MUKANDA WA KUMPALA KUI BENA TESALONIKE

1 Ami Mpoolo na Silvanuse* na Timote, kui kakongie ka bena Tesalonike ke mu buumune n’Efile Mukulu Yaya na Muanana Yesu Nkidishitu:

Kalolo na butaale bikale nenu.

2 Tukuete kutumbula Efile Mukulu misango yoso p’atuinutemuna anue boso mu nteko yetu, 3 muanda atutungunuka na kutentekiesha mufubo* wenu wa lulamato, na mufubo wenu wibukopo wa kifulo na kunyingiila kuenu pa muanda wa lukulupilo luenu mui Nfumuetu Yesu Nkidishitu, kumpala ku’Efile Mukulu etu muikale Nshetu. 4 Muanda bakuetu bafudibue n’Efile Mukulu, atuukushi muinusangule, 5 muanda mukandu wibuwa watulungula tangufikie kuanudi nka penda bu muisambo, anka ubafikile na bukome na kikudi kiselele na kushinkamisha koso, nka bu bianuuku mushindo ubaatudi munkatshi muenu bua buwa buenu. 6 Na nubaadi betuambule na nuambula Muanana, bu bibaanudi bakumiine eyi munkatshi mua bitompuanga bibungi na muloo wa kikudi kiselele, 7 biabia nubafikile bu kileshesho kui bena kukumiina boso be mu Maseduane na mu Akayi.

8 Kushi penda muanda wa’shi nubaadi bapalakashe eyi dia Yehowa mu Maseduane na mu Akayi, anka muanda wa lukumiino luenu mui Efile Mukulu ngupalakane mu ma mbalo oso biatushi na mushindo’nyi wa kuakula kintu su nkimune. 9 Muanda abo banabene abatungunuka na kuakula pabitale biabaatudi bemonene nenu bua musango wa kumpala na bibaanudi balekie ma nkishi enu nuenda kui Efile Mukulu bua kufuba bu ba mpika b’Efile Mukulu e na muwa na a binyibinyi, 10 na bua kutengiela Muana’aye afiki muiyilu, abaadi mubuushe ku lufu, Yesu etupaasha ku nsungu ayifiki.

2 Bakuetu, anuuku anue banabene’shi kufika kuetu mu kuinutala, ta nkukutue bipeta nya. 2 Muanda sunga biekala’shi tubaadi bakiengie bua musango wa kumpala na babaadi betukitshine mianda kushi kanemo ku Fidipe, nka bu bianuuku, tubaadi bashale banyingie ku bukuashi bu’Efile Mukulu eetu bua kuinulungula mukandu wibuwa w’Efile Mukulu munkatshi mua kubinguabingua* kukata. 3 Muanda elango dibaatudi benupe tadibaadi bu kilema akikatukila ku mianda i butete sunga ku madimi, 4 kadi nka bu bibaatudi bakuminyibue n’Efile Mukulu p’aye kuitupa mukandu wibuwa, nyi biatuakula kushi bua kusankisha bantu kadi bua kusankisha Efile Mukulu, aye atalulaa mashimba eetu.

5 Muanda anuku’shi kasha tatui bafubishe ngakuilo a bulamalama sunga a kuilesha biatushi na luabi; Efile Mukulu nyi nkamonyi ka uno muanda! 6 Tatubaadi sunga bakimbe ntumbo ayikatukila kui bantu, biabikala kuanudi sunga kui bangi, sunga mbiatubadia kuikala bu bushito bukata kuanudi bu biatudi batumibua ba Nkidishitu. 7 Anka tubafikile na kalolo munkatshi muenu, nka bu nyina bana aomesha bana baye na ebapasukila na kifulo kioso. 8 Biabia bu bibaatudi benufule ngofu, tubatshile kitshibilo kushi penda kia kuinulungula mukandu wibuwa w’Efile Mukulu, kadi mpa na kuinupa* miuwa yetu, muanda tubaadi na kifulo kikata kuanudi.

9 Bakuetu, anutentekiesha kalolo kuitatshisha kuetu na mufubo wetu wi bukopo. Patubaadi atuinulungula mukandu wibuwa w’Efile Mukulu tubaadi abafubu bufuku na kanya bua kupela kusemusha muntu su ngumune a kuanudi bushito buetu. 10 Anue banabene nui tumonyi, n’Efile Mukulu namu nkamonyi ka bibaatudi baleshe lulamato luetu pa kuinukitshina mianda na kululama kushi matope anue bena kukumiina. 11 Anuuku kalolo’shi tubaadi nka atuinukankamika na kuinusamba na atutusha elango kui oso a kuanudi, nka bu abikalaa nshe bana akitshina bana baye mianda, 12 bua’shi nutungunukie na kutambuka mu mushindo aukumina Efile Mukulu aye muinuitanyine mu Bufumu na mu ntumbo yaye.

13 Nyi buakinyi atue namu tukuete kutumbula Efile Mukulu kushi kukooka, muanda pabaanupetele eyi di’Efile Mukulu dibanupushiishe kuatudi, nubaadi bedikumiine kushi bu eyi dia bantu, kadi nka bu biadidi binyibinyi bu eyi di’Efile Mukulu, adio dikuete kufuba dingi muanudi anue bena kukumiina. 14 Muanda anue bakuetu, nui bambule tukongie tu’Efile Mukulu tui mu buumune na Nkidishitu Yesu tui mu Yudeya, muanda nubaadi bakiengeshibue ku maasa a bantu ba muiumbo dienu na mianda i mumune na yabakuete kuibakiengesha nayo kui bena Yunda, 15 babaadi mpa na bayipee Muanana Yesu na batemuki na babaadi betukiengieshe. Dingi tabakuete kusankisha Efile Mukulu na, mbeshikuanyi ba buwa bua bantu boso, 16 muanda tabakumiina’shi tulungule bantu ba ingi miilo mukandu ulombene kuibapaasha. P’abakitshi bino, bakuete kunyisha kufiimisha miluisho yabo. Kadi nfudiilo a bioso, nsungu y’Efile Mukulu ayikafiki kuabadi.

17 Kadi bakuetu, pabaabadi betukatushe kuanudi penda bua kapindi kapeela (ku mbidi kushi mu mashimba muetu), tubaadi bakite muetu moso bua kuimonena mpala na mpala muanda tubaadi nenu lukalo lukata. 18 Nyi buakinyi tubaadi bakimbe kufika kuanudi na, ami Mpoolo, naadi mukimbe kufika kuanudi kushi penda musango umune kadi misango ibidi; anka Satana baadi muitushikile eshinda. 19 Muanda, nkinyi kikale bu lukulupilo luetu, muloo wetu, sunga kifulu kia ntumbo kumpala kua Nfumuetu Yesu mu kipungo kia kuikala kuaye? Mu binyibinyi ta nnanue su? 20 Oolo, nui bekale binyibinyi ntumbo yetu na muloo wetu.

3 Biabia, bu biatushibaadi dingi na mushindo wa kutengiela, tubamuene’shi mbikile buwa bua kushala bupenka mu Atene; 2 Na tubaadi batume mukuetu Timote, mufubi* a Efile Mukulu bua mukandu wibuwa pabitale Nkidishitu, bua’shi enunyingishe na kuinukankamika pabitale lukumiino luenu, 3 bua’shi muntu su ngumune tasanyishuanga na bino bitompuanga. Muanda anue banabene anuuku’shi tatui balombene kusuuka aa makienga e biabia. 4 Muanda pabaatudi nenu, tubaadi nka atuinudimusha kumpala’shi, atukafumankana na kubinguabingua, na nyi bibaadi bikitshikie nka bu bianuwuku. 5 Nyi buakinyi bu bianshinaadi dingi na mushindo wa kutengiela, natumine muntu kuanudi buandia kuuka bi lulamato luenu, buashi tala yawa Atompanaa, ekala muinutompe mu kipaso kampanda na kuitatshisha kuetu kuenda mu bisumanga.

6 Kadi Timote mmukatukie kuakua kuanudi afika kuatudi nka binobino na, muitulungule mukandu wibuwa pabitale lulamato na kifulo kienu na’shi nukuete kutungunuka na kuitutentekiesha na bianudi na lukalo luibukopo lua kuitumona nka bu biatudi namu nalo. 7 Nyi buakinyi bakuetu, mu tuinyongoshi, na mu bitompuanga bietu bioso, tubaadi banyingishibue pa muanda wenu na pa muanda wa lulamato luanukuete kulesha. 8 Muanda tukuete kupetuula bukome* su nukuete kunyingiila mu Muanana. 9 Muanda mbikunyi biatudia kulesha lutumbu luetu kui Efile Mukulu pa muanda wenu, bua muloo ukata watukuete kupusha kumpala ku’Efile Mukulu etu pa muanda wenu? 10 Tukuete kuiyaya n’eshimba dimune bufuku na kanya su tui balombene kuinumona mpala na mpala, na kuinupa kiakia kianudi bakutue bua kunyingisha lukumiino luenu.

11 Biabia atutekie Efile Mukulu etu nabene muikale Nshetu, na Nfumuetu Yesu buabadia kuitupa mushindo wa kufika kuanudi. 12 Dingi Muanana atamishe na kufiimisha, kifulo kianudi nakio ku muntu na muntu na bua bantu boso, nka bu biatudi nakio buenu, 13 bua’shi anyingishe mashimba enu, nuikale bashi matope mu buiselele kumpala ku’Efile Mukulu etu na Nshetu mu kipungo kia kuikala kuanka kua Nfumuetu Yesu na beselele baye boso.

4 Nfudiilo a bioso bakuetu, anka bu bibaanudi bapete mayi a kulonda kuatudi, pabitale mushindo wanudia kutambuka bua kusankisha Efile Mukulu, nka bu bianukuete kutambuka, atuinutekie na kuinusendeela muishina dia Muanana Yesu bua kutungunuka na kunyisha kuibikita. 2 Muanda anuuku mayi a kulonda* abaatudi benupe ku bukuashi bua Muanana Yesu.

3 Muanda kikiebe ki’eshimba di’Efile Mukulu kii’shi, nuikale beselele na nuilame ku lukiebanokiebano.* 4 Abitungu oso a kuanudi awukie bia kulama* mbidi yaye mu buiselele na kinemo, 5 kushi na lukalo lukile bukopo lua kuilaalena, bu bikuete kukita miilo ishi’aiuku Efile Mukulu. 6 T’abitungu muntu su ngumune asambukie mikalo na kuluishisha mukuabo mu uno muanda, muanda Yehowa anyoko bantu bua ino mianda yoso nka bu bibaatudi babadiile kuinulungula na benudimushe. 7 Muanda Efile Mukulu tabaadi muituitanyine bua mianda ibutete, anka baadi muituitanyine bua kuikala beselele. 8 Biabia, muntu shakookiela ino mianda, ta mmuntu aapele kukookiela nya, anka apele kukookiela Efile Mukulu, aye enupa kikudi kiaye kiselele.

9 Anka pabitale kifulo kia bu bana na bana, tanui na lukalo lua’shi tuinufundile, muanda anue banabene nui balongieshibue n’Efile Mukulu bua kuifulena ku muntu na muntu. 10 Eyendo, nyi bianukuete kukitshiina bakuetu boso be mu Maseduane mushima. Kadi bakuetu, atuinusendeela bua kutungunuka na kunyisha kuibikita. 11 Kitayi muenu moso bua kuikala mu kufukama na kuipaana ku mianda yenu’nue banabene na kufuba na maasa enu, nka bu bibaatudi benulungule, 12 bua’shi numone bia kutambuka mu mushindo wibuwa kumpala kua bantu be paasha pa kakongie, na bua’shi tanuikalanga na lukalo lua kintu su nkimune.

13 Dingi bakuetu, t’atukumina’shi nuikale bakutue kuuka pabitale baaba balaale mu lufu, bua’shi tanuikalanga na kinyongua bu bi bangi bantu bashi na lukulupilo. 14 Muanda su tui na lukumiino lua’shi Yesu bafuile na aye nkusanguka, atukumina dingi’shi Efile Mukulu akasangula baaba babaafuile mu buumune na Yesu bua kuikala naye.* 15 Muanda atuinulungula ku bukuashi bu’eyi dia Yehowa’shi, atue be na muwa abekala kuanka mpa na mu kipungo kia kuikala kuanka kua Muanana, t’atukabadiila kumpala kua baaba balaale tulo mu lufu; mu mushindo su ngumune 16 muanda Muanana nabene akayiki muiyilu na musaase wa kutuma eyi, n’eyi dia mukata a mikeyilu na mpungi y’Efile Mukulu, na bantu babaadi bafue mu buumune na Nkidishitu abakasanguka kumpala. 17 Kunyima atue be na muwa babashaala, atukatuadibua mu makumbi pamune nabo bua kufumankana na Muanana mu lupunga; paapa atukekala na Muanana mafuku oso. 18 Biabia tungunukayi na kuinyingishena na ano mayi.

5 Binobino bakuetu, pabitale nsaa na bipungo, tanui na lukalo lua’shi benufundile kintu su nkimune. 2 Muanda anue banabene anuuku kalolo’shi efuku dia Yehowa adifiki nka bu abifikaa ngifi bufuku. 3 P’abakaakula’shi, “Butaale na kuiyikela!” Paapa kabutu ka kimpulunkamba akebafuila musango umune, nka bu mitanyo ayipushaa mukashi e n’eyimi pa kutanda na t’abakapanda mu mushindo su ngumune. 4 Anka anue bakuetu, tanui mu mufito, mu kipaso kia’shi diadia efuku dienushikisha nka bu biadidi dilombene kushikisha ba ngifi, 5 muanda anue boso nui bana b’etaata na bana b’efuku. Biabia tatui ba bufuku sunga ba mufito nya.

6 Nyi buakinyi tatulalanga bu abilalaa bangi, anka tushaleyi bapasukie na tulame binangu bietu. 7 Muanda baaba abalalaa, abalalaa bufuku, na baaba abakoluaa abakoluaa bufuku. 8 Anka, bu biatudi bana b’efuku, tulameyi binangu bietu, na tufuale ngabo ya pa kiadi ya lukumiino na kifulo, na tufuale lukulupilo lua kipandilo bu kifulu 9 muanda Efile Mukulu baadi muitusangule, kushi bua nsungu anka bua kupaashibua ku bukuashi bua Nfumuetu Yesu Nkidishitu. 10 Baadi muitufuile bua’shi, biatuikala bapasukie sunga balale,* tuikale na muwa naye pamune. 11 Biabia tungunukayi na kuikankamishena na kuinyingishena, nka bu bianukuete kukita.

12 Binobino bakuetu, atuinutekie bua’shi nunemekie bantu bakuete kukita mufubo* wibukopo munkatshi muenu, na abenukunkusha mu Muanana, na abenudimusha; 13 na kuibaata na muulo ukata mu kifulo pa muanda wa mufubo wabakuete kukita. Ikalayi mu butaale munkatshi muenu. 14 Dingi bakuetu, atuinutekie bua kudimusha baaba be na kafutakanyi, nuakule na bishima bia kalolo bua kusamba baaba benyongole,* kuashayi babofule, nuikale na luishinko kui bantu boso. 15 nukite bia’shi muntu t’aaluishanga mukuabo bubi ku bubi, anka misango yoso ikalayi anukimbi bua kuikitshishena bibuwa mpa na kukitshina bangi bantu boso bibuwa.

16 Ikalayi na muloo nsaa yoso. 17 Tekayi kushi kukooka. 18 Ikalayi anutumbula bua bintu bioso. Bino nyi abikumina Efile Mukulu buenu mu buumune na Nkidishitu Yesu. 19 Tanushimanga kaalo ka kikudi. 20 Tanubepuulanga mayi a butemuki. 21 Taluulayi mianda yoso; nushale balamate ku yaaya ibuwa. 22 Nuilame ku mianda ibubi ya mishindo yoso.

23 Efile Mukulu a butaale aye nabene, enuikashe ba kishila mu mianda yoso. Bakuetu, binangu bienu, miuwa yenu na mbidi yenu bikale bishi kato mu mianda yoso, bilamibue kushi matope mpa na mu kipungo kia kuikala kuanka kua Nfumuetu Yesu Nkidishitu. 24 Yawa enuitanyina e na lulamato na, akakitshi nka biabia binyibinyi.

25 Bakuetu, tungunukayi na kuteka pa muanda wetu.

26 Semayi bakuetu boso na muloo.*

27 Nenutekie muishina dia Muanana bua’shi nubadikile bakuetu boso uno mukanda.

28 Kalolo ka Nfumuetu Yesu Nkidishitu kekale nenu.