Mwanda wa 12
Musungo wa Babele
BIPWA bibungi bibaadi bikile. Baana ba Nowa abaadi batande baana bebungi. Baana babo namu abakudile abo nkutanda babo baana bebungi. Mu mafuku apela bantu abafiimine pa nsenga.
Umune a ku baba bantu babamwitaminanga bu Nimerode, kekulu ka Nowa. Baadi muntu ebubi baadi mpibwe bayipanga bantu na nyema. Nimerode baadi mwituule bu nfumu a bantu booso. Efile Mukulu tabaadi mufule Nimerode nya.
Bantu booso ba mu aa mafuku abaadi abesamba ludimi lumune. Nimerode baadi na lukalo lwa kwibalama booso bwashi ekale nfumu aabo. Ouku kibakitshine su? Balungwile bantu bwashi bayibakye lupata lukata na musungo ula mwanka. Tala mushindo wabakwete kukita matafwadi mu kifwatulo.
Yehowa Efile Mukulu tabaadi mukumiine shi bebakye byabya nya. Efile Mukulu baadi na lukalo lwashi bantu bapalakane bwa kushaala pa nsenga ishima. Bantu abambile shi: ‘Fikayi! Twibakye lupata lwibula na musungo wi na nsongo aikumu eyilu. Bwashi tupete nkumo!’ Bantu abaadi abakimbi ntumbo yaabo abo banabeene, pamutwe pa kutumbisha Efile Mukulu.
Efile Mukulu bayimikile bantu abaadi abayibaka musungo. Ouku mushindo ubaadi mwibikite su? Bashintulwile ndimi ya bantu booso, pa mutwe pa kwakula ludimi lumune. Bantu abaadi abayibaka tababaadi abepushena dingi nya. Nyi bwakinyi abetamina lupata lwabo bu Babele, sunga bu Babilone, abilesha “Kafutakanyi.”
Bantu ababangile kukatuka mu Babele. Kisaka kya bantu abaadi abesamba ludimi lumune kibayile mu kushaala pa bwakyo mu bingi bipindji bya nsenga.