? Anka, tatui bafubishe aa matalua nya, kadi tukuete kunyingiila bintu bioso buatudia kupela kutuula kikokoshi ku mukandu wibuwa pabitale Nkidishitu. 13 T’anuuku’shi bantu abakitshi mifubo* ya kishila abadiyaa bintu bia ku ntempelo, na baaba abafubaa pa kiubishi ku bilambuilo, abapetaa ndambo ya bintu bi’abalambula kuanka? 14 Mu mushindo umune, Muanana bapeele baaba abalungula mukandu wibuwa matalua a kudiila ku mukandu wibuwa.

15 Anka ami, ntshi mufubishe ino mpango su nkapeela. Na dingi ntshi mufunde ino mianda bua’shi bebinkitshine, muanda ne kukumiina sunga kufua—pe muntu kuata kabingilo kande ka kuitumbisha nako! 16 Binobino, su nkuete kulungula mukandu wibuwa, ta nkabingilo kandia kuitumbisha nako, anka nyi kitungo kiandi nakio. Binyibinyi, mulua wi kuandi su ta ndungula mukandu wibuwa! 17 Su nakitshi bino n’eshimba diande dioso, napete efuto; anka sunga nebikita kushi muyile kikiebe ki’eshimba diande, nenka na bulami buabadi bampe. 18 Biabia efuto diande nkinyi? Ndia’shi, pandungula mukandu wibuwa, ne kuiwulungula buntu kushi kuluisha matalua ande a bu mulungudi a mukandu wibuwa.

19 Muanda sunga biekala’shi ne bulungantu kui bantu boso, ne muiyikashe bu mpika kui boso, buandia kupeta bantu be bungi. 20 Kui bena Yunda nemufikie bu muina Yunda bua kupeta bena Yunda, kui be muushi mua muiya nemufike bu e muushi mua muiya sunga biekalashi ami nabene ntshi muushi mua muiya bua kupeta baaba be muushi mua muiya. 21 Kui baaba bashi na muiya nemufikie bu shi na muiya, sunga biekala’shi tshimukutue muiya ku meso ku’Efile Mukulu kadi ne muushi mua muiya wa Nkidishitu, bua kupeta baaba bashi na muiya. 22 Kui babofule nemufikie bu mubofule, bua kupeta baaba babofule. Nemufikie kioso akitungu kui bantu ba mishindo yoso bua kumona bia kupaasha bamo. 23 Biabia, nakitshi mianda yoso bua mukandu wibuwa, bua kuiulungula bangi.

24 T’anuuku’shi ba nsukishi a lubilo abasukaa boso, kadi nka penda umune nyi apetaa efuto? Sukayi mu kipaso kianudi balombene kuidipeta. 25 Baaba boso abaashaa maasha a kuipikena* abekandaa mu bintu bioso. Biabia, abo abebikitaa bua kupeta kifulu kia ntumbo* kilombene kuluila, kadi’tue, atuibikitaa bua kupeta kiakia kishi kilombene kuluila. 26 Biabia, nasuuku kushi bu muntu shi na kepatshila; na neele makofi mu mushindo ushi wa kukupila mu lupunga; 27 na mbidi yande neyikupila makofi* na neyiikasha bu mpika, kupela kua’shi kunyima kua kulongiesha bangi, nakutua kukuminyibua ami nabene mu mushindo kampanda.

10 Binobino bakuetu, nakiebe nuukie’shi, ba nkambua betu babaadi boso muushi mu’ekumbi, na oso babaadi basabukie mu kalunga 2 na boso babaadi babatshishibue mui Moyise ku bukuashi bu’ekumbi na kalunga, 3 boso babaadile kidibua kimune kia mu kikudi 4 na boso babatomene kitomuanga kimune kia mu kikudi, muanda babaadi abatomo ku lubuebue lumune lua mu kikudi lubaadi aluibalondo, na lualua lubuebue lubaadi alulesha Nkidishitu. 5 Anka, Efile Mukulu tabaadi musankie na be bungi ba kuabadi, muanda babaadi bafue mu kabaaka.

6 Ino mianda ibafikile bu bileshesho kuatudi, bua’shi tatulakilanga bintu bi bubi, bu bibaabadi bebilakile. 7 Biabia, tanuikalanga balanguidi ba ma nkishi bu bibakitshine bangi ba kuabadi; nka bu biabidi bifundibue’shi: “Bantu babashalele bua kudia na kutoma. Akupu abo nkuibua bua kuasha maasha.” 8 Dingi, tatukitanga lukiebanokiebano,* bu bibaadi bangi ba kuabadi bakite lukiebanokiebano, na abo nkufua bantu 23 000 penda muifuku dimune. 9 Na tatutompanga Yehowa, bu bibaadi bangi ba kuabadi bamutompe, na abo nkuipayibua na nyoka. 10 Dingi tatuikalanga atuunauna, bu bibaadi bangi ba kuabadi bauneune, na babaadi babutudibue kui yawa ayipayishena.* 11 Ino mianda ibaadi ibakitshikile ibafikile bu kileshesho kuatudi, na babaadi beyifunde bua kuitudimusha atue be ku nfudiilo kua uno ndumbuluilo.

12 Biabia, yawa anangushena’shi mmuimane, adimukie tala apona. 13 Takui kitompuanga su nkimune akinufikila kish’akifikilaa bantu boso. Anka Efile Mukulu e na lulamato na t’akalekiela bua’shi nutompibue na kitompuanga kianushakobesha, kadi apenufikila kitompuanga, akenukuasha buanudia kuikala na ngobesha ya kuikinyingiila.

14 Nyi buakinyi bakuetu ba kifulo, sukayi lulanguilo lua ma nkishi. 15 Nesamba nenu bu bantu be na lushinguluilo; atayi kitshibilo anue banabene pabitale biangakula. 16 Kipulu kia muabi ki’atutekiela t’akilesha’shi tui mu buumune na mase a Nkidishitu su? Na mukate w’atutshokola, t’aulesha’shi tui mu buumune na mbidi ya Nkidishitu su? 17 Muanda kui mukate umune, n’atue sunga mbiatudi be bungi, tui mbidi imune, muanda atue boso tukuete kuiabena wawa mukate umune.

18 Talayi bena Isalele ba ku mbidi: Baaba abadiyaa milambu, t’abebungilaa pamune ku kilambuilo? 19 Biabia, nkuete kuinulungula kinyi? Nkintu kiabadi balambule nkishi ki na muanda, su nkishi nabene e na muanda? 20 Nya; kadi nakiebe kuamba’shi, bintu bi’abalambula kui bantu ba ingi miilo, abebilambula ba demo kushi kui Efile Mukulu; na tankumina’shi nuikale mu kipuano na ba demo. 21 Tanui balombene kutoma kipulu kia Yehowa na kipulu kia ba demo, tanui balombene kudia “ku mesa a Yehowa” na ku mesa a ba demo. 22 Su atukimbi ‘kubuusha mukao wa Yehowa’? Tui na bukome kukila buaye su?

23 Bintu bioso mbikuminyibue, kadi bioso t’abikuasha. Bintu bioso mbikuminyibue, kadi bioso t’abinyingisha. 24 Biabia, muntu oso t’atungunukanga na kukimba nka buwa buaye’ye nabene, kadi akimbe namu buwa bua ungi.

25 Diayi muita oso w’abaudisha mu kisalue kushi kuela nkonko muanda wa kondo kenu k’eshimba, 26 muanda “nsenga na bioso bi panka, mbia Yehowa.” 27 Su muntu shi muina kukumiina benuitanyina kuaye, na nuakumina kuenda, diayi kioso ki’abenupa kushi kuela nkonko muanda wa kondo kenu k’eshimba. 28 Kadi su muntu enulungula’shi: “Uno muita wikele ulambulue ma nkishi,” tanudianga bua yawa muntu benulungula na bua kondo k’eshimba. 29 Pano ta ngakula bua kondo kenu k’eshimba, kadi nakula bua ka ungi muntu. Buakinyi bekutshibila bulungantu buande kiimu kui kondo k’eshimba ka ungi muntu? 30 Su naadi na kutumbula Efile Mukulu, buakinyi be kungakula bi bubi bua bidibua biandi na kutumbula Efile Mukulu?

31 Biabia, sunga nuadia, sunga nuatoma, sunga nuakita kingi kintu kioso, kitayi bioso bua ntumbo y’Efile Mukulu. 32 Elameyi bua kupela kuikala bu kikokoshi kui bena Yunda, kui bena Greke na kui kakongie k’Efile Mukulu, 33 Nka bu bia nkuete kuitatshisha bua kusankisha bantu boso mu mianda yoso, kushi bua kukimba buwa buande’mi nabene, kadi bua be bungi, bua’shi bamone bia kupaashibua.

11 Ngambuleyi, nka bu biandi namu muambule Nkidishitu.

2 Nenutumbula muanda nukuete kuntentekiesha mu mianda yoso, na nukuete kukita mianda yoso nka bu binaadi muinulongieshe. 3 Kadi nakumina nuukie’shi, nfumu a mulume oso, Nkidishitu; nfumu a mukashi, mmulume na nfumu a Nkidishitu, Efile Mukulu. 4 Muana mulume oso atekie sunga kutemuka mubuikile kintu kampanda ku mutue, akuatshisha nfumuaye buufu; 5 kadi muana mukashi oso atekie sunga kutemuka shi mubuikile kintu ku mutue waye, akuatshisha nfumuaye buufu, muanda bi’nka bu’shi mbamukuule nyene* ku mutue. 6 Biabia, su muana mukashi ta mubuikile kintu ku mutue waye, atshibishe nyene; anka su bi buufu bua muana mukashi kutshibisha nyene yaye sunga kuedibua kapueto, abuikile ku mutue waye.

7 Muanda t’abitungu’shi muana mulume abuikile ku mutue nya, bu biadi kinfuanyi na ntumbo y’Efile Mukulu, kadi muana mukashi nyi ntumbo ya muana mulume. 8 Muanda muana mulume tabaadi mutukile kui muana mukashi, anka muana mukashi nyi baadi mutukile kui muana mulume. 9 Na dingi muana mulume tabaadi mupangibue bua muana mukashi, anka muana mukashi nyi baadi mupangibue bua muana mulume. 10 Nyi buakinyi abitungu muana mukashi ekale na kitunduilo kia kukookiela ku mutue waye, muanda wa mikeyilu.

11 Dingi, mu kuipushena na Muanana, muana mukashi ta muiabuule kui muana mulume, na muana mulume namu ta muiabuule kui muana mukashi. 12 Muanda nka bu bikale’shi muana mukashi mmutuukile kui muana mulume, biabia muana mulume namu atandikua kui muana mukashi; anka bintu bioso abituukila kui Efile Mukulu. 13 Tshibayi uno muanda anue banabene: bi buwa bua’shi muana mukashi atekie Efile Mukulu kushi kubuikila ku mutue waye? 14 Mushindo wabadi bapangie bantu t’awinulongiesha’shi nyene i bula ayikuatshisha muana mulume buufu, 15 kadi su muana mukashi e na nyene ila, nyi ntumbo kuadi? Oolo, muanda babaadi bamupe nyene bua kubuikila ku mutue. 16 Anka su kui muntu akiebe kuikakena bua kingi kipikua, atue ta tui na kingi, sunga tukongie tu’Efile Mukulu.

17 Kadi panenupa ano malango, ta nenutumbula nya, muanda kuibunga kuenu kua pamune t’akuinukuasha, anka akuinufuishila bubi. 18 Kia kumpala, nemupushe’shi, panuibungu pamune mu kakongie, kui kuitshibuula munkatshi muenu; anka tankamba kuibishinkamisha nya. 19 Muanda akukekala tusaka tusaka munkatshi muenu, bua’shi baaba bakuminyibue, bakamuenekie patooka.

20 Nsaa y’anuibungu pamune, mu binyibinyi ta mbua kudia Kidibua kia Muanana. 21 Muanda kumpala kua kuikidia, muntu oso ekala mupue kudia kidibua kiaye kia kiolua, mu mushindo wa’shi, ungi e na nsala, ungi namu mukolue. 22 Tanui na mashibo kuanudia kudia na kutoma su? Su anusabuula kakongie k’Efile Mukulu, na kukuatshisha baaba bashi na kintu buufu su? Anukiebe nenulungule kinyi? Ne kuinutumbula bua uno muanda su? Bua uno muanda ntshi bia kuinutumbula nya.

23 Muanda kiakia kinapetele kui Muanana, nyi kinadi muinulongieshe’shi, bufuku bubaabadi na kia kupaana Nfumuetu Yesu, batshile mukate, 24 na kunyima kuaye kutumbula Efile Mukulu, beutshokuele na aye nkuamba’shi: “Uno mukate aulesha mbidi yande, ayituushibua pa muanda wenu. Tungunukayi na kukita bino bua kuntentekiesha.” 25 Bakitshine’nyi nka biabia na kipulu,* kunyima kuabo kudia kidibua kia kiolua, bambile’shi: “Kino kipulu akilesha kilombeno kipia kiabashinkamisha kui mase ande. Tungunukayi na kukita bino nsaa yoso y’anuikitomo bua kuntentekiesha.” 26 Muanda nsaa yoso y’anudi uno mukate na kutoma kino kipulu, anutungunuka na kulungula lufu lua Muanana mpa na p’afiki.

27 Nyi buakinyi, muntu oso adi mukate na kutoma kipulu kia Muanana mu kipaso kishi kilombane, akekala mupiile ku muanda wa mbidi na mase a Muanana. 28 Kia kumpala, muntu abande kuitaluula aye nabene bua kumona su mmulombanyine, akupu adie mukate na kutoma kipulu. 29 Anka yawa adi na kutoma kushi kushinguula mbidi, adi na kutoma kiimu kiaye’ye nabene. 30 Nyi buakinyi be bungi ba kuanudi, mbabofule na be na maladi, na bangi mbalale mu lufu.* 31 Anka su tu’etalula atue banabene kalolo, t’abaketutshibila kiimu nya. 32 Anka su abetutshibila kiimu, atunyokibua na Yehowa, bua’shi tatupishibuanga na ba pa nsenga. 33 Biabia bakuetu, panuibungu bua kudia kino kidibua, nuitengieshene anue boso. 34 Biabia su muntu e na nsala, adie ku nshibo kuaye, bua’shi p’anuibungu pamune, tabikalanga bua kutshibilua kiimu. Anka bua ingi mianda ibashala, nakeyilumbuula panfiki kuakua.

12 Binobino bakuetu, pabitale bia buntu bia kikudi, tankumina’shi nuikale bakutue kuuka. 2 Anuuku’shi, pabanudi nuki bantu ba ingi miilo,* abaadi abenutakula mu kulanguila ma nkishi ash’aakulaa na nubaadi anuende koso kubaabadi abenutakula. 3 Binobino nakumina nuukie’shi, muntu su ngumune p’akula ku bukuashi bua kikudi ki’Efile Mukulu, t’ambanga’shi: “Yesu mmuedibue mulua!” na takui muntu akuamba’shi: “Yesu nyi Muanana!” kushi ku bukuashi bua kikudi kiselele.

4 Kui bia buntu bilekenelekene, anka kikudi nkimune; 5 na kui mifubo* ilekenelekene, anka Muanana ngumune; 6 kui mifubo ilekenelekene ya kukita, anka kui’nka Efile Mukulu umune kuete kuiyilombasha yoso mui muntu oso. 7 Anka, mianda ayikitaa kikudi, ayimuekaa mui muntu oso bua kukuasha bantu boso. 8 Muanda nka’kio kikudi kimune, akipa muntu kampanda ngakuilo a binangu, ungi namu akimupa ngakuilo a kiukilo, 9 nka kiakia kikudi kimune, akipa ungi lukumiino, ungi namu kia buntu kia kupaasha mikumbo, 10 kui ungi, akimupa ngobesha ya kukita bilengieleshi,* kui ungi butemuki, kui ungi akimupa lushinguluilo lua mayi ayokielue, kui ungi akimupa ngobesha ya kuakula mu ndimi ilekenelekene, kui ungi namu ngobesha ya kupatuula ndimi ilekenelekene. 11 Kadi ino mianda yoso abeyikumbasha kui kikudi kimune, akipa muntu oso bino bia buntu muyile bi’akikumina.

12 Muanda nka bu bikale mbidi imune kadi na bipindi bi bungi, na sunga biabidi bikale bi bungi, bioso abikitshi mbidi imune, biabia namu nyi bikale Nkidishitu. 13 Muanda tubaadi babatshishibue boso mu kikudi kimune na mu mbidi imune, biatuikala bena Yunda sunga bena Greke, ba mpika sunga be bulungantu, na babaadi betutomeshe* boso kikudi kimune.

14 Biabia, mbidi tangikitshibue na kipindi kimune nya, anka ngikitshibue na bi bungi. 15 Su luao luamba’shi: “Bu bianshi eyasa, ntshi kipindi kia mbidi,” bino t’abikutua kuiluikasha bu kipindi kia mbidi nya. 16 Na su etui diamba’shi: “Bu bianshi eyiso, ntshi kipindi kia mbidi,” bino t’abikutua kuidikasha bu kipindi kia mbidi nya. 17 Su mbidi yoso ibadia kuikala eyiso, ibadia kupushiisha kui kunyi? Na su yoso ibadia kuikala etui, ibadia kununkiila kui kunyi? 18 Anka Efile Mukulu, mmutule kipindi na kipindi kioso kia mbidi bu bibaadi mukumiine.

19 Su bioso bibadia kuikala nka bu kipindi kimune, mbidi ibaadia kuikala naminyi? 20 Anka kui bipindi bi bungi, kadi mbidi ngimune. 21 Eyiso ta ndilombene kulungula eyasa’shi: “Ntshinobe lukalo,” sunga mutue ta ngulombene kulungula luao’shi: “Ntshinobe lukalo.” 22 Anka bipindi bia mbidi abimueneka bu bibofule, bi na muulo ukata, 23 na bipindi bia mbidi biatumono bu bishi na kinemo, atuibipa kinemo kikata, biabia bipindi bietu bia mbidi bia buufu atuibiataa na muulo ukata, 24 aku namu bipindi bia mbidi bishi bia buufu, tabi na lukalo na kintu su nkimune. Anka Efile Mukulu baadi mukite mbidi, mu kipaso kiakupa bipindi bia mbidi bishibaadi na kinemo, kinemo kikata, 25 bua’shi takuikalanga kuitshibuula mu mbidi, anka bipindi biayo bikale abikuashena. 26 Su kipindi kimune kia mbidi akikumbu, bingi bioso abikumbu nakio; su abatumbisha kipindi kimune, bingi bioso namu abisanka nakio.

27 Binobino, nui bipindi bia mbidi bia Nkidishitu, na oso a kuanudi pa bupenka nyi kipindi kia mbidi yaye. 28 Efile Mukulu basanguile bantu mu kakongie buabadia kuikala; kia kumpala, batumibua; kia kabidi, batemuki, kia kasatu, balongieshi; akupu abakitshi bilengieleshi; dingi be na bia buntu bia kupaasha mikumbo; akupu, be na mifubo ya kukuasha; be na ngobesha ya kukunkusha; na baaba abakula ndimi ilekenelekene. 29 Boso mbatumibua su? Boso mbatemuki? Boso mbalongieshi? Boso abakitaa bilengieleshi? 30 Boso be na kia buntu kia kupaasha mikumbo su? Boso abakulaa mu ndimi ilekelekene? Boso abapatuulaa* ingi ndimi su? 31 Anka tungunukayi na kukimba* bia buntu bikile bukata. Na nakenulesha eshinda dikile angi oso.

13 Su nakula mu ndimi ya bantu na ya mikeyilu, kadi kushi’mi kuikala na kifulo, nenka bu ngunga* adidi sunga bu kilonda akiele tuleo. 2 Na su ne na kia buntu kia kutemuka na kupusha mianda yoso ifuame ya kishila na kiukilo kioso, na su ne na lukumiino loso lua kutentula miengie, kadi ntshi na kifulo, ntshi kintu.* 3 Na su natusha bintu biande bioso bua kudiisha bangi, na sunga natusha mbidi yande buandia kuitumbisha kadi ntshi na kifulo, t’abinkuasha nya.

4 Kifulo ki na luishinko na kalolo. Kifulo ta ki na mukao. T’akiitumbishaa, t’akitatulaa, 5 t’akikitaa mianda ya buufu, t’akikimbaa penda buwa buakio’kio kinabene, t’akikuataa nsungu. T’akilaminaa mianda ibubi. 6 T’akisankaa na kukutua kua kululama, anka akisankaa na binyibinyi. 7 Akibuikiilaa mianda yoso, akikuminaa mianda yoso, akikulupilaa mianda yoso, na akinyingiilaa mianda yoso.

8 Kifulo t’akishiminaa nya. Anka bia buntu bia kutemuka, abikashimina; kuakula mu ndimi,* akukafudiila; na kiukilo akikashimina. 9 Muanda atuuku nka kipindi na atuakula nka kipindi kia mayi a butemuki, 10 anka apafiki kiakia kilombane, kiakia kishi kilombane akikashimina. 11 Panaadi bukinga, naadi nakula bu muana mukinga, nakitshi mianda bu muana mukinga, na kunangushena bu muana mukinga; kadi binobino bu binapu kukula, nemulekie mianda ya bukinga. 12 Muanda binobino tukuete kumona bintu bish’abimueneka kalolo, ku bukuashi bua lumueno lua kiamo,* kadi mu aa mafuku, abikekala mpala na mpala. Binobino nauku nka kipindi, kadi mu aa mafuku nakauku mianda yoso kalolo, nka bu biandi muukibue kalolo. 13 Anka binobino, kubashala bino bintu bisatu: lukumiino, lukulupilo na kifulo; kadi kikile bino bioso nyi nkifulo.

14 Kimbayi kifulo, na tungunukayi na kukimba* bia buntu bia kikudi, bikishekishe kia buntu kia kutemuka. 2 Yawa akula mu ingi ndimi, t’akula na bantu, kadi akula n’Efile Mukulu, muanda takui ungi muntu amuteemesha, na akula mianda ifuame ya kishila ku bukuashi bua kikudi. 3 Muanda yawa atemuka, anyingisha bantu, kuibakankamika, na kuibasamba ku bukuashi bua mayi aakula. 4 Yawa akula mu ingi ndimi enyingisha aye nabene, kadi yawa atemuka anyingisha kakongie. 5 Binobino nakimbi’shi anue boso nuakule mu ndimi, anka nakumina’shi nutemukie. Yawa atemuka mmukile yawa akula mu ingi ndimi, anka su apatuula bi’akula bua’shi bena kakongie banyingishibue. 6 Kadi binobino bakuetu, su nafika kuanudi nakula mu ingi ndimi, mbilombene kuinukuasha ku kinyi, pamutue pa’shi nenulungula kifumbulue sunga kiukilo, sunga butemuki, sunga dilongiesha?

7 Bi mumune na bintu bishi na muwa abitushaa eunga, biabikala mulengie* sunga lusese. Su mayi abio ta ngelekene, tui kuuka naminyi’shi akiyimbi mmulengie sunga’shi ndusese? 8 Muanda su eyi dia mpungi t’adipushika kalolo, nnanyi akuilumbuula bua ngoshi? 9 Mu mushindo umune, su na ludimi lobe t’otuusha bishima abipushika kalolo, muntu mmulombene kupusha biokula naminyi? Biabia wekala nka bu’be akula mu lupunga. 10 pangi kui ndimi i bungi pa nsenga, na takui su ndumune lush’alupushikaa. 11 Muanda su tampusha ludimi kampanda, nekala bu muenyi kui yawa eluakula, na yawa eluakula ekala bu muenyi kuandi. 12 Biabia anue namu, bu bianukuete kukimba n’eshimba kuiyilu bia buntu bia kikudi, kimbayi bianudia kuikala na bia buntu bi bungi abikanyingisha kakongie.

13 Biabia, yawa akula mu lungi ludimi, atekie buadia kupatuula. 14 Muanda su natekie mu lungi ludimi, nyi kia buntu kiande akifiki kui kikudi kikuete kuteka, kadi binangu biande ta bikuete kukita kintu nya. 15 Biabia, abitungu kukita kinyi? Nakatekie na kia buntu kia kikudi, anka nakatekie namu’nyi na kinangu kiande. Nakayimbi ntumbo na kia buntu kia kikudi, anka nakayimbi namu’nyi ntumbo na kinangu kiande. 16 Muanda su ku bukuashi bua kia buntu kia kikudi kiselele otumbisha Efile Mukulu, mmushindo kinyi ulombene muntu a bisumanga e munkatshi muenu kuela “Amene” ku luteko lobe lua lutumbu, aku namu tauku ki’okuete kuakula? 17 Binyibinyi, okuete kuela luteko lui buwa lua lutumbu, anka ungi muntu ta kuete kunyingishibua. 18 Natumbula Efile Mukulu muanda nkuete kuakula mu ndimi i bungi kuinukila anue boso. 19 Anka, mu kakongie nakumiina kuakula bishima bitano na binangu biande,* bua kulongiesha namu bangi,* pamutue pa kuakula bishima binunu ekumi mu lungi ludimi.

20 Bakuetu, tanuikalanga bana bakinga mu mpushisho enu, anka ikalayi bana bakinga mu kukita bi bubi; na ikalayi bantu bakulu mu mpushisho enu. 21 Mu Muiya mbifundibue bino: “Yehowa amba’shi, ‘nakesamba na uno muilo mu ndimi ya benyi, na ku milomo ya benyi sunga biekala’shi abakapele kunteemesha.’” 22 Biabia, kuakula mu ndimi takui bu kitunduilo bua bena kukumiina, anka mbua bashi bena kukumiina, kadi butemuki ta mbuikale bua bashi bena kukumiina, kadi mbua bena kukumiina. 23 Biabia, su kakongie kooso kashima nkebungie pamune, na boso abakula mu ingi ndimi, kadi kuafika bantu ba bisumanga sunga bashi bena kukumiina, t’abakula’shi nui na mombe su? 24 Kadi su anue boso nukuete kutemuka, na muntu shi muina kukumiina sunga muntu a bisumanga atuela muanudi, emono bu mupishibue na bu mutshibilue kiimu kui boso. 25 Mianda ifuame muishimba diaye ayikatuka patooka, na akakupila mpala paashi, na kulanguila Efile Mukulu pa kuakula’shi: “Efile Mukulu e munkatshi muenu binyibinyi.”

26 Biabia bakuetu, abitungu kukita kinyi? P’anuibungu pamune, umune a kuanudi ayimbi loono, ungi alongiesha, ungi atuusha kifumbulue, ungi akula mu lungi ludimi, ungi namu apatuula. Mianda yoso ikitshikie bua kuinyingishena. 27 Na su kui bantu abakula mu lungi ludimi, bemeene pa babidi sunga pa basatu, muntu oso akule pa kiaye kipindi na abitungu kuikale muntu a kupatuula. 28 Kadi su takui muntu a kupatuula, abitungu bashale baumiine mu kakongie na beakuile abo banabene n’Efile Mukulu. 29 Na pabitale batemuki, babidi sunga basatu bakule, na bangi bapatuule. 30 Anka su ungi bamufumbuila muanda paadi mushale, yawa akulanga kumpala aumiine. 31 Muanda nuibalombene kutemuka ku umune umune, bua’shi boso balongieshibue na banyingishibue. 32 Na bia buntu bia kikudi bia batemuki, abitungu bebikunkushe kui batemuki. 33 Muanda Efile Mukulu, t’Efile Mukulu a kafutakanyi, anka nga butaale.

Nka bu biabidi mu tukongie tooso tua beselele, 34 bana bakashi baumine mu tukongie, muanda ta mbebape matalua a kuakula. Anka bekale na kukookiela bu abiakula dingi Muiya. 35 Su abakiebe kuuka muanda kampanda, bakayipushe balume babo ku mashibo, muanda bi buufu bua muana mukashi kuakula mu kakongie.

36 Anue nyi bekale nsulo y’eyi di’Efile Mukulu su, su ndifikie nka penda kuanudi?

37 Su umune a kuanudi amono’shi mmutemuki, sunga’shi e na kia buntu kia kikudi, abitungu aukie’shi bino biankuete kuinufundila, mmuiya wa Muanana. 38 Anka su muntu t’akumiina bianka, naye namu t’akakuminyibua. 39 Biabia bakuetu, tungunukayi na kukimba kutemuka na kisumi, na tanukandikanga kuakula mu ingi ndimi. 40 Anka mianda yoso ikitshikie mu kalolo, na kuilondena mu mulongo.*

15 Binobino bakuetu, nenutentekiesha mukandu wibuwa unaadi muinulungule, wanubaadi dingi bakumiine, na wanudi bashale balamate bi bukopo. 2 Ku bukuashi bua uno mukandu wibuwa unaadi muinulungule, nukuete kupaashibua su anuiulamata, anka su nuibafikie bena kukumiina bua bisumanga.

3 Muanda, ku mianda ya kumpala inaadi muinulungule, kui ibaabadi bandungule namu ya’shi Nkidishitu bafuile bua miluisho yetu muyile abiamba Bifundue; 4 na’shi baadi mushiikibue, na baadi mubuushibue ku lufu muifuku dia kasatu muyile abiamba Bifundue; 5 baadi mumuekiele Kefase,* akupu, nkumuenekiela batumibua baye ekumi na babidi. 6 Kunyima baadi mumuenekiele bakuetu bakile pa 500 musango umune, be bungi bakii na muuwa, anka bangi ba kuabadi mbapue kulaala mu lufu. 7 Kunyima baadi mumuenekiele Yakobo, akupu nkumuenekiela batumibua boso. 8 Kadi kunyima kua bioso, baadi mummuenekiele namu nka bu kui muana mutandikue kabishi.

9 Muanda ne mukile bupeela a ku batumibua boso, na ntshi mulombanyine kuitaminyibua bu mutumibua, muanda naadi mukiengieshe kakongie k’Efile Mukulu. 10 Kadi ne bino biandi ku bukuashi bua kalolo k’Efile Mukulu. Na kalolo kaye kuandi ta kende mu mema nya,* muanda ne mutumikie kuibakila abo boso; biabia ta nami, anka nkalolo k’Efile Mukulu ke nami. 11 Biabia, sunga biekala’shi nnami sunga’shi, nnabo, bino nyi bia tukuete kulungula, na bino nyi bibanudi bakumiine.

12 Binobino, su tukuete kuinulungula’shi Nkidishitu baadi mubuushibue ku lufu, buakinyi bangi ba munkatshi muenu abakula’shi, takui lusangukilo lua bafue? 13 Su binyibinyi takui lusangukilo lua bafue, biabia Nkidishitu tabaadi mubuushibue ku lufu. 14 Kadi su Nkidishitu tabaadi mubuushibue ku lufu, bulambukishi buetu mbua bisumanga, na lukumiino luetu namu ndua bisumanga. 15 Dingi abetumono bu tumonyi tu’Efile Mukulu tua madimi, su binyibinyi bafue t’abakabuushibua ku lufu, muanda tukuete kutuusha bukamonyi pabitale Efile Mukulu’shi baadi mubuushe Nkidishitu ku lufu, aku namu ta mumubuushe ku lufu. 16 Biabia, su bafue t’abakabuushibua ku lufu, Nkidishitu namu tabaadi mubuushibue ku lufu. 17 Dingi, su Nkidishitu tabaadi mubuushibue ku lufu, lukumiino luenu ndua bisumanga; anushala mu miluisho yenu. 18 Biabia, baaba balaale mu tulo tua lufu mu buumune na Nkidishitu abashimina bua loso. 19 Su nka penda bua uno muwa nyi buatudi bakulupile mui Nkidishitu, tui bantu ba kufuila lusa ku bantu boso.

20 Kadi Nkidishitu baadi mubuushibue ku lufu, bu bimuma bia kumpala bia baaba balaale mu lufu. 21 Muanda bu bikale’shi lufu lubafikile kui muntu umune, lusangukilo lua bafue namu alufiki kui muntu umune. 22 Biabia nka bu bikale’shi kukiila mui Adama bantu boso bakuete kufua, mu mushindo umune namu kukiila mui Nkidishitu, boso abakekala na muwa. 23 Kadi muntu oso mu mulongo waye: Nkidishitu bu bikuba bia kumpala, akupu baaba bekale ba Nkidishitu mu kipungo kia kuikala kuaye. 24 Akupu, ku nfudiilo, akalusha Bufumu kui Efile Mukulu aye muikale Nshaye, kunyima kuaye kubutula mbulamatadi yoso na matalua oso na bukome boso. 25 Muanda abitungu amunane bu nfumu mpa na apakatulu Efile Mukulu beshikuanyi baye boso muushi mua ngua yaye. 26 Na muishikuanyi a nfudiilo abakabutula, ndufu. 27 Muanda Efile Mukulu “baadi mutuule bintu bioso muushi mua ngua yaye.” Kadi p’abamba’shi ‘bintu bioso bibaadi bitudibue ku bukunkushi buaye,’ bino ta mbitale yawa baadi mutuule bintu bioso ku matalua aaye. 28 Kadi p’abakatuulu bintu bioso ku bukunkushi buaye, paapa Muana nabene aketuulu ku bukunkushi bua yawa batudile bintu bioso ku bukunkushi buaye, bua’shi Efile Mukulu ekale panundu a bintu bioso na kui muntu oso.

29 Su ta bi biabia, baaba ababatshishibua bua kuikala bafue abakakitshi kinyi? Su bafue t’abakasanguka, buakinyi baaba bantu bakuete kubatshishibua bua kuikala bu bafue? 30 Buakinyi tukuete kuituula mu masaku nsaa yoso? 31 Efuku dioso ne mu masaku a lufu. Kano nyi kabingilo kandia kuitumbisha buenu bakuetu, mu Nkidishitu Yesu Nfumuetu. 32 Su nka bu bangi bantu,* naadi mulue na nyema ya bukielo ku Efeso, biabia abinkuasha ku kinyi? Su bafue t’abakasanguka, “tudieyi, tutomeyi, muanda malooba atufu.” 33 Tanuidimbanga. Ba kuuku be bubi abaluishaa muikeelo* wibuwa. 34 Ikalayi na binangu bibuwa na tanukitanga miluisho, muanda bangi bantu ta be na kiukilo ki’Efile Mukulu. Nakula bua kuinukuatshisha buufu.

35 Sunga mbiabia, ungi muntu akamba’shi: “Abakabusha bafue mushindo kinyi? Eyendo, abakabuuku na mbidi ya mushindo kinyi?” 36 Muntu shi na binangu’be! Kiakia ki’okunu t’akipetuula muwa kumpala kua kidia kufua. 37 Na kiakia ki’okunu, ta mbidi ayikulu, kadi mpenda lutete, bialuikala lua blé, sunga lua ungi mushindo; 38 anka Efile Mukulu mmuilupe mbidi muyile bi’akumiina, na apa lutete loso lua ku mbio mbidi yalo. 39 Anka bipangua bioso bi na muwa ta bi na mbidi imune nya, kui mbidi ya bantu, kui mbidi ya nyema, ingi ya tonyi na ya mishipa. 40 Na kui mbidi ya muiyilu na mbidi ya pa nsenga; kadi ntumbo ya mbidi ya muiyilu, ngilekene na ntumbo ya mbidi ya pa nsenga. 41 Ntumbo ya nguba na ya mueshi ngilekene, na ntumbo ya nyenyenyi ngilekene; luenyenyi loso nduilekene na lungi ku ntumbo.

42 Bi mumune na lusangukilo lua bafue. Mbidi ayikunyibua ayinyanga; ayikasanguka kushi kunyanga. 43 Ayikunyibua kushi kinemo; kadi ayikasangushibua na ntumbo. Ayikunyibua mu kubofula; kadi ayikasangushibua na bukome. 44 Ayikunyibua mbidi ya musamba, kadi ayikasangushibua mbidi ya mu kikudi. Su kui mbidi ya musamba, kui mbidi ya mu kikudi namu. 45 Nka bu biabidi bifundibue’shi: “Muntu a kumpala Adama, bafikile bu muntu e na muwa.” Adama a nfudiilo bafikile kikudi akipana muwa. 46 Biabia, kiakia ki mu kikudi ta nkifikie kumpala. Nyi kiakia ki ku mbidi kifikie kumpala, akupu ndio kiakia kia mu kikudi. 47 Muntu a kumpala bafikile ku nsenga na mukitshibue na lufufi lua nsenga; kadi muntu a kabidi afiki muiyilu. 48 Nka bi yawa mukitshibue na lufufi, nyi bi baaba bakitshibue na lufufi; nka bi yawa a muiyilu, nyi bi baaba namu ba muiyilu. 49 Nka bu biatudi kinfuanyi kia yawa mukitshibue na lufufi, atukekala namu kinfuanyi kia yawa a muiyilu.

50 Kadi bakuetu, nenulungula’shi mbidi na mase ta mbilombene kupiana Bufumu bu’Efile Mukulu, sunga kiakia akinyanga ta nkilombene kupiana kiakia kish’akinyanga. 51 Talayi! nenulungula mianda ifuame ya kishila: Atue boso t’atukalala tulo mu lufu, anka boso buetu atukashintuulua, 52 mu kapindi kapeela, mu kupopola ku’eyiso, apakadidi mpungi ya nfudiilo. Muanda mpungi ayikadidi na bafue abakasanguka na mbidi ish’ayinyanga, na atukashintuulua. 53 Muanda abitungu’shi yaaya ayinyanga ifuale yaaya ish’ayinyanga, na yaaya ayifu, ayikafuala ish’ayifu. 54 Na pe ino ayinyanga ayifuala ish’ayinyanga, na ino ayifu ayifuala ish’ayifu, paapa nyi apakalombana dino eyi difunde’shi: “Lufu lubaminyibua bua loso.” 55 “Lufu, ngobesha yobe i kunyi? Lufu munungi* obe wi kunyi?” 56 Munungi aufuisha lufu, mmuluisho, na bukome bua muluisho, Mmuiya.* 57 Anka atutumbula Efile Mukulu, muanda etukuasha bua kutshimuna ku bukuashi bua Nfumuetu Yesu Nkidishitu!

58 Biabia bakuetu ba kifulo, ikalayi banyingie, bash’abasanyishua, ikalayi nka na bibungi bia kukita mu mufubo* wa Muanana, baukie’shi mufubo wenu wi bukopo mu kuipushena na Muanana ta ngua bisumanga.

16 Binobino, pabitale lupungo bua beselele, nui balombene kulonda buludiki bunaadi mupe tukongie tua mu Ngalateya. 2 Muifuku dioso dia kumpala dia lubingo, oso a kuanudi atuule kantu ku lupese muyile mushindo wadi nao, bua’shi panfiki, takuikalanga lupungo. 3 Kadi pankafiki kuakua, nakatumu bantu banudi basangule mu mikanda yenu bua kutuala bia buntu bianudi batuushe na kalolo ku Yelusalema. 4 Biabia, su biamueneka’shi bibuwa bua’mi namu kuenda kuakua, nakende nabo pamune.

5 Anka nakafiki kuanudi ami bapu kukiila ku Maseduane, muanda nakakiila ku Maseduane; 6 na pangi nakashala sunga kukisha nenu kipungo kia mashika, bua’shi nuanshindikila muishinda kuakua kuankende. 7 Muanda tankumina kuinumona binobino penda mu lukilo, bu bia nkuete kukulupila bua kukisha nenu mafuku, su Yehowa akumiina. 8 Anka nashala muno mu Efeso mpa na ku Musangelo wa Mpentekote, 9 Muanda kiibi kikata akituala ku mufubo nkinshituilue, anka kui baluishi be bungi.

10 Binobino su Timote bafiki, kitayi bia’shi tatshinanga kintu su nkimune padi munkatshi muenu, muanda kuete kukita mufubo wa Yehowa nka bu’mi. 11 Biabia, muntu su ngumune tamubepulanga, kadi mutumeyi mu butaale bua’shi afikie kuandi, muanda nkuete kumutengiela pamune na bakuetu.

12 Binobino pabitale mukuetu Apolose, ne mukite muande moso bua’shi afikie kuanudi pamune na bakuetu. Kadi t’akuminanga kufika binobino, anka akafiki p’akapete nsaa.

13 Shalayi bapasukie, nyingayi mu lukumiino, kitayi mianda bu bana balume,* nuikale na bukome. 14 Kitayi mianda yoso na kifulo.

15 Biabia bakuetu, nenutekie bino: Anuuku’shi, Stefana na ba mu nshibo yaye nyi balongi ba kumpala ba mu Akayi, na’shi mbepaane mu kufubila beselele. 16 Tungunukayi dingi na kukookiela bantu be biabia, na boso abakuatshishena mufubo na abafubu bi bukopo. 17 Kadi ne na muloo wi bungi bua kuikala kua Stefana, Fortunatuse na Akayikuse pano, muanda mbalombashe mianda yanubadia kukita su nubadia kuikala pano. 18 Muanda mbanyingishe, benunyingisha mpa na’nue namu. Nyi buakinyi, ikalayi anuneemeka bantu be biabia.

19 Tukongie tua mu Azi atuinuimuna. Akila na Priska mpa na kakongie akebungilaa mu nshibo muabo, abenuseme na muloo oso mu Muanana. 20 Bakuetu boso abenuimuna. Eyimusheneyi na muloo.*

21 Luno nduimuno luande’mi Mpoolo, lua kuiyasa diande’mi nabene.

22 Su kui muntu kampanda shi mufule Muanana, edibue mulua. Nfumuetu, fika! 23 Kalolo ka Nfumuetu Yesu kekale nenu. 24 Kifulo kiande kikale kui oso a kuanudi, mu buumune na Nkidishitu Yesu.