Mwanda wa 19

Yaakobo taadi na kifuko kikata

BANDA kutala kino kifuko kikata. Bano mbaana balume 12 ba Yaakobo. E na dingi baana bakashi. Ouku eshina dya umune aku baana baaye su? Tubande kulonga bangi ba kwabadi.

Lea batandile Rubene, Simeone, Leevi na Yuuda. Rashele baadi mwinyongole bikata nsaa ibamwene shi takwete kutanda. Aye nkupa Yaakobo mufubi aaye mukashi abetanyina bu Bila. Bila batandile baana balume babidi babetamina shi Dane na Neftalii. Akupu Lea bapele Yaakobo Zilpa mufubi aaye mukashi aye nkutanda Gade na Ashere. Lea batandile dingi bana balume babidi Isakare na Zabulone.

Kunyima, Rashele batandile mwana. Bamupele eshina bu Yoosefe. Atukyebe kulonga ingi myanda pabitale Yoosefe, mwanda baadi mufikye muntu mukile bukata. Bano nyi mbaana balume 11 babatandile Yaakobo pabaadi mushale na Labane nshaaye na Rashele.

Yaakobo baadi dingi na bangi baana bakashi, kadi mu Bible mbatemune eshina dya penda umune a kwabadi. Eshina dyaye dibaadi bu Dina.

Nsaa ibalombeene bwashi Yaakobo akatukye kwa Labane bwa kwalukila mu Kanaana. Aye nkubunga kifuko kyaye kikata na loombe lwaye lukata lwa mikooko na ngombe, abo nkubanga lwendo lula.

Kunyima kwa Yaakobo na kifuko kyaye kwaluka mu Kanaana, Rashele batandile ungi mwana mulume. Bibaadi bikitshikye nsaa ibabadi mwishinda. Rashele bakyengyele ngofu, aye nkufwa pa kutanda. Kadi mwana tooka baadi bibuwa. Yaakobo bamupele eshina bu Benyamine.

Abitungu tulamiine mashina a baana balume 12 ba Yaakobo mwanda mwilo ooso wa Isaleele ngutukile kwabadi. Na dingi mashina a bisaamba 12 bya Isaleele aafiki ku mashina a baana balume 10 ba Yaakobo na a baana balume babidi ba Yoosefe. Isaake bafwile bipwa bibungi kunyima kwa kutandikwa kwa bano baana booso na abimweneka shi baadi na muloo wa kumona beekulu bebungi bino. Kadi tubande kutala kibaadi kifwile Dina, mwikulu aaye mukashi.

Kibangilo 29:32-35; 30:1-26; 35:16-19; 37:35.