MUKANDA WA KABIDI WA MPIELE

1 Ami Simone Mpiele mpika na mutumibua a Yesu Nkidishitu kui baaba bapete lukumiino luibuwa nka bu luatudi nalo,* ku bukuashi bua kululama ku’Efile Mukulu etu na Mupaashi Yesu Nkidishitu:

2 Kalolo na butaale bifiime kuanudi ku bukuashi bua kiukilo kia binyibinyi ki’Efile Mukulu, na kia Yesu Nfumuetu, 3 muanda bukome buaye bua bu Efile, mbuitupe bintu bioso abikuasha bua kuikala na muwa, na kulamata Efile Mukulu ku bukuashi bua kiukilo kia binyibinyi kia Yawa baadi muituitamine ku ntumbo yaye na bikitshino biaye bibuwa. 4 Kukiila ku ino mianda, mmuitupe milayilo ibuwa na ikile bukata bua’shi ku bukuashi buayo, nupete ngikashi y’Efile Mukulu bu bianudi bapue kupaashibua ku kunyanga kua pa nsenga akutuukila ku lukalo luibubi.

5 Nyi buakinyi kitayi muenu moso bua kukumbasha ku lukumiino luenu, bikitshino bibuwa, na ku bikitshino bienu bibuwa, kiukilo, 6 ku kiukilo kienu, kuikanda, ku kuikanda, kunyingiila, ku kunyingiila kuenu, kulamata kui Efile Mukulu, 7 ku kulamata kuenu kui Efile Mukulu, kifulo kia bu bana na bana, na ku kifulo kia bu bana na bana, kifulo. 8 Muanda su ino mianda i munda muenu na ngiule muanka, ayikenukutshisha bua kuikala bu bantu bash’abakitshi mufubo na bash’abapa bikuba pabitale kiukilo kia binyibinyi kia Nfumuetu Yesu Nkidishitu.

9 Muanda su muntu te na ino mianda, mpofu, mupuute meso aaye bua kupela kumona etaata,* na alubu biadi mutooshibue ku miluisho yaye ya kala. 10 Biabia bakuetu, kitayi muenu moso bua kushinkamisha kuitaminyibua na kusangudibua kuenu, muanda su anutungunuka na kukita ino mianda, t’anukapono su nkapeela. 11 Biabia mu uno mushindo nyi muabakenufunguila na kalolo koso bua kutuela mu Bufumu bua loso bua Nfumuetu na Mupaashi Yesu Nkidishitu.

12 Nyi buakinyi nakumina kuinutentekiesha misango yoso ino mianda sunga biekala’shi anuiyiwuku na bashimate mu bia binyibinyi bi muanudi. 13 Anka namono’shi mbikile buwa pankii mu uno tabernakele,* bua kuinunyingisha na kuinutentekiesha, 14 nka bu bianguuku’shi tabadi pa kukatusha uno tabernakele ande, nka bu bibaadi dingi Muanana Yesu Nkidishitu muibindeeshe patooka. 15 Natungunuka na kukita muande moso bua’shi kunyima kua’mi baapu kuenda, nuikale bakumbane bua kutentekiesha ino mianda anue banabene.

16 Muanda ta mmu kulonda kua mianda ya madimi yabadi bapuandikishe kui bantu, kubaatudi benuukishe bukome na kuikala kua Nfumuetu Yesu Nkidishitu nya, anka tubaadi bemuene’tue banabene ntumbo yaye ikata. 17 Muanda baadi mupete ntumbo na kinemo kui Efile Mukulu Yaya, pabaabamulunguile ano mayi ku bukuashi bua ntumbo ikata’shi: “Uno nyi Muana ande andi mufule na andi mukumiine’mi nabene.” 18 Eyendo, tubaadi bapushe ano mayi aakatukila muiyilu, pabaatudi naye ku muengie wa kishila.

19 Biabia tui na eyi dia butemuki diabadi bashinkamishe kalolo, na anukitshi bibuwa pa kutuula binangu kuanka nka bu kuilampi dikuete kumunyika mu mufito (mpa na apabanga efuku na apeboo luenyenyi lua kunamashika) mu mashimba enu. 20 Muanda kia kumpala anuuku’shi takui butemuki su mbumune bua mu Bifundue abutuukilaa ku binangu bia muntu. 21 Muanda butemuki ta mbufikie ku kikiebe ki’eshimba dia muntu musango su ngumune, anka bantu babaakuile mianda ayifiki kui Efile Mukulu bu bibaabadi abakunkushibua na kikudi kiselele.

2 Aku namu, kubaadi batemuki ba madimi munkatshi mua muilo, mu mushindo umune akuikala dingi balambukishi ba madimi munkatshi muenu. Baaba bantu abakatuesha tusakatusaka atukaluisha lukumiino luenu, abakatunu mpa na nfumuabo baadi muibawule, na bino abikebatuadila kabutu ka mu kimpulunkamba. 2 Dingi, bantu bebungi abakalondo muikelo wabo wi buufu,* na pa muanda wabo, bangi bantu abakaakula bibubi pabitale eshinda dia bia binyibinyi. 3 Dingi, mu luabi luabo abakenudiila bintu pa kuinulungula mayi a madimi. Anka kiimu kiabo kiabadi bapue kuibatshibila kubanga kala, t’akiisha nya, na kabutu kaabo akakafiki binyibinyi.

4 Mu binyibinyi Efile Mukulu tabaadi muikande bua kunyoka mikeyilu ibakitshine miluisho, anka baadi muibasumbule mu Tartare,* na nkuibanya nkano* mu mufito wibukopo muabadi balamibue bua kutengiela kiimu. 5 Na tabaadi muikande bua kunyoka nsenga ya kala, anka baadi mupaashe Nowa mulungudi a kululama, na bangi bantu musambobidi pabaadi munokieshe mpeshi a kabutu pa nsenga pabaadi bantu bash’abanemeka Efile Mukulu. 6 Na paaye kuikasha kibundi kia Sodome na Gomore bu buto, baadi muibanyokie aye nkutuusha kileshesho bua bantu bash’abanemeka Efile Mukulu bua mianda ayikafiki kumpala. 7 Na baadi mupaashe Lota muntu mululame baadi enyongola bikata bua muikelo wi buufu wa bantu bash’abanemeka miiya— 8 muanda efuku dioso yawa muntu mululame baadi akiengiesha anyima aaye bikata pabaadi amono na kupusha mianda ibubi pabaadi mushale munkatshi muabo. 9 Biabia, Yehowa awuku biadia kukaluila bantu bamulamate mu kutompibua, kadi alama bantu bashi balulame buabadia kubutudibua muifuku dia kiimu, 10 bikishekishe baaba bakuete kukimba kuluisha mbidi ya bangi na baaba bakuete kubepuula ba sha matalua.

Ba sha kapeesha na be na mutue wibukopo, tabatshinyi kuakula bibubi pabitale baaba be na matalua, 11 aku namu mikeyilu, sunga biekala’shi i na matalua na bukome buibungi, t’ayitopekaa baaba balambukishi ba madimi sunga kuibakula bibubi muanda wa kanemo kayidi nako bua Yehowa. 12 Kadi bano bantu nka bu nyema ikutue binangu, itandikue penda bua kukuatshibua na kuipayibua, abaakula bibubi pabitale mianda yabash’abauku, na abakabutudibua pa muanda wa muikelo wabo wibubi, 13 abakapete dikienga bu efuto diabo bua muikelo wabo wibubi.

Abamono kulombasha nkalo ya mbidi yabo sunga mu kanya bu muanda wa muloo. Baaba bantu mbekale bu mabashi na bu bilema, munkatshi muenu pabakuete kuipaana* ku malongiesha aabo a madimi na kukita misangelo nenu pamune. 14 Meso aabo ngaule na lusandi na taobesha kuleka kukita miluisho na, bakuete kupambusha bantu bashi bashimate. Mashimba aabo, ngepaane ku luabi. Nyi mbana bedibue mulua. 15 Mbalekie eshinda dilulame abo nkupambuka. Mbalonde eshinda dia Balame muana a Beore, baadi mufule efuto dibaabadi abamupa bua kukita bibubi, 16 anka baadi musaashilue bua kilubilo kiaye. Mpunda sh’akulaa besambile n’eyi dia muntu, na aye nkukutshishua bikitshino bibubi bia mutemuki.

17 Bano bantu be bu bitonko* bishi na mema, na bu makumbi abapapula kui kipapi, na Efile Mukulu mmuibalumbuluile mufito wibukopo. 18 Abakitshi miisambo ikata ishi na kiayo. Na kukiila ku nkalo ya mbidi na ku muikelo wi buufu,* abakaka bantu baki’abakatuka mu kusuuka baaba be na nshalelo ebubi. 19 Abebalaa bulungantu aku abo banabene be ku bupika bua kunyanga; muanda yawa oso abadi batshimune kui muntu, nyi mpika aaye.* 20 Biabia su kunyima kua kupanda ku mianda ibutete ya pa nsenga, ku bukuashi bua kiukilo kia binyibinyi kia Nfumuetu na Mupaashi etu Yesu Nkidishitu, batuelakana dingi mu ino mianda na y’ebatshimuna, nshalelo aabo akekala bubi kukila a kumpala. 21 Bibadia kuikala buwa buabo su tababaadi bapete kiukilo kia bia binyibinyi ki’eshinda dia kululama pamutue pa’shi kunyima kua’bo kuikipeta, abakutua kulonda miiya iselele ibaabadi bapete. 22 Abiakula luno lukindi lua binyibinyi bibaadi bibalombene: “Mbua balukiila ku biadi mulase aye nabene, na ngulube abadi bapue kutumpa mema, balukiila mu kuifundakasha mu matekie.”

3 Bakuetu ba kifulo, uno nyi mmukanda wa kabidi wanenufundila, nka bu mu mukanda wande wa kumpala, nenunyingisha buanudia kuikala na binangu bibuwa, pabitale mianda yanenutentekiesha, 2 bua’shi nutentekieshe mayi abaabapuile kuakula kala* kui batemuki ba kishila na muiya wa Muanana na Mupaashi eetu ku bukuashi bua batumibua benu. 3 Kumpala kua bioso ukayi’shi, mu mafuku a ku nfudiilo akukekala bantu abasepanaa abakafiki na tusepo tuabo, na abakitshi bino muyile nkalo yabo 4 na kuamba’shi: “A kuikala kuanka kuaye kubaabadi balee kuikunyi? Muanda kubanga mu mafuku abaadi ba mashetu kulu balaale mu lufu, mianda yoso ayitungunuka na kuikala nka bu biayibaadi kubanga ku kipangilo kia bintu.”

5 Muanda abapele kukumiina mu’bo banabene uno muanda’shi, kala kubaadi eyilu na nsenga bibaadi bishimatshiile kunundu kua mema na munkatshi mua mema ku bukuashi bu’eyi di’Efile Mukulu; 6 na’shi ku bukuashi buabio, nsenga ya aa mafuku, ibaadi ibutudibue p’ayo kuiyina mu mema. 7 Anka ku bukuashi bua diadia eyi dimune, eyilu na nsenga bi kuanka binobino, mbilamibue bua kaalo, na mbilamibue mpa na muifuku dia kiimu na dia kabutu ka bantu bash’abatshinyi Efile Mukulu.

8 Biabia bakuetu ba kifulo, tanulubanga’shi efuku dimune kumpala kua Yehowa di nka bu bipua kinunu, na bipua kinunu bi nka bu efuku dimune. 9 Yehowa te na lulengu bua kulombasha mulayilo waye bu abimono bangi bantu bu lulengu, anka e na luishinko kuanudi muanda t’akumiina’shi muntu su ngumune abutudibue, anka akumiina’shi bantu boso belangie ku mashimba. 10 Kadi efuku dia Yehowa adikafiki nka bu ngifi, na mu diadia efuku, eyilu adikakidi na mukungulo ukata, kadi bintu bi muanka abikaoko kaalo ke bukopo na, abikasunguluka, na nsenga na bintu bi panka, abikaleshibua patooka.

11 Bu bikale’shi bino bintu bioso abikasunguluka mu uno mushindo, nangushenayi’shi abitungu nuikale bantu ba mushindo kinyi, bantu be na muikelo wiselele, na bikitshino bia kulamata Efile Mukulu, 12 p’anutengiela na kutuula mu binangu kuikala kuanka ku’efuku dia Yehowa, mu diadia efuku eyilu adikabutudibua mu ndimi ya kaalo na bintu bi muanka abikasunguluka na kaalo kebukopo! 13 Anka muyile mulayilo waye, atutengiela eyilu dipia na nsenga ipia, na muanka amukekala kululama.

14 Biabia bakuetu ba kifulo, bu bianukuete kutengiela ino mianda, kitayi muenu moso bua’shi nfudiilo a bioso enusangane kushi kato bashi matope na mu butaale. 15 Dingi ikalayi anumono luishinko lua Nfumuetu bu kipandilo, nka bu bibaadi mukuetu a kifulo Mpoolo muinufundile namu muyile binangu bibaabamupele, 16 aakula pabitale ino mianda nka bu biakitshi mu mikanda yaye yoso. Anka ingi mianda i mu mikanda yaye i bukopo kupusha, na bantu bashi na kiukilo* na bashi bashimate, abaluisha mpushisho a ino mianda nka bu biabakitshi dingi na bingi Bifundue bioso, na bino abikebafuishila kabutu.

17 Biabia anue bakuetu ba kifulo, bu bianudi bapue kuuka ino mianda kumpala, elameyi tala benupambusha pamune nabo mu kilubilo kia bantu bash’abakookiela muiya na nuakutua kushala banyingie. 18 Anka, tungunukayi na kutama mu kalolo na mu kiukilo kia Nfumuetu na Mupaashi Yesu Nkidishitu. Ntumbo ikale kuadi kubanga binobino mpa na bua loso. Amene.